Month: April 2016

திருமந்திரம் தொடர் ….1

பா.மஞ்சுளா

திருமந்திரம்

திருமூலரின் திருமந்திரம் பன்னிருதிருமுறையில் பத்தாம் திருமுறை தமிழர்களுக்கு முத்தான பொது மறை இது ஒன்பது தந்திரங்களையும் 3047,பாடல்களையும் கொண்டது . வருடத்துக்கு ஒரு பாடல் வீதம் மூவாயிரம் பாடல்களைப் பாடினார். இவரது பாடல்களை திருஞானசம்பந்தரும், திருநாவுக்கரசரும் கோயில் கொடிமரத்தின் கீழே கண்டெடுக்கப்பட்டதாக கூறுவர்.சித்தர் மரபில் வந்த திருமூலர் உடம்பைக் கோயில் என்று பாடிய முதல் கவிஞர்,

” என்னை நன்றாக இறைவன் படைத்தனன்
தன்னை நன்றாகத் தமிழ் செய்யுமாறே”

என்று தன் படைப்பின் நோக்கத்தை உலகத்துக்கு உணர்த்தினார் இவரது பாடல்கள் எளிமையாக படிக்க சுவை தரும்

‘ ஒன்றே குலம் ஒருவனே தேவன்’
அன்பே சிவமாய் அமர்ந்து இருப்பாரே

என்ற திருமூலரின் மந்திர மணிவாக்கு உலகம் ஒன்றாக வேண்டும் என்ற உயர்ந்த நோக்கத்தின் வெளிப்பாடு. இவரது மந்திரங்கள் நெடுங்கிலும் , மூச்சுப்பயிற்சி இறையருள் சிவசிந்தனை போலியான வழிபாடு கூடாது போன்ற கருத்துகளை முன்னிலைப்படுத்தி இருக்கின்றன. இதில் முதல் பாடலாக இறைவணக்கத்தில்,

“ஒன்றவன் தானே இரண்டவன் இன்அருள்
நின்றனன் மூன்றினுள் நான்குணர்ந் தான் ஐந்து
வென்றனன் ஆறு விரிந்தனன் ஏழ்உம்பம்பர்ச்
சென்றனன் தான் இருந்தான் உணர்ந்து என்றே”

இறைவன் ஒருவரே அந்த ஒருவனை இப்போரண்டத்தின் சிவனும் சக்தியாக இரண்டாகவும் உள்ளான்.அந்த இருவனே இவ்வுலகத்தில் படைத்தல் காத்தல் அழித்தல் என்னும் முத்தொழில் புரியும், பிரமன் திருமால் உருத்திரன் என்ற மூன்றாகவும் உள்ளான். மேலும் அவனே நான்மறை வடிவில் உள்ளவன்,படைத்தல்.காத்தல் அழித்தல் அருளல் மறைத்தல் என்னும் ஐந்தொழிலுக்கும் அவனே தலைவன்.ஆறு சமயமான ,சைவம்,வைணவம் , சாக்தம் , காணாபத்யம், சௌரம், கௌமாரம் போன்ற சமயத்தின் பிரிவாக இருப்பவனும் அவனே. ஏழ் உலகத்தையும் இயக்குபவனும் எங்கும் நீக்கமற நிறைந்து,பரம்பொருளாகவும் எண்குணங்களையும் உடையவன். அவனது எட்டுவகையான குணங்கள், தன்வயமாதல், தூய உடலை பெறுதல் இயற்கை உணர்வடைதல் , முற்றும் உணர்தல் பற்றற்று ,பேரருள் நோக்கு, முடிவில்லாமை, எல்லையில்லாமை போன்ற எட்டு குணத்துக்கும் அதிபதியாக நிலைத்த பரம்பொருள் என்றுவிளக்கம் கூறுகிறார். இதனை வள்ளலாரும் ,

பரத்தினுள் பரமே பரம்பரம் பரமே…. அவனே ஜோதி சொரூபம் கருணை வடிவம் என்கிறார்

இறைவன் என்பவன் பிரபஞ்ச ஆற்றல் அவனே அனைத்தையும் இயக்கும் பேராற்றல் என்று முதல் பாடலில் நமது இறையின் நெறிமுறையை வெளிப்படுத்துகிறார்

முதல் பாடலே முத்தான பாடல்

ஒரு பானை சோற்றுக்கு ஒரு சோறு பதம்……..

தொடருவோம்

April 25, 2016
படக்கவிதைப் போட்டி 60-இன் முடிவுகள்

-மேகலா இராமமூர்த்தி

கருவண்டு விழிகளோடும், களைசொட்டும் முகத்தோடும், விளக்கொளியில் கல்விகற்கும் கவின்மழலையே! இன்று நீ கற்கும் கல்வி நாளை உன்வாழ்வில் நிச்சயம் விளக்கேற்றி வைக்கும்! வெள்ளத்தால் போகாத, வெந்தணலால் வேகாத விழுச்செல்வமாம் கல்வி, இறுதிவரை உன்னைக் காக்கும்! உன் இடுக்கண் போக்கும்!

திரு. வாசகன் பாலசூரியனின் கண்கவர் புகைப்படத்தை இவ்வாரப் படக்கவிதைப் போட்டிக்குத் தேர்ந்தெடுத்துத் தந்திருக்கின்றார் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன். ஒளிஓவியருக்கும், தேர்வாளருக்கும் எம் நன்றிகள்!

இனி, கவிதைகளில் நம் கவனத்தைச் செலுத்துவோம்!

***

கடந்தகாலம் நோக்கிய சிந்தனைப் பயணத்தில் வானவில் தெரியவில்லை; வறுமைதான் தெரிந்தது இந்தக் குழந்தைக்கு. ”வறுமைகண்டு கலங்காதே கண்மணி! இளமையில் கல்! வளமையைக் காண்பாய்!” என்று மழலைக்கு நன்மொழி நவில்கின்றார் திருமிகு. ஹிஷாலி.

கருப்பு வெள்ளை
புத்தகத்தில்
மெழுகுவர்த்தி வெளிச்சம்
எண்ணம் மாறி
வண்ணம் களையாத
அதே நிறக் கண்கள்

மௌனங்கள் மட்டும்
கடந்த காலத்தை நோக்கி
பயணிக்கிறது

அங்கும்
வானவில்லுக்கு பதிலாக
வறுமைதான் தெரிந்தது

திரும்பி வந்தேன்
திருப்பு முனையில் முடிந்தது
இளமையில் கல் !

***

”குறைந்த தீபஒளியில் பாடம்பயிலும் குழந்தையின் எதிர்காலம், நிறைந்த அறிவொளியால் வளம்பெறட்டும்!” என வாழ்த்துகின்றார் திரு. செண்பக ஜெகதீசன்.

இருட்டு வயலில்
வெளிச்ச விதை விழுந்து
முளைத்து
வெளிவருகிறது ஒளியாக..

அந்தக்
குறைந்த வெளிச்சத்தில்
குழந்தை படிக்கிறது,
வறுமை இருளகல
கல்வி ஒளிபெருக..
ஒளி பெறட்டும்,
வாழ்க்கை
வளம் பெறட்டும்!

***

மழலையின் மலர்ச்சியான எதிர்காலத்திற்கு நல்வழியையும் நல்வாழ்த்துக்களையும் நல்கியிருக்கின்றார்கள் நம் கவிஞர் பெருமக்கள்.

அடுத்து, இந்த வாரத்தின் சிறந்த கவிஞர் யார் என அறிந்துகொள்வோமா?

’கொடிது கொடிது இளமையில் வறுமை’ என்பது ஆன்றோர் வாக்கு. அந்த வறுமைப்பிணிக்கு அருமருந்து கல்வியெனும் விழுப்பொருளே ஆகும்.

”ஒருமைக்கண் தான்கற்ற கல்வி ஒருவற்கு
எழுமையும் ஏமாப் புடைத்து” எனத் தலைமுறைகள் தாண்டிநிற்கும் கல்வியின் தகைமையைப் போற்றுவார் வள்ளுவப் பெருந்தகை.

தீச்சுடரை புறத்தேவைத்து, அறிவுக்கனலை அகத்துள்ளே மூட்டிக்கொண்டிருக்கும் இச்சிறுமியின் அடர்ந்த சிந்தனைகள் அங்கே படர்ந்திருக்கும் இரவைக் கலைக்கின்றன என்கின்றது ஒரு நயமான கவிதை…

இயற்கையின்முன்
கைகட்ட வேண்டி இருந்தாலும்
இருளை விசாரிக்கின்றன
ஒளியுமிழும் விழிகள்
ஏற்றுக் கொண்ட சவாலுக்குச்
சாட்சியமான மெழுகுவர்த்திச் சுடரைச்
சற்றே
ஆவேசப்படுத்திக் காட்டுகிறது
மாற்றத்திற்குத் தயாராகும்
சிறுமியின்
வெப்பப் பெருமூச்சு –
இப்போது அடர்த்தியான
இரவைக் கலைக்கின்றன
அதனினும் அடர்த்தியான
அவளது சிந்தனைகள்…

***

சிறுமியின் சிந்தனைச்செறிவைச் சிறப்பாய்ச் சித்தரித்திருக்கும் இந்தக் கவிதையின் ஆசிரியர் திரு. எஸ். வி. வேணுகோபாலனை இவ்வாரத்தின் சிறந்த கவிஞராய் அறிவிக்கின்றேன்.

***

மின்சாரம் இல்லாவிட்டால் என்ன? கிடைத்திடும் சிறியஒளியில் தன் அறிவுச்சாரம் பெருக்கிடுவாள் இந்தத் திருநிறைசெல்வி என்கிறது மற்றொரு கவிதை…

திருநிறைப்பாள் அறிவொளியால்….
மின்சாரம் இல்லாவிடில் என்ன…?
தன் சாரம் பெருக்குவாள்
மின்னும் அறிவுச் சரமாவாள்..
சின்ன ஒளியில் பெருநிலவாக.
திருநீறு திருக்காப்பாக அறிவின்
திருக்கண் விழ அவதானமாக
திருட்டியம் பெருக்கும் செல்வி
திரு நிறைப்பாள் அறிவொளியால்.

(திருக்கண் – அறிவுப் பார்வை; திருட்டியம் – ஞானம், அறிவு)

திருமிகு. வேதா. இலங்காதிலகத்தின் இக்கவிதைக்கு என் பாராட்டுக்கள்!

April 25, 2016
குதித்தெழுந்து வாருங்கள் !

எம் . ஜெயராமசர்மா .. மெல்பேண் .. அவுஸ்திரேலியா

படித்தவரும் குடிக்கின்றார் பாமரரும் குடிக்கின்றார்
அடுத்துவரும் விளைவுபற்றி ஆருமே மனத்திலெண்ணார்
குடிபற்றித் தெரிந்திருந்தும் குடியொழிக்க மறுக்கின்றார்
அடியோடு குடியொழித்தால் அனைவர்க்கும் ஆனந்தமே !

குடித்திவிடும் வேளையிலே குணமெல்லாம் மாறிவிடும்
அடித்துடைத்து அத்தனையும் அவர்நாசம் செய்திடுவார்
பிடித்தமுள்ளார் முன்னாலும் பேயாக மாறிடுவார்
எடுத்துரைக்கும் எச்சொல்லும் ஏறிவிடா அவர்களுக்கு !

அம்மாவை மதியார்கள் அப்பாவை மதியார்கள்
ஆர்வந்து நின்றிடினும் அவர்மதிக்க மாட்டார்கள்
என்னதான் செய்கின்றோம் என்பதையும் அறியாது
ஈனத்தனமாக எத்தனையோ செய்து நிற்பார் !

கொலைகூடச் செய்திடுவார் கொழுத்திநிற்பார் சொத்தையெலாம்
நிலைகெட்டுத் தடுமாறி நீசராய் மாறிடுவார்
வெறிமுறிந்த பின்னாலே விபரீதம் தனைப்பார்த்து
வேரொடிந்த மரமாகி விரக்தியிலே நின்றிடுவார் !

உழைக்கின்ற காசெல்லாம் ஒருசதமும் மிஞ்சாது
பிழைக்கின்ற பிழைப்பதனில் பெருங்குழப்பம் வந்துவிடும்
கிடைக்கின்ற நல்வாழ்வும் கீழ்நிலைக்கு வந்துவிடும்
நடைப்பிணமாய் ஆகியவர் நரகத்தைத் தொட்டுநிற்பர் !

நாட்டிலே குடியொழித்தால் நல்லதே நடக்குமென
ஏட்டிலே எழுதிவைத்த எழுத்தையெலாம் ஒதுக்கிவிட்டு
கூட்டமாய் குடிகுடித்து குவலயத்தை அழிப்பதனை
கூண்டோடு அழித்திடுவோம் குதித்தெழுந்து வாருங்கள் !

வள்ளுவர் பிறந்தமண்ணில் வகைவகையாய் குடியிருக்கு
மாசமண முனிவரெலாம் குடியொழிக்கு வகைசொன்னார்
தெள்ளுதமிழ் நூல்கள்பல குடியொழிக்கச் சொன்னாலும்
உள்ளமதில் கொள்ளாமல் உயிர்குடிக்கக் குடிக்கின்றார் !

அன்பை அறத்தை அஹிம்சையை அழித்துநிற்கும்
அநியாயக் குடிதன்னை அகற்றிடுவோம் வாருங்கள்
துன்பமெலாம் தந்துநிற்கும் துன்மார்க்கக் குடிதன்னை
துடைத்தொழிக்க வாருங்கள் தூய்மையாய் வாழ்ந்திடுவோம் !

April 25, 2016
‘உணர்வுகள்’ கவிதைத்தொகுதி – ஒரு அறிமுகம்

– கே.எஸ்.சுதாகர்.

இந்த ‘உணர்வுகள்’ கவிதைத்தொகுதியை வைத்திருப்பவர்கள் பாக்கியவான்கள். ஏனென்றால் இது பல அரிய விடயங்களைப் பொக்கிஷமாகத் தந்து நிற்கின்றது. பாடாத பொருளில்லை எனும்படியாக பொருட்பரப்பு விரிந்து காணப்படுகின்றது. இதன் ஆசிரியர் ஜெயராமசர்மா – பாரதியார், கவிமணி, பட்டுக்கோட்டையார், கவியரசர், மகாகவி போன்றவர்களின் கவிதைகளில் திளைத்து, அவர்களை அடியொட்டி எழுதிச் செல்கின்றார். இவர் பேராதனைப்பல்கலைக்கழக தமிழ் சிறப்புப்பட்டதாரி. கல்வியியற்துறை, சமூகவியற்துறை, கற்பித்தல் நுணுக்கங்கள் ஆகியவற்றைக் கற்றுத் தேறியவர். அத்துடன் ஆசிரியர், அதிபர், உதவிக்கல்விப் பணிப்பாளர், விரிவுரையாளர் என்ற பல பதவிகளை வகித்தவர்.

இவரின் புத்தகத்திற்கு பேராசிரியர் கலாநிதி என்.சண்முகலிங்கன், கவிப்பேரரசு வைரமுத்து என்பவர்கள் வாழ்த்துரையும் – டாக்டர்.ஞானசேகரன் (ஞானம் சஞ்சிகை ஆசிரியர்), முனைவர் இரா.மோகன் (மதுரை காமராசர் பல்கலைக்கழகம்), முனைவர் அரங்க.பாரி (அண்ணாமலைப் பல்கலைக்கழகம்), பேராசிரியர் முனைவர் சரசுவதி இராமநாதன் என்பவர்கள் அணிந்துரையும் வழங்கிக் கௌரவித்திருக்கின்றார்கள். இதிலிருந்தே இத்தொகுதியின் கனதியைப் புரிந்து கொள்ளலாம்.

இங்குள்ள கவிதைகள் ஏற்கனவே பல சஞ்சிகைகள், பத்திரிகைகள், இணையத்தளங்களில் வெளிவந்தவை.

இவரது தொகுதிக்கு அணிசேர்த்திருக்கும் கவிதைகள் – பக்தி, மொழி, அன்பு, போதனை, சாதனை, இயற்கை, நினைவுகள், கொண்டாட்டம், கற்பனை, காதல் என்ற வகைப்பாடுகளில் அமைந்துள்ளன. இவர் கவிதைகளைத் தொகுக்கும் யுக்தியே ஒரு கவிதைதான்.

கவிதைகள் எல்லோருக்கும் கைவரப் பெறாதது. நான்கு வரிகள் எழுதியவுடன் சிலருக்கு நாக்குத் தொங்கும். இவருக்குக் கவிதைகள் உள்ளத்திலிருந்து ஆற்றொழுக்காக ஒரு ஊற்று போல வருகின்றன. இங்கு வருகின்ற பல பாடல்களில் சந்தம் இருக்கின்றது, சிந்தும் இருக்கின்றது. நாட்டுப்பாடல்களும் இதனூடாக வெளிப்பட்டு நிற்கின்றன. பெரும்பாலான கவிதைகள் மரபுக்கவிதைகளாக உள்ளன.

உணர்வுகளில் தலையாயது பக்தி. இதுவே இப்பொழுது எல்லாருக்கும் முதற்கண் தேவை. அந்தப் பக்தியுடன் ஆரம்பிக்கின்றது இந்த ‘உணர்வுகள்’ என்ற கவிதைத்தொகுதி. பக்தியில் முதல் வருவது ‘மணி ஓசை’. ‘கைவிஷேசமாக’ ஒலிக்கும் இந்தக்கவிதை என் மனதில் எழுப்பும் ஓசை தற்போதைய அரசியல். பக்தியோடு பரிணமிக்கின்றது இந்த அரசியல்.

‘மணி ஓசை கேட்டவுடன்
மனமெல்லாம் மகிழ்கின்றது
துணிவெல்லாம் பிறக்கிறது
தூயநிலை வருகிறது ’

தொடர்ந்து இந்தக்கவிதையில்,

‘சிவனாரின் கோவில்மணி
சீர்திருத்த முயல்கிறது
அவமான செயல் எல்லாம்
அதுபோக்க முயல்கிறது

மாதாவின் கோவில்மணி
மனங்குளிர வைக்கிறது
ஆதாரம் தான் எனவே
அது ஒலித்து நிற்கிறது

விகாரையின் கோவில்மணி
விண்ணென்று ஒலிக்கிறது
வீண்வார்த்தை பேசுவதை
விட்டுவிடு என்கிறது ’

ஆழ்ந்து நோக்குகையில் இந்த ‘வீண்வார்த்தை பேசுவதை விட்டுவிடு’ எனும் சத்தியவார்த்தைகள் மனதில் படிந்துவிடுகின்றது. மத இன ஒற்றுமையை வலியுறுத்தும் கவிதை இதுவெனலாம்.

