Category: செய்திகள்

தாய் மொழியில் பயின்றால்தான் மக்கள் வளம் பெறுவார்கள், ஜெர்மனியில் அனைத்துப் பள்ளிகளும் அரசுப் பள்ளிகளே , தங்க நகையே அணியாத நாடு ஜெர்மன், வாழ்க்கையில் கல்வி தான் நண்பன் என ஜெர்மன் ஆராய்ச்சியாளர் பேச்சு

தேவகோட்டை:
“வாழ்க்கை முழுவதும் கல்விதான் சிறந்த நண்பனாக இருக்கும்,’ என ஜெர்மனி ஆராய்ச்சியாளர் சுபாஷினி ட்ரெம்மல் பேசினார்.

தேவகோட்டை சேர்மன் மாணிக்க வாசகம் நடுநிலைப்பள்ளியில் வாழ்வியல் விழிப்புணர்வு நிகழ்ச்சி சேவுகன் அண்ணாமலை கல்லூரி முதல்வர் சந்திரமோகன் தலைமையில் நடந்தது. தலைமையாசிரியர் சொக்கலிங்கம் முன்னிலை வகித்தார். ஆசிரியை செல்வமீனாள் வரவேற்றார்.

விழாவில் தமிழ் மரபு அறக் கட்டளை துணைத்தலைவரும் , கல்வெட்டு ஆராய்ச்சியாளருமான ஜெர்மனியில் வசிக்கும் மலேசியத் தமிழர் சுபாஷினி ட்ரெம்மல் மாணவர்களிடையே பேசுகையில், “”தமிழகத்திற்கு ஒரு முறை வந்தபோது, கல்வெட்டுகளில் கிறுக்கல்கள் இருந்தது. அதில் உள்ளதைப் படிக்க முயற்சித்தபோது கல்வெட்டு ஆராய்ச்சியில் ஆர்வம் வந்தது. ஜெர்மனியில் இலத்தீன் மொழியில் கல்வெட்டுகள் உள்ளன. அங்குள்ள பாடபுத்தகங்கள் பெரிய அளவிலும், பெரிய படங்களுடன் உள்ளன. ஜெர்மனியில் எல்லா பள்ளிகளும் அரசுப் பள்ளிகள்தான். ஆங்கிலம் வந்ததற்கு ஜெர்மன் மொழிதான் காரணம். பள்ளிகளில் வகுப்புகள் 1ம் வகுப்பு, 2ம் வகுப்பு, 3ம் வகுப்பு, 4ம் வகுப்பு எனவும்,பிறகு விரும்பிய பாடங்களை படிக்கும் வண்ணமும் வகுப்புகள் இருக்கும். 5 வது வகுப்புக்கு இரண்டாவது மொழியாக இத்தாலி, இலத்தீன் என எதையாவது தேர்ந்தெடுத்து கொள்ளலாம் எனத் தெரிவித்தார்.

பிறகு, ஜெர்மனியில் வசந்த காலம், கோடைக் காலம், இலையுதிர் காலம், குளிர் காலம் என நான்கு பருவ காலங்கள் உள்ளன. ஜெர்மனியில் கோதுமை, கம்பு, சோளம், கடுகு அதிகமாகப் பயிரிடப்படுகிறது. கடுகில் இருந்து எண்ணெய், எரிவாயு தயாரிக்கப்படுகிறது. அங்கு 800 ஆண்டுகள் பழமையான கீல்ஸ் பல்கலைக்கழகம் உள்ளது. இரண்டாம் நூற்றாண்டைச் சார்ந்த ட்ரையர் என்ற பழமையான தேவாலயம் உள்ளது என்றார். மாணவ மாணவிகளுக்கு ஜெர்மனிக்குச் சென்று வந்த உணர்வு ஏற்பட்டது. தமிழகத்திற்கு இது வரை 16 முறை வந்துள்ளதாகத் தெரிவித்தார். தமிழகத்தில் மிகவும் பிடித்த இடம் திருவண்ணாமலை அருகே சமண கோவில் உள்ள திருமலை என்கிற இடம் தான் என்று கூறினார். ஜெர்மனியில் பிடித்த இடம் பெர்லின் எனக் கூறினார்.

