Blog

தித்திக்குதே திருக்குறள் – 9 – சொல்லவல்லாயோ கிளியே!

திவாகர்

அமுதகீதம்போல என்பெயரை எப்படியோ

குமுதா குமுதாவென இனிமையாய்நீ

பேசினாலும் என்னுள்பொங்கும் இன்பத்துக்கு

ஊசியளவும் உன்பேச்சு இணையாகுமோடி

நேற்றுவந்த கிள்ளைமொழிக் கிளியே

சற்றே குமுதாகுமுதா எனக்கூவாமல்

நடந்தகதை அத்தனையும் கேளடி

தொடர்கதையாய் ஆயிரம் நாட்களடி

நான்கண்டேன் வேதனையும் சோதனையும்

அன்றொருநாள் அல்லிக்குளத்திலே அடியாள்

நீராடும்போது மன்னரவர் பார்த்துவிட்டாரடி

சீரும்சிறப்புமாய் என்னைக் கல்யாணம்

செய்வேனெனச் சொன்னவரை சீண்டவில்லையடி

வாய்பேச்சு வேண்டாம் வந்துஎம்தந்தையைப்

பாருமென பொல்லாமன்னரை புறக்கணித்தேனடி

பாரிலேநல்ல பெயருமில்லைதான் பார்க்கும்

ஊர்ப்பெண்களிடம் பாதகம்வேறு செய்பவராம்

கர்வமே தலைக்கொண்டு மாமல்லனாய்

யாருக்கும் தொல்லையாய் இருப்பவராம்

யார்தான் முன்வருவாரடி இவரைமணம்செய்ய?

ஆனாலும் அவருமென்னைக் கவர்ந்ததனால்

முன்வைத்தேன் ஒருகோரிக்கை அவரிடம்

நான்வணங்கும் நாரணனை அவர்வணங்கி

தானதர்மங்கள் அன்னமிடலென ஆயிரம்நாட்கள்

ஏதுதுன்பம் வரினும் தொடர்ந்துசெய்துவந்தால்

பேதைநான் மாலையிடுவேன் அவர்க்கேயென

வீம்பாகச் சொன்னேனடி செல்லக்கிளியே

நம்பினார் அவரென்னை அதுமுதலாய்

நாளுமிந்த ஊரிலே விருந்தோம்பல்தான்

ஆளும்அரசனெனும் பேற்றையும் மறந்து

பிள்ளை மனங்கொண்டு விருந்திட்டாரடி

நாளாகநாளாக அவர்விருந்தும் அதன்சுவையும்

நாடுதோறும் வீடுதோறும் பெரும்பேரானதடி

கடுகத்தனை சிரமமுமிலாமல் வந்தவர்க்கெலாம்

பசியாற மனமகிழ்ந்துவிருந்திட்டார் வந்தவரும்

ருசித்து உண்டாரடி ரசித்துமகிழ்ந்தாரடி

காலமிது காலமடி கலியாளும்காலமடி

சீலமிகு அடியவர்கள் நாள்தோறும்

அதிகமானோரடி, விருந்துண்டால் கலியன்

அதிமதுர விருந்தொன்றே உண்டாமென்றாரடி

ஓராயிரம்நாட்களென ஏன்கேட்டேனோகி்ளியே

வருவோர்க்கெல்லாம் விருந்தோம்பி விருந்தோம்பி

ஏராளமாய் அவர்செல்வம் கரைந்துபோனதே

அரசராயிருந்தவர் ஆளும்பதவி போனதே

கடன்வாங்கினாரடி கிளியே காசுவேண்டியதால்

உடனிருந்தோரை தனைவிடுத்து ஓடவைத்தாரடி

கலங்கவில்லையடி கிளியே விருந்தினர்மனக்

கலக்கம் விரும்பவில்லையடி கிளியேஅதனால்

விருந்துச்செலவுக்குப் பொன்வேண்டி நாளும்

பெரும்பொருள்வாங்க வழிஏதும் இல்லாது

கொடும்கள்வனாகிப் போனாரடி கிளியேநான்

படுகின்ற தொல்லைகளை நாரணனும்கண்டானோ

ஏழைஇவள் சொல்லொன்றினால் மாமல்லன்

பாழும் கொள்ளையில் ஈடுபட்டானென

நேற்றிரவு அவனேஇவரெதிரே இவர்மேல்

பற்றுமிகக்கொண்டு செல்வந்தன்போல வந்தானடி

’கலியனே! உன்பலங்கொண்டு முடிந்தாலென்

கால்கழலினை எடுத்து விருந்துச்செலவுக்கு

உன்னிஷ்டம்போல பயன்படுத்துக’ என்றானடி

நாராயணனென அறியாத என்மன்னவர்தாம்

கார்வண்ணன் கால்வளையம்கழற்ற முயன்றாரடி

பாரளந்த பரமனவன் சீரடியில்தலைவைத்து

கூர்பல்கொண்டு கழல்கடிக்கும் வேளையில்

வாய்தவறி பல்லொன்று பாதத்தில்பட்டதுவே

பாய்விரித்த பாம்பணையில் பள்ளிகொண்டவன்

நேர்வந்து நின்று என்னவரை ஆட்கொண்டான்

’சீர்பெற்ற தமிழால்எனை எந்நாளும் பாடுக!

உனைஉணர்வாய் கலியாஉலகுக்கே ஒப்பாவாய்

திருமகள்போல் உள்ளவளாம் குமுதாவோடு

திருமங்கைமன்னனாய் இனிதாயிரு’ என்றான்.

சொல்லவல்லாயோ கிளியே! பசித்தவர்

எல்லோர்க்கும் ஆயிரம்நாளாய் மனமகிழ்ந்து

விருந்தளித்த என்னவர்க்கு நாராணனேமுன்வந்து

விருந்துக்குவிருதாக தன்னையே அவர்க்களித்தான்

தெள்ளியதமிழாய் நாவினிக்க அவர்பாடுவதைக்கேள்

கிள்ளைமொழியால் நீயும்கற்பாய் அவர்தமிழை.

குமுதாகுமுதா எனவென்பெயரைப் பேசாமல்

அமுதமாய் கலியாகலியா எனசொல்லநீவல்லாயோ!!

*************************************************************************************

வருவிருந்து வைகலும் ஓம்புவான் வாழ்க்கை
பருவந்து பாழ்படுதல் இன்று. (திருக்குறள் – 83)

நாளும் வரும் விருந்தினரைப் பேணுபவனின் வாழ்க்கை வறுமைப்பட்டுக் கெட்டுப் போவது இல்லை.

தித்திக்குதே திருக்குறள் – 9

(விருந்தோம்பல் என்றதும் ஏனோ குமுதாவும் திருமங்கை ஆழ்வாரும் எங்கள் சொந்த ஊர் திருநகரியும் ஞாபகத்துக்கு வந்துவிட்டதால் ஏற்பட்ட படைப்பு இது. திருவள்ளுவர் எல்லா விஷயங்களுக்கும் ஒரு குறள் வைத்திருப்பதால் இதற்கும் ஏற்ற ஒரு குறளை வைத்து எழுதப்பட்டது.)

June 22, 2016
இறையியல் சிந்தனைகள்: ஸ்டீவ் ஜாப்ஸும் வள்ளலாரும்: 2

அவ்வைமகள்
இரேணுகா இராசசேகரன்

உணர்வும் அறிவும் இயைந்த தேடல் வெகு சுவாரசியமானது

உணர்வும் அறிவும் இயைந்த தேடல் வெகு சுவாரசியமானது. மனிதனது உள்ளத்தில் ஐயம் ஒன்று முளைத்துவிட்டால் – அந்த ஐயத்தைத் தீர்த்தே ஆகவேண்டும் என்கிற வெறி பிறக்கும். மனம் எதிலும் தங்காது. தனக்குள் எழுந்துள்ள ஐயத்தைத் தீர்க்கும் சரியான விளக்கத்தைத் தேடி அது ஓடும். ஓடும் வழியில், ஒரு வேளை எவரேனும் விளக்கம் தந்தால், ஒரு வினாடி நின்று கவனிக்கும். தரப்பட்ட அந்த விளக்கம் விளங்கக் கூடியதாய் இருந்தால் அமர்ந்து யோசிக்கும். ஆனால், விளங்காத விளக்கத்தைக் காண நேரிட்டால், “தூ” என்று துப்பாத குறையாய் வெகுளும். ஆனால் சோர்ந்து போகாது! வேட்கை எண்ணம் மேலும் கூட ஓடும் – ஓடிக்கொண்டே இருக்கும். அன்றாட வாழ்விலோ பிற ஜனங்களுடன் வாழ்ந்தாலும் அவர்களிலிருந்து விலகி தன்னைத் தனிமைப்படுத்திக்கொள்ளும், சொல் மறக்கும் சுற்றம் மறக்கும், சூழல் மறக்கும். தொலைவும் பயணமும் பொருட்டில்லையெனும்படியாய் உலகின் எந்த மூலைக்கும் சென்று தன் ஐயத்தைத் தீர்த்துக்கொள்ள எத்தனிக்கும். இடம்பெயர்ந்தும், நாடு கடந்தும், கண்டம் விட்டு கண்டம் பாய்ந்தும் கூட ஒடி ஓடித் தேடும் – விடாமல் தேடும்.

ஆனால் இந்த ஒட்டத்தில், ஒன்றில் மட்டும் தெளிவு இருக்கும். அது என்னவென்றால் – வழக்கமான கல்விசார் அமைப்புக்களில் தனது ஐயத்திற்கு விடை கிடைக்காது என்பதே அது. எனவே, தேடல் வேட்கை, கல்விக்கூடங்களையும் ஆசிரியப்பெருந்தகைகளையும், முறைசார்க் கல்வியையும் அறவே புறக்கணிக்கும். விசாலப் பார்வையுடன் விரிந்து பரந்த நோக்கிலே சுற்றியுள்ள அனைத்தையும் அது காணும் – பரிசோதிக்கும். யதார்த்த சாகரங்களிலே குதித்து மூழ்கித்தேடும் முத்தான விளக்க முத்துக்கள் கிடைக்குமா என்று.

ஸ்டீவ் ஜாப்ஸிற்கு உண்டாகிய இறை தேடல் உணர்வு இத்தகையதான வீரியமும் வலிவும் கொண்டதாய் இருந்தது. அவர் ஒரு அசாதாரண மனிதர். சாதாரண மனிதர்களுக்கும் அசாதாரண மனிதர்களுக்கும் உள்ள ஒரே வேறுபாடு என்னவென்றால் அது அவர்களுடைய தேடல் தீவிரம் தான்! சாதாரண மனிதர்கள் சாதாரணமாய்த் தேடுகிறார்கள் – அசாதாரண மனிதர்கள் அசாதாரணமாய்த் தேடுகிறார்கள்.

மனம் எனும் தோணி பற்றி செல்லும் வாழ்க்கைக்கும் மதி எனும் தோணி பற்றி செல்லும் வாழ்க்கைக்கும் உள்ள வித்தியாசம் இதுதான். முன்னதில் மனம் வாகனம் பின்னதில் அறிவு வாகனம். மனத்திற்கும் அறிவிற்கும் உள்ள வித்தியாசம் ஒரு படகிற்கும் கப்பலுக்கும் இடையே உள்ள வித்தியாசத்தைப்போல.

அறிவியல்-பொறியியல் ரீதியாகப்பார்த்தால் படகும் கப்பலும் நீர் வழி வாகனங்கள் எனும் ஒரே குடும்பத்தைச் சேர்ந்த வாகனங்கள் தாம். ஆனால் இரண்டிற்கும் உள்ள வித்தியாசங்களோ ஏராளம். முன்னது நீரின் வெளிப்பரப்பில் மிதப்பது, நீரோட்டத்துடன் செல்வது – நீரோட்டத்தின் ஒவ்வொரு சலனத்திற்கும் இலக்காவது. குறைந்த தொலைவே பயணிக்க வல்லது. நீரோட்டம் கொஞ்சம் கடுமையாக ஆனாலும் பயணிக்க முடியாதது வெகுசுலபமாக விபத்துக்களைச் சந்திக்ககூடியது. இழுவைத்திறனும் கொள்திறனும் குறைவான அளவே உள்ளது. படகுப் பயணம் குறைத்த நாட்களே. படகில் பயணிப்போர்க்கு அதிக பாதுகாப்புகள் இல்லை -அதிக வசதிகள் இல்லை.

