Author: ஜெயராமசர்மா

எம். ஜெயராமசர்மா … மெல்பேண் … அவுஸ்திரேலியா 

தமிழினை முதலாய்க் கொண்டு
தரணியைப் பார்க்க வைத்த
உரமுடை டொமினிக் ஜீவா
உவப்புடன் என்றும் வாழ்க

அளவிலா ஆசை கொண்டு
அனைவரும் விரும்பும் வண்ணம்
தெளிவுடன் எழுத்தை ஆண்ட
தீரனே வாழ்க வாழ்க

சொல்லிலே சுவையை ஏற்றி
சுந்தரத் தமிழைக் கொண்டு
மல்லிகை இதழைத் தந்த
மாதவன் ஜீவா வாழ்க

தொல்லைகள் பலவும் கண்டும்
துவண்டு நீ இருந்திடாமல்
மல்லிகை இதழை நாளும்
மலர்ந்திடச் செய்தாய் நன்றாய்

தோழிலே சுமந்து சென்றாய்
சுகமுடன் பணியைச் செய்தாய்
ஆதாலால் அந்த மல்லி
அனைவரின் வசமாய் ஆச்சு

சிறு கதை மன்னனாக
சிறந்து நீ விளங்கினாலும்
பெரு மனங் கொண்டதாலே
பிரபலம் ஆகி விட்டாய்

சரிவெலாம் வந்த போதும்
சலிப்பிலா உள்ளங் கொண்டு
நிலைபெற உறுதி பூண்ட
நீயென்றும் நிலைத்து வாழ்க

கண்ணீரைக் கொண்டு நீயும்
கதைபல எழுதி நின்றாய்
தண்ணீரைக் காட்டித் தானே
தகைவுடை பரிசைப் பெற்றாய்

உண்மையாய் உழைத்து நின்றாய்
ஊருக்கு வேரும் ஆனாய்
உன்னலம் துறந்து நின்றாய்
உயர்ந்து நீ இருக்கின்றாயே

விண்ணிலே நிலவாய் நின்று
வெளிச்சத்தை காட்டி நாளும்
மண்ணிலே எழுத்தை ஆண்டு
மதிப்பினைப் பெற்று விட்டாய்

மல்லிகையை வளர்த் தெடுத்த
வல்லவனே நீ வாழ்க
நல்லதமிழ் எழுதி நிற்கும்
நாயகனே நீ வாழ்க
எல்லையிலாப் புகழ் பெற்று
என்றுமே நீ வாழ்க
எழுத்துலகில் ஜீவா நீ
என்றுமே வாழ்க வாழ்க

நடந்தலைந்து நீ தந்த
நல்ல தமிழ் ஏடெமக்கு
நல்விருந்தாய் இருந் தமையை
நாம் மறக்க மாட்டோமே
தெரிந் தெடுத்து வைத்தபெயர்
சிறந் தோங்கி நிற்கிறது
வரம் பெற்ற ஏடாக
மல்லிகையும் மணக்கிறது

மல்லிகைப் பந்தல் போட்டு
வளர்த்தனை பலரை நாளும்
கள்ள மில் செயலினாலே
கற்றவர் புகழ நின்றாய்
நல்லதோர் ஏடாய் நாளும்
மல்லிகை வளரச் செய்தாய்
நாட்டிலே உள்ளார் நெஞ்சில்
நாயகன் ஆகி விட்டாய்

மல்லிகை மணக்கிறது
மனமெல்லாம் மகிழ்கிறது
செல்லுகின்ற இடமெல்லாம்
ஜீவாவை பார்க்கின்றோம்
நல்லதொரு ஏடுதந்த
நற்றமிழன் ஜீவாவே
எல்லையிலா இன்பமுடன்
என்றுமே நீவாழ்க

