Category: நறுக்..துணுக்…

பவள சங்கரி

மனிதம் வாழ்ந்துகொண்டுதான் இருக்கிறது. ஈரோட்டில் ஒரு நகராட்சிப் பள்ளியில் மாணவர்களை நன்கு படிக்கவும், 100 % வெற்றி பெறவும் மனிதாபிமானமிக்க, ஆக்கப்பூர்வமான முறையில் செயல்படுகிறார்கள் அப்பள்ளி ஆசிரியர்கள். ஆம், கூடுதல் கவனம் செலுத்தப்பட வேண்டிய மாணவர்களைத் தேர்ந்தெடுத்து மாலை நேர தனி வகுப்பு இலவசமாக எடுப்பதோடு, அந்த மாணவர்கள் சோர்வில்லாமல், உற்சாகமாக படிக்கவேண்டும் என்பதற்காக, அந்த ஆசிரியர்கள் தங்கள் சொந்தச் செலவில், அந்த குறிப்பிட்ட தேர்வுக் காலங்களில், ஒரு நாளைக்கு ஒரு ஆசிரியர் என்று மாணவர்களுக்கு சிற்றுண்டி (4 இட்லி/சட்னி/சாம்பார்) வாங்கிக்கொடுக்கிறார்கள். இன்னொரு மனிதாபிமான விசயம், அப்பள்ளியின் முன்னாள் மாணவர், இன்று ஒரு சிறிய உணவு விடுதியின் உரிமையாளர், ரூ 10 இட்லியை 5 உரூபாய்க்கு கொடுக்கிறார்! இதல்லவோ மனிதம்!

பவள சங்கரி

நம்முடைய மூளையில் 10% மட்டுமே நாம் பயன்படுத்துகிறோம். மீதி 90% வீணாக இருக்கிறதாம். மாபெரும் அறிவுஜீவிகளுக்கும் இது பொருந்தும். தூக்கத்திலும் விழித்து செயல்படும் உறுப்பு மூளை என்று கண்டுபிடித்திருக்கிறார்கள். சூழ்நிலைக்கேற்ப மூளை சுறுசுறுப்படைந்து செயல்பட ஆரம்பிக்கிறதாம். சூழ்நிலையை உணர்ந்து நம் மூளையை பயன்படுத்தி பிரச்சனைகளைப் புரிந்துகொண்டு முடிவெடுத்து செயல்பட வேண்டியது அவரவர் வசம் தான் உள்ளது என்பதுதான் செய்தி.. கூடுதலாக இன்னுமொரு  5% மட்டுமாவது பயன்படுத்திப் பார்க்கலாமே..

பவள சங்கரி 

1961ஆம் ஆண்டின் கணக்கெடுப்பின்படி இந்தியாவில் புழக்கத்தில் உள்ள மொழிகளின் எண்ணிக்கை 1,652 என்று கண்டறியப்பட்டுள்ளன.

1971ஆம் ஆண்டின் கணக்கெடுப்பில், 10,000 மக்களுக்கும் குறைவாகப் பேசப்படும் மொழிகளைத் தவிர்த்து 108 மொழிகளை மட்டும் பட்டியலிட்டிருக்கிறார்கள். மற்ற மொழிகள் “மற்றவைகள்” என்று பட்டியலிடப்பட்டுள்ளன.

1991ஆம் ஆண்டின் கணக்கெடுப்பின்படி, தனிப்பட்ட இலக்கண அமைப்புகளுடன் கூடிய மொழிகளாக 1,576 மொழிகளைக் கண்டறிந்து வெளியிட்டுள்ளது.

2001ஆம் ஆண்டின் கணக்கெடுப்பின்படி, இந்தியாவில் கண்டறியப்பட்டுள்ள மொழிகளின் எண்ணிக்கை 1,721. அதில் 122 முக்கியமான மொழிகள் மட்டுமே பெரும்பாலான மக்கள் பயன்படுத்துகிறார்கள். மற்ற 1,599 மொழிகள் சிறுபான்மை சமூகத்தினர், உள்ளூர் குழுக்கள், பழங்குடிகள் போன்றவர்கள் பயன்படுத்தக்கூடியவைகள்.

முக்கியமான 122 மொழிகள் 10,000 ற்கும் அதிகமான பயனாளிகள் உள்ளனர். இதில் 29 மொழிகள் மட்டுமே 1 மில்லியன் மக்களின் புழக்கத்தில் உள்ளன.