தாய் மொழியில் பயின்றால் மட்டுமே அனைவரும் நல்ல நிலைமைக்கு வர இயலும் என்று கூறினார். கல்வி கற்பது வாழ்வில் இன்றியமையாதது. கல்வி கற்பது பல வாழ்வியல் முன்னேற்றங்களுக்கு வழி வகுக்கும். சிறந்த கல்வியாளர்களாக வர வேண்டும். வாழ்க்கை முழுவதும் பல வழிகளிலும் கல்வி தான் சிறந்த உற்ற நண்பனாக இருக்க முடியும். வீதிகளில் பல இடங்களிலும் பார்க்கும் போது ஆங்காங்கே குப்பை கிடக்கிறது. குப்பைகளை கொட்டக் கூடாது. அதற்கான இடங்களில் கொட்ட வேண்டும். யாரேனும் குப்பையைக் கொட்டினால் அதை எடுத்து தொட்டியில் போடவேண்டும். குப்பைகளைக் கண்ட இடங்களில் போட்டால் ஏற்படும் கெடுதல்களை பற்றி அவர்களுக்கு எடுத்துச் சொல்ல வேண்டும். இளம் வயதிலேயே கீரை போன்ற சத்தான உணவு வகைகளைச் சாப்பிட வேண்டும் என்றார்.

தனலெட்சுமி, பரமேசுவரி, சௌமியா, சந்தியா, காயத்திரி, முனிஸ்வரன், ஜெகதீஸ்வரன், அய்யப்பன் உட்படப் பல மாணவ, மாணவியரின் கேள்விக்கு பதிலளித்தார். விழாவில் எல்.ஐ.சி., மேனாள் கோட்ட மேலாளர் வினைதீர்த்தான், மணலூர் அழகு மலர் பள்ளி தாளாளர் யோகலட்சுமி, திருச்சி கடல் ஆராய்ச்சி மாணவர் அப்துல் ரகுமான் ஆகியோர் பேசினர். ஆசிரியை முத்துமீனாள் நன்றி கூறினார்.

பட விளக்கம் :
சிவகங்கை மாவட்டம் தேவகோட்டை சேர்மன் மாணிக்க வாசகம் நடுநிலைப் பள்ளியில் ஜெர்மன் நாட்டுத் தமிழ் கல்வெட்டு ஆராய்ச்சியாளர் சுபாஷிணி ட்ரம்மல் மாணவர்களுடன் ஜெர்மன் நாடு தொடர்பாக கலந்துரையாடினார்.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

மறவன்புலவு க. சச்சிதானந்தன்

(இலங்கைத் தமிழரசுக் கட்சியின் நடுக்குழு உறுப்பினர்)

2016க்குள் ஈழத் தமிழரின் ஒளிமயமான எதிர்காலத்தை நோக்கிய அரசியல் தீர்வு பெற்றுத் தருவோம் எனத் தமிழர் தேசியக் கூட்டமைப்பினர் உறுதியளித்துள்ளனர். தலைவர் இரா. சம்பந்தன் மீட்டும் மீட்டும் இந்த உறுதிமொழியைக் கூறிவருகிறார். தீர்வை நோக்கிய காய்களை நகர்த்துவதாகவும் எல்லாவற்றையும் வெளிப்படையாகப் பேசமுடிந்தால் தீர்வு எட்டமுடியாதென்பதையும் கூறி வருகிறார். அரசியலில் இத்தகைய நடைமுறைகள் வழமையே. உயிர் வாழ்வே தமிழருக்கு வினாக்குறியான இக்காலத்தில் தமிழர் தேசியக் கூட்டமைப்புக்கு முழுமையான, மனத் தடையற்ற ஆதரவைக் கொடுக்கவேண்டியது காலத்தின் கட்டாயம்.

2016 மார்கழி வரை காலக் கெடுவை நோக்கி, கட்டிறுக்கமான செயற் திட்டத்துடனும், சிங்கள அரசியல் தலைவர்களுடன் நல்லுறவைப் பேணியும், முஸ்லிம்களின் ஆதரவைப் பெற்றும், மலையகத் தமிழர்களுடன் உறவை வளர்த்தும், இந்தியா உள்ளிட்ட உலக நாடுகளின் நீதிக்கான அழுத்தப் பின்னணியில் தீர்வை நோக்கித் தமிழர் தேசியக் கூட்டமைப்பினர் முன்னேறுகின்றனர்.

