Blog

குற்றாலச் சாரலிலே ……

க. பாலசுப்பிரமணியன்

பொதிகையிருந்து பூத்துவரும் புதுப்புனலே

பொழிந்துவிடும் பொலிவுடனே குற்றாலத்தில் ..

பொங்குதமிழில் புன்சிரிக்கும் கவிதையென

புதுமணமே முகர்ந்துவிடும் மலைச்சாரல் !

எதுகையின்றி மோனையின்றி தாளமின்றி

இசைபாடும் இலையசைத்து மரங்கள் !

கலையரசி யாழிசையைக் கவர்ந்துவந்து

காதருகே கவிபாடும் கருவண்டுகளே !

மங்குஸ்தான் பழம்பறித்து மகிழ்ந்திருக்கும்

மந்தியெல்லாம் மலையோர மரங்களிலே !

மலைச்சாரல் நீர்நனைந்து மலர்களெல்லாம்

மண்வீழ்ந்து மாலைதன்னை கோர்க்கும் !

வானமுதம் வழிந்ததுபோல் வளைந்துவரும்

வாசமுடை மூலிகையுடன் தேனருவி !

வான்தெறிக்கும் நீர்திவலையில் வானவில்லாட

வள்ளலென பெருகிவரும் ஐந்தருவி !

கைநனைத்துக் கால்நனைத்துத் தலைநனைத்து

உடல்நனைக்க உளம்நனைத்திட ஓடும் !

கடுகெண்ணை நல்லெண்ணெய் தலையூரக்

களைப்பெல்லாம் நீரினிலே கரைந்தோடும் !

தூதுவளை வல்லாரை நெல்லிப்பொடியோடு

தூக்கம்வர நல்லதொரு ஜாதிக்காயும்

தூயமனம்காண மோனமுடன் யோகத்தையும்

முதுகலையாய் ஓதிவிடும் யோகியர்கள் !

மேகங்களைத் தலைசுமந்த மோகத்திலே

புவியரசி காதலிலே மலையரசன் !

வேழங்கள் அசைந்தாடி நடப்பதுபோல்

வேகமின்றி அரவணைக்கும் தென்றல் !

கண்திறந்து பார்த்தோருக்கு காட்சியங்கே

கயிலைநாதன் கயல்விழியின் திருக்கோலம் !

கண்மூடி மலையருவி முன்னிருந்தால்

காலம்மறந்து ஞாலம்மறக்கும் நல்யோகம் !

June 27, 2016
கற்றல் ஒரு ஆற்றல் – 33
க. பாலசுப்பிரமணியன்

கற்றல் சிறப்புற எவ்வளவு தூக்கம் தேவை ?

” வகுப்பில் தூங்கி வழியாதே. போய் முகத்தைக் கழுவிக்கொண்டு வா…” என்று ஒரு முறையாவது மாணவர்களைப் பார்த்துக் கூறாத ஆசிரியர்களே இருக்க முடியாது. விருப்பமில்லாத பாடங்கள், சோர்வுற்ற மனநிலை, ஆசிரியர்களிடம் ஈடுபாடற்ற தன்மை, உடல் சோர்வு, உணவு வகைகள் மற்றும் உண்ணும் முறைகளால் தூக்க நிலை ஊக்கப்படுத்தப்பட்டு கற்றலில் மற்றும் கவனத்தில் பாதிப்பு ஏற்படுகின்றது .

நல்ல தூக்கமின்மை கற்றலை வெகுவாக பாதிக்கும் என்று ஆராய்ச்சிகள் வெளிச்சமிட்டுக் காட்டுகின்றன. சராசரியாக மூளை தொடர்ந்து 16 மணி நேரம் வேலைபார்த்தபின் களைப்புற்று தூக்கத்தைத் தழுவுகின்றது. சிலருக்கு தூக்கம் 6 அல்லது 7 மணி நேரம் போதுமானதாக உள்ளது. இந்த நேரம் ஒரு தனி மனிதருடைய உடல்வாகு மற்றும் பல பரிமாணங்களால் நிச்சயிக்கப் படுகின்றது. எனவே அனைவரையும் ஒரே மாதிரியான நேரப் பரிமாணங்களில் கட்டுபடுத்துவதோ அல்லது வகைப் படுத்துதலோ தவறாகின்றது.

“ஒரு மனிதனுக்குள்ளே தூக்கத்திற்கும் விழிப்பிற்க்கும் இடையே ஒரு மிகப்பெரிய போராட்டமே நடக்கிறது” என்று மூளை அறிவியல் நிபுணர் ஜான் மெடீனா என்பவர் கூறுகின்றார். ஒரு தனி மனிதனுக்கு தூக்கம் ஒரு நாள் நிறைவு பெறவில்லையென்றால் அதை உடலும் மூளையும் “தூக்கக் கடன் “(sleep Debt) கணக்கில் சேர்த்து விடுகின்றன. இந்தக் கடன் சுமை கற்றலை கிட்டத்தட்ட 30 விழுக்காடுகள் குறைக்கின்றன என்றும், இந்தச் சுமையின் அதிகரிப்பும் கற்றலும் எதிர் விகிதத்தில் இருப்பதாகவும் காணப்பட்டுள்ளது. ஆகவே தூக்கத்தை விலக்கி அதிக நேரம் கண்விழித்துப் படிப்பது மூளையின் ஆரோக்கியத்திற்க்குக் கெடுதலாக இருப்பதோடு மட்டுமின்றி நல்ல நினைவின் அடித்தளங்களை ஆட்டிவிடுகின்றன.

“அன்றைய பாடங்களை அன்றே படி” என்று சொல்லப்படுவதும் “பாடங்களை திரும்பத் திரும்பப் படி” என்று பல காலங்களாகக் கொடுக்கப்பட்ட அறிவுரை மூளையின் இயற்கையான குணங்களுக்கு ஏற்றதாக அமைந்ததாம்.

தூக்கம் பாதிக்கப்படும் நிலையில் கற்றலில் கீழ்கண்ட பாதிப்புகள் ஏற்படுகின்றன:
1. கவனமின்மை
2. நினைவுச் சிதறல்
3. ஆர்வக் குறைவு
4. மன அழுத்தம்
5. அமைதியின்மை
6. வெறுப்பு
7. தேவையற்ற கோபம்
8. கருத்து ஒருங்கிணைப்பின்மை
9. செயலில் தாமதம்
10. தளரும் புத்திகூர்மை
ஆகவே சரியான நிறைவான தூக்கம் எவ்வாறு கற்றலுக்குத் தேவைப் படுகின்றது என்பதை நாம் உணர வேண்டும். மேலும் நம்முடைய தூக்கத்திற்கான அட்டவணைகள் எப்படியிருந்தாலும் நமது உடல் தனக்கான அட்டவணையை தானே தயாரித்துக் கொள்கிறது. இதை உயிரி கடிகாரம் (Bio -clock ) என்று அழைப்பார்கள். இந்த கடிகாரத்தை நாம் மாற்றி அமைக்க நினைக்கும் பொழுதில் அதனால் உடல் ஹார்மோன்களின் செயல்கள் பாதிக்கப்பட்டு பலவிதமாக உடல்நிலை மற்றும் அதன் ஆரோக்கியம் பாதிக்கப்படுகின்றது.

தூக்க நேரங்களை மாற்றி அமைத்து கற்றலைத் தொடரும் நிலையில் மூளையில் அதற்க்கான வலைத்தளங்கள் வலுவாக அமைவதில்லை. மாற்றாக நல்ல தூக்கத்தின் போது மூளை பல வினாக்களுக்கு அமைதியாக பதிலைத் தேடி வைத்துக்கொள்வதாகவும் கருதப்படுகின்றது.

ரஷ்ய நாட்டைச் சேர்ந்த டிமிட்ரி மெண்டெலீவ் என்ற ஒரு வேதியல் ஆராய்ச்சியாளர் தன்னுடைய ஆராய்ச்சியின் வினாக்களுக்கு தூக்கத்தில் பதில் கண்டதாகக் கூறப்படுகின்றது. இதே போல கெகுலே என்ற விஞ்ஞானி தன் கண்டுபிடிப்பிற்கு தூக்கத்தில் கண்ட கனவே காரணம் என்று சொன்னதாக பரவலாகக் கூறப்படுகின்றது.

சிக்கல் தீர்த்தல் (Problem Solving ), நெருக்கடி மேலாண்மை (Crisis Management) போன்ற பல சீரிய அறிவுத்திறன்களுக்கு நல்ல தூக்கத்தின் தேவையை வல்லுனர்கள் வலியுறுத்துகின்றனர்.

தற்காலத்தில் மாணவர்கள் தூங்கும் நேரத்திற்கு முன் அதிக நேரம் கண்விழித்து அலைபேசிகளில் பேசிக்கொண்டிருத்தலும், உரை செய்திகளை (Text message) அனுப்புதலும் மூளையின் ஓய்வுக்கும் அமைதியான உறக்கத்திற்கும் ஏதுவானதாக இல்லை என்று உணரப்படுகிறது. இதனால் தூங்கும் நேரத்தில் மூளையில் நினைவு அழுத்தங்கள் ஏற்பட்டு கற்றலின் ஆழத்தையும் திறனையும் பாதிக்க வாய்ப்புள்ளதாக தற்போதைய ஆராய்ச்சிகள் கூறுவது மட்டுமின்றி மனநல வல்லுனர்களும் கருதுகின்றனர்.

(தொடரும்)
June 27, 2016
“ ஜோதிடம் “

தமிழ்த்தேனீ

வேலைக்கு சேர்ந்து சில நாட்கள் சென்ற பின்   ஒரு நண்பரைச் சுற்றிலும் பல நண்பர்கள் உட்கார்ந்து பேசிக்கொண்டிருந்ததைக் கவனித்துவிட்டு நானும் அந்தக் கூட்டத்தில் பங்கெடுக்க அவர்களை சமீபித்தேன்.

வாப்பா தம்பி வா உக்காரு உன் பேரு என்னா என்றார் நடு நாயகமாக உட்கார்ந்திருந்த ஒரு மூத்த நண்பர்.

சார் என் பேரு கிருஷ்ணமாச்சாரி, நான் வேலைக்கு சேந்து ஆறு மாதம் ஆச்சு என்றேன். அப்போதுதான் கவனித்தேன் அந்த நடு நாயகம் அங்கிருந்த அனைவருக்கும் உள்ளங் கையில் உள்ள ரேகைகளைப் பார்த்து ஜோதிடம் சொல்லிக் கொண்டிருந்தார்.   என் கையை நீட்டச் சொன்னார். கடந்த காலத்தைப் பற்றி எல்லோரும் சொல்வார்கள், என் வருங்காலத்தைப்   பற்றிச் சொல்ல முடியுமா என்றேன்.    இங்க பார்ரா நான் கடந்த காலம் , வருங்காலம் எல்லாம் சொல்வேன் என்றார், சரி சொல்லுங்கள் என்றேன். நான் சொல்றது இருக்கட்டும்   நீ உன் வருங்காலத்திலே என்ன ஆகப் போகிறாய் என்றார்.

நான் ஒரு நடிகனாவேன், இயக்குனராவேன், எழுத்தாளனாவேன் என்றேன். கொல்லென்று ஒரு சிரிப்பலை எழும்பியது அங்கே! இதோ பாரு தம்பி என்னோட முன்னோர்கள் ஜோதிடத்திலே வல்லவங்க, அவங்ககிட்டேருந்துதான் நான் இந்தக் கலையைக் கத்துகிட்டேன்.

ஆமாம் உனக்கு இந்தக் கலையிலே நம்பிக்கை இருக்கிறதா என்றார் நாயகம். எனக்கு இந்தக் கலையிலே நம்பிக்கை இருக்கிறது, ஆனால் ஜோதிடம்   சொல்பவர்கள் மீது நம்பிக்கை இல்லை என்றேன்

புரியலையே என்றார் நடுநாயகம்.

இந்தக் கலை மிக நல்ல கலை, அதில் சந்தேகமில்லை, ஆனால் இந்தக் கலையைக் கற்றுக் கொள்பவர்கள் முழுமையாகக் கற்றுக் கொண்டு சொல்கிறார்களா என்பதுதான் என் சந்தேகம் என்றேன்.

எப்படி உனக்கு இந்த சந்தேகம் வந்தது என்றார் நடுநாயகம் . ஆண்களுக்கு வலது கை ரேகையையும் பெண்களுக்கு இடது கை ரேகையையும் பார்த்துதான் கைரேகை ஜோதிடம் சொல்வார்கள், ஆனால் நீங்கள் இங்கே ஆண்களுக்கே இடது கை ரேகையைப் பார்த்து சொல்கிறீர்கள் என்றேன்.

மீண்டும் ஒரு முறை கொல்லென்று சிரிப்பு ஒலி கேட்டது, இதோ பாரு எல்லாம் தெரிஞ்சா மாதிரிப் பேசாதே, இப்போ உன்னோட வலது கை ரேகையைப் பார்த்து   நான் பலன் சொல்றேன் என்றார்.

ஐயா இப்போது மாலை 7 மணி, பொதுவாக இரவில் கை ரேகை ஜோதிடம் பார்க்கமாட்டார்கள், பார்க்கவும் கூடாது என்றேன். திகைத்துப் போனார் அவர்

அவரிடம் நான் சொன்னேன் உங்களை எல்லாம் தெரிந்தவர் என்று காட்டிக் கொள்ள ஜோதிடக் கலையைப் பயன்படுத்தாதீர்கள். இங்கே இருப்பவர்கள் நீங்கள் கூறுபவைகளை உண்மையென்று நம்பி அதனால் ஏதேனும் அவதிக்குள்ளானால் அந்த அவதிக்குண்டான பலன் உங்களைச் சேரும், வீணாக பாவம் செய்யாதீர்கள் என்றேன்.

