ஆன்லைன் வகுப்புகளும் அதன் பாதகங்களும்

செந்தில்குமார் தியாகராஜன்,
பேராசிரியர், எக்ஸல் பிசியோதெரபி கல்லூரி,
குமாரபாளையம், நாமக்கல்,
மெயில் : senphysio1981@gmail.com
கட்டுரைச் சுருக்கம்
சமீப காலமாக தினமும் நாம் வாழ்ந்துகொண்டிருந்த வாழ்க்கையை வாழ முடியவில்லை அதாவது நாம் வாழ்ந்துகொண்டிருந்த அன்றாட வாழ்க்கை முறையிலிருந்து மாறுபட்டு, அரசு கூறும் வாழ்க்கைமுறையை நாம் வாழ்ந்து கொண்டிருக்கிறோம். குறைந்தது ஆறு மணியிலிருந்து எட்டு மணி நேரம் கணிப்பொறி முன்பு அமர்ந்து வேலை செய்வதோ மற்றும் பள்ளி ஆசிரியர்கள் எடுக்கும் பாடங்களைக் கவனிப்பது இன்றைய சூழலில் கட்டாயமாகி இருக்கிறது. கணிப்பொறி முன் அமர்ந்து வெகு நேரம் வேலை செய்யும் பொழுது, அதேபோல் ஆன்லைன் வகுப்புகள் கவனிக்கும் பொழுது பல்வேறு உடல் பிரச்சினைகள் ஏற்படுகிறது. எலும்பு தசை நரம்பு சம்பந்தமான பிரச்சினைகளும் மலச்சிக்கல், சிறுநீரகத்தில் / பித்தப்பையில் கல் ஏற்படுதல், சிறுநீரகப் பாதை நோய்த்தொற்று, அதிக நேரம் சிறுநீர் கழிக்காமல் கணிப்பொறி முன்பே அமர்ந்திருப்பதால் இதுபோன்ற பெரிய பிரச்சனைகளும் ஏற்படும்பொழுது மிகவும் மன உளைச்சலுக்கு ஆளாக நேரிடும். நம் காலம் கணிப்பொறியோடு சேர்ந்துதான் கழிகிறது, கழித்ததாகத்தான் வேண்டும் அதனால் இதுபோன்ற பிரச்சனைகளை நாம் எப்படி தவிர்ப்பது என்பதைக் கண்டிப்பாக தெரிந்துகொள்ளலாம். அதற்குச் சில வழிமுறைகளையும் இங்கே பட்டியலிடுகிறேன். கணிப்பொறி வலியோடு வாழ நாம் பிறக்கவில்லை. வலி இல்லாமல் வாழ நமக்குத் தெரியும். தொடரும் வாழ்க்கை இனிமையாக அமைய, நல்ல வழிமுறைகள் உள்ளன.
முன்னுரை
நாம் தான் உலகை ஆண்டு கொண்டிருக்கிறோம் என்று மனிதன் நினைத்துக்கொண்டிருந்தபோது யாருமே எதிர்பாராத வண்ணம் இந்த உலகத்தையே மனிதர் கைக்கு அப்பால் இருந்து வெளிப்பட்ட வைரஸ் கிருமி இன்று நம்மைக் கடந்த சில மாதங்களாக ஆண்டுகொண்டிருக்கிறது. சமீப காலமாகத் தினமும் நாம் வாழ்ந்துகொண்டிருந்த வாழ்க்கையை வாழ முடியவில்லை அதாவது நாம் வாழ்ந்துகொண்டிருந்த அன்றாட வாழ்க்கை முறையிலிருந்து மாறுபட்டு, அரசு கூறும் வாழ்க்கைமுறையை நாம் வாழ்ந்துகொண்டிருக்கிறோம் அப்படி வாழ்வது தான் சிறப்பும் கூட. ஆன்லைன், ஒர்க் பிரம் ஹோம், லாக்டவுன், கரோனா, வைரஸ், சானிடைசர், முகக் கவசம், தனிமனித இடைவெளி இந்த வார்த்தைகளெல்லாம் நம் வாழ்க்கையில் ஊடுருவிவிட்டன. ஆன்லைன் வகுப்புகளைத் தொடர்ந்து கவனிக்கும் பொழுது கழுத்து, முதுகுத் தசைகள் தேய்வடைகின்றன. இதனால் பள்ளி மாணவ மாணவிகள் 86% பேருக்கு கழுத்து, முதுகு தோள்பட்டை மற்றும் மூட்டு தசைகளில் வலி மற்றும் இறுக்கம் ஏற்படுவதாக ஆய்வு விளக்குகிறது[1]