எம் . ஜெயராமசர்மா … மெல்பேண் .. அவுஸ்த்திரேலியா

வள்ளுவத்தைப் படித்துவிடின் வாழ்க்கைபற்றி அறிந்திடலாம்

தெள்ளுதமிழ் நூல்களிலே சிறந்தநூலாய் இருக்கிறது

அள்ளவள்ளக் குறையாமல் அறிவுரைகள் தருவதனால் 

நல்லதெனப் போற்றுகின்றார் நாட்டிலுள்ள மக்களெல்லாம் 

கள்ளமெலாம் அகல்வதற்கும் கயமைவிட்டு ஓடுதற்கும்

நல்லதொரு மருந்தாக நம்குறளும் இருக்கிறது 

உள்ளமதில் குறள்கருத்தை உருவேற்றி விட்டுவிடின்

இவ்வுலகில் நல்வாழ்வு எல்லோர்க்கும் அமையுமன்றோ !

பலநூல்கள் வந்தாலும் பாரில்நிலை நிற்கின்ற 

பக்குவத்தைப் பெறுவதற்கு பக்குவமும் வேண்டுமன்றோ

குறள்வந்த காலம்முதல் தலைநிமிர்ந்து நிற்குதென்றால்

அதுகூறும் அத்தனையும் அனைவருக்கும் பொருந்துவதே 

நிலையான அத்தனையும் குலையாமல் கூறுவதால் 

தலையாய நூலாகக் குறளொன்றே திகழ்கிறது

தொலைநோக்குப் பார்வையுடன் சொல்லிநிற்கும் கருத்தாலே

நிலையாக நிற்கும்குறள் நெஞ்சமெலாம் நிறைந்திருக்கு !

ஈரடியால் பலகருத்தை இலகுவாய் சொன்னகுறள் 

எல்லோரின் வாழ்க்கைக்கும் ஏற்றதாய் இருக்குதன்றோ 

பாரிலுள்ள பலபுலவர் பலகருத்தைப் பகர்ந்திடினும்

சீரான நூலாகத் திருக்குறளே திகழுதன்றோ 

கார்கொண்ட மேகமெனக் கருத்துமழை பொழியும்குறள்

யார்மனதும் நோகாமல் நற்கருத்தைப் பாய்ச்சுதன்றோ 

வேருக்கு   நீராக  வீரியமாய் நிற்கும்குறள் 

பாருக்கு வந்ததனால் பயன்மிகுந்து  நிற்குதன்றோ !

 
எம். ஜெயராமசர்மா … மெல்பேண் … அவுஸ்திரேலியா 

அப்பாவின் தோழேறி
அவர்மார்பில் உதைத்துநிதம்
துப்பிநாம் நின்றாலும்
சுகமுடனே அதையேற்பார்
நித்திரையில் எமையணைத்து
நீங்காமல் அவர்படுப்பார்
நினைத்துநாம் பார்த்துவிடின்
நெக்குருகி நிற்போமே !

தோழேறி நின்றநாம்
தோழளவு வளர்ந்தபின்பும்
தன்தோழில் எமைத்தாங்கும்
தருமசீலர் அப்பாவே
எம்குறையைத் தம்குறையாய்
ஏற்றுநின்று காக்குமவர்
என்றுமெங்கள் நெஞ்சினிலே
இறைவனென இருக்கின்றார் !

புழுதிதனில் புரண்டாலும்
புன்முறுவல் காட்டிடுவார்
அழுதுநாம் பார்த்துவிடின்
அவருருகிப் போய்விடுவார்
தெருவதனில் சண்டைசெய்தால்
திருந்துதற்கு வழிகாண்பார்
ஒருபொழுதும் சினங்காட்டா
உத்தமராம் எங்களப்பா !

அப்பாவின் கைபட்டால்
அனைத்துமே துலங்கிவிடும்
அவர்கையைப் பற்றியதால்
அகமகிழ வாழுகின்றோம்
அளவறிந்து வாழுவென்று
அவருரைத்து நின்றதனால்
அமைதியுடன் வாழுகிறோம்
அப்பாவை அகத்திருத்தி !

