Category: திருமால் திருப்புகழ்

கிரேசி மோகன்
கண்ணன் திருப்புகழ்….
————————————————

’’கண்ணன் அந்தாதி’’
———————————————

உண்டில்லை என்றுனை இங்கிரு சாரர்கள்
விண்டுரைத்த போதும் விசுவமே -கண்டுகொண்டேன்
மித்யை ஜகத்தென்றும் சத்தியம் நீயென்றும்
வித்தை பழகும் விதம்….(6)

விதவிதப் பூவாய் விதவையின் கூந்தற்
பதவி பெறுவதென்ன பேறா! -புதுப்புது
மேனியும், நோயும் ,மரணமும் நாடகம்
தூணிலொளிந் தோன்கண் துடைப்பு….(7)

 
துடைப்பங் கழியைத் துணிப்பட்டால் மூடிப்
படைத்தாய் பிறவிப் பிணியை -இடைப்பையா
தீராவுன் ஆட்டத்தில் தோள்கொடுக்கும் தோழனெனை
பாரா திருப்பதேன் பகர்….(8)

 
பகர்தல், பரிகசித்தல்,பீற்றல்,புலம்பல்
இகழ்தல் எனவாச்(சு) வாழ்க்கை -உகிரால்
இரணியனைக் கொன்றன்(று) இருதோ(ள்) அணிந்த
நரஹரியே மோனத்தூ ணாக்கு….(9)

 
நாக்கில் நரம்பின்றி நாளை நமதென்ற
போக்கில் தடம்புரண்டு போய்விழுவோம் -தூக்கில்
இடப்பட்டும் தூங்கும் மடப்பயலே அந்த
இடப்பயல் தாளே இருப்பு….(10)

——————————————————————————————————————-

படங்களுக்கு நன்றி:

http://kamadenu.blogspot.in/2013_05_01_archive.html

கிரேசி மோகன்

கண்ணன் திருப்புகழ்(வெண்பா)….
—————————————————————
’’கண்ணன் அந்தாதி’’
———————————
காப்பு
————-

காப்புக் கரம்கொண்டு காதைப் பிடித்துமால்
தோப்புக் கரணமிடத் தீர்ப்பளித்தோய் – யாப்பெனெக்(கு)
அந்தாதி வெண்பாவில் அம்மான் புகழ்பாட
தந்தாதி தெய்வமே தா….
———————————————————————————————————————-

நூல்
———–

சரணா கதியென்று சார்ந்து கிடப்போர்க்(கு)
அரணாய் இருக்கும் அரியே -நரனாய்ப்
பிறந்து வளர்ந்து பிணியென்ற சாக்கில்
இறந்தில்லை யாவ(து) எதற்கு….(1)

எதற்கென்ற கேள்வி முதற்கொண்டு மாயை
உதிக்கின்ற ஞானமே எல்லாம் -மதித்துத்
துதிக்கின்ற நானும் விதிக்கின்ற நீயும்
நதிக்கரை நாணல்நீர் நட்பு….(2)

நட்புனக்கு லீலை நயவஞ் சகம்மாயை
கட்புலனுக்(கு) எட்டாக் கடிதொளியே -முட்புதரில்
நிற்கவைத்து ரோஜாவை நீமுகர்ந்து பார்கின்றாய்
அற்பசுகம் ஆண்டவர்க்கு மா….(3)

ஆண்டவா நீலவண்ணம் பூண்டவா நீள்விசும்பில்
நீண்டவா பாரதப் பாண்டவராய் -வேண்டவா!
தூண்டவா பக்தியால் !, தீண்டவா பாரதியாய் !,
கீண்டவா தீங்கைக் கிழித்து….(4)

கிழிந்து பிணியில் கிடக்கும் உடம்பைப்
பிழிந்து சுகம்மேலும் பார்க்கும் -இழிந்த
மனமேன் கொடுத்தாய் எனையேன் படைத்தாய்
உனைஏன் கேட்கநான் உண்டு….(5)

————————————————————————————————————

கிரேசி மோகன்

கண்ணன் திருப்புகழ்(வெண்பா)….
————————————————————–
’’கண்ணன் காப்பு’’
——————————

வையங்கள் ஏழை, வயிறார உண்டும்,
ஐயம் மிகக்கொண்டு அய்யனே ,-கையால்,
பிடித்துக் கமலப், பதவிரலை அன்று,
கடித்துக் களித்தவனே, காப்பு….

