Category: தலையங்கம்

பவள சங்கரி

தலையங்கம்

விவசாயத்திற்கு அடுத்தபடியாக மிகப்பெரிய வேலை வாய்ப்பை ஏற்படுத்தக்கூடியதும், ஏற்றுமதி, உள்நாட்டு சந்தை போன்றவைகளால் பொருளாதார முன்னேற்றத்திற்கு பெருமளவில் உறுதுணையாக இருக்கக்கூடியதுமான ஜவுளித்துறைக்கு பாதகம் ஏற்படும் வகையில் 70 ஆண்டுகளாக இல்லாத வரி விதிப்பை தவிர்த்து பல இலட்சம் மக்களின் வாழ்வாதாரத்தைக் காப்பாற்ற அரசு வழி வகுக்கவேண்டியது அவசியம். ஜவுளித் துறையினர், அனைத்திந்திய அளவில் போராட்டங்கள் நடத்தி வரும் இந்த மூன்று நாட்களில் மட்டும் பல ஆயிரம் கோடி ரூபாய் உற்பத்தி இழப்பும், பொருளாதார இழப்பும் சந்தித்துள்ளனர் என்பது வேதனையான செய்தி. நமது நிதி அமைச்சர் இதனைக் கருத்தில்கொண்டு, மேற்கொண்டு பல ஆயிரம் கோடி பண இழப்பு ஏற்படாமல் உடனடி நடவடிக்கை எடுக்கவேண்டும் என்பதே மக்கள் எதிர்பார்ப்பாக உள்ளது.

பவள சங்கரி

தலையங்கம்

2006இல் தி.மு.க ஆட்சியில் இருந்தபோது அப்போதைய முதல்வர் திரு. கருணாநிதி அவர்களால், வண்ணத் தொலைக்காட்சிப் பெட்டிகள், அரிசி போன்றவைகள் மூலம் ஆரம்பிக்கப்பட்ட இலவசங்கள் ஜெயலலிதா ஆட்சியிலும் தொடர்ந்து கொண்டிருந்தன. இதனால் இன்று தமிழகத்தின் கடன் சுமை 2.56 இலட்சம் கோடியாக ஆகியுள்ளது என்று ரிசர்வ் வங்கி அறிவித்துள்ளது அதிர்ச்சியான செய்தி. தமிழ்நாட்டில் மொத்த மக்கள் தொகையில் கல்வியறிவு பெற்றவர்கள் 80.09% . அதாவது அனைத்திந்திய அளவில் 16வது இடத்தில் தமிழ்நாடு உள்ளது. இவ்வளவு இலவசங்கள் வழங்கியும் 21.2% மக்கள் அதாவது மொத்த ஜனத்தொகையான 6.78 கோடியில், 1.2 கோடி மக்கள் வறுமைக்கோட்டின் கீழ் வாழ்கிறார்கள் என்பதே வேதனையான செய்தி. அனைத்திந்திய அளவில் வறுமைக்கோட்டின் கீழ் வாழக்கூடிய மொத்த மக்கள் தொகையில் 7வது இடத்தில் தமிழ்நாடு உள்ளது. தேவையில்லாமல் இலவசங்கள் வழங்குவதால் மிகவும் அத்தியாவசியமான, பொது மக்களுக்குத் தேவையான மருத்துவம், கல்வி, சாலையமைப்பு போன்றவைகளில் கவனம் செலுத்துவதில் பின்னடைவு ஏற்பட்டுவிடுகிறது. அதுமட்டுமின்றி சென்ற ஆண்டைவிட கடன் சுமை 18% அதிகரித்து இன்று 67% ஆக உயர்ந்துள்ளது. அதிகம் கடன் சுமை உள்ள மாநிலங்களான உத்திரப்பிரதேசம், மகாராஷ்டிரம், மேற்கு வங்காளம் ஆகியவற்றிற்கு அடுத்தபடியாக 4வது இடத்தில் நம் தமிழ்நாடு உள்ளது. பல ஆண்டுகளாக பொருளாதாரத்தில் மிகவும் மேம்பட்டு இருந்த தமிழ்நாடு இன்று மிகவும் தாழ்ந்த நிலையில் உள்ளது என்பது அதிர்ச்சியான தகவல். இரசாயணம், வாகனத்தயாரிப்புத்துறை ஆயத்த ஆடைகள் தயாரிப்புத்துறை போன்ற பல்வேறு துறைகளில் மிகச்சிறந்த தொழில் அமைப்பைக் கொண்டு கடந்த 20 ஆண்டுகளாக 7% முதல் 20% வரை தொடர் வளர்ச்சியைக் கொண்டிருந்த நமது தமிழ்நாடு இன்று மிக மோசமானதொரு நிலையை அடைந்ததற்கு உண்மையான காரணம் மாநிலப் பொருளாதாரத்தை தவறான முறையில் கையாண்டதே என்று தென் பகுதிகளுக்கான தொழில் அமைப்பின் தலைவர் திரு ரவிச்சந்திரன் கூறியுள்ளது சிந்திக்கத்தக்கது.

பவள சங்கரி

தலையங்கம்

நீட் தேர்வில் தமிழகத்திலிருந்து 80,000 மாணவர்கள் கலந்துகொண்டனர். அதில் தமிழ் வழியில் தேர்வு எழுதியவர்கள் 15,000 மாணவர்கள். இதில் அதிக மதிப்பெண்களைப்பெற்ற 25 மாணவர்கள் பட்டியலில் ஒரு தமிழ் மாணவர்கூட இடம் பெறவில்லை. நமது அண்டை மாநிலங்களான கேரளா, கர்நாடகா, ஆந்திரா, தெலுங்கானாவைச் சார்ந்த மாணவர்கள் 8 இடங்களைப் பிடித்துள்ளனர் என்பது குறிப்பிடத்தக்கது. மொத்த மதிப்பெண்களில் நமது தமிழக மாணவர்கள் சராசரியாக 50% மதிப்பெண் மட்டுமே பெற்றுள்ளனர் என்பது வருத்தமான செய்தி.

