3 பிஎச்கே – திரை விமர்சனம்
3BHK
சமீபத்தில் நான் பிரைம் வீடியோவில் 3BHK படத்தைப் பார்த்தேன். படம் முழுக்க ஒரு நெகிழ்ச்சியுடன் கண் கலங்கிய கண்களுடனேயே பார்க்க வைத்த படம். தொய்வின்றி விறுவிறுவென்று ஒரு நடுத்தரக் குடும்பத்தின் இயல்பான நிலையை, வாழ்க்கையின் யதார்த்தமான பகுதிகளையும் உணர்ச்சிகளையும் அன்றாட போராட்டங்களையும் இந்தப் படம் அழகாகப் படம் பிடித்துக் காட்டுகிறது. சித்தார்த் பள்ளி மாணவனாகவும், கல்லூரி மாணவனாகவும், திருமணத்திற்கு நிற்கும் இளைஞனாகவும் இப்படி மாறி மாறி கலக்குகிறார். ஆனாலும் இந்த வயதில் சித்தார்த் (42 வயது என்று படித்த நினைவு) பள்ளி மாணவனாக நடிப்பது ஏற்றுக்கொள்ள கொஞ்சம் சிரமம்தான் என்றாலும் அதற்கு தகுதியாகத்தான் இருக்கிறது அவருடைய உடல்வாகும், முக அமைப்பும். ஆச்சரியம்தான். சரத்குமாரும், தேவயானியும் அவரவர் பாத்திரங்களுக்கேற்ப அப்படியே வாழ்ந்திருக்கிறார்கள். பாவம் தேவயானி, தலையாட்டுவது மட்டுமே அவருடைய முழுநேரப்பணி! அமைதியான பின்னணி இசை இந்தப் படத்திற்கு மிகவும் துணைபுரிகிறது. சரத் குமார் தனது கண்ணியமான நடிப்பால் ஒரு வலுவான தோற்றத்தை ஏற்படுத்தினாலும் சில காட்சிகளில் அவரது ஒப்பனை இயல்பாக இல்லை. மீதா ரகுநாத் இயல்பான நடிப்பு.
ஒரு புதிய வீடு வாங்கும் கனவில் தன் வாழ்க்கையை மட்டுமல்லாமல், தன் இரு குழந்தைகளின் வாழ்க்கையையும் பணயம் வைக்கும் ஒரு இயல்பான நடுத்தர வாழ்க்கையின் அப்பட்டமான கதை.
மகனுக்கு ஆர்வமில்லாத, அவனுக்கு அதில் திறமையில்லையென்றாலும் எதிர்கால நன்மைக்காக என்று சொல்லி, சொல்லியே கல்வியைத் தொடரக் கட்டாயப்படுத்துவது, வரதட்சணை கொடுத்து மகளை திருமணம் செய்து வைப்பது, தன்னுடைய தனிப்பட்ட இலக்குகளை மகனின் மீது திணிப்பது போன்றவைகளால் குடும்பத்தில் ஏற்படும் பிரச்சனைகள், வேதனைகள் அனைத்தும் அழகாக சித்தரிக்கப்பட்டுள்ளது. வாழ்க்கை எப்போதும் நாம் திட்டமிட்டபடி நடக்காது என்பதோடு பல சமயங்களில் கடின உழைப்பு மட்டுமே வெற்றிக்கு உத்தரவாதமாகாது. இயக்குனர் ஸ்ரீ கணேஷ் பாராட்டுக்குரியவர்.
தந்தை என்ற உரிமையில் சில முடிவுகளை தவறாக எடுத்ததன் விளைவையும், சரியான நேரத்தில் மகனுக்கு ஏற்படும் விழிப்புணர்வும் தோல்வி என்பது வாழ்வின் இறுதி முடிவு அல்ல என்பதை லாஜிக்குடன் நிரூபித்துள்ள படம். மோசமான வன்முறைக் காட்சிகளோ, சண்டைக் காட்சிகளோ, தேவையற்ற காதல் காட்சிகள் இல்லை என்பதால் குடும்பத்துடன் நிம்மதியாகப் பார்க்கலாம்.