நான்மறை ஓதிடும் ,நான்முகன் வாழ்ந்திடும்,
தாமரை நாபியும், பூமகள் -போய்மறையும்,
சந்தனம், ஸ்ரீவத்ஸம், சாற்றும் திருத்துழாய்யு
கந்திடும் திண்மார்பும் காப்பு….

மோதகப் பிள்ளை முழுங்க, பதைபதைத்து
பீதகப் பட்டாடை பாழாகக், -காதினைக்,
கைகளால் பற்றி, கரணமிட்(டு) ஆழியை
கொய்தகோ பாலனே, காப்பு….

தேர்கடவி, பாரதப் போர்முடிக்க, பார்த்தனின்
சீர்கெடலை கீதையால் செப்பனிட்டோன், -மோர்குடத்தை
கல்லால் உடைத்தன்று, கோபியர் கோபத்திற்க்
குள்ளான கண்ணனே காப்பு….

சாக்கிரதை யாக சகாக்களுடன் சென்றாயர்,
தூக்கிலிட்ட வெண்ணை திருடியுண்ட, -போக்கிரிப்
பையனே. பேய்மழைக்குப் பர்வதம் தாங்கியக்
கையனே, கண்ணனே, காப்பு

——————————————————————————————–

படங்களுக்கு நன்றி :

http://kamadenu.blogspot.in/2014_01_01_archive.html

 
கிரேசி மோகன்

கண்ணன் திருப்புகழ்(வெண்பா)….
————————————————————

’’கண்ணன் காப்பு’’
——————————–
உறியிழுத்தாய், பின்னர் உரலிழுத்தாய், பின்னர்
மரமிழுத்தாய், பின்னர் மதகில் – அரவிழுத்தாய்,
பின்னர் நகிலிழுத்தாய், பெண்கள் துகிலிழுத்தாய்,
கண்ணா எனையிழுப்பாய், காப்பு….

சகடா சுரனை சுமந்தா காய,
முகடில் முறித்த முகுந்தா, – பகடையில்,
தோற்றவர்க்காய் தேரேறி , நூற்றவர் மாய்ந்திட,
கூற்றவனாய் நின்றவனே, காப்பு….

கோடி குருமார்கள் கூறிய வேதாந்தம்,
தேடிப் படித்தும் திருப்தியில்லை, – நாடியில்,
ஏதோ அதிருப்தி, என்னென்று சொல்வது,
கீதோ பதேசகா, காப்பு….

தரையில் புரளபீ தாம்பர ஆடை,
சுருளும் முடிநுதல் சாய, -முரளி
மனோகரா வந்துன், மதிவதனம் காட்டு.
கனாவரும் நேரத்தில், காப்பு….

கன்னத்தில் அன்னையிட்ட, கண்மை திருஷ்டியது,
வண்ணக் கருமையில் வாடிட, -எண்ணற்ற,
இம்சைக்(கு) இடமாகி, இன்னல் கடந்தோனே,
கம்சன் மருகோனே, காப்பு!!
——————————————————————————————————————-

படங்களுக்கு நன்றி :

http://kamadenu.blogspot.in/2014_01_01_archive.html

கிரேசி மோகன்

கண்ணன் திருப்புகழ்(வெண்பா)….
———————————————————
‘’கண்ணன் காப்பு’’
——————————

தீரன், யமுனா தரங்கக் கரையோரன்,
சேரும் இளமாதர் ஜீவான்ம -சோரன்,
அழகில் சுகுமாறன், அன்பில் உபகாரன்,
கழுகில் வரும்நேரம் காப்பு….