நேற்று சட்டசபையில், தமிழகக் கல்வி வழியில் நீட் தேர்வில் கலந்துகொண்ட மாணவர்களில் 85% மாணவர்களுக்கு நமது மருத்துவக் கல்லூரிகளில் வாய்ப்பு வழங்கப்படும் என்றும், சி.பி.எஸ்.இ பாடத்திட்டம் மூலமாக பயின்ற 15%  மாணவர்களுக்காகவும் ஒதுக்கப்படும் என்றும் தமிழக அரசு அறிவித்துள்ளது. முன்பே நமது உச்ச நீதி மன்றம், உயர்நீதி மன்றங்களில் இதற்கு விலக்கு அளிக்க மறுத்துள்ள நிலையில் இந்த அறிவிப்பானது சட்ட அங்கீகாரத்தைப் பெறுமா என்பது ஐயமே. அரசு அடுத்த ஆண்டிற்கு இப்போதிருந்தே ஐ.ஏ.எஸ்., ஐ.பி.எஸ். போன்ற தேர்வுகளுக்குப் பயிற்சி அளிப்பது போல நீட் தேர்வுகளுக்கும் தமிழகம் முழுவதும் சிறந்த பயிற்சி அளிக்க ஆவண செய்யவேண்டியதே அவசியமாகும். அதைவிடுத்து குறைவான மதிப்பெண் பெற்றவர்களுக்கு வாய்ப்பளித்தாலும் அவர்களுடைய எதிர்காலம் கேள்விக்குறியாக இருக்கும் என்பதே நிதர்சனம்.

பவள சங்கரி

தலையங்கம்

30 சதவிகிதத்திற்குக் குறைவாக தொடர்ச்சியாக 5 ஆண்டுகள் மாணவர்களை தேர்ச்சியடையச் செய்யத் தவறும் கல்லூரிகளின் அங்கீகாரம் ரத்து செய்யப்படும் என்று AICTE தலைவர் அறிவித்துள்ளார்.

பொறியியல் கல்லூரியில் பணியில் அமர்பவர்கள் 4 மாத பயிற்சியில் தேர்ச்சியடைய வேண்டியது அவசியம். இல்லையென்றால் கல்லூரிப் பணியில் அமர முடியாது!

பவள சங்கரி

தலையங்கம்

தமிழ் நாட்டில் மொத்தம் இருப்பது 535 பொறியியல் கல்லூரிகள். மருத்துவப் படிப்பிற்கு அடுத்ததாக பொறியியல் வல்லுநர் ஆவதே இன்றைய சமுதாயத்தின் பெருங்கனவாக உள்ள நிலையில் பெரும்பாலான கல்லூரிகள் வணிக நோக்கில் மட்டுமே செயல்படுவது வருத்தமளிக்கக்கூடியது.

தேர்வுகளில் மொத்த கல்லூரி மாணவர்களில் ஒருவரைக்கூட வெற்றி பெற வைக்க இயலாத பொறியியல் கல்லூரிகளை ஏன் தகுதி நீக்கம் செய்யக்கூடாது? (தமிழ்நாட்டில் தற்போது இரண்டு கல்லூரிகள் இந்த மோசமான நிலையில் உள்ளன)

கல்லூரியின் மொத்த மாணவர்களில், ஒற்றை இலக்க எண்ணிக்கையில் மட்டும் தேர்வில் தேர்ச்சி பெறச்செய்த சுமாராக 20 கல்லூரிகளும், இரட்டை இலக்கத்தில் 20 மாணவர்கள் எண்ணிக்கைக்குள் (சுமாராக 40 முதல் 50 கல்லூரிகள்) தேர்ச்சி பெறச்செய்த கல்லூரிகளை தகுதி நீக்கமோ அல்லது பல கல்லூரிகளை இணைத்து ஒரே கல்லூரியாக்கி அதனுடைய உள்கட்டமைப்பு மற்றும் ஆசிரியர்களின் தரத்தையும் சரிசெய்தால் தீர்வுக்கான வழியாக இருக்கலாம்.

மாணவர்களின் கட்டணத்தை நிர்ணயம் செய்யும் அரசு, கல்லூரிகளின் உள்கட்டமைப்பு மற்றும் ஆசிரியர்களுடைய தகுதிகளையும் AICTE உதவியோடு தரம் நிர்ணயிக்கப்பட வேண்டும் என்ற கொள்கைகளை கட்டாயம் கடைபிடிக்கவேண்டிய அளவில் உருவாக்கவேண்டியது அவசியம்.

பள்ளிகளில் நூறு சதவிகிதம் தேர்ச்சி பெறச்செய்யும் கல்வி நிறுவனங்களைப்போல தமிழ்நாட்டில் மொத்தம் உள்ள 535 கல்லூரிகளில் ஒரு கல்லூரிகூட நூறு சதவிகித மாணவர்களை தேர்ச்சி பெறச்செய்வதில்லை. அதிகபட்சமாக 2 அல்லது மூன்று கல்லூரிகளே 90 சதவிகிதம் தேர்ச்சி பெறச்செய்துள்ளனர். அனைத்திந்திய அளவில் சிறந்த நூறு கல்லூரிகளில் 2 அல்லது 3 கல்லூரிகளே தமிழ்நாட்டில் இடம் பெற்றிருப்பதும், உலக அளவில் பார்க்கும்போது சுமார் 4 அல்லது 5 கல்லூரிகளே இந்தியாவில் உலக அளவு தரத்தோடு இருப்பதும் பொறியியல் கல்வித்துறையில் நம் கல்வித்தரம் உயர்வதற்கு மேம்பட்ட செயல்பாடுகள் அத்தியாவசியம் என்பதை உணர்த்துகின்றன.

இந்த ஆண்டு பொறியியல் கல்லூரிகளில் தங்கள் குழந்தைகளை சேர்ப்பதற்கு முன்பு அக்கல்லூரிகளின் தரத்தை ஆய்வு செய்த பின்னரே குழந்தைகளைச் சேர்ப்பது நலம்.

