Category: கட்டுரைகள்

நிர்மலா ராகவன்

‘செழிப்பான நாடு’  என்ற அர்த்தம்கொண்டது Phu Quok. இயற்கை, கடல் என்ற ஆர்வம்கொண்ட உல்லாசப்பயணிகளின் சொர்க்கம் இது.

கம்போடியா, வியட்நாம் ஆகிய இரு நாடுகளும் ப்ரெஞ்சு நாட்டின் அதிகாரத்தில் இருந்தனவாம். முதலில் கம்போடியா நாட்டுக்குச் சொந்தமாக இருந்த இத்தீவு ஒரு போரின் விளைவாக வியட்நாமின் கைக்கு வந்தது.

கோலாலம்பூரிலிருந்து ஒன்றரை மணி நேர விமானப்பயணம் என்பதால், பலருக்கும் தெரிந்திராத இத்தீவிற்கு போய்த்தான் பார்ப்போமே என்று நானும் என் மகள் சித்ராவும் திட்டம் போட்டோம்.

நாங்கள் தங்கிய Ocean Bay Resort என்ற இடத்தை இயற்கையைக் காக்கவேண்டும் என்ற முனைப்புடன் அமைத்திருக்கிறார்கள். தெருவுக்கு இருபுறங்கிலும் காட்டையொத்த அடர்ந்த மரங்கள். மரங்களாலான இருப்பிடங்கள். குளியலறையில் நீர்யானை குளிக்க ஏற்ற, நீளமும் அகலமுமான குளியல் தொட்டி (bath tub). முழுவதும் கருங்கல்லால் ஆனது. எல்லாச் சுவர்களும் மூங்கிலால் அமைக்கப்பட்டிருந்தன.

இங்கு வந்திருந்தவர்கள் சீனா, ரஷ்ஷியா மற்றும் 1,000 கிலோமீட்டர் தொலைவிலிருந்த வியட்நாமிலிருந்து வந்தவர்கள். ஆங்கிலத்தைத்தவிர, அம்மொழிகளில்தாம் எல்லா இடங்களிலும் அறிவிப்புகள் காணப்பட்டன.

நாங்கள் கால்வைத்த நேரம் மழை கொட்டொ கொட்டென்று கொட்டியது. `நல்லவர் ஒருவர் உளரேல்,’ என்று நான் பெருமைப்பட முடியவில்லை. இது மழைக்காலம். இடியோ, மின்னலோ இல்லாது, காற்று பலக்க மழை. பேய்க்காற்றில் மரங்களின் கிளைகள் அசைய, அருகிலிருந்த கடல் அலைகள் ஆர்ப்பரிக்க, மிக இனிய அனுபவம். வராந்தாவைத்  தாண்டி, படுக்கையறைக்குள்ளும் சாரல் அடித்து, எங்களைச் சிரிக்கவைத்தது.

`மழை சற்று விட்டு விட்டதே!’ என்று நாங்கள் தங்கிய இடத்திலிருந்து ஹோட்டலுக்கு நடக்க ஆரம்பித்தவுடன் மழை பலத்துவிடும். முதல்நாள் என் புடவை முழுக்க தொப்பலாக நனைய, மறுநாளிலிருந்து உடையை ஷார்ட்ஸ், முருநீளக் கால்சட்டை என்று மாற்றினேன். எங்கள் அறையிலிருந்து வெளியே பார்த்தால், கூப்பிடு தூரத்தில் கடல். அலையோசையை ரசித்தபடி முதல் நாளைக் கழித்தேன். அவ்வளவு நனைந்தும், உடலுக்கு எந்த பாதிப்பும் நேரவில்லை என்பது விசேஷம். அரிதான, மிகத் தூய்மையான காற்றின் மகிமை.

மறுநாளிலிருந்து, டுக் டுக் (tuk tuk) என்ற வாகனத்தை வரவழைத்தோம். ஆறுபேர் உட்காரலாம். அதில் ஏறமுடியாது திணற, அதை ஓட்டிய இளம் வாலிபன் என்னைத் துக்கி ஏற்றிவிட்டான்.

இங்கு என்ன சிறப்பு என்றால், வாடகைக்காரில் எங்காவது போகும்போதும், என் கையைப் பிடித்து உள்ளே அழைத்துச் செல்கிறார்கள். `என்னால் நடக்க முடியும்,’ என்று கையை உதறினாலும் விடமாட்டார்கள்.

சாப்பாட்டுக்கூடத்தில் வேலை பார்த்த இளைஞன், “உங்களுக்கென்று, முட்டை போடாமல் pan cake பண்ணிக்கொண்டு வந்திருக்கிறேன்!’ என்று, தன் வேலையை விட்டுவிட்டு, என் மேசையில் கொண்டுவைத்தான். தோசைக்கல்லில் மாவு ஊற்றி, அதன்மேல் வெண்ணை, பலவித ஜாம், தேன் என்ற இனிப்பு வகை அது.

தென்கிழக்கு ஆசியாவின் பிரத்தியேகமான குணம் — முதியவர்களுக்கு உதவி செய்வது பெரும்பாக்கியம் என்பதுபோல் புன்னகையுடன் செய்வது.

பார்க்கவேண்டிய இடங்கள் இரண்டு: Pearl Farm (முத்துப்பண்ணை) மற்றும் பட்டுப்பண்ணை.

