Author: admin

யாக்கோபும் தூக்குதண்டனையும்!

-சேசாத்திரி பாஸ்கர்

யாக்கோப் தூக்கில் இட்டதற்கு எல்லோரும் எம்பி குதிக்கிறார்கள். சரி, இவர்களின் ஹுமன் ரைட்ஸ் இத்தனை வருஷம் என்ன செய்தது ? வன்முறையைத் தடுக்க முடிந்ததா ? இவர்கள் வன்மம் ஒரு பக்கம், இவர்கள் கோபம் ஒரு பக்கம். இத்தனை உயிர்களைப் பிரித்த இவர்களுக்கு மன்னிப்பு கொடுத்தால் மக்கள் அவனைக் கல்லடித்து கொன்று விடுவார்கள். நம் ’செகுலர்’ என்ற அன்புப் போர்வை இவர்கள் துப்பாக்கி வைத்து கொள்ளும் மறைவிடமா? சட்டத்திற்கு என்ன மரியாதை?தூக்கில் போட மாட்டார்கள் என்ற தைர்யம் தானே இவர்களை மேலும் மேலும் தப்பு செய்யச்சொல்கிறது?

அட, மக்களைக் கொல்லும்போது ஒரு சின்ன புத்தி கூடவா எட்டி பார்கவில்லை? இது தப்பு ஆச்சே என்று ஒரு நொடி கூட யோசிப்பு இல்லையா ? இதை எல்லாம் மீறி அவர் தவறு செத்தால் அவர் எந்த மன்னிப்புக்கும் அருகதை அற்றவராகி விடுகிறார். ஒரு காவல் துறையோ அல்லது அரசாங்க அதிகாரியோ தாக்கப்பட்டால் அதை தவிர்க்கச் சுட்டால் அது கொலையா? அது போல் பெரிய தப்புக்கு மரண தண்டனை அவசியம்.

தூக்கில் போட்டால் சிலருக்கு வலிக்கிறது. அப்ப என்கவுன்ட்டர் தான் ஒரே வழியா? சரி… இவன் தூக்கு நம் கலாசாரத்திற்கு ஒத்து வாராது. நம் பூமி பரோபகார பூமி; சகிப்புக்குப் பேர் போனது. எத்தனை நாளைக்கு?

இந்தத் தூக்கிலிடும் விஷயம் பக்கத்துக்கு நாடுகளுக்கான செய்தி. எவ்வளவோ விஷயத்தை நாம் மறக்கிறோம். இதையும் கொஞ்சம் கஷ்டப்பட்டு மறப்போம். கொசுவைத் தட்டும்போது பறக்கும்; மூட்டைப் பூச்சியை நசுக்கவில்லயா? தப்பு செய்ய எண்ணும் நமக்கும் இது ஒரு பாடம்! செத்து போனது பகத் சிங் அல்ல; கட்டபொம்மனும் அல்ல!

August 1, 2015
கலாம் விதைத்து விருட்சமான மரம்!

July 31, 2015
மகான் அப்துல் கலாம்

பி. சுவாமிநாதன்

‘ஒரு மனிதன் இருக்கும்போது பேசப்படுவதை விட, இறந்த பின்தான் அதிகம் பேசப்படுவான்’ என்பதை நன்றாகவே அறிவோம். அனுபவபூர்வமாகப் பார்த்தும் வருகிறோம்.

ஆனால், இருக்கும்போதும் இறந்த பின்னும் – இன்று அதிகம் பேசப்பட்டு – வணங்கப்பட்டு வருபவர் உலக மேதை டாக்டர் அப்துல் கலாம் அவர்கள்.

ஒரு மகனின் மறைவுக்காகத் தாயாகப்பட்டவள் அழுது அரற்றி அனுதாபம் தெரிவித்தால், அவன் ஒரு நல்ல மகனாக இருந்துள்ளான் என்று அறியலாம்.

ஒரு கணவனின் மறைவுக்கு மனைவியாகப்பட்டவள் கண்ணீர் விட்டுக் கதறி, சடலத்தின் அருகிலேயே இருந்து பழங்கதைகளை நினைவு கூர்ந்தால், அவன் நல்ல கணவனாக வாழ்ந்துள்ளான் என்று அறியலாம்.

ஒரு குடும்பத் தலைவரின் மறைவுக்கு ஒட்டுமொத்த வாரிசுகளும் அமர்ந்து ஓயாது கண்ணீர் விட்டால் அவர் ஒரு நல்ல தந்தையாக விளங்கி உள்ளார் என்று அறியலாம்.

ஒரு குடிமகனின் மறைவுக்காக ஒட்டுமொத்த தேசமே கண்ணீர் சிந்தினால், அந்தக் குடிமகனை ‘தேசத் தந்தை’ என்று சொல்லலாம்.

ஆம்! அப்துல் கலாம் ஐயா அவர்கள் நம் தேசத் தந்தை ஆகி விட்டார்!

கலாமின் மறைவுக்கு அஞ்சலி செலுத்தும் விதமாக ஒவ்வொரு தெருவிலும் அவரது திருவுருவப் படம் வைக்கப்பட்டு, ஃப்ளெக்ஸ் அமைக்கப்பட்டு மலர்கள் தூவப்படுகின்றன.

மெழுகுவத்திகள் ஏற்றப்படுகின்றன.

குழந்தைகள் படங்களின் முன்னால் நின்று கண்ணீர் அஞ்சலி செலுத்துகிறார்கள்.

உலகமே இரங்கல் தெரிவிக்கிறது.

ஒவ்வொரு பள்ளி – கல்லூரிகளிலும் அனுதாபம் தெரிவிக்கப்படுகிறது.

ரயில் நிலையங்கள் உட்பட பொதுமக்கள் அதிகம் நடமாடுகின்ற இடங்களில் அஞ்சலி செலுத்தப்படுகிறது.

இரங்கல் தெரிவித்து அரசு பொது விடுமுறை அறிவிக்கப்பட்டுள்ளது.

கடைகள் இயங்காது என்று பிரதான வணிகர் சங்கத் தலைவர்கள் அறிவித்துள்ளனர்.

தியேட்டர்களில் சில காட்சிகள் ரத்து என்று அறிவிப்பு.

ராமேஸ்வரத்தில் அஞ்சலிக்காக வந்து கூடும் அன்பர்களுக்கு இலவச இடம், இலவச உணவு என்கிற தனியார் அமைப்புகளின் அறிவிப்புகள்…

அஞ்சலி செலுத்துவதற்கு ராமேஸ்வரம் செல்ல வசதியாக சென்னையில் இருந்து சிறப்பு இலவசப் பேருந்துகள்…

இவை போல் இன்னும் எத்தனை எத்தனையோ…

– மேலே சொன்ன எதுவும் யாரோ வலுக்கட்டாயமாகச் சொல்லி அறிவிப்புகள் வெளியிடப்படவில்லை.

உணர்வுபூர்வமாக – உருக்கமாக வெளியான அறிவிப்புகள்.

உண்மையாக நடந்தால் –

ஒழுக்கத்துடன் இருந்தால் –

மனிதாபிமானம் கொண்டிருந்தால் –

தேச பக்தியும் அமைந்திருந்தால் –

திக்கெட்டும் உன்னை வாழ்த்தும்.

அப்துல் கலாம் அவர்கள் வாழ்ந்து காட்டினார்.

இப்போது நிகழ்ந்தது ஒரு மனிதனின் மறைவல்ல…

ஒரு மகானின் விடைபெறுதல்…

மக்களின் வாழ்வுக்காக மகான்கள் அருளினார்கள்.

அப்துல் கலாமும் அதையேதான் செய்தார்.

மகான் ஆனார்!

இன்று தேசமே கண்ணீர் சிந்துகிறது.

ஒரு நல்ல குழந்தையை இழந்து தவிக்கிறாள் பூமாதேவி.

என் ஆழ்ந்த அஞ்சலி.

– பி. சுவாமிநாதன்

July 29, 2015
அப்துல்கலாமுக்கு அஞ்சலி!

-சரஸ்வதி ராசேந்திரன்

வையம் வியக்கும்
விஞ்ஞானி நீ
விண்கலச் சாதனையாளன்
ஏவுகணை நாயகன்
கனவுகளின் நாயகன்!

நினைவுகளின் நிஜம் நீ
தன்னலம் கருதாத்
தலைவன் நீ
தன் சுகம் விடுத்துத்
தமிழினம் காத்தவன்!

விருதுகள் கூட உன்னால்
பெருமை அடைந்தன
இந்திய வீணையை மீட்டியவன் நீ
இன்று உன் வீட்டு வீணை
இசைப்பவனை இழந்து நிற்கிறது!

தமிழினமே உன் இழப்பால்
கையறு நிலையில்
கலங்கி நிற்கிறது
விரல் இழந்த கையாய்
நரம்பிழந்த வீணையாய்
நலமிழந்து வாடுகிறோம்!

நீவிட்டுச்சென்ற வீணையை
மீட்ட இளைஞர்கள் எழுந்து விட்டனர்
அதில் தேச நலன் நயமுடன்
மீட்டப்படும் என உறுதி கூறுகிறோம்!

கலாமே உன்னை இன்னும் சிறிதுகாலம்
காலன் களவாடாமல் இருந்திருந்தால்
இந்தியா வல்லரசாவதைக் கண்டிருப்பாய்
உன் பிறப்புச் சம்பவமானாலும்
உன் இறப்பு சரித்திரமாகிவிட்டது
அமைதி கொள் அறிவுலக மேதையே!

July 29, 2015
சிலந்தி வலை

-மெய்யன் நடராஜ்

வாசற்படியில்லாமல்
கட்டிய வீட்டுக்கு
வேயப்படாத கூரை

விருந்தாளிகளாய் வருவோர்
விருந்தாகும் வினோத வீடு

பூச்சிகளின்
அந்தர மயானம்

சிக்கலான வீட்டுக்குள்
சிறப்பாக வாழ்வது பற்றிக்
கற்றுக் கொள்ள
கட்டப்பட்ட பள்ளிக்கூடம்

சிக்கலுக்குள் வாழ்ந்தாலும்
சிக்கிக் கொள்வதுகளிடத்தில்
சிக்கிக் கொள்ளாமல் வாழ்வதன்
சிறந்த எடுத்துக் காட்டு

சிக்கல் இல்லாமல் போனால்
வாழ்தலில் சுவாரஸ்யம் இல்லை
என்பதையும் உணர்த்தும் சிந்தனை

கூரையில்லா வீட்டுக்குள்
குறைவில்லாக் குடும்பம்
நடத்துவதற்கான குறும்படம்

அரண்மனை வாசலில்
துப்பாக்கியோடு
நிற்கும் காவலனை ஏமாற்றிவிட்டு
அனுமதியில்லாமல்
கொத்தனாரில்லாமல் அரண்மனைக்குள்ளும்
கட்டப்பட்டு விடுகிற இந்த வீடு
அசந்தால் காவலனின்
துப்பாக்கிக்குள்ளும் கட்டப்பட்டுவிடும்

விளக்கைப் பிடித்துக் கொண்டு
கிணற்றில் விழுவதாய் வீழும்
மின்மினிப் பூச்சிகளிடம்
வெளிச்சத்தையோ…
நிறங்களில் கவர்ச்சியூட்டி
மயக்குவதாக நினைத்து வந்து
மாட்டிக்கொள்கின்ற
வண்ணத்துப் பூச்சிகளிடம்
அழகையோ வாங்கிக்
கொள்ளாவிட்டாலும்
அழகாய் வெளிச்சமாய் வாழும்
சிலந்திகள் தன்னம்பிக்கையின் வேர்கள் !

July 29, 2015
அறிவியல் கதிர் – ஆசார்யா பிரபுல்ல சந்திர ரே

பேராசிரியர் கே. ராஜு

இந்திய வேதியியலின் தந்தை என அழைக்கப்படும் பிரபுல்ல சந்திர ரே (Prafulla Chandra Ray) 1861ஆம் ஆண்டில் வங்காளத்தில் (தற்போது வங்கதேசத்தில் இருக்கும்) ராருலி என்ற கிராமத்தில் பிறந்தார். நான்காம் வகுப்பில் இருந்தபோது அவர் கடுமையான வயிற்றுப் போக்கினால் பாதிக்கப்பட்டார். அது அவரது உடல்நலத்தை வாழ்நாள் முழுவதும் பாதித்துவிட்டது.

கொல்கத்தா சென்று பள்ளிப் படிப்பை முடித்தபிறகு மெட்ரோபோலிட்டன் கல்லூரியில் சேர்ந்தார். அங்கு அலெக்சாண்டர் பெட்லருடைய உரைகள் அவருக்கு வேதியியல் பக்கம் ஆர்வம் வரக் காரணமாக அமைந்தன. கல்லூரியில் இண்டர் படிப்பை முடித்துவிட்ட அவருக்கு கில்க்ரைஸ்ட் உதவித் தொகை கிடைத்ததால், இங்கிலாந்தில் உள்ள எடின்பர்க் பல்கலையில் பி.எஸ்.சி. வகுப்பில் சேர்ந்தார். சிப்பாய்க் கலகத்திற்கு முன்பும் பின்பும் இந்தியா என்ற அவரது கட்டுரைக்கு ஹோப் பரிசு கிடைத்தது.

1888 ஆகஸ்டில் அவர் இந்தியா திரும்பினார். அடுத்த ஆண்டில் பிரசிடென்சி கல்லூரியில் பணியில் சேர்ந்தார். 1916 வரை அங்கு பணி புரிந்தார். ஜெ.சி. கோஷ், என்.ஆர். தார், பி.பி. டே போன்ற திறன் வாய்ந்த மாணவர்கள் அவருக்குக் கிடைத்தனர். அறிவியல் காத்திருக்கலாம்.. சுயராஜ்யம் காத்திருக்க முடியாது என்ற அறைகூவல் விடுத்து தேசவிடுதலைப் போராட்டத்தின் பக்கம் மாணவர்கள் கவனத்தை அவர் திருப்பினார்.

உணவில் கலப்படம் – குறிப்பாக நெய்யிலும் கடுகு எண்ணெயிலும் கலப்படம்- தனிமங்களின் அட்டவணையில் இடம் பெறாத தனிமங்கள் போன்ற பல்வேறு பிரச்சனைகளை அவர் ஆய்வுக்கு எடுத்துக்கொண்டார். ஆயுர்வேத மருந்துகளில் பாதரசத்திற்கு இருந்த முக்கியத்துவத்தின் காரணமாக அவருக்கு பாதரச ஆராய்ச்சியின் மீது தனிப்பட்ட ஆர்வம் ஏற்பட்டது. 1896-ல் மெர்குரஸ் நைட்ரைட் என்ற ஒரு புதிய கூட்டுப் பொருளை தயாரிப்பது குறித்த தன் ஆராய்ச்சிக் கட்டுரையை வெளியிட்டார். இது அவரது அறிவியல் வாழ்வில் ஒரு திருப்புமுனையை ஏற்படுத்தியது. பல்வேறு உலோகங்கள் மற்றும் அமோனியாவின் நைட்ரைட்ஸ், ஹைபோநைட்ரைட்ஸ் குறித்த பல ஆய்வுக் கட்டுரைகள் வெளியாக இது வழிவகுத்தது. 1902-ல் ஆதி காலத்திலிருந்து 16வது நூற்றாண்டு வரை இந்தியாவில் நடைபெற்ற வேதியியல் ஆய்வுகளைத் தொகுத்து அதை ஒரு வரலாற்று ஆவணமாக வெளியிட்டார்.

