வல்லமை

Blog

  • தீவிர சிகிச்சை பெறும் தமிழக முதலமைச்சர் விரைவில் குணமடைய பிரார்த்தனைகள்

    பொன் மனச் செல்வி!
    செல்வி. ஜெ. ஜெயலலிதா

    தமிழக  முதல்வர் ஜெயலலிதாவிற்கு மாரடைப்பு ஏற்பட்டதை அடுத்து தீவிர சிகிச்சை அளித்து வருவதாக அப்பல்லோ மருத்துவமனை அறிவித்துள்ளது.

    jayalalitha-19-1479558932-04-1480867750

    தற்போதைய முதல் அமைச்சரும், அனைத்திந்திய அண்ணா திராவிட முன்னேற்றக் கழகத்தின் தலைவருமான, ’அம்மா’, ‘புரட்சித் தலைவி’ என்று அன்பாக தொண்டர்களால் அழைக்கப்பெறும் ஜெயலலிதா அம்மையார் அவர்கள் அரசியலில் நுழைவதற்கு முன்னர் தமிழ் மற்றும் தெலுங்குத் திரைப்படங்களின் மூலம் தன்னுடைய கலையுலகச் சாதனையை நிரூபித்தவர். செல்வி ஜெயலலிதா அம்மையார் அவர்களின் தனிச் சிறப்பென்பதே, அவர் எந்தத் துறையில் நுழைந்தாலும் அத்துறையின் எல்லைவரை சென்று சாதிக்கும் வல்லமைப் பெற்ற, தோல்வியைக் கண்டுத் துவளாத, துணிச்சல்மிகு பெண்மணி என்றால் அது மிகையாகாது. ஃபீனிக்ஸ் பறவை போல, அழிக்க, அழிக்க, அந்தச் சாம்பலிலிருந்து மேலும், மேலும் புத்துணர்வுடன் உயிர் பெற்று வரும் வல்லமை கொண்டவர் இந்தப் பன்முக நாயகி. அந்த வகையில் பெண்குலத்திற்கே பெருமை சேர்க்கும், தன்னம்பிககை எனும் மகுடம் சூடிய இரும்புப் பெண்மணி, தாய்மை முலாம் பூசிய தங்க மங்கை,

    செல்வி ஜெயலலிதா அம்மையார் தமிழ்நாடு, திருச்சி மாவட்டம், ஸ்ரீரங்கம் என்ற ஊரை பூர்வீகமாகக் கொண்டவர். கர்நாடகா மாநிலம், மாண்டியா மாவட்டம், மேல் கோட்டை என்னும் கிராமத்தில் 1948 ஆம் ஆண்டு பிப்ரவரி மாதம் 24ஆம் நாள் பிறந்தார். இவருடைய தாத்தா ஸ்ரீரங்கம் கோவிலில் அர்ச்சகராக இருந்திருக்கிறார். இவரது பாட்டி திருமதி யதுகிரி அம்மையாரும் மிகவும் பிரபலமாக வாழ்ந்தவர். சோழர் காலத்தில் பல வைணவக் குடும்பங்கள் வெளியேற்றப்பட்ட போது இவருடைய குடும்பமும் வெளியேறியுள்ளது. மேல்கோட்டையில் கோமளவல்லி என்று பெயர் சூட்டப்பட்ட இவரின் பெற்றோர் திரு ஜெயராம் மற்றும் சந்தியா தம்பதியினர். திருமதி சந்தியா அவர்களும் பிரபலமான திரைப்பட நடிகை. தன்னுடைய 4ஆவது வயதிலேயே நாட்டியம் கற்றுக் கொள்ள ஆரம்பித்தவர். பரத நாட்டியம், கதக்களி, மோகினியாட்டம், மணிப்புரி போன்ற அனைத்து நாட்டியக் கலைகளிலும் முறையாகப் பயின்றுத் தேர்ந்தவர். நூறு முறைகளுக்கும் மேலாக நாட்டிய நிகழ்ச்சிகளை அரங்கேற்றியவர். இவருடைய ஈடு, இணையற்ற அழகு வதனம் இவரை திரைப்பட நாயகியாக பிரபலப்படுத்தியது. 1964ஆம் ஆண்டில் ’சின்னாட கொம்பே’ என்ற இவர் நடித்த கன்னடப் படம் இவரை ஒரே நாளில் திரையுலகின் உச்சாணிக் கொம்பில் ஏற்றி வைத்தது.

    செல்வி ஜெயலலிதா அவர்களின் ஆரம்பக்கல்வி, பெங்களூருவில் பிஷப் காட்டன் பெண்கள் மேல்நிலைப்பள்ளியில் துவங்கியது. பிறகு அவருடைய குடும்பம் தமிழ் நாட்டிற்கு குடிபெயர்ந்ததால் , சென்னையில் பிரபல சர்ச் பார்க் ஆங்கிலப் பள்ளியில் அவர்தம் கல்வி தொடர்ந்தது. பள்ளியில் தலை சிறந்த மாணவியாக அனைத்து ஆசிரியர்களின் கருத்தைக் கவர்ந்தவராக இருந்தார். மேல்நிலைக் கல்வியை முடித்தவுடன், சட்டக் கல்வி கற்க பேராவல் கொண்டிருந்த அம்மையார், தம் குடும்பச் சூழல் காரணமாக, கல்வி கற்கும் ஆர்வத்தைக் கைவிட வேண்டியதாகியது. கல்லூரி வாழ்க்கை என்பது சென்னை ஸ்டெல்லா மேரிக் கல்லூரியில், ஒரு நாளுடனேயே முடிந்து விட்டது. தம் அத்தை வித்யாவதி என்பவரின் வழியைப் பின்பற்றி தாமும் திரைப்படத்தில் நடிக்க வேண்டிய கட்டாயமும் ஏற்பட்டது, இந்த அழகு தேவதைக்கு!

    அம்மையாரின் கலையுலக சாதனைகள் :

    ஒரு திரைப்படக் கலைஞராக மிகப் பிரபலமானது இவருடைய வாழ்க்கை. 1961 ஆம் ஆண்டில் , முன்னாள் இந்திய குடியரசுத் தலைவர் டாக்டர் வி.வி. கிரி அவர்களின் புதல்வர் திரு சங்கர் கிரி அவர்கள் தயாரித்த ‘எபிசில்’ (Epistle) என்ற ஆங்கிலப் படத்திலும் நடித்துள்ளார். கன்னடத்தில் இவருடைய முதல் படமே மிகச் சிறந்த வெற்றி கண்டது. ‘ மனசுலு மமதலு’ என்று இவர் நடித்த முதல் தெலுங்குப் படமும் மிகப் பிரபலமானது. தெலுங்குப் பட உலகின் ‘கனவுக் கன்னி’ ஆனார். 1965ஆம் ஆண்டில் ‘வெண்ணிற ஆடை’ என்ற இயக்குநர் ஸ்ரீதரின் திரைப்படத்தின் மூலம், வியத்தகு அளவில் தமிழ்த் திரையுலகையும் ஆக்கிரமித்தார். இப்படம் இவருடைய குழந்தைத்தனமான் நடிப்பினாலும், கள்ளமற்ற அமைதி தவழும் முக அமைப்பினாலும், மிகவும் பிரபலமானது. அதற்குப் பிறகு, சவாலே சமாளி, சூரியகாந்தி, யார் நீ, நான், தெய்வ மகன், பாக்தாத் பேரழகி, நீ, மேஜர் சந்திரகாந்த், கந்தன் கருணை, தேடி வந்த மாப்பிள்ளை போன்ற பல்வேறு படங்களின், மிக வித்தியாசமான கதாப்பாத்திரங்கள் மூலமாகவும், வெற்றிப்படங்களின் மூலமாகவும் தன்னை நிலை நிறுத்திக் கொண்டவர். திரு.எம்.ஜி.ராமச்சந்திரன், நடிகர் திலகம் செவாலியே சிவாஜி கணேசன், போன்ற பல முன்னனி நடசத்திரங்களுடன் இணைந்து நடித்தவர்.

    திரையுலகின் உச்சாணியில் இருந்த மிகப் பிரபலமான நடிகரான திரு எம்.ஜி.ராமச்சந்திரன் அவர்களுடன் , ஆயிரத்தில் ஒருவன், காவல்காரன், அடிமைப் பெண், நம் நாடு, குடியிருந்த கோயில், ஒளி விளக்கு, தலைவன், கணவன் போன்ற பல திரைப்படங்களில் நடித்து வெற்றி வாகை சூடியவர். அதேபோல், செவாலே சிவாஜியுடனும், கலாட்டா கல்யாணம், எங்க மாமா, சுமதி என் சுந்தரி, பட்டிக்காடா பட்டணமா போன்ற பல வெற்றிப் படங்களில் இணைந்து திரையுலகையே நிமிரச் செய்தவர். 1960 – 70களில் தன்னுடைய கள்ளமற்ற சிரிப்பு மற்றும் அபரிமிதமான அழகு, குரல் வளம் மூலம் தமிழக திரையுலக இரசிகர்களைத் தம் வசம் முழுவதுமாகக் கட்டி வைத்திருந்தார் என்றாலும் அது மிகையாகாது.

    நாயகுடு விநாயகுடு , ஆதர்ச குடும்பம், அக்கா தம்முடு, பார்ய பிட்டலு, பிரம்மச்சாரி, நவராத்திரி, ஸ்ரீகிருஷ்ண விஜயம், கூடாச்சாரி 116 ஆகியத் திரைப்படங்கள் மூலமாக தெலுங்குத் திரையுலகையும் ஆக்கிரமித்திருந்தார். இவருடைய இரண்டாவது கன்னடப் படமான , நனா கர்த்தவ்யா மாபெரும் வெற்றி கண்டதும் குறிப்பிடத்தக்கது.

    1977 ஆம் ஆண்டில், தமிழக அரசினால் , ‘ கலைமாமணி’ விருது வழங்கப்பட்டு கௌரவிக்கப்பட்டார். இவர் ‘இசாத்’ என்ற இந்தித் திரைப்படத்தில் தர்மேந்திராவுடன் நடித்த படமும் வெற்றி வாகை சூடியது. இவர் இறுதியாக நடித்து வெளிவந்தது 1980 ஆம் ஆண்டில் வெளிவந்த ,’ நதியைத் தேடி வந்த கடல்’ என்ற தமிழ் திரைப்படம்.

    சகலகலாவல்லியான ஜெயலலிதா அம்மையார், பின்னனிப் பாடல்கள் பாடுவதிலும் வல்லவர் என்பதை 1969 ஆம் ஆண்டில் வெளிவந்த ‘அடிமைப் பெண்’ என்ற திரைப்படத்தில் இவர் பாடிய , ‘அம்மா என்றால் அன்பு’ என்ற, திரு வாலி இயற்றிய, திரு கே.வி. மகாதேவன் இசையமைத்த பாடல் மூலம் நிரூபித்தார் இந்த சாதனைப் பெண்மணி. அத்துடன் கவிஞர் கண்ணதாசன் அவர்களின் பாடல் மற்றும் ரண்டார்கை, சங்கர்-கணேஷ் ,டி,ஆர். பாப்பா ஆகியோரின் இசையமைப்பில், பிரபலப் பாடகர்கள் எஸ்.பி.பாலசுப்பிரமணியம், எல்.ஆர் ஈசுவரி , பி.சுசீலா போன்ற பிரபல இசைக்கலைஞர்களுடன், அடிமைப்பெண், சூரியகாந்தி, வந்தாளே மகராசி, வைரம், திருமாங்கல்யம் போன்ற திரைப்படங்களில் பின்னனிப் பாடல்கள் பாடியும் வெற்றி கண்டிருக்கிறார், தனக்கென்று ஒரு தனிப்பட்ட இரசிகர் கூட்டத்தை பெருமளவில் திரள வைத்திருந்ததில் இவருக்கு இணை இவரே என்பதே நிதர்சனம்.

    இப்படித் திரை உலகில் பல்வேறு சாதனைகள் புரிந்தவர் அரசியல் களத்தையும் விடுவதாக இல்லை. , நெருங்கிய வட்டத்தில் அம்மு என்ற செல்லப் பெயர் கொண்ட, இந்த பாரதி கண்ட புதுமைப் பெண், தம் வாழ்க்கையின் முன்னோடிகளாக கொண்டுள்ளவர்கள், தன் பள்ளித் தலைமை ஆசிரியை அன்னை செலின், தம் திரையுலக வாழ்க்கையின் வழிகாட்டியாகத் தாய் சந்தியா மற்றும் அரசியல் வாழ்க்கைக்கு வழிகாட்டியாக டாக்டர். எம்.ஜி. இராமச்சந்திரன் அவர்கள். அன்னை இந்திராவும், மார்கரெட் தாட்சரும் இவரை மிகவும் கவர்ந்தவர்கள்.

    சமூக நலப் பணிகளில் அம்மையாரின் சாதனைகள்:

    1981ஆம் ஆண்டு, அனைத்திந்திய அண்ணா திராவிட முன்னேற்றக் கழகத்தில் கொள்கைப் பரப்புச் செயலாளராகச் சேர்ந்ததன் மூலமாக ஆரம்பித்தது இவருடைய அரசியல் வாழ்க்கை., 1982இல் சட்ட சபையில் ‘பெண்ணின் பெருமை’ என்ற தலைப்பில் இவர் ஆற்றிய உரை திரு எம்.ஜி.ஆர் அவர்களை மிகவும் கவர்ந்தது. மாநிலங்கள் அவையில் தாம் ஆற்றிய சிறந்த உரையின் மூலமாக மறைந்த இந்தியப் பிரதமர் அன்னை இந்திராவையும் கவர்ந்தார். 1984 முதல் 89 வரை நாடாளுமன்ற மாநிலங்கள் அவை உறுப்பினராகவும்,1989-1991, 1991-1996, 2002-2006; அனைத்திந்திய அன்ணா திராவிட முன்னேற்றக் கழகத்தின் பொதுச் செயலாளராகவும், 1989இல் திரு எம்.ஜி.ஆரின் மறைவிற்குப் பிறகு, தம்முடைய மாபெரும் மக்களாதரவுடன், தமிழ்நாடு சட்டசபைத் தேர்தலில் அமோக வெற்றி கண்டு முதல் பெண் எதிர்க்கட்சித் தலைவரானார். 1991 – 1996 வரையில் முதல் பெண் முதல் அமைச்சராகப் பதவி வகித்ததும் குறிப்பிடத்தக்கது. 2001ஆம் ஆண்டில் திரும்பவும் மக்களின் பேராதரவுடன் பதவிக்கு வந்தார்.

    புத்தகப் பிரியையான இவர் புத்தகங்களின் மேல் கொண்ட தீராதக் காதலினால் தனக்கென்று பிரத்யேகமாக ஒரு மாபெரும் நூலகம் வைத்துள்ளதும் குறிப்பிடத்தக்கது. இவருடைய மிக விருப்பமான நூல் , “wild Swans” என்ற ஆங்கில நூலாகும். ஜங்க் சாங்க் என்ற சைன எழுத்தாளரால் 30 மொழிகளில் எழுதப்பட்ட நூல் இது. ஜெயலலிதா அம்மையார் 14 மொழிகளில் தேர்ச்சி பெற்ற , பன்மொழி வித்தகர் என்பதும் பாராட்டிற்குரிய விசயம்.

    ஆன்மீகத்தில் பெரிதும் நாட்டம் கொண்ட ஜெயலலிதா அம்மையார் அவர்கள் பெண்கள் மற்றும் குழந்தைகள் நலனில் தனிப்பெரும் அக்கரை கொண்டவர். இவருடைய ‘தொட்டில் குழந்தைத் திட்டம்’ பல ஆதரவற்ற குழந்தைகளுக்குக் காப்பிடமாக வாழ்வளித்துக் கொண்டிருக்கிறது. 1992ஆம் ஆண்டில், தமிழ் நாட்டில், சேலம், மதுரை, தேனீ, திண்டுக்கல் மற்றும் தர்மபுரி போன்ற நகரங்களில் பரவலாகக் காணப்பட்ட பெண் சிசுக் கொலையைத் தடுக்கும் வண்ணம், மிக அறிவார்ந்த செயலாக இந்தத் தொட்டில் குழந்தைத் திட்டம் ஆரம்பிக்கப்பட்டது. கிட்டத்தட்ட 200 தொட்டில்கள், மாவட்ட சமூக நல அலுவலகங்கள், ஆரம்ப சுகாதார மையங்கள், ஆரம்ப சுகாதாரத் துணை மையங்கள் போன்ற இடங்களில் வைக்கப்பட்டதன் மூலம் பெறப்பட்ட ஆதரவற்ற சிசுக்கள், மறு வாழ்வு மையங்களுக்கு அனுப்பப்பட்டனர். இந்தத் திட்டத்தின் மூலமாக 2001 முதல் 2011 ஆம் ஆண்டின் பாலின விகிதம் கணக்கெடுப்பில், தர்மபுரியில் 826லிருந்து 911 ஆகவும், சேலத்தில், 851லிருந்து, 917 ஆகவும், தேனீயில், 891லிருந்து, 937 ஆகவும், திண்டுக்கல்லில், 930 லிருந்து 942 ஆகவும் உயர்வு பெற்றதும் பாராட்டிற்குரியது. மேலும், 3200 பெண் சிசுக்களும், 582 ஆண் சிசுக்களும் இத்திட்டத்தின் மூலம் காப்பாற்றப்பட்டு, 2460 குழந்தைகள் உள்நாட்டிலேயே தத்தெடுக்கப்பட்டு, 197 குழந்தைகள் வெளிநாட்டினராலும், 18 குழந்தைகள் வெளிநாட்டில் வாழும் இந்தியர்களாலும் தத்தெடுக்கப்பட்டுள்ளனர் என்பதும் குறிப்பிடத்தக்கதாகும். அம்மையாரின் இத்திட்டம் நம் நாட்டை மட்டுமல்லாது, வெளிநாட்டவரையும் வெகுவாகக் கவர்ந்துள்ளதும் நிதர்சனம்.

    அனைத்து மகளிர் காவல் நிலையம், அதாவது, காவல் நிலையம் முழுவதும் பெண்களாலேயே நடத்தப்படுவது, இத்திட்டம் ஜெயலலிதா அம்மையாரின் ஆட்சியில் 1992ஆம் ஆண்டில் நிறுவப்பட்டது. இந்தியாவிலேயே 5 வது மிகப் பெரிய மாநில காவல் படை என்ற பெருமை பெற்றது தமிழ்நாட்டுக் காவல் துறை. இந்தியாவிலேயே வீடியோ திருட்டைக் கட்டுப்படுத்த ஒரு தனி படை நிறுவிய முதல் மாநிலம் என்ற பெருமையும் இவர் ஆட்சியில் பெற்றது. அனைத்து மகளிர் காவல் நிலையம், இந்தியாவில் முதன் முதலாக, ஒரு பெண் காவல் துறை ஆய்வாளர் தலைமையில், சென்னை ஆயிரம் விளக்குப் பகுதியில் ஆரம்பிக்கப்பட்டுப் பின் அனைத்து மாவட்டங்களிலும் விரிவடைந்தது. இந்தியாவின் முதல் பெண்கள் கமாண்டோப் படையும் , தமிழ் நாட்டில் , ஜெயலலிதா அம்மையாரின் ஆட்சியில்தான் அமைக்கப்பட்டது. 2.06.2003இல் அமைக்கப்பட்ட இந்தப் பெண்கள் கமாண்டோப் படை, ஆண்களுக்கு இணையாக அனைத்து வகையானப் பயிற்சிகளையும் மேற்கொண்டதோடு, ஆண்கள் கையாளக் கூடிய அனைத்து வகையான தானியங்கி மற்றும் அதிநவீன ஆயுதங்கள், தானியங்கிக் குண்டுகளைக் கண்டுபிடிப்பது மற்றும் அதைச் செயலிழக்கச் செய்வது, ஓட்டுநர், சவாரி மற்றும் சாகச விளையாட்டு போன்ற அனைத்துத் துறைகளிலும் தேர்ச்சி பெற்றார்கள். இவருடைய அரசியல் வாழ்க்கைச் சாதனைகளில் மேற்கண்ட இரண்டும் ஓர் மைல்கல் எனலாம்.

