Tag: முனைவர் பா.மஞ்சுளா

பா. மஞ்சுளா

திருமந்திரம் ………..  திரைவிலகட்டும்

திருமூலரின் வாழ்வும் வாக்கும் 

தோத்திர நூல்கள் எனக் கூறும் சைவ  திருமுறைகள் பன்னிரண்டனுள் திருமந்திரம் பத்தாவது. ஏனைய திருமுறைகளைச் சேய் என்றால் பத்தாம் திருமுறையை தாய் எனலாம்.

‘சாத்திரங்களுக்கு சிறந்தது திருமூலர் தந்திரம் தோத்திரத்தில் சிறந்தது திருவாசகம் இவற்றை
ஊன்றிக் கவனிக்கவும்’ என்று வள்ளலார் கூறுவார்.

“திருவளர் திருஅம்பலத்திலே அந்நாள் செப்பிய
மெய்ம் மொழிப்பொருளும்
உருவளர் திருமந்திரத்திரு முறையால்.உணர்த்தி
மெய்ம்மொழிப்பொருளும்

கருவளர் அடியேன்உளத்திலே நின்று காட்டிய
மெய்ம் மொழிப்பொருளும்
மருவி என் உளத்தே நம்பி நான் இருக்கும்
வண்ணமும் திருவுளம் அறியும்
. திருவருட்பா   –  ஆறாம் திருமுறை 3527

என வள்ளலார் திருமந்திரத்தின் சிறப்பை கூறுவர்.

திருமூலர் வரலாறு :

தெய்வச் சேக்கிழார் தம் திருத்தொண்டர் புராணத்தில் ,

” கயிலாயத்துஒரு சித்தர் பொதியில்சேர்வார்
காவிரி சூழ் சாத்தனூர் கருதும் மூலன்”

என தனது ‘திருமூலதேவ நாயனார் புராணம்’ என்ற பெயரில் திருமூலர் வரலாற்றைக் கூறுகிறார். திருகயிலையில் திரு நந்தி தேவரின் மாணவர்களில் ஒருவரான சிவயோகியார் ஒருவர் அகத்திய முனிவரை சந்திக்கவும், உலக நடைமுறை வாழ்வியலை அறியவும், தனது குருவான நந்தியின் ஆசியுடன் கயிலையை விட்டு பொதிகைக்குக் வந்தார். வரும் வழியில்  திருவாடுதுறையை அடைந்தார் அங்கே காவிரிக்கரையில் பசுக்கூட்டங்கள் மேய்க்கும் மேய்ப்பனான சாத்தனூர் மூலன் என்பவன் பாம்பு கடித்து இறந்து விட அப்பசுக் கூட்டமும் செய்வது அறியாது தவித்து நிற்க அவ்வழியே வந்த சிவயோகி பசுக்களின் துன்பம் போக்க சித்தருக்கே உரிய ஜீவகாருண்ய
உணர்வுடன் தனது கூடு விட்டு கூடு பாயும் வித்தையின் முலம் யோகி தனது உடலை விட்டு
மூலனின் உடலில் புகுந்து தனது உடலை ஒரு மறைவான இடத்தில் மறைத்து வைத்தார். பின்னர் அப்பசுகூட்டத்துக்கு நீருட்டி நிழலாற்றி அவற்றை காத்து மூலனின் ஊர் எல்லையிலேயே நின்றார்.பொழுது சாய்ந்தும் தன் கணவன் வரவில்லையே என நெஞ்சம் பதறடிக்கத் தேடிவந்த மூலனின் மனைவி ஊர் எல்லையில் இவர் நின்ற நிலையில் இருப்பதை கண்டு இவருக்கு
தீங்கு நேர்ந்ததே என்று இவரது உடலைத் தீண்டினாள் அவரோ உனக்கும் எனக்கும் ஒரு தொடர்பும் இல்லை என்று விலகி அங்கு உள்ள ஒரு மரத்தின் அடியில் யோகத்தில் அமர்ந்தார்.

இடையன் மனைவியோடு வந்த ஊரார் வினவ ?மூலன் உடலில் உள்ளே யோகி நடந்த உண்மையைக் கூறினார். ஊரார் அப்படி என்றால் உனது உடல் எங்கே ?என கேட்டதும் தனது உடலை மறைத்த இடம் தேடி யோகி காட்டுக்கு சென்றார் அங்கே சிவனின் திருவிளையாடலும் தொடங்கியது தன் உடம்பைத் தேடியும் காணாது சிந்தித்த போது சிவாகமப் பொருளைத் தம் வழியாகத் தமிழில் உரைக்கத் திருவுளம் கொண்ட இறைவனின் விளையாட்டு எனத் தெளிந்தார் .