தீர்வு எட்டப்படக்கூடாதென்பதிலும் தமிழரைத் தொடர்ந்து அடிமைகொள்ள வேண்டும் என்பதிலும் சிங்களத் தலைமை உறுதியாக உள்ளது. இதற்காகத் தமிழரிடையே கலகத்தைத் தூண்டிவிடுகின்றனர். சிங்களத் தலைமையின் இந்த முயற்சிக்குத் தெரிந்தோ தெரியாமலோ ஈழத் தமிழ் மக்கள் வாக்களித்து மக்களுக்காகப் பணிபுரிய வந்தவர்கள் கடந்த சில மாதங்களாக தனிப்பட்ட தாக்குதல்களும் அழாப்பி நியாயங்களும், கட்சி பிரித்தலும், நகை முரண்களும் நிறைந்த அறிக்கைப் போரில் ஈடுபட்டுப் பகைமை வளர்ப்பது போற்ற புறத்தோற்றம் இருப்பதால் சிங்களத் தலைமை தங்கள் திட்டம் வெற்றியடைவதாக எண்ணிப் புளங்காகிதம் அடைந்து வருகின்றனர்.

1965-1968 காலப்பகுதியில் தமிழரைப் பிரித்தாளும் சிங்களத் தலைமையின் சாணக்கியத்தை நேரில் கண்டிருக்கிறேன். அக்காலத்தில் அமைச்சராக இருந்த மு. திருச்செல்வம் அவர்களின் உதவியாளராக இருந்தேன். பெரியவர் செல்வநாயகம், தலைவர் ஜீ. ஜீ. பொன்னம்பலம், மு. திருச்செல்வம் மூவரும் பிரதமர் டட்லி சேனாநாயக்காவையும் மூத்த அமைச்சர் ஜே. ஆர். ஜெயவர்த்தனாவையும் சந்தித்த காலங்களில் அமைச்சர் திருச்செல்வத்தின் உதவியாளராக நானும் அங்கிருந்திருக்கிறேன். தமிழ்த் தலைவர்களை ஒருவருக்கு எதிராக மற்றவரைத் தூண்டும் அல்லது பயன்படுத்தும் வித்தையைச் சிங்களவர் நன்கறிந்திருந்தார்கள்.

1619இல் ஆட்சியை இழந்து 400 ஆண்டுகளாக ஆட்சி செய்யும் மரபையும் வழக்காறுகளையும் ஈழத் தமிழர் பெருமளவு மறந்து போயினர். 1815இல் ஆட்சியை இழந்த சிங்களவர் 100 ஆண்டு கால இடைவெளியில் ஆட்சி மரபை இழக்காமல் சாணக்கியங்களை மறக்காமல், வித்தைகளைக் கைவிடாமல் இருப்பதை நான் நேரில் கண்டிருக்கிறேன்.

மக்களாட்சி மரபில் கொள்கைக் கருத்துக் குரல்களைக் கேட்போம், அவை மாற்றுக் கருத்தாயிலென் எனக் கூறியிருப்பதே தமிழர் தேசியக் கூட்டமைப்பின் அரசியல் முதிர்ச்சியையும் சாணக்கியத்தையும் காட்டுகிறது. கொள்கை மாறுபாடுகளை வெளிப்படையாகக் கூறலாம், தமிழர் தேசியக் கூட்டமைப்பினர் அதை வரவேற்பர். தனிப்பட்ட தாக்குதல்களும் அழாப்பி நியாயங்களும், கட்சி பிரித்தலும், நகை முரண்களும் சிங்களவரின் பிரித்தாளும் முயற்சிக்குக் கைகொடுக்கும்.

2016 மார்கழி வரை காலக்கெடு விதித்து, ஒளிமயமான எதிர்காலத்துக்கான அரசியல் தீர்வை நோக்கித் தமிழர் தேசியக் கூட்டமைப்பு நகர்த்தும் முயற்சிகளுக்கு அப்பழுக்கற்ற, நெஞ்சார்ந்த, தங்குதடையற்ற ஆதரவைக் காலக்கெடு முடியும்வரை வழங்குவதே ஈழத் தமிழரின் திறமையான ஆட்சி மரபுக்கும் சாணக்கியத்துக்கும் சான்று. அவ்வாறாற்றுவதே நம் அனைவரின் கடன். நமக்காக நாமானால் நாளை நமதாகும்.

பவள சங்கரி

வணக்கம்.