2011 ஆம் ஆண்டின் கணக்கெடுப்பின்படி, 122 மொழிகள் மட்டுமே 10,000 ற்கும் அதிகமான மக்கள் பயன்படுத்துவதாக உள்ளதாக கண்டறியப்பட்டுள்ளது.

கடந்த 50 ஆண்டுகளில் இந்தியா 250 மொழிகளை இழந்துள்ளது.  இன்று 880 மொழிகள் வழக்கில் உள்ளன. 29 மொழிகள் 1 மில்லியன் மக்களுக்கும் அதிகமாக பயன்படுத்துகிறார்கள். அருணாசலப் பிரதேசத்தில் மட்டும் அதிகபட்சமாக 90 மொழிகள் வழக்கில் உள்ளன!

பவள சங்கரி

பிரகாசம் ரெட்டி, குமாரசாமி ராஜா, காமராசர், அண்ணாதுரை, எம்.ஜி.ஆர். போன்றோர் ஆட்சி செய்த தமிழ்நாட்டில் பினாமி ஆட்சி தேவையா? எந்தக் கொள்கையின் அடிப்படையில் இந்த ஆட்சி? திராவிடர் நல்வாழ்விற்காக ஏற்படுத்தப்பட்ட ஆட்சியின் நிலை என்ன? காமராசர் ஆறாம் வகுப்பு படித்தவர்தான். கல்விக் கண்ணை திறந்துவைத்தார். ஆனால் பதினோறாம் வகுப்பு படித்துள்ள நமது கல்வியமைச்சர் நீட் தேர்வுகளிலும், தொழில்நுட்பத் துறை, சி.பிஎஸ்,சி யிலும் என்ன கொள்கை முடிவு எடுத்து செயல்படப் போகிறார்? கர்நாடகாவில் காவேரியின் குறுக்கே மேகதூதில் இரண்டு அணைகள் கட்டுவதற்காக 5000 கோடி பணம் ஒதுக்கி பணியைத் துவங்கிவிட்டனர். ஆந்திர அரசு பாலாற்றின் குறுக்கே அணை கட்ட ஆரம்பித்துவிட்டனர். கொங்கு பிரதேசத்தின் முதுகெலும்பான பவானியில் கேரள அரசு அணை கட்டுகிறது. பொதுப்பணித் துறையையும் கவனித்துக்கொண்டிருக்கும் முதலமைச்சர் என்ன நடவடிக்கை எடுக்கப் போகிறார். தங்கள் பதவியைக் காக்கும் போராட்டத்தில் மட்டுமே கவனம் செலுத்திக்கொண்டு இருக்கப்போகிறார்களா? தமிழகத்தின் நலனில் சிறுதுளியேனும் அக்கறை கொள்வார்களா?

பவள சங்கரி

இந்தியாவில் மட்டும் ஆண்டிற்கு 10.01 மில்லியன் குழந்தைகள் சுற்றுச்சூழல் (AIR POLLUTION) பாதிப்பினால், காற்று மாசுபாட்டின் காரணமாக உயிர் துறக்கிறார்கள். இது சீனாவைவிட அதிகம். தில்லியில் இதுபோல் அசாதாரண சூழ்நிலை ஏற்பட்டு உச்சநீதி மன்ற உத்தரவின் பேரில் நடவடிக்கை எடுத்ததுபோல இந்தியா முழுவதும் உடனடியாக போர்க்கால அடிப்படையில் நடவடிக்கை எடுக்க வேண்டியது அவசியம்.

