“கட்டகழ கானதோர் கற்பனை ராஜ்ஜியம் கட்டி முடிந்ததடா”

2


விவேக்பாரதி

கவியரசு கண்ணதாசன் அவர்களது “கட்டகழ கானதோர் கற்பனை ராஜ்ஜியம் கட்டி முடிந்ததடா” என்கிற வண்ண மெட்டிற்கு திரு. கிரேஸி மோகன் எழுதச் சொல்லி நான் எழுதிய கவிதை.

 

கன்னங் கரிதெனத் தோன்றும் இரவினில்
…..கண்கள் விழித்திருப்பேன் – கவிப்
…..பண்கள் படித்திருப்பேன் ! அடி
கன்னி அழகினைக் காண அனுதினம்
…..காற்றில் அலைந்திருப்பேன் – அடர்க்
…..காட்டில் விழுந்திருப்பேன் !!

எந்தத் திசையிலும் எங்கெங்கு காணிலும்
…..உன்றன் திருமுகமே – எழில்
…..கொஞ்சும் கலைமுகமே ! நிதம்
சிந்தனை செய்கையில் கத்திக் கதறிடும்
…..ஆசையில் நெஞ்சமடி – சுகம்
…..ஆற்றிடப் பஞ்சமடி !

கண்ணுக்கு முன்னொரு மாயை தெரியுது
…..கைகளை நீட்டுகிறேன் ! – கனவின்
…..பொய்களைக் காட்டுகிறாய் ! அடி
பெண்மை இனத்தவர் காதல் மிகுத்திடும்
…..பெட்டை மயிலினமே – இசை
…..பெற்ற குயிலினமே

எத்தனை நாளின்னும் ஏற்க பிரிவினை ?
…..சொல்லடி கண்மணியே – எதிர்
…..நில்லடி பெண்ணழகே ! இதழ்
முத்தம் கொடுத்துயிர் மோட்சம் அடைந்திட
…..முல்லை மலர்ச்சரமே – ஒரு
…..சொல்லை உதிர்த்துவிடே !!!

பதிவாசிரியரைப் பற்றி

2 thoughts on ““கட்டகழ கானதோர் கற்பனை ராஜ்ஜியம் கட்டி முடிந்ததடா”

  1. அன்புவிவேக் பாரதி,
    உங்களின் இந்தக் கவிதை மிகவும் நன்றாக இருக்கிறது. மனத்துள் பாடிப் பார்த்தேன். இனிகிறது.

    “துள்ளும் அழகினைத் தூவும் கவிதையால்
    துன்பம் மறக்கடித்தாய் – மனத்
    தோட்டப் பழம்பறித்தாய் – ஒரு
    முள்ளும் மலர்ந்திட முத்தம் கொடுக்கிற
    முக்தன் நிலைகொடுத்தாய் -அதில்
    மூழ்கும் கலையளித்தாய் !”

    மீ.விசுவநாதன்
    15.07.2016

Leave a Reply

Your email address will not be published. Required fields are marked *