1921-ல் 60 வயதை அடைந்த தினத்திலிருந்து ரே தன்னுடைய மொத்த ஊதியத்தையும் கல்கத்தா பல்கலைக்கழகத்திற்கு அளித்து வேதியியல் துறையில் ஆராய்ச்சிகள் மேம்பட உதவினார். 1924ஆம் ஆண்டில் ஒரு புதிய வேதியியலுக்கான இந்திய ஆராய்ச்சிமையத்தையே தொடங்கினார் ரே.

பிரசிடென்சி கல்லூரியிலிருந்து 1916-ல் ஓய்வு பெற்ற ரே கல்கத்தா அறிவியல் பல்கலைக்கழகத்தில் பேராசிரியராகச் சேர்ந்தார். இங்கும் அவருடன் இணைந்து பணிபுரிய அர்ப்பணிப்பு மிக்கதோர் குழு அவருக்குக் கிடைத்தது. தங்கம், பிளாட்டினம், இரிடியம் போன்ற தனிமங்களின் கூட்டுப் பொருட்களைப் பற்றி ஆய்வுகள் செய்து அவர் தயாரித்த பல ஆய்வுக் கட்டுரைகள் இந்திய வேதியியல் குழுவின் இதழில் வெளியிடப்பட்டன. 1920ம் ஆண்டிற்குள் அவர் 107 ஆராய்ச்சிக் கட்டுரைகளை வெளியிட்டிருந்தார்.

75வது வயதில் 1936-ல் பணியிலிருந்து விடுபட்டாலும் ஓய்வு எடுத்துக் கொள்ளாமல், கௌரவப் பேராசிரியாகத் தன் ஆராய்ச்சிகளைத் தொடர்ந்தார். வங்காள மொழி மாதப் பத்திரிகைகளில் பல அறிவியல் கட்டுரைகளை அவர் எழுதி வந்தார். 1932-ல் சுயசரிதை எழுதி அதில் தன் அனுபவங்களைப் பதிவு செய்து அதை இந்திய இளைஞர்களுக்கு அர்ப்பணித்தார். அதன் தொடர்ச்சியாக இரண்டாவது தொகுப்பையும் 1935ஆம் ஆண்டில் கொணர்ந்தார். ஒரு விஞ்ஞானியாக அவர் சோதனைக் கூடத்திற்குள் முடங்கிவிடவில்லை. 1923ஆம் ஆண்டில் வடக்கு வங்காளத்தில் வெள்ளப் பெருக்கினால் லட்சக்கணக்கான மக்கள் வீடிழந்து உணவின்றித் தவித்தபோது 25 லட்ச ரூபாய் நிதியையும் பொருட்களையும் திரட்டி நிவாரணப் பணிகளுக்கு உதவினார். 1944ஆம் ஆண்டில் மரணடைந்தார். திருமணம் செய்து கொள்ளாமல் வாழ்ந்து அரசியலிலும் சமூகப் பணிகளிலும் தன்னை ஈடுபடுத்திக் கொண்ட வித்தியாசமான விஞ்ஞானிதான் ரே. ஜெ.சி. போஸ், சி.வி. ராமன், பி.சி. ரே ஆகிய மூவரும் இந்தியாவில் நவீன அறிவியல் உருவாகக் காரணமாக இருந்த முன்னோடிகள் என்று சொன்னால் அது மிகையல்ல.

July 29, 2015
“பெருந்தலைவர்” – கர்மவீரர் காமராசர்!

— எஸ். நித்தியலக்ஷ்மி.

பெருந்தலைவர்

முன்னுரை:
தென்னாட்டு காந்தி, படிக்காத மேதை, அரசரை உருவாக்குபவர் (King Maker),பெருந்தலைவர் என்ற பெருமைக்குரிய காமராசர் எளிய குடும்பத்தில் பிறந்து இந்தியாவின் தலைவிதியை நிர்ணயிக்கும் அளவிற்கு உயர்ந்தவர். வாழ்க்கைத் துணையின்றி வாழ்ந்து தமிழகத்துக்கும், இந்தியாவின் வளர்ச்சிக்கும் தான் சார்ந்த காங்கிரஸ் கட்சியின் நலன்களுக்கு மிகப்பெரும் தொண்டாற்றியவர்.

பிறப்பு:
விருதுநகர் மாவட்டம் விருதுபட்டி என்னும் விருதுநகரில் குமாரசாமி நாடார் – சிவகாமி தம்பதியருக்கு 15.07.1903 ஆம் ஆண்டு பிறந்தார். முதலில் இவரின் பெயர் குலதெய்வமான காமாட்சி அம்மனின் பெயரையே சூட்டினர். இவரது தாயார் மட்டும் ராஜா என்று அழைத்து வந்தார். பின்னாளில் காமாராசு என பெயர் மாற்றம் பெற்று எல்லோராலும் அழைக்கப் பெற்றார்.

கல்வி:
தனது பள்ளிப் படிப்பை சத்ரிய வித்யா சாலா பள்ளியில் தொடங்கிய காமரசர், ஆறு வயதில் தந்தையை இழந்ததும் ஆறாம் வகுப்போடு பள்ளிப்படிப்பைத் தொடரமுடியாத காமராசர் தன் மாமாவின் துணிக்கடையில் வேலையில் அமர்ந்தார். அங்கிருக்கும் போது பெ. வரதராசுலு நாயுடு போன்ற தேசத் தலைவர்களின் பேச்சுக்களில் கவரப்பட்டு அரசியலிலும் சுதந்திரப் போராட்டங்களிலும் ஆர்வம் காட்டினார்.

சிறை வாழ்க்கை:
ராஜாஜியின் தலைமையில் 1930 மார்ச் மாதம், வேதாரண்யத்தில் உப்பு சத்தியாகிரகம் நடைபெற்ற போது அதில் கலந்துகொண்டார். அதற்காகக் காமராசர் கைது செய்யப்பட்டு கல்கத்தா அலிப்பூர் சிறைக்கு அனுப்பப்பட்டார்.

அடுத்த ஆண்டு காந்தி-இர்வின் ஒப்பந்தத்தின் அடிப்படையில் விடுதலை ஆனார். விருதுநகர் வெடிகுண்டு வழக்கில் கைதாகி, சேலம் டாக்டர் பெ.வரதராசுலு நாயுடு அவர்களின் வாதத் திறமையால் குற்றச்சாட்டு நிரூபிக்கப்படாததால் விடுதலை செய்யப்பட்டார்.

1940ல் மீண்டும் கைதாகி வேலூர் சிறையில் அடைக்கப்பட்டார். அங்கிருக்கும்போதே விருதுநகர் நகராட்சித் தலைவராகத் தேர்ந்தெடுக்கப்பட்டார். ஒன்பது மாதங்களுக்குப் பிறகு விடுதலை ஆன காமராசர் நேராகச் சென்று தனது நகராட்சித் தலைவர் பதவியை துறந்தார். அப்போது பதவிக்கு நேர்மையாகவும் முழுமையாகவும் கடமையாற்ற முடியாத நிலையில் அதில் ஒட்டிக் கொண்டிருப்பது தவறு என்று கூறினார்.

மீண்டும் 1942ல் ஆகஸ்ட் புரட்சி நடவடிக்கைகளுக்காகக் கைது செய்யப்பட்டார். இந்த முறை மூன்று ஆண்டுகள் தண்டனையாக அமராவதி சிறைக்கு அனுப்பப்பட்டார். இம்மாதிரியான சிறை வாழ்க்கைகளின்போது சுயமாகப் படித்துத் தன் கல்வி அறிவை வளர்த்துக் கொண்டார்.

அரசியல் குரு:
மிகச்சிறந்த பேச்சாளரும் சிறந்த நாடாளுமன்ற வாதியுமான சத்தியமூர்த்தியை தனது அரசியல் குருவாக ஏற்றுக்கொண்டார் காமராசர். 1936ல் சத்தியமூர்த்தி பிரதேச காங்கிரசின் தலைவரானபோது காமராசரைச் செயலாளராக ஆக்கினார். இருவரின் முயற்சியில் காங்கிரஸ் கட்சி நல்ல வளர்ச்சியைக் கண்டு தேர்தல்களில் பெரும் வெற்றி பெற்றது. இந்தியா சுதந்திரம் அடைந்த செய்தி கேட்டு காமராசர் முதலில் சத்தியமூர்த்தியின் இல்லத்திற்குச் சென்று அங்குதான் தேசியக் கொடியை ஏற்றினார். குடியாத்தம் தொகுதியில் சட்டப்பேரவைக்கு தேர்தலில் நின்று வெற்றி பெற்றார். தமிழக முதல்வராக 13.04.1954 தமிழ் புத்தாண்டு அன்று பதவியேற்றார். முதல்வராக பதவியேற்றதும் முதலில் சத்தியமூர்த்தியின் இல்லம் சென்று அவர் படத்துக்கு மாலை அணிவித்துவிட்டுதான் தன் பணிகளைத் தொடங்கினார்.

அமைச்சரவை:
* காமராசர் அமைச்சரவை அமைத்த விதத்தில் சில நுட்பமான விஷயங்கள் உள்ளன.

* மிகக்குறைந்த எண்ணிக்கையிலேயே (8 பேர்) அமைச்சர்கள் இருந்தனர்.

* காமராசர் தன்னை எதிர்த்துப் போட்டியிட்ட சி. சுப்பிரமணியம், அவரை முன்மொழிந்த பக்தவச்சலம் இருவரையும் அமைச்சரவையில் அமைச்சர்களாக சேர்த்திருந்தார்.

ஆற்றிய பணிகள்:
ராஜாஜி கொண்டு வந்திருந்த குலக்கல்வித் திட்டத்தினைக் கைவிட்டார். அவரது ஆட்சிக் காலத்திற்குள் தமிழகத்தில் பள்ளிகளின் எண்ணிக்கை 27,000 ஆனது. அவரது மதிய உணவுத் திட்டம் இன்றும் உலக அளவில் பாராட்டப்படும் திட்டமாகும். அதன் பலனாக பள்ளிகளில் படிப்போரின் எண்ணிக்கை 37 சதவீதமாக உயர்ந்தது (ஆங்கிலேய அரசு காலத்தில் இது 7 சதவீதமாக இருந்தது). பள்ளிகளில் வேலை நாட்கள் 180 லிருந்து 200 ஆக உயர்த்தப்பட்டது. சென்னை இந்தியத் தொழில்நுட்ப நிறுவனம் (IIT) தொடங்கப்பட்டது.

காமராசர் முதல்வராக பதவி வகித்த காலங்களில் தமிழகத்தின் முன்னேற்றம், மக்களின் வாழ்க்கை முன்னேற்றம், கல்வி, தொழில் வளத்துக்கு முன்னுரிமை அளித்து பலத் திட்டங்களை நிறைவேற்றினார். அவரது ஆட்சியின்கீழ் 9 முக்கிய நீர்பாசனத் திட்டங்கள் நிறைவேற்றப்பட்டன.

அவை:

* கீழ் பவானித்திட்டம்

* மேட்டூர் கால்வாய்த்திட்டம்

* காவேரி டெல்டா வடிகால் அபிவிருத்தி திட்டம்

* மணிமுத்தாறு

* அமராவதி

* வைகை

* சாத்தனூர்

* கிருஷ்ணகிரி

* ஆரணியாறு ஆகியவையாகும்

முக்கியப் பொதுத்துறை நிறுவனங்களும், பெருந் தொழிற்சாலைகளும்:

* பாரத மிகுமின் நிறுவனம்

* நெய்வேலி பழுப்பு நிலக்கரி நிறுவனம்

* மணலி சென்னை சுததகரிப்பு நிலையம் (MRL) இதன் தற்போதைய பெயர் (CPCL)

* இரயில்பெட்டி இணைப்புத் தொழிற்சாலை (ICF)

* நீலகிரி புகைப்படச் சுருள் தொழிற்சாலை

* கிண்டி மருத்துவ சோதனைக் கருவிகள் தொழிற்சாலை

* மேட்டூர் காகிதத் தொழிற்சாலை

* குந்தா மின் திட்டம்

* நெய்வேலி மற்றும் ஊட்டியில் வெப்ப மின் திட்டங்களும் காமராசரால் ஏற்படுத்தப்பட்டவை.

அகிலஇந்திய காங்கிரஸ் (K.PLAN):
மூன்று முறை (1954-57, 1957-62, 1962-63) முதல்வராகத் தேர்ந்தெடுக்கப்பட்டிருந்த காமராசர் பதவியை விட தேசப்பணியும் கட்சிப்பணியுமே முக்கியம் என்பதை மக்களுக்கும், குறிப்பாக கட்சித் தொண்டர்களுக்கும் காட்ட விரும்பி கொண்டு வந்த திட்டம் தான் K-PLAN எனப்படும் ‘காமராசர் திட்டம்’ ஆகும். அதன்படி கட்சியின் மூத்த தலைவர்கள் பதவிகளை இளையவர்களிடம் ஒப்படைத்து விட்டு கட்சிப்பணியாற்றச் செல்ல வேண்டும் என்று இவர் நேருவிடம் சொன்னதை அப்படியே ஏற்றுக் கொண்டார் நேரு. இந்தத் திட்டத்தை முன்மொழிந்த கையோடு தன் முதல்வர் பதவியை (02.10.1963) துறந்து பக்தவத்சலம் அவர்களிடம் பொறுப்பை ஒப்படைத்து விட்டு தில்லி சென்றார் காமராசர். அக்டோபர் 9 ஆம் தேதி அகில இந்தியக் காங்கிரஸின் தலைவர் ஆனார். லால்பகதூர் சாசுதிரி, மொரார்சி தேசாய், எசு.கே.பாட்டீல், ஜெகஜீவன்ராம் போன்றோர் அவ்வாறு பதவி துறந்தவர்களில் குறிப்பிடத்தக்கவர்கள்.

அகில இந்திய அளவில் காமராசரின் செல்வாக்கு கட்சியினரிடம் மரியாதைக்குரியதாக இருந்தது. அதனாலேயே 1964-ல் ஜவகர்லால் நேரு மறைந்தவுடன் இந்தியாவின் பிரதமராக லால் பகதூர் சாஸ்திரி அவர்களை முன்மொழிந்து காமராசர் சொன்ன கருத்தினை அனைவரும் ஏற்றனர். 1966-ல் லால் பகதூர் சாஸ்திரியின் திடீர் மறைவின் போது ஏற்பட்ட அசாதாரண அரசியல் சூழ்நிலையின் போது இந்திரா காந்தியை பிரதமராக வரச் செய்ததில் காமராசருக்குக் கணிசமான பங்கு இருந்தது.

