முகமூடிக்காரன்

ரோஷான் ஏ.ஜிப்ரி 

காலத்தின் வழியே
தொலைத்த சுயத்தை
தெருத்தெருவாய் தேடியலையும் நான்
அண்மையிலிருந்து
காசுக்காகவும்,கடமைக்காகவும்
முழுநேர முகமூடிக்காரன்


என்னிடம் ஒரு முகமும்
சில..முகமூடிகளும் இருக்கின்றன
குழந்தைகள்முன் ஒருமுக மூடியையும்
மனைவியிடம் ஒரு முக மூடியையும்
உறவினர்களிடம் ஒரு முகமூடியையும்
நண்பர்கள் முன் ஒரு முக மூடியையும்
வேலை தளத்தில்
வேறொரு முகமூடியையும்
அணிய வேண்டியது அவசியமாகி விட்டது

எத்தனை நேர்த்தியாக இருப்பினும்
மாறி,மாறி மாட்டிக் கொள்ளும்
ஒவ்வொரு முகமூடியையும்
களற்றி வைக்கையில்
மாட்டிக் கொள்ளவும்  நேர்கிறது

நிம்மதியை தொலைத்தவன்
துயிலற்று அலைவதுபோல் ஆயிற்று
வாழ்க்கையில் வசித்தல்

முகமூடிகளற்ற
என்னுடைய பழைய முகத்தை
யாரிடம் பறிகொடுத்தேன்
என்பதைத்தான் இன்னும்
தெரியாமல்
தேடி அலைகிறேன்.