Tag: விப்ரநாராயணன்

விப்ரநாராயணன் 

பிறந்தது புத்தாண்டு
இறந்தது நம் ஆணவமும் பேராசையும்
திறந்தது நம் உள்ளக் கதவு
பறந்தது பகைமை யாவும்

புயல் வந்தது புலம் பெயர்ந்தனர் மக்கள்
வயல்கள் மறைந்தன வாழ்வும் அழிந்தது
அயலார் எல்லாம் அண்மையில் வந்தனர்
தயக்கமின்றி தன்னுயிர் ஈந்து வாழ்வளித்தனர்

அரசியலில் மாற்றம் கண்டோம்
ஆட்சியில் ஏமாற்றம் கண்டோம்
அறவியலில் வளர்ச்சி கண்டோம்
ஆசிரமங்கள் வளரக் கண்டோம்
அறநெறி மறையக் கண்டோம்
அறிவியல் விண்ணைத் தொட்டது
அறிவோ மண்ணில் புதைந்தது
மதங்கள் யாவும் ஒன்றே என்றனர்
மனிதர்கள் யாவரும் ஒன்றே என்றனர்
ஆனால் சண்டையும் பூசலும் தினமும்தான்
எங்கும் தன்னலம் எதிலும் தன்னலம்
வாங்கும் பொருளிலும் கலப்படம்
ஆண்டுகள் பல சென்றன
ஆனந்தம் தேடி அலைகின்றனர் மக்கள்
ஆண்டவன் வருவேன் என்றான்
அதர்மத்தை அழிப்பேன் என்றான்
அதர்மத்தின் நாட்டியம்தான் எங்கும்
இராமன் வந்தார் கிருஷ்ணர் வந்தார்
இராமானுஜரும் சங்கரரும் வந்தார்
இராமகிருஷ்ணரும் விவேகானந்தரும் வந்தார்
காந்தி வந்தார் பாரதி வந்தார்
காணவில்லை மக்கள் மனதில் அமைதியை
காணவில்லை சத்தியமும் அன்பும்
காணவில்லை நாணயமும் நேர்மையும்

நம்புவோம் கண்ணன் வருவாரென்று
நம்புவோம் புதுயுகம் பிறக்க வருவாரென்று
நம்புவோம் நல்லவர்கள் வருவாரென்று
நம்புவோம் நல்லது செய்வாரென்று

பாரதநாட்டின் மாண்புகள் அழியாது காக்கவும்
பாரினில் அமைதியும் அன்பும் வேரூன்றவும்
பார்த்தனின் அருள்மொழிகள் பரவச் செய்யவும்
பார்த்தசாரதியை வணங்குவோம் நம்பிக்கையுடன்

விப்ரநாராயணன்

 

அகவிருள் விலக்கவே ஆண்டவன் வருவான்

இகவிருள் விலக்கவே ஆசான் வருவான் இச்

சகவிருள் விலக்கவே ஆதவன் வருவான்  இச்

சகத்தினை  நெறிப்படுத்தவே  தீபாவளி வருவாள்

 

அசுரனை அழித்தான் பீமனும் அன்று நம்

அசுரத்தனத்தை அழிக்கவே தீபாவளித் திருநாள்

அச்சத்தை நீக்கவே இத்திருநாள்  நம்மனதின்

எச்சத்தை கொளுத்தவே தீபாவளித் திருநாள்

 

மத்தாப்பைக் கொளுத்துவோம் இத்திருநாளில் நம்

புத்தியையும் தீட்டுவோம் இத்திருநாளில்  நாட்டில்

எத்திசையிலும் ஒளிவீசும் தீபாவளித் திருநாள்

சத்தியத்தைக் காக்கவந்த சமத்துவத் திருநாள்

 

ஆண்டவனின் விருப்பமே இத்தீபாவளித் திருநாள்

மாண்டவன் விருப்பத்தால் மலர்ந்த திருநா ள் ஊழல்

தாண்டவத்தை கொளுத்தவந்த அற்புதத் திருநாள்

தீண்டாமை  நீங்கவே வந்த தீபவொளித் திருநாள்

 

கூட்டம் கூட்டமாய் கடைக்குச் செல்வர்

கூட்டத்தில் காணாமல் போகவும் செய்வர்

பட்டுத்துணியும்  பலவகை இனிப்பும் வாங்குவர்

கட்டுக் கட்டாய் பட்டாசும் ஆனந்தமாய்  வாங்குவர்

 

புத்தாடை அணிந்து மத்தாப்பு கொளுத்தி

தாத்தா பாட்டியுடன் மாமா மாமியுடன்

சித்தி சித்தப்பா அப்பா அம்மாவுடனும்

சுத்தி சுத்தி வந்து கொண்டாடும் திருநாள்

 

ஆனந்தமாய் இருக்கவே வந்த  ஒளித்திருநாள்

ஆனந்தத்தின் பொருளை உணர்த்தவந்த திருநாள்

ஆனந்த வாழ்வை நிலைக்கச் செய்யும் திருநாள்

ஆனந்தமே நோக்கமென்று உணர்த்த வந்த திருநாள்

 

ஒளியின் வருகை  இருளகல நாம் அறிவோம்

ஒளிதான் வாழ்வின் விளக்கமெனவும் அறிவோம்

ஒளிவுமறைவின்றி வாழ்தலே ஒளியின் வருகை

ஒளியே தீபவொளியே  அழைத்துச்செல் உலகை