வல்லமை

Month: March 2014

  • பயணத்தின் அடுத்த கட்டம

    வெங்கட் சாமிநாதன்

    இது நினைவுகளின் சுவட்டில் இரண்டாம் பாகம். ஹிராகுட் அணைக்கட்டில் கழிந்த ஆறுவருட வாழ்க்கை. 1950 மார்ச்சிலிருந்து 1956 டிஸம்பர் வரை. எப்படியோ இது எழுதப்பட்டுக்கொண்டு வருகிறது. இரண்டு அன்பர்களின் தூண்டுதல் என் சிந்தையில் விதைத்தது. எழுதி வருகிறேன். இருப்பினும், என் வாழ்க்கை அப்படி ஒன்றும் வீர தீரச் செயல்கள் நிறைந்ததல்ல. பின்  நிறைந்தது தான்  என்ன? ஒன்றுமில்லை தான்.  எந்த பெரிய வரலாற்றினதும் ஒரு சின்ன அங்கமாகக் கூட இருக்கும் தகுதி பெற்றதல்ல இந்த என் வாழ்க்கை எவரது சுய சரிதமும் பதிவு பெறும் தகுதி தான் என்ன? அவரவரே தீர்மானித்துக் கொள்ள வேண்டியதுதான்.

    உதாரணமாகச் சொல்லப் போனால், ராஜாஜி இந்த தேசத்தின் வரலாற்றில் கணிசமான பங்காற்றியவர். அவர் அது பற்றி எழுதியவரில்லை. தமிழ் சமூகத்தின் வரலாற்றையே கிளறி வைத்துவிட்டவர்கள் பெரியாரும் அண்ணாவும். இவர்களும் கூட தம் சுயசரிதத்தை எழுதியவர்கள் இல்லை. காந்தியும் நேருவும் எழுதத் தொடங்கி பாதியில் நிறுத்தி தேசத்தின்  வரலாறு ஆகி மறைந்துவிட்டார்கள். இப்படி இருக்க,  தமிழ் எழுத்துலகில் கூட ஒரு பொருட்டாக இல்லாத நான் என் வாழ்க்கையை எழுதப் புகுந்தது ஏதோ சுயபிரமையில் ஆழ்ந்து செறுக்கு மிகுந்த காரியமாகப் படும். அது ஒரு பார்வை. அத்தகைய செறுக்கு மிகுந்த எழுத்துக்கள்தாம் பெரும்பாலும் இங்கு தமிழ் சமூகத்தில் உண்டு. அவர்கள் தமக்கு உகந்த ஒரு சித்திரத்தை தாமே உருவாக்கித் தமிழ் சமூகத்துக்குத் தந்து செல்கிறார்கள். எது தன்னைப் பற்றி அறியப்பட வேண்டும் என்று தானே எழுதிக் குவித்துவிடும் காரியங்கள் நடக்கின்றன. பெரிய பெரிய காரியங்கள் படைத்தவர்கள், தேசத்தின் போக்கையே நிர்ணயித்தவர்கள் இருந்திருக்கிறார்கள். அவர்கள் அது பற்றி எழுதாவிட்டாலும் எழுதுபவர்கள் ஒரு மாதிரியான பக்தி நிறைந்தவர்கள். அவர்கள் எழுத்தில் வெட்டலும் கூட்டலும் நிறைந்திருக்கும். அவர்கள் வரம் வேண்டி நிற்பவர்கள். அல்லது வரங்கள் பல பெற்றதன் நன்றிக்கடன் செலுத்துபவர்கள். இன்றைய மாறிய சமூக அரசியல் சூழலில் இம்மாதிரி நிறைய நடந்தேறி வருகின்றன. பக்தியின் பிறழ்ச்சி.

    பக்தி இயக்கம் தோன்றியதே தமிழ் நாட்டில் தானே. உண்ணும் சோறும் பருகும் நீரும் தின்னும் வெத்திலையும் எல்லாம் கண்ணனாகவே கண்ட ஒரு ஆழ்வார், “சிக்கென உன்னைப் பிடித்தேன், இனி எங்கு எழுந்தருளுவதே”  என்று பரவசப்படும் சமயக்குரவர், “அப்பன் நீ, அம்மை நீ, அன்புடைய மாமனும் மாமியும் நீ” என்று இன்னும் ஒரு சமயக் குரவர், இவர்கள் எல்லாம் காட்டிய வழிதான். அது தான் இன்றும் தொடர்கிறது ஆனாலும் அது இத்தகைய அகோர ரூபத்தில் குணம் மாறி தாண்டவமாடமாடுவது எல்லாம் அர்த்தமிழந்து போனதையே சாட்சியப்படுத்துகின்றன. இந்த நூற்றாண்டு பக்தியின் சொரூபம் இது. அன்றைய பக்தியைச் சாடும் இன்றைய பக்தர்கள். இது ஒரு பக்கம்.

    நான் சொல்லவந்தது இன்னொரு பக்கம். அது ஒரு துருவ கோடி என்றால், இது மற்றொரு துருவ கோடி. க.நா.சு. சொல்வார்,  ”யாரும் சிறு கதை எழுத அவர்கள் வாழ்க்கையில் சில அனுபவங்கள் கட்டாயம் இருக்கும்,” என்று அவர் எழுதியிருக்கிறார். எங்கோ நினைவில்லை. இப்படி அவர் நிறைய ஆங்காங்கே உதிர்த்துச் செல்வார், வெகு சாதாரணமாக, அவையெல்லாம் பொருள் பொதிந்தவை.

    அதையே கொஞ்சம் நீட்டிச் சொல்வதென்றால், எல்லோருடைய வாழ்க்கையிலும், எந்த சாதாரணனுடைய வாழ்க்கையிலும் தான், சொல்வதற்கு, என்று நிறையவே இருக்கும். அது மற்றவர்களிடமிருந்து வேறுபட்டுத் தனித்வம் மிக்கதாகவும் இருக்கும். பிரபலங்களின் அரசியல் வாழ்க்கையை விட ஒரு சாதாரணனின் வாழ்கையில் காணும் மனித உறவுகள், அதன் நெகிழ்ச்சிகள் உண்மையானவை, உன்னதமானவை. வாழ்க்கையை இனிமையாக்குபவை.

    இது எழுதத் தொடங்கிய பின் தான் கடந்த வாழ்க்கையை ஒவ்வொன்றாக நினைவு கொள்ளத் தொடங்கிய பின் தான் தெரியத் தொடங்கியது.  என்ன தான் இருக்கிறது எழுத?, அப்படி என்ன ஒரு அவதார வாழ்க்கை வாழ்ந்து விட்டோம்?, என்று தான் முதலில் நினைத்தேன். ஆனால் தம்மை அவதார புருஷர்களாக எண்ணி தாமே எழுதியும், எழுதுவித்தும் நடமாடுபவர் களிடையே வாழும் காலத்தில், அகல் பதிப்பக பஷீரும், தமிழ் சிஃபி அண்ணா கண்ணனும் போயும் போயும் என்னை எழுதத் தூண்டியதும் சரி, மேடை கிடைக்கிறது, கேட்கிறார்கள் எழுதுவோமே, என்னதான் சாதாரணமான வாழ்க்கையே ஆன போதிலும், க.நா.சு. சொன்னது போல, யாருடைய வாழ்க்கையில் எழுதுவதற்கு விஷயங்கள், மனிதர்கள், சம்பவங்கள் இருக்கத் தான் செய்கின்றன என்று தெரிந்தது. ஏதோ எந்த முனைப்பும் இன்றி எழுதிச் சென்றேன். நடந்ததை நினைவில் கொண்டு நினைவில் வந்தவாறே. இயல்பாக எழுதிச் சென்றதில் சொல்ல கொஞ்சம் இருந்திருக்கிறது. அதிலிருந்து தனித்து பின் அட்டையில் பிரதானப்படுத்திச் சொல்ல என்று பஷீரை எடுக்கத் தூண்டியிருக்கிறது. அதுவே ஒரு விதத்தில் இந்த சுய வரலாற்றீன் ஆதார சுருதி என்றும் சொல்லலாம்..

    ”என் வாழ்க்கையில் அப்படி எழுத ஒன்றுமே இல்லை. எழுத்துலகிலும் வெளியிலும் சின உன்னதமான மனிதர்களைச் சந்தித்திருக்கிறேன். அவர்களது சில குறைகளையும் பலவீனங்களையும் மீறி. அவர்கள் உன்னதமான மனிதர்கள் தான். சில கடைத்தரமான இழிதகைகளையும் சந்தித்திருக்கிறேன். எழுத்துலகிலும் வெளியிலும், அவர்களது சில பலங்களையும் மீறி, அவர்கள் இழிந்த மனிதர்கள் தான்.

    எவ்வளவோ மாற்றங்கள், வாழ்க்கை நியதிகளில், கலாசாரத்தில், வாழ்க்கை மதிப்புகளில், அவற்றை நினைத்துப் பார்த்தால் திகைப்பாக இருக்கும்.”

    முதல் பாகம் எழுதத் தொடங்கும் போதே இதெல்லாம் தானாகவே எழுதிச் சென்றது என்று தான் சொல்ல வேண்டும். முதல் சில பக்கங்களிலேயே இது திட்டமிடாமலேயே தன் இயல்பில் தானாகவே எழுதிக்கொண்டுவிட்டது என்று சொல்லத் தோன்றுகிறது. நினைவில் வந்ததையெல்லாம் எழுதுகிறோம். நினைவுக்கு வந்த ஒழுங்கில், வரிசையில். முதல் பாகம் அச்சிட்டு வெளிவந்ததைப் பார்த்தால், அட்டையின் பின் பக்கத்தில் இந்த வாசகங்கள். தன்னையே எழுதிக்கொண்டது என்று சொல்லாமல் வேறு எப்படிச் சொல்வது?

    “உங்கள் சுய சரிதையை எழுதுங்கள்” என்று முதலில் அண்ணாகண்ணனும் பஷீரும் சொன்ன போது கொஞ்சம் அலட்சியமாகவே, என்ன இருக்கு எழுத? என்று நினைத்த போதிலும், பின்னர் எழுத தொடங்கியதும், அவ்வப்போது நினைவில் எழுந்ததை எழுதி வரும்போது, எந்த கட்டத்திலும் எந்த வயதிலும், எந்த இடத்திலும் வாழ்க்கை எனக்கு  வாழத் தகுதியான ஒன்றாகவே இருந்ததாகதான் எண்ணுகிறேன்.. அந்த அனுபவங்கள் எதாக இருந்தாலும் ஏமாற்றமோ, ஆச்சரியமோ, துன்பமோ சந்தோஷமோ எல்லாமே, அததற்குரிய மன நெகிழ்வைத் தருவனவாகவே இருந்தன. பாட்டியின் அன்பும், மாமாவின் கரிசனமும், உடலையும் மனத்தையும் வாட்டி வருத்தும் வறுமையையும் மீறி. எந்த பிரதி பலனையும் எதிர்பாராது, உறவுகளுடன் கொண்ட தன் சக்திக்கு மீறிய பாசம்

    இந்த பாசமும், உறவுகளின் நெருக்கமும், தான் இன்னமும் தொடர்கின்றன. அது பாட்டியோ மாமாவோ இல்லாமல் இருக்கலாம் அது 1935 தொடக்கம். அன்று தொடங்கிய மனதுக்கு இதமும் இனிமையுமான நினைவுகள் ஹிராகுட் என்று, ராஜா, மிருணால் காந்தி சக்கரவர்த்தி, அவன் தாயும் தங்கைகளும், ரோத்தக்கிலிருந்து வீட்டை விட்டும் அண்ணனைப் பார்க்க ரயிலேறி நாலைந்து இடங்களில் வண்டி மாறி, கிடைத்ததைச் சாப்பிட்டு புர்லா வந்து கதவைத் தட்டிய அந்தச் சிறுமி, சோப்ராவின் தங்கை, சீனிவாசன், என்று நீளும். எத்தனை சம்பவங்கள், விஜயலட்சுமி, அபிஜீத் சாக்ஸேனா, நீனா, வையெல்லாம் கடந்து தஞ்சை பிரகாஷ் வரை நீளும். ஜெயந்தன் வரைக்கும் கூடத்தான்.எனக்குத் தெரிந்தவரை எந்த கழகத்துடனும் அனுதாபம் இருந்ததாகத் தெரியவில்லை. ஆனால்,. பெரியாரிடம் அவர் கொண்டிருந்த ஈடுபாட்டை பக்தி என்றே சொல்லவேண்டும். . ஆனால் என்னுடனான அவரது சினேக பந்தத்திற்கு அதெல்லாம் ஒரு தடையாக இருந்ததில்லை. மறந்து விடுவார். அது பாட்டுக்கு அது. இது பாட்டுக்கு இது என்கிறமாதிரி. .இவ்வளவும் ஒருவனை வெறுப்பதற்கு பாப்பான் என்ற விவரம் போதும் என்னும் இரண்டு தலைமுறை தமிழகச் சமூகச் சூழலில்.அவர் சிக்கியதில்லை. ஜெயந்தனின் இந்த சினேகம் மிகப் பெரிய விஷயம் . அந்த வரலாறு பூராவும் சொல்லியாக வேண்டும். அந்த சினேகங்கள், நெகிழ்ச்சி தரும் அனுபவங்கள் எல்லாம் திரும்ப என் நினைவுகளில் ஓடும். அது ஒரு சுகமான அனுபவம். சாதாரண என் வாழ்க்கைக்கு இனிமை தந்தவர்கள்.  என்னால் ஆவதென்ன? இவர்கள் என்னிடம் எதையும் எதிர்பார்க்கவில்லை. பம்பாயிலிருந்து தில்லி வரும் ஃப்ராண்டியர் மெயிலில குளிரில் படுத்து உறக்கத்திலிருக்கும் எனக்கு எதிர் சீட்டில் இருக்கும் யாரோ அன்னிய பெண்மணி தன்னிடமிருந்த ஒரு போர்வையை தூக்கத்திலிருந்த எனக்குப் போர்த்தியது என்ன எதிர்பார்த்து?  ராஜஸ்தானிலிருந்து வந்து ஆக்ராவில் வண்டியேறிய சென்னைக்குப் போகும் ஒரு குடும்பம், அவர்களில் ஒரு மூத்த ஸ்திரீ, ஆச்சரியத்தில்  என்னைப் பார்த்து  சந்தோஷத்துடன் முகம் மலர்ந்து ”அட நீங்களா?” என்று தான் கூச்சலே இட்டாள். அவளை பத்து நாட்களுக்கு முன் அதே வண்டியில் சென்னையிலிருந்து தில்லி செல்லும் பயணத்தில் பார்த்தேன். அப்போது நட்பு பாராட்டி, என்னோடு தம் உணவைப் பகிர்ந்து கொண்ட குடும்பத்தினள் அவள். என்னிடமிருந்து அவள் பெற்றது எதுவும் இல்லை. மீண்டும் சந்தித்த சந்தோஷத்தில் அவள் முகம் மலர்ந்தது, எதை எதிர்பார்த்து?

    இதெல்லாம் தான் என் வாழ்க்கை. அதற்கு அர்த்தம் தரும் கணங்கள். இந்த பழைய நினைவுகள் அவ்வப்போது மனதை வருடிச் செல்லும் போது மனத்திரையில் காட்சி தரும்போது ஒரு மெல்லிய இசை, மந்திர ஸ்தாயியில்,விளம்ப காலத்தில் இழையோடும்.  இந்த நினைவுகளை காற்றோடு கரைந்து விடாது நான் பதிவு செய்வது  இந்த இதமான வருடல்களை இந்த எழுத்து இருக்கும் வரையாவது வாழ வைக்கும் என்  ஆசையில் தான்.

    வைத்திய நாத சிவனும், தீக்ஷிதரும், தியாகய்யரும் பாடிக் கேட்கும் அனுபவம் எப்படி இருந்திருக்கும்? யாருக்குத் தெரியும்? மைலாப்பூர்  கௌரி அம்மாள் தன் யௌவன காலத்தில் கோயில் உற்சவத்தில்  நடனமாடும் காட்சி எப்படி இருந்திருக்கும்? என்று நினைத்துப் பார்ப்பதுண்டு காற்றில் கரைந்தது கரைந்தது தானே. என் நினைவுகளின் இனிமையை, என் அனுபவங்களின் சிலிர்ப்பை எழுதியாவது வைக்கலாமே. எனக்கு இவற்றை அளித்தவர்களுக்கு நான் காட்டும் நன்றி உணர்வு தான் இது.

    அன்போடு பழகிய மூத்த உறவினர்களின் புகைப்படங்களைப் பார்ப்பது போல. 1947 மதுரை கிழக்குச் சித்திரை வீதியின் மனித நடமாட்டத்தை புகைப்படத்தில் பார்ப்பது போல. அதைப் பார்த்ததும் மனதில் ஒரு கிளர்ச்சி. ஒரு சோக உணர்வின் இழையோடுமில்லையா? கிட்டப்பாவின் “எவரனி” டேப்பில் கேட்பது போல.

    எழுத்தில் நான் சொல்ல முடியும். ஆனால் அந்த எழுத்து அந்த நினைவுகளின் போது என் மனத்திரையில் ஓடும் காட்சிகளையும் உணர்வுகளையும் கொண்டு வருமா? அவை எனக்குள் சிறை பட்டது. அந்த புகைப்படங்கள் இருந்தால் அந்தப் பழைய வண்டியூர் தெப்பக்குளத்தைப் பார்ப்பது போல. இன்று அது உயிர் இழந்த, இழக்க வைக்கப்பட்ட ஒன்று. நினைவுகளின் சுவட்டில் முதல் பாகம் வெளியிடப்பட்ட போதாவது, உடையாளூரின் கோவில் தெருக்கள், என் மாமா, பெற்றோர் புகைப் படங்கள் கிடைத்தன. ஆனால் ஹிராகுட் வாழ்க்கையைக் காட்சிப் படுத்த,, உறவாடிய நண்பர்கள் யாருடைய புகைப்படங்களும் இல்லை. அந்நாட்களில் இப்போது போல, புகைப் படம் என்பது எல்லோருக்கும் எப்போதும் சுலபமாக கைவசப்படும் ஒன்றலல. 1952-53 ல் புர்லா நண்பர்கள் வெளியூரில் சுற்றிய போது எடுத்த படங்கள் இருந்தன. எங்கள் அலுவலக அதிகாரி லாமெக் பிலாய்க்கு மாற்றலாகிச் சென்ற போது எடுத்த க்ரூப் போட்டோ எனக்கு நினைவிலிருக்கிறது. அதில் மிருணால் இருப்பான். அது எதுவும் எங்கே போயிற்றோ. எனக்கு இவையெல்லாம் மிகப் பெரிய இழப்புக்கள். எண்ணும் போதே ஒரு சோகம் கப்பும் இழப்புக்கள்.

    இருப்பது மெல்ல மெல்ல மங்கி மறைந்து வரும் நினைவுகள். அந்நினைவுகள் தரும் இப்பதிவுகள். இவை ஓரளவுக்கு அந்நாளைய வாழ்க்கையை, மனிதர்களை, பேணிய வாழ்க்கை மதிப்புகளை, ஒரு வேளை சொல்லலாம். ஆனால் வாழ்ந்த உணர்வுகள். மனத்திலோடும் காட்சிகள்…..? அதற்கு ஒன்றும் செய்ய முடியாது. இருப்பினும் இந்த நினைவுகள் வல்லமை இணையத்தில் அவ்வப்போது எழுதப்பட்டு வரும் போது, நான் பேசும் ஹிராகுட், புர்லா பற்றியும் அந்நாளில் பேசப்பட்ட விஷயங்கள் பற்றியும் அறிந்த அன்பர் எங்கிருந்தோ வந்து அவ்வப்போது தன் மனப்பதிவுகளையும் சொல்லி வந்தார். அவை எனக்கு அளித்த சந்தோஷங்கள், எதிர்பாராது வந்தவை தான். இதோ அதில் ஒன்று.

