பென் முஸ்தபா, யுஎஸ்ஏ டுடே, ஜூலை17, 2015
தமிழாக்கம்: ஒரு அரிசோனன்
பிலாக்னக், பிரான்ஸ் — அந்த விமானம் அனைவரின் தலையையும் திரும்ப வைக்கிறது. அதைப்பார்த்தால் பெலுகா என்ற வகையான திமிங்கிலததைப்போல உள்ள அதைப் பார்த்தவுடனேயே, விமான ஆர்வலர்கள் ‘அதன் பட்டப்பெயரான ‘பெலுகா’ என்று தெரிந்துகொள்கிறார்கள். எது எப்படியிருந்தாலும் உலகத்திலேயே மிகவும் வினோதமான விமானம் அது என்பதை ஒப்புக்கொள்கிறார்கள்.
அதற்கு இருபது வயது ஆகிறது.
பெலுகா என்று அதைச் செல்லமாக அழைத்தாலும்,, அதற்குக் கொடுத்த பெயர் ஏர்பஸ் ஏ300-600எஸ்டி என்பதுதான். 199௦ வாக்கில் சூப்பர் கப்பி என்ற பெயருள்ள வேறொரு சரக்கு விமானத்திற்குப் பதிலாக இவ்விமானம் பயன்படுத்தப்பட்டபோது இதை சூப்பர் டிரான்ஸ்போர்ட்டர் என்று அழைத்தார்கள்.
நாள்கள் செல்லச்செல்ல, திமிங்கிலத்தை ஒத்திருக்கும் அதை [A300-600ST] விமானக்கம்பெனி சூட்டிய பெயரால் அழைக்காமல், திமிங்கில வகையான ‘பெலுகா’ என்றே அழைக்க ஆரம்பித்தார்கள்.
விமானங்கள் தயாரிக்கும் ஏர்பஸ் நிறுவனம் இந்த விமானத்தை விமானங்களையும், பெரிய பாகங்களையும் ஓரிடத்திலிருந்து மற்றோரிடத்திற்குக் கொண்டுசெல்ல உபயோகப்படுத்துகிறது.
விமானங்களின் மிகப்பெரிய பாகங்களை அவை உற்பத்தி செய்யப்படும் இடங்களிலிருந்து ஒன்றிணைக்கப்படும் இடங்களுக்குக் கொண்டுசெல்ல ஐரோப்பிய விமான நிறுவனம் ஏர்பஸ்ஸுக்கு இவ்விமானம் உதவுகிறது.
அகலமான A340 விமானத்தின் இறக்கைகளைத் தன்னுள் வைத்துக் கொண்டுசெல்ல வல்லது பெலுகா. ஏர்பஸ் நிறுவனத்தின் புதிய அகலமான விமானம் A350ன் குழாய் உடல் முழுவதையும் விழுங்கிக் கபளீகரம் செய்துவிட்டு, வேறொரு இடத்தில் துப்பவள்ளது இவ்விமானம் என்றால் இது எவ்வளவு பெரியது என்று நாம் உணர்ந்துகொள்ளலாம்.
இவ்வளவு பெரிய ராட்சதப் பாகங்களை வேறெந்த விமானங்களாலும் கொண்டு செல்ல இயலாது. ஏர்பஸ் நிறுவனம் தனது சரக்கு போக்குவரத்து கிளை நிறுவனம் மூலம் பெலுகாவை மற்ற நிருவனகளும் உபயோகித்துக்கொள்ள வாடகைக்கு விடுகிறது.
A300 விமானத்தின் மேல் பாகத்தை வெட்டி எறிந்துவிட்டு, குமிழிபோன்ற பெரிய மேல்பாகத்தை வெட்டப்பட்ட விமானத்தின் கீழ்ப்பகுதியுடன் இணைத்து பெலுகா வடிவமைக்கப்பட்டது. தற்பொழுது A300 விமானங்கள் உற்பத்தி செய்யப்படுவதில்லை.
பெலுகா தனது இருபதாவது பிறந்தநாளை 2௦14ல் கொண்டாடியது. இவ்வளவு பெரிய பெலுகாவிற்கு பீமன்போல ஒரு தம்பியை உண்டாக்க ஏர்பஸ் நிறுவனம் திட்டமிட்டுவருகிறது. எப்படி என்கிறீர்களா?
ஊகித்து விட்டீர்களா!
உங்கள் ஊகம் சரிதான்! A300ஐவிடப் பெரிதான A330 விமானத்தை வெட்டி ஒட்டி, 2௦19வாக்கில் பெலுகா எக்ஸ்எல்— என்ற விமானத்தைச் செய்யப்போகிறார்களாம்!
ஏர்பஸ் இவ்வளவு செய்யும்பொது அதன் போட்டி நிறுவனமான் போயிங் சும்மா இருக்குமா? போயிங்கும் இம்மாதிரி வேலைக்கென — ராட்சத பாகங்களைக் கொண்டுசெல்வதற்கென 747 ஜம்போ விமானத்தை மாற்றி ஒரு விமானம் வடிவமைத்துள்ளது. அவ்விமானம் போயிங்கின் 787 டிரீம்லைனர் விமானத்தின் பாகங்களைத் தூக்கிச் செல்ல உதவியது. எனவே, அவ்விமானத்திற்கு “டிரீம்லிஃப்டர்”, அதாவது “கனவுதூக்கி” என்ற பெயரைச் சூட்டி மகிழ்ந்துள்ளது.
***