இறுதிக் காலம்:
காமராசருக்கு இந்திராகாந்தியுடன் ஏற்பட்ட கருத்து வேறுபாடு காரணமாக காங்கிரசு கட்சி இரண்டாக உடையும் நிலை ஏற்பட்டது. காமராசரின் தலைமையிலான சிண்டிகேட் காங்கிரசு தமிழக அளவில் செல்வாக்குடன் திகழ்ந்தது. ஆனாலும் திராவிட முன்னேற்றக் கழகத்தின் அபரிமித வளர்ச்சியால் அதன் பலம் குன்றிப் போக காமராசர் தன்னுடைய அரசியல் பயணத்தைத் தமிழக அளவில் சுருக்கிக் கொண்டார். தமிழக ஆட்சியாளர்களின் தவறுகளைச் சுட்டிக் காட்டி வந்தார். இந்திரா காந்தி நெருக்கடி நிலையினை அமல் செய்தபோது அதனைக் கடுமையாக எதிர்த்தவர்களில் காமராசரும் ஒருவர். 9 ஆண்டுகள் தமிழகத்தின் முதல்வராக பதவி வகித்த காமராசர் இந்தியாவின் அரசியல் போக்கு குறித்து மிகுந்த அதிருப்தியும் கவலையும் கொண்டிருந்த நிலையில் 1975 அக்டோபர் திங்கள் இரண்டாம் நாள் (காந்தியின் பிறந்தநாள்) உறக்கத்திலேயே அவரின் உயிர் பிரிந்தது. அவர் இறந்த போது பையில் இருந்த சிறிதளவு பணத்தைத் தவிர வேறு வங்கிக் கணக்கோ, சொந்த வீடோ, வேற எந்த வித நிலங்களோ இல்லை என்பது குறிப்பிடத்தக்கது. தன் வாழ்நாள் இறுதி வரை வாடகை வீட்டிலேயே வாழ்க்கை பயணத்தை முடித்தார்.

நினைவுச் சின்னங்கள்:
காமராசர் நினைவைப் போற்றும் வகையில் தமிழக அரசு சென்னை கிண்டியில் அவருக்கு பெருந்தலைவர் காமராசர் நினைவிடம் ஒன்றை
அமைத்துள்ளது. இங்கு பெருந்தலைவர் காமராசர் அவர்களின் மார்பளவு சிலை அமைக்கப்பட்டுள்ளது. கன்னியாகுமரியில் பெருந்தலைவர் காமராசர் மணிமண்டபம் ஒன்றையும் அமைத்துள்ளது. இங்கு பெருந்தலைவர் காமராசர் அவர்களின் மார்பளவு சிலை அமைக்கப்பட்டுள்ளது. நூலகம் அமைக்கப்பட்டுள்ளது. பெருந்தலைவர் காமராசர் அவர்களின் வாழ்க்கை வரலாறு தொடர்பான புகைப்படங்கள் பொதுமக்கள் பார்வைக்குக் கண்காட்சியாக வைக்கப்பட்டுள்ளது.

காமராசர் இறந்த பிறகு 1976-ல் இவருக்கு பாரத ரத்னா விருது வழங்கப்பட்டது. சென்னை வானூர்தி நிலையத்தின் உள்நாட்டு முனையத்திற்கு காமராசர் பெயர் சூட்டப்பட்டுள்ளது.

July 24, 2015
MONKEYS

-Niveditha

Monkeys live all over the world and come in different shapes, sizes and colors. Monkeys are mammals. They are our closest relatives because they act just like humans. Monkeys are very intelligent and have opposable thumbs allowing them to use tools and play games. There are more than 260 different types of monkeys. They are separated into two large groups: Old world and new world. Old world monkeys live in Africa and Asia while new world monkeys live in the Americas. One difference between the two groups is that old world monkeys don’t have grasping tails but, new world monkeys do. Also, old world monkeys’ nostrils are small, curved and set close together while most new world monkeys have round nostrils set far apart.

Diet

Most people think monkeys only eat bananas but, that isn’t really true. Monkeys are omnivores. This means they eat meat and plant based foods. Majority of the monkeys eat nuts, fruits, seeds and flowers. Some of the monkeys also eat meat in the form of bird’s eggs, small lizards, insects and spiders.

Habits & Habitat

Most monkeys live on trees but, some monkeys live in savannas or mountain areas. Monkey tribes keep moving to find more food so, one location isn’t home for very long. Monkeys are very social animals. Groups of monkeys are called tribes, missions, troops or cartloads. A troop will work close together to take care of the young and little monkeys in the group. The monkeys also like to play, cuddle and protect each other. The strongest, bravest and largest male monkeys are the leader of the group. In monkey genus groups (a large group of monkeys like a subfamily) that practice polygyny, the leader will mate with multiple females.

Offspring

The pregnancy periods for monkeys Vary depending on the genus. For example, the pregnancy for a rhesus monkey is 164 days. Baboons have a similar pregnancy period of around 187 days. Chimpanzees on the other hand, have a much longer pregnancy period of around 237 days according to the San Jose state university. Once born, baby monkeys are mostly cared by their mother. If the monkey is single and doesn’t have siblings, the baby monkey may be cared by both the parents. Lots of times, a young monkey rides on its mother’s back or sometimes it hangs from its mother’s neck. A baby monkey is considered an adult between four and five years old. Also, a monkey’s lifespan is about 10 to 50 years but, some monkeys have a shorter lifespan due to diseases.

In conclusion, monkeys are very interesting creatures and we should learn more about them to increase our knowledge.

Reference: http://www.livescience.com/27944-monkeys.html

July 22, 2015
“கல்விக்கண் திறந்தவர்” – கர்மவீரர் காமராசர்!

— தி. ஆறுமுகம்.

கர்மவீரர் காமராஜர்

கையால் துவைத்து மடித்த, நீளக்கைகொண்ட நாலைந்து கதர் சட்டை, வேட்டியோடு… ரொக்கமாக நூறு ரூபாய் தவிர தனது உடமையென்று சொல்ல வேறெதுவுமின்றி, 1975 அக்டோபர் திங்கள் 2ம் நாளில் பூதவுடலை நீத்தும், பூமியில் வாழ் மனிதரின் உள்ளத்தில் உறைந்திருக்கும் தன்னலமற்ற மாமனிதர்,
ஏழைப்பங்காளர், கல்விக்கண் திறந்த கர்மவீரர் காமராஜர் 1903 ஜூலை 15ல் தற்போதைய விருதுநகர் (அப்போதைய விருதுபட்டி) இல் குமாரசாமி – சிவகாமி அம்மாள் மகவாக இவ்வுலகில் அவதரித்தார்.

ஆறு வயதில் தந்தையை இழந்தார். தாயார் மற்றும் தமக்கையுடன் விருதுபட்டியிலே வாழ்ந்தார். தாத்தா நடத்தும் ஊர்ப் பஞ்சாயத்துக்களில் சென்றமர்ந்து நடக்கும் நிகழ்வுகளை அமைதியாய்க் கவனிப்பார். அதனைக் கண்ணுற்ற ஊர் மக்கள் உவகையோடு பாராட்டினர். திண்ணைப்ப் பள்ளியில் தமிழெழுத்துக்களைக் கற்றார். பின்னர் உணவுடன் கற்றுத்தரும் சத்திரிய உயர்நிலைப் பள்ளிக்குச் சென்றார். பள்ளிப்படிப்பில் நாட்டமில்லை. நாள்தோறும் செய்தித்தாள் வாசிப்பார். அரசியல் தலைவர்களின் மேடைப் பேச்சுக்களை ஆர்வமுடன் கவனிப்பார். “மெய்கண்டான் புத்தகசாலை” எனும் நூலகத்திற்குச் சென்று மாமேதை இலெனின், கரிபால்டி, நெப்போலியன் போன்றோர் வாழ்க்கை வரலாற்றைப் படித்து மேடையில் பேசவும், விவாதிக்க்கவுமான ஆற்றல் பெற்றார். அந்நாள் விடுதலைப் போராட்ட காலமாகையால் சுவரொட்டிகளிலே காணப்படும் ‘வந்தே மாதரம்’ என்ற வார்த்தையால் ஈர்க்கப்பட்டு, நாட்டின் விடுதலைக்காகப் போராடிவரும் காந்தியின் வழியில் தன் பயணத்தைத் தொடர முனைந்தார். தேசிய இயக்கமான காங்கிரசில் இணைந்து அதன் தொண்டராகத் தன் அரசியல் வாழ்க்கையைத் துவங்கினார். கட்சிக் கூட்டங்களை நடத்தினார். கொடி பிடித்தார், கொள்கை முழக்கமிட்டார். சைமன் குழு எதிர்ப்பு, உப்புக் காய்ச்சுதல், வெள்ளையனே வெளியேறு எனப் பல்வேறு போராட்டங்களில் பங்கேற்றதால் பதினோராண்டு சிறைவாசம் பெற்றார்.

அவரது தன்னலமற்ற உழைப்பைக் கண்ணுற்ற காங்கிரஸ் கட்சியின் தலைவர் சத்தியமூர்த்தி, அவரைக் கட்சியின் செயலாளராக நியமித்தார். சத்தியமூர்த்தியைத் தனது அரசியல் குருவாக ஏற்றுக்கொண்ட காமராஜர் 1937 ல் முதன் முதலாய்ச் சட்டமன்ற உறுப்பினராய்த் தேர்ந்தெடுக்கப்பட்டார். 1939ல் காங்கிரஸ் கட்சியின் தமிழகத் தலைவரானார். 12 ஆண்டு காலம் இப்பதவியில் சீருஞ் சிறப்புமாகத் திகழ்ந்தார். 1945ல் பிரகாசம் தலைமையிலும், 1947ல் ஓமந்தூர் ராமசாமி தலைமையிலும், 1949ல் குமாரசாமி தலைமையிலும் அமைச்சரவை உருவாகக் காரணமாயிருந்ததால் தலைவர்களை உருவாக்குபவரானார் காமராஜர்.

1954ல் மூதறிஞர் ராஜாஜி முதலமைச்சர் பதவியிலிருந்து விலகியதும், காமராஜர் தேர்ந்தெடுக்கப்பட்டார். அவரது அமைச்சரவை, அளவில் சிறியதாய் இருந்தாலும் செயலில் சிறப்புடன் திகழ்ந்தது. முன்னாள் குடியரசுத் தலைவர் மேதகு ஆர்.வெங்கட்டராமன் தொழிலமைச்சராகவும், சி.சுப்பிரமணியம் கல்வி அமைச்சராகவுமிருந்து துணைபுரிந்தனர்.

காமராஜர் முதலமைச்சராகவிருந்த காலத்தில் இரண்டாவது, மூன்றாவது ஐந்தாண்டுத் திட்டங்கள் நிறைவேற்றப்பட்டன. தமிழகத்தில் பல பொருளியல் தொழில் திட்டங்கள் தொடங்கப்பட்டன. மின் திட்டங்கள் மிகுந்தன. தரமான சாலைகள் அமைக்கப்பட்டன. கிண்டி, அம்பத்தூர் மற்றும் ராணிப்பேட்டை போன்ற இடங்களில் பெரிய தொழிற்சாலைகளும், மாவட்டந்தோறுஞ் சிறிய தொழிற் பேட்டைகளும் அமையப்பெற்றன. புதிய அணைகள் கட்டப்பட்டு பாசன வசதிகள் மேம்படுத்தப்பட்டன. இவரது காலத்தில்தான் கூட்டுறவு இயக்கம் வேரூன்றி விவசாயம், நெசவுத்தொழில் வளர்ச்சி பெற்றன. நெய்வேலியில் நிலக்கரி சுரங்கத் தொழிற்சாலை, ஊட்டியில் இந்துஸ்தான் ஃபோட்டோ ஃபிலிம் தொழிற்சாலை, கிண்டியில் அறுவை சிகிச்சைக் கருவி தொழிற்சாலை, இன்னும் சிமிண்ட், சர்க்கரை, சோடா உப்புத் தொழிற்சாலைகள் அமோகமாய் உருவாகின.

காமராஜர் காலத்தில் கட்டாயக் கல்வி நடைமுறைப்படுத்தப்பட்டது. தெருவெங்குந் தொடக்கப்பள்ளி, ஊரெங்கும் உயர்நிலைப்பள்ளி என்பதே அவரது கல்விக் கொள்கை. பள்ளி வேலை நாட்கள் 180 லிருந்து 200 ஆக உயர்த்தப்ப்பட்டது. பள்ளிச் சீரமைப்பு மாநாடுகள் நடத்தப்பட்டு பள்ளிகளுக்குத் தேவையான அடிப்படை பொருட்களும், கருவிகளும் வழங்க வகை செய்யப்பட்டன. ஈராண்டுகளில் கூட்டப்பட்ட இத்தகைய மாநாடுகள் மூலம் பல கோடி ரூபாய்கள் நன்கொடையாக வந்தன. உயர்நிலைப்பள்ளி வரை இலவசக் கல்வி அமுலாக்கப்பட்டது. மாவட்டந் தோறும் தொழில்நுட்பக் கல்லூரிகள், உடற்பயிற்சிப் பள்ளிகள், ஆசிரியர் பயிற்சி பள்ளிகளுங் கல்லூரிகளுந் துவக்கப்பட்டன. மருத்துவக்கல்லூரி மற்றும் பொறியியற் கல்லூரியில் பயிலும் ஏழை மாணவர்களுக்கு வட்டியில்லாக் கடன்கள் வழங்கப்பட்டன.

கல்வி கற்கும் மாணவர்களுக்கு மதிய உணவு இலவசமாய் வழங்க வித்திட்டவராவர் காமராஜர். நெல்லை மாவட்டத்திலுள்ள அம்பாசமுத்திரத்திற்கு மகிழுந்தில் சென்று கொண்டிருக்கும் போது நெல்லையிலிருந்து தென்காசி செல்லும் புகைவண்டிபாதையில் சாலையை மறித்து அடைக்கப்பட்டிருக்கும் கதவு திறக்கப்ப்படும் வரை காத்திருக்கும்போது, அருகிலுள்ள வயல் வெளியில் மாடு மேய்த்துக்கொண்டிருந்த ஒரு சிறுமியிடம் “ஏன் பள்ளிக்குச் செல்லவில்லையெனக்” கேட்டார். “இந்த மாடுகளை மேயத்துப் பால்கறந்து விற்றால்தான் எனக்கு சோறு என்றாள்” ‘அம்மா அப்பா எங்கே’ என்று கேட்க “அப்பாவுக்கு வயலில் வேலை, அம்மாவுக்கு வயலில் களையெடுக்கும் வேலை. மாடுகளை நான் மேயத்தால்தான் எனக்குக் கஞ்சி” என்றாள்.