முத்துப்பண்ணை

ஒரு மீனவர் முத்துக்குளிக்க இப்பகுதிக்கு வந்தபோது, பல நூற்றாண்டுகளுக்குமுன் கடலில் மூழ்கிவிட்ட கப்பலைக் கண்டார். அதில் காணப்பட்ட சாமான்களை எடுத்துவந்தார். பன்முறை இப்படியே செய்து, அவர் சேர்த்துவைத்தவை இங்கு காட்சிப்பொருட்களாக வைக்கப்பட்டிருந்தன. பதினைந்தாம் நூற்றாண்டில் கிடைத்த பீங்கான் சாமான்களோடு, பெரிய பெரிய முத்துச்சிப்பிகளும் இருந்தன. நூற்றுக்கணக்கான கோப்பைகள் உடையாது இருந்தது ஆச்சரியம். கொலுவைப்போல் அடுக்கி வைத்திருக்கிறார்கள்.

கடலிலிருந்து எடுக்கப்படும் முத்து விலை உயர்ந்தது. ஆற்றிலிருந்து மனிதனால் உற்பத்தி செய்யப்படுவது சற்றே மலிவு. பளபளப்பு குறைவு. இரு முத்துக்களை ஒன்றோடொன்று உரசினால் வெள்ளை மாவுபோல் கையில் ஒட்டுகிறது. பிறப்பிடம் ஆறோ, கடலோ, அவைதாம் நல்ல முத்துக்கள்.  எத்தனை காலம் ஆற்றில் விட்டுவைக்கிறார்கள் என்பதைப் பொறுத்து நிறம், அளவு ஆகியவை மாறும் என்றெல்லாம் ஒருவர் விளக்கினார் – முத்துச்சிப்பிகளின் உள்ளே கீறி.

பட்டுப்பண்ணை

பட்டுப்பூச்சி மற்றும் மூங்கிலால் செய்யப்படும் பட்டு வகைகளை இங்கு பார்க்கலாம். மிக அழகான, மெலிதான பட்டின் விலை அதிகம் என்று, வழவழப்பாக இருக்கும் மூங்கில் பட்டாலான ஆடைகள், காலுறை, மேசையிலும், தரையிலும் படிந்த கறைகளை நன்றாகத் துடைக்க துண்டுகள் ஆகியவற்றை மகிழ்வுடன் வாங்கினோம்.

`பார்க்க வேறென்ன இருக்கிறது?’ என்று கேட்பவர்களுக்கு: இது ஒரு சிற்றூர். பேரங்காடிகள் கிடையாது. பலரும் ஸ்கூட்டரில்தான் போகிறார்கள். ஆனால், ஏழ்மையான தோற்றமில்லாது, ஆரோக்கியமாக இருக்கிறார்கள்.

`நாகரிகம்’ என்ற பெயரில் கரடுமுரடாக நாம் செய்துவிட்ட வாழ்க்கையில் இம்மாதிரியான இயற்கைச்சூழலும், மனிதத்தன்மையுடன் வலம் வரும் மனிதர்களும் அருமருந்து.

முனைவர் கு. வளர்மதி,
உதவிப்பேராசிரியர்,
இளங்கலைத் தமிழ்த்துறை,
தி ஸ்டாண்டர்டு ஃபயர்ஒர்க்ஸ் இராஜரத்தினம் மகளிர் கல்லூரி,
சிவகாசி.

முன்னுரை

இன்றைய உலகில் பெண்களின் பங்கு மகத்தானது. ‘மங்கையராகப் பிறப்பதற்கே நல்ல மாதவம் செய்திட வேண்டுமம்மா’ என்ற கவிமணியின் வாக்கினை ஏற்ற பல தலைவர்களுள் அண்ணல் காந்தியடிகளும் ஒருவர். பெண்ணைக் காட்டிலும் சிறந்தது வேறு இல்லை என திருவள்ளுவரும், வருங்காலம் பெண்ணுடையது தான் என வினோபாஅடிகளும் கூறுகின்றனர். அடிப்படையில் ஆண், பெண் இருவருக்கும் ஆன்மா ஒன்றே. இருவருக்கும் உணர்வுகளும் ஒன்றே. ஒருவர் மற்றவர் உதவியின்றி வாழமுடியாது. ஆண் காலங்காலமாக பெண் மீது ஆதிக்கம் செலுத்தி வந்திருப்பினும், ஆடவரிடையே தோன்றிய மகான்கள் பெண்ணை ஆணுக்குச் சமமென்றே மதித்திருக்கிறார்கள். பெண்களின் முன்னேற்றத்தில் காந்தியடிகளின் பங்கு கணிசமானது என்பதை மறைக்க முடியாது. காந்திய அடித்தளத்தில் பெண் முன்னேற்றத்திற்கான பல்வேறு பரிமாணங்களை விளக்குவதாக இக்கட்டுரை அமைகிறது.

அகிம்சையின் அவதாரம் – பெண்

அகிம்சை என்றால் எல்லையற்ற அன்பு. அதற்கு எவ்வளவு துன்பம்வரினும் ஏற்கும் ஆற்றல் உண்டு. பெண் தனது தாயன்பை உயிரினங்கள் அனைத்திலும் வெளிப்படுத்துகிறாள். போரில் மூழ்கி அமைதிக்காகத் தவித்துக் கொண்டிருக்கும் உலகிற்கு அவ்வமுதைப் புகட்ட வேண்டியவர்கள் பெண்களே ஆவர். அகிம்சையின் அவதாரம் பெண் என்கிறார், காந்தியடிகள்.