அன்புதந்த அப்பாவை
அறமுரைத்த அப்பாவை
அறிவுடையார் அருகணைய
அழைத்துச்சென்ற அப்பாவை
ஆருமற்ற அனாதையென
அகமதிலே விட்டுவிடின்
ஆண்டவனே எமைப்பாரார்
அடைந்திடுவோம் நரகமதை !

உலகமெலாம் அப்பாவை
உயர்த்திநிற்கும் தினமாக
உவகையுடன் கொண்டாடி
ஊர்வலமும் செய்திடுவோம்
நித்தமே எமைநினைத்து
அத்தனையும் ஈந்தளித்த
சொத்தான அப்பாவை
சுமையென்றல் முறையாமோ
எத்தனையே இடர்தாங்கி
எமைஉயர்த்தி விட்டவரை
இல்லத்தில் நாம்வைத்துப்
என்றுமே வணங்கிநிற்போம் !

எம் . ஜெயராமசர்மா .. மெல்பேண் .. அவுஸ்திரேலியா 

பார்வையற்றோர் குறையெதையும் பார்க்காது இருந்திடுவர்
செவிப்புலனை இழந்தவரோ குறைகேட்கா இருந்திடுவார்
கையற்றோர் தீயவற்றை தொட்டுவிடா திருந்திடுவார்
இத்தனைகள் குறையிருந்தும் இவர்நிறைவா யிருப்பார்கள் !

அழகான கண்ணிருக்கும் அகன்றபெரும் செவியிருக்கும்
திடமான கையிருக்கும் திரண்டபெரும் உடலிருக்கும்
வரமாக இவையிருந்தும் வண்ணமுற இருக்காது
வசைபாடிக் குறைசொல்லி வாழ்நாளைக் கழித்திடுவார் !

ஆண்டவனின் படைப்பினிலே அரும்படைப்பு எம்படைப்பே
பகுத்தறியும் பேரறிவை படைக்கையிலே புகுத்திவிட்டான்
குறையற்ற உடல்கிடைத்தும் குறைசொல்லி இருந்துவிடின்
எமைப்படைத்த இறைவனுக்கே ஏற்குமா எண்ணிடுங்கள் !

குறைகள்பல கொண்டிருப்போர் குறைபற்றி நினைக்கவில்லை
குறையற்ற உடலுடையோர் குறைகளிலே உறைந்துவிட்டார்
கறையற்ற வாழ்வினைநாம் காணவேண்டு மெனநினைத்தால்
நிறைவாக நினைப்பதற்கு எமைமாற்றல் வேண்டாமோ !

வெள்ளத்தின் நிலையுயர மெள்ளமெள்ளப் பூவுயரும்
உள்ளமது உயர்வுபெறின் கள்ளமுடை நிலையகலும்
நல்லதென பார்க்கின்ற நற்பார்வை வளர்ந்துவிட்டால்
கள்ளமது கழன்றகன்று கண்ணியமே வந்துநிற்கும் !

ஊனமுற்றோர் என்றுசொல்லி ஒதுக்கிவிட முயலுகின்றோம்
உடலினால் ஊனமுற்றோர் ஊனமுற்றோர் ஆகார்கள்
ஆணவத்தின் வசமாகி அறம்தவறி நடப்பவரே
மாநிலத்தில் ஊனமுற்றோர் ஆகிடுவார் வாழ்வினிலே !

எம். ஜெயராமசர்மா.. மெல்பேண் .. அவுஸ்திரேலியா 

 
கருங்கூந்தல் நிறைந்திருக்க
கன்னமதில் குழிகள்விழ
விளியிரண்டும் மீனெனவே
வெண்மைநிற முகத்தினிலே
மருண்டோடி பார்த்திருக்க
வட்டநிலா வருவதுபோல்
இடைஇருந்தும் தெரியாமல்
அவள்வருவாள் நடைபயின்று
அதைக்காண ஆவலுடன்
அனுதினமும் காத்திருப்பேன் !

