Month: August 2015

விழித்தெழுங்கள் இந்தியர்களே!

— தேமொழி

முதியவரின் நம்பிக்கை

— ஆலன் அக்டோவியன் ஹ்யூம்

இந்திய மக்களே உங்கள் சோர்வின் காரணமென்னவோ ?
இறைவனின் உதவியைத்தான் எதிர்பார்த்துள்ளீர்களோ ?
வரிந்து கட்டி, எழுச்சியுடன் போராடுங்கள்
தன்முயற்சி செய்வதாலேயே நாடுகள் தோன்றுகின்றன

தீர்மானிக்கப்படுகிறது உங்களின், உங்கள் நாட்டின் எதிர்காலம்
ஆனாலும் அதைத் தீர்மானிப்பவர் நீங்களல்லவே
ஊமைகளாகிவிட்டீர்களா? உரிமைக்குக் குரல் கொடுங்கள்
தன்முயற்சியால்தான் நாடுகள் தோன்றுகின்றன

கல்வியும் செல்வமும்தான் இருந்தென்ன செய்தீர்கள்
வெற்றுப் பட்டங்கள் அளிக்கப்பட்டு ஏமாற்றப்பட்டீர்கள்
தன்னாட்சி செய்வதன் மதிப்பிற்கு ஈடாகுமா அவையாவும்
தன்முயற்சி செய்வதாலேயே நாடுகள் தோன்றுகின்றன

இருளாகப் பரவும் இரகசியப் புலம்பல்கள்
பசுந்தரையின்கீழ் நெளியும் புழுக்களன்றோ
இத்தகையப் புலம்பல்கள் அநீதியை அகற்றாது
தன்முயற்சி செய்வதாலேயே நாடுகள் தோன்றுகின்றன

நீங்கள் அடிமைகளா? சுதந்திரம் உள்ளவர்களா?
அல்லது மறைவிலே அஞ்சி வாழும் கோழைகளா?
முடிவு இருப்பது உங்கள் கைகளில்
தன்முயற்சியால்தான் நாடுகள் தோன்றுகின்றன

இந்திய மக்களே எழுச்சியுடன் போராடுங்கள்
தடைகளைத் தகர்த்தெறிந்து முன்னேறுங்கள்
விடிந்துவிட்டது! கிழக்கு வெளுத்துவிட்டது
தன்முயற்சியால்தான் நாடுகள் தோன்றுகின்றன

1886 ஆம் ஆண்டில் இந்தியர்களைத் தன்னாட்சி அமைக்கத் தூண்டி, இந்தியன் நேஷனல் காங்கிரஸைத் தோற்றுவித்தஆலன் அக்டோவியன் ஹ்யூம் அவர்கள் எழுதிய கவிதை
மொழிபெயர்ப்பு: தேமொழி

◆◆◆◆◆◆◆◆◆◆◆◆◆◆◆◆◆◆◆◆◆◆◆◆◆

Old Man’s Hope

— by Allan Octavian Hume

Sons of Ind, why sit ye idle,
Wait ye for some Deva’s aid?
Buckle to, be up and doing!
Nations by themselves are made!

Yours the land, lives, all, at stake, tho’
Not by you the cards are played;
Are ye dumb? Speak up and claim them!
By themselves are nations made!

What avail your wealth, your learning,
Empty titles, sordid trade?
True self-rule were worth them all!
Nations by themselves are made!

Whispered murmurs darkly creeping,
Hidden worms beneath the glade,
Not by such shall wrong be righted!
Nations by themselves are made!

Are ye Serfs or are ye Freemen,
Ye that grovel in the shade?
In your own hands rest the issues!
By themselves are nations made!

Sons of Ind, be up and doing,
Let your course by none be stayed;
Lo! the Dawn is in the East;
By themselves are nations made!

August 17, 2015
உன்னையறிந்தால் ………! (18)

நிர்மலா ராகவன்

பாராட்டும், கண்டனமும்

கேள்வி: குழந்தைகள் தவறு செய்தால் திட்டவோ, அடிக்கவோ கூடாதா?

விளக்கம்: எத்தனை வயதுக் குழந்தை, என்ன தவறு என்ற கேள்வி எழுகிறதே!

எட்டு மாதமேயான குழந்தை எந்த சாமானையும் எடுத்து வாயில் போட்டுக் கொள்ளும். அடித்தால் அதற்கு என்ன புரியப் போகிறது? ஒரு விரலால் நாம் அதன் கையில் தட்டினாலே போதுமானது. அதற்கே ஏதோ உயிர் போகிறாற்போல் கதறும்.
பண்டைக்கால வளர்ப்புமுறை ஒருவரின் முழுமையான வளர்ச்சிக்கு வழிவகுப்பதல்ல என்று உளவியல் கூறுகிறது. எதற்கெடுத்தாலும் பிறர்முன் திட்டுவதும், குற்றம் கண்டுபிடித்துக் கொண்டிருப்பதும் ஒருவர் கூனிக் குறுகவோ, அல்லது எதிர்ப்பு மனப்பான்மையை வளர்க்கவோதான் செய்யுமே தவிர, அவர்கள் மேலும் சிறப்பாக எதையாவது செய்ய வழிவகுக்காது.

உதாரணமாக, ஒரு பெண் சுறுசுறுப்பாக வீட்டு வேலை செய்தாலும்கூட, `இவளுக்கு ஒரு வேலையும் செய்யத் தெரியாது. எப்பவும் கண்ணாடிமுன்னால உட்கார்ந்து அழகு பார்த்துக் கொண்டிருப்பா!’ என்று சொல்வது, பெரியவர்களைப் பொறுத்தமட்டில் அவள் இன்னும் அதிகமாக வேலை செய்யத் தூண்டுவதாக இருக்கலாம். ஒரு வேளை, தம் அதிகாரத்தை நிலைநாட்டிக் கொள்வதற்காகக்கூட இருக்கலாம்.

அப்பெண்ணுக்கோ, `எவ்வளவு செய்தாலும் இவர்களுக்குத்தான் திருப்தி இல்லையே! எதற்காக வேலை செய்ய வேண்டும்!’ என்றுதான் தோன்றிப்போகும்.

ஓயாமல் திட்டப்படும் குழந்தை பிறருடன் கலகலப்பாகப் பேசுவதற்கோ, அல்லது எந்தக் காரியம் செய்வதற்கோ ஒரேயடியாகத் தயங்கும். `ஏற்கெனவே எல்லாவற்றிற்கும் வசவுதான்! எதற்கு இன்னும் திட்டு வாங்க வேண்டும்?’ என்றுதானே எண்ணம் போகும்!

அப்படி ஒரு குழந்தை எதுவும் செய்யத் தயங்குவதும் பெற்றோரின் கணிப்பில் பெரிய தவறாகிவிடும். `என் பிள்ளை எல்லாவற்றிற்கும் வெட்கப்படுவான்!’ என்று பார்ப்பவரிடமெல்லாம் கூறுவார்கள், அது சிலாகிக்க வேண்டிய குணம் என்பதுபோல்.

`இப்படித்தான் இருக்க வேண்டுமோ?’ என்று எண்ணம் போக, ஒருவர் அப்படியே நடக்கத் தலைப்படுவர். தன்னம்பிக்கை குறைவதால்தான் இளைஞர்கள் பலவித சமூகக் கேடுகளுக்கும் ஆளாகின்றனர் என்பது தெரிந்த விஷயம்.
பொதுவாக, தவறு செய்தால் திட்டுபவர்கள் ஒரு குழந்தை அல்லது சிறுவன் நல்லவிதமாக ஏதாவது செய்தால் புகழ்வது கிடையாது. புகழ்ந்தால், தன்னைவிட சிறப்பானவன் என்று கர்வம் கொண்டு, தன்னை மதிக்காமல் போய்விடுவானோ என்ற பயம்தான் காரணம். இதனாலேயே, சில பெற்றோர் புகழவேண்டிய தருணங்களில்கூட இகழ்வதைப்போலப் பேசுவார்கள்.

கதை: ஆலிஸ் (சீனப் பெண்) காரணமில்லாமலே அம்மாவிடம் அடி வாங்குவாள். கையால் அல்ல, இரும்புத் தடியால். எல்லாம் கல்வியில் இன்னும் சிறக்க வேண்டும் என்றுதான்.

(தான் எவ்வளவு மதிப்பெண்கள் வாங்கினாலும் திருப்தி அடையாது, தந்தை தண்டித்துக்கொண்டே இருந்ததால், தானே அவருடைய கையெழுத்தைப் போட்டு விடுவாராம்; பின் நன்கு படித்து, பெரிய உத்தியோகம் கிடைத்தபோது அவருடன் பேசுவதையே தவிர்த்துவிட்டதாகவும் ஒரு அன்பர் என்னிடம் கசப்புடன் தெரிவித்தர்).

மீண்டும் ஆலிஸ் கதை. பதின்மூன்று வயதுவரை காரணமின்றி அடித்துவிட்டு, அதன்பின் தோழமையுடன் பழக ஆரம்பித்தாளாம் அவள் தாய். இப்போது மகள் அவள் எதிர்பார்த்தபடியே பள்ளியில் சிறந்திருப்பது அவளுக்குத் தன் வளர்ப்புமுறை சரிதான் என்ற எண்ணத்தைக் கொடுத்திருந்தது.

தன்னைப்பற்றி நினைப்பதே தகாது என்று வளர்ந்திருப்பதால், ஆலிஸ் போன்ற பெண்கள் தனிமையில் மட்டும் சிறிது யோசிக்கிறார்கள். தமக்குள் பார்ப்பது — தன்னம்பிக்கை இல்லாமல், எதற்கும் பயப்படும் ஒரு பெண். அதற்கு நேர்மாறாக இருப்பதாக, அலட்டலாக, வெளியில் காட்டிக்கொள்வார்கள்.

அடுத்த முறை ஆலிஸ் பெருமையுடன் தன் மதிப்பெண்களைக் காட்டியபோது, புகழாமல் வளர்த்ததால்தான் மகள் நல்ல விதமாக வளர்ந்திருக்கிறாள் என்ற பெருமை எழுந்தது தாய்க்கு. `நீயெல்லாம் வகுப்பில் முதல் மாணவியா! ரொம்பத்தான் கர்வப்பட்டுக் கொள்ளாதே!” என்று ஏசிவிட்டு, “உன் வகுப்பில் மற்றவர்களெல்லாம் எவ்வளவு மக்கு என்று இப்போதுதான் புரிகிறது!’ என்றாளாம்!

தன் திறமையில் கர்வப்பட்டுக் கொள்வது தகாது என்று சிறு வயதில் தாய் சொல்ல, அம்மா சொன்னால் சரியாகத்தான் இருக்கும் என்று நம்பி, இயற்கையாக எழுந்த பெருமையை அடக்கக் கற்கிறார்கள் சிறுவர்கள்.

நான் சிலரைப் புகழ்ந்தால், அவர்களிடமிருந்து ஏதாவது ஆதாயம் பெறலாம் என்ற எண்ணத்துடன் இல்லை. உண்மையாகப் பாராட்டப்பட வேண்டியது என்று எனக்குத் தோன்றியதைச் சொல்வேன். அப்போது அவர்களது கைகள், முகம் எல்லாம் இறுகுவது ஏன் என்று யோசித்திருக்கிறேன். புகழ்ச்சியால் எழும் பெருமையை அடக்கும் முயற்சியோ?
அப்படி இல்லையேல், நாம் புகழ்ந்ததை மறுப்பார்கள். ஒரு பெண்மணி ஏதோ விசேடத்திற்காகத் தேடி அலைந்து மிக உயர்ந்த பட்டுப்புடவை வாங்கினாள். அன்று பலரும் அவள் புடவையைப் புகழ, `ஏதோ பழசு! எடுத்துக் கட்டிக்கொண்டேன்!’ என்றாளே பார்க்கலாம்! அடக்கமாம்!

புகழ்ச்சியை ஏற்பது தற்பெருமை அல்ல. கௌரவமாக ஏற்று, `நன்றி!’ என்று சொல்லிவிட்டுப் போனால் ஆயிற்று. அதற்கு ஏன் இவ்வளவு சுயக்கட்டுப்பாடு?

சில ஆசிரியைகளும் இம்முறையைப் பின்பற்றுகிறார்கள். முதல் வகுப்புப் படிக்கும் ஒரு குழந்தையிடம், `உன் மூக்கு அழகாக இருக்கிறது. உன் கண்ணும் அழகாக இருக்கிறது. உன் கையெழுத்து மட்டும் ஏன் அழகாக இல்லை?’ என்று தினமும் கேட்டாள் ஓர் ஆசிரியை. ஆசிரியை என்ன சொல்ல வருகிறாள் என்பதே சிறுமிக்குப் புரியவில்லை. அன்புடன் வளர்க்கப்பட்டிருந்ததால், `டீச்சருக்குப் பைத்தியம்!’ என்று தன் தாயிடம் சொல்லிச் சிரித்தாள்.

`கையெழுத்தைத் திருத்திக்கொள்!’ ஆரம்பப்பள்ளிச் சிறுவர்களின் நோட்டுப் புத்தகங்களிலும், விடைத்தாள்களிலும் காணப்படும் ஒரு வாசகம்.

எப்படித் திருத்திக்கொள்வது என்பதை விளக்கினால்தானே பலன் கிட்டும்? `நடுக்கோட்டில் எழுதாது, கோட்டின் மேலேயே எழுது. எழுதியதை அடிக்கடி அடிக்காதே. சற்று யோசித்து, நிதானமாக எழுது’ — இப்படி ஆக்ககரமாக அறிவுரை கூறினாலாவது பலன் கிடைக்கும்.

ஆசிரியர்கள் தம் அதிகாரத்தை நிலைநாட்டிக் கொள்வதிலேயே குறியாக இருந்தால், மாணவர்களும் மாறப்போவதில்லை, ஆசிரியர்களுக்கும் நிராசைதான், தம் உத்திகள் பலிக்கவில்லையே என்று.

குழந்தைகள் தாங்கள் செய்வதன் விளைவுகளைப் புரிந்துகொள்ளாமல் செய்யும். அது தவறு என்று அவர்களுக்குத் தெரியாது. எதையும் நகைச்சுவையுடன் அணுகினால், அவர்கள் சிரிப்பார்கள். திரும்பச் செய்ய மாட்டார்கள்.

குழந்தைகள் எப்படியெல்லாம் பெரியவர்களை மீறலாம் என்று ஆழம் பார்த்துக்கொண்டே இருப்பார்கள். சிறு பிழை என்றால், கவனிக்காமல் விட்டு விடலாம். தண்டித்தே ஆக வேண்டுமென்றால், செய்யும் பிழைக்கு ஏற்றார்போல் இருக்க வேண்டும். செய்த தவற்றையே மீண்டும் செய்யும்போது, கவனிக்காமல் விடுவதும் சரியல்ல. பிள்ளைகளுக்கான எல்லைகளை வகுத்துக்கொடுக்க வேண்டியது பெற்றோரின் கடமை.

தொடருவோம்

August 17, 2015
பூரண சுதந்திரம் யாருக்கு ?

-சி. ஜெயபாரதன், கனடா

பாரதம் பெற்றது பாருக்குள்ளே
ஓரளவு சுதந்திரம் !
பூரண விடுதலை வேண்டிப்
போராடி னோம் !
பூமி இரண்டாய்ப் பிளந்தது !
பூகம்பம் நிற்காமல்
மும்மூர்த்தி யானது
பங்களா தேசமாய் !
கட்டுப்பா டுள்ள சுதந்திரம்
கண்ணிய மானிடருக்கு !
கட்டவிழ்த் தோடும் சுதந்திரம்,
காட்டு மிராண்டி களுக்கு !

ராவணன் சீதையைத் தூக்கி
ரதத்தில் போவான் !
பூரண சுதந்திரம் அசுரப்
போர்க்களம் !
பஞ்ச பாண்டவர்
பகடை ஆடுவர் சூதில்
பத்தினியைப் பணயம் வைத்து !
பட்டப் பகலில் பாஞ்சாலி
பட்டுச் சேலையைப்
பலர் முன்
பற்றி இழுப்பான்
துச்சாதனன் !
கண்ணன் குளிக்கும் மாதர்
புடவை
களவாடு வான் !
பூரண சுதந்திரம் மாந்தர் புகும்
குருச்சேத்திரம் !