இந்த பக்தி என்ற பொருளடக்கத்தில் மொத்தம் பதினொரு கவிதைகள் உள்ளன. இதில் என்னைக் கவர்ந்த அடுத்த கவிதை ‘இரக்கமுடன் அருள் புரிவாய்!’. இந்தக்கவிதை இந்தியாவின் தற்காலத்து கல்விநிலை பற்றிச் சொல்கின்றது. கல்விக்குள் காசை வைத்து கற்பவரை முடக்கின்றாரே, கல்வியைக் காசாக்கி கடைத்தெருவில் விற்கின்றாரே என மனம் புழுங்கி,
‘பள்ளித் தலமனைத்தும் கோவில் எனச் சொல்லி
துள்ளி வரும் தமிழாலே சொன்னானே பாரதியும்
கிள்ளி எறிந்து நிற்கும் கீழான குணமுடையோர்
பள்ளிகளை இப்போது பணக்கிடங்காய் மாற்றிவிட்டார்’

என்று தொடர்ந்து செல்கின்றார் ஜெயராமசர்மா.

‘பொறுமையுடன் கேட்டுப்பாருங்கள்’ என்ற கவிதை எனக்கு நாகூர் E.M. ஹனிபா அவர்கள் பாடிய ‘இறைவனிடம் கையேந்துங்கள்’ பாடலை நினைவுபடுத்துகின்றது.

மொழி பற்றி வரும் கவிதைகளில் – ‘வந்து நிற்கும் வினையாகும்!’ – என்ற கவிதையில்

‘அருமைமிகு அம்மாவை
மம்மி என அழைத்து
பெருமைமிகு அப்பாவை
டாடி என விளித்து
கருவினிலே உருவான
கன்னித்தமிழ் மறந்து
உருமாறி உரைப்பதிலே
உயர்வென்ன இருக்கிறது ’

என்கின்றார் கவிஞர். மொழி பற்றிய பிரச்சினை புலம்பெயர்ந்தநாடுகளில் இன்று பூதாகரமாக உருவெடுத்துள்ளதை இவரது கவிதைகளில் காணலாம்.

அன்புக்கு உண்டோ அடைக்கும் தாழ். இந்தக் கவிதை நூலிலும் தாழ் திறந்து கட்டற்றுப் பாய்கின்றது அன்பு. அன்பு என்றவுடன் எம்மனதில் அம்மாவே முன்வந்து நிற்பார். அம்மா பற்றிய கவிதைகள் இதில் ஏராளம். அந்த அன்பு மழையில் நாமும் திளைக்கின்றோம்.

மழலைச் செல்வம் பற்றி ‘நிம்மதி நெஞ்சில் நிற்கும்’ என்ற கவிதை சொல்கின்றது. இந்தக் கவிதையில் ஒரு பந்தி

‘பிரசவத்தில் தாய் அழுவாள்
பிறந்தவுடன் நீ அழுவாய்
பெண்ணாகப் பிறந்துவிட்டால்
பெற்றவரும் அழுதிடுவார்
அழுதழுது பிள்ளை பெற்று
ஆருக்கு என்ன பயன்
அப்படி நினைப்பதனை
அடியோடு மறவுங்கள்’

என்கின்றார். இன்னமும் கீழைத்தேய நாடுகள் சிலவற்றில் பெண்குழந்தைகளின் நிலை கேள்விக்குரியதுதான். அதற்குப் பரிகாரமும் சொல்கின்றார்.

‘ஆண்பிள்ளை பெண்பிள்ளை
அத்தனையும் எம்பிள்ளை
ஆதலால் பிள்ளைதனில்
அன்னியத்தைக் காட்டாதீர்’

‘அரிசியில் நானெழுத
அதைப்பார்த்து நீரசித்து
சிரிசிரி எனச்சிரித்து
சிவப்பாச்சே முகமப்போ’

என்று அம்மாவைப் போற்றுகின்றார். சிவப்பானது அவர் அம்மா முகம் மாத்திரமல்ல, இவரின் முகமும்தான் என்பதை இவரை நேரில் கண்டவர்கள் அறிவார்கள். ‘சிரித்தன செம்மலர்கள்’ என்பதற்கொப்ப இவர் முகம் இருக்கும்.

வீர அபிமன்யு என்ற படத்தில் கண்ணதாசனின் ஒரு பாடல் ‘பார்த்தேன் சிரித்தேன் பக்கத்தில் அழைத்தேன்’ என்று ‘தேன்… தேன்…’ என முடிவையும். அதே பாணியில் இங்கும் ஒரு பாடல் வருகின்றது. ‘தயவான நீயே தாய்’ எல்லா வரிகளுமே ‘தாய்… தாய்…’ என்று முடிகின்றது.

உணர்வுகள் என்றொரு கவிதையும் இப்புத்தகத்தில் இடம்பெறுகின்றது. ஒரு குடும்பத்தில் நடைபெறும் அன்றாட நிகழ்வுகளை, பிள்ளையொன்று சொல்லிச் செல்லும் கவிதை. இதில் ஒரு சிடுமூஞ்சி அப்பா வருகின்றார். ஆள்தான் சிடுமூஞ்சியேதவிர குடும்பத்தை அழகுறக் கட்டிக் காக்கின்றார். மனைவி இறந்தபோது, அன்பிழந்து அவதிப்படும் காட்சியை

‘அடக்கியெமை ஆண்ட அப்பா
அடங்கியே இருந்திட்டார்
அம்மாவின் அணைப்பிழந்து
அவரிப்போ அழுகின்றார்

உணர்வுகள் எப்போதும்
உள்ளுக்குள் இருப்பதில்லை
உயிருள்ள மனிதர்க்கு
உணர்வுகளே உயர்வாகும்’

என்கின்றார். சிலவேளைகளில் ‘அன்பு’ என்ற தலைப்பின்கீழ் வரும் கவிதைகள் இவரது சுயசரிதையோ என்று சொல்லவும் தோன்றுகின்றது.

‘குருவிக்கூடு’ எள்ளல் நடையில் துள்ளி வரும் கவிதை. நல்லதொரு சிந்தனையை விதைத்துச் செல்கின்றது. மரமொன்றில் கூட்டில் வாழும் குருவிக்குஞ்சுகளுக்கு, இந்த வேடிக்கை மனிதர்களைப் பார்த்து, தாயிடத்தில் சில கேள்விகள் கேட்கின்றன. எங்கள் கூட்டையும் மனிதர்கள் உடைத்துவிடுவார்களா என்ற கேள்வி முடிவதற்குள் வினை வருகின்றது. எங்கிருந்தோ வந்த கல் குருவிக்குஞ்சையும் பதம் பார்த்து கூட்டையும் வீழ்த்துகின்றது.

‘விலங்கு பறவை யாவுமே
விலத்தி நின்ற போதிலும்
நலங்குறைந்த மனத்துடன்
நாட்டில் மனிதர் வாழ்வதேன்!’

‘அன்பு மனத்துடன் வாழ்ந்திடுவோம்’ என்ற கவிதை நவாலியூர் சோமசுந்தரப் புலவரின் ‘ஆடிப்பிறப்புக்கு நாளை விடுதலை’ என்ற மெட்டிலும் – ‘மனமெல்லாம் மாற வேண்டும்!’, ‘மனநிலை தெளிய வேண்டும்’ என்ற இரு கவிதைகளும் பாரதியாரின் ‘மனதில் உறுதி வேண்டும்’ பாடலையும் – ‘அடங்கினால் நன்மை அன்றோ!’ வித்துவான் வேந்தனாரின் ‘காலைத் தூக்கி கண்ணில் வைத்து கட்டிக் கொஞ்சும் அம்மா!’ பாடலையும் – ‘மாமருந்துமானார்!’ அப்பர் பெருமானின் ‘முன்னம் அவருடைய நாமம் கேட்டாள்’ தேவாரத்தையும் நினைவூட்டி போதனைக் கவிதைகளாகின்றன.

சாதனையாளர்கள் பட்டியலில் – ராமகிருஷ்ணர், அன்னை தெரசா, மு.வ, தேம்பாவணி தந்த வீரமாமுனிவர் (பெஸ்கி பாதிரியார்), கவிமணி தேசிகவிநாயகம்பிள்ளை, காந்திமகான், நேரு, தனிநாயகம் அடிகளார், பாரதியார், கம்பன், உ.வே.சா, நாவலர், பாலுமகேந்திரா, கண்ணதாசன், வைரமுத்து, வாலி, சிவாஜிகணேசன், பி.சிசீலா, பாலமுரளி கிருஷ்ணா, இளையராஜா, நெல்சன்மண்டேலா, டொமினிக் ஜீவா, கிருபானந்தவாரியார் என்பவர்களைப் பற்றி கவிதைமழை பொழிகின்றது இப்புத்தகம்.

‘எதிர்த்திடுவோம் கலப்படத்தை’, ‘அடியோடு புகை ஒழிப்போம்’, ‘குடியொழிக்க வாரீர்!’ என்பவை தலைப்பிலேயே பொருளை வைத்து, கலப்படத்தை, புகைத்தலை, குடிபோதையைச் சாடி நிற்கின்றன. கவிதை ஒவ்வொன்றினுள்ளும் ஒரு கதை இழையோடிக் கிடக்கின்றது.

புத்தகத்தின் அட்டை ‘நீல நிறம், வானுக்கும் கடலுக்கும் நீல நிறம், காரணம் ஏன் கண்ணே உன் கண்ணோ?’ என்று கண்ணதாசனின் பாணியில் கேள்வி எழுப்புகின்றது. அந்தக் கேள்விக்குள் குடும்பம் ஒன்று பறவையாய் வானில் பறக்கின்றது. ஒவ்வொரு கவிதையின் பின்புறமும் அழகழகான நிழற்படங்கள் வருகின்றன. தேர்வு மிகப்பொருத்தமாக உள்ளது.

மொத்தத்தில் பண்பாட்டை, கலாச்சாரத்தை, ஒழுக்கத்தை, சமுதாய அக்கறையைப் பேணி நிற்கும் கவிதை உணர்வுகளால் கட்டுண்டு நிற்கின்றேன். புத்தகம் முழுவதுமுள்ள உணர்வுகளைச் சொல்லிவிட எனக்கும் ஆசைதான். உங்கள் சுவைப்புக்காக மிகுதியை விட்டுவைக்கின்றேன்.

April 25, 2016
கேசவ் வண்ணம் – கிரேசி எண்ணம்

”வனவிஹாரி’’….
———————————–

‘’ஞான மதைஉண்ண நந்தன்சேய் பின்னாடி
கானகத்திற்(கு) ஓடும் கறவையின், -ஞானமது
கிட்டினால் நாடென்ன! , காடென்ன! , வாழஎலே
இட்டம்கொள் விஷ்ணு இலை’’….கிரேசி மோகன்….

கானகம் -வனம், காடு….
வாழ‘’எலே’’-எலே நெல்லை வட்டார விளிச்சொல்….

April 24, 2016
தென் அமெரிக்காவின் ஈகுவடார் & ஜப்பான் நாடுகளில் நேர்ந்த பூதப் பூகம்பத்தால் பலர் மரணம், பேரிடர்ச் சேதாரங்கள்

— சி. ஜெயபாரதன்.

சி. ஜெயபாரதன் B.E.(Hons) P.Eng (Nuclear), கனடா

________________________________
https://youtu.be/NR7nOjgRH38
https://youtu.be/8UazDAbztM0
https://youtu.be/Ywx55DC4wTs
https://youtu.be/c-iZFJF8eBc
http://bcove.me/i7cv1bbc
https://youtu.be/YjBPJx7ehiU
http://www.youtube.com/watch?feature=player_embedded&v=2tjIczIHkkA
http://www.youtube.com/watch?v=_YENHB0Im2I&feature=player_embedded
________________________________

பூமகள் சற்று தோளசைத்தாள் !
தாமாக வீழ்ந்தன
மாட மாளிகைகள் !
புதைபட்டார், பலர் மாண்டார்;
சிதைவுகளில்
சிக்கினர் ! கத்தினர் ! செத்தனர் !
கடற் தட்டுகள்
தடம்மாறிக் கால் உதைத்தால்
உடனே சுனாமி எழும் !
பூகம்ப ஆட்டம் நகர்த்திடும்
பூகோள அச்சை !
காலம் மாறும் ! பருவம் மாறும் !
நாளின் நீட்சி மாறும் !
கனற்பிழம்பு உட்கருவில் அழுத்தமாகிக்
குப்பென எழும் எரிமலை !
சூழ்வெளியும் நாசமாகிப்
பாழாய்ப் போக
ஆழ்ந்த பூமிக் குள்ளும்
ஊழல் கூழ்த் திரவம்
சூழ்ந்துள்ளது !
எங்கெங்கு வாழினும்
இன்ன லப்பா !
ஏழு பிறப்பிலும் புவியில்
தொல்லை யப்பா !
ஊழிக் கூத்தின்
பிரளயத் தாண்டவம் அடுத்தடுத்து
அரங்கே றுதப்பா !
முடுக்கி விட்ட பூகோளம்
உடுக்கடிக்கும்
ஊழியின் மேளம் !

________________________________

உலுக்கிச் செல்லும் ஊழியின் கை
உலுக்கி உலுக்கி மேற் செல்லும் !
அழுதாலும், தொழுதாலும் ஓயாதவன் கை !
குலுக்கிய பின் மீண்டும் குலுக்க வரும் !
— புதிய உமர் கையாம்

தென் அமெரிக்காவின் மேற்குக் கடற்கரை நீட்சி ஒரு பூகம்பப் பூத அரங்கம்
பல நூற்றாண்டுகளாக எண்ணற்ற பூகம்பங்கள் அடிக்கடி நேர்ந்து வீடுகள், மாட மாளிகைகள் இடிந்து, ஆயிரக் கணக்கான மக்கள் மடிந்து, பேரிடர் அளித்து வரும் பூத அரங்கு தென் அமெரிக்காவின் மேற்குக் கடற்கரை நீட்சிப் பகுதியே ! இந்த அரங்கு பூகம்பம் அடிக்கடி விளையாடும் உலக அக்கினி வளையத்தின் [Ring of Fire] உக்கிர அரங்காகக் கருதப்படுகிறது.

2016 ஏப்ரல் மாதத்தில் அக்கினி வளையத்தின் இருபெரும் அரங்குகளில் அடுத்தடுத்து பூகம்பங்கள் நேர்ந்து மக்களுக்கு பேரளவு மரணங்களும், பேரழப்புகளும் நிகழ்ந்துள்ளன ! ஏப்ரல் 16 இல் ஜப்பான் தென் பகுதித் தீவு கியூசூவில் [Kyushu] உள்ள மினாமியாசோ [Minamiaso] நகரை 6.4 & 7.3 மதிப்பளவு இரு வலிமை மிக்க பூகம்பங்கள் தாக்கியுள்ளன ! அதன் விளைவு இதுவரை [ஏப்ரல் 22] 42 பேர் மரணம். 1000 பேர் காயமடைந்தனர். நிலச்சரிவாலும், பாதைகள், வீதிகள், பாலங்கள் முறிவாலும் 12,000 பேர் தனித்துப் போயினர். அதே ஏப்ரல் 16, 2016 இல் தென் அமெரிக்காவின் மேற்குக் கடற்கையில் உள்ள ஈகுவடார் நாட்டில் 7.8 ரிக்டர் மதிப்பளவு நிலநடுக்கம் ஏற்பட்டு அதன் வணிக பூமி மாண்டா [Manta] நகரம் மாட மாளிகைகள், கூட கோபுர அடுக்கு வீடுகள் குப்புற வீழ்ந்து முறிந்தன. உடனே அடுத்தோர் பூகம்பம் 6.1 மதிப்பளவில் ஆட்டம் செய்து மக்களுக்கு அச்சத்தை ஊட்டி, இயற்கையின் சீற்றத்தயும் வல்லமையும் காட்டி யுள்ளது ! இதுவரை [ஏப்ரல் 22] ஈகுவடாரில் மரணம் 570 பேர், 163 பேர் இன்னும் காணப்பட வில்லை. 4065 பேர் காயமுற்றார். 23,500 பேர் குடியிருக்கும் வீடிழந்தார் !

2015 செப்டம்பர் 16 ஆம் தேதி புதன்கிழமை இரவில் மக்கள் தூங்கும் போது சில்லி நாட்டின் வடபகுதியில் உள்ள ஸாண்டியாகோ நகருக்கு அருகில் இல்லாபெல் என்னும் ஊரில் [Illapel, Chile] 8.3 ரிக்டர் அளவில் ஒரு பெரும் நிலநடுக்கம் ஏற்பட்டு 11 பேர் மரித்தார் [2015 செப்டம்பர் 17 அறிவிப்பு]. 34 பேர் காயமடைந்தார். சுமார் ஒரு மில்லியன் மக்கள் வீட்டை விட்டு நீங்க வேண்டியதாயிற்று. 240,000 பேர் மின்சாரப் பரிமாற்றம் இழந்தார். அடுத்து சிறிய சுனாமிப் பேரலை 4.5 மீடர் [15 அடி] உயரத்தில் எழுந்து, கடற் கரையில் உள்ள பல்வேறு சிற்றூர்கள் கடல் நீரில் முங்கிக் குளித்தன. இல்லாபெல் ஸாண்டியாகோவுக்கு வடக்கில் 280 கி.மீ. தூரத்தில் உள்ளது. நிலநடுக்க மையம் [Epic Center] இல்லாபெல் ஊருக்கு 55 கி.மீ. தூரத்தில் இருந்ததாகக் கணக்கிடப் படுகிறது. இல்லாபெல்லைச் சுற்றியுள்ள ஜனத் தொகை : சுமார் 35,000. முதல் நடுக்கத்துக்குப் பிறகு அடுத்தடுத்து 6 முதல் 7 ரிக்டர் வரை நில அதிர்வு ஆட்டங்கள் நேர்ந்தன. முதல் நடுக்கம் 3 நிமிடம் நீடித்தது. சில்லியின் நீண்ட பசிபிக் கடற்கரைப் பகுதி ஊர்கள் அனைத்துக்கும் சுனாமிப் பேரலை அடிப்பு எச்சரிக்கை அறிவிக்கப் பட்டது. உடனே பொதுமக்கள் பலர் உள் நாட்டுக்குள் ஓடியும், சிலர் வாகனங்களில் ஏறியும் புலம் பெயர்ந்து தப்பிக் கொண்டனர்.