பொருளுரை மற்றும் கருத்து விளக்கம்
உன் வேலையை உன் வீட்டிலேயே நீ செய் என்று பெரும்பாலான பன்னாட்டு நிறுவனக் கணிப்பொறி ஊழியர்கள் அறிவுறுத்தப்பட்டுள்ளனர்[2]. அதேபோல பள்ளி மாணவ மாணவியர்கள், கல்லூரி மாணவ மாணவியர்கள் இதே போன்ற வாழ்க்கைக்கு வாழ கற்றுக்கொண்டு இருக்கிறார்கள், குறைந்தது ஆறு மணியிலிருந்து எட்டு மணி நேரம் கணிப்பொறி முன்பு அமர்ந்து வேலை செய்வதோ மற்றும் பள்ளி ஆசிரியர்கள் எடுக்கும் பாடங்களைக் கவனிப்பதை இன்றைய சூழல் கட்டாயமாக்கி இருக்கிறது. இந்த வாழ்க்கை முறை மாற்றம் நம்மில் அனைவருக்குமே மிகவும் புதியதாக இருக்கும். செல்போனிலோ கணிப்பொறி முன்பு அமர்ந்து விளையாடுவது அல்லது அப்பா வேலை செய்துகொண்டிருந்தபோது கணிப்பொறி கடந்து செல்வது என்றிருந்த பள்ளிக் குழந்தைகள் இன்று ஆன்லைன் வகுப்புகள் மூலம் பாடத்தைப் படித்துக் கொண்டிருக்கிறார்கள்.[3]
இந்தக் காலச் சூழ்நிலை மாற்றம் நாம் மிகவும் எதிர்பாராத ஒன்றாக இருந்தாலும் நமது பொருளாதாரத்தைக் கட்டிக் காக்கவும் அதேபோல அலுவலக வேலைகளை முடிக்கவும் கணிப்பொறியோடு வாழும் வாழ்க்கை சாதாரணமாக மாறிவிட்டது. முன்பெல்லாம் நம் பிள்ளைகளைக் கணிப்பொறி முன்பு அமர விடாத அப்பாக்களும் அம்மாக்களும் தங்கள் மகனையும் மகளையும் இன்று கணிப்பொறி முன்போ அல்லது செல்போன் முன்போ அமரக் கட்டாயப்படுத்துகின்றனர், அளவிற்கு மீறினால் அமிர்தமும் நஞ்சு என்பதுபோல ஆறு மணியிலிருந்து எட்டு மணிநேர ஆன்லைன் வகுப்புகளில் உள்ள அல்லது கணிப்பொறி வேளைகளில் மூழ்கி இருக்கும் பொழுது குழந்தைகளுக்கும் பெரியவர்களுக்கும் பல்வேறு உடல் உபாதைகள் ஏற்படுகின்றன. ஏம்மா கம்ப்யூட்டரை பார்க்க வேணாம்னு சொல்லுவா அப்பல்லாம். இப்ப எல்லாம் கம்ப்யூட்டர் முன்னாடி உட்கார சொல்ற என்று கேள்வி கேட்கும் குழந்தைகளுக்குப் பதிலைத் தேடும் பெற்றோர்கள் ஏராளம். காலைல பல்லு தேய்ச்சியா பால் குடிச்சிட்டு போய் உட்காரு மேக்ஸ் டீச்சர் ஆன்லைன் கிளாஸ் போகுது பாரு என்று பெற்றோர்கள் குழந்தைகளை வருத்தும் பொழுது மிகவும் வருத்தமாக இருக்கிறது.[4]
