Category: கவிதைகள்

முனைவர் நா. சியாமளா
உதவிப் பேராசிரியர் 
தமிழ்ப் படைப்பாக்கத்துறை 
குமரகுரு பன்முகக் கலை அறிவியல் கல்லூரி, சரவணம்பட்டி கோயம்புத்தூர் -49.
தொடர்பு எண் -9159033963

மகாதேவ ஐயர் ஜெயராம்சர்மா
மேனாள் தமிழ் மொழிக்கல்வி இயக்குநர்
மெல்பேண்,  ஆஸ்திரேலியா

நாட்டுக்கோட்டை  தந்த நல்லதமிழ்  முத்து
நந்தமிழின் கவிதைக்கு அவரென்றும் சொத்து
பாட்டுக்கோட்டை கட்டியவர் பரிமளிக்க மகிழ்ந்தார்
பாட்டுத்தேரில்  ஏறியவர் பலர்வியக்க  வந்தார்

கண்ணதாசன் என்றவரும் பெயர்சொல்லி வந்தார்
கண்ணனுக்கே தாசனென்று காலமெலாம் வாழ்ந்தார்
எண்ணம் எலாம் கண்ணனாகி  எப்பொழுதும் இருந்தார்
எண்ணரிய கவிதைகளை எழுதியவர் குவித்தார்

கம்பனாகி நிற்பார் காளிதாசன் ஆவார்
இளங்கோவாய் எழுந்து கவிபாடி நிற்பார்
வள்ளுவராய் மாறுவார் வாழ்வியலைப் பாடுவார்
உள்ளமதைத் திருத்திவிட  உகந்தபடி பாடுவார்

மதுவாற்றில் நீந்தினார் மங்கைசுகம் நாடினார்
எதுவுமே அறியாமல் எடுத்தெறிந்தும் ஏசினார்
சமயத்தை இகழ்ந்தார் தத்துவத்தை வெறுத்தார்
சடம்போல கவிஞர் தன்வாழ்வை வாழ்ந்தார்

ஆண்டவனின் அருளாலே மீண்டார் நம்கவிஞர்
அஞ்ஞான இருளிலே வாழ்ந்ததாய் உணர்ந்தார்
மெஞ்ஞானம் பேசினார் மெஞ்ஞானம் எழுதினார்
மேலான தத்துவங்கள் விளங்கும்படி பாடினார்

பட்டினத்தார் திருமூலர் பலசித்தர் கருத்தை
படித்தவரும் பாமரரும் விளங்கும்படி பாடினார்
கட்டிலுக்கும் பாடினார் தொட்டிலுக்கும் பாடினார்
காடுவரை போகும்வரை கண்ணதாசன்   பாடினார்

கண்ணதாசன் தனிப்பாடல் அத்தனையும் படித்தால்
எண்ணரிய தத்துவங்கள் எமக்கெல்லாம் விளங்கும்
கண்ணனது கருணையினால் கண்ணதாசன் பாடினார்
கண்ணதாசன் கவியுலகில் காலமெலாம் வாழுவார்

பாசமலர் ஆகியும் கண்ணதாசன் இருப்பார்
பாலும் பழத்தையும் பக்குவமாய் கொடுப்பார்
படிக்காத மேதையாய் பாட்டுலகில் திகழுகிறார்
பார்த்தால் பசிதீர பலகவிதை  அளித்துள்ளார்

சங்கத் தமிழுடுத்துச் சந்தமுடன் பாடுவார்
சபையேறிக் கவிஞர் தமிழ்மணக்கப் பாடுவார்
பொங்கிவரும் ஊற்றாக புறப்பட்டுக் கவிதைவரும்
எங்கிருந்து வருகிறதோ எல்லாமே கண்ணனென்பார்

அர்த்தமுள்ள இந்துமதம் அருங்கருத்துப் பெட்டகமே
யேசுபிரான் காவியமோ நெஞ்சுக்கு ஒத்தடமே
கவியரசர் கண்ணதாசன் கலைவாணி வரமாவார்
புவிமீது கவியரசர் கவிதையாய்  வாழுகிறார்!