சில்லி நாடு உலகிலேயே பூகம்பங்கள் தாக்கும் நாடுகளில் முதன்மை நாடாகக் கருதப்படுவது. காரணம், சில்லி கடற்கரைக்கு அப்பால் நாஸ்கா அடித்தட்டு, [Nazca Tectonic Plate] தென்னமெரிக்க அடித்தட்டின் கீழ் நகர்ந்து, ஆண்டிஸ் மலைத்தொடர் சிகரத்தை மென்மேலும் உயர்த்துகிறது. சென்ற வருடம் சில்லி நாட்டின் வட புறத்தில் வாழும் மக்கள் பேரளவு சிதைவுகள் செய்த வெள்ளத்தின் அடிப்பாலும், தெற்குப் பகுதியில் காட்டுத் தீக்கள் எரிப்பாலும், இரண்டு எரிமலைகள் வெடிப்பாலும் இடருற்றார். இதுவரை உலகிலே வலுமிக்க அசுர நிலநடுக்கம் 9.5 ரிக்டர் அளவு, சில்லியில் 1960 ஆம் ஆண்டில் நேர்ந்தது. அதில் பலியானவர் 5000 மேற்பட்டவர். 2010 இல் நேர்ந்த 8.8 ரிக்டர் பூகம்பத்தில் எழுந்த சுனாமிப் பேரலையில் நூற்றுக் கணக்கான பேர் [சுமார் 500] உயிரிழந்தார். அந்த அசுர நில நடுக்கத்தில் பூமியின் சுழற்சியே சிறிது மாறி, 24 மணிநேர நாட் பொழுது இம்மி அளவு குன்றியது !

ஜப்பான் கியூசூ தீவு வீடுகள்

ஜப்பான் தென்பகுதித் தீவு வீடுகள்

ஜப்பான் தென்பகுதித் தீவு அடுக்கு வீடுகள்

http://www.youtube.com/watch?feature=player_embedded&v=2tjIczIHkkA
http://www.youtube.com/watch?v=_YENHB0Im2I&feature=player_embedded
http://www.youtube.com/watch?feature=player_embedded&v=qAqubO0R4Z0
http://www.youtube.com/watch?feature=player_detailpage&v=kg67JKzoXmY
http://www.youtube.com/watch?feature=player_detailpage&v=ERVa7MZP87Y
http://www.youtube.com/watch?feature=player_detailpage&v=E426goB47kE
http://www.bbc.com/news/world-latin-america-26862237

தென் அமெரிக்காவை அருகிய பசிபிக் கடற்தள அடித்தட்டு “நாஸ்கா” [Nazca Tectonic Plate] ஆண்டு ஒன்றுக்குச் சராசரி 3 அங்குல நகர்ச்சியில் பிறழ்ச்சி அடைகிறது. முதல் நடுக்கத்திற்குப் பிறகு அடுத்த ஓரிரு வாரங்கள் தொடரப் போகும் “பின்னதிர்ச்சியே” [Aftershocks] மிக்கச் சேதாரம் அளிக்க வல்லது. அதுபோல் ஓரிரு வாரங்களுக்கு முன்பே பூகம்பம், அதே தளத்தில் நேர்ந்த முதல் நடுக்கத்துக்கு முன்னதிர்ச்சியாய் [Beforeshocks] வந்துள்ளதையும் குறிப்பிட வேண்டும்.

பீட்டர் ஸ்பாட்ஸ் [கிறிஸ்டியன் விஞ்ஞானக் கண்காணிப்பு வெளியீடு]

“உலகில் நிகழும் மாபெரும் நில நடுக்கங்கள் பல்நூறு கி.மீடர் பாறைகளைப் பூமிக்குள் நகட்டிப் பூகோளத்தின் பளுச் சமன்பாட்டை வேறிடத்துக்குத் தள்ளிவிடும். அதன் விளைவால் பூமியின் சுழற்சி பாதிக்கப்படும். (சில்லியின் 8.8 ரிக்டர் அளவுப் பூகம்பத்தில்) ஒரு நாளின் நீட்சி 1.26 மைக்ரோ விநாடி குன்றி விட்டது. பூகோள அச்சு பளுவைச் சமப்படுத்த 2.7 மில்லியார்க் விநாடி ( 8 செ.மீடர்) (3 அங்குலம்) சரிந்து விட்டது.”

ரிச்சர்டி கிராஸ் (Richard Gross, Geophysicist NASA Jet Propulsion Lab, California)

“இந்து மாக்கடலில் 2004 ஆண்டில் ஏற்பட்ட 9.1 ரிக்டர் அளவு இந்தோனேசியப் பூகம்பத்தில் மாபெரும் சுனாமி எழுந்து ஒரு நாளின் நீட்சியை 6.8 மைக்ரோ விநாடிகள் குன்ற வைத்துப் பூகோள அச்சும் 2.3 மில்லியார்க் விநாடி (milliarc-sec) (7 செ.மீ) (2.5″) மாற்றம் அடைந்தது.”

நாசா விஞ்ஞானிகள் அறிக்கை

தென்னமெரிக்காவின் சில்லி நாட்டில் மீண்டும், மீண்டும் பேரிடர்ப் பூகம்பங்கள் !
2014 ஏப்ரல் முதல் தேதியன்று 8.2 ரிக்டர் அளவுப் பூகம்பம் இரவில் ஏற்பட்டு, 7 அடி [2 மீடர்] உயரச் சுனாமியும் எழுந்து, அரசாங்கம் எச்சரிக்கை விடுத்து, கடற்கரை நகரான லிகுயிக் [[Lquique] பகுதியில் 900,000 மக்கள் இடப் பெயர்ச்சி செய்ய நேர்ந்தது. அடுத்து 24 மணி நேரத்தில் அதே பகுதியில் 7.6 ரிக்டர் அளவு பின்னதிர்ச்சியாய் [Aftershocks] 14 மைல் கடல் ஆழத்தில் தாக்கியது ! 8.2 அளவு முதல் பூகம்பம் 12.5 மைல் கடல் ஆழத்தில் நேர்ந்தது. லிகுயிக் நகரின் ஜனத்தொகை : 200,000. விபத்தில் ஆறு பேர் உயிழந்தார். நிலநடுக்கத்தில் 2600 இல்லங்களுக்கு மேலாகச் சேதாரம் ஏற்பட்டது. 40,000 பேருக்கு மின்சாரப் பரிமாற்றம் தடைப்பட்டது. வட கரைப் பகுதிகளில் மீனவர் படகுகள் பல தகர்க்கப் பட்டன.

அந்த நிகழ்ச்சி நேர்வதற்கு முன்பு அதே தொடர் முறிவுப் பகுதியில் உள்ள பனாமா, காலிஃபோனியா பூதளங்களில் நிலநடுக்கம் உண்டானது. பனாமா கால்வாய் போக்குவரத்து இயங்கும் பகுதியில் 6.2 ரிக்டர் அளவும், லாஸ் ஏஞ்சலஸ் பகுதியில் 5.1 ரிக்டர் அளவிலும் பூகம்பம் உண்டாகி யுள்ளது. 2010 ஆண்டு சில்லியில் நேர்ந்த 8.8 ரிக்டர் பூகம்பத்தில் சுமார் 700 பேர் மாண்டனர். அப்போதைய கோர நிகழ்ச்சியின் போது ஏற்பட்ட பண விரையம் : 30 பில்லியன் டாலர் என்று மதிப்பிடப் படுகிறது ! இப்போதைய சேதாரத்தால் நிதியிழப்பு இத்தனை அளவு பெருந் தொகை இல்லை என்று தெரிகிறது.

சில்லி பெரு நடுக்கத்துக்கு இரண்டு வாரங்களுக்கு முன்பே 7.6 அளவில் ஒரு முன்னதிர்ச்சியும் [Beforeshocks], நேர்ந்த 24 மணி நேரத்துக்குள் 6.1 அளவில் பின்னதிர்ச்சியும் [Aftershocks] நிகழ்ந்ததும் குறிப்பிடத் தக்கவை. பின்னதிர்ச்சி பசிபிக் கடலில் கரையிலிருந்து 14 மைல் தூரத்தில், 12 மைல் கடல் ஆழத்தில் ஏற்பட்டுள்ளதாய்க் கணிக்கப் படுகிறது. 1960 இல் சில்லியில் நேர்ந்த 9.5 அளவு மிகப்பெரும் பூகம்பத்தில் 1655 பேர் மாண்டனர் !

நிலநடுக்கம் நேர்ந்த இம்மூன்று பகுதிகளும் [காலிஃபோர்னியா, பனாமா, சில்லி நகர்ப் புறங்கள்] பூகம்ப அரங்குகள் கொண்ட “தீக்கனல் வளையத்தில்” [Ring of Fire] படிந்துள்ளன. உலகில் ஏற்பட்ட 90% நில நடுக்கங்கள் [எண்ணிக்கை : 81] இந்த தீக்கனல் வளையத்தில்தான் நேர்ந்துள்ளன என்று அமெரிக்கன் பூதளவியல் அளப்பகம் [United States Geological Survey] கூறுகிறது ! சில்லியில் நேர்ந்த நிலநடுக்கம் பசிபிக் கடற்தள அடியில் உள்ள 7000 மைல் நீளமுள்ள நாஸ்கா அடித்தட்டு முறிவில் [Nazca Tectonic Fault Plate] ஏற்பட்டுள்ளது.

உலகில் மிகப்பெரும் பூகம்பப் பேரிடர்கள் கடல் சூழ்ந்த அடித்தட்டுப் பெயர்ச்சித் தளங்களிலேதான் நிகழ்கின்றன ! அந்த அடித்தட்டுப் பிறழ்ச்சிகளின் இடையே நசுக்கப்படும் நீர் மண்டலம் அழுத்தமாகிப் பிளவுச் சேதாரங்களில் பன்மடங்கு அதிகமாகின்றன. 2010 பிப்ரவரி 27 இல் நேர்ந்த சில்லி மாபெரும் பூகம்பத்தைப், பூதளவியல் ஆராய்ச்சி மைய ஜெர்மன் விஞ்ஞானிகள் ஆய்ந்து, அடித்தட்டுகளுக்கு இடையே நிரம்பி நேரும் நீரழுத்தம் சிதைவுகளில் பெரும்பங்கு ஏற்றுள்ளதாகக் கண்டுள்ளார்கள்.

“பூமியின் நிலப்பரப்புப் பகுதிகள் அனைத்தும் பல பில்லியன் ஆண்டுகளுக்கு முன்பு ஒருங்கிணைந்த மாபெரும் ஒற்றைக் கண்டமாக இருந்தது ! பல மில்லியன் ஆண்டுகள் கழித்து, எப்படியோ அப்பெருங் கண்டம் பிளவுபட்டு வெவ்வேறு பகுதிகளாகப் பிரிந்து, தற்போதுள்ள இடங்களுக்கு அவை பெயர்ச்சி ஆகியுள்ளன! பூகோளத்தின் அடித்தட்டுகள் [Crusts] பூமியின் உட்கருக் கனல் குழம்பில் [Liquid Core] மிதந்து மெதுவாக நிலப் பெயர்ச்சி அடைகின்றன! கண்டங்களின் நிலப் பெயர்ச்சிக்கும், அடித்தட்டுப் பிறழ்ச்சிக்கும் [Continental Drift & Plate Tectonics] பூர்வப் படிவப் பதிவுகள் [Fossil Records] சான்றுகள் காட்டி நிரூபணமும் அளிக்கின்றன”.

டாக்டர் ஆல்ஃபிரெட் வெஜினர், ஜெர்மன் பூதளவாதி [Dr. Alfred Wegener (1880-1930)]

சில்லியின் பூகம்பத்தால் பூகோளத்தின் அச்சு நகர்ந்திருக்கலாம் !

தென்னமெரிக்காவின் சில்லியில் பிப்ரவரி 27 இல் நேர்ந்த 8.8 ரிக்டர் அளவு அசுரப் பூகம்பத்தில் பூகோள அச்சு நகர்ந்து ஒரு நாளின் மணிக்கணக்கைக் குறைத்திருக்கலாம் என்று நாசா விஞ்ஞானிகள் கணினிப் போலி மாடலின் (Computer Simulation) மூலம் கண்டுபிடித்திருக்கிறார்கள். “உலகில் நிகழும் மாபெரும் நில நடுக்கங்கள் பல்நூறு கி.மீடர் பாறைகளைப் பூமிக்குள் நகட்டிப் பூகோளத்தின் பளுச் சமன்பாட்டை வேறிடத்துக்குத் தள்ளிவிடும். அதன் விளைவால் பூமியின் சுழற்சி பாதிக்கப்படும். (சில்லியின் 8.8 ரிக்டர் அளவுப் பூகம்பத்தில்) ஒரு நாளின் நீட்சி 1.26 மைக்ரோ-செகண்டு குன்றி விட்டது. பூகோள அச்சு பளுவைச் சமப்படுத்த 2.7 மில்லியார்க் விநாடி (milliarc-sec) ( 8 செ.மீடர்) (3 அங்குலம்) சாய்ந்து விட்டது.” என்று நாசா ஜெட் உந்துக்கணை பூதளவியல் விஞ்ஞானி, ரிச்சர்டி கிராஸ் கூறுகிறார்.

இம்மாதிரிப் பூகம்ப மாடல்களைக் கணினிப் போலி மாடல் மூலம் காணலாம். ஆனால் அந்த மிகச் சிறிய பூகோள விளைவுகளை கருவிகள் மூலம் உளவி அளப்பது மிகச் சிரமமானது. சில மாறுதல்கள் மட்டும் வெளிப்படையாகத் தெரிபவை. “அருகில் உள்ள சில தீவுகள் நகட்டப் படலாம்,” என்று பாதிக்கப் பட்ட தளங்களை உளவு செய்த பிரிட்டன் லிவர்பூல் பல்கலைக் கழகப் பேராசிரியர் ஆன்டிரியாஸ் ரியட்பிராக் (Andreas Rietbrock) கூறுகிறார். சில்லியின் மிகப் பெரிய நகரம் கன்செப்ஷன் (Concepcion) கரைக்கு அப்பால் உள்ள ஸான்டா மரியா தீவு (Santa Maria) பூகம்பத்தால் 2 மீடர் (6 அடி) உயர்ந்திருக்கும் என்றும் கூறுகிறார். தீவில் காணப்படும் பாறைகள் கடந்த காலத்தில் ஏற்பட்ட பூகம்பங்களால் நேர்ந்த மேல்மட்ட நகர்ச்சியை நோக்கிக் காட்டின என்றும் கூறுகிறார்.

பூகம்பத்தின் பனிவழுக்கு விளைவு என்றால் என்ன ?
பிரிட்டிஷ் புவியியல் தள ஆய்வு நிபுணர் டேவிட் கெர்ரிட்ஜ் (David Kerridge) இதைப் ‘பனி வழுக்கு விளைவு’ (Ice Skater Effect) என்று குறிப்பிடுகிறார். அதாவது பனி வழுக்குத் தளத்தில் வட்டமிடும் ஒரு பெண் தன் கரங்களை உள்ளே இழுத்துக் கொள்ளும் போது அவளது சுற்று வேகம் மென்மேலும் மிகையாகிறது. அதுபோல் பூகோளம் சுற்றும் போது அதன் உட்பளு நகர்வதால் அதன் சுழற்சி வேகம் மாறுகிறது என்று டேவிட் கெர்ரிட்ஜ் கூறுகிறார்.

“பூகம்ப மானது ஐயமின்றிப் (பளுவை நகர்த்தி) பூகோளத்தை ஒரு வளையமாக்கி ஓர் ஆலய மணி போல் ஆக்கி விட்டது,” என்று உதாரணம் கொடுக்கிறார். ஆலய மணியின் நடுத் தண்டு இங்குமங்கும் நகரும் போது மணிச் சிமிழும் அதற்கேற்பச் சாய்கிறது. மணிச் சிமிழின் அச்சும் சரிகிறது. “இந்து மாக்கடலில் 2004 இல் ஏற்பட்ட 9.1 ரிக்டர் அளவு இந்தனேசியப் பூகம்பத்தில் மாபெரும் சுனாமி எழுந்து ஒரு நாளின் நீட்சியை 6.8 மைக்ரோ விநாடிகள் குன்ற வைத்துப் பூகோள அச்சும் 2.3 மில்லி வளைவி விநாடி (7 செ.மீ) (2.5″) மாற்றம் அடைந்தது.” என்று நாசா அறிக்கை ஒன்று கூறுகிறது. இம்மாதிரி மாற்றங்கள் பூமியில் விளைந்து அடுத்து மாறுவது வரை அப்படியே தொடர்கின்றன ! மேலும் பூமியில் அத்தகைய சிறு மாறுபாடுகள் சூழ்வெளி வாயு மண்டலத்தில் நேரும் பெரும் மாறுபாடுடன் இணைந்து கொள்கின்றன என்று அறியப் படுகின்றது.

சில்லியின் நில நடுக்கம் எவ்விதம் புவி அச்சை மாற்றியது ?
சமீபத்தில் சில்லியில் நேர்ந்த 8.8 ரிக்டர் அளவுப் பூகம்பம், உட்தளப் பளுவை உள்ளே தள்ளி இருந்தால் அம்மாற்றம் புவி அச்சை நகர்த்தி இருக்கலாம் என்று நாசா விஞ்ஞானிகள் கருதுகிறார். ஆலய மணி அடிக்கும் போது மணித் தண்டு மையத்தை நோக்கி வரும்போது மணிச் சிமிழும் சாய்கிறதல்லவா ? அதை மூட்டி விடுவது பூமியின் ‘அடித்தட்டு நகர்ச்சி இயக்கமே’ (Plate Tectonics Interactions). வெவ்வே றான அடித்தட்டுப் பளுக்களின் தனித்துவ நகர்ச்சியே நில நடுக்கத்தை உண்டாக்குகிறது. மெதுவாகப் புவி அச்சு பம்பரம் போல் வட்டமிடுவதே ‘அச்சு நகர்ச்சி’ என்று கூறப்படுகிறது. (The Shift of the Earth’s Axis is called “Precession”). பூமி தன்னைத் தானே சுற்ற 24 மணி நேரம் ஆகிறது. பூமியின் சாய்ந்த அச்சு நகர்ச்சியால் மெதுவாக ஒரு வட்டமிட சுமார் 25800 ஆண்டுகள் ஆகின்றன. அச்சு நகர்ச்சி புவிச் சுற்றில் அடித்தட்டு ஆட்டப் பளுத் தள்ளுதலால் நிகழும் ‘நெம்பு மாறுபாட்டால்’ (Change in Torque) உண்டாகிறது. அதனால் புவி அச்சுக் கோண வேகமும் (Angular Velocity) மாறுகிறது.