பலபேர்கள் வந்தாலும்
பார்த்துவிடா என்பார்வை
இவள்மட்டும் வந்தவுடன்
எனைமீறிச் சென்றுவிடும்
நினைவெல்லாம் அவளாக
நிறைந்திருக்கும் காரணத்தால்
அவள்வருகை மட்டுமெந்தன்
அகத்தினுள்ளே புகுந்துவிடும் !

சிலவேளை அவள்பார்ப்பாள்
பலவேளை நான்பார்ப்பேன்
மின்சாரம் பாய்வதுபோல்
வேகமுள்ளே பரவிநிற்கும்
என்பார்வை அவள்பார்வை
இரண்டுமொன்றாய் இணைந்திடவே
கண்களிலே பேசியவர்கள்
கைபிடிக்க எண்ணிவிட்டோம் !

இல்லறத்தில் நாமிணைந்தோம்
இன்பவுலா சென்றுவந்தோம்
அன்புநிறை காதலொடு
அகமகிழ நாமிருந்தோம்
ஈருடலாய் இருந்தாலும்
ஓருயிரே என்றிருந்தோம்
எங்களது காதலது
இணையின்றி வளர்ந்ததுவே !

பிள்ளைகள் பிறந்தார்கள்
பேரின்பம் தந்தார்கள்
உள்ளூர நாம்மகிழ்ந்தோம்
உவகையுடன் கொஞ்சிநின்றோம்
கைநிறைய பொருள்வந்து
கண்ணியமாய் நாம்வாழ்ந்தோம்
கடவுளது கிருபையினால்
காதல்மேலும் வளர்ந்ததுவே !

வளர்ந்துவிட்ட பிள்ளைகளும்
இணைந்துவிட்டார் இல்லறத்தில்
முதுமை வந்துவிட்டதனால்
முடங்கிவிட்டோம் இருவருமே
தனிமையெனும் நிலையெம்மை
தவிக்கவைத்து நிற்கிறது
இனிமைதனை நினைத்தேங்கி
இருக்கின்றோம் இருவருமே !

கட்டழகுக் கருங்கூந்தல்
காந்தநிறை கண்மணிகள்
மொட்டவிழ்த்த புன்சிரிப்பு
முழுநிலவு பொலிவுமுகம்
அத்தனையும் அவழிழந்து
அயர்ந்திப்போ இருக்கின்றாள்
அவள்கோலம் தனைநினத்து
அலமந்து நானிருக்கேன் !

நான்ழுதால் தானழுவாள்
நான்சிரித்தால் தான்சிரிப்பாள்
தேனாகாப் பேசியவள்
திக்திக்கிப் பேசுகிறாள்
மான்விழிகள் கொண்டஅவள்
மயக்கமுடன் விழிக்கின்றாள்
மயக்கம்தந்த மங்கையிப்போ
தயக்கமுடன் தவிக்கின்றாள் !

என்றாலும் அவளிடத்தில்
என்சுகமே தெரிகிறது
தன்தோழில் எனயணைத்து
தான்வருடி நிற்கின்றாள்
நான்வீழ்ந்து போகாமல்
தான்வேராய் தாங்குகிறாள்
என்னுயிரைத் தன்னுயிராய்
எண்ணுகின்ற என்தலைவி !

கூன்விழுந்து விட்டாலும்
நான்விழுந்து போகாமல்
தானெழுந்து எனைத்தாங்கி
தாயெனவே நிற்கின்றாள்
என்காதல் வாழ்வினிலே
இப்போதே இனிக்கிறது
என்வாழ்வில் இன்பவுலா
இனித்தொடங்கப் போகிறது !

 எம் . ஜெயராமசர்மா … மெல்பேண் .. அவுஸ்திரேலியா 

கவையாகிக் கொம்பாகிக் காட்டகத்தே நிற்கும்
அவையெல்லாம் மனிதற்கு அரணாகின – அவனோ
அழித்தான் எரித்தான் ஆனமட்டும் பயன்படுத்தி
முடித்தானே காட்டினை இன்று.