    வாழ்க்கையின் அடி மட்டத்தில் இருக்கும் பெண்களுக்கு இவரின் நேசக்கரம் பல வகையில் நீண்டுள்ளதும் குறிப்பிடத்தக்கது. மகளிர் சுய உதவிக் குழுக்களைப் பல வகையில் திறம்பட முன்னேற்றி வழி நடத்திச் சென்றதில், நாட்டின் பொருளாதாரத்தில் உயர்வு ஏற்பட்டதோடு, வறுமைக் கோட்டில் தத்தளித்துக் கொண்டிருந்த பல குடும்பங்கள் இன்று நல்ல முறையில் வாழ வழி காட்டிய தெய்வம் ’புரட்சித் தலைவி, அம்மா’ என்று அந்தப் பெண்களில் பலர் மனதார வாழ்த்துவதையும் கேட்க முடிகிறது. சுய உதவிக் குழுக்கள் என்பது பெண் சக்தியை ஊக்குவிக்கின்ற சத்தியமான ஒரு சமூக இயக்கம் என்றாலும் அது மிகையாகாது. இதன் மூலமாக 50 இலட்சம் மகளிர் , 3 இலட்சம் குழுக்கள், சேமிப்பு மற்றும் கடன் இணைப்பு மூலம பயன் பெறுகிறார்கள்.

    இவர் ஏற்படுத்திய மழைநீர் சேகரிப்புத் திட்டம் உலகளவில், வல்லுநர்களாலும் பெரும் வரவேற்பைப் பெற்றது என்பதும் குறிப்பிடத்தக்கது. இன்றும் வறட்சியால் நிலத்தடி நீரும் வறண்டு போன பல ஊர்களிலும், இந்த மழை நீர் சேகரிப்புத் திட்டம் மூலமாக நிலத்தடி நீர் வறட்சி தவிர்க்கப்பட்டு மக்களின் முக்கிய வாழ்வாதாரமான தண்ணீர் பிரச்சனை முற்றிலும் தவிர்க்கப்பட்டுள்ளது கண்கூடு.

    விவசாயிகள் பாதுகாப்புத் திட்டம் மூலம், விவசாய கூலித் தொழிலாளிகள் மற்றும் கிராமப்புற சிறிய விவசாயிகளும் விரிவான சமூக பாதுகாப்புப் பெற வழி வகுக்கும் குறிப்பிட்ட சிறந்த திட்டம் என்று உலகளவில் பாராட்டும் பெற்றுள்ளதும் குறிப்பிடத்தக்கது. புரட்சிகரமான இத்திட்டம் மூலமாக, தமிழ்நாட்டின், 1.37 கோடி விவசாயக் கூலித் தொழிலாளிகள் மற்றும் சிறு விவசாயிகள் , திருமணம், குழந்தை பிறப்பு, தரமான கல்வி, முதியோர் ஓய்வூதியம், துர்மரண நிவாரண நிதி போன்றவற்றிற்கு நிதி உதவி பெரும் வாய்ப்பும் பெரிதும் வரவேற்கப்பட்டது.

    சுனாமி பேரழிவால் பாதிக்கப்பட்ட மக்களுக்கு ரூ.1136 கோடி அவர்தம் மறுவாழ்விற்கான நிவாரண நிதியாகவும், மீனவர்களின் படகுகள் மற்றும் வலைகள் செப்பனிடுவதற்காக ரூ.1.46 கோடியும் அளிக்கப்பட்டது. கிட்டத்தட்ட 10.36 இலட்சம் மீனவர்கள் இதனால் பயன் பெற்றுள்ளார்கள்.

    தம்மைப் பற்றித் தாமே குறிப்பிடுகையில், “எம் வாழ்க்கையின் மூன்றில் ஒரு பகுதி என் தாயினால் ஆட்கொள்ளப்பட்டது. அடுத்த இரண்டாம் பகுதியான பெரும் பகுதி, திரு எம்.ஜி.ஆர் அவர்களினால் ஆட்கொள்ளப்பட்டது. மீதமுள்ள மூன்றாம் பகுதி எனக்காக இருந்தாலும், யாம் முடிக்க வேண்டிய கடமைகளும், பணிகளும் பல உள்ளது” என்கிறார். தம் அன்னை மற்றும் தலைவர் எம்.ஜி.ஆர். ஆகியோரின் இழப்புகள் தம்மை பெரிதும் பாதித்துள்ளதாகவும் கூறுகிறார் இந்தப் பன்மொழி வித்தகர். ஆம் ஆங்கிலத்தில் நல்ல புலமையும், பேசும் திறனும், தமிழ்,கன்னடம், மலையாளம், தெலுங்கு,இந்தி போன்ற பல மொழிகளில் தேர்ச்சியும் பெற்றவர். தம் வாழ்நாளின் மிக வேதனையானத் தருணமாக இவர் கருதுவது, ஒரு பெண்ணான தன்னை எதிர் கட்சியினர் தமிழ் நாடு சட்டசபையில் வைத்துத் தாக்கி அவமானம் ஏற்படுத்தியதையே. ‘வேத நிலையம்’ என்ற பெயர் கொண்ட இவருடைய இல்லம் போயஸ் தோட்டத்தில் அமைந்துள்ளது. பழைய தமிழ், இந்தி மற்றும் ஆங்கிலத் திரைப்படங்கள் பார்ப்பதில் ஆர்வம் உள்ளவர் அம்மையார்.

    இவருடைய தன்னம்பிக்கை, துணிச்சல் அன்பை நாடும் உள்ளம் மற்றும் மன உறுதிக்கு ஆதாரம், 1985 ஆம் ஆண்டில் மார்ச் மாதம் ஒரு ஆங்கிலப் பத்திரிக்கைக்கு இவர் அளித்த பேட்டியின் ஒரு பகுதி – “ அச்சுறுத்தல்கள் மூலமாக என்னை அடிபணியச் செய்வதோ அல்லது கடுமையான நடவடிக்கை மூலம் என்னிடமிருந்து ஏதும் பெற நினைப்பதோ, என்னை மேலும் பிடிவாதமாகவும், நெகிழ்வற்றும், வளைந்து கொடுக்க இயலாமலும், மேலும் தின்மையாகவுமே மாற்றியமைக்கும். என்னிடம் நல்லபடியாகவும், தன்மையாகவும், என்னைப் புகழ்ந்து பேசியும், அமைதியாகவும், அனுசரனையாகவும் பேசுவது மூலமாக மட்டுமே என் ஒத்துழைப்பைப் பெற முடியும்” என்ற தம்முடைய வெளிப்படையான பேச்சின் மூலம், உளவியல் முறையில், தம்மைத் தாமே அறிந்து கொள்ளும் சுய விழிப்புணர்வு பெற்ற ஒரு தீர்க்கமான எண்ணமும், தெளிவான சிந்தையும், தள்ளி நின்றுத் தம்மைத்தாமே மதிப்பீடு செய்யும் வல்லமை பெற்ற மேதாவி என்பதையும் நிரூபித்துள்ளதும் கண்கூடு.

    வாழ்க்கையின் வசந்தத்தைத் துய்த்து உணரும் இனிய பதின்மப் பருவமான 16 வயதுப் பருவத்தில், பள்ளிப் படிப்பை முடித்து மேற் படிப்பாக சட்டம் பயில பேராவல் கொள்ளும் ஒரு பெண்ணிடம், தாயின் மூலம், குடும்பத்தின் பொருளாதாரச் சீர்குலைவு என்ற பேரிடி வரும் போது,தம்முடைய இரண்டாம் வயதிலேயே தந்தையை இழந்து, தாய் மட்டுமே ஆதரவாக உள்ள நிலையில், குடும்பத்தைக் காக்க வேண்டிய சூழலில் திரைப்படத்தில் நடிக்க வேண்டிய கட்டாயம் ஏற்பட்டுள்ளது. அதுவும் அழகுப் பதுமையாக நிற்கும் மங்கை எடுத்தவுடன் வெண்ணிற ஆடை (கைம்பெண் உடுத்தும் ஆடை) என்ற திரைப்படத்தில் நடிக்கும் போது அம்மங்கையின் மனநிலை என்ன பாதிப்பை ஏற்படுத்தியிருக்கும் என்பதை உணர முடிகிறது. தன் தாயிடம் அரிதாரம் பூசித் தன்னை நடிக்க அனுப்புவது தனக்களிக்கப்பட்ட தண்டனையாகவேத்தாம் உணர்வதாக மனம் நொந்து கூறியிருக்கிறார். வாழ்க்கையின் ஆரம்பத்திலேயே அடி மனதில் அழற்சி ஏற்படும் வகையில் சூழல் அமைந்துள்ளது. தனிமை பல நேரங்களில் அவரை பண்படுத்தியதன் காரணமே , அவர் எடுத்த தீர்க்கமான முடிவாக, “வாழ்க்கையில் நான் பட்ட துன்பங்களும், துயரங்களும், எனக்குப் புகட்டிய முக்கியமான பாடம் – வாழ்க்கையில் நீ நம்பக் கூடிய ஒரே ஆள் – அது நீ மட்டுமே” என்ற மிக உன்னதமான தத்துவ ஞானம்! இதிலிருந்தே வாழ்க்கையில் இவர் பட்ட துன்பங்களின் வலியும் , வேதனையும் புரிந்து கொள்ள முடிகிறது. தாம் ’பெருமைக்குரிய நண்பர்’ என்று எண்ணிய பல நண்பர்கள் தன் நம்பிக்கைக்குப் பாத்திரமாக இல்லாமல் போனதை எண்ணி வருத்தமும் கொண்டிருந்திருக்கிறார், இளகிய மனம் கொண்ட ,கபடமற்ற நல்லுள்ளமும், கனிவான பார்வையும் கொண்ட அம்மையார்.

    மக்களால், தரமான கல்வியும், திறமையையும் கையகப்படுத்துதல் என்பது ஒரு நாட்டின் பொருளாதார முன்னேற்றம் மட்டுமல்லாமல் தாங்கள் விரும்பிய வாழ்க்கையைத் தேர்ந்தெடுக்கும் வல்லமையையும் அளிப்பது கல்வி. அந்த வகையில் அம்மையாரின் சிறந்ததொரு ஆட்சியின் மூலம், கல்வித் துறையை மேம்படுத்தும் வகையில், 274 புதிய ஆரம்பப் பள்ளிகளை நிறுவினார். 2790 ஆரம்பப் பள்ளிகள் நடுநிலைப் பள்ளிகளாக மேம்படுத்தப்பட்டுள்ளது 394 நடுநிலைப் பள்ளிகள் உயர்நிலைப்பள்ளிகளாகவும், 406 உயர்நிலைப் பள்ளிகள் மேல்நிலைப் பள்ளிகளாகவும், மேம்படுத்தப்பட்டுள்ளன. 58,282 ஆசிரியர்களுக்கான காலி இடங்கள் நிரப்பப்பட்டுள்ளன.அரசு பள்ளிகள் மற்றும் அரசு உதவி பெறும் 12 வகுப்பு வரையிலான பள்ளி மாணவர்களுக்கு இலவச பாடப் புத்தகங்கள் வழங்கும் திட்டம் பெரும் வரவேற்பைப் பெற்றது. 11 மற்றும் 12ம் வகுப்பு மாணவர்களுக்கு இலவச மிதிவண்டி வழங்கும் திட்டமும் கல்விப் பணியின் குறிப்பிட்ட முன்னேற்றம் எனலாம். இவை அனைத்திற்கும் மேலாக, இந்த அரசாங்கத்தின் திட்டமான, சம்பாதிக்கும் பெற்றோரின் விபத்தின் காரணமான திடீர் இழப்பினால் வாடும் மாணவர்களுக்கு ரூ.50,000 வரை நிதி உதவி வழங்கும் திட்டம் பெரிதும் வரவேற்பைப் பெற்றதோடு, பாதிக்கப்பட்ட இளம் சிறார்களுக்கு ஒரு வரப்பிரசாதமாக அமைந்ததோர் அருமையான திட்டம் எனலாம். குழந்தைகள் மீதும், இளம் பள்ளி மாணவர்களின் மீதும், அவர்தம் கல்வியும் சிறந்து, எதிர்கால வாழ்க்கையும் நல்ல முறையில் அமைய வேண்டும் என்ற தன்னிகரற்ற தாய்மையுள்ளமும் தெளிவாக விளங்கச் செய்யும் அம்மையாரின் பல உன்னத திட்டங்களில் இதுவும் ஒன்று.பிற்பட்ட பகுதியில் வாழும் மக்களுக்காக ‘நமது கிராமம்’ என்ற திட்டம் மூலம் மக்களின் வாழ்க்கைத்தரம் உயர்த்தப்பட்டுள்ளது. ரூபாய் 200 கோடி வரை இதற்காக நிதி ஒதுக்கீடு செய்யப்பட்டுள்ளது. வறுமை, லஞ்ச ஒழிப்பு, அகிம்சை போன்ற தம் கொள்கைகளில் உறுதியாக நிற்கும் ஒரு பெண்மணியைக் காண முடிகிறது.

    தமிழக மக்களின் பேராதரவுடன், முதலமைச்சராக மூன்றாவது முறையாக பதவியேற்றுக் கொண்ட ஜெயலலிதா அம்மையார் அவர்கள், தம்மை அரியணையேற்றிய மக்களின் நம்பிக்கைக்குப் பாத்திரமாக, பதவியேற்ற முதல்நாளே, ஏழை எளிய மக்களுக்குப் பயன் தரும் வகையில் முத்தான ஏழு நலத்திட்டங்களுக்கு அச்சாரம் இட்டது, அவர்தம் தொண்டு உள்ளத்திற்கு ஒரு நல்ல எடுத்துக்காட்டு. வறுமைக் கோட்டில் உள்ள படித்த பெண்களுக்கு திருமண நிதி உதவியாக ரூ.25,000 மற்றும் திருமாங்கல்யம் செய்வதற்காக 4 கிராம் தங்கமும் , இளநிலைப்பட்டம் மற்றும் டிப்ளமோ பட்டம் பெற்றவர்களுக்கு ரூ.50,000 மற்றும் 4 கிராம் தாலித் தங்கமும் வழங்குவதாகவும், முதியோர், மாற்றுத்திறனாளிகள், கணவரால் கைவிடப்பட்ட பெண்கள், கைம்பெண்களுக்கு வழங்கப்பட்ட ரூ.500/​ மாத ஓய்வு ஊதியம் ரூ.1,000/-​ ஆக உயர்த்தி வழங்கப்படும் என்றும், பொது விநியோகத் திட்டத்தின் அரிசி பெற தகுதியுடைய குடும்ப அட்டைதாரர்களுக்கு மாதம் 20 கிலோ அரிசி இலவசமாக வழங்கப்படும் என்றும் மிகக் குறைந்த் வருமானமுள்ள அட்டைதாரர்களுக்கு, 35 கிலோஅரிசியாக உயர்த்தி , இலவசமாக வழங்கப்படும் என்றும், இயற்கை சீற்றத்தினால், மீன் பிடிக்க இயலாத காலங்களில், தடை விதிக்கப்படுவதால் பாதிக்கப்படும் மீனவ குடும்பங்களுக்கு வழங்கப்பட்டு வந்த ரூ.1,000/-​ நிதி உதவியை ரூ.2,000/-​மாக உயர்த்தி வழங்கப்படுமென்றும், அரசு பணியில் உள்ள தாய்மார்கள் தங்களது பச்சிளங்குழந்தைகளைப் பேணி பாதுகாக்கும் வண்ணம் மகப்பேறு காலச் சலுகையாக 6 மாத காலம் மகப்பேறு விடுப்பு அளிக்கப்படும் என்றும் தேர்தல் அறிக்கையில் அளிக்கப்பட்ட வாக்குறுதிகளை நிறைவேற்றியது குறிப்பிடத்தக்கது. அரசின் சிறப்புத் திட்டங்களைச் செம்மையோடு செயல்படுத்தவும், சிறப்புத் திட்டங்கள் செயலாக்கத் துறை என்ற பெயரில் துறை ஒன்றையும் துவங்கி இத்துறைக்கென தனி அமைச்சர் செயல்படுவார் என்றும் ஆணையிட்டு , நலத் திட்டங்கள் சீரிய முறையில் பாதிக்கப்பட்டவர்களைச் சென்றடையுமாறு, செயல்பட்டது பாராட்டிற்குரியது.

    அமெரிக்க வெளியுறவுத் துறை செயலர் ஹிலாரி கிளிண்டன் அவர்களுடன் 2011ஆம் ஆண்டு சூலைத் திங்கள் 21ம் நாள் நிகழ்ந்த சந்திப்பு ஒரு மணி நேரம் நீடித்தது. சென்னை கோட்டையில் தலைமைச் செயலகத்தில் நடைபெற்ற இதில் இலங்கைப் பிரச்சனை, தமிழ்நாட்டில் அமெரிக்க தொழில் முதலீடு போன்ற முக்கியப் பேச்சு வார்த்தைகள் வரலாற்று சிறப்புப் பெற்றது.

    உலகத்தில் உள்ள எந்த அரசியல்வாதியும் பொறாமைப்படும் அளவுக்கு அமைந்துள்ள அமோக வெற்றி, நடந்து முடிந்த சட்டப்பேரவை தேர்தலின் வெற்றி என்று பாராட்டினார். முதல் அமைச்சர் ஜெயலலிதாவின் கடந்த கால ஆட்சியின்போது நிகழ்த்தப்பட்ட சாதனைகளுக்காகவும் பாராட்டு தெரிவித்தார் ஹிலாரி கிளிண்டன், இந்தியா-அமெரிக்கா இடையிலான வலுவான இருதரப்பு வர்த்தக உறவுகளை நினைவு கூர்ந்த முதல அமைச்சர் ஜெயலலிதா அமெரிக்கா, இந்தியாவின் 3வது பெரிய வர்த்தக பங்குதாரராகவும், இரண்டாவது பெரிய ஏற்றுமதி சந்தையாகவும், 3-வது பெரிய இறக்குமதி ஆதாரமாகவும் உள்ளதையும் , 2009-2010-ம் ஆண்டில் இந்தியா அமெரிக்காவுக்கு 30 பில்லியன் டாலர் அளவுக்கு ஏற்றுமதி செய்தது போல்வே அமெரிக்காவில் இருந்து இந்தியா, 10 பில்லியன் டாலர் அளவுக்கு இறக்குமதி செய்தது. இந்தியாவின் நடுத்தர சந்தை வளர்ச்சியடைந்து வருவதால், வரும் ஆண்டுகளில் அமெரிக்காவின் சேவைகளை இந்தியா அதிகளவில் இறக்குமதி செய்யும் என்றார். தமிழ்நாடு, ஆட்டோமொபைல் மற்றும் ஆட்டோ உதிரிபாகங்கள் தயாரிப்பிலும் முன்னணியில் இருப்பதாகக் கூறியவர், தமிழகத்தில் ஆட்டோமொபைல் துறையில் அமெரிக்கா அதிக முதலீடுகள் செய்ய வேண்டும் என்ற வேண்டுகோளும் விடுத்தார். மேலும் அவர் ஆட்டோமொபைல் துறையில் தமிழ்நாடு உலக அளவில் மிகப்பெரிய மையமாக உருவாக வேண்டும் என்பதே தமிழகத்தின் இலக்காகும், அதற்கான வாய்ப்புகளும் அதிகம் உள்ளது என்றார். மேலும், சிறு மற்றும் நடுத்தர தொழில்களை ஊக்குவிக்கும் வகையில் போதுமான வசதிகள் ஏற்படுத்தித் தரப்படுகிறது எனவும், வாகன உற்பத்தித் துறையில் உலகளாவிய நிறுவனங்களைப் பங்கு கொள்ளச் செய்வதன் மூலம் அந்தத் துறையை வலுப்படுத்த நடவடிக்கைகள் எடுக்கப்படுவதாகவும் ஹிலாரியிடம் விளக்கிக் கூறினார் முதல் அமைச்சர் ஜெயலலிதா.