அதன் பின் திருவாவடுதுறை இறைவனை வணங்கி மேற்கே அமைந்திருக்கும் அரசமரத்தடியில் கீழ்ச் சிவயோக நிட்டை கூடிச் சிவாகமப் பொருளை ஓராண்டுக்கு ஒன்றாக

‘ஒன்றவன்தானே ‘என்று தொடங்கி மூவாயிரம்  ஆண்டுகளில் மூவாயிரம் திருமந்திரங்களை அருளினார் பின்னர் திருவருளால் திருக்கயிலை சேர்ந்தார்.

நந்தி அருளாலே நாதனம் பேர் பெற்றோம்
நந்தி.அருளாலே மூலனை நாடினர்
நந்தி அருளாவது என் செயும் நாட்டினில்
நந்தி வழிகாட்ட நானிருந்தேனே
பாடல்__51

யோக சித்தியால் திருமூலர் வாழ்ந்திருக்க வேண்டும் எனலாம் .மேற்கண்ட அவரது பாடலை
அவரது வரலாற்றை கூறுகிறது.

அகத்திய வைத்திய ரத்தின சுருக்கம் 360 என்ற நூலில் திரு மூலரை பற்றி வேறு ஒரு கதையும் உண்டு கதை எதுவாக இருந்தாலும் நமக்குக் கவலை இல்லை. அவரது பாடலே அவரை இவ்வுலகம் உள்ள வரை நிலை நிறுத்தும்.

மூலன் உரை செய்த மூவாயிரம் தமிழ்
மூலன் உரை செய்த முந்நூறு மந்திரம்.
மூலன் உரை செய்த முப்பது உபதேசம்
மூலன் உரை செய்த மூன்றும் ஒன்றாமே

பாடல்___ 2997

தொடருவோம்

பா.மஞ்சுளா

திருமந்திரம்

திருமூலரின் திருமந்திரம் பன்னிருதிருமுறையில் பத்தாம் திருமுறை தமிழர்களுக்கு முத்தான பொது மறை இது ஒன்பது தந்திரங்களையும் 3047,பாடல்களையும் கொண்டது . வருடத்துக்கு ஒரு பாடல் வீதம் மூவாயிரம் பாடல்களைப் பாடினார். இவரது பாடல்களை திருஞானசம்பந்தரும், திருநாவுக்கரசரும் கோயில் கொடிமரத்தின் கீழே கண்டெடுக்கப்பட்டதாக கூறுவர்.சித்தர் மரபில் வந்த திருமூலர் உடம்பைக் கோயில் என்று பாடிய முதல் கவிஞர்,

” என்னை நன்றாக இறைவன் படைத்தனன்
தன்னை நன்றாகத் தமிழ் செய்யுமாறே”

என்று தன் படைப்பின் நோக்கத்தை உலகத்துக்கு உணர்த்தினார் இவரது பாடல்கள் எளிமையாக படிக்க சுவை தரும்

‘ ஒன்றே குலம் ஒருவனே தேவன்’
அன்பே சிவமாய் அமர்ந்து இருப்பாரே

என்ற திருமூலரின் மந்திர மணிவாக்கு உலகம் ஒன்றாக வேண்டும் என்ற உயர்ந்த நோக்கத்தின் வெளிப்பாடு. இவரது மந்திரங்கள் நெடுங்கிலும் , மூச்சுப்பயிற்சி இறையருள் சிவசிந்தனை போலியான வழிபாடு கூடாது போன்ற கருத்துகளை முன்னிலைப்படுத்தி இருக்கின்றன. இதில் முதல் பாடலாக இறைவணக்கத்தில்,

“ஒன்றவன் தானே இரண்டவன் இன்அருள்
நின்றனன் மூன்றினுள் நான்குணர்ந் தான் ஐந்து
வென்றனன் ஆறு விரிந்தனன் ஏழ்உம்பம்பர்ச்
சென்றனன் தான் இருந்தான் உணர்ந்து என்றே”

