திருமால் திருப்புகழ் (89)
கிரேசி மோகன்
கண்ணன் திருப்புகழ்(வெண்பா)….
————————————————————
’’கண்ணன் அந்தாதி’’
————————————
Keshav
முந்திவந்து வாய்நிறைய மண்ணினை உண்டபின்,
அந்தநாள் அன்னை அனுபவித்த, -விந்தையைக்,
காட்டுவாயா நீயெனக்கு, மாட்டிடையா நானுக்கு,
ஊட்டிடுவேன் வெண்ணை உவந்து….(51)
உவந்தன்று பூதனை, ஊட்டிய நஞ்சைக்,
குவிந்த இதழால் குடித்தோய், -இவன்தன்,
இதய விஷத்தை, இறக்கி அதனுள்,
புதிய அமுதாய்ப் புகு….(52)
புகுந்தன்று, பொய்கை படமெடுத்(த) ஐந்து
முகம்கொண்ட காளியன் மீது, -வெகுண்டெழுந்(து),
ஆடிய ஆட்டம், அதற்கீடாய் ஐம்புலன்கள்
ஆடா(து) அடங்கநீ, ஆடு….(53)
ஆடிப் பெருக்காகக், கூடிக் குளிக்கு(ம்)ஆயர்,
பாடி இளம்கோ பியர்கூறை, -வேடிக்கை
ஆகப் பறித்தவா, மோகத் திரைவிலக்கி,
யோகநிர்வா ணம்தா எனக்கு….(54)
”எனக்கவலைத் தந்தாய் மனக்கவலை தீரும்”
எனக்குசேலன் நட்புக்(கு) இளகும், -குணக்கடலே,
மாபாவச் செல்வம் மனதில் சுமக்கின்றேன்,
கோபாலா, கொள்ளைக்குக் காத்து….(55)
—————————————————————————————————————-
படங்களுக்கு நன்றி:
http://kamadenu.blogspot.in/2014_04_01_archive.html