மகாதேவ ஐயர் ஜெயராம்சர்மா
மேனாள் தமிழ் மொழிக்கல்வி இயக்குநர்
மெல்பேண், ஆஸ்திரேலியா

பத்து அவதாரம் பரந்தாமன் எடுத்தார்
பழிபாவம் போக்கிடவே அவதாரம் எடுத்தார்
அத்தனையும் இத்தரையில் அறமோங்கச் செய்ய
அவரெடுத் தாரென்று  அகமிருத்தி வைப்போம்

மச்சமாய் வந்தார் கூர்மமாய் வந்தார்
வராகமாய் வந்தார் நரசிம்மன் ஆனார்
வாமன வடிவத்தில் வந்தாரே பரந்தாமன்
பரசுராம ரானார் அரக்கர்மாளச் செய்தார்

உத்தமனாய் வந்தார் சத்தியத்தைக் காத்தார்
உயர்வுடைய இராமனாய் அவதாரம் எடுத்தார்
சத்தியத்தைச் சந்தர்ப்பம் ஆக்கியே நின்று
கிருஷ்ணாய் மலர்ந்தார் கீதையைத் தந்தார்

ஒன்பது அவதாரம் எம்பெருமாள் கொண்டார்
உட்பகையை உடைத்துமே உயர்பொருளாய் உயர்ந்தார்
பாரினிலே பலதுஷ்டர் பல்கி வருகின்றார்
பத்தாவ தவதாரம்  பரந்தாமன் எடுப்பார்

கஷ்டங்கள் ஓங்கும் துட்டர்கள் வருவார்
கண்ணியத்தில் உள்ளார் கண்ணீரில் மிதப்பார்
சத்தியமும் தர்மமும் தடுமாறித் தவிக்கும்
இத்தருணம் எம்பெருமாள் அவதாரம் எடுப்பார்

அவதாரம் அனைத்துமே அல்லெலாம் போக்கும்
அவதார தத்துவத்தை அறியாதார் அறியார்
அறிந்துணர்வார் அனைவருமே அஞ்ஞானம் இல்லார்
அஞ்ஞானம் அகற்றுவதே ஆண்டவனின் அவதாரம்!

மகாதேவ ஐயர் ஜெயராமசர்மா 
மேனாள் தமிழ் மொழிக் கல்வி இயக்குநர் 
மெல்பேண், ஆஸ்திரேலியா

நம்பிக்கை என்றால் நம்பிக்கை வேண்டும்
தும்பிக் கையானை தொழுகிறார் பலபேர்
பற்பல மதங்கள் பல்வகைத் தெய்வங்கள்
இப்புவி இருப்பதை எண்ணிட வேண்டும்

அல்லா என்கிறார் யேசு என்கின்றார்
அரியே என்கிறார் அரனே என்கிறார்
அகிலாண் டேஸ்வரி அம்பிகை என்கிறார்
நம்பிக்கை என்பது நாமமாய் பெருகுது

உண்டு என்று நம்பிக்கை வைக்கிறார்
இல்லை என்று சொல்பவர்  இருக்கிறார்
உண்டா இல்லையா என்பதை நினைக்க
நம்பிக்கை எதுவெனத் தெளிந்திட வேண்டும்

பாசம் நேசம் பர்த்ததே இல்லை
அன்பு கருணை பார்த்ததே இல்லை
எல்லாம் இருக்கு என்னும் நம்பிக்கை
எல்லோர் இடத்தும் இறுக்கமாய் இருக்கு

நிறமும் இல்லை உருவும் இல்லை
கண்ணால் எவரும் கண்டதும் இல்லை
இருப்பதாய் நம்பிக்கை இறுக்கமாய் இருக்கு
விமர்சனம் வெறுப்பை வெளியிட  மாட்டோம்

இவைகள் அனைத்தும் நிறைந்தது இறையே
இறையில் நம்பிக்கை தவறா சொல்வீர்
நம்பிக்கை உருவமே இறையே ஆகும்
நம்பிக்கை என்றுமே நல்லதே காட்டும்

நம்பினார் கெடுவதில்லை நம்பினார் வீழ்வதில்லை
நான்மறையும் நம்பிக்கை நல்வழியும் நம்பிக்கை
மதங்கூறும் தத்துவங்கள் மகத்தான நம்பிக்கை
மகத்தான நம்பிக்கை மாநிலத்தில் இறையாகும்!