பெண் முன்னேற்றத்திற்கான அடிக்கல்

பெண்முன்னேற்றம் குறித்து அண்ணல் காந்தியடிகள், முதலில் சீதை, தமயந்தி, திரௌபதி போன்ற தூய உறுதிவாய்ந்த தீரமாதரைத் தோற்றுவித்தாக வேண்டும். நாம் அவர்களை உண்டாக்கிவிட்டால், இன்றைய சூழலில் பெண்கள் சொல்லுபவையும் செய்பவையும் சாஸ்திரங்களைப் போலவே மதிக்கப்பெறும் என்கிறார்.

தியாகத்தின் உறைவிடம்

பெண்ணினத்தை பலவீனமானது என்றல்ல, ஆணை விட சிறந்ததே என்று கருதுகிறார் அண்ணல் காந்தியடிகள். ஏனென்றால் இன்றும் பெண்ணினமே தியாகத்திற்கும், வாய்திறவாது கஷ்டங்களைச் சகிப்பதற்கும், பணிவுக்கும், பக்திக்கும், ஞானத்திற்கும் உறைவிடமாக இருந்து வருகிறது.

பெண்ணுரிமை

வீட்டிலேயே பெண் அடிமையாக வாழ்வதனைக் காந்தியடிகள், நம் அநாகரிகத்தின் சின்னமென்று கருதினார். இன்று அதிகப்பெண்கள் அரசியலில் கலந்து கொள்வதில்லை. பெரும்பாலோர் சுயமாகச் சிந்திப்பதில்லை. தம் பெற்றோர் அல்லது கணவர் ஏவலைச் செய்வதோடு திருப்தியாயிருக்கிறார்கள். பெண்களை இழிவுபடுத்தியதன் விளைவாக கடுந்தண்டனையை ஆண்கள் அனுபவித்தேயாக வேண்டும். பெண் ஆணின் வலைக்குத் தப்பிஇ தன் தகுதியையும் பெருமையையும் உணர்ந்து அவர்கள் இயற்றியுள்ள சட்டங்கள்இ சம்பிரதாயங்கள் ஆகியவற்றை மீறிக் கிளம்பும்போது அது அகிம்சை முறையில் இருந்தால் தக்கபயன் அளிக்கத் தவறாது என்பது அண்ணல் காந்தியடிகளின் நம்பிக்கையாகும். ‘நான் பெண்ணாகப் பிறந்திருந்தால், பெண்களெல்லாம் தம் கைப்பாவைகள் என்று ஆண்களிடையே நிலவும் கட்டுக்கதையை எதிர்த்துப் புரட்சி செய்வேன்’ என்று 1927-ஆம் ஆண்டு யங்இந்தியா நாளிதழில் குறிப்பிட்டுள்ளார்.

பெண்களுக்கான உரிமையில் அண்ணல் காந்தியடிகள் உறுதியான நிலைப்பாட்டைக் கொண்டிருந்தார். ஆண்களுக்கு இல்லாத சட்டரீதியான சிரமங்கள் எதுவும் பெண்களுக்கும் இருக்கக்கூடாது என்பது காந்தியடிகளின் கருத்தாகும். பெண் பிள்ளைகளும் ஆண்பிள்ளைகளும் சரிசமமாக நடத்தப்பட வேண்டும் என்கிறார்.

ஆணும் பெண்ணும் சமம்

ஆண்களும் பெண்களும் ஒரே கல்வி நிலையங்களில் பயிலும் கூட்டுக்கல்வி முறையை காந்தியடிகள் வலியுறுத்தினார். இந்தச் சோதனைமுயற்சியினை வீட்டிலிருந்தே தொடங்க வேண்டும் என்பது காந்தியடிகளின் விருப்பமாகும். பெண்களுக்குத் தக்க கல்வியளிக்க வேண்டுமென்று காந்தியடிகள் விரும்பினார். பெண், ஆடவனது சமஅறிவுள்ள சகி. அவன் ஈடுபடும் எல்லா காரியங்களிலும் கலந்து கொள்ள உரிமையுள்ளவள். ஆணைப்போலவே சுதந்திரமாக வாழ வேண்டியவள். ஆடவனுக்குத் தன்துறையிலுள்ள தலைமையும் உரிமையும் பெண்களுக்கும் தன்துறையில் இருத்தல் வேண்டும்.

ஆணும் பெண்ணும் சமமென்றால் அவர்கள் செய்யும் வேலைகளும் ஒன்றாயிருக்க வேண்டும் என்பதல்ல. ஒரு பெண் வேட்டையாடுவதையோ ஈட்டியை எடுத்து வீசுவதையோ சட்டம் தடுக்காதிருக்கலாம். ஆனால், ஆண்களுக்கே உரிய இம்மாதிரியான காரியங்கள் செய்ய இயல்பாகவே கூசும் சுபாவம் கொண்டவர்கள். இயற்கை இருபாலரையும் ஒன்றையொன்று நிரப்பும் வகையில் அமைத்திருக்கிறது. உருவங்களைப் போலவே அவர்கள் வேலையும் வெவ்வேறானவை.

பெண்களைத் தம்நண்பர்கள் என்று எண்ணாது, தம்மை அவர்களின் அதிபர்களென்று எண்ணி ஆடவர் உலகம் அடிமைப்படுத்துகின்றனர். பழக்கவழக்கமும் சட்டமும் சேர்ந்து பெண்ணை அடக்கி வந்திருக்கின்றன. தன்வாழ்க்கையை உருவாக்குவதில் ஆண்களுக்கு இருக்கின்ற உரிமை பெண்களுக்கும் உண்டு. தன் வாழ்க்கைத்துணையைத் தேர்ந்தெடுக்கும் உரிமை பெண்களுக்கு இருத்தல் வேண்டும். சமுதாயத்தில் வரதட்சணைக் கொடுமை ஒழிந்து, ஆணும் பெண்ணும் சமமாக வேண்டும்.