காரைக்குடி கம்பன் கழகம் , காரைக்குடி கல்லுக்கட்டி கிருஷ்ணா கல்யாண மண்டபத்தில் 31-1-2016 ஆம் தேதி நடத்தும் இவ்வாண்டுக்கான தமிழக அனைத்து கலை, அறிவியல், பொறியியல், தொழில் நுட்ப, கல்வியியல், கல்லூரிகளுக்கான போட்டி அறிக்கையினையும், சிவகங்கை மாவட்ட உயர்நிலை, மேல்நிலைப் பள்ளிகளுக்கான ஒப்பித்தல் போட்டி நடைபெறுகிறது.

தங்களுக்குத் தெரிந்தவர்கள், உறவினர்கள் வீட்டுப் பிள்ளைகளிடம் இவை பற்றி தெரிவித்து மாணாக்கர்கள் அவர்கள் படிப்புக் கட்டணம், புத்தகங்கள் வாங்கும் செலவிற்கு உதவுகிறார்போல் அதிக அளவில் ரொக்கப் பரிசுகளைப் பெற்றுப் பயனடைய உதவிடும்படி மிக்க பணிவன்புடன் வேண்டுகின்றோம். தங்கள் அறிவிப்பு பெற்றோர்களின் பாரத்தை இம்மழை வெள்ளப் பாதிப்பு சமயத்தில் குறைப்பதற்கு பெருமளவில் உதவும்; அவர்கள் தங்களுக்கும், தங்கள் பத்திரிக்கைக்கும் நன்றி பாராட்டுவர்.

மேலதிக விபரம் வேண்டுவோர் அல்லது போட்டித் தயாரிப்பிற்கு விவரம், குறிப்பு வேண்டினால் அஞ்சலட்டையில் பள்ளியா கல்லூரியா என்று குறிப்பிட்டு, தங்கள் வீட்டு அஞ்சல் குறிப்பு எண்ணுடனான முழு இல்ல முகவரியை, “கம்பன் கழகம், காரைக்குடி 2” என்ற முகவரிக்கு எழுதினாலோ அல்லது 94450 22137 என்ற கைபேசிக்கு குறுஞ்செய்தியில் (எஸ் எம் எஸ்) அனுப்பினாலோ எங்கள் செலவில் அறிக்கைகளை முழு விபரங்களுடன் அனுப்பி வைக்கிறோம் என்ற செய்தியையும் தெரிவித்து உதவ மிக்க அன்புடன் வேண்டுகின்றோம்.

தாங்கள் இதுகாறும் எங்கள் முயற்சிகளுக்கு அளித்துவந்த உதவிகளுக்கும் ஆதரவிற்கும் நன்றியும் வணக்கமும் ஏற்றருள்க! இத்தகு நட்பும், உதவியும் இனியும் தொடர அன்போடு நன்றி பாராட்டி வேண்டுவோம்.

தமிழ்ப் பணியில் தங்கள் பணிவன்புள்ள

 
செயலாளர்
————————————-
M.Palaniappan
muppalam2006@gmail.com
manidal.blogspot.com
9442913985

அகம் ஐந்து, புறம் ஐந்து மாணவர்களுக்கான ஆளுமை பயிற்சி
அம்மா, அப்பா சொல்வதை நன்றாகக் கேட்போம் மாணவர்கள் உறுதி.

தேவகோட்டை சேர்மன் மாணிக்க வாசகம் நடுநிலைப் பள்ளியில் மாணவர்களுக்கான அகம் ஐந்து, புறம் ஐந்து என்ற தலைப்பில் ஆளுமை தன்மை வளர்க்கும் பயிற்சி நடைபெற்றது.

பயிற்சிக்கு வந்தவர்களை ஆசிரியை முத்துமீனாள் வரவேற்றார். பள்ளி தலைமை ஆசிரியர் லெ. சொக்கலிங்கம் தலைமை தாங்கினார். மதுரை நிகில் அமைப்பின் மண்டல பயிற்சியாளர் திரு. திரு. தயானந்தன் மாணவர்களுக்கு ஆளுமை தன்மை வளர்க்கும் பயிற்சி அளித்தார்.
அகம் ஐந்து என்கிற தலைப்பில் …
1. அன்பு செலுத்துதல்,
2. பொறுப்புணர்வு,
3. ஒற்றுமை,
4. நேர்மை,
5. பிறர் நிலையில் இருந்து பார்த்தல்
என்கிற 5 பண்புகள் தொடர்பாகவும்;

