Category: கிரேசி மொழிகள்

 

”ABOVE was an ardent WHITE TRANQUILLITY….!
————————————————————————————-

“வெண்மை நிறத்தில் விதான விவேகமாய்
உண்மை உணர்த்தும் உபயோகச் -சின்மயத்தில்,
உள்ளது வேத உணர்வதன், விக்ஞானம்
சுள்ளெனத் தைக்கும்ரோ ஜா(சா) “….கிரேசி மோகன் ….!

’’சங்கர சாம்பசிவம்,சங்கெழில் மோகினியை
பம்பையில் முங்கிப் பிணைந்திட -பங்குனி
உத்திரத்தில் தோன்றிய உற்சவ அய்யனை
நித்திரைக்கு முன்பு நினை ‘’….கிரேசி மோகன்….!

பங்குனி உத்திரத்தன்று எழுதியது….!
———————————————-

’’பங்குனி உத்திரா! பந்தளப் புத்திரா!
செங்கட் திருமால் சுமந்தவா! -இங்குநீ
தோன்றிய இந்நாளில் தோத்திரம் செய்வோர்க்கு
ஊன்றிடும் கோலுன் உறவு’’….!

’’பிணிகொண்டு கூற்றின் படிவாசல் நிற்போர்
மணிகண்டன் நாமம் முழங்க -இனிகண்டம்
இல்லையென்(று) ஆகிடும் ஈரொன் பதாம்படிமுன்
தொல்லையாம் தேங்காய் தெறித்து’’….!

’’மீனாள் திருமணத்தில் மாலோன் அழகுகண்டு
மான்மழு வாளன் மயங்கினான் -கானில்
அபரிமித மோஹினியை ஆலிங் கனித்திட
சபரிகிரி வாசன் ஜனிப்பு’’….!

”சங்குதிரி சூலத்தை சேரப் பிறந்தவன்,
பங்குனி உத்திரன்முன், பம்பையில் -முங்கி
சரணம் விளிப்போர்க்கு சாதகங்கள் இன்றி
மரண ஜனனம் முடிவு’’….கிரேசி மோகன்….!

திருவா திரைமுன், திருச்சுழி ஊரில்
கருவாய் அழகம்மை கர்பம் -உருவாய்
பெருந்தவம் செய்த பகவான் ரமணர்
பிறந்து துறந்தார் பிறப்பு!….கிரேசி மோகன்….!

 

’ஈகோவை விட்டு இரைந்து சிரித்திடப்
போகோவைப்(TV) பார்பேரன் பேத்தியொடு, -ஆகாகா!
சாகா வரம்பெற்ற சோட்டாபீம் கார்டூனால்,
தேகாபி மானம் தொலைப்பு’’….கிரேசி மோகன்….!

 

 

பேத்திக்கு திருக்குறள் கிளாஸ் எடுத்துவிட்டு(இன்றைய குறள் ‘’யாகாவா ராயினும் நாகாக்க’’)….!

 

‘’யார்போட்ட அட்சதையோ, யாதுமாகி நின்றோமே!
பேர்கெட்டுப் போனதே பாழகந்தைப் -பாற்பட்டு,
யாகாவா ராயினும் நாகாக்கா மல்பேசி,
சோகாப்பர் ஆனோம் சிறுத்து’’….கிரேசி மோகன்….!

”பலனெதிர் பாரா பழக்கத்தைக் கொண்டால்,
கலம்சேரும் தானாய் கரைக்கு, -புலனஞ்சும்,
இன்னாசெய் தாலும் இவைநா ணயிருசும்மா,
தன்னால் பிறக்கும் தவம்’’….கிரேசி மோகன்….!

”குறள் வெண்பா’’
——————————–

‘’கடுக்கன் வருங்கால் கலகலப்பா கும்நாம்
இடுக்கண் வருங்கால் இளிப்போம்(நகுக):-படுக்கையில்(தூங்கும்போது)
பண்டிதன், பாமரன், பாரபட்சம் ஏதய்யா!
வண்டிதன் போக்கில் விரை’’….கிரேசி மோகன்….!