    தமிழ்நாட்டில் அமெரிக்க முதலீடுகளுக்கு அதிக வாய்ப்பு உள்ளதாக ஹிலாரி கிளிண்டன் தெரிவித்ததும் குறிப்பிடத்தக்கது. தமிழ்நாடு அரசு, தலா 300 மெகாவாட் உற்பத்தித்திறன் கொண்ட 10 சூரியசக்தி பூங்காக்களை உருவாக்கத் திட்டமிட்டுள்ளது பற்றியும் அம்மையார் பேசியதும் குறிப்பிடத்தக்கது. தமிழ்நாட்டில் மனிதவளம் மிகப்பெரிய சொத்தாக இருப்பதையும், மனிதவள மேம்பாட்டிற்கு கல்வி முக்கிய பங்காற்றுவதையும் சுட்டிக்காட்டினார். தமிழகத்தில் 2011 மற்றும் 2020 ஆண்டுகளுக்கு இடையே 10 முதல் 12 மில்லியன் அளவுக்கு வேலைவாய்ப்புகள் இருக்கும் என மதிப்பிடப்பட்டுள்ளதாகக் கூறிய ஜெயலலிதா, தரமான கல்வி நிறுவனங்களும், வேலைவாய்ப்புக்கான பயிற்சி அளிக்கும் அமைப்புகளும் நான்கு மடங்கு அதிகரிக்க வேண்டும் என்பதையும் தெரிவித்தார்.

    ஹிலாரி கிளிண்டன், தமிழக மற்றும் அமெரிக்க தொழிற்பயிற்சி நிறுவனங்களின் பரிமாற்றத் திட்டங்களுக்கும் தாம் ஆர்வத்துடன் இருப்பதாகவும், அமெரிக்க மாணவர்கள், தமிழ்நாட்டில் உள்ள அமெரிக்க நிறுவனங்கள் மற்றும் தன்னார்வத் தொண்டு நிறுவனங்களில் பயிற்சி பெற வர வேண்டும் என்று தாம் விரும்புவதாகவும் தெரிவித்ததும் வரவேற்கத்தக்கதாகும். தமிழகத்தில் சாலை உள்கட்டமைப்புகளை மேம்படுத்தும் பணியில் தமிழகமும், அமெரிக்காவும் இணைந்து செயல்பட அதிக வாய்ப்புள்ளதாகவும் குறிப்பிட்டார் முதல்வர் ஜெயலலிதா அம்மையார்.

    அமெரிக்கா எச்.ஒன்.பி. விசா எண்ணிக்கையை 65000 ஆயிரமாக உள்ளதை 1 லட்சத்து 95 ஆயிரமாக அதிகரிக்க வேண்டும் என்று கேட்டுக் கொண்டார். மேலும் அவர், இலங்கையில் போர் முடிந்து இரண்டு ஆண்டுகள் ஆகிவிட்ட நிலையிலும், இன்னமும் இலங்கைத் தமிழர்கள் யாழ்ப்பாண பகுதிகளில் உள்ள முகாம்களில் தங்க வைக்கப்பட்டு உள்ளனர். இதனால் அவர்களது சொந்த இடங்களுக்குச் செல்ல முடியாமல் அவர்கள் தவிக்கின்றனர் என்பதையும் சுட்டிக்காட்டினார். இதற்கு கவலை தெரிவித்த ஹிலாரி கிளிண்டன், முகாம்களில் அடைக்கப்பட்டுள்ள இலங்கைத் தமிழர்கள் தங்களது சொந்த இடங்களுக்கு திரும்புவதற்கு, அமெரிக்க அரசு பல புதுமையான, ஆக்கப்பூர்வமான திட்டங்களை ஆராய்ந்து வருவதாகவும் கூறினார். தமிழ்நாட்டில் உள்ள இலங்கை அகதிகள் முகாமில் உள்ளவர்களுக்கு, உள்ளூர் மக்களுக்குச் செய்து தரப்படும் அனைத்து வசதிகளும் இவர்களுக்கும் செய்து தரப்பட்டுள்ள்தாக அம்மையார் தெரிவித்தார். தங்கள் உடைமைகள், சொத்து, சுகம், சொந்தம், பந்தம் என அனைத்தையும் இழந்து அகதிகளாய் வந்து தஞ்சம் புகுந்துள்ள அந்த நொந்த உள்ளங்களுக்கு களிம்பிட்டு ஆற்றும் விதமாக அம்மையாரின் செயல் திட்டங்கள் அமைந்திருப்பது, பெண்மைக்கேயுரிய அவர்தம் இரக்க குணமும், கனிவான போக்கும் தெளிவாகிறது.

    முதலமைச்சர் ஜெயலலிதா அம்மையார் கொண்டு வந்த முன்னோடித் திட்டங்களான தொட்டில் குழந்தைத் திட்டம், பெண் குழந்தைப் பாதுகாப்புத் திட்டம், அனைத்து மகளிர் காவல் நிலையங்கள், மகளிர் சுயஉதவிக் குழுத் திட்டம் ஆகியவற்றைப் பற்றி தெரிந்து கொள்ள மிகவும் ஆர்வமாக இருப்பதாகவும், அமெரிக்காவிற்குப் பயன்படும் வகையில், இத்திட்டங்களைப் பற்றிய தகவல்களை சென்னையில் உள்ள அமெரிக்கத் துணைத் தூதரகத்திற்கு வழங்குமாறும் ஹிலாரி கிளிண்டன் முதல் அமைச்சர் ஜெயலலிதாவை கேட்டுக் கொண்டதும் குறிப்பிடத்தக்கது. முன்னாள் முதல் – அமைச்சர் எம்.ஜி.ஆர். கொண்டு வந்த இலவச சத்துணவு திட்டத்தையும் வெகுவாகப் பாராட்டினார் அவர்.

    இலங்கையில் சம உரிமைக்காகத் தம் இன்னுயிரையும் பணயம் வைத்துப் போராடி வரும் தமிழர்களை முற்றிலும் அழிக்கும் நடவடிக்கையில், இலங்கை அரசு பொதுமக்கள் வசிக்கும் பகுதிகள் மற்றும் மருத்துவமனைகள் மீது குண்டுகள் வீசப்பட்டு ஒட்டு மொத்த தமிழினத்தையே அழிக்கக் கூடிய கொடிய செயலை மேற்கொள்ளப்பட்டபோது, தமிழக சட்ட மன்ற வரலாற்றில் பொன் எழுத்துக்களால் பொறிக்கப்படக் கூடிய வகையில் போர்க்குற்றங்களில் ஈடுபட்டவர்களை போர்க் குற்றவாளிகள் என்று பிரகடனப்படுத்த ஐ.நா சபையை மத்திய அரசு வலியுறுத்த வேண்டுமென்றும், சிங்களருக்கு இணையாக தமிழர்களுக்கு அனைத்து குடியுரிமைகளும் வழங்கப்பட வேண்டுமென்றும், இதற்காக இலங்கை அரசின் மீது மற்ற நாடுகளுடன் இணைந்து பொருளாதாரத் தடையை விதிக்க நடவடிக்கை எடுக்க வேண்டும் என்றும் தீர்மானம் நிறைவேற்றியது உலகெங்கும் வாழும் தமிழர்களின் உள்ளங்களில் நம்பிக்கை ஒளியேற்றி வைத்ததும் மறுக்க இயலாத உண்மை.

    அம்மையார் பெற்ற விருதுகளின் விவரம்:

    1993ஆம் ஆண்டில் மதுரை காமராசர் பல்கலைக் கழகத்திடமிருந்தும் மற்றும் 2003ஆம் ஆண்டு, பாரதிதாசன் பல்கலைக்கழகத்திடமிருந்தும் டாக்டர் ஆஃப் லெட்டர்ஸ் பட்டமும், 1991இல், சென்னை பல்கலைக்கழகத்திடமிருந்து இலக்கியத்திற்கான டாக்டர் பட்டமும் , 1992ஆம் ஆண்டில் டாக்டர் எம்.ஜி.ஆர் மருத்துவப் பல்கலைக் கழகத்திடமிருந்து அறிவியலுக்கான டாக்டர் பட்டமும், 2003ஆம் ஆண்டில் தமிழ்நாடு விவசாயப் பல்கலைக்கழகத்திடமிருந்து அறிவியலுக்கான டாக்டர் பட்டமும் , 2005இல் டாக்டர் அம்பேத்கார் சட்டப் பல்கலைக் கழகத்திடமிருந்து சட்டங்களுக்கான டாக்டர் பட்டமும், பெற்று, கௌரவிக்கப்பட்டார். அதுமட்டுமன்றி, உலகளவில், உக்ரைனின், மனித உரிமைகள் பாதுகாப்புக் குழுவினரால் Golden Star of Honour and Dignity Award என்ற விருது மூலமும் கௌரவிக்கப்பட்டு, பாரத மாதாவிற்கும் பெருமை தேடித் தந்துள்ளார்..

    2011 மாநிலத் தேர்தலில் வெற்றி பெற்று மீண்டும் முதல் அமைச்சராகத் தேர்ந்தெடுக்கப்பட்டு தற்போது தமிழ்நாட்டை மென்மேலும் உயர்த்தி, தமிழ் மக்களுக்கு அன்னையாக இருந்து அன்பு காட்டி அரவணைத்து வழி நடத்திச் செல்லும் அம்மையாரின் தொண்டு மேலும் சிறக்க வாழ்த்துவோம். இதுவரை அம்மையார் பணியாற்றியுள்ள சட்டசபைத் தொகுதிகளின் விவரம் வருமாறு:

    1989 – போடிநாயக்கனூர்
    1991 – பர்கூர்
    2002 – ஆண்டிப்பட்டி
    2006 – ஆண்டிப்பட்டி
    2011 – ஸ்ரீரங்கம்
    2015 – சென்னை ராதாகிருஷ்ணன் நகர்
    இரண்டாவது முறையாக வெற்றிபெற்று மீண்டும் முதல்வரானார்.

    மனிதராய்ப் பிறந்தவர் ஒவ்வொருவரின் வாழ்க்கையும் ஏற்ற , இறக்கங்களால் ஆனது. அதிலிருந்து தப்புவார் எவரும் இலர். ஆனால் அதனை ஒருவர் எப்படி எடுத்துக் கொள்கிறாரோ அதன் பொருட்டே அவர்தம் வெற்றியும், தோல்வியும் நிர்ணயிக்கப்படுகிறது. அதாவது வெற்றியைக் கண்டு இறுமாப்பு கொள்வதும், தோல்வியின் போது துவண்டு வீழ்வதும் ஓர் சாதனையாளருக்கு அழகல்ல. அந்த வகையில் தம் வாழ்க்கையில் இடறிய எத்துனையோ தடைக்கற்களையும், படிக்கற்களாக மாற்றிக் கொண்டு , தம் துணிச்சல், தைரியம், அஞ்சா நெஞ்சம், விடா முயற்சி, சுதந்திர உணர்வு, அனைத்தும் இன்றைய கால கட்டத்தில் ஒரு பெண்ணிற்கு எத்துனை அவசியம் என்பதையும் வாழ்ந்து காட்டிக் கொண்டிருக்கும் நம் தமிழக முதல்வரை, மேலும் ,மேலும் வெற்றி வாகை சூடி, நம் தமிழ் நாட்டையும் வெற்றிப் பாதையில் வழி நடத்திச் செல்ல மனமார வாழ்த்துவோம். பெண்னாய்ப் பிறந்து விட்டோமே என்று நொந்து போய் வெம்பி, வேதனைப்பட்டு முடங்கிக் கிடந்த காலகட்டத்திலேயே, நான் பெண்ணாய்ப் பிறந்து சாதித்தவைகள் எத்தனை பாருங்கள் என்று வாழ்ந்து காட்டிக் கொண்டிருக்கும் ஓர் எடுத்துக்காட்டு அம்மையார் ஜெயலலிதா என்றாலும் அது மிகையாகாது. சோதனைகளை சாதனையாக்கும் அவர்தம் விடா முயற்சியும், எள்ளி நகையாடும் வஞ்சகம் கொண்டோரை மோதி மிதித்து விடும் வல்லமையும் ஜான்சி இராணியின் மறு அவதாரமாக தோற்றமளிப்பதும், தனி ஒரு பெண்ணாக நின்று அத்துணை எதிர்ப்புகளையும், துணிச்சலுடன் எதிர் கொள்ளும் திறனும், பெண் சக்தி என்ற மகத்தான சக்தியின் வெளிப்பாடு என்பதும் நிதர்சனம்.

    முதலமைச்சர் ஜெயலலிதா அவர்கள் மக்கள் நலனில் அக்கறைகொண்டு ஏற்படுத்தியுள்ள மலிவு விலை உணவகங்களும், ‘அம்மா மருந்தகம்’, ‘அம்மா சிமெண்ட்’, போன்ற பல்வேறு திட்டங்களும் சமீபத்தில் நிறைவேற்றப்பட்டு செயல்பட்டுவருகின்றன.

    தற்போது அப்பலோ மருத்துவமனையில் உடல் நலக்குறைவு, இருதய நோய் காரணமாக தீவிரச் சிகிச்சை பெற்றுவரும் எல்லோரும் அன்புடன் அழைக்கப்பெறும் அம்மா அவர்கள் விரைவில் பூரண குணமடைந்து மக்களுக்குப் பணியாற்ற எல்லாம் வல்ல எம்பெருமானை பிரார்த்திக்கிறோம்.

    Share

  • உள்ளத்தால் உயர்ந்துநிற்பார் !

       ( எம். ஜெயராமசர்மா …. மெல்பேண் … அவுஸ்திரேலியா )

     

    உடல்குறையை உளமிருத்தா

    ஊக்கமதை உளமிருத்தி

    செயற்கரிய பலவாற்றி

    திறலுடனே விளங்கிநின்று

    நலமுடனே இருக்கின்றோம்

    என்றுலகை வியக்கவைக்கும்

    மாற்றுத்திறன் மிக்காரை

    மனமார வாழ்த்திநிற்போம் !

     

    ஆண்டவன் படைப்பினிலே

    அரைகுறையாய் பிறந்தாலும்

    ஆண்டவனே வியந்துநிற்க

    அவர்செயல்கள் ஆற்றுகிறார்

    வேண்டாதார் எனவொதுக்கும்

    நிலையதனைத் தகர்த்தெறிந்து

    வியக்கவே  வைத்துநிற்கும்

    மேனிலையை வாழ்த்திடுவோம் !

     

    ஊனமுற்றார் எனவழைக்கும்

    வார்த்தைதனை பொய்யாக்கி

    வானமென உயர்ந்துநின்று

    வகைதொகையாய் பலவாற்றி

    தேர்ந்தெடுத்த வாழ்க்கைதனை

    சிறப்புடனே வாழவெண்ணி

    சீராகவாழும் அவர்

    செம்மையினை வாழ்த்திடுவோம் !

     

    நெஞ்சமதில் உறுதிகொண்டு

    துஞ்சாமல் பலதொட்டு

    வஞ்சமிலா மனத்துடனே

    வாழவெண்ணி வாழுமவர்

    ஊனமுற்றோர் எனக்கூறும்

    வட்டமதை விட்டுவிட்டு

    வாழ்நாளை மகிழ்வாக்கும்

    மனத்திடத்தை வாழ்த்திநிற்போம் !

     

    ஊனமது உடலில்லை உள்ளத்தில் இருக்கிறது

    ஞானமது வந்துவிட்டால் நம்முணர்வும் விழித்துவிடும்

    உள்ளமெலாம் ஊனம்வைத்து ஊனமதை நாம்பழித்தால்

    ஊனமுற்றார் ஊனமுறார் உள்ளத்தால் உயர்ந்துநிற்பார் !

     

    Share

  • நலம் .. நலமறிய ஆவல் … (33)

    சகோதரச் சண்டைகள்

    %e0%ae%a8%e0%ae%b2%e0%ae%ae%e0%af%8d

    கல்யாணமாகியிருந்த ஓர் இளம்பெண்ணிடம், `உன் சிறுவயதில் நடந்ததில் ஏதாவது ஒன்று மீண்டும் நடக்காதா என்று நீ ஆசைப்படுவது எது?’ என்று கேட்டேன்.

    யோசிக்காது வந்தது அவள் பதில்: `என் அண்ணனுடன் பிடித்த சண்டைகள்!’ பிறகு, சற்று ஏக்கத்துடன் தொடர்ந்தாள் `இப்போது சண்டையே போட மாட்டேன் என்கிறான். விட்டுக்கொடுத்து விடுகிறான்!’
    கூடப்பிறந்தவர்களுடன் சண்டை போடாத குழந்தை இருக்கிறதா? சந்தேகம்தான்.

    போட்டி

    பெற்றோரின் அன்பில் தனக்குப் போட்டியாக வந்துவிட்டதே என்று மூத்தவனும், `நான்தான் அம்மா வயத்திலேருந்து முதல்லே வந்திருக்கணும். அண்ணாவுக்குத்தான் எல்லாம் நிறையக் கிடைக்கிறது!’ என்று சிறியவனும் பொருமுகிறார்கள்.

    கதை: கத்திச்சண்டை

    சிறு குழந்தைகள் சண்டை போடுவதற்குக் காரணம் எதுவும் தேவையில்லை. நீண்ட காம்பைக்கொண்ட ஒரு பழுத்த இலையை கத்தியாகவே பாவித்து அதற்காகச் சண்டை போடுவார்கள்.

    `இது என் இலை! நான்தானே பறித்தேன்? என்னுடையதுதான்!’

    `நான்தான் முதலில் பார்த்தேன்? எனக்குத்தான் சொந்தம்!’

    இவர்களுக்கு நடுவில் மாட்டிக்கொண்டு இளம் தாய் முழிப்பாள். “இப்படி எல்லாவற்றிற்கும் சண்டைதான்! இரண்டுபேருமே குழந்தைகள்! எனக்கு என்ன செய்வதென்றே தெரியவில்லை. அடிக்கவும் மனம் வரவில்லை,” என்றாள். “`உனக்கும் ஒரு கத்தி பறித்து தருகிறேன்,’ என்று சிறியவனைச் சமாதானப்படுத்தினால் தீர்ந்தது கதை!” என்றேன் சிரிப்புடன்.

    அவளும் சிரித்தாள். “அவ்வளவுதானா?”

    சிறிது நேரத்தில் இரு சிறுவர்களும் முதலில் போட்ட வாய்ச்சண்டையை மறந்து, `கத்திச்சண்டையில்’ தீவிரமாக ஈடுபட்டார்கள். அவர்கள் வாயிலிருந்தும், அடித்தொண்டையிலிருந்தும் கார்ட்டூன் படங்களில் பார்த்திருந்த ஒலிகள் எழும்பிக்கொண்டிருந்தன! கத்தி உடையும்வரை அவர்கள் விளையாட்டு நீடித்தது. சிறிது நேரம் கழித்து, வேறு எதற்காவது சண்டை போடுவார்கள்.