கப்பலோ கடுமையான கட்டமைப்பும் உறுதியும் கொண்டது. நீரின் சலனங்கள் அதற்கு ஒரு தூசி மாதிரி, எந்த நீர் அதனைக் கவிழ்க்க வல்லதோ, அதையே தனக்கு ஒத்தாசை செய்யுமாறு தன்வசப்படுத்தி, நீரின் பரப்பில் வெறுமனே மிதக்காமல் நீருள் பாதி அமிழ்ந்து, நீரை ஆலிங்கனம் செய்வதைப்போல ஒரு வெளிப்புறக் காட்சியைக் கொடுத்துக்கொனடே நீரை இறுக்கிப் பாதத்தில் பிடித்துக்கொள்ளும் மகா சாமர்த்தியம் உள்ள வாகனம் கப்பல். முயலகனைக் காலில் அழுத்தியபடி மோனப் புன்னகையுடன் ஆரவாரம் ஏதுமின்றி வெகு யதார்த்தமாய் அமர்ந்திருக்கும் சிவபெருமானின் தட்சிணாமூர்த்தித் தத்துவத்தின் அறிவியல் எடுத்துக்காட்டு கப்பல் எனலாம்.

பொம்மலாட்டம் ஆடாமல் நீரில் நிலையாய் நிற்பது கப்பலின் திறம். பிரம்மாண்ட இழுவைத்திறனுடன் கம்பீரமான மகா உறுதியுடன், அதிக தூரம், அதிக வேகம், அதிகக் கொள்திறன் – என்று அதிக ஆற்றலுடன் – அதிக விசையுடன் செல்லும் வாகனம் கப்பல். கப்பல் பயணத்தை நெறிப்படுத்த – கண்காணிக்க ஓராயிரம் கட்டுப்பாட்டுக் கருவிகள் – எனவே கப்பல், மோசமான வான் நிலையிலும் கடல் சீற்றத்திலும் கூட அச்சமின்றி செல்ல வல்லது. கப்பலில் பயணம் நீண்ட காலத்தன்மையுடையது. பயணம் நீண்டது தான், சேருமிடம் வெகு தொலைவு தான் என்றாலும் கப்பல் பிரயாணத்தில் விபத்துக்களோ மிகக்குறைவு. ஒன்றிரண்டு பேர்மட்டுமே அல்லாமல் பல்லாயிரம் பேரைப் பாதுகாப்பாய் கடலைக் கடக்க வைக்கும் வல்லமை உடையது கப்பல்.

இது நிற்க.

சரி, வாழ்வெனும் கடல் பயணத்தில், மனம் எனும் படகில் ஏறுவதா அல்லது அறிவெனும் கப்பலில் ஏறுவதா என்பதை நிர்ணயிப்பது எது? இது ஒரு மிகப் பிரம்மாண்டமான கேள்வி. ட்ரில்லியன் டாலர் வினா எனலாம். சொல்லப்ப்போனால், உலகின் பல்வேறு மதங்களும் அவற்றின் சமயங்களும் இவ்வினாவைப்பற்றியே எழுந்தவையாய்ப் பரிமளிக்கின்றன. மனத்தைப் பற்றியும் அறிவைப் பற்றியும் சமயங்கள் ஒவ்வொன்றும் எண்ணிறந்த வியக்கியானங்களைப் பொழிந்து சென்றிருகின்றன. சொல்லப்போனால், மனம் எனும் படகில் சாதரணப் பல்லோரும் ஏறிப் பயணித்து மாண்டு போவதை எல்லா சமயங்களுமே சித்திரமாய்த் தீட்டுகின்றன. மனமார்கத்துக்காய், மதியைத் தகவமைத்துக் கொள்ளும் – துணைக்கழைத்துக்கொள்ளும் சாதாரண மனித நடவடிக்கைகளால் எழும் விபத்துக்களையும் ஆபத்துக்களையும் சமயங்கள் யாவும் மனிதக் கதைகளைக் கொண்டே விளக்கிக் காட்டுகின்றன.

இந்நிலையில், அவ்வப்போது மகா மனுஷ்யர்கள் இவ்வுலகில் அவதரிக்கிறார்கள். இவர்களை அவதாரப் புருஷர்கள் என்று சொல்வதுண்டு. “புருஷ” என்றால் “ஆண்“ எனப் பலரும் நினைத்துக் கொண்டிருக்கிறார்கள். இது தவறு. “புருஷ” என்பது ஆண் – பெண் எனும் இருபாலருக்குமே பொதுவானது. புருஷ என்றால் சுற்றி நிகழும் சலனங்களுக்கு இலக்காகாத உறுதித்தன்மை உடையவர் என்பது பொருள். இவர்களைப் பிரபஞ்ச மனிதர்கள் என்பதுண்டு – விண்ணிலும், மண்ணிலும், வெளியிலும், கடலிலும் ஓராயிரம் சலனங்கள் எழுந்தாலும், பிரபஞ்சம் எவ்வாறு நிலைத்து நிற்கிறதோ அவ்வாறு இருப்பவர்கள் என்பது பொருள்.

மகா மனுஷ்யர்கள் அசாதாரணமானவர்கள். ஆனால் அவர்கள் யாவரும் சாதாரண மனிதர்களாகவே பிறந்தார்கள் – வளர்ந்தார்கள். ஆனால், அவர்கள், வாழ்க்கைக் கடலில் பயணித்தது மதியெனும் கப்பலில் – மனம் எனும் தோணியில் அல்ல. எந்த ஒன்று அவர்கள் இதனைச் செய்யுமாறு செய்தது? என்று நீங்கள் வினவுகிறீர்கள்.

விடை: ஒற்றைப்பதம்: சமூகப் பிரக்ஞை.

சமூகப் பிரக்ஞையுடன் எழும் தேடல், இறையுணர்வையும் தழுவி எழும் பாங்கை பல அவதாரப் புருஷர்களிடமும் காண்கிறோம், இவ்வகையில் ஸ்டீவ் ஜாப்ஸின் தேடல் நவீன யுகத்தில், ஒரு புரட்சிகரமான நிகழ்வு என்றால் அது மிகையாகாது.

தொடருவோம்

June 22, 2016
சூரியனின் புறக்கோள் யுரேனஸைக் கண்டுபிடித்த ஜெர்மன் விஞ்ஞானி வில்லியம் ஹெர்ச்செல்

(1738-1822)

சி. ஜெயபாரதன், B.E.(Hons), P.Eng (Nuclear) கனடா

+++++++++++++

“எனக்கு முன்பு அண்ட வெளியில் மனிதர் தேடிய இடத்தைத் தாண்டி, அதற்கும் அப்பால் பிரபஞ்சத்தை ஆழமாய் என் கண்கள் நோக்கிச் சென்றன !”

வில்லியம் ஹெர்ச்செல் வானியல் விஞ்ஞானி

‘புனித வேத நூல்களில் நாம் காணும் மேன்மையான நியதிகளை நிலைநாட்டி மெய்ப்பிக்கவே, மனித முயற்சிகள் விஞ்ஞானத்தில் மேற்கொள்ளப் பட்டன என்று எனக்குத் தோன்றுகிறது ‘

ஜான் ஹெர்ச்செல் (John F. Herschel) (1792-1871)

முன்னுரை: 1781 ஆம் ஆண்டு வரை சூரிய மண்டலம் ஆறாவது அண்டமான சனிக்கோளுடன் முடிவதாக எண்ணப்பட்டது. அந்த ஆண்டில் இன்னிசை ஞானியும், விண்ணியல் ஆரம்பநிலை விஞ்ஞானியும் [Amateur Astronomer] ஆன வில்லியம் ஹெர்ச்செல் என்பவர், யாருமே நினைத்துப் பாராதவாறு சனிக் கோளுக்கும் அப்பால் பரிதியைச் சுற்றி வரும் ஒரு புதிய அண்டக்கோள் நகர்ச்சியைக் கண்டு, வானியல் வரலாற்றில் ஒரு மாபெரும் வியப்புணர்ச்சியை உண்டாக்கினார்! பரிதியிலிருந்து சனிக்கோள் சுற்றி வரும் தூரத்தை விட, இரண்டு மடங்கு தொலைவில் சுற்றி வந்ததால், எவரது தொலைநோக்கியும் அதுவரைப் புதுக்கோளைக் காண வில்லை! அத்துடன் ஹெர்ச்செல் பயன்படுத்திய புதிய தொலைநோக்கி மிகக் கூர்மையும், கையாளும் திறமையும் கொண்டதாக இருந்தது!

பிரம்மாண்டமான இந்தப் பிரபஞ்சம் ஓர் பெரும் வெடிப்பில் தோன்றி 15 பில்லியன் ஆண்டுகள் ஓடி விட்டன என்று வானியல் வல்லுநர் முடிவு செய்துள்ளார்கள்! தான் படைத்த முதல் தொலைநோக்கியின் வழியே விண்வெளியின் திரையை நீக்கிய காலிலியோ (1564-1642), பூமியின் நிலவைப் போல வெள்ளிக் கோளின் பிறை வளர்ச்சி, பிறைத் தளர்ச்சி ஆகியவற்றைக் கண்டார்! வியாழனின் துணைக் கோள்களைக் கண்டார். முதன்முதல் சனிக் கோளின் நீள் வடிவத்தைக் கண்டார்! யுரேனஸ் புறக்கோளுக்கு அப்பால் நகரும் நெப்டியூன் [Neptune] கோளைக் கண்டாலும், அது ஒரு பரிதி மண்டலக் கோள் என்பதைக் காலிலியோ அறியாது தவற விட்டுவிட்டார்!

பால்மய வீதியை முதன்முதலில் நோக்கிய விஞ்ஞானி கலிலியோ

1600 ஆண்டின் ஆரம்ப காலத்தில் இத்தாலிய வானியல் விஞ்ஞான மேதை கலிலியோதான் முதன்முதல் நமது பால்மய வீதி (Milky Way Galaxy) காலக்ஸியைத் தனது தொலைநோக்கியில் கண்டு உளவு செய்தவர். அந்த ஒளி விண்ணரங்கில் எண்ணற்ற விண்மீன்கள் இருந்ததைக் கண்டு வியந்தார். அதற்குப் பிறகு 1755 இல் ஜெர்மன் வேதாந்தி இம்மானுவல் கென்ட் (Immanuel Kant) பால்மய வீதி குவியாடி போன்ற விண்மீன்களின் மந்தை (Lens-shaped Group of Stars) என்றும், அதனைப் போல் வேறு விண்மீன்களின் மந்தைகள் உள்ளன வென்றும் கூறினார். பிரிட்டனில் பணிபுரிந்த அடுத்தொரு ஜெர்மன் வானியல் நோக்காளர் வில்லியம் ஹெர்ச்செல்தான் (1738-1822) முதன்முதலில் விஞ்ஞான ரீதியாக பால்மய வீதியைத் துருவி ஆராய்ந்து எழுதியவர். அதற்குப் பிறகு அவரது சகோதரி கரோலின் ஹெர்ச்செல்லும் புதல்வர் ஜான் ஹெர்ச்செல்லும் வில்லியத்தைப் பின்பற்ற ஏராளமான காலாக்ஸிகளைத் தொலைநோக்கிகள் மூலம் கண்டுபிடித்துப் பதிவு செய்தார்கள்.

காலிலியோ, ஹியூஜென், நியூட்டன், காஸ்ஸினி ஆகியோரைப் பின்தொடர்ந்து, வில்லியம் ஹெர்ச்செல் தொலைநோக்கியைச் செம்மையாக்கி, மேம்படுத்திப் பெரிதாக்கி புதுக் கோள் யுரேனஸ், அதன் இரண்டு துணைக் கோள்கள், அற்புத காலக்ஸிகள் [Galaxies], ஆயிரக் கணக்கான நிபுளாக்கள் [Nebulae] ஆகியவற்றைக் கண்டு பிடித்து உலகை வியக்கச் செய்தார். அத்துடன் சனிக்கோளின் அடுத்த இரண்டு சந்திரன்களைத் தனது தொலைநோக்கி மூலம் கண்டு பிடித்தார், ஹெர்ச்செல்.

வானியம் வல்லுநர் வில்லியம் ஹெர்ச்செல் வாழ்க்கை வரலாறு

1781 மார்ச் 13 ஆம் தேதி வில்லியம் ஹெர்ச்செல் தொலைநோக்கி வழியே விண்மீன்களை உளவி வரும் போது ஓர் மங்கலான அண்டத்தைக் கண்டார். அது என்னவென்று துருவி நோக்க கருவியின் கூர்மையை மிகைப்படுத்திப் பார்க்கும் போது ஒரு தெளிவான நீல நிறத் தட்டு தெரிந்தது. முதலில் அது ஒரு வால்மீன் [Comet] என்று கருதினார். வால்மீன்கள் விண்மீன்களைப் பின்புலமாக்கிப் பரிதியைச் சுற்றுபவை. ஆனால் புதுக் கோள் நகர்ச்சியை அவர் தொடர்ந்து நோக்கும் போது, அதன் புதிய இடம் அண்டையில் இருக்கும் விண்மீன்களின் இருக்கைக்கு ஒப்பிய தூரத்தில் மாறியது. அவ்விதம் அதன் போக்கைப் பொறுமையாக நீண்ட காலம் ஹெர்ச்செல் பதிவு செய்ததில், அதன் நகர்ச்சி வால்மீனின் போக்கை ஒத்திருக்க வில்லை! புதுக்கோளின் சுற்றும் வீதி ஏறக் குறைய வட்ட வீதியில் [Circular Orbit] காணப் படவே, அது பரிதியைச் சுற்றும் மற்றுமோர் அண்டக்கோள் என்பதை ஹெர்ச்செல் முடிவு செய்தார்.