பவள சங்கரி

தலையங்கம்

கோவை மாநகராட்சியில் வீடுகள் கட்டுவதற்கு மாநகராட்சி அலுவலகங்களுக்கு கால் கடுக்க நடக்க வேண்டியதில்லை. கணினிமயமாக்கப்பட்டுள்ள, அலுவலகத்தில் அங்கிருக்கும் திரைச்சீலைகளுக்குக்கூட கையூட்டு தர வேண்டியதில்லை. கட்டிட வரைபடங்கள், அதற்குரிய அனைத்து ஆவணங்களையும் பதிவு செய்துவிட்டால், உடனடியாக குறுஞ்செய்தி மூலமாக பதிவு எண் அளிக்கப்பட்டுவிடுகிறது. அதில் எத்தனை நாட்களுக்குள் அந்த வரைபடம் ஏற்றுக்கொள்ளப்படும் என்ற தகவல் அறிவிக்கப்படுகிறது. அந்த நாட்களுக்குள் ஒப்புதல் சீட்டும் வழங்கப்பட்டு விடுகிறது. மாற்றங்கள் தேவைப்படும்பட்சத்தில் அதன் காரணங்கள் கேட்டும் குறுஞ்செய்தி அனுப்பப்பட்டு இதன் மூலமாக குறைகள் நிவர்த்தி செய்யப்பட்டு கட்டிடம் கட்டுவதற்கான ஒப்புதல் வழங்கப்படுகிறது. இதன் மூலமாக ஒரு பைசா கையூட்டு கொடுக்காமல் ஒப்புதல் பெறும் முறை கோவையில் நடைமுறைப்படுத்தப்பட்டுவிட்டது. கோவையில் இது முடியும் என்றால் ஏன் ஈரோடு, சேலம், சென்னை, அகமதாபாத், குஜராத் போன்ற அனைத்து நகரங்களிலும் இதனை நடைமுறைப்படுத்த முடியாது. மத்திய அரசு இதற்கான ஒரு செயலியை உருவாக்கி முதலாவதாக அனைத்து மாநகராட்சிகளிலுமாவது செயல்படுத்தினால் மிகவும் பயனுடையதாக அமையும். இலஞ்ச ஒழிப்பின் முதல் நடவடிக்கையாகக்கூட இதைக் கொள்ளலாம். ஆறு மாதங்களுக்குள் அலுவலர்களின் நடவடிக்கைகள் ஆய்வு செய்யப்பட்டு விவரம் அளிக்கவேண்டும் என்று அறிவுறுத்தியுள்ள நடுவண் அரசு மாநகராட்சிகளிலும் இதை உடனடியாகச் செயல்படுத்தினால் சிறப்பாக இருக்கும்.

பவள சங்கரி

உலகிலுள்ள மொத்த குழந்தைகளில் இந்தியாவில் மட்டும் சுமாராக 31% குழந்தைகள் (1,21,000 ஆயிரம்) ஊட்டச்சத்து குறைபாடுகளாலும், கல்வி கற்பதற்குரிய வசதியின்றியும், சரியான வாழ்வாதாரங்களின்றியும் உள்ளதாக உலக சுகாதார நிறுவனம் அறிவித்துள்ளது. உலகில் முதலாவது இடத்திலுள்ள நம்மைவிட நைஜீரியா, பாகிஸ்தான், யுகாண்டா போன்றவைகள் முறையே 7, 6, 5 சதவிகிதங்களில் இருப்பதாக அறிவிக்கப்பட்டுள்ளது. தென் ஆப்பிரிக்க நாடுகளான யுகாண்டா, நைஜீரியா போன்ற நாடுகளில் உள்ள குழந்தைகளில் 95% பேர் ஊட்டச்சத்து குறைபாடுகளால் அவதியுறுகின்றனர். வளரும் நாடுகளில் முதல் இடத்தில் இருக்கும் நம் இந்தியா ஒரே ராக்கெட்டில் 109 சாட்டிலைட்டுகளை விண்ணில் செலுத்தியுள்ளது. விரைவில் மேலும் 45 ராக்கெட்டுகளை விண்ணில் செலுத்த இருக்கிறோம். செவ்வாய் கிரகத்திற்கும் ராக்கெட் அனுப்பிவிட்டோம். நமக்காக தனி ஜி.பி.எஸ் கூட உருவாக்கிவிட்டோம். இப்படி எத்தனையோ முன்னேற்றங்களுடன் பெருமைகள் கொண்டிருந்தாலும், மிக முக்கியமான பிரச்சனையான, நம் வருங்கால சந்ததிகளான குழந்தைகள் விசயத்தில் மிகவும் பின் தங்கி, நலிவுற்ற குழந்தைகள் உள்ள நாடுகளில் முதலாவது இடத்தில் இருப்பது வேதனை. பல்வேறு துறைகளுக்காக பல ஆயிரம் கோடிகளை ஒதுக்கும் மத்திய அரசு குழந்தைகளின் நல்வாழ்விற்காக கவனம் செலுத்தி நாளைய நமது சந்ததியினரை வாழ வைப்பார்கள் என்று நம்புவோம். குழந்தைகள் நலனில் எப்போதும் அதிக அக்கறை செலுத்தும் நமது பிரதமர் மோடி அவர்கள் இந்தப் பிரச்சனைகளில் தனி கவனம் செலுத்தி தீவிர நடவடிக்கை எடுப்பதன் மூலம் மக்கள் மனதில் நிலையான இடம் பிடிப்பார் என்பதும் உறுதி.