    இப்படிச் சமாதானம் செய்யாமல், `அவன் சின்னவன்! அவனோடு உனக்கென்ன சண்டை? அழவிடாதே. குடு!’ என்று தாய் கூறியிருந்தால், அம்மாவுக்கு என்னைவிட தம்பிதான் உயர்த்தி என்ற எண்ணம் எழும் மூத்தவனுக்கு.

    இளையவனோ, அம்மா தன்பக்கம்தான் பேசுவாள், எது வேண்டுமானாலும் அழுது சாதிக்கலாம் என்று எண்ணிவிடுவான்.

    ஐந்து வயதுக்குள் பிறருடன் பழகும் தன்மை புரியாததால் சண்டை வருகிறது. குடும்பத்தினர் அவர்களது சண்டையில் குறுக்கிட்டு தக்கபடி வழிநடத்தாவிட்டால், அப்போது எழும் மனக்கசப்பு எல்லா வயதிலும் நிலைத்திருக்கும்.

    என்னையும் கவனியேன்!

    குடும்பத்தில் கடைக்குட்டி தாயிடம் ஒட்டிக்கொண்டிருக்கும். அதுபோல்தான், நோய்வாய்ப்பட்டிருக்கும் குழந்தையும். அதன் அண்ணனோ, அக்காளோ தனக்கும் தாயின் பிரத்தியேக கவனிப்பு கிடைக்கவேண்டும் என்று பெருமுயற்சி எடுத்துக்கொள்வார்கள். இது நல்லதல்ல. ஒரு தாய் எல்லாக் குழந்தைகளையும் அவரவர் தேவைக்கு ஏற்றபடி கவனித்துத்தான் ஆகவேண்டும்.

    அம்மாவின் கவனத்தைத் தங்கள் பக்கம் திருப்பவும் சில குழந்தைகள் சண்டையில் ஈடுபடலாம். அம்மாதிரித் தருணங்களில், அவர்களைக் கவனிக்காது விடுவதுதான் சரி.

    தன் ஒவ்வொரு நிமிடத்தையும் குழந்தைகளுக்காகவே செலவழிக்க நேரிட்டால், தாய்க்குத்தான் நிம்மதி பறிபோய், மன அழுத்தம் ஏற்பட்டுவிடும். (இதேபோல், வீட்டில் போதிய கவனிப்பு இல்லாத சிறுமிகள் பள்ளிக்கூடத்தில் ஆசிரியையின் கவனத்தைப் பெறவேண்டி, வேண்டுமென்றே ஏதாவது தவறிழைப்பார்கள். அவர்களைக் கவனிக்காமல், அலட்சியப்படுத்துவதுதான் அவர்களுக்கு அளிக்கக்கூடிய பெரிய தண்டனை).

    இது உன் வேலை!

    சற்றுப் பெரியவர்களாக ஆனதும், வீட்டு வேலைகளை யார் செய்வது என்பது சண்டைக்கு முக்கியமான காரணமாக அமையும். இதைத் தவிர்க்க, காலையில் ஒருவர், மாலையில் ஒருவர், அல்லது வாரத்தில் சில நாட்கள் ஒருவருக்கு என்றெல்லாம் பகிர்ந்துவிடலாம். வயதுக்கு ஏற்றபடி அவர்களுக்கு அளிக்கப்படும் வேலையை அவரவர்தான் தவறாது செய்ய வேண்டும் என்று வகுத்துவிட்டால், முணுமுணுக்காமல் செய்வார்கள்.

    வசவு கற்றுக்கொடுப்பது

    ஒரு குடும்பத்தில் தாயும் தந்தையும் வாக்குவாதம் செய்துகொண்டே இருந்தால், அவர்களைப்போல் நடக்கத்தானே குழந்தைகளும் கற்பார்கள்? இதற்குத்தான் பெரியவர்கள் பேசும்போது குழந்தைகள் அங்கு இருக்கக்கூடாது என்று விலக்கி வைப்பது. வயதுக்கு மீறிய வளர்ச்சி வேண்டாமே!

    திரைப்படங்களைப் பார்த்தும் வேண்டாத வசவுகளைக் கற்கிறார்கள் குழந்தைகள்.

    நானும் அப்படித்தான்.

    சொந்தக்கதை

    நான் சிறியவளாக இருந்தபோது பார்த்த படங்களில், வில்லன் தன் மனைவியைத் திட்டுவான். (கெட்டவன் என்றால் துளிக்கூட நல்ல குணம் இருக்கக்கூடாது என்பது திரைப்பட விதி). `பாவி, துரோகி, சண்டாளி, நயவஞ்சகி,’ என்று அடுக்கிக்கொண்டே போவான். ஒவ்வொரு சொல்லுக்கு அடுத்தும், `நானா!’ என்று நெஞ்சில் கைவைத்து அதிர்பவள்தான் நல்ல மனைவி.

    இதில் வேடிக்கை என்னவென்றால், எல்லாப் படங்களிலும் இதே வரிசையில், இதே வார்த்தைகள்தாம் வரும்.

    எங்கள் வீட்டில் இந்தமாதிரி வார்த்தைகள் எல்லாம் உபயோகிக்கப்படாததால், இப்புதிய வார்த்தைகளை ஆர்வத்துடன் கற்றேன். எப்போது, எவ்வாறு உபயோகிக்க முடியும் என்றெல்லாம் யோசிக்கவில்லை.

    எட்டு வயதுக்குட்பட்ட எனக்கும், என் தங்கைக்கும் சண்டை வரும்போது, நான் `பாவி!’ என்று ஆரம்பிக்க, அவள் அடுத்த வார்த்தையைப் பிரயோகிப்பாள். இருவருக்கும் எதற்கும் அர்த்தம் தெரியாது என்பது ஒருபுறமிருக்க, அவற்றை உச்சரிக்கும்போதே பலம் பெருகி, எதிராளியை வீழ்த்திவிட்டதுபோல் உணர்வோம். முடிந்தவரை உரக்கக் கத்துவோம் — அம்மா, `ஏய்! என்ன அசிங்கம் இது?’ என்று எங்கிருந்தாவது குரல் கொடுக்கும்வரை.

    இரண்டுபேரும் ஒரே சமயத்தில் ஒற்றுமையாகி, `ஒண்ணுமில்லேம்மா,’ என்று குரல் கொடுப்போம். ஒருவரையொருவர் பார்த்துப் பெருமையுடன் சிரித்துக்கொள்வோம்.

    பல முறை இதுபோன்ற சம்பவங்கள் நடந்துவிட, அவ்வார்த்தைகள் மனதில் பதிந்துவிட்டன. எதற்குச் சண்டை போட்டோம் என்று நினைவில்லை.

    சமீபத்தில் ஏதோ அரதல் பழசான படத்தில் வில்லன், `பாவி!’ என்று ஆரம்பிக்க, நான் மகிழ்ச்சியுடன், மீதி வார்த்தைகளைப் பூர்த்தி செய்தேன்! வீட்டில் எல்லாருக்கும் ஒரே சிரிப்பு.

    சண்டை அவசியம்

    சகோதர சகோதரிகள் சண்டை போடுவது பிற்கால வாழ்க்கைக்கு அவசியம். எப்படி என்கிறீர்களா?
    பிறரது எண்ணப்போக்கைப் புரிந்துகொண்டு, அனுசரணையாக நடந்துகொள்ளவும், நல்லவிதமாகப் பழகவும் சிறுவயதில் நாம் போடும் சண்டைகள் உதவுகின்றன.

    `இந்தப் பொம்மையை நீ வெச்சுக்கோ, அதை நான் எடுத்துக்கறேன்,’ என்று சமாதானம் பேசும் குழந்தை தகறாறின்போது பேச்சுவார்த்தை நடத்தக் கற்கிறது. முரட்டுத்தனமாக நடப்பது நன்மையில் முடிவதில்லை என்று புரிந்து, அதை அடக்கிக்கொள்ள முயல்கிறது.

    எப்போதும் சிறிய மகனையோ, மகளையோ பெரிய குழந்தைக்கு எதிராக ஆதரித்துப் பேசும் தாய் தன்னையுமறியது அதற்குக் கேடு விளைவிக்கிறாள்.

    எல்லாருமே எப்போதுமே விட்டுக்கொடுத்துக்கொண்டே இருப்பார்களா, என்ன! சண்டை போடவும் தைரியம் இல்லாது, சமாளிக்கும் வழியும் புரியாது விழிப்பார்கள் அப்படி வளர்க்கப்பட்ட சிலர்.

    `என்னையும் அடிச்சு வளர்த்திருக்கணும்!’ என்று தாயிடமே குறைகூறுவார்கள்.

    வேறு சிலர் எல்லாவற்றிற்கும் பிறருடன் சண்டை போடுவார்கள்.

    கதை: வளர்ந்த செல்லக்குழந்தை

    என்னுடன் உத்தியோகம் பார்த்த ஓர் ஆசிரியை விஞ்ஞானப் பாடத்தை என்னுடன் பகிர்ந்து கற்பித்தாள். நான் பௌதிகம் மற்றும் ரசாயனம் மட்டும்.

    ஒரு பரீட்சைக்கு, `நீ உன் பாடத்தில் கேள்வித்தாளை அமைக்க வேண்டுமாம். உன்னிடம் தெரிவிக்கும்படி தலைமை ஆசிரியர் என்னிடம் சொல்லிவிட்டுப் போனார்,’ என்று நான் அவளிடம் கூறினேன்.

    `நான் பண்ணமாட்டேன், போ! நீ என்ன சொல்வது?’ என்று அவள் முரண்டுசெய்தது பிற ஆசிரியர்களுக்கு வேடிக்கையாக இருந்தது.

    எனக்கோ ஒரே எரிச்சல். `என்னவோ பண்ணிக்கொள்!’ என்றேன்.

    அவள் போய் தலைமை ஆசிரியரைச் சந்தித்தாள். அவர் என்ன `டோஸ்’ விட்டாரோ!

    தோல்வியடைந்தவள்போல் முகத்தை வைத்துக்கொண்டு, `சரி. நானே செய்யறேன்!’ என்று என்னிடம் வந்து கூறினாள், எனக்காக ஏதோ பெரிய தியாகம் செய்வதுபோல. நான் எதுவும் பேசவில்லை.

    அவள் அப்பால் சென்றதும், `இவளுக்கு ஆறு அண்ணன்மார்கள். இவள் ஒருத்திதான் பெண். வீட்டில் செல்லக்குழந்தையாக இருந்திருக்கலாம். அதற்காக எப்போதுமே எல்லாருமே அருமையாக நடத்தவேண்டும் என்றால் நடக்கிற காரியமா?’ என்றார் முதிர்ச்சியுடைய ஆசிரியை ஒருவர். அதை ஒப்புக்கொண்டு, எல்லாரும் நமட்டுச்சிரிப்புச் சிரித்தோம்.

    உங்கள் குழந்தைகள் சண்டை போடுகிறார்களா? ஒருவர் பக்கமும் சாயாமல், அவர்களை ரசியுங்கள். அடிதடியில் இறங்கினால் மட்டும் குறுக்கிடலாம். தானே பெரியவர்களானதும், ஒற்றுமையாகிவிடுவார்கள். அப்போது அவர்கள் போட்ட சண்டைகளையெல்லாம் நினைவுகூர்ந்து சிரிக்கலாம். அவர்களுக்குப் பிறகு பிறந்த குழந்தைகள், `எவ்வளவு வேடிக்கை! இப்போ சண்டையே போடறதில்லையே!’ என்று ஏங்கும் அளவுக்கு!

    தொடருவோம்

    Share

  • படக்கவிதைப் போட்டி … (89)

    பவள சங்கரி

    அன்பிற்கினிய நண்பர்களே!

    வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

    15320292_1165074813546716_841877321_n

    23112939n06_rராமச் சந்திரன் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

    இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 10.12.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

    போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

    Share

  • கற்றல் ஒரு ஆற்றல்  55

    -க. பாலசுப்ரமணியம்

    வீட்டுச் சூழ்நிலைகளும் கற்றலும் (3)

    education

    இது ஒரு வீட்டில் நடந்த நிகழ்ச்சி. மூன்றாம் வகுப்பில் படிக்கின்ற ஒரு மாணவன் அன்று பள்ளி முடிந்ததும் தனது மாதாந்திர மதிப்பீட்டிற்கான பதிவேட்டினை (Progress report) தனது தாயிடம் அளிக்கிறான். அதைக் கவனித்த அவன் தாய் “கணக்கிலே வெறும் 85 மார்க்குகள்தானா? இப்படி எடுத்தால் எப்படி உருப்படுவாய்? எந்தப் பொறியியல் கல்லூரியிலே உனக்கு இடம் கிடைக்கும்?” என்று கேட்கிறாள்.

    அதற்குப் பதிலளிக்கும் வகையில் மகன் பொறுமையாக “அம்மா, எனக்கு அறிவியலில் 100 மார்க்குகள் கிடைத்துள்ளன. ஆங்கிலத்திலே 97 மார்க்குகள், சமூக இயலில் 93 மார்க்குகள் கிடைத்திருக்கின்றன” எனப் பதிலளிக்கிறான்”. உடனே தாய் “அதைப்பற்றி எனக்குக் கவலையில்லை. கணக்கில் ஏன் மார்க்குகள் குறைந்தன? உங்க அப்பாவுக்கு யார் பதில் சொல்றது? நீயே உன் அப்பாவிடம் பேசிக்கொள்” என்று சொல்லி அலுவலகத்தில் இருக்கும் தனது கணவரிடம் அலைபேசியில் “உங்க பையனை நீங்களே கேட்டுக் கொள்ளூங்கள்” என்று அவன் கையில் அலைபேசியைக் கொடுத்து விடுகிறாள்.

    ”என்னடா ஆச்சு உனக்கு…. ஏன் இவ்வளவு கம்மி மார்க்? என்று கேட்கும் தந்தையிடம் மகன் கூறுகிறான், “அப்பா, எனக்கு அறிவியலில் 100 மார்க் கிடைத்திருக்கின்றதே” என்று சொல்ல, “அதேபோலக் கணக்கிலே ஏன் வாங்கவில்லை?” என்று தந்தை வினவ,” அப்பா, நான் முயற்சிக்கிறேன்.” என்று மகன் சொல்லுகிறான்.

    அடுத்த பரிட்சையில் கணக்கிலே 100 வாங்குவேன் என்று உறுதிசொல்லுவாயா?”என்று தந்தை கேட்க முடியாதுப்பா. நான் முயற்சிதான் செய்ய முடியும். கிடைப்பதும் கிடைக்காததும் என் கையில் இல்லை என்று அழகாகப் பதில் கூறுகின்றான்.

    “எப்பொழுது 100 கிடைக்கும் என்று உறுதியாகச் சொல்லுவாய்?” என்று அவர் மீண்டும் கேட்க, எப்பொழுதுமே என்னால் சொல்ல முடியாது. என்னால் எப்பொழுதும் முயற்சிக்கத்தான் முடியும். நான் எவ்வளவு முயற்சி இப்போது செய்கிறேனோ அதைவிட அதிகமாக முயற்சிப்பேன்.

    100 மார்க் வாங்குவதை ஒரு குறிக்கோளாகக் கொண்டு முயற்சிப்பேன்.” என்று பதிலளிக்க, தாய்க்கும் தந்தைக்கும் ஒரே வருத்தம். ஆனால் இதைவிட ஒரு தர்க்கரீதியான, புத்திசாலித்தனமான பதிலை யாரும் கொடுத்திருக்க முடியாது. அதுவும் மூன்றாம் வகுப்பில் படிக்கின்ற ஒரு மாணவன்!

    பொதுவாக வீடுகளில் குழந்தைகள் ஏதாவது சிறப்பாகச் செய்யும்பொழுது அதைப் பாராட்டுவதில்லை. பதிலாக, குறைகளையே முன்னிறுத்திப் பேசுவது வழக்கமாக உள்ளது. இந்த நிகழ்ச்சிக்குப் பின்னுள்ள குடும்பத்தைச் சேர்ந்த தாயின் அடுத்த கவலை, இவனை நூறு மார்க்குகள் வாங்க வைக்க என்ன செய்யலாம்? இவனுக்குத் தனியான டியூஷன் ஏதாவது வைக்கலாமா என்று!

    பொதுவாக வீடுகளில் குழந்தைகளை டியூஷனுக்கு அனுப்புவது ஒரு பெருமைக்குரிய  விசயமாக ஆகிவிட்டது. என் குழந்தை கணக்குக்கு டியூஷன் போறான்; இங்கிலீஷுக்கு டியூஷன் போறான். அதைத்
    தவிர மியூசிக், டென்னிஸ் என்றெல்லாம் சொல்லிப் பெருமைப்படுவது தற்காலத்திய வாழ்க்கை முறையில் ஒரு வழக்கமாகிவிட்டது. ஆனால் இவை குழந்தைகளுக்குத் தேவைதானா என்பதை யோசித்துச் செய்தல் நலம்.

    “எங்களுக்கு அவனோடு உட்கார நேரமில்லை” என்று பெருமைப்பட்டுக் கொள்ளும் பலரை நான் பார்த்ததுண்டு. அவர்கள் குழந்தைகளுக்காக ஆயிரக்கணக்கில் டியூஷனில் செலவிடுவதைவிட ஒருசில மணித்துளிகள் அவர்களுடன் கூட அமர்ந்து அவர்களை உற்சாகப்படுத்தி அவர்கள் என்ன கற்றுக்கொள்கிறார்கள் எப்படிக் கற்றுக்கொள்கிறார்கள் என்பதை அறிந்துகொள்ளுதல் சிறப்பானது.

    அண்மையில் வெளிவந்த “அம்மா கணக்கு ” என்ற திரைப்படத்தில் தன் மகளுக்காகத் தாயும் கூட அமர்ந்து கற்றுக்கொள்ளுவது மிகச்சிறப்பான கருத்து. பொதுவாகப் பெற்றோர்கள் தங்களுக்கு வயதாகிவிட்டது, ஆகையால் கருத்துக்களை தாங்கள் புரிந்து கொள்ள முடியாது என்று நினைப்பதே ஒரு தவறான கருத்து. முயற்சி திருவினையாக்கும் என்பது இதற்கும் பொருந்தும்.

    டியூஷன் படிப்பதால் மட்டும் குழந்தைகள் சிறப்பாகச் செய்வார்கள் என்ற கருத்து மிகத் தவறானது. இதனால் நிச்சயமாகச் சற்று முன்னேற்றம் ஏற்படலாம், மற்றவர்களுடைய அணுகுமுறைகளை அறிந்துகொள்ளலாம், தவிர இவைகளைத் தவிர்க்க முடியாததாகப் பெற்றோர்கள் கருதக்கூடாது. சில நேரங்களில் இந்த நேரத்தை அவர்கள் மற்ற திறன்களை மேம்படுத்தவோ அல்லது மூளைக்கு ஓய்வு கொடுக்கவோ உபயோகப்படுத்திக் கொள்ளலாம்.

    பொதுவாக இந்த இடங்களில் மாணவர்களை ஒரு யந்திரமாக்கி அவர்களின் மனப்பாடத்திறமைகளை வளர்த்துப் பரீட்சைகளில் அதிக மதிப்பெண்கள் வாங்குவதற்குத் தயார் செய்யப் படுகிறார்கள். சற்றே சிந்தித்தால் நமது அணுகுமுறைகளில் மாற்றங்கள் ஏற்பட்டு நம்மால் குழந்தைகளுக்கு அதிக நேரத்தை தர முடியும். முயற்சிக்கலாமே?

    (தொடரும்)

    Share

  • இடைத் தரகர்!