’’குறள் வெண்பா’’
——————————–

‘’திட்டினாலும் நாமத்தைத் தீட்டினாலும் ,கண்ணிநுண்
கட்டினாலும் கண்ணா கலங்காதே, -எட்டிநில்:
அகழ்வாரைத் தாங்கும் அடிவாரம் போல
இகழ்வார் பொறுத்தல் இருப்பு’’….கிரேசி மோகன்….!

‘குறள் வெண்பா’’
—————————–

‘’தகரம் முதல்மனி தன்வரையில் சொர்க(பரமபதம் எப்படி வேணா வச்சுகலாம்)-
நகரம் அடைய நகரும் -நுகர்வோனே(Customer)-
ஆதி பகவனின் அன்பில் ஒடுங்கலை,
ஓதி உணர்த்த உலகு’’….கிரேசி மோகன்….!

’’குறள் வெண்பா’’….
——————————————-
கல்வியைப் பற்றி யோசிக்கையில் ஸ்ரீ ரமணரின் ’’சப்தஜால மஹாரண்யம் சித்த பிரமண காரகம்’’….சூரி நாகம்மாள் ஸ்ரீரமணாஸ்ரம லேகுலுவில் படித்த பகவானின் பதில் நினைவுக்கு வந்தது

’’கற்றோர்கள் செல்லுமிடம் காண்பர் சிறப்பானால்
பெற்றோர்கள் பக்கமுளல் பாண்டித்யம்: -சுற்றாதே!
சொற்கள் பெருங்காடு, சித்தம் கலங்கவைக்கும்,
நிற்கும் நடுத்தெருவே நன்று’’….கிரேசி மோகன்….!

 

 

’’நாட கமேவுலகம் நாமார்ட்டிஸ்ட், ஆடியன்ஸ்,
போடுகின்ற வேடங்கள் பொய்சாட்சி, -வீடு
வரையுறவு வீதி வரைமக்கள் ஆகத்
தரையுறவு மேக்கப்பில் தான்’’….கிரேசி மோகன்….

 

ஷீரடி பாபா வெண்பாக்கள்
———————————-

அக்கல்கோட் ராஜன் அவதார மானவா
சிக்கல்கட் டாமிந்த சம்சாரம் -வெக்கங்கெட்
டீரடியும் சேற்றினில் வைத்திங்கு சீரழிந்தோம்
ஷீரடி ஆற்றில் செலுத்து….(1)

சுகவாணி சாயி கமலவாசி சாயி
மகமாயி சாயி அயனரியரன் -சாயி
முகமதுவும் சாயி முனியேசு சாயி
அகமதை ஷீரடியாய் ஆக்கு….(2)….

மோதக மூக்கனே சாதக வாக்கனே
தீதற போக்கிடும் போக்கனே -மாதவா
சாயி மஹராஜா தாயின் அருள்சொரியும்
ஆயி மகமாயி ஆவ்….(3)….

தாயினால் மண்தோன்றி நோயினால் மண்மூடும்
காயமிது பொய்யென்று காணுவாய் -மாயமாய்
ஆயிரம் ஒன்றாகும் ஒன்றா யிரமாகும்
சாயிராம் சேவடியில் சேர்….(4)

விண்டுரைக்க வொண்ணா விளையாட்டுப் பிள்ளையை
பண்டரிக்குள் வாழும் பகவானாய் -கண்டறிவாய்
ஷீரடி சாயியவன் சேவிப் பவர்க்கருள
வேரடி பாயும் விழுது….(5)

உதியெடுத்(து) உந்தன் நுதலிலே பூசி
கதியென்று சாயி கமலப் -பதமிரெண்டை
பற்றிவாழ பாவங்கள் பற்றாது, பாபாவை
சற்றுநேரம் சிந்திக்க சித்து….(6)

