ஏற்றிடலே நன்று !

     (    எம் . ஜெயராமசர்மா …… மெல்பேண் ….. அவுஸ்திரேலியா   )

 

 

தானியங்கள் பலவற்றை நாமுண்டு வந்தோம்

நகரத்து உணவுகளை நாம் காணவில்லை

ஊரெல்லாம் விவசாயம் உயிர்ப்புடனே அன்று

ஒழுங்குடனே இருந்ததனை யாவருமே அறிவோம்

காலமெனும் சக்கரமோ வேகமாய் சுழன்று

கடுகதியாய் உணவெல்லாம் மாற்றமுறத் தொடங்கி

நாமின்று வேண்டாத உணவுகளை உண்டு

நலமிழந்து போவதற்கு ஆளாகி உள்ளோம் !

 

கூழ்குடித்த காலமதில் குடல்நோய்கள் குறைவே

கொக்கோகோலா குடித்தவர்க்கு வருநோய்கள் பலவே

ஆழ்கிணறு நீரெடுத்து அருந்திநின்றோம் நன்றாய்

அதனாலே ஆரோக்கியம் அமைந்திருந்த தன்று

நீர்குடித்தோம் மோர்குடித்தோம் நிரம்பியது வயிறு

பீர்குடித்து உடல்நலத்தைக் கெடுக்கின்றோம் இன்று

ஊர்முழுக்க இப்போது மாறியே போச்சு

உயிர்ப்புள்ள உணவுகளை உண்பாரும் குறைவே !

 

வரகுதினை கம்புசோளம் மாட்டுணவாய் ஆச்சு

மனிதவுண வெல்லாமே வரண்டு போகலாச்சு

தினமுண்ட  எள்ளும்கூட சிதறியெங்கோ போச்சு

பனைதந்த பலபொருளும் காட்சிப் பொருளாச்சு

நின்றுகொண்டே  உண்டுவிட்டு ஓடிநிற்கும் பலபேர்

கண்டதையும் கடையில்வாங்கி வாயினுள்ளே போட்டு

மென்றிடாமல் விழுங்கிநின்று வேகமுடன் சென்று

விலைகொடுத்து நோயையவர் வாங்குகிறார் நாளும் !

 

பக்கற்றில் உணவுவகை பதம்பதமாய் இருக்கு

பார்ப்பவர்கள் மனங்கவரும் கவர்ச்சியதில் இருக்கு

காலைமாலை வேளைக்கென கலர்கலராய் இருக்கு

கண்டவுடன் வாயூறும் காட்சியதில் இருக்கு

சமையல்செய்ய விரும்பாத பலபேர்க்கும் இப்போ

சரியான துணையாக இருக்குதந்த உணவு

பணம்கொடுத்து வாங்கியதை பலபேரும் உண்டு

பறிகொடுத்து நிற்கின்றார் பலநலத்தை இன்று !

 

செயற்கையாய் தயாரிக்கும் உணவு வகையெல்லாம்

செரிமானம் ஆகாமல் சிக்கலினைத் தருமே

அதைவிரும்பி ஏற்பதற்கு அதையாக்கி விற்போர்

அதிகபணம் செலவாக்கி விளம்பரங்கள் செய்வார்

விளம்பரத்தால் மயங்கிநிற்கும் பலபேரும் ஆங்கே

விரைந்துசென்று அதைவாங்கி வீட்டிலுண்டு மகிழ்வார்

மகிழ்கின்றார் மகிழ்ச்சியது நிலைத்துவிடு முன்னே

மருந்துதேடி அவரலைந்து மாட்டிடுவார் வகையாய் !

 

மேல்நாட்டு உணவுவகை மெத்தவுமே வந்து

மெய்யாக உடல்நலத்தை பொய்யாக்கி விட்டு

நாளெல்லாம் பலநோய்கள் நமதுடலுள் செலுத்தி

நம்பணத்தை வீணாக்கும் நடைமுறையில் இருக்கு

பழையவுண வெல்லாமே உடல்நலத்தை நோக்கி

பக்குவமாய் அமைந்தமையை பார்க்கின்ற போது

நமதுணவை நாம்மறத்தல் நமைமறத்தல் அன்றோ

இனிமேலும் நம்முணவை ஏற்றிடலே நன்று !

 

 

 

Share

About the Author

ஜெயராமசர்மா

has written 240 stories on this site.