மசூதியை இரவில் தகர்த்து
வேரறுப்பது
பூரண சுதந்திரம் !
பாதிரியார் உடையில்
தீ வைப்பது
வேதியர் சுதந்திரம் !
ரயில் பெட்டிகளை எரித்துச்
சவப் பெட்டி ஆக்குவது
நவகாளிச் சுதந்திரம் !

பூரண சுதந்தி ரத்தில்
மதம் பிடித்த யானைகள்
மனித நேயத்தை மிதிக்கும்
சுதந்திர நாட்டில்
மதக் கோலத் திருவிழா
கும்ப மேளா !

எழுத்துச் சுதந்திரத்தில்
ஒழுக்கம், கடமை, கண்ணியம் !
விதிகளுக்கு அடங்கிய
நிதிச் சுதந்திரம் !
உரிமைத் தேர்ச்சி யில்லாத
வறுமைச் சுதந்திரம் !
கட்டவிழ்த் தோடும் முழுச் சுதந்திரம் !
பட்டு உதிரும் சுதந்திரம் !
ஒட்டு மாங்கனியாய்
நட்டு வைக்கும் சுதந்திரம் !
சுட்ட பழமா அல்லது
சுடாத பழமா
எது சுதந்திரம் ?

எட்டித் தொட முடியா
பனிச் சிகரத்தில்
வேராய் மறைந் திருக்கும்
பூரண சுதந்திரம் நமக்குச்
சீரழிவுப் பாதை !
முழு விடுதலை பெற்றவர்
மோகன் தாஸ் காந்தி !
போதி மரத்தடியில்
பூரண விடுதலை வேண்டித்
தவம் புரிகிறார்
போலிச் சாமியார்
புதிய பூமிக்கு !
பூரண சுதந்திரம் வேண்டாம் !
ஓரளவு போதும் !

August 17, 2015
சுதந்திரம் காத்திடு !

-பா.ராஜசேகர்

சுதந்திரம் எல்லோர்க்கும்
சமமென நினைத்திடு
சாதி சமயத்தால் பிரிப்பதை
இன்றோடு நிறுத்திடு !

எத்தனை தியாகங்கள்
செய்ததாலே வந்தது ?
சதையும் இரத்தமும்
கலந்த மண்ணு நினைத்திடு !

ஒன்றுபட்ட பாரதம்
உயர்வாகும் புறப்படு
உலக நாடுகளுக்கு
உணர்த்தவேணும் தோள்கொடு !

நீதி நியாயங்கள்

நிலைப்பதற்குக் குரல் கொடு
நீரை விலைகொடுக்கும்
நிலையை மாற்றப் போர்த்தொடு !

பணத்தாசையிலே நாட்டுக்குக்
கேடுசெய்வோரை நோக்கி வாளெடு
பதவி அதிகாரம் பழி சேர்க்கும்
கூட்டம் வேண்டாம் ஓட்டிடு!

பசியே இல்லாமை பாரதம்
பெறவேண்டும் பயிரிடு
சொர்க்கம் வேறில்லை பாரத
மண்ணேதான் உணர்ந்திடு !

August 17, 2015
காதலின் பொன்வீதியில் – 12

–மீனாட்சி பாலகணேஷ்.

தப்பி விட்ட காதல் கணக்கு!

அவன் அற்புதமான கவிதைகள் இயற்றும் கவிஞன்; இளைஞன்; கட்டழகன். கவிதையும் கலாரசனையும் அவன் குருதியில் ஊறிப்போனவை. அவன் தந்தை கம்பர் ஒரு மாபெரும் புலவர். இவனும் தந்தைக்கேற்ற தனயன். பெயர் அம்பிகாபதி. கண்ணால் காணும் அனைத்தையும் காதல் நோக்கில் கண்டு பாடும் வாலிபப் பருவம்.

இன்று அரச மாளிகையில் கம்பருக்கு ஒரு விருந்து ஏற்பாடாகியிருக்கிறது. அவர் இயற்றி, சமீபத்தில் அரங்கேற்றிய இராமாவதாரம் எனும் ஒரு ஒப்பற்ற நூலுக்காகப் பரிசுகள் அளித்து மரியாதை செய்த மன்னன், புலவரை விருந்துக்கும் அழைத்திருந்தான். புலவருடன் புலவர் மகனும் வந்திருந்தான்! நியாயம் தானே?

தலைவாழை இலைகள் போடப்பட்டு, ஆசனங்களில் அனைவரும் அமர்ந்திருந்தனர். சம்பிரதாயப்படி, உப்பு, ஊறுகாய், பச்சடி, பொரியல் என முதலில் பணிப்பெண்கள் பரிமாறிவிட்டுப் போக, விருந்தின் முக்கியமான இனிப்பான பாயசத்தினைப் பரிமாற அதனைப் பொற்கிண்ணத்தில் ஏந்தி வந்தாள் அரசகுமாரி அமராவதி! அவளே ஒரு கவிதை! அரசன் குலோத்துங்கன் மாளிகையில் வளரும் அழகு தேவதை!

பதினாறு வயதுப் பருவ மங்கை- அவள் நடந்தால் பாதங்கள் நோகுமே எனப் பாதசரங்கள் புலம்ப, அன்னநடை நடந்து, பாயச வட்டிலை ஏந்தியதால், அதன் கனத்தில் கொடியிடை அசைந்தாட ஒரு மின்னல் போல வந்தாள் அவள் – அமராவதி. அழகான இளைஞன் ஒருவனை எதிர்பாராத விதத்தில் அரசவைப் புலவரருகே கண்டதால் அமராவதிக்கு நாணத்தில் நடை தடுமாறிக் கால்கள் பின்னின.

ஆச்சரியத்தில், கண்கள் தாமரை இதழ்களென விரிய, அம்பிகாபதி மலைத்தான். கணப்பொழுதில் பார்வைகள் சந்தித்து மீண்டன. இதயங்கள் இடம் மாறின!

இளங்கவிஞன் இளவரசியைக் கண்டதும் கொண்ட காதலும் கற்பனையும் – அல்ல அல்ல, கண்ணெதிரே காணும் காட்சியின் அழகும் இனிமையும்- உள்ளத்திலிருந்து கவிதையை ஊற்றாகப் பெருக்கி நின்றன.
பாடல் பிறக்கின்றது:
‘இட்ட அடி நோக எடுத்த அடி கொப்பளிக்க
வட்டில் சுமந்து மருங்கசைய………’
ஆஹா…. திடுக்குற்று அனைவரும் உண்பதை நிறுத்தி விட்டு அம்பிகாபதியை நோக்குகின்றனரே! கம்பருக்குப் புரிந்தது. பஞ்சும் நெருப்பும் அருகருகே அன்றோ நெருங்குகின்றன? காதல்தீ பற்றிக் கொள்ளாது என் செய்யும்? ஆனால், மன்னன் மகளிடம், கவிஞன் மகன் காதல் கொள்ளலாகுமா? உலகம் இதனை ஒப்புக் கொள்ளுமா? மன்னனின் விழிகளில் சினம் பொங்குவதைக் காண்கிறார்.

சமயோசிதமாக, “அம்பிகாபதி! என்னப்பா இத்தருணத்தில் கிழங்கு விற்கும் பெண்ணைப் பற்றிய பாடல்?” என்கிறார் கம்பர்.

“கம்பரே! நீரும் உம் மகனும் விளையாடுகின்றீர்களோ? அமராவதியைக் கண்டு காதல் கவிதை புனைய ஆரம்பித்தான் உம் மகன். நீர் அதனை இல்லை என்கிறீரோ?” என்ற குலோத்துங்கன், “கவிதையின் அடுத்த அடிகள் என்னவோ?” என்றான் ஏளனமாக.

‘-கொட்டிக்
கிழங்கோ கிழங்கென்று கூறுவாள் எந்தை
வழங்கோசை வையம் பெறும்.’
என்று பாடி முடித்து வைத்தார் கம்பர். அப்போதைக்கு ஒன்றும் கூறவில்லையாயினும் அரசன் புரிந்து கொண்டான்.

இளம் இதயங்கள் காதலில் சங்கமித்து விட்டதைக் கம்பரும் உணர்ந்து செய்வதறியாது திகைத்தார்.

◆◆◆

அம்பிகாபதி – அமராவதி காதல் கதைக்குச் சரித்திர ஆதாரங்கள் ஏதுமில்லை. கம்பரின் வாழ்வில் ஒரு சிறு சம்பவமாகப் புனையப்பட்ட கட்டுக்கதை என்றே பல தமிழ் அறிஞர்கள் கூறுகின்றனர். 50-களிலும் அதற்கு முன்பும் வெளிவந்த திரைப்படங்கள் தான் இந்தக் காதல் கதை மிகவும் பிரபலமாக வழி வகுத்தது எனலாம். அழகான பாடல்களுடன் அற்புதமான நடிப்பும் சேர்ந்து அம்பிகாபதி – அமராவதி காதலை அமரத்துவமாக்கின. சரித்திர ஆதாரமின்றிப் புகழ் பெற்று விட்ட ‘சரித்திர’க் காதல் கதை இது எனலாம். சரி, கதையையும் காதலையும் அதன் விளைவுகளையும் நோக்கலாமே!

◆◆◆

நாளொரு மேனியும் பொழுதொரு வண்ணமுமாக வளர்கின்றது அம்பிகாபதி – அமராவதி காதல். குலோத்துங்கனுக்கு இதில் விருப்பமேயில்லை. அம்பிகாபதியிடம் கூறினான்:
“மன்னன் மகளை மாலையிட வேண்டுமென்றால், அதற்குச் சில தகுதிகள் வேண்டும். நீ உன் தகப்பனைப் போன்று பெரும் புலமை படைத்தவனாயின், அகப்பொருள் கலவாமல், நூறு பாடல்களைத் தொடர்ச்சியாகப் பாட வேண்டும். அவ்வாறு செய்ய இயன்றால், அமராவதியை மாலையிடலாம். இல்லாவிடின், உன் தலை துண்டிக்கப்படும்,” எனும் கடும் நிபந்தனையைச் சோழன் விதித்தான்.

கவிச்சக்கரவர்த்தி கம்பரின் மகனாயிற்றே! தன் கல்வி மீது செருக்கு இல்லாது இருக்குமா? “நூறென்ன! ஆயிரமாயிரம் கவிகளும் பாடுவேன் மன்னா,” என்றான் அம்பிகாபதி.

நிபந்தனை ஒப்புக் கொள்ளப் படுகின்றது. அமராவதியும் காதலனிடம் கூறுகிறாள்: “அன்பரே! நான் நூறு மலர்களுடன் திரைக்குப் பின் காத்திருப்பேன். நூறாவது பாடல் முடிந்ததும் தங்கள் முன்பு வந்து நிற்பேன்.” காதலில் எழுந்த கற்பனைகள்…… கவிதையினைக் கணக்கிடும் உறுதி!

இரு காதலரும் கணிக்கத் தவறியது ஒரு சிறு கணக்கு.

கடவுள் வாழ்த்துடன் துவங்கிய போது, அதனை முதல் பாடலாகக் கணக்கிட்டுக் கொள்கிறாள் அமராவதி. ஆர்வத்தில் விளைந்த அவசரக் கோளாறு அது. அம்பிகாபதி, காதலி கணக்கு வைத்துக் கொள்கிறாள் எனத் தான் எண்ணிக்கை வைத்துக் கொள்ளவில்லை. அம்பிகாபதியின் வாயிலிருந்து பாடல்கள், அகப்பொருளே கலவாது*, மடை திறந்த வெள்ளம் போன்று பெருகி ஓடுகின்றன.

அமராவதி மலர்களை எண்ணி எண்ணிச் சேர்க்கிறாள். காதலனின் கவிதா விலாசத்தின் மேதைமையில் உள்ளம் பூரிக்கிறாள். இவ்வாறு தொண்ணூற்றொன்பது பாடல்கள் முடிவடைகின்றன- அல்ல அல்ல… அமராவதியின் கணக்குப்படி நூறு பாடல்கள் அவை.

மேகத் திரளின் பின்னிருந்து அதனைக் கிழித்துக் கொண்டு வெளிவரும் முழுமதி போலத் தனது முகத்தைக் காட்டியபடி காதலன் அம்பிகாபதி முன்பு வெளிப்படுகிறாள் அமராவதி எனும் அப்பெண்ணரசி.

அம்பிகாபதி அவளைக் கண்ணுற்றதும் நூறு பாடல்கள் ஆகி விட்டன எனக்கருதி, அவளழகை வருணித்து அகப்பொருள் அமைந்த அடுத்த பாடலை இசைக்கிறான்.

‘சற்றே சரிந்த குழலே துவளத் தரளவடம்
துற்றே அசையக் குழை ஊசலாடத் துவர்கொள் செவ்வாய்
நற்றேன் ஒழுக நடன சிங்கார நடையழகின்
பொற்றேர் இருக்கத் தலையலங்காரம் புறப்பட்டதே.’

அந்தகோ! அரசவையில் ஒரே பரிதாப ஆரவாரம்.
“இன்னும் நூறு பாடல்கள் ஆகவில்லையே!”
“ஐயோ இளவரசி! உங்கள் கணக்கு தப்புக் கணக்கு!”
“கடவுள் வாழ்த்து கணக்கில் சேராதெனத் தமிழ் பயின்ற உனக்குமா தெரியாது போய் விட்டது?” என அரசவைப் புலவர் ஒட்டக்கூத்தர் சுட்டிக் காட்ட, அடியற்ற மரம் போல வீழ்ந்து மூர்ச்சையானாள் அமராவதி.

கம்பரின் கெஞ்சலும், மற்றோரின் அனுதாப வேண்டுகோள்களும் மன்னன் குலோத்துங்கன் மனதைத் தொடவே இல்லை.
நிபந்தனைப்படி, அம்பிகாபதியின் தலை துண்டிக்கப்பட்டு அவன் உயிர் துறக்கிறான். மனமுடைந்து அமராவதியும் உயிர் துறக்கிறாள். மணவாழ்வில் இணைய இயலாத காதலர் மறு உலகில் இணைகின்றனர்.
சோகம் ததும்பும் காதல் கதை இது!

◆◆◆

சிறிது விலகி நின்று நோக்கினோமாயின் காதலர்க்குரிய ஓரிரு இன்றியமையாத நியதிகளை இவர்கள் கவனமாகக் கையாளவில்லை எனக் காணலாம்.
எவருக்கும் தன் திறமை மீது நம்பிக்கை இருக்கும்; இருக்க வேண்டும். ஆனால் அது செருக்காக மாறும் காலத்து, அழிவுப்பாதையில் தான் அழைத்துச் செல்லும். அதுவும் இக்கட்டான இந்தச் சூழ்நிலையில் அம்பிகாபதி சிறிது தாழ்மையுடன் இருந்திருக்கலாம் எனத்தான் எண்ணத் தோன்றுகின்றது.

ஆர்வத்தில் அமராவதியின் எண்ணிக்கைக் கணக்குத் தப்பிப் போயிற்றே! அவள் ஒன்றிற்கு இரண்டாக, இன்னும் ஒரு தோழியையோ, வேறு யாராவது ஒருவரையோ பாடல்களின் எண்ணிக்கையைக் குறித்துக் கொள்ளக் கூறியிருக்கலாம். அவளையே நம்பி அம்பிகாபதி தான் எண்ணிக்கை வைத்துக் கொள்ளத் தவறி விட்டான்; ‘சந்தேகத்திற்கு இருக்கட்டுமே’ என இன்னும் ஓரிரு பாடல்கள் பாடியிருக்கக் கூடாதா? காதலியைக் கண்டதும் எல்லாமே மறந்து தன்னிலையும் மறக்குமானால் அவனால் என்ன தான் சாதிக்க இயலும்? ‘காற்றிலேறி அவ்விண்ணையும் சாடுவோம் காதற்பெண்கள் கடைக்கண் பணியிலே,’ என்றான் இன்னொரு கவிஞன். காதலுக்கு அத்தகைய சக்தி உண்டு அல்லவோ?