ஒளிமந்தைகள், நிபுளாக்கள்

புதுக்கோள் கண்டு பிடிப்பதற்கு முன்பு 90 ஆண்டுகளாய்ப் பல வானியல் வல்லுநரின் கண்ணில் அது தென்பட்டிருந்தாலும், அதை ஒரு விண்மீன் என்று கருதினார்! பரிதி மண்டலக் கோள் அது என்பதைப் பலர் அறியத் தவறி விட்டார்கள்! யுரேனஸைக் கண்டு பிடித்த ஹெர்ச்செல்லின் கூரிய விழிகள் அவரைச் சிறந்ததொரு வானோக்காளர் என்பதை நிலைநாட்டியது. யுரேனஸ் கோள்தான் மனிதர் தொலைநோக்கி மூலம், முதன் முதலில் கண்டு பிடிக்கப்பட்ட சூரிய மண்டலக் கோள்! யாவரும் அறிந்த புதன், வெள்ளி, செவ்வாய், வியாழன், சனி ஆகிய பண்டைக் கோள்களை யார் முதலில் கண்டு பிடித்தார் என்பது எந்த வரலாற்றிலும் காணப் படவில்லை! நமது இந்து ஜோதிடக் கணிப்பில், கிரேக்க ஜோதிட ஞானத்தில் மேற்கூறிய கோள்கள் யாவும் பல்லாயிர ஆண்டுகளாகக் கையாளப் பட்டு வருகின்றன!

1738 நவம்பர் 15 ஆம் தேதி வில்லியம் ஹெர்ச்செல் ஜெர்மனியில் ஹானோவர் என்னும் ஊரில் பிறந்தார். அவரது பெற்றோர் இருவரும் இசை ஞானிகள். அவ்வழிப் பிறப்பில் வில்லியம் ஹெர்ச்செல்லிடம் புகுந்து இன்னிசைத் தானாக அவர்பால் குடிகொண்டது. 1757 இல் பத்தொன்பது வயது வந்ததும், விஞ்ஞானி வில்லியம் ஹெர்ச்செல் இங்கிலாந்துக்கு அனுப்பப் பட்டார். அவருக்குப் பிறகு அவரது தனயன் அலெக்ஸாண்டர், தங்கை கரோலின் பிரிட்டனுக்கு வந்து அவருடன் இணைந்தார்கள்.

பிரிட்டனில் வில்லியம் இசைக்கலையை விருத்தி செய்து, இசைப்பயிற்சி ஆசிரியராகவும், இராணுவப் பாண்டு வாத்தியக் குழுவினராகவும் பணியாற்றினார். இசைக்கலையில் மூழ்கிச் சிறப்புற்ற வில்லியத்துக்குத் திடீரென வானியல் துறையில் ஆர்வம் பொங்கி, பிறகு அதுவே அவரது தலையாய வேட்கை ஆயிற்று! முதலில் தொலைநோக்கியை வாடகைக்கு எடுத்து வான மண்டலத்தை ஆராய்ந்தார். பிறகு அலெக்ஸாண்டர், கரோலினுடன் சேர்ந்து மூவரும் 48 அங்குல ஒளிப்பிம்ப 40 அடிக் குவிநீளத் தொலைநோக்கியை [48 ‘ Reflector, 40 ‘ Focul Length Telescope] உருவாக்கினார்கள். அதை டிசைன் செய்து முடிக்கப் பேரரசர் மூன்றாம் ஜார்ஜின் [King George III] 6600 US டாலர் நிதி உதவி கிடைத்தது. ஆனால் அவரது மகத்தான கண்டு பிடிப்புகளுக்கு அவரது 20 அடி நீளத் தொலைநோக்கியே அவருக்கு முதலில் உதவி புரிந்தது!

வில்லியம் ஹெர்ச்செல் வானோக்கி உளவும் போது, அண்டக் கோள்களையும், பால்மய மின்மினிகளையும் முறைப்படிப் பதிவு செய்து, சீரான ஒழுங்கில் ஆய்வு செய்பவர். 1781 மார்ச் 13 ஆம் தேதி அன்று தனது 7 அங்குல ஒளிபிம்பத் தொலை நோக்கியில் யுரேனஸ் புதுக்கோளைக் கண்டு, பல ஆண்டுகள் அதன் நகர்ச்சியைப் பதிவு செய்து, சனிக்கோளுக்கும் அப்பால் அது ஏறக்குறைய வட்ட வீதியில் சுற்றி வருவதைக் கணித்தார். ஹெர்ச்செல் புதுக்கோளுக்கு முதலில் இட்ட பெயர் ‘ஜார்ஜியம் சைடஸ் ‘ [Georgium Sidus]. பேரரசர் ஜார்ஜ் மன்னரின் நினைவாக அப்பெயரை அளித்தார். வானியல் குழு [Astronomical Society] அவரிட்ட பெயரை ஏற்றுக் கொள்ளாது, புதுக்கோளை ‘யுரேனஸ் ‘ என்று கிரேக்க இதிகாசக் கடவுள் பெயரால் பின்னால் அழைத்தது.

பால்மய வீதி வெளி மின்மினிகளைக் கண்டுபிடித்த ஹெர்ச்செல்

பிரிட்டனின் பேரரசர் ஜார்ஜ், ஹெர்ச்செலை அரசாங்க வானியல் துறைஞராக ஆக்கி அவருக்கு ஆண்டுக்கு 320 டாலர் [US Dollar Value] பென்ஸன் ஊதியப் பணமளித்துச் சேர்த்துக் கொண்டார். 1774 முதல் வில்லியம் தொலைநோக்கி ஏணியில் நின்று கண்காணித்து, வர்ணித்து அளக்கும் விபரங்களை எல்லாம், கீழே அமர்ந்து கொண்டு தங்கை காரோலின் பதிவுத் தாளில் எழுதி உதவி செய்தாள். 1782 இல் சனி நிபுளா [Saturn Nibula, NGC-7009] பதிவானது. 1783 இல் 18.7 ‘ அபெர்சர் [Aperture] 20 அடி குவிநீளத் தொலைநோக்கியில் வில்லியம், கரோலின் இருவரும் இணைந்து பல பால்மய நிபுளாக்களையும், காலக்ஸியையும் கண்டு விளக்கங்களை எழுதினார்கள். பதினெட்டு மாதங்கள் வெகு ஆழ விண்வெளியைக் கண்காணித்து 1785 இல் 1000 ஆழ்வெளி மின்மினிகள் [Deepsky Objects], 1788 இல் அடுத்து 1000 ஆழ்வெளி மின்மினிகள், 1802 இல் இன்னும் 500 ஆழ்வெளி மின்மினிகள் கண்டு பிடிக்கப் பட்டுப் பதிவு செய்யப்பட்டன! 1888 ஆண்டு வெளியான புதிய நிபுளா அட்டவணையில் [New General Catalogue] உள்ள 8000 நிபுளா எண்ணிக்கையில் முதல் 2477 நிபுளாக்களைக் கண்டவர் வில்லியம் ஹெர்ச்செல்.

வில்லியம் ஹெர்ச்செல் வானியல் விஞ்ஞானத்தின் பல பகுதிகளுக்குத் தன் மூலப் படைப்புகளை வழங்கி யிருக்கிறார். யுரேனஸ் கோள் (1781), அதனிரு துணக்கோள்கள் [Titania, Oberon (1787)], சனிக்கோளின் இரண்டு சந்திரன்கள் [Mimas, Enceladus (1789)], ஆயிரக் கணக்கான நிபுளாக்கள் கண்டு பிடிப்பு, பால்மய வெளியின் காலக்ஸி மாடல் அமைப்பு [Model of the Milkyway Galaxy], இரட்டை விண்மீன்களின் பொது இருக்கை [Common Existence of Binary Stars], புறவெளிப் பிரபஞ்சத் தீவுகள் இருக்கையின் எதிர்பார்ப்பு [Possibility of External Island Universe (Galaxy)], ஹெர்குலிஸ் விண்மீன் கூட்டத்தை நோக்கிப் பரிதி மண்டல நகர்ச்சி [Motion of the Solar System towards the Direction of Constellation Hercules], உட்சிவப்பு ஒளிக் கண்டுபிடிப்பு [Discovery of Infrared Light] ஆகிய அனைத்தும் வில்லியம் ஹெச்செல் புரிந்த பணிகளில் முக்கியமானவை.

யுரேனஸ் புறக்கோளின் சிறப்பு அம்சங்கள்

ஹெர்ச்செல் கண்டுபிடித்த புதுக்கோளுக்கு ‘யுரேனஸ் ‘ என்று பெயரிட்டவர், ஜெர்மன் வானியல் நிபுணர் யோஹான் போடே [Johann Bode]. கிரேக்க இதிகாசப்படி ‘யுரேனஸ் கடவுள் ‘, சனிக் கடவுளின் தந்தை என அறியப்படுகிறது. பூமியைப் போல் நான்கு மடங்கு பெரிதான யுரேனஸ், வியாழன், சனிக் கோள்கள் போன்ற ஓர் வாயுக் கோளம். பரிதியிலிருந்து 1800 மில்லியன் மைல் தூரத்தில் சுற்றி வரும் யுரேனஸ் கோளைச் சாதாரண ஒரு பைனாகுளர் வழியாக வானில் காண முடியும். சக்தி வாய்ந்த தொலைநோக்கி மூலம் பார்த்தால், யுரேனஸ் நீலம் கலந்த ஒரு பச்சை வண்ணத் தட்டு போல் தோன்றுகிறது.

யுரேனஸின் விட்டம் 32,190 மைல். அக்கோள் 22 துணைக் கோள்களையும் [22 Moons], 11 ஒல்லியான வளையல்களையும் [11 Thin Rings] கொண்டது. உட்புற வளையல்கள் 6 மைல் அகண்டவை! வெளிப்புற வளையல் 60 மைல் அகலம் கொண்டது! யுரேனஸ் மேல்முகில் தளத்திலிருந்து உள் வளையல் 11,000 மைல் தூரத்திலும், புற வளையல் 16,000 மைல் அப்பாலும் உள்ளன. பரிதியை ஒரு முறைச் சுற்றி வர, யுரேனஸ் கோளுக்குச் சுமார் 84 ஆண்டுகள் ஆகின்றன. தன்னைத் தானே யுரேனஸ் தன்னச்சில் சுற்றிக் கொள்ள 17.24 மணி நேரங்கள் ஆகும்.

யுரேனஸ் கோளின் அச்சு [Axis] மிகவும் திரிந்த கோணத்தில் சாய்ந்து [98 டிகிரி Tilt] ஏனைய பரிதி மண்டலக் கோள்களைப் போலின்றி மாறுபட்டுச் சூரியனைச் சுற்றுகிறது! அதாவது யுரேனஸின் துருவ அச்சு [Polar Axis] ஏறக் குறைய, சுற்றுவீதி மட்டத்தில் [Orbital Plane] படிந்து, வட தென் துருவங்கள் மாறி மாறிப் பரிதியை நேரே நோக்கிச் சுற்றுகின்றன! அவ்விதம் பரிதியைச் சுற்றுவதால், யுரேனஸில் விந்தையான காலநிலை நிகழ்கிறது! வட துருவத்தில் 21 பூகோள வருடங்கள் பகல் உள்ள போது, தென் துருவத்தில் 21 வருடம் இரவு நீடிக்கிறது! யுரேனஸின் துருவ அச்சு அத்துணை அளவு கோணிப் போனதற்குக் காரணம் இதுவரைக் கண்டு பிடிக்க முடியவில்லை. ஒருவேளை பூத வால்மீன் ஒன்றோ அல்லது வேறோர் அண்டம் ஒன்றோ யுரேனஸ் மீது மோதி அதன் அச்சைச் சாய்த்திருக்கலாம் என்று விஞ்ஞானிகள் கருதுகிறார்கள்!

