Blog

சென்னையில் தனித்தமிழ் இயக்க நூற்றாண்டு விழா ஆய்வரங்கம்

-முனைவர் மு. இளங்கோவன்

தனித்தமிழ் இயக்கத்திற்கு அறிஞர்களின் பங்களிப்பு என்னும் தலைப்பில் தனித்தமிழ் இயக்க நூற்றாண்டு விழா ஆய்வரங்கம் சென்னை, நீலாங்கரையில் 06.11.2016 (ஞாயிறு) காலை 10 மணிமுதல் மாலை வரை நடைபெறுகின்றது.

திரு. இ. பி. கனகசுந்தரம் அவர்கள் தலைமை தாங்கவும், பாவலர் இரா. தேவதாசு அவர்கள் முன்னிலையுரையாற்றவும் பாவலர் செவ்வியன் அவர்கள் வரவேற்புரையாற்றவும் உள்ளனர்.

காலை 10 மணிக்கு அமையும் முதல் அமர்வில் மறைமலையடிகளாரின் தனித்தமிழ் இயக்கப் பங்களிப்பு என்னும் தலைப்பில் முனைவர் க. தமிழமல்லன் அவர்களும், நீலாம்பிகையாரின் தனித்தமிழ் இயக்கப் பங்களிப்பு என்னும் தலைப்பில் முனைவர் மறை. திரு. தாயுமானவன் அவர்களும் உரையாற்ற உள்ளனர்.

பிற்பகல் 3 மணிக்கு அமையும் இரண்டாம் அமர்வில் தேவநேயப் பாவாணரின் தனித்தமிழ் இயக்கப் பங்களிப்பு என்னும் தலைப்பில் முனைவர் மு.இளங்கோவன் அவர்களும் தமிழ் மறவர் பொன்னம்பலனாரின் தனித்தமிழ் இயக்கப் பங்களிப்பு என்னும் தலைப்பில் முனைவர் பொற்கோ அவர்களும் உரையாற்ற உள்ளனர்.

தமிழ்ஆர்வலர்களை அன்புடன் அழைக்கின்றோம்.

இடம்: அறிஞர் செவ்வியன் இல்லம், 311, 5 ஆம் தெற்குக் குறுக்குத் தெரு, கபாலீசுவரர் நகர், நீலாங்கரை, சென்னை- 600115

நிறுத்தம்: நீலாங்கரை காவல் நிலையம் நிறுத்தம் எதிரில்.

தொடர்புக்கு: 99624 61632 / 97916 29979

November 7, 2016
சூரியகாந்தனின் ‘எதிரெதிர் கோணங்கள்’ நாவலில் பெண்ணியம்

–ச.சங்கர்

முன்னுரை

படைப்பிலக்கியத்தின் பொதுத்தன்மைகளைக் கொண்டு பல கோட்பாடுகள் உருவாகின. அவ்வாறு உருவான கோட்பாடுகளில் ஒன்று பெண்ணியம். பெண் படும்பாடுதான் பெண்ணியப் படைப்புகளின் அடிப்படைத்தளமாக அமைந்துள்ளது. இதற்கு ஆண்படுத்தும் பாடுகள் மட்டுமின்றிச் சமூகச்சூழல்களும் கலாசாரமும் மதமும் அடிப்படைக்காரணமாக அமைகின்றன. சூரியகாந்தனால் எழுதப்பட்ட நாவல்கள் பெண்களின் வாழ்வைச் சீரழிக்கும் சிக்கல்களைத் தமது அனுபவங்களாக முன் வைத்துள்ளன. இவருடைய எதிரெதிர் கோணங்கள் நாவலின்வழி பெண்களுக்கு ஏற்படக்கூடிய கொடுமைகளையும், பெண்ணியச் சிந்தனைகளையும் பற்றி ஆராய்வதே இக்கட்டுரையின் நோக்கமாகும்.

பெண்ணியம் – விளக்கம்

பெண்ணியம் என்பது உலகளாவியது; இஃது உலகில்உள்ள அனைத்து மனித குலத்துள்ளும் ஒவ்வொரு காலகட்டத்திலும் பெண்களின் முன்னேற்றத்தை விமர்சிக்க ஏற்பட்டது எனலாம். இது பெண்களின் சமத்துவத்தையும் முன்னேற்றத்தையும் வலியுறுத்துவதாகும்.

`Feminism` என்ற ஆங்கிலச்சொல் Femina என்ற இலத்தீன் சொல்லிலிருந்து `மருவி` வந்ததாகும். Femina என்றால் பெண்ணின் குணாதிசயங்களைக் கொண்டுள்ளன என்பது பொருளாகும். இச்சொல் முதலில் பெண்களின் பாலியல் குணாதிசயங்களைக் குறிப்பிடவே வழங்கப்பட்டது. பின்பே பெண்களின் உரிமைகளைப் பற்றி பேசுவதற்காக எடுத்தாளப்பட்டது.1

1889இல் Womanism என்ற சொல் பெண்களின் உரிமைப் பிரச்சினையையும் அதனடிப்படையிலான போராட்டத்தையும் உணர்த்தப் பயன்படுத்தப்பட்டது. 1890ஆம் ஆண்டு Womanism என்ற சொல்லினிடத்தை Feminism என்ற சொல் பெற்றது. 1894ஆம் ஆண்டு வெளிவந்த ஆக்ஸ்போர்ட் ஆங்கில அகராதியில் முதன்முதலில் இச்சொல் எடுத்தாளப்பட்டது. Feminism என்ற சொல்லுக்குத் தன்வாழ்வின் மூலம் அர்த்தம் ஏற்படுத்திக் கொடுத்தவர் ரேஸ்ரேசே என்ற பெண்மணி ஆவார்.2 பெண்ணியம் என்ற சொல்லாடல் பெண்விடுதலைக்கான கோட்பாட்டுப்பதிவாக அமைந்துள்ளது.

இலக்கியங்களில் பெண்ணியம்

மனித வாழ்வின் பிரதிபலிப்பே இலக்கியம். இலக்கியங்கள் சமுதாயத்தைப் பிரதிபலிக்கும் கண்ணாடியாகத் திகழ்கின்றன. இலக்கியங்கள் பெண்ணிய உணர்வின் அடிப்படையில் எழுந்தவையாக இருந்தாலும் வாசகர்களின் மனநிலைக்கு ஏற்ப இன்பமாகவோ, துன்பமாகவோதான் அதன் முடிவு அமைந்திருக்கும். பெண்ணிய உணர்வுடன் எழுதப்படும் இலக்கியங்கள் பெண்களின் மனஉணர்வுகள் பண்புகள் பிரச்சனைகள் போன்றவற்றைக் கூறுகின்றன.

சூரியகாந்தனும் பெண்ணியமும்

     பெண்ணியத்தை மையப்படுத்தி பல படைப்பாளிகள் பல படைப்புகளை படைத்து வருவதை காண்கிறோம். ஒவ்வொரு படைப்பாளியும் இன்றைய சமூகத்தில் பெண்களுக்கு எதிராக நடைப்பெறக்கூடிய நிகழ்வுகளை அவர்களின் எண்ண ஓட்டத்திற்கு ஏற்பத் தம்முடைய படைப்புகளில் படைக்கின்றனர். அந்த வகையில் சூரியகாந்தனும் தம்முடைய படைப்புகளின் வாயிலாகப் பெண்களுக்கு ஏற்படக்கூடிய கொடுமைகளையும் அவர்களுக்கு ஏற்படக்கூடிய இன்னல்களையும் பெண்ணியம் குறித்த செய்திகளாகச் சுட்டிக்காட்டுகிறார்.

எதிரெதிர் கோணங்கள் நாவலில் சமூகக் கொடுமைகள்

     இன்றைய சமூகத்தில் பெண்களுக்குப் பல்வேறு கோணங்களில் இருந்து ஏதாவது ஒரு வகையில் துன்பங்கள் வந்தவண்ணம் உள்ளன. அந்த வகையில் சூரியகாந்தனின் எதிரெதிர் கோணங்கள் நாவலில் சீனிவாசனின் மூத்தமகள் பாக்யரதி கஸ்தூரிராஜ் அண்ட் கம்பெனி பிரைவேட் லிமிடெட் நிறுவனத்தில் பெர்சனல் ஸ்டெனோவாகப் பணிபுரிந்து வருகிறாள். அதே நிறுவனத்தில் வேலை செய்யும் அஸிஸ்டெண்ட் மேனேஜர் ராபர்ட்டைக் காதலித்து வந்தாள். தன் காதல் வீட்டுக்குத் தெரியும்முன்பே தன்னைத் திருமணம் செய்துகொள்ளும்படி ராபர்ட்டைக் கேட்க, குடும்பச் சூழ்நிலையையும் மதத்தையும் காரணம்காட்டித் தன் தாய் சம்மதத்தோடுதான் திருமணம் இல்லையேல் உன்வீட்டில் பார்க்கும் ஒருவரைத் திருமணம் செய்துகொள் என்று கூறித் தப்பித்துக்கொள்ளும் ஆண்களின் மனநிலையைப் படம்பிடித்துக்காட்டுகிறார்.

சமூகத்தில் பெண்களுக்கு எதிரான கொடுமைகள் ஏராளம் நிகழ்கின்றன. குறிப்பாக, திருமணம் செய்யப்பட்ட பெண்களின் கொடுமைகள் குடும்பம் சார்ந்தும், உறவுகள் சார்ந்தும் நிகழ்வதைக் காணமுடிகிறது. திருமணம் நிகழ்ந்து கணவன் தனது தவறான நடவடிக்கை அல்லது தற்செயலாக அவன் இறத்தலுக்கு மனைவியே காரணம் என்ற தவறான எண்ணம் மக்கள் மனத்தில் இருப்பதைக் காணமுடிகிறது. இதனைச் சூரியகாந்தனும் தனது எதிரெதிர் கோணங்கள் நாவலில் “துக்கம் விசாரிக்க வந்தவர்களில் பெரும்பாலோர் பாக்யரதியை கபோதித்தனத்தோடும், கழிசடைத்தனத்தோடும் ஒரு மாதிரியாக வெறித்துப் பார்த்தனர். கால் முதல் தலை வரையிலும் கண்களால் அளந்தனர். தாலி கழுத்தில் ஏறின பதினஞ்சாம் நாளே உனக்கு இந்தக்கதி வந்துடுத்தே… எம் மகளே” (ப-129). என அலமேலு தலையில் அடித்துக்கொண்டு அழுததையும் தாலிச்சரடு கழுத்தை விட்டு நீங்கின மறுநாளே கங்காதரன் வீட்டார் தாங்கள் போட்டிருந்த நகைகளையும் இவளிடமிருந்து கழட்டிக்கொண்டு வீட்டைவிட்டு விரட்டும் அவலங்களைக் குறிப்பிட்டும் தாலி ஏறுவதற்கும், தாலி அறுபடுவதற்கும் பெண்ணே காரணம் என்ற சமூக அவலத்தைப் புலப்படுத்துகின்றார்.

கணவனால் ஏற்படும் கொடுமைகள்

திருமணம் என்பது சொர்க்கத்தில் நிச்சயிக்கப்படுகிறது என்பர். பாக்யரதி வாழ்க்கையில் அது நரகமாகிப் போனது. காதலனால் கைவிடப்பட்டவள் பெற்றோர் சம்மதத்துடன் பார்சல் சர்வீஸ் ஒன்றில் வேலைசெய்த கங்காதரனைத் திருமணம் செய்து கொள்கிறாள். இவளின் காதல் வாழ்க்கையைத் தெரிந்துகொண்ட கங்காதரன் ஒவ்வொரு நாளும் பலவிதமான துன்பங்களுக்கு ஆளாக்குகின்றான். “உன்னைத் தாண்டி உத்தமி…… நாங் கேட்டது கூட காதில் விழலையா? உன்னோட மாஜி காதலனோட நெனப்பு இப்ப வந்துடுச்சோ…. சொல்லேண்டி உங்களோட காதல் லீலைகளை… சிதம்பரம் பூங்காவிலேயும், ரேஸ்கோர்ஸ் ரோட்டிலேயும் பார்த்தவனாச்சே”³என்னோட பணத்துக்கு ஆசைப்பட்டு உன்னைக்கட்டி வெச்சிட்டானா உங்கப்பங்காரன்.” என்று ஒவ்வொரு நாளும் தன் மனைவியை அடித்தும், உதைத்தும், சிகரெட்டால் சுட்டும் துன்புறுத்துகின்றான். போதை தலைக்கு ஏறிய உடன் வண்ண, வண்ண நீலப்படங்களை வைத்துக்கொண்டு அதில் உள்ளது போல் தன்னுடன் இருக்க வேண்டும் என வற்புறுத்தி தன் ஆசையை நிறைவேற்றிக் கொள்ளும் மிருகங்களுக்கு மத்தியில் தன் குடும்ப கௌரவத்திற்காகவே போராடும் பெண்களின் உளக்குமுறலைக் குறிப்பிடுகிறார்.

பணிபுரியும் இடத்தில் பெண்களுக்கு ஏற்படும் கொடுமைகள்

ஆண்களையும் பெண்களையும் சமமாகக் கருதும் இக்காலகட்டத்தில் ஒரு சிலர் பெண்களைப் போகப்பொருளாகவே கருதுவதையும், பணிபுரியும் இடத்தில் பெண்கள் அனுபவிக்கின்ற துன்பங்களையும் சூரியகாந்தனின் எதிரெதிர் கோணங்கள் நாவலில் காணலாம். கல்பனா பிரியா அட்வடைஸிங் ஏஜென்ஸியில் பணிபுரிந்து வருகிறார் அதே கம்பெனியில் வேலை செய்யும் அசோக் ஓனர் இல்லாத சமயங்களில் அவளிடம் சம்பந்தம் இல்லாமல் பேசுவது, ஆசை வார்த்தைகளைக் கூறுவது, தொட்டுப் பேசுவது, அவள் அழகை வர்ணிப்பது என சக இடத்தில் பெண்கள் அனுபவிக்கும் கொடுமைகளைக் காணமுடிகின்றது.