பேராதனை பல்கலைகழக தமிழ் சிறப்புப் பட்டதாரி.அத்தோடு, கல்வியியல் துறையில் டிப்ளோமா, சமூகவியல் துறையில் டிப்ளோமா,கற்பித்தல் நுணுக்கத்தில் முதுகலை தத்துவமானி பட்டங்களையும் பெற்றவர்.கல்வித்திணைக்களத்தில் உதவிக் கல்விப் பணிப்பாளராகவும்,வட இலங்கை புனித பிரான்சிஸ் சேவியர் செமினறியில் பகுதி நேர‌ தமிழ், இந்துகலாசார விரிவுரையாளராகவும், யாழ்/ பேராதனை பல்கலைக்கழகங்களின் வெளிவாரி பட்டப்படிப்புப்பிரிவில் தமிழ் விரிவுரையாளராகவும்,இலங்கை ஒலிபரப்புக்கூட்டுத்தாபனத்தில் அறிவிப்பாளராகவும், நாடகத்தயாரிப்பாளராகவும் கடமையாற்றியுள்ளார். மாற்றம்,உதயன்,ஈழ நாடு, சிந்தாமணி, உதயசூரியன் இந்துசாதனம், மெல்லினம், உதயம்,பத்திரிகைகளில்.. கவிதை, கட்டுரை,சிறுகதை,விமர்சனம், ஆகியவற்றை எழுதியுள்ளார்.10க்கு மேற்பட்ட நூல்களையும்,100 ஓரங்க நாடகங்களையும்,10க்கு மேற்பட்ட வில்லுப்பாட்டுக்களையும்,20க்கு மேற்பட்ட நாட்டிய நாடகங்களையும், எழுதியுள்ளதோடு.. "முதற்படி" என்னும் குறுந்திரைப்படத்துக்கு கதை வசனம் எழுதி நடித்து 2007ல் அவுஸ்த்திரேலியாவில் மெல்பேண் நகரில் வெளியீடும் செய்யப்பட்டது.ஈழத்தில் பல ஸ்தலங்க‌ளுக்கு ஊஞ்ஞல் பாடியுள்ளதோடு.. அண்மையில் மேற்கு அவுஸ்த்திரேலியா பேர்த் மாநகரில் கோவில்கொண்டிருக்கும் பாலமுருகப்பெருமான் மீதும் ஊஞ்ஞல் பாடியுள்ளார்.2008ல் மதுரைமாநகரில் நடைபெற்ற அகில உலக சைவ‌ சித்தாந்த மாநாட்டில் புராணப்பகுதிக்கு தலைவராகவும், ஆய்வுக் கட்டுரையாள‌ராகவும் விளங்கியுள்ளார்.அண்மையில் ஐரோப்பிய நாடுகளுக்கு சுற்றுப்பயணம் சென்று அங்கெல்லாம்.. தமிழ்,கலாசாரம், இந்துசமயம்,சம்பந்தமாக விரிவுரைகள் ஆற்றியுள்ளார்.லண்டனில் ஜி.ரி.வி. நிலையத்தார் சமயம்,தமிழர்பண்பாடுசம்பந்தமாக இரண்டு தினங்கள் பேட்டி கண்டு நேரடியாக ஒளிபரப்புச்செய்தனர். தற்போது மெல்பேண் தமிழ்ச்சங்கத்தின் ஆலோசகராகவும்,விக்டோரியா இந்து கல்விமையத்தின் ஆலோசகராகவும், தமிழ் அவுஸ்த்திரேலியன் சஞ்சிகையின் இணை ஆசிரியராகவும் விளங்குகிறார். பூர்வீகம் தமிழ்நாடு தாராபுரம். வளர்ந்தது, படித்தது, வேலை பார்த்தது, யாவுமே இலங்கையில்..தற்போது குடியுரிமை பெற்றிருப்பது அவுஸ்த்திரேலியாவில்.

Write a Comment [மறுமொழி இடவும்]


five + 2 =


Copyright © 2015 Vallamai Media Services . All rights reserved.
வல்லமை மின்னிதழில் வெளியாகும் ஆக்கங்கள், ஆக்கியவரின் தனிப்பட்ட கருத்துகளே; வல்லமையின் கருத்துகளாகக் கொள்ள வேண்டாம்.