யுரேனஸ் வாயுக் கோளத்தில் பெரும்பான்மையாக ஹைடிரஜன் [83%], மற்றும் ஹீலியம் [15%], மீதேன் [2%] வாயுக்களே நிரம்பி யுள்ளன. மீதேன் வாயு யுரேனஸின் மேல் தளத்தில் பரிதியின் செவ்வொளியை உட்கொண்டு, நீலப்பச்சை நிறத்தை உமிழ்கிறது! வியாழன், சனிக் கோள்களைப் போன்று, யுரேனஸின் சூழ்வெளி மட்ட ரேகைப் [Lattitude] பகுதிகளில் சீரான முகில்கள் நிலை பெற்று, கண்கவர் வண்ணப் பட்டைகளாய்க் [Vivid Colour Bands] காணப்படுகின்றன! 1986 ஜனவரியில் அருகே பறந்து சென்ற வாயேஜர்-2 விண்ணாய்வுக் கப்பல் [Voyager-2 Space Probe] யுரேனஸ் தளத்தில் உள்ள மிகக் குளிர்ந்த உஷ்ணத்தைக் [-220 டிகிரி C] காட்டி இருக்கிறது! நடுப்பகுதி மட்ட ரேகைகளில் கடும் புயல் காற்றுகள் மணிக்கு (90-360) மைல் வேகத்தில், யுரேனஸ் சுற்றும் திசையில் எப்போதும் அடித்துக் கொண்டிருக்கின்றன! ரேடியோ விஞ்ஞானச் சோதனைகள் [Radio Science Experiments] மூலமாக ஆராயும் போது, யுரேனஸ் மத்திம ரேகையில் [Equator] மணிக்கு 180 மைல் வேகப் புயல், விந்தையாக எதிர்த்திசை நோக்கி அடிப்பது அறியப் பட்டது!

1977 ஆண்டு வரை யுரேனஸின் 9 வளையங்கள் மட்டுமே அறியப் பட்டிருந்தன! 1986 இல் யுரேனஸை அண்டிய வாயேஜர்-2 விண்ணுளவி மற்றும் 2 வளையங்களைக் கண்டு படமெடுத்து, அவற்றின் பரிமாணங்களையும் அளந்தது. அவ்விரு வளையங்கள் வியாழன், சனிக் கோள்களின் வளையங்கள் போலின்றி மாறாக இருந்தன. வெளிப்புற எப்ஸிலான் [Epsilon] வளையத்தில் பனிப் பாறைகள் பல அடிகள் அகண்டு காணப் பட்டன. அத்துடன் மிக நுண்ணிய தூசிகள் வளையங்களில் படிந்துள்ளதும் தெரிந்தது.

யுரேனஸின் அச்சு, நீள்வட்டப் பாதையின் மட்டத்தில் அமைந்துள்ளதால், அதன் வீரிய காந்த மண்டலம் அச்சுக்கு 60 டிகிரி கோணத்தில் சாய்ந்துள்ளதை, வாயேஜர்-2 விண்ணுளவி காட்டி யுள்ளது. யுரேனஸ் வாயுக்கோளின் காந்த மண்டலம் எதனால், எதிலிருந்து நிகழ்கிறது என்பது இன்னும் புதிராகவே உள்ளது!

பூமி, மற்ற அண்டக் கோள்களின் உருகித் திண்ணிய நடுக்கருவால் [Dense Molten Core] காந்த மண்டலம் உண்டாவது போல், யுரேனஸ் கோளிலும் நேரலாம் என்று கருதப்படுகிறது.

பிரபஞ்ச காலக்ஸிகளை ஆராய்ந்த ஹெர்ச்செல் குடும்பத்தார்

பிரிட்டிஷ் ஜெர்மன் விஞ்ஞானி வில்லியம் ஹெர்ச்செல், அவரது தங்கை கரோலின் ஹெர்ச்செல், தனயன் ஜான் ஹெர்ச்செல் ஆகிய மூவரும் பத்தொன்பதாம் நூற்றாண்டில் விந்தையான பல ஒளிமீன் மந்தைகளை விண்வெளியில் கண்டுபிடித்து, வானியல் வரலாற்றில் புரட்சியை உண்டாக்கினார்கள். வில்லியம் ஹெர்ச்செல் யுரேனஸ் புதுக்கோளையும், அதனிரு துணைகோளையும் கண்டவர். தங்கை கரோலின் சகோதரன் வில்லியத்துடன் துணையாகப் பணியாற்றி அவற்றைத் தொடர்ந்து பதிவு செய்து, சில வால்மீன்களையும் கண்டு பிடித்தவர். வில்லியத்தின் மகன் ஜான் ஹெர்ச்செல் வானியல், கணிதம், பெளதிகம் [Physics], நிழற்பட இரசாயனம் [Photochemistry], விஞ்ஞான வேதாந்தம் [Philosophy of Science] ஆகிய துறைகளில் தனது மேம்பட்ட பங்கை முக்கிய பகுதியில் அளித்திருக்கிறார். சார்லஸ் டார்வின், மைக்கேல் ·பாரடே, மேரி ஸோமர்வில் மற்றும் பல உலக மேதைகள் அவருடன் கொண்டிருந்த 7500 தொடர்புக் கடிதங்கள், அவரது நூற் களஞ்சியத்தில் [Archives] பாதுகாப்பாய் சேமித்து வைக்கப் பட்டுள்ளன.

வில்லியம் ஹெர்ச்செல் பெற்ற சிறப்பான விருதுகள்

வில்லியம் ஹெர்ச்செல் வானியல் பணிகள் நவீன விஞ்ஞான வளர்ச்சிக்கு வழி அமைத்ததோடு, அண்ட வெளித் தேடலுக்கும் விதை யிட்டன! காலிலியோவுக்குப் பிறகு மேன்மையான வானோக்காளர் என்று கருதப் படுபவர் ஹெர்ச்செல்! முதன் முதலில் பால்மய வெளியின் காலக்ஸி, விண்வெளி மின்மினிகளின் அமைப்பு ஏற்பாடையும் விளக்கமாக உலகுக்கு எடுத்துக் காட்டியவர் அவர்தான் என்று வில்லியம் ஹெர்ச்செல் கண்காட்சி [William Herschel Museum] அதிபர் பாட்டிரிக் மூர் [Patrick Moore] கூறுகிறார்.

ஹெர்ச்செல் யுரேனஸ், அதனிரு துணைக் கோள்களைக் கண்டு பிடித்துத் திறமையான வானோக்காளி எனப் பெயர் பெற்றுப் பிரம்மாண்டமான சூரிய மண்டலப் பரிமாணத்தை இரட்டிப்பு செய்தவர்! அப்பணியை மெச்சி பேரரசர் மூன்றாம் ஜார்ஜ் [King George III] அவருக்கு கோப்லே தங்கப் பதக்கம் [Copley Medal] அளித்தார். அடுத்து ஃபெல்லோ ஆஃப் ராயல் சொசைடி [Fellow of Royal Society] மதிப்பும் ஹெர்ச்செல் பெற்றார். ராஜீய வானியல் குழுவினரின் [Royal Astronomical Society] அதிபதியாகவும் இறுதியில் அவர் தேர்ந்தெடுக்கப் பட்டார்.

கெப்ளர் விண்ணோக்கி

வில்லியம் ஹெர்ச்செல் தனது 84 ஆவது வயதில் 1822 ஆகஸ்டு 24 ஆம் தேதி காலமானார்! அவர் இறுதியாக 1819 இல் கண்டது ஓர் வால்மீன்! அவருக்குப் பிறகு வானியல் பணியை அவரது புதல்வன் ஜான் ஹெர்ச்செல் அடுத்து மேற்கொண்டு பல அற்புதக் கண்டு பிடிப்புகளைச் செய்தார்! 2007 ஆம் ஆண்டில் அனுப்பி இயங்கப் போகும் ‘ஹெர்ச்செல் விண்வெளி நோக்ககம் ‘ [Herschel Space Observatory] ஈரோப்பிய விண்வெளி ஆய்வுப் பேரவையால் [ESA] தயாரிக்கப்பட்டு வருகிறது.

பால்மய வெளியில் புதிய வானியல் விண்மீன்களையும், வண்ணச் சுடர்வீசும் கண்கொள்ளா விண்வெளிப் பூக்களையும் நோக்க நோக்க, பிரபஞ்ச அமைப்பின் மகத்தான புதிர்கள் பெருகிக் கொண்டே போகின்றன! விண்வெளியைப் படிபடியாக படையெடுத்து மின்மினிகளைக் கண்பற்றிப் பதிவு செய்யும் வானியல் விஞ்ஞானிகளின் அசுரப் பசி என்றாவது அடங்கப் போகிறதா ?

++++++++++++++++++++++

தகவல்கள்:

1. New Lights on the Solar System – Scientific American [Oct-Dec 2003]

2. The Once & Future Universe By: Rick Gore, National Geographic [June 1983]

3. Coming of Age in the Milky Way By: Timothy Ferris [1988]

4. Exploration of the Universe By: Abell, Morrison & Wolff [1987]

5. Uranus: Visit to a Dark Planet By Rich Gore, National Geographic [Aug 1986]

6. Book of the Universe By: Ian Ridpath [1991]

7. Exploring the Planets By: Brian Jones [1991]

8. Planets & Moons By: William Kaufmann [1978]

9. http://www.newworldencyclopedia.org/entry/William_Herschel [February 20, 2014]

10. http://www.britannica.com/biography/William-Herschel

11. https://en.wikipedia.org/wiki/William_Herschel [JKune 12, 2016]

************************

S. Jayabarathan [jayabarathans@gmail.com] June 19, 2016 [R-1]

June 22, 2016
தாய்மை

கீர்த்தனா

”டேய், மகேஸ்!… எழுந்திருடா…… மணி 7 ஆச்சு….இன்னும் தூங்கிட்டு இருந்தா காலேஜ் பஸ் போயிடும்…..”

“என்ன சீதா இப்படி பண்ணிட்டிங்க….இப்பதான் ஒரு நல்ல கனவு வந்தது…. சரி விடுங்க…அதை அப்படியே காலேஜ் போய் கண்டினியூ பண்ணிக்கிறேன்….” என்றான் மகேஸ்.

“அதெல்லாம் அப்பறம் பண்ணிக்கலாம்….போய் முதல்ல பல் விலக்கிட்டு, உள்ளே சுடுதண்ணி வச்சிருக்கேன் குளிச்சிட்டு வா…”

அவனை அனுப்பி விட்டு சமையல் வேலையை ஆரம்பித்தார், சீதா.

குளித்து விட்டு வந்தவன், சமையலறைக்குள் புகுந்தான்…..

”இன்னைக்கு என்ன சமையல்……. வாசம் சுண்டி இழுக்குது…”

”என் தங்கத்துக்கு பிடிச்ச முருங்கைக்காய் சாம்பார், வெண்டைக்காய் பொரியல்-தான் செஞ்சிருக்கேன்….”

“இதுதான் என்னோட சீதா-ங்கறது….. ஆனா இன்னும் கொஞ்ச நாள் கஸ்டப்படுங்க….. அதுக்கப்பறம்….”

“அதுக்கப்பறம்…. நீ சமைக்க போறேனு சொல்லிடாதப்பா….. நான் பாவம்ல”

“ச்ச….ச்ச….. நான் அந்த மாதிரி கெட்ட பையன் இல்ல…… நான் என்ன சொல்ல வந்தேன் தெரியுமா….. ஒரு நல்ல மருமகளா கூட்டிட்டு வந்துடுவேன்… அவ உங்களை நல்லா கவனிச்சுப்பா….. நீங்க ஜாலியா இருக்கலாம்……. அவ்வளவுதான்..”

“ஆசைப்படுடா…… அதுக்காக பேராசைப்படறியே! வர்ற மருமக என்னை கவனிக்கலைனாலும் பராவாயில்லை….உன்னை எப்பவும் ஒரு தாய் மாதிரி பார்த்துக்கிட்டா, அதுவே எனக்கு போதும்….”

“ அதெல்லாம் பார்த்துக்கலாம்… உங்களுக்கு ஆபிஸ்க்கு லேட்டாகிடுச்சு….இந்தாங்க உங்க லஞ்ச் பாக்ஸ்…….. நீங்க கிளம்புங்க”

“உன்கிட்ட பேசிகிட்டே மணிய பார்க்காம இருக்கேன்… சரி.. நான் புறப்படுறேன்…. ரூம்ல உன் டிரஸ் அயர்ன் பண்ணி வச்சிருக்கேன்… உன்னோட பொருள் எதையும் தேட வேண்டியதில்லை…. எல்லாம் ஹால்ல இருக்கு…. அப்பறம் உன் ஹூவையும் பாலிஸ் போட்டுடேன்….

சீக்கிரம் புறப்பட்டு போ தம்பி…. காலேஜ் பஸ்ஸ விட்டுட்டு, வெளி பஸ்ல போய், கூட்டத்துல மாட்டிகிட்டு சிரமப்படாத…”

“சரி.. சரி.. நான் பார்த்து போய்க்கிறேன்….”

அவர் கிளம்பி போனதும், அவனுடைய வேலைகளை முடித்துக் கொண்டு பஸ் ஸ்டாப்பிற்கு சென்றான்.