      கல்பனாவின் குடும்ப சூழ்நிலையையும் அவளுடைய குடும்ப வறுமை நிலையையும் நன்கு புரிந்துகொண்ட முதலாளி கணேசமூர்த்தி அவளைத் தன்னுடைய இச்சைக்கு இணங்குமாறு வற்புறுத்துவதையும் யாருமில்லா சமயத்தில் அவளை அடைய நினைப்பதையும், அதற்காக ஆசைவார்த்தைகளைக் கூறுவதையும் காணமுடிகிறது. “நெக்ஸ்ட் மன்த்லேர்ந்து உனக்கு இருநூறு இல்லெ ஐந்நூறு ரூபாய் அதிகப் படுத்தலாம்னு ஃபீல் பன்றேன்”⁴ என்று சொல்லிக்கொண்டே தோளில் படர்ந்த கைகள் மெல்ல மெல்ல இறுகிக் கீழ்நோக்கி இறங்குவதை உணர்ந்து கொண்ட இவள் `அய்யோ……இந்த அநியாயத்தை என்னால் அனுமதிக்க முடியாது என்று ஒரே தள்ளாக அந்த ஆளைத் தள்ளிவிட்டாள்”⁵ இவ்வாறு பல்வேறு துன்பங்களுக்கு ஆளாகும் கல்பனா அதை வெளியில் சொல்லமுடியாமல் மனதளவில் புழுங்குவதையும் வேலைக்கு செல்லும் பெண்கள் தன் குடும்ப கௌரவத்தைக் காக்கத் தன் பிரச்சனையை வெளிக்காட்டிக் கொள்ளாமல் உணர்ச்சிகளை மனதில் அடக்கிக் கொண்டு வாழ்ந்து வருவதையும் காண முடிகின்றது.

முடிவுரை

சமுதாயத்தில் பெண்களுக்கு ஏற்படக்கூடிய அவலங்களையும் அவர்களுக்கு எதிராக ஏற்படக்கூடிய கொடுமைகளையும் ஆசிரியர் தம்முடைய எதிரெதிர் கோணங்கள் நாவலின் வாயிலாக வெளிப்படுத்தியுள்ளார். எதிரெதிர் திசைகள் ஒரு மையத்தில் சந்தித்தால் புதிய பாதைகள் உருவாகும். எதிரெதிர் கோணங்கள் ஒரு நோக்கில் சிந்தித்தால் புறப்பாடுகள் சமமாகும். உணர்ச்சிபூர்வமாகச் சிந்தித்தவள் அறிவுப்பூர்வமாக சிந்திக்கத்தொடங்குகிறாள். பெற்றோர்களை, சகோதரிகளை, சிநேகிதிகளைத் தனக்குத் துரோகம் செய்தவர்களை நினைத்துப் பார்க்கும் பண்புடையவளாக சூரியகாந்தன் தன் நாவலில் பெண்ணியச் சிந்தனைகளை சுட்டுகிறார்.

அடிக்குறிப்பு

[1]. பெண்ணியம் – முனைவர் இரா.பிரேமா – ப.11
2. பெண்ணியம் – முனைவர் இரா.பிரேமா – ப.12
3. சூர்யகாந்தனின் எதிரெதிர் கோணங்கள்- ப.139.
4. சூர்யகாந்தனின் எதிரெதிர் கோணங்கள்- ப.62.
5. சூர்யகாந்தனின் எதிரெதிர் கோணங்கள்- ப.63

*****

ச.சங்கர்
முனைவர் பட்ட ஆய்வாளர்,
தமிழ்த்துறை,
எஸ்.கே.எஸ்.எஸ்.கலைக்கல்லூரி
திருப்பனந்தாள்.

November 7, 2016
தண்டனை

க. பாலசுப்பிரமணியன்

நாட்டின் தலைநகரான புதுடில்லியில் நேற்றும் இன்றும் காணக்கிடைக்காத காட்சி… உண்மை…. கண்களை அகலமாய் திறந்து பார்த்தாலும் உங்களுக்கு முன்னால் செல்லும் வாகனங்களோ அல்லது மனிதர்களோ கண்ணில் பட மாட்டார்கள் .. இது பனிமூட்டமல்ல.. புகைமண்டலம்! குழந்தைகளின் பாதுகாப்பிற்காக சுமார் 1800 பள்ளிகள் இரண்டு நாட்களுக்கு மூடப்பட்டன.

மாலை நேரத்தில் காற்றில் மிதந்துநின்ற கரித்துகள்களும் தூசியும் மற்றும் விஷத்தன்மை வாய்ந்த கலவைப் பொருள்களும் கீழிறங்கி வந்து புகைமண்டலமாக மனிதர்கள் மூச்சு விடுவதற்கே தடையாகவும் ஆபத்தாகவும் அமைந்தது. சுவாசிப்பதில் சாதாரணமாக இருக்கும் மனிதர்களுக்கே இந்த கதியென்றால் ஆஸ்த்மா மற்றும் நுரையீரல் சம்பந்தப்பட்ட வியாதிகள் இருப்பவர்களை பற்றிக் கேட்கவே வேண்டாம்… என்ன கொடுமையிது!

மனிதர்களுடைய அடிப்படைத்தேவையான காற்றே கலப்படமாகி சுவாசிக்க முடியாமல் போனால்.. நாம் எங்கே போய்க்கொண்டு இருக்கிறோம்? இதற்க்கு என்ன காரணம்? இதற்கு யார் பொறுப்பு?

உடனே மத்திய அமைச்சரவை கூடி அபாய மணியை அடித்தது.. டில்லியின் ஆளுநர் மந்திரிசபையின் கூட்டத்தைக் கூட்டினார்.. டில்லியின் முதலமைச்சர் தன்னுடைய மந்திரிசபையைக் கூட்டினார்… இன்னும் சில நாட்களுக்கு கட்டுமானத் தொழில் மற்றும் ஜெனரேட்டர் இயக்குதல் போன்றவை தடைசெய்யப்பட்டன. இதெல்லாம் சரி.. இவையெல்லாம் எரியும் நெருப்பை அணைக்கும் செயல்கள்தானே? இவற்றிற்கான மூலகாரணங்களை அறிந்து அதற்கான நடவடிக்கைகள் எடுக்க வேண்டாமா?

சில ஆண்டுகளுக்கு முன்பு ஒரு காரில் ஐந்து நிமிடத்தைக் கடந்த தூரத்தை இன்று கடக்க அரைமணி நேரம் ஆகின்றது.. அத்தனை நெரிசல்.. அலை அலையாகக் கார்கள்.. ஒவ்வொரு வீட்டிலும் ஒவ்வொருவருக்கும் ஒரு கார்..

நாம் தேவைகளை அதிகரித்துக்கொண்டு விட்டோம் .. ஆனால் உண்மையில் அவை தேவைகளா? இல்லை பல நேரங்களில் நமது தேவையற்ற ஆசைகளுக்கும் விருப்பங்களுக்கும் நாம் இயற்கையை பயன்படுத்திக்கொண்டும் மாசுபடுத்திக்கொண்டும் இருக்கின்றோமா? சிந்திக்க வேண்டிய நேரம்..

இன்று புதுதில்லியில் நடப்பது நாளை மும்பையில் நடக்கும். இன்னொருநாள் பெங்களூரிலோ அல்லது சென்னையிலோ நடக்கும். இது ஒரு நகரத்தில் மட்டும் நடக்கும் நிகழ்வு அல்ல.. இது ஒரு சமுதாயத்தின் சிந்தனையின் தேக்கத்தையும் பொறுப்பற்றத்தன்மையையும் வெளிப்படுத்துவதாக அமைகின்றது.

நேற்று விமானத்தில் ஏறும் பொழுது பலர் அங்கலாய்த்துக்கொண்டிருந்தனர்.. “இந்த நிலைமைக்கு அரசாங்கம் என்ன செய்து கொண்டிருக்கின்றது. என்ன செய்யப்போகின்றது?” இந்த மாதிரி பேச்சுக்களில் ஏதோ அரசாங்கத்திற்கும் நமக்கும் சம்பந்தம் இல்லாதது போல் நாம் சிந்திக்கிறோம்… உண்மைதான்.. ஒரு அரசாங்கத்தின் கொள்கைகள், சட்டங்கள், விதிமுறைகள் நல்லபடியாக கண்காணிக்கப்பட்டால் இந்த நிலைமை வாராது இருக்கலாம். ஆனால் இதற்கு முக்கிய காரணம் முழுமையாக சமுதாய நோக்கும் போக்கும்தானே?

இந்த தண்டனை யாருக்கு யார் கொடுத்தது?

November 7, 2016
பிரபஞ்சத்தின் மகத்தான நூறு புதிர்கள். விரைவாகச் சுற்றிய பூர்வப் பூமியின் வேகம் எப்படிக் குறைந்தது ?

சி. ஜெயபாரதன் B.E.(Hons) P.Eng (Nuclear) கனடா

http://www.youtube.com/watch?feature=player_detailpage&v=h3kB0Z4HdSo

http://www.youtube.com/watch?feature=player_detailpage&v=ye8bROSSq2g

http://www.youtube.com/watch?feature=player_detailpage&v=hahpE8b6fDI

http://www.youtube.com/watch?feature=player_detailpage&v=WGTBJHFNywI

http://www.space.com/14908-moon-evolved-video-guided-tour.html

http://www.space.com/14442-grail-mission-snaps-side-moon.html

*********************

பொங்கி வரும் பெருநிலவைப்
புகழாத கலைஞர் இலர் !
மங்கிப் போன
கரி முகத்தில் கால் வைத்தார் !
முழு நிலவுக்குத்
தங்க முலாம் பூசுவது
வெங்கதிர்ப் பரிதி !
கடல் அலைகள் எழுப்பும் நிலவு !
அச்சின்றி நகர்வது !
அங்கிங் கெனாதபடி
எங்கும் முகப் பருக்கள் ! பெருங்குழிகள் !
சுற்றியும் சுழலாத பம்பரம் !
ஒருமுகம் காட்டும் !
மறுமுகம் மறைக்கும் !
புவியை மோதிய முரண்கோள்
நிலவை உருவாக்கும் !
பூமியின் வேகம் குறைந்தது !
புல்லினம், புழுவினம், புள்ளினம்
உயிரினம் தோன்றின !
புவிச் சுழற்சி நின்று போனால்
நிரந்தர அழிவு, நேரும்
பிரளயம் !

+++++++++++++++++

பூர்வப் பூமியின் பெருவேகம் எப்படிக் குறைந்தது ?

பல்லாண்டுகளாக பழைய கணிப்புப்படி, நிலவு பூமிக்கு வெகு அருகில் இருந்ததாகவும், அப்போது பூமி தன்னச்சில் தன்னைச் சுற்ற 5 மணி நேரம் எடுத்ததாகவும் முடிவு செய்யப்பட்டது. இந்தக் கணிப்பின் மூலமே “பூதத் தாக்கல் நியதி” [The Giant Impact Theory] ஊகிப்பானது. அதன்படி பூர்வீகப் புவியை செவ்வாய்க் கோள் அளவு முரண்கோள் ஒன்று மோதி, விளைந்த துணுக்களால் நிலவு தோன்றியது என்னும் கோட்பாடு நிலையானது.

பூமி – நிலவின் பண்டை வரலாற்றைப் புதிய கோட்பாடு கணினிப் போலி மாடலில் [Theoretical Computer Modelling] இட்டுப் பார்த்ததில், பூதத் தாக்குதலில் உருவான நமது துணைக்கோள் நிலவு, பூமியின் அச்சைப் பேரளவு சாய்த்து, சுழற்சியை வெகு விரைவாகச் சுற்றவிட்டுப் போனது என்று முடிவை உறுதியாக்கியது. பூதத் தாக்குதலுக்குப் பிறகு என்ன நேர்ந்தது என்பதைப் போலி கணினி மாடலில் [Computer Simulations] போட்டு ஆராய்ந்ததில், “பெரு உதை” [Big Whack] நிகழ்ச்சி பற்றி விளக்கம் கிடைத்தது. அதாவது பிள்ளை நிலாவின் [இளம் நிலவு] சுற்றுவீதி [Orbit] சிறிது சிறிதாய்ப் பெரிதானது. பூமியின் சுழற்சி வேகம் பேரளவில் குறைந்து, சரிந்த அச்சு மட்டச் சுற்றுவீதிக்கு [Ecliptic] ஒப்பிச் சற்று நேராகத் தற்போதைய [23.5 டிகிரி] நிலைக்குப் படிப்படியாக மாறியது. மேலும் போலிக் கணினி மாடல்களில், பெரிய துணைக்கோள் கொண்ட அண்டக் கோள்களில், மிதமான காலநிலையும், உயிரின வசிப்பும் வாய்க்க வசதி இருக்குமா என்ற வினாவுக்கும் விடை காண முடியும்.