உதாரணமாக இரண்டு மெல்லட்டைப் புத்தகங்களை எதிர் எதிரே வைத்து ஒன்றை ஒன்று நெருங்கச் செய்வோம். சில சமயம் புத்தகத் தாள்கள் ஒன்றுக்கு அடியில் ஒன்றாய்ச் சுமுகமாகச் சொருகிக் கொள்ளலாம். அல்லது ஒன்றுக்குள் ஒன்று நுழைய முடியாது கட்டுத் தாள்கள் சுருட்டிக் கொண்டு புத்தக இடத்தை மாற்றலாம். இந்தப் புத்தகங்களே புவிக்குப் பளுவாய் அமைந்துள்ள அடித்தட்டுகள் (Tectonic Plates) என்று எடுத்துக் கொள்ள வேண்டும். அவ்விதம் அடித்தட்டுகள் நெருங்கும் போது பூமியின் உட்பளு இடம் மாறுகிறது.

சில்லி நாட்டின் பல மைல்களுக்குக் கீழே நாஷ்கா அடித்தட்டு, தென் அமெரிக்க அடித்தட்டு (Nazca Plate & South American Plate) என்று இரண்டு அடித்தட்டுகள் ஆண்டுக்கு 7 செ.மீடர் வேகத்தில் ஒன்றை ஒன்று நெருங்கி வருபவை. அவை ஒன்றின் மேல் ஒன்று குதிரை ஏறும் போது நில நடுக்கம் உண்டாகிறது. அப்படி ஏறும் போது மேலும் கீழும் ஆடும் ஸ்பிரிங் போல் (Spring Wire) அடித்தட்டுகள் குதிக்கின்றன. அந்த அதிர்வலைகளே நில நடுக்கமாக பூமியின் தளப்பகுதியில் மேலும் கீழும் தாவி அல்லது பக்க வாட்டில் எதிர் எதிராய் நகர்ந்து வீடுகளை இடிக்கிறது, பாலங்களை உடைக்கிறது, வீதிகளைப் பிளக்கிறது !

பூகோள அதிர்ச்சிகளில் என்ன நிகழ்கின்றன ?
பூகம்பத்தின் போது பொதுவாக நேரும் விளைவுகள் :

1. புவி அடித்தட்டுகள் நகர்ச்சி : நாஷ்கா தென் அமெரிக்க அடித்தட்டுகள் மோதி ஒன்றின் மேல் ஒன்று ஏறுதல் அல்லது, அடித்தட்டுகள் எதிர் எதிர் உராய்வு. அல்லது அடித்தட்டுகள் மேல் கீழ்ச் சரிவு.

2. அசுரப் பூகம்பம் ஏற்படுதல் : உதாரணம் சில்லியின் 8.8 ரிக்டர் அளவுத் தீவிரம். (பிப்ரவரி 27, 2010)

3. பூமியின் உட்பளு தள்ளப்படுதல் : பளுக் கடத்தல் நில நடுக்கத் தீவிரத்தைச் சார்ந்தது.

4. புவி அச்சு சாய்வு : பளுவைப் பொருத்தும், இட நகர்ச்சியைப் பொருத்தும் அச்சின் சரிவு மாறுபடும்.

5. புவி அச்சுக் கோணத்தின் வேகம் மாறுபடுதல் (Angular Velocity Changes).

சுருங்கச் சொன்னால் பூகம்பத்தின் போது நேரும் பளுத் தள்ளல், இடமாறுபாடு, வேகம் ஆகியவை ஈடுபாடு கொண்டு புவி அச்சைத் திரிபு செய்கின்றன. பூகம்பங்கள் ஏற்படும் போது இவ்விதம் பன்முறைப் பூமியின் வரலாற்றில் புவி அச்சின் சரிவு மாறுபட்டுள்ளது.

இமாலய மலைச் சரிவுகளை ஆட்டிய நில அதிர்ச்சிகள்:
விடுதலை அடைந்த பிறகு 2005 அக்டோபர் 8 ஆம் தேதி முதன்முதல் வரலாற்றில் மிகக் கோரமான ஓர் அசுரப் பூகம்பம் பாகிஸ்தான் வடகிழக்குப் பகுதியை 7.6 ரிக்டர் உச்ச அளவில் குறைந்தது 140 தடவைகள் குலுக்கி ஆட்டி பெரும் காங்கிரீட் கட்டிடங்களைக் கூட கீழே தள்ளிச் சிதைத்து விட்டது! பாகிஸ்தான் பற்றிக் கொண்ட காஷ்மீரில் மரணம் அடைந்தோர் எண்ணிக்கை 54,000 ஆக அக்டோபர் 16 இல் கணிக்கப் பட்டது, இப்போது 79,000 [அக்டோபர் 20, 2005] ஆக ஏறி யிருப்பதாக அறிவிக்கப் பட்டது. குளிர்காலம் விரட்டிக் கொண்டு வரும் இந்த தருணத்தில் குறைந்தது 2 மில்லியன் மக்களுக்குத் தங்க வீடுகள் இல்லாமல், தகர்ந்து போன தளங்களில் நின்று தவித்தார்கள்! இந்தியக் காஷ்மீர்ப் பகுதியில் 2000 பேர் மரணம் அடைந்ததாகத் தெரிகிறது. 2005 செப்டம்பர் மாதம் அமெரிக்காவில் அடித்த சூறாவளி கேட்ரினாவின் ஆற்றலை விட 20 மடங்கு மிகையான பேராற்றல் கொண்டது, காஷ்மீர் பூகம்பம் என்று அமெரிக்காவின் நாளிதழ் வாஷிங்டன் போஸ்ட் கூறுகிறது! 2004 ஆண்டு இறுதியில் இந்தோனேசியா கடற்தட்டில் ஆட்டம் நேர்ந்து உலகப் பெரும் சுனாமிப் பேரலைகள் தாக்கித் தென்னாசியக் கடற்கரைப் பகுதிகளில் 230,000 பேர்கள் மாண்டு போயினர்! அரை மில்லியனுக்கு மேற்பட்டவர் தமது இல்லங்களை இழந்தனர். 1991 ஆம் ஆண்டு அடித்த சூறாவளிப் பேய்மழையில் பங்களா தேசப் பகுதிகளில் மட்டும் சுமார் 140,000 மக்கள் மடிந்தனர் என்று அறியப்படுகிறது.

நிலையற்று நடுங்கும் இமய மலைத் தொடர்ச்சிகள்:
பூகோளத்தில் உள்ள நீர்ப் பரப்பில் அட்லாண்டிக் கடலின் அகற்சி நீளமாகி வருகிறது! பசிபிக் பெருகடலின் இடைவெளிச் சிறுகச் சிறுகச் சிறுத்துக் கொண்டு வருகிறது! நிலப் பகுதிகளை எடுத்துக் கொண்டால் ஈரோப்பில் ஆல்ப்ஸ் மலைத்தொடர் வளர்ச்சியாகி உயரம் இன்னும் அதிகமாகிக் கொண்டே போகிறது! பூதக் கண்டம் ஆ·ப்பிரிக்கா ஒட்டிக் கொண்டிருக்கும் செங்கடல் வடமுனையில் அறுந்து பிளக்கப் போகிறது! ஹவாயி தீவுகள் வடமேற்குத் திசையில் மெதுவாகப் பெயர்ந்து ஜப்பான் தீவுகளை நோக்கிச் செல்கின்றன! வட அமெரிக்காவும், ஐரோப்பாவும் எதிர்ப்புறம் நகர்ந்து விலகி இடைவெளியை அகற்சி யாக்கி வருகின்றன! அமெரிக்காவில் காலி·போர்னியா கடற்கரையில் உள்ள லாஸ் ஏஞ்சலஸ் நகரம் நகர்ந்து, வடபுறமாகச் சரிந்து கொண்டி ருக்கிறது! இமாலயச் சிகரங்களை இந்தியாவின் கனத்த உபகண்டத் தட்டு வடபுறம் அழுத்தி, அழுத்தி அவற்றின் உயரத்தை மிகையாக்கிய வண்ணமா யிருக்கின்றன! தென்புறத்தில் உள்ள இந்தியக் கடற்தட்டும், வடக்கில் இருக்கும் யுரேசியத் தட்டுடன் முட்டி மோதிக் குதிரை ஏறி, நிலநடுக்கம் உண்டாவது அடிக்கடி நேர்ந்து வரும் இயற்கையின் அபாயத் திருவிளை யாடல்கள்!

அந்த நகர்ச்சி நியதியில் இந்திய உபகண்டம் ஆண்டுக்கு 1.6 அங்குலம் [40 மில்லி மீடர்] வடபுறம் நோக்கித் தள்ளப்படுகிறது! இவ்விரு தட்டுகளும் முட்டி மோதும் போது, கீழிருக்கும் அடித்தட்டு [Crust] புடைத்து மேல் எழுகிறது! அப்போது மலை உச்சிகள் இன்னும் உயர மாகின்றன. இந்தியத் தட்டு வடக்குத் திசையில் நகரும் போது, அடித்தட்டு தணிந்து யுரேசியத் தட்டை மேலே உயர்த்திக் கீழே நுழைகிறது! இந்த நியதிதான் “தட்டுக் கீழ்நுழைவு” [Plate Subduction] என்று சொல்லப்படுகிறது. இரண்டு தட்டுகளுக்கு இடையே நிகழும் இந்த குவியழுத்த நகர்ச்சியால் [Compressive Motion] இடை நழுவல் [Slip] ஏற்பட்டுப் பூகம்பங்கள் உண்டாக்கும் புவித்தட்டு உந்துப் பழுதுகள் [Thrust Faults] அமைகின்றன. அவற்றில் நமக்கு நன்கு அறிமுகமான முப்பெரும் பழுதுகள்: 2004 இல் சுனாமி உண்டாக்கிய இந்தோனேசியா கடற்தட்டுப் பழுது, கலி·போர்னியாவின் ஆண்டிரியா பழுது, இமயமலைத் தொடரின் இமயப் பழுது ஆகியவை முக்கியமானவை.

உலகத்தில் நேர்ந்த பேரிடர் நிலநடுக்கங்கள்

2010 ஆண்டில் கடந்த மூன்று மாதங்களில் மட்டும் குடிமக்கள் வசிக்கும் உலகப் பகுதிகளில் பல நில நடுக்கங்கள் நேர்ந்துள்ளன. நமக்கு வரலாறு அறிந்த காலம் முதல் உலகில் ஏற்பட்ட எரிமலைகள், நில நடுக்கங்கள் செய்த கோர விளைவுகளைப் பதிவு செய்து வந்திருக்கிறோம். சைனா கிங்கை மாநிலத்தில் (Qinghai) ஏப்ரல் 14 இல் 6.9 ரிக்டர் அளவில் ஒன்று, எப்ரல் 5 இல் மேற்கு மெக்ஸிகோவில் 7.2 ரிக்டர் அளவில் ஒன்று, ஜனவரி 13 இல் ஹெய்தியில் 7.0 ரிக்டர் அளவில் ஒன்றும், பிப்ரவரி 17 இல் சில்லியில் 8.8 ரிக்டர் அளவில் ஒன்றும் முக்கியமாகக் குறிப்பிடத் தக்கவை. சில்லியின் கடற்கரைப் பகுதியில் மட்டும் 1973 முதல் 7 ரிக்டர் அளவை மிஞ்சிய 13 நில நடுக்கங்கள் ஏற்பட்டுள்ளன ! இவை அனைத்தும் பூமியின் உட்பளுவை அங்குமிங்கும் நகர்த்திப் புவி அச்சில் திரிபுகளை உண்டாக்கி வந்துள்ளன ! இவற்றால் நாளின் நீட்சி குன்றியும் மிஞ்சியும் போகலாம் ! அதைத் தவிர பூமிக்கு வேறென்ன சூழ்வெளி மாற்றங்கள் நேரும் என்று இன்னும் நாசா விஞ்ஞானிகள் விளக்கமாய் அறிவிக்கவில்லை !

அசுரப் பூகம்பம் ஒன்று வரப் போகிறது என்று சில மணிநேரங்களுக்கு முன்பாக மக்களுக்கு அபாய முன்னறிவிப்பு செய்யும் சாதனம் ஒன்று இன்னும் கண்டு பிடிக்கப்பட வில்லை ! இப்போது உள்ள கருவிகள் சில விநாடிகளுக்கு முன் (20 -30 sec) மட்டும் அறிவிக்கக் கூடியவை. அவை மக்களுக்குப் பாதுகாப்பளிக்கப் போதா ! எரிமலை வெடிப்பு எழுவதற்கு முன்பு எரிமலை வாயிலில் புகை மண்டலம் எழுகிறது ! சுனாமி ஊர்ந்து கடற்கரை நோக்கி வருவதற்குள் பூதள ஆட்டத்தையோ அல்லது அலைகள் பொங்கி எழுவதையோ உளவுக் கருவிகள் மூலம் ஒருவாறு உணர்ந்து இப்போது முன்னெச்சரிக்கை செய்ய முடிகிறது ! ஆனால் பூகம்பம் ஏற்படுவதற்குச் சில மணிநேரம் முன்னால் குடிமக்களுக்கு முன்னறிப்பு செய்யும் அபாய அறிவிப்புச் சாதனம் ஒன்று 21 ஆம் நூற்றாண்டில் இன்னும் உருவாக்கப் படவில்லை என்பது வருத்தப்பட வேண்டிய விஞ்ஞானக் குறைபாடாகும் !

(தொடரும்)

தகவல்:
1. Time Magazine Article, “Nightmare in the Mountains,” By: Tim McGrik (Oct 24, 2005)
2. The Kashmir Earthquake By Washington Post (Oct 12, 2005)
3. Himalayan Tectonic Setting Earthquake Program.
4. Earthquake History & Seismicity in the Northwest Region of Indian Sub-continent. [http://asc-india.org/seismic/pakistan.htm]
5. New York Times -As Pakistan Reels, Musharraf Pleads for International Aid By: Somini Sengupta (Oct 8, 2005)
6. Quake Homeless in Urgent Need of Tents By: Martin Regg Cohn, Asia Bureau (Oct 17, 2005)
7. (a) http://www.thinnai.com/?module=displaystory&story_id=40401222&format=html(Earthquake in Gujarat)
7 (b) http://www.thinnai.com/?module=displaystory&story_id=40401292&format=html(Earthquake in Mexico City)
7 (d) http://www.thinnai.com/?module=displaystory&story_id=40401082&format=html(Major Earthquake in Iran
7 (e) http://www.thinnai.com/?module=displaystory&story_id=40510211&format=html(Earthquake in Himalayan Zone) (October 21, 2005)
7 (f) https://jayabarathan.wordpress.com/2009/04/09/earthquake-in-italy/ (Italian Earthquake 2009)
8. Techtonics in Italian Earthquake By Chris Rowan Geologist (April 6 2009)
9. Italian Earthquake Death Toll Rises to 260 & 28,000 Homeless By Reuters Alertnet (Apr 8, 2009)
10. BBC News Aftershock Hits Italy Quake Zone (April 7, 2009)
11. Rescue Workers Preparing for Surgical Operation on Buildings (April 7, 2009)
12. News Desk – Italy Earthquake 2009 -Worst Quake Since 1980 (April 7 2009)
13. Guardian UK : Italy Earthquake : Stricken L’Quila Suffers Again as Aftershocks Hit By John Hooper (April 7, 2009)
14. Precession of the Earth’s Axis Coming to Light
15. BBC News : Chile Counts Costs as Tsunami Ebs (Feb 28, 2010)
16. Business Week : Chilean Quake Likely Shifted Earth’s Axis, NASA Scientist Says By : Alex Morales (March 1, 2010)
17. BBC News : Hundreds Die in West China Quake (April 14, 2010)
18. How the Chile Earthquake Changed the Earth’s Axis By : A.W. Berry (Mar/April 2010)
19. http://www.bbc.com/news/world-latin-america-26862237 [April 3, 2014]
20. http://www.cnn.com/2014/04/01/world/americas/chile-earthquake/ [April 2, 2014]
21. http://en.wikipedia.org/wiki/2010_Chile_earthquake [April 2, 2014]
22. http://rt.com/news/chile-earthquake-aftershock-evacuated-025/ [April 3, 2014]
23. http://www.livescience.com/39110-japan-2011-earthquake-tsunami-facts.html [August 22, 2013]
24. http://www.eurasiareview.com/04042014-ring-of-fire-fears-following-earthquakes-in-california-chile-and-panama/ [April 4, 2014]
25. http://rt.com/usa/eathquakes-ring-fire-pacific-145/
26. http://earthsky.org/earth/powerful-earthquakes-japan-ecuador-april-2016 [April 17, 2016]
27. http://www.abc.net.au/news/2016-04-17/ecuador-earthquake-7.8-magnitude/7332852 [April 16, 2016]
28. https://en.wikipedia.org/wiki/2016_Ecuador_earthquake [April 17, 2016]
29. http://www.thestar.com/news/world/2016/04/18/us-troops-aircraft-in-japan-join-earthquake-aid-effort.html [April 18, 2016]
30. https://en.wikipedia.org/wiki/List_of_earthquakes_in_2016 [April 20, 2016]
31. https://en.wikipedia.org/wiki/2016_Kumamoto_earthquakes [April 20, 2016]
32. http://www.680news.com/2016/04/20/ecuador-buries-dead-as-hope-for-survivors-fade/ [April 20, 2016]
33. https://en.wikipedia.org/wiki/Cascadia_subduction_zone [April 21, 2016]
34. http://www.newsmax.com/Newsfront/death-toll-japan-earthquake/2016/04/16/id/724272/ [April 22, 2016]

********************

[S. Jayabarathan] jayabarathans@gmail.com (April 22 , 2016)

April 23, 2016
உலக புத்தக தினம்!