    -தமிழ்த்தேனீ

    எப்போதுமே நேரிடையான தொடர்பு நல்லது. இடைத் தரகர்களை நாடினால் அவர்கள் இஷ்டப்படி நம்மை ஆட்டுவிப்பார்களே தவிர நம் இஷ்டத்துக்கு எதுவும் அவர்கள் செய்ய மாட்டார்கள். இது அனுபவ பூர்வமான உண்மை. அதனால் எப்போதுமே நேரிடையான தொடர்புகளையே நான் கொண்டிருக்கிறேன்.

    இப்போதைய நிலையில் சமீபத்தில் ஒரு இடத்துக்குச் சென்றிருந்தேன் அந்த இடத்தில் ஒரு பெரிய உயரமான பெட்டி வைத்திருந்தார்கள். அதிலே குறிப்பிட்ட காசைப் போட்டால் அதிலே இருக்கும் கோகா கோலாவோ, அல்லது பெப்சியோ நம் கைக்கு அளிக்கும். அந்த இயந்திரத்தில் காசைப் போட்டுவிட்டு என் பேரன் கேட்ட லிம்கா வேண்டுமென்று பட்டனை அமுக்கினேன். இயந்திரத்தில் உள்ளே ஏதேதோ சத்தம் கடைசியில் கண்ணாடி வழியே ஒரு லிம்கா வருவது தெரிந்தது. சில நொடிகளில் அந்த லிம்கா ஒரு பெட்டியில் வந்து விழுந்தது. அதை எடுக்கக் கையை நீட்டினேன். அங்கே நீல நிறத்தில் இங்கே இருக்கும் பட்டனை அமுக்கவும் என்று அறிவிப்பு வந்தது. அந்த பட்டனை அமுக்கினேன். மீண்டும் சில சத்தங்கள், மறுபடியும் அந்த லிம்கா பாட்டில் வேறொரு பெட்டிக்குள் வந்து விழுந்தது , மீண்டும் கையை நீட்டினேன்; அங்கே ஒரு அறிவிப்பு! வேறு ஒரு பட்டனை அமுக்கும் படி. அது சரி லிம்கா எப்போது என் கைக்கு வரும் என்றே தெரியவில்லை. ஒரு பெட்டிக்குள்ளிருந்து வேறு பெட்டிக்கே மாறிக் கொண்டிருக்கிறது.

    கையில் உள்ள காசையும் உள்ளே போட்டாயிற்று. இப்போது என்ன செய்வது என்றே தெரியாமல் விழிக்கிறேன். நேராக ஒரு கடைக்குப் போய்ப் பணத்தைக் கொடுத்து லிம்கா கேட்டால் உடனே கிடைத்திருக்கும்.  ஆனால் ஒரு வித்யாசம் போலி லிம்காவாகக் கூட இருக்கலாம். தரமான லிம்கா வேண்டுமென்றால் அந்த இயந்திரம் சொல்வதைக் கேட்டு, அது எப்போது தருகிறதோ அப்போது பெறவேண்டும். அதுவரை தண்ணீர் குடித்துச் சமாளிக்கலாம். கள்ள வியாதிகள் வராமலிருக்கும்.

    அதே போல்தான் சென்றவருடம் ஜோதிடர் சனிப்பெயர்ச்சி உங்கள் மேஷராசிக்கு  அஷ்டம சனியாக இருக்கிறார்  என்றார். சரி நான் என்ன  செய்யவேண்டும் என்றேன்.  தோஷபரிகாரம் செய்யுங்கள் சரியாகிவிடும் என்றார். சரி செய்வோம் என்ன செய்ய வேண்டும்?  என்றேன்.

    ஒரு ஹோமம் நடத்தலாம்  அதற்கு 12 ரூபாய் செலவாகும்  என்றார். சரி, நான் யோசித்து உங்களை அழைக்கிறேன்  என்று சொல்லி அவரை  அனுப்பிவிட்டு  யோசித்தேன்.

    ஹோமம் செய்தால் சரியாகலாம். அந்த  ஹோமத்தின் வாயிலாக நாம் சனி பகவானை மகிழ்விக்கப் போகிறோம்.  அவரது கருணையை யாசிக்கப் போகிறோம்; அவ்வளவுதானே  என்று தோன்றியது.  சரி,  தெய்வங்கள் எப்போதுமே உண்மையான பிரார்த்தனைக்குச் செவிசாய்க்கும் என்பார்களே வேதமறிந்த பெரியோர்.  ஆகவே  மனப்பூர்வமான பிரார்த்தனையை நாமே செய்யலாமே  என்று தோன்றியது. அன்று முதல்  சனீஸ்வர பகவானே  கிரகங்களில் ஈஸ்வர பட்டம் பெற்றவர்  நீர் ஒருவர் மட்டுமே. அப்படிப்பட்ட  பெருமைகொண்ட  நீர்  என்னை ஆசீர்வதியுங்கள். எனக்குக் கருணை காட்டுங்கள், தினமும் உங்களை யாசிக்கிறேன்,   உங்களிடம் சரணடைகிறேன் என்று மனப்பூர்வமாக வேண்டிக்கொண்டு  காலையிலும்  இரவு படுக்கப் போகும் போதும் அவரை வணங்கி  பிரார்த்தனை செய்தேன்.  எனக்குச் சில  கஷ்டங்கள்  வந்தாலும்  அவைகளைச் சமாளிக்க  எனக்கு போதிய  மனவலிமையையும் அளித்தார்  சனீஸ்வரன்.

    கடந்த  அஷ்டமச்  சனிக் காலத்தில் இப்படியே  நான் நேரிடையாக சனீஸ்வரரை  வேண்டியே சமாளித்தேன். நம் விதி என்று ஒன்று இருக்கிறது என்ன வேண்டினாலும் ஹோமங்கள் யாகங்கள் செய்தாலும் விதியின் குரூரம் வேண்டுமானால் சற்றே குறையுமே தவிர  முழுவதும் விலகாது. அதையும் தவிரச்  சனிக் கிரகம் அல்லது  சனி பகவான்  நாம் ஏறெகனவே செய்திருக்கும் பாவங்களையும் நம்மை அறியாமலோ  அறிந்தோ இந்த  ஜென்மத்தில் செய்யும் பாவங்களையும் கணக்கிட்டு  அதற்குத் தகுந்தவாறு  நமக்குச் சில சோதனைகளைக் கொடுத்து நம் பாவங்களின் அளவைக் குறைத்து நம்மை சமப்படுத்தும் துலாக்கோல் போல செயல்படுகிறார் என்பார்கள்.

    ஆகவே நம் பாவங்களைக் குறைத்து  நம் ஆத்மாவை சமனப்படுத்தும் அவரை வணங்கினாலே போதும். இடைத்தரகர்கள் எல்லாம் தெரிந்தது போல் ஏதேனும் சொல்லி நம்மிடம்  பணம் பறிக்கும் செயலை அனுமதிக்க வேண்டாம். நேரிடைத் தொடர்பே எப்போதும் நல்லது  என்பதை உணர்கிறேன். ஆனானப்பட்ட  சர்வேஸ்வரன் சிவனையே சிறிது காலம் பீடிக்க வேண்டிய கட்டாயத்துக்கு  உள்ளான  சனீஸ்வரர்   சிவனிடம் வந்து நான் இப்போது உங்களைப் பீடிக்கப் போகிறேன்  என்றார்.  அதற்கு சிவன் அது உன்னால் முடியாது என்று சொல்லிவிட்டு ஏதோ ஈரேழு உலகங்களையும் தாண்டி ஒரு பாதாளத்தில் போய் உட்கார்ந்து கொண்டு  இருந்துவிட்டு  சனீஸ்வரர்  பீடிக்க  வேண்டிய காலம் கழிந்ததும்  வெளியே வந்து  என்ன சனீஸ்வரா  என்னைப் பிடிக்க முடியாமல் கஷ்டபட்டாயா  என்றார்.

    அதற்குச் சனி பகவான் புன்னகையுடன்  ஈஸ்வரா  கையிலாயத்தில் உங்கள் ஆசனத்தில் பெருமையாக அமரவேண்டிய  நீர்  ஏதோ பாதாளத்தில் போய் இருந்தீரே  அப்போதே தெரியவில்லையா  நான் உம்மையும் பீடித்துவிட்டேன் என்று  என்றார்.

    அதனால் நமக்கு  சனீஸ்வரர்  பீடிக்க வேண்டிய  வேளை வந்தால் நம்மால் தப்ப முடியாது; ஆகவே அவரையே  சரணடைவோம்.  அதைவிட முக்கியம் இந்தச் சனிப் பெயர்ச்சி இப்போது வருகிறது.  அதே ஜோதிடர் என்னிடம் வந்து  உங்களுக்கு சனீஸ்வரர்  எட்டாம் இடத்திலிருந்து விலகிவிட்டார்.  அதனால் அஷ்டம சனியின்  பாதிப்புகள் குறைந்துவிடும்  ஆனால் உங்கள் மனைவிக்கும்   இப்போது முதல் அஷ்டம சனி ஆரம்பம் ஆகவே ஹோமம் செய்யலாமா  என்றார். நான் யோசித்துவிட்டு அழைக்கிறேன் என்றதும் அவர் சென்றுவிட்டார்.

    கடந்த  அஷ்டம சனிக் காலத்தில்  என்னோடு கூடவே இருந்து என்னைப் பார்த்துக் கொண்ட என் கோபங்களையும்  சமாளித்த  என் துணைவியார் போலவே  இப்போது அவளுக்கு  அஷ்டம சனிக் காலமாகிய இந்தக் காலத்தை  நாம் அவளோடு இருந்து அவளுக்கு உதவியாய் இருக்க வேண்டும்  என்று தீர்மானம் எடுத்து  மீண்டும் சனீஸ்வர  பகவானிடம் வேண்டிக்கொண்டு நல்ல படியாக வாழ்வோம் என்னும் நம்பிக்கையில்   காலையிலும் இரவிலும் சனீஸ்வர பகவானைப் பிரார்த்திக்கத் தொடங்கி இருக்கிறேன்.

    ஆகவே  27  நக்‌ஷத்திரத்திற்குள் ஏதோ ஒரு நக்‌ஷத்திரத்திலே தானே நம் வாழ்க்கைத் துணை பிள்ளைகள்  எல்லோரும் இருக்கிறார்கள். கிரகங்களின் சுழற்சி மாறும்; அதற்கேற்ற பலன்களும் மாறும். கிரக சுழற்சியை மாற்றவோ நிறுத்தவோ நம்மால் முடியாது.  ஆனால் நாம் நேர்மையாக வாழ்ந்து  இறையைத் தொழுது  எல்லாவற்றையும் சமாளிப்போம்; நல்லதே நடக்கும் என்னும் நம்பிக்கையோடு. ஆகவே தீர்மானம் எடுங்கள் இடைத்தரகர்கள் யாரும் தேவையில்லை. நானும் இறையும் நேரிடையாகவே மனப்பூர்வமாக உரையாடிக் கொள்கிறோம்;  இறையிடம் நாங்கள் நேரிடையாகவே  வேண்டிக் கொள்கிறோம் என்று.

    அதற்காக  ஹோமங்களுக்கும் யாகங்களுக்கும் பலனில்லை  என்று நான் சொல்வதாக யாரும் நினைக்க வேண்டாம். அவைகளுக்கு உண்டான பலன்கள் நிச்சயமாக இருக்கிறது. ஆனால் அவற்றை மனப்பூர்வமாகப்  பணத்தின்மேல் குறிக்கோள் இல்லாமல் பக்தியுடன் ஸ்ரத்தையுடன் செய்ய ஆள் கிடைத்தால்  நிச்சயமாக  செய்யலாம். அப்படிப் பணத்தாசை, பேராசை இல்லாத மனிதர் தெய்வத்துக்கு சமானமாவார். அப்போது அவரே  தெய்வமாகிறார் இடைத்தரகராக ஆவதில்லை.

    ஆகவே அப்படிப்பட்ட  தெய்வாம்சம் பொருந்திய  மனிதர் கிடைத்தால் நாமும் ஹோமங்கள், யாகங்கள் செய்யலாம்.  நல்ல பலன்கள் கிட்டும். மனிதன் என்பவன் தெய்வமாகலாம்; பேராசை வரும்போது தரகனாகிறான்.

     

     

     

    Share

  • படக்கவிதைப் போட்டி 88-இன் முடிவுகள்

    -மேகலா இராமமூர்த்தி

    தூளியில் துயிலுகின்ற இந்தத் தூமலரின் தோற்றம், உறங்கிக்கொண்டே ஆடும் ஆனந்த நடனமாய்க் காட்சிதந்து நம்மைக் கிறங்க வைக்கின்றது!

    childinhammock

    இவ்வழகிய புகைப்படத்தை அருமையாய் எடுத்திருக்கும் திரு. யெஸ்மெக்கிற்கும், இதனைப் போட்டிக்குத் தேர்வுசெய்து தந்திருக்கும் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பனுக்கும் நம் நன்றி!

    இவ்வாரக் கவிதைப் போட்டிக்கு வந்துள்ள கவிதைகள் அடுத்து நம் பார்வைக்கு!

    *****

    ”பெரியவர்கள் செய்யும் பித்தலாட்டங்களை இந்தப் புதுமலர் கண்ணுறாமல் கண்வளர்வதே நல்லது; அதனை எழுப்பாதே!” என அறிவுறுத்துகின்றார் திரு. செண்பக ஜெகதீசன்.

    எழுப்பாதே…

    பிள்ளை உறங்கட்டும்,
    பெரியவர்களே அதை
    எழுப்பவேண்டாம்..

    பார்க்கவேண்டாம் அது
    நீங்கள் படும் பாட்டை-
    பணத்துக்காக..

    மனிதம் மறந்து
    பணத்தை நினைக்கும்
    மனது அதற்கு வரவேண்டாம்..

    இறப்பு மறந்து
    இரக்கமின்றி அதைக்
    கறக்கும் வழிகளை அது
    காணவேண்டாம்..

    சேர்த்த பணத்தை
    நன்றாய்ச்
    செலவிடாமல்,
    மண்ணில் புதைத்து
    மண்ணில் புதைவதைக்
    கண்ணில் காணவேண்டாம்..

    தூயதை மறந்து
    தீயதை வளர்க்கும்
    பணம்படுத்தும் பாட்டை அது
    பார்க்கவே வேண்டாம்..

    அதனால்,
    பிள்ளை உறங்கட்டும்,
    பெரியவர்களே அதை
    எழுப்பவேண்டாம்…!

    *****

    இவ்வாரத்தின் சிறந்த கவிதையை இனிக் காண்போம்!

    துயிலெனும் தூக்கம்
    இறைவன் நமக்களித்த இலவசப் பரிசு – தூக்கம்
    இமைகள் மூடி நமக்குள் நாமே தொலையக் கிட்டும் சுகம்
    துயிலின்     முடிவு விழிப்பா இல்லை
    விழிப்பின் முடிவு துயிலா – இது
    இயற்கை நமக்கு விடும் விடுகதை
    இரண்டும் இருளும் ஒளியுமாய் ஓயாமல்
    நம்மைச் சுற்றி உலா வரும் உண்மை
    துயில்லில்லா வாழ்வு துயரமே அது போல்
    விழிப்பில்லா வாழ்வும் அதி துயரமே
    அளவோடு கொள்ளும் துயிலும் விழிப்பும் கொள்ள‌
    வாழ்வும் வளமாகும் என் நாளுமே!
    பொய்த் தூக்கம், பெருந்தூக்கம், அரைத்தூக்கம்
    ஆழ்நிலைத் தூக்கம் பகல் தூக்கமெனப் பல வகை உண்டு
    தூங்காது தூங்கி இருக்கும் நிலையோ
    மெய்யடியார்கள் கண்ட கலை…
    மானிடர் கொள்வது அறியா துயில் ஆனால்
    மாதவன் கொண்டது ஆலிலையில் அறிதுயில்
    ஆழ்துயிலில் துளிர் விட்ட அரிய சிந்தனைகளே
    அறிஞர்கள் கண்ட அரும் பெரும் கண்டு பிடிப்புகள்
    அறியாப் பருவம் வரை வந்த ஆழ்ந்த தூக்கம்
    பருவம் வர வரப் பறப்பது ஏனோ
    இனி வரம் ஒன்று கேட்கிறேன் இறைவா!
    வரும் நாட்களில் குழந்தையைப் போல் தூங்கவே!

    ”ஆங்காரம் உள்ளடக்கி ஐம்புலனைச் சுட்டறுத்துத்
    தூங்காமல் தூங்கிச் சுகம்பெறுவ தெக்காலம்?” என்று வினவுகின்றார் பட்டினத்தாரின் பரம அடியாரான பத்திரகிரியார் எனும் சித்தர். தூங்காமல் தூங்கிச் சுகம்பெறுவதெல்லாம் சித்தர்களுக்கு மட்டுமே சாத்தியப்படுபவை; சாமானியர்க்கு அல்ல!

    கவலையும் முதுமையும் மனித உறக்கத்தின் அளவைக் குறைத்துவிடும் வாள் போன்றவை. கவலையின் வலையில் சிக்கிக்கொள்ளாத மழலையர் மட்டுமே மகிழ்ச்சியாய் உறங்கும் பேறுபெற்றவர்கள். அக்குழந்தைமையை இறைவனிடம் வரமாய் வேண்டும் திருமிகு. ராதா விஸ்வநாதனை இவ்வாரத்தின் சிறந்த கவிஞராய்த் தெரிவுசெய்திருக்கின்றேன். பாராட்டுக்கள் கவிஞருக்கு!

     

     

     

    Share

  • உணர்ந்து.. அகற்று

    நாகினி

     

    நாளும் விடியல் நலமாக்கும் ஆண்டவன்
    ஆளும் உலகத்தில் அமைதி கெடுத்திடும்
    கோளும் மறையாதக் கோடு!

    கோடு கிழித்திங்கு கொள்கை மறக்காமல்
    ஏடு படிப்பித்த ஏற்றமிகு போதனையை
    நாடு எனவோதும் நாடு!

    நாடு ஒருமை நலம்பெற வேண்டியே
    காடு மலைச்சுற்றி கற்பித்தோர் பட்டபெரும்
    பாடு தனையுணர்ந்துப் பார்!

    பார்முழுதும் போற்றிடும் பண்பான தேசத்தில்
    ஊர்முழுக்க சாதியும் ஊனமிகு கோள்களும்
    ஆர்ப்பரிக்கும் தீங்கை அகற்று!

     

    Share

  • நடா புயலே

                  ரா.பார்த்தசாரதி              

     

    புயல் என்றாலே மக்கள் மனதில் கலக்கம்

    விபரீத விளைவுகள் ஏற்படும் என்கிற தயக்கம்

    புயலால் சேதம் ஏற்படுமே  என்ற தவிப்பு

    மக்கள் மனதில் தவிர்க்கமுடியாத பதைபதைப்பு !

     

    நடா புயலே ! எங்களை சேதப்படுத்தாமல் ஒதுங்கிடு

    மக்கள்  பணமில்லாமல் பொருள் வாங்க தவித்திடுது

    மக்களிடத்தில்,பணம் எல்லாம் செல்லா காசாக  மாறியது

    இதனை கண்டு அரசும் என்ன செய்வதென்று தவிக்கின்றது !

     

    புயலே ! என்று அரசும் உதவும் நிலையில் இல்லை

    மக்கள் கையில் பணமும் அதிகம் இல்லை.

    எங்கள் நிலையறிந்து சற்றே  ஒதுங்குவாயா

    எங்கள் வாழ்வினை நிலைபெறச்  செய்வாயா !

     

    புயலுக்கு பின்னே அமைதி என்றான்  மனிதன்

    அரசு  முன்னெச்சரிக்கை செய்வதையும் கண்டான்

    சீர்செய்ய  அரசின் மெத்தன போக்கையும் கண்டான்

    இயற்கையால் ஏற்படும் அழிவை தடுக்க வழி கண்டானா !