புறம் ஐந்து என்கிற தலைப்பில் …
1. கவனித்தல்,
2. பாராட்டுதல்,
3. ஆழமான சிந்தனை,
4. ஆக்க சிந்தனை,
5. கோபத்தைக் கையாளுதல்
என்கிற 5 பண்புகள் தொடர்பாகவும் மாணவர்கள் எளிதாகப் புரிந்துகொள்ளும் வகையில், பல்வேறு விளையாட்டு முறையின் மூலமாகவும் எடுத்து விளக்கினார்.

மாணவ மாணவியரைப் பல குழுக்களாகப் பிரித்து அவர்களுக்குள் ஒரு தலைவரை தேர்ந்தெடுத்து அதன் மூலம் பயிற்சி அளித்தார். குழுக்களுக்குள் எவ்வாறு ஒற்றுமையைக் கொண்டு வருவது என்பதைச் செயல்கள் மூலம் செய்து நேரடியாக விளக்கம் அளித்தார். அடுத்தவர் நிலையை உணர்ந்து கொள்ளுதல் சார்பாகப் படங்களும் போட்டுக் காண்பிக்கப்பட்டது. பெற்றோர்கள் எவ்வாறு கஷ்டப்பட்டு பிள்ளைகளை வளர்க்கிறார்கள் என்பதும் தெளிவாக சில படங்களின் வழியாகக் காண்பிக்கப்பட்டது.

இதனைப் பார்த்த பெருவாரியான மாணவியர்கள் தங்கள் அம்மாவும் இது போல்தானே கஷ்டப்பட்டு நம்மைப் படிக்க வைக்கின்றனர் என்று கண்ணீர் விட்டு அதன் அர்த்தத்தைப் புரிந்து அழுதனர். இனிமேல் நாங்கள் அம்மா, அப்பா சொல்வதை நன்றாகக் கேட்போம் என்று உறுதி எடுத்துக் கொண்டனர். ஆளுமை தன்மை தொடர்பாகச் சக்தி, முத்தழகி, செந்தில், நந்தகுமார், காயத்திரி, முனீஸ்வரன் உட்படப் பல மாணவ மாணவியர் சந்தேகங்களைக் கேட்டு பதில் பெற்றனர். பயிற்சியின்போது பல்வேறு மாணவ மாணவியர் இது வரை தாங்கள் தெரியாமல் பொய் சொன்னது உண்டு என்றும் இனிமேல் பொய் சொல்ல மாட்டோம் என்றும், நல்ல செயல்களையே செய்வோம் என்றும் பேசினார்கள்.
நிறைவாக ஆசிரியை சாந்தி நன்றி கூறினார்.

பட விளக்கம்:
தேவகோட்டை சேர்மன் மாணிக்க வாசகம் நடுநிலைப் பள்ளியில் அகம் ஐந்து ,புறம் ஐந்து என்ற தலைப்பில் ஆளுமை தன்மை வளர்க்கும் பயிற்சியினை மண்டல பயிற்சியாளர் திரு. தயானந்தன் பயிற்சி கொடுத்தார்.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

வெளியீடு: காவ்யா
16, 2nd Cross Street,3rd floor,
Trustpuram, Kodambakkam,
Chennai 600 024

பக்கம்: 1038
விலை ; ரூ. 999

Jayanthi Sankar / ஜெயந்தி சங்கர்

கழிவிலிருந்து செல்வம் கண்காட்சி

தேவகோட்டை சேர்மன் மாணிக்க வாசகம் நடுநிலைப் பள்ளியில் அன்றாடம் நாம் பயன்படுத்தும் பொருள்களில் வீணாவதிலிருந்து செலவு எதுவும் இல்லாமல் நல்ல பொருள்கள் தயாரித்துப் பயன்படுத்தும் கண்காட்சி நடைபெற்றது.