குவலயா பீடத்தின் கொம்பொசித்துக் கம்சன்,
கவலையால் பீடிக்கக் கொன்றோன் – ’அவலையா
தந்தாய் எடுத்துக்கொள் தோழாயென் செல்வமுன்
கந்தையைக் கட்டுமென்றோன்’ காப்பு….

கூவும் கஜேந்திரனை, காத்த புஜேந்திரா,
ஏவிய சக்கரத்தை ஏந்தியவா, -காவிய
பாகவதக் கண்ணா, பரந்தாமா நாரணா,
காகவத காகுத்தா காப்பு….

ஆலில் மிதந்தவா, ஆழ்வார்கள் பாசுர,
நூலில் நிறைந்தவா, நந்தலாலா, -தோளில்,
திருத்துழாய் பூண்ட, திருவோணத் தானே,
கருத்தில் கலந்துவளைக் காப்பு….

கால்கள் பலநூறு, கண்டேனென் வாசலில்,
வால்கள் புடைசூழ வந்தமுகுந்தன்,-நூல்போல்,
அணிவகுப்பாய் சென்று ,அடுக்களை உள்ளில்
விநியோகம் செய்தான் விருந்து!!

—————————————————————————————–

படங்களுக்கு நன்றி:

http://kamadenu.blogspot.in/2014_05_01_archive.html

கிரேசி மோகன்

கண்ணன் திருப்புகழ்(வெண்பா)….
———————————————————-
’’கண்ணன் காப்பு’’….
————————————

பொன்னிற வண்ணப் புழுதி எழுந்துயர்,
விண்ணவர் கண்ணில் விழுந்திட, -செந்நிற
சாயங்கா லத்தில் , சகாக்களுடன் வீடேகும்,
காயாம்பூ வண்ணனே காப்பு….

காளியன் குட்டையில் மூளியாய் மூழ்கஅவன்,
தோளினில் ஆடிய தெய்வமே, -காளியின்
அண்ணனே, கைமாறி ஆயர் குலம்புகுந்த
கண்ணனே, வேண்டினேன் காப்பு….

பூதனை மார்பை புசித்தவள் ஆவியை,
வேதனை இன்றி விரட்டியவா, -தீதினை
ஓட்டவும், தர்மம் உயரவும், பாண்டவ
கூட்டம், பிணைந்தவா காப்பு….

தாய்க்குப் பணிந்தன்று, தாம்பில் புகுந்துமரம்
சாய்க்க, உரலிழுத்த சாகஸா, – வாய்க்குள்,
மாதா மகிழ மகோன்னதம் காட்டிய,
கீதா உபதேசா காப்பு….

எதுரா எதுராவென, எங்கெங்கோ தேடும்,
புதிராம் புவிவாழ்வு போதும், – மதுரா
நகரொளிந்த தெய்வம், நவனீதக் கண்ணன்,
குகனணைந்து ஐவரானோன் காப்பு!!

—————————————————————————————————

படங்களுக்கு நன்றி :

http://kamadenu.blogspot.in/

கிரேசி மோகன்

கண்ணன் திருப்புகழ்(வெண்பா)….
———————————————————-
‘’கண்ணன் காப்பு’’
—————————–

கஷ்டம் கலைந்திடும், நஷ்டம் நகர்ந்திடும்,
இஷ்டம் நமக்கு இணங்கிடும், – அஷ்டமி
ரோகினியில் தோன்றிய, லேகிய வண்ணனின்,
காகநிறக் காலிரெண்டும் காப்பு!

 
தீக்குளிட்டு பாரதி தீண்டிய தெய்வத்தை,
வாக்கிலெட்டா கண்ணனை வாழ்த்துவோம்,-பூக்களிட்டு
அப்பம் , அதிரசம், முப்பழங்கள், அப்பயல்முன்
கப்பம்நீ கட்டிடக் காப்பு!