பத்தொன்பதாம் நூற்றாண்டு முதலாக, விஞ்ஞானிகள் பூமியை விட்டு [ஆண்டுக்கு 1.5″ வீதம்] நிலவு மிகமிக மெதுவாக அப்பால் செல்கிறது என்றும், பூமியின் சுழற்சி அதே சமயம் வேகம் குறைந்து வருகிறது என்றும் அறிந்திருந்தார்கள். காரணம், நிலவு உண்டாக்கும் பேரலைகளின் சக்தி கடற்கரைகளைத் தொடும்போது, மெதுவாய் வலுவிழந்து விரைய மாகிறது. இந்த சக்தி, பூமியின் சுழற்சித் தணிவிலிருந்துதான் வந்திருக்க முடியும். அதாவது பூமியின் சுழற்சி மெதுவாகி 5 மணிநேர நாள் நீண்டு, நீண்டு தற்போதைய 24 மணிநேர நாளாய் நீண்டுவிட்டது.

இந்தக் கணினி போலி மாடல்களில் சில முக்கிய பௌதிக நிகழ்ச்சிகள் எடுத்தாளப் படாமல் இருக்கலாம். நான்கு ஆண்டுகளுக்கு முன்பு [2012] காலிஃபோர்னியா பல்கலைக் கழகத்தைச் சேர்ந்த குக் & ஸாரா ஸ்டீவார்ட் [Cuk & Sara Stewart] ஆகியோர் விஞ்ஞான இதழில் ஓர் விளக்கவுரையை வெளியிட்டார். அதன்படி பூதத் தாக்குக்கு முன்பு, பூமி வெகு, வெகு வேகமாய்ச் சுமார் 2 மணிநேர நாளில் சுற்றியதாக அறிவிப்பு இருந்தது.

“பிண்டங்கள் பிளந்து விழுகின்றன, நடுமையம் தாங்க முடியாமல்.”

வில்லியம் பட்லர் ஈட்ஸ், ஐரிஸ் கவிஞர் (1865-1939)

நம்மால் எட்டிப் பிடிக்க இயலாதபடி அல்லது நாம் கண்டுபிடிக்க முடியாதபடி எந்த ஒரு பொருளும் நம்மிடமிருந்து நீக்கப்பட வில்லை.

டெஸ்கார்டிஸ், பிரெஞ்ச் கணித மேதை (1596-1650)

காலாக்ஸியிலும், பால்மய வீதியிலும் விண்மீன்கள் தூள்களாய்ச் சிந்திக் கிடக்கின்றன.

மில்டன், ஆங்கிலக் கவிஞன் “இழந்த சொர்க்கலோகம்” (1608-1674)

இருள்வெளியின் திமிங்கலப் பற்கள் அப்படியே அதை விழுங்கிவிடும்.

வில்லியம் ஷேக்ஸ்பியர் ஆங்கில நாடக மேதை (1564-1616)

நமது பூமிக்கு நிலவு தோன்றி எத்தனை மில்லியன் ஆண்டுகள் ஆகின்றன ?

பரிதி மண்டலம் தோன்றி சுமார் 95 மில்லியன் ஆண்டுகட்குப் பிறகு ஏற்பட்ட ஓர் அண்டக்கோள் மோதலில் நமது பூமியின் நிலவு உருவானது என்று 2014 ஏப்ரல் 2 ஆம் தேதி வெளிவந்த “இயற்கை இதழில்” [Nature Journal] அண்டக்கோள் விஞ்ஞானிகள் அறிவித்துள்ளார். இந்த புதிய தகவல் தெரிவிப்பது என்ன வென்றால், 4.470 பில்லியன் ஆண்டுகட்கு முன்பு நமது பூர்வப் புவியோடு [Proto-Earth] செவ்வாய்க் கோள் வடிவத்தில், ஓர் அண்டம் மோதிச் சிதறிய தூசித் துணுக்குகளே நிலவாக உருண்டு திரண்டது என்று தெரிகின்றது. இந்தக் கால ஆண்டு கணிப்பு எண்ணிகையில் 32 மில்லியன் ஆண்டுகள் குறைந்தோ, கூடியோ இருக்கலாம். சூரிய மண்டலம் சுமார் 4.567 பில்லியன் ஆண்டுகட்கு முன்பு உண்டாகி உள்ளது என்பது இப்போதைய துல்லிய மதிப்பீடு. பூதளத்தில் கண்டெடுத்த பூர்வீக விண்கற்கள் மாதிரிகளின் [Oldest Meteorites] வயதை வைத்து அந்த மதிப்பீடு செய்யப்பட்டு உள்ளது. பூமியானது சூரியன் தோன்றிய முதல் 150 மில்லியன் ஆண்டுகளில் உருவாகி இருக்க வேண்டும் என்ற கருத்தும் வெளியானது..

இந்த மோத நிகழ்ச்சியில் நிலவு தோன்றியதுடன், நமது பூமியின் இறுதி வடிவமும் முடிவானது என்றும் புதிதாக அறிவிக்கிறார். அப்போது பூமியின் உட்கருவில் உள்ள திரவ உலோகங்கள் பெருங்கனல் தள நிலையை விட்டு மையத்துக்குச் சுருங்கின. முன்கூறிய மதிப்பீட்டு அறிவிப்பில் பரிதி மண்டலம் தோன்றிய (30 -200) மில்லியன் ஆண்டு கட்குப் பிறகு நிலவு உருவானது என்பது நிலவி வந்தது. அந்தக் கால மதிப்பீடுகள் யாவும், பூமியில் கதிர்வீசிக் காணப்படும் பாறைத் தாதுக்களின் மூலகக் கதிரியக்கத் தேய்வு [Radioactive Decay of unstable Elements] வீதத்தைக் கணக்கிட்டு விஞ்ஞானிகள் கணித்தவையே.

2014 ஏப்ரல் 2 ஆம் தேதி இயற்கை விஞ்ஞான இதழில் வெளியான புதிய முறை வேறானது. அந்த முடிவு ஃபிரான்ஸ், ஜெர்மனி, அமெரிக்க விண்கோள் விஞ்ஞானிகள் [Planetary Scientists] தயாரித்த “கணனிப் போலி மாடல்” [Computer Simulation Model] மூலம் அறிந்தவையே. அந்தக் கணனி மாடல் பூர்வீகச் சூரிய குடும்பத்தில் எப்படித் தூசி, துணுக்குப் பாறைகள் சேர்ந்து திரண்டு “சிசுக்கருக் கோள்கள் ” [Planetesimals] ஆயின என்று ஆராயப் பட்டன. இவையே பின்னர் நாமறிந்த புதன், வெள்ளி, புவி, செவ்வாய், நிலவுச் சிசுக் கோள்களாய்த் [Planetary Embryos] உருண்டு திரண்டன. ஒவ்வோர் கோள் மோதலிலும் படிமானப் பிண்டத் துணுக்குகள் சேர்ந்து தாக்கப் பட்ட கோளின் வடிவம் பெருத்தது. பூமியைப் பொருத்த வரையில் நிலவு மோதச் சிறலில் மொத்த நிலவு நிறையில் 0.5% அளவுப் படிமானம் சேர்ந்துள்ளது. அந்த சான்று முறைகள் மூலம் நமது புவிக்கோள் உருவாக 95 மில்லியன் ஆண்டுகள் ஆயின என்றும், சூரிய மண்டலத்தில் நீர்க்கோள் பூமியே உருவாக நீண்ட காலம் ஆனது என்றும் விஞ்ஞானி அலெக்ஸாண்ரோ மார்பிடெல்லி கூறுகிறார்.

சூரிய மண்டலத்தில் நூதனப் புதிரான நீர்மயப் பூகோளம்

பிரபஞ்சக் காலாக்ஸிகளில் நாமறிந்த பால்மய வீதியின் பரிதி மண்டலத்தில் நாம் வசிக்கும் ஒரே ஒரு கோளில்தான் நூதனமாகப் பேரளவில் நீர்மயம் திரவ வடிவிலும், திடவ உருவிலும், ஆவியாகவும் (Liquid, Solid & Vapour) பல கோடி ஆண்டுகள் நீடித்து வருகிறது. அதிலும் விந்தையாகப் பூமியின் பிரம்மாண்டன கடற்குழி எப்படி நீர்மயமாக நிரம்பியது என்பது புதிர்களில் ஒரு புதிராக உள்ளது ! அந்தக் கடல்நீர் எப்படி உப்புக் கலவை நீராகி உயிரினங்கள் எப்படித் தோன்றின என்பது மேலும் புதிராக உள்ளது ! பல மாதிரிச் சான்றுகளில் ஒத்திருக்கும் துணைக்கோள் நிலவு பூமியின் சேயாகக் கருதப் படுகிறது ! ஆனால் வாயு மண்டலமும், நீர் வளமும் தாய்க்கோளில் பெருவாரியாக இருக்கச் சேய்க் கோளில் ஏனப்படி இல்லாமல் போயின என்பதும் வியப்பாக இருக்கிறது ! பூமிக்கு ஒரே முகத்தை மட்டும் மில்லியன் ஆண்டுகளாய்க் காட்டிச் சுற்றிவரும் துணைக்கோள் நிலவு எப்படித் தோன்றியது என்பது உறுதியாக அறியப் பாடாமல் இன்னும் புதிரான ஒரு சிந்தனைக் கோட்பாடாகத்தான் உள்ளது.

சூரிய மண்டலத்தில் உள்வட்டக் கோள்களான புதன், வெள்ளி, பூமி (நிலவு), செவ்வாய் ஆகிய நான்கு கோள்களும் திடப் பிண்டம் (Solid Matter) கொண்டவை. பூமியில் மட்டும் திடப் பிண்டமும் பெருவாரிக் கடல் நீரும் உள்ளன. ஆனால் வெளிவட்டக் கோள்களான வியாழன், சனி, யுரேனஸ், நெப்டியூன் ஆகிய நான்கும் ஏன் வாயுக் கோள்கள் ஆயின ? திடக்கோள்கள் பரிதியின் மூர்க்க ஈர்ப்பு விசையால் இழுக்கப்பட்டு நெருக்கமான நீள்வட்ட வீதியில் சுற்றுகின்றன. அதே சமயத்தில் வெளிவட்ட வாயுக் கோள்கள் உள்வட்டக் கோள்களுக்கு அப்பால் வெகு தொலைவில் சுற்றி வருகின்றன.

அப்பொல்லோ பயணத்தில் கிடைத்த ஒப்பில்லா மாதிரிப் பாறைகள்

பரிதியின் உள்வட்டக் கோள்களில் புதனுக்கும், வெள்ளிக்கும் துணைக்கோள் எதுவும் இல்லை. செவ்வாய்க் கோளுக்கு உருளைக் கிழங்கு போல் இரண்டு சிறிய துணைக் கோள்கள். பூமிக்கு ஒரு துணைக்கோள். வெளிவட்டத்தில் உள்ள வியாழனுக்கு 63 நிலவுகள், சனிக்கு 62 நிலவுகள், யுரேனசுக்கு 27 நிலவுகள், நெப்டியூனுக்கு 13 நிலவுகள் இருப்பது வியப்பாக உள்ளன. பல ஆண்டுக் காலமாக வானியல் விஞ்ஞானிகள் பூமியும் சந்திரனும் தனித்தனியாகத் தோன்றிப் பிறகு ஈர்ப்பு மண்டலத்தில் சேர்ந்து கொண்டவை என்று கருதினார்கள். அதைக் “கூட்டுச் சேகரிப்பு” முறை (Co-Accretion) என்று வானியல் விஞ்ஞானிகள் குறிப்பிடுவர். கூட்டுச் சேகரிப்பு முறையில் உருவாகும் ஓர் அண்டம் அருகில் பரவிய பிண்டத் துணுக்குகளை ஈர்ப்பு விசையால் தன்வசம் இழுத்து உடல் பெருத்து ஈர்ப்பாற்றலும் மிகையாக்கிக் கொள்வது. இழுப்பு நியதி (Capture Theory) நிலவு உண்டான பிறகு, பூமி நோக்கி வந்து புவியீர்ப்பு மண்டலத்தில் இழுக்கப் பட்டுச் சுற்றி வருவதாகச் சொல்கிறது. பிளவுக் கோட்பாடு (Fission Theory) சொல்கிறது: பரிதி மண்டலத்தில் தோன்றிய இளம்பருவக் காலத்தில் பூமி அரைத் திரவ நிலையில் (Semi-fluid State) இருந்து பிளவு ஏற்பட்டு சிறு கோளொன்று நிலவாகப் பிரிந்து பூமியைச் சுற்றியது. அடுத்தது “குளிர்த்திண்மை விதி” (Condensation Theory) எனப்படுவது. அந்த முறையில் பரிதி மண்டலக் கோள்கள் உண்டான “நிபுளாவிலிருந்து” (Nebula) தனித்தனியாக உருவாகிய இரண்டு கோள்களாக பூமியும், நிலவும் அனுமானிக்கப் படுகின்றன.

1969-1970 ஆண்டுகளில் நிலவுக்குப் பயணம் செய்த பல்வேறு அப்பொல்லோ குறிப்பணிகளில் (Apollo Moon Missions) வானியல் விமானிகள் கொண்டுவந்த இரசாயன மாதிரிகள் நமது துணைக்கோள் நிலவைப் பற்றி மகத்தானப் புதுமைகளை வெளியிட்டன. நிலாப் பாறைகளின் மாதிரிகளில் பூமியில் கிடைக்கும் “ஆக்ஸிஜென் ஏகமூலப் பொருட்கள்” (Oxygen Isotope Materials) போல் காணப் பட்டன. அதாவது பூமியும், நிலவும் பரிதி மண்டலத்தின் ஒரே அரங்கப் பகுதியில் (Same Region of the Solar System) தோன்றையவை என்று நிரூபித்தன ! அத்துடன் நிலவிலும் பூமியைப் போல் உச்ச உஷ்ணத்தில் உருகும் ஆவியியல் மூலகங்கள் (Volatile Elemets that melt at high Temperatures) எதுவும் கிடையாது ! அவை இரண்டும் ஆதி காலத்தில் அதி உச்சநிலை உஷ்ணத்தில் வடிவானவை என்பது தெரிய வருகின்றன.

