சிறு நெருப்பின் பெருந்துளி !

ஃபிடல் காஸ்ட்ரோ

unnamed
எஸ் வி வேணுகோபாலன்

கொடுங்கோலன் பாடிஸ்டாவை
உறக்கம் தொலைக்கச்செய்து
இறுதி மோதலில் வீழ்த்தவும் செய்தவனே

மனிதகுல விடுதலைக்கான வேலைகள்
கூடிக் கொண்டிருக்கவே செய்தது உனக்கு

உலகளாவிய புரட்சிகர இதயங்களுக்கு
நம்பிக்கைக் குருதி பாய்ச்சிக் கொண்டிருந்தாய்

ஏகாதிபத்தியத்தின் கனவுகளில் ஊடுருவிக்
கலகம் விளைவித்துக் கொண்டிருந்தாய்

உன் அடிச்சுவடுகளை அந்நாளில்
தொடர்ந்து வந்து கொண்டிருந்தவர்கள்
புரட்சி வேட்கை கொண்டோர் மட்டுமன்று
தீர்த்துக் கட்டத் துடித்த சதிகார சக்திகளும்தான் !

இளமையில் புகட்டப்பட்டிருந்த
விவிலியம்* விரவிய இலக்கிய மொழியில் (*விவிலியம் = பைபிள்)
மதங்களுக்கு அப்பாற்பட்ட தத்துவம் விரிந்தது

ஆயுதங்களற்ற வேளைகளிலும்
பேச்சுகளின் வீச்சில்
நடுங்கி ஓடின எதிர்ப்புரட்சிக் கும்பல்கள்

பொதுவுடைமையின் சாத்திய சாட்சியமாகிய
கியூப மண்ணில்
அடுத்தடுத்த தலைமுறை குழந்தைகள் கைகளிலும்
புரட்சியின் பூங்கொத்துகள்

சந்தைப் பொருளாதாரத்தின்
சத்தங்களுக்கு இடையே
நசுக்கப்பட்டுக் கொண்டிருக்கும் மனித உணர்வுகளை
அன்பின் பேரூற்றால் தளிர்க்கச் செய்யும்
எதிர்கால நம்பிக்கைக்கு
எக்காலத்திற்குமான
சிறு நெருப்பின் பெருந்துளி நீ!

நவம்பர் புரட்சியின் நூற்றாண்டில்
அமைதி பெறுகிறது
ஒட்டுமொத்த உயிர்களுக்காகவும் துடித்த
உன் உன்னத இதயம் !
உற்ற தோழன் சே குவேராவை
மீண்டும் நினைவிலேந்தி வழியனுப்புகிறது
உலகம் இருவரையும்!

உலகம் யாவிலும் உன் பெயரால்
சுடர்ந்தெரியும் மெழுகு தீபங்களிலிருந்து
பரவும் வெளிச்சம்
சுரண்டல் இருளை ஒருநாள்
முற்றாகத் துடைத்தெறியும்.

Share

About the Author

எஸ்,வி.வேணுகோபாலன்

has written 81 stories on this site.

என்னைப் பற்றி என்ன சொல்ல.... ஓர் எளிமையான வாசகர். உணர்ச்சி ஜீவி. தாம் இன்புறும் வாசிப்பை இதர வாசக உலகு இன்புற வைத்து அதன் பின்னூட்டம் கிடைக்கப் பெறாவிட்டாலும் நெகிழ்ச்சியுற தொடர்ந்து பகிர்ந்து கொள்ளத் துடிக்கும் ஓர் உணர்ச்சி ஜீவி. வங்கி ஊழியர். கவிதைகளில்தான் புறப்பட்டது எனது படைப்புலகமும். எழுதுவதை விடவும் வாசிப்பது, கேட்பது, பார்ப்பது, பகிர்வது பிடித்திருக்கிறது. ஆனாலும் எழுதுவதை விடாமல் பிடித்து வைத்திருக்கிறது இந்தக் கணினி எழுதுகோல். அற்புதமான போராளி எனது வாழ்க்கை இணை தோழர் ராஜேஸ்வரி. சுவாரசியமிக்க குழந்தைகளில் மூத்தவர் கட்டிடவியல் மூன்றாமாண்டு மாணவி. இளையவர் ஏழாம் வகுப்பில். இந்து, நந்தா இருவருக்குமே ஓவியம், கவிதை,பாடல்கள் ரசிப்பது மிகவும் பிடிக்கும். இந்து எழுதிய முதல் ஆங்கிலக் கவிதை அவள் நான்காம் வகுப்பில் இருக்கையில் ஹிந்து யங் வேர்ல்ட் இணைப்பில் இடம் பெற்றது. நந்தாவின் முதல் தமிழ் கவிதை அவன் மூன்றாம் வகுப்பில் இருக்கும்போது அவன் சொல்லச் சொல்ல நான் எழுதியது, துளிர் இதழில் வெளியானது. படைப்புலகம் இருக்கட்டும். அவர்களுக்கான நேரம் மறுக்கப்படும்போது அவர்கள் என்னை ஈவிரக்கமின்றித் தாக்கும்போது என்னைவிட அதிகம் காயம் சுமப்பது எனது எழுத்துக்கள்தான்....அது தான் என்னை எழுதவும் தூண்டுவது. என்னை மனிதனாகத் தகவும் அமைப்பது...

Write a Comment [மறுமொழி இடவும்]

Security Question: (* Solve this math to continue) *


Copyright © 2015 Vallamai Media Services . All rights reserved.
வல்லமை மின்னிதழில் வெளியாகும் ஆக்கங்கள், ஆக்கியவரின் தனிப்பட்ட கருத்துகளே; வல்லமையின் கருத்துகளாகக் கொள்ள வேண்டாம்.