இந்த ஒரு நிமிட உரையாடல் காமராஜரின் உள்ளத்தில் ஊடுருவி, ஆரம்பப் பள்ளிகளில் அனைவருக்கும் இலவச உணவு என்ற முடிவை மேற்கொள்ள வைத்தது. அரசுத் திட்டங்களை நாட்டு மக்கள் அனைவருக்கும் பொதுவானதாகவே கருதினார். அன்னையைச் சந்திக்க விருதுப்பட்டிக்குச் சென்ற காமராஜரிடம் தெரு முனையிலிருக்கும் குடிநீர் குழாயைத் தமது வீட்டருகே அமைத்துத் தரும்படி அவரது சகோதரி கூறினார். “அது அரசு அமைத்தக் குழாய் அனைவருக்கும் பொதுவானது. முதலமைச்சர் வீட்டுக்கு அருகில் அமைக்க எந்தச் சட்டமுமில்லை. ஆகவே அது தற்போதிருக்குமிடத்தில் தானிருக்கும். நீ அங்கு போய் தண்ணீர் பிடித்துக்கொள்” என்று கூறிவிட்டாராம். அரசின் அனுமதியில்லாமலேயே தனது நிறுவனத்திற்கு ஆயிரம் இணைப்புகள் பெற்றுகொண்டதை நியாயப்படுத்தி வாதிடுகின்ற இதே மண்ணில் தன்னுடைய வீட்டருகே தண்ணீர் குழாய் அமைக்க இசைவு தெரிவிக்க மறுத்த முதலமைச்சர் காமராஜர் வாழ்ந்ததும் இந்நாடே!

சமுதாய அமைப்பில் அடித்தளத்திலிருப்பவர்களை உயரச் செய்ய சீர்திருத்த நடவடிக்கைகள் பல மேற்கொண்டார். தஞ்சாவூர் பண்ணையாள் பாதுகாப்புச் சட்டத் திருத்தம், சாகுபடி செய்யும் தொழிலாளிக்கு 60% பங்கு கிடைக்க வழிவகை செய்தார். நிலச்சீர்திருத்தம் மூலம் உச்ச வரம்பை 30 ஏக்கர் எனக் குறைத்திட்டார். உபரி நிலங்களை மீட்டு, நிலமில்லா ஏழைகளுக்குப் பகிர்ந்தளித்தார். கருப்பட்டிக் காய்ச்சுபவர், கைத்தறியாளர், குயவர், மீனவர் போன்றோருக்காக சிறு தொழிலாளர் நலத்திட்டங்களை உருவாக்கினார். 60 வயதைக் கடந்த முதியோருக்கு ஓய்வூதியம் வழங்கும் திட்டம் குறிப்பிடத்தக்கத்து. நகர்ப்புற வீட்டு வசதி மற்றும் மருத்துவ வசதித் திட்டங்கள் நிறைவேற்றப்பட்டதும் காமராஜர் காலத்தில்தான்.

1962 ல் சீனப் படையெடுப்புக்குப்பின் இந்தியாவில் காங்கிரஸ் கட்சித்தலைவர்கள் சிலர் மீது மக்களுக்கு வெறுப்பேற்பட்டு தேர்தலில் அவர்களைத் தோல்வியடையச் செய்தனர். இந்த இக்கட்டான சூழலை வென்றடைய மூத்த தலைவர்கள் சிலர் ஆட்சிப்பொறுப்பை விட்டு விட்டு கட்சி வளர்சிப்பணியில் செயலாற்ற வேண்டுமென காமராஜர் ஒரு திட்டத்தைக் கொணர்ந்ததோடு தானும் தமிழகத்தின் முதல்வர் பொறுப்பிலிருந்து விலகி முன்னுதாரணத்தை ஏற்படுத்தினார். மொரார்ஜி தேசாய், லால் பகதூர் சாஸ்திரி போன்றோரும் ஆட்சிப் பணியைத் துறந்து கட்சிப் பணியில் ஐக்கியமாயினர். அப்போது பிரதமராயிருந்த பண்டித ஜவகர்லால் நேரு இத்திட்டத்தைக் காமராஜர் திட்டமெனக் கூறி மெருகூட்டினார்.

1963 ம் ஆண்டில் புவனேசுவர் நகரில் கூடிய அனைத்திந்திய காங்கிரஸ் மாநாடு மாமனிதர் காமராஜரை பெருந்தலைவராக்கியது. 1964ம் ஆண்டில் பாரதப் பிரதமர் நேரு மரணமடைந்தபோது, அடுத்த பிரதமரைத் தேர்ந்தெடுப்பதில் காங்கிரஸ் கட்சியில் பல்வேறு குழப்பங்கள் கொப்பளித்தன. காமராஜரின் சமயோசித புத்தியில் உதித்தவரே லால் பகதூர் சாஸ்திரி. இவரது பெயரைப் பரிந்துரை செய்து தான் பெருந்ததலைவர் என்பதை நிலை நிறுத்தினார் காமராஜர்.

1966 ம் ஆண்டில் ரஷ்யாவிலுள்ள தாஷ்கண்டிற்கு இந்தியா – பாகிஸ்தான் போர் நிறுத்த ஒப்பதந்தத்திற்காகச் சென்ற இந்தியப் பிரதமர் லால் பகதூர் சாஸ்திரி அகால மரணமடந்த சமயம் அடுத்த பிரதமர் யார்? என்ற குழப்பத்தின் போது மாமனிதர் காமராஜர் தலையிட்டு ‘நேருவின் மகளே வருக, நிலையான ஆட்சியைத் தருக’ என்ற முறையில் இந்திராகாந்தியைப் பிரதமராக்கினார்.

‘தீட்டிய மரத்தில் பதம் பார்ப்பதுபோல்’ மன்னர் மானியம் ஒழிப்பு பிரச்சனையில் பெருந்ததலைவர் காமராஜர் விரும்பாத தீர்மானத்தை அன்னை இந்திரா கொண்டுவர மனம் வெதும்பி, காங்கிரஸ் கட்சியிலிருந்து விலகி ‘ஸ்தாபனக் காங்கிரஸ்’ என்ற பெயரில் புதிய கட்சியைத் தோற்றுவித்தார். மூத்த காங்கிரஸ் உறுப்பினர்களனைவரும் அப்புதிய கட்சியில் இணைந்தனர். இப்புதிய கட்சியில் இணைந்தவரனைவரும் ஏறத்தாழ துறவர வாழ்க்கையில்தான் இருந்தனர். பின்னர் ‘மன்னிப்போம் மறப்போமென்ற’ கோட்பாட்டின்படி ஸ்தாபனக் காங்கிரஸ் கலைக்கப்பட்டு, காங்கிரஸ் பேரியியக்கம் தொடர்ந்தது.

இந்திய நாடாளுமன்றத்தில் பெருந்ததலைவர் காமராஜருக்கு முழு உருவ வெண்கலச் சிலை வைத்து நன்றியறிதலைக் காட்டியுள்ளனர். “பாரத ரத்னா” என்ற உயரிய விருதும் வழங்கப்பட்டுள்ளது. மதுரையிலமைந்த பல்கலைகழகத்திற்குப் பெருந்தலைவர் காமராஜரின் பெயரைச் சூட்டி “கல்விக்கண் திறந்தவர்” எனும் புகழை உலகுக்குப் பறை சாற்றியுள்ளனர். இவரது காலத்தில்தான் ‘விருதுபட்டி, விருதுநகராகியது’ அங்கு அவர் பிறந்த வீடு தற்போது நினைவுச் சின்னமாக்கப்பட்டுள்ளது. சென்னையில் அவர் வாழ்ந்த வீடும் நினைவு இல்லமாகப் பராமரிக்கப்பட்டு வருகிறது. இவரது நினைவைப் போற்றும் வகையில் சென்னை மெரினா கடற்கரைச்சாலை “காமராஜர் சாலை” எனப் பெயர் மாற்றம் பெற்றுள்ளது. சென்னை தேனாம் பேட்டையில் ‘காமராஜர் அரங்கம்’ அமைக்கப்பட்டுள்ளது. இவரது பிறந்த நாளான ஜூலை 15ம் நாள் கல்வி வளர்ச்சி நாளாகக் கொண்டாடப்படுகிறது.

நம் தேசப்பிதா காந்தி அடிகளின்பால் அளவற்ற அன்பும் பாசமும் கொண்ட கர்ம வீரர் காமராஜர் காந்தி பிறந்த நாளான 1975 அக்டோபர் 2ம் நாளில் இப்பூவுலகைத் துறந்து நினைவுலகில் நிலைத்தார்.

July 22, 2015
கூட்டாஞ்சோறு

-ராகவபிரியன்

வயல் தலையின்
வகிடு வரப்பின்மேல்
சீப்பாய் ஊர்ந்தனர் குழந்தைகள்!

மதகு மடிமீது
தலைவைத்துப் படுத்திருந்தது நிழல்
காலடி கேட்டு
ஓடி ஒளியும் அணிலாய்
நிழலோடிக் குவிந்தனர் குழந்தைகள்!

சுள்ளி அடுப்பின்மேல்
சுகமாய் அமர்ந்து
தாளமிட்டவாறே தயாரானது
கூட்டாஞ்சோறு!

உப்பிலிமாட்டான் கோவில்
வேல்மேல் குத்திய எலுமிச்சைச் சாறாய்
எல்லோர் முகத்திலும் ஆவல் வடிந்தது

முதல் கவளம்…காகத்திற்கு!

இந்தக் கோடையிலும்
அந்தக் கூட்டாஞ்சோறு
இன்னும் ஆறவேயில்லை!

July 22, 2015
சிகப்பு உறை!

-ராகவபிரியன்

நெருப்பைக் கவ்வியிருந்த
சாம்பல் போர்வையைக்
கேட்டு வாங்கித்
தன்னை மூடிக்கொண்டது
காவிரிக் கரையோரப் புதர்…

தூக்கியெறியப்பட்ட
தெருநாய் சவம் மொய்த்த ஈக்களும்
பெயர் அறியாச் செடிகளும்
சில பூச்சிகளும்
மொய்த்துக்கொண்டிருந்தன புதரில்…

இடிந்த வகுப்பறையின்
கரும்பலகையாய்
ஊசலாடிக்கொண்டிருந்தது நிசப்தம்…

குழந்தை இடுப்பில்
சுற்றியிருக்கும்
அரைஞ்ஞாண் கயிறாய்
ஓரத்தில் ஓடிக்கொண்டிருந்தது காவிரி

புதரில் அமர்ந்து
சுமந்து வந்திருந்த
பெண் குழந்தையையும்
ஊறுகாய்ப் பொட்டலத்தையும்
நகத்தால் கிழித்தான்
மது முகமூடி அணிந்திருந்த அவன்!

நிசப்தக் கரும்பலகையின் மேல்
ஊறுகாயும் உயிரும்
திமிரிக்குதித்து அப்பிக்கொண்டன சிவப்பாய்…

சுவைத்து வீசிய
சிசுவின் சவம் மூடிய
சருகு உறைமீது
ஊறுகாய் ஒட்டியிருந்தது
தபால் தலையாய்…

ஈக்கள் மொய்க்கும்
உறையின் மேல்
அவமானம் அப்பியிருக்க
முகவரி தேடிக்கொண்டிருக்கிறது
முகம் சிதைந்த காவல் துறை!

July 22, 2015
வரம்

— மாதவன் ஸ்ரீரங்கம்.

மணியடித்ததும் பையைத்துக்கிக்கொண்டு சண்முகத்தைப் பார்த்தன பிள்ளைகள். அவன் கையிலிருந்த கடிகாரத்தை ஒருமுறை பார்த்துக்கொண்டான். புத்தகத்தை மூடிவைத்துவிட்டுத் தலையாட்ட சிட்டாகப் பறந்தார்கள் எல்லோரும். கடைசியாக தமிழரசியும் வந்து மேஜைமீதிருந்த அவள் புத்தகத்தை எடுத்துக்கொண்டு கிளம்பிய பின் சண்முகம் எழுந்திருக்காமல் உட்கார்ந்திருந்தான்.

வெளியே மழைவருவதற்கான அறிகுறிகள் தென்பட்டன. காற்று மைதானத்தின் மணற்புழுதியை வாரிக்கொண்டுவந்து வகுப்பில் போட்டுவிட்டுச் சென்றது. கரையான் அரித்திருந்த மர ஜன்னல்கள் தடுப்புக்கட்டையைத் தாண்டி ஆடிக்கொண்டிருந்தன.

பியூன் துரை வந்து ஹெட்மாஸ்டர் அழைப்பதாகக் கூற, தயக்கத்துடன் எழுந்துகொண்டான். வராந்தாவில் நடக்கையில் பீட்டி மாஸ்டர் செபாடியன் சிரித்தபடி கையசைத்தார். மைதானத்தில் இன்னும் சில பெரிய பையன்கள் ஃபுட் பால் விளையாடிக்கொண்டிருந்தார்கள். ஹெட்மாஸ்டர் அறையில் கற்பகம் டீச்சர் பேசிக்கொண்டிருந்தாள். இவன் மரியாதை நிமித்தம் கதவை சப்தம் செய்ய ஹெட்மாஸ்டர் “எஸ் கமின்” என்றார்.

சண்முகம் உள்ளே நுழைந்ததும் கற்பகம் எழுந்து கிளம்பிவிட்டாள். இவனைப்பார்த்து ஒரு வருத்தத்துடன்கூடிய புன்னகையை அவள் வெளியிட்டதாகத் தோன்றியது தனது பிரமையாக இருக்குமோ என யோசித்தான். ஹெட்மாஸ்டர் ராமகண்ணப்பன் இவனை உட்காரச்சொல்லிவிட்டு ஜன்னலுக்கு வெளியே நின்ற அசோகமரங்களை வேடிக்கை பார்க்கத்துவங்கினார். அவர் எதைப்பற்றி பேசப்போகிறார் என்று ஊகிக்கமுடிந்தது.

“சொல்லுங்க சார்” என்று சண்முகமே பேச்சைத் தொடங்கினான்.

அவர் தனது விரல்நகங்களை ஆராய்ந்தபடி கேட்டார்.

“எதாச்சும் வெவரம் தெரிஞ்சிச்சா சண்முகம்?”

அவன் எதிர்கொள்ளவே விரும்பாத கேள்வி அது. பலருக்கும் பதில்கூறிச் சலித்துவிட்ட கேள்வி. கடந்த ஒருமாதமாக செல்லுமிடமெங்கும் சண்முகத்தை விடாமல் துரத்திவரும் கேள்வி. பள்ளிக்குக்கூட பலநாள் விடுப்பெடுத்து வீட்டிற்குள்ளேயே முடக்கிவைத்த கேள்வி. அவனுக்கு மிகவும் அயர்ச்சியாயிருந்தது. ஆனால் பதில்கூறாமலிருக்கமுடியாது. கேலிக்காகவும் ஆர்வத்திலும் எழும் கேள்வியல்ல அது. ஹெட்மாஸ்டர் ராமகண்ணப்பன் சண்முகத்தின்மீது மிகுந்த அக்கறை கொண்ட மனிதர். நிச்சயம் மற்றவர்களைப்போல அவரை தவிர்த்துவிடமுடியாது.