    இன்னம்பூரான்
    08 10 2011

    இன்னம்பூரான் wrote on 8 October, 2011, 19:54

    கிட்டத்தட்ட 16 மாதங்களுக்கு முன் இது விஷயமாக, நான் கட்டுரை ஆசிரியருக்கு, வேறு ஒரு தளத்தில் எழுதியது:
    *
    ‘    அன்புள்ள திரு.வெ.சா. அவர்களுக்கு,
    அன்றொரு நாள் ஒரிஸ்ஸா பாலசுப்ரமண்யம் வந்திருந்தார். மகிழ்ச்சியுடன் இருவரும் ஒரிஸ்ஸாவின் புகழ் பாடிக்கொண்டிருந்தோம். இயற்கையின் மடியில் தூங்கி வடியும் அழகிய  பெண்குழந்தையல்லவா, அவள் ?  நான் 80-களில் ஒரிஸ்ஸாவில் பணி புரிந்தேன். ஸீதாகாந்த் மஹோபாத்ரா  அண்டைவீடு.  நினைத்தால் வரத்து போக்கு.  திரு.வெங்கட் ராமன்,  திருமதி .லீலா  வெங்கட் ராமன் ( அவர் தந்தை திரு கிருஷ்ணசாமியும்   நண்பர், ஆசான்), சுந்தரராஜன் (ஐஏஎஸ்), ஹபீப்அஹ்மத்   மீனாட்டி மிஸ்ரா [கலை உணர்வு: என்னுடன்  தமிழில் பேசினார், பந்தநல்லூரில்  குருகுலவாசம் பற்றி சொன்னார்.  கண்வெட்டு எப்படி என்று கலைஉணர்வுடன் அடித்துக் காண்பித்து என்னையும் என் மனைவியையும் அசத்தினார்.] ஆகியோர்  நட்பு.  கொரபேட் குக்கிராமத்திலிருந்து மயூர்பஞ்ச் இடிந்த அரண்மனைவரை அத்துபடி. சிமிலிபால் கோர் ஏரியாவில் அசந்தர்ப்பமான களிறு நேர்காணல், கைரி புலிக்குட்டியுடன் ஓடி விளையாட்டு, பீத்தர் கணிகா ராஜநாகம், முதலை.சம்பல்பூர் கரடி, பூரி ஜெகன்னாத் நபகளேபரில் குஷி, சாக்ஷிகோபாலில்தாருப்ரம்மன் தரிசனம். ஃபூல்பானி முதுகுடி விருந்து. சொல்லி மாளாது .போங்கள். சொல்வதில்  எனக்கு சந்தோஷம்.  ஒரு காசு கொடுத்து பாடச்சொன்னா, பத்துக்காசு கொடுத்து நிறுத்தச் சொல்லணும். நாடோடி சொன்னமாதிரி, ‘இதுவும்ஒரு ப்ருகிருதி’. கேட்பதில் மகிழ்ச்சி என்றீர்கள். அதான்.
    நீங்கள் ஒரிஸ்ஸாவில் இருந்தது 50களில்? அப்போது நான் சென்னைக்கேணியில் தவளை.


    இன்னம்பூர் பாடல் பெற்ற ஸ்தலம்; கஜப்ரிஷ்ட விமானம்    பெருமாள்  ஶ்ரீனிவாசர் நாவல்பாக்கத்தில் புலன் பெயர்ந்து  இருந்தாராம், சிலகாலம். கும்பகோணத்திலிருந்து  ஸ்வாமி மலை ரோட்டில் 3 மைல்கல், தள்ளி. நம்மூர்  இல்லை. நான் அந்த ஊர்   என்  இயர்பெயர்: ஸெளந்தரராஜன்.  ஒரு வார்த்தைகேட்டா, பத்து எழுதறேன்   சுருக்கி எழுதறான் ன்னு பேரு வேறே.
    நான் கேள்வி  கேட்கவே  இல்லையே. ‘உருப்படவைப்பது சாத்தியமே’ என்று  காமன்பாட்டு பாடினேன்.  தமிழ் நாடு அந்த வகையில் இயங்காததால், பொருள் வளம், கல்வி,  திறன்,  ஆகியவற்றில்  குறைந்த அளவே  உருப்பட்டிருக்கிறது.  மற்றவர்கள் எழுதிய  கருத்துக்களையும் படித்தேன்   உங்கள் கருத்துக்கள்  தெளிவாக இருந்தன, எனக்கு. என் ஆதங்கம் என்ன எனில், கலை உணர்வு அனிச்சமலர் போல.தொட்டாச்சிணுங்கி. சொரணை என்று ஒரு வார்த்தை சொன்னீர்கள். It is morethan aesthetics. It is more than sensitivity. It carries within itselfthe Saraswathi of ப்ரஞ்ஞை. நானும் மற்ற நாடுகளிலும், ஏன் மும்பை, டில்லி, கொல்கத்தாவில் காணப்படும் கலை ப்ரஞ்ஞையை  சென்னையில்  பார்க்க இயலவில்லை.  குறிப்பாக,  இங்கிலாந்து  கலைத்துறை விஷயங்கள்  பற்றி, குடும்ப ஈடுபாட்டினால்  தெரியும்.  நமது  பிரச்னை  இது தான். கலையும்,  அரசியலுக்கும், வணிகத்துக்கும் கைப்பொம்மையாக  இயங்கத் தொடங்கிவிட்டது.  ஒரு சின்ன உதாரணம்:  சாலியமங்கலத்தில் பாகவதமேளா நடக்கிறது.  உலகளவில்  ஒரளவு புகழப்படுகிறது.  அரசு இனி பார்க்காதது போல் பாசாங்கு  செய்யமுடியாது.  விருது  கொடுத்தார்கள்.  யாருக்கு?  நாதஸ்வர  வித்வானுக்கு மட்டும்!  அவர் கம்பீர நாட்டை ஜோராத்தான் வாசித்தார். அதுவா பாயிண்ட்?  ஏதோ பாகவத மேளா நிழலாட்டம் போல. இங்கு  சிலப்பதிகாரம்  எப்படி தழைக்கும்?

    இதுவே ஜாஸ்தி, மன்னிக்கணும்.


    அன்புடன்,
    *
    இன்னம்பூரான்
    08 10 2011

    எங்காவது ஒரு ஸஹ்ருதயர் எனக்குக் கிடைக்கமாட்டாரா என்ன? இதோ ஒருவர் இன்னம்பூரார்/

    வெங்கட் சாமிநாதன்/14.2.2014

    Share

  • இந்த வார வல்லமையாளர்!

    திவாகர்

    images (4)இந்த வார வல்லமையாளராக டாக்டர் நா. கணேசனை விருது வாங்க அழைத்திருப்பதற்கு இரண்டு விசேஷ காரணங்கள் உண்டு. ஒன்று எனக்கு இதயத்துக்கு நெருக்கமான மகாகவி பாரதி, இரண்டு ஆந்திரத்தில் நான் மிகவும் மதித்துப் போற்றும் கந்துகூரி வீரேசலிங்கம் பந்துலு. இருவருமே சமகாலத்தவர், அதிலும் வீரேசலிங்கம் பந்துலு பாரதியை விட வயதில் மிக மூத்தவர் கூட (முப்பது வருடங்களுக்கும் மேலாக)

    ராஜமுந்திரியைச் சேர்ந்த வீரேசலிங்கம் பந்துலு வாழ்ந்த காலத்தில் ஆந்திராவின் நிலையைப் பார்க்கவேண்டும். எங்கும் ஏற்றத் தாழ்வுகள் ஏராளமாக மலிந்த காலம், அதை அப்படியே வளர்த்து தமக்குச் சாதகமாக்கிக்கொண்ட ஜமீன்கள், அவர்களுக்குத் துணை நின்ற ஆங்கிலேயர், முரட்டுத்தனமான மூட நம்பிக்கைகள், ஒரு பெண் விதவையென்றால் அதிலும் நோய்கள் மலிந்த அக்காலத்தில் இளவயதில் மரணம் காணும் ஆண்களின் மனைவிகளுக்கு இழைக்கப்படும் கொடுமைகள், விதவைப்பெண்கள் தாசி குலங்களில் தள்ளப்பட்டு இழிநிலைக்கு ஆளான காலகட்டம், கல்வியறிவே தெலுங்கு மாநிலத்தைத் தாண்டினால்தான் கிடைக்கும் என்ற நிலைமை, மேல்தட்டு வர்க்க அராஜகம் என்பது கட்டவிழ்ந்து கிடந்த நிலை, இவையெல்லாம் இந்த ஆந்திரத்தில் நூறு ஆண்டுகளுக்கு முன்னர் நடந்தவைகளா என்பதை இப்போது நினைத்தாலும் பிரமிப்பாகவும், பரிதாபமாகவும் இருக்கிறதுதான்.

    வீரேசலிங்கம் பந்துலு இந்த அநியாயங்களை தைரியமாக எதிர்த்தவர். பெண்கள் முன்னேற வழி வகுத்தவர். தாய்க்குலம் முன்னேறவில்லையென்றால் இந்த உலகமே தேவையில்லை என்று தைரியமாக எழுதியவர். இவர்தாம் தெலுங்கில் முதன்முதலாக நாவல் எழுதியவர். நூறு புத்தகங்களுக்கும் மேலாக எழுதியவர். அத்தனை புத்தகங்களுமே சீர்திருத்தக் கருத்தைத்தான் சொல்லும். விதவா விவாகத்தில் முன் நின்றவர். வீதிநாடகங்கள் மூலமாக விதவைப்பெண்களை தைரியப்படுத்தி மறுவிவாகத்துக்கு அவர்களைத் தயார்படுத்திய அதிசயத்தை இப்போதும் கூட ஆந்திர இலக்கிய உலகம் இவரைப் போற்றிக் கொண்டே இருக்கிறது.

    வீரேசலிங்கம் பந்துலு நம் மகாகவியின் இனிய நண்பர். வீரேசலிங்கம் பந்துலுவின் இந்த ஆந்திர புரட்சியும் சமூக சீர்திருத்தமும் உலகம் அறிய வேண்டுமென்ற கருத்தில் அவரைக் கதாநாயகனாகக் கொண்டு தமிழில் ‘சந்திரிகையின் கதை’ என்ற கதையை எழுதினார் பாரதி. கதையில் வீரேசலிங்கம் பந்துலுவைத் தவிர ஏனைய பாத்திரங்கள் கற்பனை என்றாலும் பாரதிக்கு மிகவும் பிடித்த ‘பெண் விடுதலை; என்ற நோக்கம் இங்கு மிக நன்றாகக் கையாளப்படுத்தப்பட்டுள்ளது.

    திரு நா. கணேசன் இந்த வாரம் மறைந்த ரா. பத்மநாபனின் எழுத்துக்களிலிருந்து சில வரிகள் வீரேசலிங்கம் பந்துலுவைப் பற்றி எடுத்துப் பதித்துள்ளார். திரு கணேசனுக்கு ஒரு நன்றியுடன் அந்த வரிகளை சற்று ஒரு முறை பார்ப்போம்.

    Bharati strongly believed in social reform, and therefore he had great admiration for Kandukuri Veeresalingam Pantulu (1848-1919). Veeresalingam was 34 years senior to Bharati, and he was a close friend and co-worker of Bharati’s first editor, G. Subramania Iyer Veeresalingam was a great social reformer of the times, and Bharati has brought in both Veeresalingam and G. Subramania Iyer as real life characters in his social novel (incomplete) titled “Chandrikaiyin Kathai” (The Story of Chandrika).

    The nove1 starts with the widowing of Visalakshi, paternal aunt of Chandrika, left helpless. Visalakshi goes to Madras with the orphaned Chandrika, to seek the help of G. Subramania Iyer to get her a husband. Iyer sends her to Veeresalingam with a letter.

    Visalakshi goes to Rajahmundry to be disappointed. She learns that Veeresalingam has gone to Madras and is staying at a house in Egmore. She comes to Madras and meets Pantulu, says Bharati:

    “… Inside, he was alone, seated in a deck chair and writing a book.

    “Visalakshi saluted him and gave him the letter from G. Subramania Iyer. Veeresalingam asked her to sit in the chair opposite him. She sat there with Chandrika in her lap, Veeresalingam Pantulu read the letter in full, and then asked her in Tamil, ‘What day is today?’ She replied in Telugu, ‘It is Budhavaaramu.’

    “Meeku Telugu vachchunaa?’ (Do you know Te1ugu?) Pantulu asked.

    “Avunu, chaala baaga vachchunu’ (Yes, I know it very well.) said Visahkshi.”

    Husband-Wife Team

    Bharati then goes on to narrate how Pantulu’s wife came in while he was querying Visalakshi about her attainments. All this is portrayed very naturally and the picture is effective.

    When Mrs. Pantulu learns of the reason for Visalakshi’s visit, she recalls that Gopala Iyengar, Deputy Collector in Tanjore, who had expressed an interest in marrying a widow, had called, and she thought this girl would suit him. There is a discussion between husband and wife on the matter. Visalakshi assures Veeresalingam Pantulu that she is willing to wed Gopala Iyengar, although he drinks, hoping to reform him after marriage.

    At this juncture Gopala Iyengar himself comes form downstairs. As he is fond of a good dinner, Pantulu asks his wife and Visalakshi to go down and prepare a sumptuous feast. After the feast, Pantulubroaches the subject with Iyengar and he readily agrees under the impression that the servant-maid, who was having the child Chandrika while Mrs. Pantulu and Visalakshi were inside the kitchen, was the prospective girl mentioned by Pantulu. Later when he sees Visalakshi, he says no and insists on his original choice. Despite, difficulties, Pantulu is able to arrange the inter-caste marriage of Gopala Iyengar and the Naidu servant-maid.

    As for Visalakshi, requesting Pantulu to arrange a husband for her somewhere else, she goes to stay with some relatives of hers. After some painful incidents she meets a youthful Sannyasi. They fall in love mutually. The young man renounces Sannyasa and marries the widow according to Brahmo rites, with the blessings of Veeresalingam Pantulu.

    சரித்திரத்தின் பொன்னேடுகளிலிருந்து சில தங்கங்களை நமக்கு அளித்த டாக்டர் . திரு நா. கணேசன் அவர்களை இந்த வார வல்லமையாளராகத் தேர்ந்தெடுக்கிறோம். அவருக்கு நம் நன்றிகளுடன் வாழ்த்துகளும்..

    கடைசி பாரா: திரு கிரேஸி மோகனின் திருமால் திருப்புகழ்

    “அகந்தை வேரறுத்தவ் விழந்த வான்கிடைத்திங்

    கிருந்த வாறிருக்க -ரமணேசர் 
    புகன்ற வாசகத்தை உணர்ந்து மாதவத்தை 
    நெருங்க ஞானவித்தை -அருள்வாயே 
    அகன்ற சாகரத்தில் அனந்தன் மேலிருக்கை
    அமைந்த யோகநித்ரை, -வனமாலி 
    சுகந்தம் வீசலக்மி பதங்கள் மேவநித்ய 
    இனங்கள் சூரிநிற்க -பயில்வோனே 
    தகுந்த வாறளிப்பு ,சினந்த மாமனுக்கு 
    இகழ்ந்த பாலனுக்கு -முறைவாசல்,
    தினங்கள் போயெமர்க்கை விழுந்து சாவதற்குள் 
    முகுந்த வாவகத்துள் -குடியேற 
    புகுந்த ஆழிவிட்டு பருந்து வாகனத்தில் 
    பறந்து வாயெனக்கு -துணையாக 
    உயர்ந்த கோபுரத்துள் கிடந்து வாழவைக்கும் 
    குடந்தை மாநிலத்து -பெருமாளே”

    அன்பு  நண்பர்களே,

    வணக்கம். கடந்த 23 – 29 ஏப்ரல், 2011 முதல் வல்லமையாளர் விருது  வழங்கி வருவது அனைவரும் அறிந்ததே. இந்த வாரம்  நூறாவது வாரம் என்பதை மகிழ்ச்சியுடன் தெரிவித்துக் கொள்கிறோம். இந்த 100 வாரங்களில் சுமார் 90 வாரங்கள் திரு திவாகர் அவர்கள் அந்த வார வல்லமையாளர்களைத் தேர்ந்தெடுத்து அவர்களின் தனித்த ஆற்றலை பலரும் அறியும் வகையிலும், மற்றவர்களுக்கும் அது ஊக்கம் கொடுக்கும் வகையிலும் விருது வழங்கி இப்பணியை சிறப்பாக நிறைவேற்றியுள்ளார். அவருக்கு நம் வல்லமையின் சார்பில் மனமார்ந்த பாராட்டுகளும், நன்றியும் தெரிவித்துக்கொள்கிறோம். இடையில் அவருக்கு முடியாத சில தருணங்களில் திரு இன்னம்பூரன், பேரா. திரு நாகராசன் மற்றும் திரு. பெண்ணேஸ்வரன் ஆகியோரும் இப்பணியை  மேற்கொண்டனர். வல்லமையின் வளர்ச்சியில் பங்குபெறும் அனைவருக்கும் நம் பாராட்டுகளும், நன்றியும் உரித்தாகுக.  வருகின்ற வாரங்களில் திருமதி தேமொழி இப்பணியின்  பொறுப்பேற்றுள்ளார் என்பதையும் மகிழ்ச்சியுடன் தெரிவித்துக்கொள்கிறோம். அவருக்கும் நம் வாழ்த்துகள். அனைவரும் அந்தந்த வார வல்லமையாளர்களுக்கான தங்கள் பரிந்துரைகளை vallamaieditor@gmail.com என்ற முகவரிக்கு வழங்கவும் வேண்டுகிறோம்.  நன்றி.

    அன்புடன்

    பவள சங்கரி

    Share

  • நான் அறிந்த சிலம்பு – 113 (24.03.14)

    மலர் சபா

    மதுரைக் காண்டம் – 11. காடு காண் காதை

    உறையூரில் தங்கிய கவுந்தி முதலிய மூவரும் வைகறையில் புறப்பட்டுத் தென் திசை நோக்கிச் செல்லுகின்ற வழியில் உதயகாலத்தில் ஓர் இள மரக் காவில் புகுதல்

    rose-garden-3-bo-li

    மூன்று திங்களை அடுக்கி வைத்தது போல் விளங்கிய
    முப்பெரும் குடையின் கீழ்
    மாலையாக மலர்ந்து தொங்கும்
    அசோக மரத்தின் அடர்ந்த நிழலின்கண்
    சிவந்த கதிர்களையுடைய
    கதிரவனின் ஒளி போல் விளங்கும்
    அருகதேவன் எழுந்திருளியிருக்கிறான்.
    அவன் தனக்கென்று ஓர் ஆதி இல்லாதவன்.

    அவனை அம்மூவரும் வணங்கித் தொழுதனர்.
    பின் அங்கே தவப்பள்ளியில் தங்கியிருந்த
    முனிவர் அனைவர்க்கும்
    முன்னர் ஆற்றிடைக் குறையாகிய
    திருவரங்கத்துச் சோலையில்
    சாரணர் தமக்கு அருளி உரைத்த
    அற மொழிகளைக் கவுந்தியடிகள் எடுத்துரைத்தார்.

