கே. ரவி
கைகள் குவிக்கும்
பாடல் – எஸ்.பி. பாலசுப்பிரமணியம்
கைகள் குவிக்கும் போதெல்லாம் வடிவேல் – விழிக்
கமலம் திறக்கும் போதெல்லாம் கதிர்வேல்
நினைவுத் திரை விலகிப் புலனடங்கி
ஒரு முனைப்பில் மனம் திளைக்கும் தவம் கூர்வேல்
முளைத்த நிலவுப் புன்முறுவல் – ஆறு
முகங்கள் ஞானத் தீப்பொறிகள்
பனித்த சடையன் பக்கம் அமர்ந்து
பாடம் சொன்ன செவ்விதழ்கள் – கரை
மோதித் திரும்பும் கடலலைகள் – தினம்
ஓதித் துவளும் ப்ரணவத்தில் –
ஆடிக் களிக்கும் பாதங்கள் – நுரை
யாகித் தெறிக்கும் சதங்கைகள்
கந்தா கடம்பா கதிர்வேலா – எனக்
கதறி அழுதால் வழிபிறக்கும்
கருணை மனமே மயில்வாகனமாய்க்
கண்டால் ஞான விழிதிறக்கும்
குருவாய் நினைவில் வருவாய் முருகா
எனவே இதயம் குரல்கொடுக்கும்
குழந்தை வடிவம் குலுங்கிச் சிரிக்கும்
வேலாயுதமே நிழல்கொடுக்கும் – சக்தி
வேலாயுதமே நிழல்கொடுக்கும்.
கே.ரவி
Leave a Reply