Blog

கற்றல் ஒரு ஆற்றல் 52
க. பாலசுப்பிரமணியன்

மூளையும் கற்றலின் திறன்களும்

கற்றலின் வலைத்தளங்கள் நிரந்தரமாக மாறிக்கொண்டிருப்பதால் ஒவ்வொருவரின் கற்றலின் திறனும் ஆற்றல்களும் மாறிக்கொண்டிருக்கும் வாய்ப்பு அதிகமாக உள்ளது. ஒரு மாணவனின் கற்றலின் வேகமும் திறனும் கீழ்கண்ட சில நிர்பந்தங்களால் தொடர்ந்து மாற்றி அமைக்கப் பட்டு வருகின்றது.
1. தேவை
2. ஆர்வம்
3.சூழ்நிலைகள்
1. கவனம்
2. மகிழ்வு நிலை
3. எளிமை
கற்றலுக்கான தேவை அதனுடைய வேகத்தையும் திறனையும் அதிகமாக நிர்ணயிப்பது மட்டுமின்றி பாதிக்கவும் செய்கின்றது. இதை கற்றுத்தான் ஆகவேண்டும் என்ற நிர்பந்தம் ஏற்படும் பொழுது ஆர்வத்தின் நிலை எவ்வளவாக இருந்தாலும் விருப்பு இன்றியும் கூட கற்றல் வேகமாக நடைபெறுகின்றது. ஆனால் இப்படிக் கற்றுக்கொள்ளப் பட்ட பதிவுகள் பல நேரங்களில் அந்தத் தேவைகள் மறைந்த பின்போ அல்லது அவைகளின் முக்கியத்துவம் பாதிப்பு ஆகியவை குறைந்தபின்போ குறைந்திடவோ அல்லது விலகிடவோ வாய்ப்புக்கள் அதிகமாகின்றன. சில நேரங்களில் கற்றலின் தேவைகள் அதுவரை அந்தத் தனி நபரிடம் இல்லாத ஆர்வத்தை உண்டாக்குவதற்க்கோ அல்லது ஊக்குவிப்பதற்கும் வாய்ப்பு இருக்கின்றது

ஒருவர்க்கு கற்றலில் ஆர்வங்கள் ஏற்பட பல காரணங்கள் உண்டு. பல நேரங்களில் அவர்களுடைய மரபணுக்களின் வழியாக குடும்பத்தில் வழி வழியாக ஒரு கற்றலில் திறனில் இருக்கின்ற ஆர்வம் காரணமாக வர வாய்ப்புண்டு. உதாரணமாக பாடல், ஆடல், நடிப்பு, கவிதை, விளையாட்டு, இலக்கிய ஆர்வங்கள் இவைகளை சொல்லலாம். இதுவே அவர்களின் வளர்ப்புச் சூழ்நிலைகளில் உரமாக அமைந்துவிடுவதால் அது கற்றலுக்கு ஏதுவான ஆர்வத்தை உண்டாக்குவதிலும் பேணுவதிலும் மேன்மைப்படுத்துவதிலும் உதவுகின்றது.

இதைத் தவிர சிறு வயதில் ஏற்படுகின்ற மனத்தாக்கல்கள் சில உந்துதல்கள் பாதிப்புக்கள் ஆர்வத்தை வளர்ப்பதற்கும் குறைப்பதற்கும் வாய்ப்புக்கள் தருகின்றன.

சில நேரங்களில் ஆர்வங்கள் சூழ்நிலைகளின் காரணமாக ஏற்பட்டு அந்தச் சூழ்நிலைகள் மறைந்தவுடன் விலகிவிடுகின்றன. உதாரணமாக, குழந்தைப் பருவத்தில் சில விளையாட்டுக்களைக் கற்றுக்கொள்வதும், மற்றவர்கள் கற்றுக்கொள்கிறார்கள் என்பதற்காக போட்டிக்காகவோ அல்லது தன் திறன்களை மற்றவர்களின் திறன்களுடன் ஈடுகட்டுவதற்காகவோ ஆர்வங்களும் அதற்கான கற்றலும் மலர்ந்து பின் உதிர்ந்து விடுகின்றன.

சில நேரங்களில் மாணவர்கள் தங்களுடன் கூடப் படிக்கும் மாணவர்கள் IIT , பொறியியல், மருத்துவம் போன்ற படிப்புக்கான தேர்வுகளுக்காக தயாரிக்கும் பொழுது தாங்களும் அவர்களுடன் இணையாகப் போட்டியிட வேண்டும் என்ற ஒரு காரணத்திற்க்காக மட்டும் அதில் ஆர்வத்தை ஏற்படுத்திக்கொண்டு, இந்த ஆர்வம் சில நாட்களிலே தங்கள் திறன் குறைவாலோ அல்லது உண்மை ஆர்வத்திலிருந்து மாறுபட்டோ விலகியோ இருப்பதாலோ கற்றலை நிறுத்திக் கொள்வதை பார்த்திருக்கின்றோம்.

பல நேரங்களில் உள்ளிருக்கும் ஆர்வத்தின் பரிமாணங்கள் தெரியாமல் போனாலோ அல்லது வீடுகளிலும் உறவுகளிலும் அந்த ஆர்வங்களை வளர்ப்பதற்கான உரம் கிடைக்காமல் போனாலோ அதனைச் சார்ந்த கற்றல் விலகிவிடுவதைப் பார்க்கமுடிகின்றது. பெற்றோர்களின் கட்டாயத்தின் காரணமாக வளர்ந்து மலர்ந்த சில கற்றல்கள் ஆர்வமின்மையின் காரணமாக சாதாரணத் தொழில் நிர்பந்தங்களுக்கு வழி வகுத்தாலும் பின் காலத்தில் அந்த நபர்களுக்கு அந்தத் தொழில் சிறப்படையாமல் இருக்க வாய்ப்புண்டு.

எத்தனையோ முறைகள் தேர்வு மையங்களில் மருத்துவம் மற்றும் மற்ற கல்லூரி நுழைவுகளுக்கான தேர்வுகள் நடக்கும் பொழுது மாணவ மாணவிகள் ஒன்றுமே எழுதாமல் இருந்ததைக் கண்கூடாகப் பார்த்திருக்கின்றேன். ‘எனக்கு இதில் ஆர்வமில்லை. எங்க அப்பாதான் கட்டாயப் படுத்தினார். அவர் வெளியே காத்துக்கொண்டிருப்பதால் நான் வெளியே போகவில்லை. கடைசி வரை உட்கார்ந்து கொண்டிருக்கவேண்டும்.” என்று பயத்திற்காகவோ அல்லது நிர்பந்தத்திற்காகவோ அமர்ந்திருப்பதைக் காணும் பொழுது துயரத்தின் எல்லையைத் தொட்டு விடுகின்றோம்.

கிட்டத்தட்ட இருபத்திஐந்து ஆண்டுகளுக்கு முன்பு வெளி மாநிலத்திலிருந்து என்னைச் சந்திக்க வந்த ஒரு பள்ளி முதல்வர் தனது மகனையும் கூட அழைத்து வந்திருந்தார். “எனது பள்ளியில் பல மாணவர்களுக்கு IIT, பிலானி போன்ற இடங்களில் தேர்வு கிடைத்துள்ளது. என் மகனுக்கு மட்டும் முடியவில்லை. கணக்கில் வெறும் 45 மதிப்பெண்கள் வாங்கியிருக்கின்றான். என்ன செய்ய ? இவனுக்கு ஏதாவது தனியார் பொறியியல் கல்லூரியில் சேர வாய்ப்புக் கிடைக்குமா ?” என்று வேதனையுடன் வினவினார். அவருடைய மகனிடம் தனியாகப் பேசிய பொழுது அவனோ ” எனக்கு கணக்கில் ஆர்வமில்லை. பொறியியலில் அதிகமான ஆர்வமில்லை. அப்பா சொல்கிறாரே என்ற ஒரே காரணத்திற்காகத் தான் கூட வந்தேன் ” என்ற உண்மையைச் சொன்னான்.

அவனுடைய தந்தையிடம் மிகப்பபொறுமையாகப் பேசி அறிவுரை கூறியபின் அந்தப் பையனை அருகில் உள்ள சமையல் மற்றும் உணவு நிர்வாகம் பற்றிய படிப்பினைக் கற்றுத் தரும் கல்லூரியில் சேர்த்தார். வேதனையுடன் திரும்பிய அவரை சுமார் இருபது ஆண்டுகளுக்குப் பின் சந்தித்த பொழுது கட்டாயப்படுத்தி உணவுக்காக என்னை அழைத்துச் சென்ற அவர் ஒரு பெரிய நட்சத்திர ஹோட்டலில் பெரிய பதவியில் இருந்த தன் மகனை மீண்டும் அறிமுகப்படுத்தி ” என்னைப் போல் நாலு பங்கு சம்பளம் அவனுக்கு ” என்று பெருமைப் பட்டார். அந்த மாணவன் ஆர்வத்துடன் படித்து முன்னுக்கு வந்தது பலருக்கு எடுத்துக்காட்டாக அமைந்தது.

தொடரும்…
November 14, 2016
கறுப்பு பணம்

ரா.பார்த்தசாரதி

இந்திய பிரதமர் கறுப்பு பணம் நீக்க அதிரடி வழி கண்டார்

அதிகம் புழங்கும் ரூபாய் ஐந்நூறு, ஆயிரம் ரூபாய் நோட் டுக்களே

கறுப்பு பணம் வைத்திருப்பவர்களுக்கே திண்டாட்டம்

ஏழை, நடுத்தர மக்களுக்கோர் சில நாட்களே திண்டாட்டம் !

பணவீக்கமும், கறுப்பு பணத்தினால் ஏற்படுகின்றதே

விலைவாசிகள் அதிகமாகி மக்களை தடுமாற செய்கின்றதே

அதிக பணம் கொடுத்து குறைந்த பொருள் வாங்கப்படுகின்றதே

பல ஆண்டுகள் கறுப்பு பணத்தால் வளர்ச்சி தடை பட்டதே !

பல கோடி ரூபாய்கள் குவியலாக்கி எரிக்கப்படுகின்றதே

நல்ல உள்ளம் கொண்டவர்களால் இலவச உணவு அளிக்கப்படுகின்றதே

மக்கள் படும் துன்பத்தை கண்டு அரசும் ஆவண செய்கின்றதே

பணம் பதுக்குபவர்களுக்கு இது ஒரு சாட்டையடியானதே !

கறுப்பு பண ஒழிப்பால் லஞ்சமும் சற்றே கட்டுப்படுமே

உண்மை விலை நிர்ணயித்து பொய்யான விலை தவிர்க்கப்படுமே,

பொருள்களின் விலைகள் சற்றே கட்டுப்பாட்டிற்குள் வருமே

நல்லவை நடக்க சில துன்பங்களை எதிர்கொள்ள வேண்டுமே !

கறுப்பு பண ஒழிப்புக்கு மக்களும் உதவ முன் வரவேண்டும்

இவைகள் எல்லாம் நாட்டின் வளர்ச்சிக்கு என எண்ணவேண்டும்

நாட்டில் கறுப்பு பண முதலைகளை அடையாளம் காட்டவேண்டும்

அரசுடன் ஒத்துழைத்து நாமும் உதவிக்கரம் நீட்டவேண்டும் !

November 14, 2016
படக்கவிதைப் போட்டி .. (86)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

திருமதி. ராமலஷ்மி எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 19.11.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014-ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

November 14, 2016
குறளின் கதிர்களாய்…(145)

செண்பக ஜெகதீசன்

வைத்தான்வாய் சான்ற பெரும்பொரு ளஃதுண்ணான்

செத்தான் செயக்கிடந்த தில்.

       –திருக்குறள் –1001(நன்றியில் செல்வம்)

புதுக் கவிதையில்…

சேர்த்த பெரும்பொருளைச்

செலவிடாமல் அனுபவிக்காது

உண்ணாமல் உயிர்வாழ்பவன்,

ஒப்பாவான் செத்தவனுக்கே..

ஆகப்போவது

அவனால் ஏதுமில்லை…!

குறும்பாவில்…

பெரும்பொருள் சேர்த்ததை உண்டனுபவிக்காதவன்,

பிணம்தான் உயிருடனிருந்தாலும்-

பயனேதுமில்லை அவனால்…!

மரபுக் கவிதையில்…

ஓடி யாடி சம்பாதித்து

   ஒன்றாய் வீட்டில் சேர்த்துவைத்து,

நாடி ஏதும் உண்ணாமல்

   நன்றாய் எதையும் நுகராதே

வாடி வாழும் மனிதனவன்

  வாழ்ந்தும் நிசமாய்ச் செத்தவனே,

தேடிப் பிடித்துப் பார்த்தாலும்

  தேறா தவனால் எப்பயனுமே…!

லிமரைக்கூ..