மகாதேவ ஐயர் ஜெயராமசர்மா
மேனாள் தமிழ் மொழிக் கல்வி இயக்குநர்
மெல்பேண், ஆஸ்திரேலியா

காவியம் பாடினால் கம்பனை விஞ்சுவார்
கற்பனைத் திறனில் உச்சந் தொட்டவர்
பக்தியின் வழியில் பயணந் தொடங்கினார்
பாடினார் பாடினார் பக்தியைப் பாடினார்

கல்வியில் சிறந்தவர் கசடுகள் களைந்தவர்
எண்ணிடும் அனைத்தும் ஏற்றமாய் கொண்டவர்
மண்ணிலே வாழும் மக்களின் மனத்தில்
பக்தியின் பெருமையை பாடியே கொடுத்தார்

அரசனின் அவையில் அமைச்சராய் இருந்தார்
அதிகாரம் ஆணவம் அவரகம் இல்லை
ஆண்டவன் நினைப்பே அவரிடம் நிறைந்தது
அமைச்சராய் இருப்பதை மறந்தே இருந்தார்

அரன் அடியார்கள் பெருமையை அறிந்தார்
அவர் வரலாற்றை இணைத்திட  முனைந்தார்
எப்படி இணைக்கலாம் என்றவர் எண்ணினார்
பக்தியின் நினைப்பவர் புத்தியில் புகுந்தது

பக்தியை உத்தியாய் கொண்டனர் அவரும்
பக்தியைக் காட்டிடப் பதங்களை நாடினார்
புத்தியில் புகுந்திடப் பக்குவப் பதங்கள்
வந்துமே குவிந்தன வளர்ந்தன வளர்ந்தன

பற்பல குலங்கள் வந்த நல்லடியார்
அறுபத்து மூவரை பக்தியால் இணைத்தார்
பற்பல இடங்கள் பற்பல குணங்கள்
பக்தியில் கலந்திட பகர்ந்தனர் கதையை

ஒதுக்கப் பட்டவர் உயர்வுடன் மிளிர்ந்தார்
வெறுக்கப் பட்டவர் வணங்கிட  உயர்ந்தார்
ஆலயம் எங்கணும் சிலையாய் அமர்ந்தார்
குருபூசை ஆற்றிடும் பெருநிலை எய்தினார்

அன்பால் இறையினைத் தொட்டவர் அடியவர்
அவரது கதையினைத் தொட்டவர் சேக்கிழார்
சேக்கிழார் தமிழால் செப்பிய கதையே
மாக் கதையாக  மலர்ந்தது புராணமாய்

நாயகன் இல்லை நாயகி இல்லை
எதிரியாய் பாத்திரம் எதுவுமே இல்லை
இறை அடியாரின் நிறைவுகள் கருவாய்
அமைந்திடும் வண்ணம் அமைந்தனர் கதையை

பாமரர் படித்தவர் பக்குவம் பெற்றிட
பக்தியை தேர்ந்து எடுத்தனர் சேக்கிழார்
காதலை உருக்கத்தைக் காட்டிடும் நிலையிலும்
கடவுளின் நினைப்பைக் காட்டியே எழுதினார்

பக்தியாய் மலர்ந்த நல்பெரிய புராணத்தை
பாமரர் படித்திட வைத்தவர் நாவலர்
நாவலர் பெருமான் செய்தநற் பணியால்
சேக்கிழார் கவியெலாம் மலர்ந்தன வசனமாய்

ஆலயந் தோறும் பெரிய புராணத்தை
ஆறுமுக நாவலர் விரித்துமே உரைத்தார்
அரன் அடியாரின் பெருமையைப்  பக்தியை
பாமரர் விளங்க நாவலர் செய்தார்

தத்துவம் சமயம் தலையாய தொண்டு
சித்ததில் இருக்கச் செய்தவர் சேக்கிழார்
சேக்கிழார் சிந்தனை சிறந்த நற்சிந்தனை
போற்றியே நிற்போம் பூசனை ஆற்றுவோம் !