வானியல் விஞ்ஞானிகள் நிலவின் இரசாயன மாதிரிகள் பூகோளத்தின் மேற்தளத் தட்டைப் போல் (Earth’s Mantle) ஒத்திருப்பதைக் கண்டறிந்தார்கள். ஆனால் தோன்றிய போது பூமியின் மேற்தளத் தட்டு மிகத் திண்மையான உலோகத்திலிருந்து உண்டானது. தனித்துத் தோன்றிய நிலாவிலே எப்படி பூமியை ஒத்த உலோகவியல் தட்டுப் பொருட்களைக் கொண்டிருக்க முடியும் என்னும் கேள்வி எழுகிறது !   அப்பொல்லோ-11 வானியல் விமானிகள் கொண்டுவந்த வெள்ளைக் கூழாங்கற்களில் நூதனப் பாறை “அநார்த்தோசைட்” (Anorthosite) இருந்தது. அப்பாறையில் பூமியில் தென்படும் சோடியம், கால்சியம் அலுமினியம் சிலிகேட் (Sodium & Calcium Aluminiuam Silicates) தாதுக்கள் இருந்தன.

நிலவு தோன்றியதை முடிவு செய்ய மூன்று நிபந்தனைகள்

நிலவு எப்படி உண்டானது என்ற கேள்விக்குப் பதில் கூறும் எந்தக் கோட்பாடும் கீழ்க்காணும் மூன்று நிபந்தனை மெய்ப்பாடுகளைப் பூர்த்தி செய்ய வேண்டும் :

1. நிலவின் கீழான பிண்டத் திணிவு [(Moon’s Density 3.3 gram/c.c) (Earth’s Density 5.5 gram/c.c)] கூறுவது என்ன வென்றால், நிலவின் இரும்பு உட்கரு (Iron Core) பூமியை போல் கனமான தில்லை என்னும் கருத்து.

2. நிலவின் பாறைகளில் நீரைப் போல் ஆவியாகும் பொருட்கள் (Volatile Substances) இல்லை. அதாவது பூமியை விடப் பேரளவில் சூடாக்கப்பட்ட தளத்தைப் பெற்றுள்ளது நிலவு (Baking of Lunar Surface).

3. பூமியிலும் நிலவிலும் காணப்படும் ஆக்ஸிஜென் ஏகமூலத் தாதுக்கள் ஒரே ஒப்புமை வீதத்தில் இயற்கையாகப் படிந்துள்ளன (Relative Abundane of Oxygen Isotopes). அதாவது பரிதி மண்டலத்தில் ஒரே தூரப் பகுதியில் பூமியும், நிலவும் உண்டாகி உள்ளன.

நிலவு எப்படி தோன்றியது என்பதற்குக் கூறப்படும் கோட்பாடுகள்

பூமியின் இரட்டைக் கோள்போல் காணப்படும் நிலவு எப்படிப் பிறந்தது என்பதை விளக்க வானியல் விஞ்ஞானிகள் நான்குவிதக் கோட்பாடுகளை அனுமானம் செய்கிறார். முதல் மூன்று நியதிகளில் ஓரளவு மெய்ப்பாடுகள் இருந்தாலும், நான்காவது “பூதத் தாக்கு நியதியே” (The Giant Impact Theory) பெரும்பான்மை விஞ்ஞானிகளால் ஏற்றுக் கொள்ளப்பட்டுள்ளது.

1. பிளவு நியதி (The Fission Theory)

இந்தக் கோட்பாட்டின்படி நிலவு ஒரு காலத்தில் பூமியின் ஒரு பகுதியாக ஒட்டியிருந்து பிறகு சூரிய மண்டலத்தின் துவக்க காலத்தில் எப்படியோ பிளந்து தனியாகப் பிரிந்தது என்று கருதப் படுகிறது. தற்போதுள்ள மாபெரும் பசிபிக் கடற்குழியே நிலவுக்குப் பூர்வீக இருப்பிடமாக இருந்திருக்க வேண்டு மென்று யூகிக்கப் படுகிறது ! அந்தப் பகுதியி லிருந்துதான் நிலவு பிரிந்து வந்திருக்க வேண்டும் என்பது ஒரு சித்தாந்தக் கருத்து. இதற்கு ஒரு காரணம். பூமியின் மேற்தளத் தட்டு (Earth’s Mantle) நிலவின் தளப்பகுதி இரசாயனப் பொருட்களை ஒத்துள்ளது. வேகமாகச் சுழலும் பூமியே, சுழல்வீச்சு விசையால் பிரிந்து போன சிறு கோளை வெளியே தள்ளிச் சுற்ற வைத்திருக்கும். அந்தக் கோட்பாடை மெய்யாக எடுத்துக் கொண்டால் பூமியிலும் நிலவிலும் ஏதாவது ஒத்திருக்கும் “பூர்வப் படிவச் சான்றுகள்” (Fossil Evidences) கிடைத்திருக்க வேண்டுமல்லவா ? ஆனால் அத்தகைய நிரூபணச் சான்றுகள் அப்பொல்லோ பயண விமானிகளுக்கு கிடைக்க வில்லை. மேலும் நிலவில் காணப்படும் பெரும் சூட்டுப் பொருட்கள் (Baked Rock Substances) எப்படி வந்தன என்பதற்கு இதில் விளக்கம் காண முடிவதில்லை.

2. கைப்பற்று நியதி (The Capture Theory)

இந்தக் கோட்பாடு மூலம் அறிவது: நிலவு சூரிய மண்டலத்தில் முதலில் வேறெங்கோ தோன்றியது என்றும், பின்னால் அதைப் பூமியின் ஈர்ப்பு விசை இழுத்துக் கொண்டது என்றும் அனுமானம் செய்யப் படுகிறது. நிலவில் காணப்படும் வெவ்வேறு விதமான இரசாயனப் பொருட்களுக்கு இவ்விதி உதவினாலும் பூகோள ஈர்ப்பில் கவரப்பட்டு, நிலவு சுற்றும் நீள் வட்டவீதிக்கு வந்தது என்பதை விளக்க முடியாவில்லை. காரணம் பூமியை நோக்கி இழுக்கப்படும் நிலவைக் கட்டுப்படுத்தி மெதுவாக்கும் ஓர் எதிர்ப்பு உந்தாற்றல் எதுவும் இல்லாமல் அப்படிச் செய்ய முடியாது என்று விஞ்ஞானிகள் எண்ணுகிறார். மேலும் நிலவில் காணப்படும் பெரும் சூட்டுப் பொருட்கள் (Baked Rock Substances) எப்படி வந்தன என்பதற்கு இதில் விளக்கம் காண முடிவதில்லை.

3. குளிர்த்திண்மை நியதி (The Condensation Theory)

சூரிய மண்டலத்தை உருவாக்கிய மூல “நிபுளாவிலிருந்து” (Nebula) பூமியும், நிலவும் தனித்தனியாகத் தோன்றியவை என்றும் நிலவு பூமியைச் சுற்றும் கோண வட்டவீதியில் தள்ளப்பட்டது என்றும் இந்தக் கோட்பாடு அனுமானம் செய்கிறது ! அந்தக் கோட்பாடு மெய்யென்றால் அவை இரண்டுக்கும் ஏறக்குறைய ஒரே அளவு திணிவுள்ள “கன உலோக உட்கரு” (Same Dense Iron Core) அமைய வில்லை யென்னும் முரண்பாடு உண்டாகுகிறது. அத்துடன் அவை இரண்டும் ஒரே மாதிரி உட்பொருட்கள் (Composition of Materials) கொண்டிருக்க வில்லை. மேலும் நிலவில் காணப்படும் பெரும் சூட்டுப் பொருட்கள் (Baked Rock Substances) எப்படி வந்தன என்பதற்கு இதில் விளக்கம் காண முடிவதில்லை.

4. பூதத் தாக்கு நியதி அல்லது விலக்கு வளைய நியதி (The Giant Impact Theory or The Ejected Ring Theory)

பெரும்பான்மையான வானியல் விஞ்ஞானிகள் தற்போது ஏற்றுக் கொண்டை கோட்பாடு இது. இந்தக் கொள்கையின்படி செவ்வாய்க் கோள் அளவான குட்டிக் கோள் ஒன்று, சூரிய மண்டலம் உண்டான இளம்பருவத்தில் பூமியைத் தாக்கியதாகவும், மோதலின் விளைவில் இரண்டு கோள்களின் மேற்தளத் தட்டுப் பொருட்கள் பேரளவில் எறியப்பட்டன வென்று அனுமானம் செய்கிறது. சிதறிய துணுக்குகள் ஒன்றுடன் ஒன்று சேர்ந்து. நிலவாக உருண்டு திரண்டு பூமியைச் சுற்றும் ஒரு கோளானது. மோதலில் எழுந்த கனல் வெப்பத்தால் நிலவின் பாறைகள் சூடாக்கப் பட்டன ! நிலாவின் பெரும்பகுதி ஏன் பாறைக் குன்றாக உள்ளது, அக்குன்றுகள் எப்படிக் கடுமையாகச் சூடாக்கப்பட்டன என்னும் கேள்விகளுக்கு விளக்கம் தருகிறது இந்தக் கோட்பாடு. சூரிய மண்டலம் உருவான பிறகு இத்தகைய மோதல்கள் பெருமளவில் நேர்ந்ததற்குச் சான்றுகள் கிடைக்கின்றன.

உறுதி செய்யப்பட்ட முடிவான நிலவுத் தோற்ற நியதி

1970 ஆண்டுக் காலங்களில் நிலவுத் தோற்றத்தை விளக்க வானியல் விஞ்ஞானிகள் முடிவான பூதத் தாக்கு நியதியை (The Giant Impact Theory) அரங்கேற்றினார்கள். பூமி மீது மோதிய சிறிய கோள் முட்டிய போது, “கோண-மையத் தாக்குதலில்” (Off-center Impact) மோதியதாக அனுமானிக்கப் படுகிறது. அத்தகைய மோதல் இளமைப் பருவப் பூமிக்கு விரைவான துவக்கச் சுழற்சியை (Fast Inititial Spin) அளித்திருக்க முடியும் என்றும், எறியப்பட்ட துண்டம் நிலவாக வடிவம் பெற்றுச் சுற்றியிருக்க வேண்டும் என்றும் கருதப் படுகிறது. அத்துடன் மோதலில் விளைந்த வெப்பசக்தி நிலவின் பாறைப் பொருட்களைச் சூடேற்ற ஏதுவாக உதவியிருக்கும் என்று நம்பச் செய்கிறது. ஏறக்குறைய அடுத்த பத்தாண்டுகளாக “பூதத் தாக்கு நியதியை” விஞ்ஞானிகள் நம்பாமல் இருந்தனர். 1984 இல் நடந்த ஒரு கூட்டுக் கருத்தரங்கில் எல்லா நியதிகளும் விவாதிக்கப்பட்டு, முடிவில் பெரும்பான்மையான எண்ணிக்கையில் பூதத் தாக்கு நியதி பலரால் ஒப்புக்கொள்ளப் பட்டது.

50 மில்லியன் ஆண்டு வயதாகிப் பூமி தவழ்ந்து வளரும் பருவத்தில் உடல் முறுக்கேறாது கனிந்த நிலையில் உள்ள போது அத்தகைய பூத மோதல் நிகழ்ந்திருக்க முடியுமென்று நம்ப இடமிருக்கிறது ! அதை நிரூபித்துக் காட்ட அமெரிக்காவில் போல்டர், கொலராடோ தென்மேற்கு ஆய்வுக் கூடத்தில் ராபின் கானூப் (Robin Canup, Southwest Research Institute), என்பவரும் காலி·போர்னியா பல்கலைக் கழகத்தின் எரிக் ஆஸ்ஃபாக் (Erik Asphaug) என்பவரும் ஒரு புதிய “கணினி போலிப் படைப்பை” (Computer Simulation) வெற்றிகரமாகச் செய்தார்கள்.

[தொடரும்]

தகவல்:

Picture Credits: NASA, JPL; National Geographic; Time Magazine, Astronomy Magazine.

1. Our Universe – National Geographic Picture Atlas By: Roy A. Gallant (1986)
2. 50 Greatest Mysteries of the Universe – How Did the Moon form ? (Aug 21, 2007)
3. Astronomy Facts File Dictionary (1986)
4. The Practical Astronomer By Brian Jones & Stephen Edberg (1990)
5. National Geographic – Invaders from Space – Meteorites (Sep 1986)
6. Cosmos By Carl Sagan (1980)
7. Dictionary of Science – Webster’s New world (1998)
8. Physics for Poets By : Robert March (1983)
9. Atlas of the Skies (2005)
10 Universe Sixth Edition By: Roger Freedman & William Kaufmann III (2002)11 Wikipedia – Inner Structure of the Moon (January 31, 2008)

10 (a). http://physicsforme.com/2011/09/19/how-common-are-earth-moon-planetary-systems/ [September 19, 2011]

11. http://en.wikipedia.org/wiki/Protoplanet [December 23, 2013]
12. http://www.space.com/55-earths-moon-formation-composition-and-orbit.html [June 21, 2013]
13. http://www.space.com/25320-moon-evolution-photo-timeline-gallery.html [April 2, 2014]
14. http://www.space.com/25322-moon-formation-wild-theories.html [April 2, 2014]
15. http://en.wikipedia.org/wiki/Moon [April 11, 2014]
16.http://www.ndtv.com/article/world/scientists-date-moon-at-4-47-billion-years-5037041[April 2, 2014]

17. http://spaceplace.nasa.gov/review/dr-marc-earth/earth-rotation.html

18. http://www.dailygalaxy.com/my_weblog/2016/10/the-planet-that-collided-with-early-earth-creating-the-moon-caused-it-to-spin-on-its-side.html? [October 31, 2016]

19. http://howldb.com/p/1-november-2016-did-early-earth-spin-on-its-side-news-astronomy-now-online-1o0hmo [November 1, 2016]

20. https://en.wikipedia.org/wiki/Earth%27s_rotation [November 4, 2016]

******************

S. Jayabarathan [jayabarathans@gmail.com [ November 4, 2016] [R-3]

Attachments area

Preview YouTube video Scientists date Moon at 4.47 billion years

Scientists date Moon at 4.47 billion years

Preview YouTube video Birth of the Moon

Birth of the Moon

November 5, 2016
ஆறுபடைவீடு (6) – திருத்தணிகை

க. பாலசுப்பிரமணியன்

கந்தா கந்தாவெனக் கொஞ்சியே அழைத்திட

இந்தோ இந்தோவென வந்திடும் மயிலே!