” விசாரிச்சவரைக்கும் மதுரையில இருக்கிறதாச் சொல்றாங்க சார்”

“பொறவு என்ன ? நேருல போயி நாலு நல்லவார்த்தை சொல்லிக் கூட்டியாந்திர வேண்டியதான சண்முகம்?”

எத்தனை சுலபமான தீர்வு ? யதார்த்தத்தில் அது சாத்தியமா என்ன ? என்றென்றைக்குமாய் வேண்டவே வேண்டாமென்று தூக்கிப்போட்டுவிட்டுச் சென்றவளை நேரில் சென்று வா என்றால் வந்துவிடுவாளா என்ன ?

” இல்ல சார். நேத்து அவ தங்கச்சி வந்திருந்திச்சி. எம்முன்னாடிதான் ஃபோன்ல பேசிச்சு. ஒரே முடிவா வரமாட்டன்னு சொல்லிருக்காப்ள”

ஹெட்மாஸ்டர் அவனை தர்மசங்கடமாகப் பார்த்தார். கடைசியில் அதுமட்டும்தான் எல்லோராலும் சாத்தியம். ஊருலகமே அப்படித்தான் பார்த்துக்கொண்டிருக்கின்றது. அய்யோ பாவம் என்று அவர்கள் உச்சுக்கொட்டும் சப்தம்தான் கேட்கவில்லை. நிஜத்தில் இந்த அனுதாபங்கள் தான் அவனை அதிகம் இம்சிக்கின்றன.

” எனக்கு என்ன சொல்றதுன்னே தெரியல சண்முகம். நீ ரெம்ப நல்ல மனுசன். ஒனக்கு இது நடந்துருக்கவேணாம்”

அவன் பதிலேதும் கூறாமல் அமைதியாக இருந்தான். துரை கதைவைத் தட்டிவிட்டு உள்ளே வந்தான். கையிலிருந்த சாவிக்கொத்துகளை ஹெட்மாஸ்டர் டேபிள்மேல் வைத்துவிட்டு கிளம்புவதற்கான அவர் அனுமதிக்காக காத்திருந்தான். அவர் அவனிடம் வழக்கமான விசாரிப்புகள் முடித்துவிட்டு அனுப்பினார். அவன் சென்றபின் மறுபடி கேட்டார்,

” அவங்க அப்பாம்மா என்ன சொல்றாங்க?”

” அவங்க என்னத்தை சொல்லுவாங்க. வரப்ப போறப்ப எல்லாம் ஓன்னு அழுவையும் ஒப்பாரியுந்தான்”

“சாப்பாடு போக்குவரத்தெல்லாம் ?”

” நானாத்தான் செஞ்சுக்கிறேன் சார்”

வெளியே மெலிதான மழை தூறத்தொடங்கியது. ஹெட்மாஸ்டருக்கு பின்புறமிருந்த ஜன்னலின்வழி சாரல் அறைக்குள் புகுந்தது. சற்றுநேரத்திற்கெல்லாம் பீட்டி மாஸ்டர் சில பையன்களுடன் வந்தார். பையன்கள் கையிலிருந்த ஃபுட் பாலை உள்ளறைக்குள் கொண்டுபோய் வைத்துவிட்டு ஓசையின்றிக் கிளம்பினார்கள். இவர்கள் பர்சனலாக பேசிக்கொண்டிருப்பதை குறிப்பாலுணர்ந்தபடி பீட்டி மாஸ்டரும் ராமகண்ணப்பனிடம் தலையாட்டிவிட்டு வெளியேறினார்.

“மதுரைல நமக்கு வேண்டப்பட்டவங்க இருக்காங்க சண்முகம். எதாச்சும் ஒத்தாசை வேணும்னா தயங்காம சொல்லு”

“தேவைப்பட்டா அவசியம் சொல்றேன் சார்” என்றபடி சண்முகம் எழுந்துகொண்டான்.

” நா கெளம்பறேன் சார்”

“சரி சண்முகம். நா அப்பறமா வீட்டுப்பக்கம் வரேன்” என்று விடைகொடுத்தார்.

லேசாக தலையில் கைவைத்து மழைக்கு மறைத்தபடி கேட்டை கடந்தபோது, அருகாமை பஸ்டாப்பில் பீடி புகைத்துக்கொண்டிருந்த துரை தனது முதுகையே உற்றுப்பார்த்ததுபோலிருந்தது.

ஒரு பெண் தனது புருஷனை விட்டுவிட்டு வேறொருவனுடன் ஓடிவிடுவது அந்த புருஷனுக்கு உண்மையிலேயே பெருத்த அவமானம்தான்போல என்று நினைத்துக்கொண்டான்.

வீடு அதிக தூரமில்லை. பள்ளியிலிருந்து பத்துநிமிட நடையில் சேர்ந்துவிடலாம். சண்முகம் பிரதான சாலையைத் தவிர்த்து ரைஸ்மில்லை ஒட்டிய சிறிய சந்தில் நுழைந்து நடந்தான். பிரதான சாலையில் கடைவீதியைக் கடந்து செல்லவேண்டியிருக்கும். சிறிய ஊரின் மிகச்சிறிய கடைத்தெரு என்பதால் எல்லோருக்குமே சண்முகத்தை தெரிந்திருக்கும்.

எத்தனை யோசித்தும் அவனால் காரணத்தை கண்டுபிடிக்கவே முடியவில்லை. சண்முகத்தின் குடும்பம் மதுரைக்கு அருகே இருக்கிறது. இந்த ஊரில் வாத்தியார் வேலை கிடைத்ததும் வரவேண்டியதாயிற்று. அப்பா ஊர் நாட்டாமை. மேலிடங்களில் மாற்றலுக்கு பேசிப்பார்த்தார். ஒன்றும் நிகழவில்லை. அம்மாவிற்கு உடல்நிலை அத்தனை சிலாக்கியமில்லை என்பதால் சண்முகம் இங்கே தனியாகவே இருக்கவேண்டியதாயிற்று.

இங்கு வேலைக்கு வந்தபின் சாப்பாடுதான் பெரிய பிரச்சனையாக இருந்தது ஆரம்பத்தில். அதற்காகவே அவனுக்குத் திருமணம் செய்வதென்று முடிவெடுத்தார்கள் வீட்டில். முயற்சியில் இறங்கியபோதுதான் தெரிந்தது பெண் கிடைப்பதன் சிரமங்கள். செய்தித்தாள்கள் மூலமும், புரோக்கர்கள் மூலமும் நிறைய அலைந்து, இறுதியாக தூரத்து உறவினர் மூலம் அருப்புக்கோட்டையிலிருந்து ஜாதகம் வந்தது.

குடும்பத்துடன் சென்று பார்த்து, பஜ்ஜி பலகாரங்கள் தின்றுவிட்டு பத்து சவரனுக்கு ஒப்புக்கொண்டு நிச்சயம் செய்தார்கள். செல்வியுடன் தனியாக சிலநிமிடங்கள் பேசியபோது அவளுக்கும் சம்மதம் என்பதாகத்தான் கூறினாள். காதல் கீதல் எதிலும் விருப்பமில்லை என்றாள். சண்முகத்தின் வேலைபற்றி, பள்ளியிருக்கும் ஊர்பற்றியெல்லாம் நிறைய ஆர்வத்துடன் கேட்டு தெரிந்துகொண்டாள். திருமணம் பற்றிய எவ்விதக் கனவுகளும் சண்முகத்துக்கு இருந்ததில்லை.

ரைஸ் மில் கனத்த மவுனத்துடன் நின்றிருந்தது. பவர் கட்டாக இருக்குமென்று நினைத்துக்கொண்டான். வீடிருக்கும் தெருவில் ஒரு காலிமனை நிறைய எருக்கஞ்செடிகள் வளர்ந்திருந்தன. செல்விக்கு எருக்கஞ்செடியென்றாள் நிரம்பப்பிடிக்கும். அதன் மொட்டுக்களை பட்பட்டென்று உடைத்து குழந்தைபோல குதூகலிப்பாள். அவளுடன் வாழ்ந்தது மூன்றுமாதங்கள்தான் என்றாலும் அசைபோட ஆயிரம் விஷயங்கள் எஞ்சிக்கிடப்பது அவனுக்கே ஆச்சரியமாகத்தான் இருந்தது.

மழை பெரிய துளிகளுடன் படார் படாரென்று முகத்திலைறையும்போது அவன் வீட்டுத்திண்ணையில் ஏறி நின்றுகொண்டான். பூட்டைத்திறந்து வீட்டிற்குள் நுழையவே விருப்பமில்லை அவனுக்கு. பாக்கெட்டில் கைநுழைத்து வீட்டுச்சாவியை எடுத்தான். சிலசமயம் சாவியை மறந்து பள்ளி மேஜை டிராயரிலேயே வைத்துவிட்டு வந்துவிடுவான். நல்லவேளையாக இன்று மறக்கவில்லை.

சலிப்புடன் வீட்டிற்குள் செல்ல வெறுமை வரவேற்றது. வீட்டின் நடுவே செல்வியின் புடவை கொடியில் ஆடிக்கொண்டிருந்தது. திருமணமாகி வந்தபின் அவன் செல்விக்கு வாங்கித்தந்த முதல் புடவை அது. அதை நகர்த்தாமல் குனிந்து உள்ளே சென்றான். சமையல் மேடையில் காலை சமைத்த பாத்திரங்கள் கழுவாமலிருந்தன. ஒரு பால் பாத்திரத்தையும் தம்ளரையும் மட்டும் கழுவினான். பிரிட்ஜைத் திறந்து பால் பாக்கெட்டை உடைத்து தேநீர் தயாரித்துக்கொண்டான்.

செல்வி பிரமாதமாக சமைப்பாள். அவள் போடும் தேநீரின் ருசி குடித்து அரைமணியாகியும் நாக்கைவிட்டு அகலாது. தேநீருடன் வந்து திண்ணையில் உட்கார்ந்து மழையை கவனித்தான். மழைநீர் அவன் கால்களை நனைத்ததை சட்டைசெய்யாமலிருந்தான்.

மூன்றுமாதத்தில் ஒரு சண்டையில்லை, சங்கடங்கள் இல்லை. அவள் முகம் வாடியதுகூட இல்லை. மாலையானால் பஸ்ஸேறி டவுனுக்குச்சென்று ஊர்சுற்றிவிட்டு ஏதேனும் ஓட்டலில் சாப்பிட்டுவிட்டு வருவார்கள். அவளுக்கு சண்முகத்தை பிடிக்காமல் போவதற்கான எவ்வித முகாந்திரங்களும் தெரியவேயில்லை. தாம்பத்ய உறவும்கூட பிரச்சனைகளின்றி சரியாகவே இருந்தது. அவளுடைய திருப்தியைக் கேட்காமல் முடித்துக்கொண்டதேயில்லை அவன் முயக்கங்களை.

செல்போன் ஒலித்தது. செல்வியின் அம்மாதான். இப்போதெல்லாம் இது வாடிக்கையாகிவிட்டது. பள்ளிவிட்டு வரும் நேரத்தில் சரியாக போன் செய்து விசாரிக்கிறாள். சண்முகம் அழைப்பை எடுக்கவில்லை. எடுத்தால் அழுவாள். மன்னிப்புக் கேட்பாள். யார் செய்த பிழைக்கு யார் மன்னிப்புக்கேட்பது ? உண்மையில் சண்முகத்திற்கு உள்ளுக்குள் ஏதோ அறுந்துவிட்டது. வாழ்வு பற்றிய அபிப்பிராயங்கள் அர்த்தங்கள் அனைத்துமே குழப்பமாகத் தோன்றின. எவ்வித கெட்ட பழக்கங்களுமில்லாத ஒருத்தனை ஏன் ஒரு பெண் விட்டுச்செல்கிறாள் ?

சண்முகத்தின் அப்பாதான் இடிந்துபோய்விட்டார். வரன் பார்த்துக்கொடுத்த உறவினருடன் சண்டையிட்டு முறித்துக்கொண்டார். ஊரோடு வந்துவிடும்படி வற்புறுத்திக்கொண்டிருந்தார். அம்மா வேறு பெண் பார்க்கிறேன் என்று கிளம்பினாள். சண்முகம் மறுத்துவிட்டான். சமீபமாக செய்தித்தாள்களின் மணமக்கள் தேவை விளம்பரங்கள் பார்க்கும்போதெல்லாம், மார்க்கெட்டில் தனக்கான விலை குறைந்திருப்பதை புரிந்துகொண்டான். மறுபடி ஒரு திருமணம் பற்றி யோசிக்கவே முடியவில்லை அவனால்.

மழை விட்டு விட்டு பெய்துகொண்டேயிருந்தது. உள்ளே சென்று பாத்திரங்களைக் கழுவிவைத்தான். அழுக்குத்துணிகளை ஒரு ஓரமாக குவித்து வைத்தான். இரவு உணவுக்கு ஏதாவது செய்யலாமா என்று யோசித்து, பிறகு சலிப்புடன் ஓட்டலில் பார்த்துக்கொள்ளலாம் என்று விட்டுவிட்டான். உடைமாற்றிக்கொண்டு வீட்டைப்பூட்டிவிட்டு குடையுடன் வெளியேறினான். டவுனுக்குச் சென்று ஏதேனும் ஒரு தியேட்டருக்குப்போய் சினிமா பார்த்துவிட்டு அப்படியே சாப்பிட்டுவிட்டு வரலாமென்று முடிவு செய்தான்.

சினிமா பார்க்கும் மனநிலை இல்லைதான். ஆனால் வீட்டிலிருந்தால் மனம் யோசித்தே மாய்ந்துபோகும். எல்லாமே கனவாக இருந்தால் எத்தனை நன்றாக இருக்குமென்று நினைத்துப்பார்த்தான். எல்லாம்விட, கடைசிவரை அவள் தன்னை விட்டுச்சென்றதன் காரணம் தெரியாததுதான் அதிகம் வதைத்தது. இம்முறை ரைஸ்மில்லைக் கடக்கும்போது கடகடகடவென இரைந்துகொண்டிருந்தது. கரண்ட் வந்திருக்கவேண்டும்.

பிரதான சாலைக்கு வந்து நகரத்துவங்கிய டவுன் பஸ் ஒன்றை நிறுத்தி ஏறிக்கொண்டான். பேருந்தில் கூட்டமில்லை. மூடியிருந்த ஜன்னலை திறக்க மழை சண்முகத்தை நனைத்தது.

July 20, 2015
சுற்றுச்சூழல் ஆளுகையை கட்டமைக்க

–து. சிவக்குமார்.