    அன்றிரவு அருகதேவன் தங்கியிருந்த
    அந்த இடத்தில் தங்கியிருந்து,
    பின் வைகைறையில் தென் திசை செல்ல விரும்பி
    உறையூரை விட்டு நீங்கி நடக்கலாயினர்.

    ஞாயிறு கிழக்குத்திசையில் இருந்து
    ஒளி பர்ப்பி எழுகின்ற வேளை;
    நீர்நிறைந்த வளம் பொருந்திய
    வயல்களும் குளங்களும்
    பொலிவுற்று விளங்கும்
    அழகு பெற்ற பூஞ்சோலை வழியே சென்றனர்.
    வழிப்போக்கர்கள் தங்கும் மண்டபத்தை அடைந்தனர்.

    அடிப்படையாக அமைந்த சிலப்பதிகாரத்தின் வரிகள் இங்கே:  01 – 14

     
    படத்திற்கு நன்றி:
    http://www.mumsema.com/misafir-sorulari/154161-bahar-mevsimi-gul-bahcesi.html
    Share

  • சிறுகை அளாவிய கூழ் – 12

    இவள் பாரதி

    அறையெனும் பூமிப்பந்தில் உறங்கும்

    குட்டிச் சூரியனே

    நீ விழித்ததும்

    விடிகிறதெனக்கு

    ————————–

    குழந்தைக்கு

    ஊர்கண் பட்டிருக்கும்

    சுத்திப் போடு என்கிறார்கள்

    உன்னை அணுஅணுவாய் ரசிக்கும்

    என் கண்ணும்பட்டிருக்கும்

    என் காலடிமண்ணை

    எடுத்துத்தர சம்மதம்தான்

     

    இந்த சிமென்ட் பூச்சுத் தரைகளில்

    எப்படி எடுப்பது நகத்தளவு மண்ணை

    தெருமுனைக்குச் சென்று

    தானே வளர்ந்திருந்த செடிக்கருகிலிருந்து

    சிறிதுமண்ணை எடுத்து வந்து

    அதன்மீது நடந்து தந்துவிட்டேன் உன் பாட்டியிடம்

    இனி உனக்குக் காய்ச்சல் அடிக்காது கண்ணே..

     

    ————-

     

    Share

  • சிராய்ப்பு

    (குறுங்கதை)

    அது ஒரு குறுகிய தெரு. அந்தத் தெருவில் வசிக்கும் மழலைகள் சில அந்த இளம்பச்சை நிற வண்ணம் தீட்டப்பட்ட வீட்டு வாசலில் விளையாடிக்கொண்டிருந்தன.

    அந்த வீட்டிற்குள் எப்போதும் போல் இணையவெளியில் உலவிக் கொண்டிருந்தான் கார்த்திகேயன் – வாசலில் விளையாடிக்கொண்டிருந்த குழந்தைகளில் ஒன்றின் தகப்பன். அந்தக் குழந்தைக்குக் கூட ஏதோ ‘ஷா’வில் முடியும் பெயர். சரியாக நினைவுக்கு வரவில்லை.

    வாசலில் வாகனசத்தம் கேட்கும்போதெல்லாம் வெளியே வந்து அவனது காரை அந்த வாகனங்கள் எப்படிக் கடந்து போகின்றன என்பதை பார்த்துவிட்டு, மீண்டும் உள்ளே சென்று வலைமேயத் தொடங்கிவிடுவான்.

    சமையலறையிலிருந்து திடீரென்று அவன் மனைவி சித்ரா பதறி அடித்துக்கொண்டு வெளியே ஓடுவதை சலனமில்லாமல் திரும்பிப் பார்த்துவிட்டு, மீண்டும் கணிப்பொறியில் மூழ்கினான்.

    வெளியே சென்ற மனைவி, குழந்தையைக் கொண்டுவந்து நாற்காலியில் கிடத்திவிட்டு, உள்ளே ஓடினாள்.

    அப்போதுதான் குழந்தை அழுதுகொண்டிருப்பதை கவனித்தான் கார்த்திக்.

    “என்ன ஆச்சுடி குட்டி” என்று கேட்டுக்கொண்டே குழந்தையிடம் சென்றான்.

    “இடி விழுந்தாகூட உங்க அப்பாவுக்கு அது கேக்காதுடீ குட்டி!” என்று உரக்கக் கத்திக்கொண்டே வந்து அடிபட்ட இடத்தில் மருந்திட்டாள் சித்ரா.

    “சின்ன ஸ்க்ராட்ச் தானே? அதுக்கு ஏன் இவ்வளவு பதைபதைப்பு? குழந்தைய நீதான் கெடுக்கற. நானெல்லாம் சின்ன வயசில்ல அடிபட்டா, மண்ணை எடுத்து அடிபட்ட எடத்துல போட்டுப்பேன். தானா சரியாயிடும். கூல்!” என்றவனை முறைத்துவிட்டு உள்ளே குழந்தையை அழைத்துச் சென்றுவிட்டாள். அவனும் வெளியே சென்று காரை ஒருமுறை எட்டிப் பார்த்துவிட்டு மீண்டும் வலைமேயச் சென்றுவிட்டான்.

    அன்று மாலை ஏழு மணி இருக்கும்.

    “குழந்தைக்கு லேசா உடம்பு சுடுது. டாக்டர்கிட்ட கூட்டிட்டு போறேன்” என்று கூறிவிட்டு டிரைவரை அழைத்துக் கொண்டு காரில் சென்று அமர்ந்தாள் சித்ரா.

    அதைக் கேட்ட அடுத்தகணம், பதைபதைத்துக்கொண்டு வெளியே வந்த கார்த்திக், “டாக்டர் வீடு இருக்கற தெருவுல ரெண்டு பக்கம் முள்ளுச்செடிங்க நிறைய இருக்கு. தெருமுனையிலேயே காரை விட்டுட்டு நடந்து போய்டுங்க, மகேந்திரன்” என்று டிரைவருக்கு அறிவுரை கூறி அனுப்பிவிட்டு, வாட்டத்துடன் அவர்களையே பார்த்துக்கொண்டு இருந்தான் கார்த்திக்.

    கார் மருத்துவமனைக்குச் செல்வதற்குள் மகேந்திரனின் கைபேசிக்கு கார்த்திக்கிடமிருந்து மூன்றுமுறை அழைப்புகள் வந்தது.

    மருத்துவமனை இருந்த தெருமுனையில் காரை நிறுத்தினான் மகேந்திரன்.

    சித்ரா காரிலிருந்து இறங்கிவிட்டு, “இன்னொருமுறை அவர்கிட்டர்ந்து கால் வந்தா, கார் மேல ஸ்க்ராட்ச் ஆயிடும்னு கவலைபடாம இன்டர்நெட்ல எதையாச்சும் பண்ண சொல்லுங்க. ஸ்க்ராட்ச் தானே! மண்ணை அள்ளிப் பூசி  சரி பண்ணிக்கலாம்! ” என்று கூறிவிட்டு, குழந்தையைத் தூக்கிக்கொண்டு அந்த இருட்டில் தனியாக மருத்துவமனைக்கு நடந்து சென்றாள்.

    Share

  • நாளை நமதே… இந்த நாளும் நமதே

    கவிஞர் காவிரி மைந்தன்

    மக்கள் திலகம் என்னும் அடைமொழி எம்.ஜி.ஆர். அவர்களுக்கு கல்கண்டு தமிழ்வாணன் அவர்களால் வழங்கப்பட்டது. எம்.ஜி.ஆர் அவர்களின் மாபெரும் வெற்றிப்படங்களுக்குப் பாடல்கள் இயற்றிப் பெரும்புகழ் ஈட்டியவர் கவிஞர் வாலி அவர்கள் என்பதை வரலாறு சொல்கிறது.

    திரைப்படப் பாடலாசிரியர்கள் பல நூறு பேர்கள் வந்தாலும் தங்கள் தடங்களைப் பதித்துவிட்டுப் போனாலும் விரல்விட்டு எண்ணக்கூடிய ஒரு சிலரை மட்டுமே காலம் இன்று கணக்கில் வைத்திருக்கிறது. ஏன்.. எப்படி.. எண்ணிப்பார்த்தால், திரைப்பாடல்கள் என்கிற வரையறைகளை வகுத்துக்கொள்ளாமல், வாழ்க்கையின் எல்லைகளை.. இன்ப துன்பங்களை பல்வேறு கூறுகளை.. அப்பாடல்களில் இலகுவாக பக்குவமாய் பதித்து வைத்திருப்பதே அடிப்படைக் காரணம் ஆகும் என்பது புலனாகும்.

    குறிப்பாக, புரட்சித் நடிகர் பொன்மனச் செம்மல் என்கிற அடைமொழிகளைத் தாங்கிநின்ற சாதனை சரித்திரமம் எம்.ஜி.ஆர். என்கிற கதாநாயகனின் பாத்திரப் படைப்புகள் எல்லாம் மக்கள் மனதில் நிச்சயமாக, சத்தியமாக, பலமாக பெரியதோர் தாக்கத்தை உண்டாக்கும் வல்லமை – வசனங்களைத் தாண்டி.. இது போன்ற பாடல்களின் மூலமே சாத்தியமாகும் என்பதை கவிஞர் வாலி அவர்கள் எம்.ஜி.ஆருக்காக எழுதிய பல்வேறு பாடல்கள் சாட்சியம் கூறும். இதோ இவ்வரிசையில் நாளை நமதே திரைப்படத்திற்காக மெல்லிசை மன்னர் எம்.எஸ்.விஸ்வநாதன் இசையில் .. திரையில் இருமுறை மலரும் அன்பு மலர்களே.. நம்பி இருங்களேன். நாளை நமதே..

    அன்பு மலர்களே நம்பி இருங்களே
    நாளை நமதே இந்த நாளும் நமதே
    தர்மம் உலகிலே இருக்கும் வரையிலே
    நாளை நமதே எந்த நாளும் நமதே

    தாய் வழி வந்த தங்கங்கள் எல்லாம்
    ஓர் வழி நின்று நேர் வழி சென்றால்
    நாளை நமதே…

    காலங்கள் என்னும் சோலைகள் மலர்ந்து காய் கனியாகும்
    நமக்கென வளர்ந்து

    நாளை நமதே நாளை நமதே நாளை நமதே
    நாளை நமதே நாளை நமதே நாளை நமதே நாளை நமதே

    பாசம் என்னும் ஊர் வழி வந்து பாசமலர் கூட்டம்
    ஆடும் மழையில் அமைவது தானே வாழ்க்கை பூந்தோட்டம்

    மூன்று தமிழும் ஓர் இடம் நின்று
    பாடவேண்டும் காவியச் சிந்து

    அந்த நாள் நினைவுகள் எந்த நாளும் மாறாது
    அந்த நாள் நினைவுகள் எந்த நாளும் மாறாது

    நாளை நமதே, நாளை நமதே

    வீடு என்னும் கோயிலில் வைத்த வெள்ளி தீபங்களே
    நல்ல குடும்பம் ஓளிமயமாக வெளிச்சம் தாருங்களே

    நாடும் வீடும் உங்களை நம்பி நீஙகள்தானே அண்ணன் தம்பி
    எதையுமே தாங்கிடும் இதயம் என்றும் மாறாது

    நாளை நமதே நாளை நமதே

    தாய் வழி வந்த தங்கங்கள் எல்லாம்
    ஓர் வழி நின்று நேர் வழி சென்றால்
    நாளை நமதே…

    காலங்கள் என்னும் சோலைகள் மலர்ந்து காய் கனியாகும்
    நமக்கென வளர்ந்து

    நாளை நமதே நாளை நமதே நாளை நமதே

    படம் : நாளை நமதே (1974)
    இசை : எம்.எஸ்.விஸ்வநாதன்
    பாடியவர்: எஸ்.பி. பாலசுப்பிரமணியம், டி.எம். சௌந்தரராஜன்

    http://www.youtube.com/watch?v=pY-kqvZr070

    இத் திரைப்படம் பார்த்தபோது.. குறிப்பாக இந்தப் பாடலில் இந்த வரிகள் தந்த உற்சாகம், வைராக்கியம் .. இன்று நான் பெற்றுள்ள வெற்றிகளுக்கெல்லாம் முதற்படி என்றால் அது மிகையன்று.

    திரு. தர்மேந்திரா அவர்கள் இந்தியில் நடித்த யாதோங்கி பாரத் என்னும் இந்திப்படத்தின் தழுவல் இந்தப் படம் எனினும் பாடல்கள் மெல்லிசை மன்னரால் அதீதமானதவையாகவும் அற்புதமாகவும் மலர.. கவிதை இதழ்கள் விரிவது போல் பாடல் வரிகள் அமைத்தவர் கவிஞர் வாலி என்பதில் இருவேறு கருத்தில்லை.

    நாளை நமதே இந்த நாளும் நமதே…

    Share

  • வார ராசி பலன் 24.03.14-30.03.14

    காயத்ரி பாலசுப்ரமணியன்
    மேஷம்: வியாபாரிகள் உங்கள் சேவையை விமர்சனம் செய்யும் வாடிக் கையாளர்களிடம் பக்குவமாக நடந்து கொள்ளுங்கள். மாணவர்கள் புதிய இடங்களில், உணவுக் கட்டுப்பாட்டை கடை பிடித்தால், உடல்நலம் நன்றாகத் திகழும். புதிய வீடுகள் மற்றும் மனைகளை வாங்கும் முன் பத்திரங்களைச் சரிபார்ப்பது அவசியம். வீண் ஜம்பம், வேண்டாத பெருமை இரண்டையும் விலக்கிவிட்டால், கலைஞர்கள் நிம்மதியாய் வேலை செய்யலாம். பணியில் இருப்பவர்கள் பதற்றமின்றி பொறுமையுடன் செயல்பட்டால், உயரதிகாரிகளின் நம்பிக்கைக்குப் பாத்திரமாக முடியும். பெண்களுக்கு வேலை பளு கூடலாம்.
    ரிஷபம்: கடன் தொல்லைகளினால் சிறிது மன சஞ்சலம் ஏற்பட்டாலும், சிக்கல் வராமல் இந்த வாரம் சமாளித்து விடுவீர்கள். பங்குதாரார்களின் ஆதரவால் புதிய ஒப்பந்தங்கள் கையெழுத்தாகும். கலைஞர்கள் அதிக புகழ்ச்சி எனும் வலை விரிப்பவரிடம் மாட்டிக் கொள்ளாமல் விலகியே இருங்கள். பணியிடத்தில் பிறர் கூறும் குற்றம், குறைகளுக்காக அவர்களிடம் வாக்கு வாதத்தில் இறங்குவதை தவிர்த்துவிடவும். சில சந்தர்ப் பங்களில்,நண்பர்களே உங்களை எதிரியாய் கருதி உங்களோடு மோதும் நிலை உருவாகும். தேவையில்லாமல் பெண்கள் தங்கள் அலுவலக ரகசியங்களை பிறரிடம் கொட்ட வேண்டாம் .

    மிதுனம்: பெண்கள் அடிக்கடி வரும் கோபத்தை குறைத்து கொண்டால், இல்லத்தில் சச்சரவு எழாது. மாணவர்கள் தேவையற்ற எண்ணங்களுக்கு இடம் தராமல், படிப்பில் கவனம் செலுத்தி வாருங்கள். அதிக நேரம் பணியில் ஈடுபடுபவர்கள் உடல் நலனில் அதிக அக்கறையுடன் இருக்க வேண்டிய வாரமிது. நீங்கள் எங்கு பணி புரிந்தாலும், சொல்,செயல் ஆகிய இரண்டிலும் நிதானத்தைக் காட்டி வந்தால், எந்த நிலைமையும் சமாளித்து விடலாம். வியாபாரிகள் வாக்குறுதிகளை வழங்குவதைக் காட்டிலும் அதை நிறைவேற்றி வைப்பதில் கவனமாய் இருந்தால், சிக்கல்கள் ஏதும் வராது. அனைவரை யும் அனுசரித்துச் செல்வதன் மூலம் கலைஞர்களுக்கு ஆதாயம் இரட்டிப்பாகும்.

    கடகம்: உங்களின் நிதி நிலைமைக்கேற்றவாறு காசோலைகளை பயன்படுத்துவது நல்லது. புதிய நபர்களிடம் வியாபார ஒப்பந்தம் செய்யும் முன்பு, அவர்களின் பொருளாதாரம், முன் அனுபவம் ஆகியவற்றை அறிந்து செயல்படவும். பணியில் பொறுமையை சோதிக்கும் சந்தர்ப்பங்களையும், லாவகமாக கையாண்டால், மன அமைதிக்கு பங்கம் வராது. சுய தொழில் புரிபவர்கள் புதிய முயற்சிகள் வெற்றி பெறுவதற்காக அதிகம் உழைக்க வேண்டியிருக்கும்.மாணவர்கள் நாவடக்கம் நன்மையைத் தரும் என்பதை நினைவில் கொண்டு செயல்பட்டால், நற்பெயரை எளிதில் தக்க வைத்துக் கொள்ள இயலும்.

    சிம்மம்: சிலருக்கு குடும்பத்துடன் சுற்றுலா சென்று மகிழும் வாய்ப்பு கிட்டும். கர்ப்பிணிப் பெண்கள் உடலில் சில அசௌகரியங்கள் தோன்றி மறையலாம். தகுந்த மருந்து களை உட்கொண்டால், ஆரோக்கியம் நன்றாக இருக்கும். பணியில் இருப்பவர் களை கவனத் தடுமாற்றம், மறதி ஆகியவை அலைக்கழிக்கும். மாணவர்கள் வெளி வட்டாரப் பழக்கங்களில் தராதரமறிந்து பழகிவந்தால், வீண் சங்கடங்கள் உங்களை அண்டாது. கலைஞர்கள் அபவாதங்களுக்கு இடமளிக்காதவாறு உறுதியாய் செயல் படுங்கள். வியாபாரிகள் ஏனோதானோவென்று பணிகளைச் செய்யாமல், தகுந்த திட்டப்படி செய்தால், குழப்பங்களைத் தவிர்த்து விடலாம்.

    கன்னி: உயர்ந்த பதவியில் இருப்போர்கள், பிறரின் குற்றம் குறைகளை இதமாக சுட்டிக் காட்டினால், வேலைகள் தேங்காமல் முடிந்து விடும். இந்த வாரம் பெண்கள் உறவுகளி டமிருந்து அதிக சலுகைகளை எதிர்பார்க்க முடியாது. பொது சேவையில் ஈடுபட்டுள்ள வர்கள் பொதுப்பிரச்னைகளைத் தீர்க்க, புத்திசாலித்தனமும், பொறுமையுமே உதவும் என்பதை நினைவில் வைத்துக் கொள்வது நல்லது. மாணவர்கள் தகுதிக்கேற்ற நட்பைத் தேடிக் கொண்டால், வீண் தலைவலியை தவிர்த்து விடலாம். வியாபாரிகள் புதிய முயற்சிகளுக்குத் தேவையான பக்கபலத்துடன் களம் இறங்கினால், நினைத்ததை சாதிக்க இயலும்.

    துலாம்: பணி புரிபவர்கள் உடனிருந்தே காலை வாருபவர்களிடம் உஷாராக இருந்தால், உங்கள் உழைப்பு வீணாகாமலிருக்கும். பெண்கள் உபத்திரவம் தரும் அண்டை அயலா ரை அருகில் சேர்க்காதீர்கள். உங்களின் விலை உயர்ந்த பொருட்களை பாதுகாப் பாக வைத்தால், வீண் கலக்கத்தை தவிர்த்து விடலாம். உங்களின் பழைய அனுபவம், தொடர்புகள் ஆகியவற்றின் உதவி கொண்டு வியாபார சிக்கலைத் தீர்க்க இது ஏற்ற வாரம். கலைஞர்கள் சுற்றியிருப்பவர்களால் வீண் செலவுகள் செய்ய வேண்டிய சுழலுக் குத் தள்ளப்படுவர். மாணவர்கள் பங்கேற்கும் விளையாட்டுப் போட்டிகளில் அதிக கவனம் தேவை.