நீ இன்னும் என்னைப் பற்றிச் சரியாகப் புரிந்து கொள்ளவில்லை அரைகுறையாக எதையோ தெரிந்து கொண்டு கதையளக்கிறாய்.   சரி நாளை நமக்கெல்லாம் விடுமுறை அப்போது உன் கையைப் பார்த்து நான் பலன் சொல்கிறேன் , அப்போது தெரிந்து கொள்வாய் என் திறமையைப் பற்றி என்றார்.

இன்று அமாவாசை நாளைக்கு ப்ரதமை, ப்ரதமையில் யாரும் ஜ்யோதிடம் , ஜாதகம் , கைரேகை பார்க்க மாட்டார்கள் என்றேன். ஜ்யோதிடம் ,ஜாதகம் கைரேகை போன்றவைகளை நல்ல நேரத்தில் தான் பார்க்க வேண்டும். அதுவும் குறிப்பிட்ட நல்ல நாளில் வெற்றிலை பாக்கு போன்றவைகளை காணிக்கையாக வைத்து முதலில் ஜ்யோதிடம் பார்ப்பவருக்கு அளித்துவிட்டு அவரையே நம்பி, மனதில் உறுதியுடன் , நம்பிக்கையுடன் கேட்பவர் கேட்டால்தான் பலிக்கும் என்றேன்.   அது மட்டுமல்ல கொண்டு வருபவரிடம் வெற்றிலை பாக்கு இவைகளை வாங்கி அந்த வெற்றிலைகளை முதலில் எண்ணுவார்கள். அதன் பிறகு தனித்தனியே பிரித்து அந்த வெற்றிலைகளை பின் புறமாக அமைந்திருக்கும் நரம்புகளைப் பரிசோதிப்பார்கள் என்றேன்.

இதோ பார்ரா கைரேகையைப் பாருடான்னா வெற்றிலையோட நரம்புகளைப் பாப்பாங்களாம் என்று எக்காளமிட்டு சிரித்தார் நாயகம்.

ஆமாம் அந்த நரம்புகள் அமைப்பில் வித்யாசம் உண்டு. வெற்றிலையின் காம்பின் பகுதியிலிருந்து சீரான நடு நரம்பும் , அந்த நடு நரம்பிலிருந்து பிரியும் பக்கவாட்டு நரம்புகள் தொடங்கும் ஒவ்வொரு இடத்திலிருந்தும் வெற்றிலையின் வால் பக்கம் சேரும் இடம் வரையில் சீராக, அமைந்து முடியுமிடத்தில் இரண்டு நரம்புகளும் ஒரு புள்ளியில் சந்தித்தால் அது பெண் வெற்றிலை.

அப்படி இல்லாமல் தொடக்கத்திலிருந்து நரம்புகள் சீராக இல்லாமல் வெற்றிலையின் வால் பக்கத்தில் அந்த நரம்புகள் மேலும் கீழுமாய் சந்தித்தால் அவை ஆண் வெற்றிலை என்றும் சொல்வார்கள். என்றேன் நான்

ஆமாம் உனக்கு என்னா வயசு என்றார் நாயகம், நான் சொன்னேன் 18 முடிந்து ஆறு மாதங்கள் ஆகின்றன என்றேன். அதுக்குள்ள வெற்றிலையிலேயே ஆண் பெண் விதயாசம் பாக்க ஆரம்பிச்சிட்டியா உருப்பட்டாப் போலத்தான் என்றார் நாயகம்.

ஐய்யா நான் பார்க்கிறேன் என்று சொல்லவில்லை ஜோதிட விவரமறிந்தவர்கள் இதையெல்லாம் கூர்ந்து கவனிப்பார்கள் என்று சொன்னேன்.

ஓஹோ   சரி சரி நானும்தான் கேக்கறேன் உனக்குத் தெரிந்ததை யெல்லாம் சொல்லு , நாங்க நம்புவோம் என்று நக்கலடித்தார் நாயகம்.

நானும் அமைதியாக அப்படியே ஐயா சொல்கிறேன் நம்புவதும் நம்பாததும் உங்கள் இஷ்டம். இப்படி நாம் கொண்டு செல்லும் வெற்றிலைகளை நம்மிடம் பேசிக் கொண்டே நமக்கே தெரியாமல் அவைகளில் பெண் வெற்றிலை எவ்வளவு, ஆண் வெற்றிலை எவ்வளவு என்று எண்ணிக்கையை மனதில் வைத்துக்   கொள்வார்கள். அதில் பெண் வெற்றிலைகள் எவ்வளவு ஆண் வெற்றிலைகள் எவ்வளவு என்று எண்ணி அந்த எண்ணிக்கையை மனதில் கொண்டு பலன்களை சொல்வர் என்றேன்.

வெற்றிலை என்பது வெற்று இலை அல்ல, விஷயமுள்ள இலை என்பது என் அனுபவத்தில் அறிந்திருக்கிறேன். கும்பகோணத்து மக்கள் வெற்றிலை போடும் அழகை ரசித்திருக்கிறீர்களா   நல்ல விருந்தை உண்டுவிட்டு, சாவகாசமாக திண்ணையில் காற்றாட வந்து உட்கார்ந்து இடுப்பில் வேட்டி மடிப்பில் இருக்கும் அந்தச் செல்லத்தை ,அந்த வெற்றிலைப் பெட்டியை எடுத்து கனிவோடு ஒரு முறை அதைப் பார்த்துவிட்டு, கையால் அன்பாக இதமாக அந்தப் பெட்டியைத் தடவிக்கொடுத்துவிட்டு, வலிக்காமல் மெல்லத் திறந்து அதன் உள்ளே இருக்கும் வெற்றிலையை, ஒவ்வொன்றாக எடுத்து உள்ளங்கையால் சுத்தமாக ,இதமாக தடவி , வெகு லாவகமாக மனதுக்கு இதமான சொற்களை, கலைகளை, ஆராய்ந்து கொண்டே, சங்கீத ஞானத்தையும் விவரித்துக்கொண்டே, கூடவே சில குறும்புக்காரர்கள்.

சங்கீதம் பாடிய பெண்மணியின் சாரீரத்தையும் , கூடவே சரீரத்தையும் பற்றி மிக லாவகமாக நுணுக்கமான சொற்களால் குறும்புடன் ஸ்லாகித்துக்கொண்டே   இதமாக சுண்ணாம்பை எடுத்து வெற்றிலையில் தடவி, லாவகமாக நடு நரம்பில் மடித்து முன் பக்கமாக நடு நரம்பை மட்டும் கிழித்து, மடித்து கையில் வைத்துக்கொண்டு, மணக்கும் தூள் பாக்கை வாயில் போட்டுக்கொண்டு, மடித்த வெற்றிலையை வாயில் போட்டு வெற்றிலைக்கு வலிக்காமல் இதமாக மென்று அதன் சாறை வாயில் குதப்பிக்கொண்டே பன்னீர் புகையிலையையும் வாயில் போட்டு அதோடு சுவைத்து கடைவாயில் அதை அடக்கிக்கொண்டு சிவந்த உமிழ் நீர் வழிய எதிரே இருப்பவர்மீது தெறிக்காமல் பேசும் நளினம் இருக்கிறதே அடடா!

இத்தனை கலைகளும் அந்த வெற்றிலைப் பெட்டியில்தான் இருக்கிறது என்று நம்பும் அவர்களுக்கு   இந்த வெற்றிலைப் பெட்டி செல்லம்தான்.

வெற்றிலைப் பெட்டி செல்லமாக இருக்கலாம், ஆனால் வெற்றிலையே செல்வம் என்று நாம் உணர்வோம். வீட்டில் வெற்றிலைக் கொடி வைத்து அந்தக் கொடி நன்றாக வளர்ந்தால் செல்வம் பெருகும் என்பது நம்பிக்கை. தேனி மாவட்டம் பெரியகுளம், ஜெயமங்கலம், மேல்மங்கலம், வடுகபட்டி, சில்வார்பட்டி, நல்லகருப்பன்பட்டி, பெரியகுளம் கீழவடகரை, தெய்வேந்திரபுரம், தாமரைக்குளம் மற்றும் போடி, சின்னமனூர் பகுதியில் அதிக அளவில் வெற்றிலைக் கொடி பயிரிடப்படுகிறது.

வெற்றிலையில் எத்தனை ரகம் இருக்கிறது என்று பார்த்தால் கருப்பு வெற்றிலை அல்லது கார வெற்றிலை என்னும் கும்பகோணத்து கொழுந்து வெற்றிலை ஒரு ரகம். கம்மாறு வெற்றிலை, கற்பூரவெற்றிலை மற்றும் சாதாரண வெற்றிலை என்பன.கற்பூர மணத்துடன் சறிது காரமாகவும் இருப்பது கற்பூர வெற்றலையாகும்.

வெற்றிலைக்கு நல்ல மணமும் , காரமும் உண்டு. கருப்பு நிறமுடன் நல்ல காரமாக இருப்பது கம்மாறு வெற்றிலை. அகத்தி மரங்களை இடையில் வளர்த்து அதில் வெற்றிலைக் கொடிகளைப் படர விடுவார்கள். சில வெற்றிலைகள் நன்றாகப் படர்ந்து பெரியதாக வளரும், சில வெற்றிலைகள் சிறு வடிவமாய் இருக்கும் ,பெரிதாக வளராது.

பொதுவான குணம். சீதம் நீக்கும், வெப்பம் தரும், உமிழ்நீர் பெருக்கும், பசி உண்டாக்கும், பால் சுரக்க வைக்கும், காமத்தைத் தூண்டும். நாடி நரம்பை உரமாக்கும், வாய் நாற்றம் போக்கும். வெற்றிலைச் சாறு சிறுநீரைப் பெருக்குவதற்கும் பயன்படுகிறது. வெற்றிலைச்சாற்றுடன் நீர் கலந்த பாலையும், தேவையான அளவு கலந்து பருகி வர நீர்ச்சுருக்கு என்னும் நோய் குணமாகும்.

வெற்றிலையில் விளக்கெண்ணெய் தடவி அதை அடுப்பில் காயவைத்து லேசான சூட்டுடன் குழந்தைகளின் மார்பில் பரப்பினால் நாள்பட்ட சளி கரைந்து குழந்தை சுகமாக மூச்சுவிடும்.

வயிற்றுப் பொறுமல் மந்தம் போன்றவைகளுக்கு இதே முறையில் வெற்றிலையை வாட்டி வயிற்றில் இட்டால் சற்று நேரத்தில் குழந்தை வலி நீங்கிச் சிரிக்கும்   வெற்றிலைச் சாறுக்கு தொண்டையிலுள்ள குரல் நாளங்களைச் சரிப்படுத்தும் குணம் உண்டு , அதனால் குரல் வளமாகும் . அதனால்தான் இசைக்கலைஞர்கள் வெற்றிலை போடும் பழக்கம் மேற்கொள்ளுகிறார்கள்.

மன்னருக்கு வெற்றிலை மடித்துக் கொடுக்க அடைப்பைக் காரர்கள் என்று ஒரு வேலையாள் உண்டு. அவர்கள் வெற்றிலையை பின்பக்கமாக மடித்து நடு நரம்பு நீக்கி அளவாக சுண்ணாம்பு தடவி தேவையான பாக்கை அதிலிட்டு மன்னர்களுக்கு சுவைக்கக் கொடுப்பார்கள்.

தாம்பூலத்தில் பயன்படும் வெற்றிலை இல்லாத வைபவமே கிடையாது. இன்று வரை வெற்றிலை இல்லாத வைபவங்களோ, பண்டிகைகளோ கிடையாது. வெற்றிலையில் மைதடவிப் பார்த்து குறி சொல்லுபவர்கள் உண்டு. திருமண சம்பந்தத்தை உறுதி செய்ய வெற்றிலை பாக்கு வைத்து தட்டு மாற்றிக்கொண்டு தொடங்குவார்கள் .

வெற்றிலையில் ஒரு ரகசியம் உண்டு

நல்ல நாட்கள் பார்க்கவோ, திருமண சம்பந்தம் பேசவோ நாம் ஜோசியரிடம் செல்லும்போது நாம் வெற்றிலை அவரிடம் அளித்தால், அவர்கள் எத்தனை வெற்றிலை நாம் கொண்டு சென்றோம் என்பதை எண்ணியே நாம் நினைத்த காரியம் நடக்குமா நடக்காதா என்று கூறிவிடுவார்கள்.

அது மட்டுமல்ல வெற்றிலையின் அமைப்பில் கிளை நரம்புகள் வெற்றிலையின் இருபக்கத்திலும் சமமாகப் பரவி நடு நரம்போடு வந்து இணையும் வடிவத்தை வைத்துக்கொண்டே அந்த வெற்றிலை ஆண் வெற்றிலையா ,அல்லது பெண் வெற்றிலையா என்று கண்டறியும் அறிஞர்கள் நம்மிடையே உண்டு

அப்படி கண்டு பிடித்து பெண் வெற்றிலை அதிகமாக இருந்தால் அதை வைத்து வந்தவரின் காரியம் நடக்க சாத்தியக் கூறுகள் எவ்வளவு சதவிகிதம் என்பதையும் கண்டறிவார்கள். பெண் வெற்றிலை அதிகமாயிருந்தால் அதை சக்தியின் வடிவம் என்பர். காரிய சித்திக்கு அதிக எண்ணிக்கை கொண்ட பெண் வெற்றிலை சக்தி கொடுக்கும் என்பது நம்பிக்கை.

“அந்ததை அடைக்காய் தின்பதில் ஊறு

முதல் நீர் நஞ்சாம்-அதி பித்தம்

இரண்டாவதூறு நீரே-கடையமிர்தம்

மூன்றாவதூறு நீர் தான்

கனமதுர நான்காவதூறு மந்நீர்

மடையெனவே ஐந்தாறிற் சுரந்துள் ஊறி

வருநீர் களைச் சுகித்து

தடையுருப் பித்தமொடு மந்த நோயும்

தளர்பாண்டு நோயும் உண்டாம் தரம் சொன்னோம்.””