கைப்பாவையல்ல பெண்

நாட்டில் பெண்ணுக்கு அளிக்க வேண்டிய சரியான கல்வி, தனது கணவனுக்கு கைப்பாவையல்ல என்பதை உணர்த்த வேண்டும். ஆண்களைப் போன்று பெண்களுக்கும் தனது தேவைகளைப் பூர்த்தி செய்ய உரிமை உண்டு. சீதையை இராமனுக்கு அடிமைபூண்டு வாழ்ந்தவள் என்று எண்ணுகிறவர்கள், அவள் அனுபவித்த சுதந்திரத்தின் சிறப்பையோ இராமன் எல்லா விஷயங்களிலும் அவளுக்கு அளித்து வந்த மதிப்பையோ புரிந்து கொள்ளவில்லை என்று தான் ஆகிறது. தன்னையும் தன்மானத்தையும் காத்துக்கொள்ள முடியாத கையாலாகாத பெண்ணல்ல சீதை என்பது அண்ணலின் கருத்தாகும்.

கைம்பெண் மணம்

கணவன் இறந்தபின்பு, பெண்கள் கைம்மை வாழ்க்கை மேற்கொள்கின்றனர். சிறுவயதினரான விதவைகளுள்ள வீட்டார் தைரியமாகத் தம்பொறுப்பிலுள்ள அக்குழந்தைகளுக்கு மறுமணமல்ல, முறைப்படி நன்றாக மணம்செய்வித்து இச்சீர்திருத்தத்தைத் தொடங்க வேண்டும். ‘மறுமணம்’ என்று சொல்லாதது அவர்களுக்கு முதலில் நடந்தது மணமே அல்ல என்பதனால்தான், என்று யங் இந்தியா நாளிதழில் 1926-இல் காந்தியடிகள் குறிப்பிட்டுள்ளார்.

தாய்மை

பெண்ணின் தாயன்பு எப்போதும் காந்தியடிகளுக்கு உயர்ந்ததும் உவகையளிப்பதுமாகவே இருந்தது. ஒருதாய் தன்குழந்தைகளை உயிருக்கு உயிராக நேசிக்கும்போது அவர்களை வளர்க்கும் அறிவு அவளுக்கு இல்லாமல் இருக்கலாம் என்ற மிலிபோலாக்கின் கருத்திற்கு ‘அன்பே அவளுக்கு அதையும் கற்றுக்கொடுக்கும்’ என்கிறார், காந்தியடிகள்.

கருத்தடைக்குப் புலனடக்கம்

பிறக்கும் குழந்தைகளின் தொகையைக் கட்டுப்படுத்துவதற்குள்ள தலையாய ஒரேமுறை புலனடக்கமே ஆகும். செயற்கை முறைகளினால் கட்டுப்படுத்துதல் மனித இனம் தற்கொலை செய்துகொள்ளுதலாகும். அவை சரியாக இருந்தபோதும் செயற்கைமுறைகளினால் தீங்கே விளையும் என்பது காந்தியடிகளின் கருத்தாகும்.

பெண் மானம்

பெண்ணைப் பாதுகாத்தல் ஆண்களின் கடமையென்றாலும் தன்னைக் காக்க ஆடவன் ஒருவன் இல்லாதபோதும், இப்புனிதப்பணியை அவன் செய்யத் தவறியபோதும் இந்தியப்பெண் யாரும் என்ன செய்வேன்? என்று ஏங்கக்கூடாது என்கிறார், காந்தியடிகள். ஒருபெண் தாக்கப்படுகையில் அவள் இம்சை, அகிம்சை பற்றியெல்லாம் யோசித்துக் கொண்டிருக்கத் தேவையில்லை. அப்போது அவளின் முதற்கடமை ‘தற்காப்பே’ ஆகும். தன்மானத்தைக் காப்பதற்கு அவளுக்குத் தோன்றும் எந்த முறையையும் அல்லது சாதனத்தையும் அவள் உபயோகித்துக் கொள்ளலாம். கடவுள் அவளுக்கு நகங்களும் பற்களும் அளித்திருக்கின்றார். அவற்றை அவள் தன்னால் முடிந்த மட்டும் உபயோகித்துக் கொள்ளலாம். சாகத்துணிந்த ஆடவனாலும் பெண்ணாலும் தன்னை மட்டுமல்லஇ பிறரையும் தன்னுயிரை அளித்துக் காக்க இயலும்.

தேவதாசிகள் ஒழிப்பு

சட்டத்திற்கும் நியாயத்திற்கும் மாறாக தன் இச்சைக்காக செயல்படும் சிலரால் பல பெண்களின் வாழ்க்கை பாதிப்புக்குள்ளாகிறது. பெண்கள் சிலர் இதற்கு கட்டாயமாக்கப்பட்ட கொடுமைகளும் நிகழ்ந்துள்ளது. இப்பெண்களை தேவதாசிகள் என்று அழைப்பதனால், மதத்தின் பெயரால் இறைவனையே அவமானப்படுத்துகிறோம். இத்தகு கொடுமைகளிலிருந்து விடுத்துப் பெண்களைப் பாதுகாக்க வேண்டும். தேவதாசி முறையை ஒழிப்பதற்காக, இந்தியா விடுதலை அடைந்ததை அடுத்து 1947, அக்டோபர் 9-ஆம் நாளன்று ‘தேவதாசி ஒழிப்புச் சட்டம்’ கொண்டுவரப்பட்டது.