இங்கு தான் விதி விளையாடி விட்டது எனத் தெரிகிறது………………
காதலின் பொன்வீதி இவர்களை மேலுலகிற்குத் தான் அழைத்துச் சென்று விட்டது..

◆◆◆
*அம்பிகாபதிக் கோவை எனச் சிற்றிலக்கிய வடிவில் ஒரு நூல் உள்ளது. இது அகப்பொருள் இல்லாமல் பாடப்பட்டுள்ள கோவை நூல். இதன் ஆசிரியர் பெயர் அம்பிகாபதி எனவும் இதில் 200-க்கும் மேற்பட்ட பாடல்கள் உள்ளன எனவும் அறிகிறோம். (ஆதாரம்: தமிழ் விக்கிப்பீடியா- கட்டற்ற கலைக் களஞ்சியம்)

படம் உதவி:
www.dollsofindia.com [http://www.dollsofindia.com/images/products/contemporary-paintings/rajput-princess-QD45_l.jpg]

August 17, 2015
வார்த்தை தவறிவிட்டாய் கண்ணம்மா … மார்பு துடிக்குதடி …

— கவிஞர் காவிரிமைந்தன்.

இளமை ஊஞ்சலாடுகிறது திரைப்படம்! இயக்குநர் ஸ்ரீதரின் முக்கோணக் காதலின் மற்றுமொரு பரிமாணம்! இசை ஞானி இளையராஜா இசையாட்சி! எஸ்.பி.பாலசுப்ரமணியத்தின் இழைந்தோடும் குரல்! திரைக் கதையின் முக்கியக் கட்டத்தில் நாயகன் நாயகியை நோக்கிப் பாடுகின்ற இப்பாடல்!

பாரதியின் கண்ணம்மா என்னும் பெயரை எத்தனை வாஞ்சையாய் பல்லவியில் பொருத்திப் பாடலை துவக்குகின்றார் கவிஞர் வாலி! மேடைப் பாடகனாய் கமலஹாசன் தன் காதல் தாபங்களைக் காட்டும் அற்றைய நாளின் மிகப் பிரபலமான பாடல்! கல்லூரி மாணவர்களின் கரகோஷத்தில் அரங்கங்கள் அதிர்ந்த அந்த நாட்களை எண்ணிப் பார்க்கிறேன்! இசை ஞானி தனக்குக் கிட்டிய ஒவ்வொரு திரைப்படத்திலும் முத்திரை பதிக்க வெற்றிநடை போட்ட வெள்ளித்திரை ஓவியங்களில் இதுவும் ஒன்று!

சூப்பர் ஸ்டார் ரஜினிகாந்த், ஸ்ரீப்ரியா, கமலஹாசன் கூட்டணியில் கொட்டிக்கிடக்கும் நவரச நடிப்பில் இசை மலர்கள் ஆராதனை நம்மை ஈர்க்க வைக்கும்! பழமைக்கும் புதுமைக்கும் தன் கடைசி நாள் வரை ஈடுகொடுத்து எழுதி வந்த பாட்டுப் புலவன் வாலி வரைந்த வரிகள் அர்த்தத்தை அள்ளி வீசும்! இசைக்கோர்வை என்பது அவர் நடந்துவரும் ராஜபாட்டை! சாதாரண வார்த்தைகளைச் சரியான இடத்தில் பயன்படுத்தும்போது அவை அசுர பலம் பெற்றிடும் யுக்தியைக் கற்றுத் தேர்ந்தவரென்பதால் ‘காதல்’ பிரிவின் வலியை எளிதாக வார்த்தைகளில் இறக்குமதி செய்கிறார் கேளுங்கள்!

கால மாற்றத்தில் ‘காதல்’ மாற்றம் பெறுகிற கோலத்தை இயக்குநர் ஸ்ரீதரின் கைவண்ணத்தில் காண்பது கூட ஒரு இனிய அனுபவமே! அப்பட்டமாய் முக்கோணக் காதலை திரைக்கதையில் சொன்னவர் என்கிற பெருமை இவரையே சாரும்! இவர்தம் திரைப்படத்தில் கதையுண்டு! கருத்துண்டு! சுவையான பாடல்கள் நிரந்தரமாய் உண்டு! இனிதான இசையோடு என்றென்றும் கேட்டு மகிழ… நெகிழ… இப்பாடலும் வருகிறது கேளுங்கள்!!

வார்த்தை தவறிவிட்டாய் கண்ணம்மா … மார்பு துடிக்குதடி…
பார்த்த இடத்திலெல்லாம் உன்னைப் போல் பாவை தெரியுதடி…

என்னடி மீனாட்சி… சொன்னது என்னாச்சு…
நேற்றோடு நீ சொன்ன வார்த்தை காற்றோடு போயாச்சு…
என்னடி மீனாட்சி… சொன்னது என்னாச்சு…
நேற்றோடு நீ சொன்ன வார்த்தை காற்றோடு போயாச்சு…

உந்தன் உதட்டில் நிறைந்திருக்கும் பழரசம்
அந்த வனத்தில் மறைந்திருக்கும் துளிவிஷம்…
நெஞ்சம் தவித்திடும் நாளில்
நீயோ அடுத்தவன் தோளில்
எனை மறந்து போனது நியாயமோ
இந்தக் காதல் ஓவியத்தின் பாதை மாறியது
காலம் செய்துவிட்ட மாயமோ…
ஒரு மனம் உருகுது…
ஒரு மனம் விலகுது…
(என்னடி)

அன்பில் விளைந்த உறவு ஒரு தொடர்கதை
அந்த உறவு உனக்கு ஒரு சிறுகதை …
கண்ணன் தன் வழியே பாட…
ராதை தன் வழியே ஓட…
இந்தப் பிரிவைத் தாங்குமோ என் மனம்
ஒரு நூலில் ஆடுகிற ஊஞ்சல் போன்றதடி
நாளும் மாறுகின்ற உன் மனம்…
(என்னடி)

காணொளி: https://www.youtube.com/watch?v=3VjfAZzEb88

https://www.youtube.com/watch?v=3VjfAZzEb88

August 17, 2015
கிராமசபையிலும், பயனாளிகளைத் தேர்வு செய்வதிலும் மாற்றம் தேவை

— ஆ. ஜெயராஜன்.

இந்த வருடத்தின் மூன்றாம் கிராம சபை நாளான ஆகஸ்ட் 15 முடிந்திருக்கிறது. நாடு முழுவதிலும் உள்ள கிராமங்களில், மக்கள் ஒன்று கூடும் இடமாக இருக்கும் பள்ளிக்கூடத்திலோ அல்லது பொதுவிடத்திலோ கிராமசபை (பெயரளவிலோ அல்லது நடக்காமலோ) கூடியிருக்கும். இதில் கிராமத்திற்கு உட்பட்ட பொது மக்களும், பஞ்சாயத்து உறுப்பினர்களும் ஒன்று கூடி நடந்து முடிந்த நிகழ்வுகளையும், இனி மேற்கொள்ள வேண்டியதையும் பற்றிப் பேசியிருப்பர்.

மத்தியிலும், மாநிலத்திலும், உள்ளாட்சியிலும் நாம் நமது வேட்பாளரை நேரடியாகவோ அல்லது மறைமுகமாகவோ தேர்ந்தெடுக்கின்றோம். அரசியல் சாசனத்தின் அடிப்படையில் மத்தியிலும் மாநிலத்திலும் 1951 ஆம் ஆண்டுக்குப் பிறகும், பஞ்சாயத்துகளில் 1992 ஆம் ஆண்டுக்குப் பிறகும் மக்களால் தேர்ந்தெடுக்கும் முறையைப் பின்பற்றி வருகின்றோம்.

பொதுவாகவே, நம் நாட்டில் ஆட்சி அமைக்க பெரும்பான்மையைப் பெற வேண்டும் என்பது அரசியல் அமைப்பின் கோட்பாடு. ஆகவே அரசியல் கட்சிகள் பெரும்பான்மையை மையமிட்ட ஒன்றாகவே திகழ்கிறது. இன்றைய சூழலில் பொது மக்களின் பங்கேற்பின்மை; அதிகரித்துக் கொண்டிருக்கும் அரசியல் கட்சிகள், இவற்றால் பெரும்பான்மை என்பது உடைக்கப்பட்டு அது ஒரு அர்த்தமற்றதாகிவிட்டது. இந்நிலையில், மக்களால் தேர்ந்தெடுக்கப்படும் மாநில சட்டசபை உறுப்பினர்கள் மற்றும் பாராளுமன்ற உறுப்பினர்களுடைய செயல்பாடுகளையும் பொறுப்புகளையும் கிராம பஞ்சாயத்து உறுப்பினர்களுடன் ஒப்பிட்டுப் பார்க்கும்போது, கிராமத்தைச் சிறந்த முறையில் ஆட்சிசெய்வதற்கான அதிகாரத்தைக் கொண்டுள்ளவர் ஊராட்சித் தலைவரே ஆவார். ஊரக வளர்ச்சி என்பது ஒரு கிராமத்தின் பொருளாதார வளர்ச்சியையும், சமூக வளர்ச்சியையும் கொண்டதாக அமைதல் வேண்டும். இவ்விரண்டையும் பெறுவதற்கு சமூகப் பங்களிப்பு என்பது மிக மிக அவசியமானதாகின்றது.

இப்பங்களிப்பினை ஆற்றுவதற்கான கருவியாக விளங்குவது கிராமசபை என்றால் அது மிகையாகாது. இக்கிராம சபையானது மத்திய மாநில அரசுகள், ஊரக வளர்ச்சிக்கென செயல்படுத்தும் திட்டங்களையும், அதன் பயனாளிகள் குறித்த விவரங்களையும், பொதுமக்கள் நேரடியாக அறிந்து கொள்ளவும் தங்களது பங்களிப்பினை ஆற்ற வாய்ப்பளிக்கும் வகையிலும் அமைகின்றது. கிராமசபையினை நடத்துவதும் அதனைச் செயல்படுத்துவதும் ஊராட்சித் தலைவரின் பணிகளில் முதன்மையானதாகும். அப்படிப்பட்ட கிராமசபையின் குறிக்கோள் மற்றும் அது தோல்வியுறுவதற்கான காரணிகளையும் அவற்றைக் களைவதற்கான வழிமுறைகளையும் விளக்குவதாக இக்கட்டுரை அமைகின்றது.

பொதுமக்களுக்கான இக்கிராமசபை கூட்டத்தில் மக்களின் பங்களிப்பு துளியளவும் இடம்பெறுவதில்லை என்கின்ற செய்தி வேதனைக்குறியதாகும். இதன் பின்னணியினைப் பார்க்கும் பொது பலதரப்பட்ட சிக்கல்கள் இதில் காணப்படுவதை அறியலாம். ஒரு ஆண்டில் 4 முறை கிராமசபை கூடவேண்டும் என்பது அரசின் அடிப்படைக் கொள்கை. ஆனால் இந்நான்கு தினங்களும் அரசு விடுமுறை நாட்களாகவே இருப்பினும் மக்கள் கூடுவதில்லை. காரணம், ஊரக மக்கள் பெரும்பாலும் தினக்கூலிகளாகவும், விவசாய உழைப்பாளர்களாகவும் இருப்பதால் பகல்பொழுதில் நடைபெறும் இதுபோன்ற கூட்டங்களில் அவர்களால் பங்கேற்ப முடிவதில்லை, முறையான அறிவிப்பு பொதுமக்களைச் சென்றடைவதில்லை, பொதுமக்களுக்கும் போதுமான விழிப்புணர்வு இருப்பதில்லை, அரசியல் தலையீடுகள் மற்றும் ஆதிக்கச்சக்திகள் குறித்த அச்சம் இது போல நாம் அடுக்கிக்கொண்டே போகலாம்.

அரசின் ஒவ்வொரு திட்டமும் ஒரு குறிப்பிட்ட பொதுமக்கள் குழுவின் நலனைக் கருத்தில் கொண்டே உருவாக்கப்படுகின்றது. உதாரணமாக, பெண்களுக்காகவும், வறுமை கோட்டிற்குக் கீழ் உள்ள மக்களுக்காகவும், விவசாயிகளுக்காகவும், பழங்குடி மக்களுக்காகவும் என அரசால் திட்டங்கள் வகுக்கப்படுகின்றன. ஆனால் கிராமசபையில் இத்திட்டங்கள் தொடர்புடைய பொது மக்களின் பங்கேற்பின்மையால், திட்டங்களின் குறிக்கோள், பயன் குறித்த தகவல்கள் ஆகியன அவர்களைச் சென்றடைவதில்லை. கிராமசபை தலைவர் பெரும்பாலும் இதைப் பொருட்படுத்துவதும் இல்லை.

இந்த அலட்சியப் போக்கின் தொடர்ச்சியாக மற்றொன்றையும் சுட்டிக் காட்டலாம். பெரும்பான்மை சமூகத்தையோ, வகுப்பையோ, சாதியையோ, கட்சியையோ, மதத்தையோ, இனத்தையோ சார்ந்த ஒருவர் கிராமசபைத் தலைவராக தேர்ந்தெடுக்கப்பட நேர்ந்தால், ஊரக வளர்ச்சிக்கு எனக் கொண்டு வரும் திட்டங்கள் அனைத்தும் அவர் தம் சார்புடைய சமூகத்தையோ, வகுப்பையோ, சாதியையோ, கட்சியையோ, மதத்தையோ, இனத்தையோ சென்றடையுமாறு நடந்து கொள்ள வாய்ப்புகள் மிக மிக அதிகம். இதன் தொடர்ச்சியாக ஒரு முறை தேர்ந்தெடுக்கப்படும் கிராமசபைத் தலைவர் அவரது தனிப்பட்ட செல்வாக்கினாலோ, இயற்கையாகவோ இன்னும் பிற காரணங்களாலோ அடுத்தடுத்து தேர்ந்தெடுக்கப்படும் சூழலும் உருவாகும் பொழுது மேற்கண்ட நிகழ்வுகள் தொடரும் நிலை ஏற்பட்டு அக்கிராமத்திலுள்ள சிறுபான்மை சமூகத்தினருடைய அடிப்படை பயன்பாடுகள் முழுமையாகச் சென்றடைவதில் தொய்வு ஏற்படுகின்றது அல்லது முழுமையாகச் சென்று அடைவதில்லை என்றே கூறலாம்.

அடிப்படை வாழ்வாதாரச் சிக்கலை போக்குவதற்காக ஒதுக்கப்படும் நிதியானது அந்தந்த பஞ்சாயத்தினைச் சென்றடைகின்ற போதும், அரசு எதிர்பார்க்கும் இலக்குகளின் குறியீட்டினை அது அடைந்ததாகத் தெரியவில்லை. ஒவ்வொரு ஆண்டும் ஒதுக்கப்படும் நிதியின் அளவு கூடுகின்றதே தவிர அந்நிதிக்குரிய இலக்குகளைச் சற்றேனும் அரசு அடைந்ததாகத் தெரியவில்லை. இதைக் கூர்ந்து நோக்கும் பொழுது நமக்குப் புலப்படுவது யாதெனில், ஒவ்வொரு ஆண்டும் நிதி ஒதுக்கீட்டின் அளவு குறைந்திட வேண்டுமே தவிர கூட்டுவதினால் இலக்குகளை நாம் அடைந்து விடுவோம் என்று கருதி விட முடியாது. இது தவிர, நிதி கூடக் கூட, அது ஏற்கனவே பயன் அடைந்த பயனாளர்களையும், ஊழல் பெருச்சாளிகளையும், அரசியல் தலைவர்களின் கைத்தடிகள் மற்றும் சொந்தங்களையுமே சென்று சேருமே தவிர உண்மையான பயனாளிகள் இதனால் பயன் பெறுவது கேள்விக்குறியே. அரசு முன்னதாகவே கூடுதல் கவனம் செலுத்தி இதை எந்தெந்த வழிகளில் சிறப்பாக மேற்கொள்ளலாம் என்பதனை முன்கூட்டியே திட்டமிட்டிருந்தால் இந்த இலக்குகளை என்றோ அரசு எட்டி இருக்கலாம் என்பதும் கண்கூடு.

