ஏறன் சிவா
வற்றாத கற்பனை வேண்டும் நாளும்
வளமான சிந்தனை வேண்டும் — கவிச்
சொற்சுடர் மதிதனில் வேண்டும் அவை
சோர்வுறாப் பயன்தரல் வேண்டும் — கருத்து
முற்றிய கவிதைகள் வேண்டும் அவை
முடிவிலா இசைபெறல் வேண்டும் — அதற்கு
நற்றமிழ் துணைவரல் வேண்டும் நெஞ்சின்
நடுவமர்ந் தருள்செய வேண்டும்!
மலரென் றழைத்தாரடி — உன்றன்
மனத்தைக் குழைத்தாரடி — தோழி
வலிமை யிழந்தாயடி!
அழகைப் புகழ்ந்தாரடி — உன்றன்
அறிவை யிகழ்ந்தாரடி — தோழி
ஆற்றல் குறைந்தாயடி!
நிலவும் முகிலுமென்றே — உன்றன்
நினைவை மறைத்தாரடி — தோழி
நிழலாய்ச் சரிந்தாயடி!
வலையை விரித்தாரடி — உன்றன்
வாழ்வைப் பறித்தாரடி — தோழி
மருண்டு விழித்தாயடி!
தென்றல் எனவுரைத்தே — உன்றன்
திண்மை யழித்தாரடி — அதைத்
தெரிய மறந்தாயடி!
கனவைக் கலைத்தாரடி — அதில்
கல்லை விடுத்தாரடி — தோழி
காய மடைந்தாயடி!
காதல் மறுத்தாரடி — உன்றன்
கண்ணீர் பழித்தாரடி — தோழி
கனவுக்குள் வாழ்ந்தாயடி!
ஓதும்உன் சொல்லைத் — தீயில்
உதறி எறிந்தாரடி — தோழி
ஊமையாய் நின்றாயடி!
வஞ்சி உனக்கெதிராய் — இங்கு
வளருங் களைபிடுங்க — உளத்தில்
மாற்றங்கள் காண்பாயடி!
நெஞ்சு நிமிர்வாயடி — தோழி
நெருப்பாய் இருப்பாயடி — உன்றன்
நிலையை உயர்த்துதற்கே!
– ஏறன் சிவா
எதிர்பார்த்த உன்வெற்றி
இடம்மாறிப் போகலாம்!
புதிதாகத் தோல்விகளும்
போர்த்தொடுத்து நிற்கலாம்!
சதியெல்லாம் உனக்கெதிராய்
சாட்டையைச் சுழற்றலாம்!
சிதறாதே! சிதையாதே!
சிறகுண்டு பறந்துபோ!
நெஞ்சத்தில் உதிப்பதெல்லாம்
நேராமல் தவறலாம்!
பஞ்சுபோன்ற உன்னிதயம்
பாரத்தைச் சுமக்கலாம்!
நஞ்சுணவை அமிழ்தமென்று
நம்பினோரே ஊட்டலாம்!
அஞ்சாதே! துஞ்சாதே!
அத்தனையும் கடந்துபோ!
நாளெல்லாம் உன்நிலையோ
நலிந்துகொண்டே இருக்கலாம்!
மாளாத துயரத்தில்
மனம்சிக்கித் தவிக்கலாம்!
தாளாத உன்மேனி
தளர்ந்தொருநாள் முடங்கலாம்!
வீழாதே! தோழா..கேள்
விடிவுவரும் தொடந்துபோ!
-06/02/2019
-ஏறன் சிவா
ஓடும் காலம் ஒருநாளும்
உனக்காய் மட்டும் நிற்காது!
தேடித் துன்பம் வரும்முன்னே
தீர்த்துக் கட்ட முடியாது!
கூடி நேரம் வருமென்று
காலம் கடத்தல் கூடாது!
ஓடி நாளும் தேயாமல்
உண்மை வழியில் போராடு!
-கவிஞர் ஏறன் சிவா
நூல்பல கற்க வேண்டும்
நுண்மைகள் அறிய வேண்டும்
தோள்களில் வலிமை வேண்டும்
தொய்விலா நிலையும் வேண்டும்
சூழ்ச்சிகள் உணர வேண்டும்
சுடர்மிகு அறிவு வேண்டும்
வேல்விளை யாட்டும் வேண்டும்
வெற்றியின் நட்பு வேண்டும்!
கூரிய பார்வை வேண்டும்
கொள்கையில் தெளிவு வேண்டும்
சீரிய திறமை வேண்டும்
செந்தமிழ் துணையாய் வேண்டும்
நேரிய சிந்தை வேண்டும்
நெற்றியில் ஒளியும் வேண்டும்
பாரினை வெல்லும் பாட்டை
பராசக்தி அருள வேண்டும்!
-30/01/2019
———————————————
கவிஞரைப் பற்றி