கபீர்தாசரின் கவிதைகள் (3) தமிழாக்கம் : க. பாலசுப்ரமணியன்

க.பாலசுப்பிரமணியன்

 

kabir-424x282-1

நானும் நித்தம் பசியின்றி இருக்க

நாடியவர் நித்தம் பசியின்றி இருக்க

நாளும் தருவாய் நிறைவாய் இறைவா !

நானிலத்தில் வேண்டேன் உனையன்றி நிரந்தரமே !

 

காமம் இருக்கும்  இடத்தில் கடவுள் இல்லை

கடவுள் இருக்கும் இடத்தில் காமம் இல்லை

கடவுளும் காமமும் என்றும் இணைவதில்லை

கதிரவனும் மதியும் என்றும் சேர்வதுண்டோ ?

 

வரிசையில் அரிசியைச் சுமந்திடும் எறும்பு

வழியினில் சுமையினை மாற்றிட முடியுமோ?

சிற்றின்பத்தைச் சுமக்கின்ற ஓ! மனிதா !

பேரின்பத்தை வாழ்வில் அடைந்திட முடியுமோ ?

 

ஒளியின் அழகினில் மயங்கிடும் விட்டில்

உறவினைத் தேடி உயிரையும் இழந்திடும்

அழகுடன் உறவிடத்  துடித்திடும் உள்ளம்

அமைதியை இழந்து அழிவினை நாடிடும் !

 

குட்டையில் சேற்றினில் மலர்ந்திடும் தாமரை

குலவிடும் நிலவினைக் கண்டதும் சிரிக்குமே

குறைவில்லா அன்பு கிடைத்திடும் பொழுதினில்

குலவிடும் நெஞ்சங்கள் குறைந்திடும் தூரமே !

 

ஆயிரம் நல்லவை அன்புடன் செய்தாலும்

ஆணவ நெருப்பினால் அனைத்தும் அழிந்திடும்

ஆணவம் தந்த அக்கினி அளவில்லாக் கோபமே

அன்புடைச் செயல்களை அழித்திடும் அவலமே !

 

எழுவது என்றும் வீழ்வது நியதி

மலர்வது என்றும் வாடுதல் உறுதி

அமைவது அனைத்தும் உடைவதும் நியதி

ஆரம்பம் அனைத்துக்கும் உள்ளது இறுதி.

 

Share

About the Author

க. பாலசுப்பிரமணியன்

has written 398 stories on this site.

க. பாலசுப்ரமணியன், முன்னாள் இயக்குனர் (கல்வி). மத்திய இடைநிலைக் கல்விக் கழகம், டில்லி ஆர்வம்: இலக்கியம், கவிதை, கல்வி, உளவியல், மனித வள மேம்பாடு கல்வி பற்றிய இவருடைய பல கட்டுரைகளும் புத்தகங்களும் வெளியிடப்பட்டுள்ளன.

Write a Comment [மறுமொழி இடவும்]

Security Question: (* Solve this math to continue) *


Copyright © 2015 Vallamai Media Services . All rights reserved.
வல்லமை மின்னிதழில் வெளியாகும் ஆக்கங்கள், ஆக்கியவரின் தனிப்பட்ட கருத்துகளே; வல்லமையின் கருத்துகளாகக் கொள்ள வேண்டாம்.