கண்காட்சிக்கு வந்தவர்களை மாணவர் ஜெகதீஸ்வரன் வரவேற்றார். தேவகோட்டை சரக உதவித் தொடக்க கல்வி அலுவலர் லெட்சுமி தேவி கண்காட்சியைத் தொடக்கி வைத்து தலைமை தாங்கிப் பேசுகையில், மாணவர்கள் அனைவரும் நமக்குத் தேவை இல்லாமல் உபயோகப்படாமல் உள்ள பொருள்களில் இருந்து நல்ல பொருள்களாக மாற்றி நன்றாகக் கொண்டு வந்துள்ளீர்கள். நமக்குத் தேவை இல்லை என நினைக்கும் பொருள்கள் நமக்குப் பல வழிகளில் பயன்படுவதை நீங்கள் புரிந்து கொள்ள வேண்டும் எனப் பேசினார். பள்ளி தலைமை ஆசிரியர் லெ. சொக்கலிங்கம் முன்னிலை வகித்தார்.

1ம் வகுப்பில் மாணவி திவ்யஸ்ரீ தென்னங்குச்சி, தெர்மோகோல் கொண்டு கிளிக்கூண்டு, சுத்தியல், துப்பாக்கி ஆகியவற்றையும்
2ம் வகுப்பு மாணவன் வெங்கட்ராமன் தேங்காய் மூடி, பட்டன் கொண்டு ஆந்தையும்
3ம் வகுப்பு மாணவி ஜனஸ்ரீ அரச இலை கொண்டு யானை உருவமும்
4ம் வகுப்பு மாணவி வள்ளியம்மை தண்ணீர் டப்பாவில் தராசும்
5ம் வகுப்பு மாணவி காயத்ரி முட்டைக் கூடு கொண்டு பூங்கொத்து, பொம்மை ஆகியவற்றையும்
6ம் வகுப்பு மாணவன் சஞ்சய் தண்ணீர் டப்பாவில் பூங்கொத்தும்
7ம் வகுப்பு மாணவி எழுதும் மேசையை காலண்டர் அட்டை கொண்டும்
8ம் வகுப்பு மாணவி அட்டை, குச்சிகள் கொண்டு தபால் பெட்டியும்
செய்து முதல் பரிசினை பெற்றனர். கண்காட்சிக்காக 100க்கும் மேற்பட்ட பொருட்களைச் செய்து கொண்டு வந்தனர்.
ஆசிரியை முத்து லெட்சுமி, முத்து மீனாள், வாசுகி ஆகியோர் நடுவர்களாகச் செயல்பட்டனர்.

நிறைவாக மாணவி சக்தி நன்றி கூறினார்.

பட விளக்கம் :
தேவகோட்டை சேர்மன் மாணிக்க வாசகம் நடுநிலைப் பள்ளியில் கழிவிலிருந்து செல்வம் கண்காட்சியை தேவகோட்டை உதவித் தொடக்க கல்வி அலுவலர் லெட்சுமி தேவி துவக்கி வைத்துப் பார்வையிட்டார்.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

சுட்டி கிரியேசன்ஸ் அழகிய தங்க மீன் வடிவத்தை உருவாக்கிய தேவகோட்டை சேர்மன் மாணிக்க வாசகம் நடுநிலைப் பள்ளி மாணவர்களுக்குப் பாராட்டு

சுட்டி விகடன் 15/12/2015 இதழில் சுட்டி கிரியேசன்ஸ் பகுதியில் வெளியான அழகிய தங்க மீன் வடிவத்தை உருவாக்கிக் காண்பித்துள்ள தேவகோட்டை சேர்மன் மாணிக்க வாசகம் நடுநிலைப் பள்ளி மாணவ,மாணவியர் .

சுட்டி கிரியேசன்ஸ் அழகிய தங்க மீன் வடிவத்தை உருவாக்கிய தேவகோட்டை சேர்மன் மாணிக்க வாசகம் நடுநிலைப் பள்ளி மாணவ,மாணவியர் . நேரடியாகப் புத்தகத்தை பார்த்துச் செய்தபோது எடுத்த படம்.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

22ஆம் ஆண்டு பாரதி திருவிழா இம்மாதம் 11, 12, 13 ஆகிய மூன்று நாட்கள் வழக்கம்போல் திருவல்லிக்கேணி, பாரதி நினைவு இல்லத்தில் நடைபெறுகிறது. அவசியம் நீங்கள் வந்து கலந்து கொள்ள வேண்டுகிறோம்.

அன்புடன்
*வானவில் பண்பாட்டு மையம்
*சைமா, திருவல்லிக்கேணி

சித்தார்த்தா பள்ளி

தேவகோட்டை- தேவகோட்டை சேர்மன் மாணிக்க வாசகம் நடுநிலைப் பள்ளியில் உலக எய்ட்ஸ் தின நாள் விழிப்புணர்வு நடைபெற்றது.