பவள சங்கரி

தலையங்கம்

இந்தியாவின் மொத்த உள்நாட்டு உற்பத்தி வருமானம் (ஜிடிபி) 6.1 சதவிகிதமாக சரிந்துவிட்டதாக நேற்றைய அறிவிப்பில் கூறப்பட்டுள்ளது. ஒவ்வொரு கட்சியினரும் அவரவர் நிலைக்கேற்ப இதைப்பற்றி விமர்சனம் செய்கின்றனர். உயர் மதிப்புடைய நோட்டுகள் செல்லாது என்ற அறிவிப்பிற்குப் பிறகு நமது நாட்டின் பொருளாதார வளர்ச்சி சரிவைச் சந்தித்துள்ளது. பொருளாதார வல்லுநர்கள் கூறுவதை விட்டுவிட்டு யதார்த்தமாக வியாபார உலகத்தையும் பொது மக்களின் பொருளாதார நிலையையும் பார்க்கும்போது வேதனைப்படாமல் இருக்க முடியவில்லை. செழுமையான வணிகம் இல்லை. மக்களிடம் தாராளப் பணப்புழக்கமும் இல்லை. இந்த நிலையில் ஜிஎஸ்டி ஜூலை 1ஆம் தேதியிலிருந்து அமலுக்கு வருவதாக அரசு அறிவித்துள்ளது இப்பிரச்சனையை மேலும் அதிகரிக்கச் செய்யக்கூடும். சரக்கு மற்றும் சேவை வரி (ஜி.எஸ்.டி) பற்றிய தெளிவான விளக்கங்கள் இதுவரை அதிகாரப்பூர்வமாக அறிவிக்கப்படவில்லை. இது குறித்த முழுமையான விவரங்களும் இதுவரை வெளியிடவில்லை. சாதாரணமாக சாப்பிடும் உணவகங்களுக்கு வரியை அதிகரித்தும், நட்சத்திர உணவு விடுதிகளுக்கான வரிவிதிப்பு குறைத்தும் அறிவிக்கப்பட்டுள்ளதால் மக்கள் தங்கள் எதிர்ப்பைத் தெரிவிக்கும் வகையில் நடத்திய போராட்டத்தில் அனைத்து உணவு விடுதிகளும் மூடப்பட்டிருந்தது. பொருளாதாரப் பிரச்சனைகள் இருக்கும் சமயத்தில் இதற்கான தீர்வை வல்லுநர்கள் மூலமாக ஆராய்ந்த பின்பே சரக்கு மற்றும் சேவை வரி (ஜி.எஸ்.டி) அமலாக்கப்படுவது சரியாக இருக்கும். ஜிஎஸ்டி என்பதை மத்திய , மாநில அரசுகள் தங்கள் அரசு சார்ந்த நலத்திட்டங்களாகக் கருதாமல், வணிகர்கள், பொது மக்கள் நலம் சார்ந்ததாக கருதும் வகையில் சிறப்பாக அமல் படுத்தினால் இத்திட்டம் முழுமையாக வெற்றி பெறலாம்.

பவள சங்கரி

குழந்தைகள் முதல் பெரியவர்கள் வரை அனைவரும் அன்றாடம் உபயோகிக்கும் பால் போன்ற அத்தியாவசியப் பொருட்களில் கலப்படம் செய்கிறார்களா என்ற ஐயமே பெரும் அச்சத்தை ஏற்படுத்தக்கூடியது. ஆனால் இன்று பால் கலப்படம் செய்யப்பட்டு வருகிறது என்று உறுதியாக நம்பும் சூழல் ஏற்பட்டுவந்துள்ள நிலையில் இதற்கு எதிரான போராட்டத்தை நாம் முன்னெடுக்கவேண்டிய அவசியம் ஏற்பட்டுள்ளது.

கலப்படப்பாலுக்கு எதிராகப் போராடவேண்டிய நேரம் இது என்பதை நம்பும் கேரள மாநிலத்திற்குள் ஒரு சொட்டு கலப்படப்பால்கூட செல்ல முடியாது. அதனுடைய எல்லைகளைச்சுற்றி நடமாடும் ஆய்வூர்திகளை வைத்துப் பரிசோதனை செய்தே அனுமதிக்கின்றனர். முன்பு தமிழகத்திலிருந்து சென்ற காய்கறிகளை, இராசயண உரங்கள், பூச்சிக்கொல்லி மருந்துகள் பயன்படுத்தப்பட்டுள்ளதாகக் கூறி தடை செய்தனர். கேரளாவைப் பின்பற்றி தெலுங்கானாவும் இந்த கலப்படப்பாலுக்கு எதிரான போரினை ஆரம்பித்துள்ளனர். நமது பால்வளத் துறை அமைச்சர் இனி எப்போது என்ன நடவடிக்கை எடுக்கப் போகிறார்?

பவள சங்கரி

தலையங்கம்

மருத்துவ மேற்படிப்பிற்கான கட்டணங்கள் பற்றி அரசு அறிவிப்பு ஏற்கக்கூடியதா?
மிகப்பெரிய ஏற்றத்தாழ்வை ஏற்படுத்தியுள்ள, அரசு ஒதுக்கீட்டிற்கும் கல்லூரி நிர்வாகத்தின் ஒதுக்கீட்டிற்கும் தனித்தனி கட்டணம் என்ற வகையில் கட்டண விகிதங்கள் நிர்ணயிப்பது வருந்தத்தக்கது . இதனால் மாணவர்களின் சுமையை அதிகமாக்கக்கூடியதாகவே இருக்கும். மருத்துவப் படிப்பு முடித்தவுடன் ஓராண்டு கிராமப்புறங்களில் பணி செய்யவேண்டிய சூழலில், அவர்கள் மேற்படிப்பு படிக்க ஆர்வம் இருந்தால், ஆண்டிற்கு 12 /13 இலட்சம் என எப்படி கட்டணம் செலுத்த முடியும்? இதைத் தவிர்த்து தங்கும் விடுதி செலவு, உணவு, போக்குவரத்து போன்றவற்றின் அதிகப்படியான செலவு அவரவர் விருப்பம்போல் செய்துகொள்ளலாம். தரம் மிகுந்த மருத்துவர்களை உருவாக்கவேண்டும் என்ற நல்லதொரு செயல் திட்டத்திற்கு இதுபோன்ற முட்டுக்கட்டைகள் பாதகமாக அல்லவா இருக்கும்? அரசு ஒதுக்கீட்டைப் போன்றே மற்ற அனைத்து ஒதுக்கீடுகளுக்கும் பொதுவாக குறைவான கட்டணங்களை நிர்ணயித்து திறமை மிகுந்தவர்களை ஊக்குவிக்க வேண்டியது அரசின் கடமை. உயிர் காக்கும் மருத்துவத்தைப் பொறுத்தவரை, பொருளாதார நோக்கில், வருமானம் சம்பாதிப்பதைக் குறியாகக்கொண்டு கல்லூரி நடத்துவது ஏற்புடையதல்ல.