பலவாய்ச சேர்த்த சொத்தை

பயனுற அனுபவிக்காதவன் வாழ்ந்தும் பிணமே,

பயனிலா அவன்வெறும் செத்தை…!

கிராமிய பாணியில்…

செலவுபண்ணு செலவுபண்ணு

நல்லமொறயா செலவுபண்ணு..

ஓடியாடி சம்பாதிச்சி

வீடுநெறய குமிச்சிவச்சி

எதயும் எடுத்து அனுபவிக்காம

ஒண்ணுந்திங்காமப் போறவந்தான்

உசிரோடயிருந்தாலும் பொணந்தான்,

அவனால

யாருக்குமில்ல பலன்தான்..

அதால,

செலவுபண்ணு செலவுபண்ணு

நல்லமொறயா செலவுபண்ணு…!

November 14, 2016
நான் அறிந்த சிலம்பு – 227

-மலர் சபா

மதுரைக் காண்டம் – அழற்படு காதை

நால்வகை வருணபூதமும் நீங்குதல்

பாண்டிய மன்னன் நீதி தவறும் அந்த நாளில்
இம்மதுரை நகர்
தீக்கிரையாகும் செய்தி ஒன்றுண்டு என்பதனை
அறிய வேண்டிய முறைப்படி முன்பே அறிவோம்.
அதனால் காவல் புரிவதை விடுத்து
இவ்விடத்தை விட்டு நீங்குதல் இயல்பானதேயாகும்.

இங்ஙனம் பூதங்கள் நான்கும்
தமக்குள் பேசி முடிவுக்கு வந்தபின்,
தன் முலையாலே நகரைத் தீக்கிரையாக்கக் கருதிய
வீரமங்கை கண்ணகி கண்முன்
நகரத்தை விட்டு நீங்கின.

மறவோர் சேரியில் எரி பரவுதல்

தானியங்கள் விற்கும் கடைவீதியும்
கொடிபறக்கும் தேர் செல்லும் வீதியும்
நால்வகை மக்கள் பகுதி பகுதியாக
வாழும் வீதிகளும்,
வீரம்மிக்க குரங்காகிய
அனுமனைக் கொடியில் எழுதி உயர்த்தி,
காண்டிபம் என்னும் வில்லினை ஏந்தி
வீரனாகிய அர்ச்சுனன்
காண்டாவனத்தைத் தீக்கு இரையாக்கிய
அந்நாளில் வனத்தில் வாழ்ந்த விலங்குகள்
கலங்கியது போல் கலங்கி நிற்கின்றன.

அறவோர் வாழும் தெருவில் எல்லாம்
தீ தன் தழலைப் பரவ விடாமல்,
தீவினை செய்பவர் நிறைந்த
இடங்களில் மட்டும் அதிகமாகப் பரவியது.

*****

படத்துக்கு நன்றி: கூகுள்

November 14, 2016
சிந்தையில் நிற்கும் சிட்னி திருவிழா!

-எம். ஜெயராமசர்மா, மெல்பேண், அவுஸ்திரேலியா

ஆங்கில நாட்டினிலே அழகுதமிழ் சபையேறி அனைவரையும் அணைத்துநின்ற அதிசயத்தைச் சொல்லுகிறேன். வெள்ளையர்கள் தாமும் விருப்புடனே சேலையுடன் துள்ளுதமிழ் விழாக்காண துடிப்புடனே வந்துநின்றார். நல்லதமிழ் பேசிநின்ற நம்முடைய பிள்ளைகளை நாலுபேர் அறிவதற்கு நற்சபையாய் அமைந்ததுவே!

கவிகம்பன் விழாவினையே கருத்துடனே நடத்திநின்ற காளையரைக்கன்னியரைக் கனம்பண்ணல் முறையன்றோ. ஜெயராமின் துணிவாலும் பணிவான குணத்தாலும் ஜெயமான விழாவாக அமைந்தமையை அறிந்திடுவோம். யாழ்மண்ணில் நடக்கின்ற விழாவாக நான்கண்டேன். ராஜ கதிரைகளும் ராஜசபை அலங்காரமும் ஜோராக இருந்ததை யாவருமே ரசித்தார்கள். ஜெயராஜின் கற்பனைகள் சிந்தாமல்,சிதறாமல் அவரின் மனத்தைப் பிரதிபலிப்பதாக மண்டப ஒழுங்கமைப்பு, அலங்காரம், வரவேற்று உபசரித்தல், அத்தனையும் அமைந்தமையைக் கட்டாயம் குறிப்பிடவே வேண்டும்.

அக்கால மன்னர்கள் தமிழுக்கு உழைத்தோர்களைக் கெளரவித்து அவர்களுக்குக் குடை, கொடி, ஆலவட்டம் சகிதம் சபைக்கழைத்து பரிசில்கள் வழங்கினார்கள் என்று இலக்கியங்கள் வாயிலாகப் படித்திருக்கின்றோம்.

இக்காலத்தில் மன்னர்களுக்குப் பதிலாக அரசாட்சியாளர்கள் தங்கள் மனம் போனபடிப் பாராட்டிப் பரிசளிப்பதையும் காண்கின்றோம். ஆனால் கம்பன்கழகம் போன்ற ஒரு அமைப்பு செய்வதைப்போல வேறு எந்தத் தமிழ் அமைப்புகளும் இப்படி ஒரு கெளரவிப்பு விழாவினைச் செய்யவில்லை என்றே கூறலாம்.

பொருத்தமானவர்களைத் தேர்வுசெய்து அவர்களுக்கு உரிய கெளரவம் கொடுத்து மனத்திலே இருத்திவைக்கும்படியான பெறுமதி மிக்க பரிசினையும் வழங்கும் நயத்தகு நாகரிகத்தினால் ஏனைய அமைப்புக்களைவிடக்கம்பன்கழகம் உயர்ந்தோங்கியே நிற்கிறது என்பதை எவருமே மறுக்க மாட்டார்கள்.

சிட்னி மாநகரில் அண்மையில் நடந்தேறிய கம்பன் விழாவில் நடந்த கெளரவிப்பைச் சோழ அரசபையில் நடந்த கெளரவிப்பாகக் கற்பனை செய்து நான் பார்க்கிறேன். அத்தனை நேர்த்தியும், சிறப்புமாக அந்த வைபவம் அமைந்திருந்தது. இதனைத் தனது மனத்தில் திட்டமிட்டுத் தனது சீடர்களுடன் இணைந்து அரங்கேற்றிய அன்புத்தம்பி ஜெயராம் அவர்களை அகமார வாழ்த்துகின்றேன்.

21 அக்டோபர் ஆரம்பமான இத்திருவிழா, அறிஞர்பலர் சிறப்பிக்க 23அக்டோபர் வரை ஆனந்தமாக நடைபெற்றது.   21, 22 அக்டோபர் திகதிகளில் நடைபெற்ற விழாவில் பங்குகொள்ளும் பாக்கியத்தை இறைவன் எனக்குக் கொடுத்திருந்தார்.இரண்டு தினங்களும் “தன்னை மறந்தாள் தன்நாமம் கொட்டாள் தலைப்பட்டாள் நங்கை தலைவன் தாளே” என்னும் நிலையில்தான் நானிருந்தேன் என்று சொல்லுவதில் பெருமகிழ்வு அடைகின்றேன்.

உண்ணும் சோறும், பருகும் நீரும், கம்பனும் கன்னித்தமிழுமே என்றிருக்கும் தம்பி ஜெயராமையும் அவரது மாணாக்கர் பரம்பரையும் பார்க்கும்பொழுது தமிழ் இனி ஒருபோது வீழாது. அதற்கு என்றுமே உயர்ச்சிதான்
என்னும் எண்ணமே எனக்குத் தோன்றியது.

சிட்னியில் நடந்த கம்பன் திருவிழாவில் வயது வேறுபாடின்றி மிகச் சிறியவரும் இடைத்தரமானவரும், நடுத்தரமானவரும், முதிர்வானவர்களும் நிகழ்ச்சிகளை அலங்கரித்தமை மிகவும் அற்புதமாக இருந்தது.

அதிகமான விழாக்களில் சற்று முதிர்ந்தவர்களே முன்னிலை வகிப்பார்கள். ஆனால் பத்தாவது ஆண்டு கம்பனது திருவிழா வயதினைத்தூக்கி ஒருமூலையில் வைத்துவிட்டு வளரிளம் குருத்துக்களுக்கு வாய்ப்பளித்து ஊக்கப்படுத்தியமை மிகவும் முக்கிய விடயமாக அமைந்ததைக் கட்டாயம் சொல்லியே ஆகவேண்டும்.

முதல் நாள் கவியரங்கம் கலாநிதி ஶ்ரீ பிரசாந்தன் நடுவராயிருக்க நடந்தது. இதில் கலந்தவர்கள் இளைஞரும் அல்லர் முதியவர்களும் அல்லர். ” எண்ணங்களும் வண்ணங்களும்” என்பதே கவியரங்கத் தலைப்பு. இதில் பங்கு கொண்டவர்கள் வெளிப்படுத்திய விதங்களைப் பார்த்து உண்மையில் வியந்தேவிட்டேன். சாதாரண வண்ணங்களுக்குள் இவ்வளவு விஷயங்களா என்று எண்ணத்தோன்றியது. இதில் பங்கு கொண்டவர்களில் தமிழ்முரசு ஆசிரியர் திரு. பாஸ்கரன் அவர்களை மட்டுமே எனக்குத் தெரியும். ஏனையவர்களை அன்றுதான் மேடையில் கண்டேன். பாஸ்கரன் அவர்கள் ‘முடிவுறா முகாரி’ என்னும் கவிதைநூலினை வெளியிட்டிருந்தார். நானும் அதனை வாசித்து விமர்சனமும் எழுதுயிருக்கிறேன். பாஸ்கரன் புதுக்கவிதை தானே பாடுவார். அவர் எப்படி இதற்குள் வந்தார் என்று நான் யோசித்துக்கொண்டிருக்கும்போதே கறுப்பு வண்ணம் பற்றிக் கவிபாட வந்துவிட்டார்.    கொம்யூனிசமாகக் கொட்டப்போகிறாரே என்று எண்ணிய எனக்கு ஏமாற்றமே காத்திருந்தது. பாஸ்கரனின் மரபுக்கவிதை பக்தியுடன் பின்னிப்பிணைந்து எதுகை மோனையுடன் சந்தத்தமிழாய் கொட்டியது கண்டதும் உண்மையிலே பிரமித்தே விட்டேன். கறுப்பென்றால் வெறுக்கவேண்டாம் என்னும் கருவை மிகவும் நயமாக பாஸ்கரன் தந்தது எனக்குள் உறைந்துவிட்டது என்பதை மகிழ்வுடன் பகிர்ந்து கொள்கின்றேன்.

வண்ணங்களைப் பற்றி உலகு பார்க்கும் பார்வை, உலக மக்கள் பார்க்கும் பார்வை, சாதாரணமாக மக்கள் பார்க்கும் பார்வை, இலக்கியங்கள் பார்க்கும் பார்வை எனப் பல பார்வைகளை பலவண்ணமாய் இக்கவியரங்கம் விருந்தாக அளித்தது. கவியரங்க நடுவரின் புன்சிரிப்பும், சுவையான, கலகலப்பான தமிழ்க் கவிதையும் கவியரங்கின் அழகுக்கு அழகூட்டியது என்பது எனது அவிப்பிராயமாகும்.

இரண்டாம் நாள் திருவிழா இளைஞரையும் சிறுவர்களையும்முன்னிறுத்தி ஆரம்பமாகியது. தமிழ்நாட்டிலிருந்து வருகை தந்திருந்த தமிழ்ப்பேராசிரியர் வி. அசோக்குமார் அவர்களது தலைமையில், “திட்டம் போட்டு எழுதினானே” என்னும் மகுடத்தில் காதல், தியாகம், வீரம், தாய்மை, நட்பு, வஞ்சகம் என்னும் பார்வையில் இளையர் பட்டாளம் இனிய தமிழைப் பொழிந்துநின்றார்கள்.

அவுஸ்த்திரேலிய மண்ணில் உள்ள இளைஞர்கள் இங்கிலீசு மட்டும்தான் பேசுவார்கள். தமிழென்றால் எட்டவே நிற்பார்கள் என்னும் எண்ணத்தைத் தவிடு பொடியாக்கும் விதத்தில் இந்த நிகழ்ச்சி அமைந்திருந்தது. அவர்கள் அனைவரையும் அகமாரப் பாராட்டி வாழ்த்துகிறேன். இவர்களால் இனிய தமிழ்இன்ப உலா வரும் என்பதில் எள்ளளவும் சந்தேகமே இல்லை.