பவள சங்கரி

எழுத்தாளர்களின் தலைவிதி பெரும்பாலும் பல்வேறு நிராகரிப்புகளின் இடையேதான் நிர்ணயிக்கப்படுகிறது. இது இன்று நேற்று அல்ல.. பல காலமாக தொடர்வதுதான். உலகின் மிகச் சிறந்த படைப்பாளர்களின் ஒருவரான பிரித்தானிய எழுத்தாளரான ஜே. கே. ரௌலிங் என்பவரால் எழுதப்பட்ட ஏழு கனவுருப் புனைவுப் புதினங்களின் தொகுப்புதான் ஹாரி பாட்டர் என்ற நூல். இந்த நூல் பிற்காலங்களில் எவ்வளவு பிரபலமடைந்திருக்கிறது என்பது நாம் அறிந்ததே. ஆனால் ரௌலிங் இந்த புதினத்தை எழுத ஆரம்பித்தபோது உணவு, உறைவிடம், உடை என அடிப்படைத் தேவைகளுக்குக்கூட அல்லாடிய நிலைதான் என்பதை எத்தனைபேர் அறிந்திருப்போம்? அவர் பெரும் மன வேதனையில் இருந்த காலம் அது. தெருவோரங்களிலும், காப்பி கடைகளிலும் அமர்ந்து ஒரு பழைய தட்டச்சு இயந்திரம் மூலமாக தட்டச்சிய புதினத்தை பல பதிப்பாளர்களிடம் கொண்டு சென்று தவம் கிடந்தும் அவர்கள் பதிப்பிட மறுத்தனர். இறுதியாக ஒரு மிகச் சிறிய பதிப்பு நிறுவனமான ப்ளும்ஸ்பரி என்ற நிறுவனம் 1,000 பிரதிகளுக்கு 2,250 பவுண்டு தருவதாக ஒப்புக்கொண்டு வெளியிட அத்துணையும் மிக விரைவிலேயே விற்றுத் தீர்ந்து வசூலிலும் சாதனை படைத்து சரித்திரம் படைக்க ஆரம்பித்துவிட்டது!

April 23, 2016
கேசவ் வண்ணம் – கிரேசி எண்ணம்

”வினயன் வெகுசமர்த்தன், வில்லுக்கு கீதைக்
கணையவன்(அம்பவன்), காலால் கறவைக்(கு) -அனன்யபக்தி
திண்ணமாய்ப் போட்டும்(புகட்டும்), திருவில்லிப் புத்தூராள்(ஆண்டாள்)
கண்ணனை நெஞ்சே கருது’’….

‘சிந்தை வெளிகடந்து, மந்தை வெளிபுகுந்து,
கந்தல் உடையணிந்து, கன்றுகளை -தந்தையாய்,
அன்னையாய்க் காத்து, அனன்யம் அளித்திடும்,
கண்ணனை நெஞ்சே கருது”….கிரேசி மோகன்….

April 23, 2016
உலக புத்தக தினம்!

ஏப்ரல் 23: உலக புத்தக தினம்

வாசிப்பின் காதலர் தின வாழ்த்துக்கள் !

எஸ் வி வேணுகோபாலன்

பல மாதங்கள் ஆயிற்று அந்தத் தோழரைப் பார்த்து. சில ஆண்டுகளாக நளினி பெங்களூரில் இருப்பவர். கடந்த வாரம், எதிர்பாராத ஒரு புத்தக வாசிப்பு அவரை சந்திக்க உதவியது. கூரியரில் எழுத்தாளர் திலீப் குமார் அனுப்பிக் கொடுத்த அவரது சிறுகதைத் தொகுதியில் நான் எதிர்பார்த்தபடியே எனக்கு மிகவும் பிடித்த அவரது “ஒரு குமாஸ்தாவின் கதை” இருக்கவே, அலுவலகத்திலிருந்து மாலை புறப்படுகையில் ரயில் பயணத்தில் வாசிக்க எடுத்தேன், இடையே வந்த இரண்டு அலைபேசி அழைப்புகளுக்கு நடுவே நகர்ந்த கதையின் முக்கியமான கடைசி ஒன்றரை பக்கங்கள் இருக்கையில் நான் இறங்கவேண்டிய கோடம்பாக்கம் வந்துவிட்டது. ஆனாலுமென்ன, இறங்கிய இடத்திற்கு நேர் எதிரே இருந்த அருமையான நீளக் கடப்பா கல் திண்ணையில் அமர்ந்து பரிதவிப்போடு வாசித்து முடித்து எழுந்திருக்கும்போது, எதிரே ‘ஹாய்’ என்ற குரல். அடுத்த ரயிலில் வந்திறங்கி இருந்தார் நளினி. அவர் சொன்ன விஷயம்தான் சுவாரசியமானது: “ஜன்னல் வழியே பார்த்தால் உங்களைப் போலவே ஒருவர் புத்தகம் படித்துக் கொண்டிருக்கிறார்…நீங்கள்தானோ என்று யோசிக்கையில் எழுந்து நடக்க ஆரம்பித்தீர்கள்…புறப்பட இருந்த ரயிலில் இருந்து சட்டென்று ஓடி வந்து இறங்கினேன்” என்றார். சிறிய உரையாடலுக்குப் பிறகு காஞ்சிபுரத்திற்கான ரயில் வரவும் விடைபெற்றுச் சென்றார்.

வாசிப்புக்கு இடம், காலம், காரணம் எல்லாம் உண்டா என்ன…யாராவது எப்போதாவது வந்து படிப்பார்கள் என்று ஒரு சிற்றூரின் எளிய நூலகத்தில் காத்திருக்கின்றன புத்தகங்கள். தனது நூல் ஒன்று புதுக்கருக்கு கலையாமல் பழைய புத்தகக் கடை ஒன்றில் பத்து ரூபாய் என்று எழுதப்பட்டிருக்கும் சிறிய பலகையின் அருகே கிடப்பதைப் பார்த்து அதிர்ச்சியுறக் கூடும் எழுத்தாளருக்கும், எங்கிருந்தோ வந்து கடையைக் கடக்கப் போகும் ஓர் உண்மையான வாசகர் மீது நம்பிக்கை இருக்கவே செய்யும். அந்தக் குறிப்பிட்ட தருணத்தில் யார் கூடுதல் கவனம் பெறுகிறார் என்று பார்த்தால் வாசிப்பே வெற்றி பெறுகிறது.

விஜய மல்லையா விவகாரம் பெரிதும் பேசப்படும் இந்தக் காலத்தில், வராக் கடன் போலவே வாசிக்காத கடன் பட்டியலும் வெளியிடப்பட வேண்டும் என்ற கோரிக்கையை எழுப்பத் தோன்றுகிறது. அதாவது வாசிப்பைக் கடமையாகக் கொள்ள மறுப்பவர் பட்டியல் அல்ல அது, படிக்கிறேன் என்று வாங்கி வாங்கி அந்தப் புத்தகங்களுக்கு நீதி வழங்காதோர் பட்டியல் ! மிகவும் தற்செயலாக என் மகனுடைய நண்பனின் தந்தை என் வாசிப்பைப் பற்றி மகிழ்ச்சியோடு அறிந்து ஒரு புத்தகத்தை வாசித்துவிட்டுத் தருமாறு அனுப்பி வைத்தார். அதை வாசிக்காமலே கடந்து கொண்டிருந்த ஒரு நாளில், ‘படிக்க நேரமில்லாவிட்டால் அந்தப் புத்தகத்தையாவது உருப்படியாகத் திருப்பிக் கொடுத்து விடு, எங்கள் நட்புபாதிப்பதற்கு அது காரணம் ஆகிவிடக் கூடாது’ என்று நந்தா என்னிடம் தீர்மானமாகச் சொல்லிவிட்டான். வெட்கத்தோடு நூலைத் திருப்பிக் கொடுத்துவிட்டு வந்த குற்றவுணர்ச்சி இன்னும் உறுத்திக் கொண்டிருக்கிறது. இப்படி எத்தனை எத்தனை புத்தகங்கள் வாசிக்காமல், அதிலும், அன்பின் நிமித்தம் புதிய நூலின் பிரதியை அனுப்பி வைத்த அன்பர்கள் பலர் தோழமையோடு சகித்துக் கொண்டிருக்க, பழைய கடனை அடைக்காமல் புதிய நூல் ஏதேனும் கிடைத்தால் அதை உடனே படிக்கும்போது அவர்கள் யாரும் அருகே இல்லையே என்று கண்கள் தன்னிச்சையாகப் பார்த்துக் கொள்கின்றன.

ஆறு மாதங்களாக வீட்டருகே உள்ள உதயா முடி திருத்தகத் தோழர்களை ஏய்த்துக் கொண்டிருந்தேன். நானாக ஒரு புத்தகத்தை அவர்களுக்குக் கொண்டுபோய்க் காட்டிச் சில வரிகளைப் படித்துக் காட்டிவிட்டு நான் முடித்தபிறகு கொடுப்பதாகச் சொல்லிவிட்டுவந்தேன். அந்தப் புத்தகத்தை அவர்கள் நான் கடையைக் கடந்து போகும்போது எல்லாம் நினைவூட்டிக் கேட்டுக் கொண்டே இருப்பார்கள். பண்டுவம் என்றால் மருத்துவம், ஆகவே பண்டிதன் என்று நாவிதர்களுக்குப் பெயர் என்ற குறிப்பில் சிலிர்த்த சதீஷ், ‘சார் புத்தகம் எங்கே கிடைக்கும்னாவது சொல்லுங்க, நாங்க போய்ப் பார்த்துக்கொள்கிறோம்’ என்று சொல்லியும் நான் அவர்களுக்கு நியாயம் செய்யத் தவறிக் கொண்டிருந்தேன்.

அண்மையில், ஒரு புத்தகக் கடையில் நுழைந்து குறிப்பிட்ட புத்தகம் அங்கே கிடைக்குமா என்று உரக்கக் கேட்கையில், ‘இங்கே மட்டுமல்ல, எங்கும் கிடைக்காது, என்னிடம்தான் பிரதிகள் எல்லாம் இருக்கின்றன’ என்று அங்கே புத்தகங்கள் வாங்கிக் கொண்டிருந்த வேறோர் அன்பரிடமிருந்து குரல் வந்தது. ஐ டி படித்துவிட்டு உருப்படியான வேலை கிடைக்காத நிலையில், நூல் விற்பனையாளராக இயங்கிக் கொண்டிருக்கும் கதிரேசனிடம் பணத்தையும், முகவரியையும் ஒப்படைத்து விட்டு வந்தேன். மறுநாள் மாலை வீடு திரும்புகையில் புத்தகம் கூரியரில் வந்து காத்திருந்தது. “ஒரு சவரக்காரனின் கவிதை மயிருகள்” என்ற அந்த நூலை முடி உடனே எடுத்துக் கொண்டுபோய், முடி திருத்தகத் தோழனிடம் கொண்டு சேர்க்கையில் கட்டிப் பிடித்து அவர் அடைந்த உற்சாகம் ஒரு வாசிப்புத் திருவிழா ! நூலுக்குப் பணம் வாங்க மறுத்த என்னிடம்,’பணத்தைக் கொடுக்காமல் வாங்கிக் கொள்ளமாட்டேன், அப்போதுதான் வேறு நல்ல புத்தகம் கிடைத்தாலும் நீங்கள் வாங்கிக் கொடுத்து அறிமுகம் செய்வீர்கள்’ என்ற சதீஷின் குரல் எழுத்தாளர்களை ஒட்டுமொத்தமாகச் சிறப்பிக்கும் மழைநீர்த் துளி.

நான் எதிர்பார்த்த புத்தகம் கிடைக்காது போன அந்தக் கடையில் நான் எதிர்பாராமல் கண்டடைந்த ஒரு மொழிபெயர்ப்புக் கவிதை நூலை (“என் நூறு கிராமங்களின் பெயர்களை இரவோடு இரவாக மாற்றிவிட்டனர்” – அக்னி சேகர்), மாபாவி ஒரு வாரம் கழித்தே பையில் இருந்து எடுத்தேன். ஜிகாத் தீவிரவாதத்தின் தாக்குதலுக்கு உள்ளாகிக் கொண்டிருக்கும் காஷ்மீர் மக்களது துயரம் குறித்த அந்த பிரதி பல கேள்விகளை எழுப்புவது. இந்தியிலிருந்து தமிழில் அற்புதமாக அந்தக் குரலைக் கொணர்ந்த கோவை இந்தி பேராசிரியர் ரமேஷ் குமாரை அழைத்து என்னை அறிமுகம் செய்து கொள்ளாமலே அந்த நூல் என்னுள் ஏற்படுத்திய பாதிப்புகளைப் பேசத் தொடங்குகையில், “அய்யா உங்கள் பெயரைச் சொல்லக் கூடாதா?” என்று கேட்டார். ‘ ஒரு வாசிப்பு அனுபவத்தில் நிலைகுலைந்து போயிருக்கும் வாசகன் தனது பெயரைச் சற்று நிதானமாகவே மீட்டெடுத்துக் கொள்ள முடியும்’ என்ற எனது பதிலில் அவர் அடைந்த பேரானந்தக் கிளர்ச்சிக்கு எந்த ராயல்டி தொகையும் ஈடாகாது.

அண்மையில் குடும்ப மருத்துவர் பி வி வெங்கட்ராமன் (அவரே ஓர் இலக்கிய விரும்பி; சோவியத் கதைகள் கொண்டாடி) அவர்களைச் சந்திக்கக் காத்திருக்கையில் தற்செயலாக புதிய தலைமுறை கல்வி இதழ் பொறுப்பாசிரியர் பொன் தனசேகரனை அங்கே காண முடிந்தது. தொலைக்காட்சியால் சிறுவர்களுக்கு ஏற்படும் பாதிப்பு குறித்த தமது நூல் ஒன்றைக் கொடுத்தபடி அவர் சொன்ன செய்தி உற்சாகம் அளிப்பது. ‘தெருவிளக்கும் மரத்தடியும்’ என்னும் தலைப்பில் பேரா ச மாடசாமி அவர்கள் எழுதி வந்த தொடர் கட்டுரைகளின் தொகுதி வரும் ஜூன் மாதம் சென்னை புத்தகக் கண்காட்சில் வெளிவர இருக்கிறது என்றார். கற்றல், கற்பித்தல் அனுபவங்களின் அற்புதக் கொடையாக அந்த நூல் அமையும். இளம் எழுத்தாளரான – ஏழாம் வகுப்பில் நுழையும் சைதன்யாவின் அடுத்த மொழி பெயர்ப்பு நூல், செப்டம்பரில் வெளியாகிறது என்றார் அவரது தந்தை.

கடந்த வாரம், நான் பணியாற்றும் இடத்தில் வேறு ஒரு துறையில் மூத்த பெண் ஊழியர் ஒருவர் விருப்ப ஓய்வில் விடைபெறும் எளிய நிகழ்ச்சி ஒன்றில் பங்கேற்கச் சென்றபோது, தொடக்க காலங்களில் துணிச்சலும் குறும்பும் நகைச்சுவை உணர்வும் ததும்பும்படி வேலையில் வந்து சேர்ந்த அவர், பின்னர் வாழ்க்கையின் போக்கில் பல தொடர் நிகழ்வுகள், மிகவும் நேசித்த தாயின் மரணம் போன்றவை ஏற்படுத்திய பாதிப்பினால் சற்று உளவியல் நெருக்கடிக்கு ஆளாகி ஆளே மாறிப் போய்விட்டிருந்ததை அவருடன் ஒன்றாகப் பணியில் சேர்ந்த வேறொரு பெண் தோழர் கண்ணீர் மல்கப் பேசினார். சக ஊழியரான அவர் எழுப்பும் எந்தக் கேள்விக்கும் இயல்பாகப் பதில் அளிப்பது, மன ஆறுதல் தரும்படி பேச்சுக் கொடுப்பது என்று ஆண்டுக் கணக்கில் உதவி வந்திருக்கும் இன்னொரு தோழர், ஒரு கட்டத்தில் அவர் விருப்ப ஓய்வில் செல்வதே எதிர்கால சிக்கல்களைத் தவிர்க்கும் என குடும்பத்தாரிடம் எடுத்துப் பேசி நல்லவிதம் அதை முடித்தும் கொடுப்பதில் உதவி செய்திருக்கிறார். அன்பும் கரிசனமும் சூழ்ந்திருந்த அந்தத் தருணத்தில் பேசிவிட்டுத் திரும்பியபோது எனக்கு எஸ் ராமகிருஷ்ணன் அவர்களது “காஃப்கா எழுதாத கடிதம்” தொகுப்பில் இடம் பெறும் ரேமண்ட் கார்வர் எனும் அமெரிக்க எழுத்தாளரின் அற்புதமான “ஒரு சிறிய எளிய காரியம்”சிறுகதை நினைவுக்கு வந்தது.

அசுவாரசியமாக நடந்து கொள்ளும் பேக்கரி ஆள் ஒருவரிடம் தனது மகன் பிறந்தநாளுக்கான கேக் ஆர்டர் கொடுத்துத் திரும்புகிறாள் 33 வயது தாய் ஆன். பிறந்த நாள் கொண்டாடவேண்டிய திங்கள் கிழமை காலையில் பள்ளிக்குச் செல்லும் ஸ்காட்டியை ஒரு கார் இடித்துவிட்டுச் சென்றுவிட மருத்துவமனையில் சேர்க்கப்பட்டுக் கண் விழிக்காதிருக்கிறான் அவன். மருத்துவர் ஆறுதலும், நம்பிக்கையும் அளித்தபடி இருக்கிறார். இரண்டு நாட்களில் மருத்துவமனையில் என்னென்னவோ நடந்து கொண்டிருக்கிறது. சோறு தண்ணீர் செல்லாமல் கணவனும் மனைவியும் மகன் கண் திறக்கக் காத்திருக்கின்றனர். இடையே கணவன் வீடு திரும்பும் ஒரு பொழுதில் ஓயாது அடிக்கும் டெலிபோனில் ‘கேக் எடுத்துக் கொள்ள வரவில்லையே’ என்று கேட்கும் குரல் கணவனுக்குச் சரிவர கேட்பதில்லை. திரும்பத் திரும்ப ஒலிக்கும் அழைப்பில் எரிச்சல் அடைகிறான்.