பவள சங்கரி

தமிழக முதல்வர் மாண்புமிகு ஓ.பன்னீர்செல்வம் அவர்களுக்கு ஆதரவு தெரிவிக்கும் முகமாக, ‘மிஸ்ட் கால்’ திட்டம் நிறைவேற்றப்பட்டுள்ளது. அதாவது 9289222028 என்ற கைபேசி எண்ணிற்கு மிஸ்ட் கால் கொடுத்து விருப்பப்பட்ட பொது மக்கள் தங்கள் ஆதரவைத் தெரிவிக்கலாம் என்று அறிவித்திருந்தார்கள். இதன் தொடர்ச்சியாக கடந்த 2 நாட்களில் 35 இலட்சம் மக்கள் மிஸ்ட் கால் அதாவது தவறவிட்ட அழைப்புகள் மூலமாக தங்கள் ஆதரவைத் தெரிவித்துள்ளனர். இதில் 3 இலட்சம் அழைப்புகள் வெளி மாநிலங்கள் மற்றும் 2 இலட்சம் அழைப்புகள் வெளி நாடுகளிலிருந்தும் வந்துள்ளதாம். இதுமட்டுமன்றி நேரில் வந்து தங்கள் ஆதரவைத் தெரிவித்துள்ள பொது மக்களின் சுய விவரங்களும் கணினியில் பதிவு செய்யப்பட்டு அவைகளும் இதுவரையில் 3 இலட்சங்களைத் தாண்டியுள்ளதாம். தவறவிட்ட அழைப்புகள் மூலம் தமக்கு ஆதரவு தெரிவித்த பொது மக்கள் ஒவ்வொருவருக்கும் தமது குரல் பதிவு மூலம் நன்றியும் தெரிவித்துள்ளார் திரு ஓ.பன்னீர் செல்வம் அவர்கள். மறைந்த முதல்வர் ஜெயலலிதா அவர்களும் தேர்தல் காலங்களில் தமக்கு ஆதரவு தெரிவித்த மக்களுக்கு தமது குரல் பதிவின் மூலம் நன்றி தெரிவித்திருந்தார் என்பதும் குறிப்பிடத்தக்கது.

பவள சங்கரி

சேலம் அரசு அருங்காட்சியகத்தில் கிடைத்த பண்டைய தமிழர் வீர விளையாட்டிற்கான மற்றுமொரு ஆதாரம் – ஆணேறு தழுவும் சிற்பம்.  தமி வீரன் ஒருவன் காளையின் இரு கொம்புகளையும் பிடித்து அடக்குவது போன்று அமைந்த அற்புதமான சிற்ப வேலைபாடுகள் கொண்ட நடுகல் இது! 14 ஆம் நூற்றாண்டைச் சார்ந்த நடுகல் என்பதும் குறிப்பிடத்தக்கது.

பவள சங்கரி

சென்ற ஆண்டு 28 சணல் தொழிற்சாலைகள் மூடப்பட்டுள்ளன. இந்த ஆண்டு 48 ஆலைகள் மூடப்பட்டுள்ளன. விவசாயப் பொருட்களிலிருந்து உற்பத்திப்பொருள் தயாரிப்புகளை நிறுத்தினால் விவசாயிகளின் வாழ்வாதாரம் பாதிக்கும் நிலை ஏற்படும். மக்கிப்போகும் சணல் உற்பத்தியை நிறுத்திவிட்டு பெட்ரோலியப் பொருட்களான நெமிலிப் (பாலிதின் பைகள்) பைகளுக்கு அரசு ஆதரவு தெரிவித்து நீர் பிடிப்பு ஆதாரங்களில் பாதிப்பு உண்டாக்கிவிடுமோ என்று சமூக ஆர்வலர்களின் கவலைக்கு என்ன பதில் சொல்லப் போகிறார்கள்? விவசாய வேலை வாய்ப்புகளிலும் பாதிப்பு ஏற்படும் என்பதும் மறுக்கவியலாது. வங்க முதல்வர் சகோதரி மம்தா பானர்ஜி அவர்கள் இதில் தலையிட்டு தக்க நடவடிக்கைகள் எடுப்பார் என்று நம்புவோமாக!

பவள சங்கரி

சென்ற ஆண்டு நிதிநிலை அறிக்கையில் அறிவித்த திட்டத் தொகைகள் எத்தனை சதவிகிதம் பயன்படுத்தப்பட்டுள்ளன, மீதமுள்ள தொகைகள் இந்த ஆண்டுத் திட்டங்களோடு இணைக்கப்படுமா. மாதாந்திர வாரியாக இந்தத் திட்டங்களின் செயல்பாடுகள் குறித்த அறிக்கைகள் அரசு பெறுகிறதா? பல திட்டங்கள் (நிர்பயா திட்டம் போன்று) தொகை அறிவிக்கப்பட்டும் செயல்படுத்தப்படாமலே பல ஆண்டுகளாக தொடர்கிறது. இதற்கு ஏதாவது நடவடிக்கை அரசு எடுக்குமா. இதைப்பற்றி எந்தத் தகவலும் இந்த ஆண்டு நிதிநிலை அறிக்கையில் வெளியிடவில்லை என்பது வருத்தத்திற்குரியது.