என்று தேரையர் என்னும் சித்தர் எழுதியிருக்காரு   என்றேன்

அடேங்கப்பா எல்லாம் தெரிஞ்சிருக்கே உனக்கு என்று என்னைச் சமாளிக்கும் விதமாக தன் தோல்வியை சமாளித்தார் நடுநாயகம்.

அன்புடன்

தமிழ்த்தேனீ

June 27, 2016
மல்லிகை மணக்கிறது !

எம். ஜெயராமசர்மா … மெல்பேண் … அவுஸ்திரேலியா

தமிழினை முதலாய்க் கொண்டு
தரணியைப் பார்க்க வைத்த
உரமுடை டொமினிக் ஜீவா
உவப்புடன் என்றும் வாழ்க

அளவிலா ஆசை கொண்டு
அனைவரும் விரும்பும் வண்ணம்
தெளிவுடன் எழுத்தை ஆண்ட
தீரனே வாழ்க வாழ்க

சொல்லிலே சுவையை ஏற்றி
சுந்தரத் தமிழைக் கொண்டு
மல்லிகை இதழைத் தந்த
மாதவன் ஜீவா வாழ்க

தொல்லைகள் பலவும் கண்டும்
துவண்டு நீ இருந்திடாமல்
மல்லிகை இதழை நாளும்
மலர்ந்திடச் செய்தாய் நன்றாய்

தோழிலே சுமந்து சென்றாய்
சுகமுடன் பணியைச் செய்தாய்
ஆதாலால் அந்த மல்லி
அனைவரின் வசமாய் ஆச்சு

சிறு கதை மன்னனாக
சிறந்து நீ விளங்கினாலும்
பெரு மனங் கொண்டதாலே
பிரபலம் ஆகி விட்டாய்

சரிவெலாம் வந்த போதும்
சலிப்பிலா உள்ளங் கொண்டு
நிலைபெற உறுதி பூண்ட
நீயென்றும் நிலைத்து வாழ்க

கண்ணீரைக் கொண்டு நீயும்
கதைபல எழுதி நின்றாய்
தண்ணீரைக் காட்டித் தானே
தகைவுடை பரிசைப் பெற்றாய்

உண்மையாய் உழைத்து நின்றாய்
ஊருக்கு வேரும் ஆனாய்
உன்னலம் துறந்து நின்றாய்
உயர்ந்து நீ இருக்கின்றாயே

விண்ணிலே நிலவாய் நின்று
வெளிச்சத்தை காட்டி நாளும்
மண்ணிலே எழுத்தை ஆண்டு
மதிப்பினைப் பெற்று விட்டாய்

மல்லிகையை வளர்த் தெடுத்த
வல்லவனே நீ வாழ்க
நல்லதமிழ் எழுதி நிற்கும்
நாயகனே நீ வாழ்க
எல்லையிலாப் புகழ் பெற்று
என்றுமே நீ வாழ்க
எழுத்துலகில் ஜீவா நீ
என்றுமே வாழ்க வாழ்க

நடந்தலைந்து நீ தந்த
நல்ல தமிழ் ஏடெமக்கு
நல்விருந்தாய் இருந் தமையை
நாம் மறக்க மாட்டோமே
தெரிந் தெடுத்து வைத்தபெயர்
சிறந் தோங்கி நிற்கிறது
வரம் பெற்ற ஏடாக
மல்லிகையும் மணக்கிறது

மல்லிகைப் பந்தல் போட்டு
வளர்த்தனை பலரை நாளும்
கள்ள மில் செயலினாலே
கற்றவர் புகழ நின்றாய்
நல்லதோர் ஏடாய் நாளும்
மல்லிகை வளரச் செய்தாய்
நாட்டிலே உள்ளார் நெஞ்சில்
நாயகன் ஆகி விட்டாய்

மல்லிகை மணக்கிறது
மனமெல்லாம் மகிழ்கிறது
செல்லுகின்ற இடமெல்லாம்
ஜீவாவை பார்க்கின்றோம்
நல்லதொரு ஏடுதந்த
நற்றமிழன் ஜீவாவே
எல்லையிலா இன்பமுடன்
என்றுமே நீவாழ்க

June 27, 2016
சுவாமி விவேகானந்தர்

சுலோசனா

5ஆம் வகுப்பு முதல் 12ஆம் வகுப்பு வரை பயிலும் மாணவர்களுக்கு விடுமுறை பண்பாட்டு பயிற்சி வகுப்பில் ஆற்றிய உரை.

மகான்கள் பூமிக்கு வருவதன் நோக்கம்

தாய்மையின் பங்கு

விவேகானந்தரின் இளமைப் பருவம் இந்திய பண்பாட்டின் உயர்வு . விவேகமும் வைராக்கியமும், ஒழுக்கம், தன்னை வளர்த்தல், சகோதரத்துவம்,சேவை மனப்பான்மை, சராசரி மனிதர்களாகப் பிறக்கும் எத்தனையோ உயிர்களை கடைத்தேற்றுவதின் பொருட்டு சாதாரண மனிதன் சான்றோன் எனும் நிலையை அடையும் பொருட்டே மகான்கள் இறை அருளால் மண்ணில் வந்து பிறக்கின்றனர். பிறவாநிலையை எய்திவிட்ட அவர்கள் நம் பொருட்டே இங்கு வருகின்றனர்.

சத்குரு தியாகராஜசுவாமிகள்,இவர்களை வணங்கி,எந்தரோ மகானுபாவுலு அந்தரிகி வந்தனமு” என்று பாடுகின்றார். எத்தனயோ மகான்கள் –அத்தனை பேருக்கும் வந்தனம் என்று நாமும் வணங்க கடமைபட்டிருக்கின்றோம். சுவாமி விவேகானந்தர் பல விதங்களில் பூர்ணத்துவம் அடைந்த ஒரு மாபெரும் மகான். அறிவார்ந்த பக்தியில் குருவின் சேவையில்,நாட்டுப்பற்றில் மனித குலத்திற்கு செய்யும் சேவையில் என பலவித கோணங்களிலும் பரிமளிக்கின்றார். அவருடைய குருவான பகவான் ராமகிருஷ்ண பரமஹம்சர் சிந்தனைகளையும் இந்து மதத்தின் உள்ளார்ந்த தத்துவங்களையும் ஸ்ரீராமகிருஷ்னரின் சர்வ சமயசமரச கருத்தை உலகெங்கும் முழங்கியவர். அவரின் தாய் திருமதி புவனேஸ்வரி ஓர் உயர்ந்த பெண்மணி. இந்திய
பண்பாட்டின் எடுத்துக்காட்டான குணம் வேண்டி மகனுக்கு தெய்வ சிந்தனையை அன்னத்தோடு அன்பாக ஊட்டி வளர்த்தார்.

“எப்பொருள் யார்வாய் கேட்பினும் அப்பொருள்

மெய்பொருள் காண்பறிது”

எனும் வள்ளுவரின் வாக்கின்படி ஆராயும் மனப்பான்மை அவரோடு சேர்ந்து வளர்ந்தது. வக்கீலுக்கு படித்துக் கொண்டிருந்தவர் பகவான் இராமகிருஷ்ணரின் சிஷ்யர் ஆனதும் பின்னாட்களில் அமெரிக்காவில் இந்து சமயத்தின் சார்பாகப் பேசி உலகப் புகழ் அடைந்ததும் உலகமறிந்த வரலாறு அவர் குழந்தைகளையும் இளைஞர்களையுமே நாட்டின் செல்வங்களாக கருதினார். இன்று ஒழுக்கமுடனும் வீரத்துடனும் திடமான உடம்புடனும் வளர்க்கப்படும் சிறுவர் சிறுமியரே நாளை இந்தியாவின் நல்ல குடிமக்கள் ஆவர் எனக் கருதினார்.

துறவியாயினும் சுவாமியால் தாய் நாட்டுப் பற்றை துறக்க முடியவில்லை.

இளைஞர்கள் பொது அறிவால் தங்களைத் தாங்களே நல்ல முறையில் பண்படுத்திக் கொள்ள முடியுமெனக் கருதினார்.விவேகமும் வைராக்கியமும் மனிதனை அவன் லட்சியத்திற்கு அழைத்துச் செல்லும் என்றார்.நல்ல முடிவுகளை எடுப்பது விவேகம்.எடுத்த முடிவுகளை நிறைவேற்றிக் கொள்ள தேவைப்படுவது வைராக்கியம்.எடுத்த முடிவை படிப்பில் தொழிலில் முன்னேற வைராக்கியம் தேவை. படிக்க உழைக்க எவ்வளவு நேரம் தேவை,அந்த நேரத்தை எப்படி தேடுவது? பிடித்த சில விஷயங்களை அனுபவிப்பதில் அளவு வைத்துக் கொள்ள வேண்டும்.விளையாடுவது அளவோடு.மாலை முழுதும் விளையாட்டு என்கின்றார் மகாகவி பாரதியார்.காலை எழுந்தவுடன் படிப்பு என்கின்றார்.நாளின் தொடக்கத்திலேயே கல்வியை பயிலவேண்டும் என்கின்றார்.டி வி பார்ப்பதில் விடியோ கேம் விளையாடுவதில்லை என்பதெல்லாம் வைராக்கியத்தின் அடையாளம்.தொழில் கல்வியோ வேறுவிதமான கல்வியோபயின்று ஒரு நல்ல திறமைசாலியாக எடுத்துக் கொண்ட துறையில் வளருவதே வீட்டிற்கும் நாட்டிற்கும் ஒருவர் செய்ய வேண்டிய அவசிய கடமை.ஒழுக்கமான சிறுவனே சிறந்த இளைஞனாக வளர முடியும்.அவனே நல்ல மகனாக நல்ல சகோதரனாக, நல்ல கணவனாக,சிறந்த தந்தையாக உருவாக முடியும்.சகோதரமனப்பான்மை மனித நேயம் இவைகள் சுவாமிஜியின் மனதில் நிறைந்த பன்பான உணர்வுகள்.

ஒன்றே குலம்,ஒருவனே தேவன் என்ற திருமூலரின் கருத்தே பகவான் இராம கிருஷ்ணரின் தலையாய கருத்தாகும்.அல்லா எனவும் ஏசு எனவும் ஈசனே எனவும் அழைப்பதெல்லாம் ஒரு இறைவனையே என்கின்றார் பகவான். பாணி என்றும் வாட்டர் என்றும் தண்ணீர் என்றும் ஜலம் என்றும் அழைக்கபடுவதெல்லாம் , நீரான ஒரு பொருளையே குறிக்கும் என்கின்றார்.

அடுத்து சேவை மனப்பான்மை;-

இயன்றவருக்குத் தன்னால் இயன்ற உதவியை செய்வதே சேவை எனப்படும்.சுய நல மிக்க இந்த உலகியல் வாழ்வில் பிறருக்காக செய்வதுபதிலுக்கு எந்த ஒரு பலனையும் எதிர்பாராமல் செய்வது இதே மனிதாபிமானத்தின்,மனித நேயத்தின் அடிப்படையில் செய்யப்படுவது ,இதுவே சேவை என்பதன் பொருள்;

திருமூலர் தன்னுடைய திருமந்திரத்தில்

யாவர்க்குமாம்,இறைவர்க்கோர் பச்சிலை

யாவர்க்குமாம் பசுவிற்கு ஓர் வாயுறை

யாவர்க்குமாம் உண்ணும் போது ஓர் கைப்பிடி

யாவர்க்குமாம் பிறருக்கு இன்னுரை தானே

என்கிறார்.குறைந்தபட்ச உதவிகள் இவை.எதுவும் இயலாவிட்டாலும்,ஆதரவான ஆறுதல் வார்த்தைகள். உண்ணும் போது ஒரு கைப்பிடி சோறு,இவை யாவராலும் முடிந்ததுதானே.உலகில் மனிதரிடையே சகோதரத்துவம் வந்துவிட்டால்,தீவிர வாதம் எங்கிருந்து வரும்.யாதும் ஊரே யாவரும் கேளீர் என்ற கனியன் பூங்குன்றனர் சத்திய வாக்கே. அப்துல் கலாம் ஐயா அவர்கள் உலக அரங்கில் உரைத்தார்.மற்ற நாட்டினரும் போற்றும் பண்பாடு, பாரத பண்பாடு,அதை காப்பாற்றவேண்டியது இளைய தலைமுறையினரிடமே இருக்கின்றது.

ஜனனீம் சாரதாதேவிம்,

இராம கிருஷ்ணம் ஜகத்குரும்

பாத பத்மே த்யோச்ருத்வா

பிரணமாமிமுஹீர்முணிலஜிஹீ

நம ஸ்ரீ யதிராஜாய விவேகானந்த சூரயே

ஸத் சித்சுகஸ்வரூ பாயே

ஸ்வாமினே ,தாப ஹாரினோ.

June 27, 2016
குறளின் கதிர்களாய்…(126)

செண்பக ஜெகதீசன்

அகனமர்ந் தீதலி னன்றே முகனமர்ந்

தின்சொல னாகப் பெறின்.

     -திருக்குறள் -92(இனியவை கூறல்)

புதுக் கவிதையில்…

புன்னகை முகத்தில் கூட்டி

வருவோரை

இன்சொல்லால் வரவேற்பது,

அகநிறைவுடன்

அடுத்தவர்க்கு

ஈவதைவிட இனிதானதே…!

குறும்பாவில்…

இதயநிறைவுடன் ஈவதைவிட,

இதழில் புன்னகையுடன் பிறரை

இன்சொலால் வரவேற்பதே இனிது…!

மரபுக் கவிதையில்…

வாசல் வந்த வறியவர்க்கு

   வள்ளல் தன்மை மாறாதே

வேச மின்றியே உளமார

   வேண்டு மட்டும் ஈவதிலும்,

வாச மலர்போல் புன்னகைத்து

     வருவோர் தம்மை உபசரித்தே

ஆசையாய் இன்சொல் உரைப்பதுதான்

     அளவில் உயர்ந்த நல்லதாமே…!

