கி. கண்ணன்
முன்னுரை:
இணையம், இன்று உலகைத் தன் கைக்குள் கொண்டுவந்துள்ள ஓர் ஊடகமாகும். நூல்களாகக் கொண்டுவர முடியாத பல தகவல்களை இணையதளம் உடனுக்குடன் அளிக்கும் ஓர் ஒப்பற்ற பிணைப்பாக விளங்குகிறது. இலக்கியம், ஆன்மீகம், அரசியல், பொழுதுபோக்கு என்று இதனுள் இல்லாதததே இல்லை எனலாம். சமூக வலையகம், வலைப்பதிவு, வலைத்தளம் என்று பலவகைகளில் இணையமானது இன்று வளர்ச்சி பெற்றள்ளது. அவ்வகையில் இணையதளங்களின் பங்களிப்பானது குறிப்பிடத்தக்க இடத்தைப் பெறுகின்றன. இதில் தமிழ்க்களஞ்சியம்.காம் என்ற இணையதளம் எவ்வாறு தமிழ்மொழி, தமிழிலக்கியம் தொடர்பான செய்திகளை வெளிக்கொணர்கிறது என்பதை விளக்குவதாக இக்கட்டுரை அமைகிறது.
களஞ்சியம்:
களஞ்சியம் என்ற சொல் பொதுவாக ஒரு பொருளை சேமித்து வைக்கும் இடத்தைக் குறிக்கும். குறிப்பாக தமிழில் களஞ்சியம் நெல் போன்ற தானியங்களை சேமித்து வைக்கும் இடத்தைக் குறிக்கும் என்று களஞ்சியத்திற்கு விளக்கமளிக்கின்றது விக்கிபீடியா. அறிவியல் களஞ்சியம், கலைக் களஞ்சியம், வாழ்வியற் களஞ்சியம் என களஞ்சியம் பலவகைப்படும். இணையத்தில் விக்கிபீடியா என்ற கட்டற்ற இணையம் மட்டுமே உலகளாவிய தகவல்களைத் தருகின்றது. தமிழ் இணையத்தில் தமிழ்க்களஞ்சியம் என்பது தமிழ் தொடர்பான அனைத்துத் தகவல்களையும் ஒன்றிணைக்கின்றது.
தமிழ்க்களஞ்சியம் (www.tamilkalanjiyam.com):
தமிழகத்தைச் சேர்ந்த சக்திவேல், கணேசன், பெருமாள் ஆகியோரின் கூட்டு முயற்சியால் கிடைக்கப்பெற்ற ஓர் அற்புத பொக்கிஷம் தமிழ்க் களஞ்சியம் என்னும் தமிழ் சேமிப்பான் ஆகும். இது எண்ணற்ற இலக்கியங்களையும் ஆவணங்களையும் பதிவு செய்து தற்கால மக்களின் அறிவிற்கும் வருங்கால தலைமுறையின் பயன்பாட்டிற்கும் வழிவகுத்துள்ளது. தமிழர்களாகிய நமது கலாச்சாரம், வரலாறு, பாரம்பரியம் நம்மைவிட மேலை நாட்டவர்களுக்கே அதிகம் தெரிந்திருக்கிறது. நம்மைப் பற்றி நாம் அறிந்து கொண்டால்தான் நம்மிடையே இன மற்றும் மொழி உணர்வு வளரும். இதைக் கருத்தில் கொண்டு தொடங்கப்பட்டதுதான் இந்த தமிழ்க்களஞ்சியம்.காம் இணையதளம், என்று இதற்கு முன்னுரை அளிக்கிறார் ஆசிரியர் சக்திவேல்.
பகுப்பு:
இந்தத் தமிழ் களஞ்சியம் இணையதளத்தில்,
இலக்கியம்,
தமிழ் உலகம்,
அறிவியல்
பொதுஅறிவு
ஆன்மீகம்
ஜோதிடம்
மருத்துவம்
பெண்கள் பற்றி
நகைச்சுவை
கலையலகம்
என்ற பத்து பகுப்புக்களின் கீழ் பலவகையான தகவல்கள் திரட்டித் தரப்பட்டுள்ளன. களஞ்சியம் என்பதன் பொருளுக்கிணங்க பலதரப்பட்ட செய்திகளையும் இதில் தொகுக்கப்பட்டுள்ளன. குறிப்பாக தமிழ் தொடர்பான செய்திகளைத் தருவதாக அமைந்துள்ளது.