    விருச்சிகம்: நெருக்கடியான சூழலிலும் பெண்கள் புன்னகையே பதிலாக தந்து வாருங்கள். குடும்ப ஒற்றுமை குலையாமல் இருக்கும். பணி புரியும் இடங்களில் அவசரமாய் செயல்படுவதை தவிர்த்து, தகுந்த ஆலோசனையுடன் செயல்பட்டால், எவரும் உங்களை குறை கூற மாட்டார்கள். பண விஷயங்களில் எவருக்கும் அவசரப்பட்டு வாக்குறுதிகளை கொடுக்க வேண்டாம். மாணவார்கள் மாதத் தேர்வுகளை அலட்சிய மாக எண்ணாமல் கவனத்துடன் எழுதுவது அவசியம். வியாபாரிகளுக்கு, நம்பிக்கை க்குரிய பணியாளர்கள் நிறுவனத்திலிருந்து விலகிச் செல்லும் சூழல் உண்டாகும். வாகனப் பராமரிப்பிற்கென்று சில்லறை செலவுகளை செய்வீர்கள்.

    தனுசு: கலைஞர்கள் வெளி இடங்களுக்கு எடுத்துச் செல்லும் பொருட்களில் கவனமாக இருந்தால், கலை நிகழ்ச்சிகள் வெற்றிகரமாய் அமையும். பெண்கள் மின்சாதனப் பொருட்களை கவனமாய் கையாளுங்கள். ஆடம்பரச் செலவுகளைக் குறைத்து, சேமிப் பை அதிகப்படுத்தினால், கடன் தொல்லைகளை குறைத்து விடலாம். பொது வாழ்வில் இருப்பவர்களுக்கு சற்றே பொறுப்புக்கள் அதிகரிக்கும். மாணவர்கள் சிறிய காரியத்தை யும் சிரத்தையுடனும் செய்தால் சிறப்பான பலனைப் பெறலாம்,அடிக்கடி வெளியூர்ப் பயணம் செல்பவர்கள் சளித் தொந்தரவுக்கு ஆளாக வேண்டி வரும். வியாபாரிகள் ஒப்பந்தங்களைப் பெற அங்கும், இங்கும் அலைந்து திரிவர்.

    மகரம்: எதிரும் புதிரும் இருந்த உறவுகள், நெருங்கி வருவதால், பெண்கள் மகிழ்ச்சி யுடன் திகழ்வார்கள். பெற்றோர்கள் பிள்ளைகளின் ஆரோக்கியத்தில் தனி கவனம் செலுத்துவது அவசியம். மாணவர்கள் சின்னசின்ன விஷயங்களுக்கு உணர்ச்சி வசப் படுவதைத் தவிர்த்தல் நலம். தம்பதிகளுக்குள் அனுசரணையும், புரிதலும் இருந் தால், குடும்பத்தில் அமைதியும், மகிழ்ச்சியும் தங்கும். பணியில் இருப்பவர்கள் புதிய பொறுப்பு களை விருப்பமுடன் ஏற்றுக் கொள்வவதால், நல்ல பெயரோடு பதவி உயர்வும் வந்து சேரும். தொழிலாளர்கள் இடையே தோன்றும் மன வேறுபாடுகள் பெரிதாகாமல் இருக்க அவர்களை தட்டிக் கொடுத்து செல்லுங்கள். வியாபாரம் சீராக இருக்கும்.

    கும்பம்:வியாபாரிகள் புதிய ஒப்பந்தங்களை ஒப்புக்கொள்ளும் முன், அதில் உள்ள நிறைகுறைகளை உணர்ந்து செயல்படுவது நலம். பெண்கள் பிள்ளைகளின் கூடாத நட்பினால் தோன்றும் பிரச்னைகளை முளையிலேயே கிள்ளுவது புத்திசாலித்தனமான செயலாகும். நீங்கள் எதிர்பார்த்தவகைகளில் வரும் அதிக வரவால் பழைய கடன்களை தீர்க்க தேவையான பணம் கிடைக்கும். சுய தொழிலில் தோன்றும் கஷ்டங்களைக் கடக்க உங்கள் உழைப் பும், சாமர்த்தியமும் கை கொடுக்கும். கலைஞர்கள் நீங்கள் எதிர்பார்க்கும் நல்ல தகவல்கள் கிடைக்கும் வரை பொறுமையாய் இருப்பது அவசியம்.

    மீனம்: எதிலும் முனைப்புடன் ஈடுபடும் மனப்பாங்கால், வியாபாரிகள் எடுக்கும் முயற்சியெல்லாம் லாபமாய் மாறும். மாணவர்கள் புதிய இடங்களில் எவரை நம்பியும் உங்கள் உடைமைகளை ஒப்படைக்க வேண்டாம். சொத்து சம்பந்தப்பட்ட பிரச்னை களை நிதானமாகக் கையாள்வது நல்லது. பெண்கள் முன் கோபத்தை மூட்டை கட்டி வைத்துவிட்டு செயலில் இறங்கினால், குடும்ப முன்னேற்றமான நிலைக்கு செல்வது உறுதி. கலைஞர்கள் பெரிய மனிதர்களின் சந்திப்பினால் பெரிய செலவுகளைச் சந்திக்க நேரிடும் . கூட்டுக் குடும்பத்தில் இருப்பவர்கள் அவ்வப்போது தோன்றும் சிறிய சச்சரவுகளைப் பெரிது படுத்தவேண்டாம்.

    Share

  • மணிமொழிக்கு அம்மா எழுதும் கடிதம்

    விசாலம்

    என் அன்புள்ள மணி ..நீ அங்க சௌக்கியமா? மாப்பிள்ளை எப்படி இருக்கார்?உங்க இரண்டு பேருக்கும் என் ஆசீர்வாதங்கள்..நீ எங்கிட்ட கோச்சுண்டு போனதிலிருந்து எனக்கு மனசே சரியா இல்லை.குட்டி சூடாமணி அதாண்டி நீ ஆசை ஆசையா சூடின்னு கூப்பிடுவாயே அந்த செல்லக்குட்டி எப்போதும் போல் எங்கிட்ட சமத்தாய் இருக்கிறாள். லோவர் கேஜி போய்ட்டு வராள். .உங்குழந்தைய விட்டுட்டு இருப்பது உனக்கு சிரமம் தான் .மனசு கஷ்டந்தான் .ஆனா என்ன செய்ய ?நீ கூப்பிட்டா அவ உங்கூட வர மாட்டேங்கறாளே. நான் என்ன செய்ய? யானை தன் தலை மேல தானே மண்ணை வாரிப்போட்டுண்ட மாதிரி நீயே தான் இந்த நிலைமைக்கு காரணமாயிட்டே.இன்னிக்கு இந்தக்கடிதாசுலே என் மனச கொட்டிடப்போறேன். ஏன்னா எனக்கும் வயசாச்சு.ஒரு நாள் இருப்பது போல் உடம்பு ஒரு நாள் இல்லை. அப்பா இல்லாத பொண்ணாச்சே ன்னு உன்னை நன்னா படிக்க வச்சேன். படிப்பு வேஸ்ட் ஆக்காமல் வேலைக்கு போகப்போறேன்னு நீ. சொன்னே. எனக்கு என்ன தெரியும் நீ மாடலாகவும் இருக்க போறேன்னு . எனக்கு பிடிக்காத ஒரு பேஷன் கம்பெனில சேர்ந்தே. அங்க சேர்ந்தப்பறம் என்னிடம் வந்து ‘சேரட்டுமா” ன்னு கேட்டே. உன் பிடிவாதம் தான் ஜயிச்சுது. அங்க தான் போனேயே .எப்போதும் பணம் பிசின்ஸ் ன்னு மெஷினப்போல் வேலை செய்யற ஒத்தனை காதலிச்சே. அவன் உன்னை மாடலிங் ல நன்னா யூஸ் பண்ணிண்டான் .உன்னால அவனுக்கு வந்த லாபம் கொஞ்சமா நஞ்சமா! இப்படியே விடப்பிடாதுன்னு நினைத்து உங்க இருவருக்கும் கல்யாணமும் செஞ்சு வச்சேன் .அப்பறந்தான் எனக்கு நிம்மதி .கிடைச்சுது .போதுண்டி இனி இந்த வேலை வேண்டாம் ன்னுசொன்னேனே உனக்கு ஞாபகம் இருக்கா? ஆனா நீ என்ன சொன்னே ‘ அம்மா நான் ஒரு குழந்த பெத்துண்டப்பறம் வேலையை விட்டுடறேன்”ன்னு சொன்னே. ஆனா உன் அழகு குலஞ்சுபோய்டும்ன்னு நாளைக்கடத்திண்டே வந்தே. ஆனாலும் கடவுள் என் பிரார்த்தனையைக்கேட்டுட்டார்.

    அன்னிக்கு எனக்கு நன்னா ஞாபகம் இருக்கு . காலைல பூஜை பண்ணி முடிச்சேன் .உம் போன் கால் வந்தது .”அம்மா நான் கன்ஸீவ் ஆயிருக்கேன்.” “ஆஹா மணி எனக்கு ரொம்ப சந்தோஷமா இருக்கு .மும்பையில் மழை ரொம்ப ஜாஸ்தி. மழைல எல்லாம் நினையாதே “

    “நிறுத்தும்மா .நானே வருத்தமா இருக்.கேன் சனியன் பிடித்தது இப்போவே வந்திடுத்து . இன்னும் ஒரு வருஷத்துக்கு மாடலிங் எல்லாம் குளோஸ்” ன்னு சொன்னாயேஞாபகம் வரதா? அப்பறம் அழகு பிம்பமாக உனக்கு சூடாமணி பொறந்தா.. எதோ கடமையே ன்னு பெத்துப்போட்டாப்போல் அந்தக்குழந்தைய எங்கிட்ட கொடுத்துட்டே. ஏதோ ஒரு இரண்டு மாசம் பால் கொடுத்தே.அப்பறம் உன் அழகு குலைஞ்சுடுமேன்னு அதையும் நிறுத்திட்டே. எப்போ பாத்தாலும் ஆபீஸ் .புகழ் பணம்ன்னு நீங்க இரண்டு பேரும் அலஞ்சீங்க.போறதத்துக்கு

    மாப்பிள்ளைக்கு சிங்கப்பூரில் வேலை கிடைச்சு போனார்.நீயும் அங்க அவரோட போவேன் ன்னு அடம் பிடிச்சே அது சரிதா. புருஷன் இருக்கற இடத்தில தான் நீயும் இருக்கணும் ஆனா உன் குழந்தையும் அழச்சிண்டு போணுமா வேண்டாமா? “சூடி உங்கிட்ட இருக்கட்டும் அவ உங்கிட் வளரட்டும்.ஏன்னா எனக்கும் வேலைல பிரமோஷன் கிடச்சிருக்கு எனக்கு குழந்தையோட நிம்மதியா வேலை செய்ய முடியாது. அது வேற ஙொய் ஙொய்ன்னு அழும் . அந்த ஊசி இந்த ஊசின்னு அதெல்லாம் வேற பாத்துக்கணும் என்னால முடியாதம்மா. “ன்னு கட் அன்ட் ரைட்டா எங்க்கிட்ட சொன்னாயே அது ஞாபகம் இருக்கா?

    அன்னிலேந்து இந்த எட்டு வருஷமா சூடி எங்கிட்டதான் இருக்கா. வருஷத்தல ஒரு மாசம் வந்து இவளோட இருந்தா எப்படி ஒட்டிப்பா? சொல்லு.ஆபீசில யாரோ குழந்த உங்கிட்ட ஒட்டாம போயிடும் அதனாலே உங்கிட்ட அழைச்சுண்டு வந்திடுன்னு சொன்னதாக நீ சொன்னே.அதனாலே போன மாசம் நீ வந்தவுடனே ஆசையா சிங்கப்பூர்ல வாங்கிய கவுனை காட்டி நீ கூப்பிட்டே .அது என்ன வெறும் பொம்மையா ?அதுக்கும் உணர்ச்சிகள் இருக்கே. ” உங்கம்மா உன்னை விட்டுட்டு சிங்கப்பூரில இருக்காடின்னு அவ பிரண்டு அவளிடம் சொல்றாளாம் அதான் அன்னிக்கு சூடி தன்

    மூஞ்சியைத்திருப்பிண்டு இது யாரம்மா இந்த ஆன்டி .னு சொன்னா. நீயோ விடாமே ‘அட சூடிக்குட்டி என் செல்லமே நான் தான் உன் மம்மி ன்னு சொன்னே. உன் கையை நீட்டி வான்னு சொன்னே .அதுவோ .போ ஆன்டி .நீ என் மம்மி இல்லை .இவதான் என் மம்மி ன்னு என் கழுத்தை கட்டிண்டா.நீ கூப்பிட கூப்பிட மூஞ்சியை திருப்பிண்டா? அதுக்கு நான் என்ன செய்ய முடியும்? இதுக்காக கோச்சுண்டு ஊருக்குப்போனால் என்ன செய்யறது? உனக்கு குழந்தையா இருக்கச்ச பாத்துக்க முடிலை. இப்ப அழகா எட்டு வயசு சிறுமியா இருக்கச்ச உனக்கு கூட வச்சுக்கணும் போல இருக்கு .எனக்கும் இனிமே இந்தக்குழந்தையை விட்டுட்டு இருப்பது கஷ்டம் தான் நீ என்னையும் அங்கு கூப்பட தயங்கறாய். உன் பிரஸ்டிஜ் என்ன ஆகும்ன்னு உனக்கு தோன்றது !ரொம்ப நாளா என் மனசில இருக்கறத உங்கிட்ட கொட்டிடணும் இருந்தேன் . நீ கோபத்தல போன்ல கூட சரியா பேசல .அதனால இந்த லெட்டர் எழுதறேன். குழந்த வளர்ப்பு என்பது சும்மா இல்லை அது ஒரு வரப்பிரசாதம். கொடுத்து வச்சிருக்கணும் .அங்கு பணம் பெரிசில்லை. புகழ் பெரிசில்லை . அந்தஸ்து பெரிசில்லை .இனியாவது புரிஞ்சுக்கோ . நம்மிட்ட நமக்கு வேணுங்கற சொத்து இருக்கு. அதனாலே வேலையை விட்டுட்டு சூடியோட ஒரு இரண்டு வருஷமாவது இரு .அவ உன்னோட ஒட்டிண்டுடுவா. என்ன இருந்தாலும் ரத்த பாசம் ஆச்சே . மேலே எனக்கு என்ன எழுதறதுன்னு தெரிலை. கோபத்தை தூக்கிப்போட்டுட்டு அமைதியாக யோசி . .. உடம்ப பாத்துக்கோ. ராத்திரி வேலைன்னு அலையாதே. சரியான சமயத்ல சாப்பிடு. நேரம் கெட்ட நேரத்ல சாப்பிட்டா அல்சர் வந்துடும் .இந்த லெட்டர் வந்தவுடனே எங்கிட்ட பேசு .எல்லாம் ஒரு நாள் இல்லாட்டா ஒரு நாள் சரியாய்டும் இப்படிக்கு உன் அம்மா . .

    Share

  • சூரியனை நெருங்கிச் சுற்றும் முதற்கோள் புதன் மெதுவாய்ச் சுருங்கிக் கொண்டு வருகிறது

     
     
     

    The Shrinking Planet -1

    (NASA’s Messenger Space Probe Orbiting Planet Mercury)  

    [March 16, 2014] 

    சி. ஜெயபாரதன் B.E.(Hons) P.Eng (Nuclear) கனடா

     

    http://www.youtube.com/watch?feature=player_detailpage&v=-wZ-67otBQw

    http://www.youtube.com/watch?feature=player_detailpage&v=VMN7R4d5JX0

    http://www.dailymotion.com/video/x1hsxnj_why-planet-mercury-is-shrinking_travel

    http://www.youtube.com/watch?feature=player_embedded&v=AdbVizaV9C4

     

     

    பரிதியை நெருங்கிச் சுற்றுவது
    முதற்கோள் புதன் !
    நாசா அனுப்பிய மாரினர்
    முதல் விண்ணுளவி
    புதன் கோளைச் சுற்றி
    விரைந்து சென்று
    பாதிக் கோளை உளவியது !
    நாசாவின் இரண்டாம்
    விண்ணுளவி மெஸ்ஸெஞ்சர்
    புதன் கோளை
    இரு புறமும் சுற்றி
    முழுத் தகவல் அனுப்புகிறது
    இப்போது.
    பரிதிக் கதிர் சுட்டுப் பொசுக்கிடும்
    கரிக்கோள் புதக்கோள் !
    தளப் பரப்பில் மேடு,  பள்ளம்,
    முறிவுகள் நிரம்பியது !
    உருகிய உட்கரு குளிர்ந்து, உடல்
    சுருங்கிப் போகும்
    உலோகக் கோளம் அது !
    வெப்பமும் குளிரும் மாறி,
    பரிதி வீசிப் பந்தாடும்
    சிறிய கோள் !

    ++++++++++++++++

    unnamed

    புதிய தகவல் கண்டுபிடிப்பு பல்லாண்டுகள் வெப்ப நிலை வரலாற்று மாடல்களுக்கும், புதக்கோள் சுருக்க மதிப்பீடுக்கும் [Paradox between Thermal History Models & Estimates of Mercury Contraction]  இடையில் நிலவிய முரண்பாடுகளைத் தீர்த்தது.  இப்போது வெப்ப உற்பத்தி, வெப்ப இழப்பு, கோள் சுருக்க வரலாறு முரண்பாடு இல்லாது சீராக ஒருமித்து  உள்ளது.

    பால் பைர்ன் [Paul Byrne, Planetary Geologist, Messenger Spacecraft Scientist] [March 16, 2014]

    1974- 1975 ஆண்டுகளில் மாரினர் -10 விண்ணுளவி தகவல் அனுப்பிய போது புதன் கோளின் உட்கரு வெப்ப பரிணாமத்தில் [Thermal Evolution of Mercury Interior] எனக்கு வேட்கை மிகுந்து அதில் ஈடுபாடு கொண்டேன்.  ஆனால்  வெப்ப நிலை மாடல் மூலம் கண்ட அளவு, பூதளவியல் விஞ்ஞானிகள் முன்னறிவித்த புதன் கோள் சுருக்க அளவை விட மிகையாக இருந்தது.   மேலும் அப்போதைய முன்னறிவிப்பு மாரினர் -10 விண்ணுளவி புதன் கோளில் பாதிக்கும் குறைந்த அளவு கோளத்தை உளவி அனுப்பிய தகவல் மட்டுமே.  நாற்பது ஆண்டுகளாக  எங்கள் கோட்பாடுக்கும், ஆய்வு விளைவுக்கும் இடையே  ஒரு மர்மமாக இருந்த இந்த முரண்பாடு  இப்போது முடிவாகத் தீர்வானது.

    ஷான் ஸாலமன் [Sean Solomon, Principal Investigator, Mariner -10 Space Probe]  

     

    Earth Mercury Comparision

    “பரிதிக்கு மிக நெருங்கிய புதன் கோளை நோக்கிச் சென்ற நாசா விண்ணுளவி சிறிய பாறை அண்டத்தை அண்டிச் சுற்றும் முன்பே முக்கியத் தகவல் பலவற்றை அனுப்பி யுள்ளது.  இரண்டரை ஆண்டுகளுக்கு முன்பு நாங்கள் நினைத்திருந்தது போல் இப்போது இல்லை புதன் கோள்.  மெஸ்ஸெஞ்சர் விண்ணுளவி பெருங்குழிப் பீடங்களையும், கடந்த கால எரிமலைத் தடங்களையும் வியப்பூட்டும் காட்சிகளாய்க் காட்டியுள்ளது.”