நட்டநடு கானகம் நாற்புரமும் சாகரம்
எட்டுவித கோணலாய் இவ்வாழ்க்கை -விட்டுவிட
புத்தியில்லை, வெற்றிபெற சக்தியில்லை சத்குருவே
பித்தனிவன் பேதமையைப் போக்கு….(7)

தாயி தகப்பன் தெய்வமே ஷீரடி
சாயி மகராஜா சத்குரு -சேய்நான்
படித்த உமது சரித்திரம் பாடி
முடிக்க அருள்வீர் மகிழ்ந்து….(8)

சாதுவாய் ஷீரடி சொந்தங்கள் காத்திட
கோதுமை மாவை அரைத்தது -தீதுரு
காலரா நோயை வாலறுத்(து) ஓட்டிடும்
போலோராம் சாயிநாதன் போக்கு….(9)

வாயினால் பேசி வசனத்தை உச்சரிக்க
சாயிராம் வாக்கை சரியாக்கு -தூயவா
ஷீரடி வந்துன்னை சேவிக்கும் நாளன்று
கூறிடுவேன் நன்றிக் கடன்….(10)

சகிப்பு, வினயம், சகோதர பாவம்
உகக்கும் அனைத்தையும் ஒன்றாய் -அகத்தும்
புறத்தும் சமரச சன்மார்கம் காண
சிரத்தினில் ஷீரடி சூடு….(11)

கெட்டபுத்தி செய்கைகள் விட்டகன்(று) ஓடிட
புட்டபர்த்தி பாதம் பணிந்திடு -பட்டுமலர்
நித்தியமும் நெஞ்சில் நிறுத்த நிறுத்திடும்
சத்யம் சிவசுந் தரத்து….(12)

பத்திரம் பாதுகாப்பு பாபாவின் ஷீரடி
சத்திரச் சாவடியில் சாஸ்வதம் -நித்திரை
சொப்பனம் மற்றும் சகஜத்தில், சாயிராம்
எப்பவும் காப்பு எமக்கு….(13)

பன்றிக் காய்ச்சல் ஊரில் பரவிய போது….
——————————————————
வந்திருக்கும் பன்றி வியாதி வெகுண்டோட
எந்திரத்தில் முன்போல இட்டரைப்பாய் -உன்திறத்தைக்
காட்டருள் பாபா கலங்குகிறோம், நீயல்லால்
கூட்டெமெக்கு வேறிங்கார் கூறு….(14)

ஆறடி மண்ணில் அடங்கும் உடலோடு
மாரடித்துப் பார்த்தேன் முடியவில்லை -ஷீரடி
நாதா சரண்புகுந்தேன் நின்னை, எனக்கருள்
ஏதே னுமனுபூதி யை….(15)

ஆள்காட் டிவிரல் அடுத்தவிரல் வாயிலாய்
தாள்காட்டும் கட்டைவிரல் தீண்டிட -மால்கட்டின்
வேரடிக்குப் பாய்ந்து வினைமரம் சாய்த்திடும்
ஷீரடி பாபா செயல்….(16)

மாபாவம் செய்தும் மகனீயர் ஷீரடி
பாபா சரணம் புகுந்தோரை -ஆபாச
இச்சைகள் அண்டாது என்றென்றும் காத்திடும்
உச்சியில் இட்ட உதி….(17)

வேப்ப மரத்தடியில் வீற்று மருந்தாக
காப்பிடும் சாயி கசப்பாக -சாப்பிடத்
தந்தாலும் நோய்க்கு தருகற் பகமாகி
வந்தோர்க்கு வாழ்வில் வலுவு….(18)

காம துனியெரித்து நாம உதியெடுத்து
தாமசம் தீர்ப்பாய் தகப்பன்சாய் -ராமனே
வேம்பாமென் நெஞ்சில் விளைந்த குருஸ்தானில்
ஆம்பிளை அம்மா அமர்….(19)