பெண்களுக்கென்று இழைக்கப்பட்ட அநீதிகள் எண்ணிலடங்காதவைகள். இதுபோன்ற சமூகநோயிலிருந்து விடுபட, தூயோர் ஒவ்வொருவரும் தாம் எங்கிருந்தாலும் தம் சுற்றுவட்டாரங்களில் தீமையில்லாது பார்த்துக் கொள்ளவேண்டும் என்று காந்தியடிகள் வலியுறுத்தினார்.

ஆபரணப் பித்தம்

ஆபரண சேர்க்கையானது அழகு சேர்ப்பதற்காகப் பயன்படும் ஒரு சாதனமே ஆகும். விலை அதிகமுள்ள நகைகள் அணிவதனால், பொருளாதார அளவில் நாட்டிற்கு நிச்சயம் ந~;டமே என்பது அண்ணலின் கருத்து. ஏனெனில், தொழிலுக்குப் பயன்படக்கூடிய அவ்வளவு முதலீடுகளும் முடக்கப்பட்டும் தேய்ந்தும் போகிறது. இந்தச் சுயதூய்மை இயக்கத்தில் ஆண்களும் பெண்களும் தம் ஆபரணங்களை அளிப்பதால், சமூகத்திற்கு நிச்சயம் நன்மையே என்பது காந்தியடிகளின் எண்ணம் ஆகும்.

போராட்டக் களத்தில் பெண்கள்

உலகிலேயே பெண்களை அதிகஅளவில் திரட்டி நடத்தப்பட்ட போராட்டங்களில் மிகவும் பிரம்மாண்டமானது இந்தியப்போராட்டம் என்றால், முன்னோடிப் போராட்டம் என்பது தென்னாப்பிரிக்காவில் நடந்த சத்தியாக்கிரகம்தான். இவையாவுமே காந்தியடிகளால்தான் சாத்தியமானது. கிறிஸ்துவத் திருமணங்களைத் தவிர மற்ற திருமணங்கள் ட்ரான்ஸ்வாலில் செல்லாது என்று அந்நாட்டில் சட்டம் இயற்றப்பட்டது. இதனை எதிர்த்து, ‘ட்ரான்ஸ்வால் சகோதரிகள்’ என்று அழைக்கப்பட்ட 11பேர் கொண்ட குழுவானது காந்தியடிகளால் அமைக்கப்பட்டு போராட்டத்தில் ஈடுபடுத்தப்பட்டனர். இவர்கள் நியூகேஸில் சுரங்கப்பகுதிகளுக்குச் சென்றார்கள். அங்கு ஒப்பந்தத் தொழிலாளர்களை வேலை நிறுத்தத்தில் ஈடுபடுத்தி பேரளவிளான போராட்டங்களை நடத்தி வெற்றியும் பெற்றனர்.

இந்தியாவில் பெண்களின் நிலை

காந்தியடிகள் தென்னாப்பிரிக்காவில் இருந்து திரும்பிய காலத்தில் பெண்களுக்கு எதிரான வன்முறைகள், சாதி ஆணவக்கொலைகள் போன்றவை காந்தியடிகளை வேதனைக்குள்ளாக்கியது. இந்தியர்கள் தங்கள் பெண்களை அடிமையிலும் மோசனான நிலையிலேயே வைத்திருந்தனர். பெண்ணடிமைத்தனம் போன்றவற்றை ஒழிக்காமல், தேசவிடுதலை சாத்தியமில்லை என்றே காந்தியடிகள் கருதினார்.

பொதுவாக பலகூட்டங்களில் பேசும்போது, காந்தியடிகள் தன்கையைக் காட்டி முதல்விரல் தாழ்த்தப்பட்ட மக்களுக்குச் சமத்துவம்; இரண்டாவது விரல் நூல் நூற்றல்; மூன்றாவது மது உள்ளிட்ட போதைவகைகளைத் தவிர்த்தல்; நான்கு இந்து – முஸ்லீம் ஒற்றுமை; ஐந்து ஆண்-பெண் சமத்துவம் போன்றவைகள் நிறைவேற்றப்படல் வேண்டும் என்று வலியுறுத்தினார். பெண்களையே தனது வழித்துணையாகவும் உறுதுணையாகவும் தேர்ந்தெடுத்துக்கொண்டார். அவரோடு விவாதிக்கும்படியும், மாறுபாடான கருத்தைக் கொண்டிருந்தால் தைரியமாக வெளிப்படுத்தும்படியும் பெண்களை காந்தியடிகள் ஊக்குவித்தார். முடிவுகளை எடுப்பதில் மனைவிக்கு முதலிடம் கொடுக்க வேண்டுமென்றும் காந்தி கூறினார்.