குமரா குமராவெனக் கனிவுடன் கூப்பிட

வந்தேன் வந்தேனென வந்திடும் வேலே!

பொல்லா நினைவுகள் பொடியாய் விழுந்திடும்

எல்லாத் திசையிலும் துணையாய் நிற்கும்

கல்லா மனிதருக்கும் கலங்கரை விளக்கம்

கந்தாவெனும் சொல்லே காலங்கள் கடத்தும் !

வென்றெனென்று சொல்லிட வாழ்வில் இல்லை

கொன்றைஅணிந்த குமரன் வரும் வரை !

நன்றேநன்றே நாளும் உந்தன் நினைவுகள்

குன்றில்வாழும் குமரா குறைகள் களைவாய் !

படியாய் படியாய் வாழ்வில் படிப்படியாய்

பிடியாய் மனமே கந்தனைப் பிடியாய்

படியாத் துயரங்கள் பனியாய் மறைய

முடிவாய் முதலாய் முருகனை வைப்பாய் !

இடியின் முழக்கம் நிலத்தின் நடுக்கம்

இசையாய் இனிக்கும் இதயத்தில் இருந்தால்

இமையனின் மகனே ! இணையில்லாக் குமரா !

இதயத்தில் அமர்ந்திடு இருதுணை அணைத்து !

தனியாய் வந்தேன் விடைகள் தேடி

தணிகை நாதா ! சஷ்டியில் வேண்டி

தடைகள் நீக்கிடத் தருணம் இதுவே

தருவாய் அருளை வருவாய் வேலா !

November 5, 2016
அனைவருக்கும் வேண்டுமையா !

( எம் .ஜெயராமசர்மா… மெல்பேண் … அவுஸ்த்திரேலியா )

நூல்கள்பல கற்றாலும்

நுண்ணறிவைக் காணவில்லை

மால்மருகா வேல்முருகா

மனமெல்லாம் குழப்பமையா

நால்வேதப் பொருளோனே

நம்பியவர்க் கருள்பவனே

நாளுமுனைத் துதிபாட

நற்கருணை தாருமையா !

சூரர்தமை அழிப்பதற்கு

சுடராக வந்தவனே

பாரினிலே பலசூரர்

பாதகங்கள் செய்கின்றார்

யாருமே அவர்பக்கம்

பார்ப்பதற்கு அஞ்சுகிறார்

வேலவனே உன்வேலை

விட்டுவிடு விரைவுடனே !

ஆணவத்தை அழிப்பதற்கு

அரனுன்னை அனுப்பிவைத்தார்

ஆணவமோ இவ்வுலகில்

அரியணையில் இருக்கிறதே

ஆண்டவனை இப்போது

வேண்டாது எனக்கூறும்

ஆணவத்தை அழிப்பதற்கு

ஐயாநீ வேலைவிடு !

சஷ்டிவிரதம் இருப்பார்க்கு

சங்கடங்கள் போகுமென்பார்

கஷ்டம்பல இருந்தாலும்

சஷ்டியை நாம்விடுவதில்லை

துஷ்டர்பலர் வந்திங்கு

கஷ்டம்பல கொடுக்கின்றார்

இஷ்டமுடன் நீயிரங்கி

எமக்கருள்வாய் கந்தவேளே !

முருகாவுன் திருநாமம் முழுவுலகம் ஒலிக்கிறது

தெருவெங்கும் உன்கோவில் சிறந்தோங்கி இருக்கிறது

அருளான உன்னாட்சி அகிலமதைக் காப்பதற்கு

ஐயாவுன் அருள்நோக்கே அனைவருக்கும் வேண்டுமையா !

விழுந்தாலும் உன்நாமம் எழுந்தாலும் உன்நாமம்

விருப்பமுடன் எம்மனதில் வீறுகொண்டு வருகிறது

விண்ணவரைக் காப்பதற்காய் வேலுடனே வந்தவனே

மண்ணுலகில் உள்ளார்கள் மனம்திருந்த வரம்தருவாய் !

November 5, 2016
இங்கிலாந்திலிருந்து ஒரு மடல். . . (216)

அன்பினியவர்களே!

அன்பான வணக்கங்கள்.

உலகத்தில் பிறந்த ஒவ்வொரு மனிதருக்கும் தாம் வாழும்காலம் மட்டும் உடல்நலக் குறைவுகளை நிவர்த்தி செய்யும் உரிமை ஒரே விதத்தில்தான் அமைந்துள்ளது. ஆனால் அது எவ்வளவு தூரம் நடைமுறையில் சாத்தியப்படுகிறது என்பது கேள்விக்குறியே! ஒவ்வொரு மனிதனுடைய பொருளாதார நிலையும் வித்தியாசப்படுவது இயற்கையே. ஆனால் அவர்களுக்குக் கிடைக்கும் வைத்திய வசதிகள் அவர்களின் பொருளாதாரத்தில் தங்கியிருப்பது இந்த 20ஆம் நூற்றாண்டில் ஏற்றுக் கொள்ளக்கூடிய ஒரு நிகழ்வா?

எமது பின்புல நாடுகளில் பணமிருப்பவர்கள் தனியார் மருத்துவமனைகளில் தமது வசதிகளுக்கேற்ப நவீன வசதியுடன் சிகிச்சைகளைப் பெறுவதும், வறுமையின் பிடியில் சிக்கித் தவிப்பவர்கள் அரசாங்க வைத்தியமனைகளில் கிடைக்கக்கூடிய சிகிச்சையை மட்டுமே பெறும் நிலை காணப்படுவது சகஜமாக ஏற்றுக்கொள்ளப் படுகிறது. இங்கிலாந்தில் இந்நிலை மாற்றியமைக்கப்பட வேண்டும் என்று 1946ஆம் ஆண்டு முதல் கோஷம் முன்வைக்கப்பட்டது. சிகிச்சையைப் பொறுத்தஅளவில் பொருளாதாரத்தில் எந்நிலையில் இருந்தாலும் அனைவரும் சிகிச்சை பெறுமிடத்தில் ஒரே தராதரத்தில் சிகிச்சை பெற வேண்டும் என்று வாதிடப்பட்டது. இதன் விளைவாக 1948ஆம் ஆண்டு அது சட்டமாக்கப்பட்டது. அதன் விளைவே இன்று நாம் இங்கிலாந்தில் அனுபவிக்கும் சிகிச்சை வழிகள். இந்த அரசாங்க அமைப்பு “தேசியச் சுகாதார சேவை ( National Health Service – NHS) என்றழைக்கப்படுகிறது.

பணிபுரியும் அனைவருடமிருந்தும் அவர்களது ஊதியத்தில் ஒரு சிறுஅளவு அரசாங்கத்தினால் தேசியப் பாதுகாப்பு நிதிக்காக அளவிடப்படுகிறது. அதன் காரணமாக நாட்டிலுள்ள அனைவருமே இலவச சிகிச்சை பெறுகிறார்கள். ஆனால் இன்றைய காலகட்டத்தில் இப்போது பல கேள்விகள் பலமுனைகளில் இருந்து கிளம்பியுள்ளது. இன்றைய பொருளாதாரச் சிக்கலான காலகட்டத்தில் இங்கிலாந்து அரசாங்கத்தினால் இன்னும் எத்தனை காலத்திற்கு இந்த இலவசச் சுகாதரச் சேவையைத் தொடர முடியும்? என்பது பொதுவான ஒரு கேள்வியாகிறது. சுமார் 60 வருடங்களுக்கு முன்னால் இருந்த இங்கிலாந்துக்கும் இன்றைய இங்கிலாந்துக்கும் இடையில் பல வேறுபாடுகளுண்டு. ஜனத்தொகையின் பெருக்கம் பல மடங்காகியுள்ளது. அது மட்டுமின்றி பல நவீன மருந்துகளினால் மனிதர்களின் வாழ்க்கைக் காலம் நீட்சியடைந்துள்ளது. அதிகமான முதியவர்கள் தமது 90 வயதுகளையும் தாண்டி வாழ்ந்து கொண்டிருக்கிறார்கள். அவர்களுக்கான வைத்தியத் தேவைகள் நாளுக்குநாள் அதிகரித்த வண்ணமுள்ளது. இந்நிலையில் அரசாங்கத்தினால் இச்சுகாதாரச் சேவைக்காக ஒதுக்கப்படும் நிதியில் பெரிய பற்றாக்குறை ஏற்படுகிறது. இதனால் பல வைத்தியசாலைகளில் அளிக்கப்படும் சிகிச்சையின் தரம் குன்றிப்போயுள்ளதாக பல புகார்கள் வந்த வண்ணமுள்ளது. டாக்டர்கள், தாதிமார்கள் மற்றைய பணியாளர்களின் ஊதியம் பலகாலமாக மிகவும் குறைந்த அளவிலான வீதத்திலேயே அதிகரிக்கப்பட்டிருப்பதால் இத்துறைகளில் பணிபுரிவோர் அதிக அளவில் பணிகளுக்காக அந்நியநாடுகளுக்குச் செல்லும் ஒரு நிலை ஏற்பட்டுள்ளதாகக் கூறப்படுகிறது.

இத்தகைய ஒரு சூழலில் இப்போது ஒரு பிரச்சனை பூதாகரகமாகக் கிளம்பியுள்ளது. இதுவரைக் காலமும் யாராவது இங்கிலாந்துக்குச் சுற்றுலாப் பயணிகளாக வந்த இடத்தில் உடல்நலக்குறைவால் வைத்தியசாலையில் அனுமதிக்கப்பட்டால், அவர்களுக்கான சிகிச்சையும் இலவசமாகவே வழங்கப்பட்டு வந்தது. ஆனால் சில வருடங்க:ளுக்கு முன்னால் அரசாங்கம் இங்கிலாந்துக்குச் சுற்றுலாப் பயணிகளாகவோ அன்றி உறவினர்களைப் பார்ப்பதற்காகவோ வரும் எவரும் இங்கிலாந்துப் பிரஜைகளாக அன்றி இங்கிலாந்தில் நிரந்தரமாக வசிக்கும் உரிமை பெற்றவர்களாக இல்லாதவிடத்து வைத்தியச் செலவுகள் அவர்களிடமிருந்து அறவிடப்பட வேண்டும் எனும் சட்டம் இயற்றியது. ஆனால் இன்றுவரை இந்தச் சட்டம் முழுமையாக அமுல் நடத்தப்படுவதில்லை என்றும் ஏறத்தாழ 250 மில்லியன் வரையிலான இங்கிலாந்து பவுண்ட்ஸை இங்கிலாந்து வைத்தியத்துறை வருடமொன்றுக்கு இழக்கிறது என்றும் ஒருதரப்பினால் கணிக்கப்பட்டுக் கூறப்படுகிறது.

இதுபற்றிய செய்தி ஒன்றுக்கு இங்கிலாந்து ஊடகங்கள் அதிக முக்கியத்துவம் கொடுத்துக் கடந்தவாரம் செய்தி வெளியிட்டிருந்தது. இங்கிலாந்தின் ஒரு முன்னணி வானொலி ஊடகமான எல்.பி.சி. எனும் வானொலி நிலையத்தின் நிகழ்வொன்றை நான் காரில் பயணித்துக் கொண்டிருக்கும்போது சமீபத்தில் செவிமடுக்கும் சந்தர்ப்பம் கிடைத்தது. காலநேரம் திரு. நிக் வெராரி என்பவரால் நடத்தப்படும் ஒரு நேயர்களுடனான சம்பாஷணை நிகழ்வாகும். அப்போது ஊடகங்களில் பிரஸ்தாபிக்கப்பட்ட அந்தச் செய்தி ” ஒரு நிறைமாதக் கர்ப்பிணிப்பெண் நைஜீரியா நாட்டிலிருந்து விருந்தினராக இங்கிலாந்துக்கு வந்திருக்கும்போது மூன்று குழந்தைகளுக்குத் தாயாகிறார். அவருக்கான பிரசவ வைத்தியம் இங்கிலாந்து வைத்தியர்களினால் இலவசமாகச் சகல வசதிகளுடனும் அளிக்கப்பட்டுள்ளது. அதற்கான செலவு 146000 இங்கிலாந்துப் பவுண்ட்ஸ்கள் என்று கணிக்கப்பட்டுள்ளது. “இந்தப் பணம் ஏன் அவரிடமிருந்து அறவிடப்படவில்லை?” என்பதுதான் ஊடகங்களின் கேள்வியும் குற்றச்சாட்டும்.