தானாக வளர்ந்தமரம் தன்வாழ்வை மனிதனுக்காய்
தானீந்து நிற்கின்ற தன்மையினை காணுகிறோம்
தானாக வளர்ந்தமரக் காட்டினிலே வளர்ந்துவிட்டு
வீணாகக் காடழித்து விபரீதம் தேடுவதேன் !

மாடுவெட்டி நிற்கின்றான் ஆடுவெட்டி நிற்கின்றான்
அத்தோடு நின்றிடாமால் அநேகமரம் வெட்டுகின்றான்
மரம்வளர்க்கும் எண்ணமின்றி மரம்வெட்டி நின்றுவிடின்
மாநிலத்தின் பசுமையெலாம் வாழ்விழந்தே போயிடுமே !

நாட்டின்வளம் காடதனை நாமழித்து நின்றுவிடின்
நல்லமழை பெய்வதனை நாம்பார்க்க முடியாது
நீரில்லா வாழ்க்கைதனை யாருமெண்ண மாட்டார்கள்
பாரில்மழை மழைவேண்டிமெனில் பாதுகாப்போம் காடதனை !

சுவாசிக்கக் காற்றும் பசிபோக்க உணவும்
சுத்தமான இடமும் அத்தனையும் அவசியமே
சூழல்பற்றிப் பேசுகிறோம் சூழலைநாம் பார்ப்பதில்லை
சூழல்நிலை மாசுபடின் வாழ்வுநிலை என்னாகும் !

நகரமய மாக்கலினால் நம்சூழல் என்னாச்சு
நச்சுத்தன்மை சூழலினை தன்வசமாய் வைத்திருக்கு
பெருந்தெருக்கள் பேருந்து பெருமளவில் வந்தாச்சு
அருந்திநிற்கும் குடிநீரும் அசுத்தமுடன் கலந்தாச்சு !

மேல்நாட்டு வண்டியொடு கீழ்நாட்டு வண்டியுமாய்
பாதையிலே விடும்புகையால் பலநோய்கள் வருகிறது
கவனிப்பார் கவனிக்கா நிலையிவை இருந்துவிடின்
கண்டிப்பாய் கஷ்டகாலம் காலனென வந்துநிற்கும் !

இயற்கைவழி அத்தனையும் இலாபம்தரா எனவெண்ணி
செயற்வழி கையாண்டு சேர்க்கின்றார் பலநோய்கள்
விளைகின்ற பயிரனைத்தும் வேகமாய் வளர்ந்தாலும்
விரும்பியுண்ணும் யாவருக்கும் வில்லங்கம் விளைக்குதல்லோ !

தொழிற்சாலைக் கழிவுகளால் தூய்மையுடை நீர்நிலைகள்
அழுக்கேறி நிற்கையிலே அதைப்பருகும் மக்கள்தமை
கணப்பொழுதும் நினையாமல் காசையெண்ணும் கயமையெனும்
குணம்மாறி நின்றுவிடின் கொண்டிடுமே தூய்மையங்கு !

மரம்வெட்ட நினைக்கின்றார் மரம்வளர்க்க வாருங்கள்
நிலம்காக்க நினைக்கின்றார் செயற்கைமுறை தவிருங்கள்
உரமான வாழ்வினுக்காய் உள்ளமதைத் திருப்புங்கள்
தரமான நற்சூழல் தானமைக்க வந்திடுங்கள் !

எம். ஜெயராமசர்மா
வானலைகள் ஊடாக வண்ணத் தமிழ்பரப்பி
தேனாக இனித்துநிற்கும் திகட்டாத வானமுதே
ஐயிரண்டு ஆண்டாக அனைவரது மனங்கவர்ந்தாய்
அளவில்லா வளர்ச்சிபெற அகமகிழ்ந்து வாழ்த்துகிறேன் !

எல்லையில்லா இன்பம்தரும் எங்களது வானமுதே
நல்லபல ரசிகர்களை நாளும்நீ வளர்த்துள்ளாய்
சொல்லவல்ல சுவைபயக்க சுந்தரமாய் தமிழ்தருவாய்
நல்லபடி நீநிலைக்க நயந்துன்னை வாழ்த்துகிறேன் !