இன்றைய உலகில் நாம் சந்தித்து வரும் பெரும் பிரச்சனைகளில் மிகமுக்கியமான ஒன்று சுற்றுச்சூழல் பாதிப்பு. இந்தச் சுற்றுச்சூழல் பாதிப்பு என்பது எவ்வளவு மோசமான விளைவுகளைத் தந்துகொண்டிருக்கின்றது என்பது பற்றி நாம் அன்றாடம் ஊடகங்கள் வாயிலாகவும் பத்திரிக்கைகள் மூலமும் தெரிந்துகொண்டிருக்கிறோம். மேலும் பல நிகழ்வுகள் இந்தச் சுற்றுச்சூழல் பாதிப்பையும், இயற்கை பேரழிவையும் நம் கண்முன்னே கொண்டுவந்து நிறுத்துகின்றன. இந்தப் பாதிப்பிற்கும், பேரழிவிற்கும் யார் காரணம் என்று பார்த்தோமேயானால் அதில் நிச்சயம் மனித குலத்தின் அபார வளர்ச்சி மற்றும் அதன் செயல்பாடுகள்தான் முக்கியப் பங்கு வகிக்கின்றன.

இந்தச் சுற்றுப்புறச்சூழல் மேம்பாடு குறித்து பல்வேறு நாடுகள் பல்வேறு திட்டங்களை நடைமுறைப்படுத்தியும், செயல்படுத்தியும் வருகின்றன. இயற்கைப் பேரிடர், பருவநிலை மாற்றம், பசுமை இல்ல வாயுக்கள் போன்ற பிரச்சனைகள் இன்று பெரும் சவாலாக உள்ளது. வேகமான வளர்ச்சி நடவடிக்கைகள், தொழில்நுட்ப வளர்ச்சி, தொழிற்சாலைகளின் அதீத வளர்ச்சி மற்றும் செயல்பாடுகள், அதன் தாக்கம் ஆகியவை இந்தச் சுற்றுச்சூழலிலும் எதிரொலிக்கத் தொடங்கியது. மேலும் உலகமயமாதல் மற்றும் நவீனமயமாக்கல் என்ற கொள்கைகளினால் இன்று சுற்றுச்சூழல் பாதிப்பு என்பது தீவிரமடைந்து அதன் உச்சத்தை தொட்டுக்கொண்டிருக்கிறது. சுற்றுச்சூழல் சீர்கேடு என்பது மனிதர்கள் தொடர்பான ஒன்றல்ல மாறாக உலகில் இருக்கும் அனைத்து உயிரினங்களுக்கும் தொடர்பானதும் கூட. இந்த மாற்றங்கள் என்பது மனிதர்களையும் அவர்களின் சமூக வளர்ச்சிக்கும் பெரும் பாதிப்பை உண்டாக்கும். தொழிற்சாலைகள் மூலம் அதிகரித்து வரும் கார்பன்-டை-ஆக்ஸைடு உள்ளிட்ட பசுமை இல்ல வாயுக்களின் வெளியேற்றம் காரணமாக நம் நாட்டில் வெள்ளம், வறட்சி ஆகியவை தொடர்ந்து ஏற்படுகின்றன. காடுகள் அழிப்பு உள்ளிட்டவற்றாலேற்படும் சூழியல் மாற்றங்கள் இந்தியாவிற்கு பெரும் சவால்களை ஏற்படுத்தி வருகின்றன. இதற்கு இந்திய அரசும் உலகளவில் ஐ. நா-வும் பல்வேறு திட்டங்களை நடைமுறைப்படுத்தி வருகின்றன.

ஒரு புதிய சுற்றுச்சூழல் ஆளுகையை கட்டமைக்க இந்தியாவும் இன்ன பிற நாடுகளும் உலகளவில் ஒன்றிணைந்து பல்வேறு சுற்றுச்சூழல் பாதுகாப்பு தொடர்பான சட்டங்களையும், திட்டங்களையும் இயற்றி நடைமுறைப்படுத்தி வருகின்றன. இருப்பினும் இயற்கைப் பாதுகாப்பு தொடர்பான சட்டங்களை இயற்றுவதிலும் அதனை நடைமுறைப்படுத்துவதிலும் அரசுக்கு ஒரு தெளிவற்ற பார்வையும், ஒரு குழப்பமான நிலையும் உள்ளன. இந்தியாவில் மத்திய மாநில அரசுகள் இந்தச் சுற்றுச்சூழல் பாதுகாப்பில் போதுமான அக்கறை செலுத்துவதில்லை மாறாக அது வளர்ச்சித் திட்டங்கள் என்ற பெயரில் காடுகளை அழிப்பது, ஆறுகளின் போக்குகளை மாற்றி அமைப்பது போன்ற செயல்களில் ஈடுபட்டு இயற்கையைப் பாதுகாப்பதற்குப் பதில், இயற்கைச் சுரண்டலுக்கு வித்திடுகிறது. இந்தச் சூழலில் ஒரு நிலையான, பாதுகாப்பான ஒரு புதிய சுற்றுச்சூழல் ஆளுகையை எப்படி கட்டமைக்க முடியும் என்பது பற்றி இந்தக் கட்டுரையில் விளக்கப்பட்டுள்ளது.

பருவ நிலை மாற்றம் – ஒரு பார்வை
இன்று சுற்றுச்சூழல் பாதிப்பு மற்றும் இயற்கைப் பேரழிவு என்பது புவி வெப்பம் அதிகரிப்பு, வறட்சி, அதிக மழைப்பொழிவு, பசி பட்டினி, பொருளாதாரச் சீர்குலைவு போன்றவற்றால் ஏற்படுகின்றன. மேலும் மின்சாராம், தண்ணீர் பற்றாக்குறை, இயற்கைச் சீற்றம் போன்றவையும் ஏற்படுகின்றது. இதற்கெல்லாம் காரணம் இந்தப் பருவநிலை மாறுபாடு. இந்தப் பருவ நிலை மாற்றங்களால் விவசாயம், மக்களின் ஆரோக்கியம், இயற்கை அமைப்பு, தண்ணீர் விநியோகம் மற்றும் மக்களின் வாழ்வாதாரங்கள் பெரிதும் பாதிக்கப்படுகின்றன. மேலும் எண்ணற்ற தாவர இனங்கள், விலங்கினங்கள் இந்தப் பருவ நிலை மாற்றத்தால் பாதிப்பிற்கு உள்ளாகி வருகின்றன. இந்த மாற்றத்தின் வெளிப்பாடாக வறட்சி, வறுமை, தண்ணீர் தட்டுப்பாடு, விவசாயம் போன்றவை பெரிதும் பாதிக்கப்படுகின்றன.

அதுமட்டுமின்றி ஆறுகளில் கடுமையான நீர்த்தட்டுப்பாடு உண்டாகின்றன. இதனால் நதிநீர் பங்கீடு தொடர்பான பிரச்சனைகளில் அண்டை நாடுகளுடனும், அண்டை மாநிலங்களுடனும் சண்டையிட்டு நீர் பெறும் ஒரு சூழல் இன்று நம் நாட்டில் நிலவுகிறது. மேலும் இந்தப் பருவநிலை மாற்றத்தால் வெப்பம் அதிகரித்து கடல் மட்டம் உயருகின்றது. இதனால் கடற்கரை ஒட்டிய விவசாயப் பகுதிகளில் கடல் தண்ணீர் புகுந்து அந்த நிலம் விவசாயத்திற்கு பயனற்றதாக மாறிவிடுகிறது. கடல்மட்ட பாதிப்பினால் பாதிக்கப்படும் 27 நாடுகளில் இந்தியாவும் ஒரு நாடு என்று சர்வதேச சுற்றுச்சூழல் ஆய்வறிக்கை தெரிவிக்கிறது. மேலும் அதிகப்படியான பசுமை இல்ல வாயுக்களின் விளைவாக வளிமண்டலத்தில் அதிகமான கார்பன்-டை-ஆக்ஸைடு நிறைந்து புவியை சூடாக மாற்றி வருகிறது.

இன்று வளிமண்டலத்தில் அதிகப்படியான கார்பன்-டை-ஆக்ஸைடை வெளியிடுவது அமெரிக்க மற்றும் ஐரோப்பிய கண்டங்களால்தான். சுமார் 75 சதவிகித அளவில் இவ்விரு கண்டங்களும் கார்பன்-டை-ஆக்ஸைடை வெளியிடுகின்றன. இந்தச் சூழலில் இந்தியாவும் அதிகமான கார்பன்-டை-ஆக்ஸைடு வாயுவை வெளியிடுகின்றன. இதனால் காற்று மாசுபாடு அடைந்து பல்வேறு நோய்கள் பரவுகின்றன. உலகசுகாதார அமைப்பின் ஆய்வு அறிக்கையின்படி இந்தியாவில் சுமார் 5 இலட்சம்பேர் இந்தக் காற்று மாசுபாட்டினால் பாதிப்படைகின்றனர் என்று தகவல் அறிக்கை தெரிவிக்கிறது. மேலும் இந்தக் காற்றுக் காற்று மாசுபாட்டினால் நீர் மாசுபாடு அடைகின்றது. இந்தியாவில் நீர் மாசுபாட்டால் 21 விதமான தொற்றுநோய்கள் பரவுகின்றன. இதனால் ஆண்டுக்கு சுமார் 1000 பேர் இந்த நீர் மாசுபாட்டால் இறக்கின்றனர் என்று உலகசுகாதார ஆய்வறிக்கை தெரிவிக்கிறது. இதற்கு முக்கியக் காரணம் தொழிற்சாலைகளிலிருந்து வெளியேறும் நச்சுப்புகை மற்றும் அதிகமான போக்குவரத்துப் பயன்பாடும்தான். இந்தியாவில் சுமார் 1.5 மில்லியன் மக்கள் கரியமில வாயுவை வெளியிடும் வாகனங்களைப் பயன்படுத்துவதாக ஒரு ஆய்வு அறிக்கை கூறுகிறது.

சமீபத்தில் வெளியான தேசியக் காற்றுத் தர நிர்ணய குறியீட்டில் காற்று மாசு அதிகம் உள்ள நகரங்களில் டெல்லி முதலிடமும், கான்பூர் மற்றும் சென்னை ஆகிய நகரங்கள் காற்று மாசு அதிகம் உள்ள முதல் பத்து நகரங்களில் இடம் பெற்றுள்ளன. கடந்த ஆண்டு உலக சுகாதார ஆய்வு நிறுவனம் வெளியிட்ட அறிக்கையில் உலக அளவில் மொத்தம் 20 நகரங்கள் மிகவும் காற்று மாசுபட்ட நகரங்களாக அறிவிக்கப்பட்டன. இதில் உள்ள 20 நகரங்களில் 13 நகரங்கள் இந்திய நகரங்களாகும். மேலும் கடந்த ஆண்டு வெளியிட்ட சுற்றுச்சூழல் மேம்பாட்டு குறியீட்டில் 174-ஆவது நாடாக இந்தியா இடம் பெற்றுள்ளது. மொத்தம் கணக்கில் எடுத்துக்கொள்ளப்பட்ட நாடுகள் 178. இதில் இந்தியா இடம்பெற்றிருக்கும் இடத்தை பார்க்கும்பொழுது சுற்றுச்சூழல் பாதுகாப்பு மற்றும் மேம்பாட்டில் எவ்வளவு மோசமான இடத்தை நாம் பெற்றுள்ளோம் என்பதை நாம் எண்ணிப் பார்க்க வேண்டும். இதற்கு மத்திய மாநில அரசுகள் தகுந்த நடவடிக்கை எடுக்க இயலாமலும், போதுமான நெறிமுறைகளை வகுக்க முடியாமலும் சுற்றுச்சூழலைப் பாதுகாக்க வேண்டிய சூழ்நிலை இன்று நிலவுகிறது.

அதேபோல் விவசாயம் என்பது இந்தப் பருவநிலை மாறுபாட்டால் முற்றிலும் அழியும் அபாயம் ஏற்பட்டுள்ளது. பருவமழை பொய்த்து காலநிலை மாற்றத்தால் போதுமான அளவு விவசாய உற்பத்தி செய்ய முடியாத சூழ்நிலை இன்று உருவாகி உள்ளது. தெற்காசிய நாடுகளில் 4 முதல் 10 சதவிகித அளவில் விவசாய உற்பத்தி இந்த ஆண்டுக்குள் குறைந்துவிடும் என்று உலக உணவு மற்றும் விவசாய அமைப்பின் ஆய்வறிக்கை தெரிவிக்கின்றது. விவசாய உற்பத்தி குறைந்தால் வறுமை ஏற்படும் அபாயம் இன்று நிலவுகிறது. இந்த வறுமையின் காரணமாக ஆண்டுதோறும் 5.6 மில்லியன் குழந்தைகள் இந்தியாவில் இறக்கின்றன. மேலும் இந்த வறுமையின் காரணமாக ஊட்டச்சத்து குறைபாடு ஏற்படுகின்றது. உலக நாடுகளுடன் ஒப்பிடுகையில் குறைந்த உடல் எடையுடன் குழந்தைகள் இந்தியாவில்தான் அதிகம் பிறக்கின்றன.

கடந்த 1971 மற்றும் 2004 ஆகிய இடைப்பட்ட ஆண்டுகளில் வெப்பநிலை உயர்வால் பனிமலை உருகி இமயமலை மற்றும் அதனைச் சுற்றியுள்ள 50 கோடி மக்கள் தங்கள் வாழ்வாதாரத்தை இழந்துள்ளனர். கடந்த 35 ஆண்டுகளில் கங்கோத்ரி பனிமலை உருகி சுமார் 17 மீட்டர் வரை கடல்மட்டம் உயர்ந்துள்ளது. இந்தப் பேரழிவின் விளைவுதான் உத்தரகாண்டின் கோரத்தாண்டவம். இந்தப் பருவநிலை மாற்றத்தால், வானிலை மாற்றம், அதிக மழைப்பொழிவு, கடுமையான வறட்சி போன்றவை மத்திய இந்தியாவிலும் அதனை ஒட்டியுள்ள நகரங்களிலும் கடந்த பத்தாண்டுகளில் பன்மடங்கு உயர்ந்துள்ளது. 2009-ஆம் ஆண்டு நிகழ்ந்த அதிகமான வெள்ளப்பெருக்கால் ஆந்திராவும் கர்நாடகமும் பெரிதும் பாதிக்கப்பட்டன. இந்தப் பேரழிவிற்கு சுமார் 2 மில்லியன் மக்கள் குடிநீர் தட்டுப்பாட்டாலும், உணவு தட்டுப்பாட்டாலும் பாதிக்கப்பட்டிருக்கிறார்கள். 2005-ஆம் ஆண்டு மும்பையில் பெய்த கனமழைதான் இந்தியாவில் ஒரே நாளில் பெய்த அதிக கனமழையாகும். 24 மணி நேரத்தில் சுமார் 994 மி.மீ மழை மும்பையில் பதிவானது. இப்படி கடுமையான வறட்சி மற்றும் அதிக மழைப்பொழிவு போன்றவற்றிற்காக இந்திய அரசு ஆண்டுதோறும் ரூ. 800 கோடி வறட்சி நிவாரணமாக செலவழிக்கின்றது. மேலும் சுமார் 350 மில்லியன் இந்தியர்கள் வறட்சியால் கடந்த பத்தாண்டுகளில் அதிகம் பாதிக்கப்பட்டுள்ளனர். 18 மாநிலங்களில் 300 பில்லியன் மக்கள் தங்கள் வாழ்வாதாரத்தை இழந்துள்ளனர் இந்தக் கடுமையான வறட்சி மற்றும் அதிக மழைப்பொழிவால்.