அதுபற்றிய தொடர்ந்த தொலைபேசிச் சம்பாஷணையில் வானொலி நிலையத்தைத் தொடர்பு கொண்ட நைஜீரியப் பின்புலத்தைக் கொண்ட ஒரு நேயர் “நைஜீரியாவைப் பின்புலமாகக் கொண்ட பலர் இந்நாட்டில் சட்டபூர்வமாகப் பணிபுரிந்து அரசாங்கத்துக்கு வரி செலுத்தி வருகிறார்கள், பின் எதற்காக நீங்கள் நைஜீரிய மக்களைப் பற்றிக் குறைவாக விமர்சிக்கிறீர்கள்?” என்று அந்நிகழ்ச்சித் தொகுப்பாளரான நிக் வெராரியிடம் கேட்டார். அதற்கு அவர் மிக அமைதியாக “ஒரு ஊடகவியலாளரின் பார்வையில் எது முக்கியச் செய்தியாகிறதோ அதை அலசுவதே எனது பணி. இம்முக்கியச் செய்தியின் சாரம் அப்பணத்தை அறவிடாத நிர்வாகக் குறையைச் சுட்டிக் காட்டுவதேயன்றி அந்த நைஜீரியப் பெண்மணியின் மீது குற்றம் கூறுவதல்ல. இச்செய்தியில் சம்பந்தப்பட்டவர் நைஜீரியப் பென்மணி அல்லாது ஒரு அவுஸ்திரேலியப் பெண்மணியாக இருப்பினும் விளைவு ஒரே மாதிரியாகத்தான் இருக்கும். உங்களைப் போலவே நானும் இந்நாட்டில் சட்டபூர்வமாக வரி செலுத்தி வாழும் பல நைஜீரிய பிரித்தானிய பிரஜைகளை அறிவேன். எனவே தயவுசெய்து இது நைஜீரிய நாட்டினருக்கெதிரான ஒரு விமர்சனம் என்று பார்க்காதீர்கள்”என்றார்.

இந்நிகழ்வினைக் கேட்டதும் என் மனத்திலும் சிந்தனைகள் பறக்கத் தொடங்கின. இந்நாட்டில் சிறுபான்மையினர் எனும் எண்ணத்தோடு நாம் வாழும்வரைச் செய்திகளில் எம்மவர்கள் சம்பந்தப்பட்டால் அது எம்மீது தொடுக்கப்பட்ட ஒரு கெளரவப்பிரச்சனையாகச் சிந்திக்காமலே முடிவெடுத்து விடுகிறோமோ எனும் எண்ணம் என்னுள் கிளர்ந்தது. இந்நாடு நம் அனைவருக்கும் பொதுவானது. இந்நாட்டின்வளர்ச்சியும், தாழ்ச்சியும் எம்மையும், எமது சந்ததியையும் தான் பாதிக்கப்போகிறது. இந்நாட்டின் நிர்வாகம் சரியாக நடத்தப்படாததையிட்டு நாமும்தான் வருந்த வேண்டும். ஆனால் அதில் எம்மைச் சேர்ந்தவர்கள் சம்பந்தப்பட்டிருந்தால் ஏனோ அதனுள் இருக்கும் உண்மையான செய்திகளை மனம் உள்வாங்கிக் கொள்ள மறுப்பது எமது தனிமனிதக் குறைபாடா? இல்லை ஒட்டுமொத்தமாக எமது கலாசாரக் குறைபாடா?

மீண்டும் அடுத்த மடலில்…
அன்புடன்
சக்தி சக்திதாசன்

November 4, 2016
காவிரி புரக்கும் நாடு – 1

-மேகலா இராமமூர்த்தி

ஆற்றங்கரைகளில்தாம் பெரும்பான்மையான மனித நாகரிகங்கள் தோற்றங்கொண்டன என்பது ஆய்வாளர்கள் கருத்து. நைல் (Nile) நதிக்கரையில் தோன்றிய எகிப்திய நாகரிகமும், யூப்ரடிஸ் (Euphrates), டைகரிஸ் (Tigris) நதிக்கரைகளில் தோன்றிய சுமேரிய (இன்றைய ஈராக்) நாகரிகமும், சிந்துநதிக்கரையில் (Indus River aka Sindhu River) தோன்றிய சிந்துசமவெளி நாகரிகமும் ஆய்வாளர்களின் கருத்துக்கு அரண்சேர்ப்பதாய் அமைகின்றன.

குறிஞ்சி (மலைசார் நிலம்), முல்லை (காடுசார் நிலம்), நெய்தல் (கடல்சார் நிலம்) என்று எத்தனையோ வாழிடங்களை இயற்கை மனிதர்களுக்குத் தந்திருக்க, மருதநிலப்பகுதியாக அறியப்படும் ஆற்றங்கரைகளில் மட்டும் நாகரிகம் தோன்றுவானேன் என்று நாம் வினவலாம்.

“மனிதர்கள் வேளாண்மைசெய்யக் கற்றுக்கொண்டது மருதநிலத்தில் குடியேறிய பின்னர்தான்! நகரங்கள் முதன்முதல் தோன்றியதும் உழவுத்தொழிற்குச் சிறந்த மருதநிலத்திலேயே. உழவுத்தொழிலும் நிலையான குடியிருப்பும், ஊர்ப்பெருக்கமும் நாகரிகம் தோன்றுவதற்குப் பெரிதும் துணை செய்தன. உழவுத் தொழிலால் வேளாண்மையும், பதினெண் பக்கத் தொழில்களும், பிறதொழில் செய்வார்க்கும் போதியவுணவும், வாணிகமும் ஏற்பட்டன. நிலையாகக் குடியிருப்பதனால் உழவன் ’குடியானவன்’ எனப் பெற்றான். ’இல்வாழ்வான்’ என்று திருவள்ளுவரால் சிறப்பித்துச் சொல்லப் பெற்றவனும் உழவனே” என்று ஆற்றங்கரைகளில் நாகரிகம் தோன்றி வளர்ந்ததை விளக்குவார் பாவாணர்.

நம் தமிழகத்தைப் பொறுத்தமட்டில் நல்லதோர் நாகரிகத்தை இங்கே தோற்றுவித்த பெருமை பூ விரியும் சோலைகளைத் தன்பாதையெங்கும் பரப்பிய காவிரியாற்றுக்கு உண்டு. வற்றாத சீவநதியாய், (ஒருகாலத்தில் திகழ்ந்த) காவிரிப்பேராறு தமிழகத்தை…குறிப்பாக, அன்றைய சோழநாட்டை வளங்கொழிக்கும் பொன்னாடாக்கியது வரலாற்றுண்மை! அதனால்தான் சோழநாட்டை ’வளநாடு’ என்றும் அதனையாண்ட அரசனை ’வளவன்’ என்றும் புலவர்களின் பொய்யாச் சிறுநா புகழ்ந்து பாடிற்று. ’சோழவளநாடு சோறுடைத்து’ எனும் பழமொழிக்குக் காவிரியே காரணம் என்பதை யாரே மறுப்பர்?

கன்னட நாட்டின் (கர்நாடகா) குடகுமலையிலுள்ள தலைக்காவிரி எனும் பகுதியே காவிரியின் பிறந்தகம். இதனையே ’குடமலைப் பிறந்த தண்பெருங் காவிரி’ என்று மலைபடுகடாமும் குறிக்கின்றது. குட(கு)மலையிலிருந்து துள்ளிக்குதித்துவரும் காவிரிப்பெண்ணாள், ஹசன், மாண்டியா, மைசூரு, பெங்களூரு எனும் பல்வேறு கன்னட மாவட்டங்களைக் கடந்து தன் கடற்காதலனைத் தேடித் தமிழகத்துக்குள் நுழைகின்றாள். தருமபுரி, சேலம், ஈரோடு, திருச்சிராப்பள்ளி என்று ஒவ்வொரு பகுதியாகத் தாண்டி, காதலனைக்காண நெடும்பயணம் மேற்கொண்டுவரும் அவள், சிராப்பள்ளியைக் கடந்ததும் அகண்ட காவிரியாய் ஆர்ப்பரித்து வருகின்றாள். தஞ்சையை நெருங்க நெருங்கத் தன் தலைவனைச் சந்திக்கவேண்டும் எனும் ஆவல் மீதூர, அரிசிலாறு, வெண்ணாறு வெட்டாறு என்று பல கைகளை (இவை காவிரியின் கிளைகள்) நீட்டியபடிப் பாய்ந்தோடி வருகின்றாள் அப் பாவை.

முற்காலச் சோழர்களின் பொற்புடைத் தலைநகராய்த் திகழ்ந்த பூம்புகாரில் நுழைந்து, தனக்காக வழிமேல்விழிவைத்துக் காத்திருக்கும் வங்கக் கடலரசனோடு தன் தங்கக் கைகோக்கிறாள் அந்தத் தையல். சம்பு எனும் பெண்தெய்வத்தின் காவலில் இருந்தமையால் ’சம்பாபதி’ எனும் பழம்பெயர்கொண்டிருந்த பூம்புகார் நகரம், காவிரி தன்னுள் புகுந்து செல்வதனாலேயே ’காவிரிப்பூம்பட்டினம்’ எனும் புதுப்பெயர் கொண்டதாக மணிமேகலைக் காப்பியம் குறிப்பிடுகின்றது.

கருநாடகம் தொடங்கித் தமிழகம் ஈராகக் கிட்டத்தட்ட 800 கி.மீ தூரம் பயணிக்கும் காவிரிப்பேராற்றின் நீளமும் பயணத்தூரமும் கன்னடத்தைவிடத் தமிழகத்திலேயே அதிகம் என்பது ஈண்டுக் கருதத்தக்கது.

இனி, தமிழகத்தின் பெருவளத்துக்குக் காரணமாயிருந்த காவிரிப்பேராறு குறித்து நம் பைந்தமிழ் இலக்கியங்கள் செப்புவது என்ன என்பதைக் கண்ணுறுவோம்.

சங்க இலக்கியங்கள் என்று குறிக்கப்படுபவை பாட்டும், தொகையும் (எட்டுத்தொகை, பத்துப்பாட்டு). இவற்றைப் பதினெண்மேற்கணக்கு நூல்கள் என்றும் அழைப்பர். இச்சங்கநூல்கள் காவிரியாற்றைக் குறித்து ஒன்றல்ல… இரண்டல்ல…முப்பத்தேழு இடங்களில் வாயூறிப் பேசுகின்றன என்பதை அறியும்போது உண்மையில் வியப்பே மேலிடுகின்றது. அவற்றில் சிலவற்றை நாமும் அறிந்துகொள்வோம்!

பத்துப்பாட்டு நூல்களில் இரண்டாவதாக வைத்தெண்ணப்படும் பொருநராற்றுப்படை, முடத்தாமக்கண்ணியார் எனும் நல்லிசைப்புலவர் கரிகாற்பெருவளத்தான்மீது பாடியதாகும். 248 அடிகளுடன், ஆசிரியமும் வஞ்சியும் விரவிய நடையுடைத்து இந்நூல். இதன் இறுதிப்பகுதி, புகாரைப் புரக்கும் காவிரியைக் கற்கண்டுச் சொற்கொண்டு வருணிக்கின்றது.

….பன்மாண்
எல்லை தருநன் பல்கதிர் பரப்பிக்
குல்லை கரியவுங் கோடெரி நைப்பவும்
அருவி மாமலை நிழத்தவு மற்றக்
கருவி வானங் கடற்கோள் மறப்பவும்
பெருவற னாகிய பண்பில் காலையும்
நறையும் நரந்தமு மகிலு மாரமும்
துறைதுறை தோறும் பொறையுயிர்த் தொழுகி
நுரைத்தலைக் குரைப்புனல் வரைப்பகம் புகுதொறும்
புனலாடு மகளிர் கதுமெனக் குடையக்
கூனிக் குயத்தின் வாய்நெல் லரிந்து
சூடுகோ டாகப் பிறக்கி நாடொறும்
குன்றெனக் குவைஇய குன்றாக் குப்பை
கடுந்தெற்று மூடையின் இடங்கெடக் கிடக்கும்
சாலி நெல்லின் சிறைகொள் வேலி
ஆயிரம் விளையுட் டாகக்
காவிரி புரக்கு நாடுகிழ வோனே. (பொரு: 232-248)

கதிரவனின் கடும்வெப்பம் தாளாது கஞ்சாச்செடிகளும் (கஞ்சாச் செடி கடுமையான வெப்பத்தைத் தாங்கக்கூடியது) கருக, மரங்களெல்லாம் பட்டுப்போக, மாமலைகளில் அருவிகள் இல்லாதுபோக, முகில்கள் கடல்நீரை முகந்து மழைபொழிய மறக்க, பெரும் வறட்சியும், வற்கடமும் பூவுலகைப் பீடிக்கும் காலத்தும், நுங்கும் நுரையும் பொங்க ஆரவாரித்துவரும் காவிரிவெள்ளமானது நறைக்கொடி, நரந்தம்புல், அகில், சந்தனம் போன்ற மணப்பொருள்களையெல்லாம் சுமந்துவந்து துறைதோறும் புனலாடும் மகளிர்க்குப் பரிசுப்பொருள்களாய் நல்கும். வளைந்த வாயையுடைய அரிவாளால் அரிந்து குன்றெனக் குவிக்கப்பட்ட நெற்பொலி (நெல்குவியல்) மூ(ட்)டைகள் ஒன்றோடொன்று நெருக்கமாய் அடுக்கப்பட்டிருக்கும் என்று காவிரிதந்த வளம் கவினுறப் பேசப்படுகின்றது இங்கே!

அன்று சோழவளநாட்டின் நெல்விளைச்சல் எவ்வளவு தெரியுமா? ஒருவேலி நிலத்தில் ஆயிரங்கலம் (நெல்) விளையுமாம்! அதுவும் சாதாரண நெல் இல்லை! ’சாலி’ என்று சொல்லப்படும் உயர்ரக நெல்லைப் பயிரிட்டு அமோக விளைச்சல் கண்டிருக்கின்றார்கள் அன்றைய சோணாட்டு உழவர்கள்.