இலக்கியம்:
தமிழ் இலக்கியம் தொடர்பான அனைத்து நூல்களையும் ஒரே இடத்தில் காணக் கிடைக்கின்றது. சங்க இலக்கியம், இலக்கணங்கள், காப்பிய இலக்கியங்கள், புராணங்கள், தல புராணங்கள், சைவ இலக்கியங்கள், வைணவ இலக்கியங்கள், கிறித்துவ இலக்கியங்கள், இசுலாமிய இலக்கியங்கள், சமண இலக்கியங்கள், சித்தர் இலக்கியங்கள், சிற்றிலக்கியங்கள், திரட்டு நூல்கள், அவ்வையார் நூல்கள், கம்பர் நூல்கள், ஒட்டக்கூத்தர் நூல்கள் என பல பிரிவுகளும் மேலும், இதில் கவிதைகள், புதுக்கவிதைகள், கதைகள், கட்டுரைகள், சிறுகதைகள், நாடகங்கள், நாட்டுப்புறப் பாடல்கள், சிறுவர் பாடல்கள் ஆகியன இடம்பெற்றுள்ளன.
தமிழ் உலகம்:
இத்தலைப்பின் கீழ், தமிழ் இலக்கிய நூல்கள், தமிழக மன்னர்கள், தமிழ்ப் புலவர்கள், தமிழ்க அறிஞர்கள், தமிழக தலைவர்கள், கலைஞர்கள், அறிவியலாளர்கள், எழுத்தாளர்கள், மாவட்டங்கள், ஊர்கள், சுற்றுலா தலங்கள், திருத்தலங்கள், அரசியல் கட்சிகள், ஆறுகள், ஏரிகள், மலைகள், கோட்டைகள், தமிழ்ப்பெயர்கள், தமிழ்ப் பணியார்கள் என்று தமிழ் மொழி, தமிழ்நாடு சார்ந்த தகவல்கள் இதில் ஒன்று திரட்டப்பட்டுள்ளன. தேவையான இடங்களில் சுட்டிப் படங்களுடனும் விளக்கப்பட்டுள்ளன.
மேலும் இப்பிரிவில், தமிழ் தேடுபொறி, அகரமுதலி, தமிழ் ஆங்கில அகராதிகள், கலைச்சொற்கள், மின்னஞ்சல், உரையாடல், கட்டுரைகள் போன்ற இணைப்புகளும் இத்துடன் இணைக்கப்பட்டுள்ளன.
அறிவியல்:
அறிவியல் என்னும் பகுப்பின் கீழ் அறிவியல் தொழில்நுட்பம் சார்ந்த ஆய்வுகள் தொடர்பான பல கட்டுரைகள் இதில் இடம்பெற்றுள்ளன. இதில், கணிதவியல், மின்னியல், மின்னணுவியல், கனிமவேதியியல், கரிமவேதியியல், வானவியல், இரசவாதம், கணிப்பொறியியல், ஒளியியல், ஒலியியல், உளவியல், அணுஇயற்பியல், தாவர வகைப்பாட்டியல், உடல் அமைப்பியல், உடற்செயலியல், மரபியல் போன்றனவும் இது தொடர்பான கட்டுரைகளும் இடம்பெற்றுள்ளன.
மேலும் இப்பகுதியில், அடிப்படை கணிதவியல், அடிப்படை இயற்பியல், அடிப்படை வேதியியல், அடிப்படை உயிரியல், அறிவியல் கண்டுபிடிப்புகள், அறிவியல் விதிகள் போன்றன இடம்பெற்று விளக்கப்பட்டுள்ளன.
பொது அறிவு:
இப்பகுப்பின் கீழ், உலக வரலாறு, இந்திய வரலாறு, இந்து, கிருத்துவ, இசுலாமிய குழந்தைப் பெயர்கள் இன்னும் பல பொது அறிவு சார்ந்த தகவல்கள் இதில் தொகுக்கப்பட்டுள்ளன. பொது அறிவுத் தகவல்கள், பொது அறிவுக் கட்டுரைகள், கேள்வி பதில்கள், சாதனைகள் ஆகியனவும் இதில் இடம்பெற்றள்ளன.