மருத்துவமனையிலேயே இருக்கும் மனைவியை வீட்டுக்குப் போய் சற்று ஓய்வெடுத்துக் கொண்டு, நாய்க்கும் உணவு கொடுத்துவிட்டு வா, ஆனால் ஃபோன் அடித்தால் எடுக்க வேண்டாம் என்று அனுப்பி வைக்கிறான் கணவன். அவளோ ஃபோன் அடித்து ஓய்ந்ததும் பயந்துகொண்டு மருத்துவ மனையை அழைத்துக் கேட்கிறாள், அங்கே ஒன்றும் நடப்பதில்லை. பிறகு மீண்டும் மருத்துவமனைக்குத் திரும்புகையில், எல்லாம் முடிந்திருக்கிறது, ஸ்காட்டி இறந்துவிடுகிறான். மருத்துவர் கையறு நிலையில் வருத்தம் தெரிவிக்கிறார். உடல் கிடைக்க தாமதம் ஆகும் என்ற நிலையில் நொறுங்கிப் போய் வீடு திரும்புகின்றனர் கணவனும் மனைவியும். மீண்டும் ஓயாது அடிக்கும் ஃபோன் மணிச்சத்தம் பேக்கரியில் இருந்து வரும் அழைப்பு என்று தெரிந்து அவரைச் சண்டை பிடிக்க இருவரும் விடிந்தும் விடியாத காலையில் ஓடுகின்றனர். அவரும் சண்டைக்குத் தயாராகிறார். ஆனால் இவர்கள் நிலை உணர்ந்து துயரத்தில் பங்கேற்கிறார். தனக்குக் குழந்தைகள் கிடையாது, 16 மணி நேரத்திற்கும் அதிகமாக ஒற்றை ஆளாக நகரத்து மனிதர்களுக்காக உணவு தயாரிக்க அங்கேயே உழலும் தன்னால் ஸ்காட்டியின் பிரிவைப் புரிந்து கொள்ள முடியும் என்கிறார். முதலில் அவர்களுக்குத் தேவை உணவு என்று வற்புறுத்திச் சொல்லி அவர்களது மூன்று நாள் பசியைத் தீர்க்க உணவு ரோல்களை எடுத்துக் கொடுத்துக் கொண்டே இருக்கிறார். ஆர்டர் செய்யப்பட்ட கேக் டெலிவரி செய்யப்படாது இருப்பது தனக்கு உறுத்தலான விஷயம் என்பதாலேயே திரும்பத் திரும்ப அழைக்க வேண்டியதாயிற்று என்கிறார். அவர்களும் சமாதானம் ஆகி அவரோடு பேசிக் கொண்டே இருக்கக் கதை முடிகிறது. ஒரு சிறிய நல்ல காரியத்தை இந்த உலகில் யாராவது ஒருவர் வேறு யாரேனும் மனிதர்களுக்காகச் செய்து கொண்டேதான் இருக்கின்றனர். புத்தகங்கள் ஓயாது அந்த வேலையைச் செய்துகொண்டிருப்பதாக எனக்குப் பட்டது.

டிசம்பர் மாத பெருமழை வெள்ளத்தில் இழந்த பொருள்களில் புத்தகங்களின் வலியும் வேதனையுமே அதிகம். இனி கிடைக்காது என்கிற மாதிரியான சில நூல்களைக் கண்ணீர் மல்க விடை கொடுத்து வெளியேற்றினோம். அருமையான மனிதர்கள் மற்றும் செல்ல பிராணிகள் இறப்பு ஏற்படுத்தும் துயரத்தை அப்போது நினைத்துப் பார்க்கத் தோன்றியது. உயிர்களின் தோற்றமும் மறைவும் தவிர்க்க இயலாதவை, ஆனால் நினைவுகள் அழியாதவை. சங்கிலித் தொடராக ஒரு விசை அந்த நினைவுகளைத் தலைமுறைகளைக் கடந்து கடத்துகிறது. ஒரு மரணத்தை அடுத்து அதே இல்லத்தில் புதிய உயிரின் பிறப்பில் கேட்கும் அழுகை புன்னகையை, மகிழ்ச்சியை குடும்பத்திற்கு மீட்டுக் கொடுக்கிறது. ஓர் இடைவெளி அற்ற மகிழ்ச்சியை, மன நிம்மதியை, ஆறுதலை, பகிர்வை, உரையாடலை, இசைவை, சமாதானத்தை, மன்னிப்பை, சகிப்புத் தன்மையை, விடுதலையை, தாமே ஆற்றுப் படுத்திக் கொள்ளத் தக்க ஒரு துயரப் பெருக்கை, தாமே ததும்பிக் கொண்டாடும் களிப்பை, காற்றை, வெளிச்சத்தை, நம்பிக்கையை, கனவுகளை, கண்ணீரை, பெருஞ்சிரிப்பை மனிதர்கள் சுதந்திரமாக அனுபவிக்க வாசிப்பு அருள்பாலிக்கிறது.

ஏப்ரல் 23, வாசகரை மிகுந்த பெருமிதத்தோடு தலை நிமிர்ந்து சமூகத்தைப் பார்க்க வைக்கிறது. புத்தகங்கள் இலேசாக செருமிக் கொள்கின்றன. நூலகங்கள் தங்களது திருவிழாவின் கொடியேற்றத்தைக் கொண்டாடுகின்றன. புத்தக ஆர்வலர்கள் ஒரு காதலர்களைப்போல் வீதியில் உலவும் காட்சியை உலக புத்தக தினம் படம் பிடிக்கிறது. இதுவரை வாசிப்பில் அத்தனை ஈடுபாடு காட்டதவர்களைப் பார்த்துக் கண் சிமிட்டி அருகே அழைக்கின்றன நூல்கள். ஆதலினால் காதல் செய்வீர் உலகத்தீரே, வாசிப்பின் மீது!

*****************

April 23, 2016
வைராக்கியம்

பவள சங்கரி

‘இளமையில் கல்’ என்றார்கள். கற்க ஆவல் கொண்ட மாணவர்கள் அனைவரும் தங்கள் விருப்பம்போல கற்க முடிகிறதா என்றால் இல்லை என்பதே வருந்தத்தக்க விசயம். அறிவும், ஆற்றலும் இருப்பவருக்கு பள்ளிக்கட்டணம் கட்டவோ, நோட்டுப் புத்தகம் வாங்கவோ வசதியில்லாமல் ஏழ்மை வாட்டி வதைக்கலாம். எல்லா வசதியும் இருக்கும் இளைஞனுக்கு படிப்பில் நாட்டம் இல்லாமல் போகலாம். பெற்றோரின் கட்டாயத்திற்காக மட்டுமே படித்துக்கொண்டு வருவான். இன்னும் சில குழந்தைகளுக்கோ பிறவிக் குறைபாடு போன்ற பிரச்சனைகளால் கல்விக்கூடம் செல்வது என்பதே பெற்றோரின் பகற் கனவாகிவிடுகிறது. இப்படி ஒரு சிலரின் வாழ்க்கையில் அடிப்படையான கல்வி என்பது ஒரு சரித்திரமாகவே மாறிவிடுகிறது. ஆனால் எப்படியும் கல்வி கற்றே தீரவேண்டும் என்ற வைராக்கியத்துடன் இருப்பவர்களுக்கு, அந்த எண்ணமே அவர்களுக்கு அதை ஏதேனும் ஒரு வழியில் அதை செயல்படுத்திவிடுகிறது.

மரம் ஏறத்துணியும் ஒருவருக்கு பின்னால் தாங்கிப்பிடிக்க கை கொடுக்கலாம். சற்றே மேலெழும்போது நம் கையை இயன்ற அளவிற்கு நீட்டி அவருக்கு உதவலாம். இன்னும் சற்று மேலெழும்பும்போது நம் குதிங்காலை சற்றே உயர்த்தி அவரைத் தூக்கிவிடலாம். இறுதியாக நம் தோளின்மீது தம் பாதம் பதித்து ஏறவும் பொறுக்கலாம். அதைத்தாண்டி அவர்தான் அந்த மரத்தின் உச்சத்தை அடைய முயலவேண்டும் எவருடைய உந்துதலும் இன்றி. அப்படி ஏறும்போது சுற்றி இருக்கும் கிளைகளின் வலிமையறிந்து அதன் உதவியுடன் மெல்ல மெல்ல உச்சியைத் தொடவேண்டும். நிறை, குறைகளைக்கடந்து தமது உச்சத்தை நெருங்கும் வைராக்கியமும், விடாமுயற்சியும் எவரிடம் இருக்கிறதோ அவர்கள் மட்டுமே வாழ்க்கையின் வெற்றிப்படியை நெருங்கவியலும்.

சிரீகாந்த் போலா என்பவர் ஐதராபாத் நகரைச் சார்ந்த பார்வையற்ற 24 வயது இளைஞர். இந்த வயதில் தொழிற்துறை வட்டத்தில் பெரிய கதாநாயகனாக வலம்வருபவர். ஆனால் அவருடைய கடந்த காலம் பற்றி நாம் அறிய வேண்டும். இவர் பிறந்தபோது இவருடைய பெற்றோர் ஆண்டொன்றிற்கு ரூ.20,000 மட்டுமே சம்பாதிக்கக்கூடியவர்கள். இப்படி குறையுடன் பிறந்த மகன் தேவையா என்ற சுற்றத்தின் அமில வீச்சுகளின் இடையில் தெய்வாதீனமாக உயிர் பிழைத்து சிரமத்துடன் வளர்க்கப்பட்டவர். தமது பள்ளிப்பருவத்தில் படிப்பை ஒரு தவமாக மேற்கொண்டவர். பத்தாம் வகுப்பு வரை 90, 100 என்று மதிப்பெண்களை குவித்துக்கொண்டிருந்தவருக்கு, பள்ளியிறுதி வகுப்பில் (+1) தாம் பார்வையிழந்தவர் என்ற காரணத்தினால் அறிவியல் பாடத்தை விருப்பப்பாடமாக எடுக்க அனுமதி மறுக்கப்பட்டது. ஆனால் இவர் சட்டப்படி நடவடிக்கை எடுத்துப் போராடி ஆறு மாதத்திற்குப் பிறகு அதே அறிவியல் படிப்பில் சேர்ந்ததோடு நில்லாமல் 12ம் வகுப்பில் 98 சதவிகிதம் மதிப்பெண்கள் எடுத்துக்காட்டினார். ஆனாலும் அதற்குப் பிறகும் ஓயவில்லை அவருடைய போராட்டம். ஐ.ஐ.டி, என்.ஐ.டி. என எங்கும் போட்டித் தேர்வுகளுக்கு அனுமதி கிடைக்கவில்லை. நம் நாட்டில் எந்த கல்வித்துறையும் அவருக்கு உதவ முன்வரவில்லை. அந்த இளைஞர் ஓயாமல் வெளிநாடுகளில் உள்ள கல்லூரிகளுக்கு தமது நிலையைத் தெரிவித்து விண்ணப்பித்தார். இறைவன் பார்வையும் அவர் முயற்சிக்கு ஒளியூட்டியது. உலகிலேயே தலை சிறைந்த நான்கு கல்லூரிகளான எம்.ஐ.டி., இசுடேன்ஃபோர்டு, பெர்க்கிலி, மற்றும் கார்னீகு மெல்லான் ஆகிய கல்லூரிகளிலிருந்து ஒருசேர அழைப்பு வந்தது. அமெரிக்க நாட்டில், எம்.ஐ.டி இன் உதவித்தொகை பெற்ற முதல் சர்வதேச பார்வையிழந்த மாணவர் என்பதும் குறிப்பிடத்தக்கது. 2012 இல் அமெரிக்காவிலிருந்து திரும்பி வந்தவுடன் அவர் போலாந்து (Bollant) தொழிற்சாலைகளை உருவாக்கி அதன் 60% தொழிலாளர்களாக மாற்றுத் திறனாளிகளையே நியமித்தார். 450 பணியாளர்களைக் கொண்ட இந்த நிறுவனம் இன்று 50 கோடி மதிப்புள்ளது என்பதோடு ரத்தன் டாட்டா அவர்களே இதில் முதலீடு செய்துள்ளார் என்பதும் குறிப்பிடத்தக்கது.

இன்னொருவரையும் இதுபோன்று குறிப்பிட முடியும். 2001 ஆம் ஆண்டு ஜூன் மாதம் கட்டப்பட்ட பிரபலமான கோவை ஜெம் மருத்துவமனையின் இயக்குநர் மருத்துவர் சி. பழனிவேல் என்ற உலகப்புகழ் பெற்ற அறுவைச்சிகிச்சை நிபுணர், ஆய்வாளர், கோவையில் இயங்கும் இரைப்பை குடல் மருத்துவ மருத்துவமனை, ஆராய்ச்சி மையத் தலைவர் பொறுப்பில் இருப்பவர். லேப்புராசுக்கோப்பி என்ற மருத்துவச் சிகிச்சை முறையில் பல நவீன தொழில்நுட்பங்களைக் கண்டுபிடித்து சாதனை படைத்துள்ளவர் இவர். பல ஆண்டுகளாக மருத்துவத் துறையின் ஒரு குறிப்பிட்ட அறுவை சிகிச்சை பயிற்சிக்காக பல்வேறு நாடுகளுக்குச் சென்று வந்துள்ளவர். லேப்புராசுக்கோப்பியில் நவீன தொழில்நுட்பங்களை மேற்கொண்டதோடு, ஏழை, எளிய மக்களுக்கும் அறுவை சிகிச்சைகளும், வாழ்க்கையை மாற்றியமைக்கும் மருத்துவங்களும் கிடைக்கும்படி செய்தவர். ஆம், மருத்துவர் பழனிவேல் அவர்களின் ஜெம் ( GEM) அறக்கட்டளை தொண்டு நிறுவனம் மூலமாக வறுமைக்கோட்டில் வாழும் மக்களுக்கு இலவச மருத்துவச் சிகிச்சையை வழங்குகிறது. இந்த அறக்கட்டளை அமைப்பு இரைப்பை குடலியல் மருத்துவமனையில் 20 படுக்கைகள் கொண்ட இலவச மருத்துவப் பிரிவை பராமரித்து வருகிறது. கோயம்புத்தூர் நகரைச்சுற்றி அடிக்கடி மருத்துவ முகாம்கள் நடத்தப்பட்டுவருகிறது. இவருக்கு வெளிநாடுகளிலிருந்தும் அடிக்கடி பயிற்சி வகுப்புகள் கருத்தரங்கம் என்று அழைப்புகள் வந்தவண்ணம் உள்ளன என்பதும் குறிப்பிடத்தக்கது. கடந்த 22 ஆண்டுகளுக்கும் மேலாக இந்த சிகிச்சை முறை பயன்பாட்டில் உள்ளது. சிசேரியன் அறுவைச் சிகிச்சை தவிர வயிறு சம்பந்தப்பட்ட அனைத்து அறுவை சிகிச்சைகளுக்கும் இந்த நவீன முறை அறுவை சிகிச்சை சிறப்பாக செயல்பட்டு வருகிறது. அறுவை சிகிச்சை முடிந்த ஓரிரு நாட்களில் நோயாளிகள் இயல்பு நிலைக்குத் திரும்புவதும், மருத்துவமனையில் அதிக நாட்கள் தங்க வேண்டிய தேவையும் இல்லை என்பதை இதன் சிறப்பாகக் கூறமுடியும்.

மருத்துவர்களுக்கு இந்த நவீன அறுவைச் சிகிச்சை குறித்த பயிற்சியை வழங்கும் இவர் அதனை எளிமையாக விளக்கும் விதமே அலாதியானது. முன் காலத்தில் கிரிக்கெட் விளையாட்டை ஒரு புறம் நின்று வேடிக்கைப் பார்த்து பந்து வரும் திசையை உன்னிப்பாகக் கணிக்கவேண்டும். ஆனால் இப்போதைய நவீன தொழில்நுட்ப முன்னேற்றத்தில் பந்து புறப்பட்ட இடத்திலிருந்து அது சேரும் இடம்வரை அதன் பயணிக்கும் பாதையை மிகத்துல்லியமாக காணமுடிவது போன்றதுதான் லேப்புராசுக்கோப்பி சிகிச்சை முறை என்று எளிமையாக விளக்கம் அளிப்பாராம்..

2003 ஆம் ஆண்டில் டாக்டர் பழனிவேல் எடின்பர்க் ராயல் கல்லூரியின் அறுவை சிகிச்சை மருத்துவர்கள் மூலம் பெல்லோசிப், 2006 இல் டாக்டர் பி சி ராய் தேசிய விருது, அமெரிக்காவில் ‘சர்வதேச ஒலிம்பிக் அறுவை சிகிச்சை ஒலிம்பிக் வெள்ளிப் பதக்கம்’ வென்றது போன்ற பல பெருமைகளைப் பெற்றவர்.

இதுமட்டுமன்றி, லேப்புராசுக்கோப்பி சிகிச்சை முறை சம்பந்தமாக மூன்று புத்தகங்களை எழுதி வெளியிட்டுள்ளார்: லேப்புராசுகோப்பி அறுவை சிகிச்சை கலை; “Text Book of Surgical Laparoscopy” “CIGES Atlas of Laparoscopic Surgery.”

இத்துனை சாதனை புரிந்த இவருடைய ஆரம்பக்கால வாழ்க்கை அந்த அளவிற்கு எளிமையானதாக இல்லை. ஒரு சாதாரண விவசாயக்கூலித் தொழிலாளியின் மகனாகப் பிறந்தவர் இவர். மிகப்பெரும் சவால்களைச் சந்தித்த பிறகே இந்த நிலைமைக்கு வந்திருக்கிறார் என்பதே உண்மை. ஆம், நாமக்கல் மாவட்டம், திருச்செங்கோடு அருகில் உள்ள ஒரு கிராமத்தில் பிறந்தவர் இவர். 1953 ஆம் ஆண்டில் இவர் குடும்பம் மலேசியாவிற்கு குடிபெயர்ந்தது. குடும்பத்தின் ஏழ்மை காரணமாக தமது கல்வியை ஆறாம் வகுப்பிலேயே நிறுத்திவிட்டு ஒரு சாராயக் கடையில் பத்து மலேசிய டாலர்களுக்கு வேலைக்குச் செல்ல வேண்டிய சூழல் ஏற்பட்டது. 18 வயது வரை வேலை பார்த்தவர் அதற்குமேல் கல்வி கற்கவேண்டும் என்ற பேரார்வம் உந்தித்தள்ள, 1967 இல் அங்கிருந்து கிளம்பி இந்தியா வந்து சேர்ந்தார். நல்லாசிகளின் விளைவாக பள்ளியில் சேரும் வாய்ப்பும் அமைந்து, தம்முடைய 21 ஆம் வயதில் எஸ்.எஸ்.எல்.சி வகுப்பு படித்து முடித்தார். கற்கள் ஏற்றும்போது ஏற்பட்ட காயம் காரணமாக சிதைக்கப்பட்ட ஒரு விரல் மற்றும் நிமோனியா காய்ச்சல் காரணமாக தனலட்சுமி என்ற ஆறு வயது அன்புச் சகோதரி உயிரிழந்தது போன்ற காரணங்களால் அவர் மருத்துவம் பயில விரும்பினார். பல சிரமங்களுக்கிடையில் மருத்துவப் படிப்பும் பயின்றவர், இசுடான்லி மருத்துவக் கல்லூரியில் தங்கப் பதக்கத்துடன் வெற்றிவாகையும் சூடி வந்தார். தாம் வந்த பாதையை மறக்காதவராக வசதியில்லாத பல நோயாளிகளுக்கு இலவச மருத்துவமும், குறைந்த கட்டண வசூலிப்பும் செய்து வருகிறார் என்பதும் குறிப்பிடத்தக்கது!

