சிலேடை சித்தர் சேது சுப்பிரமணியம்
காதல்
சில சமயம்
விளையாட்டானது!
சில சமயம்
விபத்தானது!
சில சமயம்
விபரீதமானது!
சில சமயம்
வினையானது!
காரணம் பெரிதல்ல,
காரியமே பெரிது.
எதனால் வந்ததென்று
எவர்க்கும் தெரியாது.
எது ஈர்த்ததென்றும்
எவர்க்கும் தெரியாது.
காதல் வென்றால் வைரம்,
தோற்றால் ஒரு வைரஸ்.
காதலர்களே,
முயன்று மணப்பீர், இல்லையேல்
முயன்று மறப்பீர்.
வாழ்க காதல்!
வாழ்க காதலர்தினம்!
வாழ்க காதலர் தினமும்!
சிலேடை சித்தர் சேது சுப்ரமணியம்
தைத்திங்கள் பிறக்கிறது
தைப்பொங்கல் வருகிறது
தை, தை எனக் குதித்து
‘தை’ மகளை வரவேற்போம்.
உலகோர் பசி தீர்க்க
உழைக்கின்ற உழவர்க்கு
உற்சாகம் தருகின்ற
உன்னத விழாவன்றோ!
ஏரோட்டி, சால் அமைத்து
நீர் பாய்ச்சி, நாற்றுநட்டு,
களையெடுத்து, எரு இட்டு,
தலையெடுத்த பயிரை
அறுவடை செய்தடுக்கி,
அறுவடை முடித்த வயலில்
புத்தடுப்பு தானமைத்து
புதுப்பானைப் பொங்கலிட்டு
புத்தாடை தானுடுத்து
பொங்கிவரும் பால்கண்டு
பொங்கலோ பொங்கலெனக்
குலவையிட்டுக் கொண்டாடி,
ஆதவனைக் கும்பிட்டு
ஆவினத்தைச் சீராட்டி ,
நன்றி நவிலும் நாளே
பொங்கல் எனும் நன்னாள் – இது .
உழவர்களின் திருநாள் .
ஊரார் பசிதீர்க்கும்
உழவர்தம் துயர்தீர்க்க
உரிய விலைகொடுத்து
உயர்த்திடுவோம் அவர்நிலையை .
இடைத்தரகர் எனும்
ஈனப்பிறவிகளின்
கொட்டத்தைத் தானடக்கி
கொள்ளையைத் தடுத்திடுவோம்.
நீர்நிலைகள் புனரமைத்து
நீர்வளம் பெருக்கிப் பயிர்
வீணாகும் நிலையை
விரைந்து சரிசெய்வோம் .
இயற்கைப் பேரிடரால்
இன்னல் விளைந்தக்கால்
நம் கை கொடுத்து அவர்க்கு
நம்பிக்கை அளித்திடுவோம் .
வில்லேருழவர்க்கும்,
சொல்லேருழவர்க்கும்,
எல்லோர் வயிற்றுக்கும்
நல்லேர்தான் ஆதாரம்.
உழவுக்கும் உழவர்க்கும்
உழைப்புக்கும் வந்தனம்.
ஆண்டுக்கொருமுறை பிறக்கும் புத்தாண்டு .
ஆண்டாண்டு தோறும் வாழ்த்துக்கள் பரிமாற்றம்
ஆண்டவன் அருளால் அனைத்தும் நலமாக
வேண்டுவோம், உழைப்போம், பெறுவோம் முன்னேற்றம்.
இவ்வாண்டு வந்திட்ட இன்பங்கள் தொடரட்டும்.
இவ்வாண்டு வந்திட்ட இன்னல்கள் மறையட்டும்.
வருமாண்டு வளமாக வருமானம் சிறக்கட்டும்.
வருமானம் பெருகிட வழிகள் திறக்கட்டும்.
சபதங்கள் மேற்கொள்ள புத்தாண்டு வேண்டாமே.
சபலங்கள் இல்லாத மனஉறுதிதான் வேண்டும் .
எண் மாற்றம்தானென்று எளிதாக எண்ணாதீர்
எண்ண மாற்றம் இருந்தால் எல்லாம் நிறைவேறும் .
நன்னம்பிக்கை கொண்டு நல்லதே செய்திடுவீர் .
தன்னம்பிக்கை இருந்தால் ,தரணி நம் வசமாகும்.
இரண்டாயிரத்து இருபதில் இந்தியா வல்லரசாகுமென்று
மறைந்த மாமேதை கலாம் சொல்லிவைத்தார் .