அனைவருக்கும் 12ஆம் வகுப்புவரை இலவச கல்வி என்று பல மாநிலங்கள் செயல்பாட்டில் இருக்கும்போது ஒன்றாம் வகுப்பிற்கு 4000 ரூபாய், 12 ஆம் வகுப்பு வரை பல்வேறு கட்டணங்கள் இருப்பது அரசின் கொள்ளைகளில் உள்ள குளறுபடிகளைக் காட்டுகிறது. 12ஆம் வகுப்பு வரை உள்ள அனைத்துப் பள்ளிகளும் அரசுடைமையாக்கப்படவேண்டும் என்பதே கல்வியாளர்கள் மற்றும் பொதுமக்களின் வேண்டுகோள்.

பவள சங்கரி

தலையங்கம்

தேர்தல் செலவுகளுக்கு கட்சிகளுக்கு அரசு செலவுத்தொகையை அளிப்பதற்கு தேர்தல் ஆணையம் எதிர்ப்பு. தேர்தலில் கட்சியில் செய்யும் செலவுகளில் எது அரசு கொடுத்த பணத்தில் செய்யப்படுகிறது, எது அவருடைய கட்சிப்பணத்திலிருந்து செய்யப்படுகிறது என்று பிரித்துப்பார்க்க முடியாது என்ற காரணம் கூறப்பட்டுள்ளது. தேர்தல் நடைமுறையில் நிறைய சீர்திருத்தங்கள் செய்யப்படவேண்டியது பற்றி கூறியிருப்பதும் குறிப்பிடத்தக்கது. கட்சி நன்கொடைகளே ஊழலின் ஆரம்பமாக உள்ளது. வாக்காளர்களுக்கு இலவசங்கள் கொடுப்பதும், பணம் கொடுப்பதும் ஊழலை ஊக்குவிக்கிறது. தேர்தலில் வெற்றிபெறும் கட்சிகள் அரசு இயந்திரத்தை முறைகேடாகப் பயன்படுத்தி பல ஆயிரம் கோடிகளை மக்களிடம் சுரண்டுவதற்கும் இதுவே காரணமாகவும் அமைந்துவிடுகிறது. தேர்தலுக்காக கட்சியினர் நன்கொடை பெறுவதையும் செலவு செய்வதையுமே முற்றிலுமாக தடை செய்யப்படவேண்டும். தேர்தல் செய்திகளை அரசே வெளியிட்டு தேர்தலை நடத்தினால் பல்வேறு முறைகேடுகள் தடை செய்யப்படும். வாக்காளர்களுக்கு வாக்களிப்பதற்கு பணம் இலவசங்கள் கொடுப்பவர்களையும் அவர்கள் சார்ந்த கட்சிகளையும் பத்து ஆண்டுகள் தேர்தலில் நிற்பதற்கு தடை செய்யும் வகையில் சட்டதிருத்தம் கொண்டுவந்தால் நேர்மையான தேர்தலை சந்திக்கக்கூடும்.

அமெரிக்கா போன்ற மேலை நாடுகளிலும் இந்த நன்கொடைகள் பெற்று செலவு செய்வது அங்கும் ஊழலை வழிவகுத்துக்கொண்டே இருக்கின்றன. ரஷ்யா, சீனா போன்ற கம்யூனிச நாடுகளில் அரசே தேர்தல் செலவினங்களை ஏற்றுக்கொள்வதோடு வேட்பாளர்கள் பற்றிய அறிவிப்புகள் விளம்பரப்படுத்தப்படுவதும் அரசு மூலமாகவே நடைபெற்று தேர்தலும் ஒழுங்காக நடைபெறுகிறது. இந்த முறையை நம் நாட்டிலும் பின்பற்றலாமே.. தேர்தல் சீர்திருத்தங்கள் இந்த காலகட்டத்தில் மிகவும் அவசியமானதொன்று.

பவள சங்கரி

தலையங்கம்

நம் இந்தியப்  பிரதமர் மோடி அவர்கள் தலைமையில் மத்திய அரசின் மூன்றாண்டுகள் ஆட்சி நிறைவடைந்துள்ள நிலையில் அவர்தம் பணியையும் அவர் ஆட்சியில் மற்ற அமைச்சர்களின் செயல்பாடுகள் குறித்தும் நோக்கத்தக்கது.

பிரதமரின் ஆட்சியில் பல்வேறு பிரிவுகளான, நிதி, நீதி, கல்வி, உள்நாட்டு பாதுகாப்பு, இராணுவம், விண்வெளி, தொழிலாளர் நலம், மருத்துவம், நகர் கட்டமைப்பு போன்ற முக்கியமான பத்து துறைகளில் ஏற்பட்டுள்ள மாற்றங்களே அதன் வெற்றியை நிர்ணயிக்கக்கூடியது . அந்த வகையில் முன்னேற்றப்பாதையில் செல்வதற்குரிய பல திட்டங்கள் முன்னெடுக்கப்பட்டுள்ளதை மறுக்கவியலாது. நம் இந்தியப்பிரதமரின் இந்த மூன்றாண்டு கால ஆட்சியை அரசியல் பின்னணியில் ஊடுறுவதைக்காட்டிலும், பாரபட்சமற்று நாட்டு நலனில் அக்கறைகொண்ட ஒரு பிரதமரை நாம் பெற்றிருக்கிறோமா என்பதே நம் மக்களின் இன்றைய சிந்தையாக குழப்பமேற்படுத்திக்கொண்டிருக்கிறது. இதனை முழுமையாகக் களையவேண்டிய முக்கிய பொறுப்பு நம் இந்தியப்பிரதமருக்கு உள்ளது என்பதையும் மறுக்கவியலாது.