இளைஞரைத் தொடர்ந்து வயதிலே மூத்தோர்கள் பலர் பங்கு கொள்ள, கம்பனது கண்பார்வையில் இருக்கும் கம்பவாரிதி ஜெயராஜின் தலைமையில் சிந்தனை அரங்கம் இடம்பெற்றது. இப்படியும் சிந்திக்க முடியுமா என்று சபையினரையே அதிரவைத்தது இவ்வரங்கம்.    கம்பவாரிதியின் சொல்லாற்றலால் வாதிட்டவர்கள் மயங்கியே விட்டார்கள். சபையைக் கேட்கவா வேண்டும்? ஆடாமல் அசையாமல் யாவருமே கம்பவாரிதியையே கண்கொட்டாமல் பார்த்தபடி அவர் பேசுவதைக் கேட்டபடி இருந்தார்கள். யாவரையும் இனிய தமிழ் இறுக அணைத்தபடியால் நிகழ்ச்சி முடிந்துவிட்டதா என்பதே தெரியாமல் யாவரும் இருந்தார்கள் என்பதே உண்மை. அதற்கு நானும் விலக்கல்ல!

சிறுவர்களைக் கொண்டு கம்பனது தெரிந்தெடுத்த பாத்திரங்களைக்கண்முன்னே நிறுத்திய நிகழ்ச்சியாக இது இருந்தது. பாத்திரப் பொருத்தமாகச் சிறுவர்களைத் தேர்ந்தெடுத்து அவர்களுக்கு உரிய ஆடை ஆபரணங்களுடன் மேடையில் உலாவர விட்டமையை யாவருமே மனதார சித்தார்கள். அந்தக்குழந்தைகளையும் அன்புடன் நேசித்தார்கள். மனத்தில் பதியும் நிகழ்ச்சி என்று சொல்லவே வேண்டும். அவர்களை ஒழுங்கு படுத்தியவர்கள் பாராட்டுக்கு உரியவர்களே.

கம்பன் கழகத்தால் சிறுவர்களுக்கும் இளைஞர்களுக்கும் அவர்களின் திறலுக்காகப் பலநிலைகளில் பரிசுகள் வழங்கப்பட்டன. அதைத்தொடர்ந்து சான்றோர் விருதும் மாருதி விருதும் வழங்கும் நிகழ்சி இடம்பெற்றது.

ஆங்கில மந்திரிகள் அரங்கினில் அமர்ந்து இருக்கச் சான்றோர் விருதுகள் வழங்கப்பட்டன. அதைத்தொடர்ந்து மாருதி விருது விழா மிகவும் கோலாகலமாகத் தொடங்கியது. நிறைவில் கம்பவாரிதியின் தலைமையில் மிகச் சிறப்பான பட்டிமண்டபம் இடம்பெற்றது. மீண்டும் தமிழ் மாரிப் பொழிந்தது, சபையிலே ஆனந்தம் பெருகியது.

அக்டோபர் மாதத்தில் ஆனந்தம், அகநிறைவு அத்தனையும் தந்தவிழாவாக சிட்னி மாநகரில் நடைபெற்ற கம்பனது திருவிழாவைக் காணுகிறேன். இதுதமிழ்த் திருவிழா. தமிழைத் தழைக்கச் செய்யும் பெருவிழா. எங்குச் சென்றாலும் தமிழ் தமிழ்தான் என எடுத்தியம்பும் விழா என்பதே எனது மனத்தில் எழுந்த எண்ணமாகும். இப்படி விழாக்கள் நடந்தால் எல்லோரும் மகிழ்வடைவார். எங்கள் தமிழ் பெருமையுறும்.

“கம்பனைப் படிப்போம்; கன்னித்தமிழ் காப்போம்!”

November 14, 2016
வாலாஜா ஸ்ரீ தன்வந்திரி ஆரோக்ய பீடத்தில் நவம்பர் 13 ம் தேதி ஸம்வத்ஸர அபிஷேக விசேஷம் ஹோம சப்தாஹம் இனிதே ஆரம்பமானது.

வேலூர் மாவட்டம், வாலாஜாபேட்டை, அனந்தலை மதுரா, கீழ்புதுப்பேட்டையில் அமைந்துள்ள ஸ்ரீ தன்வந்திரி பீடத்தில், 28ம் தேதி (13.11.2016) முதல் கார்த்திகை மாதம் 4ம் தேதி (19.11.2016) வரையிலும் ஸ்ரீ ஆரோக்ய லக்ஷ்மி ஸமேத தன்வந்திரி பெருமாள் மற்றும் இங்கு பிரதிஷ்டை செய்துள்ள இதர 73 விதமான பரிவார தேவதைகளுக்கும் கயிலை ஞானகுரு டாக்டர் ஸ்ரீ முரளிதர ஸ்வாமிகள் ஆக்ஞைப்படி “ஸம்வத்ஸராபிஷேகம்” சப்தாஹமாக நடைபெற உள்ளது.

இதில் முதல் நாளான இன்று 13.11.2016 கோ பூஜை, வேத பாராயணம், விக்னேஸ்வர பூஜை போன்ற பூர்வாங்க பூஜைகளுடன் தொடங்கப்பட்டு யாகங்கள் சிறப்பாக நடைபெற்றது.

மேலும் இந்நிகழ்ச்சியின் போது ‘Danvantri Arogya Peedam – A National Temple’ எனும் ஆங்கில நூலானது வெளியிடப்பட்டது. மாண்புமிகு சென்னை உயர்நீதி மன்ற நீதிபதி மகாதேவன் அவர்கள் வெளியிட உயர்திரு. K.மணிவண்ணன், மாவட்ட வருவாய் அலுவலர், வேலூர். டாக்டர். சதீஷ், சென்னை, திரு.K.ராதாகிருஷ்ணன், காவல் துறை தலைமை இயக்குநர், சிவில் சப்ளையிஸ், சென்னை. திரு.முருகையா IAS, மாநில ஆணையாளர், மாற்றுத்திறனாளிகள் நலம், சென்னை. டாக்டர். கோதண்டராமன், பஞ்சவடி, திரு.P.V.V.மூர்த்தி, ஹிந்து நிருபர், வேலூர், டாக்டர். கோபால்-கனகலட்சுமி, பெங்களூர், டாக்டர் விஸ்வஜா, சென்னை ஆகியோர் பெற்றுக்கொண்டனர்.

இவ்வைபவங்களில் சுற்றுப்புற நகர பொதுமக்கள், அருளாளர்கள், முக்கிய பிரமுகர்கள் மற்றும் தன்வந்திரி பக்தர்கள் பங்கேற்று குருவருளுடன் திருவருள் பெற அழைக்கின்றோம். மேற்கண்ட ஏழு நாட்களும் சிறப்பு அன்னதானத்துடன், கலை நிகழ்ச்சிகள், இசை நிகழ்ச்சிகள், ஆன்மிக சொற்பொழிவுகள் நடைபெறும். இந்த தகவலை தன்வந்திரி குடும்பத்தினர் தெரிவித்தனர்.

November 13, 2016
2016 நவம்பர் 14 ஆம் நாள் தெரியும் நிலா, 70 ஆண்டுக்கு ஒருமுறை வரும் பேருருவப் பெருநிலவு !

சி. ஜெயபாரதன் B.E.(Hons) P.Eng (Nuclear) கனடா

http://www.bing.com/videos/search?q=extreme+super+moon&qpvt=Extreme+Super+Moon&FORM=VDRE

+++++++++++++++

+++++++++++++++

பூமியின் உடற் சதையி லிருந்து
பூத்தது வெண்ணிலவு !
நீள் ஆரத்தில் தெரியும் சிறு நிலவு !
குறு ஆரத்தில் பெருநிலவு !
பூமித் தாயிக்குப் பரிவுடன்
ஒருமுகம் காட்டி
மறுமுகம் மறைப்பது நிலவு !
அண்டையில் சுற்றிய
முரண்கோள் தியா”
பண்டைப் புவியுடன் மோதி
உருண்டை யாய்த்
திரண்டது நிலவு !
பூமியும் நிலவும் ஒரே ஒரு
பிண்டத்திலே
உண்டான
உண்டைக் கட்டிகள் !
தாய்ப் புவியும் சேய் நிலவும்
கைகோர்த் தாடும்
அம்மானைப் பந்துகள் !
பூமியின் நீர் ஊற்று போல்
நிலவுக் குள்ளும்
நீர்த் தடாகம் இருக்கலாம் !
குளிர் நீரில் நெளிந்து வாழும்
உயிர் இம்மிகளும்
உலவலாம் !

++++++++++++++++++++

நிலவின் சுற்றுவீதி சுழற்சி

++++++++++++++++

பொங்கிவரும் பேரளவுப் பெருநிலவு

2016 நவம்பர் 14 ஆம் நாள் புவிக்கு மிக நெருங்கி நிலவு நகர்ந்து, பேரளவுப் பொன்னிலவாய் வானில் தோன்றிக் கண்ணைக் கவரப் போகிறது ! வடிவம் பெரிதாய்த் தெரிவதுடன் சற்று பொன்னொளியும் மிகையாய்க் காணப் போகிறது. இதைத்தான் பாரதியார் “பொங்கிவரும் பெருநிலவு” எனப் பாடிச் சென்றார் என்று நாம் சொல்லிக் கொள்ளலாம் ! புவிக்கு இம்மாதிரி நிலவின் நெருக்கம் 69 ஆண்டுக்கு ஒருமுறை நேர்ந்து, நிலவுக்குப் பெருவடிவமும், பேரொளியும் தெரியும் என்று உலக வானியல் நிபுணர் கணித்துள்ளார். அப்போது புவி மையத் தூரம், நிலவு மையத்திலிருந்து 221,524 மைல் [356,509 கி.மீ.] இருக்கும். அதாவது புவித்தளம், நிலவுத் தளத்திலிருந்து 216,486 மைல் [348,401 கி.மீ.] தூரத்தில் இருக்கும். இந்தப் பெருநிலவின் முழு வடிவம் நவம்பர் 13 இல் வட அமெரிக்கக் கண்டத்தில் தெரியும்.

1948 ஜனவரி 26 இல் நிலவு பேரளவு தெரிந்த பிறகு இப்போது மீண்டும் பெரிதாய்க் காணப் போகிறது. அடுத்து இப்படிப் பெரிதாய்த் தெரியப் போவது 2034 நவம்பர் 25 ஆம் நாளில்தான்.

புவியை நிலவு சுற்றிவரும் சுற்றுவீதி முழுவட்டமில்லை. சற்று நீள் வட்டமானது. சராசரி சுற்றுவீதி தூரம் : 238,900 மைல் [384,400 கி.மீ.]. நிலவின் குறு ஆரமும் [Perigee] நீள் ஆரமும் [Apogee] பற்பல காரணங்களால் முக்கியமாக நிலவின் நீள் ஆரம் பரிதியை நோக்குவதால், மாதா மாதம் மாறுகின்றன. நிலவின் சுற்றுவீதி நீட்சி நவம்பர்-பிப்ரவரி நாட்களில் உச்சமாகப் பரிதிக்கு நெருங்கி உள்ளது. பூமியின் சுற்றுவீதியும் சற்று [2%] நீள்வட்டமாய் உள்ளது. அதனால் பரிதியின் ஈர்ப்பியல் பாதிப்பு நவம்பர், டிசம்பர், ஜனவரி, பிப்ரவரி மாதங்களில் உச்சமாக உள்ளது.

2016 நவம்பர் 14 இல் தெரியும் பெருநிலவு ] குறு ஆர முழுநிலவு [Perigean Full Moon] என்று பெயரிடப் பட்டுள்ளது. அந்த நிகழ்ச்சிப் பெருநிலவுகள் தற்போது “பேருருவ நிலவு” [Supermoons] என்று அழைக்கப் படுகின்றன. இப்பெயரை 1979 இல் இட்ட ஜோதிடர் : ரிச்சர்டு நோல் [Astrologer Richard Nolle]. நிலவின் விட்டம் 7% பெரிதாகவும், பரப்பளவு 15% மிகையாகவும் தெரியும். அப்போது பரிதி ஒளி நிலவில் படும்போது 16% ஒளிமயம் அதிகமாகத் தோன்றும். அப்போது பூமியில் கடல் அலைகள் உயரம் சற்று உயரும். அலையடிப்பு கடல்கரைப் பரப்பை 30 அடி தூரம் உள் நோக்கி நகர்த்தும்.

+++++++++++++++++++

“நாசாவின் ஸ்டியரியோ இரட்டை விண்ணுளவிகள் பூமிக்கு அருகில் பரிதியைச் சுற்றிய பூர்வீக அண்டக் கோள் ஒன்றின் எச்சத் துணுக்குகளைத் (Remnants of an Ancient Planet) தேடி புதிரான ஓர் அரங்கை நோக்கிச் செல்கின்றன ! அந்த உளவிகள் ஏதாவது அதன் துணுக்குகளைக் கண்டால் நிலவு தோன்றிய ஒரு பெரும் புதிர் தீர்க்கப்படும் ! அந்த அண்டக் கோளின் பெயர்தான் தியா (Theia) என்பது. அது ஒரு கற்பனைக் கோள். அதனை யாரும் இதுவரை மெய்யாகப் பார்த்ததில்லை. ஆனால் ஆராய்ச்சியாளர் அக்கோள் 4.5 பில்லியன் ஆண்டுகளுக்கு முன்பு இருந்ததாகவும் அது பூமியுடன் மோதி நிலவு உருவானது என்பதாகவும் நம்புகிறார்கள்.”