    ஷான் சாலமன் (பிரதம ஆய்வாளர், நாசா மெஸ்ஸெஞ்சர் விண்ணுளவிக் குறிப்பணி) (ஆகஸ்டு 15, 2010)

    “பரிதிக் கோளின் மிக நெருங்கிய அகக் கோளை ஆராயும் முயற்சியில் அப்பாலுள்ள மற்ற கனத்த கோள்களோடு மாறுபடும் வேறுபாடுகளை நாங்கள் அறிந்து கொள்வோம்.  குறிப்பாக அகக் கோள் புதனைத் தேடும் ஆராய்ச்சியில் நமது புவிக்கோளைப் பற்றிப் புரிந்து கொள்ள வாய்ப்புள்ளது.”

    ஷான் சாலமன் (பிரதம ஆய்வாளர், நாசா மெஸ்ஸெஞ்சர்)

    “நாசாவின் முதல் விண்கப்பல் மாரினர் -10 போல் நான்கு அல்லது ஐந்து மாதங்களில் புதன் கோளை நாங்கள் விரைவில் நெருங்கிச் சுற்றியிருக்க முடியும்.  ஆனால் மாரினர் சென்ற அத்துணை வேகத்தில் நாங்கள் புதன் கோள் ஈர்ப்பு விசையில் மெஸ்ஸெஞ்சரை இறங்க வைத்துச் சுற்றி வர இயலாது.  புதன் கோளை நெருங்கும் போது மிக மெதுவாகச் சென்றால்தான் விண்ணுளவி புதன் ஈர்ப்பு விசையில் இறங்க (Spacecraft Orbital Insertion) ஏதுவாகும்.”

    ஷான் சாலமன் (பிரதம ஆய்வாளர், நாசா மெஸ்ஸெஞ்சர்)

     

    The Shrinking Planet -3

    முன்பு எண்ணியதை விட மிகையாகச் சுருங்கி வருகிறது புதன் கோள்  

    2014 மார்ச்சு 16 “இயற்கை பூதளவியல் விஞ்ஞான இதழ்” [Nature Geoscience] வெளியீட்டில், நாசாவின் விண்ணுளவி மெஸ்ஸஞ்சர் அனுப்பியுள்ள புதிய கோளத் தளவியல் படப்பிடிப்புப் பதிவின்படி,  புதக்கோளின் பெரிதான உட்கருக் கனல் திரவம் குளிர்ந்து, விஞ்ஞானிகள் முன்பு செய்த மதிப்பீட்டுக்கும் மிகையாகச் சுருங்கி வருகிறது என்று அறியப் படுகிறது.   புதக்கோள் உட்கரு குளிர்ந்து, சுருங்கி வரும் போது முறிந்த, திரிந்த 5900 பூதள வடிவமைப்புகளை ஆய்ந்து, கணக்கிடப் பட்டுத் தீர்வான முடிவே அது.   அந்தக் கண்டுபிடிப்பில் புதக்கோளின் வெப்ப நிலைப் பரிணாமம் , அடித்தட்டுப் பெயர்ச்சி, எரிமலை வரலாறு, மிகப் பெரிய உலோக உட்கரு அமைப்பு ஆகியவற்றைத் [Thermal, Tectonic, Volcanic History, Structure of the Large Metallic Core] தெளிவாய்ப் புரிந்து கொள்ள வாய்ப்புக் கிடைத்தது.

    பூமியைப் போல் அடுக்கடுக்கான பல்வேறு அடித்தட்டுகளின்றி, புதக்கோள் ஒற்றை அடித்தட்டு கொண்டது.   நாசா புதன் கோளைச் சுற்ற முதலில் அனுப்பிய விண்ணுளவி மாரினர் -10 [Mariner -10] புதன் மேற்தளத்தை 45% அளவே ஆய்வு செய்ய முடிந்தது.   முழுப் பரப்பைத் தழுவாது, கணித்த பழைய மதிப்பீடுகள் 3.8 பில்லியன்  ஆண்டுகளில் புதனின் ஆரம் 0.5 – 2 மைல் [0.8 -3 கி. மீடர்] குன்றியது என்று குறிப்பிட்டன.   ஆனால் வெப்ப நிலை வரலாற்றின்படி 3 – 6 மைல் [5-10 கி. மீடர்] ஆரம் குறைந்தது என்பது முன்னுரைக்கப் பட்டது.  இப்புதிய விளைவுகள் புதக்கோள் பழைய அளவை விட 4.4 மைல் [7  கி.மீடர்] அளவு மேலாகச் சுருங்கியது என்று காட்டு கின்றன. அதாவது வெப்ப நிலை மாடலை ஒப்ப, தற்போதைய ஆரத்தின் நீளம் : 1516 மைல் [2440 கி. மீடர்].  பால் பைர்ன் குழுவினர் [Paul Byrne & Coauthors] 5934 மேடு, பள்ளங்களை ஆய்ந்து, புதக்கோள் 5 முதல் 560 மைல் சுருங்கி விட்டதாகக் கூறுகின்றார்.  இப்படிச் சுருங்கிப் போகும் புதக்கோளின் திரவ உட்கரு முழுவதும் ஒரு காலத்தில் உறைந்து போய்ச் சுருக்க இயக்கம் முற்றிலும் நிறுத்தமாகும் !

    சுமார் 3.8 பில்லியன் ஆண்டுகளுக்கு முன்பிருந்தே, புதக்கோளின் உட்கரு மெதுவாய்ச் சுருங்கத் துவங்கி, இதுவரை 8.8 மைல் [14 கி.மீடர்] குறைந்து, புதக் கோளின் ஆரம் தற்போது சராசரி 3030 மைல் [4800 கி.மீடர்] என்று கணிக்கப் படுகிறது.  பூமியைப் போல் புதக்கோளின் உட்கருவும் கடுமைக் கனல் உலோகக் கருவாய் [Super Hot Metallic Core] உள்ளது.  புதக்கோளின் அடித்தட்டு பூமியின் அடித்தட்டுகள் போல் ஒன்றின் மேல் ஒன்று ஏறி நில அதிர்ச்சிகள் உண்டாக்குவ தில்லை.

    முதன்முதல் புதன் கோளை இருபுறமும் சுற்றிய நாசா விண்ணுளவி

    2011 மார்ச் 17 ஆம் தேதி நாசாவின் விண்ணுளவி ‘மெஸ்ஸெஞ்சர்’ ஆறரை ஆண்டுகள் பயணம் செய்து பரிதியை மிக நெருங்கிச் சுற்றி வரும் புதனை நீள்வட்டத்தில் வட்டமிட ஆரம்பித்தது.  பரிதிக் குடும்பத்திலே மிகச் சிறிய புதக்கோள் பரிதிக்கு மிக நெருங்கிச் சுற்றுவதால் தள உஷ்ணம் சூடேறி ஈயத்தைக் கூட உருக்கிவிடத் தீவிரம் உள்ளது. பரிதியின் அத்தகையக் கடும் வெப்பத்தைத் தாங்கிக் கொள்ள மெஸ்ஸெஞ்சர் விண்ணுளவிக்குப் போதிய வெப்பக் கவசம் இணைக்கப் பட்டுள்ளது.  மெஸ்ஸெஞ்சர் விண்ணுளவிதான் முதன்முதல் புதன் கோளை இருபுறமும் ஆராயச் சுற்றி வருகிறது.  1974-1975 இல் நாசா அனுப்பிய மாரினர் -10 (Mariner -10) விண்கப்பல் வெள்ளிக் கோளைச் சுற்றிப் பிறகு புதக் கோளையும் ஒருபுறம் சுற்றிப் படம் எடுத்து விபரங்களையும் பூமிக்கு அனுப்பியது.  தற்போது இருபுறமும் சுற்றி வரும் மெஸ்ஸெஞ்சர் ஏழாண்டுக்கு முன்பு 2004 ஆகஸ்டு 3 ஆம் தேதி அமெரிக்காவின் பிளாரிடா கெனாவரல் ஏவு முனையிலிருந்து ஏவப்பட்டது.  மெஸ்ஸெஞ்சர் புதனை மிகவும் நெருங்கி 200 கி.மீ (124 மைல்) உயரத்தில் சுற்றப் போவதாகத் திட்டமிடப்பட்டுள்ளது.  விண்ணுளவியின் சுற்று நீள்வட்டக் குற்றாரம் : 200 கி.மீடர் (124 மைல்), நீளாரம் : 15,000 கி.மீடர் (9000 மைல்).

    மெஸ்ஸெஞ்சர் (MESSENGER) என்பதின் விரிவான விளக்கம் புதக்கோள் மேற்தளம், சூழ்வெளி, பூதளவியல் தொகுப்பு (MErcury Surface Space ENvironment GEochemistry & Ranging) என்ப தாகும்.  விண்ணுளவியின் நிறை : 485 கி.கிராம் (1070 பவுண்டு).  446 மில்லியன் டாலர் மதிப்புள்ள விண்ணுளவியின் பரிமாணம் : (1.85 மீடர் உயரம், 1.42 மீடர் அகலம், 1.27 மீடர் ஆழம்) (6 அடி உயரம், 4.5 அடி அகலம், 4 அடி ஆழம்).  விண்ணுளவி 608 கி.கிராம் (1340 பவுண்டு) எரிசக்தி திரவம், அழுத்தம் உண்டாகப் போதிய ஹீலியம் ஆகியவற்றைத் தூக்கிச் செல்லும் திறமுள்ளது.  திசை நோக்கி விண்ணுளவியைத் திருப்புவதற்கு நான்கு பெரிய உந்து ராக்கெட்டு களும், நான்கு சிறிய உந்து ராக்கெட்டுகளும் இணைக்கப் பட்டுள்ளன.  புதக் கோளின் இராசாயனக் கலவைகள், பூதளவியல், காந்தவியல் பண்பாடு களைத் துல்லியமாகப் பதிவு செய்ய மெஸ்ஸெஞ்சர் அனுப்பப் பட்டுள்ளது.  ஏவப்பட்ட பிறகு மெஸ்ஸெஞ்சர் விண்ணுளவி மூன்று முறை ஈர்ப்பு விசை வீச்சில் (ஜனவரி 2008 இல் பூமிச் சுற்று வீச்சு, அக்டோபர் 2008 இல் வெள்ளிக் கோள் சுற்று வீச்சு, செப்டம்பர் 2009 இல் புதக் கோள் சுற்று வீச்சு) உந்தப் பட்டு இறுதியில் வேகம் மிதமாக்கப் பட்டு 2011 மார்ச் 18 இல் புதக்கோள் ஈர்ப்பு விசையில் இழுக்கப் பட்டு அதை நீள்வட்டத்தில் சுற்ற ஆரம்பித்தது.  புதன் கோளை மெஸ்ஸெஞ்சர் குறைந்தது ஓராண்டுக்கு 730 முறை சுற்றிவந்து பூமிக்குத் தகவல் அனுப்பும்.  எரிசக்தி திரவம் விண்ணுளவி ஓராண்டுக்கு மேல் பணி புரிய போதிய அளவு உள்ளது.

    மெஸ்ஸெஞ்சர் விண்ணுளவி ஏவியதின் முக்கியக் குறிப்பணிகள்

    புதன் கோள் நமது நிலவை விடச் சிறிது பெரியது.  அதன் விட்டம் : 4800 கி.மீடர் (2980 மைல்).  அதன் உட்கரு உருகி உறைந்து போன ஒரு பெரும் இரும்புக் குண்டு.  பூமியைப் போல் வாயு மண்டலம் இல்லாத புதக் கோளில் புலப்படாத ஒரு மெல்லிய வாயுச் சூழ்வெளி (Exosphere) சுற்றியுள்ளது.  அந்த அரங்கில் பரிதியிலிருந்து வெளியேறும் அணுக்களும், அயான்களும் உலவி வருகின்றன.  புதன் தளத்திலிருந்தும் இராசாயன மூலகங்களும் உதறப் பட்டு எழுகின்றன.  சோடியம், பொட்டாசியம் போன்ற கன மூலகங்கள் புதன் மேற்தளத்தின் அருகே தவழ்கின்றன.  அவற்றைப் பரிதியின் ஒளித்துகள்கள் (Solar Photons) விண்வெளிக்குத் தள்ளுகின்றன.

    1.  புதக் கோளின் தளப் பொருட்களைத் (Surface Composition) துல்லியமாக அறிவது.

    2.  புதக் கோளின் பூதளவியல் வரலாற்றை (Geological History) வரையறை செய்வது.

    3.  புதக் கோளின் காந்தக் களத்தின் துல்லிய பலத்தையும் (Precise Strength of the Magnetic Field) அது தள உயரத்தின் ஏற்ற இறக்கத்தினால் மாறுவதையும் அறிவது.

    4.  புதக் கோளின் திசைப் பிறழ்ச்சியை (Mercury’s Libration) அளந்து உட்கருவின் திரவ வெளிக்கரு இருப்பை அறிவதற்கு ஆராய்ச்சி செய்வது.

    5.  புதக் கோள் துருவங்களில் உள்ள வானலை எதிரொலிப்பு பொருட்களின் (Radar Reflective Materials) பண்பாடுகளைத் தீர்மானிப்பது.

    6.  ஆவியாகும் முக்கிய கனிமங்களையும் (Volatile Species) அவற்றின் மூலச் சுரப்பிகளையும், படிவுகளையும் புதக்கோள் வாயுச் சூழ்வெளியில் (Exosphere) இருப்பதை ஆராய்வது.

    பரிதிக்கு அருகில் கடும் வெப்ப விண்வெளியில் சுற்றி வரும் புதன் கோள்!

    ரோமானியக் கடவுளின் தூதர் மெர்குரி [Mercury, Messenger of God] பெயரைக் கொண்டு முதற்கோள் புதனின் பெயர் மெர்குரி [Mercury] என்று வைக்கப் பட்டது. 17 ஆம் நூற்றாண்டில் பிறை வெள்ளியை [Venus] முதலில் கண்ட இத்தாலிய வானியல் மேதை காலிலியோ, புதனும் அவ்வாறே பிறை வடிவில் இருப்பதைத் தொலை நோக்கியில் பார்த்து, இரண்டும் பரிதியைச் சுற்றி வருகின்றனவா என்று ஆராய்ந்தார். அதை உறுதிப் படுத்த புதன், வெள்ளி ஆகியவற்றின் பிறைகளைத் தொடர்ந்து பதிவு செய்து, பூமியின் நிலவைப் போல் பாதி நகர்ச்சியில் பிறை பெரிதாவதையும், அடுத்த பாதி நகர்ச்சியில் பிறை சிறிதாவதையும் கண்டு பிடித்து, புதன் வெள்ளி இரண்டும் பரிதியை மையமாகக் கொண்டு சுற்றி வருகின்றன என்று நிரூபித்துக் காட்டினார். சூரியனும் மற்ற கோள்களும் பூமியை மையமாகக் கொண்டு சுற்றி வருகின்றன என்று கூறிய, கிரேக்க ஞானிகள் அரிஸ்டாடில் [Aristotle] டாலமி [Ptolemy] ஆகியோரின் கொள்கை பிழையான தென்று எடுத்துக் காட்ட, காலிலியோவுக்கு வெள்ளி புதன் ஆகிய கோள்களின் பிறை வளர்ச்சியும், பிறைத் தளர்ச்சியும் சான்றாய் அமைந்தன!

    பூமியிலிருந்து தொலை நோக்கி மூலம் பார்த்தால், சூரிய உதயத்திற்கு ஒன்றை மணி நேரத்திற்குப் முன்பு எழுந்து, சூரிய மறைவுக்கு ஒன்றை மணி நேரத்திற்குப் பின்பு புதன் தெரியாமல் போகிறது. சுக்கிரனும் காலையில் அதுபோல் விடி வெள்ளியாகவும், மாலையில் அந்தி வெள்ளியாகவும் ஒளி வீசுகிறது! காலை நேரத்தில் பரிதிக்குக் கிழக்குக் கோடித் திசையில் [Greatest Eastern Elongation], அடுத்து மாலை நேரத்தில் மேற்குக் கோடித் திசையில் [Greatest Western Elongation] மட்டுமே புதனைக் காண முடியும். அதாவது, புதன் கோளைப் பூமியி லிருந்து 28 டிகிரி கோணத்தில் பரிதிக்கு இருபுறமும் காண முடியுமே தவிர, மற்ற வீதி நகர்ச்சியில் அது சூரியனின் பேரொளி வெள்ளத்தில் மூழ்கிப் போகிறது.

     

     

    சுக்கிரனைப் [Venus] போல், புதனுக்கும் துணைக் கோள் எதுவும் இல்லை. சூரிய மண்டலத்தில் மற்ற எல்லாக் கோள்களுக்கும் [பூமி, செவ்வாய், வியாழன், சனி, யுரேனஸ், நெப்டியூன், புளுடோ] ஒன்று அல்லது மேற்பட்ட துணைக் கோள்கள் உள்ளன! கரடு முரடான துளைகள் நிறைந்த கரும் பாறை களைப் புதன் கொண்டிருப்பதால், அது பரிதியின் ஒளியை எதிரொ ளிக்கும் திறம் [Albedo = 0.06] மிகவும் குறைந்தது. பூமியைப் போல் பாதுகாப்பு வாயு மண்டலம் எதுவும் புதனில் இல்லாததால், சூரியனின் உக்கிர வெப்பம் முழுவதும் அதன் வரண்ட குழிகளையும், உச்சி மலைகளையும் சுட்டுக் கரிய வைக்கிறது.

     

     

    பரிதி குடும்பத்தின் முதற்கோள் புதனின் தனிச்சிறப்புப் பண்பாடுகள்

    உருவத்தில் பூமிக்கும் சந்திரனுக்கும் இடைப்பட்ட ஓர் வடிவைப் பெற்றது புதன். அதன் விட்டம் 3030 மைல். சந்திரனைப் போல் புதனும் கரடு முரடான குழிகள் [Craters] நிறைந்து, வாயு மண்டலம் எதுவும் இல்லாத ஏறக் குறைய சூன்யமான [Vacuum] சூழ்நிலையைக் கொண்டது.  புதன் சுக்கிரனைப் [Venus] போல் மித மிஞ்சிய சூடான [480 டிகிரி C] கோளாக இல்லா விட்டாலும், உஷ்ணம் அதிக அளவில் -180 டிகிரி C முதல் +430 டிகிரி C வரை ஏறி இறங்கி, கடும் வெப்பமும் குளிரும் ஊஞ்சல் ஆடும் ஒரு கோள். அதன் ஈர்ப்புச் சக்தி மிகவும் வலிமை அற்றது! பூமியின் ஈர்ப்பு விசை 1 என்று வைத்துக் கொண்டால், புதனின் ஈர்ப்பு விசை 0.38 தசம அளவு! அதாவது பூமியில் 100 பவுண்டு எடையுள்ள ஒரு பண்டம், புதனில் 38 பவுண்டு எடைதான் காட்டும்!  சூரிய ஒளிமயத்தில் பரிதியை மிகவும் நெருங்கிச் சுற்றி வருவதால், புதனைத் தொலை நோக்கி மூலம் காண்பது, மிகவும் கடினம். பரிதிக்குச் சுமார் 28 மில்லியன் மைல் தூரத்தில் நீள்வட்ட வீதியில் [Elliptical Orbit] 88 நாட்களுக்கு ஒரு முறைப் பரிதியைச் சுற்றி வருகிறது.