நிதித்துறை : இன்றைய காலகட்டத்திற்கு ஏற்றவாரு நிதித்துறையில் பல்வேறு மாற்றங்களைக் கொண்டுவந்துள்ளனர். அதில் ஒரு பகுதியாக உயர் நோட்டுகள் செல்லாது என்று அறிவித்தலும், ஜிஎஸ்டி முறையை செயல்படுத்த இருப்பதும் பாராட்டிற்குரிய அம்சமாகவே கருதப்படுகிறது. கருப்புப்பணம் முற்றிலுமாக ஒழிந்தது என்று மகிழ்ச்சிகொள்ள முடியாவிட்டாலும், இவை ஓரளவிற்கு கட்டுப்பாட்டிற்கு கொண்டுவரப்பட்டுள்ளது என்றே சொல்லவேண்டும். அதிலுள்ள சில குறைபாடுகளை களைந்தாலே நிதித்துறையில் மேலும் வெற்றியை அடையமுடியும் என்பதும் திண்ணம். வருங்காலத்தில் அதற்குரிய முயற்சிகளும் எடுக்கப்படுவதற்கான முகாந்திரமும் தெளிவாகவே உள்ளதை வரவேற்கலாம்.

நீதித்துறை: நமது நீதித்துறையானது மக்களின் நம்பிக்கைக்குரிய வகையில் சிறப்பாக செயல்பட்டு வருகிறது என்பது பாராட்டிற்குரிய விசயம். அரசுத் துறைகளோ அல்லது பொதுமக்கள் பிரச்சனைகள் என எந்தவிதமான சட்டப்பிரச்சனையாக இருந்தாலும் அதற்குரிய சரியான தீர்வு கிடைக்கும் என்ற நம்பிக்கையை ஏற்படுத்தியுள்ளதும் வரவேற்கத்தக்கது.

கல்வி: கல்வித் துறையைப் பொருத்தமட்டில் பல்வேறு மாற்றங்கள் கொண்டுவரப்பட்டபோதும், பொதுமக்கள் மத்தியில் ஏற்பட்டுள்ள சில வருத்தங்களைப் போக்கும்விதமாக மனிதவள மேம்பாட்டுத்துறையில் மேலும் பல மாற்றங்கள் செயல்படுத்தப்படவேண்டியதும் அவசியமாகிறது. போதுமான ஆய்வகங்கள் இன்மையும், ஆய்வுகள் ஊக்கப்படுத்துதலில் உள்ள பின்னடைவுகளும் சரிசெய்யப்படவேண்டிய தேவையும் உள்ளது. தனிப்பட்ட ஆய்வாளர்களை உற்சாகப்படுத்துவதும் அவசியமாகிறது.

உள்நாட்டு பாதுகாப்பு / இராணுவம்: இராணுவத் தேவைகளுக்கு கொள்முதல் செய்வதில் கவனம் செலுத்தும் அரசு அதன் ஒரு பகுதியை உடனடித் தேவைகளுக்கு தளவாடங்களாக வாங்குவதும், மீதிப்பகுதிகளை உள்நாட்டில் தயாரிப்பதற்கு ஏற்ப வழிமுறை செய்து உள்நாட்டு வேலை வாய்ப்புகளை பெருக்கியிருப்பதும் பாராட்டிற்குரியது. பிரதமரின் ‘மேக் இன் இந்தியா’ என்ற வெற்றிகரமான திட்டத்தை நினைவுகூர்ந்து மகிழச்செய்கிறது.  புதிதாகக் கொள்முதல் செய்யப்பட்டுள்ள மிக நவீன டாங்கிகளும் இதற்குரிய எடுத்துக்காட்டுகளாகக்கொள்ளலாம். விமானத்துறையிலும் இதுபோன்ற ஆக்கப்பூர்வமான செயல்பாடுகளை முன்னெடுத்திருப்பது பாராட்டிற்குரியது. தீவிரவாதிகள், நக்சலைட்டுகள், எல்லைப்புறப் பாதுகாப்பு போன்றவைகளிலும் மேலதிக கவனம் செலுத்தி, தீவிர பாதுகாப்பு நடவடிக்கைகள் எடுக்கவேண்டியதும் அவசியமாகிறது.

விண்வெளி: விண்வெளித் துறையில், இஸ்ரோவின் மேம்படுத்தப்பட்ட செயல்கள் போன்று பல பாராட்டத்தக்க செயல்பாடுகளைக் காணமுடிகிறது. தொலைத்தொடர்புத் துறைகளில் மக்கள் பயன்பெறும் வகையில் மாற்றங்கள் ஏற்பட்டுள்ளதும் சிறப்பு.

தொழிலாளர் நலம்: தொழிலாளர் நலம் குறித்த பெரும் முன்னேற்றங்கள் இல்லாவிட்டாலும் பிரச்சனைகள் இல்லாத வகையில் செயல்படுத்தி வருவதைக் காணமுடிகிறது. பெருமளவில் வருமானம் வரக்கூடிய ஐ.டி. துறையில் அதிக அளவில் பணியாளர்களை நீக்கும் முயற்சியில் மிகப்பெரிய பத்து நிறுவனங்கள் இறங்கியுள்ளது ஏற்புடையதன்று. அந்த வகையில் பணியிலுள்ள ஐ.டி பொறியாளர்களுக்கு தக்க பணிப்பாதுகாப்பை வழங்க வேண்டிய பொறுப்பும் மத்திய அரசிற்கு  கூடுகிறது.