கணிப்பொறி முன் அமர்ந்து வெகு நேரம் வேலை செய்யும் பொழுது அதேபோல் ஆன்லைன் வகுப்புகளைக் கவனிக்கும் பொழுது பல்வேறு உடல் பிரச்சினைகள் ஏற்படுகின்ன்றன.[5] காலை 9 மணிக்கே தயாராகும் ஆன்லைன் வகுப்புகளை, குறைந்தது ஆறு மணி நேரம் தொடர்ந்து ஒரு குழந்தை கவனிக்கும் பொழுது உடல் ரீதியாகவும் மனரீதியாகவும் பல்வேறு உடல் உபாதைகள் ஏற்படுகின்றன. இதில் மிக முக்கியமானவை முதுகு வலியும் கழுத்து வலியும் கைவிரல் வலியும். பொதுவாக, பள்ளி மற்றும் கல்லூரி மாணவ மாணவர்களும் பாதிக்கப்படுகிறார்கள். இப்பொழுது ஏற்படும் சிறுசிறு கழுத்துவலி, முதுகுவலி பின்னாளில், நாள்பட்ட அதாவது தொடர் பிரச்சினையாக பூதமாக மாறலாம். முன்பெல்லாம் எலும்பு தேய்மானம் என்பது 55 வயதிற்கு மேலே இருப்பவர்களுக்கு ஏற்படுவதாக ஆராய்ச்சிகளில் எடுத்துக் கூறினர். ஆனால் கணிப்பொறிப் பயன்பாடும் செல்போன் பயன்பாடும் இந்த எலும்புத் தேய்மானம், தளர்ச்சியுறுதல் போன்று, உடலில் பல்வேறு மாற்றங்கள் ஏற்படுவதைத் துரிதப்படுத்துகின்றன.[6]
பொதுவான தொடர் கணிப்பொறி, செல்போன் பயன்பாட்டால் ஏற்படும் பிரச்சனைகள்
- கழுத்து வலி
- தோள்பட்டையில் ஏற்படும் வலி
- கணிப்பொறியில் இருக்கும் செயல்பாட்டை(மௌஸ்) கட்டுப்படுத்துவதால் கை விரல்களில் ஏற்படும் வலி மற்றும் எரிச்சல்
- கட்டைவிரல், ஆட்காட்டி விரல், நடு விரல்களில் உணர்ச்சி மாறுபட்டு உணருதல்
- முழங்கை மற்றும் மூட்டு வலி
- முதுகு வலி, தலை வலி, கண் எரிச்சல், கண்களில் நீர் வடிதல்
- அதிக நேரம் அமர்வதால் இடுப்பு தசைகளில் ஏற்படும் வலி
- முதுகு மற்றும் கால் பகுதி வரை மேலிருந்து கீழாக வலி வருதல்
- கால் விரல்கள் மரத்துப் போதல்
- உடம்பின் நிலைப்பாட்டு மாற்றம் (POSTURE) அதாவது உடம்பில் கூன் விழுதல்
இதுபோன்ற எலும்பு, தசை, நரம்பு சம்பந்தமான பிரச்சினைகளும் மலச்சிக்கல், சிறுநீரகக் கல், பித்தப்பையில் கல் ஏற்படுதல், சிறுநீரகப் பாதையில் நோய்த்தொற்று, அதிக நேரம் சிறுநீர் கழிக்காமல் கணிப்பொறி முன்பே அமர்ந்திருப்பதால் இதுபோன்ற பெரிய பிரச்சனைகளும் ஏற்படும்பொழுது மிகவும் மன உளைச்சலுக்கு ஆளாக நேரிடும். இதுபோன்ற பிரச்சினைகளை எப்படி தவிர்ப்பது அதற்காக ஆன்லைன் வகுப்புகளைத் தவிர்த்து விடலாமா, கணிப்பொறி முன் அமர்ந்து வேலை செய்வதைத் தவிர்த்து விடலாமா என்றால் கண்டிப்பாக அது நம்மால் முடியாது. அது சரியான தீர்வாகவும் இருக்காது. நம் காலம் கணிப்பொறியோடு சேர்ந்துதான் கழிகிறது, கழித்தாகத்தான் வேண்டும். அதனால் இதுபோன்ற பிரச்சனைகளை நாம் எப்படி தவிர்ப்பது என்பதைக் கண்டிப்பாகத் தெரிந்துகொள்ளலாம். அதற்குச் சில வழிமுறைகளையும் இங்கே பட்டியலிடுகிறேன்.