மைக்கேல் கெய்ஸர் (NASA STEREO Project Scientist) (ஏப்ரல் 14, 2009)

“பூமியிலிருந்தும் நிலவிலிருந்தும் எடுத்த திரட்டு ஸிலிகேட் (Bulk Silicate) இரண்டும் ஒரே மாதிரி ஏகமூலக் கூட்டுக் கலவை (Isotopic Composition) கொண்டவை. அண்டக் கோளின் அசுரத் தாக்குதலின் போது பேரளவில் “ஏகமூலச் சமப்பாடு” (Isotopic Equilibration) அவற்றில் நேர்ந்திருக்கிறது என்பது சமீபத்தில் வெளியான அறிக்கைக்கு உடன்பாடு தெரிவிக்கிறது.

இயற்கை விஞ்ஞான வெளியீடு (Nature Science Journal)

அண்டக் கோள் தியாவின் அசுர மோதல் நியதி

4.5 பில்லியன் ஆண்டுகளுக்கு முன்னே பூமிக்கருகில் பரிதியைச் சுற்றி வந்த பூர்வீகக் கோள் ஒன்று பூமியோடு மோதிச் சிதைவுத் துணுக்குகளே நிலவு துணைக் கோளாகியது என்னும் ஓர் “அசுர மோதல் கோட்பாடு” (The Giant Impact Hypothesis) புதியதாக நிலவி வருகிறது ! அந்தக் கோள் செவ்வாய்க் கோள் அளவான “தியா” (Theia) என்று கூறப்படுகிறது. இந்தக் கோட்பாடுக்குச் சான்றளிப்பவை : நாசாவின் அபொல்லோ விண்வெளித் தீரர் நிலவிலிருந்து கொண்டு வந்த மாதிரிப் பாறைகள், மண் திரட்டுகள். அந்த மாதிரிகள் காட்டுவதென்ன ? நிலவின் தரைப் பரப்பு ஒருகாலத்தில் உருகி அமைந்தது என்பது. நிலவின் உட்கரு மிகச் சிறு இரும்பு உண்டை (Relatively Small Iron Core) என்பது.

அடுத்த சான்று. மற்ற விண்மீன் மண்டலங்களின் கோள்களில் அத்தகைய மோதல்கள் காணப்படுவது. இப்போது தீர்வு காணப்படாத வினாக்கள் : ஏன் நிலவின் மாதிரிகள் இரும்பு ஆக்ஸைடு அல்லது தீண்டா மூலகங்கள் போன்றவற்றின் (Iron Oxide or Siderophilic Elements) (Siderophile Elements : Any element that has a weak affinity for oxygen and sulfur and that is readily soluble in molten iron. Siderophile elements include iron itself, nickel, cobalt, platinum, gold, tin, and tantalum.) ஆவியாகும் மூலகங்களின் வீதங்களைக் (Ratio of Volatile Elemets) காட்டவில்லை ? இந்தக் கோட்பாடு வலியுறுத்தும் பூமியின் எரிமலைக் குழம்பு ஏறி வழிந்த தரைப்பகுதி (Magma Ocean) எப்படி பூமியில் தோன்றி யிருக்கக் கூடும் என்னும் ஐயப்பாடு !

மோதல் கோட்பாடு தோன்றிய வரலாறு

1898 ஆம் ஆண்டில்தான் ஜார்ஜ் ஹோவேர்டு டார்வின் (George Howard Darwin) (பரிணாமக் கோட்பாடு எழுதிய சார்லஸ் டார்வின் அல்லர்) பூமியும் நிலவும் பூர்வீக காலத்தில் ஒரே உடம்பாக இருந்தவை என்று கூறியவர். ஜார்ஜ் டார்வினின் கோட்பாடு என்ன வென்றல் பூர்வ பிள்ளைப் பூமியின் சுழல்வீச்சு விசையால் (Centrifugal Force) பூமியிலிருந்து உருகித் திரண்ட ஒரு கோள் வெளிப்பட்டு நிலவென்னும் துணைக்கோள் ஆனது. அவர் நியூட்டனின் யந்திரவியல் கணக்கைப் பயன்படுத்தி நிலவு முதலில் பூமிக்கு வெகு அருலில் சுற்றத் துவங்கிப் பிறகு மெதுவாக விலகிச் சென்றது என்று விளக்கினார். அந்த விலக்கு நகர்ச்சியைப் பிறகு நாசாவும், சோவியத் ரஷ்யாவும் லேஸர் ஒளிக்கதிர்களை நிலவுக்கு அனுப்பி உறுதிப்படுத்தின.

ஆனால் டார்வினின் கணித முறைப்படி மீட்சி முறையில் பின்னே சென்று நிலவைத் திருப்பி பூமியோடு இணைத்துக் கணக்கிட முடியவில்லை ! 1946 இல் ஹார்வேர்டு பலகலைக் கழகத்தைச் சேர்ந்த ரெகினால்டு ஆல்ட்வொர்த் டாலி (Reginald Aldworth Daly) ஜார்ஜ் டார்வினின் கோட்பாடை எதிர்த்து, நிலவு சுழல்வீச்சு விசையால் உண்டாக வில்லை என்றும் வேறோர் கோள் மோதித் தோன்றிய தென்றும் சவால் விடுத்தார். பிறகு டாலியின் கருத்து பல்லாண்டுகள் கழித்து 1975 இல் மீண்டும் டாக்டர் வில்லியம் ஹார்ட்மன், டாக்டர் டொனால்டு டேவிஸ் இருவரால் வெளியாக்கப் பட்டது. புதுப்பிக்கப் பட்ட அந்தக் கொள்கையே அசுர மோதல் கோட்பாடாய் இப்போது மெருகிடப் படுகிறது.

மோதிய பூர்வீகக் கோள் தியாவைப் பற்றி

இதுவரை யாரும் தியா என்னும் கோளைப் பார்த்தில்லை. தியா என்பது ஒரு கற்பனைக் கோள். தியா என்பது ஒரு கிரேக்க தேவதையின் பெயர். 4.5 பில்லியன் ஆண்டுகட்கு முன்பு பரிதி மண்டல் கோள்கள் உண்டான போது தியாவும் தோன்றியதாகத் தெரிகிறது. மோதுவதற்கு முன்பு தியா பூமியைப் போல், பூமிக்கு அருகிலே பரிதியைச் சுற்றி வந்தது. தியாவின் கோள் அளவு செவ்வாய்க் கோளை ஒத்தது. பூர்வீகக் கோள் தியா தோன்றைய போது அது பூமியின் (Lagrangian Points L4 or L5 Relative to Earth) சமகோணப் புள்ளிகளில் ஒன்றில் இருந்திருக்க வேண்டும் என்று விஞ்ஞானிகள் கருதுகிறார்கள். அதாவது பூமி சுற்றி வரும் பாதையில் பூமிக்கு 60 டிகிரி முன்னோ அல்லது 60 டிகிரி பின்னோ தியாவும் சுற்றி வந்திருக்க வேண்டும். ஏதோ ஒரு காரணத்தால் தியாவின் நிறை மீறிப் போனதால் சுற்று வீதி நிலைப்பாடு தவறிப் பாதிப்பானது ! அப்போது பூர்வீகப் பூமியின் மிகையான ஈர்ப்புச் சக்தியால் தியா இழுக்கப்பட்டு பூமியோடு மோதும் நிலை ஏற்பட்டது !

வானியல் வாசகத்தில் அந்த தியா–பூமி மோதல் மிதமான வேகமாயினும், விளைவு அசுரத் தனமானது. தியா பூமியை ஒரு கோண மூலையில் தாக்கி, அதன் இரும்பு உட்கரு பூமியின் வயிற்றுக்குள் பாய்ந்தது ! தியாவின் மேல்தட்டும் (Mantle) பூமியின் குறிப்பிடத் தக்கப் பகுதி மேல்தட்டும் சிதைந்து வெளியேறிப் பூமியைச் சுற்றத் துவங்கியது ! அந்தச் சிதைவுப் பிண்டமே ஒரு நூற்றாண்டுக்குள் உருண்டு திரண்டு நிலவானது என்று கருதப் படுகிறது. கணினிப் போலிமாடல் (Computer Simulations) அமைப்பில் கண்டபடி 2% சிதைவுப் பிண்டம் தெறித்துப் போய்ச் சமகோணப் புள்ளியில் ஒரு வளையத்தில் குப்பையாய்ச் சுற்றிக் கொண்டிருக்கும் என்று அறியப் படுகிறது. சிதைக்கப்பட்ட பாதி நிறைதான் நிலவாக உருவாகும் என்றும் போலிமாடலில் அறியப் படுகிறது.

அப்போது பூமிக்குப் பேரளவு “கோண முடுக்கமும்” (Angular Momentum) நிறையும் (Mass) அளவு கூடுகின்றன என்பது தெரிய வருகிறது. பூமி எந்த வேகத்தில் சுழன்றாலும், எந்த சாய்வில் சரிந்திருந்தாலும் மோதலுக்குப் பிறகு அதனுடைய நாள் நீட்சி 5 மணி நேரம் மிகையாகும் ! அத்துடன் பூமியின் மத்தியரேகை நிலவின் சுற்றுவீதி மட்டத்தை நோக்கி நெருங்கும் ! அந்த மோதலின் போது குறிப்பிடத் தக்க துண்டுகள் உண்டாகவும், அவை யாவும் சமகோணப் புள்ளிகளில் தங்கிக் கொள்ளும் வாய்ப்புக்கள் நேருகின்றன. அத்தகைய மோதல் சிதைவுத் துணுக்குகள், மற்ற கோள்களால் சமநிலை தடுமாறிப் பாதிப்பு ஏற்பட வில்லை யென்றால் 100 மில்லியன் ஆண்டுகள் கூட அப்புள்ளிகளில் தங்கிக் கிடக்கும் என்று ஊகிக்கப் படுகிறது !

அப்பொல்லோ பயணத்தில் கிடைத்த ஒப்பில்லா மாதிரிகள்

1969-1970 ஆண்டுகளில் நிலவுக்குப் பயணம் செய்த பல்வேறு அப்பொல்லோ குறிப்பணிகளில் (Apollo Moon Missions) வானியல் விமானிகள் கொண்டுவந்த இரசாயன மாதிரிகள் நமது துணைக்கோள் நிலவைப் பற்றி மகத்தானப் புதுமைகளை வெளியிட்டன. நிலாப் பாறைகளின் மாதிரிகளில் பூமியில் கிடைக்கும் “ஆக்ஸிஜென் ஏகமூலப் பொருட்கள்” (Oxygen Isotope Materials) போல் காணப் பட்டன. அதாவது பூமியும், நிலவும் பரிதி மண்டலத்தின் ஒரே அரங்கப் பகுதியில் (Same Region of the Solar System) தோன்றையவை என்று நிரூபித்தன ! அத்துடன் நிலவிலும் பூமியைப் போல் உச்ச உஷ்ணத்தில் உருகும் ஆவியியல் மூலகங்கள் (Volatile Elemets that melt at high Temperatures) எதுவும் கிடையாது ! அவை இரண்டும் ஆதி காலத்தில் அதி உச்சநிலை உஷ்ணத்தில் வடிவானவை என்பது தெரிய வருகின்றன.

வானியல் விஞ்ஞானிகள் நிலவின் இரசாயன மாதிரிகள் பூகோளத்தின் மேற்தளத் தட்டைப் போல் (Earth’s Mantle) ஒத்திருப்பதைக் கண்டறிந்தார்கள். ஆனால் தோன்றிய போது பூமியின் மேற்தளத் தட்டு மிகத் திண்மையான உலோகத்திலிருந்து உண்டானது. தனித்துத் தோன்றிய நிலாவிலே எப்படி பூமியை ஒத்த உலோகவியல் தட்டுப் பொருட்களைக் கொண்டிருக்க முடியும் என்னும் கேள்வி எழுகிறது ! அப்பொல்லோ-11 வானியல் விமானிகள் கொண்டுவந்த வெள்ளைக் கூழாங்கற்களில் நூதனப் பாறை “அநார்த்தோசைட்” (Anorthosite) இருந்தது. அப்பாறையில் பூமியில் தென்படும் சோடியம், கால்சியம் அலுமினியம் சிலிகேட் (Sodium & Calcium Aluminiuam Silicates) தாதுக்கள் இருந்தன.