மாதவனை, கேசவனை, மாலொழிய வந்தவனை,
ஆதவனை, ஆயர் அணிவிளக்கை, -யாதவனை,
ரோகினி அஷ்டமியாய், ஆகிய கீதையை,
காகீ எனக்கத்தக் காப்பு!

நடுநிசியில் ரோகினி நட்ஷத் திரத்தில்,
கொடுஞ்சிறையில் தோன்றிய கண்ணா,-முடிமிசையில்
அப்பன் சுமந்திட ஆயர்தம் கோகுல.
குப்பம் நுழைந்தவனே காப்பு!

கட்டு மயிற்பீலி, கொண்டை யிலணிந்து,
பட்டுப்பீ தாம்பரம், பூண்டாவை, -வெட்ட
வெளிதனில், மேய்க்க வேய்ங்குழல் ஊதும்,
களிமிகு கண்ணனே காப்பு!!

—————————————————————————————————————-

படங்களுக்கு நன்றி:

http://kamadenu.blogspot.in/2014_04_01_archive.html

கிரேசி மோகன்

கண்ணன் திருப்புகழ்….
————————————–

’’கண்ணனை நெஞ்சே கருது’’
——————————————————–

“ஈவிரக்க நெஞ்சுக்(கு) இறைத்திடும் பக்திநீர்,
நாவிறக்க மாய்வாய்ப்பண் ணாகமாறி, – போயிறக்கம்
விண்நனைய மண்ணில் விழலுக்கும் பாயும்காண்;
கண்ணனை நெஞ்சே கருது!

“ஆயர் சகாயன் ,அலேக்நிரஞ்சன், மண்தின்று,
தாயார் திகைத்திட தன்பவள -வாய்க்குள்ளே,
வண்ணமதைக் காட்டி, விசுவரூபக் காட்சிதந்த,
கண்ணனை நெஞ்சே கருது”

’’பெண்ணழகைக் கண்டு பரவசிக்கும் போதினில்,
கண்ணைப் பறிக்கின்ற காட்சியில், -உன்இடர்
புண்ணை சொறிகையில், பேரின்ப சாட்சியாய்
கண்ணனை நெஞ்சே கருது’’….

“பெண்ணொருத்தி பின்னலை பாரதிப் பிள்ளையவன்
பின்நின்(று) இழுக்கையில் பிய்ந்ததால், -மின்னலாய்,
சென்னியில் சூடி சிருங்கார கோலமுற்ற,
கண்ணனை நெஞ்சே கருது”….

“ஆடா(து) அசங்காது, வாடாது வற்றாது,
மாடோ, மனிதனோ, மாமுனியோ ,-கூடாமல்
எண்ணி எதிர்போர்க்கும், முன்னம் குதித்திடும்,
கண்ணனை நெஞ்சே கருது”

கூட்டுக் குடும்பமாய் காட்ஷி தருகின்ற,
பாட்டுக்(கு) ஒருகவி பாரதியின் -வீட்டினுக்கு,
அண்மையில் நிற்கின்ற, அல்லியூர் சாரதியை,
கண்ணனை நெஞ்சே கருது!!

——————————————————————————————————————–

படங்களுக்கு நன்றி

கிரேசி மோகன்

கண்ணன் திருப்புகழ்(வெண்பா)….
———————————————————-
’’கண்ணனை நெஞ்சே கருது’’
——————————————————-

காதுகண்வாய் மூக்குடல், பூதப் புலனைந்தும்,
ஏது உனக்கென்று எண்ணினையோ, – சூதிலன்று
பெண்ணவள் பாஞ்சாலி இன்னல் களைந்தவனை
கண்ணனை நெஞ்சே கருது….

கரம்தயிர் வெண்ணை கவர்ந்தவர் வீட்டில்,
அறம்பொருள் இன்பம் அனைத்தும் – தரும்பரம்,
பின்னிவைகள் எச்சமுற, முன்னிருத்தும் மோட்ஷமதை,
கண்ணனை நெஞ்சே கருது….