இப்படி பல்வேறு நிலைகளில் சுற்றுப்புறச் சூழல் பாதிப்பு காரணமாக நாம் இயற்கை வளத்தை இழந்து வருகிறோம். இந்தச் சூழலில் சுற்றுச்சூழல் பாதுகாப்பை உறுதி செய்ய மத்திய மாநில அரசுகளின் திட்டங்கள் மற்றும் அதன் செயல்பாடுகளினால் சுற்றுச்சூழல் மேம்பாடு அடைந்திருக்கிறதா, அதன் மூலம் மக்களின் வாழ்வாதாரம் சிறப்படைந்திருக்கின்றதா என்றால் அது கேள்விக்குறிதான். இந்தச் சூழலில் மத்திய மாநில அரசுகள் சுற்றுச்சூழல் பாதுகாப்பை உறுதிப்படுத்த அதன் நிர்வாகத்திலும், ஆளுகையிலும் மாற்றம் கொண்டுவர வேண்டும். அதன்மூலம் ஒரு சிறந்த சுற்றுச்சூழல் ஆளுகையை இந்தியாவில் கட்டமைக்க முடியும்.

உள்ளாட்சி அமைப்புகளின் பங்கு
உள்ளாட்சி அமைப்புக்கள் சுற்றுச்சூழல் ஆளுகையிலும், அதன் பாதுகாப்பை உறுதி செய்வதிலும் முக்கிய பங்கு வகிக்கின்றன. 73-ஆவது மற்றும் 74-ஆவது சட்டத்திருத்தம் பஞ்சாயத்து அமைப்புக்களை வலுப்படுத்தவும் அதனுடைய பங்கேற்பை உறுதிப்படுத்தவும் வழிவகை செய்கிறது. ஆனால் இந்த உள்ளாட்சி அமைப்புக்களுக்கு சுற்றுச்சூழல் பாதுகாப்பை உறுதிசெய்வதற்கு ஏதேனும் பணிகள் ஒதுக்கப்பட்டுள்ளனவா அல்லது ஏதேனும் அதிகாரங்கள் வழங்கப்பட்டுள்ளனவா என்று பார்த்தோமேயானால், சட்டத்திருத்தத்தில் நேரடியாக பஞ்சயாத்து அமைப்புக்கள் சுற்றுச்சூழல் ஆளுகையில் பங்கேற்காது அதனுடன் தொடர்புடைய செயல்பாடுகளில் ஈடுபட்டு சுற்றுச்சூழலைப் பாதுகாக்க உள்ளாட்சி அமைப்புகள் வழிவகை செய்கிறது. உதாரணமாக உள்ளாட்சி அமைப்புக்களுக்கு வழங்கப்பட்டுள்ள 29 பணிகளில் சமூக காடுகளைப் பராமரித்தல், பண்ணைக் காடுகளை உருவாக்குதல், திடக்கழிவுகளை மேலாண்மை செய்தல், நீர் நிலைப் பகுதிகளை மேலாண்மை செய்தல் போன்ற பணிகள் உள்ளாட்சி அமைப்புகளுக்கு வழங்கப்பட்டுள்ளன.

இந்தப் பணிகளின் மூலம் சுற்றுச்சூழல் பாதுகாப்பை உறுதி செய்வதிலும், அதன் நிர்வாகத்திலும், ஆளுகையிலும் உள்ளாட்சி அமைப்புக்கள் பங்கேற்க முடியும். மேலும் சுற்றுச்சூழல் பாதுகாப்பு என்பது மக்கள் பங்கேற்போடும், அவர்களின் ஒத்துழைப்போடும் கீழ்மட்டத்தில் இருந்து உருவாக வேண்டிய ஒரு பாதுகாப்பு இயக்கம். அந்தப் பாதுகாப்பு இயக்கம்தான் சிறந்த ஒரு சுற்றுச்சூழல் ஆளுகையை கட்டமைக்க வழிகோலும். சுற்றுச்சூழல் ஆளுகையை கட்டமைக்க மக்களோடு நேரடித் தொடர்பில் உள்ள உள்ளாட்சி அமைப்புக்கள் இதற்கு பெரிதும் உதவுகின்றன. மேலும் இந்த உள்ளாட்சி அமைப்புக்கள் பல்லுயிர் பெருக்கச் சட்டம், பேரிடர் மேலாண்மைச் சட்டம் ஆகியவற்றின் மூலம் சுற்றுச்சூழல் பாதுகாப்பில் உதவி செய்கின்றன. கேரளாவில் உள்ள உள்ளாட்சி அமைப்புக்கள் பல்லுயிர் பெருக்கச் சட்டத்தின் மூலம் அந்தந்தக் கிராமப் பஞ்சாயத்துக்களில் பல்லுயிர் பெருக்கப் பதிவேடுகளை பராமரித்து வருகின்றன. இதன் மூலம் தாவர இனங்களைக் கண்டறிந்து பாதுகாக்கவும், விலங்கினங்களைப் பாதுகாக்கவும், விவசாய மற்றும் தரிசு நிலங்களைப் பராமரித்துப் பயன்படுத்திடவும் இந்தப் பதிவேடுகளின் மூலம் உள்ளாட்சி அமைப்புக்கள் உதவுகின்றன. மேலும் பேரிடர் மற்றும் வெள்ள காலங்களில் நிவாரணங்களை வழங்கிட, துரிதமாக பேரிடர் நிவாரணப் பணிகளைச் செய்திட இந்த உள்ளாட்சி அமைப்புக்களுக்கு வழிவகை செய்யப்பட்டுள்ளது மாவட்டப் பேரிடர் மேலாண்மை ஆணையம் மூலம்.

மேலும் இந்த உள்ளாட்சி அமைப்புகள் சுற்றுச்சூழல் சார்ந்த முடிவுகளை எடுப்பதற்கு கிராம சபையின் மூலமும் அதிகாரம் வழங்கப்பட்டுள்ளன. மேற்குத்தொடர்ச்சி மலையின் சுற்றுச்சூழல் ஆய்வுக்காக மத்திய அரசு அமைத்த கஸ்தூரிரங்கன் குழு பரிந்துரை செய்ததுபோல் மத்திய மாநில அரசுகள் சுற்றுச்சூழல் அல்லது கனிமவள சம்பந்தமான முடிவுகளை எடுக்கும்போது அப்பகுதிகுட்பட்ட கிராம சபையின் ஒப்புதலோடு முடிவுகள் எடுக்கப்பட வேண்டும் என்று பரிந்துரை செய்துள்ளது. இப்பரிந்துரையின் மூலம் உள்ளாட்சி அமைப்புக்கள் மற்றும் கிராம சபையின் மூலம் ஒரு சிறந்த ஆளுகையை சுற்றுச்சூழல் பாதுகாப்பில் கட்டமைக்க நம்மால் முடியும் என்பது தெளிவாகிறது. எனவே நிலைத்த சுற்றுச்சூழல் ஆளுகையை கீழ்மட்ட அளவில் கட்டமைக்க உள்ளாட்சி அமைப்புக்கள் பெரிதும் உதவுகின்றன.

என்ன செய்யவேண்டும்?
சுற்றுச்சூழல் ஆளுகையை கட்டமைப்பதில் மத்திய மாநில மற்றும் உள்ளாட்சி அமைப்புகள் மட்டுமின்றி தன்னார்வத் தொண்டு நிறுவனங்கள், உயர்கல்வி நிறுவனங்கள், நிதி மற்றும் சமூக ஆணையங்கள், இளைஞர் நற்பணி மன்றங்கள் மற்றும் சமூக ஆர்வலர்கள் ஆகியோர் கிராம அளவிலும், மாவட்ட அளவிலும் மற்றும் மாநில அளவிலும் சுற்றுச்சூழல் ஆளுகையை கட்டமைக்க ஒன்றிணைந்து செயல்பட வேண்டும். மேலும் மக்களின் ஒத்துழைப்பும் அவர்களை முடிவெடுத்தலில் பங்கேற்க வைப்பதன் மூலமும் ஒரு மிகச் சிறந்த சுற்றுச்சூழல் ஆளுகையை தேசிய அளவில் நம்மால் கட்டமைக்க முடியும். சுற்றுச்சூழல் ஆர்வலர்கள் மற்றும் பசுமை நண்பர்கள் குழுவாக ஒன்றிணைந்து சுற்றுச்சூழல் பாதுகாப்பு தொடர்பான விழிப்புணர்வுப் பிரச்சாரங்களை மக்கள் மத்தியில் ஏற்படுத்த வேண்டும். சுற்றுச்சூழல் பாதுகாப்பு தொடர்பான விழிப்புணர்வுப் பயிற்சிப் பட்டறைகளை மாணவர்களுக்கும், சட்டமன்ற உறுப்பினர்களுக்கும், பாராளுமன்ற உறுப்பினர்களுக்கும், உள்ளாட்சி பிரதிநிதிகளுக்கும் அரசுத்துறைகள், தொண்டு நிறுவனங்கள் அல்லது உயர்கல்வி நிறுவனங்கள் மூலம் பயிற்சிகளை வழங்கிட அரசு முனைந்திட வேண்டும். இதன் மூலம் நிலைத்த நீடித்த சுற்றுச்சூழல் ஆளுகையை நம் இந்தியாவில் கட்டமைக்க முடியும். இதனால் எதிர்கால சந்ததியினர் வளமுடன் வாழ நாம் உதவ முடியும்.

உதவிய நூல்கள்:
க. பழனித்துரை, “அதிகாரப்பரவலின் அடிப்படைகள்”, இராஜீவ்காந்தி பஞ்சாயத்துராஜ் ஆராய்ச்சி இருக்கை, காந்திகிராம கிராமியப் பல்கலைக்கழகம், காந்திகிராமம், 2007.
க. பழனித்துரை, “பருவநிலைமாற்றமும் உள்ளாட்சியும்”, இராஜீவ்காந்தி பஞ்சாயத்துராஜ் ஆராய்ச்சி இருக்கை, காந்திகிராம கிராமியப் பல்கலைக்கழகம், காந்திகிராமம், 2007.

July 20, 2015
பயன்மிகு இணையவழிச் சேவைகள்

— எஸ். நித்தியலக்ஷ்மி.

கூகுளில் தேடல் நுட்பங்கள்

கூகுள் தேடல் சாதனம் மூலம் தேடுகையில், நீங்கள் தேடும் நோக்கத்திற்குத் தேவையில்லாத பல தகவல்கள் பட்டியலிடப் படுகின்றனவா? எப்படிப் பார்த்தாலும் தேடி அறிய விரும்பும் தகவல்கள் கிடைக்கவில்லையா? தேடலுடன் சில ஆப்பரேட்டர்களை இணைத்து தேடலுக்குச் சில வரையறைகளைத் தர கூகுள் இடம் அளிக்கிறது. அந்த வரையறைத் தேடல்களை எப்படி அமைப்பது என இங்கு பார்க்கலாம்.

கூகுள் தேடல்கள் :
1. குறிப்பிட்ட சொல் மட்டும்: நாம் சொற்கள் அடங்கிய சில சொல் தொகுதிகளைத் தருகையில், அடிப்படைத் தேடலில் அவை எந்த வரிசையில் இருந்தாலும், அந்த டெக்ஸ்ட் உள்ள தளம் காட்டப்படும். அப்படி இல்லாமல், குறிப்பிட்ட வரிசையில் சொற்கள் அமைக்கப்பட்டால் மட்டுமே தேவை எனில் என்ன செய்திட வேண்டும்? எடுத்துக்காட்டாக, “nor custom stale her infinite variety” என்ற வரிசையில் உள்ள ஷேக்ஸ்பியர் வரியினைக் கொண்டுள்ள டெக்ஸ்ட் உள்ள பக்கம் மட்டுமே வேண்டும் எனில், இந்த சொற்களை மேற்கோள் குறிகளுக்குள் தர வேண்டும். அப்படிக் கொடுக்கையில், இந்த வரிசையில் உள்ள சொற்றொடர்கள் உள்ள பக்கங்கள் மட்டுமே பட்டியலிடப்படும்.

எனவே, இது போன்ற கட்டாயமான தேவை இருந்தால் மட்டுமே மேற்கோள் குறிகளுக்குள் தேடல் சொற்களை அமைக்க வேண்டும். சாதாரணத் தேடலில் அமைத்தால், பல முக்கிய தளங்களை நாம் காணாமல் இழக்க வேண்டியதிருக்கும்.

2. சொல்லை விலக்கி அளிக்க: குறிப்பிட்ட ஒரு சொல்லுடன், இன்னொரு குறிப்பிட்ட சொல் இல்லாதவை மட்டுமே நமக்குத் தேவையாய் இருக்கும். எடுத்துக்காட்டாக, மெட்ரோ நகரங்களைப் (metro cities) பற்றித் தேடுகிறீர்கள். இப்போது வந்திருக்கும் விண்டோஸ் 8 தொகுப்பில் மெட்ரோ என்ற யூசர் இன்டர்பேஸ் முதலில் தரப்பட்டது. எனவே நீங்கள் metro cities என்று அளிக்கையில், விண்டோஸ் 8 குறித்த தளங்களும் காட்டப்படும். இதனைத் தவிர்த்து நகரங்களை மட்டும் பெற, Metro Cities windows என ஒரு சிறிய டேஷ் அடையாளத்தை (மைனஸ்) தேவையற்ற சொல்லுடன் இணைக்க வேண்டும். இதே போல ஒரு குறிப்பிட்ட தளத்தில் உள்ள எதுவும் வேண்டாம் என்றால், அந்த தளத்தின் பெயருக்கு முன்னால், site: எனக் கொடுக்க வேண்டும். எடுத்துக்காட்டாக, tamil kings site: wikipedia.org எனக் கொடுக்கலாம்.

3. இணைச் சொற்களுடன் தகவல்: மேலே காட்டப்பட்டதற்கு எதிராக, ஒரு சொல்லைப் போன்றே பொருள் உள்ள இணைச் சொற்களும் (Synonyms) காட்டப்பட வேண்டும் எனில், (~) குறியீட்டினைச் சேர்க்க வேண்டும். எடுத்துக்காட்டாக, ~food facts எனக் கொடுத்தால், நல்ல உணவிற்கான பிற சொற்களுடன் தேடல் தகவல்கள் தரப்படும்.