இறைவன் ஒருவரே அந்த ஒருவனை இப்போரண்டத்தின் சிவனும் சக்தியாக இரண்டாகவும் உள்ளான்.அந்த இருவனே இவ்வுலகத்தில் படைத்தல் காத்தல் அழித்தல் என்னும் முத்தொழில் புரியும், பிரமன் திருமால் உருத்திரன் என்ற மூன்றாகவும் உள்ளான். மேலும் அவனே நான்மறை வடிவில் உள்ளவன்,படைத்தல்.காத்தல் அழித்தல் அருளல் மறைத்தல் என்னும் ஐந்தொழிலுக்கும் அவனே தலைவன்.ஆறு சமயமான ,சைவம்,வைணவம் , சாக்தம் , காணாபத்யம், சௌரம், கௌமாரம் போன்ற சமயத்தின் பிரிவாக இருப்பவனும் அவனே. ஏழ் உலகத்தையும் இயக்குபவனும் எங்கும் நீக்கமற நிறைந்து,பரம்பொருளாகவும் எண்குணங்களையும் உடையவன். அவனது எட்டுவகையான குணங்கள், தன்வயமாதல், தூய உடலை பெறுதல் இயற்கை உணர்வடைதல் , முற்றும் உணர்தல் பற்றற்று ,பேரருள் நோக்கு, முடிவில்லாமை, எல்லையில்லாமை போன்ற எட்டு குணத்துக்கும் அதிபதியாக நிலைத்த பரம்பொருள் என்றுவிளக்கம் கூறுகிறார். இதனை வள்ளலாரும் ,

பரத்தினுள் பரமே பரம்பரம் பரமே…. அவனே ஜோதி சொரூபம் கருணை வடிவம் என்கிறார்

இறைவன் என்பவன் பிரபஞ்ச ஆற்றல் அவனே அனைத்தையும் இயக்கும் பேராற்றல் என்று முதல் பாடலில் நமது இறையின் நெறிமுறையை வெளிப்படுத்துகிறார்

முதல் பாடலே முத்தான பாடல்

ஒரு பானை சோற்றுக்கு ஒரு சோறு பதம்……..

தொடருவோம்

மஞ்சுளா வள்ளலார்

நட்டாற்றில் கையை நழுவ விட்டேனோ ….

இந்தியா சிந்தனை மரபில் முக்கியமான ஞானியாகக் கருதப்படுபவர் வள்ளலார் அவரிடம் பிரதானமாக இருந்த குணம் கருணை ,அதுவே அனைத்து குணங்களில் அடக்கம் எனலாம் . எங்கோ ,யாரோ அடிபடுகிறபோது அவர்களுக்காக நாம் கண் சிந்துவது கருணை.மனிதனிடம் இருக்கும் குணமே அவனை தீர்மானிக்கிறது. நம்மைக் காயப்படுத்தும் எதையும் மற்றவர்களுக்கு செய்யக்கூடாது என்று மகாபாரதத்தில் அனுசாசன பாவத்தில் காணலாம் நமக்குத் தீமையானதை ஒரு போதும் அடுத்தவர்களுக்கும் ஆற்றக்கூடாது என்று பத்மாபுரணமும் குறிக்கின்றது .

இந்த உலகத்தில் மனிதனின் உண்மையான குணம் யாரும் இல்லாத இடத்திலும் தவறு செய்யாது இருத்தல் ஆகும். நம்மை யாரும் கவனிக்கவில்லை என்ற எண்ணம் வரும்போது நமது உள்ளுணர்வு விழிப்படைந்து உள் தூங்கும் மிருகம் விழித்து, இது தான் ‘தகுந்த சமயம் ‘என்று கிடைக்கும் சந்தர்ப்பத்தைப் பயன்படுத்தும் .அப்படி தவறு செய்தவர்கள் பெயர்களை பட்டியல் இடும்போது நினைவில் வருவார்கள் ஏராளமான நபர்கள் முதலில் ஏசுநாதர் காட்டிக்கொடுத்த அவரது சீடன். ,கட்டபொம்மனையும் தூக்கிலிடச் செய்த எட்டப்பன் பெரியபுராணத்தில் வரும் முத்துதத்தன் ,என பலரது வரலாறுகள் நமக்கு நம்பிக்கை துரோகத்தால் விளைவாக தோன்றிய கதைகளை இன்றும் கூறும் .