லிமரைக்கூ…

நல்லதுசெய் உளம்மகிழக் கொடுத்து,

அதனினும் நன்றாகும் வருவோரை உபசரித்தல்

வாயதனில் இனியசொல்லாய் எடுத்து…!

கிராமிய பாணியில்…

அள்ளிக்குடு அள்ளிக்குடு

இல்லாதவுனுக்கு அள்ளிக்குடு,

ஏதயங்குளுர அள்ளிக்குடு

இல்லயிண்ணாம அள்ளிக்குடு..

இதவிட நல்லதுதான்,

ஓபசரிக்கணும் ஒபசரிக்கணும்

வாறவங்கள ஒபசரிக்கணும்,

மொகம்மலந்து ஒபசரிக்கணும்

இனியசொல்லால ஒபசரிக்கணும்..

அள்ளிக்குடு அள்ளிக்குடு

இல்லாதவுனுக்கு அள்ளிக்குடு,

இதோட

ஓபசரிக்கணும் ஒபசரிக்கணும்

மொகம்மலந்து ஒபசரிக்கணும்

இனியசொல்லால ஒபசரிக்கணும்…!

-செண்பக ஜெகதீசன்…

June 27, 2016
நான் அறிந்த சிலம்பு – 214

மலர்சபா

மதுரைக் காண்டம் 10. வழக்குரை காதை

மன்னவன் உரைத்த விடை

மன்னவன் உரைத்தான்:
“பெண் அணங்கே!
கள்வனைக் கொல்லுதல்
கொடுங்கோல் ஆகாது;
அதுவே அரச நீதியாகும்.”

கண்ணகி தன் சிலம்பின் தன்மையை அறிவித்தல்

“அறநெறி பின்பற்றாத
கொற்கை நகரத்து வேந்தனே!
என் காலுக்கு அணியாய் விளங்கும்
சிலம்பின் பரல்கள் மாணிக்கமே”
என்றாள் கண்ணகி.

மன்னவன் தன் தேவியின் சிலம்பில் உள்ள பரல் முத்து எனக்கூறி, காவலர் கொண்டுவந்த சிலம்பைக் கண்ணகியின் முன் வைத்தல்

தேனைப் போன்ற மொழியுடைய
கண்ணகி உரைத்தது
சரியான கூற்றேயாகும்.
எம்முடைய சிலம்பில் உள்ள பரல்கள் முத்தே
என மனதுக்குள் நினைத்து
அச்சிலம்பைக் கொண்டுவரும்படி
காவலரிடம் கூறினான்.
அவர்கள் கொண்டுவந்த சிலம்பைக்
கண்ணகி முன் வைத்தான்.

கண்ணகி சிலம்பை உடைக்க மாணிக்கம் மன்னவன் முகத்தில் தெறித்தல்

கண்ணகி காலில் அணிகின்ற
சிலம்பினை உடைக்க
அதிலிருந்த மாணிக்கம்
மன்னவன் முகத்தில் தெறித்தது.

படத்துக்கு நன்றி:
கூகுள்

June 26, 2016
சமூகப் பொறுப்பு அவசியம்

பவள சங்கரி

சென்ற வெள்ளியன்று (24/06/16) காலை 6.30 மணிக்கு வழக்கம்போல் செங்கல்பட்டு அருகே உள்ள பரனூர் மகேந்திரா சிட்டியில் உள்ள இன்போசிஸ் ஐடி நிறுவனத்தில் மென் பொறியாளராக தான் பணிபுரியும் அலுவலகத்திற்குச் செல்வதற்காக சென்னை நுங்கம்பாக்கம் இரயில் நிலையத்திற்கு தன் தந்தையுடன் வந்திருக்கிறார் சுவாதி. தினமும் மின்சார இரயிலில் பணிக்குச் செல்வது வழக்கம். மகளை இறுதியாகப் பார்க்கப்போவது அன்றுதான் என்ற எண்ணம் துளியும் இல்லாமல் அன்பு மகளை கொண்டுவந்து விட்டுவிட்டு கிளம்பிவிட்டார் அவர் தந்தை. மத்திய அரசு பணியில் இருந்து ஓய்வு பெற்ற சென்னை சூளைமேட்டை சேர்ந்த சந்தான கோபாலகிருஷ்ணன் என்பவரின் மகள் சுவாதி, 24 வயது இளம் பெண். மகளை இரயில் நிலையத்தில் விட்டுவிட்டு வீடு வந்து சேர்ந்த சில மணித்துளிகளில் அவர் இரயில் நிலையத்தில் கொலையான செய்தி கேட்டு துடிதுடித்து பதறி ஓடி வந்து இரத்த வெள்ளத்தில் அசைவற்றுக் கிடக்கும் உடலைப் பார்த்து தன் இரத்தம் உறைந்து அதிர்ச்சியில் நிற்கிறார். இரண்டு மணி நேரத்திற்கும் மேலாக அதே இடத்தில் நடைமேடையில், போவோர் வருவோருக்குக் காட்சிப் பொருளாக, பிரேதப் பரிசோதனைக்குக்கூட எடுத்துச் செல்லாமல் அங்கேயே வைத்து இருந்ததையும் சேர்த்தே விழுங்க வேண்டிய கொடுமையான சூழலில் ஒரு தந்தையின் நிலையை கற்பனை கூட செய்ய முடியவில்லை. சென்னை போன்ற ஒரு பெருநகரத்தில் இப்படியொரு நிலை சற்று வருத்தத்திற்குரியதுதான். அதுவும் கொலை செய்தவனைக் கண்டுபிடிப்பதற்கு ஏதுவாக சிசிடிவி கேமரா கூட இல்லை என்பதுதான் மேலும் வேதனைப்படச் செய்யும் விசயம்.

பட்டப்பகலில், மக்கள் நடமாட்டம் உள்ள இரயில் நிலையம் போன்ற பொது இடத்தில் இத்தனைக் கொடூரமாக ஒரு பெண்ணை வெட்டிக் கொன்றுவிட்டு கத்தியை தண்டவாளத்தில் தூக்கி வீசிவிட்டு சாவதானமாக ஒரு கொலைகாரன் தப்பிச் செல்லும் அளவிற்கா நம் காவல்துறையும், சமூகமும் இருக்கிறது? நினைக்கவே அச்சமாக இருக்கிறது. பாதுகாப்பு என்பதே கேள்விக்குறியாக இருக்கிறது. இதே நாளில் பல்வேறு இடங்களில் பல்வேறு விதமான கொலைகள் நடந்திருக்கின்றன என்றாலும் ஒரு பொது இடத்தில் ஒரு இளம் பெண் இப்படி பட்டப்பகலில் கொலை செய்யப்பட்டிருப்பது மக்கள் மத்தியில் பெரும் அதிர்ச்சியை ஏற்படுத்தியுள்ளது. ஏதோ சிறிய வாக்குவாதத்திற்குப் பிறகே அந்த இளைஞன் அப்பெண்ணை கொடூரமாகத் தாக்கிக் கொன்றிருக்கிறான் என்பது நேரில் கண்டவர்களின் வாக்குமூலம்.

சில நாட்களுக்கு முன்பு கால் டாக்சி ஓட்டுநரிடம் வாக்குவாதம் செய்து, அவர் பற்றி புகாரும் அளித்ததால் அவர் வேலையிலிருந்து நீக்கப்பட்டும் இருந்திருக்கிறார். இதுகூட கொலைக்கான காரணமாக இருக்குமோ என்ற நோக்கிலும் காவல்துறை விசாரணை இருந்திருக்கின்றது. ஆனாலும் தான் கொலை செய்யவில்லை என்று அந்த ஓட்டுநர் மறுத்திருக்கிறார். இன்னும் சரியான காரணம் புரிபடாத இந்நிலையில் ஊடகங்கள் தங்கள் மகளின் பெயருக்கு களங்கம் ஏற்படுத்த வேண்டாம் என்று குடும்பத்தினர் கேட்டுக்கொண்டிருக்கின்றனர். கொலைக்கான காரணம் சரியாக தெரியாதபோது மேலும் மேலும், புதிய புதிய கற்பனைக் கதைகளைச் சொல்லி வெந்த புண்ணில் வேலைப் பாய்ச்சுவதில் நியாயமில்லை. தேவையில்லாமல் சம்பவத்தை திசை திருப்புவதால் கொலையாளி தப்பிப்பதற்கும் அது வழிவகுத்துவிடும். ஊடகங்களும் பொது மக்களும் தேவையில்லாத விவாதத்தை நிறுத்தி, கொலைக்கான காரணமும், கொலையாளியும் பிடிபடும் வரை பொறுமை காப்பதே தற்போதைய தேவை.

June 26, 2016
இன்னம்பூரான் பக்கம் [7] பெண்ணியம்: புதிய பார்வை [3/2]

இன்னம்பூரான்
ஜூன் 26, 2016

கட்டுரையை தொடர்வதற்கு முன் ஷாக்: இன்று சென்னையில் ஐந்து பெண்மணிகள் (நான்கு பெண்கள் 30 வயதுக்குள்) கொடூரமாகத் தாக்கப்பட்டு வெட்டிக் கொல்லப்பட்டனர். அவர்களில் ஒருவர் 24 வயது யுவதி. கணினி பணியாளர். நுங்கம்பாக்கம் ரயில்வே ஸ்டேஷனில் கொலை. ராயப்பேட்டை போலீஸ் ஸ்டேஷன் அருகில் ஒரு அன்னையும் அவரது மூன்று மகளிரும் கொல்லப்பட்டு, வீட்டிலேயே சடலங்கள் ஒளித்து வைக்கப்பட்டிருந்தன. இதையெல்லாம் கேட்டு, பிரபல வழக்கறிஞர் சுதா ராமலிங்கம், ‘பெண்களுக்கு வீட்டிலும் பாதுகாப்பு இல்லை; வெளியிலும் இல்லை. அவர்கள் தற்காப்பு சண்டைகள் கற்றுக்கொள்ள வேண்டும். ‘ என்கிறார்.

“,,,இன்று கட்டுரையின் முன்னறிவிப்பு மட்டும் தான். வாசகர்கள் இருந்தால், முழுதும் வெளியாகும். அத்தருணம் படித்த கட்டுரையின் இணைப்பும் கொடுக்கப்படும். அது வரை, சாரு பஹ்ரீக்கும், லான்ஸெட்டுக்கும் நன்றி கூறி விடை பெறுகிறேன்.”
(தயக்கத்துடன் தொடருக்குத் திரும்புகிறோம்.).

சாரு பஹ்ரீ இந்த கொடுமையின் நிவாரணம் பொருட்டு அரசு எடுக்கும் நடவடிக்கைகளை விவரிக்கும்போது, கூறுவது:

உலக சுகாதார மையம் [WHO] உலகின் மூன்றில் ஒரு பங்கு பெண்பாலார் தனது வாழ்க்கையில் வன்முறையால் துன்பம் அடைகின்றனர் என கூறுகிறது. இந்தியாவில் வீட்டிற்குள் வன்முறை அவதிப்படும் பெண்களே மூன்றில் ஒரு பங்கு என்பதால் உலக பிரச்னை, இந்தியாவில் எங்கும் இல்லாத அளவு மாபெரும் பிரச்னையாகி விட்டது. முதற்கண்ணாக, விழிப்புணர்ச்சி தலையெடுக்கவேண்டும். இந்திய மத்திய அரசின் சுகாதார இலாக்கா 850,000 நபர்களை முன்னிலை சமுதாய ஆலோசகர்களாக (Accredited Social Health Activists (ASHAs)—front-line community health workers—to create awareness of what constitutes violence against women, the consequences, and its identification and prevention.) நியமனம் செய்து, பயிற்சி அளித்து, வன்முறைக்கு உட்படுத்த பெண்களுக்கு தக்கதொரு ஆலோசனை, அடைக்கலம், சட்ட உதவி, வருமானம் தரும் சிறு தொழில்கள் கற்றுக்கொடுப்பது, குழந்தை பராமரிப்பு ஆகிய உதவிகள் செய்வார்கள்.’ என்ற திட்டம் பற்றி விவரம் கொடுத்திருக்கிறார், இத்தகைய சங்கிலித்தொடர் உதவிகள் அவர்களின் வாழ்க்கைத்தரத்தை உயர்த்தும் என்கிறார். பொது மக்கள் இவற்றீன் மீது கவனம் வைத்து இவர்களின் பணியை தணிக்கை செய்யவேண்டும்.

என்ன உதவி செய்தாலும் அவை உடனுக்குடன் நம்பகத்தனமான முறையில் கிட்ட வேண்டும் என்பதற்காக, புது டில்லியில், எல்லா விதமான உதவிகளும் ஒரே இடத்தில் கிடைக்க ஏற்பாடு செய்துள்ளார்கள்.

மாநிலங்களில் இத்தகைய சேவை மன்றங்கள் எதிர்ப்பார்த்த அளவு உருவாகவில்லை. காரணம், வேறு அமைச்சரகம் என்ற ஐயம் ஏற்படுகிறது. எனினும் 33 மையங்கள் இருப்பது ஒரு அளவு வரவேற்கத்தக்கதே. மூன்றே வருடங்களில் ஒவ்வொறு மாவட்டத்திலும் இவை சேவை செய்யும் என்று மத்திய அரசு உறுதி கூறுகிறது. மற்றும் பல உத்திகளை கையாளப்போவதாக மத்திய அரசும் தன்னார்வக்குழுக்களும் திட்டம் போடுகின்றனர்.

பார்க்கலாம்.