     

    நாம் வாழும் பூமி பரிதிக்கு அப்பால் 93 மில்லியன் மைல் தூரத்தில் உள்ளது! எல்லாக் கோள்களையும் விடப் பரிதியை வெகு விரைவில், மணிக்கு 100,000 மைல் வேகத்தில் சுற்றி வருகிறது, புதன்! வானலைத் தட்டு [Radar] மூலம் புதனின் கதிரலைகளை ஆராய்ந்ததில், அது தன்னைத் தானே 59 நாட்களில் சுற்றிக் கொள்வது அறியப் பட்டது. பூமிக்கும் பரிதிக்கும் இடையே சுற்றி வரும் சுக்கிரன், சந்திரனைப் போன்று, புதனும் அதனுடைய 88 நாள் பயணத்தில், சூரிய ஒளியில் பிறை வடிவைக் [Crescent Phases] காட்டி, பிறை வளர்ச்சியும், பிறைத் தளர்ச்சியும் பெற்று வருகிறது.  ஒளிநிறப் பட்டை ஆய்வில் [Spectroscopic Analysis] புதன் கோளத்தில் மிகவும் நலிந்த சூழக [Atmosphere] மண்டலமும், அதில் சோடியம், பொட்டாசியம் இருப்பதாக அறியப் பட்டது. அவற்றின் அணுக்கள் தரைப் பரப்பிலிருந்துதான் கிளம்பி யிருக்க வேண்டும்.

     

     

    ஒரு நூற்றாண்டில் 15 தடவை புதன், பூமிக்கும் பரிதிக்கும் இடையே குறுக்கீடு [Transit] செய்கிறது.  அப்பொது பூமி, புதன், பரிதி மூன்றும் ஒரே நேர் கோட்டில் அமையும்!  அந்தச் சமயத்தில் புதன் கோள் ஒரு கரும் புள்ளியாக, பிரம்மாண்டமான பரிதியின் வட்ட முகத்தில் பொட்டு போல் தெரிகிறது. 1677 இல் முதல் புதன் குறுக்கீடு காணப்பட்டுப் பதிவாகி யுள்ளது. அதற்குப் பின்பு இதுவரை 44 புதன் குறுக்கீடுகள் தொடர்ந்து காணப்பட்டுப் பதிவாகி ஆராயப் பட்டுள்ளன.

    நாசா புதனுக்கு முதலில் ஏவிய விண்கப்பல் மாரினர்-10

    நாசா 1973 ஆம் ஆண்டு நவம்பர் 3 ஆம் தேதி ஏவிய, விண்வெளிக் கப்பல் மாரினர்-10 [Mariner-10] சுக்கிரனை [Venus] முதலில் ஆராய்ந்து படமெடுத்து, அடுத்து 1974 பிப்ரவரி 5 ஆம் தேதி புதன் கோளை நெருங்கி 197 மைல் அருகே பறந்து ஒரு புறத்தை மட்டும் படமெடுத்தது.  நாசா சுக்கிரனின் ஈர்ப்பு சக்தியைப் பயன்படுத்தி, விண் கப்பலின் போக்கைக் கட்டுப் படுத்தி, புதனைக் குறிவைத்தது.

     

     

    அம்முயற்சி வெற்றி அடைந்து, ஆறு மாத இடை வெளிகளில் அடுத்து, அடுத்து மாரினர்-10 மூன்று முறைப் புதனைக் கடந்து, தொடர்ந்து புதுப் புது விபரங்களைப் பூமிக்கு அனுப்பியது. மாரினர்-10 புதனின் தளப் பகுதிகளை முதன் முதல் படமெடுத்து அனுப்பவும், எதிர்பாராதவாறு ஒரு பெரும் காந்தக் களத்தைக் கண்டு பிடிக்கவும் ஏதுவானது.

    புத மண்டலம் காந்த சக்தி கொண்டுள்ளதற்கு, அதன் உட்கருவில் இரும்புக் கோளம் இருக்க வேண்டும் என்று ஊகிக்கப் படுகிறது. பூமியின் சந்திரனைப் போல் மேல் தளத்தில் பாறைக் குழிகள் நிரம்பி இருந்தாலும், புதன் கோள் தனித்துவம் பெற்றுச் சிறிதளவு காந்த சக்தி கொண்டுள்ளது.  சந்திரனில் காந்த மண்டலமும் இல்லை! இரும்புள்ள உட்கருவும் இல்லை! புதன் தளத்தில் கோபுரம் போன்ற செங்குத்தான மலைகள், தாழ்ந்த பள்ளங்கள் ஏராளமாய் இருக்கின்றன. ஆனால் பூமியின் சந்திரனில் புதனைப் போல் செங்குத்தான மலைகள் இல்லை. புதன் கோளில் வாயு அழுத்தம் இல்லை! பிராணவாயு, நைடிரஜன் எதுவும் கிடையாது! நீரில்லை ! புதனும் பூமியின் நிலவைப் போலவே எந்த வித உயிரினமும் வாழ வழி இல்லாத ஓர் செத்த அண்டமே [Dead Planet]!

     

    செவ்வாய், சுக்கிரன் கோள்களைப் போல், புதனும் கடும் வெப்பம், குளிர்ச் சூழ்நிலை கொண்டு யாரையும் வரவேற்காத வரண்ட பாறை நிலமே! வாயு மண்டலத்தில் இம்மி யளவு ஆர்கான் [Argon], நியான் [Neon], ஹீலியம் [Helium] மிகச் சிறிய அழுத்தத்தில் சூழ்ந்துள்ளது! அப்பாறை நிலம் எங்கும் விண்கற்கள் விழுந்து விழுந்து பெருங் குழிகள் ஏற்பட்டுள்ளதை மாரினர்-10 எடுத்துக் காட்டியது.  மாரினர்-10 ஆய்வுச்சிமிழ் புதனின் காந்த சக்தி பூமியின் காந்த சக்தியில் நூற்றில் ஒரு பங்களவு இருப்பதாகக் கண்டது. புதன் பரிதியை இருமுறைச் சுற்றிவரும் காலத்திற்குள் [88 நாட்கள்], அது தன்னைத் தானே தன்னச்சில் மூன்று முறைச் சுழல்கிறது.

    1991 இல் பூமியிலிருந்து மிகச் சக்தி வாய்ந்த வானலைத் தொலைநோக்கி [Radio Telescope] மூலம் பார்த்ததில் புதன் கோளின் துருவக் களங்களில் பனிக்கட்டி அடுக்குகள் மேவி இருப்பதைக் காட்டியது.  ஆனால் அந்தப் பகுதிகளில் மாரினர்-10 ஆய்வுச்சிமிழ், 1974 இல் பயணம் செய்ய முடிய வில்லை!

     

    பூமியின் வட துருவத்திற்கு மேல் உயரத்திலிருந்து பார்த்தால், சூரிய குடும்பத்தில் புளுடோவைத் தவிர, மற்ற எல்லாக் கோள்களும் [புதன், வெள்ளி, பூமி, செவ்வாய், வியாழன், சனி, யுரேனஸ், நெப்டியூன்] ஏறக் குறைய ஒரே மட்ட வீதிகளில் எதிர்க்-கடிகார [Counter-Clockwise] சுழற்சியில் சூரியனைச் சீராய்ச் சுற்றி வருகின்றன. கடவுளின் மகத்தான படைப்புக்கு, பிரம்மாண்டமான பிரபஞ்ச அண்டங்களின் ஒழுங்கு இயக்க நியதி ஓர் அரிய எடுத்துக் காட்டு!

    1973 இல் வெள்ளி, புதன் இரண்டு கோள்களை ஒரே பயணத்தில் ஆய்வு செய்த மாரினர்-10 இன் பொறி நுணுக்கப் போக்கைப் பயன்படுத்தி, நாசா [NASA] விஞ்ஞானிகள் அடுத்து ஒரே விண்வெளிப் பயணத்தில், பரிதியின் புற வெளியில் சுற்றி வரும் வியாழன், சனி, யுரேனஸ், நெப்டியூன் ஆகிய நான்கு கோள்களை ஆராயும் திறமுடைய வாயேஜர்-2 [Voyager-2] ஆய்வுச் சிமிழைத் தயாரித்து 1977 ஆகஸ்டு 20 இல் அனுப்பி வெற்றி பெற்றது, ஒரு மாபெரும் விஞ்ஞானப் பொறியியல் சாதனை!  2014 ஆண்டில் ஈசாவும், ஜாக்ஸாவும் இணைந்து (ESA & JAXA) (European Space Agensy & Japanese Space Agency) புதன் கோளுக்கு விண்ணுளவி அனுப்பப் போவதாக அறியப் படுகிறது.

     

     

    (தொடரும்)

    ++++++++++++++++++++++++

    தகவல் :

    Picture Credit : NASA,

    1.  National Geographic Picture Atlas of Our Universe (1986)

    2.  Astronomy Today Chaisson & McMillan (1999)

    3.  Reader’s Digest – The Universe & How We See It  By : Giles Sparrow (2001)

    4.  Universe By : Roger Freedman & William Kaifmann III (6th Edition) (2002)

    5.  BBC News :  Messenger Spacecraft to Go Back to Mercury (June 11, 2001)

    6.  BBC News : NASA Set to Revisit Mercury (July 16, 2004)

    7.  NASA’s Messenger to Fly By Mercury During Retrograde (September 15, 2009)

    8.   Spacecom- Whole New Mercury Promised By NASA Spacecraft (Messenger) (August 15, 2010)

    9.   BBC News – Messenger Probe Enters Mercury Orbit By Jonathan Amos (March 17, 2011)

    10.  Daily Galaxy : The Extreme Planet : Messenger Spacecraft Swings into Orbit Around (Planet) Mercury Today.  March 11, 2011

    11. CU-Boulder Space Scientists Ready for Orbital Insertion 0f (Messenger), Mercury Spacecraft. (March 17, 2011)

    12.  Wikipedia “Messenger” Spacecraft (August 9, 2011)

    13. http://www.spacedaily.com/reports/Mercury_contracted_more_than_prior_estimates_999.html  [March 18, 2014]

    14.  http://news.nationalgeographic.com/news/2014/03/140316-mercury-shrinking-planets-nasa-messenger-spacecraft/ [March 16, 2014]

    15.  http://www.nst.com.my/latest/mercury-the-incredible-shrinking-planet-1.517249 [March 17, 2014]

    16.  http://www.spacedaily.com/reports/Mercurys_contraction_much_greater_than_thought_999.html  [March 18, 2014]

    17.  http://blog.education.nationalgeographic.com/2014/03/18/the-incredible-shrinking-planet/ [March 18, 2014]

    ++++++++++++++++++

    S. Jayabarathan (jayabarathans@gmail.com) (March 22, 2011)
    http://jayabarathan.wordpress.com/

    Tiny Planet Mercury Is Shrinking Fast

    Nasa says Mercury is shrinking

     

    Share

  • திருமால் திருப்புகழ் (34)

    கிரேசி மோகன்

     
    தனந்த தானனத்த தனந்த தானனத்த
    தனந்த தானனத்த-தனதான….

     

    100_8808

    மாசி மகத் திருவிழா - குடந்தை மகாமகக் குளம்
    மாசி மகத் திருவிழா – குடந்தை மகாமகக் குளம்

    “அகந்தை வேரறுத்தவ் விழந்த வான்கிடைத்திங்

    கும்பகோணம் தெப்ப உற்சவர்
    கும்பகோணம் தெப்ப உற்சவர்

    கிருந்த வாறிருக்க -ரமணேசர்
    புகன்ற வாசகத்தை உணர்ந்து மாதவத்தை
    நெருங்க ஞானவித்தை -அருள்வாயே
    அகன்ற சாகரத்தில் அனந்தன் மேலிருக்கை
    அமைந்த யோகநித்ரை, -வனமாலி
    சுகந்தம் வீசலக்மி பதங்கள் மேவநித்ய
    இனங்கள் சூரிநிற்க -பயில்வோனே
    தகுந்த வாறளிப்பு ,சினந்த மாமனுக்கு
    இகழ்ந்த பாலனுக்கு -முறைவாசல்,
    தினங்கள் போயெமர்க்கை விழுந்து சாவதற்குள்
    முகுந்த வாவகத்துள் -குடியேற
    புகுந்த ஆழிவிட்டு பருந்து வாகனத்தில்
    பறந்து வாயெனக்கு -துணையாக
    உயர்ந்த கோபுரத்துள் கிடந்து வாழவைக்கும்
    குடந்தை மாநிலத்து -பெருமாளே”

    பின்-குறிப்பு… அல்ல அல்ல எனது பின்-கோட்-குறிப்பு ‘’குடந்தை’’ எனப்படும் கும்பகோணம்…. என் சொந்த ஊர்….

     

    படங்களுக்கு நன்றி

    http://enthamizh.blogspot.in/2013/03/blog-post_5203.html

    http://www.dinakaran.com/Aanmeegam_Detail.asp?Nid=2137&Cat=3

     

    Share

  • தி.க.சியின் நாட்குறிப்புகள்

    வாசிப்புகளின் வாசலிலே – தி.சுபாஷிணி

    தொகுப்பு: வே.முத்துக்குமார்

    tkc

    இந்நூலின் தொகுப்பாசிரியரான வே.முத்துக்குமார் சிறந்த இலக்கியவாதியும் படைப்பாளியும் ஆவார். பிரபல நாளிதழ்களில் கவிதைகளும் கதைகளும் எழுதிவருபவர். இவர் தி.க.சி.யின் ஆத்மார்த்த சீடர். வெளிஉலகத்திற்குத் தன்னை விளம்பரப்படுத்திக்கொள்ளாது, தி.க.சி. அவர்கள்பால் அன்பு கொண்டு, அவருக்குத் தொண்டு புரியும் நெல்லைப் பண்பாளர். தி.க.சியின் இலக்கியப் பொக்கிஷங்களைத் தூசிதட்டி அடுக்கு ம்போது கிடைத்த நல்முத்து இந்நாட்குறிப்புகள்.  1948 ஆம் ஆண்டு டைரியில் முதல் நாள் தொடங்கி, நவம்பர் மாதம் பாதி நாட்கள் அய்யா குறிப்பு எழுதியிருக்கிறார்கள்.  முத்துக்குமார் இதைப்படித்த உடன் ‘இது ஒரு கால ஆவணம்’, எனக்கருதி நூலாக வடித்தார். அய்யாவின் இளம் வயது புகைப்படம் அட்டைப்படமாக அமைந்தது. பின்னட்டையில் இன்றைய தி.க.சி. அத்தோடு கி.ரா.வின் அழகான குறிப்பு!

    எனக்குக் கிடைத்த நண்பர்களில் தி.க.சி. வித்தியாசமானவர். என்னிடமுள்ள நல்லவைகளை மட்டும் எடுத்துக் கொண்டவர். சுமார் அறுபது ஆண்டுகளாக எங்கள் நட்பு நீடித்து வருகிறது. நான் மாறிக்கொண்டே வந்திருக்கிறேன் பலபல விசயங்களில். அவர் மட்டும் அச்சு அசல் தி.க.சி.யாகவே இருந்து வருகிறார். ‘மூத்த பிள்ளை’ என்று எங்களுக்குள் நாங்கள் தி.க.சியை குறிப்பிட்டுக்கொள்வோம். தி.க.சியை எதோடு ஒப்பிட்டுச் சொல்லுவது என்று நினைக்கிறபோது எனக்கு அவரை சுக்குக்கு ஒப்பிட்டுச் சொல்லலாம் என்று தோன்றுகிறது. ரசிகமணி சொல்லுவார்: “நாக்குக்குத்தான் -சுக்கு காரம்; குடலுக்கு ரொம்ப இதம்”. சுக்குக்கு மிஞ்சிய மருந்தும் உண்டா?

    இந்நூலைப் பதிப்பிக்க சந்தியா பதிப்பகம் முன் வந்து, இம்மாதம் 15 ஆம் நாள் அய்யாவின் கைகளில் அமரும் படி செய்துவிட்டனர். இதைவிட தி.க.சி. அவர்களுக்கு வேறு என்ன சந்தோஷம் இருக்க முடியும். நிச்சயமாக இந்நூல் கிடைத்ததும், ஒரு குழந்தையைப்போல் மகிழ்ந்திருப்பார். அந்த மகிழ்ச்சியின் நீட்சியிலேயே எனக்கொரு பிரதியும் அவர் கையால் கிடைக்கப்பெற்ற பாக்கியசாலியானேன். அப்பாக்கியத்தை உங்களுடன் பகிர்ந்துகொள்ளும் பேறும் உடனே கிடைக்கப்பெற்றுவிட்டேன்.

    ஆம். இது ஒரு கால ஆவணம்தான். 1925 ஆம் ஆண்டு மார்ச்சுத் திங்கள் 30 ஆம் நாள் தொடங்கிய வாழ்க்கையின் நீட்சியில் ஒரு கூறின் செயல்பாடு. அச்செயல்பாட்டு நாட்களின் சில குறிப்புகளை உங்களுக்கு அந்நூலிலிருந்து அளிக்க விழைகின்றேன்.  இதோ:&

    Friday, 30th January 1948

    சர்வஜித்து தைமீ 17 வெள்ளி

    இன்று மாலை 5.30 மணிக்கு உலகம் போற்றும் உத்தமர், அகிலமெங்கும் அஹிம்சை ஒளிபரப்பி அண்ணல், மகாத்மா காந்தி பிர்லா மாளிகையின் முன்பு, பிரார்த்தனைக் கூட்டத்தில், காக்கிச் சட்டையணிந்த ஒரு இந்துவால் சுட்டுக்கொல்லப்பட்டார்.  மார்பிலே ஒரு குண்டும், வயிற்றிலே 2 குண்டுகளும் பாய்ந்தன.  காந்திஜியின் மரணச் செய்தி உலகையே கண்ணீர் விடச் செய்து விட்டது.  இந்தியா முழுவதும் சொல்ல முடியாத சோகத்தில் ஆழ்ந்தது.  ‘நல்லவனுக்கு இது காலமில்லை’ என்றார் ஷா. 8.30 மணிக்கு நேருவும், பட்டேலும் ஒலிபரப்பினர்.  நாளை காலை 11 மணிக்கு பிர்லா மாளிகையிலிருந்து புறப்பட்டு மாலை 4 மணிக்கு யமுனை நதிக்கரையில் அடக்கம் நடைபெறுமாம்.

    Friday, 30th January 1948

    சர்வஜித்து தைமி 18 உ சனி

    இன்று நகரெங்கும் பரிபூரண ஹர்த்தால் கார், வண்டிகள், ரயில்கள் ஒன்றும் ஓடவில்லை.  கடைகள் மூடப்பட்டன.  விட்டு விட்டு லேசாக மழை பெய்து கொண்டிருந்தது.

    காலையிலே 10 முதல் 2 வரை ஆபீசிலே வேலை நடந்தது!  ‘Petty cash, Postage வவுச்சர்கள் போட்டு supplementary day book  எழுதினார்கள். Cash bookகிலும் நான் கை வைத்தேன்.

    நேற்றைய General Ledger விஷயமாக, posting விஷயமாக Accountantக்கும் எனக்கும் சிறு சண்டை வந்தது.  அவர் அதைச் செய்கிறேன் என்று சொல்லி என்னை ஏமாற்றிவிட்டார்!

    மாலையிலே ரேடியோக் கேட்டு விட்டு நகர்சுற்றி, நயினார்குளம் வரை போய்த் திரும்பினோம். இரவு சபாபதி வீட்டில்  ரேடியோ கேட்டோம்.  5 மணிக்கு காந்திஜியைத் தகனம் செய்தார்கள் யமுனை நதிக்கரையில்.