ஆன்மீகம்:
மத வேறுபாடு இல்லாமல் அனைத்து மதத்தினையும் பற்றிய குறிப்புகள் இதில் காணப்படுகின்றது. சைவம், வைணவம், கிறித்துவம், இஸ்லாமியம், சமணம் ஆகிய மதங்கள் தொடர்பான தகவல்கள் தொகுக்கப்பட்டுள்ளன. திருமால். சிவன், முருகன், விநாயகர், அம்மன் ஆலயம், நாயன்மார்கள், ஆழ்வார்கள், நவக்கிரகங்கள், நட்சத்திரக்கோயில்கள், கட்டுரைகள், மந்திரம், யந்திரம், சித்தர்கள் போன்றன பற்றி இதில் விவரிக்கப்பட்டுள்ளது. யோகக்கலைகள், யாகங்கள் பற்றியும் இத்துடன் விளக்கப்பட்டுள்ளது. மேலும்,
ஜோதிடம்:
தமிழ்க் களஞ்சியத்தில், அதிக பிரிவுகளைக் கொண்டு காணப்படுகிறது ஜோதிடம் பகுப்பாகும். பொது ஜோதிடம், வேத ஜோதிடம், நாடிஜோதிடம், எண் ஜோதிடம், ஆரூடங்கள், கைரேகை, பரிகாரங்கள், ஜாதகக் களஞ்சியம் என்று தலைப்பும் அதனைத் தொடர்ந்து உங்கள் ஜாதகம், பொருத்தம், பஞ்சாங்கம், சனி, குரு, ராகு-கேது ராசி பலன்கள், நவக்கிரக மந்திரங்கள், ஆரூடச் சக்கரங்கள் யோகங்கள் ஆகியன அதன் கீழ் தொகுக்கப்பட்டுள்ளன. மேலும் ஜோதிடக் கட்டுரைகள், குறிப்புகள், கேள்வி-பதில்கள் ஆகியனவும் இடம்பெற்றுள்ளன.
மருத்துவம்:
அனைத்து தரப்பு மனிதர்களுக்கும் தேவையான பகுதியாக இரு இருக்கிறது. சித்த மருத்துவம், இயற்கை மருத்துவம், ஆயுர்வேத மருத்துவம். ஹோமியோபதி பற்றிய விவரங்களுடன் மருத்துவம் தொடர்பான கட்டுரைகளும் இதில் இடம்பெற்றுள்ளன.
பெண்கள் பகுதி:
அழகுக்குறிப்புகள், சமையல் குறிப்பு, சமையல் செய்முறை, குழந்தை வளர்ப்பு, மகளிர் மன்றம், கோலம். மருதாணி என்ற தலைப்புகளின் கீழ் பெண்கள் தொடர்பான குறிப்புகளும் கட்டுரைகளும் இடம்பெற்றுள்ளன.
மேலும் இக்களஞ்சியத்தில், நகைச்சுவையும், கலையுகம் என்ற பகுப்புகளின் கீழ் நடிகர், நடிகையர், இசையமைப்பாளர்கள், கருவிகள், சினிமா செய்திகள் போன்றனவும் இ்டம் பெற்றுள்ளன.
முடிவுரை:
இணையம், கட்டற்ற கலைக்களஞ்சியமாக இருக்கின்றது என்பதற்கு தமிழ்க்களஞ்சியம் ஓர் சிறந்த உதாரணமாக விளங்குகிறது. இதில், இலக்கியம், குழந்தைகள், சினிமா, பொழுதுபோக்கு, பெண்கள், ஆன்மீகம் என்று அனைத்து விதமான மக்களும் பயன்படுத்தும்படி இலக்கியத் தரத்துடன் இத்தளம் அமைக்கப்பட்டுள்ளது. வகைகள் பிரிக்கப்பட்டுள்ள முறை அனைவராலும் ஏற்றுக்கொள்ளும்படியும் எளிதில் புரிந்து கொள்ளும்படியும் அமைக்கப்பட்டுள்ளது.
கி. கண்ணன்,
முனைவர் பட்ட ஆய்வாளர், (ப/நே.)
அறிவியல் தமிழ் மற்றும் தமிழ் வளர்ச்சித் துறை,
தமிழ்ப் பல்கலைக்கழகம்,
தஞ்சாவூர்.