இவ்வாறாக மேற்கண்ட கூற்றுகளின் அடிப்படையில் நோக்கும் போது பஞ்சாயத்துத் தலைவர்கள் மற்றும் கிராம சபையின் குறித்த நிலவரங்கள் தெரிய வருகின்றன. ஆகவே இதைச் செம்மை படுத்தச் சில வழிமுறைகள் கீழ்கண்டவாறு இனங்காணப் படுகின்றது.
முதலாவதாக, இத்திட்டங்களில் உள்ள குறைபாடுகளை களையவும் சீரிய முறையில் அதனைச் செயல்படுத்தவும் அரசு சார்பில் நியமிக்கப்படும் ஒரு குழுவோ அதிகாரியோ சம்பந்தப் பட்ட திட்டத்தோடு தொடர்புடைய பயனாளிகளை அவ்வப்போது நேரடியாகச் சந்தித்து, திட்டங்கள் குறித்து கலந்தாய்வு ஆலோசனை செய்யும் பொழுது அத்திட்டம் உயிரூட்டம் பெறும் என்று எதிர்பார்க்கலாம்.

இரண்டாவதாக, கிராம பஞ்சாயத்து தலைவரைத் தேர்ந்தெடுக்கும் முறையை நாம் மாற்றலாம். ஏன் கிராம பஞ்சாயத்து தலைவரைத் தேர்ந்தெடுக்கும் முறையை மட்டும் மாற்றலாம் என்றால், மக்களால் தேர்ந்தெடுக்கப்படும் மாநில சட்டசபை உறுப்பினர்கள் மற்றும் பாராளுமன்ற உறுப்பினர்கள் சட்டங்கள் மற்றும் திட்டங்ளை இயற்றும்பொழுதும், அதை அமல்படுத்தும் பொழுதிலும் எதிர்க்கட்சிகள் அவர்களது தரப்பு வாதத்தையும் முன் வைப்பர். ஆதலால் கூட்டு முடிவு எடுக்கப்படும். ஆனால், கிராம பஞ்சாயத்தில் அவ்வாறாக நடைபெறுவது இல்லை. ஆகவே, ’குடவோலை’ முறையைப் பின்பற்றலாம். இங்கு, திட்டத்தை அமல் படுத்துவதும், அதை மக்களிடம் கொண்டு போய் சேர்ப்பதும்தான் தலையாயக் கடமை. அதற்குப் பெரும்பான்மையைவிட, மக்களின் ஈடுபாடுதான் முக்கியம். குடவோலை முறையில் ஆதிக்கச்சக்திகள் குறித்து அச்சப் படத் தேவை இல்லை.

மூன்றாவதாக, கிராமசபை கூடும் நேரத்தில் மாறுதல் தேவை. பொதுவாக, இந்தியப் பாரம்பரியத்தில் ஊர்ப்புறங்களில் நடைபெறும் எந்த ஒரு நிகழ்வானாலும் அது பொது மக்கள் கூடுவதற்கு வசதியாக மாலை நேரங்களில் நடைபெறுவது வழக்கம். உதாரணமாக, குடும்பங்களில் நடைபெறும் சடங்கு முறைகள், ஊர்ப்பொதுவில் நடைபெறும் விழாக்கள் போன்றவை பொதுவாக இரவு நேரங்களில் நடத்துவதற்குக் காரணம், அனைத்துத் தரப்பு மக்களின் ஒருங்கிணைப்பும் அவர்களின் பங்களிப்பும் இடம் பெற வேண்டும் என்பதற்காகத்தான். இதே நடைமுறையைக் கருத்தில் கொண்டு கிராம சபையின் கூட்டத்தினை மக்களுக்கு ஏதுவான நேரமாகக் கருதப்படும் மாலை நேரங்களில் நடத்தும்பொழுது அனைத்துத் தரப்பு மக்களும் பங்கேற்கும் ஒரு சூழலை உருவாக்கித் தரலாம்.

நான்காவதாக, கிராமசபை கூடும் நாளை முறையாக விளம்பரப்படுத்த வேண்டும். இவ்விஷயத்தை அரசு தீவிரமாக கருத்தில் கொண்டு செயல்படுத்தினால் மக்களிடம் ஆக்கபூர்வமான விளைவுகளைக் காணமுடியும். சான்றாக, கிராமசபை குறித்த அறிவிப்பை (கிராம சபை கூடும் நாளை) மக்களின் கவனத்திற்கு கொண்டு செல்ல வெகுஜென ஊடகங்களைப் பயன்படுத்த வெண்டும். தேசிய நாட்காட்டிகளில் (காலண்டர்) கிராமசபை குறித்த வாசகங்களை வெளியிட்டு அன்று விடுமுறை என்று சுட்டிக் காட்டலாம். பள்ளிகளிலும், கிராம சபை விடுமுறை நாட்களுக்கு முந்தைய நாளில் கிராம சபை குறித்த அறிவிப்போடு விடுமுறை என்பதை எடுத்துக் கூற வேண்டும். இதனால் மக்கள் சீறிய விழிப்புணர்வு பெறுவர்.

அடிப்படை செயலாக்க சக்தியாகச் செயல்படும் கிராம பஞ்சாயத்துத் தலைவர், அவர் பொறுப்புகளை உணர்ந்து சரிவர செயல்பட்டு இருந்தார் ஆயின் அரசின் அனைத்துத் திட்டங்களும் வெற்றி பெற்று இருக்கும். ஆனால், இது நம் நாட்டிலுள்ள பெரும்பாலான கிராம பஞ்சாயத்துகளில் நடந்ததாகத் தெரியவில்லை. இதனால் மாற்றம் ஒன்றே மானுட தத்துவம் என்ற அடைமொழிக்கேற்ப தகுந்ததொரு மாற்றம் ஏற்படுமாயின் அது நன்மை பயக்கும். ஊர்கூடித் தேரிழுப்பது போல அனைவரும் சேர்த்து கூட்டு முயற்சியோடும் தன்னார்வத்தோடும் பங்கேற்று, மிகுந்த அர்ப்பணிப்போடு செயல்படும் பொழுது கிராம சபை எனும் தேரினை எளிதாக நகர்த்திச் சென்று திட்டங்களின் பயன்களை அதன் பயனாளிகளிடம் சேர்க்கலாம்.

Bibliography
1) Arun kavshik, “How Representative has the Lok Sabha bear” EPW, may 12, 2012, vol XL no 19
2) Http://shodhganga.inflibnet.ac.in/bitstream/10603/354/14/14_chapter7.pdf
3) http://www.isidelhi.org.in/saissues/sa112/nirmala.pdf
4) rural.nic.in/sites/…/budget/Outcome_Budget_RD_2011_12_book.pdf

ஆ. ஜெயராஜன்,
முனைவர் பட்ட ஆய்வாளர்
காந்தி கிராம கிராமிய பல்கலைக் கழகம்
காந்திகிராமம்-624302
திண்டுக்கல், தமிழ்நாடு
தொலை பேசி: 9047771414
மின்னஞ்சல்: najayarajan@gmail.com

August 17, 2015
படக்கவிதைப் போட்டி 25-இன் முடிவுகள்

-மேகலா இராமமூர்த்தி

புகைப்படத்தை எடுத்திருக்கும் திரு. வினித், அதனைப் போட்டிக்குத் தேர்வு செய்தளித்துள்ள வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் இருவருக்கும் வல்லமையின் நன்றி.

உயரப் பறக்கும் இந்தப் பறவைகள் போல் நம் உள்ளமும் உயர்வையே உள்ளினால் வாழ்வு வளம்பெறும். வானம் வசப்படும்!

இனி, நம் கவிஞர்கள் கோத்துத் தந்திருக்கும் கவிச்சரங்களைக் களிப்போடு வாசித்து மகிழ்வோம்!

***

வித்தியாசமான சிந்தனையோடு, இப்பறவைகளின் மறுபக்கத்தில் தன்னையே சுவராக எண்ணிப் பார்க்கின்றார் திரு. கவிஜி.

ஓவியம் அசைவதாக
கற்பனை கொண்ட
பறவைகளின் மறு பக்கத்தில்
நான் வெறும்
சுவர்…

***

’ஒற்றுமையைத் தம் சிறகில் ஏற்றிப் பறக்கும் இப்பறவைகள் காதல் தேசத்தின் தூதுவர்களோ!’ என்று வியக்கிறார் திருமிகு. கார்த்திகா.

…வட்டமிட்டு இரை கொத்தும்
சிறு பறவைகள்
ஒற்றுமையையே
வலிமையாய்
சிறகில் ஏற்றி
உயரப் பறந்திடும்
பெரும் தேவதைகள்
[…]
கொஞ்சும் அலகுகளால்
நெஞ்சம் அசத்தி
உலகாளும் நீங்கள்
இந்த தேசத்தின்
காதல் தூதுவர்களோ!!

***

’வேற்றுமையில் ஒற்றுமை காணும் பாடத்தைப் பறவைகளிடம் கற்றுக்கொள்ளுங்கள்!’ என்று வேண்டுகோள் விடுக்கிறார் திரு. செண்பக ஜெகதீசன்.

பறவைகள் பார்த்திட மட்டுமல்ல
பாடம் பலவும் கற்றிடத்தான்,
உறவு பகையெனப் பிரித்திடுவான்
வேற்றுமைச் சிறகை விரித்திடுவான்,
நிறமென இனமென விலகிடுவான்
நினைத்திடா பேதமாய் உலவிடுவான்,
மறந்திடும் மனிதனைத் திருத்திடத்தான்
மேலவை ஒன்றாய்ப் பறப்பதுவே…!

***

சுதந்திரம் வாங்கியதாய்ச் சொல்லிக்கொண்டு நாளும் ஒரு சிறைச்சாலை திறந்துகொண்டிருக்கும் மனிதரின் அவலநிலை கண்டு பறவைகளும் பரிகசிக்கின்றன என்கிறார் திரு. மெய்யன் நடராஜ்.

சுதந்திரம் வாங்கியதாய்
சொல்லிக்கொண்டு
புதிய புதிய
சிறைச்சாலைகள்
திறந்துகொண்டிருக்கும்
மனிதர்களே வாருங்கள்

நேற்றுகள் தந்த பாரங்கள்
நெஞ்சோடு இல்லாமலும்
நாளையை பற்றிய
கவலைகள் கொள்ளாமலும்
இன்றைய பொழுதை
இனிமையாய் கழிக்கும்
எங்களிடம் இல்லாத சுதந்திரம்
உங்களிடம் இருந்தால் சொல்லுங்கள்…

***

உளமெனும் படர்மணலில் உயர்ந்தெழும் எண்ணப் பறவைகளை நம் சிந்தை கவரும் வகையில் சந்த நயத்தோடு தீட்டியிருக்கின்றார் திரு. சுந்தர் புருஷோத்தமன்.

படர்மணல் நிலமென
துளமிதை அழகே,
நீ கேளாய்….!
[…]
சிறகதை விரித்தியல்
பொடுசுழல் விசையதை
மனத்தினில் கொடுத்திடு
நினைப்பெனும் பறவை…!
[…]
நடப்பதன் நடுவினுள்
திகழ்கரு வெதுவென
நினைக்கையில்,
நடந்ததைத் திரும்பவும்
நடந்துளம் நினைந்திட
படபடபடவென வெழுமே…!

நெளிவுறு புழுக்களை
சிதற்படும் வெறுப்பினை
லபக்கென விழுங்கிட
விரும்பிடும் பறவை…!
[…]
செழுந்தழல் தருமதன்
தகிப்பில்,
எழுந்துயர்ப் பறந்தனவே……!!…

***

தான் விண்ணில் பறக்கச் சிறகுகளையும், மண்ணில் மாந்தரனைவரும் நல்லவண்ணம் வாழும் நன்னாளையும் இறைவனிடம் இறைஞ்சுகிறார் திருமிகு. லட்சுமி.

பறவைகள்போல சிறகுகள் வேண்டி
இறைவனிடம் யாசிக்கிறேன்!
[…]
விண்ணுயரப் பறக்க நான்
நினைத்தாலும் மண்துகளாய்
மிதிபட்டுக் கிடக்கின்றேன்!
[…]
விதை விதைத்தவன் மட்டுமே
அறுவடைக்கு சொந்தமாவான்!
அறுப்புக்கு புது நாற்று சொந்தக்காரன்
வந்த அதிசயத்தை தடுக்க உதவுவாயோ!
[…]
விதை விதைத்தவனுக்கே
விதைகள் சொந்தமென
பரவச் செய்ய சிறகுகள்
வேண்டி யாசிக்கிறேன்!
ஏறுபோல உண்மைநடைபோட
இலஞ்சம் இல்லா பெருவாழ்க்கை
கொண்டுவர இல்லானுக்கும்
உணவளிக்கும் மனம் மிகுந்துவர
முதியோர் காப்பிட சிறகுக் கைகளை எனக்கருள
இறைவனிடம் யாசிக்கிறேன்!

***

’எதிர்பார்ப்பு ஏதுமில்லை; ஏய்த்துப் பிழைப்பதில்லை. பறவைகளைப் பார்த்தேனும் நாம் பண்படுவோம்; பயனுறுவோம்!’ என்கிறார் திரு. சுரேஜமீ.

இளமாலை வேளையிலே
இளந்தென்றல் வீசிவர
இரைதேடி வந்திட்ட
இசைபாடும் புள்ளினங்கள்

இரக்கத்தை நெஞ்சோடும்
இருப்பவற்றைக் கையோடும்
இயன்றவரை தினம்சேர்க்கும்
இவரன்றோ தெய்வமென்பேன்!
[…]
எதிர்பார்ப்பு இங்கில்லை
ஏங்கும் நிலையில்லை
ஏய்த்துப் பிழைப்பதில்லை
எவர்மீதும் வன்மமில்லை

பரவிநிற்கும் மணற்பரப்பு
பறந்துவிரிய பறவைக்கூட்டம்
பார்த்துத் தெளிந்து
பண்படுவோம்; பயனுறுவோம்!…

***

’கூடு திரும்பும் வேளையிலே குஞ்சுகளுக்கு இரை சேகரிக்கின்றீரோ?’ என்று பறவைகளைப் பார்த்து பக்குவமாய் வினாத்தொடுக்கிறார் திருமிகு. தமிழ்முகில்.

…சிதறிக் கிடக்கும்
தானியம் தனை
சிந்தை சிதறாது
அலகு தனில்
அள்ளி எடுக்கிறீரோ ?
[…]
கடலும் வானும்
நீலப் பட்டு கொண்டு
புது அரங்கம்
அமைக்கின்றனவே !

கூடு திரும்பும்
நேரமதில் பிள்ளைகட்கு
உணவெடுத்துச் செல்ல
கருமமே கண்ணாய்
செயலாற்றுகிறீரோ
பறவைகளே ?

***

சிந்திய உணவுண்டுச் சூதுவாது ஏதுமின்றிச் சுந்தரமாய் இறகுவிரிக்கும் பறவைகளின் சுதந்திரம் மானிடர்க்கு வாய்ப்பதெப்போ(து)? என்ற தன் ஏக்கத்தைக் கவிதையில் பதிவுசெய்திருக்கின்றார் திருமிகு. வேதா இலங்காதிலகம்.

பதந்தரும் இறகு விரித்து
மிதந்திடும் பறவைச் செயலை
இதந்தரும் சுதந்திரமென ஒப்பிட்ட
சுதந்திர அடையாளமாக்கினான் மனிதன்
[…]
வெட்ட வெளியில் ஒன்றாய்
கெட்ட பாகுபாடு சூதுவாதின்றி
ஒட்டு மொத்த சிந்தனை
எட்டும் உணவிற்கு மட்டும்!
பட்டு சுதந்திரம் இதுவன்றோ!
வெட்டு சூது வன்முறையென்று
கிட்டிய சுதந்திரம் எங்கே!
நட்டுவிடுங்கள் தர்மச் செயலை.

***

ஒளிர்ந்திடும் ஞாயிற்றை, பறந்திடும் புள்ளினத்தை, அவற்றிற்கு உணவளித்து உயர்ந்திடும் மானுடத்தைக் காட்சிப்படுத்தியுள்ளார் திரு(மிகு?). மணிச்சிரல்.

ஒளிர்ந்து இருக்கும் ஞாயிற்றால்
வளர்ந்து இருக்கும் பூமியின்மேல்
பரந்து இருக்கும் வானத்தின்கீழ்
விரிந்து இருக்கும் மேகங்கள்
பசித்து இருக்கும் உயிர்கள்
ரசித்து இருக்கும் கண்கள்
பறந்து இருக்கும் புள்கள்
சிறந்து நிற்கும் மனிதர்!.