    Thursday, 12th February 1948

    சர்வஜித்து தைமீ 30உ வியாழன்

    காலையில் குமரகுருபரன் வீட்டிற்கு வந்தார்.  இன்று காந்திஜியின் சாம்பல் கரைக்கும் நாள்.  காலையிலே ஊர்வலம் சென்றது.  மாலையில் லாலா சத்திரமுக்கில் பந்தல் அமைத்து பாவையர் நூல் நூற்றனர்.  சாயங்காலம் சர்வகட்சிகளும் அடங்கிய மாபெரும் ஊர்வலம் ஒன்றும் ஆற்றங்கரையை நோக்கிக் கிளம்பியது.  ‘சுப்பரம், தீச்சட்டி, மொட்டைத் தலை’ ஆகியவைகளுடன் ஊழியர்கள் துக்கம் கொண்டாடினார்.

    நானும் சோமுவும் 10.30 மணிக்கு ரகுநாதன் வீடு சென்றோம்.  பேச்சு, திருக்குறள், காமத்துப்பால் ஆராய்ச்சி, ராஜரத்தினத்தின் கதையைத் திருத்துதல் ஆகியலை நடந்தது.  இரவு அண்ணாச்சி வீட்டில் ‘Oil’ முகவுரையை வாசித்து விட்டு பார்க்கிலே People’s Age  படித்தோம்.  இரவு 12 வரைக்கும் மீண்டும் People’s Age வாசித்தேன்.

    (Oil -அமெரிக்க எழுத்தாளர் அப்டன் சிங்லர் எழுதிய நாவல்)

    Monday, 23rd February 1948

    சர்வஜித்து மாசி மீ 1உ திங்கள்

    Letter to  கலியபெருமாள்

    படிப்பு : People’s Age – Illustrated weekly

    அரசியல் : காந்திஜியின் கொலையைப் பற்றி கிமிசிசி யில் ஜெயப்பிரகாஷ் நாராயணன் குற்றச் சாட்டும் படேலின் பதிலும்.

    பொருளாதாரம் : பாங்கில் நிறைய தங்க நகைகள் அடகுக்கு வருகின்றன, மக்கள் தனது கடைசி உடைமைகளையும் அடகு வைக்கின்றனர்.

    சமூகம் : சபாபதி வீட்டிலே இரவு ஒரு மணி நேரம் பேசிக் கொண்டிருந்தேன்.  கட்சி அபேட்சகர்கள் 8 இல் 4 பேர் திருச்சி கவுன்சிலர்கள் ஆயிருக்கின்றனர்.

    இலக்கியம் : ‘தேனீயின் விளம்பரம் பார்த்தேன்.  மற்ற மறுமலர்ச்சிப் பத்திரிகைகளின் கதி தான் இதற்கும் என்றார் சபாபதி.  ஆம், உண்மை.

    நண்பர்கள் : தி.ப.தி.க்கு ஜலதோஷம் எனக்கு அஜீரணம்.  மோரீஸ் பழத்தினால் புளிச்சேப்பம் உண்டாகிறது.

    தேனீ & எம்.வி. வெங்கட்ராமை ஆசிரியராக கொண்டு கும்பகோணத்திலிருந்து வெளிவந்த இலக்கிய மாத இதழ்

    Friday, 27th February 1948

    சர்வஜித்து மாசி மீ 15 உ வெள்ளி

    Letter to Chidambaram; Salary Day

    அரசியல் : Draft Const. ஐ புகழ்ந்து பத்திரிகைகள் பிதற்றுகின்றன.  1951 வரை எலெக்ஷன் கிடையாது என்றுவிட்டார் படேல்.

    பொருளாதாரம் : தையல்காரன் கூலியை 8 அணா லாபப்படுத்திக் கொடுத்ததற்காக சங்கரனுக்கு ரூ.0-1-3 லஞ்சம் காப்பிச் செலவு! இது தொழிலாளி வயிற்றில் அடிப்பது தான்.  8 உருப்படிக்கு ஒன்னரை ரூபாய்!

    இலக்கியம் : ஜகன்நாதன் எனக்கு தன்னம்பிக்கை இல்லை என்றார் ‘கலைஞர் கழக’ விஷயமாக.  நீங்கள் தான் அதற்கு வெட்கப்பட வேண்டும் என்றேன் நான்.  Typical  திருநெல்வேலிப் பண்பாடு ஜகன்நாதன் பேசியது என்றார் தி.ப.தி.

    நண்பர்கள் : நடராஜன் நேற்று முழுவதும் தூக்கமில்லை, அண்ணாச்சி வருந்தும் படி ரேடியோவை நிறுத்திவிட்டதால் & எனறு தனது முன்கோபத்தைப் பற்றிச் சொன்னார்.  இரவு 10 மணிக்கு கொஞ்ச நேரம் அவர் பாணியில் பேசிக் கொண்டிருந்தேன்.  சென்னைப் பயணத்தைப் பற்றிய கனவுகளால் இன்று தூக்கமில்லை.

    Wednesday,  21st April 1948

    சர்வஜித்து சித்திரை மீ 9 உ புதன்

    Letter to Sailappan; Letter from Va.Ka

    அரசியல் : காஷ்மீரைப் பற்றிய ஐ.நா தீர்மானத்தை ஜயங்கார் மறுத்து விட்டார்.  லாகூரில் பஞ்சாப் பாதுகாப்புச் சட்டத்தின் கீழ் ரொமேஷ் சந்திரா கைது செய்யப்பட்டார்.

    ஆபீஸ் : டவுன் ஆபீசை மூடும்படி உத்தரவு வந்துவிட்டது.  தந்தியில் விளம்பரம் வருகிறது.  அதற்கு 2 * 2 காலத்திற்கு ரூ. 16 கூலி!

    மாலையில் நேற்றைப் போல் இன்றும் ஆற்றிலே குளிக்கச் சென்றோம்.  பேச்சு sex விஷயத்தை சுற்றிச் சுற்றி வந்தது.  இன்று சற்று முன்னே எட்டிப் போய்க் குளித்தோம்.

    நேற்று குளித்ததினால் இன்று கால்வலி வந்துவிட்டது.  வலதுகால் மட்டும் அதிகமாய் வலித்தது.  இரவு பாலகணபதி விலாசில் சாப்பாடு, நடராஜன் பற்று ரூ. 2-8-0!

    Wednesday, 5th May 1948

    சர்வதாரி சித்திரை மீ 23உ புதன்

    Letter to Va.Ka & Chidambaram; Letter from Chidambaram

    அரசியல் : ராஜாஜி, கவர்னர் ஜெனரல் ஆகிவிட்டார்.  தென்னிந்தியாவில் குதூகலம்.  ஜவஹர் அடுத்த மாதம் தமிழ் நாட்டில் சுற்றுப் பயணம்.

    இலக்கியம் : ‘தேனீ விமர்சனம் வ.க.வுக்கு.

    சமூகம் : ராஜாஜியின் நியமனத்தைக் கண்டு அய்யங்கார்கள் துள்ளுவார்களாம்!

    பொருளாதாரம் : பல்புரூசு ரூ. 1-1-0, பல்பசை ரூ.0-14-0, பல்பொடி ரூ.0-1-0, கேசவர்த்தினி ரூ.0-12-0, பூட்ஸ் ரூ.3-5-0, இப்படியாக பல சாமான்கள் வாங்கினேன். தையல் கூலி ரூ.0-1-2-0.

    குளிப்பு : இன்று சபாபதி வராவிட்டாலும், நேற்று குளிக்காததை ஈடு செய்ய இன்று 9 மணிக்குப் போய் குளித்தோம்.

    Friday, 28th May 1948

    சர்வதாரி சித்திரை மீ 15உ வெள்ளி

    ‘ஷாப் சட்டப்படி வேலை முடிந்தாலும் நீங்கள் 7 மணி வரை ஆபீசிலேயே இருக்க வேண்டும். S.I.Bankல் அப்படித் தான் சட்டம்!  என்றார் ஏஜண்டு. வேலையில்லாமல் சும்மா இங்கே உட்கார்ந்திருப்பானேன்? Indian Bank இல் எப்படி நடக்கிறது பார்த்தீர்களா? என்றேன் நான்.

    ‘சிவாஜி’யிலே என் பெயரையும் சேர்த்து எழுத்தாளர் மகாநாட்டுப் பிரதிநிதிகளில் ‘பிரபலஸ்தர்கள்’ என்று திலோகம் குறிப்பிட்டிருக்கிறார்!

    தலைமறைவாயுள்ள கம்யூனிஸ்டுகளுக்கு தங்க இடமோ, குடிக்கத் தண்ணீரோ, பணமோ கொடுத்தால் 3 மாதக் கடுங்காவலும், 1000ரூ அபராதமும் விதிக்கப்படும் என்ற பாசிஸ அவசரகச் சட்டம் நேற்றைய பத்திரிகைகளில் வந்துள்ளது.

    திருலோகம் & திருலோக தீதாராம்: சிவாஜி இதழாசிரியர்

    Fridaay, 23rd July1948

    சர்வதாரி ஆடி மீ 8உ வெள்ளி

    படிப்பு : ‘லெனின் பிறந்தார்’

    அண்ணாச்சியிடம் ரகுநாதன் கடிதத்தைக் காட்டினேன்.  அமப்பித்தனின் ‘செல்லம்மாளை’ ரொம்பவும் பாராட்டினார் நடராஜன்.  சபாபதி ஆபீசுக்கு வந்தார் சம்பத்துக்கு மணியார்டர் செய்ய.

    இன்று Junior சிவசங்கரனுக்கு 6 மாதப் பிறந்த தின விசேடம்.  எனக்கு பாயாசச் சாப்பாடு! இரவு சபாபதி வீட்டிலே சீட்டாட்டம்.  ராத்திரி சாப்பிடாததால் உறக்கமில்லை.  Weeklyல்  C.R.Mandyயின் கதைப் படித்தேன்.

    கே. வேலாயுதம் ரொம்ப பெரிய மனுஷன் ஆய்விட்டான், நண்பர்களை மறந்துவிட்டான்’ என்று கூறினார் தி.ப.தி.

    Friday, 24th September 1948

    சர்வதாரி புரட்டாசிமீ 9உ வெள்ளி

    Office safety ordinance issued!.

    1. பியூன்களை சொந்த வேலைக்கு ஏவக் கூடாது.

    2. ஆபீஸ் நேரத்தில் வெளிச் செல்லக் கூடாது.

    3. ஆபீசில் பத்திரிகைகள் படிக்கக் கூடாது.

    4. இடைவேளியில் அரசியல் பேசக் கூடாது.

    ஏஜண்டு மட்டும் இத்தனையும் இதற்கு மேலும் செய்யலாம்.  அநீதி!  ஆபீசில் கருங்காலி C.V.R. பண்ணிய வேலை இது! கருங்காலிகளைக் கருவருப்போம்!

    இரவு 8 முதல் 9, மாணிக்கம், தி.ப.தி. நான் ஆகியோர் இலக்கியம், சினிமா, கலைகள்’ பற்றிப் பேசிக் கொண்டிருந்தோம்.

    இரவு ஆகாரம் கஞ்சி. இரவு 12 மணிக்கு தம்பியை ஏசினேன்.

    Wednesday, 6th October 1948

    சர்வதாரி புரட்டாசி மீ 21உ புதன்

    Book Post from A.I.R

    இன்று ஆபீசில் விரோதம் ரொம்ப வளர்ந்து விட்டது.  மேஜையில் தான் உட்கார்ந்து மதுசூதனனுடன் பேசிக் கொண்டிருப்பது பற்றி ஒவ்வொருவரையும் explanation கேட்டார் ஏஜண்டு.  பிறகு இன்னொரு explanation.

    Cashier-க்கும் Accountant க்கும் எவ்வித சம்பந்தமுமில்லையா? Fixed deposit இருக்கிறதே?  என்று கேட்டு ஏஜண்டை எதிர்த்து விட்டேன்.  இதை ராமகிருஷ்ணய்யர் சபாபதியிடம் சொல்லி ரொம்ப கண்டித்தாராம்.

    முத்தையா என்னைக் காட்டிக் கொடுத்துவிட்டான்.  இதை நான் எதிர்பார்க்கவில்லை, C.V.R ம் பாதி துரோகம் பண்ணி விட்டான்.  ராமகிருஷ்ணய்யர் நடுநிலைமை.  இரவு மதுசூதனன் வீட்டிற்குச் சென்று 2 மணி நேரம் மந்திராலோசனை செய்தோம்.  வழக்கம் போல் சபாபதி வீட்டிற்குச் சென்று ஸோமாசுடன் பேசிவிட்டு 10.30க்கு வீடு.

    Monday, 15th November 1948

    சர்வதாரி ஐப்பசி மீ 30உ திங்கள்

    Post from People’s Age; Card to Chidambaram

    காலையில் வ.க. சகோதரர்க்ள 9.30 மணிக்கு வந்தனர்.  பாளையங்கோட்டை பைண்டிங் ஆபீஸ் போய் விட்டு மீண்டும் மத்தியானம் வந்தனர்.  ஆபீஸ் ஜோலியை முடித்து விட்டு, பொன்னு கடைக்குச் சென்றோம்.  பின் ஸோமாஸைப் பார்க்கச் சென்றோம்.  போகும் போது, ‘அதிர்ஷ்டம், விதி, தர்மம், கடவுள்’ இவைகளில் அசோகனுக்கு அதிக நம்பிக்கை வந்துவிட்டதென்றும் அவைகளைப் பற்றிய உங்கள் அபிப்பிராயம் என்னவென்றும் கேட்டார் வ.க.

    முயற்சி, திட்டமிட்ட உழைப்பு, தன்னம்பிக்கை, சந்தர்ப்பத்தைப் பயன்படுத்துதல்’ ஆகியவற்றில் தான் எனக்கு நம்பிக்கை என்றேன்.

    பிறகு பார்க்கில் உட்கார்ந்து, ‘சிந்தனை, இலக்கிய விமர்சனம், கிராம ஊழியன், சல்லியர் கோன் கதைகள்’ இவைகள் பற்றிப் பேசிக் கொண்டிருந்தோம்.  உண்மையான விமர்சனத்தைப் பாராட்டும் பண்பை தமிழ்நாடு பெறவில்லை என்றார் வ.க.

    Tuesday, 16th November 1948

    சர்வதாரி கார்த்திகை மீ 1உ செவ்வாய்

    Letter to  தி.ப.தி; Letter from Raghunathan

    இன்று மனைவி வீடு தொடும் விசேடம் நடந்தேறியது.  பாயாசத்துடன் சாப்பாடு.  குழந்தையின் பெயர் ஜெயலெட்சுமி.  வாழ்க அவள்!

    “1948ல் நானெழுதிய நாட்குறிப்புகள் ஒரு முதிரா இளைஞனின் இலட்சியத் தேடல்களையும் பல்வேறு உளநிலைகளையும் பலவீனங்களையும் ஓரளவிற்குப் பிரதிபலிக்கின்றது” என்று தி.க.சி. அவர்கள் கூறுகிறார்.

    இந்நூலை மகாகவி வழிவந்த விடுதலைப் போராட்ட வீரர்கள் தோழர். இரா. நல்ல கண்ணு, தோழர் என்.சங்கரய்யா, தோழர் பழ.நெடுமாறன் ஆகியோருக்கு மனமுவந்து காணிக்கையாக அளித்திருக்கிறார்.

    ஒரு நூற்றாண்டின் இயக்க, இலக்கிய, திறனாய்தலின், நடுநிலை விமர்சனத்தின், இளம் படைப்பாளிகளின் ஊக்கமாய், இலக்கியத் தோட்டக்காரனாய் அனைத்துக்கும் மேலாக மனுசத்தனம் வற்றா ஊற்றாக ஒளிர்ந்து கொண்டிருக்கின்றார்  தி.க.சி.

    நூல்: தி.க.சி.யின் நாட்குறிப்புகள்

    தொகுப்பாசிரியர்: வே.முத்துக்குமார்

    பக்கம் & 176

    விலை & 125 ரூபாய்

    பதிப்பகம் & சந்தியா பதிப்பகம், அசோக் நகர், சென்னை & 83

    & கி.ரா.

    Share

  • அன்புள்ள (மணிமொழி) அம்மாவுக்கு!

    அன்புள்ள அம்மாவிற்கு,

           தங்கள் வயிற்றில் உதிக்கும் பெரும்பேறு பெற்ற அன்பு மகன் சண்முகம் எழுதும் கடிதம். இந்தக் கடிதத்தை நானோ இல்லை என்னுடன் பிறந்த மற்ற எழுவரில் ஒருவரோ, தங்களுக்குப் படித்துக்காட்டத் தாங்கள் இவுலகில் இல்லை என்ற எண்ணம், இலந்தை முள்ளில் சிக்கிக் கொண்ட வெளவாலைப் போல என் மனத்தைக் கிழித்தாலும், அரூபமாக நின்று எங்களைக் காக்கத் தொடங்கி இருக்கும் தாங்கள் நிச்சயம் இம்மடலுக்குச் செவிமடுப்பீர்கள் என்று நம்புகிறேன்.

          பணியிலிருந்து ஓய்வு பெற்றுவிட்ட நிலையில், பெரும் செல்வம் சேர்க்கவில்லை எனினும், வாழ்கையின் அடிப்படைத் தேவைகளைப் பூர்த்தி செய்துகொண்டு, பொருளாதாரச்சுமை வாழ்க்கையை நெருக்கடிக்கு ஆளாக்காத வகையில் இன்று உன் மக்களாகிய நாங்கள் வாழுகிறோம் என்றால், அதற்காக வாழ்க்கை முழுவதும், நீங்களும் அப்பாவும் எதிர்கொண்ட இன்னல்களும், வறுமையை எதிர்த்துப் போரிட்டு, வாழ்க்கையின் ஒவ்வொரு நிலையிலும், ஒவ்வொரு நாளும், ஒவ்வொரு மணித்துளியும் எங்களைக் கரையேற்ற வேண்டும் என்ற எண்ண வெள்ளத்தில் நீங்கள் இருவரும் நீந்தியதே காரணம் என்பதை நாங்கள் அனைவரும் மனப்பூர்வமாக உணர்கிறோம்!

          பெரும் தமிழ்ப்புலமையும், கணித அறிவும் பெற்றிருந்த அப்பாவால், எட்டுப் பிள்ளைகளையும் காப்பாற்றுவதற்குத் தேவையான பொருளீட்ட முடியாமல் போக, எப்பாடுபட்டாவது பிள்ளைகளைக் காப்பாற்ற வேண்டும் என்ற உந்துதலால், அவர் பொருள் தேடி பல ஊர்களுக்குச் சென்றுவிட்ட சமயங்களில் தனி ஆளாக நின்று சிறுவர், சிறுமிகளாகவும், மழலைகளாகவும் இருந்த எங்களைக் காத்த தங்களின் துணிவை எண்ணினால் இன்றும் மெய்சிலிர்க்கிறது.