நாசாவின் விண்வெளிக் காலநிலை விண்ணுளவி

நாசாவின் விண்வெளிக் காலநிலை விண்ணுளவி (NASA’s Space Weather Monitoring Spacecraft STEREO) இரட்டை உளவிகளைக் கொண்டு பரிதியின் பாண்பாடுகளை ஆராய 2006 அக்டோபர் மாதம் 25 ஆம் தேதி பூமியைச் சுற்றி வர அனுப்பப் பட்டது. அது நாசாவின் மூன்றாவது திட்டமான பரிதி மண்டல உளவி (NASA’s Solar Terrestrial Probes) ஆராய்ச்சிகள். ஸ்டியரியோ திட்டம் எனக் கூறப்படும் அந்த ஆராய்ச்சியில் முப்பக்கப் பதிவு நோக்கி (3D Probing) சூரியனின் சூறாவளிப் புயல்களை (Anatomy of Solar Storms) உட்புற ஆய்வுகள் செய்யும். பரிதியின் தீக்கறைகளை (Sun Spots) ஆராயும் ! அத்துடன் அதன் ஆய்வுப் பணிகள் நிற்கவில்லை. நாசா ஸ்டியரியோ இரட்டை உளவிகளைத் திசை திருப்பி சமகோணப் புள்ளிகளின் அரங்குகளை (Lagrangian Point Zones L4 & L5) உளவி மோதிச் சிதைந்து போன பூர்வீகக் கோள் தியாவின் சிந்திய 2% துணுக்குகளைத் தேடிச் செல்லும் ! தியாவின் அந்தத் துணுக்குகளை விண்ணுளவி கண்டு பிடித்தால் நிலவு எப்படித் தோன்றியது என்னும் பெரும் புதிர் விடுவிக்கப்படும் !

நாசா சமகோணப் புள்ளித் தளங்களை சிதறிய முரண்கோள்களின் (Asteroids) ஈர்ப்புத் துணுக்குகள் இளைப்பாறும் களங்கள் (Gravitaional Parking Lots) என்று குறிப்பிடுகிறது. முரண்கோள்களில் இருக்கும் பாறைத் துணுக்குகள் பூமி நிலவைப் போல் ஒரே மாதிரி மண்ணைக் கொண்டிருந்தால் தியா மோதல் கோட்பாடை நிரூபிப்பதாக நாங்கள் அறிவிப்போம் என்று கெய்ஸர் கூறுகிறார். மேலும் நாசாவின் அபொல்லோ விண்வெளித் தீரர்கள் எடுத்து வந்த பாறைகள் பூமியில் உள்ள பாறைகளைப் போன்ற ஆக்ஸிஜன் ஏகமூலக் கூட்டுக் கலவையை (Oxygen Isotope Compositions) ஒத்திருந்தன என்றும் அறியப்பட்டுள்ளது.

[தொடரும்]
+++++++++++++++++++

https://youtu.be/QKdvexOZ-MQ

தகவல்:

Picture Credits: NASA, JPL; National Geographic; Time Magazine, Discovery, Scientific American & Astronomy Magazines. Wikipedia & Earth Science & the Environmental Book.

1. Our Universe – National Geographic Picture Atlas By: Roy A. Gallant (1986)
2. 50 Greatest Mysteries of the Universe – How Did the Moon form ? (Aug 21, 2007)
3. Astronomy Facts File Dictionary (1986)
4. The Practical Astronomer By Brian Jones & Stephen Edberg (1990)
5. National Geographic – Invaders from Space – Meteorites (Sep 1986)
6. Cosmos By Carl Sagan (1980)
7. Dictionary of Science – Webster’s New world (1998)
8. Physics for Poets By : Robert March (1983)
9. Atlas of the Skies (2005)
10 Universe Sixth Edition By: Roger Freedman & William Kaufmann III (2002)
11 On the Moon By : Patrick Moore (January 2001)
12 http://www.thinnai.com/?module=displaystory&story_id=40802271&format=html(நிலவு எப்படித் தோன்றியது ?)
13 Wikipedia – Inner Structure of the Moon [January 31, 2008]
14 Astronomical Society of the Pacific – Whait if the Moon Did not Exist ? By : Neil F. Comins, University of Maine (1996)
15 AstronomyCafe.net What Would Have Happened if the Earth Did not Have the Moon ?
16 Home Page. Natural World . Com – Formation of the Earth & The Moon, Tides & Gravity
17 Earth-Moon Dynamics Page – Would We have Had Evolution Without the Moon ? By : Dan Green B.Sc. (Hons).
18 Tides on Earth – The Recession of the Moon By : Tim Thompson (Matt Rosenberghttp://geography.about.com/)
19 Scientific American – Without the Moon, Would There Be Life on Earth ? By : Bruce Dorminey (April 21, 2009)
20 Daily Galaxy -The Theia Hypothesis – New Evidence Emerges that Earth & the Moon Were Once the Same [July 5, 2008]
21 NASA Hunts for Remnants of an Ancient Planet (Theia) Near Earth (April 11, 2009)
22 Science Illustrated : The Lukiest Collision -New Findings The Moon’s Explosive Origins (Nov-Dec 2008]
23 NASA Probes Seeks Remnants of Lost Theia Planet By : Lewis Page (Apr 14, 2009)
24 NASA Report -NASA’s STEREO Spacecraft Reveals Anatomy of Solar Storms By : Laura Layton Heliophysics News Team (April 14, 2009)
25. Giant Impacy Hypothesis From Wikipedia (April 29, 2009)

26. http://www.accuweather.com/en/outdoor-articles/astronomy/extreme-super-full-moon-to-cause-chaos/46417 [March 1, 2011]

27. http://earthsky.org/tonight/in-2015-the-first-of-six-supermoons-occurs-on-january-20

28. http://www.bing.com/videos/search?q=extreme+super+moon&qpvt=Extreme+Super+Moon&FORM=VDRE

29. http://www.timeanddate.com/astronomy/moon/super-full-moon.html

30. https://en.wikipedia.org/wiki/Apsidal_precession [October 29, 2016]

31. https://en.wikipedia.org/wiki/Supermoon [November 10, 2016]

32. https://en.wikipedia.org/wiki/Orbit_of_the_Moon [November 11, 2016]

****************

S. Jayabarathan [jayabarathans@gmail.com] November 12, 2016] [R-1]

Attachments area

Preview YouTube video Tonight’s Hunters Super Moon using the new Nikon P-900

Tonight’s Hunters Super Moon using the new Nikon P-900

November 13, 2016
தொடர்வலைகள்!

பவள சங்கரி

தலையங்கம்

8 ஆம் தேதி இரவு 8 மணிக்கு பாரதப் பிரதமரின் அதிரடி அறிவிப்பிற்குப் பிறகு ஏற்பட்ட நிகழ்வுகள் பல திருப்பங்களை ஏற்படுத்திக்கொண்டிருக்கின்றன. ‘விழித்துக்கொண்டோர் எல்லாம் பிழைத்துக்கொண்டார்’ என்ற பாடலைப்போல தங்களிடமிருந்த 500, 1000 உரூபாய் நோட்டுகளை மாற்றுவதற்கும், செல்லத்தக்கதாக ஆக்குவதற்கும் மக்கள் நகைக்கடைகளை முற்றுகையிட்டிருந்ததும், நகைக்கடைகள் விடிய விடிய சுறுசுறுப்பாக இயங்கிக்கொண்டிருந்ததும், தங்கத்தின் விலை 40,000ற்கு மேலும் விற்றதும், இடைத்தரகர்கள் தரகுக்கு நோட்டுக்களை மாற்றியதும் பல இடங்களில் நடந்தேறியிருக்கிறது. அதாவது அரசு கொடுத்த 50 நாட்கள் வாய்ப்பை தவறாகப் பயன்படுத்தக்கூடிய காட்சிகள் பலவிதமாக நடந்தேறிக்கொண்டிருக்கின்றன. தங்களுடைய மேதாவிலாசங்கள் மூலமாக இந்தச் சூழ்நிலையைப் பயன்படுத்தி ஏழை எளிய மக்களை வதைக்கக்கூடிய காட்சிகள் வேதனை அளிப்பதாக இருக்கின்றன.

வங்கித் துறையினரின் சரியான செயல்பாடுகளும், தணிக்கைத் துறையினரின் தேவையான வழிகாட்டுதலும் இச்சூழலுக்கு வளம் சேர்த்துள்ளன. ஆயினும் எரிகிற வீட்டில் பிடுங்கும்வரை இலாபம் என்ற நோக்கில் செயல்படுபவர்களுக்கு அரசு உடனடியாக நடவடிக்கை எடுக்கவேண்டும். அப்போது மட்டுமே ஏழை மக்களின் கண்ணீர் துடைக்கப்படும். பொது மக்களின் நல்ல எண்ணங்களும், நாட்டுப்பற்றும் பிரதமரின் கரத்தை வலிமையாக்கும்பட்சத்தில் இந்த அதிரடி நடவடிக்கைக்கான பலன் முழுமையாகக் கிடைக்கலாம். வ.உ.சி , சுப்பிரமணிய சிவா போன்றவர்கள் நாட்டிற்காக பட்ட வேதனையைவிடவா இந்த சில மணித்துளிகளின் வேதனை பெரிதாகி விடப்போகிறது. வங்கிகளின் பணி நேரங்களை அதிகரித்தும் பணப்பரிமாற்றங்களுக்கு அதிக அலுவலர்களை நியமித்தும் இனி வரக்கூடிய 4 நாட்களுக்கு இரவு எட்டு மணி வரை வங்கிகள் செயல்படும் போன்ற அறிவிப்புகளும் ஆறுதல் அளிக்கக்கூடியதாக உள்ளன. திருப்பதி திருமலை நிர்வாகத்தினர் தங்கள் அலுவலகம் மூலமாக பக்தர்களுக்கு நோட்டுகளை மாற்றிக்கொடுத்ததும், தன்னார்வத்தொண்டுள்ளம் கொண்ட தனி மனிதர்கள் தாங்களாக முன்வந்து மற்றவர்களுக்கு உதவி செய்தது போன்ற மனிதாபிமானமிக்க செயல்களையும் காணமுடிந்தது. தொடரும் நிகழ்வுகளை பொறுத்திருந்து பார்ப்போம்.

November 11, 2016
அந்திமக்கால ஞானம் !

பா.ராஜசேகர்

பாலும் தண்ணீரும்
கலந்தே சுரந்துகொண்டிருக்கிறது
என்கிணறு

இனிப்பிரித்து
தேவையானதை அருந்தவேண்டும்
என்பறவை

கொடியமிருகங்கள்
என்வனத்தில் அதிகமாய்
உலவிக்கொண்டிருக்கின்றன

என் பார்வை
இப்போது சாதுக்களை
நோக்கியே செல்கிறது

கடந்தகாலங்களைவிட
இப்போது நிறைய
முரண்பட்டிருக்கிறேன்

என் குடம் இப்போது
அமைதியை நோக்கியே
தழும்பிக்கொண்டிருக்கிறது!

நம்பமுடியவில்லையா?
என்மயானம்
எதிரே இருக்கிறது!

November 11, 2016
“ இயற்கை ”

தமிழ்த்தேனீ

ஒன்பது வழிகள் வைத்தான் உடல்விட்டு உயிர் போக‌

ஒரு வழியும் வைக்கவில்லை உயிர் வந்து உடல் சேர‌

இறைவனிடம் நான் கேட்டேன், இது என்ன ஓர வஞ்சனை ?

ஒரு கேள்வியினால் கொக்கிபோட்டேன்

அவனளித்தான் பல பதில்கள், அது எதுவும் புரியவில்லை

ஆனாலும் ஒரு பதில் ஓரளவு புரிந்ததெனக்கு,

ரகசியமாய் முணுமுணுத்தான் என் காதில் மட்டுமதை

உங்களிடம் சொல்லுகிறேன் காத்திடுவீர் ரகசியமே

இயற்கையின் சாகசமே அதிலிடங்கும் அதிசயமே

இயற்கையை வெற்றி கொள்ள என்னாலும் முடியவில்லை

இயற்கைதான் கடவுள் ,நான் கூட அதன் பிடியில்

தவிக்கிறேன் மீளாமல், சொன்னால் நம்ப மாட்டாய்

ஒரே ஒருமுறை தான் விதைத்தேன் ப்ரபஞ்ஜம் வளர்ந்தது

பல முறை அழித்துப் பார்த்தேன் ஒன்றும் பலனில்லை,

இனி இப் ப்ரபஞ்ஜம் நானே நினைத்தாலும் அழிக்க முடியாது

,இயற்கையை வெல்ல என்னாலும் முடியாது..

நீ கேட்ட கேள்விக்கு விடை தெரியுமா உனக்கு?