அங்கு அவன் நண்பன் யாதவ் அவனுக்காக காத்துக் கொண்டிருந்தான்.

“டேய், என்னடா! இன்னைக்கும் லேட் பண்ணிட்ட…….. பஸ் போயி 10 நிமிஸம் ஆகுது… சரி வா ஏதாவது டவுன் பஸ் வந்தா போகலாம்..”

“சாரிடா….. லேட்டாயிடுச்சு..” என்றவனின் நினைவில் சீதா வந்தார்…… அவர் முன்பே அவனை எச்சரித்திருந்தார் அல்லவா!!!!

’இன்னைக்கு காலேஜ் பஸ்ஸ விட்டுட்டோம்னு சீதாவுக்கு தெரிஞ்சுது…… கண்டிப்பா என்மேல கோவிச்சுப்பாங்க…’

அடுத்ததாக வந்த பஸ்ஸில் ஏறினார்கள். கூட்டம் நிரம்பி வழிந்தது…..

யாதவ், “சரிடா.. இன்னைக்கு புட்போர்டு-தான் போலருக்கு” என்றான்.

மகேஸ், “அதெல்லாம் முடியாது! எங்க வீட்டுல வெளி பஸ்ல போகவே வேண்டாம்னு சொல்வாங்க……. நீ என்ன புட்போர்டு அடிக்க கூப்பிடற……. வந்து மேலே ஏறுடா…..”

உள்ளே போனதும்தான் தெரிந்தது….அந்த பஸ்ஸில்தான் சீதாவும் இருந்தார். அவனை பார்த்து விட்டார். ஆனால் எதுவும் பேசவில்லை. அவருடைய ஸ்டாப்பிங் வந்ததும் இறங்கி சென்று விட்டார்.

காலேஜ் போன பின்னும் இதே நினைவுதான்….. அவரின் அமைதி அவனை அலைக்கழித்தது. ’நல்லா கோவிச்சுகிட்டாங்கன்னு நினைக்கிறேன்….’

அங்கு சீதாவும் நிம்மதியாக இல்லை. ‘இன்னும் விளையாட்டுப் பையனா இருக்கானே…… இப்படி கூட்டத்துல ரொம்ப நேரம் நின்னுட்டு போனா, அவன் அதுலயே டயர்டு ஆகிடுவான். நான் சொன்னதை புரிஞ்சிக்கவே இல்லையே……

இதுக்காகதான் நான் அவனை காலேஜ் பஸ்ல போக சொல்றேன்…… பேசாம, ஒரு பைக் வாங்கி குடுத்துடலாமா?……. அவன் விருப்பப்படற நேரத்துக்கு புறப்பட்டுக் கொள்ளலாம்……

ஆனா, பைக்லையும் பார்த்து கவனமாக போகனும்…… இப்ப எல்லாம் டிராபிக்கும் அதிகம்…… அவன் வயசு பசங்க எல்லாரும் வச்சிருக்காங்க…. அவனுக்கும் ஆசை இருக்கும்……. இதுவரைக்கும் பைக் வாங்கி குடுங்கன்னு அவனா கேட்டதில்லை…..’

மாலை 6 மணி…

பல எண்ணங்களோடு ஆபிஸிலிருந்து கிளம்பினார்.

வீட்டில் ஏற்கனவே மகேஸ் வந்திருந்தான்…..

அவர் உள்ளே வந்ததை கவனித்தவன்…. அவர் அருகில் சென்று அமர்ந்து கொண்டான்.

“ தயவுசெய்து, என்னை கோவிச்சுக்காதிங்க….. ப்ளீஸ்..நான் இனிமே லேட்டாக போக மாட்டேன்…”

”டேய், உன்மேல எப்பவும் எனக்கு கோபம் வராது…. ஏன்னா, நீ என்னோட செல்ல பையன்…. அதனாலதான் உன்னோட எல்லா வேலையிலும் குறுக்க வரேன்னு நினைக்கிறேன்….”

”எனக்கு தெரியும் அப்பா!! நீங்க இத்தனை நாளா என்மேல காட்டுன அன்பு, பாசம் எல்லாமே அம்மா உயிரோட இருந்தாக்கூட காட்டிருக்க முடியுமான்னு தெரியல… என்னோட 10 வயசுல அம்மா இறந்தப்ப இருந்து இந்த நிமிஸம் வரைக்கும் அம்மா இல்லாத குறையே தெரியாம வளர்ந்து இருக்கேன்….. அது உங்களால தான் அப்பா!!! “

தன் மகனை சமாதனப்படுத்தினார், சீதா என்கிற சீதாராமன்.

அவனை வீட்டிற்கு வெளியே அழைத்துச் சென்றார்…… அங்கு புது பைக் அவனுடைய பிறந்தநாள் பரிசாக நின்று கொண்டிருந்தது….. நாளைக்கு அவனது பிறந்தநாள்…..

அந்த பைக் இரு அன்பு நெஞ்சங்களை சுமந்து கொண்டு ஊர்வலம் சென்று கொண்டிருந்தது!!!!!!!

June 22, 2016
உலக யோகா தினம்

ஆய கலைகள் அறுபது நான்கு கலையே
யோகாவும் இதனில் அடங்கும் கலையே
யோகிகளும், துறவிகளும் வளர்த்த கலையே
நமது நாட்டினில் தோன்றிய கலையே !
அனுதினம் யோகாசனங்களை செய்ய பழகுங்கள்
அது உடலினை உறுதி செய்து, நோய் நீக்கும் இடமாகும் 1

உடற்பயிற்சியும், நடை பயிற்சியும் தினமும் மேற்கொள்ளுங்கள்
அது இளமை என்னும் ரகசியம் தோன்றும் இடமாகும் !

யோகாசனங்களில் பல வகைகள் உண்டு
சில யோகாசனங்களே மிகுந்த சிறப்புண்டு
சிறுவர் முதல், முதியோர்கள் வரை யோகா பழகலாம்
அனுதினம் இதனை கடைபிடித்தால் நோய்யின்றி வாழலாம் !

நோய்யற்ற வாழ்வே குறைவற்ற செல்வம்,
யோகாசனங்களை செய்து உடல் நலனை பேணுங்கள்
யோகாசனங்களின் நன்மையினை உலகிற்கு எடுத்துரையுங்கள்
இதுவே உலக யோகா தினம் அறிவுறுத்தும் கருத்தென உணருங்கள் !

ரா.பார்த்தசாரதி

June 21, 2016
கேசவ் வண்ணம் – கிரேசி எண்ணம்

கண்ணபிரான் காயாம்பூ வண்ணபிரான் வெண்ணைமண்
தின்னபிரான் நற்கீதை சொன்னபிரான் -பின்னமுறான்
முன்னவனாம் தென்மதுரை அன்னையவள் அண்ணனையே
எண்ணவரும் ஏகாந்தம் இங்கு….
கண்ணன் அனுபூதி….
——————————————-

வாய்ப்பூதான் வாடிடுமோ வாழ்விலாழ் வாராகும்
வாய்ப்பெனெக்குத் தந்திட வாசுதேவா -நோய்ப்பாயில்
கூற்றன்கைப் பாவையாய் தோற்றுக் கிடப்பேனோ
ஏற்றம் தரவா எனக்கு….(31)

எனக்கே எனெக்கென்(று) எவருளார் என்று
தனக்கே தனக்குள் தவித்தால் -உனக்குள்
உவமை இலாத ஒருத்தனைக் காண்பாய்
அவனே அரியென்(று) அறிந்து….(32)

அறிந்தேன் அறியாமை அந்தஅரி மாயை
அறிந்தேன் அவனேதான் ஆன்மன் -அறிந்தேன்
கருந்தேகக் கண்ணனவன் கண்,காணல், காட்சி
ஒருங்கிணைந்து தோன்றுமரி ஓம்….(33)

ஓமனக் குட்டனே கோமண கோவிந்தா
கோமணம் கட்டிய கோபாலா -நாமணக்கும்
ஆரா அமுதனே அய்யா குருவாயூர்
சீராளா சீனிவா ஸா….(34)

வாஸனாதி கர்மங்கள் பூசிமகிழ் பூர்வநெஞ்சே
தேசம்நூற் றெட்டுடைய தேவனை -யோசனையில்
வைத்து வழிபட்டுக் கைத்தலத்தால் கும்பிடப்
பொய்த்திடுமைம் பூதப் புதிர்….(35)

புதிரவன் போக்கு புலனவன் தாக்கு
மதிரதம் மாயையில் மூழ்கக் -கதிரவன்
போல்தோன்றிக் காரிருள் தோல்சீவிக் காத்திடும்
மால்வண்ணம் யாமறியோ மே….(36)….கிரேசி மோகன்….

June 21, 2016
இலக்கை அடைய முயற்சி தேவை பள்ளி மாணவர்களிடம் டி .எஸ்.பி. பேச்சு

எல். சொக்கலிங்கம்

தேவகோட்டை – தேவகோட்டை சேர்மன் மாணிக்க வாசகம் அரசு உதவி பெறும் நடுநிலைப் பள்ளியில் உலக யோகா தின விழாவில் இலக்கை அடைய முயற்சி தேவை என தேவகோட்டை டி . எஸ்.பி .பேசினார்.

விழாவில் ஆசிரியர் கருப்பையா வரவேற்றார்.பள்ளி தலைமை ஆசிரியர் லெ .சொக்கலிங்கம் தலைமை தாங்கினார் .தேவகோட்டை காவல் ஆய்வாளார்கள் ரமேஷ்,பாஸ்கரன் ஆகியோர் முன்னிலை வகித்தனர்.தேவகோட்டை டி .எஸ்.பி.கருப்பசாமி சிறப்பு விருந்தினராக கலந்துகொண்டு உலக யோக தினவிழாவினையொட்டி நடைபெற்ற ஆசிரியர் – மாணவர் மேம்பாட்டிற்கு யோகாவின் பங்களிப்பு என்ற தலைப்பில் நடைபெற்ற

பேச்சுப்போட்டி,கட்டுரைபோட்டி,கவிதை போட்டிகளில் வெற்றி பெற்ற ச.கார்த்திகா ,சு.சங்கீதா, மு.விக்னேஷ் ,க.ராஜி ,மு.ராஜேஸ்வரி ,பீ .ஜெனிபர்,அ.உமா மகேஸ்வரி , பா.சங்கீதா ,பா .பாக்கியலெட்சுமி ஆகியோருக்கு பரிசுகள் வழங்கினார்.

மாணவர்களிடம் டி.எஸ்.பி.பேசுகையில்,யோகா செய்வதன் மூலம் உங்கள் மனம் தூய்மை ஆகும்.எந்த செயலை செய்தாலும் அதனை தெரிந்து,அறிந்து,புரிந்து செய்ய வேண்டும்நுனிப்புல் மேய கூடாது.இலக்கை அடைய முயற்சி செய்ய வேண்டும்.மனம் இருந்தால் மார்க்கம் உண்டு.மனபலம் தருவது யோகா ஆகும்.முழுமையான அறிவில் மேம்பட்ட நல்ல சமுதாயம் உருவாக்குவதற்கு தகுதி உடையவர்கள் ஆசிரியர்களே.முயலும்,ஆமையும் கதையில் ஆமையும் ஜெயிக்கும்.அதற்கு காரணம் தன்னம்பிக்கை ஆகும்.தன்னம்பிக்கை இருந்தால் வாழ்க்கையில் வெற்றி பெறலாம்.முயலும் ஜெய்க்கும் .ஆனால் முயலாமை ஜெயிக்காது.நான் என்னுடைய இளமை காலத்தில் என்னுடைய உழைப்பில் கிடைத்த பணத்தை கொண்டு கல்வி பயின்றேன். எனது பெற்றோரும்,எனது உறவினர்களும் எனக்கு நம்பிக்கை தரும் விதத்தில் பேசுவார்கள்.எனது முயற்சியினால் தன்னம்பிக்கையுடன் படித்து இந்த அரசு வேலைக்கு வந்துள்ளேன்.காவல் துறை பணியை நான் மிகுந்த கவுருவமாக நினைக்கிறேன்.படிக்கும்போதே பல்வேறு தகவல்களை நீங்கள் அறிந்து கேட்டு தெரிந்து கொண்டு பல்துறை வித்தகராக வளர வேண்டும்.நேர்மறை எண்ணங்களை வளர்த்து கொள்ளுங்கள்.அதற்கு யோகாவை முழுமையாக பயன்படுத்துங்கள் என்று பேசினார்.மாணவ,மாணவியர் பரமேஸ்வரி,வெங்கட்ராமன்,தனலெட்சுமி,நந்த குமார்,பரத்குமார் கேள்விகள் கேட்டு பதில்கள் பெற்றனர்.ஆசிரியை வாசுகி நன்றி கூறினார்.