     

    Share

  • தோல்வி

     

     

    ரா.பார்த்தசாரதி

     

    தோல்வி   என்பது வெற்றியின்  முதற்  படி

    தோல்வி என்பது விதியின் வலி அல்ல

    அதுவே விதியை மாற்றும்  வழியாகும்

    தோல்வி என்பது தலைக்குனிவும் அவமானமாகும்

    அதுவே  தடை நீக்கும்   அடையாளமாகும்

    தோல்வி என்பது வெட்கப்படும் செயல் அல்ல

    அதுவே வெற்றியை தூண்டும்  வீரம்

    தோல்வி என்பது முள்குத்தும் பாதையல்ல

    அதுவே முன்னேற சொல்லும் பாடமாகும்

    தோல்வி என்பது மிரளவைக்கும் பூதமல்ல

    அதுவே அனுபவம் தரும் தேவதை

    தோல்வி என்பது துன்பத்தின் நினைவலை

    அதுவே நம்மை தூங்கவிடாத கனவு

    தோல்வி என்பது கிழிந்த புத்தகம் அல்ல

    அதுவே வாழ்க்கையின் சிறந்த புத்தகம்

    தோல்வி என்பது பின்னிழுக்கும் பயமே

    வெற்றியை எட்டி பிடிக்கும் துணிவே !

    தோல்வி என்பது முட்டாள்களின் தலைவன் அல்ல

    அது அறிவாளிகளின்  ஆசிரியன்.

    தோல்வியை ஏற்போம் ! துவளாமல் இருப்போம் !

     

     

     

    Share

  • கேசவ் வண்ணம் – கிரேசி எண்ணம்

    Saptamandala -wcolor-lores

    ”பாவாடை தாவணியில் பாய்ந்தனள் வாமனி
    மூவாசை(மாபலி) பாதாளம் மூழ்த்திட , -ஆவேசம்,
    கொண்டாகா ஸத்தினில் ஆனாளே விக்கிரமன்:
    கன்றிதனைக் கண்ட கரி(சாட்சி)’’….கிரேசி மோகன்….!

    Share

  • கேசவ் வண்ணம் – கிரேசி எண்ணம்

    161203 Govinda. watercolor.lores

    ”பிஞ்சுகோ விந்தனவர் பூபாளம் வாசிக்க,
    பஞ்சிலவம் போல்பால் பொழியுது, -செஞ்சரண்
    சேர்ந்த பசுங்கன்று சேவடி துய்த்ததால்:
    சார்ந்தோரைக் கொள்ளும் சரண்’’….கிரேசி மோகன்….!

    கூடாரையே வெல்லும் கோவிந்தனுக்கு தன்னைச் சார்ந்தோரை காக்கும் சரண்….!

    Share

  • நீர்க்கோள் பூமி சுற்றும் நமது சூரிய மண்டலம் பால்வீதிச் சுருள் ஒளிமந்தையில் மிக மிக அபூர்வப் படைப்பு

    our-solar-system-2

    சி. ஜெயபாரதன் B.E.(Hons) P.Eng (Nuclear) கனடா

    ஊழிச் சிற்பி வெளிவிடும் மூச்சில்
    உப்பிடும் பிரபஞ்சக் குமிழி
    ஒரு யுகத்தில் முறிந்து மீள் பிறக்கும் !
    விழுங்கிய கருந்துளை வயிற்றில்
    விழித்தெழும் பரிதி
    மண்டலங்கள் காண விண்ணோக்கியின்
    கண்ணொளி நீண்டு செல்லும்!
    நுண்ணோக்கி ஈர்ப்புக் களத்தை
    ஊடுருவிக் காமிராக்
    கண்வழிப் புகுந்த
    புதிய பூமிக்கோள்கள் இவை !
    சூரிய  மண்டலம் போல்
    வெகு தூரத்தில் இயங்கிச்
    சுய ஒளிவீசும்
    விண்மீனைச் சுற்றிவரும்
    மண்ணுலகுகள் இவை எல்லாம் !
    ஈர்ப்பு வெளியில் முதன்முறை
    பூமியை விட வடிவில் பெருத்த
    நீர்க்கோள்  இரண்டைப்
    பார்த்துளது கெப்ளர் விண்ணோக்கி !
    இதுவரைப் பார்த்த நீர்க்கோள்
    எதுவும் நமது புவிக்கோள் போலில்லை !
    புதுக்கோள்கள் பற்பல
    ஆயினும் கெப்ளர் விண்ணோக்கி
    ஆடிக்கு ஒளிந்து,
    தேடிக் கிடைக்கா புவிக்கோள்கள்
    கோடிக் கணக்கில் !

    +++++++++++++++

    new-solar-system-kepler-80

    நம் கண்ணோக்கில் தெரியும் சூரிய மண்டலத்தில், நமது பூமிக்கோள் ஏதோ தற்செயலாகத் தோன்றிய [Random Formation] ஒரு பாறை நீர்க்கோளன்று. அது சுற்றும் பாதை ஏற்றதொரு மனித வசிப்புப் பகுதியில்தான் [Habitable Zone] உள்ளது.  அதற்கெனத் தனிப்பட்ட விளக்கம் ஏதும் தேவையில்லை.

    கெல்வின் வால்ஷ் [Planetary Scientist, Southwest Research Institute, Colorado, USA]

    habitable-zone

    நமது சூரிய மண்டலம், கெப்ளர் தொலைநோக்கி கண்டுபிடித்த மற்ற பரிதி மண்டலங்கள் போல் ஏனில்லை என்று எமக்குத் தெரியவில்லை.  ஆனால் அதற்கோர் விடை காண நாங்கள் வேட்கையுடன் உள்ளோம்.

    கெல்வின் வால்ஷ் [Planetary Scientist, Southwest Research Institute, Colorado, USA]

    தோற்ற காலப் பூர்வீகத்தில் பெரும்பான்மையான பரிதிகளைச் சுற்றிலும் அகக்கோள்களாய், திண்ணிய பாறைக்கோள் அமைப்புகள் [Systems of Tightly-packed Inner Planets (STIPs)] உண்டாகியுள்ளன என்று  நாங்கள்  கூறுகிறோம். கால நீடிப்பில் முரண்கோள்கள் மோதல்களில் இந்தக் கோள்கள் பல சிதைந்து விலகிப் போய், நாம் காணும் இப்போதைய 5% – 10% விண்மீன் அமைப்புகள் எஞ்சியுள்ளன.

    காதிரையன் வோல்க் & பிரெட் கிலாட்மன் [University of British Columbia, Canada]

    solar-system

    குன்றிய எண்ணிக்கையில் பரிதிக்கு அகத்தில் உள்ள திண்ணிய பாறைக்கோள் அமைப்புகள் [STIPs] மூலம் தெரிவது நமது சூரிய மண்டலம் ஓர் அபூர்வப் படைப்பு என்பதற்கு ஆதாரம் காட்டுவதே.  நாங்கள் பத்து மில்லியன் ஆண்டு கால நீடிப்பில், நான்குக்கு மேற்பட்ட திண்பாறை அகக்கோள்கள் நெருங்கிச் சுற்றும், 13 கெப்ளர் விண்ணோக்கி கண்ட 13 பரிதி மண்டல ஏற்பாடுகளைப் போலிக் கணினி மாடல்களில் இட்டு [Computer Simulations] ஆய்வு செய்தோம்.  10 அமைப்புகளில் சிறு கோள்கள் மோதல்களில் பாதிப்பாகிப் பரிதி மண்டல ஏற்பாட்டை மாற்றியது.  மற்ற 3 அமைப்புகள் 10 மில்லியன் ஆண்டுகள் சிதையாமல் நிலைத்து இயங்கின.

    காதிரையன் வோல்க் & பிரெட் கிலாட்மன் [University of British Columbia, Canada]

    water-vapor-discovery

    பால்வீதி ஒளிமந்தையில் பூமிக்கோள்போல் உயிரின வசிப்பு நீர்க்கோள்கள் உள்ளனவா ?

    பூமிக்கோள் போல் நீர்க்கோள் இருக்கிறதா என்று விண்ணோக்க 2009 ஆண்டில் ஏவப்பட்ட நாசாவின் கெப்ளர் குறிப்பணித் தொலைநோக்கி [Kepler Mission Telescope] மூலம் இதுவரைக் [2016] நோக்கி ஆய்வு செய்த 4696 அண்டக்கோள்களில் 2331 அமைப்புக் கோள்கள் நமது சூரிய மண்டத்தை ஒத்துள்ளன என்பது தெரிந்துள்ளது. அவை பரிதியை நெருங்கிச் சுற்றும் நான்கு அல்லது ஐந்து அகக்கோள்கள் & ஒன்று அல்லது இரண்டு பூதப் புறக்கோள்கள் கொண்டவை. ஆனால் அவை ஏன் நமது சூரிய மண்டலம் போலில்லை என்ற வினாவுக்கு உலக வானியல் விஞ்ஞானிகள் விடை கிடைக்காமல் தவிப்புடன் முனைந்து வருகிறார். கெப்ளர் தொலைநோக்கி கண்ட பரிதிக் கோள் மண்டலங்களில் நமது சூரிய அமைப்பில் இல்லாத “பெருத்த வடிவப் பாறைப் பூமிகள்” [Super Rocky Earths], ஒருசில நாட்களில் பரிதி சுற்றும் “வெப்பக்கனல் பூதக்கோள் வியாழன் ” [Giant Hot Jupiter] விந்தையாகக் காணப்பட்டன.

    கெப்ளர் தொலைநோக்கி கண்ட கெப்ளர்-80 அமைப்பில் [Kepler -80 System]சுற்றும் கோள்கள் சீரமைப்பில் ஒவ்வோர் மாதமும் [27 days] நேர் கோட்டில் [Synchronized to be aligned] சந்திக்கின்றன.  நாசாவின் கெப்ளர் ஆய்வுகள் மூலம் இரு வானியல் விஞ்ஞானிகள், ஆரம்ப காலத்தில் நமது சூரிய மண்டலத்தில் வெள்ளிக் கோளுக்கு முன்னால் நான்கு கோள்கள் சூரியனைச் சுற்றி வந்திருக்கலாம் என்று கருதுகிறார்.  பின்னர் முரண் கோள் மோதல்களில் புதன் கோளைத் தவிர மற்றவை சிதைந்து போயிருக்கலாம் என்றும் அறிவிக்கிறார்.

    Hunt for Earth like planets

    “இந்த இரண்டு நீர்க்கோள்கள் நமது பரிதி மண்டலக் கோள்களைப் போன்றவை அல்ல.   அவை கரையில்லாத, முடிவற்ற கடல்களைக் கொண்டவை.    ஆங்கே உயிரினங்கள் இருக்கலாம். ஆனால்  அங்கிருப்போர் மனிதர் போல் பொறியியற் திறமை  உடையவரா என்பது தெரியாது.   இந்த நீர்க்கோள்களில் உயிரின வாழ்வு, உலோகம், மின்சாரம், நெருப்பு போன்றவை இல்லாது, கடலடியில்தான் நீடிக்க முடியும்.   ஆயினும் அவ்விரண்டு நீல நிறக் கோள்கள், பொன்னிற விண்மீன் ஒன்றைச் சுற்றி வருவதைக் காண்பது வனப்புடன் இருக்கும்.  மேலும் அவற்றில் உயிரின இருப்பைக் கண்டுபிடித்த பொறிநுணுக்க அறிவுத்தரம் நம்மை வியக்க வைக்கும்.”

    லீஸா கால்டநேகர் [இயக்குநர் விஞ்ஞானி மாக்ஸ் பிளாங்க் வானியல் ஆய்வுக்கூடம்]

    aj

    கண்டுபிடித்த நீர்க் கோள்கள் கெப்ளர் -62e,  கெப்ளர்-62f [Kepler -62e & Kepler -62f] எனப் பெயரிடப் பட்டுள்ளன.   அவை கெப்ளர் -62 [Kepler -62] என்னும் விண்மீனைச் சுற்றி வருகின்றன.  நீர்க்கோள் கெப்ளர் -62e திரண்ட முகில் வானைக் கொண்டது.  கணனி மாடலின்படித் துருவம் வரை பூராவும் சூடான வெக்கை மயமானது [Warm and Humid].   தூரத்தில் சுற்றும் நீர்க்கோள் கெப்ளர் -62f கார்பன் டையாக்ஸைடு  வாயுவை மிகுதியாகக் கொண்டு “கிரீன்ஹௌவுஸ் விளைவால்” சூடேறி நீர்மயத்தை நீடிக்கச் செய்கிறது.   இல்லையென்றால் அதன் நீர்வளம் பனியாகி ஓர் பனிக்கோளாய் மாறிப் போயிருக்கும்.”

    டிமித்தர் ஸஸ்ஸெலாவ் [ஹார்வேர்டு வானியல் வல்லுநர்] [Dimitar Sasselov]

    Two Water Planets“ஆதிகாலத்துப் பூர்வீக உலகங்கள் இன்னும் கண்ணுக்குத் தெரியாமல் மறைந்து கிடக்கின்றன.” ரே வில்லார்டு & அடால்ஃப் ஷாலர் (Ray Villard & Adolf Schaller) “இன்னும் பத்தாண்டுகளுக்குள் மற்ற விண்மீன் குடும்பங்களில் நமது பூமியைப் போல் உள்ள கோள்களையும், உயிரினச் சின்னங்கள் இருப்பையும் கூடத் தேடிக் கண்டுபிடித்து விடலாம் என்று விஞ்ஞானிகள் கருதுகிறார்கள்.”

    ரே ஜெயவர்த்தனா (Ray Jayawardhana, Associate Professor of Astronomy, University of Toronto) (2007)

    Kepler -62 System

    நாசாவின் கெப்ளர் விண்ணோக்கி முதன்முறை இரண்டு நீர்க்கோள்களைக் கண்டு பிடித்தது 

    2013 ஜூலை 6 ஆம் தேதி நாசாவின் கெப்ளர் விண்ணோக்கி முதன்முறை இரண்டு நீர்க்கோள்கள் சுற்றிவரும் ஒரு விண்மீனைக் கண்டுபிடித்தது.   அந்த விண்மீனின் பெயர் கெப்ளர் -62 [Kepler -62].  விண்மீன் கெப்ளர் -62 நமது சூரியனை விடச் சிறியது. உஷ்ணமும் தணிந்தது.  அந்த விண்மீனைச் சுற்றும் நீர்க்கோள்களின் பெயர்கள் :  கெப்ளர் -62e, கெப்ளர் -62f  [Kepler -62e and Kepler -62f].   நீர்க்கோள்  கெப்ளர் -62e,  அதன் விண்மீனை ஒருமுறைச் சுற்றும் காலம் 122 நாட்கள்;  நீர்க்கோள் கெப்ளர் -62f விண்மீனைச் சுற்றும் காலம் 267 நாட்கள்.  அவற்றின் விண்மீன் குறுக்கீடு போக்கை நோக்கி அவற்றின் ஒப்புமை அளவுகள் அறிந்து கொள்ளப்படும்.

    நீர்க்கோள் கெப்ளர் -62e, நமது பூமியை விட 60% பெரிதாகவும், நீர்க்கோள் கெப்ளர் -62f  40% பெரிதாகவும் இருப்பதாய்க் கணிக்கப் பட்டுள்ளன.  வானியல் விஞ்ஞானிகள் நீர்க்கோள் இரண்டும் சுற்று வாயு மண்டலமின்றிப் பாறையாலும், நீராலும் உருவானவை என்று ஊகிக்கிறார்.   கெப்ளர் -62 விண்மீனை அருகில் சுற்றும் நீர்க்கோள் கெப்ளர் -62e, சற்று சூடாகவும்,  பூமியை விட மேகம் மூடியிருப்பதாகவும் தெரிகிறது.  தூரத்தில் சுற்றும் நீர்க்கோள்  கெப்ளர் -62f பேரளவு CO2 கரியமில வாயு மிகுந்து, “கிரீன் ஹவுஸ் விளைவால்” சூடேறி, முன்னதை விடத் தணிந்த உஷ்ண நிலையில்  நீர்மயத்தைத் திரவ வடிவில் வைத்துள்ளது.  இல்லையென்றால் அந்த அரங்கில் நீர்க்கோள் ஓர் பனிக்கோள் ஆகியிருக்கும்.

    நாசாவின் ஹப்பிள் விண்ணோக்கி நீலக்கோள் ஒன்றைக் கண்டுபிடித்தது.

    2013 ஜூலை 11 இல் நாசாவின் ஹப்பிள் விண்ணோக்கி பூமியிலிருந்து 63 ஒளியாண்டு தூரத்தில் உள்ள  அண்டவெளி விண்மீனை ஒன்றைச் சுற்றி வரும் நீல நிற வாயுக் கோளைக் கண்டுபிடித்தது. நீலக்கோளின் பெயர் : HD 189733b.   2005 ஆம் ஆண்டில் கண்டுபிடிக்கப் பட்ட அந்தக் கோளின் மீது நீல நிறம் சிதறுவதாக முதலில் ஊகிக்கப் பட்டது.  2013  ஜூலையில் அதை ஹப்பிள் தெளிவாக மெய்ப்பித்தது.  நீலக் கோள் அதன் தாய்ப் பரிதியிலிருந்து 2.9 மில்லியன் மைல் தூரத்தில் சுற்றி வருகிறது.   மேலும் தனது ஒரு பாதி வடிவை விண்மீனுக்குக் காட்டி, மறு பாதி முகம் இருளில் தெரியாமல், ஈர்ப்பு விசையில் கட்டப் பட்டு [Gravitationally locked], நமது பூமியைச் சுற்றும்  நிலவு போல் காணப்பட்டது. நீலக்கோளின் பகல் நேர உஷ்ணம் பயங்கரமானது : 2000 டிகிரி F.  வாயுக்களின் வேகம் : 4500 mph. நீல நிறக் கோளின் [Cobalt Blue Colour] நீல நிறம் பூமியைப் போல் நீர் மீது ஒளிச் சிதறலால் எதிர்ப்படுவ தில்லை.   அந்தக் கோளின் மேக மண்டலத்தில் கலந்துள்ள சிலிகேட் துகள்களே [Silicate Particles] நீல நிறத்துக்குக் காரணம் என்பது அறிய வருகிறது.  2007 இல் நாசாவின் ஸ்பிட்ஸர் [Spitzer Space Telescope]  விண்ணோக்கி அறிவித்தபடி, நீலக்கோளின் இரவு-பகல் உஷ்ணங்கள் வேறுபாடு 500 டிகிரி F  என்று கணிக்கப் பட்டது.

    பரிதியைப் போல் தெரியும் விண்மீனான எப்ஸிலான் எரிடானியைச் சுற்றும் (Epsilon Eridani) வாயுத் தூசித் தட்டு ஒரு கோள் என்பது நிச்சயம்.  ஹப்பிள் மூலம் கண்டதால் அது தோல்வியான விண்மீனில்லை, ஓர் அண்டக்கோள் என்பது உறுதி !  அது பெரிதளவில் இருந்தால், கோளுக்கும் விண்மீன் தூசிக்கும் தொடர்பில்லாத பழுப்புக் குள்ளி (Brown Dwarf) என்று சொல்லி விடலாம்.