கேள்விகள்கேட்பது சுலபம், உயிர் வந்து உடல்

சேர ,இயற்கையை வெற்றி கொள்ள‌ வழி எதேனும்

இருக்கிறதா ? ரகசியமாய் என்னிடமே இறைவன்

கேட்டான் என்ன ப‌தில் நான் சொல்ல‌

உங்க‌ளுக்கு தெரிந்தால் ரகசியமாய் என்னிட‌ம்

சொல்லுங்க‌ள் …அவனிடம் சொல்லுகிறேன் நான் !!

November 11, 2016
காவிரி புரக்கும் நாடு – 4

-மேகலா இராமமூர்த்தி

மலைமிசைத் தொடுத்த மலிந்துசெலல் நீத்தம்
தலைநாள் மாமலர் தண்துறைத் தயங்கக்
கடற்கரை மெலிக்குங் காவிரிப் பேரியாற்று
அறல்வார் நெடுங்கயத்து அருநிலை கலங்க
மாலிருள் நடுநாட் போகித் தன்னையர்
காலைத் தந்த கணைக்கோட்டு வாளைக்கு
அவ்வாங்கு உந்தி அஞ்சொல் பாண்மகள்
நெடுங்கொடி நுடங்கு நறவுமலி மறுகில்
பழஞ்செந் நெல்லின் முகவை கொள்ளாள்
கழங்குறழ் முத்தமொடு நன்கலம் பெறூஉம்
பயங்கெழு வைப்பிற் பல்வேல் எவ்வி… (அகம்-126: நக்கீரர்)

குடமலையிலிருந்து தொடர்ந்துவிழுகின்ற காவிரியின் பெருவெள்ளமானது, முதல்நாள் தான் கொண்டுவந்து சேர்த்த மணமிகு மலர்கள் துறைகள்தோறும் பொலிந்துவிளங்க, கடற்கரையையே கரைத்துவிடும் அளவிற்குப் பாய்ந்தோடி வருகின்றது. கருமணல் ஒழுகுகின்ற அவ்வாற்றின் மடுவிலுள்ள நிலைகொள்ளாத நீர் கலங்குமாறு, நள்ளிருளில் ஆற்றைக் கடந்துசென்ற தன் தமையன்மார்கள் விடியற்காலையில் பிடித்துக்கொண்டுவந்து தன்னிடம் தந்த, திரண்ட கோடுகளையுடைய வாளைமீனைக் கையில் வாங்கினாள் கனிமொழிபேசும் பாணர்குலப் பைங்கிளி ஒருத்தி.

மகிழ்ச்சியில் மனம்துள்ள, நெடுங்கொடிகள் அசைவதும், கள் மிகுதியாக விற்கப்படுவதுமான ஒருதெருவின் வழியே நடந்துசென்றாள் அம்மீனை விற்க. (அப்போதே தமிழ்க்குடி கள்குடியில் திளைத்து மகிழ்ந்திருக்கின்றது என்பதை இதன்வாயிலாக அறிகிறோம்!).

தன் வாளைமீனை அத்தெருவில் விற்றவள், அதற்குப் பண்டமாற்றாகக் கடைக்காரர் தந்த செந்நெல்லை வாங்கமறுத்தாள். அவ்வனிதையின் உள்ளக்கிடக்கையை அறியாத அந்த வணிகர், ”நெல் வேண்டாமா? அப்படியானால் வேறென்ன வேண்டுமம்மா உனக்கு?” என்று அன்போடு அவளை வினவ, முத்துக்களாலான ஓர் அணிகலனைத் தொட்டுக்காட்டினாள் அவள்.

கடல்வளங்கொழிக்கும் வேளிர்குல அரசனான ’எவ்வி’யின் ஆட்சி செவ்வையாய் நடக்கும் ஊர் அது! அங்கே அம்மங்கை கேட்டது கிடைக்காமலா போய்விடும்? ”முத்துமாலைதானே வேண்டும்? இந்தா…பெற்றுக்கொள்!” என்று அந்த வணிகரும் கழங்குகளையொத்த பெரிய முத்துக்களால் கோக்கப்பட்ட ஒளிவீசும் மாலையை அவள்கையில் உடனே அளித்துவிட, முத்தைப்பழிக்கும் தன் வெண்பற்களைக் காட்டி முறுவலித்தாள் அந்தப் பாண்மகள்!

சங்கப் பெரும்புலவர் நக்கீரரின் அருந்தமிழ்ப் பாடலிது. இதில் பேசப்படும், கடற்கரையை மெலிக்கும் காவிரிப் பேராற்றை வியப்பதா அல்லது மீனைக் கொடுத்து முத்தாரம் வாங்கிய அந்த வித்தகியை வியப்பதா? பட்டிமன்றம் வைத்துத்தான் விடைகாண வேண்டும்!

ஆறுகளில் புதுவெள்ளம் பொங்கிவருவதைப் பெருவிழாவாகக் கொண்டாடும் வழக்கம் பண்டைத் தமிழரிடத்து இருந்திருக்கின்றது. அதன் அன்றைய பெயர் ’புதுப்புனல் விழா’ என்பதாகும். அவ்விழாவே இந்நாளில் ’ஆடிப்பெருக்கு’ என்று பெயர்மாற்றம் பெற்றுள்ளது எனலாம். இப்போதெல்லாம் ஆடிமாதத்தில் ஆற்றிலே வெள்ளப்பெருக்கை அவ்வளவாகக் காணமுடிவதில்லை; எனினும், வீட்டிலே சித்திரான்னங்களைத் தயார்செய்து எடுத்துக்கொண்டு, ஆற்றங்கரைகளில் சுற்றஞ்சூழ அமர்ந்துண்ணும் வழக்கம் இன்னமும் சில (கிராம) மக்களிடம் இருந்துவருவது நம் மரபின் எச்சம் இன்னமும் மிச்சமிருக்கின்றது எனும் நம்பிக்கையை நம்முள் விதைக்கின்றது!

சரி, புகார் நகருக்கு அருகிலுள்ள கழார் எனும் காவிரித்துறைக்குச் சென்று அங்கு நடைபெறும் புதுப்புனல் விழாவைக் கண்டுவருவோம்!

சோழ நன்னாட்டின் காவிரிக்கரையில் அமைந்திருந்த வளமான ஊர் கழார். அதனை ஆண்ட குறுநில மன்னன் மத்தி என்பான். அவன் குறித்துச் சில செய்திகள்…

சோழரின் ஆட்சியின்கீழ் இருந்த கழார்த் துறையை ஆண்ட பரதவர்கோமானான மத்தி, பெருவீரன். சோழமன்னனின் ஆணைக்கிணங்க, எழினி என்னும் மற்றொரு குறுநில மன்னனோடு போர்புரிந்த மத்தி, அவன் பல்லைப் பிடுங்கிக்கொண்டுவந்து தன் கோட்டைக் கதவின் வாயிலில் பதித்தானாம். கேட்கவே அச்சமாக இருக்கிறதல்லவா?

அஞ்சத்தக்க பெருவீரனான அந்த மத்தியின் ஊரான கழாரில் புதுப்புனல் விழா ஆண்டுதோறும் வெகுவிமரிசையாய்க் கொண்டாடப்படுவது வழக்கம். அவ்வாறு புதுப்புனல் விழா நடைபெறவிருந்த நன்னாள் அது! மன்னன் கரிகால்வளவனும் அவனுடைய கலிகொள் சுற்றத்தாரும் கழார்த் துறையில் வந்து கூடிவிட்டனர் விழாக்காண!

கரிகாலனின் அருகே அமர்ந்திருந்தாள் அவன் ஆசைமகள் ஆதிமந்தி. அவள் முகத்திலேதான் எத்தகைய மந்தகாசப் புன்னகை! இருக்காதா பின்னே…? இன்னும் சற்றுநேரத்தில் அவள் காதற்கணவனும், ஆட்டத்தில் தேர்ந்தவனுமான ’அத்தி’ காவிரிப்புனலில் நீச்சல்நடனம் நிகழ்த்தி அனைவரையும் மகிழ்விக்கக் காத்திருந்தான். அந்த பூரிப்புதான் ஆதிமந்தியின் முகத்தில் புன்னகையாய்ப் பூத்திருந்தது! (ஆட்டத்தில் தேர்ந்தவன் என்பதாலேயே அவன் ’ஆட்டனத்தி’ என்றழைக்கப்பட்டான்; அவன் சேரமன்னன் என்று குறிக்கப்படுகின்றான்.)

ஒளிமிகுபொறிகள் அவன் சேவடிகளில் திகழும் வீரக்கழல்களில் மின்ன, கஞ்சத்தாளம் ஒலிக்க, இணையில்லா ஆணழகனான அத்தி தன் ஆட்டத்தைத் தொடங்கினான். அனைவரும் இமைக்க மறந்து அவன் நடனத்தையே பார்த்திருக்க, திடீரென்று பாய்ந்துவந்த காவிரியின் பெருவெள்ளமானது அத்தியை அடித்துச்சென்றுவிட்டது. இதனைச் சற்றும் எதிர்பாராத அனைவரும் செய்வதறியாது திகைத்து நின்றனர்.

உண்மையில் நிகழ்ந்ததாக இலக்கியங்களில் பதிவுசெய்யப்பட்டுள்ள இச்சம்பவத்தைத் தன் அகப்பாடல் ஒன்றில் அழகாய்ப் பயன்படுத்தியுள்ளார் சங்கப் புலவர் பரணர்.

சேரிப்பரத்தையைத் தேடிச்சென்ற ஒரு மருதநிலத் தலைவன், அவளிடமிருந்து மீண்டு, தன் பழைய காதலியான இற்பரத்தையை நாடி வருகின்றான் (காதல்மன்னன் போலிருக்கிறது!). அவனைக் கண்ட இற்பரத்தை தன்முகத்தில் இகழ்ச்சிக்குறிப்புத் தோன்ற, ”என்னருமைத் தலைவனே! அத்தியின் அழகைக்கண்டு நயந்த காவிரிப்பெண்ணாள், அவனைக் கவர்ந்துசென்று கடலில் ஒளித்ததுபோல், சேரிப்பரத்தை உன்னை என்னோடு சேரவிடாது கவர்ந்துசென்று ஒளித்தாலும் நான் உன்னிடம் ஊடல் கொள்ளமாட்டேன்; உன்னை வெறுக்கவும் மாட்டேன்” என்று பகடிசெய்வதாக இப்பாடல் அமைந்துள்ளது.

…மலிபுனல் பொருத மருதொங்கு படப்பை
ஒலிகதிர்க் கழனிக் கழாஅர் முன்துறை
கலிகொள் சுற்றமொடு கரிகால் காணத்
தண்பதம் கொண்டு தவிர்த்த இன்னிசை
ஒண்பொறிப் புனைகழல் சேவடி புரளக்
கருங்கச்சு யாத்த காண்பின் அவ்வயிற்று
இரும்பொலப் பாண்டில் மணியொடு தெளிர்ப்பப்
புனல்நயந்து ஆடும் அத்தி அணிநயந்து
காவிரி கொண்டு ஒளித் தாங்கு மன்னோ!
நும்வயிற் புலத்தல் செல்லேம்… (அகம்: 376 – பரணர்)

நீச்சல்நடனம் ஆடிய அத்தியைக் கவர்ந்துசென்ற காவிரிப்பெண்ணாள், அவனைக் கடலில் ஒளித்தாள் என்கிறார் பரணர். அந்த ஆடலரசன் உயிரோடு மீண்டானா? அல்லது…கடலிலேயே மாண்டானா? என்ற பதைபதைப்பு நமக்கும் ஏற்படவே செய்கின்றது.

இதற்கான விடை விரைவில்!

(தொடரும்)

November 11, 2016
அருங்காட்சியகம் ஓர் அறிவுக் கருவூலம் – 76

76. எரிமலை ஆய்வுக்கூடம்-அருங்காட்சியகம், லா பல்மா தீவு, கனெரி தீவுக்கூட்டம்

முனைவர்.சுபாஷிணி

இந்த பூமி பல அதிசயங்களைத் தன்னுள்ளே கொண்டுள்ளது. இயற்கை நம் கண் முன்னே காட்டும் பல கோடி அதிசயங்களைப் பார்க்கும் மனமிருப்போரால் அவற்றைப் பார்த்து இயற்கை அழகில் இலயிக்க முடிகின்றது. ஏனையோருக்கு அவை பொருளற்றதாகப் போய்விடுகின்றது. இந்த பூமிப்பந்தின் பூகோள இயற்கையில் ஒரு முக்கிய அங்கமாக இருப்பவை எரிமலைகள். உயிருள்ள, அதாவது இன்னமும் பூமிக்கு வெகு அடியில் கனன்று கொண்டு தீப்பிழம்புகளுடன் உள்ள எரிமலைகள் இன்னமும் இருக்கின்றன. அவற்றைப் பற்றிய செய்திகளை அவ்வப்போது தொலைக்காட்சி ஊடகங்களில் நாம் பார்த்திருக்கலாம். மிகப்பல எரிமலைகளோ உயிரில்லாதவை. அதாவது, இத்தகைய எரிமலைகளிலிருந்து வெடிப்புக்கள் நிகழாது என்பதால் இவை அபாயகரமற்றவை என அறியப்படுபவை. இத்தகைய உயிரற்ற எரிமலைகள் பல தீவுகளாக நம் கண் முன்னே காட்சியளிக்கின்றன. அத்தகைய தீவுகளில் ஒன்று தான் லா பல்மா தீவு.