பட விளக்கம் : தேவகோட்டை சேர்மன் மாணிக்க வாசகம் அரசு உதவி பெறும் நடுநிலைப் பள்ளியில் நடைபெற்ற உலக யோகா தின விழா போட்டிகளில் வெற்றி பெற்ற மாணவர்களுக்கு தேவகோட்டை டி .எஸ்.பி.கருப்புசாமி பரிசுகளை வழங்கினார்.உடன் பள்ளி தலைமை ஆசிரியர் லெ .சொக்கலிங்கம்,தேவகோட்டை காவல் ஆய்வாளர்கள் ரமேஷ்,பாஸ்கரன் உள்ளனர்.

June 21, 2016
யோகாரம்

சிங்காரம் உண்டு சிருங்காரம் உண்டு
சிறுகாரம் ஏதுக்கடி!
ஓங்காரம் உண்டு ரீங்காரம் உண்டு
ஆங்காரம் ஏதுக்கடி!
அழகாரம் உண்டு அலங்காரம் உண்டு
அதிகாரம் ஏதுக்கடி!
உபகாரம் உண்டு பரிகாரம் உண்டு
கடிகாரம் ஏதுக்கடி!

ஓகாரம் என்ன! ஏகாரம் என்ன!
ஆகாரம் நீதானடி!
ஊகாரம் ஆகி, ஒளகாரம் ஆன
அஃகாரம் நீதானடி!
மீகாரம் வெல்லும் மோகாரம் கொண்ட
நாகாரம் நீதானடி!
தேகாரம் வென்று ராகாரம் கொண்ட
யோகாரம் நீதானடி!

June 21, 2016
கேசவ் வண்ணம் – கிரேசி எண்ணம்

”நீலம்பா ரித்த நவநீதன் மத்ததனில்,
பாலின்ப வெண்ணை பிசுபிசுக்க, -காலின்பம்
கொண்டு பருகுகிறாள் கோமாதா;, கோலமிதை
விண்டுரைத்த கேசவ் வியப்பு’’….கிரேசி மோகன்….

“விண்சார்ந்த இந்திரன் வீசிய மின்னலிடி
மண்சேரா வண்ணம் மலையெடுத்த, -மின்சாரக்
கண்ணமுது ,அந்தக் கிளிசுகர் கூறிய
வண்ணமிகு பாக வதம்”….கிரேசி மோகன்….

June 20, 2016
தமிழ்த் தேசியவாதியுடன் சிறப்பு நேர்காணல்

பவள சங்கரி

தமிழ்த் தேசியவாதி ஐயா திரு பழ.நெடுமாறன் 1933 ஆம் ஆண்டு மார்ச் மாதம் 10ஆம் நாள் , கி. பழநியப்பனார் மற்றும் பிரமு அம்மையாருக்கும் தவப்புதல்வனாய்ப் பிறந்தவர். இவரது தந்தையார் மதுரைத் தமிழ்ச் சங்க செயலாளராகவும், மதுரை திருவள்ளுவர் கழக நிறுவனராகவும் பணியாற்றியவர். 1942 ஆம் ஆண்டு மதுரையில் நடைபெற்ற முத்தமிழ் மாநாடு, 1948 ஆம் ஆண்டு மதுரையில் நடைபெற்ற தமிழ்த் திருநாள், 1956 ஆம் ஆண்டு மதுரைத் தமிழ்ச் சங்கப் பொன்விழா போன்ற மாபெரும் தமிழ் மாநாடுகளைச் சிறப்புற நடத்திய பெருமை அவர்தம் தந்தையாரையேச் சாரும். பழ.நெடுமாறன் அவர்களுக்கு பார்வதி என்ற மனைவியாரும், ஒரு தமக்கை, ஒரு தங்கை, மூன்று தம்பிகளும் உள்ளனர்.

ஆரம்பக் காலத்தில் மகாத்மா காந்தி, காமராசர் மீது கொண்ட பற்றின் காரணமாக இந்திய தேசிய காங்கிரசு இயக்கத்தில் இணைந்து பணியாற்றினார். இந்திரா காந்தி அம்மையார் மதுரையில் தாக்கப்பட்ட போது அவரை உயிருடன் மீட்டார் என்பது குறிப்பிடத்தக்கது. திரு காமராசர் அவர்கள் நெடுமாறன் ஐயாவின் துணிவையும் நற்குணத்தையும் வெகுவாகப் பாராட்டி அவருக்கு “மாவீரன்” என்ற பெயரையும் சூட்டினார். சில கருத்து வேறுபாடுகளினால் காங்கிரசை விட்டு வெளியேறியவர் , பின்னர் காமராசர் காங்கிரசு என்ற இயக்கத்தை தோற்றுவித்தார். ஈழப் பிரச்சனையில் முழுமையாகத் தம்மை ஈடுபடுத்திக்கொண்டு தமிழர்களின் நலன் கருதி தமிழர் தேசிய இயக்கத்தைத் துவக்கினார். பதவிக்காகவேண்டி தேர்தல் அரசியலில் ஈடுபடுவதைத் தவிர்த்து முற்றிலும் தமிழ் மக்களுக்கான போராட்டங்களை மட்டுமே முன்னிறுத்தும் சமூக நலப்பணி அரசியல் வழியைத் தேர்ந்தெடுத்து செயல்பட்டு வருகிறார்.

இந்தியாவில் தூக்குத் தண்டனையை அறவே நீக்க வேண்டும் என்பதற்காக தமிழகமெங்கும் பெரும் இயக்கத்தை நடத்தியதோடு சென்னையில் ஐம்பதினாயிரம் பேரைத் திரட்டி மரண தண்டனை ஒழிப்பு ஊர்வலம் நடத்தியதன் மூலம் பெரும் விழிப்புணர்வை மக்களிடையே ஏற்படுத்தியவர் இவர். 1983 ஆம் ஆண்டில் கொழும்பில் மூவாயிரத்துக்கும் மேற்பட்ட தமிழர்கள் படுகொலை செய்யப்பட்ட துக்கமான நிகழ்வின்போது 5000 தொண்டர்களுடன், மதுரையிலிருந்து இலங்கை நோக்கி தமிழர் தியாகப் பயணம் மேற்கொண்டார். 1991 ஆம் ஆண்டில் தமிழ்நாட்டில் சிறப்பு முகாம்களில் அடைக்கப்பட்டிருந்த காயமடைந்த, ஊனமுற்ற விடுதலைப் புலிகளின் நிலைமை குறித்து தேசிய மனித உரிமை ஆணையத்துக்கு முறையிட்டு அவர்கள் விடுதலை பெற பெரிதும் உதவினார். 2000 ஆம் ஆண்டில் வீரப்பன், கன்னட நடிகர் இராசகுமாரை கடத்திய போது காட்டுக்குள் சென்ற மீட்புக் குழுவிற்குத் தலைமை ஏற்றுச் சென்று வீரப்பனிடம் பேசி இராசகுமாரை விடுவிக்கவும் உதவியவர். இதன் விளைவாக இரு மாநிலங்களுக்கிடையே மூளவிருந்த பெரும் இனக் கலவரத்தைத் தடுத்து நிறுத்திய பெரும்பேறும் பெற்றவர் இவர். 2000 ஆம் ஆண்டில் வீரப்பனுக்கு உதவியவர்கள் என்ற குற்றச்சாட்டின் கீழ் தடா சட்டப்படிக் கைது செய்யப்பட்டு அதன் காரணமாக மைசூர் சிறையில் வாடிய 121 அப்பாவி ஊர்க்காரர்களின் வழக்கைச் சிறந்த வழக்கறிஞர்களைக் கொண்டு நடத்தி அவர்களில் 117 பேரின் விடுதலைக்கு வழி வகுத்த உத்தமரும் இவர்தான்.

மாணவப் பருவத்திலிருந்து இன்று வரை தமிழர்களின் நலம் சார்ந்த பல்வேறு போராட்டங்களில் கலந்து கொண்டு அதன்பொருட்டு சுமார் 50 க்கும் மேற்பட்ட முறை கைது செய்யப்பட்டு காவலிலும் சிறையிலும் நாட்கணக்கிலும் மாதக் கணக்கிலும் வைக்கப்பட்டவர். ஐயா அவர்கள் மக்கள் நலன் கருதி தமிழகத்தின் ஒன்றிரண்டு சிறைகளைத் தவிர ஏனைய அனைத்துச் சிறைகளிலும் இருந்திருக்கிறார் என்றால் அது மிகையாகாது.

சமீபத்தில் ஈரோடு திருமுறைக்கழக நிறுவனர் ரா.ப. தங்கவேலனார் நூற்றாண்டு விழா மற்றும் பெரிய புராணப் பேரொளி உயர்திரு ஈரோடு தங்க.விசுவநாதன் அவர்களின் பவள விழா நிகழ்வில் கலந்துகொண்டு, அவ்வமயம் அடியேனின் ’கடைச்சங்கத்தில் கொங்கு கலாச்சாரம்’ என்ற நூல் உலகத் தமிழினத் தலைவர் திருமிகு பழநெடுமாறன் அவர்களால் சிறப்பாக வெளியிடப்பட்டது. நூல் அவர் கையில் கிடைத்த குறுகிய கால அவகாசத்திலேயே நூலின் தலைப்பினாலேயே தாம் மிகவும் ஈர்க்கப்பட்டதால், வாசிக்கும் ஆர்வம் ஏற்பட்டு விரைவில் பெரும்பகுதி படித்ததாகவும், பல நூல்கள் அரைத்த மாவையே அரைத்துக்கொண்டிருப்பதைப் போல் அல்லாமல் இந்நூல் ஒரு புதிய கோணத்தில் ஆய்வு செய்யப்பட்டிருப்பதைத் தாம் மகிழ்ந்து வரவேற்பதாகவும், அதற்காகவே தமது மனம் நிறைந்த பாராட்டுகளை வழங்குவதாகவும் ஐயா அவர்கள் பேசியது மிகவும் உற்சாகம் அளிக்கக்கூடியதாக இருந்தது. நூல் பற்றிய பல விளக்கங்களை பொறுமையாகக் கேட்டறிந்ததோடு விரிவாக எழுதுவதாகவும் கூறியுள்ளார். ஐயா அவர்கள் அடுத்த ஆய்வு நூலுக்கான அச்சாரமும் போட்டு வாழ்த்தியது மன நிறைவை ஏற்படுத்தியது. நிறை குடங்கள் என்றும் நீர் தளும்புவதில்லை என்று முழுமையாக உணர்ந்த தருணமும் இதுதான்…. இவ்வரிய தருணத்தில் ஐயா அவர்களுடன் நம் வல்லமை இதழுக்காக மேற்கொண்ட சிறப்பு நேர்காணலின் தொகுப்புகளைக் கீழே காணலாம்:

எங்களுடைய பல விதமான ஐயங்களுக்கு மிகத் தெளிவாக பதில் அளித்து தம்முடைய நெருக்கடியான நேரச்சூழலிலும் பல மணித்துளிகளை நமக்காகச் செலவிட்ட ஐயா பழ.நெடுமாறன் அவர்களின் மனிதம் போற்றும் பேராண்மையை வணங்கி விடைபெற்றோம்.

உடன் இருந்து உதவியதோடு ஐயாவின் உள்ளம் அறிந்து மனம் நெகிழ்ந்து போற்றி, தம் ஐயங்களையும் தெளிவு பெற்ற தமிழர், இன்முகம் நிறை வல்லமை மிக்க இளைஞர் திரு அகரம் பார்த்திபன் அவர்களுக்கும் வாழ்த்துகள்.

நன்றி

அன்புடன்

பவள சங்கரி

June 20, 2016
கேசவ் வண்ணம் – கிரேசி எண்ணம்

’’கண்ணன் அனுபூதி’’….
———————————————–

தேற்றி விஜயனைத் தேரேற்றி வில்லேந்தச்
சாற்றினாய் கீதையை சர்வேசா -சேற்றினுள்
பஞ்சப் புரவிகட்(கு) அஞ்சிப் புதைந்திடும்
நெஞ்ச ரதத்தை நிறுத்து….(25)

நிருத்தம் பயில நினக்கொரு வாய்ப்பு
கருத்த நவநீதக் கண்ணா -பருத்த
அகந்தையாம் ஆற்றில் புகுந்ததே ஆசை
முகுந்தாயிக் காளியனுன் மன்று….(26)

மன்றாடி ஈசன் மனம்குளிர மோகினியாய்
அன்றாடிப் பாடிய அச்சுதா -மன்றாடிக்
கேட்கிறேன் வைகுந்தா காட்சிதா கைலாசன்
வேட்கை அளவென் விருப்பு….(27)

விருப்புடன் மாலோலன் விரைகழல் பற்றிச்
சிறப்புடன் வாழ்வோம் செகத்தில் -மறுப்பிதில்
உண்டென்றால் கேளீர் உறங்கையில் உண்டாநீர்
உண்டில்லை சொல்வீர் உடன்….(28)

உடனிருக்கும், ஓட வடமிடும், வாடக்
கடன்பட்டார் நெஞ்சாய்க் கலங்கும் -புடமிட்ட
பொன்னாக்கும் மண்ணை, பொலிவாக்கும் வாழ்க்கையை
கண்ணனைக் கூடிக் கிட….(29)

கிடந்தால் உறக்கம், கிளர்ந்தெழ உண்பாய்
இடர்களையும் சாக்கில் இகத்தை -தொடர்ந்திடும்
இக்கூத்தைக் காண இறைவா எமெக்கெதற்கு
வக்கத்த வேடிக்கை வாய்ப்பு….(30)….கிரேசி மோகன்….