    பார்பரா மெக் ஆர்தர் (Barbara McArthur, Project Leader, University of Texas) ”

    பூதக்கோளின் விட்டம் நமது பூமியைப் போல் ஒன்றை மடங்கு [12,000 மைல்].  அந்த கோள் லிப்ரா நட்சத்திரக் கூட்டத்திலிருந்து 20 ஒளியாண்டு தூரத்தில் இயங்கிச் சுயவொளி வீசும் மங்கிய கிலீஸ்-581 விண்மீனைச் சுற்றி வருகிறது.  அதன் சராசரி உஷ்ணம் 0 முதல் 40 டிகிரி செல்ஸியஸ் என்று மதிப்பிடுகிறோம். ஆகவே அங்கிருக்கும் தண்ணீர் திரவமாக இருக்கும் என்று கருதப் படுகிறது.  அந்த கோள் பாறைக் குன்றுகளுடனோ அல்லது கடல் நீர் நிரம்பியோ அமைந்திருக்கலாம்.”

    ஸ்டெஃபினி உட்றி [Stephane Udry, Geneva Observatory]

    Hubble Space Telescope

    “மற்ற சுயவொளி வீசும் விண்மீன்களின் கோள்களை விட, கண்டுபிடிக்கப்பட்ட இந்த பூதக்கோள் ஒன்றுதான் உயிரின வளர்ச்சிக்குத் தேவையான அனைத்து உட்பொருட்களும் கொண்டதாகத் தெரிகிறது.  அக்கோள் 20 ஒளியாண்டு தூரத்தில் உள்ளதால், விரைவில் அங்கு செல்லும் திட்டங்களில்லை.  ஆனால் புதிய உந்துசக்திப் பொறிநுணுக்கம் விருத்தியானல், எதிர்காலத்தில் அக்கோளுக்குச் செல்லும் முயற்சிகள் திட்டமிடப் படலாம்.  பேராற்றல் கொண்ட வானோக்கிகளின் மூலமாக அக்கோளைப் பற்றி அறிந்து கொள்ளக் கூடியவற்றை நிச்சயம் ஆய்ந்து கொள்ளப் பயிற்சிகள் செய்வோம்.”

    அலிஸன் பாயில் [Alison Boyle, Curator of Astronomy, London’s Science Museum]

    “அண்டையில் உள்ள சின்னஞ் சிறு சுயவொளி விண்மீன்களைச் சுற்றிவரும் பூமியை ஒத்த அண்டக் கோள்களில் உயிரின வாழ்வுக்கு ஏற்ற பகுதிகள் உள்ளதாக இப்போது அறிகிறோம்.  இச்செய்தி புல்லரிப்பு ஊட்டுகிறது. இப்பணி நாசாவின் அண்டவெளித் தேடல் முயற்சிகளின் முடிவான குறிக்கோளாகும்.”

    டாக்டர் சார்லஸ் பீச்மென்  [Dr. Charles Beichman, Director Caltech’s Michelson Science Center]

    “பூதக்கோள் போல பல கோள்களைத் தேடிக் காணப் போகிறோம். பூமியை ஒத்த கோள்களைக் கண்டு அவற்றின் பண்பாடுகளை அறிய விரும்புகிறோம்.  ஆங்கே வாயு மண்டலம் சூழ்ந்துள்ளதா?  அவ்விதம் இருந்தால் எவ்வித வாயுக்கள் கலந்துள்ளன?  அந்த வாயுக் கலவையில் நீர் ஆவி [Water Vapour] உள்ளதா?  அந்த வாயுக்களில் உயிரினத் தோற்றத்தின் மூல இரசாயன மூலக்கூறுகள் கலந்துள்ளனவா?  நிச்சயமாக அந்த கோள் எந்த விதமானச் சூழ்வெளியைக் கொண்டது என்பதையும் கண்டு கொள்ள விழைகிறோம்.”

    டாக்டர் விக்டோரியா மீடோஸ் [Member, Terrestrial Planet Finder, NASA]

    “தற்போது ஒருசில வாரங்களுக்கு ஒருமுறை வியாழக் கோளை ஒத்த புறவெளிக் கோள் ஒன்று கண்டுபிடிக்கப் படுகிறது !  சமீபத்தில் கண்ட புதிய கோள் கிலீஸ் 876 (Gliese 876) விண்மீனைச் சுற்றி வருகிறது !  மிக்க மகத்தானது ஹப்பிள் கண்டுபிடித்துப் படமெடுத்த கோள் இரட்டை விண்மீன்கள் வீசி எறியப்பட்டு 450 ஒளியாண்டு தூரத்தில் உள்ளது !  எல்லாவற்றுக்கும் உன்னதமான கோள் இனிமேல்தான் வரப் போகிறது !”

    மிசியோ காக்கு (Michio Kakau, Professor Theoretical Physicist, City College of New York) (2007)

    பூமியைப் போன்ற வெளிப்புறக் கோள்கள் கண்டுபிடிப்பு !

    250 ஆண்டுகளுக்கு முன்பே விண்கோள் தோற்றத்தைப் பற்றிச் சொல்லும் போது ஜெர்மன் மேதை இம்மானுவல் கென்ட் 1755 இல் அண்டக் கோள்கள் விண்மீனைச் சுற்றும் வாயுத் தூசித் தட்டிலிருந்து உதிக்கின்றன என்று முதன்முதலில் அறிவித்தார் !  இதுவரை [ஜூலை 3, 2008] 307 கோள்கள் கண்டுபிடிக்கப் பட்டாலும் ஒரு விண்மீனைச் சுற்றி ஒரே சமயத்தில் கோளையும் வாயுத் தூசித் தட்டையும் சேர்ந்து நோக்கியதில்லை !  தனியாகக் கோளையோ அல்லது தனியாக வாயுத் தூசித் தட்டையோ விஞ்ஞானிகள் கண்டிருக்கிறார்.  இப்போது நாசா & ஈசா (NASA & ESA) விஞ்ஞானிகள் ஹப்பிள் தொலைநோக்கி மூலமாக கென்ட் கூறிய அரிய கருத்தை மெய்யென்று நிரூபித்துள்ளார்.  1991 இல் முதன்முதல் விஞ்ஞானிகள் பரிதி மண்டலத்துக்கு வெளியே உள்ள ஒரு விண்மீனைச் சுற்றும் முதல் கோளைக் கண்டுபிடித்தார்கள்.  அடுத்து பதினாறு ஆண்டு களுக்குள்  [2008] இதுவரை 307 வெளிப்புறக் கோள்கள் கண்டுபிடிக்கப் பட்டுள்ளன !  புதிய முதல் கோளின் பெயர் “மெதுசேலா” (Methusela) என்பது.  7200 ஒளியாண்டு தூரத்தில் இருக்கும் அந்தப் புதுக்கோள் பூமியை விட மூன்று மடங்கு வயது கொண்டது !  ஆயினும் பூமியைப் போல் நீர்வளம் மிக்க நீர்க்கோள் ஒன்று இதுவரையில் விஞ்ஞானிகள் கண்டுபிடிக்கப்பட வில்லை !

    2006 நவம்பர் அமெரிக்க வானியல் இதழில் (American Astronomical Journal) பரிதியைப் போன்ற விண்மீன் எப்ஸிலான் எரிடானியை (Epsilon Eridani Star) பத்தரை ஒளியாண்டு தூரத்தில் விஞ்ஞானிகள் கண்டதாக அறிவிக்கப்பட்டது.  சூரிய மண்டலத்தின் கோள்கள் சூரிய வாயுத் தூசித் தட்டில் ஒரே சமயத்தில் உருண்டு திரண்டு உதித்தவை.  4.5 பில்லியன் வயதுடைய நமது பரிதி ஒரு நடு வயது விண்மீன் !  அதனுடைய வாயுத் தூசித் தட்டு பல மில்லியன் ஆண்டுகளுக்கு முன்பே கரைந்து மறைந்து விட்டது !  ஆனால் எப்ஸிலான் எரிடானி விண்மீன் இளையது.  அதன் வயது சிறியது – 800 மில்லியன் ஆண்டுகள்தான் !  ஆதலால் அதனுடைய தட்டு இன்னும் வெளிப்படை யாகத் தெரிகிறது !  எப்ஸிலான் எரிடானியைச் சுற்றும் தட்டு பூமத்திய ரேகைக்கு 30 டிகிரி கோணத்தல் சாய்ந்துள்ளது !  அதில் திரண்டு உருவாகும் கோளின் நிறை நமது வியாழக் கோளைப் (Planet Jupiter) போல் ஒன்றரை மடங்கு !  அந்தக் கோளே பூமிக்கு அருகில் உள்ள புறவெளிப் பரிதிக் கோள் (Extra-Solar or Exo-Planet) !  அது ஒருமுறைத் தனது விண்மீனைச் சுற்ற சுமார் 7 ஆண்டுகள் ஆகின்றன !  ஹப்பிள் தொலைநோக்கி முதலில் அந்த மங்கலான வாயுக் கோளைக் காண முடியா விட்டாலும், 2007 இல் பரிதி ஒளியைப் பிரதிபலித்த போது தெளிவாகப் படமெடுக்க முடிந்தது.சூரிய மண்டலத்துக்கு அப்பால் புதியதோர் பூமியைக் கண்டுபிடித்தார்

    ஐரோப்பிய விண்வெளி விஞ்ஞானிகள் இந்த வாரத்தில் (ஏப்ரல் 25, 2007), சூரியனைப் போன்ற ஆனால் வேறான ஒரு சுயவொளி விண்மீனைச் சுற்றிவரும் மனித இனம் வாழத் தகுந்ததும், பூமியை ஒத்ததுமான ஓர் அண்டக்கோளைக் கண்டுபிடித்ததாக அறிவித்தார்கள்.  தென் அமெரிக்காவின் சில்லியில் உள்ள அடாகமா பாலைவனத்து ஈஸோ வானோக்கு ஆய்வகத்தின் [Atacama European Science Observatory, (ESO) La Silla, Chille, South America] 3.6 மீடர் (12 அடி விட்டம்) தொலைநோக்கியில் பிரெஞ்ச், சுவிஸ், போர்ச்சுகீஸ் விஞ்ஞானிகள் கூடிக் கண்டுபிடித்தது.  அந்த ஆய்வகம் கண்ணுக்குத் தெரியாத கோள்களின் ஈர்ப்பாற்றல் விளைவால் ஏற்படும் “முன்-பின் திரிபைத்” [Back-and-Forth Wobble of Stars, caused by the gravitational effect of the unseen Planets] தொலைநோக்கி வழியாக மறைமுகமாக விண்மீனைக் காண்பது.  கண்டுபிடிக்கப்பட்ட கோள் நமது பூமியைப் போல் ஒன்றரை மடங்கு பெரியது;  அதன் விட்டம் 12,000 மைல்.  புதுக்கோளின் எடை நமது பூமியைப் போல் 5 மடங்கு.  அது சுற்றும் சுயவொளி விண்மீனின் பெயர்: கீலீஸ் 581 c [Gliese 581 c].  புதிய கோள், கிலீஸை ஒரு முறைச் சுற்றிவர 13 நாட்கள் எடுக்கிறது. கிலீஸா ஒளிமீன் லிப்ரா நட்சத்திரக் கூட்டத்தி லிருந்து 20.5 ஒளியாண்டு தூரத்தில் உள்ளது.  ஒளியாண்டு என்பது தூர அளவு. ஓர் ஒளியாண்டு என்றால் ஒளிவேகத்தில் [விநாடிக்கு 186,000 மைல் வேகம்] ஓராண்டு காலம் செல்லும் தூரம்.  நாசா விண்வெளித் தேடலின் முடிவான, முக்கியக் குறிக்கோளும் அவ்விதக் கோள்களைக் கண்டு பிடித்து ஆராய்ச்சிகள் புரிவதே!

    பரிதி மண்டலத்தைத் தாண்டி இதுவரை [டிசம்பர் 10, 2013] 1051, 797 பரிதிக் குடும்பங்கள்]  வெளிப்புறக் கோள்கள் (Exoplanets) கண்டுபிடிக்கப் பட்டாலும், சமீபத்தில் கண்ட இந்தக் கோள்தான் சிறப்பாக நமது பூமியை ஒத்து உயிரின வாழ்வுக்கு ஏற்ற வெப்ப நிலை கொண்டதாக உள்ளது. மேலும் அந்த உஷ்ண நிலையில் நீர் திரவ வடிவிலிருக்க முடிகிறது.  கிலீஸ் விண்மீனைச் சுற்றிவரும் நெப்டியூன் நிறையுள்ள ஓர் வாயு அண்டக்கோள் ஏற்கனவே அறியப் பட்டுள்ளது.  பூமியைப் போன்று எட்டு மடங்கு நிறையுள்ள மூன்றாவது ஓர் அண்டக் கோள் இருக்க அழுத்தமான சான்றுகள் கிடைத்துள்ளன.  வானோக்கிகள் மூலமாகப் புதிய பூமியின் வாயு மண்டலத்தில் மீதேன் போன்ற வாயுக்கள் உள்ளனவா, நமது பூமியில் தென்படும் ஒளிச் சேர்க்கைக்கு வேண்டிய குளோரோ·பைல் காணப்படுகிறதா என்றும் ஆய்வுகள் மூலம் அறிய முற்படும். மறைமுக நோக்கில் கண்டுபிடிக்கப்பட்ட அண்டக்கோள்கள் 2005 மார்ச் 17 ஆம் தேதி வார்ஸா பல்கலைக் கழகத்தின் பேராசிரியர் ஆன்டிரி உதல்ஸ்கி [Andrzej Udalski] முதன்முதலாக ஈர்ப்பாற்றல் நோக்கு லென்ஸ் ஆய்வு முறையில் [Optical Gravitational Lensing Experiment (OGLE)] பூமியிலிருந்து நமது காலாக்ஸியின் மத்தியில் ஆயிரக்கணக்கான ஒளியாண்டு தூரத்தில் உள்ள விண்மீன் ஒன்று, அதற்கும் அப்பாலுள்ள விண்மீன் முன்பாக நகர்வதைத் தொலைநோக்கி வழியாகக் கண்டார்.  ஒரு மாதத்துக்குப் பிறகு அவற்றை நோக்கிய போது விந்தை ஒன்றை விண்வெளி விஞ்ஞானி கண்டார்.  வெகு தொலைவிலிருந்த விண்மீன் வியப்பாக 100 மடங்கு வெளிச்சத்தில் மின்னியது.  அதாவது திடீரென வெளிச்சத் திண்மையில் திரிபு காணப்பட்டது.  அந்த வித விரைவு வெளிச்சத் திரிபு தெரிவிப்பது ஒன்றே ஒன்றுதான்:  அதாவது முன்னிருந்து ஒளித்திரிபை உண்டாக்கிய விண்மீன் ஐயமின்றி ஓர் அண்டக்கோளே!  அந்த வெளிச்சத் திரிபை உண்டாக்கக் காரணமாக இருந்தது அந்த அண்டக்கோளின் ஈர்ப்பாற்றலே!  அதாவது புவி எடைக் கோள் ஒன்று அந்தப் பகுதியில் இருந்தால் நாம் தொலைநோக்கியில் அக்கோளைக் காணலாம்.  சில்லியின் லாஸ் காம்பனாஸ் வானோக்கு ஆய்வுக் கூடத்தின் 1.3 மீடர் [4 அடி விட்டம்] தொலைநோக்கியில் ஆண்டுக்கு 600 மேற்பட்ட நுண்ணோக்கு லென்ஸ் ஆய்வுகள் [Micro-lensing Experiments] நடத்தப் படுகின்றன.

    ஈர்ப்பாற்றல் நோக்கு லென்ஸ் ஆய்வுகள் என்றால் என்ன?

    நாம் வானிலை நூல்களில் பார்க்கும் அழகிய விண்மீன்கள் பெரும்பான்மையானவை ஹப்பிள் தொலைநோக்கி மூலமாகவோ அல்லது மற்ற தொலைநோக்கிகள் வழியாகவோ குறிப்பிட்ட தூரத்தில் [உதாரணமாக 400 ஒளியாண்டு] பார்த்துப் படமெடுக்கப் பட்டவை.  அந்த தூரம் நமது பால்வீதி காலாக்ஸி விட்டத்தின் 1% தூரம்.  மற்ற காலாக்ஸிகள் பில்லியன் ஓளியாண்டுக்கும் அப்பால் உள்ளன.  1936 ஆம் ஆண்டு ஆல்பர்ட் ஐன்ஸ்டைன் விண்மீன்களின் ஈர்ப்பாற்றல் தளங்கள், ஒரு கண்ணாடி லென்ஸ் போல ஓளியை வளைக்கின்றன என்று கூறினார்.  ஈர்ப்பாற்றல் லென்ஸின் விளைவுகளுக்கு ஆயிரக்கணக்கான சான்றுகள் இப்போது காணப்படுகின்றன.  அம்முறை மூலமாக வெகு தூரத்தில் உள்ள ஒளிமீன்களைத் தெளிவாகக் காண முடிகிறது.  ஈர்ப்பாற்றல் லென்ஸ் விளைவின் அடிப்படை விளக்கம் இதுதான்:  பூமியின் தொலைநோக்கி மூலமாக இரண்டு விண்மீன் களை நேர் கோட்டில் கொண்டு வந்தால், அண்டையில் உள்ள விண்மீனின் ஈர்ப்பாற்றல் தளம் [லென்ஸ் போன்று] அப்பால் உள்ள விண்மீனின் ஒளியை வளைக்கிறது.  அவ்வளைவு ஒளி ஒரு வட்ட வடிவில் தெரிகிறது.  அதுவே “ஐன்ஸ்டைன் வளையம்” [Einstein Ring] என்று அழைக்கப் படுகிறது.  அந்த நுண்ணோக்கு லென்ஸ் ஈர்ப்பாற்றல் மூலமாகத்தான், புதிய பூமி இப்போது கண்டுபிடிக்கப்பட்டு விஞ்ஞானிகளிடையே மாபெரும் புத்துணர்ச்சியை உண்டாக்கியுள்ளது.

    பரிதி மண்டலத்துக்கு அப்பால் கோள்களை நோக்கும் முறைகள்

    நேர்முறையில் நோக்க முடியாது பலவித மறைமுக முறைகளில் புறவெளிப் பரிதிக் கோள்கள் கண்டுபிடிக்கப் படுகின்றன.  தாய் விண்மீனைப் போல் ஒளியின்றி புறவெளிக் கோள்கள் மிக மிக மங்கலாகத் தெரிவதால் அவற்றைக் நோக்கி உளவுவது சிரமமான ஆராய்ச்சி.  மேலும் தாய்க் கோளின் ஒளி எதிரொளி (Glare) வேறு கொடுப்பதால், மங்கலான வெளிச்சமும் வெளுத்துப் போகிறது. புறவெளிக் கோள் கண்டுபிடிப்பு முறைகள் எவை ? வானியல் அளப்பு முறை, ஆரத்தின் வேக முறை, டாப்பிளர் விளைவு முறை, பல்ஸர் கால முறை, கடப்பு முறை, ஈர்ப்பாற்றல் நுட்ப லென்ஸ் முறை, விண்மீன் சுற்றும் தட்டு முறை, இரட்டைத் தடுப்பு முறை, சுற்றுவீதி நிலை முறை, மறைப்பு அளப்பு முறை (Astrometry, Radial Velocity or Doppler Method, Pulsar Timing, Tansit Method, Gravitational Micro-Lensing, Circumsteller Discs, Eclipsing Binary, Orbital Phase, Polarimerty) போன்றவை. ஹப்பிள் விண்வெளி நோக்கு முறையைத் தவிர இதுவரைப் பயன்படுத்தப்பட மற்ற முறைகள் யாவும் பூதள அமைப்புத் தொலைநோக்கிகள் மூலம் (Ground-Based Telescopes)  கண்ட முறைகளே.  அவற்றை விட மேம்பட்ட முறைகள் தொலைநோக்கிகளை அமைதியற்ற வாயு மண்டலத்திற்கு மேலே விண்வெளியில் அனுப்பிக் காணும் முறைகளே.