***

’வேடுவக் கைகளில் சிக்காமல் பாடிப் பறந்திடுங்கள் வான்வெளியில் சுதந்திரமாய்’ என்று பறவைகளிடம் பாசமொழி பகர்கின்றார் திருமிகு. புனிதா கணேசன்.

…வேர் விட்ட வேடுவக் குணங்களால் ஊன் நாடியே எம்மை
மூர்க்கத்தனமாகச் சிறை பிடித்து வதைக்கு முன்னர் –நாம்
மார்க்கம் ஒன்றை வகுத்து சிறகை விரித்து உயரப் பறந்து
சேர்வோம் ஓர் சுதந்திர பூமியை சிறகின் வலிமையால்
[…]
தர்மம் தொலைந்த தாரணியில் தங்கி உணவு தேடுவிரேல்
தேர்ந்தே எடுத்தீர் உணவதனை – சுதந்திர வேட்கை கொள்ளாது
தீர்க்கும் பசிக்கு சொண்டுகளே போதும் இங்கு இனி –உமக்கு
நேர்த்தியான சிறகெதற்கு சுதந்திரத்தை நாடாது ?

***

வளமான கருத்துக்களை வாரியிறைத்திருக்கும் கவிஞர்களுக்கு என் பாராட்டுக்கள்!

இவ்வாரத்தின் சிறந்த கவிஞரைத் தேர்ந்தெடுக்கும் தருணமிது!

இனம், மதம், நிறம் என்று வெறிகொண்டலையும் மானுட மூர்க்கத்தை வெறுத்த சின்னப் பறவைகள் ஒற்றுமை எனும் பெருங்குணம் கொண்டு விண்ணுயரப் பறந்திடும் காட்சி இது என்று விளம்பிடும் கவிதையொன்றைக் கண்ணுற்றேன்.

அக்கவிதை…

“வாருங்கள் தோழர்களே
விண்ணுயரப் பறந்திடுவோம்! ”

கருப்பென்றும் சிவப்பென்றும் பேதலிப்பான்
விருப்புடனே எந்நாளும் வாழமாட்டான்
செருக்குடனே வாழ்ந்திங்கு கெட்டலைவான்
வருத்தமே கொண்டழியும் மனிதன்வாரான்
[…]
மதமென்னும் போர்வையிலே மாட்டிக்கொள்வான்
நிதமிங்குப் போர்செய்து மனிதம்கொல்வான்
இதமாகப் பேசுதலே இழிவென்பான்
உதவாத குணமுடைய மனிதன்வாரான்
[…]
ஆறறிவு தனக்கென்று ஆண‌வம்கொள்வான்
ஆறுதலாய்ப் பேசுதலை அறியமாட்டான்
மாறுதலை மனமொப்பி வாழமாட்டான்
சீறுதலே குணங்கொண்ட மனிதன்வாரான்
[…]
கூடிவாழும் நமையிங்கு விரட்டவாரான்
சோடியாக வாழும்நம்மைத் துரத்தவாரான்
பாடியாடி இரைசேர்ப்பதைத் தடுக்கவாரான்
பேடியிவன் சகவாசம் நமக்குவேணாம்

வாருங்கள் தோழர்களே
விண்ணுயரப் பறந்திடுவோம்!

சிந்தனைக்குத் தீனியிடும் இக்கவிதையை யாத்த திரு(மிகு?). வி.எஸ்.கே.வை இவ்வாரத்தின் சிறந்த கவிஞராய் அறிவிக்கின்றேன்.

பறவைகளை வேட்டையாடிக் கொல்வதும், மூடநம்பிக்கையில் மூழ்கிப்போய் அவற்றைக் கூண்டிலடைத்துச் சோதிடம் சொல்வதும், பறவை பெயரில் லேகியம் விற்றுக் காசுபார்ப்பதையும் கண்டிக்கும் மற்றொரு கவிதையும் நம்மைச் சிந்திக்க வைக்கின்றது.

கூட்டமாய் வரும் பறவைகளே….
கொஞ்சம் நிதானம் தேவை.
இரை போடும் மனிதரை
இனியும் நம்பாதீர்.
[…]
தானியங்கள் உருவில்
விஷத்தினைத் தூவிடுவான்….
மானியங்களாய் பறவைகளை
மொத்தமாய் அள்ளிடுவான்….

சுயநலக்காரனிவன்
சுதந்திரத்தை அடகுவைப்பான்…
பசுங்கிளியைக் கூண்டிலிட்டு
சோதிடத்தைச் சொல்லவைப்பான்…

பந்தயப் புறாக்களாய்ப்
பறக்கவிட்டு பணம்பார்ப்பான்
சிங்காரச் சிட்டுகளைச்
சிறைபிடித்தழகு பார்ப்பான்…

குருவிக்கூடு கலைத்து
லேகியம் செய்துகொள்வான்….
காக்கைகள் கரையுமென்று
விருந்தினைப் புறந்தள்ளுவான்…
[…]
இயற்கையைக் கொல்பவன்…
இவனுக்குச் சிறிதும்
இரக்கம் காட்டிடாதீர்
இயற்கையே இவனைக் கொல்லும்,

இனியும் இவனிங்கு
திருந்திட வில்லையெனில்!

திரு. இளவல் ஹரிஹரன் எழுதியிருக்கும் இக்கவிதையைப் பாராட்டுக்குரியதாய்த் தேர்ந்தெடுக்கின்றேன்.

கவிஞர்கள் அனைவர்க்கும் மீண்டும் என் வாழ்த்தும் பாராட்டும்!

August 16, 2015
2011 இல் புகுஷிமா விபத்து நேர்ந்து நான்கு ஆண்டுக்குப் பின் ஜப்பான் அணுமின் உலைகளின் நிலைமை என்ன ?

சி. ஜெயபாரதன் B.E.(Hons) P.Eng (Nuclear) கனடா

https://youtu.be/wCX_baMgI_I

https://www.youtube.com/watch?feature=player_embedded&v=IcGqNM5t28s

+++++++++++++++

அணுமின் சக்தி நிலையங்கள் மீண்டும் இயங்காமல் போனால், ஜப்பானில் சில தொழிற் துறையாளர் பேரளவு இடர்ப்பாடுகளுக்குள் பாதிப்பு அடைவர். அவர்கள் யாவரும் பேரளவு அரசாங்க ஆதரவு உடையவர் ஆதலால் மீண்டும் பல அணுமின் உலைகள் இயங்க ஆரம்பிக்கும்.

பேராசியர் ஜெஃப்பிரி கிங்ஸ்டன் [ஆளுநர், ஆசிய அறிவு ஆய்வுகள், ஜப்பான் டெம்ப்பிள் பல்கலைக் கழகம்]

பூர்வப்படிவு எரிசக்தி எருக்கள் [Fossil Fuels] மீது கொண்டிருக்கும் நம்பிக்கை, அவற்றின் விலை ஏற்ற இறக்கத்தை எதிர்பாராத போதும், எரி ஆயில் உற்பத்தி நாடுகள் இடும் விலை மாறும் போதும் நிலைமை பெரிதும் கவலைக் கிடமாகிறது. பேரளவில் இயல் எரிவாயு [Natural Gas] இறக்குமதி செய்வது, ஜப்பான் மின்னாற்றல் உற்பத்திக்கு நிதி இழப்பு [Risk] ஏற்பட எதிர்பார்ப்பு நிகழலாம். அணு உலை பாதுகாப்பு நம்பிக்கை குறைந்து போனாலும், அணு மின்சக்தி ஜப்பானுக்கு ஓர் நல்லுறுதி அளித்துள்ளது. அணுமின்சக்தி உற்பத்தித் துறையில் விபத்து எதிர்பார்ப்புகள் [Risks], பராமரிப்பு நிதிச் செலவுகள் மிகையாக இருப்பினும், யுரேனிய எரிசக்தி கிடைப்பதில் தொடர்ந்த உறுதிப்பாடு உள்ளது.

டோமோகோ முராகமி [அணுமின்சக்தி ஆய்வாளி, எரிசக்திச் சிக்கனப் பொறித்துறை ஆய்வகம், ஜப்பான்].

2015 இல் ஜப்பானில் அணுமின்சக்தி நிலையங்கள் நிலை என்ன ?

2011 புகுஷிமா விபத்து நேர்ந்து நான்கு ஆண்டுகள் கடந்து, புதிய பாதுகாப்பு விதிகளுக்குக் கீழ்ப்படிந்து, முதன்முதல் சென்டை அணுமின் நிலையம் Unit : 1 [Sendai Nuclear Power Plant] இப்போது இயங்க ஆரம்பித்தது. அது கியூஷு மின்சார ஆற்றல் கம்பேனியைச் [Kyusu Electric Power Company] சேர்ந்தது. இரண்டாவது யூனிட் இன்னும் ஓரிரு மாதங்களில் இயங்க ஆரம்பிக்கும். அடுத்து 25 அணுமின் சக்தி நிலையங்கள் இயங்க ஜப்பான் அரசாங்க அனுமதிக்குக் காத்திருக்கின்றன. கியூஷு கம்பேனி 100 மில்லியன் டாலர் செலவழித்து அணு உலைப் பாதுகாப்பு ஏற்பாடுகள் சீராக்கப் பட்டுச் செப்பணிடப் பட்டுள்ளன. ஜப்பான் 2030 ஆண்டுக்குள் நாட்டின் 20% திறத்தை மேலும் அணுமின் சக்தி நிலையங்கள்தான் பூர்த்தி செய்யும் என்று தெரிகிறது.

புகுஷிமா விபத்துக்குப் பிறகு, பாதுகாப்பு முறைகள் செப்பணிட ஜப்பான் அரசங்கம் இயங்கிக் கொண்டிருக்கும் 48 அணுமின் நிலையங்களை நிறுத்தம் செய்தது. அவற்றில் 43 அணுமின் நிலையங்கள் மீண்டும் இயங்கும் நிலையில் உள்ளன. 2011 சுனாமியில் சுமார் 16,000 ஜப்பானியர் உயிரிழந்தார். இன்னும் 2500 பேர் காணப் படவில்லை. மேலும் கதிரிக்கத் தடுப்பு விளைவுகளால் 160,000 பேர் புலம்பெயர்ந்தார். ஆனால் புகுஷிமா நான்கு அணு உலைகள் விபத்தால் இதுவரை யாரும் உயிரிழக்க வில்லை.

“அமெரிக்காவின் விண்வெளிக்கப்பல் “சாலஞ்சர்” எரிந்து போய் அனைத்து விண்வெளி விமானிகள் [1986 ஜனவரி 28] மாண்டதும், அடுத்துச் செர்நோபில் அணுமின் நிலையம் [1986 ஏப்ரல் 26] வெடித்ததும் நமக்கு அதிர்ச்சியைக் கொடுத்து, நாகரீக முன்னேற்றத்தின் பெயரால் எழுந்துள்ள நிறுவகங்களின் கோர விளவுகளை மனித இனம் இன்னமும் புரியாமலே இருப்பதை நினைவூட்டுகின்றன.”

மிக்கேயில் கார்பசாவ் [Mikhail Gorbachev (Aug 18, 1986)]

அணுமின்சக்தி நிலையங்களில் விபத்துக்கள் நேரும் என்று எதிர்பார்ப்பதிலும், அதனால் ஏற்படும் தீங்கு விளவுகளைக் குறைக்க வழிகள் உள்ளன என்னும் பாதுகாப்பு உறுதிலும் பொது மக்களின் உடன்பாடு காணப்பட வேண்டும். பாதுகாப்பாக எப்படி அணுமின் உலையில் நேரும் விபத்தின் தீவிர விளைவுகளோடு மனிதர் வாழ முடியும் என்பது ஒருபுறம் இருக்க, செர்நோபில் போன்ற கோர விபத்துகளை எப்படித் தடுக்க வேண்டும் என்பது முக்கியமான கேள்வியாக இன்னும் தெரியவில்லை!

இயற்கை விஞ்ஞானப் பதிப்பு [Nature]

நகரிலிருந்து 30 மைல் தூரத்தில் உள்ள சிறு அணுமின் நிலையம் ஒன்றில் பெரும் விபத்து நேர்ந்தால், சுமார் 3400 பேர் மரணம் அடையலாம்! கதிரியக்கத்தால் 43,000 நபருக்குத் தீவிரத் தீங்குகள் விளையலாம்! நகரப் புறத்திலும், நிலவளத்திலும் ஏற்படும் பொருட் சேதம் சுமார் 7 பில்லியன் டாலர் நிதி விரையத்தை உண்டாக்கலாம்.

அமெரிக்க அணுசக்திப் பேரவைக் கணிப்பு [US Atomic Energy Commission Brookhaven Report (1957)]

“மேன்மையான படைப்பு ஒன்றை உருவாக்க ஒரு பாதை இருக்குமானால், அதனால் விளையும் கோர முடிவுகளின் முழுத் தோற்றத்தை முதலில் உற்று நோக்கிய பிறகுதான் அதை ஆரம்பிக்க வேண்டும்”

தாமஸ் ஹார்டி [Thomas Hardy]

முன்னுரை:  2011 மார்ச் 11 ஆம் தேதி ஜப்பான் கிழக்குக் கரையில் 9 ரிக்டர் அளவில் அசுரப் பூகம்பம் ஒன்று உண்டாகி, இதுவரை எழாத 9 மீடர் (30 அடி) உயரச் சுனாமிப் பேரலைச் சுவர் தாக்கிப் பேரழிவை உண்டாக்கியது ! அப்போது அந்தப் பகுதியில் இயங்கிக் கொண்டிருந்த 11 அணுமின் உலைகள் பாதுகாப்பாக சுயநிறுத்தம் அடைந்தன ! 7.5 ரிக்டர் நிலநடுக்க அளவைத் தாங்கிக் கொள்ள அமைக்கப்பட்ட அணுமின் உலைகள் 9 ரிக்டர் அளவு பூத நடுக்கத்தைப் பொறுத்துக் கொண்டு நிலைகுலையாது நிமிர்ந்து நின்று ஆச்சரியம் விளைவித்தது ! ஆனால் 30 அடி உயர அசுரச் சுனாமி அலையை அணு உலைகள் தாங்கிக் கொள்ள முடியாது அவற்றின் அபாயப் பணி அவசிய மின்சாரச் சாதனங்கள் முடமாக்கப் பட்டு நிறுத்தப் பட்டன. அணு உலை எருக்கோல்களின் மிச்ச வெப்பத்தைத் (Residual Heat of the Shutdown Fuel Rods) தணிக்க நீரனுப்ப முடியாமல் ஓரளவு உருகிப் போயின. மேலும் நீரில் மூழ்காத எருக்கோல்களின் உஷ்ணம் மிகையாகி அவற்றின் கவச ஸிர்கோனியம் (Zirconium Fuel Sheath) நீரோடு இணைந்து ஹைடிரஜன் வாயுக் கோளம் வெளியேறி ஆக்ஸிஜனுடன் கலந்து யூனிட் -1, -2, -3 அணு உலைக் கட்டங்களின் மேற்தளங்கள் வெடித்தன ! யூனிட் -1 இன் எஃகு கோட்டைக் கீழ் வளையத்தில் (Torus) நீராவியின் அழுத்தம் மிகையாகிப் பிளவு ஏற்பட்டு கதிரியக்க கசிவு தொடர்ந்தது. வெப்பத் தணிப்புக்குக் குழாய் நீரனுப்ப வசதியற்று, கடல் நீரைப் பயன் படுத்த வேண்டிய நிர்ப்பந்த நிலை ஏற்பட்டது, அணு உலை வெப்பத் தணிப்பு நீர் போக்குக்குத் தேக்குமிடம் இல்லாமல் டர்பைன் கட்டடத்தில் சேமிப்பாகிக் கதிரியக்கம் கடல் வெள்ளத்தில் கலந்தது ! வெளியேறும் நீராவியில் கதிரியக்கத் தூள்களும் வாயுக்களும் சுற்றுப் புறங்களில் பலமடங்கு வீரியத்தில் பரவின !