தற்காலப் பெண்கள்

பெண்கள், மேனாட்டாருக்கே பொருத்தமான பழக்கவழக்கங்களைப் பின்பற்றிப் பயனில்லை; இந்தியச் சூழ்நிலைக்கும் இயல்புக்கும் பொருத்தமான முறைகளைக் கையாள வேண்டும். நம் பண்பாட்டின் சிறந்த அம்சங்களை விடாது பற்றிப் பாதுகாப்பதில் கலங்காத உறுதியும்இ அதன் தீயஅம்சங்களைத் தயங்காது விலக்குவதில் திடமும் பெண்கள் பெற்றிருக்க வேண்டும். தற்காலப் பெண்கள் ஆடை அணிவது காற்று, மழை வெயிலிலிருந்து தன் உடலைக் காக்க அல்;ல. பார்ப்போர் கவனத்தைக் கவரவே! பல செயற்கை அழகுசாதனங்களைக் கொண்டு, பலபெண்கள் இயற்கை செய்யத் தவறியதைச் செய்து, விசித்திரமாகக் காட்சியளிக்கிறார்கள். அகிம்சைவழி இதுமாதிரியான செயல்கள் பெண்களுக்கு உகந்ததல்ல என்கிறார், காந்தியடிகள். சுதந்திர காலகட்டத்தில் இருந்த பெண்களின் நிலை கல்வி, பொருளாதாரம், வேலைவாய்ப்பு போன்றவற்றில் பன்மடங்கு வளர்ச்சி கண்டுள்ளது. பெண்களின் முன்னேற்றமானது சமத்துவ சமுதாயத்திற்கு இன்றியமையாததாகும்.

தொகுப்புரை

பெண்களுக்கு அளிக்கப்பட்ட அநீதிகள் குறித்தும் அவற்றிலிருந்து பெண்களைப் பாதுகாத்தல் குறித்தும் அண்ணல் காந்தியடிகளின் வலிமைமிக்க கருத்துகள் தொகுத்துக் கூறப்பட்டுள்ளன.

சமூகத்தில் பெண்களின் நிலை குறித்தும் அவர்களின் அடிப்படைத் தேவைகள், உரிமைகள், சமத்துவம், சகோதரத்துவம் போன்றவை அனைத்துத்தரப்பு பெண்களுக்கும் தடையின்றி கிடைக்கப்பெற வேண்டும் எனவும் வலியுறுத்தப்பட்டுள்ளது.

பெண்களுக்கு இழைக்கப்பட்ட அநீதிகளான வரதட்சணைக் கொடுமை, தேவதாசி முறை போன்றவற்றிலிருந்து முழுமையாகப் பாதுகாத்து அவர்களின் முன்னேற்றத்திற்கு ஆண்கள் உறுதுணையாக இருக்க வேண்டுமென்பதே அண்ணல் காந்தியடிகளின் கருத்தாகும் என்பது புலப்பட்டுள்ளது.

பெண்களின் இயல்புகள் குறித்தும், சமுதாயத்தில் பெண்களின் முக்கியத்துவம் மற்றும் தற்காலப் பெண்களின் மனநிலை குறித்தும் பலதளங்களில் குறிப்பிடப்பட்ட அண்ணல் காந்தியடிகளின் கருத்துகள், ‘காந்திய அடித்தளத்தில் பெண் முன்னேற்றத்திற்கான பல்வேறு பரிமாணங்கள்’ எனும் இக்கட்டுரையில் விரிவாக ஆராயப்பட்டுள்ளது.

சக்தி சக்திதாசன்

அன்பினிய வல்லமை வாசகர்களே!

இங்கிலாந்திலே இன்று அரசியல் நிலைமைகள் வேகமாக மாறிக் கொண்டிருக்கின்றன.

பிரதமர் கியர் ஸ்டாமர் தனது பதவியை இராஜினாமா செய்துள்ளார் என்ற செய்தி அரசியல் வட்டாரங்களில் பெரும் அதிர்வை ஏற்படுத்தியுள்ளது.

இந்த முடிவு ஒரு தனிப்பட்ட தீர்மானமாக மட்டும் அல்லாமல், கடந்த சில வாரங்களாக உருவாகிக் கொண்டிருந்த அரசியல் அழுத்தங்களின் கூட்டுத் தாக்கமாகப் பார்க்கப்படுகிறது.

இந்தச் சூழலைப் புரிந்துகொள்ள, மூன்று முக்கிய காரணிகளை நாம் ஆராய வேண்டியுள்ளது.

அண்டி பேர்ன்காம் ( Andy Burnham ) பெற்ற அண்மைய வெற்றி, ரீபோர்ம் கட்சியின் எதிர்பாராத எழுச்சி, மற்றும் லேபர் கட்சியின் உள்ளக அழுத்தங்கள்.

முதலில், அண்டி பேர்ன்காம்.

சில காலங்களுக்கு.முன்னால் இரண்டுமுறை லேபர் கட்சியின் தலைமைப்பதவிக்கு போட்டியிட்டு தோல்வியுற்றதால் பாரளுமன்ற அரசியலை விட்டு ஒதுங்கியிருந்தார்.

பாராளுமன்ற அரசியலை விட்டு ஒதுங்கினாலும் அரசியலை விட்டு ஒதுங்கவில்லை.

லேபத் கட்சியின் சார்பாக தான் வாழும் மான்செஷ்டர் பகுதி மேயர் தேர்தலில் போட்டியிட்டு இரண்டுமுறையும் வெற்றி பெற்றார்.

வெற்றி பெற்றது மட்டுமில்லாமல் அப்பகுதியின் பிரச்சனைகளை எதிர்கொண்டு பல தீர்வுகளை பெற்றுகொடுத்து அப்பகுதியில் மிகவும் பிரபல்யமடைந்திருந்தார்.

இராண்டாவது தடவையாக கடந்த மேமாதம் தான் மீண்டும் மேயராக தெரிவு செய்யப்பட்ட நிலையில் மீண்டும் பராளுமன்ற உறுப்பினராகும் முடிவெடுத்தார்.