June 20, 2016
அம்மாவின் கண்கள் ;ஒரு பார்வை

முல்லை அமுதன்

தமிழின் வரப்பிரசாதம் தமிழர் வாழும் பரப்பெல்லை விரிவுபட்டுள்ளது. இன முரண்பாடு உள்ளக வெளியக இடப்பெயர்வுகளை அதிகமான மக்களை பெயர்த்திருக்கிறது அல்லது வேரோடு பிடுங்கி எறிந்திருக்கிறது. ஆதலினால் மக்களின் பரப்பளவின் அதிகமும் அதிகமாக அவர்களுக்கிடையேயான மொழி வளம் ஆளுமை கற்றுக்கொள்ளும் வல்லமை கல்வியின் மேலோங்கிய பயிற்சி கைகளுக்குள் உலகையே கொண்டு வரும் கணினியியல் நெறிகளின் கற்கைகள் ஒவ்வொரு வரும் தங்களின் திறமைகளை வெளிக்கொணரும் துணிச்சலையும் கொண்டு வந்துள்ளமை கண்கூடு.

இங்கு பன்முக ஆளுமை மிக்க படைப்பாளிகளும் அபரிமிதமாகத் தங்களை இனங்காட்டியே வந்துமுள்ளனர்.

இப்போது நமக்குப் புதிதாய் அறிமுகமாகிறார் திருமதி.வத்சலா ரமேஷ்.

சொல்வதை சுவை படச் சொல்வதில் தன் கவிதை மூலம் சாத்தியமாக்கியிருக்கிறார்.

ஒவ்வொரு வார்த்தையையும் ரசித்தபடி எழுதியிருக்கிறார்.வாசகனிடம் அழைத்துச் செல்லும் கவிதைகளுக்குள் நாமும் மூழ்கிப்போவது அதிசயம்தான்.தமிழ் மீதான அளப்பரிய பிரியம் தமிழை அழகாகாவும் எழுத முடிந்திருக்கிறது.

வாழ்க்கை மீதான நம்பிக்கைகள், விருப்புகள், கனவுகள், தன் மீதான கழிவிரக்கம், தன்னையே உரசிப்பார்க்கும் சமூகவெளி தருகின்ற அனுபவம், தாயின் ஸ்பரிசம், கற்பனை வெளியில் தானே துள்ளி ஓடுகின்ற ஆட்டுக்குட்டி போலவும், பதுமையாய் ஒதுங்கிப்போகிற பெண்ணாய், உறவை, உலகை உற்றுப்பார்க்கிற அனுபவஸ்தியாக படைப்பைத் தந்திருக்கிற வத்சலா அவர்களின் கவிதைகள் ஒரு விசாலமான உலகைத் தரிசிக்க முனைந்து நிற்கின்றன.

“ஏகாந்த காற்றில்

பறக்கும்

பால்யத்தின் நினைவுகள்

றெக்கை முளைத்த சருகுகளாய்.”

ஒரு சோறே பதம்பார்க்க உதவுகிறது.

“ஒரு கோப்பைத் தேநீரை

என் இதழ் கேட்கும் சூட்டோடு

சினேகிதமாய் பருகிக் கொண்ருந்தேன்.

வெளியில் பொழிகிறது மழை

என் தேநீர்க் கோப்பையை

நிறைக்கும் வரை”

உதட்டுக்கும் கோப்பைத் தேநீருக்குமான உறவில்

தன்னையும் இணைத்துக் கொள்ளும் மழை…சூழலை தன் வயப்படுத்தும் லாவகம் கவிதைக்கும் வலுச் சேர்க்கிறது.

மனதில் பட்டதை சொல்வதற்கும்,எழுத நினைப்பவற்றை அழகுறச் சொல்வதற்கும் கவிதை கைகொடுக்கும். இங்கும் கவிக்குரல் வத்சலா அவர்களின் கவிதைகள் தெளிவாக வந்து விழுந்திருக்கின்றன.

அவரின் குணம் மென்மையானதுவோ. கவிதைகளும் அப்படியே. ஆக்ரோசம் எங்கும் இல்லை.

ஆனால் கனவுகள் நிறையவே தூவப்பட்டுள்ளன பூக்களாய்.

ஒரு படைப்பாளிக்கும் வாசகனுக்குமான இடைவெளி நெருங்கும் போதே படைப்பின் மீதான விருப்பம் மேலிடும். படைப்பாளியை நெருங்கும் தொழில்நுட்பம் எப்போதும் படைப்பாளிக்குத் தெரிந்திருக்கவேண்டும். அதற்காக கைகளுக்கு விலங்கிட்டுக்கொள்வதல்ல.

முதலில் வாசகனாக உணர்ந்து பார்க்க வேண்டும். அவ்வளவே!

சிலருக்கு அவர்களின் கல்வி கைகொடுக்கும். இன்னும் சிலருக்கு அனுபவம் எழுதுவதற்கு கைலாகு கொடுக்கும். திருமதி.வத்சலாவிற்கு இரண்டுமே துணைபுரிந்திருக்கின்றன.

‘என்னைப் பார்த்துப்

பேசாத

அவள் இதழ்கள்

மௌனமாய்!

அவளின்

விரிந்த விழிகள்

பேசின காதலாய்!’

உணர்வுகள் எழுத்தில் சிறப்பிடம் பெறுகிறது

‘’காற்றில் மிதக்கும் இறகு

பறவையாய்ப் பறக்கும்

மனசு’

‘மெல்ல மெல்ல

பாதம் பதித்து

அவள் நடந்தாள்.

அவள் கொலுசு

சிணுங்கி இசையெழுப்பியது.

சத்தமில்லாமல்

அவள்

பின்னே சென்றது

என் மனது’

…..நான் குடைக்குள்

நனையாமல் இருக்கிறேன்.

என்னை

நனைத்துவிட்டுச் செல்கிறது.

காதல் மழையாய்

உன் நினைவுகள்’.

ஓவியா பதிக்க வெளியீடாக வந்துள்ளதில் மகிழ்ச்சியே.

அழகியப் பதிப்பு.. கவனமெடுத்து ஒழுங்கமக்கப்பட்டுள்ளன.

96 பக்கங்களில் எல்லாவற்றையும் சொல்லிவிடத் துடிக்கும் ஆதங்கம் கவிஞனின் ஆரம்ப முயற்சி என்பதின் அளவுகோல்.

இன்னும் முயன்றிருக்கலாமே என்கிற எதிர்பார்ப்பும் இல்லாமல் இல்லை.

கவிதைகளுக்கு காதல் துணைபுரிந்திருக்கிறதோ? முதலில் எழுதவரும் அனைவருமே காதலையே கவிவரிகளுக்குள் அடக்கிப்பார்க்கிறார்கள். காதலும் அடங்கிப்போகிறது.

சப்தமின்றி வார்த்தைகளை கோர்வையாக்கி வரிகளாக்கி நமக்கு கவிதையாக்கியிருக்கின்றார். வாசிக்கையில் உள்ளுக்குள் வயதையும் மீறி ரசிக்கின்ற அனுபவம் அலாதியானது.

கவிதை எழுதுதல் என்பது இலகுவானதாகிவிட்டதா என்கிற எண்ணம் எனக்கு உண்டு. முன்பெல்லாம் நமக்குக் கிடைத்த மு.மேத்தா, கண்னதாசன், வாலி என்று விரிவுபட்டு பலரைத் தேடி வாசிக்கும் காலம் ஒன்றிருந்ததே. இப்போது கணினிவயப்பட்ட உலகில் எதுவும் சாத்தியமாகும் என்பது போல கவிதைகளும், கவிதை நூல்களும் வந்துகொண்டிருக்க, பதிப்பகங்களும் பெருக்கமுற்றபடியே வருகின்றமையும் கண்கூடு.

சிலர் சொல்லலாம் ஆரோக்கியமான சூழல் கவிதையில் காணப்படவில்லை என.. முன்னரும் போஸ்ட்கார்ட் கவிதைகள் வந்த காலமும் உண்டு.பின்னர் ஆரோக்கியான சூழலில் கவிதைகளும்,கவிஞர்களும் உருவாகவில்லையா?

ஆயிரம் பூக்கள் மலரட்டுமே.

வெண்பஞ்சு மேகத்தின் வெண்ணெயை..

உனது உடலெங்கும் பூசி

நீலவான் கடலின் அலையில்

அசைந்தும்,மிதந்தும்,குளித்து

விண்மீன்களில் அத்தனை

ஒளிவெள்ளத்திலும், மிளிர்வுடன் உருவாகிய

வெண் தாரகைப் பெண்ணும் நீதானோ?..’

கொஞ்சம் குளிரை

அனுப்பிவிடு என்னுயிரே!

வெய்யில் கேட்கிறது

வேண்டுமென்று..’

‘…

வலியும் வேதனையுமெனக்கு

ஓலமிட்டழும் மரம் அறியும்

மரணத்தை மட்டும்..’

எவை காலம் தொட்டு நிற்கும் என்பதை நிர்ணயிக்கும் என்பதை உணர்ந்து வரவேற்கவும்,வழிவிடவும் வேண்டுமே தவிர புதுவரவுகளுக்கு தடபோடுதல் ஆகாது.

வத்சலாவின் கவிதைகளும் -எதிர்கால நிஜங்களை கைகளுக்குள் அடைத்துவிடும் தார்ப்பரியத்துடன் தொடரும் என்கிறதே நம்பிக்கை.

தன் முன்னால் நடப்பவற்றை, சூழலை சாதாரணன் உள்வாங்குகின்ற முறைக்கும் அதையே கவிஞனின் மனதில் ஏற்படுத்திச் செல்கின்ற சலனங்களுக்கும், தாக்கங்களுக்கும் நிறையவே வித்தியாசம் உண்டு. அதை எழுகின்ற ஒரு படைப்பாளி உள்வாங்கி எழுதுகின்ற உணர்வுக்கும் அதையே வாசிக்கினற வாசகனுக்குமான இடைவெளி அதிகமாகிவிடக்கூடாத எச்சரிக்கை அல்லது பக்குவம் தேவை. அதனைச் சரிவரச் செய்கிற போது வாசகனை சென்றடையும், சலனத்தை, தாகத்தை ஏற்படுத்தியே தீரும்.

சிலவற்றை தெரிவு செய்கையில் ஒன்றுக்கொன்று தொடர்பறுந்து நீர்த்துப்போகின்ற அபாயமும் உண்டு.

வத்சலா ஓரளவு புரிந்துகொண்டுள்ளார். அவரின் கவிதைக்கான பயிற்சி, வாசிப்பு ஆற்றல் இன்னும் விசாலமாகும் பட்சத்தில்

அம்மாவின் கண்கள் போன்று பல கவிதைகளை தருகின்ற வல்லமையும் பெறுவார்.

இன்னொன்றையும் கவனமெடுக்கவேண்டும்.

கவிதைகளில் குற்றம் கண்டுபித்துச் சொல்கின்ற நக்கீரர்கள் அதிகம் வலம் வருகின்ற களத்தில் கவனமாக எதை செவிசாய்க்கவேண்டும், எதை நிராகரிக்கவேண்டும் என்கிற நிதானத்துடன் நகரும் பட்சத்தில் எதிர்காலம் கம்பீரமாக இருக்கும்.

வாழ்த்துக்களுடன்,

முல்லைஅமுதன்

20/06/2016

June 20, 2016
“குரு ரமணா”

மீ.விசுவநாதன்

மனத்தை அழிக்கப் பழகென்றாய் – ரமணா
மனத்தில் நீயும் இருக்கின்றாய் !
சினத்தை அழிக்கப் பழகென்றாய் – என்
சிரமம் அறிந்து சிரிக்கின்றாய் !

ஆசை அடக்கப் பழகென்றாய் – என்
ஆசை உனதாய் அறிகின்றாய் !
காசைத் துறக்கப் பழகென்றாய் -பொற்
காசாய்ப் பொலிந்தே அழைகின்றாய் !

அண்ணா மலையை நினையென்றாய் – நீ
அண்ணா மலையாய்த் தெரிகின்றாய் !
எண்ணா திருந்து களியென்றாய் – அந்த
எண்ணா மருந்தின் சுவையானாய் !