கிளரொளி இன்பம் இளமையில் தங்கும்,
தளரளி மூப்பதில் தேயும், – மலரளித்(து),
உன்னகத்தை பக்தி உணர்வால் உருமாற்ற,
கண்ணனை நெஞ்சே கருது….

தூய யமுனைத் துறைவனை, நந்தகோபன்
ஆயர் குலம்குதித்த ஆரமுதை, -சேயாக,
இன்னமுதாய் பேய்ச்சி இருமுலை உண்டவனை,
கண்ணனை நெஞ்சே கருது….

 
“நாணல், யமுனா நதிநெல் நிமிர்தலாய்,
கூனல் அர்ஜுனரை கீதையால்,-நாணதிர,
விண்ணென்று காண்டீப வில்லெடுக்க வைத்தவனை,
கண்ணனை நெஞ்சே கருது”!!

————————————————————————————————————–

படங்களுக்கு நன்றி

கிரேசி மோகன்

கண்ணன் திருப்புகழ் (வெண்பா)….
———————————————————-
’’கண்ணனை நெஞ்சே கருது’’
—————————————————

பீலி மயில்கொண்டை, பீதாம் பரஆடை
காலிகள் மேய்க்கும் கழியுற்றான் -போலிருந்தும்
எண்ணுதலுக்(கு) எட்டானை, கண்ணுதலான் மைத்துனனை
கண்ணனை நெஞ்சே கருது….

சொர்ணமாய் வீசிடும் சூரிய னால்காலம்
நிர்ணயம் ஆகிடும், நீகும்ப -கர்ணனாய்
திண்ணமாய்த் தூங்காமல் தூங்கி சுகம்காண
கண்ணனை நெஞ்சே கருது….

படுத்த(து) அரவணைமேல், பாண்டவர்க்காய் அன்று
தொடுத்தது பாரதத் தொல்போர் -கொடுத்தது
எண்ணிலா செல்வத்தை ஏழை குசேலனுக்கு
கண்ணனை நெஞ்சே கருது….

ஓதநீர் வண்ணத்தை ,யாதவ சின்னத்தை
ஓதுமறை நான்குமுரை உன்னதத்தை -பேதமற
என்னவென்று சொல்ல எழுத்துக்(கு) அகப்படாத
கண்ணனை நெஞ்சே கருது….

எண்திசையை ஏழ்கடலை விண்முகடை விஸ்வத்தை
கண்ணசைவில் பக்தரைக் காத்திட -முன்னசையும்
அன்னத்தன் வீற்ற அரவிந்த நாபியோன்
கண்ணனை நெஞ்சே கருது!!

படங்களுக்கு நன்றி :

http://kamadenu.blogspot.in/2013_09_01_archive.html

கிரேசி மோகன்

கண்ணன் திருப்புகழ்(வெண்பா)….
———————————————————-

”கண்ணனை  நெஞ்சே கருது’’
——————————————–

கடவுள் மடியில் கிடக்கும் வரையில்,
அட!உள் வெளியேது அஞ்சேல்! -கடலுள்ளே,
பன்னகத்தில் யோகம் பயிலும் பரம்பொருளாம்,
கன்ணனை நெஞ்சே கருது….

சிந்தை வெளிகடந்து, மந்தை வெளிபுகுந்து,
கந்தல் உடையணிந்து, கன்றுகளைத் – தந்தையாய்,
அன்னையாய்க் காத்து, அறுகம் அளித்திடும்,
கண்ணனை நெஞ்சே கருது….

கும்பிடுதல் கர்மம், குதூகலம் கோவிந்தன்,
தென்படுதல் ஆத்ம தரிசனம், – பண்படுஇவ்,
வண்ணமந்த, வாரிதி வண்ணனுடன் வாழ்ந்திடக்,
கண்ணனை நெஞ்சே கருது….

உன்னை அறிதல் உனக்கெதற்கு, உள்ளிருக்கும்
பொன்னுக்(கு) அணிகலப் போர்வையே, – தொன்னையில்,
வெண்ணெய் இருக்க, விழுதுநெய்க்(கு) ஏங்குவதேன்,
கண்ணனை நெஞ்சே கருது….