(தொடரும்)

சித்திரத்துக்கு நன்றி: https://i.ytimg.com/vi/aHjoqG8R6Dg/hqdefault.jpg

June 26, 2016
கேசவ் வண்ணம் – கிரேசி எண்ணம்

”தாலாட்டு பாடுகின்றான் தாமோ தரன்நாலு
காலாட் படைக்குக் கொடுத்துமடி: -வாலாட்டித்
துள்ளும் கறவை துவண்டு கிடக்குததன்
உள்ளும் புறமும் உவப்பு”….கிரேசி மோகன்….

June 26, 2016
கேசவ் வண்ணம் – கிரேசி எண்ணம்

”மூடமெய் பக்தி முழங்கால் வழிவார
மாடவர் பாதத்தை மேயுது : -GODஅவர்
காடதனில் வாசிப்பு கோதை திருப்பாவை,
மாடதன் மேய்ச்சல் மறந்து’’….கிரேசி மோகன்….

June 25, 2016
கேசவ் வண்ணம் – கிரேசி எண்ணம்

கிரேசி மோகன்

ஓவியப் பிதாமகர் திரு.கோபுலு சார் நமது கேசவ்ஜிக்கு ‘’கிருஷ்ணப் பிரேமி’’ என்ற பட்டத்தை அளித்துள்ளார் என்பதை சந்தோஷத்துடன் பகிர்ந்து கொள்கிறேன்….(கேசவ் வெகு கூச்சத்துடன் என்னிடம் இந்த சந்தோஷத்தைப் பகிர்ந்து கொண்டது அடியேன் செய்த பாக்கியமே)….

’’யாரென் றுதெரியுதா! , யாதவன் தானிவன்மன்
னார்குடி கோபுலு மாடோடு- சாரே!(மலையாள ‘’சாரே’’)
கிருஷ்ணனை டெய்லி தருகின்ற கேசவ்,
‘’கிருஷ்ணப் பிரேமி கரெக்ட்’’….கிரேசி மோகன்….

தொடர்ந்து பன்னாட்களாக நம்மையெல்லாம் தமது அற்புதமான ஓவியக்கலை மூலம் உள்ளம் நெகிழச் செய்யும் ‘கிருஷ்ணப் பிரேமி’ கேஷவ்ஜி அவர்களுக்கு வல்லமையின் மனமார்ந்த வாழ்த்துகள்.

June 25, 2016
மாய உலகில் மனம் பாடும் பாடல்!

பவள சங்கரி

குருட்டு உலகில் குதர்க்கம் பேசும் முரட்டு உலகம் – இது
உச்சியைத்தொட வக்கணை பேசும் வரட்டு நாதம் – பாப்பா
புரிந்து தெளிந்து கொள்ளம்மா பித்தம் தீர வழியைச் சொல்லம்மா

இருக்கும் மடமையை வெளிச்சம் போடும் பகட்டு உலகமே – மாயையில்
ஓயாத போட்டியும் பொறாமையும் கூடிய உலகமே – பாப்பா
புரிந்து தெளிந்து கொள்ளம்மா பித்தம் தீர வழியைச் சொல்லம்மா

குருட்டு உலகில் குதர்க்கம் பேசும் முட்டாள் உலகம்தான் – இது
பட்டாம்பூச்சியாய் தவ்வித்தவ்வி விட்டிலாய் வீழும் விபரீதம்தான் – பாப்பா
புரிந்து தெளிந்து கொள்ளம்மா பித்தம் தெளிய மருந்து சொல்லம்மா

நொந்த பயிரை நோண்டிப் பார்க்கும் கொடுமையை கூடிக் களிக்கும்
நொந்த பயிரை நோண்டிப் பார்க்கும் கொடுமையை கூடிக் களிக்கும்- கொண்டாடும்
நொந்திடும் தோட்டக்காரனிடம்
பூச்சொரியும் வசனங்களோதும் சில புரட்டு வேதமும் ஓதும்
வகைவகையான புரட்டுகள் வைத்து வதைக்கும் உலகமே – பாப்பா
புரிந்து தெளிந்து கொள்ளம்மா பித்தம் தெளிய மருந்து சொல்லம்மா

மமதைக் குரங்கைத் தாவவிடும் தத்துவ ஞானம் – அதன்
போதையில் மூழ்கும் முற்றும்
வம்பும் குலைந்து குரங்கும் வீழ்ந்து அடுத்த மரம் தாவும்
வம்பும் குலைந்து குரங்கும் வீழ்ந்து அடுத்த மரம் தாவும் – சிலர்
மனமும் இதுபோல சறுக்கி வீழ்ந்து மாயும் பகட்டு உலகமம்மா – பாப்பா
புரிந்து தெளிந்து கொள்ளம்மா பித்தம் தெளிய மருந்து சொல்லம்மா

குருட்டு உலகில் குதர்க்கம் பேசும் முட்டாள் உலகமம்மா – இது
பட்டாம்பூச்சியாய் தவ்வித்தவ்வி விட்டிலாய் வீழும் விபரீதம்தான் – பாப்பா
புரிந்து தெளிந்து கொள்ளம்மா பித்தம் தெளிய மருந்து சொல்லம்மா
ம்ம்ம்ம்ம்ம்… ம்ம்ம்ம்ம்…. ம்ம்ம்ம்…. ஆ… ஆ… ஆ…. ஆ….

பி.கு. பாடலுக்கு குரல் கொடுத்து பதிவு செய்துள்ள அன்புத் தோழி கீதா மதி அவர்களுக்கு மனம் நிறைந்த நன்றியும், பாராட்டுகளும்.

https://soundcloud.com/thiru-arasu-10/video-1467000372

June 25, 2016
விண்வெளிச் சுனாமிக் கதிர்வீச்சு மூன்றாம் பூகாந்த வளையம் தோன்றி மறையக் காரணமாகும்.

சி. ஜெயபாரதன் B.E.(Hons) P.Eng (Nuclear) கனடா

http://www.youtube.com/watch?feature=player_embedded&v=c9qKIVlhXpQ

http://www.youtube.com/watch?feature=player_embedded&v=sF_Gbs1yj6w

http://www.youtube.com/watch?feature=player_embedded&v=CMwdhEKoBdw

++++++++++++

சிறப்பாகப் பேரளவில் ஒளிப்பிழம்பு அலைகளை [Plasma Waves] நாங்கள் நோக்கினோம். அண்டவெளிச் சுனாமிபோல் [Space Tsunami] அடித்து அவை பூகாந்தக் கதிர்வீச்சு வளையங்களைச் சுற்றித் தெறித்து, வெளி வளையப் பகுதியை அழித்துச் சென்றன. அப்போது புரிய முடியாதபடி மூன்றாம் காந்த வளையத்தின் வடிவாக்கம் விளங்கியது.

பேராசிரியர் இயான் மாண் [அல்பெர்டா பல்கலைக் கழகம், கனடா]

மூன்றாம் பூகாந்த வளைய எழுச்சி இயக்கத்துக்கு ஓர் உன்னத விளக்கம் நாங்கள் கண்டறிந்தோம். எங்கள் ஆய்வு விளைவுகள், முக்கிய இயக்க முறைகள் துல்லியமாய்க் குறிப்பிட்ட பிறகு, மூன்றாம் காந்த வளையம் தோன்றுவதற்கு ஓர் மகத்தான எளிய விளக்கம் கிடைத்தது.

பேராசிரியர் இயான் மாண் [Ian Mann, University of Alberta, Canada]

அண்டெவெளிக் கதிர்வீச்சு [Space Radiation] 21 ஆம் நூற்றாண்டின் தொழிற் துறைக் குழுவினருக்குத் தேவைப்படும், துணைக்கோள் இயக்கத்துக்கு அடிப்படி முறைகளை முறிக்கப் பயமுறுத்துகிறது. எப்படி அந்த கதிர் வீச்சுச் சக்தி எழுகிறது, எப்படி அது இழக்கப் படுகிறது என்று அறிந்து கொள்வது அண்டவெளித் தேடல் ஆய்வுக்குச் சவாலாய் உள்ளது.

பேராசிரியர் இயான் மாண்

பரிதியின் கடும் கதிர்ப் புயலிலிருந்து புவியைக் காக்கும் பூகாந்தக் கோளம்.

ஒரு பாதுகாப்புக் குமிழிபோல் பூகாந்தக் கோளம் சூரியப் புயலின் ஒளிப் பிழம்பை [Plasma of Solar Wind] விழுங்கிடும் அல்லது விலக்கிவிடும். சூழ்நிலை ஒத்துள்ள போது, வட துருவத்தில் பன்னிற ஒளியாட்டங்கள் [Aurora Displays]  காட்சி தரும். ஆனால் பரிதியின் புயல் கடுமையாகும் போது, தீவிர விண்வெளிப் பருவநிலைச் சூறாவளி அடித்துக் கோரக் கதிர் வீச்சுகளை வான் ஆலன் காந்த வளையங்களில் உண்டாக்கும். அவற்றால் நேர்ந்திடும் மின்னோட்டத்தில் புவியெங்கும் இயங்கும் மின்சாரக் கோப்புகள் [Electric Power Grids] சேதமடைந்து, பல கோடி டாலர் பண விரைவை ஏற்படுத்தும்.

இயற்கைப் பௌதிக விஞ்ஞானப் பதிப்பு [Nature Physics] இதழில், கனடா, அல்பர்டா பல்கலைக் கழகத்தின் ஆய்வாளர்கள் ஒரு புதிய கண்டுபிடிப்பை வெளியிட்டுள்ளார். முதன்முதலாக எப்படிப் புதிரான மூன்றாம் வான் ஆலன் பூகாந்த வளையத்தை அண்டவெளிச் சுனாமி உண்டாக்கியது என்பது அறிவிக்கப் பட்டிருந்தது. தீவிர மிகச் சிற்றதிர்வு ஒளிப்பிழம்பு அலைகள்  [Ultra- Low Frequency Plasma Waves]  எப்படி புறப் பகுதி கதிர் வளையத்தை விண்வெளியில் சிதைவின்றித் தூக்கிச் சென்று, மூன்றாம் வளையத்தை உண்டாக்கியது என்னும் விளக்கம் இருந்தது. கடந்த 50 ஆண்டுகளாக, அண்டவெளி யுகத்தின் [1958] ஆரம்பத்திலிருந்தே, எதிர்பாராத விதத்தில் கண்டுபிடிக்கப் பட்ட வான் அல்லன் வளையங்கள், துணைக்கோள்கள் இயக்கத்துக்கும், மனிதர் விண்வெளி உளவுக்கும் தேவையானவை என்று அறியப் பட்டது.

மூன்றாம் வான் அல்லன் வளையத் தோற்றக் கண்டுபிடிப்பு புதிரான ஒருபெரும் வானியல் வரலாற்று மைல்கல் நிகழ்ச்சியாகக் கருதப் படுகிறது. வாகன நகர்ச்சி வழிகாட்டி ஏற்பாடு  [GPS -Geo Positioning System] & துணைக்கோள் வழித் தொடர்புகள் [Satellite -Based Telecommunications] போன்றவை வான் அல்லன் வளையங்களுக்குள் விழும் கதிர்வீச்சால் பாதிக்கப்படுபவை. உயர்சக்தி எலெக்டிரான்கள் “துணைக்கோள் கொல்லி” [Satellite Killer] என்று அழைக்கப் படுபவை. சமீபத்திய கணிப்பு மூலம் அறிவது : தீவிர விண்வெளிப் பருவகாலப் புயலடிப்பால்  [Severe Space Weather Storm] ஏற்படும் சேதாரங்களின் செலவுத் தொகை 2000 பில்லியன் டாலர் [2 Trillion Dollar] என்று மதிப்பீடு செய்யப் படுகிறது.

வான் ஆலன் கதிர்வீச்சு வளையங்களை ஆராய நாசா ஏவிய இரட்டை விண்ணுளவிகள்

2012 செப்டம்பர் முதல் தேதி வான் ஆலன் கதிர்வீச்சு வளையங்களை [Van Allen Radiation Belts] ஆராய நாசா ஏவிய இரட்டை விண்ணுளவிகள்  [Van Allen Probes] ஏற்கனவே அறிந்த சக்தி மிக்க மின்கொடைத் துகள்கள் [High Energy Charged Particles] நிரம்பிய இரண்டு உள், வெளி வளையங்களைப் [Inner & Outer Belts] பற்றி அறிந்து கொள்ளவே அனுப்பப் பட்டன. ஆனால் விஞ்ஞானிகள் 50 ஆண்டு காலமாய்த் தீர்மானித்திருந்த பழைய அமைப்பு மாறி மெய்யாகக் கண்டது இரண்டல்ல, மூன்று வளையங்கள். இது விண்ணுளவிக் கருவி பிழையாகக் காட்டிய தவறான காட்சி என்று விஞ்ஞானிகள் முதலில் ஐயமுற்றார். ஆனால் அப்போது மெய்யாகத் தோன்றிய மூன்றாம் வளையம் ஒரு மாத காலம் பூமியில் நீடித்த பிறகு முழுமையாய் மறைந்தது !

டேனியல் பேக்கர் [விண்வெளிப் பௌதிக விஞ்ஞானி, கொலராடோ பல்கலைக் கழகம்]

முதல் அண்டவெளி அதிர்ச்சி அலை அடித்து, [Interplanetary Shock Wave] மத்தியில் தோன்றிய மூன்றாம் கதிர்வீச்சு வளையம் 2012 செப்டம்பர் மாதம் முழுதும் காணப் பட்டது. ஆனால் அப்போது வெளி வளையம் தெளிவாகவும், பிறகு தேய்ந்தும் மாறித் தெரிந்தது. அக்டோபர் முதல் தேதி மற்றோர் அண்டவெளி அதிர்ச்சி அலை அடித்து, உள்ளமைப்பு வளையம் தவிர, மற்ற மத்திய, வெளி வளையங்கள் இரண்டும் மறையும்படி செய்தது ! ஒரு வாரம் கழித்து மூன்றாவது அதிர்ச்சி அலை அடித்து வெளி வளையத்தை மீண்டும் காட்டி முன்பிருந்த இரட்டை வளைய அமைப்பை மறுபடித் தோன்றச் செய்தது. இந்தக் கண்டுபிடிப்பு பூமியின் கதிர்வீச்சு வளையங்கள் தோன்ற பரிதியின் ஆற்றல் மிக்க வெடிப்பு வெளிவீச்சுகளே [Solar Outbursts] காரணம் என்று தெரிந்து கொண்டோம். ஆயினும் தற்போது தோன்றி, மறைந்த மூன்றாம் கதிர்வீச்சு வளையத்துக்கு ஒரு நியதியும் முழு விளக்கம் அளிக்க முடியவில்லை !