எனவே தான் வள்ளலார் இரண்டாவது மிக முக்கியமான ஒன்று மனிதரின் குணம் என்று மனுமுறை வாசகத்தில் கூறினார் . இதில் மனுநீதி சோழனின் மகன் பசுவின் கன்றை தோர் காலில் கொன்ற நிகழ்வை வைத்து , சமதர்மநீதியை உலகிற்கு உணர்த்தியவர் ஒருவர் நம்பி நம்முடன் வரும்போது அவரே கைக்கழுவிவிடுவது எவ்வளவு பெரிய பாவம் அந்த பாவத்துக்கு பிரதிபலனாக நாம் புண்ணியம் எவ்வளவு செய்தாலும் அது பயன் இல்லை வாழ்வில் மிக பெரிய பாவத்தில் ஒன்று நம்பிக்கை கொண்டவர்களுக்கு துரோகம் செய்வது

நல்லது செய்த லாற்றீ ராயினும்
அல்லது செய்த லோம்புமின் ….. என்று புறம்

கூறுகிறது. மேலும் ஔவையின் ஆத்திச்சூடியில்

குணமது கைவிடேல். என்கிறாள் நல்ல குணமே மற்றவர்களையும் அரவணைத்துச் செல்லும் .
நல்ல குணம் உடைய சான்றோர்களைச் சார்ந்த நட்புக் கொள்ள வேண்டும்.

தொடருவோம்

முனைவர் .பா.மஞ்சுளா

நல்லோர் மனதை நடுங்கச் செய்தேனோ ……..

நல்லவர்கள் என்பதற்கு அறிஞர், சான்றோர் ,பழி பாவத்துக்கு அஞ்சி நடப்பவர்கள் என்று பொருள் தருகிறது அகராதி. நாம் செய்யும் செயல்களை வைத்து நமது பாவ, புண்ணிய கணக்கு வருகிறது. பிறருக்கு தீங்கு தரும் செயல்களை எல்லாம் பாவ செயல்கள் என்றும் , நல்லது செய்யும் செயலை புண்ணிய செயலாகவும் நாம் கொள்ளலாம். அடுத்தவர் மேன்மைக்கு செய்யும் காரியம் புண்ணியம், அவர்களது வீழ்ச்சிக்கு செய்யும் காரியம் பாவம் எனக் கூறலாம். நமது நினைவால், செயலால் அடுத்தவரின் இதயத்தில் சின்னக் கீறல்கூட ஏற்படாமல் வாழ்வதே சிறந்த வாழ்க்கை. இதைத்தான் வள்ளலார் தனது மனுமுறை கண்ட வாசகத்தில் முதல் வரியாகக் கூறுகிறார். எவ்வளவு உயர்வான சிந்தனை ஒரு மனிதன் என்பவன் எப்படி வாழ வேண்டும் என்பதற்கு எடுத்துக்காட்டு. அடுத்தவரின் உணர்வுகளை அறிந்துகொண்டு வாழும்போது மற்றவர்களை குறைசொல்ல மாட்டார்கள் ஏனென்றால் உயிரை மாய்ப்பதை விட நமது குணத்தை மாய்ப்பது பெரும் குற்றம்.  இதைத்தான் வள்ளுவரின் குறளில்,

‘தீயினால் சுட்ட புண் உள்ளாறும் ஆறாதே
நாவினாற் சுட்ட வடு’

தீயினால் எற்பட்ட காயத்தை விட, சொற்களால் உண்டாகிறது வடு என்றும் நமது நினைவில் நிலைத்து இருக்கும். அதுவே இரணமாக மாறி உள்ளே வடுவாக நீடிக்கிறது. நினைவால் சொல்லால், செயலால் அடுத்தவர் மீது பூ சொரிந்து வாழ்வது நல்ல ஒரு செயலாகும். நமது எண்ணத்தை தூய்மைப்படுத்தி உள்ளத்தில் உள்ள அழுக்குகளை எல்லாம் நீக்கி, நாம் இறைவனை சிந்திக்கின்ற போது மனம் விழிப்புணர்வு பெறும். அப்போது எவ்வுயிரையும் தீங்கு செய்ய மனம் ஏற்காது .

‘எவ்வுயிரையும்தன்னுயிர் போல் எண்ண வேண்டும்’

என்பார் வள்ளலார், அந்த உளவியல் எண்ணமே உள்ளத்தில் ஆழமாகப் பதிந்தால் மனம் உற்சாகத்துடன் எந்த செயலையும் நாம் செய்யும் போது ஒரு வகையான மனதிருப்தி ஏற்படும் . நமது செயல்களே உலகத்திற்கு அளவுகோல்களாக மதிக்கப்படும் .அவ்வகையில் வாழ்கின்ற மானிடம் சிறக்கும் அங்கு பண்பாட்டுக் கருவூலமாக மக்கள் இருப்பார்கள் .

நல்லோர் மனதை குளிர செய்யலாம்.

தொடரும்………

முனைவர் .பா.மஞ்சுளா
தமிழ்த்துறைத் தலைவர்
எஸ் .எஸ் .எம்.கலை அறிவியல் கல்லூரி
குமாரபாளையம்
நாமக்கல் மாவட்டம்