தாகூரின் கீதங்கள் – 7
உன்னோடு ஐக்கியம்
மூலம் : இரவீந்தரநாத் தாகூர்
தமிழாக்கம் : சி. ஜெயபாரதன், கனடா
உன்னைத்தான் எப்போதும்
நேசித்திருப்பதாய்
உணர்கிறேன் இன்று நான்
எல்லா
இடர்களுக்கும் இடையே !
யுக யுகமாகப்
பொதுக் குழுவினரோ டிணைந்து
நீயும் நானும்தான்
நேசர்களாய் இருந்தோம் !
உலகில் எப்புறம் நோக்கினும்
உயிர் வாழ்வில்
நினைவுக்கு வருகிறது;
நீயும், நானும்
எல்லை யற்ற வடிவங்களில்
ஐக்கிய மானது
எனக்குத் தெரிகிறது
ஒவ்வொரு பிறப்பிலும் !
காலவரை கடந்து
வான்வெளி அரங்கிலே நான்
வாசம் செய்ததை
நான் மறந்து போனேன் !
விண்மீன்களின்
மினுமினுப் பொளியில்
தாவித் தாவி
ஊஞ்சலாடி இருந்திருப்போம்
ஒன்றாக
நீயும் நானும் !
*********************
Original Source: A Tagore Testament,
Translated From Bengali By Indu Dutt
Jaico Publishing House (1989)
121 Mahatma Gandhi Road,
Mumbai : 400023
**********************