டேனியல் பேக்கர்.

விண்வெளி முற்போக்குப் பொறிநுணுக்கப் புதுத் திறத்தால், நாசாவின் வான் ஆலன் விண்ணுளவிகள் ஆழ்ந்த விளக்கமுடன் எப்படிக் கதிர்வீச்சு வளையங்களில் மின்கொடைத் துகள்கள் நிரம்பி உள்ளன வென்றும், அவற்றை அண்டவெளியில் எது தொடர்ந்து மாற்றி வருகிற தென்றும், இவ்வித மாறுதல்களால் எப்படி உயரத்தில் பூமியின் சூழ்வெளி பாதிக்கப் படுகிற தென்றும் விஞ்ஞானிகள் அறிய முடிகிறது.

ஜான் கிரென்ஸ்ஃபிலெட் [NASA Associate Administrator for Science]

பரிதியின் மேற்தளத்தில் குளத்தில் விழுந்த கல் கோலமிடும் வட்டங்கள் போல் சூரிய பூகம்பங்கள் ஏற்படுவதாக 1972 ஆம் ஆண்டிலே உல்ஃப் (Wolff) என்பரால் முன்னறிவிக்கப் பட்டது.   அவை சூரிய தளத்தின் கீழே திடீரென எழும் சக்தியால் வளையும் ஒலி அலைகள் தோன்றி மெய்யாக மேற்தளத்தில் வட்டங்களாய் உண்டாகின்றன.

டாக்டர் ஸெர்கி ஸகராவ் (Dr. Sergei Zharkov) (UCL’s Mullard Space Science Laboratory)

“சமீபத்தில் நான் கற்றுக் கொண்டது இதுதான் : பூமியின் உட்கருவை மெதுவாக ஆனால் அசுரத் தீவிரத்தில் பாதிப்பது சூரியன் ஒன்றே ! பூமியின் காலநிலைச் சூழ்வெளி மாறுதலுக்குச் (Climate & Weather Change) சூரியனே பிரதானக் காரணி என்பதை நானும் எனது கீர்த்தி பெற்ற விருந்தினர்கள் டாக்டர் பீட்டர் ஆல்ஸனும் டாக்ரட் நிகோலா ஸ்கஃபீட்டாவும் ) ஒப்புக் கொண்டோம்.”

மிட்செல் பாட்டிரோஸ் (Mitchel Battros) (Solar Rain நூல் படைப்பாளி)

“பரிதி உச்சத்தின் (Solar Maximum) போது எப்போதும் (பரிதித் துருவத் திருப்பம்) நிகழ்கிறது ! பரிதி வடுக்களின் எண்ணிக்கை (Sunspots) உச்சமாகும் போது அதன் துருவ முனைகள் மாறுகின்றன. இப்போது அந்த உச்ச நிலையைப் பரிதி அடைவது ஒரு நல்ல அறிகுறியாகத் தெரிகிறது.”

டேவிட் ஹாத்தவே (David Hathaway, Solar Physicist, Marshal Space Flight Center)

பரிதிக் கோளத்தில் (Heliosphere) நிகழும் துருவத் திருப்பத்தின் தாக்கம் மிகவும் சிக்கலானது ! பரிதி வடுக்கள் தீவிரக் காந்த முடிப்புகள் சேமிக்கப் பட்டுள்ள பெரும் களஞ்சியம். இரட்டைத் துருவக் காந்தப் பட்டை (Dipole Magnetic Field) மறைந்து போனாலும் முடிச்சு அவிழ்ந்து காந்த தளம் சுருள் சுருளாக வெளிப்புறம் பாய்கிறது. துருவத் திருப்பம் நேரும் போது பரிதிக் கோளம் காணாமல் போவதில்லை ! வெற்றிடத்தை நிரப்பிட ஏராளமான, சிக்கலான அளவுக் காந்த அமைப்பாடுகள் இருக்கின்றன. இதுவரை விஞ்ஞானிகள் மேலிருந்து கீழ் நேரான நோக்கில் துருவத் திருப்பத்தைக் காணவில்லை. இப்போது “யுலிஸிஸ் விண்ணுளவி” விஞ்ஞானிகளுக்கு பரிதியின் மெய்யானச் சோதிப்பு உளவைக் காட்டப் போகிறது.

டேவிட் ஹாத்தவே. (டிசம்பர் 9, 2005)

“பரிதியின் காந்த மண்டலம் சூரிய குடும்பம் முழுவதையும் “பரிதிக் குமிழி” எனப்படும் ஒரு கோளத்துக்குள் (Heliosphere Bubble) மூடிக் கொள்கிறது. அப்பரிதிக் கோளம் 50 AU முதல் 100 AU வானியல் அளவீட்டில் நீட்சி அடைந்து புளுடோ சுற்று வீதிக்கு அப்பாலும் செல்லும். [1 Astronomical Unit (AU) = Unit Distance Between Sun & Earth]. சூரியனின் காந்தத் தள மாறுபாடுகள் பரிதிக் குமிழியின் வழியாக பரிதிப் புயலால் எடுத்துச் செல்லப் படுகின்றன.”

ஸ்டீவ் சூயஸ் (Steve Suess, Solar Physicist, Marshal Space Flight Center)

“வான் ஆலன்” கதிர்வீச்சு வளையம் [Van Allen Radiation Belt] என்பது என்ன ?

பூமியைச் சுற்றி இருக்கும் இந்த “டோநட்” வடிவ வளையத்தில் [Donut Shape Ring] சக்தி வாய்ந்த பிளாஸ்மா மின்கொடைத் துகள்கள், எலெக்டிரான், புரோட்டான் [Energetic Charged Particles – Plasma (Electrons & Protons)] ஆகியவை எண்ணற்ற அளவில் நிரம்பி உள்ளன. இவற்றை இந்த வளையத்தில் வைத்திருப்பது பூமியின் ஆற்றல் மிக்க காந்த தளம். இந்த புலப்படாத உள், வெளி எனப்படும் இரு வளையங்கள் பூமிக்கு உயரத்தில் 100 – 60,000 கி.மீ. [60- 36,000 மைல்] இருப்பதை விண்ணுளவிகள் கண்டுபிடித்துள்ளன. அந்த அரங்குகளில் உயரத்துக்கு ஏற்பக் கதிர்வீச்சு அளவீடுகள் [Radiation Levels] ஏறி இறங்கி மாறுபடுகின்றன. பெரும்பான்மையான இந்த மின்கொடைத் துகள்கள் பரிதிப் புயல் [Solar Winds] மூலமாகவோ அல்லது அகிலக் கதிர்கள் [Cosmic Rays] மூலமாகவோதான் வந்திருக்க முடியும் என்று விஞ்ஞானிகள் கருதுகிறார்.

1958 ஆண்டில் உள் வளையம், வெளிவளையம் ஆகிய இரு வளையங்களையும் முதன்முதல் பூமியின் காந்தக் கோளத்துக்கு [Earth’s Magnetoshere] உள்ளே இருப்பதைக் கண்டுபிடித்த அமெரிக்க விஞ்ஞானி “ஜேம்ஸ் வான் ஆலன்” [James Van Allen] பெயரே அவற்றுக்கு இடப்பட்டன. வெளி வளையத்தில் பூராவும் சக்தி மிக்க எலெக்டிரான்களும், உள் வளையத்தில் எலெக்டிரான், புரோட்டான் ஆகிய இரண்டு துகள்கள் கலந்தும் இருப்பது தெரிய வந்தது. மேலும் குறைந்த அளவில் ஹீலிய அணுக்கருவின் ஆல்ஃபா துகள்கள் [Alpha Particles from Helium Nuclei] இரு வளையங்களிலும் இருந்து வருகின்றன.

முதல் அண்டவெளி அதிர்ச்சி அலை அடித்து, [Interplanetary Shock Wave] மத்தியில் தோன்றிய மூன்றாம் கதிர்வீச்சு வளையம் 2012 செப்டம்பர் மாதம் முழுதும் காணப் பட்டது. ஆனால் அப்போது வெளி வளையம் தெளிவாகவும், பிறகு தேய்ந்தும் மாறித் தெரிந்தது. அக்டோபர் முதல் தேதி மற்றோர் அண்டவெளி அதிர்ச்சி அலை அடித்து, உள்ளமைப்பு வளையம் தவிர, மற்ற மத்திய, வெளி வளையங்கள் இரண்டும் மறையும்படி செய்தது ! ஒரு வாரம் கழித்து மூன்றாவது அதிர்ச்சி அலை அடித்து வெளி வளையத்தை மீண்டும் காட்டி முன்பிருந்த இரட்டை வளைய அமைப்பை மறுபடித் தோன்றச் செய்தது. இந்தக் கண்டுபிடிப்பு பூமியின் கதிர்வீச்சு வளையங்கள் தோன்ற பரிதியின் ஆற்றல் மிக்க வெடிப்பு வெளிவீச்சுகளே [Solar Outbursts] காரணம் என்று தெரிந்து கொண்டோம். ஆயினும் தற்போது தோன்றி, மறைந்த மூன்றாம் கதிர்வீச்சு வளையத்துக்கு ஒரு நியதியும் முழு விளக்கம் அளிக்க முடியவில்லை !

இந்த இரண்டு வளையங்களும் விண்வெளித் துணைக்கோள் தொடர்பு களையும், கருவிகளையும் [Satellite Communications and Instruments] பாதிக்கின்றன. மின்கொடைத் துகள்கள் வீசும் பேரளவு கதிர்வீச்சி லிருந்து கருவிகள் போதிய கவசமுடன் பாதுகாக்கப்பட வேண்டும். 2013 பிப்ரவரி 28 ஆம் தேதி நாசாவின் வான் ஆலன் விண்ணுளவிகள், தோன்றி மறைந்த மூன்றாம் கதிர்வீச்சு மாய வளையத்தைக் [Third Transient Radiation Ring] கண்டுபிடித்து வானியியல் விஞ்ஞானிகளை வியக்க வைத்தன ! அத்துடன் மூன்றாவது வளையம் நான்கு வாரங்களே நீடித்து மேலும் விஞ்ஞானிகளை வியப்புறச் செய்தது !

பரிதியில் எழும் சூரிய தீப்புயல்கள் புரியும் தீவிர விளைவுகள்

2012 மார்ச் 30 ஆம் தேதி முல்லார்டு விண்வெளி விஞ்ஞான ஆய்வுக் கூடத்தைச் (UCL’s Mullard Space Science Laboratory) சேர்ந்த டாக்டர் ஸெர்கி ஸகராவ் (Dr. Sergei Zharkov) தேசீய வானியல் கூட்டரங்கில் (National Astronomy Conference) தனது ஆய்வு உரையை நிகழ்த்திய போது கீழ்வரும் அதிசயத் தகவலை முதன்முதல் எடுத்துக் கூறியிருக்கிறார்.    அதாவது பரிதியின் காந்த புலத்தாலும், மின்னேறிய துகள்களாலும் சூரிய தீப்புயல்கள் (Solar Eruptions) எழும்போது பரிதிப் பூகம்பங்கள் (Sunquakes) உண்டாக்கப் படுகின்றன. காரணம் : அப்போது பரிதியிலிருந்து பேரளவு காந்தத் திரட்சி வடிவு (Magnetic Structure) சூரிய மண்டலச் சூழ்வெளியில் வெளியேறுகிறது.    சூரியப் பூகம்ப நிகழ்ச்சியின் முதல் நோக்கை ஆய்வு செய்து 1990 ஆண்டு முடிவில் அறிவித்தவர் இருவர் : கோஸோவிசெவ் & ஸர்காவ் (Kosovichev   & Zharkov) . கடந்த பத்தாண்டு காலத்தில் பரிதிச் சூழ்வெளியில் வீசப் பட்ட சூரிய தீப்புயல்களின் (Solar Flares) வலுமிக்க துகள் கற்றைகள் தாக்கி (Impact of Powerful Beams of Particles) பரிதிக்குள் புகுந்து சூரியப் பூகம்பங்களை (Sunquakes) உண்டாக்கும் என்பது உறுதியாக நிலைநாட்டப் பட்டது.    இப்போது 2012 இல் வெளியான புதிய ஆய்வு அறிக்கையில் பரிதியின் “காந்தப் புலத் திணிவு எழுச்சிகளும்” (CME Coronal Mass Ejections) சூரியப் பூகம்பத்தை உண்டாக்குகிறது என்பது தெரிய வருகிறது.

இந்த விஞ்ஞானிகள் இருவரும் 2011 பிப்ரவரி 15 இல் பரிதியில் நேர்ந்த தீப்புயல்களை ஆய்வு செய்து 2011 மார்ச்சில் நேர்ந்த கிழக்கு ஜப்பான் புகுஷிமா பகுதி 9.0 ரிக்டர் நிலநடுக்கத்தை விட 1000 மடங்கு ஆற்றல் உள்ள சூரியப் பூகம்பம் எழுந்ததைக் கூறியிருக்கிறார்.   அந்த சூரியப் பூகம்பத்தைத் தூண்டியது பரிதிக் காந்த புலத்தின் புயலான இரு வால் முனைகளே.    அதாவது தீப்புயலில் உள்ள காந்தப் புலத்தின் திடீர் விரிவுதான் சூரிய பூகம்பத்தை உண்டாக்கி உள்ளது.    பரிதி மண்டலத்தில் பாயும் தீப்புயலின் சராசரி வேகம் வினாடிக்கு 600 கி.மீ. தூரம் (600 km/sec) (360 mps). அதே பூகாந்தப் புயல் (Geomagnetic Storm) பூமியைத் தாக்கி துருவங்களில் ஒளித்தோரணமும் தோன்றியது.