பெற்றோர்களுக்கும் உங்கள் குழந்தைகளுக்கும்
- உங்கள் குழந்தைகளைக் கண்டிப்பாக காலையிலோ மாலையிலோ விளையாடச் சிறுசிறு விளையாட்டுகளைப் பழக்குங்கள் நீங்களும் அவர்களோடு விளையாடலாமே
- உங்கள் குழந்தைகளோடு பெற்றோர்களும் மட்டைப்பந்து, கால்பந்து போன்ற விளையாட்டுகள் விளையாடும் பொழுது மேற்குறிப்பிட்ட தசை, எலும்பு, நரம்பு சார்ந்த பிரச்சினைகளைப் பெரும்பாலும் தவிர்த்துவிடலாம்
- உங்கள் குழந்தைகள், ஆன்லைன் வகுப்புகளைக் கவனிக்கும் பொழுது, அவர்கள் இருக்கைகள் உள்ள அறை நல்ல காற்றோட்ட வசதி உள்ளதாகவும் அதேபோல நல்ல வெளிச்சம் உள்ளதாகவும் இருக்குமாறு பார்த்துக்கொள்ளுங்கள்
- ஒவ்வோர் ஆன்லைன் வகுப்பு முடியும் பொழுது இருக்கையிலிருந்து எழுந்து நடக்குமாறு உங்களின் குழந்தைகளுக்கு அறிவுறுத்தவும்.
- கணிப்பொறி முன் அமர்ந்து வேலை செய்யும் பொழுது, வயது வந்தவர்களும் தொடர்ந்து வெகுநேரம் கணினி முன்பு அமர்ந்து வேலை செய்வதைத் தவிர்த்து நேர இடைவெளியை அனுசரிக்கவும்.
- அதிக நீர் பருகுவதையும் சிறுநீர் வரும்பொழுது சிறுநீர் கழிப்பதைப் பழக்கப்படுத்திக் கொள்ளவும். இப்படிச் செய்தால், சிறுநீரை அடக்கும் பொழுது சிறுநீரகக் கற்கள், நோய்தொற்று போன்றவை ஏற்படுவதைத் தவிர்க்கலாம்
- பழங்கள் உண்பதையும் பழச்சாறுகள் குடிப்பதையும் குழந்தைகளுக்குப் பழக்கபடுத்துவதோடு பெரியவர்களும் பருகுவதால் உடல் ஆரோக்கியமாக இருப்பதோடு உடலுக்குத் தேவையான வைட்டமின் சத்துக்களும் தாது சத்துக்களும் இதனால் கிடைத்துவரும்.
- நொறுக்குத்தீனிகள் உண்பதைக் கணிப்பொறி முன் இருக்கும் பொழுது தவிர்ப்பதால் குழந்தைகளுக்கு ஏற்படும் உடல்பருமன் போன்றவற்றையும் தவிர்க்கலாம்.
சில உடற்பயிற்சிகள்
கழுத்து முதுகு வலிகளை மற்றும் கண் எரிச்சல் போன்றவற்றைத் தவிர்க்க சில உடற்பயிற்சிகளை இங்கே உங்களுக்குத் தருகிறேன்.
- கழுத்துத் தசைகளை இலகுவாக்க, வானத்தை நோக்கிய நேர்கொண்ட பார்வை இருக்குமாறு ஒரு ஐந்து மணித்துளிகள் மேலே நோக்குதல், அதேபோல தரையை நோக்கியவாறு பார்த்து, கழுத்தை ஐந்து மணித்துளிகள் கீழ் நோக்கியவாறு பிடித்திருப்பது. இதுபோன்று காலை மாலை 10 முறை செய்துவருவது உங்களது கழுத்துத் தசைகளை இலகுவாக்கும்.
- அதேபோல கண்பார்வை இடதுபுறமும் திருப்பியவாறு, வலதுபுறமும் திருப்பியவாறு ஐந்து மணித்துளிகள் பிடித்திருப்பது இதுவும் 10 முறை செய்யலாம்.
- தோள்களை வானத்தை நோக்கியவாறு உயர்த்துவது, உயர்த்திய வண்ணம் ஐந்து மணித்துளிகள் பிடித்திருப்பது. இதுபோன்று 10 முறை செய்வது.
- கழுத்துத் தசைகளை இலகுவாக்க, உங்களது கையைப் பின்புறம் கட்டிக்கொண்டு உங்கள் கழுத்தை வலது புறமோ, இடப்பக்கமோ உங்கள் தலையில் கைவைத்து இழுக்கும் பொழுது, கழுத்துத் தசைப்பிடிப்புகளைத் தவிர்க்கலாம்.