விழிப்புணர்வு நிகழ்ச்சிக்கு வந்தவர்களை ஆசிரியை சாந்தி வரவேற்றார். பள்ளி தலைமை ஆசிரியர் லெ. சொக்கலிங்கம் தலைமை தாங்கினார். சேவுகன் அண்ணாமலை கலை மற்றும் அறிவியல் கல்லூரி முதல்வர் சந்திரமோகன் உலக எய்ட்ஸ் தினம் தொடர்பாகவும், நல்ல பழக்கங்களை சிறு வயதிலேயே கற்று கொள்ளவேண்டும் என்றும், எய்ட்ஸ் என்ற ஆட்கொல்லி நோய் இன்று மேலாண்மை செய்ய கூடிய வகையில் நம் நாட்டில் உள்ளது. பருவ வயதில் வரக்கூடிய மன பதட்டங்களை எதிர்கொள்ள ஆசிரியரின் உதவியுடன் நல்ல பழக்கங்களை பழகிக் கொண்டாலே எந்த நோயும் வராது என்று பேசினார். மாணவர் முனீஸ்வரன், மாணவிகள் சௌமியா, தனம் ஆகியோர் தங்களது கருத்துக்களைத் தெரிவித்தனர். நிறைவாக ஆசிரியை கலாவல்லி நன்றி கூறினார்.

பட விளக்கம் :
தேவகோட்டை சேர்மன் மாணிக்க வாசகம் நடுநிலைப் பள்ளியில் உலக எய்ட்ஸ் தின விழாவில் தேவகோட்டை ஸ்ரீ சேவுகன் அண்ணாமலை கலை மற்றும் அறிவியல் கல்லூரி முதல்வர் சந்திரமோகன் பேசினார்.
உடன் பள்ளி தலைமை ஆசிரியர் லெ. சொக்கலிங்கம்

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

அறம் செய விரும்பு திட்டத்தின் மூலம் சிவகங்கை மாவட்டம் குக்கிராமத்தின் அரசு நடுநிலைப் பள்ளிக்கு தண்ணீர் சுத்திகரிப்பு இயந்திரம் உதவி:

“ஆனந்த விகடன் – ராகவா லாரன்ஸ்” ஆகியோரின் “அறம் செய விரும்பு” திட்டத்தின் கீழ் அறம் செய விரும்பு திட்டத்தில் உதவி கோரிய சிவகங்கை மாவட்டம் …
காரைக்குடியில் இருந்து சுமார் 14 கிலோமீட்டர் தொலைவில் உள்ள சக்கோட்டை ஒன்றியம் நேமம் பழையூர் என்கிற ஊரில் உள்ள அரசு நடுநிலைப் பள்ளிக்கு 50 லிட்டர் நல்ல தண்ணீர் சுத்திகரிப்பு இயந்திரம் வழங்கப்பட்டது. அந்த தண்ணீர் சுத்திகரிப்பு இயந்திரத்தை  மாட்டுவதற்கு பணியாளர் அவர்கள் சென்னையில் இருந்து வந்து பகல் முழுவதும் வேலை செய்தார்.

பள்ளியின் பொறுப்பு தலைமை ஆசிரியர் திரு. ரவிச்சந்திரன் அவர்கள் அந்த ஊரில் கடைகள் இல்லாத நிலையில் 8 கிலோமீட்டர் தொலைவில் உள்ள கீழசிவல்பட்டி என்கிற ஊருக்குச் சென்று பொருட்களை வாங்கிக் கொடுத்து மிகுந்த உதவியாக இருந்து உள்ளார் என்பது குறிப்பிடத்தக்கது. பொறுப்பு தலைமை ஆசிரியர் திரு.ரவிச்சந்திரன் அவர்களும், பள்ளி ஆசிரிய, ஆசிரியைகளும், மாணவர்களும் எங்களை இன் முகத்துடன் வரவேற்றனர். தண்ணீரைக் குடித்து விட்டு அருமையாக இருப்பதாகச் சொன்னார்கள். மாணவர்களின் முகத்தில் அவ்வளவு சந்தோசம். அதனை விட தங்கள் மாணவர்களுக்கு நல்ல தண்ணீர் கிடைத்து விட்டதைப் பார்த்து தலைமை ஆசிரியர் அவர்களுக்கும் மிகுந்த சந்தோசம். அதனைக் கண்ட நமக்கும் சந்தோசம்.