ஆயிரங்கலம் என்றால் எவ்வளவு என்று ஒரு கணக்குப் போட்டுப் பார்ப்போம். ஒருகலம் என்பது 24 படி. அப்படியானால், ஆயிரங்கலம் என்பது 24000 படி. படிக்கும்போதே வாய்பிளக்கிறோமே…விளைவித்துப் பார்த்தவர்களின் பெருமிதத்தை விளக்கிச்சொல்ல வார்த்தை ஏது?

இத்துணைப் பெருமைவாய்ந்த காவிரிபுரக்கும் நாட்டுக்கு உரிமையுடையோனாகிய கரிகால்வளவன் போற்றுதலுக்குரியவன்தானே?

(தொடரும்)

November 4, 2016
இரட்சிக்க இறைஞ்சுகிறேன் !

எம் .ஜெயராமசர்மா … மெல்பேண் .. அவுஸ்திரேலியா

       செந்தமிழால் பாடிநிதம்

          கந்தாவுனை வேண்டுகிறேன்

       வந்தவினை போயகல

           வரமருள வேண்டுமையா

       சொந்தமெலாம் எனைச்சூழ

            சுகமுடனே வாழுதற்கு

       கந்தவேளே உந்தனருள்

            தந்துவிட வேண்டுகிறேன் !

      அசுரகுணம் அழிவதற்கு

          அவதாரம் எடுத்தவனே

      அசுரகுணம் எம்மிடத்தில்

            அழியாமல் இருக்கிறதே

      வழிமுழுக்க உனைவைத்து

            வணங்கிநாம் இருக்கின்றோம்

       வடிவேலா எமைத்திருத்தி

             வரமருள வேண்டுகிறேன் !

         நீதிநெறி தவறாமல்

             நான்வாழ வேண்டுமையா

         நெஞ்சமுள்ள வஞ்சனைகள்

               நீறாக வேண்டுமையா

          சோதனையை நான்தாங்கும்

                துணிவெனக்குத் தந்திடையா

            நாதனது திருப்புதல்வா

                  நல்லதுணை நீயன்றோ !

             உன்நாமம் இப்போது

                  உலகமெங்கும் ஒலிக்குதையா

             ஓங்காரப் பொருளுக்குள்

                    உலகமே அடங்குதையா

              மண்மீது உள்ளாரின்

                    மனம்சிறக்க வைப்பதற்கு

               மால்மருகா மனமிரங்கி

                     வரமருள வேண்டுகிறேன் !

            பட்டதுன்பம் போதுமையா

               படித்துவிட்டேன் பலபாடம்

            துட்டரது சகவாசம்

                  துயரமெலாம் தந்ததையா

             இஷ்டமுடன் கந்தஷஷ்டி

                   இனிப்படிப்பேன் கந்தவேளே

             இரக்கமுடன் எனைக்காத்து

                    இரட்சிக்க இறைஞ்சுகிறேன் !

November 4, 2016
அறுபடைவீடு (5)- திருமாலிருஞ்சோலை ( பழமுதிர்ச்சோலை )

க. பாலசுப்பிரமணியன்

தேன்மணக்கும் தினைமணக்கும் தமிழ்மணக்கும் நிலத்தினிலே

பூமணக்கும் காய்மணக்கும் கனிமணக்கும் சோலையிலே

வான்மணக்கும் இசையமைக்கும் தெம்மாங்கின் அசைவினிலே

வாய்மணக்கும் சொல்மணக்கும் கந்தாவென அழைத்திடவே !

எட்டுக்குடி வேலனவன் எட்டாமல் நின்றிருப்பான்

விட்டகுறை தொட்டகுறை வேதனைகள் விலக்கிடுவான்

பட்டுமேனி தெய்வானை பாசமுள்ள குறமகளும்

தொட்டிருக்கத் துணைகொண்டு துரிதமாய் காத்திடுவான் !

விளையாடத் தமிழிருக்க இடையனாய் வந்திருப்பான்

இசைக்கவிகள் இதழசைவில் இனியத்தமிழ் கேட்டிருப்பான்

சுட்டப்பழம் தந்திருப்பான் சுடாதபழம் வைத்திருப்பான்

பட்டமர வாழ்வினிலே கொட்டும்மழையாய் வந்திடுவான்!

குறுஞ்சியென்ன நெய்தலென்ன குமரனுக்கு ச் சம்மதமே

குன்றென்று ஒன்றிருந்தால் கந்தனுக்கு உறைவிடமே

குறைதீர்க்கக் கொடியேந்தி மயிலேறும் ஆறுமுகமே

குறையில்லா இதயத்தில் குடியிருக்கும் இன்முகமே !

வேலுண்டு வினையில்லை விரைவில் வந்திடுவாய்

தாள்கண்டு தரணியிலே தாகங்கள் தீர்த்திடுவேன்

கோளெல்லாம் உனைக்கண்டு குறைகள் நீக்கிடுமே

நாளெல்லாம் துணையாக உனையன்றி யாரிருப்பார் ?

தெளியாத அறிவோடு தெருவெல்லாம் அலைகின்றேன்

தெவிட்டாத இன்பம் நீயன்றோ:? வாடுகின்றேன் !

தோதாகப் பரிசொன்றும் உனக்கென்று கிடைக்கவில்லை

தோத்திரங்கள் செய்கின்றேன் துரிதாக வந்திடுவாய் !

November 4, 2016
நாடிவந்து நிற்குமன்றோ !

எம் . ஜெயராமசர்மா … மெல்பேண் … அவுஸ்திரேலியா

நாநயம் இருந்துவிட்டால்
நாணயம் நமக்குவரும்
பேய்மனம் கொண்டுவிட்டால்
பிணம்போல ஆகிடுவர்
தூய்மையது மனமேறின்
துட்டகுணம் மறைந்துவிடும்
நாமென்றும் வாழ்வினிலே
நாணயத்தை காத்திடுவோம் !

மேடைகளில் முழங்கிடுவார்
விதம்விதமாய் எழுதிடுவார்
விவாதங்கள் வந்துவிட்டால்
மேதையெனக் காட்டிடுவார்
போதைபற்றி கதைசொல்வார்
பொறுப்புப்பற்றி பலசொல்வார்
போதையுடன் வீடுவந்து
பொங்கிடுவார் வீட்டினிலே !

அறவழியை விட்டுவிட்டால்
அனைவர்க்கும் தீமையென்பார்
அஹிம்சைதனை அரவணைத்தல்
அனைவர்க்கும் நன்மையென்பார்
அன்புபாசம் யாவருக்கும்
அத்திவாரம் தானென்பார்
அசிங்கமுள்ள அத்தனையும்
அரங்கேற்றம் செய்தும்வைப்பார் !

வள்ளுவரை அருகழைப்பார்
வாய்மைபற்றிப் பேசிடுவார்
தெள்ளுதமிழ் தலைவனென்பார்
தில்லுமுல்லு பலசெய்வார்
உள்ளமெலாம் கள்ளமுடன்
ஒழுக்கமின்றி அவரிருப்பார்
நல்லதமிழ் காத்திடுவோம்
நாட்டிலுள்ளோர் வாருமென்பார் !

கண்ணகியைப் போற்றிடுவார்
கற்புப்பற்றி நூல்செய்வார்
எண்ணமெலாம் திருவருளே
எனச்சொல்லி திருடிநிற்பார்
தன்னைவிட மேதாவி
தோன்றவில்லை எனவுரைப்பார்
தலைதெறிக்கக் காரியங்கள்
சமத்தாகச் செய்துநிற்பார் !

பெண்ணடிமை ஒழிவதற்கு
பிரசாரம் செய்திடுவார்
பெண்பித்து தலைக்கேறி
பெண்ணைப் பிய்த்துஎறிந்திடுவார்
மண்மீது போதையது
மடிவதற்கு முழங்கிடுவார்
மதுமீது அவர்தவழ்ந்து
வந்துநிற்பார் மனைக்குள்ளே !
வீண்வார்த்தை பேசாதீர்
வீண்வாதம் புரியாதீர்
மாண்புடனே பேசிடுவீர்
மாண்புடனே நடந்திடுவீர்
தான்வாழும் சமுதாயம்
தலைநிமிர வேண்டுமென்று
தான்நினைத்து வாழ்பவரே
தலைவனாய் உயர்ந்திடுவார் !
உள்ளொன்றும் புறமொன்றும்
உயர்வினுக்கு ஏற்றதல்ல
உரைக்கின்ற வார்த்தையது
உள்ளிருந்து வரவேண்டும்
கள்ளமிலா உள்ளமொடு
கருணையுடன் வாழ்வதுதான்
நல்லதொரு வாழ்வாக
நமக்கெல்லாம் அமைந்துவிடும் !

நாணயமாய் வாழ்ந்துவிட்டால்
நாட்டுக்கே நன்மையன்றோ
நாட்டுக்கே இப்போது
நாணயமே தேவையன்றோ
நாநயத்தைக் காப்பாற்றி
நாணயமாய் நாமிருந்தால்
நன்மையெலாம் எமைநோக்கி
நாடிவந்து நிற்குமன்றோ !

November 4, 2016
ஆறுபடைவீடு (4)

க. பாலசுப்பிரமணியன்

திருப்பரங்குன்றம்

பரங்குன்றத்துப் பேரழகே ! பார்புகழும் விண்ணழகே !

பரமசிவன் விழியிருந்து பறந்துவந்த ஆணழகே!

பழகுதமிழ் மொழிதந்து பண்பரப்பும் தமிழழகே !

பாலோடு தேன்கலந்த பல்சுவைப் பெயரழகே !

நாதத்தின் தலைவன் நினைப்பினிலே பிறந்தாய்

வேதத்தின் பொருளாக வாழ்வினிலே நின்றாய்

ஞானத்தின் வடிவாக ஞாலத்தைக் கவர்ந்தாய்

காலத்தின் கருவே ! கருணைமிகு கந்தா !

பொய்கையில் வளர்ந்த பொதிகைமலைத் தென்றலே

பூமேவும் செங்கமலம் குருபரனுக்குக் கொடுத்தவனே

புரியாத பிரணவத்தை பரமனுக்கும் சொன்னவனே

புதிரான வாழ்வுக்குப் புதுப்பொருளைக் கொடுப்பவனே !

படியாத அகம்கொண்டு பழிகொண்ட சூரனை

பரிவாக அருள்கொண்டு ஆட்கொண்ட அமரா !

பரிசாக தெய்வானைக் கைப்பிடித்த பண்பாளா !

பரங்குன்றம் புகழ்பாடும் மெய்ஞ்ஞான திருவே

அவ்வையோடு அகத்தியனுக்கும அருள்செய்த ஆனந்தா !

ஆலவாய் தமிழ்ச்சங்கம் அணிசெய்த அமுதா !

ஆயிரம் பெயர்கொண்டு அழைத்தாலும் அசையாமல்

அடியார்கள் அன்பிற்கு அருள்செய்யும் வேலவனே !

குன்றுமேல் நீயிருக்கக் குறைவின்றிப் பார்த்திருந்தேன்

குகையுள்ளே நீஅமர்ந்தால் குமரா என்செய்வேன் ?

குலம்காக்கும் கொழுந்தே நெஞ்சினிலே வருவாயோ?

குறைநீக்கி அறம்காக்கக் குருவாக நிற்பாயோ ?

November 3, 2016
நீளும் பயணம்!

பவள சங்கரி

உம்இதய இச்சையின் உச்சம்
நோக்கிய உயர்வில் இன்னொருவர்
நீ கொள்ளையடித்த பணப்பையைக்
களவாடி அதன்மீது மெழுகுக்
கொழுப்பையும் பூசி அப்பொதியையும்
இன்னொருவரை சுமக்கச்செய்பவரிடம்
இரக்கம் காட்டுங்கள்! பாவம்
அச்சதைப் பிண்டத்திற்கு ஏறுதலும்
கடினம், பாதையும் நீண்டதாகிவிடும்!
கலீல் கிப்ரான் (மொழிபெயர்ப்பு)

November 2, 2016
இலக்கியச் சித்திரம் – இனிய பிள்ளைத்தமிழ்-29

மீனாட்சி பாலகணேஷ்

தென்திருப்பேரை முகில்

கிடந்தும் தவழ்ந்தும் இருக்கும் குழந்தை உருண்டு புரண்டெழுந்து அழகாகக் குத்துவிளக்கு போல எழுந்தமர்ந்து கொள்ளும்போது அதனைக்காணும் தாயின் மகிழ்ச்சி அளவிட இயலாதது. குழந்தையிடம், ‘கை வீசம்மா கைவீசு,’ என்றும், கைகளைக்கொட்டிச் சப்தமெழுப்பிச் சப்பாணி ( சஹ+ பாணி= சப்பாணி) கொட்டவும் கற்றுக் கொடுக்க முயல்வாள் அன்னை.

சந்தன மரங்கள் அடர்ந்து செறிந்த சோலைகளைக்கொண்ட ஊர் திருப்பேரை எனும் திருமாலின் தலமாகும். இங்கு சின்னஞ்சிறுவனான, கருமுகில்வண்ணனான ஒரு குழந்தை உள்ளான். தெய்வக்குழந்தையான திருப்பேரை நாதனவன். பெயரும் மகரக்குழைக்காதன்! அவனைச் சப்பாணி கொட்டுமாறு வேண்டும்போது அக்கரங்களால் அவன்செய்த செயல்களைக் கூறுவது தானே முறைமை? அதற்கு நம் புலவரின் கற்பனை வளம் ஊற்றாகப் பெருகுகிறது!