- நின்றுகொண்டு நேராகக் குனிந்து, கட்டைவிரலைத் தொடுவதை தினமும் 10 முறை செய்வது முதுகுத் தசைகளை இலகுவாக்கும்.
- டைனிங் டேபிள் போன்றவற்றில் உண்ணாமல், முடிந்தவரை தரையில் அமர்ந்து உங்கள் குழந்தைகளோடு உணவு உண்ணுவது சிறப்பானது.
- அதேபோல மாலையிலும் சிறிது நேரம் உங்கள் குழந்தைகளோடு விளையாடுங்கள்.
- தினமும் எட்டு மணி நேர உறக்கத்தைக் கட்டாயமாக்கிக்கொள்ளுங்கள். உங்கள் உடல் தசைகளில் ஏற்படும் தளர்ச்சியை உறக்கம் தவிர்க்கும்.
- நீங்கள் படுத்துறங்கும் தலையணை மற்றும் படுக்கை ஆகியவற்றை, உங்களுக்கு நல்ல உறக்கத்தைக் கொடுக்கும் வகையில் அமைத்துக்கொள்ளுங்கள்.
- நிறைய நீர் அருந்த வேண்டும். அதேபோல நீங்கள் உங்கள் குழந்தையோடு ஆன்லைன் வகுப்புகளில் அமர்ந்து அல்லது அவர்கள் அருகில் இருப்பது நல்லது.
முடிவுரை
நாம் வாழும் வரை நோயில்லாமல் வாழவே எல்லோரும் விரும்புகிறோம். ஆனால் கால மாற்றம், பல்வேறு சூழல் சார்ந்த பிரச்சினைகள், நம் வாழ்வை மாற்றிக்கொண்டே இருக்கின்றன. மேலே குறிபிட்ட வழிமுறைகளை நீங்கள் பின்பற்றும் பொழுது உங்கள் குழந்தைகளுக்கும் பிற்காலத்தில் ஏற்படப்போகும் பல்வேறு பிரச்சினைகளை வருமுன் காப்பதோடு தவிர்க்கவும் முடியும். பொதுவாக, பிற்காலத்தில் ஏற்படப்போகும் கை கால் மூட்டு, கழுத்து, முதுகு வலிகள், ஒருபக்கத் தலைவலி, பார்வைக் குறைபாடு போன்றவற்றைத் தடுத்து நிறுத்தவதோடு நோயில்லா, வலியில்லா வாழ்க்கை வாழ்வதோடு மேற்குறிப்பிட்ட சிறு உடற்பயிற்சிகள் உங்களுடைய உடல் ஆரோக்கியத்தை ஊக்குவிப்பதோடு நீங்கள் செய்யும் வேலைகளையும் அதேபோல ஆன்லைன் வகுப்புகளையும் சிரமமில்லாமல் நல்ல ஊக்கத்தோடு கவனிக்கச் செய்ய முடியும்.
References
- Parthibane S, Majumdar A, Kalidoss VK, Roy G. Prevalence and patterns of musculoskeletal pain among school students in Puducherry and its association with sociodemographic and contextual factors. Indian J Pain 2017;31:119-26
- Picavet HS, Schouten JS. Musculoskeletal pain in the Netherlands: prevalences, consequences and risk groups, the DMC (3)-study. Pain. 2003;102:167–78.
- Dockrell S, Simms C, Blake C. Schoolbag carriage and schoolbag-related musculoskeletal discomfort among primary school children. Appl Ergon. 2015;51:281–90.
- “Neck pain: overview.” 17 December 2015. Pub Med Health, https://www.ncbi.nlm.nih.gov/pubmedhealth/PMH0084213/#i2374.prevalenceandoutlook
- Viana MC, Lim CC, Pereira FG, Aguilar-Gaxiola S, Alonso J, Bruffaerts R, et al. Previous mental disorders and subsequent onset of chronic back or neck pain: findings from 19 countries. J Pain. 2018;19(1):99–110.
- San Francisco State University. “Computers can be a real pain in the neck.” ScienceDaily. ScienceDaily, 4 January 2019. <www.sciencedaily.com/releases/2019/01/190104131233.htm>.