பயணம்

[download id=”கசடதபற”]பயணம்

உடல் நலத்திற்குக் கேடெனும்
அறிவிப்பு வேகத்தடையிருந்தும்
வாடிக்கையாளரை ஏற்றிச் சுமந்து
விற்பனையில் வேகமாக பயணிக்கும்
போதை விட(ஷ)ப் பொருள்கள்..

தலை வெடித்துச் சிதறும்
மரணத்தூது வருமென அறிந்தும்
தலைக்கவசம் அணியாது
சாலையில் சுய ஓட்டுநராய்
வண்டி பறக்க பயணிக்கும்
இளைய மட மனங்கள்..

சட்டம் வகுத்து தரும்
நெறிகளைச் சட்டைசெய்யாமல்
அசட்டையாய் சாலையில்
பேசியும் இசை நுகர்ந்தும்
கைபேசியுடன் உறவாடியபடி
பயணிக்கும் பாதசாரி
பகுத்தறிவு ஜட உயிர்கள்..

ஒன்றும் அறியாத
குழந்தைகளா
நினைவிழப்பு நோயின்
வயது முதிர்வா
பகுத்தறியத் தெரியாத
இயற்கை சதிசெய்த
பிறவிப் பைத்தியங்களாயென
அறிந்துகொள்ள இயலாதவாறு
மூடர்களாய் மூடப்பழக்கவழக்கத்தில்
இணைந்து பயணிக்கும்
கூடயிருந்தே குழிபறிக்கும்
கபட உறவுகள்..

பொய் முகம் கழற்றி
பொலிவான பகுத்தறிவு தலைக்கவசமிட்டு
பொங்கும் அன்போடு நிலைக்கும்
பொறுமை பண்பு வண்டியை
பொறுப்பாய் இயக்கினால்
பொன்னாகும் வாழ்க்கைப் பயணம்..!!

… நாகினி

பதிவாசிரியரைப் பற்றி

நாகினி

இறைவன் உண்டு என்ற ஒரே நம்பிக்கைத் தவிர மற்றபடி ஆன்மீகத்தில் அதிக நாட்டம் இல்லாத பெண்மணி. முதுகலை, இளநிலை கல்வியியல், ஆய்வியல் அறிஞர், பட்டம் பெற்ற ஆசிரியை. எனது கதைகள்,கவிதைகள் .. காற்றுவெளி, மகாகவி, இனிய நந்தவனம் ஆகிய சிற்றிதழ்களிலும், பெரியார்பிஞ்சு இதழில் குழந்தை இலக்கியமும், கவிச்சூரியன் இதழில் எனது ஹைக்கூ படைப்புகளும் வெளிவந்துகொண்டிருக்கின்றன.
மேலும் முத்துக்கமலம், வார்ப்பு, வலைத்தமிழ், வல்லமை இணைய இதழ்களிலும் எனது கவிதைகள் வெளிவருகின்றன.

See author's posts