பவள சங்கரி

மத்திய ரிசர்வ் வங்கியின் எச்சரிக்கை!. – BIT COIN – பிட் காயினை நம்பாதீர்கள். பிட் காயின் என்பது உரூபாயோ, டாலரோ அல்ல. இது ஆன்லைனில் பணப்பரிமாற்றத்திற்காக பயன்படுத்தக்கூடியது. இன்று பெரும்பாலானவர்கள் ஆன்லைனில் பொருட்கள் வாங்கிக்கொண்டிருக்கிறோம்பிட் காயினை எந்த நாடும், ரிசர்வ் வங்கியும் அங்கீகாரம் செய்யவில்லை. நம் ரிசர்வ் வங்கி இரண்டாவது முறையாக எச்சரிக்கை மணி ஒலித்துள்ளது. பல இலட்சம் கோடிகள் இழப்பதற்கு முன்பு விழித்துக்கொள்வது அவசியம்..

பவள சங்கரி

மாதச்செலவுத் திட்டம் போடும்போது செலவுக் கணக்கை மட்டும் எழுதாமல் எந்தப் பொருள் எங்கு எப்படி வாங்கப் போகிறோம் என்பதையும் திட்டமிடுதல் அவசியம். ஒரு பானை சோற்றுக்கு ஒரு சோறு பதம்.. பொதுவாக அனைவரும் பயன்படுத்தும் உளுந்து பற்றி பார்ப்போம். 1 கிலோ உளுந்தின் விற்பனை விலை  ₹ 96. பர்மா உளுந்து ₹ 76. மொத்த விற்பனை மண்டியில் வாங்கினால் 1 கிலோ உளுந்து ₹ 120 க்கு வாங்கலாம். பெரிய மால், டிபார்ட்மெண்ட் ஸ்டோர் என்று போனால் ₹ 140. சின்ன மளிகைக் கடையில் குறைந்தபட்சம் ₹ 150. அதுவும் நோட்டு போட்டு மாசக் கடனுக்கு வாங்குபவர்களுக்கு கடைக்காரர் போடுவதுதான் விலை.. ஆக கிட்டத்தட்ட இரண்டு பங்கு விலை கொடுத்து வாங்க வேண்டியுள்ளது. அரசு தலையிட்டு, தர நிர்ணயம், விலைக் கட்டுப்பாடு கொண்டுவந்தால் மத்தியதர மக்கள், ஏழை எளியவர்களுக்கு பயன்படும்.

பவள சங்கரி

பவள சங்கரி

உலகில் உள்ள சிறந்த 140 நகரங்களில் முதலாவதாக ஆற்றல்மிகு இயங்கு நிலை நகரங்களில் முதலாவதாக பெங்களூரூ நகரம் தேர்ந்தெடுக்கப்பட்டுள்ளது. அமெரிக்காவின் சிலிக்கான் வேலி நகரத்தை மூன்றாவது இடத்திற்குத் தள்ளிவிட்டு முதலாவது இடத்திற்கு வந்துள்ள பெங்களுரூ நகரத்திற்கு வாழ்த்துகள். தொழில் துறை வேலை வாய்ப்பு, ரியல் எஸ்டேட், போன்ற அனைத்துத் துறைகளின் அடிப்படையில் தேர்ந்தெடுக்கப்பட்டுள்ளது. இப்பட்டியலில் சென்னை 17 வது இடத்திலும், மும்பை, தில்லி 23, 25 வது இடத்திலும் உள்ளன. இந்த 140 நகரங்கள் ஆசிய பசிபிக் நாடுகளில் அமைந்துள்ளதும் குறிப்பிடத்தக்கது. இந்தப் பட்டியலில் சீனாவை இந்தியா பின் தள்ளியுள்ளது.

பவள சங்கரி

இந்தியாவில் மொத்த பெண்கள் தொகை 40 கோடி. இதில் 40% பெண்கள் கிராமப்பகுதிகளில் விவசாயம் சார்ந்த பணிகளையே மேற்கொண்டுள்ளனர். இவர்களுக்கென்று சொந்தமாக விவசாய நிலங்களும் கிடையாது. அதனால் இவர்களுக்கு விவசாயி என்ற அங்கீகாரமோ அல்லது அரசின் உதவிகளோ, மானியங்களோ கிடைப்பதில்லை.

பவள சங்கரி