முப்பது ஆண்டுகளுக்கு முன்பு 1979 இல் நேர்ந்த அமெரிக்காவின் திரிமைல் தீவு அணுமின் உலை விபத்தில் வெப்பத் தணிப்பு நீரனுப்ப முடியாது பேரளவு எருக்கோல்கள் உருகிப் போயின. வெப்ப மிகையில் நீரும் எருக்கோல் கவச ஸிர்கோனியமும் இணைந்து பேரளவு ஹைடிரஜன் வாயுக்கோளம் அணு உலைக்குள் திரண்டு வெடித்து மூடிய கோட்டையைத் தகர்த்து விடும் என்றோர் அச்சத்தை உண்டாக்கியது. அவ்விதம் எச்சரிக்கை செய்து 30 ஆண்டுகள் கடந்து ஜப்பான் புகுஷிமாவில் மூன்று அணுமின் உலைகளில் நிலநடுக்கத்தால் நிறுத்தமாகி, சுனாமியால் டீசல் எஞ்சின்கள் முடக்கமாகி வெப்பத் தணிப்பு நீரனுப்பு ஏற்பாடுகள் தடைப்பட்டு ஓரளவு எருக் கோல்கள் உருகி விட்டன என்று தெரிய வருகிறது ! அதை விடக் கோரமாய் அணுமின் உலைக்குள் பேரளவு ஹைடிரஜன் வாயுக்கோளம் திரண்டு வெடித்து மூன்று அணுமின் உலைகளின் கட்டட மேல்தளம் சிதைந்து அங்கிருந்த யந்திர சாதனங்களும் சிதறிப் போயின ! நான்காவது அணு உலையின் மேற்தளம் நீர்த் தொட்டியில் சேமிப்பான எருக்கோல்கள் தணிப்பு நீரின்றி, ஹைடிரஜன் வாயு சேர்ந்ததால் வெடித்தது ! விபத்து நேர்ந்த திரிமைல் தீவின் விளைவு களிலிருந்து ஜப்பான் அணுவியல் துறை நிபுணர்கள் என்ன பாடங்கள் கற்றுக் கொண்டார் என்று தெரியவில்லை ! என்ன செம்மைப்பாடுகளைத் தமது அணுமின் உலைகளில் நிறுவினர் என்பதும் ஆழ்ந்து அறிய வேண்டிய உளவுகள் !

அணு உலைகளின் சிதைவாலும், அசுரச் சுனாமியாலும் ஜப்பானியருக்கு விளைந்த பாதிப்புகள் (ஏப்ரல் 25, 2011)

புகுஷிமா பூகம்பச் சுனாமி விபத்தால் நேர்ந்த மரணங்கள், சிதைந்த நகரங்கள், வீடுகள், தொழிற்துறைகள் அவற்றால் ஏற்பட்டப் புலப்பெயர்ச்சிகள், இடக்கடத்தல், கதிரியக்கத் தீண்டல்கள் ஆகியவற்றை நோக்கினால் இந்த நிலநடுக்க விபத்து உலகப் பெரு விபத்துகளில் ஓர் உச்ச இடத்தைப் பெறுகிறது ! இந்தப் பேரிழப்பின் நிதி மதிப்பு சுமார் 235 பில்லியன் டாலர் என்று உலக வங்கி மதிப்பீடு செய்கிறது ! ஜப்பான் அரசாங்கம் இவற்றைச் சீராக்க 3 பில்லியன் டாலர் நிதித் தொகை ஒதுக்குத் திட்ட ஏற்பாட்டை வெளியிட்டுள்ளது.

ஏப்ரல் 25, 2011 தேதி வரை பூகம்பம், சுனாமி, கதிரியக்கத் தாக்குதலால் ஜப்பான் பகுதிகளில் நேர்ந்த முக்கியச் சீர்கேடுகள், இன்னல்கள் கீழே கொடுக்கப் பட்டுள்ளன :

1. ஜப்பான் தேசீயக் காவல்துறை அறிக்கைப்படி மரணம் அடைந்தவர் எண்ணிக்கை : 14,358. இன்னும் காணாமல் இருப்பவர் எண்ணிக்கை : 11,889.

2. பூகம்பத்தாலும், சுனாமியாலும், கதிரியக்கத்தாலும் இடங் கடத்தப்பட்டு தற்காலியப் பாதுகாப்பு இடங்களில் தங்கி இருப்போர் எண்ணிக்கை : 130,904.

3. புகுஷிமா அணு உலை விபத்தால் கதிரியக்கப் பொழிவிலிருந்து 20 கி.மீடருக்குள் அப்பால், 30 கி.மீடருக்குள் வசிக்கும் 136,000 பேர் அரசாங்க ஆணையால் புலப்பெயர்ச்சி ஆக்கப் பட்டுள்ளார்.

4. தொகூக்கு மின்சார வாரியத்தின் (Tohuku Electric Power Co) அறிவிப்புப்படி 12,485 வட ஜப்பான் இல்லங்களில் மின்சாரம் அனுப்பு வசதிகள் இல்லை.

5. ஐந்து நகர்ப் புறத்தில் குறைந்தது 79,000 இல்லங்களில் குழாய் மூலம் குடிநீர் அனுப்பு வசதிகள் முடங்கி உள்ளன என்று உடல்நல அமைச்சகம் அறிவித்துள்ளது.

6. குறைந்தது 95,100 வீடுகள் தகர்ந்து போயின, அல்லது சுனாமியால் இழுத்துச் செல்லப் பட்டன, அல்லது எரிந்து சாம்பலாயின என்று தெரிய வருகிறது.

7. புகுஷிமாவுக்கு அருகிலுள்ள கடல் நீரைச் சோதித்ததில் கதிரியக்க சீஸியம்-134 இன் அளவு பாதுகாப்பு அனுமதி நிலைக்கு மீறி 18,000 மடங்கு ஏறி விட்டதாக அறியப்படுகிறது.

8. புகுஷிமாவைச் சுற்றியுள்ள நிலவளம், நீர்வளம், பயிர்வளம் கதிரியக்கப் பொழிவுகளால் ஓரளவு தீண்டப்பட்டு பொது மக்களின் வேளாண்மை, தொழில்கள், ஊழியங்கள், உணவு வகைகள், பால்வளம், மீன்வளம் பாதிக்கப் பட்டுள்ளன. அவற்றின் மொத்த இழப்பீடுத் தொகை இப்போது முழுமையாகத் தெரியாவிட்டாலும், சுமார் 100 பில்லியன் டாலர் என்று பொருளாதார நிபுணர் மதிப்பீடு செய்கிறார்.

9. பூகம்பத்தாலும், சுனாமியாலும் நேர்ந்த இழப்புக்கள் மட்டும் 300 பில்லியன் டாலர் நிதித் தொகை எண்ணிக்கையை எட்டும் என்று அறியப் படுகிறது ! இதுவரை நேர்ந்த உலக இயற்கைத் தீங்குகளில் உச்ச நிலை இழப்பாக மதிப்பீடு செய்யப் படுகிறது !

10. ஜப்பானின் இந்தப் பேரிழப்புக்கு உதவி செய்ய இப்போது 146 உலக நாடுகள், 39 அகில நாட்டு ஆணையகங்கள் முன்வந்துள்ளன என்று ஜப்பன் வெளிநாட்டு அமைச்சம் அறிவித்திருக்கிறது.

11. புகுஷிமாவின் நான்கு அணுமின் உலைகளின் வெடிப்பும், கதிரியக்க வெளியேற்றமும், சுற்றுப் புறத்தில் வாழும் மக்களுக்கு அளித்த இடர்ப்பாடுகளையும் எடைபோட்டு அகில நாட்டு அணுவியல் துறைப் பேரவை (International Atomic Energy Agency – IAEA) விபத்து நிலை அளவை ஐந்திலிருந்து ஏழுக்கு உயர்த்திச் செர்நோபில் விபத்துக்கு நிகராக ஏற்றியுள்ளது !

12. சுனாமியால் பெருஞ் சேதமடைந்த புகுஷிமாவின் நான்கு அணுமின் உலைகளும் நிரந்தரமாய் முடக்கமாகிச் சுத்தமாக்கப் பட்டுச் சில ஆண்டுகளில் மூடப்பட்டுவிடும் ! அதனால் ஜப்பானில் மின்சாரப் பரிமாற்றம் 2720 MWe குறைந்து போய் சில இடங்களில் மின்வெட்டும், மின்தடையும் உண்டாகும். இந்த நான்கு அணுமின் உலைகளின் சிதைந்த எருக் கோல்கள் நிரந்தரமாய் நீக்கப்பட்டுக் கதிரியக்கத் தீண்டல் யாவும் துடைக்கப்பட்டுச் சுத்தமாக்க குறைந்து 10 அல்லது 15 ஆண்டுகள் ஆகலாம் !

ஜப்பானின் எதிர்கால மின்சக்தி உற்பத்தித் திட்டங்கள் (2011 மார்ச் 30) :

ஜப்பானுக்குத் தேவையான எரிசக்தியில் 80% பங்கை மற்ற நாடுகளிலிருந்து அது இறக்குமதி செய்ய வேண்டியுள்ளது. இப்போது இயங்கிவரும் 50 அணுமின் உலைகள் 30% மின்சக்தியைத் தொடர்ந்து பரிமாறி வருகின்றன.   2017 இல் அணுமின்சக்தி உற்பத்தி அளவு 40% ஆகவும், 2030 இல் 50% ஆகவும் உயரும் என்று முந்தைய திட்டப்படி எதிர்பார்க்கப் படுகிறது. ஜப்பான் இரண்டாம் உலகப் போரில் அணுகுண்டு வெடிப்பால் கதிரியக்கப் பாதிப்புகளில் பேரின்னல் உற்றாலும், நிலநடுக்கம், சுனாமி அடிப்புகள் நித்தியப் பேரிடர் கொடுத்தாலும், புகுஷிமாவின் நான்கு அணுமின் உலைகள் வெடித்துக் கதிரியக்கம் வெளியேறி மக்கள் பெரு வேதனைப் பட்டாலும், ஜப்பான் தேசத்துக்குத் தொடர்ந்து பேரளவில் மின்சக்தி உற்பத்தி செய்யத் தற்போது அணுசக்தியைத் தவிர எரிசக்தி வேறில்லை என்பது நாம் அறிந்து கொள்ளும் மெய்ப்பாடு ! 7.5 ரிக்டர் அளவுக்கு டிசைன் செய்த புகுஷிமா அணுமின் உலைச் சாதனங்கள். கட்டங்கள் 9 ரிக்டர் அளவுப் பூதப் பூகம்பத்தால் சிறிதளவு கூடச் சிதைவாக வில்லை என்பது இங்கே குறிப்பிடத் தக்கது. 30 அடி உயரச் சுனாமி அலைகளால் அணுமின் உலைகளில் சீர்கேடுகள் நிகழாமல் தடுப்பு அரண்களும், பாதுகாப்புச் சாதனங்களும் எதிர்கால ஜப்பானில் சுறுசுறுப்பாக உருவெடுக்கும் என்று நாம் நம்பலாம். அணுசக்தியால் ஓடும் ஜப்பானின் யந்திரச் சக்கரத்தை எல்லாம் பெரு நில நடுக்கமும், பேரலைச் சுனாமிகளும், கதிரியக்க அச்சமும் நிரந்தரமாய்த் தடுத்து நிறுத்திவிடும் என்று உலக மாந்தர் எதிர்பார்க்கக் கூடாது !

(தொடரும்)

***************

தகவல்:

1. IAEA Team to Report on Kashiwazaki Kariwa Nuclear Power Plant Examination (Aug 16, 2007)

2. Japan Earthquake Triggers Nuclear Plant (Transformaer) Fire

3. Earthquake Spills Radioactive Water at Japanese Nuclear Plant (July 17, 2007)

4 Nuclear Waste (Water) Leak Fear after Japan Quake By: Justin McCurry (July 18, 2007) Tokyo

5. Japan Earthquake Caused Nuclear Waste (Water) Spill

6. Japanese Earthquake Sparks Nuclear Plant (Transformer) Fire By: AP (July 16, 2007)

7. Japan Nuclear Power Plants and Earthquakes (August 2007)

8. Herald Tribune : Earthquake Stokes Fears Over Nuclear Safety in Japan By Martin Facker (July 24, 2007)

9. Earthquake Zone : Earthquakes & Nuclear Safety in Japan [Citizen Nuclear Information Center (CNIC)] By Philip White International Liaison Officer CNIC.

10. Four Categories of Buildings & Equipment for Earhtquake-resitant Design of Nuclear Power Plants

11. Safety of Nuclear Power Reactors, [www.uic.com.au/nip14.htm] (July 2007)

12. Nuclear Power Plants & Earthquakes [www.uic.com.au/nip20.htm] (Aug 2007)

13. IAEA Issues Report on Kashiwasaki-Kariwa Nuclear Plant   (August 17, 2007)

14. Third IAEA Report on Kasiwasaki-Kariwa Nuclear Plant (Jan 29, 2009)

15. Efforts toward Enhansing Scismic Safety at Kasiwasaki-Kariwa Nuclear Power Station (Nov 14, 2009)

16. Backgrounder on Earthquakes & Nuclear Power in Japan   (March 11, 2011)

17. Japan Nuclear Industry is in Meltdown [Sep 28, 2002]

18. Monju Fast Breeder Startup (Feb 10, 2010)

19. Nuclear {Power in Japan (March 30, 2011)

20. Russia & India Report – Lessons of Fukushima – Expert Opinions. (March 28, 2011)

20 (a) Macleans Magazine – Japan Fearing the Fallout (March 28, 2011)

21. Monju Fast Breeder Restarts after 14 years of Suspension (May 12, 2010)

22. Fukushima & Chernobyl Compared (April 11, 2011)

23. World Nuclear Association – Nuclear Power in Japan (April 2011)

24. Fukushima : What Happened and What Needs to be done ? (April 10, 2011)

25. Japan Fukushima Damaged Nuclear Reactors’ Status (April 13, 2011)

26. Setbacks at Japan (Fukushima) Nuclear Plants (May 12, 2011)

27. http://www.vox.com/2014/8/1/5958943/nuclear-power-rise-fall-six-charts [January 30, 2015]

28. http://www.usatoday.com/story/news/world/2015/03/09/japan-tsunami-radiation-fourth-anniversary-fukushima/24254887/ [March 11, 2015]

29. http://www.bbc.com/news/world-asia-33858350 [August 11, 2015]

30. http://fukushimaupdate.com/ [August 11, 2015]

31. https://en.wikipedia.org/wiki/Nuclear_power_in_Japan [August 11, 2015]

32. http://www.stuff.co.nz/world/asia/71034742/japan-restarts-nuclear-reactor-4-years-after-fukushima-disaster [August 11, 2015]

33. http://www.vox.com/2015/8/12/9143265/japan-nuclear-restart-fukushima [August 12, 2015]

************************
S. Jayabarathan (jayabarathans@gmail.com) August 16, 2015
http:jayabarathan.wordpress.com/

Attachments area

Preview YouTube video Fukushima update 2015

Fukushima update 2015

Preview YouTube video Japan Tsunami / Earthquake 2011 – New Footage Inside Car

Japan Tsunami / Earthquake 2011 – New Footage Inside Car

August 16, 2015
நாகை அம்பாள் நீலாயதாக்‌ஷி பிரார்த்தனை பாடல்
நாகை வை. ராமஸ்வாமி

உ

ஒம் ஶ்ரீ சாய்ராம்

அன்பே, அமுதே, அகிலலோக நாயகி நீலாயதாக்ஷியே

வித்திலே விருட்சம் வைத்தாய் மேகத்தில் வெள்ளம் வைத்தாய்

என்னுள்ளே நின்னை வைத்தாய் கருணாகடாக்ஷி காரோண நாயகியே

அன்பே, அமுதே, அகிலலோக நாயகி நீலாயதாக்ஷியே

அருளே, அழகே, ஆதிஅந்தமில்லா அனந்தமே

அசைந்தாடும் மயிலழகன் அம்மையே ஸ்ரீசக்ரவாஸினியே

சப்த சாகரமும் சப்த ஸ்வரங்களும்

சப்த கன்னிகைகளும் சப்த ரிஷிகளும்

பஞ்ச பூதம் பணிந்து சந்ததம் நின் துதி பாடிட

பஞ்சமின்றி அருளும் மந்தஹாஸ முகம் மகிழும் வேளை

சுந்தர வதனமும் கமலத்திருவடியும் நெஞ்சத்தே வந்தமர

நின் திருவடி போற்றி என்றும் மகிழ்ந்திட

அருளிடுவாய் மலரடி தரிசனம் அடைக்கல சரணம்

அன்பே, அமுதே, அகிலலோக நாயகி நீலாயதாக்ஷியே

35/2015 நாகை வை. ராமஸ்வாமி
1. Listen to Nagai Sri Neelayadakshi Ambal Devotional songs MUSIC INDIA ON LINE
2. http://mio.to/album/Kalakkad+R.+Srinivasan%2C+Kalakkad+R.+Thyagarajan%2C+Lata+Ramchand%2C+Praveena+Avanthikrishan/Nagai+Sri+Neelayadakshi+Ambal+Devotional+Songs+-+Vol+1
3. RADIOSAI http://www.ecatering.irctc.co.in/
4. Rcom http://play.raaga.com/tamil/album/Nagai-Sri-Neelayadakshi-Ambal-Devotional-Songs-Vol-1-songs-TD02593
August 16, 2015
கேசவ் வண்ணம் – கிரேசி எண்ணம்

கண்ணன் -கேசவ் -காந்தி….
—————————————————
சுதந்திர தின நல்வாழ்த்துக்கள்….