அவரது மான்செஷ்டர் பகுதி செயற்பாடுகளின் அடிப்படையில் செல்வாக்கு குன்றிய நிலையில் இருந்த கியர் ஸ்டாமருக்கு ஒரு மாற்று தலைவராக இவரால் சிறப்பாக செயலாற்ற முடியும் என்று பாராளுமன்ற லேபர் கட்சி உறுப்பினர்கள் எண்ணினார்கள்.

அதற்கு ஒரு பாராளுமன்ற உறுப்பினராகக்கூட இல்லாத அண்டி பேர்ன்காம் எவ்வாறு பிரதமராகலாம் ?

இங்கேதான் மான்செஷ்டர் பகுதியில் அண்டி பேர்ன்காம் பிறந்து வளர்ந்த மக்கெல்ஸ்வீல்ட் எனும் பகுதி பாரளுமன்ற உறுப்பினர் அண்டி பேர்ன்காம் அவர்களை பாரளுமன்றம் அனுப்புவதற்கு ஏதுவாக தனது பாராளுமன்ற பதவியை இராஜினாமா செய்தார்.

விளைவு அதற்கான இடைத்தேர்தல் கடந்த 18ம் தேதி நடைபெற்றது.

அண்டி பேர்ன்காம் இந்தத் தேர்தலில் வெற்றி பெற்றால் கியர் ஸ்டாமர் அவர்களின் பிரதமர் பதவிக்கு போட்டியிடுவார் எனும் எதிர்பார்ப்பில் போட்டியிட்டார்.

கடந்த வாரம் அவர் பெற்ற அரசியல் வெற்றி சாதாரண தேர்தல் வெற்றியாக மட்டும் பார்க்க முடியாது.

அது லேபர் கட்சியின் அடிப்படை ஆதரவாளர்களின் மனநிலையை வெளிப்படுத்தும் ஒரு குறியீடாக மாறியுள்ளது.

பாரம்பரிய தொழிலாளர் வாக்காளர்கள், நகர்ப்புற நடுத்தர வர்க்கம், மற்றும் இளைஞர் வாக்காளர்கள் இவர்கள் பலரும் ஸ்டாமரின் மிதமான, சில நேரங்களில் தயக்கமான அரசியல் அணுகுமுறைக்கு மாற்றாக, தெளிவான மற்றும் நேரடியான குரலை நாடி வருகிறார்கள்.

பேர்ன்காம் இந்த இடைவெளியை நிரப்பியுள்ளார்.

அவரது அரசியல் மொழி நேரடி, அவரது கொள்கைகள் மக்களோடு இணையும் வகையில் அமைந்துள்ளன.

இதனால், லேபர் கட்சிக்குள் மறைமுகமான தலைமைப் போட்டி உருவாகி, ஸ்டாமரின் நிலையை பலவீனப்படுத்தியுள்ளது.

இரண்டாவது, ரீபோர்ம் கட்சியின் எழுச்சி.

இது இங்கிலாந்தின் அரசியல் அமைப்பில் ஒரு முக்கிய மாற்றத்தை சுட்டிக்காட்டுகிறது.

பாரம்பரிய கன்சர்வேட்டிவ் ஆதரவாளர்கள் மட்டுமல்லாமல், அரசியல் அமைப்பில் விரக்தி அடைந்த பலர் ரீபோர்ம் கட்சியின் பக்கம் திரும்பியுள்ளனர்.

குடியேற்றம், பொருளாதாரம், மற்றும் தேசிய அடையாளம் போன்ற கேள்விகளில் அவர்கள் எடுத்துக்கொள்ளும் கடுமையான நிலைப்பாடுகள், பொதுமக்களிடையே எதிரொலி பெற்றுள்ளன.

இந்த எழுச்சி, லேபர் கட்சிக்கு இரு முனைகளிலும் அழுத்தத்தை ஏற்படுத்தியுள்ளது.

ஒரு பக்கம் கன்சர்வேட்டிவ் வாக்காளர்கள் ரீபோர்முக்கு நகர, மற்றொரு பக்கம் லேபர் ஆதரவாளர்கள் மாற்று தலைமை தேடுகின்றனர்.

இதன் விளைவாக, ஸ்டாமர் அரசியல் மையத்தில் நிலைத்து நிற்க முயன்ற போதும், அவரின் ஆதரவு தளரத் தொடங்கியது.

மூன்றாவது மற்றும் மிக முக்கியமானது, லேபர் கட்சியின் உள்ளக நிலைமை.

ஸ்டாமர் தலைமையில் கட்சி ஒரு நிலைத்தன்மையை அடைந்தது என்பது உண்மை.

ஆனால், அந்த நிலைத்தன்மை உற்சாகத்தை உருவாக்கவில்லை.

கட்சியின் பல உறுப்பினர்கள், குறிப்பாக இளம் தலைமுறை, திடமான மாற்றங்களை எதிர்பார்த்தனர்.

அந்த எதிர்பார்ப்பு நிறைவேறாதபோது, அதிருப்தி மெதுவாக வெளிப்படத் தொடங்கியது.

இவை அனைத்தும் சேர்ந்து, ஒரு அரசியல் சூழ்நிலையை உருவாக்கின.

அந்த சூழலில், ஸ்டாமர் தனது பதவியைத் தொடர்வது கட்சிக்கே பாதகமாக இருக்கலாம் என்ற உணர்வு உருவாகியுள்ளது.

அரசியலில், சில நேரங்களில் விலகுவது தோல்வி அல்ல.

அது ஒரு மாற்றத்திற்கான வாய்ப்பை உருவாக்கும் தீர்மானமாகும்.