மேற்கண்ட இரண்டு சாதனையாளர்களும் தங்கள் வைராக்கியம் மூலமாகவே தடைகளை முறியடித்து வெற்றிவாகை சூடியுள்ளார்கள் என்பதே நிதர்சனம்!

April 22, 2016
சங்ககாலப் பெண் புலவர்களின் படைப்புத்திறன்

பா. மஞ்சுளா

சங்க இலக்கியம் உலகின் செம்மொழித் தகுதிபெற்ற உயர்வான இலக்கியம். அதில் காணப்படும் கருத்து வளம், கற்பனைச் சிறப்புத்தன்மை பொருந்திய பாடல்களின் செறிவு படிப்போர் உள்ளத்தைக் கவரும் வண்ணம் எக்காலத்திலும் அழியாப் புகழ்பெற்றது.

” இயற்கையிலே கருத்தாங்கி இனிமையிலே
வடிவெடுத்து “…. என்று .திரு.வி.க. கூறுவார்.

சங்கம் என்ற சொல்லுக்கு அவையம், புணர், கூட்டு, தொகை, கழகம், தமிழ்நிலை, என அகராதி விளக்கம் தரும். சங்க காலத்தில் வாழ்ந்த புலவர்கள் பல்வேறு காலகட்டத்தில் பாடல்களை இயற்றியுள்ளார். அக்காலத்தில் பெண்பாற் புலவர்கள் பலர் இருந்தனர். அவர்களின் புலைமைச் சிறப்புமிக்கது. வெள்ளிவீதியார், ஔவையார், நப்பசலையார் போன்றவர்கள் குறிப்பிட வேண்டிய பெண்பாற் புலவர்கள்.

வெள்ளிவீதியாரின் பிரிவாற்றாமை பாடல்…

தலைவியின் மனநிலை:

தலைவி தலைவன் தன்னோடு இல்லாத அந்த மாலைப்பொழுதில் அவனுடைய நினைவால் வாடுகிறாள். தன்னுடைய மனத்தை வெளிப்படுத்த முடியாமல் துன்புறுவதை

சோறு சொரி குடவயின் கூம்புமுகை அவிழ

வளிபரந்து ஊட்டும் விளிவில் நாற்றமொடு

மையிரும் பனைமிசைப் பைதல உயவும்

அன்றிலும் என்புறம் நரலும்… (நற்றிணை – 335)

என்னும் பாடலில் மூலம் சந்திரன் விண்ணகத்து தோன்றும். அலையினை உடைய கடலும் அடங்காது முழங்கும். கடல்நீர் கரையில் மோதிப் பெயரும் பலவகையான பூக்களை உடைய கடற்கரைச் சோலையில் தாழை முள்ளை உடைய இலையுடன் விளங்குகிறது. அது சோற்றைச் சொரிகின்ற கூம்பிய அரும்பினை மலரச் செய்யும். காற்று அப் பூமடலுள் புகுந்து மணத்தைப் பரப்பும். கரிய பெரிய பனைமரத்தில் இருந்து அன்றில் ஒலிக்கும். இவையன்றி விரலால் தடவி வருத்தமுற விருப்பதைச் செய்யும் நல்ல யாழும் நடுச்சாமத்தில் என் உயிர் உய்யாத நிலையில் இசைத்து நிற்கும். இவற்றில் எனது அன்புநோய் மிகப் பெரியது. அதனை நீக்க எனது காதலர் அருகில் இல்லையே என புலம்புவதாக அருமையான பிரிவாற்றாமைப் பாடல் பாடியுள்ளார் .

வள்ளுவர் இதனை…

காலை அரும்பிப் பகலெல்லாம் போதாகி
மாலை மலரும்இந் நோய்.

என்னும் குறளில் பிரிவால் வருகின்ற நோய் காலையிலே அரும்பாக இருந்து பகல் எல்லாம் மொட்டாக முதிர்ந்து பின்பு மாலையில் மலர்கின்றது என்கிறார்.

நாரையைத் தூது விடுதல்…

சிறு வெள்ளாங் குருகே! சிறு வெள்ளாங் குருகே!

துறைபோக அறுவைத் தூமடி அன்ன

நிறங் கிளர்தூவிச் சிறுவெள்ளாங் குருகே (நற்றிணை ….70)

என்னும் வரிகள் வெண்மையான நாரையே! நீ
எங்கள் ஊரில் உள்ள நீர்த்துறைகளுக்குச் சென்று
கெளிற்று மீனைத் தின்னுகிறாய். என்னுடைய
தலைவன் இருக்கும் ஊருக்குச் சென்று வருகிறாய்.
அவர் பிரிவால் நான் வாடுகிறேன் என்று சொல்லலாம்.
ஆனால், எங்கள்மீது அன்பு இருந்தும் மறந்து விடுகிறாய்
என்று தலைவன் பிரிவால் தலைவி நாரையைத் தூது
விடுவதாக இப்பாடல் அமைந்துள்ளது.

வெள்ளிவீதியார் கணவனைப் பிரிந்து வாழ்ந்தவர்.
கணவனைப் பல இடங்களில் தேடி அலைந்தவர்.
இதனை…

ஆதிமந்தி போலப் பேதுற்று
அலந்தனென் உழல்வென் கொல்லோ… (அகநானூறு …..45)

என்னும் பாடலில் தோழியிடம் தலைவர் தன்னை விட்டுப்பிரிந்து, வாகைமரத்தின் முற்றிய காய் நெற்றுகள் கூத்தரின் பறைபோல விட்டுவிட்டு ஒலிக்க, வெப்பம் மிகுதியான பெரிய காட்டுவழியாக மக்கள் நடமாட்டம் இல்லாத நிலையில் யானைகளைக் கொல்லும் புலி திரிகின்ற வழியைக் கடந்துசென்றார். அவர் பிரிவால் என்மீது பசலை பரவியது. காவல் மரமாகிய புன்னையை அன்னி என்பவன் வெட்டி வீழ்த்தியபோது ஆரவாரம் ஏற்பட்டது. அதைக்காட்டிலும் ஊர்மக்கள் எழுப்பிய அலர் எங்கும் பரவியது. ஆட்டனத்தியின் காதலனைக் கடல்கொண்டு சென்றபோது அவள்பெற்ற துன்பம்போல நானும் பெற்றேன் .

பசந்தாள் இவள்என்பது அல்லால் இவளைத்
துறந்தார் அவர்என்பார் இல் (குறள்.1188)

தலைவன் பிரிவால் பசலை நிறம் அடைந்தாள் என்று பழி சொல்வது அல்லாமல், இவளைத் தலைவன் விட்டுப் பிரிந்தான் என்று கூறுபவர் ஊரில் இல்லையே… என்று வருந்துகின்றாள்.

தொல்காப்பியர் பிரிவின் நிலைகளைக் கூறும்போது,

ஓதல் பகையே தூதிவை பிரிவே (தொல்-971:பொருள்) என்கிறார்.

இக்காலத்தில் பெண்பாற் புலவர்கள் தங்களின் எண்ணக் கருத்துகளையும் தலைவன்மீது கொண்ட காதலையும் அழகியமுறையில் பதிவுசெய்து உள்ளார்கள். இதில் வெள்ளிவீதியார் பாடல்களின் மூலம் பழங்கால மக்களின் பழக்கவழக்கம் மற்றும் ஆட்டனத்தி ஆதிமந்தி வரலாற்று நிகழ்வுகளை அறியும் வாய்ப்பாக பாடல்கள் அமைந்துள்ளன. ஒருபெண் என்பவள் தலைவன் தன்னை விட்டுப்பிரியும் நேரத்தில் அவள்படும் துயரத்தைப் பாடல் மூலமாகக் கொண்டுவந்து பசலைநோயின் தன்மையைக் கண்முன்னே கொண்டுவரும் அவரது வாழ்வியல் அனுபவத்தை விளக்கும்விதம் மிகவும் அருமையான ஒன்றாகும்.

ஔவையின் விநாயகர் அகவல்:

சித்தர் இலக்கியத்தில் குறள் தனியானதோர் பெருமை பெற்று விளங்குவது போலவே, அவ்வை இயற்றிய விநாயகர் அகவலும் பெருமைபெற்று விளங்குகிறது. குறட்பாவை ஆசான் என்றும் அகவலை அன்னை என்றும் அழைப்பது சித்தர் மரபாகும். இரண்டு நூல்களுமே சித்தர்களின் ஞானத்தை உள்ளடக்கிய கவிக்களஞ்சியங்களாக இருப்பினும் முன்னதை உபதேசிக்கிற குரு என்றும் பின்னதைப் பக்திஅமுதம் ஊட்டும் அன்னை என்றும் சித்தர்கள் போற்றி வந்திருக்கிறார்கள்.

பகுப்பு முறைகள்:

அகவல் 72 வரிகள் உடையது. தோத்திர வழிபாடு செய்யும் பக்தர்களில் பலரும் தங்கள் பாராயணத்தில் முக்கிய இடத்தை விநாயகர் அகவலுக்குத் தருகிறார்கள். இது ஒரே பாடலாக யாக்கப்பட்டு, தொடக்கம்முதல் முடிவுவரைத் துதி்ப்பாடலுக்குள்ளே ஞானத்தைக் குழைத்துத் தருகிறது. அகவல் எனினும் மனம் ஒடுங்கிய நிலையில் ஓதுதல் எனப் பொருள்படும். சொல்லுதல் அல்லது மொழிதல் என்பதைவிட அகவுதல் என்ற சொல்லுக்கு இப்படி ஒரு சிறப்பு உண்டு.

சிறப்பு:

விநாயகருடைய பெருமையை எடுத்துச் சொல்வதோடு, யோகிகள் வழிபடுகின்ற ஞானச் சின்னங்களை வரையறைசெய்து வகுத்துக்கூறுவது விநாயகர் அகவலின் தனிப்பெரும் சிறப்பாகும்.

திருமுருகாற்றுப்படை என்னும் நக்கீரர் படைப்பிலும் இந்த நுட்பங்கள் நன்கு பயின்றுவருவதையும் புலவர் உலகம் நன்கு அறியும்.

சித்தர்களின் ஞான நுட்பம் அகவலில் இருந்தாலும், வேறு தனிச்சிறப்பான தன்மையும் இதற்கு உண்டு.

முதலாவது சிறப்பு மொழிஎளிமை; இரண்டாவது இசைப்பண்பாகும்; மூன்றாவது அதனுடைய மந்திர ஆற்றலாகும்.

சீதக் களபச் செந்தாமரைப்பூம்
பாதச் சிலம்பு பலஇசை பாட

திருவடியைச் செந்தாமரை என்று அழைப்பது ஓர்
உயர்ந்த தமிழ் மரபாகும். தாமரை சேற்றில் மலர்வது;
சேற்றில் மலர்ந்தாலும் செம்மலராகப் பூப்பது இம்மலரின்
சிறப்பாகும். இதுவே வெண்டாமரையாகும்போது
சின்னமான வெண்மையாக மலர்கிறது. அழுக்கிலிருந்து அழகும், அள்ளலிருந்து தூய்மையும் பிறக்கின்றது என்பது தத்துவம். இதன் உட்பொருள், எல்லா அழகும் அழகின்மையிலிருந்து உதித்து மேலெழுந்து நிற்கிறது என்ற தத்துவம் உள்ளடக்கம் உடையது. ஒரு பானை சோற்றுக்கு ஒரு சோறு பதம் என்பார்கள். இந்த ஒரு வரியே இவ்வளவு சிறப்புடையது என்றால் முழுவதும் எவ்வளவு அழகான உட்பொருள் கொண்டது!

விநாயகர் அகவல் பிறந்த கதை:

ஔவையார் விநாயகருக்குப் பூசை செய்யும்போது இடையில் சேரமான் பெருமாள்நாயனார் வெள்ளை யானையின் மீது திருக்கயிலாயம் போகும்போது ஔவையார் மீது கொண்ட பற்றின் காரணமாக அவரையும் அழைக்க, அவர் நான் விநாயகர் வழிபாடு முடிந்துதான் வருவேன் என்று கூற அவர்கள் இவரை விட்டுவிட்டுச் சென்றார்கள். ஆனால் அகவலை முழுவதும் கேட்ட விநாயகர், ஔவையாரைத் தனது துதிக்கை மூலம் தூக்கி ஒரே நிமிடத்தில் கயிலை சேர்த்து விட்டார். நாயனாருக்கு முன்பே ஔவையார் கயிலாயம் சென்றார்.

நிறைவாக…

சங்க காலப் பெண்களின் படைப்புகள் காதல் மட்டுமன்றி ஞானத்தையும் உள்ளடக்கமாய் உடையவை. அறம், பொருள், இன்பம், வீடுபேறு உடையது நமது தமிழர் இலக்கியம். அதில், காதலைப் போற்றும் பெண்புலவர்கள் ஞானத்தையும் வியப்பூட்டும் ஒன்றாகப் படைத்து, அதில் மெய்ஞ்ஞானமாகிய பக்தியைப் படைத்தவிதம் மிகவும் அருமையான ஒன்றாகும்.

April 22, 2016
கேசவ் வண்ணம் – கிரேசி எண்ணம்

அற்புதம் கேசவ்….ரமண முனியும் தங்களது வேங்கட ரமணக் கனியும் இணைத்துப் பார்க்க வைத்தது இந்த ஓவியம்….கண்ணனுக்கு செல்லப் பசு ‘’கங்கி’’ (டோங்க்ரே மகராஜ் பாகவதம் படித்து அறிந்தது) என்றால் ‘’ரமண முனிக்கு’’ செல்லப் பசு ‘’லஷ்மி’’….தனது ‘’ஆயிக்கு’’(அம்மா அழகம்மை) மோட்சம் அளித்து கோயில் கட்டிய ரமண முனி, தனது செல்லப்பசு ‘’லஷ்மி’’க்கும் மோட்சம் அளித்து கோயில் கட்டினார்….கண்ணனோ ஒருபடி மேலே போய் தங்கள் மூலமாக ‘’கங்கி’’க்கு தினமும் மோட்சம் அளிக்கிறார்….அகந்தை மனமாம் ஆனை(நானை)யை அடக்கியவர் ஸ்ரீ ரமணர்….கம்சனின் குவலயாபீடம் என்ற ஆனையை அடக்கியவர் ஸ்ரீ கண்ணபிரான்….அந்த பெட்டர் நான் பட்டர் கண்ணனின்றி வேறு எது….’’அஹம் பிரும்மாஸ்மி’’….I AM THAT I AM….இப்படி விதவிதமாக யோசிக்க வைக்கிறது தங்களின் ஓவியம்….வெண்பாவுக்கு வருவோம்….

‘’ஆவுக்(கு) ஒருகோயில், ஆயிக்க்(கு) ஒருகோயில்,
சாவுக்கு மட்டும் சமாதிதந்த, -மாவுத்தன்,
ஆனை மனமடக்கு சோணை ரமண(ர்)அறி(அரி என்றும் கொள்ளலாம்)
நானைப் படைத்(து)உமிழும் நந்து(செல்லமாக நந்தகுமாரனை)….கிரேசி மோகன்….

சமாதி -பிரம்ம நிலை மோட்சம்….

April 22, 2016
நினைவு நல்லது வேண்டும் – நம்பிக்கைத் தொடர்

முனைவர் நா. சங்கரராமன்

1. கொண்டாடி மகிழ்வோம் குழந்தைகளை ….

“நீங்க தமிழ் வாத்தியார்தானே ?. பரமார்த்த குருனா யாரு ?அவரப் பத்தி கதை சொல்லுங்க … நாளைக்கு எங்க மிஸ் கதை சொல்லணும்னு சொல்லிருக்காங்க ” என்றபடியே வீட்டிற்கு வந்த மழலையை அமரவைத்துவிட்டு அவருக்கு இப்படி ஒரு கதையை படிக்கச் சொல்லி அனுப்பிய ஆசிரியையை மனதார வாழ்த்திவிட்டு ஒரு கதையைச் சொல்லிவிட்டு பெருமிதமாக அனுப்பினேன் குழந்தையை…

நினைவுகள் சற்று பின்னோக்கி ஓடியது. “முட்டாள் , மூடன் , பிலேச்சன் …” என்று ஆரம்பித்து பரமார்த்த குரு கதையை எங்கள் தாத்தாவிடம் படுத்துக்கொண்டே கேட்போம். ஒரே கதைதான் ஒவ்வொரு நாளும் விதவிதமாகச் சொல்வார். நாங்களே “நேத்து சொன்ன கதையையே சொல்லுங்க” என்றே விரும்பிக்கேட்ட கதைகள் அவை . தெனாலிராமன் , அம்புலிமாமா , மரியாதை ராமன் , விக்கிரமாதித்தன் என்று நீண்டு கொண்டே போகும். ஏழுகடல் தாண்டி ஏழு மலை தாண்டி அவர் சொல்லும் கதைகள் எங்களை வேறொரு உலகத்திற்கே அழைத்துச் செல்லும். மறுநாள் வகுப்பறை நண்பர்களிடம் அந்த கதையை சொல்லி கதாநாயகனாகத் திரிவோம். நன்னெறிக் கதைகள் அனைத்தும் நம்மை நல்வழிப் படுத்திய காலம் உண்டு .