4. குறிப்பிட்ட தளத்தினுள் மட்டும்: உங்களுக்கான தேடல் குறிப்பிட்ட தளத்தில் மட்டுமே மேற்கொள்ளப்பட வேண்டும் எனில், சொல்லுக்குப் பின்னால் site: என்ற சொல்லுடன், அந்த தளத்தின் யு.ஆர்.எல். தரப்பட வேண்டும். எடுத்துக்காட்டாக, chromesite:support.google.com எனக் கொடுக்கலாம். இவ்வாறு கொடுக்கையில் chrome என்ற சொல் support.google.com என்ற தளத்தில் இடம் பெறும் இடங்கள் மட்டுமே கிடைக்கும்.

5. எந்த சொல்லானாலும் சரி: குறிப்பிட்ட தேடல் சொல் தொகுதியில் ஓர் இடத்தில், எந்த சொல் வந்தாலும் பரவாயில்லை என்று எண்ணினால், தேடலுக்கான சொல் தொடரில், அந்த இடத்தில் ஆஸ்டெரிஸ்க் குறியீட்டைத் தரலாம். எடுத்துக் காட்டாக “a * saved is a * earned” என அமைக்கலாம்.

6. எந்த சொல்லுக்கான விடையும் வேண்டும்: சில சொற்களைக் கொடுத்துத் தேடச் சொல்கையில், அவற்றில் இரண்டில் எந்த சொல் இருந்தாலும் வேண்டும் என எண்ணினால், அந்த இரண்டு சொற்களுக்கிடையில் “OR” எனப் பெரிய எழுத்துக்களில் தர வேண்டும். எடுத்துக்காட்டாக olympics location 2014 OR 2018 எனத் தரலாம். இவ்வாறு தருகையில், ஒலிம்பிக்ஸ் நடைபெற்ற இடம் 2014 ஆம் ஆண்டு அல்லது 2018 ஆம் ஆண்டு என இரண்டு ஆண்டுகளுக்குமான தேடல் நடைபெற்று விடை கிடைக்கும். இந்த குறியீடு இல்லை என்றால், இரண்டு சொற்களும் இடம் பெறும் தள விடைகள் மட்டுமே கிடைக்கும். இந்த தேடல் குறியீட்டில் என்பதற்குப் பதிலாக “|” என்ற குறியீட்டினையும் அமைக்கலாம்.

7. ரேஞ்ச் அமைக்க: விலை, ஆண்டு, நேரம், காலம் குறிப்பிடுகையில், இதிலிருந்து இது வரையிலானது வரை தேடுக என்று நாம் அமைக்க விரும்புவோம். அப்போது ரேஞ்ச் அமைப்பில் உள்ள இரண்டுக்கும் இடையே இரு புள்ளிகளை அமைக்க வேண்டும். எடுத்துக்காட்டாக, ரூ.2,000 முதல் ரூ.4,000 வரையிலான விலை ரேஞ்சில் உள்ள கேமராக்கள் குறித்து அறிய camera Rs.50..Rs.100 என அமைக்கலாம்.

July 20, 2015
பயன்மிகு இணையவழிச் சேவைகள்

— திருமதி. சிவானந்தம் கனகராஜ்.

இணைய ஆவண சேமிப்பு மற்றும் பகிர்தலுக்கான தளங்கள்

நாளும் நமது கணிப்பொறியில் பல வகையான ஆவணங்களை ( Documents ) உருவாக்கி பயன்படுத்துகிறோம். Microsoft Office ன் பல்வேறு மென்பொருட்களான MS Word, MS Excel, MS PowerPoint, இவையனைத்து மென்பொருட்களையும் நாம் அன்றாடம் பயன்படுத்தி வருகிறோம். அதே போல் பல வகையான படக் கோப்புகள், jpeg, gif, bmp மற்றும் zip கோப்புகள், pdf கோப்புகளை உருவாக்கி பயன்படுத்துகிறோம். மற்றவர்களோடு பகிர்ந்தும் கொள்கிறோம்.

நாம் உருவாக்கும் ஆவணங்களை கணினியில் சேமித்து வைக்கிறோம். Compact Disc, Pen drive, Hard disc போன்ற external storage device களிலும் சேமித்துப் பயன்படுத்தலாம். அப்படி சேமிக்கையில், அந்த உபகரணங்களை கையில் எடுத்துச் செல்வோம். அங்கனம் எடுத்துக் செல்லக் கூட தேவையில்லாது, இணையத்திலேயே சேமித்துக் கொள்ளும் வசதியும் இன்று உள்ளது. இணைய வசதி இருந்தால், எங்கு எப்போது வேண்டுமானாலும் நமது கோப்புகளை பயன்படுத்திக் கொள்ளலாம்.

நமது மின்னஞ்சலிலேயே நமது கோப்புகளை இணைத்து, பிறருக்கு அனுப்பவோ, பகிர்ந்து கொள்ளவோ செய்யலாம். ஆனால், மின்னஞ்சல் சேவை வழங்கும் ஒவ்வொரு நிறுவனமும் நாம் மின்னஞ்சலுடன் தரவேற்றும் கோப்புகளுக்கான அளவை நிர்ணயம் செய்துள்ளன. அவை நிர்ணயத்துள்ள அளவுக்கு மேலாக இருக்கும் கோப்புகளை அனுப்புவதென்பது இயலாது. இதற்காக வடிவமைக்கப்படவை தான், இந்த இணையவழி ஆவண சேமிப்பு மற்றும் பகிர்தலுக்கான தளங்கள்.

மின்னஞ்சல் சேவை நிறுவனங்கள் வழங்கும் அதிகபட்ச மின்னஞ்சல் அளவு வரம்பு ( Maximum Email Size Limit ) கீழ்வருமாறு:

மேற்குறிப்பிட்டிருக்கும் கோப்புகளின் அளவுக்கு மேல் மின்னஞ்சலில் இணைப்புகளாக கோப்புகளை அனுப்ப இயலாது. அது போன்ற சூழ்நிலைகளில், இணையத்தில் இருக்கும் ஆவண சேமிப்பு மற்றும் பகிர்தலுக்கு உதவும் இணைய தளங்களை பயன்படுத்திக் கொள்ளலாம்.

அத்தகைய சேவைகளை இலவசமாக இணையவழி வழங்கும் இணையதளங்கள் குறித்து இக்கட்டுரையில் காணலாம்.

கூகுள் டாக்ஸ் வியூவர் (Google Docs Viewer):
கூகுள் வழங்கும் சேவை இந்த கூகுள் டாக்ஸ் வியூவர். மைக்ரோசாப்ட் வோர்ட், நோட்பேட் போன்ற மென்பொருட்களை பயன்படுத்தி நமது ஆவணங்களை கோப்புகளாக சேமித்து வைப்போம். அத்தகைய கோப்புகளை நாம் தனி மென்பொருள் ஏதுமின்றி இணையத்திலேயே உருவாக்கி, சேமித்து, திருத்தங்கள் மேற்கொள்வது என அனைத்து வகையான வேலைகளையும் இணையத்திலேயே செய்து, கோப்புகளை சேமித்துக் கொள்ளலாம்.

word processors (சொல் செயலிகள்) வழங்கும் பல்வேறு சேவைகளும் இந்த இணையவழி சேவையின் வாயிலாக கிட்டுகிறது. எடுத்துக்காட்டாக, கோப்புகளில் திருத்தம் மேற்கொள்ளுதல் (Editing ), மெருகூட்டுதல் (styling), சேமித்தல் (saving) என தனி மென்பொருட்களில் செய்யும் அனைத்து செயல்களையும் இதிலும் மேற்கொள்ளலாம் .

ஆயிரத்திற்கும் மேற்பட்ட எழுத்துருக்கள், இணையதள இணைப்புகள் கொடுக்கும் வசதி, படங்களை நமது கணினியிலிருந்து பயன்படுத்திக் கொள்ளும் வசதி, ஓவியம் வரையும் வசதி, அட்டவணைகள் உருவாக்கிக் கொள்ளும் வசதி என ஒரு தனி மென்பொருளில் கிடைக்கும் அனைத்து வசதிகளும் இந்த இணையவழி சேவையின் மூலம் கிடைக்கப் பெறலாம். நமது கூகுள் மின்னஞ்சல் கணக்கினை பயன்படுத்தியே நமது கோப்புகளை சேமித்துக் கொள்ளலாம்.

கூகுள் வழங்கும் இந்த சேவையை கீழ்காணும் இணைய பக்கத்தில் பெறலாம்:
docs.google.com

ஸ்ரைப்டு (Scribd):
Scribd ன் உதவியுடன் நம்மால் நமது கோப்புகளை இணையத்தில் வெளியிட அல்லது மற்றவர்களுடன் பகிர்ந்து கொள்ள முடியும். கோப்புகளை பிறர் பயன்படுத்த கட்டணம் வசூலிக்கவும் செய்யலாம். நமது கோப்புகளை சேமிப்பதற்கென தனி கணக்கு உருவாக்கி அதில் நமது கோப்புகளை சேமித்துக் கொள்ளலாம். நாம் அங்ஙனம் சேமிக்கும் கோப்புகளுக்கான இணைய பக்க முகவரியின் உதவியுடன், அந்த கோப்புகளை இணையத்திலேயே வாசிக்க, தரவிறக்க என்று பல வசதிகளும் கிடைக்கின்றன.

இவை மட்டுமின்றி, கட்டுரைகள், கடிதங்கள், புத்தகங்கள், செய்தித் தாள்கள், பத்திரிகைகள், கவிதைகள், வியாபரத்திற்கு பயன்படுத்தப்படும் படிவங்கள், சட்ட ரீதியான ஆவணங்கள், சொற்பொழிவுகள், விளக்கக் காட்சிகள், சுற்றுலா வழிகாட்டிகள் என்று இணையத்தில் கிடைக்கும் பலவகையான ஆவணங்களையும் இந்த இணையவழிச் சேவையின் மூலம் சேமித்துப் பயன்படுத்தலாம், பிறருக்கு பயன்படுத்த, பகிர்ந்து உதவலாம்.

நாம் சேமித்து வைத்துள்ள கோப்புகளை, நமது இணைய பக்கங்களிலும், இந்த Scribd ன் உதவியுடன் வெளியிட்டுக் கொள்ளலாம்.

இந்த சேவையை கீழ்காணும் இணைய பக்கத்தில் பெறலாம்:
https://www.scribd.com/

ஸ்லைடு ஷேர் ( Slide Share):
நாம் அறிந்த தகவல்களை மற்றவருடன் பகிர்ந்து கொள்ளும் நோக்கோடு உருவாக்கப் பட்டது தான் இந்த slide share. ஆவணங்கள் (documents), காணொளிகள் (videos), விளக்கக் காட்சிகள் (presentations), இணையவழி கருத்தரங்கங்கள் (webinars), விளக்கக் காட்சிகள் (infographics ), PDF கோப்புகள், புகைப்படத் தொகுப்பு என்று பலவகையான கோப்புகள், பல்வேறு வடிவங்களில் தரவேற்றவும், பலருடன் பகிர்ந்து கொள்ளும் வசதியை இந்த இணையதளம் வழங்குகிறது.

இதில் பதினைந்து மில்லியனுக்கும் மேலான பலவகையான கோப்புகள் தரவேற்றம் செய்யப் பட்டுள்ளன. அவற்றில் தொழில்நுட்பம், கல்வி, வணிகம், ஆரோக்கியம் சார்ந்த தகவல்கள், பயணக் கட்டுரைகள் என்று பல வகையான தகவல்கள் நமக்கு கிடைக்கின்றன.

நாம் இங்கு தரவேற்றம் செய்யும் கோப்புகளை பிறருடன் பகிர்ந்து கொள்ளலாம். வலைபூக்கள் மற்றும் வலைதளங்களில் வெளியிடலாம், இணைப்பு வழங்கலாம்.

இந்த சேவையை வழங்கும் வலைப்பக்கம்
www.slideshare.net

ஸ்கை ட்ரைவ் (sky drive) / ஒன் ட்ரைவ் (one drive):
மைக்ரோ சாஃப்ட் நிறுவனம் வழங்கும் இணையவழி ஆவண சேமிப்பு வசதி தான் இந்த ஸ்கை ட்ரைவ். ஸ்கை ட்ரைவ் தற்போது ஒன் ட்ரைவ் என்று அழைக்கப் படுகிறது.

புகைப்படங்கள், காணொளிகள் , பலவகையான கோப்புகளை நாளும் பயன்படுத்துவோம், நமக்கு நெருக்கமானவர்களுடன் பகிர்ந்து கொள்வோம். அங்ஙனம் பகிர்ந்து கொள்வதற்கு இந்த ஒன் ட்ரைவ் நமக்கு உதவுகிறது.

ஒன் ட்ரைவ் தற்போது மைக்ரொ சாஃப்ட் வழங்கும் MS – Office மென்பொருட்களுடன் வருகிறது. இணையத்தில் பயன்படுத்த கிடைக்கும் இந்த மென்பொருட்களில் MS Word, MS Excel, MS PowerPoint, MS One Note ஆகியன அடங்கும்.

பயனர் ஒவ்வொருவருக்கும் ஒரு டெராபைட் (Terabyte) அளவுள்ள தகவல்களை சேமிக்கும் வசதியை வழங்குகிறது ஒன் ட்ரைவ்.

இதில் தரவேற்றும் கோப்புகளை பிறருடன் பொதுவில் பகிர்ந்து கொள்ளலாம். குறிப்பிட்ட சிலருடன் மட்டும் பகிர விரும்பினால், அவ்வாறும் செய்யலாம். பகிரும் கோப்புகளில், யார் மாற்றங்கள் செய்யலாம் என்பதையும் நாமே தீர்மானித்து, குறிப்பிட்ட சிலருக்கு மட்டும் மாற்றம் செய்யும் உரிமையையும் வழங்கலாம்.

இந்த சேவையை கீழ்காணும் இணையதளத்தில் பெறலாம்:
onedrive.live.com

இஸ்ஸூ (Issuu.com) :
இணையவழி ஆவண சேமிப்பு மற்றும் பகிர்தலுக்கான மற்றுமோர் தளம் இஸ்ஸூ. இங்கு சேமிக்கும் ஆவணங்களை பிறருடன் பகிர்ந்து கொள்ள இயலும். நமது வலைப்பக்கங்களில், புத்தகம் போலவே வாசிப்பதற்கு ஏதுவாக வெளியிட முடியும்.

பல துறை சார்ந்த தகவல்கள், கலை, கல்வி, தொழில் நுட்பம், திரைப்படம், பயணம், சுற்றுலா என பல துறை பற்றிய தகவல்களும் இங்கு கிடைக்கின்றன. நாமும் இதில் ஓர் கணக்கினை துவங்கி இணைந்து கொண்டால், நமக்கு தெரிந்த தகவல்களையும் உலகில் உள்ள பலருடனும் பகிர்ந்து கொள்ளவும் முடியும்.

இந்த சேவையை வழங்கும் இணையதளம்:
issuu.com

July 20, 2015