வானத்துமழை காணின் மண்ணெல்லாம் பசுமைபெறும்
வானமுதின் தேன்மழையால் மனமெல்லாம் மகிழ்வுபெறும்
ஞானத்தை உடையோரின் நற்கருத்தும் தேடிவரும்
நாளும்நீ வளர்ச்சிபெற நல்வாழ்த்தை நவில்கின்றேன் !

விஞ்ஞானம் மெஞ்ஞானம் மேலான கலாசாரம்
எஞ்ஞான்றும் உந்தனது ஒலிபரப்பில் இணைந்துநிற்கும்
நல்ஞானம் உடையோரால் நாளும்நீ வளருகிறாய்
வல்லமையாய் நீதிகழ மனமார வாழ்த்துகிறேன் !

கங்காரு நாட்டினிலே களைப்பின்றித் தமிழ்பேசி
சிங்கார நடைபோட்டு சிறப்பாக விளங்குகின்றாய்
தங்கத்தமிழ் வானமுதே தலைநிமிர்ந்து நீநிற்கப்
பொங்கிவரும் பூரிப்பால் பொலிவுபெற வாழ்த்துகிறேன் !

பத்தாண்டை நிறைவுசெய்யும் பண்பான வானமுதே
பல்லாண்டு நீநிலைக்கப் பாசமுடன் வாழ்த்துகிறேன்
முத்தான் தமிழ்கொண்டு முன்வந்த வானமுதே
முன்னேற்றம் பலகண்டு முழுமைபெற வாழ்த்துகிறேன் !

பிரம்மஶ்ரீ எம். ஜெயராமசர்மா … மெல்பேண் .. அவுஸ்திரேலியா

 எம் . ஜெயராமசர்மா … மெல்பேண் .. அவுஸ்திரேலியா 

ஆயுதக் கழஞ்சியத்தை அரவணைத்த அரக்கரெலாம்
அறிவுக் கழஞ்சியத்தை அக்கினியில் இட்டார்கள்
அத்தனையும் செய்துவிட்டும் அவரோய்ந்த பாடில்லை
மிச்சமெலாம் கொழுத்துதற்கும் மீண்டுமெழ நினைக்கின்றார் !

புத்தபிரான் போதித்த போதனைகள் அத்தனையும்
போதிமரம் கேட்டுவிட்டுப் பெறுமையுடன் நிற்கிறது
காவிகட்டி சேதிசொல்லும் கனிவுடைய துறவியரும்
பாவிகளின் அருகிருந்து பாடமெல்லோ சொல்லுகிறார் !

வேட்டிகட்டும் தர்மிஷ்டர் விரும்பிநின்ற மந்திரிகள்
போட்டிபோட்டு வந்துநின்று பொசுக்கிவிட்டார் நூலகத்தை
காட்டிக்காட்டி எரிக்கச்சொல்லி கைகட்டி நின்றார்கள்
நாட்டுமக்கள் தமைக்காக்கும் நல்லவரின் மந்திரிகள் !

கொழுத்தடா என்றுசொல்லி கொடுத்தானே தீயதனை
ஊத்தடா என்றுசொல்லி உடன்கொடுத்தான் எண்ணெய்தனை
கொக்கரித்து நின்றுகொண்டு கொழுத்திவிட்டார் நூலகத்தை
யாழ்நகரின் மத்தியிலே தீவானைத் தொட்டதுவே !

தென்கிழக்கு ஆசியாவின் சிறந்தவொரு நூலகத்தை
திட்டமிட்டுக் கொழுத்தியதை திறலென்றே நினைக்கின்றார்
அன்புடையோர் அறிவுடையோர் அறமுடையோர் அனைவருமே
அநியாயம் இதுவெனவே அலறிநின்று அழுகின்றார் !