“பகுத்துண்டு பல்லுயிர் ஓம்புதல் “என்று சத்துணவை வாங்கிவிட்டு பக்தியும் பசியும் கலந்த குரலில் சொல்லிவிட்டு அருகில் இருக்கும் குருவிக்கும் மைனாவிற்கும் கொடுத்து சாப்பிட்ட காலம் எல்லாமே ஞாபகம் வந்தது.

தாத்தாக்களையும் பாட்டிகளையும் முதியோர் இல்லங்களில் விட்டுவிட்டு சிடி வாங்கி ரைம்ஸ் கேட்கும் குழந்தைகள் நன்னெறிகளை எப்படிக் கற்றுக் கொள்ளும்?. பள்ளிக்கு சென்றால் கதைகள் பேச நேரமில்லை.பேசினால் அபராதம் .கடிவாளம் கட்டப்பட்ட குதிரை போன்ற மதிப்பெண் பயணம் …

காலையிலேயே குழந்தைகளை விட பரபரப்பாக இயங்கும் அப்பா அம்மாக்களை பார்க்கையிலே சற்றே பரிதாபமே மேலிடுகிறது. எந்தஅபாகஸூம் நன்னெறிகளைச் சொல்லித் தருவதில்லை.உங்கள் குழந்தைகளோL நேரத்தைசெலவிடுங்கள்.நேற்றைய குழந்தைகளான இன்றைய பெரியவர்களிடம் சற்று பேச விடுங்கள் “ஹோம் வொர்க் செய்யணும் .டியூசன் போகணும் ” என்று உங்களின் இயந்திர தனத்தை அவர்களின் மீது திணிக்காதீர்கள்

எனக்கு ஒவ்வொரு விடுமுறையும் இப்படித்தான் ஆரம்பிக்கும் … இந்த கடிதம் முதலே தொடங்கும் கொண்டாட்ட தருணங்கள் ..

” அன்புள்ள பாவாவுக்கு ஆத்ம நமஸ்காரம் …

எனது ஆசீர்வாதங்களை தங்கைக்கு கூறவும் . நிற்க .

இப்பவும் குழந்தைகளுக்கு பள்ளி விடுமுறை விட்டிருப்பார்கள் என்றே நினைக்கிறேன். நான் வரும் சனிக்கிழமை வந்து குழந்தைகளையும் வெங்கியையும் ஊருக்கு கூட்டிச் செல்கிறேன். மாப்பிள்ளையிடமும் தகவலை தெரிவிக்கவும்.அவருக்கும் எனது ஆசீர்வாதங்கள் . இயன்றால் தாங்களும் தங்கையும் ஊருக்கு வருமாறு வேண்டுகிறேன் ……”

என்றபடியே அந்த கடிதம் தொடரும் . விடுமுறை விட்ட நாளிலிருந்து இந்த கடிதத்தை நாங்கள் எதிர்பார்த்து காத்து கிடப்போம் . அம்மாவின் அப்பாவான தாத்தா அப்பாவின் அப்பாவான தாத்தாவுக்கு எழுதும் கடிதம் . ஒவ்வொரு ஆண்டும் ஏப்ரல் இறுதி வாரத்தில் வரும் இந்த கடிதமே எங்களுக்கு பாஸ்போர்ட் விசா எல்லாமும் . அன்றிலிருந்து அம்மாவின் முகத்தில் கூடுதல் பிரகாசம் காணலாம். சிறிய வயதிலேயே அம்மாவை இழந்த 3 பெரியப்பாக்கள் , பெரியம்மா , அண்ணன் , தங்கைகளுடன் குறைந்த பட்சம் 30 நபர்களாவது இருக்கும் அந்த வீட்டிலிருந்து வந்தவள் . இங்கேயும் கூட்டத்திற்கும் பாசத்திற்கும் குறைவில்லாமல் இருந்தது . இரண்டு அத்தைகள் ,3 சித்தப்பாக்கள் குழந்தைகள் என வீடே அமர்க்களமாக இருக்கும் கோடை விடுமுறையில் …

அருப்புக்கோட்டை அருகில் இருக்கும் குருந்தமடம் தான் எங்கள் அம்மாவின் ஊர். தினமும் 6 முறை மட்டுமே பஸ் வரும் என்ற வகையில் அமைந்த ஒரு கிராமம். அங்கு தாத்தாவின் வீடு . முன் வாசலில் இருந்து பின் வாசலுக்கு நடை பயிற்சியே மேற்கொள்ளலாம் . அத்தனை பெரிய வீடு . எனக்கு விபரம் தெரிந்த நாட்களிலே அந்த வீட்டினில் மின்விசிறி , டிவி ஏதும் கிடையாது . ஆனால் பொழுது எப்படி போகுமென்றே தெரியாது .

கடிதம் எழுதியபடியே தாத்தா வருவார் நெல்லைக்கு . மஞ்சள் பையிலே சாத்தூர் சேவு வாங்கிக்கொண்டு மல்லிகைப்பூ , கனகாம்பரம் என்று பார்சலோடு . அவர் வருவதற்குள்ளாகவே அம்மா ஒரு டிரங்கு பெட்டியில் என் அண்ணன் , தம்பி , தங்கை என்ற 5 பேருடைய துணிகளை எடுத்து வைத்திருப்பாள் .

” தாத்தா நாம எப்போ ஊருக்கு கிளம்புவோம் ” என்ற கேள்வியை அவர் வந்தவுடன் ஆர்வ மிகுதியால் கேட்டு பல நேரங்களில் அம்மாவிடம் திட்டு வாங்கிய அனுபவமும் எனக்கு உண்டு … தாத்தா வந்து இரண்டு நாட்கள் எங்கள் வீட்டில் இருப்பார் . அப்பா தாத்தா மிகச்சிறந்தவர் என்றாலும் எப்போதாவது வரும் அம்மா தாத்தா மீது தனிப்பிரியம் தானே . அவரை மாலை நேரங்களில் கோயிலுக்கு அழைத்துச் செல்வது . எங்கள் நோட்டு புத்தகங்கள் காண்பிப்பது .அவர் எங்களுக்காக வாங்கி வந்த பொம்மைகளை பக்கத்து வீடுகளில் காட்டி பெருமிதம் கொள்வது என்ற அலப்பரை கொஞ்சம் நஞ்சமல்ல…

மறுநாள் காலையில் தாத்தாவோடு பேருந்திலே கிளம்பியதுமே சன்னலோர சீட்டு ஒரு உலகப்போர் நடக்கும் எங்களுக்குள்ளே . அதன் பின்னர் சாமாதனம் செய்து மூன்று பேருக்குமே அந்த சன்னலோரத்தில் அமரும் படி ஏற்பாடு செய்து வண்டி நகரும் . அருப்புக்கோட்டையில் வந்து இறங்கும்போது மதியமாகும்

பேருந்து நிலையத்திற்கு எதிரில் இருக்கும் ஆஞ்சநேய விலாசில் பார்சல் வாங்கி விட்டு வீட்டில் பெரிய தாத்தா , மாமா , குழந்தைகள் பார்க்கும் ஆர்வத்தில் பேருந்து அந்த ஊரின் கம்மாய் தாண்டி பத்ரகாளியம்மன் கோவிலைத் தொட்டு குருநாதர் கோவிலில் திரும்பும்போதே அங்கிருந்து பார்த்தால் எங்களை ஆர்வத்தோடு வரவேற்கும் அத்தை பையன்கள் பார்க்கையில் மனதும் ரெக்கை கட்டிப் பறக்கும் . அம்மாவை தாத்தாவை விட்டு ஓடிப்போய் அவர்களோடு கைகோர்த்து விளையாட ஆரம்பித்து …

கல்லா மண்ணா , கண்ணாமூச்சி , தாயம் , ஓடிப்பிடிச்சி ,செவன்ஸ்டோன் ,பம்பரம் ,கோலிக்காய் என்ற வகையில் எல்லையில்லா விளையாட்டுகளோடு இருட்டிய பிறகு வேண்டிய திரைபோல கட்டி சினிமா போல நாங்களே பொம்மலாட்டம் நடத்துகையில் சாதம் பிசைந்து குழந்தைகள் அனைவரையும் பெரியவர்களோடு அமர வைத்து கையிலே உருளை உருளையாக தந்து அது ஒரு சொர்க்கம் என்பதெல்லாம் அப்படித்தானே இருந்திருக்க முடியும் …

அதற்குள் அந்த ஊர்த்திருவிழா மேமாத இறுதியில் நடக்கும் . நாங்கள் ஊருக்கு கிளம்பும் ஒருவாரம் முன்னர் …அரிச்சந்திர மயான காண்டம் , முத்தாரம்மன் , வள்ளி திருமணம் இவற்றில் ஏதாவது ஒன்றும் அடுத்தடுத்த நாட்களில் ஆடலும் பாடலும் , வில்லுப்பாட்டு , திரைகட்டி திரைப்படங்கள் போடுவது என்ற படி ஒவ்வொரு நாளும் களைகட்டும் . பொங்கல் அன்று அப்பாவும் வந்து சேருவார் . அதுபோக இன்னமும் உறவுகள் எல்லாம் அங்கே சேரும்போது குறைந்த பட்சம் அந்த வீட்டில் 60 நபர்களாவது இருப்பார்கள் . அங்கு கேஸ் கிடையாது . விறகு கரி அடுப்புதான் . மிக்ஸி , கிரைண்டர் எதுவும் கிடையாது ஆனாலும் வேளாவேளக்கு சுவையான உணவு கிடைக்கும் . காரணம் அத்தைகள் , சித்திகள் , சித்தப்பாக்கள் , மாமாக்கள் அனைவரும் கூடி உழைத்தனர். ஒவ்வொரு முகத்திலும் கபடமற்ற புன்னகை தவழும் . ஒருவருக்கொருவர் பரிந்து பேசி ஆனந்த கண்ணீர் அவ்வப்போது எட்டிப் பார்க்கும் …

பள்ளிப்பருவம் முடிந்து கல்லூரி வேலை என்று வந்தபின் தாத்தா பாட்டிகள் அனைவரும் காலம் சென்ற பின் கூடுதல் கொஞ்சம் கொஞ்சமாக குறைந்து நவீனத்திற்கு ஆட்பட்டு வெறும் புகைப்படங்கள் எடுப்பதே கொண்டாட்டமாக மாறிவிட்ட இன்றைய சூழலில் ஏதோ இழந்துவிட்டதான ஏக்கம் மட்டும் மனதிலே ….

விழாவெல்லாம் முடிந்த பின் ஊருக்கு கிளம்பும் நாளிலே கண்ணீர் மெதுவாக எட்டிப்பார்க்கும். கருவேல மரங்களைத்தாண்டி பேருந்துகள் கடக்கும் போது கனவுகளை அங்கேயே விட்டுவிட்டு வருவோம் அடுத்த விடுமுறைக்காக …

அப்போது அப்படி இருந்ததாலே இப்போதும் மகிழ்வோடும் நம்பிக்கையோடும் இயங்க முடிகிறது . பள்ளிப்பருவம் விடுமுறைகளிலேதான் நம் குழந்தைகள் கொண்டாடி மகிழ இயலும் .உறவுகளின் உன்னதங்களை உணர முடியும் . இப்போதும் அவர்களை இயங்கவிடாமலும் சிறப்பு வகுப்புகள் எனும் பெயரில் அவர்களுடைய சுதந்திரத்திற்கும் மகிழ்வான தருணங்களுக்கும் நாம் இடையூறாகி விடக்கூடாது.

தாத்தாவின் மடியில் படுத்துக்கொண்டு கேட்ட பரமார்த்த குரு கதைகளின் சுகத்தினை எத்தனை பணத்தாலும் பெற்றிட முடியாது என்பதை உணர வேண்டும் ….

கொண்டாடுவோம் கோடையை
குழந்தைகளோடு

உங்கள் குழந்தைகளோடு செலவிட நேரம் ஒதுக்குங்கள் அதைவிட முக்கியம் ஒதுக்கிய நேரத்தில் அன்போடு நடந்து கொள்ளுங்கள் அம்புலி மாமாவை அழ வைத்துவிடாதீர்கள்..

தொடருவோம்

April 22, 2016
அனுமன் அறுபது – (ஒரு கவிதை மாலை – 5)

க.பாலசுப்பிரமணியன்

ஐந்தாம் பத்து

கருணைக் கடலே ! கண்கள் போற்றி

காக்கும் வலிமையே ! கரங்கள் போற்றி !

காற்றின் மைந்தா ! கால்கள் போற்றி !

காத்திட வருவாய் ! கண்மணி போற்றி !

வானர வடிவம், மானுட தேகம்

வானவர் குலத்தின் வளர்பிறைத் தெய்வம்!

வல்லவர் நல்லவர் தேடிடும் ஞானம்

வடையையும் மாலையாய் அணிந்த வினோதம் !

குளிர்ந்த பார்வை கூப்பிடும் அருகில்

குறைவில்லா அழகு கூடிய நிறத்தில்

குழந்தையின் சிரிப்பாய் குவிந்த முகத்தில்

குறைகள் மறையும் பார்த்த தருணத்தில்.!

பணிவுக்குப் பாசுரம் நீ படைத்தாய் !

பண்புக்கு இலக்கணம் நீ கொடுத்தாய் !

பக்திக்கு ஆலயம் நீ அமைத்தாய் !

பரமனின் உறவை நெஞ்சினில் வைத்தாய் !

சீதையின் தலைவனைச் சிந்தையில் வைத்து

சிந்தையில் என்றும் பக்தியை வைத்து

பாதையில் என்றும் பண்பினை வைத்து

சேவடி தன்னில் சேவைகள் செய்தாய் !

குறை தீர்க்க முன் நிற்கும் குணசீலா !

நிறை நிலவாய் அருள்சுரக்கும் ஆனந்தா !

மதி கொடுத்து விதிகடத்தும் வல்லோனே !

கதி கொடுத்து வினைதீர்ப்பாய் நல்லோனே !

வானில் செல்கையில் வானுக்கு அழகு

நீரினைத் தாண்டிட நீருக்கு அழகு

நிலத்தில் நின்றால் நீயே அழகு

நித்தம் உந்தன் நினைவே அழகு !

வாரணம் ஆயிரம் தோளுடை வலிமை

பாரினில் நிகரில்லை பணிவின் மேன்மை

நீருடை மேகமாய் நித்தமும் அருள்வாய்

வாலுடை வேந்தே! வருவாய் விரைந்தே !

அலையாத மனமும் அசையாத நினைவும்

அன்பான உணர்வும் அருளுடை நெஞ்சும்

அழியாத செல்வமாய் , ஆரியன் நினைவும்

அருளிட வேண்டினேன் அஞ்சனை மகனே !

கண்களில் பக்தியும் கைகளில் சக்தியும்

மனத்தில் வேகமும் மதியில் யூகமும்

சொல்லில் பண்பும் சோர்விலா அன்பும்

சேர்த்திட அருள்வாய் சீதையின் செல்வா !

April 22, 2016
மனுமுறை கண்ட வாசகம் …. நற்சிந்தனை ……2

மஞ்சுளா வள்ளலார்

நட்டாற்றில் கையை நழுவ விட்டேனோ ….

இந்தியா சிந்தனை மரபில் முக்கியமான ஞானியாகக் கருதப்படுபவர் வள்ளலார் அவரிடம் பிரதானமாக இருந்த குணம் கருணை ,அதுவே அனைத்து குணங்களில் அடக்கம் எனலாம் . எங்கோ ,யாரோ அடிபடுகிறபோது அவர்களுக்காக நாம் கண் சிந்துவது கருணை.மனிதனிடம் இருக்கும் குணமே அவனை தீர்மானிக்கிறது. நம்மைக் காயப்படுத்தும் எதையும் மற்றவர்களுக்கு செய்யக்கூடாது என்று மகாபாரதத்தில் அனுசாசன பாவத்தில் காணலாம் நமக்குத் தீமையானதை ஒரு போதும் அடுத்தவர்களுக்கும் ஆற்றக்கூடாது என்று பத்மாபுரணமும் குறிக்கின்றது .

இந்த உலகத்தில் மனிதனின் உண்மையான குணம் யாரும் இல்லாத இடத்திலும் தவறு செய்யாது இருத்தல் ஆகும். நம்மை யாரும் கவனிக்கவில்லை என்ற எண்ணம் வரும்போது நமது உள்ளுணர்வு விழிப்படைந்து உள் தூங்கும் மிருகம் விழித்து, இது தான் ‘தகுந்த சமயம் ‘என்று கிடைக்கும் சந்தர்ப்பத்தைப் பயன்படுத்தும் .அப்படி தவறு செய்தவர்கள் பெயர்களை பட்டியல் இடும்போது நினைவில் வருவார்கள் ஏராளமான நபர்கள் முதலில் ஏசுநாதர் காட்டிக்கொடுத்த அவரது சீடன். ,கட்டபொம்மனையும் தூக்கிலிடச் செய்த எட்டப்பன் பெரியபுராணத்தில் வரும் முத்துதத்தன் ,என பலரது வரலாறுகள் நமக்கு நம்பிக்கை துரோகத்தால் விளைவாக தோன்றிய கதைகளை இன்றும் கூறும் .

எனவே தான் வள்ளலார் இரண்டாவது மிக முக்கியமான ஒன்று மனிதரின் குணம் என்று மனுமுறை வாசகத்தில் கூறினார் . இதில் மனுநீதி சோழனின் மகன் பசுவின் கன்றை தோர் காலில் கொன்ற நிகழ்வை வைத்து , சமதர்மநீதியை உலகிற்கு உணர்த்தியவர் ஒருவர் நம்பி நம்முடன் வரும்போது அவரே கைக்கழுவிவிடுவது எவ்வளவு பெரிய பாவம் அந்த பாவத்துக்கு பிரதிபலனாக நாம் புண்ணியம் எவ்வளவு செய்தாலும் அது பயன் இல்லை வாழ்வில் மிக பெரிய பாவத்தில் ஒன்று நம்பிக்கை கொண்டவர்களுக்கு துரோகம் செய்வது

நல்லது செய்த லாற்றீ ராயினும்
அல்லது செய்த லோம்புமின் ….. என்று புறம்

கூறுகிறது. மேலும் ஔவையின் ஆத்திச்சூடியில்

குணமது கைவிடேல். என்கிறாள் நல்ல குணமே மற்றவர்களையும் அரவணைத்துச் செல்லும் .
நல்ல குணம் உடைய சான்றோர்களைச் சார்ந்த நட்புக் கொள்ள வேண்டும்.

தொடருவோம்

April 22, 2016