வல்லமை

அண்ணாகண்ணன்

வல்லமை மின்னிதழ், 13 ஆண்டுகளை நிறைவுசெய்து 14ஆம் ஆண்டில் நுழைந்துள்ளது. இந்தப் பதின்மூன்று ஆண்டுகளில் வல்லமை, 19,413 ஆக்கங்களை வெளியிட்டுள்ளது. இவை, முறையே 13,920 பின்னூட்டங்களைப் பெற்றுள்ளன. தொடர்ந்து பங்களிக்கும் படைப்பாளர்களையும் ஆய்வாளர்களையும் மதிப்பீட்டாளர்களையும் வாசகர்களையும் ஆசிரியர் குழுவினரையும் நன்கொடையாளர்களையும் பெரிதும் பாராட்டுகின்றோம். அனைவரின் ஆதரவுக்கும் மிக்க நன்றி.

2023 ஏப்ரல் 28 அன்று செல்வராஜ் ராமன் என்பார், வல்லமைத் தளத்தில் விடுத்துள்ள பின்னூட்டம் இதோ:

The contents contained in “vallamai” are of immense value to aspiring students and venturing capitalists. The literary section and the stories being published give much needed impetus to passionate writers and thinkers to spread their “know how” to tamil fraternity. Kudos to “vallamai “

நமது பணி, பலருக்கும் பயன் தருவதாக அமைவதில் மகிழ்ச்சி.

முக்கியமான தொடர்கள், கட்டுரைகள், படைப்புகள், தொடர்ந்து வெளிவருகின்றன. ஆய்வறிஞர் கருத்துரையுடன் ஆய்வுக் கட்டுரைகளை வெளியிட்டு வருகின்றோம்.

ஒரு முக்கியமான திருத்தத்தை இந்த ஆண்டு செய்துள்ளோம். பண்டிகை, திருநாள், பிறந்தநாள், நினைவுநாள் போன்ற தினங்களில் கவிதை ஆக்கங்கள் வருவதுண்டு. இவை செய்யுள் வடிவிலோ அழகியல் கூறுகளுடனோ இருக்கும். ஆனால், கவிதை அம்சத்தை விட, அந்தக் கருப்பொருளின் செய்தி அம்சங்களுக்கு முக்கியத்துவம் கொடுப்பதாக இருக்கும். இவற்றை இதுநாள் வரை கவிதைப் பகுதியில் வெளியிட்டு வந்தோம். இப்போது ‘நாளாம் நாளாம்’ என்ற தனிப் பிரிவில் வெளியிடத் தொடங்கியுள்ளோம். இது கவிதை என்ற செவ்வியல் வடிவத்திற்கும் இதர நினைவூட்டல் படைப்புகளுக்கும் வேறுபாட்டை உணர்த்தும். மேலும், இவற்றைத் தனித் தனியாக அணுகுவதற்கும் வழிவகை செய்யும்.

கடந்த ஆண்டு வல்லமையின் செலவினங்களுக்காக நன்கொடை கோரினேன். நண்பர்கள் ஜெயபாரதன், முனைவர் நா.கணேசன், பேராசிரியர் கண்மணி, பேராசிரியர் பெஞ்சமின் லெபோ ஆகியோர் கனிவுடன் அனுப்பிய நன்கொடைகளால் தளம் சீராக இயங்கி வருகிறது.

வல்லமைக்கு வரும் படைப்புகளை வெளியிடுவதில், முனைவர் சுரேஷ் ரங்கநாதன் பேருதவி புரிந்து வருகிறார். தள நிர்வாகப் பணியை எல்.கார்த்திக் தொடர்ந்து ஆற்றி வருகிறார். இருவருக்கும் நனி நன்றி.

வல்லமை மின்னிதழை மேம்படுத்த, உங்கள் வாழ்த்துகளையும் ஆலோசனைகளையும் கருத்துகளையும் பகிருங்கள்.

பதிவாசிரியரைப் பற்றி

Leave a Reply

Your email address will not be published. Required fields are marked *