புத்த தர்மமெங்கே புனிமுடை ஆட்சியெங்கே
தத்துவத்தைப் போதிக்கும் தகைமையுடை தலைமையெங்கே
சத்தியத்தை மறந்துவிட்டு உத்தமாராய் நடித்துநின்றால்
நித்தமுமே தீயிட்டு நிட்டூரம் செய்வரன்றோ !

படித்தோரும் அழுதார்கள் பாமரும் அழுதார்கள்
எடுத்துத்தேடி வைத்தெல்லாம் எரியுண்டு போச்சுவென
படித்தறிந்த தாவீது பாதிரியார் கேட்டவுடன்
துடிப்படங்கிப் போய்விட்ட துயரினைநாம் மறப்போமா !

காவல்துறை கயவர்களாய் மாறியதை மறப்போமா
கடமையுடை மந்திரிகள் காடைத்தனம் மறப்போமா
கல்விச்சொத்தை தீயிட்ட காலமதை மறப்போமா
கடவுளிடம் முறையுடுவோம் கவலைதனை மறப்பதற்கு !

எம் . ஜெயராமசர்மா .. மெல்பேண் .. அவுஸ்திரேலியா

அன்புடன் இரு
ஆணவம் அகற்று
இன்முகம் காட்டு
ஈகை வளர்
உண்மையை உரை
ஊக்கத்தை நாடு
எரிக்கும் கோபத்தை
ஏற்காது இரு
ஐக்கியமாகு சத்தியவழியில்
ஒன்றிய மனத்துடன்
ஓதிநீ அறிந்திடு
ஒளடதம் ஆகும்
அனைத்துமே உனக்கு !

கள்ளமனத்தினை காணாமல்செய்திடு
கிள்ளியெறிந்திடு கீழவர்தொடர்பினை
குறைகள்சொல்வதை கூறுகள்போட்டிடு
கெட்டவர்நட்பு கேடெனவுணர்ந்திடு
கைகளால் அன்பொடு கைகளைப்பற்றிடு
கொலைவெறி ஊட்டிடும் கோபத்தைவிட்டிடு
கெளரவமுந்தன் ஒளடதமாகுமே !

சன்மார்க்கம் நின்றால் சாந்தியைப் பெறலாம்
சிறுமதி கொண்டால் சீரெலாம் மறையும்
சுகம்பெற வேண்டில் சூழலை மாற்று
செகமதில் உன்னைச் சேவிப்பர் நாளும்
சைகள் மூலம் சகலதும் உணர்த்தலாம்
சொல்லும் சொல்லை சோர்விலா சொல்லு
செளக்கியம் ஆகும் சகலதும் உனக்கு !

தர்மம் செய்வதை தாமதம் ஆக்காதே
திருட்டு என்பதை தீண்டாமல் இருந்திடு
துன்மார்க்க குணத்தைத் தூரவே விரட்டு
தென்படும் உனக்கு தேவையாம் தெளிவு
தைக்கும் வார்த்தையை தவிர்த்தே நில்லு
தொட்டிடும் யாவும் தோன்றிடும் நன்றாய் !

-எம். ஜெயராம சர்மா, மெல்பேண், அவுஸ்த்திரேலியா

மதுவைநீ நாடாதே மதிகெட்டுப் போயிடுவாய்
மங்கையரை நாடுவதால் வலியுனக்கு வந்துவிடும்
சதிசெய்யும் குணமுடையார் சகவாசம் தனைவிடுத்தால்
சரியான வழிநடக்கத் தானாகப் பழகிடுவாய்!

ஏழ்மைநிலை இருப்பாரை இரக்கமுடன் அணைத்துவிடு
எதிரியென எவரையுமே என்றும்நீ எண்ணாதே
சோதனைகள் வந்திடினும் சோர்ந்துவிடா திருந்துவிடின்
சாதனையின் நாயகனாய்த் தலைநிமிர நின்றிடுவாய்!

அறத்தினை நினை அன்பை யணை
சிரத்தையுடன் நீ சிறந்தன தேர்ந்திடு
இறப்பினைப் பற்றி எண்ணா திருந்திடு
சிறக்க வாழ்ந்திட சிந்தனை செய்திடு!