படக்குறிப்பு:  பள்ளியின் பொறுப்பு தலைமை ஆசிரியர் திரு. ரவிச்சந்திரன் அவர்களும்  மாணவர்களும்
லெ. சொக்கலிங்கம்,
அறம் செய விரும்பு – தேவகோட்டை.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

முருகேஷ். மு

வந்தவாசி.நவ.21. வந்தவாசி அரசுக் கிளை நூலகத்தின் நூலக வாசகர் வட்டம், எஸ்ஆர்எம் இன்போடெக் கம்ப்யூட்டர் நிறுவனம் மற்றும் ஸ்ரீகிருஷ்ணா கோச்சிங் சென்டர் இணைந்து நடத்திய 48-ஆவது தேசிய நூலக வார முப்பெரும் விழா சார்பாக பள்ளி மாணவ – மாணவிகளுக்கு ஓவியப் போட்டி, கட்டுரைப் போட்டி, கவிதைப் போட்டி ஆகியவை வந்தவாசி அரசு பெண்கள் மேனிலைப் பள்ளி வளாகத்தில் நேற்று தொடங்கியது.

இவ்விழாவிற்கு நூலக வாசகர் வட்டத் தலைவர் கவிஞர் மு.முருகேஷ் தலைமையேற்றர். மூன்றாம் நிலை நூலகர் பூ.சண்முகம் அனைவரையும் வரவேற்றார். வந்தை வட்டக் கோட்டைத் தமிழ்ச் சங்கத் தலைவர் எ.மு.உசேன், எஸ்ஆர்எம் இன்போடெக் கம்யூட்டர் நிறுவன முதல்வர் எ.தேவா, ஸ்ரீகிருஷ்ணா கோச்சிங் சென்டர் முதல்வர் பா.சீனிவாசன் ஆகியோர் முன்னிலை வகித்தனர்.

வந்தவாசியைச் சுற்றியுள்ள 6 முதல் 12-ஆம் வகுப்புவரையுள்ள பள்ளி மாணவ – மாணவிகளுக்கு நடத்தப்பட்ட
ஓவியப் போட்டி, கட்டுரைப் போட்டி, கவிதைப் போட்டியில் சுமார் 450-க்கும் மேற்பட்ட மாணவ- மாணவிகள் கலந்து கொண்டனர். போட்டிகளில் வெற்றி பெற்ற மாணவ – மாணவிகளுக்கு கிளை நூலகர் கு.இரா.பழனி பரிசுகள் மற்றும் பாராட்டுச் சான்றிதழ்களை வழங்கினார்.

விழாவில், ரூ.1000/- செலுத்தி, 170-ஆவது நூலகப் புரவலராக ஓய்வுபெற்ற தலைமையாசிரியர் ப.ஜெயலெட்சுமி இணைந்தார்.

மூன்றாம் நிலை நூலகர் சா.ஜோதி,யுரேகா ஒன்றிய கருத்தாளர்கள் மு.குமரன், மு.ஜீவா, முருகன்,
பள்ளி ஆசிரியர்களும் ஏராளமாய் கலந்து கொண்டனர்.

நிறைவாக, நூலக உதவியாளர் மு.ராஜேந்திரன் நன்றி கூறினார்.

படக்குறிப்பு :

வந்தவாசியில் அரசு கிளை நூலக வாசகர் வட்டத்தின் சார்பில் நடைபெற்ற தேசிய நூலக வார விழாப் போட்டிகளில் வெற்றி பெற்ற மாணவ – மாணவிகளுக்கு கிளை நூலகர் கு.இரா.பழனி பரிசுகளை வழங்கும்போது எடுத்த படம். அருகில், நூலக வாசகர் வட்டத் தலைவர் மு.முருகேஷ், வந்தை வட்டக் கோட்டைத் தமிழ்ச் சங்கத் தலைவர் எ.மு.உசேன், எஸ்ஆர்எம் இன்போடெக் கம்யூட்டர் நிறுவன முதல்வர் எ.தேவா, ஸ்ரீகிருஷ்ணா கோச்சிங் சென்டர் முதல்வர் பா.சீனிவாசன் ஆகியோர் உள்ளனர்.