மருத்துவம் : மத்திய அரசின் பல்வேறு நடவடிக்கைகளால் வறுமைக்கோட்டிற்கு கீழ் வாழும் ஏழை மக்களுக்கும் சிறந்த மருத்துவம் கிடைக்கும்வகையில் பல திட்டங்களை முன்னெடுத்திருப்பது பாராட்டிற்குரியது. என்றாலும் பன்னாட்டு நிறுவனங்களின் ஆதிக்கத்தை கட்டுப்பாட்டிற்குள் வைத்திருப்பதும் அவசியமாகிறது. ஸ்டெண்ட் போன்ற இருதய சிகிச்சைக்குரிய முக்கியமான சிகிச்சைக் கருவியே இதற்கு உதாரணம்.

நகர் கட்டமைப்பு: இத்துறைக்காக பல ஆயிரம் கோடிகள் ஒதுக்கப்பட்டுள்ளபோதிலும், அந்தந்த மாநிலங்களின் செயல்பாட்டில் உள்ள நகர் கட்டமைப்புகளை சரியான முறையில் மேற்பார்வையிட்டு அதனை தகுந்த காலங்களில் முடிவுறச்செய்து, மக்களின் பயன்பாட்டிற்கு வரும்வகையில் விரைவுபடுத்தப்படவேண்டியதும் மத்திய அரசின் கடமை.

ஆக இன்றியமையா இந்த பத்துத்துறைகளிலும் மத்திய அரசின் செயல்பாடுகள்   அனைத்தும் குறையின்றி பாராட்டிற்குரியதாக  இருப்பினும் உள்நாட்டு பாதுகாப்பு, இராணுவம், மனிதவள மேம்பாடு ஆகிய துறைகளில் மேலும் சிறப்பான செயல்பாடுகளை எதிர்நோக்கும் இந்த நேரத்தில் பெரிய அளவில் ஊழல் புகார்கள் வெளியே வராமல் இருப்பதும் ஆறுதல் அளிப்பதாகவே உள்ளது. நாட்டில் உள்ள கருப்புப்பணம் வெளியில் கொண்டுவருவதில் சிறப்பாகச் செயல்பட்டு வரும் மத்திய அரசு இதை அரசியல் நோக்கில் பார்க்காமல் நாட்டு நலனில் உண்மையான அக்கறைகொண்டு செயல்படுத்தினால் மேலும் சிறப்பாக இருக்கும். ஆக இந்த மூன்றாண்டு ஆட்சி நல்ல வளமான விதைகளைத் தூவியுள்ளதன் மூலம் மேலும் சிறந்த விருட்சமாக உருவாகும் என்ற நம்பிக்கையை வளர்ப்பதாகவே உள்ளது.

நீட் தேர்வு பற்றி பலவேறான கருத்துகள் இருக்கும் சூழலில் , இத்தேர்வை சமீபத்தில் நடைமுறைப்படுத்தியதில் நாகரிகமற்ற முறையில், அநாகரிகத்தின் உச்சத்திற்கேச் சென்று அந்தத் தேர்வுச்சமயத்தில் அந்தந்த பகுதிகளில் உள்ள தேர்வு நிர்வாகிகள் செய்துள்ள செயல்கள் கண்டிக்கத்தக்கது. பெண்களுக்கான டிரஸ் கோட் தேர்வு விண்ணப்பத் தாளிலேயே குறிப்பிடப்பட்டிருக்க வேண்டும். அதைச் செய்யத் தவறிவிட்டனர். பெண்களின் உள்ளாடைகளைக் களையச்செய்வதும், துப்பட்டாவை அகற்றியதையும் மாணவர்கள் முழுக்கை சட்டை அணிவதை தடை செய்ததும் எந்த சட்டத்தில் உள்ளது? இதைவிடுத்து தேர்வு மையங்களின் பெயர்களிலும் குளறுபடிகள் நடந்துள்ளன. இதற்கெல்லாம் நீட் தேர்வு மையம் என்ன நடவடிக்கை எடுக்கப்போகிறது? தேர்வு எழுதச்செய்யும் மாணவர்களுக்கு தேவையற்ற இந்த கெடுபிடிகளால் மன அமைதியிழந்து தேர்வு சரிவர எழுத முடியாத சூழல் ஏற்பட்டுள்ளது. மீண்டும் மறு தேர்வு நடத்தவேண்டும். இந்த தவறுகள் செய்தவர்களை, மாணவர்களின் ஒரு வருட வாழ்க்கையை கேள்விக்குறியாக ஆக்கியவர்கள் தண்டிக்கப்படுவார்களா?

பவள சங்கரி

ஊர் பஞ்சாயத்துகளுக்கு உயர்நீதி மன்றம் அளித்த அதிகாரத்தின்படி இனி அந்தந்த ஊர் பஞ்சாயத்து உறுப்பினர்கள் ஒன்றுகூடி எங்கள் பகுதியில் இனி மதுபானங்கள் விற்பனை தேவையில்லை என்று தடைவிதித்தால் அந்தப் பகுதிகளில் டாஸ்மாக் கடைகள் திறப்பதற்கு தடைவிதித்து உயர்நீதி மன்றம் வரலாற்று சிறப்புமிக்க தீர்ப்பளித்துள்ளது. இனிமேல் அரசுகளையோ, கட்சிகளையோ குறைகூறுவதை விட்டுவிட்டு அவரவர் பகுதிகளை சரியாக நிர்வகிக்க பொது மக்களும் முன்வரலாம். பஞ்சாயத்து ராச்சியம் முறையில் இது ஒரு மைல்கல்!

மத்திய மாநில நெடுஞ்சாலைகளில் உள்ள டாஸ்மாக் கடைகளை மக்கள் வாழும் பகுதிகளுக்குக் கொண்டுவரவும் உயர்நீதி மன்றம் தடை விதித்துள்ளது. டாஸ்மாக்கிற்கு எதிராக போராடும் மக்களை கைது செய்வதற்கும் உயர்நீதி மன்றம் தடை விதித்துள்ளது. பூரண மதுவிலக்கு எப்போது அமல்படுத்தப்படும் என்றும் கேள்வி எழுப்பியுள்ளது.