‘’கண்ணனின் கன்றாக, கஸ்தூரி பாயன்னை,
அண்ணலின் காலுக்(கு) அபிஷேகம்: -வண்ணமுற,
தேசப் பிதாவையும், தாமோ தரனையும்,
கேசவ் இணைப்பு கிளாஸ்’’….கிரேசி மோகன்….

August 15, 2015
இந்திய சுதந்திரதின வாழ்த்துக்கள்

இருளில்
வந்ததோர் விடியல்
இந்திய தேசத்தின்
சுதந்திர விளைச்சல்

முடிந்ததோர்
ஆங்கிலேய ஆதிக்கம்
பிறந்ததோர்
பாரத விடுதலை

நடந்ததோர்
அறப்போர் அன்று
அண்ணல் காந்தியின்
அஹிம்சை வழியில்

துணிந்ததோர்
சுபாஷ் சந்திரபோஸ்
புரிந்ததோர்
வீரமிகு விடுதலைப் போர்

புனைந்ததோர்
வீரமிகு கவிதைகள்
மகாகவி பாரதியின்
விடுதலைக் கீதங்கள்

ஓட்டியதோர்
கப்பல் சுதேசமாய்
சிங்கத்தோன்
கப்பலோட்டிய தமிழனாம்

களைந்ததோர்
உயிரையாம் இளைஞன்
வாஞ்சிநாதன் எனும்
வீரமிகு தமிழன்

கனவிலோர்
சுதந்திரம் கண்டவன்
பாரதியெனும் எம்
தமிழ் முப்பாட்டன்

சீறியதோர்
சிங்கமென பாளையகோட்டையில்
கட்டபொம்மன் எனும்
காளையாம் பாரதத்தில்

கூவியோர்
அறைகூவ;ல் விடுத்த
அமரர் கலாம் தனின்
கனவு நனவாகு,ம்

புதியதோர்
உணர்வுடன் வளர்ந்திடும்
பாரதம் ஆசியாவின் ஒளியாய்
உயர்த்திடுவீர் பெருமை தனை

வலியதோர்
வல்லரசாக மாறிடும்
வழிதனில் வளரட்டும்
சுதந்திர இந்தியா

வளர்ந்ததோர்
இளைய பாரத இளைஞர்
பாரின் பல நிறுவனங்களின்
பாரிய தலைவர்களாய்

மகிழ்ந்ததோர்
தமிழன் இவன் இதயமே !
மகிழ்வுடன் வாழ்த்திடுவேன்
என் இனிய இந்திய இதயங்களை

விழித்ததோர்
சமுதாயம் இதுவென நாட்டில்
இல்லாமை இல்லாமல் ஆக்கிட
முனந்தோர் சாதனைகள் புரிந்திடுக

வாழ்த்துதோர்
இந்திய சுதந்திரதின
வாழ்த்துக்கள் கூறி
வாழிய வாழிய
காலம் காலமாய் என்றும்
கலாமின் கனவுகளோடு

வாழ்த்துக்களோடு
சக்தி சக்திதாசன்

August 15, 2015
வல்லமையின் சுதந்திரத் திருநாள் நல்வாழ்த்துகள்!

பவள சங்கரி

ஒரு முறை நான் வாரனாசியில் இருந்தபோது, ஒரு பெரிய தொட்டி நிறைய நீர் ஒரு புறமும் மற்றொருபுறம் நெடிதுயர்ந்த சுவரும் இருந்த ஒரு இடத்தைக் கடந்து சென்று கொண்டிருந்தேன். நிறைய குரங்குகள் வாழ்ந்து கொண்டிருந்த இடம் அது. வாரனாசியின் குரங்குகள் மிகப்பெரும் காட்டுமிராண்டிகளாகவும், சில நேரங்களில் கடுகடுப்பாகவும் இருக்கக்கூடியவை. இப்போது என்னை தங்கள் சாலை வழியாக கடந்து செல்ல அனுமதிக்கக்கூடாது என்று மனதில் ஏற்றிக்கொண்டதால், அவைகள் அலறிக்கொண்டும், கிறீச்சிட்டுக்கொண்டும், நான் அங்கு நடந்தபோது என் பாதங்களை பிராண்டிக்கொண்டும் இருந்தன. அவைகள் மிக நெருக்கமாக வந்து என் மீது மோத எத்தனித்தபோது நான் ஓட ஆரம்பித்தேன். ஆனால் நான் எவ்வளவு வேகமாக ஓடினேனோ அதைவிட வேகமாக ஓடி வந்த அந்த குரங்குகள் என்னை கடிக்க ஆரம்பித்தன. என்னால் தப்பிக்கவே இயலாது என்ற நிலை வந்தபோது, ஒரு வழிப்போக்கர் என்னை அழைத்து, “அந்தக் காட்டுமிராண்டிகளை எதிர்கொள்” என்றார். நான் திரும்பி நின்று அந்த குரங்குகளைப் பார்த்தேன், அவைகள் பின்னால் தள்ளிச்சென்றதோடு இறுதியாக ஓடியும் மறைந்தது.

இதுதான் நம் வாழ்க்கைக்கான பாடம் – கொடூரங்களை எதிர்கொள்ளுங்கள், துணிச்சலுடன் எதிர்கொள்ளுங்கள். அந்தக் குரங்குகளைப் போன்று நம்முடைய வாழ்க்கைத் துயரங்களும் நாம் அதன்முன் துணிந்து நின்றால் அவைகள் புறமுதுகிட்டு ஓடும். நமக்கு சுதந்திரம் வேண்டுமென்றால், அதனை எதிர்கொண்டு வெற்றியடையும் இயல்பினால் மட்டுமே முடியுமே தவிர ஒருபோதும் அதனை விட்டு விலகி ஓடுவதால் அல்ல. கோழைகள் ஒருபோதும் வெற்றியைச் சந்திப்பதில்லை. நம் அச்சம். துன்பம் மற்றும் அறியாமை என அனைத்தும் நம்மை விட்டு விலகி ஓட வேண்டுமென்று நினைத்தால் அவைகளை எதிர்த்துப் போராடவேண்டும்.

சுவாமி விவேகானந்தர்

August 15, 2015
“வான்புகழ் கொண்ட பாரத ரத்தினம்”– கர்மவீரர் காமராசர்!

— ஜெயஸ்ரீ ஷங்கர்.

பகைவர்களும் மதிக்கும் பண்பாளரான காமராசரின் தலைமையில் தமிழகம் கண்ட வெற்றிகரமான நல்லாட்சி ‘பொற்குடத்தில்’ வைத்துப் பாதுகாப்பதைப் போல இணையத்தில் கல்மேல் எழுத்துக்களாக காலத்துக்கும் மாறாமல் இருக்குமாறு பதிவுகளாகி உள்ளன. ஆடம்பரமில்லா எளியவாழ்கை வாழ்ந்தவரை வெறும் ஆயிரம் வார்த்தைகளுக்குள் எளிமையாகவே எழுதத்தான் இயலுமா?

விருதுப்பட்டியில் குமாரசாமி நாடார்,சிவகாமி அம்மாள் தம்பதியர்க்கு, ஜூலை 15-ஆம் தேதி 1903 ஆம் ஆண்டில் உதித்த ‘வரலாற்று நாயகன்’. தன் தமிழகத்திற்குத் தாரை வார்த்துக் கொடுக்கவென்றே, ‘சிப்பிக்கு- நித்திலமாக, குலதெய்வம் அன்னை ‘காமாட்சி’யின் அருளால் ‘காமராசர்’ வந்து பிறந்திருக்கிறார் என்று அந்த அன்னை சிவகாமியம்மாள் அப்போது நினைத்திருக்க மாட்டார்.

ஆறாம் வகுப்பிற்கு மேல் தன்னால் படிக்கமுடியாமல் போயிற்றே என்கின்ற தீராத வருத்தம் அவரது ஆழ்மனத்தை வாட்டியது. அதனாலேயே உலக விஷயங்களைக் கற்றுக்கொள்ளத் தவறாமல், ஓய்வு நேரங்களில் பற்பல பத்திரிகைச் செய்திகளைப் படித்து நாட்டு நடப்பை நன்கு அறிந்திருந்தார். இளவயதில் அவர் கேட்ட பொதுக்கூட்டங்களே பிற்காலத்தில் அவரை சுதந்திரப் போராட்ட வீரராக மாற்றியது,

அந்நியர்களின் ஆட்சியில் இந்தியா அடிமைபட்டுக் கிடந்த காலகட்டம். ‘வந்தேமாதரம்’ ஒன்றே வீரர்களின் சுவாசமாக, உயிரின் வேதமந்திரமாகக் கொண்ட சுதந்திரப்போராட்ட இயக்கங்களில் காமராசரும் கலந்துகொண்டு காந்தியத்தைப் பரப்பினார்.

ஜாலியன் வாலாபாக் படுகொலை பற்றிய செய்தி அறிந்தவர், மனம் கலங்கினார். தனது அரசியல் வழிகாட்டியாக தலைவர் ‘சத்தியமூர்த்தி’யின் தொண்டராகி காங்கிரஸ் பேரியக்க உறுப்பினராகி முழுநேர தேசப்பணிக்குத் தன்னையே அர்ப்பணித்தார். கள்ளுக்கடை மறியல்,அந்நியத்துணிகள் பகிஷ்காரம், கொடிப் போராட்டம், சைமன் கமிஷன் எதிர்ப்பு என பல போராட்டங்களில் கலந்து கொண்டு கிட்டத்தட்ட ஒன்பதரை ஆண்டுகள் சிறைவாசம் பெற்றார்.

சிறையிலிருந்த நேரங்களில் , மனத்தையும் அறிவையும் மேன்மையுறச் செய்யும் பல இலக்கிய நூல்களையும் பல மொழிகளையும் கற்றுத் தேர்ந்தார். அன்னபட்சி முத்தை உண்பதைப்போல் காமராசர் தான் படித்த இலக்கியங்களில் வாழ்வியல் வழிமுறைகளை விழுங்கி அதை வழுவாது வாழ்விலும் கடைபிடித்தார்.

இந்தியா விடுதலை அடைவதற்கு முன்பே, சத்தியமூர்த்தி அவர்கள் இறந்துவிட்டதால், காமராசர் இந்தியா சுதந்திரம் அடைந்த பிறகு, முதலில் தலைவர் சத்தியமூர்த்தி வீட்டிற்குச் சென்று தேசியக்கொடியை ஏற்றினார்.

பல சோதனைகளையும் வேதனைகளையும் கடந்து தான் நமக்கு விடுதலைக் கிடைத்ததென்பதை தனது சொந்த அனுபவத்தால் கண்ட காமராசர், சுதந்திரத்தின் அருமையை நன்கு உணர்ந்தவர் ,அதைப் பேணிக் காக்க வழிவகுத்தார்.

“ஒன்றைச் செய்ய விரும்புகிறபோது அதை செய்வதற்காகவே இருக்கிறோம் என எண்ண வேண்டும்” எனும் தொலைநோக்குச் சிந்தனையோடு காமராசர் திருமணமே செய்து கொள்ளாமல் நாட்டுக்காக தன்னையே அர்ப்பணித்தார்.

அன்பு, கருணை, உண்மை, நேர்மை, பொறுமை, சமயோசிதம், விவேகம், நியாயம், துணிவு, தியாகம் என்ற மனிதாபிமான நற்பண்புகள் நிறைந்தவராகத் திகழ்ந்தார். காலத்தை உயிர் போல மதித்தவர். நேரம் வீணாகக் கூடாது, காசு விரயமாக்கக் கூடாது என்ற கொள்கைகளைக் கொண்டவர்.

அண்ணல் காந்தியடிகளின் ‘செய் அல்லது செத்து மடி’ எனும் தாரக மந்திரத்தையும், தனக்குப் பிடித்த பாரதியாரின் கனவை நனவாக்கவும் , திருக்குறளின் அறத்தையும், தாகூர் அவர்களின் வீரத்தையும், விவேகானந்தரின் விவேகத்தையும், ஔவையார், நாலடியாரில் நல்லன எல்லாமுமாக காமராசரின் மனசாட்சி மேலோங்கி ஆட்சிபுரிந்ததால் தமிழகத்தில் அவரது ஆட்சி ‘பொற்கால ஆட்சியாக’ அமையப் பெற்றது.

காமராசர் தமிழக முதலமைச்சராக பதவி ஏற்பதற்கு முன், தலைவர் சத்தியமூர்த்தியின் வீட்டுக்குச் சென்று அவருடைய படத்திற்கு மாலை அணிவித்து வணங்கி, தன்னுடைய பணியைத் தொடர்ந்தார். அவர் , தன்னுடைய அமைச்சரவையை மிகவும் வித்தியாசமாகவும் வியக்கும்படியும்,தன்னை எதிர்த்து போட்டியிட்டவர்களையே அமைச்சராக்கினார்.

கடுமையான உழைப்பே மக்களை வறுமையில் இருந்து மீட்கும் என்றும் சமதர்ம சமுதாயம் மலர, கல்வியும், உழைப்புமே கண்கள் போன்றது எனவும் தீர்மானித்தார்.

பொருளாதாரத்தில் பின்தங்கியிருந்த தமிழகத்தை உயர்த்த அவருக்கு ஏராளமான வாய்ப்புகளும் காத்திருந்தது. அதைச் சரியாக பயன்படுத்திக் கொண்டு தான் கொண்ட கொள்கையில் வெற்றி பெற அயராது உழைத்தார். நேர்மையும் எளிமையும் அவரைக் கவசமாகவே காத்தது.

தன்னலமற்ற தலைவர் காமராசருக்கு பின்தங்கியவர்கள் , ஏழைகள் , படிக்காத பாமரர்களின் மேல் அளவு கடந்த பாசம் கொண்டவர். அந்த அன்பை வார்த்தைகளில் சொல்லாமல் செயலில் காட்டினார். இலவசத் திட்டங்கள் எதையும் ஏழைகளுக்கு கொடுக்காமல் அவர்கள் குடும்பம் மற்றும் சமூகம் முன்னேற என்ன வழியோ அதை தனது ஆட்சியில் செய்தார்.

முதல்வரான பின்னர், தன்னுடைய முதல் பணியாக ராஜாஜி கொண்டுவந்த குலக்கல்வித் திட்டத்தினை கைவிட்டு, அவரால் மூடப்பட்ட 6000 பள்ளிகளைத் திறந்தார் . மேலும், 17000த்திற்கும் மேற்பட்ட பள்ளிகளைத் திறந்தோடு மட்டுமல்லாமல், பள்ளிக்குழந்தைகளுக்கு “இலவச மதிய உணவு திட்டத்தினை” ஏற்படுத்தி, இலவச சீருடையும் கொடுத்து,ஏழை எளிய மக்களின் கல்வியில் பெரும் முன்னேற்றத்தினை ஏற்படுத்தினார். இந்திய அரசியலில் தலைசிறந்த பணியாகக் கருதப்பட்ட இந்தத் திட்டம், உலக அளவில் பாராட்டப்படும் திட்டமாகவும் அமைந்தது.