பரிதியில் நேரும் இந்தக் கண்கொள்ளாக் காட்சிகள் சூரியச் சூழ்வெளியிலிருந்து எப்படிப் பரிதி மேற்தளத்திற்கும் உட்கருவுக்கும் சக்தியும் நெம்பு நிறையும் (Energy and Momentum) வருகின்றன என்று ஆராய விஞ்ஞானிகளுக்கு மிகவும் உதவுகின்றன.

பரிதியின் மேற்தளத்தில் குளத்தில் விழுந்த கல் வரையும் வட்டங்கள் போல் சூரிய பூகம்பங்கள் ஏற்படுவதாக 1972 ஆம் ஆண்டிலே உல்ஃப் (Wolff) என்பரால் முன்னறிவிக்கப் பட்டது.   அவை சூரிய தளத்தின் கீழே திடீரன எழும் சக்தியால் வளையும் ஒலி அலைகள் தோன்றி மெய்யாக மேற்தளத்தில் வட்டங்களாய் உண்டாகின்றன என்று   டாக்டர் ஸெர்கி ஸகராவ் (Dr. Sergei Zharkov) சொல்கிறார்.   2012 ஆண்டில் பரிதியின் கொந்தளிப்பு மிகையாக ஏறுவதால் அதன் உச்சநிலை 2013 இல் அதிகமான சூரிய பூகம்ப எண்ணிக்கையுடன், அவற்றின் மூல காரணங்களையும் முக்கிய விளைவுகளையும் அறியவும் உதவும்.

அடித்தட்டு நகர்ச்சியின் போது பூமிக்குள்ளே என்ன நிகழ்கிறது ?

பூமிக்குள் அடித்தட்டு நகர்ச்சியைத் (Plate Tectonics) துடிக்க வைத்துப் பூகம்பத்தை எந்த விதப் புறத் தூண்டல் உண்டாக்குகிறது என்பதைப் பூதள விஞ்ஞானிகள் இதுவரைக் குறிப்பிட்டுக் காட்ட வில்லை ! ஆனால் அவர்கள் கருதுவது : பூமியின் உட்கருவில் எழும் வெப்பம் மெதுவாக உள்தட்டு (Mantle) ஓட்டத்தைத் தடிப்பான மேல்தட்டு (Lithosphere) அடுக்கில் எழுப்பி விடுகிறது. கடந்த மில்லியன் கணக்கான ஆண்டுகளாய்க் கடையும் இந்த கொந்தளிப்பு இயக்கமே கடற்தட்டுகளையும், அடித்தட்டுகளையும் நகர்த்தி வருகிறது. பூதள விஞ்ஞானிகள் இவ்வித அடித்தட்டு நகர்ச்சி நிகழ்ந்து கடந்த 2.5 முதல் 4 பில்லியன் ஆண்டுகளாகப் பூமியின் மேல் தளத்தை உருவாக்கி வந்திருக்கிறது என்று மதிப்பிடுகிறார்கள். இப்போதும் அந்த நகர்ச்சி தொடர்ந்து இயங்கி வருகிறது.

இந்திய மண்திணிவு எதிர்த்துத் தள்ளுவதால் இமயத்தின் சிகரங்கள் உயர்ந்து கொண்டே போகின்றன ! ஹவாயித் தீவுகள் ஜப்பானை நோக்கி அங்குல அங்குலமாய் நகர்கின்றன ! ஐரோப்பாவும் வட அமெரிக்காவும் ஒன்றை விட்டு ஒன்று விலகிச் செல்கின்றன ! அதாவது அட்லாண்டிக் கடல் அகலமாகிப் பசிபிக் கடல் சுருங்கி வருகிறது ! இன்னும் மில்லியன் ஆண்டுகள் தாண்டி ஒருவர் நோக்கினால் உலகக் கண்டங்களின் புதிய அமைப்பில் வேறு முகத்தோடு செதுக்கப் பட்டிருக்கும் ! பூமியானது மாபெரும் ஏழு அடித்தட்டுகளோடு பல்வேறு சிறு அடித்தட்டுகளைப் பின்னி மேல் தளத்தை அமைத்துக் கொண்டுள்ளது ! உள்ளே உள்ள பூமியின் வெப்ப திரவம் வலுவற்ற பகுதிகளின் வழியே கசிந்து வெளியேறி அவற்றில் எரிமலை அரங்குகள், தீவுகள் உண்டாகின்றன.

ஓராண்டில் சுமார் ஒரு மில்லியன் நிலநடுக்கங்கள் பூமியில் நேருகின்றன என்று பூதள விஞ்ஞான நூலில் குறிப்பிடப் பட்டுள்ளது ! இவற்றில் பல மிகச் சிறிய அதிர்வுகள். கருவிகளால் மட்டுமே அவை உணரப்பட்டுப் பதிவாகின்றன. ஒவ்வோர் ஆண்டிலும் சராசரிச் சுமார் 10,000 பூகம்ப மரணங்கள் நேருகின்றன. அதாவது ஓராண்டில் இரண்டு பூகம்பங்கள் நேர்ந்தால் சராசரி மரணங்கள் 5000 (2X5000 =10,000) ஏற்படலாம். 1900 ஆண்டு முதல் 2009 வரை 6.1 முதல் 9.5 ரிக்டர் அளவீட்டில் சுமார் 50 அசுரப் பூகம்பங்கள் நேர்ந்துள்ளன ! அவற்றில் 2004 ஆம் ஆண்டு இந்து மாக்கடலில் 9 ரிக்டர் அளவீட்டில் நேர்ந்த இந்தோனேஷியா கடற்தட்டுப் பூகம்பத்தில் எழுந்த சுனாமி அலையடிப்பில் தென்னாசியக் கடற்கரை நாடுகளில் 250,000 மக்கள் உயிரிழந்தனர் ! உடைந்த இல்லங்கள், இழப்புகள் பல பில்லியன் டாலர் மதிப்புள்ளவை ! வரலாற்றில் மாபெரும் மனித இனச் சேதம் !

பூகம்ப நகர்ச்சியும் பூமியின் பூதள மின் ஜனனியும்

பூகம்பம் என்பது பூமிக்கடியில் எழுந்து மேல் தளத்தில் அல்லது கடற் தளத்தில் நேரும் ஒரு திடீர் நில அதிர்ச்சி ! அந்த நிலநடுக்கத்தைப் பூமிக்கடியில் மெதுவாகப் பாறைகளில் சேமிக்கப்பட்ட சக்தியின் வெளிப்பாடே உண்டாக்குகிறது ! இந்தச் சக்திக்கு மூல காரணி யாது ? எப்படிச் சக்தி பாறைகளில் சேமிப்பாகிறது ? ஏன் திடீரென நிலநடுக்கம் ஏற்படுகிறது ? பூமியின் உள்ளமைப்புப் படத்தைப் பார்த்தால் “லித்தோ கோளம்” (Lithosphere) முறியும் பாறைகளைக் கொண்டதாகத் தெரியும். அக்கோளம் சுமார் 100 கிலோமீடர் (60 மைல்) தடிப்புள்ளது. மேலும் “ஆஸ்தெனோ கோளத்தின்” (Asthenosphere) சூடான பிளாஸ்டிக் பாறையில் அது மிதக்கிறது. லித்தோ கோளம் அனைத்தும் “நகர்ச்சி அடித்தட்டுகள்” (Tectonic Plates) எனப்படும் ஏழு பெரும் துண்டங்களாகவும் பல்வேறு சிறு துண்டங்களாகவும் பிரிக்கப் பட்டுள்ளன ! அந்த நகர்ச்சி அடித்தட்டுகள் ஆண்டுக்குச் சதா 1 முதல் 1.8 செ,மீடர் நகர்ந்து செல்வதால், ஒன்றை ஒன்று முட்டி, மோதி, நழுவிக் குதிரை ஏறி எல்லைப் பகுதியில் (Plate Boundaries) தள முறிவுகளை ஏற்படுத்துகின்றன. அவ்விதம் அடுத்தடுத்து ஜப்பான், இந்தோனேஷியா, ஸான்பிரான்சிஸ்கோ, தென்னமெரிக்காவின் பெரு (Peru) நாட்டுப் பகுதிகளில் தொடர்ந்து நிலநடுக்கம் ஏற்பட்டு வருகிறது.

பூதள விஞ்ஞானிகள் பூமி உட்கருவின் காந்தத் தளத்தில் ஏற்படும் ஏற்ற இறக்கத்துக்கு என்ன காரணம் என்பதை நீண்ட காலமாக அறிந்திருந்தார்கள். நமது பூமி மற்ற சூரியக் கோள்களைப் போல் தனது உட்புறப் “பூதள மின் ஜனனியைக்” (Internal Geodynamo) கொண்டு சுயக் காந்த தளத்தை உண்டாக்கிக் கொள்கிறது. பூமியின் மின் ஜனனி சாதாரண மின்சார ஜனனி போல் சுழலும் உட்கருவின் இயக்கத்தால் மின்னோட்டத்தை நிகழ்த்துகிறது. நிலவைப் போல் ஏழு மடங்கு கொள்ளளவுள்ள ஓர் இரும்புத் திரவக் கடல் பூமிக்குள் சுற்றிப் பூதள மின் ஜனனியாக இயங்கி வருகிறது.

சூரியனே பூமியின் காலநிலைச் சூழ்வெளி மாறுதலுக்குக் காரணம்

பூமியின் காலநிலைச் சூழ்வெளி மாறுதலுக்குச் (Climate & Weather Change) சூரியனின் வாயுக் கோளக் கொந்தளிப்பே காரணம் என்பது பூதள விஞ்ஞானிகள் பலரது முடிவாகத் தெரிகிறது. பூகோளச் சூடேற்றத்தின் நீட்சிக்குப் (Global Warming Trend) பரிதியின் கொந்தளிப்புப் புயலே பெரும் பங்கேற்கிறது. அதற்கு மனித விளைவுகளின் பங்கு சிறிதளவே ! சூரியனே நமது பூமியில் நேரும் பாதிப்புகளுக்கு பூகோளத்தின் உட்கருவில் ஒரு சங்கிலி இயக்கத்தைத் தூண்டும் ஒரு யந்திரமாக உள்ளது ! நமது விஞ்ஞான நுண்கருவிகள் அனைத்தும் (விண்ணுளவிகள், தொலைநோக்கிகள்) விண்ணை நோக்கிப் பரிதியின் இயக்கத்தையும், அதனால் ஏற்படும் பூமியின் காந்த தளம், பூமியின் சூழ்வெளியில் அயனிக் கோளம், ஸ்டிராடோ கோளம் ஆகியவற்றின் பாதிப்புகளையும் ஆராய்ந்து அளந்து வருகின்றன.

பூமியில் இடி மின்னல் தாக்குவது போல் பூமியின் சக்தி முறுக்கேறிய உட்கருவும் (Highly Charged Core) நடந்து கொள்கிறது. பூமியின் உட்கரு, கீழ்த்தட்டு, மேல்தட்டு (Core, Mantle & Crust) ஆகியவற்றை ஆய்ந்து உளவு செய்த டாக்டர் பீட்டர் ஆல்ஸன் கருத்துக்கேற்ப பரிதியின்  “காந்தப் புலத் திணிவு எழுச்சிகளும்” [Corona Mass Ejection (CME)] மற்றும் பல்வேறு விண்வெளி அனுப்பும் மின்கொடைத் துகள்கள் (Charged Particles) மின்னல் அடிப்பு போல் தாக்கும் பொருட்களில் எதிரடியும் உண்டாக்கு கின்றன !

கடற் தளத்தின் மீது சீரான காந்தத் திணிப்புகள்

1950 ஆண்டுகளில் கடற் தளத்தின் கீழ் பெட்ரோலிய ஆயில் புதையல்களைத் தேடிச் செல்லும் பூதள ஆய்வாளர் காந்தக் கருவி களைக் கட்டிக் கப்பல் அல்லது விமானம் மூலம் ஆராய்ந்த போது காந்த வலுவற்ற பாறைகளுக்கு அருகில் ஆயில் கிணறு இருப்பதைச் சோதித்தார்கள். பூமியின் தளத்தில் நோக்கிய போது பாறைக் காந்தங்கள் தாறுமாறாய் இங்கும் அங்கும் செம்மை யில்லாது இருந்தன. ஆனல் கடற்தளங்களில் காந்தப் பாறைகள் அவ்விதம் அமையவில்லை ! மாறாக 1960 ஆண்டுகளில் அட்லாண்டிக் கடலில் தேடிய போது கடற்தளப் பாறைகளின் காந்தங்கள் சீராக ஓரினப் பண்பாட்டில் விந்தையாக நீண்ட அளவுத் துண்டங்களாய் “மைய அட்லாண்டிக் பிளவுக்கு” இணையாக (Parallel to the Mid-Atlantic Ridge) அமைந்திருந்தன. அந்த மைய அட்லாண்டிக் கோட்டில்தான் எரிமலைக் கசிவுகள் உண்டாகி எரிமலைத் தீவுகள் எழும்பியுள்ளன ! மற்றும் எல்லைக் கோட்டில் தான் பூகம்பங்களும் பல நேர்ந்துள்ளன.

கடற் தளப்பரப்பு விலகி நகர்தல் !