“யார்நீ?” எனநீ துளையென்றாய் – விடை
யார்நீ அறிந்த அருளானாய் !
ஊர்பேர் மறக்கப் பழகென்றாய் – நீ
ஊர்பேர் வணங்கும் பொருளானாய் !

(18.06.2016)

June 20, 2016
குடும்பம்

பிரகாஷ்

    காடூர் என்ற கிராமத்தில் ஏழை எளிய மக்கள் வாழ்ந்து வந்தனர். இக்கிராமத்தில் படிப்பறிவு இல்லாதவர்கள் அதிகமாக இருந்தனர். அதிலும் கடினமாக உழைத்து படிக்கவைக்கும் போது நடந்த சம்பவங்களை இக்கதையில் சுட்டுகிறேன்.

கலைச்செல்வி பள்ளிக்கு சேர்ந்த முதல் நாளே நண்பர்கள் துணைக்கு இல்லை என்று வருத்தப்பட்டாள். அடுத்தநாள் பள்ளிக்குச் செல்லும்போது தேவி, அபி, என்ற இரண்டு நண்பர்கள் கிடைத்ததும் மகிழ்ச்சியடைந்தாள். கலைச்செல்வி பள்ளிக்குச் செல்லும்போது ஆற்றை கடந்து செல்லவேண்டும். ஆற்றை கடந்து செல்வதற்கு தொங்குபாலம் ஒன்று அமைத்திருக்கின்றனர். ஒரு நாள் மழை வந்ததும் ஆற்றில் நீரின் அளவு அதிகமாக வந்ததால் ஆற்றை கடந்து செல்லமுடியாமல் அவள் தவித்தாள்.

எப்படி செல்வது என்று நின்று யோசித்தாள் கலைச்செல்வி

    எதிர்புரத்தில் யாரோ வராங்க அவரிடம் உதவி கேட்போம். யாரோ? கேட்போம்.

    என்னங்க என்ன அந்தப்பக்கத்தில கூடிட்டு போயி விடுவீங்களா – சரிங்க

ரொம்ப நன்றிங்க.

உங்க பேர் என்னங்க? ஆனந்தன் என் பேர் கலைச்செல்வி சரிங்க – மீன்டும் சந்திப்போம் – வரங்க, வாங்க

அடுத்தநாள் இருவரும் சந்தித்துப் பேசிக்கொண்டனர்.

இப்படி தினமும் சந்தித்து வந்தார்கள்.

இருவரும் சேர்ந்து ஒருநாள் ஊருக்குள் சென்ற போது அவர்கள் மீது மக்கள் பார்வையில் தவறான கண்ணோட்டத்தில் பார்க்கப்பட்டது.

ஊரு மக்கள் தவறான கண்ணோட்டத்தில் பார்க்கப்பட்டதால் நாம் இனி பிரிந்து வாழ வேண்டாம் என்ற கலைச்செல்வி ஆனந்தனிடம் சொன்னாள்.

சரி எனக்குள்ள இதுவரைக்கும் உன்மேல எந்த ஆசையுமே இல்ல, உன்னோட விருப்பம் டா.

பிறகு ஆனந்தன் கலைச்செல்வியை தனது காட்டிற்குள் தனிமையில் சந்திக்க விரும்பினான் கலைச்செல்வியும் சந்தித்தாள். அவர்களை அறியாமலே தவறு நடந்து விடுகின்றது. அத்தவறை கலைச்செல்வியின் தாய் மாமன் பார்த்துவிடுகிறான்.

இதை எப்படியாவது ஊருக்குள்ள சொல்லியே ஆகனும்.

கட்டபஞ்சாயித்துக்கு ஏற்பாடு செய்து பஞ்சாயத்தில் நிக்க வைத்து இருவரையும் கேள்விகள் எழுப்பினார்கள்.

நீங்க ரெண்டு பேரும் காட்ல என்ன பன்ணீங்க? பேசிட்டுதான் இருந்த – என்னடா அவ ஒன்னும் பன்னலன சொல்ரா, என்ன ஆதாரம் இருக்க தப்ப பன்னத்துக்க ஒன்னு இல்லங்க ஐயா.

ஏமா பேசரத்துக்கு எடமா இல்ல போமா வேரவேளை இருந்தா பாருங்க.

அப்பா – ஊருக்குள்ள பஞ்சாயத்து வெச்சி என் பேர கெடுத்துடயேடி உன்ன எவன்டி கட்டிக்கப்போரான் எங்கயாவது போய் செத்து தொலஞ்சிடு என் கண்ணுக்கு முன்னாடி இருக்காத.

கலைச்செல்வி ஊரவிட்டு போயிட்டா

உறவினர்கள் – ஏன்டா நல்லா இருந்தவள இப்படி பன்னிடயடா போயி தேடுங்கடா எங்க இருக்கானு

அத்தை – வெள்ளையம்மாள் கலைச்செல்வியை சந்தித்ததும் மகிழ்ச்சியடைந்து எங்கயாவது ஒடிபோயி பொளச்சிக்கோமா.

இந்த என்னால முடிஞ்சது 100/- ரூபாயும், 1 பவுன் நகை ஜாகரிதியாக போயிட்டுவா – சரி அத்த

தாய் மாமன் – எங்க மாமா அவள வெளிய அனுப்பு. இல்லடா – இப்ப அனுப்ப போரிங்களா இல்லையா, எங்கிட்ட வம்பு பன்றதுக்கே குடிச்சிட்டு வந்து இருக்கியாடா.

சரி சரி கோச்சிக்காதிங்க கோவத்தில பேசிட்ட மாமா.

ஆனந்தன்

    “என் இதயத்தில் தீ மட்டும் எரித்து

    உடலில் உயிர் மட்டும் வாழ்ந்து இருக்கு

    கலைச்செல்வி நீ எங்க இருக்க”

கலைசெல்வி வெளியுர் சென்றபின் ஒரு பஞ்சு கம்பெனியில்   வேளை செய்து இருந்தாள். தங்குவதற்கு ஒரு அறையும் 5000/- சம்பளமும் கொடுத்தனர்.

ஆனந்தன் கலைச்செல்வியை தேடி அலைந்து கிடைக்காமல் அவர் அப்பாவை சந்தித்து பேசினான்.

ஏன்டா உன்னையே நம்பி இருந்த எம் பொண்ண ஏமாத்திடயடா

அவள் அத்தையை சந்தித்தான் – உனக்கு என்ன அந்த பொண்ணு உன்னையே நினச்சிகிட்டுயிருக்கு, பாவம் உண்காரியத்தை முடிச்சிட்டு கைவிட்டுட்ட

ஆனந்தன் – “பாவம் செய்த எனக்கு பரிகாரமே இல்லையா”

தாய் மாமனை சந்தித்தான். அவன் அவங்க மாமாவை பார்த்து பேசினான்.

டே மாப்பிள ஆசைய காட்டி மோசம் பன்னிட்டாங்கடா தெருவில விடவேண்டியவன நடு வீட்டுல வெச்சா இப்படிதான்டா.

ஆனந்தன் – மாமா நான் உங்க பொண்ண கட்டிக்கிறன்.

தாய் மாமன் – மாமா உங்க பொண்ண அவனே கட்டிகிரனு சொல்லிட்டா இல்ல கட்டிகுடுத்துருங்க.

போடா பரதேசி இப்படிதான்டா அன்னைக்கும் சொன்னிங்க

சரி, சரி அவன நாளைக்கு 7 மணிக்கு ஐயனார் கோயிலுக்கு வர சொல்லுடா சரி மாமா.

தண்னி அடிப்பான கேளுடா இல்ல மாமா.

நான் போயிட்டு வரன்.

எங்கடா போன பொண்ணு வீட்டுக்கு.

ஆனந்தனின் அப்பா நெல் குடோனில் இருந்த பூச்சி மருந்தை குடித்துவிடுகிறார்.

அப்பாவை மருத்துவ மனையில் சேர்த்து விட்டு ஆனந்தன் அங்கே இருந்தான்.

ஆனந்தன் கலைச்செல்வியை பார்க்க முடியாமல் போய்விடுகிறான்.

தாய்மாமனே திருமணம் செய்து கொள்கிறான்.

ஆனந்தன் – கலைச்செல்வியின் தாய் மாமனை சந்திக்க வந்ததும் இருவரையும் பார்த்து அதிர்ச்சி அடைந்துவிடுகிறான்.

திரும்பி வீட்டுக்குச் சென்றுவிடுவான். ஆனந்தனின் அண்ணன் சிங்காரம் – சட்டையில் கைவைச்சி எங்கடா போன, எங்கையோ போரன்டா எல்லா உன்னாலதான்டா கோவத்தில் ஆனந்தன் – அண்ணனை அடித்துவிடுகிறான். அண்ணி (வள்ளி) இதா என் புருசமேல கைவச்ச நல்லா இருக்கமாட்ட.

ஆனந்தன் – எல்லோரும் சேர்ந்து என் வாழ்க்கையே பாழாக்கிடிங்களேடா. என்று சொல்விட்டு அவருடைய கரும்புத் தோட்டத்தில் குடித்துவிட்டு படுத்து இருந்தான்.

அவன் அண்ணி “வள்ளி” வேறு ஒருவருடன் தொடா்புடையதை பார்த்துவிடுகிறான். வள்ளியும் ஆனந்தனை பார்த்துவிடுகிறாள்.

ஆனந்தன் வீட்டிற்குச் செல்வதற்குள்ளே அவள் சென்று விடுகிறாள். சென்றதும் அழுது கொண்டு இருப்பாள் மாமன் ஏன்டி அளுகிற ஏங்க உங்க தம்பி என்ன கைய புடிச்சி இழுத்துடான்.

ஆனந்தனின் அப்பா அவனிடம் எதுவும் கேட்காமலே அடித்து வீட்டைவிட்டு வெளியே போடா நாய.

இன்னும் எத்தனபேரு வீட்டுல கைவைக்கப்போரானோ.

மீன்டும் ஆனந்தன் இரவு வீட்டுக்கு வந்து கதவை தட்டினான் அப்பா திறந்து விடுவார், அம்மா பசிக்குதம்மா அம்மா, அவன்தான் கேக்குரான் இல்ல சாப்பாடு போடு சாப்பிட்டும். சாப்பிட்ட பின் அழுதுகொண்டே அம்மாவை பார்க்கிரான். அவன் பார்க்கிர பார்வையே வேறமாதிரி இருக்கு போட வெளியே என்று திட்டிவிடுகிறாள் தாயும்.

    “என்ன பத்துமாசம் சுமந்து பெத்தவளே

         இப்படி நினைத்துவிட்டாள் என்று”

மருந்து குடித்துவிட்டு இறந்து விடுகிறான். அவனுடைய நண்பன், அப்பா, அம்மா, உறவினர்கள் ஆகியோர் அழுது கொண்டு இருந்தார்கள்.

பெத்த மகன சொல்லி வழத்தாம விட்டுட்டு அழுது என்னப் பன்றது,

ஊா் மக்கள் இன்னும் என்ன ஆக வேண்டிய காரியங்களை பாருங்க.

நண்பன், டே போங்கடா எனக்குத் தெரியும் என்ன பன்னனும் என்று ஆனந்தனை எரித்துவிட்டு வீடு திரும்பும்போது அம்மாவை பார்த்து அவன் சொன்னான். மீண்டும் மரறுஜென்மத்துல எனக்க மகனா பிறந்து வருவான்.

June 20, 2016
படக்கவிதைப் போட்டி .. 69

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

வெங்கட் சிவா எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (25.06.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான முனைவர் காயத்ரி பூபதி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

முனைவர். காயத்ரி பூபதி கும்பகோணத்தில் பிறந்தவர். தற்போது ஐதராபத்தில் வசித்து வருகிறார். இவர் “குறள் கூறும் குற்றங்களும் அவற்றின் தண்டனைகளும்” என்ற தலைப்பில் இளம் முனைவர் பட்டமும் “சங்க இலக்கியத்தில் கருப்பொருளாட்சி” என்ற தலைப்பில் முனைவர் பட்டமும் தஞ்சை தமிழ்ப் பல்கலைக் கழகத்திலிருந்து பெற்றவர். தனது ஆராய்ச்சிக் காலத்தில் தஞ்சை தமிழ்ப் பல்கலைக் கழகத்திலும் பின்னர் தனலட்சுமி கல்லூரியிலும் விரிவுரையாளராகப் பணியாற்றியவர். மேலும் பன்னாட்டு மற்றும் உள்நாட்டுக் கருத்தரங்குகளில் தனது ஆய்வுக் கட்டுரைகளை சொற்பொழிவு மூலம் திறம்பட வெளிப்படுத்தி உள்ளார். இவர் இந்தி மொழியில் இளங்கலை பட்டமும் பெற்றவர்

June 20, 2016