அரக்க குணத்தை அடியோ டழித்திடு
உரக்க வுண்மையை வாழ்வினி லுரைத்திடு
குறைக்குள் சென்றிடா மனத்தைத் தடுத்திடு
சிறக்க வாழ்ந்திடச் சிந்தையைச் செலுத்திடு!

தாழ்வுமனப் பான்மையினைத் தானழித்து நில்லு
வீழ்கின்ற எண்ணம்வரின் விரட்டியே கொல்லு
ஆர்வந்து எதிர்த்தாலும் அன்புவழி நில்லு
அகிலமதி லுன்வாழ்வு அர்த்தமுட னமையும்!

எம் . ஜெயராமசர்மா .. மெல்பேண் .. அவுஸ்திரேலியா 
கடவுள் ஒருநாள் தமிழரைப் பார்க்கத்
தமிழ்நாடு வந்தாராம்
தமிழர் வெறியாய் ஓடித்திரிவதைத்
தெரிவினில் கண்டாராம்
காரணம் புரியா நிலையில் கடவுள்
கைகட்டி நின்றாராம் !

தோரணம் கட்டித் தமிழர்கள் எல்லாம்
துடிப்புடன் நின்றாரும்
ஆரது ஆட்சியைப் பிடிக்கிற தென்று
அடிபட்டுக் கொண்டாராம்
வாயிலே வந்ததை வார்த்தைகள் கொட்டி
வாக்குகள் கேட்டனராம் !
தோழமை என்றவர் சொல்லிலே சொல்லி
சொத்தெலாம் குவித்தனராம்
நாளைய வளர்ச்சி எதனையும் எண்ணா
நல்லதைச் சுருட்டினராம்
வேரொடு களைவோம் ஊழலை என்றவர்
விண்ணென உயர்ந்தனராம்
வியர்வையில் நின்றவர் அத்தனை பேருமே
விக்கித்து நின்றனராம் !
மதுவினை ஒழிப்போம் என்றுமே சொன்னவர்
மதுக்கடை திறந்தனராம்
மதியினை இழந்து மற்றவர் நின்றிட
மரமென இருந்தனராம்
நீதியைக் கையில் எடுத்துமே நின்று
நிட்டூரம் செய்தனராம்
சாதியைக் காட்டி சமயத்தைக் காட்டிய
சரித்திரம் படைத்தனராம் !

வேதனையில் மக்கள் வாழ
விதம்விதமாய் வீடு கட்டி
காதலுடன் கார் வாங்கி
கணக்கின்றிப் பணம் பதுக்கி
உலக வங்கி அனைத்திலுமே
உழைப்பின்றி வந்த பணம்
உபயோகப் படும் என்று
ஒதுக்கி வைப்பார் பக்குவமாய் !
படிப்பறியார் உடுப்பறியார் படுத்திருக்க இடமறியார்
பசியாற வழியின்றி பரிதவிக்கும் நிலையினிலே
துடித்தெழுந்து ஓடிவந்து துயர்துடைக்கும் மனமின்றி
அடித்தெழுந்து பேசுகின்றார் ஆட்சியிலே அமர்வதற்கு !
காந்திபோட்டி போடவில்லை கவிதாகூர் விரும்பவில்லை
சாந்திமனம் கொண்டவர்கள் சண்டைதனை விரும்பவில்லை
சரியான தேர்தலெனின் சண்டைக்கே இடமில்லை
சனநாயகம் தளைக்கச் சரியான வழிசமைப்போம் !
குத்து வெட்டு அத்தனையும்
சுத்தி வந்து பார்த்துவிட்டு
சத்தியமாய் தமிழ் நாட்டை
தான் நினைப்ப தில்லையென
உத்தமராம் எம் கடவுள்
உடனடியாய்ச் சென்று விட்டார்
அத்தனைபேர் மனம் மாற
அவர் இரங்க வேண்டுவமே !