லா பல்மா தீவு என்பது ஐரோப்பா கண்டத்தில் உள்ள ஒரு தீவு. கனெரி தீவுகள் கூட்டத்தில் அங்கம் வகிக்கும் ஒரு தீவு இது. மொரொக்கோ நாட்டுக்குக் கீழே, அதாவது பிரான்சு, ஸ்பெயின் ஆகிய நாடுகளுக்குக் கீழும் ஆப்பிரிக்க கண்டத்தின் வடபகுதியிலும் அமைந்திருப்பது இந்தக் கனெரி தீவுக்கூட்டம். இந்தத் தீவுக்கூட்டத்தில் எட்டு பெரிய தீவுகளும், மேலும் பலப்பல சிறு தீவுகளும் நிறைந்திருக்கின்றன. இந்தக் கனெரித்தீவுக்கூட்டம் தற்சமயம் ஸ்பெயின் நாட்டிற்குச் சொந்தமானதாக உள்ளது.

லா பல்மா தீவைப்பற்றிச் சொல்வதென்றால், இது கனெரித்தீவுக்கூட்டத்தில் ஐந்தாவது பெரிய தீவு. ஆயினும் ஒரு நாள் வாகனத்தில் தீவு முழுவதையும் சுற்றி வந்து விடலாம். இந்தத் தீவின் தலைநகரம் சந்தாகுரூஸ் டி லா பல்மா நகரம். இது ஒரு சிறு நகரம்.

சுற்றுலா பயணிகள் விரும்பிச்செல்லும் சுவர்க்கபுரிகளில் ஒன்று இந்த லா பல்மா தீவு. வருடம் முழுவதும் சுற்றுப்பயணிகளின் கூட்டம் அலைமோதும் ஒரு தீவு. இந்தத்தீவு பூகோளவியலாளர்களின் ஆய்வுகளின் படி மூன்று அல்லது நான்கு மில்லியன் ஆண்டுகளுக்கு முன்னர் வெடித்த எரிமலையிலிருந்து உருபெற்ற ஒரு தீவு ஆகும். அரை மில்லியன் ஆண்டுகளுக்கு முன்னர் தபுரியண்ட எரிமலை வெடித்துச் சரிந்து பெரும் பள்ளத்தினை ஏற்படுத்தியது. இப்பகுதியை கல்டேரா டி தபுரியண்ட என அழைக்கின்றனர். ஸ்பேனிஷ் நாட்டின் ஆளுமைக்குள் லா பல்மா வந்த பின்னர் ஏழு எரிமலை வெடிப்புக்கள் நடந்துள்ளன. அவையாவன:
1470-1492 மொந்தானா குவேமேடா ( Montaña Quemada)
1585 தாயுவா – எல்பாசோ (Tajuya near El Paso)
1646 சான் மார்ட்டின் எரிமலை (Volcán San Martin)
1677 சான் அந்தோனியோ எரிமலை ( Volcán San Antonio)
1712 எல் சார்க்கோ எரிமலை ( El Charco)
1949 நம்ப்ரோக் எரிமலை, ஹோயோ நெக்ரோ எரிமலை (Volcán Nambroque at the Duraznero, Hoyo Negro and Llano del Banco vents)
1971 தெனகூயா எரிமலை (Volcán Teneguía)

இதில் ஆக இறுதியாக வெடித்து பின்னர் மடிந்த தெனகூயா மற்றும் 1677இல் வெடித்து பின் மடிந்த சான் ஆந்தோனியோ எரிமலையின் ஃபுவான்கலியாந்தாவில் உள்ள ஆய்வுக்கூடமும் அருங்காட்சியகமும் உள்ள பகுதிக்கு நான் 2012ஆம் ஆண்டில் சென்றிருந்தேன்.

ஒரு நீண்ட நிலப்பரப்பு அது. சீதோஷ்ணம் ஏறக்குறைய 10டிகிரி செல்சியஸ் மலையின் உச்சிப்பகுதியில் . கீழே இறங்க இறங்க 15 டிகிரி செல்சியஸ் வரை சீதோஷ்ணம் கூடியவாறு இருந்தது. எரிமலைக்கு மேலே நிற்கும் போது மேகமூட்டம் நம்மைக் கடந்து செல்லும். அதற்குள்ளே ஊடுருவி நடந்து செல்வது புது அனுபவமாக நிச்சயமாக இருக்கும்.

எரிமலைகள் வெடித்துச் சிதறும் போது பூமியின் அடியிலிருந்து வெடித்துக் கிளம்பும் தீப்பிழம்புகள் பல நூறு வகையான தாதுப்பொருட்களை உள்ளடக்கியவை. மனிதர்கள் அதிகம் வாழாத தீவுகளில் எரிமலைகள் கக்கிய தீப்பிழம்புகள் இறுகி பாறைக்கற்களாக புதிய தோற்றம் பெற்று அதன் மேற்பரப்பில் இந்த சீதோஷ்ணத்திற்கு ஏற்ற தாவார வகைகள் முளைத்துக் கிளம்பியிருக்கின்றன.

இந்த எரிமலைப்பிரதேசத்தில் நடக்க நடக்கக் கண்ணுக்கு எட்டிய தூரம் வரை மக்கள் நடமாட்டம் குறைந்த, எந்தவித சத்தமோ, இடையூறோ இல்லாத தனிமையை உணரலாம். பூமியைக்கடந்து ஏதோ வேற்றுக் கிரகத்தில் உலாவிக் கொண்டு இருக்கின்றோமே என்ற எண்ணத்தை வரவழைக்கும் வித்தியாசமானதொரு அனுபவம் இது. எரிமலைப்பகுதியின் கீழ்ப்பகுதியில் நடந்து பின்னர் தெனகூயா எரிமலை வெடிப்பு பள்ளத்தாக்குப்பகுதிக்கு அதன் உச்சிப் பகுதியான ஃபுவான்கலியாந்தா வந்து சேர்ந்தால் அங்கே எரிமலை ஆய்வுக்கூடமும் அருங்காட்சியகமும் இருப்பதைக் காணலாம்.

லா பல்மா மட்டுமன்றி கனெரி தீவுகளின் எரிமலைகள் பற்றிய விளக்கம், எரிமலைகள் எவ்வாறு உருவாகின்றன என்ற தகவல்கள், உலகின் முக்கிய எரிமலை வெடிப்புச் சம்பவங்கள் பற்றிய விபரங்கள் என விரிவான நில அமைப்புப்பற்றிய ஆய்வுகள் இங்கே வழங்கப்பட்டுள்ளன.

லா பல்மா தீவில் சுற்றுலாப் பயணிகள் எரிமலைகளில் நடந்து அதன் அனுபவத்தைப் பெறும் வகையில் தரமானத் தகவல்களை வழங்குகின்றனர். வழிகாட்டி கையேடுகளை வைத்துக்கொண்டே இந்த எரிமலையில் நடந்து திரிந்து நில அமைப்பு, தாவர வகைகள், எரிமலை தீப்பிழம்பு கற்பாறைகள் ஆகியனவற்றைக் கண்டறியலாம். பூகோள நில ஆய்வுகளில் ஈடுபாடு கொண்டோருக்கு இவ்வகை அனுபவங்கள் மிகப்பயனுள்ளதாக அமையும்.

சரி. நமது அடுத்த அருங்காட்சியகத் தேடலில் மற்றுமொரு அருங்காட்சியகம் அழைத்துச் செல்கின்றேன். என்னைத் தொடரலாமே!.

November 11, 2016
தேசிய கல்வி தினம் (National Education Day ) (11 நவம்பர்)

க. பாலசுப்பிரமணியன்

இந்தியாவின் முதல் கல்வி அமைச்சர் மௌலானா அப்துல் கலாம் ஆசாத் அவர்களின் நினைவாக நவம்பர் 11ஆம் நாள் தேசிய கல்வி தினமாக மத்திய அரசால் அறிவிக்கப்பட்டு ஆண்டுதோறும் கொண்டாடப்படுகிறது . கல்வி எந்த ஒரு நாட்டுக்கும் முதுகெலும்பு. ஒரு நாட்டின் தலைவிதி அந்த நாட்டின் கல்விக்கூடங்களில் நிர்ணயிக்கப்படுகிறது என்று கோத்தாரி கமிஷனின் முதல் வாக்கியமே உறுதிப்படுத்துகிறது. இந்த நாட்டுக்கு சுதந்திரம் கிடைத்தபின் கல்வியை நாட்டின் ஒவ்வொரு மூலையிலும் உள்ள பாமர மக்களுக்கும் ஏழை எளியோருக்கு கிடைப்பதற்கான வழிகள் மேற்கொள்ளப்பட்டதில் கர்மவீரர் காமராஜர் போன்ற பல முன்னோடிகளை நாம் நினைத்துப் பார்க்கவேண்டும்.

கல்வி அறிவை வளர்ப்பதில் பெண்களுக்கு ஏற்பட்ட தடைகளும் சமுதாய நோக்குகளும் போர் நோக்கில் சந்திக்கப்பட்டு இன்று சமுதாயத்தின் எல்லாக் கல்வி மையங்களிலும் பெண்களுக்கு சரி நிகர் சமானமாகவும் முற்போக்கு நோக்கிலும் இடங்கள் ஒதுக்கப்பட்டு நாட்டின் தலைவிதி மாற்றப்பட்டு வருகின்றது. இருப்பினும், பெண்கல்விக்கு நாட்டில் பல பாகங்களில் இன்னும் செய்ய வேண்டிய வேலைகளும் மாற்றங்களும் போதிய அளவைத் தொடவில்லை.

கல்வியை அடிப்படை உரிமையாக்கி மத்திய அரசு நாடு முழுவதிலும் 14 வயதுவரை உள்ள சிறார்களுக்கு கல்வி கிடைப்பதற்கான வழிமுறைகளை ஏற்படுத்தியும் அதற்கான முழுப்பலன் இன்னும் அவர்களுக்கும் சமுதாயத்திற்கும் கிடைக்கவில்லை. இது கவலைக்குரியது மட்டுமல்ல, சமுதாயத்தின் சிந்தனையில் ஏற்படவேண்டிய மாற்றத்திற்கு நாம் செய்ய வேண்டிய பணிகளுக்கு ஒரு எடுத்துக்காட்டாகவும் திகழ்கின்றது.

ஆனால் கல்வியின் நோக்கம்தான் என்ன? எண்ணும் எழுத்தும் கற்பிப்பதா? புத்தக அறிவை வளர்ப்பதா? தேர்வுகளில் அமர்த்தி சான்றிதழ்களை வழங்குதலா? இன்று கல்வி நிறுவனங்கள் வியாபார நோக்கில் வளர்க்கப்பட்டு மற்ற வியாபாரங்களை விட அதிக அளவில் பொருளீட்டுவதற்கு முன்மாதிரியாக விளங்க ஆரம்பித்துவிட்டன.

” அறம் செய்ய விரும்பு” என்றும் “ஆறுவது சினம்” என்றும் “ஈவது விலக்கேல்” என்றும் தனிமனிதப் பண்பாடுகளையும் சமுதாய கோட்பாடுகளையும் வளர்த்த கல்வியின் நோக்கம் தடைபுரண்டு LKG வகுப்புகளிலிருந்தே IIT க்கு தயார் செய்யும் நிலை ஏற்பட்டுள்ளது. “ஒரு தனி மனிதனின் உள்ளிருக்கும் பூரணத்துவத்தை வளர்ப்பதுதான் கல்வியின் நோக்கம்” என்ற சுவாமி விவேகானந்தரின் கூற்று மறக்கப்பட்டு கல்வியை சில புத்தகங்களின் உள்ளிருக்கும் எழுத்துக்களிலும் கருத்துக்களிலும் புதைத்து வருகின்றோம்..

வாழ்க்கையில் கல்லூரிகளில் படித்து பல சான்றிதழ்களையும் பட்டங்களையும் பெற்றவர்களிடம்கூட மனித நேயம் முற்றிலுமாக காணக்கிடைப்பதில்லை. சிந்திக்க வேண்டிய நேரம்.

கற்றல் ஒரு வாழ்க்கைப் பயணம். அது பள்ளிகளிலும் கல்லூரிகளிலும் முடங்குவதில்லை. இறுதிமூச்சு வரை வாழ்க்கையில் கற்றுக்கொள்ள வாய்ப்புக்களும் வழிமுறைகளும் உள்ளன. புத்தகக் கல்வியோடு வாழ்க்கைக் கல்வியை கற்றுக்கொள்ளுதல் மிக அவசியம்.