வல்லரசாவது பெரிதன்று, மக்களுக்கு ஏற்ற
நல்லரசாள்வதே நன்மை பயக்குமன்றோ.
விவசாயமும் தொழிலும் , விரைந்து பெருகட்டும் .
வேலையில்லா நிலை வேகமாய்க் குறையட்டும்.
விலைவாசி குறைந்து மக்கள் மனம் மகிழட்டும்.
பொருளாதார மந்த நிலை மாறட்டும்.
அரசியல் கட்சிகள் அறிவோடு நடக்கட்டும் .
மதவாதம், இனவாதம், மண்ணுக்குள் புதையட்டும் .
தீவிரவாத எண்ணம் தீக்கிரையாகட்டும் .
பாலியல் குற்றங்கள் பனிபோல் மறையட்டும்.
விஞ்ஞானமும் ,மெய்ஞானமும் விழிகளாய்த் திகழட்டும்.
அஞ்ஞானம் அகன்று அறிவொளி படரட்டும்.
உழைப்புக்கும், உண்மைக்கும், உயர்வு கிடைக்கட்டும்.
தாய்நாட்டுப்பற்று எங்கும் தழைத்து ஓங்கட்டும்.
-சிலேடை சித்தர் சேது சுப்ரமணியம்
மாதவனை வணங்கிய
மார்கழி முடிந்ததும்
ஆதவனை வணங்கிட
தைப் பொங்கல் வருகுது .
போகட்டும் துன்பமென
போகியோடு துவங்குது
பொங்கட்டும் இன்பமென
பொங்கல் தொடருது .
உழவுக்கு உதவி செய்யும்
மாட்டுக்கு நன்றி சொல்ல
மாட்டுப்பொங்கல்
மறுநாள் வருகுது .
உறவுகளைப் புதுப்பித்து
உற்சாகம் கண்டிடவே
காணும் பொங்கல்
மூன்றாம்நாள் வருகுது ..
உணவுத்தரும் தொழிலுக்கும்
உணர்வில் கலந்த தமிழுக்கும்
ஒருசேர விழா எடுக்கும்
உயரியவிழா பொங்கலன்றோ .
வியர்வை சிந்தி உழைக்கும்
விவசாயி பிழைத்திடவும்
விவசாயம் தழைத்திடவும்
விலை நன்கு கிடைத்திடவும்
வேண்டிடுவோம் இந்நாளில் .
தமிழர் திருநாளாய் -இந்தத்
தரணி போற்றும் நன்னாளில்
தமிழன்னை புகழ் பாடி
தமிழினத்தை உயர்த்திடுவோம்.
திருவள்ளுவர் தினத்தில்
திருக்குறளை முற்றோதி
குறள் வழி வாழ்ந்து இந்தக்
குவலயத்தில் உயர்ந்திடுவோம் .
உழவன் வாழ்க , உயிரினங்கள் வாழ்க ,வாழ்க
தமிழ் வாழ்க , தமிழினம் வாழ்க .,வாழ்க
வள்ளுவம் வாழ்க ,இவ்வையகம் வாழ்க, வாழ்க .
பொங்கலோ பொங்கலென பொங்குக இன்பமெங்கும் .
– சிலேடை சித்தர் சேது சுப்ரமணியம்
புத்தாண்டு வருகின்றது .
புத்துணர்வு வருகின்றது.
புது வாழ்வு மலருமென்று
புது நம்பிக்கை தருகின்றது .
இவ்வாண்டு கவலைகள்
இத்தோடு முடியட்டும்
வருமாண்டு நம்வாழ்க்கை
வளமாக இருக்கட்டும் .
விழுகின்ற மழைநீரால்
விவசாயம் செழிக்கட்டும் .
அழுகின்ற நிலைமாறி
ஆனந்தம் கொழிக்கட்டும்..
அரசியல்வாதிகள் இனி
அறவழிக்குத் திரும்பட்டும்.
அவர்களைத் தேர்ந்தெடுப்போர்
அறிவோடு நடக்கட்டும் .
தூய சக்திகள் நம்மைத்
துடிப்போடு ஆளட்டும்
தீய சக்திகள் இனிமேல்
தீயில் பொசுங்கட்டும் .
மக்களிடையே பிரிவினைகள்
மண்ணோடு போகட்டும்
ஒற்றுமை மனநிலை
ஓங்கி வளரட்டும் .
பாமரர் நிலைமாறி
படிப்பறிவில் சிறக்கட்டும்
பாரதம் வல்லரசாய்
பார்போற்ற வளரட்டும் ..