குஜராத் பல்கலைக் கழகம் கல்வித்துறையில் செயற்கரிய சாதனைகள் செய்தமைக்காக “டாக்டர்” பட்டம் தர காமராசரைத் தேடி வந்தார்கள்.
” டாக்டர் பட்டமா? எனக்கா? என்ன பெரிய சாதனை செஞ்சுட்டேன்னு இந்த முடிவெடுத்தீங்க. நாட்டில் எத்தனையோ விஞ்ஞானிகள், மேதாவிகள் இருக்கிறாங்க… அவுங்களை தேடிப்புடுச்சு இந்த பட்டத்தை குடுங்க. எனக்கு வேண்டாம்… நான் ஒத்துக்கொள்ளவே மாட்டேன்… போய்வாங்க” என்று சொல்லி அனுப்பிவிட்டார். டாக்டர்.ஐன்ஸ்டீன் ” இப்படிப்பட்ட ஒரு மாமனிதர் இந்த நிலவுலகத்தில் ஊனோடும் உதிரத்தோடும் உலவினார் என்பதை வருங்காலச் சந்ததியினர் நம்பவே மறுப்பர்” என்றார்.

“இருக்கு, இல்லைங்கிறதைப்பத்தி எனக்கு எந்தக்கவலையும் கிடையாதுன்னேன். நாம செய்றது நல்ல காரியமா இருந்தா போதும். பக்தனா இருக்கறதைவிட யோக்கியனா இருக்கணும். அயோக்கியத்தனம் ஆயிரம் பண்ணிகிட்டு கோயிலுக்குக் கும்பாபிஷேகம் பண்ணிட்டா சரியாப்போச்சா…?” அடுத்த மனுஷன் நல்லாருக்கணும்கிறது தான் வழிபாடு. ஏழைகளுக்கு நம்மாலான உதவிகளைச் செய்யணும்கிறது தான் பிரார்த்தனை. இதுல நாம சரியா இருந்தா… தெய்வம்னு ஒண்ணு இருந்தா அது நம்மள வாழ்த்தும்னேன்…!” அதுதான் அவரது இறை நம்பிக்கை.

“வடக்கு வாழ்கிறது! தெற்கு தேய்கிறது” என்று தி.மு.கழகத்தினர் பிரசாரம் செய்தனர். அதிலும் உண்மை இருப்பதை காமராஜரும் உணர்ந்துகொண்டார். எனவே, தமிழ்நாட்டில் பெரிய தொழிற்சாலைகளையும், அணைகளையும் அமைக்க வேண்டும் என்று முடிவு எடுத்தார். மத்திய அரசிடம் வற்புறுத்தி, ஐந்தாண்டு திட்டங்களில் தமிழகத்திற்கு அதற்கான நிதியை ஒதுக்கும்படி செய்தார்.

காமராசர் கல்வித் துறையில் மட்டுமல்லாமல், தொழில்துறை, நீர்பாசனத் திட்டங்கள், மின் திட்டங்கள் போன்றவற்றிலும் முன்னேற்றத்தை ஏற்படுத்தினார். தமிழகத்தில் தொழில்துறைகளை வளர்ப்பதை குறிக்கோளாகக் கொண்டு, பல்வேறு நடவடிக்கைகளை செயல்படுத்தி வேலை வாய்ப்பை உயர்த்தினார்.

‘நெய்வேலி நிலக்கரித் திட்டம்’, ‘பெரம்பூர் ரயில் பெட்டி தொழிற்சாலை’, ‘திருச்சி பாரத் ஹெவி எலக்ட்ரிக்கல்ஸ்’, ‘கல்பாக்கம் அணு மின்நிலையம்’, ‘ஊட்டி கச்சா ஃபிலிம் தொழிற்சாலை’, ‘கிண்டி டெலிபிரிண்டர் தொழிற்சாலை’, ‘மேட்டூர் காகிதத் தொழிற்சாலை’, ‘சேலம் இரும்பு உருக்கு ஆலை’, ‘பாரத மிகு மின் நிறுவனம்’, ‘இரயில் பெட்டித் தொழிற்சாலை’, ‘நிலக்கரி புகைப்படச் சுருள் தொழிற்சாலை’ என மேலும் பல தொழிற்சாலைகள் காமராஜரால் உருவாக்கப்பட்டன. இதைத் தவிர, ‘மேட்டூர் கால்வாய்த்திட்டம்’, ‘பவானி திட்டம்’, ‘காவேரி டெல்டா வடிகால் அபிவிருத்தி திட்டம்’, ‘மணிமுத்தாறு, அமராவதி, வைகை, சாத்தனூர், கிருஷ்ணகிரி, ஆரணியாறு போன்ற நீர்பாசன திட்டங்களையும்’ ஏற்படுத்தினார். காமராசர் ஆட்சியின் இறுதியில், தமிழகம் தொழில் வளத்தில் இரண்டாம் இடத்தைப் பிடித்தது.

தமிழ்நாட்டின் இரட்சகர், கல்வி வள்ளல் என்று தந்தை பெரியாரால் பாராட்டப் பட்ட பெருந்தலைவர் காமராசர், மக்களாட்சியின் மாண்பிற்குச் சிறந்த எடுத்துக் காட்டாக விளங்கினார். தமிழகத்தில் பஞ்சம் இல்லையெனும் அன்னக்கொடியை பறக்கவைத்தார் பெருந்தலைவர்.

‘முதல்வர் இட ஒதுக்கீடு’ என்ற பிரிவில் மருத்துவ கல்லூரியில் 5 இடங்களுக்கு 50க்கும் மேற்பட்ட விண்ணப்பங்கள் வந்திருந்த நிலையில், பெற்றோர் கையெழுத்து இருந்த இடத்தில ‘கைநாட்டு’ வைத்திருந்த விண்ணப்பங்களை தேர்வுசெய்து படிக்காத பாமரர்களின் பிள்ளைகள் மருத்துவம் படித்து முன்னேறட்டும், அப்போதுதான் எதிர்காலத்தில் அவர்களின் வாரிசுகள் படிப்பறிவு பெறுவர். இதுபோல் ஒவ்வொரு குடும்பமும் முன்னேறினால் நாடே முன்னேறும் என்றார்.

மூன்று முறை தமிழக முதலமைச்சராக தேர்தெடுக்கப்பட்ட காமராசர் அவர்கள், பதவியை விட தேசப்பணியும், கட்சிப்பணியுமே முக்கியம் என கருதி “கே-ப்ளான் ” எனப்படும் திட்டத்தினை” கொண்டுவந்தார். அதன்படி, கட்சியின் மூத்த தலைவர்கள் பதவிகளை, இளைஞர்களிடம் ஒப்படைத்துவிட்டு, கட்சிப் பணியாற்ற வேண்டும் என்பதே நோக்கமாகும். அதன் பேரில் முதலமைச்சர் பதவியைத் துறந்த காமராசர் பொறுப்பினை பக்தவத்சலத்திடம் ஒப்படைத்துவிட்டு, தில்லிக்குச் சென்றார்.

பிரதமர் நேரு,உயிரோடு இருப்பவர்களின் சிலையைத் திறந்து வைப்பது சரியல்ல என்ற கருத்தைக் கொண்டிருந்தாலும்,பெருஞ்சாதனையாளரைப் பொறுத்தமட்டில், விதிவிலகில்லை என்பதால் , காமராசரின் சிலையைத் திறந்து வைக்கிறேன்’ என்று காமராசரைப் புகழ்ந்தார். விழாவில் காமராசரும் கலந்துகொண்டார்.

ஒன்பதரை ஆண்டுகள் முதலமைச்சராகச் விளங்கிய காமராசர், அப்பதவியைத் புளியம்பழம் ஓட்டில் ஒட்டாதது போல் உதறிவிட்டார். நேரு மறைந்தபோது, லால்பகதூர் சாஸ்திரியை பிரதமராக்கி அவரும் மறைந்தபோது, திருமதி இந்திராகாந்தியை பிரதமராக்கி, ‘கிங் மேக்கர்’ என்ற பெருமையடைந்தார்.

காமராசர் ரஷியப் பயணத்தின் போது மாஸ்கோ வரவேற்பில்,பாரதியின் ‘ஆகா வென்றெழுந்துது பார் யுகப் புரட்சி’ என்ற பாடலைப் பாடி ரஷிய மக்களின் பாராட்டுக்களைப் பெற்றார்.

இந்திய காங்கிரசு தலைவர்களுள்ளே, சிறந்த இராஜதந்திரி காமராசர் என்று பாரதம் முழுவதும் பாராட்டும் புகழ்நிலைக்கு உயர்ந்த முதல் தமிழர் காமராசரே ஆவார்.

“எந்த நேரத்திலும் எந்த நிலையுலும் நான் ஒரு ஏழை இந்தியனாகவே இருக்க விரும்புகிறேன்” என்று கூறி அதன்படி ஆடம்பரம் இல்லா எளியவாழ்க்கை வாழ்ந்தவர் காமராசர். கர்மவீரர், புடம்போட்ட தங்கமல்ல.தன்னைத்தானே பட்டை தீட்டிக்கொண்ட நல்வைரம்.

தமிழகத்தில் ‘கள்ளுக்கடை’யைக் கண்ட காமராசர் கண்ணீர் விட்டழுதார், நாடு இப்படி நாசமாப்போச்சே என்று மனமுடைந்தார்.

.உண்மையை உரக்கப் பேசியவர், 1975 ஆம் ஆண்டு காந்தி ஜெயந்தியன்று காமராசர் என்கின்ற பெரும் தூண் தான் வந்த வேலை முடிந்ததென்று எண்ணித்தானோ , இறுதியாக ‘விளக்கை அணைத்துவிட்டுப் போ’ என்று சொல்லிப் படுக்கையில் சாய்ந்தவர் பின்பு எழுந்திருக்கவேயில்லை.

இந்திய அரசின் மிக உயரிய விருதான “பாரத ரத்னா” விருது மத்திய அரசால் அவரது அழியாத ஆன்மாவுக்கு வழங்கப்பட்டது.

காமராசரின் கொள்கைகளைப் பின்பற்றியே அவருக்கு நிகரான டாக்டர். அப்துல்கலாம் சமீபத்தில் நம்மை மீளாத்துயரில் ஆழ்த்தி மறைந்தார்.

இப்போது தமிழகத் தராசு தனது இரண்டு தட்டுக்களையும் இழந்த சோகத்தில், நீதிமுள்ளும் சாயுமோ?

இளையசமுதாயமே, இவர்களைப் படித்தாவது வாழப்பழகுங்கள்..!

August 15, 2015
கர்மவீரர் காமராசர் கட்டுரைப் போட்டிக்கான கால அவகாசம் நீட்டிப்பு!

அன்பினிய நண்பர்களுக்கு,

ஒரு மகிழ்ச்சியான செய்தி. வாசகர்கள் மற்றும் படைப்பாளர்களின் விருப்பத்திற்கிணங்க கட்டுரைப் போட்டிக்கான கட்டுரைகள் பெறக்கூடிய கடைசி நாள் 15.08.2015 லிருந்து 31.08.2015 வரை நீட்டிக்க முடிவு செய்திருக்கிறோம். வாழ்த்துகள் நண்பர்களே.

வல்லமை மின்னிதழும் கவியரசு கண்ணதாசன் தமிழ்ச் சங்கமும் இணைந்து வழங்கும் கர்மவீரர் காமராசர் கட்டுரைப் போட்டி

வணக்கம். அன்னை சிவகாமி பெற்றெடுத்த தமிழ்ச் சிங்கம்.. பொற்கால ஆட்சியை நடத்திக் காட்டிய தலைவர்! தர்மமே மானிடப் பிறப்பெடுத்துத் தரணியிலே வந்துதித்து ஏழைகளைக் காத்து நின்றதென்றால் காமராசருக்கே அது சாலப் பொருந்தும்.

நம் தமிழ் நாட்டில் இலட்சோப லட்சம் மக்கள் கல்விச்செல்வம் பெற்றுத் திகழ்வதற்கு காமராசர் ஒருவரே காரணம் என்பதை மறுக்க இயலாது. எளிமைக்கு இவர், இனிய எடுத்துக்காட்டு! கருப்புத் தங்கம்.. காங்கிரஸ் பேரியக்கத்தில் மாநிலத் தலைவர் – இந்திய தேசிய காங்கிரசின் தலைவர்…. இரண்டுமுறை இந்தியாவின் பிரதம மந்திரிகளை நிர்மாணித்த கிங் மேக்கர்! தன்னிகரில்லாப் பெருந்தலைவர்! ஈடில்லா உழைப்பாளி! மக்களுக்காகவே வாழ்ந்து மக்களுக்காகவே தியாக வாழ்வேற்று மறைந்த மா மனிதர் இவர் என்பதை இவரின் இறுதி ஊர்வலத்தில் கூடிய கூட்டம் சாட்சி சொன்னது!

அந்த நன்றிப் பெருக்கோடு உளம் கனிந்து அத்திருமகனாரை நினைவில் நிறுத்தும் பொருட்டு, உலகெங்கும் வாழும் தமிழர்கள் பலரும் பங்கேற்க, “கர்மவீரர் காமராசர்” என்னும் கட்டுரைப் போட்டியை அறிவிக்கிறோம். போட்டியில் பங்கேற்கும் கட்டுரைகள், வல்லமை மின்னிதழில் வெளியாகும். வெற்றி பெறும் சிறந்த படைப்புகளுக்குப் பரிசு உண்டு. தேர்வு பெறும் கட்டுரைகள், நூல் வடிவம் பெறும்.

இக்கட்டுரைப் போட்டியின் நடுவர் பொறுப்பினைத் தமிழறிஞரும் சிறந்த சொற்பொழிவாளரும் காமராசர் அவர்களைப் பற்றி நன்கு அறிந்தவரும் பண்பட்ட அரசியல்வாதியுமான தமிழருவி மணியன் ஏற்றுள்ளார். தமிழருவி மணியன் அவர்களுக்கும் இந்தக் கட்டுரைப் போட்டியை முன்மொழிந்த கவிஞர் காவிரிமைந்தன் அவர்களுக்கும் நமது நன்றிகள்.

15.07.2015, காமராசர் பிறந்த இந்த நன்னாளில் இந்தக் கட்டுரைப் போட்டியை நடத்துவதில் பெருமை கொள்கிறோம். படைப்பாளர்கள், எழுத்தாளர்கள் அனைவரும் திரளாகப் பங்கேற்று, பரிசுகளை வெல்ல அழைக்கிறோம்.

உங்கள் கட்டுரையை யூனிகோடில் 1000 வார்த்தைகளுக்கு மிகாமல் எழுதி, 15.08.2015க்குள் vallamaieditor@gmail.com என்ற முகவரிக்கு அனுப்ப வேண்டுகிறோம்.

பரிசுத் தொகை – முதல் பரிசுகள் மூன்று …. ரூ.1000 வீதமும்

இரண்டாம் பரிசுகள் இரண்டு ரூ.750 வீதமும் மற்றும் மூன்றாம் பரிசுகளாய் மூன்று ரூ.500 வீதமும் வழங்கப்படும்! (மொத்தப் பரிசுகள் – ரூ.6 ஆயிரம்)

மேற்கண்ட பரிசுகளைத் தவிர, பங்கேற்கும் அனைத்துக் கட்டுரைகளும் பரிசீலித்து, தகுதியுள்ள படைப்புகள் நூல் வடிவம் பெறும் என்பதையும் மகிழ்ச்சியுடன் தெரிவிக்கிறோம்!

ஒருவரே ஒரு கட்டுரைக்கு மேல் அனுப்பலாம்; எந்தத் தடையும் இல்லை..

கட்டுரைப் போட்டி முடிவுகளைப் பொறுத்தவரை, நடுவரின் தீர்ப்பே இறுதியானது.

போட்டியில் அனைவரும் பங்கேற்று, பரிசுகளை வெல்லுமாறு அன்போடு அழைக்கிறோம். வாழ்த்துகள் நண்பர்களே.

August 15, 2015