தன் சிவந்த கரங்கள் இன்னும் சிவக்கச் சப்பாணி கொட்டி விளையாடுகிறான் அந்தக்குட்டன்! யாரவன்? அவன் செய்த அரும்பெரும் செயல்களைப் பெருமையுடன் அடியாரான புலவர் விளக்குவதனைப் பார்க்கலாமா?

விசுவாமித்திரர் ஆகிய பெருந்தவ முனிவர்களின் தவத்தினை நாசம் செய்து பெரும் குற்றம்புரிந்து வந்த கருமை நிறங்கொண்ட தாடகை எனும் ஒரு அரக்கியை வதைத்தான். அவளுடைய கொடிய உயிரினைக் குடிக்கும் வண்ணம் வில்லினில் கணைகளைத் தொடுத்தான்; அவளை மிக எளிதாகக் கொன்றும் விட்டான். அவனே ஸ்ரீராமன் எனும் தசரதன் குலக்கொழுந்து. ‘இராமன் கணைகளைத் தொடுத்துத் தாடகையை அழித்தான்,’ என மட்டும் கூறாது, அதனை இன்னுமே விளக்கி, அக்கொடியவளின் உயிர் எவ்வாறு போயிற்றென விளக்குவதும் இன்னொரு புலமைநயம்: அம்பினால் அடிபட்டவளின் உடலிலிருந்து கொழுங்குருதி பெருக்கெடுக்கின்றது. நரிகள் அவளைச் சுற்றிச் சூழ்ந்து தசையினைப் பிடுங்கி உண்கின்றன. இயமன் இவ்வண்ணம் அவளது உயிரைக் குடிக்குமாறு செய்தான் ‘இராமன் எனும் இந்தத் தென்திருப்பேரையூர் உறையும் சிறுவன்’ என அவன் மேலேற்றிக் கூறுவார் புலவர்.

தாடகை வதத்தைப்பற்றிக் கம்பர் கூறுகிறார்:

‘மார்பில் தைத்த அம்பினால் உண்டான புண்ணிலிருந்து பெருகிய இரத்தம் மாலையின் செவ்வானப் பரப்பு தரையில் வீழ்ந்ததுபோல, பாலைவனம் முழுதும் கடலாக மாறும்படி விழுந்து பரவியது,’ என்றும், ‘தாமரைமலரில் வாழும் பிரமனுக்கு ஒப்பான மாமுனி விசுவாமித்திரனின் கட்டளையை மறுக்காதவன் இராமன்; அவன் செய்யும் முதல்போர் (கன்னிப்போர்) இது. எமன் ஒருபக்கம் இந்த அரக்கர்குலத்தின் உயிரை உண்ணவேண்டும் எனும் ஆசையால் திரிந்து கொண்டிருக்கிறான்; ஆனாலும் வாளேந்திய அரக்கர்களைக் கண்டு அவனுக்கு ஒரு தயக்கம்; அச்சம். இன்று அவனுடைய ஆசையும் கொஞ்சம் நிறைவேறியது!’ எனவும் கவிதைநயம் மிளிரக் கூறுகிறார்.

வாச நாள்மலரோன் அன்ன மாமுனி பணி மறாத
காசு உலாம் கனகப் பைம்பூண் காகுத்தன் கன்னிப்போரில்
கூசிவாள் அரக்கர் தங்கள் குலத்து உயிர்குடிக்க அஞ்சி
ஆசையால் உழலும் கூற்றும் சுவை சிறிது அறிந்தது அன்றே.
(தாடகை வதைப்படலம்)

கம்பரின் சொல்லாற்றலின் தாக்கத்தை இப்பிள்ளைத்தமிழ்ப் பாடல்களிலும் உணர முடிகின்றது. இவன் இவ்வாறு தாடகையினை அழித்ததனால் கௌசிகன் எனும் விசுவாமித்திர முனிவனின் வேள்வி வேதமுறையினின்று வழுவாமல் நடைபெறுமாறு முடித்தும் தந்தான்.

பின்பு மிதிலைநகரினை அடைந்து சொல்லுதற்கரிய புகழ்படைத்த சனக மாமன்னன் வசமிருந்த வில்லினை (சிவதனுசை) முறிக்கிறான் அச்சிறுவன். எவ்வாறு? சும்மா முறிக்கவில்லை; கண்டதுண்டமாக ஒடித்துவிட்டான் எம்முடைய இந்தக்கோமகன் என்கிறார் புலவர்.

கம்பர், ‘கையால் எடுத்தது கண்டனர்; இற்றது கேட்டார்,’ என்றார். கணப்பொழுதினில் வில்லை உடைத்து விட்டானாம் இராமன். இப்புலவர் இன்னும் ஒருபடி மேல்போய், ‘பலதுண்டங்களாக உடைத்து விட்டான்,’ என்கிறார்! ‘ஆகா’ எனத் தலையசைத்து இரசிக்கிறோம்!

இவனுடைய இச்செயல் சிவசங்கரக்கடவுளின் கண்களைக் குளிர்வித்ததாம்.

இந்தத் தென்திருப்பேரை முகில் வண்ணக் குழந்தையை புகழ்வாய்ந்த செயல்களைச் செய்த தனது கைகளைக்கொண்டு சப்பாணி கொட்டி அருளுமாறு வேண்டுகிறார் புலவர்.

கம்பரைப்போல இவனது கைவண்ணத்தை அழகுறக் காட்டியருளுகிறார்.

அருமையான கற்பனை! கம்பர் வழியிலேயே சென்று தமது பிள்ளைத்தமிழ் நூலை வடிவமைத்துள்ள புலமைநயம் புதுமை!

கக்கக் கொழுங் குருதி நரிபிடுங்கத்தசை
கவர்ந்துயிர் குடிப்ப மறலி
கருநிறத் தாடகையை வதை படுத்தசிலைக்
கடை குழைத்தடிகணை தொடுந்
தொக்கிற் பெருந்தவக் கௌசிகன் வேள்வியும்
சுருதிநூல் முறை முடித்துச்
சொல்லரிய மிதிலாபுரிச் சனகன்வில்
கண்டதுண்டப் படுத்து மெங்கோன்
செக்கச் சிவக்குங் கொழும்பவள வார்க்கதிர்ச்
செஞ்சுடாவி மணிமுடிச்
சிவசங்கரக் கடவுள் கண்கள்களி கூரச்
சிறந்தருள் புரிந்து சங்கு
சக்கரத்துணை செங்கை யொக்கச் சிவப்பவொரு
சப்பாணி கொட்டி யருளே,
சந்தனச் சோலைசெறி தென்திருப்பேரை முகில்
சப்பாணி கொட்டி யருளே
(ஸ்ரீ மகரக் குழைக்காதர் பிள்ளைத் தமிழ்- சப்பாணிப்பருவம்)

இந்நூலின் பாட்டுடைத்தலைவனை இராமனாகக்கொண்டு அவன் சிவதனுசை முறித்து, சானகியை மணந்ததையும், தாடகை முதலான அரக்கர்களையும் அழித்த வீரச்செயல்களையும், இன்னும் பலவற்றையும் புலவர் பாடியுள்ளார். இந்நூலை இயற்றியவர் இன்னாரென அறிய இயலவில்லை. இனிய எளிய சொற்களைக்கொண்டு மிக அருமையாக இப்பிள்ளைத்தமிழ் நூல் அமைந்துள்ளது.

அடுத்து சிற்றில் பருவத்திலிருந்து ஒரு மாறுபட்ட கற்பனைகொண்ட பாடலைக் காணலாமா?

சிறுவன் திருப்பேரைநாதன் சிறுமிகள் இழைத்து விளையாடும் சிற்றிலைக் காலால் எற்றி உதைத்து அழிக்க முற்படுகிறான். அச்சிறுமிகள் மிகுந்த வாக்குசாதுரியத்துடன் அவனுடன் வார்த்தையாடுவது நமக்கு வியப்பினைத் தருகின்றது!

இவர்கள் பாடுபட்டு வண்டல் மண்ணைக்கொழித்து, பதமாக நீர்சேர்த்துப் பிசைந்து, சிற்றில் இழைத்திருக்கிறார்கள். சிற்றில் இழைத்து விளையாடும்போது தாய் தந்தையாராகத் தம்மைக் கருதிக்கொண்டு பாவைகளை வைத்தும் விளையாடுவார்கள் சிறுபெண்கள். சிற்றிலை அழிக்க இச்சிறுவன் ஓடோடி வருகிறான். இவனோ அரசகுமாரன்; அவனிடம் ஒரு சிறுபெண், பெரிய பெண்மணி போல நீட்டி முழக்கிக் கூறுகிறாள்: “ஆசையாக, அன்பாக இந்தக் குழந்தையை நான் மார்போடு அணைத்துக்கொண்டு முலைப்பால் கொடுக்கிறேன். பின்பு அமுதம்போலும் புனல்நீரில் நீராட்டி, அதன் அழகான கடைக்கண்களுக்கு மையும் தீற்றியுள்ளேன். கழுத்தில் பொன்னாரத்தைத் திருத்தமாக அணிவித்து, பட்டாடையும் உடுத்தியுள்ள எனது குழந்தைக்கு புகழ்வாய்ந்த பெரியோனான உனது பெயரையே நான் இடுவேன். எப்போது? நாங்கள் பாடுபட்டுக் கட்டியுள்ள மாளிகை, மாடங்கள், அரங்கங்கள், வேதிகை கொண்ட இச்சிற்றிலை நீ அழிக்க ஓடோடி வரலாகாது காண்பாய்! எங்கள் சிற்றிலை அழிக்கமாட்டேன் எனக்கூறினால் நானும் கூறியபடி என் குழந்தைக்கு உன் பெயரை இடுவேன். நாங்கள் சின்னஞ்சிறு பேதைப்பெண்கள்; காலால் எங்கள் சிற்றிலை நீ எற்றினால் உன் மென்மையான (அடியார் தொழும்) திருவடியில் வண்டல் துகள்கள் ஒட்டிக்கொண்டு உறுத்துமே ஐயா!

“ஆகவே அலைகள் வீசும் பொருநை நதிக்கரையிலமைந்த திருப்பேரையின் நாதனே! சிற்றில் சிதையேலே!” என வேண்டுவதாகப் பாடியுள்ளார். ஒப்பற்ற கற்பனை நயம்கொண்டு, சிறுமித்தன்மையின் பேதைமையையும் விளக்கிக்காட்டும் இனிய பாடல்.

அன்போ டணைத்து முலைகொடுத்தின்
அமுதூற்றறிருக்கும் புனலாட்டி
அருங்கட் கடைக்கஞ் சனமெழுதி
ஆரந் திருத்திப் பட்டுடுத்தி
உன்பே ரிடுவே னென் குழவிக்
குள்ள தயவாற் றனிசமைத்த
உயர்மா ளிகையு மாடரங்கும்
ஒளிர்வே திகையு நீயழிக்க
வன்பா லோடி வரவுனக்கு
வழக்கன் றுலகிற் சிறுபேதை
மகளி ருந்து விளையாடும்
வண்டற் றுகள்சே வடிபடுமே
தென்பே ரையினங் குலநாத
சிறியேஞ் சிற்றில் சிதையேலே
திரையார் பொருநைத் தடந்துறைவா
சிறியேஞ் சிற்றி்ல் சிதையேலே
(ஸ்ரீ மகரக் குழைக்காதர் பிள்ளைத் தமிழ்- சிற்றிற்பருவம்)

மேலும் காட்சிகளைக்கண்டு மகிழ்வோம்.

மீனாட்சி க. (மீனாட்சி பாலகணேஷ்)
{முனைவர் பட்ட ஆய்வாளர், தமிழ்த்துறை,
கற்பகம் பல்கலைக் கழகம், கோவை,
நெறியாளர்: முனைவர் ப. தமிழரசி,
தமிழ்த்துறைத் தலைவர்.}

********************************

November 2, 2016
ஆறுபடை வீடு (3) – திருச்சீரலைவாய் (திருச்செந்தூர்)

க. பாலசுப்பிரமணியன்

அளவில்லாக் கருணை கந்தனின் விழிகள்

அறியாத சூரனின் அகந்தையின் வேர்கள்

ஆணவத்தில் எழுந்தன அழிவினைத் தேடி

அலைவாய்க் கரையில் ஊழ்வினை நாடி !

ஓமென ஓமென உயர்ந்தன அலைகள்

ஒருதலை இருதலை மறுதலை மடிய

தறுதலை ஆணவம் தரணியில் வீழ

ஆறுதலை முருகன் அருளும் வெல்ல !

மாயைகள் அனைத்தும் மண்ணில் வீழ்ந்தது

மாலனின் மருகன் மனமே வென்றது

காலனின் அணைப்பில் சூரனும் கதற

வேலவன் ஆற்றலை வானகம் புகழ்ந்தது

கூரிய வேலும் கொடியவன் கூறிட

கூவியே வந்தது கொடியினில் சேவலும்

குமரனைச் சுமந்திடஅகவியே மயிலும்

குவலயம் மகிழ்ந்திடகந்தனின் தரிசனம் !

சமரினை முடித்த சங்கரன் மகனும்

சந்தனம் அணிந்தே சன்னிதி கொண்டான்

தந்தனத் தோமென தாளங்கள் போட்டு

தாளிணைத் தேடி வந்தன காவடி !

நாழிக் கிணற்றில் அகந்தையைக் கழுவி

நாழிப் பொழுதும் கந்தனைக் கண்டால்

தாழிட்ட நெஞ்சங்கள் தானாய்த் திறக்கும்

தாளினைப் போற்றியே தரணியில் வாழ்வோம் !

November 2, 2016