கந்தலா னாலுமதைக் கொண்டுத் திரம்கட்டி
மந்திரமாய்த் தொங்கும் மரவணையில் -அந்தரத்தில்
எங்கணம் ஏறினீர், அங்கணம் பாபாவே
இங்கெனெக்கோர் உச்சி இடு….(20)

தீர்த்தங்கள் ஏழும் தளும்பிடும் ஷீரடி
மூர்த்தியின் பாதத்தில் MunNiiraai -ஆர்த்தி
எடுபுத்தி, அன்பாம் எரியூட்டி, ஆர்வத்
துடன்பக்தி நூலே திரி….(21)

அச்சுதன் சம்பு அயனுரு ஆனவா
சச்சிதா னந்தகுரு சாயிராம் -இச்சிறை
ஆறடிப் பொந்தில் அடைபட்(டு) உழல்கிறேன்
ஷீரடியில் சேர்ப்பாய் சரண்….(22)

ஆயிரம் அம்மாக்கள் ஆகுமோ ஈடாக
சாயிராம் தாய்க்குச் சமானமாய் -நோயினால்
ஆறடி ஓய்ந்தாலும் ஆன்ம சுகம்தரும்பார்
ஷீரடி மாயி சிரிப்பு….(23)

ஆடை கபினி அணிந்தடி யார்களின்
பாடை அதற்குள் பதுக்கிடும் -வீடை,
அறம்பொருள் இன்பம் அளித்திடும் வேப்ப
மரம்நிழல் சாயி மகான்….(24)

ஆரத்தி நேரத்தில் ஆலயம் சென்றுனது
பாரத்தை பாபாவின் பாதத்தில், -ஈரத்தில்
கண்கள் பளபளக்க கைகூப்பி சேர்க்கமனப்
புண்கள் மலராய் பிறப்பு….(25)

“உதிநுதல் சூடி, நதிகங்கை ஆடி(நீராடி)
சதிபதியாய் ஷீரடி சாயி, -அதிபதி,
பாபா வழிசென்று, பக்கிரிப் பிக்ஷையில்,
தீபா வளிகாண் தினம்”….(26)…கிரேசி மோகன்….

உதி-விபூதி, நுதல்-நெற்றி….

‘’மரத்தடி நீழல், கரத்திடைக் கூழும்
பரத்திடப் புல்மெத்தை, பிக்‌ஷை -இரைத்திடத்தாய்: -(தாயொத்த மாந்தர்)
ஆன்மனைத் தேடு அவசிய நாடகம்:
நான்,மனை மக்கள் நடிப்பு’’….கிரேசி மோகன்….!

(OR)
‘’மரத்தடி நீழல், கரத்திடைக் கூழும்
பரத்திடப் புல்மெத்தை, பிக்‌ஷை -இரைத்திடத்தாய்: –
ஏஸியில், சோறுண்டு ஏகாந்த வாழ்வினை
லேஸியாய் க்ரேஸி லயி’’….கிரேசி மோகன்….!

 

 

படமும் பாடலும்….!
——————————————-

’’பாண்டவன் தேருச்சி பாய்ந்து பறந்தவர்,
ஆண்டவன் பஞ்சமுக ஆஞ்சனேயர், -தூண்டவும்,
ஆண்டவனால் புத்தாண்டு ஆரம்பம் நாளின்று
வேண்டுதல்வேண் டாமை விருது’’….கிரேசி மோகன்….

ஆண்டவன் ஸ்வாமிகள் சித்தி….!

 

யுகாதி அன்று எழுதியது….!
————————————————

தகாது தவிர்த்துநல் தக்கவை ஏற்று
யுகாதியில் எந்தரோக்க ளோடு -மகானுவாய்
சித்திறையை சேர்வதற்கு சாதகம் செய்திட
சித்திரையில் காண்பாய் ஜெயம்….கிரேசி மோகன்….!