கழல்தொழுது கைகூப்பி கும்பிட்டு, செய்யும்
தொழிலுறங்கும் தென்னரங்க தேவன் – சுழல்திகிரி,
மின்னனைய நந்தகி, வெண்ணிற சங்குற்ற,
கண்ணனை நெஞ்சே கருது….கிரேசி மோகன்….

———————————————————————————————————–

படத்திற்கு நன்றி:

http://kamadenu.blogspot.in/2013_11_01_archive.html

கிரேசி மோகன்
கண்ணன் திருப்புகழ்(வெண்பா)….
———————————————————–

’’கண்ணனை நெஞ்சே கருது’’
—————————————————–

நானாக நம்முள்ளே, ஆணாகப் பெண்ணாகத்,
தானாகத் தோன்றிடும் தத்துவத்தை, – மீனாக,
எண்ணற்ற வண்ணமாய், மண்காக்க வந்தவனை,
கண்ணனை நெஞ்சே கருது….

ஆனந்த சாகரம், ஆத்ம தரிசனம்,
நானந்த பொய்கையில் நீந்திட – வானம்தன்,
வண்ணனை, அன்று வரையேந்தி நின்றவனை
கண்ணனை நெஞ்சே கருது….

அலுப்பினில் ஆழ்ந்து, சலிப்பினில் சோர்ந்து,
இலுப்பை மலரை இனிப்பென்(று), -உலுக்குகிறாய்.
மண்ணினை சர்க்கரையாய் மாற்றவல்ல மாதவனை
கண்ணனை நெஞ்சே கருது….

எதையோ நினைந்து அதையே முனைந்து
பதையாய்ப் பதைத்தது போதும் – கதையாக
மன்னனுக்கு முன்னம்  முனிசுகர் போதித்த
கண்ணனை நெஞ்சே கருது….

குவித்த திரவியம், கொண்டதோர் சுற்றம்,
தவித்த நிலையில்போம் தூரம் – பவித்திர
எண்ணமுற்ற மெய்யடியார் ஏகாந்த சேர்க்கைக்கு
கண்ணனை நெஞ்சே கருது!!

————————————————————————————————————–

படங்களுக்கு நன்றி:

http://kamadenu.blogspot.in/2013_11_01_archive.html

கிரேசி மோகன்
கண்ணன் திருப்புகழ்(வெண்பா)….
———————————————————-

’’கண்ணனை நெஞ்சே கருது’’….
———————————————————-

பாரீசன் வில்லொடித்து, பத்தினியாள் கைப்பிடித்து,
மாரீச மானால் மனைபிரிந்து, -பேராசை
மன்னனவன் லங்கேசன் மாள,வந்தோன் பின்வந்த,
கண்ணனை நெஞ்சே கருது….

ந்யாபகம் தொல்லை, நினைவு களோசத்ரு,
வ்யாபகம் கர்ம வினைகளாம், -தீபமாய்,
எண்ணத் தகளியில் ஏகாந்த நெய்யூற்றி
கண்ணனை நெஞ்சே கருது….

ஐயம் தகளியாய், அச்சமே நெய்யாக,
அய்யே!நீ ஏற்றுவாய் அஞ்ஞானம், – மையிருள்
வண்ணனை, ஞான வரதனை, வேய்ங்குழல்
கண்ணனை நெஞ்சே கருது….

விரலோடு வீக்கம்போல் வெற்பெடுத்(து) அன்று
திரளோடு தாங்கி, தவிக்க -உரலோடு,
வெண்ணையை உண்டதால், பின்னிப் பிணைந்தவனை,
கண்ணனை நெஞ்சே கருது….

அஞ்சுபுலன் ஓடு அதற்குள்ளே அக்கினிக்
குஞ்சொளிந்து கூவும் குருநாதா!, -அஞ்சன
வண்ணனை, கீதை உரைத்தகுரு நாதனைக்
கண்ணனை நெஞ்சே கருது….கிரேசி மோகன்….