          பொருள் தேடிப் பிரிந்து சென்ற அப்பா, மாதக் கணக்கில் திரும்பி வராத நிலையில், வயிற்றிற்கான உணவைக் கூடப் பெறமுடியாமல், வயல்வெளி ஓரங்களில் வளர்ந்திருந்த கீரைகளைப் பறித்து, உப்பை மட்டும் இட்டு வேகவைத்து எங்கள் பசியாற்றிய ஒரு இரவு வேளையில், நாற்பது வயதைக் கடந்திருந்த  உங்களிடம் தவறாக நடந்து கொள்ளும் கீழ்த்தரமான எண்ணம் கொண்ட சில ஆணாதிக்க வல்லூறுகள், நம் வீட்டுக் கதவின் மீது கற்களை எரிந்து நம்மை அச்சுறுத்த முயல, ஓரிரு நிமிடம் அச்சத்தில் உறைந்த நீங்கள், எங்களைக் காப்பாற்ற வேண்டும் என்ற எண்ணம் உங்களுக்குள் தீயாக எரிந்து கொண்டிருந்ததாலோ என்னவோ, வீட்டில் இருந்த அரிவாளைக் கையில் எடுத்து வைத்துக் கொண்டு,

    “டேய், எவன்டா அது பொட்டப் பசங்களா, தைரியமான ஆம்பளையா இருந்த உள்ள வந்து பாருங்கடா”

    என்று பேருருவம் எடுத்து நின்று, பெருங்குரலெடுத்துக் கத்திய, ஒரு சில நொடிகளில், கதவின் மீது மோதிய கற்களின் ஓசை நின்று போக, எங்களைக் கட்டியணைத்துக் கொண்டு கண்ணீர் விட்ட உன் வயிற்றில் உதிக்க நாங்கள் பெருந்தவம் செய்திருக்க வேண்டும் அம்மா!

    வாழையடி வாழையாய் வறுமையைக் கண்டும்,

    வாய்மைமதி தூய்மையுடன் வாழ்வியல் கொண்டு,

    வானுயரச் சிந்தனையை வழுவாமல்  கொண்டு,

    வாழ்க்கையைக் கற்பித்த தேவதை நீயே!

           அப்பா பெருள் தேடிப் பிரிந்து சென்றிருந்த மற்றொரு தருணத்தில், வறுமையின் கோர முகத்தைப் பார்த்துப் பார்த்து சலிப்படைந்திருந்த நீ, புலியிடம் சிக்கிக் கொண்ட கலைமான், முதலில் உயிரைப் பிடித்துக் கொண்டு தப்பித்து ஓட முயன்று, பின்னர் தப்பிச் செல்ல வாய்ப்பில்லை என்று உணர்ந்தவுடன், மரணத்தை ஏற்றுக் கொள்ளும் மனநிலையை அடைவதுபோல, வறுமைப் புலியிடமிருந்து வாழ்க்கைக் கலைமானைக் காத்துக் கொள்ள இயலாமல், மரணத்தை தழுவிடும் மனநிலையை அடைந்து, உணவில் நஞ்சினைக் கலந்து, எங்கள் அனைவருக்கும் கொடுத்து, நீயும் உட்கொண்டு, வாழ்க்கையை முடித்துக் கொள்ள இருந்த தருணத்தில், எங்கிருந்தோ திடீரென்று இறைவன் போலத் தோன்றி, நம் அனைவரையும் தடுத்துக் காப்பாற்றி, தன் குடும்பம் வறுமையில் இருந்த நிலையிலும் நமது பசியை ஆற்றிய, உன் சகோதரியும் என் சிற்றன்னையுமான “சின்னக்காள்” அம்மாளை, இன்றும் ஒவ்வொரு வேளை உணவு உண்ணும் முன்னும் நான் வணங்கத் தவறுவது இல்லை. அந்த நிகழ்வுகளை இன்று நினைத்தாலும் என் கண்களில் பெருக்கெடுக்கும் கண்ணீரின் வெப்பத்தில் என் கன்னங்கள் இரண்டும் வெந்துவிடுவது போல உணர்கிறேன்.

                வறுமையின் உச்சக் கட்டத்தில் நம் வாழ்க்கை இருந்த காலகட்டத்தில், நம்மை அரவணைத்து வாழ வைத்த தெய்வங்களான பொன்னம்மா அத்தை, தங்களது மற்றொரு சகோதரியும் என் சிற்றன்னையுமான காமாட்சியம்மாள், இன்னும் பலரையும் என் வாழ்நாள் முழுவதும் உங்களுக்கு இணையான இடத்தில் வைத்துப் போற்றி வருகிறேன் அம்மா!.

     இளமையினில் வறுமையறு புதல்வரொடு மடிவதென,

    ஈன்றோர் விதித்த கெடுவில்,

    நளசுவையி லுணவுவகை கனிவொடுறு பசியகல,

    பாங்காய் அளித்த தெய்வம்,

    பண்புநிறை சின்னக்காள் பாரிலொரு தெய்வமன்றோ!

    அன்புபெரு கிடுமன்னை காமாட்சி, பொன்னத்தை,

    வளமான வாழ்வுக்கு வழிகோல வித்திட்ட,

    மகிழ்வான தெய்வங்களே!

    ஏழ்மையிலு மேழைக்கு இன்முகத் தோடுதவி,

    செய்தவர்கள் தெய்வமன்றோ!

    வாழ்வில்நெறி பிறழாது எனைவகுத் துய்விக்க,

    வள்ளலென வந்த பேரும்,

    காலத்தி லிவரன்றி ஞாலத்தி லொருதெய்வம்,

    என்னுள்ளம் கண்ட திலையே!

    ஆலயம் சென்றாலு மங்குந் தினம்தொழும்,

    தெய்வங்கள் இவர்களன்றோ!

          இதுபோல வறுமையின் பிடியில் சிக்கித் தவித்தாலும், எங்களைக் காப்பாற்றி வெற்றிப் படிகளில் ஏற்றிவிட வேண்டும் என்ற உங்களின் நெஞ்சுரத்திற்கு முன்னால் புலியைக் கண்டு அஞ்சி ஓடும் யானையைப் போல, வறுமை உங்கள் உழைப்பிற்கும், தாய்மை உணர்வுக்கும் பணிந்து மெல்ல மெல்லப் பின்வாங்கத்தொடங்க, நம்பிக்கையுடன் எங்களைக் கல்வி கற்கத் தூண்டி, கிடைத்த சின்னச்சின்ன வாய்ப்புகளையும் முறையாகப் பயன்படுத்தி, எட்டுப் பிள்ளைகளையும் ஒருவர் பின் ஒருவராகக் கரையேற்றிய உங்களின் அசாத்தியத் திறமையை இன்றும் நாங்கள் வியந்து போற்றி, உங்களின்  பெயரன் மற்றும் பெயர்த்திகளுக்குத் தொடர்ந்து, அவர்களது மழலைப் பருவத்தில் இருந்து எடுத்துச் சொல்லி வந்தோம்.

    இன்று அவர்களும் கல்வியை முடித்து, தங்களுக்கென ஒரு தொழிலைத் தேர்ந்தெடுத்து, அதில் வேரூன்றி வெற்றிபெற்று உள்ளனர். அவர்கள் அனைவருக்கும் கலியாணம் முடிந்து, தத்தம் குடும்ப வாழ்க்கையில், மகிழ்வாக ஈடுபட்டு வருவதைக் கண்டு, உங்கள் மக்களாகிய நாங்கள் எட்டுப் பேரும் ஆனந்தம் அடைந்து நிற்கிறோம்.

          இந்நிலையில் உங்கள் பெயரன் மற்றும் பெயர்த்திகள், நம் குடும்பம் இந்த அளவிற்கு சிறப்பாக மேம்பட்டு வருவதற்கு ஆணிவேராக நின்ற தங்களின் பாட்டியையும், தாத்தாவையும் மகிழ்ச்சி நிறைந்த அன்புடனும், நன்றியுடனும் நினைவு கூர்ந்து போற்றுவதற்காக ஒருவிழா எடுக்க  முடிவு செய்தனர்.

          மூன்று நாட்கள், உங்களின் மக்கள் மற்றும் பெயரன் பெயர்த்திக்ள என மொத்தம் 83 பேர் ஒன்றுகூடி உங்கள் இருவரின் பெருமையையும், தியாகத்தையும் மட்டுமே பேசிப் பேசி மகிழ்ந்தோம்.

    தாத்தா, பாட்டியின் நினைவாக “ஒன்றுகூடி மகிழும் விழா” என்று இதற்குப் பெயரிட்டு, உங்களைப் பெருமைப் படுத்தினர்.

          திருச்செங்கோடு அருகிலுள்ள மோர்ப்பாளையம் என்னும் சிற்றூரில் பிறந்த நீங்களும், பெருந்துறை அருகிலுள்ள தச்சம்பாளையம் என்னும் சிற்றூரில் பிறந்த அப்பாவும்,  சிறுவர், சிறுமியராக இருந்த பொழுது உங்கள் வாழ்க்கையில் நடைபெற்ற சுவையான நிகழ்வுகளையும், (உங்கள் வாயிலாக நாங்கள் அறிந்து கொண்டது) நாங்கள் எட்டுப் பேரும் சிறுவர் சிறுமிகளாக இருந்த பொழுது நம் வாழ்க்கையில் நடந்த சுவையான, கசப்பான நிகழ்வுகளையும், உங்கள் பெயரன் பெயர்த்திகளுடன் பகிர்ந்து கொண்டோம்.

          அந்த நிகழ்வுகளைக் கேட்டு சில நேரங்களில் கண்ணீரோடும், சில நேரங்களில்  மனம் நிறைந்த சிரிப்புடனும் அவர்கள் தங்கள் உணர்வுகளை வெளிப்படுத்தியது மறக்க முடியாததாக அமைந்துவிட்டது.

          மூன்று நாட்கள் நடந்த விழாவின் முத்தாய்ப்பாக, சிலர் நம் வாழ்க்கையில் நடந்த பல்வேறு நிகழ்வுகளையும் ஓவியங்களாக வரைந்து எங்களுக்கு அளித்தனர்.

          “விழுதுகளின் விழா” என்னும் தலைப்பில் ஒரு கவிதையை எங்களுக்குப் பரிசாக வழங்கி எங்களை ஆனந்தக் கடலில் ஆழ்த்தினர். அந்தக் கவிதையையும் உங்களோடு பகிர்ந்து கொள்கிறேன்.

    விழுதுகளின் விழா

    போற்றும் புகழ்மோர்ப் பாளையம் பிறந்து,

    பாவளத் தச்சம் பாளையம் புகுந்து,

    போர்க்குணம் நிறைந்த சின்னம் மாள்நற்,

    பாத்திறம் நிறைந்த மாரிமுத்துவுடன்,

    பூக்கும் இல்லற வாழ்வில் இணைந்தார்!

    வாமன வடிவில் இருந்த வறுமை,

    வான்வரை வளர்ந்து வெறுமை காட்ட,

    வறுமையை வீழ்த்தும் வேகம் கொண்டு,

    வெற்றிப் படிகளில் மக்களை ஏற்றினர்!

    நுட்பமதி சின்னம்மாள் நோன் பிருந்து,

    வித்தகஞ்செய் முத்துமாரி தோள் இணைந்து,

    வெப்பமுமிழ் வாழ்வுதனை வெற்றி கொண்டு,

    இப்புவியில் வாழ்வாங்கு வாழுகின்றார்!

     

    அட்ட மா சித்தி களைப்,

    பெற் றெடுத்த ஆலமரம்,

    சுட்ட மா வறுமை யிலும்,

    சிற்பமென வாழ்ந்து நின்று,

    தொட்டு வானை எட்டிவிடும்,

    வித்தை களைக் கற்பித்து,

    விழுதுகளை வளர்த் தெடுக்க,

    விழுதுகளின் விழுதுகளும்,

    பழுதின்றிப் படர்ந்து நின்று,

    பணிவுடனே வணங்கு கின்றோம்!

    அன்புடன்,

    விழுதுகளின் விழுதுகள்.

    குறிப்பு:

          மாரிமுத்து-சின்னம்மாள் தம்பதியரின் மக்களுக்காக, அம்மக்களின் பிள்ளைகள் இணைந்து நடத்திய “ஒன்றுகூடி மகிழும் விழாவில்” வழங்கப்பட்ட கவிதை.

    தாத்தா பெயர்                                                           :               மாரிமுத்து.

    தாத்தாவின் ஊர்                                                      :               தச்சம்பாளையம்

    பாட்டி பெயர்                                                             :               சின்னம்மாள்

    பாட்டியின் ஊர்                                                        :               மோர்ப்பாளையம்

    மக்கட் செல்வங்களின் எண்ணிக்கை             :               எட்டு (8)

    பெயரன், பெயர்த்திகளின் எண்ணிக்கை         :              இருபத்து இரண்டு (22)

    கொள்ளு/எள்ளுப் பெயரன் பெயர்த்திகள்      :              இருபத்து ஏழு(27)

          இந்தக் கடிதத்தை எழுதியதன் மூலம் உங்களுடனும் அப்பாவுடனும் நேரடியாகப் பேசிய மனநிறைவை அடைகிறேன் அம்மா!

    இப்படிக்கு,

    உங்கள் அன்பு மகன்,

    சண்முகம்.

    Share

  • சென்னை பெண்கள் சர்வதேச திரைப்பட விழா (CWIFF) – 2014

     

    சென்னை பெண்கள் சர்வதேச திரைப்பட விழா (CWIFF) – 2014
    ————————————————————————————————————-

    film1

    தென் இந்தியாவின் மிக பிரம்மாண்டமான சர்வதேச திரைப்பட விழா, முதல்முறையாக சென்னையில் மே 20, 2014 முதல் 25, 2014 வரை நடைபெறவுள்ளது. இத்திரைப்பட விழாவில் மிக முக்கியமாக பெண்களால் இயக்கப்பட்ட திரைப்படங்களுக்கும், பெண்கள் குறித்த பல்வேறு வகைத் திரைப்படங்களுக்கும், முன்னுரிமை கொடுக்கப்படும். மேலும் ஊடகத்துறையை சார்ந்த பல பயிற்சி பட்டறைகளும் நடைபெறவுள்ளன. இதற்கான பத்திரிகைச் சந்திப்பு மார்ச் 8, 2014 அன்று வாணிமஹாலில் நடைபெற்றது.
    · விளம்பர படங்கள் (Ad film)

    · குறும்படங்கள் (Short film)

    · முழு நீளத்திரைப்படம் (Featurefilm)

    · விளக்கத்திரைப்படம் ((Documentary film)

    film2

    (CWIFF) பெண்களை மையமாக கொண்ட திரைப்படங்கள் மட்டுமல்லாமல் அனைத்து வகையான படங்களையும் வரவேற்கிறது. இவ்விழாவில் ஆண்களுக்கும் வாய்ப்பு அளிக்கப்படும். மாணவர்கள் அனுப்பும் திரைப்படங்களுக்கு பதிவுத் தொகையில் சிறப்பு சலுகை உண்டு. மேலும் மாணவர்கள் தரும் திரைப்படங்களுக்கு தனி முன்னுரிமை அளிக்கப்படுவதோடு அவர்கள் திரைப்படங்களை ஒரு நாள் முழுவதும் திரையிடவும் ஏற்பாடு செய்யப்பட்டுள்ளது. இதற்கான முடிவுகள் நீதிபதிகள் குழுவினரால் தேர்வுசெய்யப்படும். இத்திரைப்பட விழாவுக்கான திரைப்படங்கள் பிவிஆர் திரையரங்கிலும்ஆர்.கே.வி ,ரிவ்யு அரங்கிலும் திரையிடப்படும்.

    film3

    திரைப்படங்களை பதிவு அஞ்சல் மற்றும் www.cwiff.com என்ற இணையத்தளம் மூலமாக அனுப்பலாம். படங்களை அனுப்ப வேண்டிய கடைசி தேதி ஏப்ரல் 15, 2014.இத்திரைப்பட விழாவில் வெற்றி பெறுபவர்களுக்கு பெறுமதியான பரிசு தொகையும், விருதுகளும் வழங்கப்படவுள்ளன.

    இலங்கையை சேர்ந்த படைப்பாளிகள் மேலதிக விபரங்களுக்கு இந்த நிகழ்வின் ஆலோசனை சபை உறுப்பினராகவும் சர்வதேச ஊடக இணைப்பாளராகவும் இருக்கும் கவிஞர் பொத்துவில் அஸ்மினுடன் தொடர்புகொள்ளலாம் (0094 771600795,vtvasmin@gmail.com)

    Ø விபரங்களுக்கு

    P.G.Udhayakumar,

    Festival Director

    Chennai Women’s International Film Festival,

    O/o Eventaa SouthIndia Productions,

    A division of M/s Dollphin Interactive Sciences pvt. ltd.,

    Ph: +91 98844 28927
    URL : www.cwiff.com,

    E-mail: info@cwiff.com

    Facebook: https://www.facebook.com/CWIFF2014

    twitter: https://twitter.com/CWIFF2014

     

    Share

  • திருமால் திருப்புகழ் (33)

     

    கிரேசி மோகன்

    Tamil-daily-news-paper_31147402525
    ‘’ஏறு மயிலேறு விளையாடும் முகமொன்று’’ அருணகிரியார் சந்தத்தில்….
    ———————————————————————————————————–blogger-image-1144768691

    இராமன் திருப்புகழ்….

    “கோசலைகு மாரனென கொஞ்சுமுகம் ஒன்று
    தேசுமுனி வாசிஷ்ட யோகமுகம் ஒன்று
    கோசிகனின் சீடனென கண்டமுகம் ஒன்று
    கோரமகள் தாடகையை கொன்றமுகம் ஒன்று
    ஈசன்சிலை யாகசிலை இற்றமுகம் ஒன்று
    வாசமகள் ஜானகியின் ஆசைமுகம் ஒன்று
    ஆசுகவி மாருதியின் நட்புமுகம் ஒன்று
    ஆதிகவி ஓதுமிதி காசபெரு மாளே”
    ———————————————————————————————————-

     

     

    Share

  • மக்கள் கேட்கும் கேள்விகள் (1)

    பவள சங்கரி

    தலையங்கம்

    உயர்திரு அன்னா ஹசாரே அவர்களே,

    ஒரு கட்சி ஆட்சியில் இருக்கும் பொழுது அவர்களுக்கு எதிராக அதாவது அவர்களின் ஊழலுக்கு எதிராகப் போராடுவதாகக் கூறி சமீபத்தில் தலைநகரில் நீங்கள் போராட்டம் நடத்தினீர்கள். ஊழலுக்கு எதிரான சட்ட முன் வடிவம் பாராளுமன்றத்தில் சட்டமாக நிறைவேற்றப்பட்டது. இதை நிறைவேற்றிய ஆளும் கட்சியினரும் இதற்குத் துணை நின்ற எதிர் கட்சியினரும் ஊழலை ஒழிப்பதில் உண்மையாக அக்கறை உடையவராக இருப்பதாக நீங்கள் கருதுகிறீர்களா? தேர்தல் சமயமான இந்த நேரத்தில் அனைத்துக் கட்சியினரும் ஊழலில் திளைத்தவர்களை தங்களுடைய வேட்பாளராக அறிவித்துள்ளனரே, நீங்கள் தற்போது என்ன செய்து கொண்டிருக்கிறீர்கள்? ஜெயப்பிரகாஷ் நாராயணன் மற்றும் அண்ணல் காந்தியடிகள் போல் போராடாமல் அமைதி காப்பதற்கு என்ன காரணம். நீங்கள் போராட வேண்டிய இத்தகைய நேரத்தில் அலட்சியப் போக்குக் காட்டுவதை மக்கள் ஏற்றுக் கொள்வார்கள் என்று நினைக்கிறீர்களா?

    இன்னும் கேட்க வேண்டிய கேள்விகளும், பதில் சொல்ல வேண்டிய தலைவர்களும் நிறையவே இருக்கிறார்கள்?

    வாக்களிப்போம்!

    ஊழற்ற அரசை உருவாக்குவோம்!!

    விலை போகாமல் வாக்களிப்போம்!!!

    Share