1962 இல் லாரென்ஸ் மார்லி (Lawrence Morley) என்பவர் கடற்தள விரிவைப் பற்றி முதன்முதல் அறிவித்தைப் பல பூதள விஞ்ஞானிகள் நிராகரித்தார். லாரென்ஸ் மார்லி, அடுத்து டிரம்மண்டு மாத்யூஸ், ·பிரெடெரிக் வைன் ஆகிய மூவரும் கடற்தளம் தொடர்ந்து சீராக ஆண்டுக்கு 2.5 செ.மீடர் வீதத்தில் விலகிக் கொண்டு வருவதாக அறிவித்தனர். அடித்தட்டுகள் விலகும் போது பிளவில் எரிமலைக் குழம்பு கசிந்து பிறகு குளிர்ந்து படிகிறது. அப்போது அவை தமது காந்த முனை அமைப்புகளையும் முத்திரை செய்தன. சராசரி அரை மில்லியன் ஆண்டுகளுக்கு ஒருமுறை பூகாந்தம் முனைத் திருப்பம் செய்கிறது. அதே போல் கடற்தளப் பாறைகளும் தமது காந்த முனைத் திருப்பங்களைப் பதிவு செய்கின்றன. அதாவது பூமியின் கடற்தளம் ஒரு “பூத நாடாப் பதிவு மானி” (Giant Tape Recorder) போல் இயங்குகிறது ! இவ்விதமாக அனைத்துக் கடற்தளங்களும் வெவ்வேறு காந்த முனைகளைப் பதிவு செய்த பாறைத் துண்டங்கள் கொண்டதாக காணப் படுகின்றன. அந்த கடற்தள அடித்தட்டுகளைத் தொடர்ந்து தள்ளிக் கொண்டு நகர்த்துவது பூமியின் உட்கரு வெப்பச் சக்தியே !

[தொடரும்]
+++++++++++++++++++

தகவல்:

Picture Credits: NASA, JPL; National Geographic; Time Magazine, Discovery, Scientific American & Astronomy Magazines, Science Illustrated, Wikipedia & Earth Science & the Environmental Book.

1. Our Universe – National Geographic Picture Atlas By: Roy A. Gallant (1986)
2. 50 Greatest Mysteries of the Universe – How Did the Solar System form ? (Aug 21, 2007)
3. Astronomy Facts File Dictionary (1986)
4. The Practical Astronomer By Brian Jones & Stephen Edberg (1990)
5. National Geographic – Invaders from Space – Meteorites (Sep 1986)
6. Cosmos By Carl Sagan (1980)
7. Dictionary of Science – Webster’s New world (1998)
8. Physics for Poets By : Robert March (1983)
9. Atlas of the Skies (2005)
10 Universe Sixth Edition By: Roger Freedman & William Kaufmann III (2002)
11 Universe By : Roger Freedman & William Kaufmann III (2002)
12 Science Daily : Magnetic Field Reversals Illuminated By Lava Flows Study [September 26, 2008]
13 Pure Energy System News : Earth’s Magnetic Field Reversal By : Mary-Sue Haliburton
14 Magnetic Storm Home Page What Drives Earth’s Magnetic Field (Oct 2003)
15 BBC News : Is The Earth Preparing to Flip ? By : David Whitehouse (March 27, 2003)
16 Scientific American Magazine – Our Ever Changing Earth – Probing the Geodynamo By : Gary Glatzmaier & Peter Olson (September 26, 2005)
17 Solar Pole Shift & Pole Reversal in 2012 ( http://newsvote.bbc.co.uk/mpapps/pagetools) By : Patrich Geryl (May 19, 2009)
18 Science at NASA – The Sun Does a Flip (February 15 2001)
19 India Daily Technology Team (Aug 8, 2005)
20 NASA Claims Sun Polar Shift Due in 2012 (Dec 9, 2005)
21 Earth Wobbles Linked to Extinctions (Oct 11, 2006)
22 The Sun’s Magnetic Cycle By Dr. David Stern (April 12, 2007)
23 Earth’s Magnetic Reversals & Moving Continents By Dr. David Stern (Feb 23, 2008)
24 The Sunspot Cycle By Mitzi Adams (June 6 2009)
25 ECTV News Letter – Has The Solar Magnetic Pole Reversal Already Begun ? By : Mitch Battros (Oct 10, 2005)
26 New Sunspot Activity Threatens Mobile Phone Networks (Jan 7, 2008)
27 Sun’s Polar Reversal 2012 – The Next Magnetic Polar Shift & Consequences
28 http://www.thinnai.com/?module=displaystory&story_id=40906041&format=html(Earth’s Pole Reversal)
29 National Geographic Picture Atlas of Our Universe By : Roy Gallant (1986)
29 (a) National Geographic – Sun Bursts By Curt Suplee (July 2004)
30 American National Oceanic & Atmospheric Administration (NOAA) Forecast – Next Solar Storm Cycle 24 Will Start Late NOAA Website : http://www.noaa.gov & NOAA’s Space Environment Center: <http://www.sec.noaa.gov> (April 25, 2007)
31 Philip’s World Atlas – Solar System Profile & Anatomy of the Earth (2005)
32 Oxford Essential World Atlas – Restless Earth (2006)
33 Hutchison The Encyclopedia of Earth : Magnetism, Gravity & Heat (1985)
34 National Geographic Picture Atlas of Our Word (1990)

35 Earth Science & The Environment By : Graham Thompson & Jonathan Turk (1993)
36 http://www.space.com/11506-space-weather-sunspots-solar-flares-coronal-mass-ejections.html  (Space Weather: Sunspots, Solar Flares & Coronal Mass Ejections)
37  http://science.nasa.gov/science-news/science-at-nasa/2006/10mar_stormwarning/ (NASA Science News   Solar Storm Warning) (March 10, 2006)
38  http://www.thecityedition.com/Pages/Archive/2010/Sunspots.html  [Sunspot Cycles & Power Grid] (November 18, 2011)
39 http://solarham.com/ Joint USAF/NOAA Report of Solar and Geophysical Activity SDF Number 104 Issued at 2200Z (April 13, 2012)
40. Solar Science – Solar Eruptions Cause Sunquakes (April 4, 2012)

41. http://en.wikipedia.org/wiki/Van_Allen_Probes [Twin Van Allen Probes] [June 16, 2013]

42. http://science.nasa.gov/science-news/science-at-nasa/2013/28feb_thirdbelt/ [Van Allen Third Belt] [February 28, 2013]

43. http://www.scientificamerican.com/article.cfm?id=third-van-allen-radiation-belt-makes-appearance-around-earth [February 28, 2013]

44. http://www.webpronews.com/radiation-belt-around-earth-discovered-by-nasa-2013-03 [March 1, 2013]

45. https://en.wikipedia.org/wiki/Van_Allen_radiation_belt (Van Allen Radiation Belts)  [June 16, 2013]

46. http://www.dailymail.co.uk/sciencetech/article-2286560/Third-Van-Allen-belt-Earth-Space-probes-shed-new-light-hazardous-space-regions-filled-killer-electrons.html [March 1, 2013]

47. http://www.americaspace.com/?p=32169 (Third Radiation Ring Discovered) [March 3, 2013]

48. http://www.huffingtonpost.com/2013/09/30/third-van-allen-belt-solar-storm_n_4017297.html [Septemper 30, 2013]

29. https://en.wikipedia.org/wiki/Van_Allen_radiation_belt [June 3, 206]

49. http://www.dailymail.co.uk/sciencetech/article-2286560/Third-Van-Allen-belt-Earth-Space-probes-shed-new-light-hazardous-space-regions-filled-killer-electrons.html   [June 20, 2016]

50. http://www.spacedaily.com/reports/Space_tsunami_causes_the_third_Van_Allen_Belt_999.html [June 21, 2016]

++++++++++++++++++++++++++++++++++++++++++++++++++++

S. Jayabarathan (jayabarathans@gmail.com) [June 22, 2016]

https://jayabarathan.wordpress.com/

Attachments area

Preview YouTube video Previously Undetected Radiation Belt Revealed

Previously Undetected Radiation Belt Revealed

Preview YouTube video Van Allen Radiation Belts to be Explored by New Spacecraft | NASA RBSP Storm Probe Mission Video

Van Allen Radiation Belts to be Explored by New Spacecraft | NASA RBSP Storm Probe Mission Video

Preview YouTube video Van Allen Radiation Belt Storm Probes – What They Will Do | NASA RBSP GSFC Video

Van Allen Radiation Belt Storm Probes – What They Will Do | NASA RBSP GSFC Video

June 25, 2016
இன்னம்பூரான் பக்கம் [7] பெண்ணியம்: புதிய பார்வை [3/1]

இன்னம்பூரான்
ஜூன் 24, 2016

ஒரு கட்டுரையை நான்கு பாகமாக அளிக்க வேண்டிய கட்டாயம், நேரமின்மை. விட்டு விடுவதை விட, இது மேல்.

இங்கிலாந்தின் லான்ஸெட் என்ற மருத்துவ இதழ் பல்லாண்டுகளாகவே மிக பிரபலம்; முக்கியத்துவம் வாய்ந்தது. அதில் நாளை சாரு பஹ்ரீ என்பவர் எழுதிய Gaps in India’s health response to violence against women என்ற ஆங்கில கட்டுரை வெளியாகும். நாமும் நான்கு பேர் ஆராய்ந்து கூறுவதை ஆழ்ந்து கவனிக்கவேண்டும். இல்லையென்றால், குண்டுச்சட்டியில் குதிரை ஓட்டலாம்.

அந்த கட்டுரையின் என்னுடைய சாராம்சத்தின் முதல் பாகம் இங்கே.

பெண்கள் மீது வன்முறை நடப்பதை சமுதாயத்தின் ஆரோக்கிய பிரச்னையாக அரசு அணுகினாலே, சுகாதார நடைமுறைகளால் இந்த பூதாகாரமான பிரச்னைக்கு தீர்வு காண்பது எளிதாகும் என்று வல்லுனர்கள் கருதுவதாக, சாரு பஹ்ரீ கூறுகிறார்.

ஐந்து வருடங்கள் முன்னால் இந்த பிரச்சனையை அணுக தனக்கு ஒரு வாய்ப்பு இருப்பது காயத்திரி என்ற கர்நாடகா அரசு பணி புரியும் செவிலியருக்குத் தெரியாது. இன்று, 82 செவிலியர்கள், 37 டாக்டர்கள், 270 சமுதாய ஆர்வலர்கள், இவருடன் இணந்து இந்த பிரச்சனையின் தாக்கத்தை கணிசமான அளவு குறைக்க முடிந்திருக்கிறது என்பது அவருக்கு ‘என்னால் முடியும்’ என்ற நம்பிக்கையை கொடுத்துள்ளது. ‘ஸெளக்யா’ என்ற திட்டத்தின் கீழ் தனியார்-அரசு கூட்டமைப்பு ஒன்று அருமையாக செயல் படுகிறது. இதற்கு மத்திய அரசும், அமெரிக்க உதவியும் போற்றத்தக்கவை.

பளிங்கு நீர் போன்ற தெளிவுடன், பெண்களை அடித்து துன்புறுத்தியோ, வாய்வீச்சில் வசை பாடியோ, பாலியல் தொந்தரவு கொடுத்தோ, காசு பணம் கொடுக்காமல் பாடாய் படுத்தினாலோ அது பெண்ணியத்தைத் தாக்கும் வன்முறை என்பது அந்த கூட்டமைப்பின் தாரகமந்திரம். ‘இவர்கள் எல்லாரும் ஆரோக்கிய வாழ்வின் பாதுகாவலர்கள், அண்டை வீட்டார் போல..’ என்கிறார், அகில இந்திய அளவில் இந்த பிரச்சனையுடன் போராடும் Research Triangle Institute Global India Private Limited, New Delhi, என்ற அமைப்பின் தலைவரும் பெங்களூரில் மருத்துவ பேராசிரியையும் ஆன சுனீதா கிருஷ்ணன். ஆகவே, அனுபவமும், பரிச்சியமும் கை கொடுக்க, காயத்திரி போன்றோர் துப்புத் துலக்கி, ‘அடி வாங்கி சுருங்கிக் கறுத்தக்கண், காயம் பட்ட அவயவங்கள், அஞ்சி நடுங்கும் பீதி போன்ற சின்னங்களை புரிந்து கொண்டு தக்கதொரு முறையில் இயங்குகிறார்கள்.’ என்று கூறுகிறார். சில பெண்கள் கதறியழுது கொடுமையை பற்றி கூறிவிடுகிறார்கள்; சிலர் பல முறை பேசிய பிறகு தான் நடந்த கொடுமையை ஒத்துக்கொள்கிறார்கள்.’ என்று காயத்திரி கூறியிருக்கிறார். சில குடும்பங்களில் கொடுமைக்கு ஆட்படுத்தப்பட்ட பெண்கள் எங்களை அணுகமுடியாமல் குடும்பத்தினர் தடுப்பார்கள். நான் அதையும் மீறி அவர்களிடம் தனித்து மிருதுவாகப் பேசி உண்மையை அறிந்துகொள்வேன், என்கிறார், காயத்திரி.

இந்த தொடர் சொற்றொடராக பதிவு செய்யப்படவில்லை. இது உண்மையை கக்கும் அப்புரானி. அதனால் தான் இந்தியாவில் வெளிவராமல், இங்கிலாந்தில் பதிவு ஆகி, நம் மானத்தை வாங்குகிறது. எப்படியாவது கொடுமையை தடுக்கும் வழியில் பயணிப்பது நம் கடமை.

இன்று கட்டுரையின் முன்னறிவிப்பு மட்டும் தான். வாசகர்கள் இருந்தால், முழுதும் வெளியாகும். அத்தருணம் படித்த கட்டுரையின் இணைப்பும் கொடுக்கப்படும். அது வரை, சாரு பஹ்ரீக்கும், லான்ஸெட்டுக்கும் நன்றி கூறி விடை பெறுகிறேன்.

(தொடரட்டுமே.)

சித்திரத்துக்கு நன்றி:
http://sheikyermami.com/wp-content/uploads/2015/05/burqa.jpg

இன்னம்பூரான்

June 24, 2016