—————————————————————————————————————-

படங்களுக்கு நன்றி:

http://kamadenu.blogspot.in/2013_03_01_archive.html

கிரேசி மோகன்

கண்ணன் திருப்புகழ்….
——————————————-
’’கண்ணனை நெஞ்சே கருது’’
————————————————

கனவு, தனைமறந்து கண்மூடும் தூக்கம்,

நனவிவை, மூன்றிலும் நான்யார், -வினவிட,
எண்ணவலை ஓய்ந்து, எழுந்திடும் பாற்கடல்
கண்ணனை நெஞ்சே கருது….

பாட்டிசைத்தக் கம்பனைக், கேட்டிசைந்து கொக்கரித்த
மேட்ட ழகியசிங்கன் மாலோலன், -சேட்டையாய்
பின்அணங்கு கள்சேலைப் பொய்கை பறித்தவன்,
கண்ணனை நெஞ்சே கருது….

கடல்கடைந்த போதாமை காயம் எடுத்து,
வடவரையைத் தாங்கும் வரதன், -இடையனை,
அண்ணனுடன் சேர்ந்தாயர் ஆநிரை மேய்த்தவனைக்,
கண்ணனை நெஞ்சே கருது….

நாடாய் விரக்தியை, கூடாய்வை ராக்கியத்தை,
தேடாய் தெளிவான்ம தத்துவத்தை, -வாடாய்நீ,
விண்ணகர் வைகுந்த வாய்ப்புண்டு, வேய்ங்குழல்
கண்ணனை நெஞ்சே கருது….

கோஹம் விசாரித்து, சோஹத்தின் சன்னிதியில்,
நாஹமித் தேஹமில்லை நன்குணர்ந்து, -மோஹமாய்,
பிண்ணனியில் மேயும் பசுபாசம் ஓட்டிட,
கண்ணனை நெஞ்சே கருது

———————————————————————————————————————-

படங்களுக்கு நன்றி :

http://kamadenu.blogspot.in/2014_01_01_archive.html

கிரேசி மோகன்

கண்ணன் திருப்புகழ் (வெண்பா)….
————————————————————–
’’கண்ணனை நெஞ்சே கருது’’
—————————————————–

சூர்பணகை ஆனாலும், சுந்தரி ஆனாலும்,
பார்ப்பன எல்லாம் பரம்பொருளே – தாற்பரியம்
தன்னை உணர்ந்து தவறா(து) இருந்திட,
கண்ணனை நெஞ்சே கருது!

சதிரிள மாதர் சகவாச தோஷம்,
உதிரிலைக் காலம் உணர்வாய் – மதிளரங்க
மன்னனை, மாயனை, மண்புகுந்த ஆயனை,
கண்ணனை நெஞ்சே கருது!

பண்டரி எங்குளான், பாலன் புகன்றிட,
விண்டதிரத் தூண்வாய் வெளிப்பட்ட – பண்டரியில்
தன்நினைவு தப்பத் துதிப்போர்க்(கு) அருள்புரியும்,
கண்ணனை நெஞ்சே கருது!

பட்டதெல்லாம் பாழாகும், தொட்டதெல்லாம் தூளாகும்
எட்டிய(து) ஏதும்வாய்க்(கு) எட்டாது – அட்டமியில்
விண்ணகன்று தாய்மாமன் வெஞ்சிறைக்கு வந்தவனை
கண்ணனை நெஞ்சே கருது!

வானிருந்த, கீழிறங்கி தூணிருந்த, தந்தவர
வானிருந்த, தாம்பு வடமிருந்த – மாவிருந்தை
உண்ணுதற்(கு) ஆகா(து), உறியேறும் ஆகாயக்
கண்ணனை நெஞ்சே கருது!!
————————————————————————————————————

படங்களுக்கு நன்றி:

http://kamadenu.blogspot.in/2011_12_01_archive.html