வெயிலின் ஜனநாயகம்

 

 

எஸ் வி வேணுகோபாலன்

4db55585-58f7-4be0-943e-c1e7e8d2b75a
வெயிலால் வெயிலுக்காக
வெயிலே நடத்துகிறது
கோடையின் ஆட்சியை

எந்த உடை அணிந்தாலும்
வெயில் போர்த்தி
வழியனுப்பி வைக்கிறது வீடு

எந்தப் பொருள் வாங்கப் போனாலும்
மறவாது
வெயில் வாங்கித் திரும்புகிறாள் இல்லத்தரசி

எங்கிருந்து புறப்பட்டு எங்கெங்கோ அலைந்து
எங்காவது நிறைவு செய்யப்படும்
எல்லாப் பயணங்களுக்கும்
இலவச பாதுகாப்பு அளிக்கிறது வெயில்

தனக்கு எதிராக
விரியும் குடைகளிடம்
மான அவமானம் எல்லாம் பாராது
வாய்க்கிற பகுதிக்கெல்லாம்
சூடு போட்டுக் கடமை ஆற்றுகிறது வெயில்

ஓட்டமாய்ப் பறக்கும் குழந்தையோடு
ஓடோடிச் சென்று
நழுவாது உடலைப் பற்றிக் கொள்ளும் வெயில்
விழுந்தாலும் ஏந்தி
விரைந்து நிமிர்த்தியும் கொடுக்கிறது

தகதகக்கும் சாலையில்
சேலைத் தலைப்பால் குழந்தைகளைத்
தற்காத்துக் கொண்டே தவித்தபடி செல்லும்
தாயின் பாதங்களை
முத்தமிட்டுக் கொண்டே போகிறது வெயில்

வறண்டு போகும் நாவிலும்
இடுங்கும் கண்களிலும்
பதுங்க இடம் கிடைக்காது
நடுங்கி நகரும் உடல்களிலும்
நனைந்து ஒட்டிக் கொள்ளும் மேலுடையிலும்
வாழ்வாங்கு வாழ்ந்து சிறக்கிறது வெயில்

செடி கொடிகளைக் களைந்து
மரங்களை அழித்து
நிழல்களைத் தொலைத்து
எழுப்பிய வளர்ச்சி மாநகரங்களை
உளமார வாழ்த்தி அருள்கிறது வெயில்

பெருமழை நாளில்
நனைந்தும் மிதந்தும் மூழ்கியும் போன நகரத்தைப்
பிழிந்து உலர்த்திக்
காயப் போட்டுக் கொண்டிருக்கிறது வெயில்

வெயிலை வரவேற்று
வெயிலின் முன்னிலையில்
வெயிலைக் கொண்டாடும்
வாய்ப்புக்கு நன்றி பாராட்டி
விடை பெறவைக்கிறது வெயில்

*****************

 

நன்றி : தீக்கதிர்

Share

About the Author

எஸ்,வி.வேணுகோபாலன்

has written 81 stories on this site.

என்னைப் பற்றி என்ன சொல்ல.... ஓர் எளிமையான வாசகர். உணர்ச்சி ஜீவி. தாம் இன்புறும் வாசிப்பை இதர வாசக உலகு இன்புற வைத்து அதன் பின்னூட்டம் கிடைக்கப் பெறாவிட்டாலும் நெகிழ்ச்சியுற தொடர்ந்து பகிர்ந்து கொள்ளத் துடிக்கும் ஓர் உணர்ச்சி ஜீவி. வங்கி ஊழியர். கவிதைகளில்தான் புறப்பட்டது எனது படைப்புலகமும். எழுதுவதை விடவும் வாசிப்பது, கேட்பது, பார்ப்பது, பகிர்வது பிடித்திருக்கிறது. ஆனாலும் எழுதுவதை விடாமல் பிடித்து வைத்திருக்கிறது இந்தக் கணினி எழுதுகோல். அற்புதமான போராளி எனது வாழ்க்கை இணை தோழர் ராஜேஸ்வரி. சுவாரசியமிக்க குழந்தைகளில் மூத்தவர் கட்டிடவியல் மூன்றாமாண்டு மாணவி. இளையவர் ஏழாம் வகுப்பில். இந்து, நந்தா இருவருக்குமே ஓவியம், கவிதை,பாடல்கள் ரசிப்பது மிகவும் பிடிக்கும். இந்து எழுதிய முதல் ஆங்கிலக் கவிதை அவள் நான்காம் வகுப்பில் இருக்கையில் ஹிந்து யங் வேர்ல்ட் இணைப்பில் இடம் பெற்றது. நந்தாவின் முதல் தமிழ் கவிதை அவன் மூன்றாம் வகுப்பில் இருக்கும்போது அவன் சொல்லச் சொல்ல நான் எழுதியது, துளிர் இதழில் வெளியானது. படைப்புலகம் இருக்கட்டும். அவர்களுக்கான நேரம் மறுக்கப்படும்போது அவர்கள் என்னை ஈவிரக்கமின்றித் தாக்கும்போது என்னைவிட அதிகம் காயம் சுமப்பது எனது எழுத்துக்கள்தான்....அது தான் என்னை எழுதவும் தூண்டுவது. என்னை மனிதனாகத் தகவும் அமைப்பது...

Write a Comment [மறுமொழி இடவும்]

Security Question: (* Solve this math to continue) *


Copyright © 2015 Vallamai Media Services . All rights reserved.
வல்லமை மின்னிதழில் வெளியாகும் ஆக்கங்கள், ஆக்கியவரின் தனிப்பட்ட கருத்துகளே; வல்லமையின் கருத்துகளாகக் கொள்ள வேண்டாம்.