உலகத்தோடு ஓட்ட ஒழுகல் பல கற்றும்

கல்லான் அறிவிலாதான்

என்ற வள்ளுவன் வாக்கு முற்றிலும் உண்மை…

மனிதநேயத்தை வளர்க்காத கல்வி .. சான்றிதழ்களை மட்டும் போற்றும் கல்வி .. எங்கே நம்மைக் கொண்டு சேர்க்கும் என்பது இன்று சிந்திக்க வேண்டிய கருத்து.

November 11, 2016
இங்கிலாந்திலிருந்து ஒரு மடல் . . . (217)

அன்பினியவர்களே!

அன்பான வணக்கங்களுடன் உங்களுடன் உரையாடுவதில் மிகவும் மகிழ்கிறேன். வாழ்வின் அதிமுக்கியத் திருப்பத்தை எமது வாழ்நாளில் சந்தித்து விட்டோம் என்று பெருமூச்செறிந்து விட்டுச் சற்றுஅயர்ந்து உட்கார்ந்தால் அது என்ன பெரிய திருப்பம் இதை விடவா ? எனும் வகையில் காலம் எனும் சக்கரம் எம்முன்னே அடுத்தொரு பெரிய திருப்பத்தைத் தூக்கிப் போட்டுவிடுகிறது. ஆம், சரித்திரப் புத்தகத்தில் 2016ஆம் ஆண்டு மேற்குலக அரசியல் வரலாற்றின் திருப்புமுனை எனும் வகையில் தன்னுள் இதுவரை எண்ணியிராத பல திருப்பங்களை எம்முன்னே நிகழ்த்திக் காட்டிவிட்டு நகர்ந்து கொண்டிருக்கிறது. நடந்து முடிந்த நிகழ்வுகள் எமக்குப் பிடித்தவகையில் அமைந்தனவோ இல்லை எம்மால் ஏற்றுக்கொள்ளாதவைகளாக இருந்தனவோ அவைகளை ஏற்றுக்கொண்டு வாழ்க்கைக்கு முகம் கொடுப்பதைத் தவிர வேறு எதுவும் செய்வதற்கில்லை.

மேற்குலக ஜனநாயகம் எனும் அரசியல் கோட்பாட்டினுள் சிக்கிச் சுழலும் துகள்களில் எம்மைப்போன்ற புலம்பெயர் தமிழர்களும் அடங்குகிறோம். எங்கோ பிறந்து, எங்கோ வளர்ந்து இன்று நாம் பிறந்தமண்ணை விட்டு எத்தனையோ ஆயிரம் மைல்களுக்கப்பால் எமது வாழ்வை அமைத்து நாம் வாழும் நாட்டின் பிரஜைகளாக எமை மாற்றிக் கொண்டு வாழும் எமக்குப் பல நிகழ்வுகள் நாடகமேடைக் காட்சிகள் போன்றவையே. ஆனால் யதார்த்த வாழ்வில் அந்நிகழ்வுகளின் தாக்கங்களுக்கு நாமும் உள்ளாகப் போகிறோம் என்பது தவிர்க்க முடியாத உண்மையாகிறது.

கடந்த ஜூன் மாதம் 23ஆம் திகதி இங்கிலாந்து நாட்டின் பெரும்பான்மை மக்களின் தீர்ப்பான ஜரோப்பிய ஒன்றியத்திலிருந்து ஜக்கிய இராச்சியம் வெளியேற வேண்டும் எனும் முடிவு ஆட்சியிலிருந்த ராசாங்கம், எதிர்க்கட்சி வழமையான அரசியற்கட்சிகள் என்பனவற்றின் எதிர்பார்ப்புகளுக்கும் பல கருத்துக் கணிப்பு அமைப்புகளின் கணிப்புகளுக்கும் முற்றிலும் முரணான ஒரு முடிவைத் தூக்கிப் போட்டது. அதேபோல உலகின் முன்னணிப் பொருளாதார நாடாகவும், உலகில் பல நாடுகளின் முன்னோடி நாடாகவும் விளங்கிய ஜக்கிய அமெரிக்காவின் அதிபர் தேர்தல் இன்று காலை கொடுத்த இந்த அதிரடியான, எதிர்பார்ப்புகளுக்கு முரணான முடிவு அகில உலகம் முழுவதுமே அதிர்வலைகளை உண்டாக்கியிருக்கிறது. இவ்வதிர்வலைகள் நேர்மறையானவையா அன்றி எதிர்மறையானவையா என்பது நாட்டிற்கு நாடு வேறுபட்டிருக்கிறது.

வெளிநாடுகளில் இன்று புலம்பெயர் மக்களாக வாழ்ந்து கொண்டிருக்கும் எம் போன்றவர்களின் முன்னால் இம்முடிவுகளின் பின்னணி பலவகையான கேள்விகளைத் தூக்கிப் போட்டிருக்கின்றன. இவ்வதிரடியான அரசியல் திருப்பங்களின் அடியில் ஒருவகையான தேசிய உணர்வு புதைந்திருப்பதை யாரும் மறுக்கமுடியாது. இத்தேசிய உணர்வின் மீது இனத்துவேஷம் எனும் சாயம் பூசப்பட்டிருக்கிறதா என்பதுவே மிகவும் ஆழமாகச் சிந்திக்கப்பட வேண்டிய விடயமாகிறது. அப்படியே தேசிய உணர்வுகளின் மீது இனத்துவேஷம் அடிப்படையாக அமைந்திருக்குமானல் அதன் காரணம்தான் என்ன?

வெளிநாட்டிலிருந்து குடியேறுவாசிகளாகவோ அன்றி அகதிகளாகவோ வந்த அனைவரையும் இருகரம் நீட்டி வரவேற்றுச் சகிப்புத்தன்மைக்கும், புரிந்துணர்வுக்கும் முன்னோடிகளாகத் திகழ்ந்த நாடுகளில் இத்தகைய காழ்ப்புணர்ச்சிகள் ஊடுருவக் காரணம்தான் என்ன? இவற்றிற்கு புலம்பெயர் மக்களாகிய எம் போன்றவர்களின் செயற்பாடுகள் எந்த அளவுக்குக் காரணமாக இருந்திருக்கின்றன? இவற்றுக்கெல்லாம் உளச்சுத்தியோடு, நேர்மையாக விடைகளை அலசவேண்டியது எம் அனைவருடைய கடமையாகிறது.

உதரணத்திற்கு நான் வாழும் இங்கிலாந்தினை எடுத்துக் கொள்வோம். அடிப்படையில் இங்கிலாந்து கிறிஸ்துவ மதத்தினரைப் பெரும்பான்மையாகக் கொண்ட நாடு. இந்நாட்டிற்கு வெளிநாடுகளில் குறிப்பாக ஆசியநாடுகளில் இருந்து குடியேறுவாசிகளாக வந்த நாம் இந்நாட்டின் மதத்தினை எந்த அளவுக்குக் கௌரவித்து வாழ்கிறோம்? அவர்களது கலாசார விழுமியங்களின் தாத்பரியங்களைச் சரியாக உள்வாங்கி இருக்கிறோமா? எமது கலாசாரத்தையும், எமது மதக்கோட்பாடுகளையும் காப்பாற்றிக்கொள்ள வேண்டும் எனும் ஆதங்கத்தில் இந்நாட்டு மக்கள் எமக்கு அளித்த சலுகைகளை அவைகளின் எல்லை மட்டும் கொண்டுசென்று இவர்களது சகிப்புத்தன்மையை சோதிக்கும் சூழ்நிலைக்கு வந்து விட்டோமா ? நாம் வாழும் நகரங்கள்தோறும் கோவில்களை அமைப்பதன்மூலம் எமது சமயத்தையும், எமது கலாசாரத்தையும் காப்பாற்றுகிறோம் எனும் பெயரில் அவர்களது கலாசார விழுமியங்களின் அடையாளங்களை அவர்கள் இழப்பது போன்ற ஒரு தோற்றத்தை அவர்களுக்கு ஏற்படுத்தி விட்டோமா? இவையெல்லாம் எம்முள்ளே எழவேண்டிய கேள்விகள். எமக்கு இந்நாடுகள் வாடகை வீடாக இருப்பது போன்ற உணர்வு இருக்கலாம்; ஆனால் எமது சந்ததியினருக்கு இது அவர்களது சொந்த வீடு அல்லவா ?அவர்களது சொந்த வீட்டிலேயே அவர்கள் நிம்மதியாக வாழமுடியாத வகையில் ஒரு நிலைமையை ஏற்படுத்தி விட்டோமா ?

“ப்ரெக்ஸிட்” எனும் இங்கிலாந்தின் முடிவும், அமெரிக்க ஜனாதிபதியாக “ட்ரம்ப்” அவர்கள் தெரிவுசெய்யப்பட்டதும் முக்கியமான திருப்பங்கள்; ஆனால் இவற்றின் அடிக்கோடாக இனத்துவேஷ உணர்வுகள் இருப்பதகாக் கூறிக் கொள்ளும் அதேநேரம் இந்த “ப்ரெக்ஸிட்” முடிவையும், “ட்ரம்ப்” அவர்கள் ஜனாதிபதியாக வருவதையும் ஆதரித்த எம்மவர் பலரை நான் சந்தித்திருக்கிறேன் என்பதுவே உண்மை. அப்படியாயின் இம்முடிவுகள் எப்படி “இனத்துவேஷம்” கொண்டவையாக இருக்க முடியும்? இதன் காரணங்கள்… ஒன்று இவற்றின் பின்னால் இருக்கும் நாட்டின் பொருளாதார நன்மைகளை உள்வாங்கியதால் எம்மவர் அதரித்திருக்கலாம்; இரண்டாவதாக தம்மை இந்நாடுகளின் பிரஜைகளாகவும், தமக்கும் இந்நாட்டின் பெரும்பான்மையினராகிய வெள்ளை இனத்தவருக்கும் எதுவித வேறுபாடுமில்லை என்பதனால் எம்மவர் ஆதரித்திருக்கலாம்.

எது எப்படி இருப்பினும் இந்நிகழ்வுகள் நடந்து முடிந்துவிட்டன என்பதுவே உண்மை. இவை இரண்டின் முடிவுகளுக்கும் எதிரான கருத்துக்களை ஆதரித்தவன் நான்; இருப்பினும் மேற்குலக ஜனநாயகத்தின் அடிப்படையில் இம்மக்களின் இப்பெரும்பான்மை முடிவுகளை ஏற்றுக்கொண்டு அதனுடன் எம்மை இணைத்துக் கொண்டு வாழ்வது ஒன்றே இயல்பான நிலையாகிறது. “ப்ரெக்ஸிட்” எனும் நிகழ்வின் எதிரொலியாக ஏற்படும் நிலைகளை எமக்குச் சாதகமாக்கி அதன்மூலம் அனுகூலமான வாழ்வினை ஏற்படுத்திக் கொள்வதே புலம்பெயர்ந்தவர்களாகிய எமது கடமையாகிறது. அதேபோல “ட்ரம்ப்” அவர்களின் பிரசாரக் கோஷங்களைக் கேட்டு அவரைப் பற்றி நானெடுத்த கணிப்பு வெற்றியடைந்த பின்னால் அவர் கொடுத்த உரையைக் கேட்டதும் கொஞ்சம் ஆட்டம் கண்டிருக்கிறது. ஆம், அமெரிக்க மக்கள் ஏதோ ஒரு நம்பிக்கையில் அரசியல் பின்னணி எதுவுமற்ற ஒரு வெற்று வியாபார முதலாளியைத் தமது ஜனாதிபதியாக்கியுள்ளார்கள். அவர்க்குச் சந்தர்ப்பம் அளித்து அவரது செயற்பாடுகளை அவதானிப்பது ஒன்றே இன்றைய எமது தேவையாகிறது. பிரசார மேடைகளில் கர்ஜித்த “ட்ரம்ப்” என்பவருக்கும் ஜனாதிபதியாகப் பதவியேற்கப்போகும் “ட்ரம்ப்” என்பவருக்கும் இடையில் வேறுபடு இருப்பது போலவும் அவ்வேறுபாடு அனுகூலமிக்கது போலவும் தென்படுகிறது.

“கண்ணாலே காண்பதும் பொய், காதாலே கேட்பதும் பொய், தீர விசாரிப்பதே மெய் ” எனும் முன்னோர்கள் கூற்றுக்கேற்ப ஜானாதிபதி “ட்ரம்ப்” அவர்களுக்குச் சந்தர்ப்பம் அளித்துப் பார்க்க வேண்டியது ஜனநாயகத்தை நம்பும் அனைவரது கடமையாகிறது.

மீண்டும் அடுத்த மடலில்…

அன்புடன்
சக்தி சக்திதாசன்

November 11, 2016