இன்றைய இங்கிலாந்து அரசியல், புதிய சமநிலையைத் தேடிக் கொண்டிருக்கிறது.

பழைய அரசியல் வரையறைகள் மாறிக் கொண்டிருக்கின்றன.

தலைமை, கொள்கை, மற்றும் மக்கள் எதிர்பார்ப்புகள் இவை அனைத்தும் புதிய வடிவம் எடுக்கின்றன.

இந்த மாற்றத்தின் மையத்தில் நின்று, கியர் ஸ்டாமரின் விலகல் ஒரு முடிவாக அல்ல, ஒரு புதிய அரசியல் கட்டத்தின் தொடக்கமாக பார்க்கப்பட வேண்டும்.

கன்சர்வேடிவ் கட்சிக்கு இது தற்காலிகமாக அனுகூலம், ஆனால் நீண்டகாலத்தில் சிக்கலும் உள்ளது.

கியர் ஸ்டாமரின் ராஜினாமா லேபர் அரசின் மீதான சோர்வை அதிகரித்து, ஆளும் தரப்பில் குழப்பத்தை உருவாக்குவதால் எதிர்க்கட்சியான கன்சர்வேடிவ்களுக்கு தாக்கும் வாய்ப்பு கிடைக்கிறது.

குறிப்பாக “நிலைத்தன்மை” மற்றும் “ஆட்சி மாற்றம்” என்ற கதையை அவர்கள் முன்வைக்க முடியும் .

ஆனால் 2024 பொதுத்தேர்தல் படுதோல்விக்குப் பிந்தைய பலவீன நிலை, கட்சிக்குள் தலைமைத் தெளிவின்மை, மற்றும் Reform UK-க்கு வாக்குகள் சிதறிச் செல்லும் அபாயம் காரணமாக, இந்த நெருக்கடி அவர்களுக்கு தானாகவே மீட்சியை தராது.

மொத்தத்தில், இது கன்சர்வேடிவ்களுக்கு ஒரு வாய்ப்பும் ஒரு எச்சரிக்கையும் சேர்ந்த நிலை.

ஸ்டாமர் விலகலால் அரசியல் விவாதத்தின் மையம் மீண்டும் ஆட்சியின் செயல்திறன், பொருளாதாரம், மற்றும் தலைமை நம்பகத்தன்மை என்பவற்றுக்கு திரும்புகிறது.

இது கன்சர்வேடிவ்களுக்கு தாக்குப்பிடிக்க உதவும்.

ஆனால் அவர்கள் தங்களை நம்பத்தகுந்த மாற்றாக காட்ட முடியாவிட்டால், அந்த அதிருப்தியின் பலனை Reform UK அதிகமாக எடுத்துக்கொள்ளும்.

எனவே இந்த சூழல் கன்சர்வேடிவ்களுக்கு உடனடி அனுகூலம், ஆனால் அடிப்படை ரீதியில் இன்னும் பெரும் சிக்கலே .

லிபரல் டெமகிரட்ஸ் க்கு இது பொதுவாக அனுகூலமான சூழல்.

பெரிய இரண்டு கட்சிகளின் மீதான அதிருப்தி அதிகரிக்கும் போது, லிபரல் டெமகிரட்ஸ் பல இடங்களில் “நேர்மையான, மிதமான, உள்ளூர் பிரச்சினைகளை கவனிக்கும்” மாற்று சக்தியாக தங்களை முன்வைக்க முடியும்.

குறிப்பாக நடுத்தர வர்க்கம், கல்வி பெற்ற வாக்காளர்கள், மற்றும் லேபர்-கன்சர்வேடிவ் இரண்டிலும் ஏமாற்றமடைந்தோர் இவர்களை நோக்கி நகர வாய்ப்பு உண்டு .

தலைமை மாற்றமும், ஆட்சிக் குழப்பமும் அதிகமாகும் காலங்களில், அவர்கள் நிலைத்தன்மை மற்றும் சமநிலை எனும் அரசியல் மொழியை வலுப்படுத்தி, உள்ளூர் தேர்தல்களிலும் இடைத்தேர்தல்களிலும் முன்னேற முடியும் .

ஆனால் அவர்களுக்கு சிக்கலும் இல்லாமல் இல்லை.

நாட்டளவில் ஆட்சி மாற்றத்தின் வெற்றிடம் உருவானாலும், லிபரல் டெமகிரட்ஸின் ஆதரவு பெரும்பாலும் குறிப்பிட்ட தொகுதிகளில் மட்டுமே வலிமை பெறும்.

அதை தேசிய அரசியல் அலைக்காற்றாக மாற்றுவது கடினம்.

மேலும், அதிருப்தி வாக்குகள் எல்லாம் ஒரே நேரத்தில் அவர்களிடம் வருவதில்லை.

அவை சில நேரங்களில் Reform UK-க்கும், சில நேரங்களில் கன்சர்வேடிவ் மீள்சீரமைப்புக்கும் சிதறிவிடும் .

எனவே இவர்களுக்கு இது “வாய்ப்புள்ள காலம்” என்றாலும், அதை பெரும் இடைநிலை வெற்றியாக மாற்றத் தெளிவான பிரச்சாரமும் உள்ளூர் அமைப்பும் அவசியம்.

இது ஒரு தனிப்பட்ட அரசியல் கதையாக மட்டும் அல்ல.

இது இங்கிலாந்து ஜனநாயகத்தின் இயக்கத்தின் ஒரு பிரதிபலிப்பு.