மகாதேவ ஐயர் ஜெயராமசர்மா
மேனாள் தமிழ் மொழிக்கல்வி இயக்குநர்
மெல்பேண், ஆஸ்திரேலியா

பாரதி வந்தார் பற்பல பாடினார்
பண்டிதர் ஒதுக்கினார் பாமரர் ஏந்தினார்
காரிருள் போக்கிடும் கதிரவன் ஆகினார்
கன்னித் தமிழின் காவலன் ஆனார்

பாட்டில் புதுமை பதத்தில் புதுமை
ஊட்டியே கவிதை உவப்பாய் அளித்தார்
நாட்டை நினைத்து நல்லன மொழிந்தார்
நாடே அவரின் உயிராய் இருந்தது

பாரதி காலம் கவிமணி இருந்தார்
நாமக் கல்லின் நற்கவி இருந்தார்
எட்டய புரத்து பாரதி மூச்சை
சுப்பு ரத்தினமே சுவாசித்து நின்றார்

நாமக் கல்லார் நற்கவி ஆவார்
கவிமணி தமிழின் கற்கண் டாவார்
பரதி தாசனாய் வந்தார் ஒருவர்
அதுவே அவரின் ஆசியே ஆகும்

சுப்பு ரத்தினம் எழுந்தார் தாசனாய்
சுப்பிர மணிய பாரதி வாழ்த்தினார்
வாழ்த்திய வாழ்த்து வளர்ந்தே வந்தது
மாநிலம் பாரதி தாசனைப் பெற்றது

அன்னிய ஆட்சியில் பாரதி வாழ்ந்தார்
அடிமை என்பது அனலாய் கொதித்தது
அனலை அகற்றப் பாரதி பாடினார்
அடிமைக் கெதிராய் படைப்புகள் ஈந்தார்

பாரதி தாசனின் காலமோ வேறு
அடிமை அகன்று சுதந்திரம் மலர்ந்தது
தமிழே ஆட்சி தமிழே தலைமை
அதனால் தமிழை அமுதம் என்றார்

பாரதி தமிழை தேனாய் ஆக்கினார்
அவரின் தாசனோ உயிராய் ஆக்கினார்
பரதி வழியில் பயணந் தொடரினும்
அவரின் சிந்தனை புதிதாய் மிளிர்ந்தது

கல்வியை இருவரும் கண்ணே என்றனர்
பெண்ணின் கல்வியை பெரிதாய் எண்ணினர்
குருவின் கருவை மனத்தில் கொளினும்
அவரின் சிந்தனை அகன்றே நின்றது

பாரதி உள்ளம் புதுமைகள் இருந்தும்
பக்தியை பாரதி பக்குவம் என்றார்
பாரதி தாசனோ பக்தியைப் பாரா
புரட்சிக் கவியாய் ஊர்வலம் வந்தார்

பாரதி பாடல்கள் திரைக்கு வந்தன
பாரதி தாசனே திரைக்குள் நுழைந்தார்
நாடகம் எழுதினார் நடிக்கவும் செய்தார்
நாட்டுப் பாடலை நயமுடன் அணைத்தார்

புரட்சிக் கவிஞராய் இருவரும் எழுந்தார்
புதுமைகள் புகுத்தி கவிஞராய் ஒளிர்ந்தார்
பாரதி வாழ்த்திய கவிஞராய் அமைந்தார்
பாவேந்த ரெனவே பாரினில் திகழ்கிறார்