பவள சங்கரி

ஒவ்வொரு முறையும் இயற்கையின் சீற்றத்தால் முதலில் பாதிக்கப்படுபவர்கள் நம் விவாசாயப் பெருமக்களே. விவசாயத்தை ஒரு தலையாயத் தொழிலாக எடுத்துக்கொண்டு, ஏனைய மற்ற தொழில்களைப்போலவே இதனையும் கருதி அதற்கேற்ப நம்முடைய தொழில்சார்ந்த திட்டமிடல்களை செயல்படுத்தவேண்டியது அவசியமாகிறது. முதலாவதாக பருவகால மாற்றங்கள் குறித்த வானிலை ஆய்வாளர்களின் நவீன தொழில்நுட்பம் மூலம் வெளியிடப்படும் கருத்துகளை உள்வாங்கி அதற்கேற்ப நம் திட்டமிடல்களை ஆரம்பிக்கவேண்டும். பல நேரங்களில் புறக்கணிக்கப்படும் முக்கியமான கருத்துகளே பல நட்டங்களுக்கு காரணமாகிவிடுகிறது. புதிய பாசனத் திட்டங்களைக் கையாண்டால் வறட்சியிலும் 60% மகசூலை எடுக்கமுடியும். செயற்கை உரங்களை எந்த அளவிற்கு பயன்படுத்துகிறோமோ அதற்கேற்ற சரிவிகிதத்தில் இயற்கை உரங்களை பயன்படுத்துதலும் அவசியம். முதலில் பயிர் பாதுகாப்பு காப்பீடு எடுத்துக்கொள்வது அவசியம். அதில் ஒரு பகுதி மான்யமாக அரசு வழங்கிவிடுகிறது. இதற்கு நாம் செய்யவேண்டியது விதை நெல், உரம் போன்ற அத்தியாவசியத் தேவைகளை கொள்முதல் செய்யும்போது அந்த இரசீதுகளை பாதுகாப்பாக வைத்திருத்தல் வேண்டும். அப்படிச் செய்யும்போது இதுபோன்ற இயற்கைச் சீற்றங்கள் ஏற்படும்போது நாம் எவரிடமும் கையேந்த வேண்டியதில்லை. உரிமையோடு நமது இழப்பீட்டைப் பெறமுடியும். இத்தனைப் பிரச்சனைகளையும் தாண்டி விவசாய விளைபொருட்கள் விற்பனைக்குச் செல்லும்போது இடைத்தரகர்களால் விவசாயிகளின் உழைப்பு உரிஞ்சப்படுகிறது. உதாரணமாக முட்டைகோசு, முள்ளங்கி போன்றவை கிலோ ஒன்று மூன்று ரூபாய்க்கு வாங்கி பொதுமக்களை சென்றடையும்போது பத்து மடங்கு விலையேற்றத்துடன் சென்றடைகிறது. நடுவில் உள்ள ஒன்பது மடங்கு இலாபம் இடைத்தரகர்களால் அனுபவிக்கப்படுகிறது. பரிட்சார்த்த முறையில் ஒரு பெண் விவசாயி ஆந்திர மாநிலத்தில் அனைத்து விவசாயப் பொருட்களையும் மொத்த விற்பனைக்கு தாங்களே கொண்டுசென்று விற்பனை செய்ததில் பன்மடங்கு இலாபம் சம்பாதித்துள்ளனர். அனைவருக்கும் இலட்சக்கணக்கில் இலாபத்தைப் பிரித்துகொடுத்து நல்ல வழியும் காட்டியுள்ளார். குளிர்ப்பதப்படுத்தும் கிடங்குகள் அதிகளவில் தேவை என்பதை உணர்ந்து அதற்கான முயற்சிகளை முன்னெடுக்க அரசு உதவியை கோரிப்பெறலாம். தமிழ் நாட்டிலேயே மேட்டுப்பளையத்தில் மட்டுமே இதுபோன்று குளிப்பதனப்படுத்தும் கிடங்கு இருப்பதாகத் தெரிகிறது. ஒசூர், மதுரை, திண்டுக்கல், பெருந்துறை, சேலம், கிருட்டிணகிரி, ஈரோடு போன்ற விவசாயப் பெருநகரங்களில் குளிர்சாதனக் கிடங்குகள் அதிகளவில் உருவாக்கினால் விவசாயிகளின் வாழ்வாதாரங்கள் பன்மடங்கு உயரும் என்பது உறுதி. இதோடு கிருட்டிணகிரியில் உள்ளதுபோன்று விவசாய உபப்பொருட்கள் தயாரிக்கும் நிலையங்கள், உதாரணமாக மாம்பழம் அதிகமாக விளைச்சல் காணும் சேலம், கிருட்டிணகிரி போன்ற இடங்களில் மாம்பழக்கூழ் தயாரிக்கும் ஆலைகளைக் கூட்டு முயற்சியில் விவசாயிகளே செய்ய முனைந்தால் பன்மடங்கு இலாபங்களைப் பெறலாம். பருத்தி விவசாயிகள் தங்கள் விளைப்பொருட்களை சிறிது காலம் வைத்திருந்து விற்றாலே மூட்டைக்கு பல ஆயிரம் ரூபாய் அதிக இலாபம் கிடைக்கும்.இந்த விளைப்பொருட்கள் மீதே வங்கியில் பணம் பெற்று அந்த இடைக்காலத்தை சமாளிக்கலாம். அதுபோன்றே கரும்புச்சக்கை வைக்கோல் போன்றவைகளிலிருந்து தயாரிக்கக்கூடிய, காகித அட்டை, சணல், நூல் போன்ற பலவகைப் பொருட்களைத் தயாரித்து பல இலட்சங்கள் வருமானங்களைப் பெறலாம். இப்படி பல வகையில் நம் தன்மானம் கெடாத வகையில் உரிமையோடு, நம் சொந்த உழைப்போடு சுதந்திரமாக பெருமிதத்தோடு வாழ வழிகள் நிறையவே உள்ளன என்பதே யதார்த்தம்.