    1. 2006 டிசம்பரில் புறவெளிக் கோள்களைக் கண்டுபிடிக்க ரஷ்யா அனுப்பிய ஐரோப்பிய கோரட் (COROT) விண்ணோக்கி ஊர்தி. 2. ஐயமின்றி ஹப்பிள் தொலைநோக்கி இதுவரை ஒருசில புறவெளிக் கோள்களைப் படமெடுத்துள்ளது. எதிர்காலத்தில் நாசா & ஈசா திட்டமிட்டுள்ள குறிப்பணிகள் : 3. கெப்ளர் விண்வெளித் தொலைநோக்கி (Kepler Space Telescope) பிப்ரவரி 2009 இல் நாசா அனுப்பத் திட்டமிட்டுள்ளது. 4. புதிய உலகங்கள் தேடும் திட்டம் (New Worlds Mission) ஏவும் தேதி இன்னும் தீர்மானம் ஆகவில்லை. 5. ஈசாவின் திட்டம் : டார்வின் உயிரினக் கோள் தேடும் திட்டம் (ESA’s Darwin Space Mission) (ஏவும் ஆண்டு : 2015) 6. நாசாவின் விண்வெளிக் கோள் திட்டம் (Space Interferomerty Mission) (SIM) (திட்டம் ஆண்டு : 2015 or 2016) 7. விண்வெளிக் கோள் நோக்கி (Terrestrial Planet Finder) (TRF) (ஏவும் தேதி இன்னும் தீர்மானம் ஆகவில்லை.) 8. பேகஸி (பறக்கும் குதிரைத்) திட்டம் (PEGASE) PEGASE is a proposed space mission to build a double-aperture interferometer composed of three free-flying satellites. The goal of the mission is the study of Hot Jupiters (pegasids), brown dwarfs and the interior of protoplanetary disks  The mission would be performed by the Centre National d’tudes Spatiales and is currently being studied for launch around 2010-2012.

    (தொடரும்)

    ++++++++++++++++++++++++++

    தகவல்:

    Picture Credits: NASA, JPL; National Geographic; Time Magazine, Discovery, Scientific American & Astronomy Magazines.

    1. Our Universe – National Geographic Picture Atlas By: Roy A. Gallant (1986)

    2. 50 Greatest Mysteries of the Universe – Are There Other Planets Like The Earth ? (Aug 21, 2007)

    3. Astronomy Facts File Dictionary (1986)

    4. The Practical Astronomer By Brian Jones & Stephen Edberg (1990)

    5. Sky & Telescope – Why Did Venus Lose Water ? [April 2008]

    6. Cosmos By Carl Sagan (1980)

    7. Dictionary of Science – Webster’s New world [1998]

    8. The Universe Story By : Brian Swimme & Thomas Berry (1992)

    9. Atlas of the Skies – An Astronomy Reference Book (2005)

    10 Hyperspace By : Michio kaku (1994)

    11 Universe Sixth Edition By: Roger Freedman & William Kaufmann III (2002)

    12 Physics for the Rest of Us By : Roger Jones (1992)

    13 National Geographic – Frontiers of Science – The Family of the Sun (1982)

    14 National Geographic – Living with a Stormy Star – The Sun (July 2004)

    15 The World Book of Atlas : Anatomy of Earth & Atmosphere (1984)

    16 Earth Science & Environment By : Dr. Graham Thompson & Dr. Jonathan Turk (1993)

    17 The Geographical Atlas of the World, University of London (1993).

    18 Hutchinson Encyclopedia of Earth Edited By : Peter Smith (1985)

    19 A Pocket Guide to the Stars & Planets By: Duncan John (2006)

    20 Astronomy Magazine – What Secrets Lurk in the Brightest Galaxies ? By Bruce Dorminey (March 2007)

    21 National Geographic Magazine – Discovering the First Galaxies By : Ron Cowen (Feb 2003)

    22 Astronomy Magazine Cosmos – The First Planet By : Ray Villard & Adolf Schaller & Searching for Other Earths By : Ray Jayawardhana [Jan 2007]

    23 Discover Magazine – Unseen Universe Solar System Confidential [Jan 2007]

    24 http://www.thinnai.com/?module=displaystory&story_id=40704261&format=html(திண்ணைக் கட்டுரை – பூமியைப் போன்ற புதிய கோளைக் கண்டுபிடித்த விண்வெளி விஞ்ஞானிகள்)

    25 National Geographic Magazine – Searching the Stars for New Earths (Dec 2004)

    26 Scientific American – Does Methane Point to Bacteria on Mars & Titan ? By : Sushil K. Atreya. (May 2007)

    27 News Week Magazine The New Solar System – Our Changing Way of the Universe -(Sep 2006)

    28 Cosmos Magazine – Three-Planet Solar System Detected (May 2006)

    29 Cosmos Magazine – Origin of Planets Confirmed (Oct 2006)

    30 Cosmos Magazine – Earth-Like Planet Await Discovery (Sep 2006)

    31 Cosmos Magazine – Distant Sun Has System of Five Planets (Nov 2007)

    32 Cosmos Magazine – Catalogue of Strange New Worlds (May 2007)

    33 Cosmos Magazine – New Earth-Like Planet May Hold Liquid Water (April 2007)

    34 Astronomy Magazine – Earth-Like Planets May Be Common (Dec 2003)

    35 Omnome Science – Earth -2 How to Find Earth-Like Planets (June 2006)

    36 Extra-Solar Planets By : Wikipedia [31 July 2008]

    36(a)  http://revolutionizingawareness.com/tag/space/  [December 24, 2011]

    36(b)  http://www.kavlifoundation.org/science-spotlights/searching-best-and-brightest  [2011]

    37  http://www.messagetoeagle.com/alienwaterworldskepler.php#.Uem1lo3VCPU  [April 18, 2013]

    38  http://www.dailygalaxy.com/my_weblog/2013/07/two-alien-planets-with-endless-oceans-unlike-anything-in-our-solar-system-.html  [July 11, 2013]

    39  http://www.scientificamerican.com/article.cfm?id=first-distant-planet-be-seen-in-color-blue&print=true  [July 11, 2013]

    40  http://science.gsfc.nasa.gov/sed/index.cfm?fuseAction=home.main&&navOrgCode=667  [NASA Sites for Exoplanets]

    41  http://www.spacedaily.com/reports/Hubble_Finds_a_Cobalt_Blue_Planet_999.html [July 12, 2013]

    42.   https://en.wikipedia.org/wiki/Exoplanet  [December 11, 2013]

    43.  http://www.dailygalaxy.com/my_weblog/2016/11/nasas-kepler-mission-reveals-our-solar-system-is-extremely-rare-and-we-have-no-idea-why.html  [November 29, 2016]

    ******************

    S. Jayabarathan (jayabarathans@gmail.com)  December 2, 2016 [R-1]

    https://jayabarathan.wordpress.com/

    Share

  • கேசவ் வண்ணம் – கிரேசி எண்ணம்

    161202 - Ananya - Indian ink -lores
    161202 – Ananya – Indian ink -lores

    ’’பாரத பட்டரின் பாதம் வருடிட
    கோரதம்போல் ஓடுது கோகுலத்தில் :-வேறெதையும்
    எண்ணாது கன்றேபோல் ஏகாக்ரம் கொள்வோர்க்கு
    முன்னோடும் கண்ண முயல்’’….கிரேசி மோகன்….!

    முன்னே ஓடித் தோற்றாலும் கண்ணன் முயல்போலத்
    தூங்கி வெற்றியை ஆமை நமக்களிக்கும் அனன்யன்….!

    For Every Succesful Man There Is A Krishna Ahead….!முயலாமை பாடம்….!முயற்சி திருவினையாக்கும்….!

    Share

  • இலக்கியச்சித்திரம் – இனிய பிள்ளைத்தமிழ் – 31

    மீனாட்சி பாலகணேஷ்

    மன்றிடை நின்றாடுவோன்தமை ஆட்டுமயில்!

    am2

    பிள்ளைத்தமிழ் இலக்கியங்கள் அனைத்துமே அபாரமான கற்பனை வளமும் கருத்தும் செறிந்த பாடல்களாலும், அணிநயம், சந்தநயம், போன்றன நிறைந்த செய்யுட்களாலும் அமைக்கப்பட்டவையாகும். பாடிய புலவோர்கள், கவிஞர்கள் மட்டுமின்றி இறை அடியார்களாகவும், பக்திநெறியில் சிறந்து விளங்குபவர்களாகவும் இருந்தனர். எல்லையற்ற பரம்பொருளை ஒரு சிறு குழந்தையாக்கி அன்புசெய்து கொண்டாடி நமக்கு அளவிறந்த அருமையான பிள்ளைத்தமிழ்ச் சிற்றிலக்கியங்களை அளித்ததும் இவர்களே.

    am
    பல்வேறு தலங்களில் உறைந்து அருள்பாலிக்கும் அன்னை தெய்வமாம் பராசக்தியின் மீதான பிள்ளைத்தமிழ் நூல்களில் பல பருவங்களிலும் சிவபெருமானின் திருவிளையாடல்கள் அழகுறப் பாடப்பெறும். அவ்வண்ணலின் நடனத்தைப் போற்றிப் பாடாத அடியார்களான புலவர்களே இல்லை எனலாம். அண்ணலின் நடனத்திற்கேற்ப அன்னையவள் கைத்தாளம் கொட்டுவாள் எனத் தாலப்பருவத்திலும், உன்மத்த நடனமாடி அவளிழைக்கும் சிற்றிலை அழிப்பவனாகவும், இன்னும் பலவிதங்களிலும் அவன் வருணிக்கப் பெறுகிறான்.

    திரிசிரபுரம் மகாவித்துவான் மீனாட்சிசுந்தரம் பிள்ளையவர்கள் பல சிறந்த பிள்ளைத்தமிழ் நூல்களை இயற்றித் தமிழன்னைக்கு அர்ப்பணித்தவர். இவற்றுள் ஒன்றான திருத்தவத்துறை பெருந்திருப்பிராட்டியார் மீதான பிள்ளைத்தமிழிலிருந்து இரு பாடல்களைக் காணலாமே! இவை செங்கீரைப் பருவத்திற்கானவை.

    am1
    எவ்வாறு, எவற்றை எப்பொழுது செய்ய வேண்டும் எனக் கணவனை ஆட்டிவைக்கும் மகளிர் உண்டு. அவளுடைய கைப்பாவை என அக்கணவர்மார்கள் கூறப்படுவர். இதே கருத்தினை நகைச்சுவையாகக் கையாண்டு, மன்றிடை நடனமாடும் அம்பலவாணனை ஆட்டுவிக்கும் மயில் என இப்பெருந்திருவினைப் புகழ்கிறார் பிள்ளையவர்கள். அவ்வமயம், ஐயனின் நடனத்தையும் அதன் சூக்குமப்பொருளையும் அழகுற வருணிக்கிறார்.

    ஐயனின் சடை கனத்ததும், அழகு நிறைந்ததுமான பவளநிறம்கொண்ட செஞ்சடை. பாதாள கங்கை அங்கு குடிகொண்டுள்ளாள்; அவள் அங்குள்ள இளம் பிறைமதியுடன் சேர்ந்து துள்ளிக்குதிக்கிறாள்; ஐயனின் திருநடனத்தினால்தான் இது நடைபெறுகின்றது! அண்ணல் காதிலணிந்துள்ள சங்கக்குழைகள் அசைந்தாடுகின்றன. புருவங்கள் நெரிந்து வளைந்து அசைகின்றன. அவனுடைய இதழ்களில் குறுமுறுவல் பூத்து அது நிலவொளியாகக் காண்கின்றது. நடனமாடுபவனின் உடல் அசைவினால் அத்துணைப் பொருட்களும் அசைகின்றன.

    அவனுடைய அழகிய உடலைத் தழுவிய கொன்றைமாலை, வெண்மையான மண்டையோடுகளாலான மாலை, உடலைச் சுற்றிய அரவமாகிய பாம்பு, திரண்ட தோள்கள், திருவயிறு இவையெல்லாவற்றையும் கடந்து நின்று ஒளிவீசுகிறது. திருவடிகளிலணிந்த மணி நூபுரம் ஒலிக்க, உடுக்கை ஏந்திய கை படைப்பினைச் செய்ய, அமைந்த கரம் அடைக்கலம் தந்தருளவும், தழலேந்திய கரம் அழித்தலைச் செய்யவும், ஊன்றிய மலர்ப்பாதம் மறைக்கும் திரோதம் எனும் தொழிலைச் செய்யவும், எடுத்த அழகிய திருவடி, ‘இதனைப் பற்றிக்கொள், உனக்கு முத்தி,’ என அருளும்வகையில் உயர்த்தி விளக்கி ஒரு மன்றிடையில்- உலகம் எனும் அரங்கில்- நின்றாடும் ஒருவன் தன்னை ஆட்டிவைக்கும் மயிலாக விளங்குகிறாள் பெருந்திருப்பிராட்டி.

    அவள் செல்வங்கள் கொழிக்கும் தவத்துறை எனும் ஊரின்கண் உறையும் கருணைப்பிராட்டி ஆவாள். தேன்நிறைந்த மலர்மாலைகளை அணிந்த மென்மையான பெண்ணமுதம் போன்றவள்; அவளைச் செங்கீரையாடுமாறு வேண்டுகிறார் புலவர்.

    குருவார் துகிர்ச்சடை திசைத்தட வரக்கங்கை
    குழமதியி னோடுதுள்ளக் –
    குழையசை தரத்திருப் புருவமுரி தரவெழுங்
    குறுமூர னிலவெறிப்ப,
    மருவார் கடுக்கைவெண் டலையரவு திண்டோள்
    வயிற்றுயல் வரக்கதிர்த்து –
    மணிநூ புரங்குமு றிடப்படைப் பேற்றதுடி
    வாய்த்ததிதி யபயமாய்த்த,
    லுருவார் கொழுந்தழ றிரோதமூன் றியதா
    ளுவப்பரு ளெடுத்ததாளி –
    லோங்கத் தெரித்துமன் றிடையென்று நின்றாட
    வொருவர்தமை யாட்டுமயிலே,
    திருவார் தவத்துறைக் கருணைப் பிராட்டிநீ
    செங்கீரை யாடியருளே –
    தேமலர்க் கண்ணிபுனை கோமளப் பெண்ணமுது
    செங்கீரை யாடியருளே.

    (திருத்தவத்துறை பெருந்திருப்பிராட்டியார் பிள்ளைத்தமிழ்- செங்கீரைப்பருவம்- மகாவித்துவான் மீனாட்சிசுந்தரம்பிள்ளை)

    இங்கு பிள்ளையவர்கள் உண்மைவிளக்கப் பாடலொன்றின் (திருவதிகை மனவாசகம் கடந்தார்) கருத்தை அழகாக எடுத்தாண்டிருப்பது மிக அருமையாக உள்ளது. சிவமும் சக்தியும் இணைந்துதான் பிரபஞ்சத்தினை உருவாக்கிக் காத்து, அருளி, நீக்கி, மறைத்து, அழித்து ஆடுகின்றனர். இப்பிரபஞ்சப் பெருநடனத்தின் சாட்சியாக அம்மை விளங்குகிறாள் எனும்பொருள் இதன்கண் அழகுற மறைந்துள்ளது.

    தோற்றம் துடி அதனில் தோயும் திதி அமைப்பில்
    சாற்றியிடும் அங்கியிலே சங்காரம் — ஊற்றமா
    ஊன்று மலர்ப்பதத்தில் உற்றதிரோதம் முத்தி
    நான்ற மலர்ப்பதத்தே நாடு.

    (உண்மைவிளக்கம்)

    ***********

    சின்னஞ்சிறு பெண்குழந்தை தவழ்ந்தாடி வருகிறாள். இவள் பெருந்திருப்பிராட்டி. இவளைச் சார்ந்த அனைத்தும் ஆடுகின்றன. விரும்பத்தக்க அழகிய திருவடிகளில் – பட்டுப் பாதங்களில் வயிரத் தண்டை அணிவித்துள்ளாள் தாய்; தவழும் குழந்தையின் கால்களில் அது நெருங்கி ஒலிசெய்கின்றது. இது அழகிய தாமரைமலரில் அன்னப்பறவை அமர்ந்து மகிழ்ந்து ஆடுவதனை ஒத்திருக்கிறது என்கிறார். கம்பைநதியில் அன்னை சிவலிங்கம் அமைத்து வழிபட்டகாலை, வெள்ளப்பெருக்கு வந்தபோது, அச்சிவலிங்கத்தைக் காப்பாற்ற இறுக அணைத்துக் கொண்டமையால் அதில் அன்னையின் முலைத்தழும்பும், கைவளைத்தழும்பும் உண்டாயின. அதனை இப்போது நினைவு கூர்கிறார். அந்த விடைக்கொடியவரின் திருமேனிக்கு வளைத்தழும்பு கொடுத்தோம் எனப் பெருமை பேசுவதுபோல கையில் ஒலிக்கும் அழகான வளைகள் ஒலிசெய்தபடி ஆடுகின்றன. முடியில் அன்னை அணிவித்த சூழியம் எனும் அணிகலன் ஆடுகின்றதாம். முகத்தில் எழும் குறுமுறுவல் மலரைப்போல விரிந்து ஆடுகின்றது. முழுமைபெற்ற நிலவின் வடிவத்தில் முத்துக்கள் அமைந்தனபோல, முகமாகிய நிலவில் நுண்மையான சிறு வியர்வைத்துளிகள் பொருந்தி ஆடுகின்றன. சிறு குழந்தையல்லவா? ஓயாது தவழ்ந்தாடினால் வியர்க்காதா?

    இக்குழந்தை அடியார்களுடைய உள்ளத்தில் விரும்பிக் குடிபுகுபவள்; நன்மையற்றவற்றை மாற்றி நல்லனவாக்கி அருளும் திருத்தவத்துறை நாயகியாகிய பெருந்திருவே! செங்கீரையாடுகவே! என வேண்டுகிறார் புலவர்.

    அன்னை செங்கீரையாடுங்கால் அனைத்துப்பொருட்களும் உடன் ஆடுகின்றன. பராசக்தியின் இயக்கத்தால் மட்டுமே இவ்வுலகம் செயல்படும் என இப்பாடல் சூக்குமமாகத் தெரிவித்தருளுகின்றது!

    சந்தநயமும் செறிந்த பாடல்.

    கடிமலர் முளரியி லெகினம் வதிந்து
    கலித்தா டுதல்பொருவக்
    காமரு சீறடி வயிரத் தண்டை
    கஞன்று கலித்தாடக்
    கொடிவிடை யார்திரு மேனிச்சுவடு
    கொடுத்த திறங்கூறிக்
    கூறிக் குமுறுதல் போல வொலிக்குங்
    கோலவளை களுமாட
    முடியுறு சூழிய மாட எழுங்குறு
    முறுவன் மலர்ந்தாட
    முழுமதி முத்தென முகமதி நுண்டுளி
    மொய்குறு வியராட
    அடிய ருளம்குடி புகுமொரு சுந்தரி
    யாடுக செங்கீரை
    அவத்துறை மாற்று தவத்துறை நாயகி
    யாடுக செங்கீரை.

    (திருத்தவத்துறை பெருந்திருப்பிராட்டியார் பிள்ளைத்தமிழ் – செங்கீரைப்பருவம் – மகாவித்துவான் மீனாட்சிசுந்தரம்பிள்ளை)

    மீனாட்சி க. (மீனாட்சி பாலகணேஷ்)
    {முனைவர் பட்ட ஆய்வாளர், தமிழ்த்துறை,
    கற்பகம் பல்கலைக் கழகம், கோவை,
    நெறியாளர்: முனைவர் ப. தமிழரசி,
    தமிழ்த்துறைத் தலைவர்.}

    ********************************

    _

    Share