பவள சங்கரி

தலையங்கம்

ஒரு உயிரை அழிப்பது என்பது பாபமான செயல்தான் என்றால், அழிந்து கொண்டிருக்கும் அந்த உயிரினால் பெரிய உயிர் போவதைத் தடுக்காமல் இருப்பதும் பாவம்தானே. இதற்கு சட்ட திட்டங்கள் என்ற பெயரில் எந்த விதத்தில் நியாயப்படுத்த முடியும்? சமீபத்தில்  கர்நாடகாவைச் சேர்ந்த, சவீதா என்ற 31 வயதான பல் மருத்துவர், கொடூரமாக உயிரிழந்தது நெஞ்சை உருக்குவதாக உள்ளது. அயர்லாந்து

நாட்டில் கால்வே எனும் நகரில் பொறியாளராகப் பணிபுரியும் பிரவீன் என்பவரின் மனைவியான இவருக்கு வயிற்றில் உண்டான கரு இயல்பான நிலையில் இல்லையென்பதை,  வயிற்று வலி ஏற்பட்டபோது,  மருத்துவர்களால் கண்டுபிடிக்கப்பட்டு சொல்லப்பட்டுள்ளது. 17 வார கருவே என்பதனால் கோளாறு உள்ள கருவை  கலைத்து விடும்படி வேண்டியும், தங்களுடைய கத்தோலிக்க கிறித்துவ நாட்டின் சட்டப்படி கருவைக் கலைக்க முடியாது என்று மருத்துவர்கள் மறுத்துவிட்ட நிலையில் அக்கரு வயிற்றிலேயே இறந்துள்ளது. அதன் விடம் தொப்புள் கொடி வழியாக தாயின் இரத்தத்தில் பரவி, அவர் உயிரையேக் குடித்துள்ளது. அந்நாட்டு நாடாளுமன்றத்தில் விவாதிக்கும் அளவிற்கு இப்பிரச்சனை பெரிதாகி, இந்தச் சட்டத்தின் விதிகளைத் தளர்த்த வேண்டும் என்று 2000 மக்கள் தலைநகர் டப்ளினில் நாடாளுமன்றத்திற்கு வெளியே பேரணி நடத்தினர். ச‌விதாவின் மரணம் குறித்து விசாரணைக்கு அந்நாட்டு சுகாதாரத்துறை ஜேம்ஸ் ரெய்லி உத்தரவிட்டுள்ள நிலையில் இது குறித்து அயர்லாந்து பிரதமர் எண்ட கென்னி கருக்கலைப்பு செய்யாததால் இந்தியப் பெண் மரணமடைந்துள்ளது. துர்பாக்கியமாதென்றாலும், இது இந்த நாட்டு மக்களின் பன்னெடுங்கால நம்பிக்கை என்பதால் கருக்கலைப்பு சட்டத்தில் தீடீர் என்று எந்த மாற்றமும் செய்ய முடியாது என்று கூறியிருக்கிறார். சட்டங்கள் என்பது மக்களின் வாழ்வைக் காப்பாற்றுவதற்காக என்பது போய், அச்சட்டத்தின் காரண்மாகவே இது போன்று இன்னும் எத்தனை உயிர்கள் போயிருக்கிறதோ என்று யோசிக்க வைக்கிறது. வளர்ந்த நாடுகளில் அங்கொன்றும், இங்கொன்றுமாக நடக்கும் சில சம்பவங்கள்கூட அம்பலமாகி பலத்த எதிர்ப்பும் கிளம்புவது, இனி இதுபோன்ற பிரச்சனைகள் எழாமல் இருப்பதற்கான ஆரோக்கியமான சூழலாகவே இருப்பதோடு இது. மனதிற்கு ஆறுதல்ளிக்கக்கூடிய விசயமாகவும் இருக்கிறது.

இது ஒரு புறமிருக்க இதே துர்பாக்கிய நிலை நம் நாட்டின் பல பிற்பட்ட கிராமங்களிலும், கல்வியறிவற்ற மக்களின் மத்தியிலும் விழிப்புணர்வற்ற நிலையில் எத்தனையோ சவிதாக்கள் மடிந்து கொண்டிருக்கிறார்கள் என்பதே நிதர்சனம். சமீபத்திய உலக சுகாதார மைய கணக்கெடுப்பின்படி, தென் மற்றும் மத்திய ஆசிய நாடுகளில் இந்தியாவிலேயே அதிகப்படியான பாதுகாப்பற்ற கருக்கலைப்பு நடைபெறுவதாக குறிப்பிடப்பட்டுள்ளது. பல பின் தங்கிய கிராமங்களில் சுகாதாரமற்ற முறையில் கருக்கலைப்பு செய்யும் முறை இன்றளவிலும் புழக்கத்தில் உள்ளதும் குறிப்பிடத்தக்கது. முரட்டுத்தனமான மற்றும் சுகாதாரமற்ற பல வழிமுறைகளில் கருக்கலைப்பு செய்வதால் ஏற்படும் தொற்று மற்றும் இரத்த இழப்பினால் சில காலங்களிலேயே நோய்வாய்ப்பட்டு காரணம் அறியாமலேயே இறந்து போகும் அபாயமும் கூட ஏற்படுகிறது.

நம் நாட்டில் கருக்கலைப்பு சட்டப்படி தவறானதொன்றில்லையென்றாலும் பல காரணங்களுக்காக கிராம மக்கள் மருத்துவமனைகளில் சென்று கருக்கலைப்பு செய்வதை தவிர்த்துவிடுகிறார்கள். சுகாதாரமற்ற  முறையில் சில பழக்கங்களைத் தொடர்வதால் பல பிரச்சனைகளை எதிர்கொள்ள வேண்டிவருகிறது. நம் இந்தியாவில் மத்திய பிரதேசம், தமிழ்நாடு, உ.பி.போன்ற பல மாநிலங்களின் பிற்பட்ட கிராமங்களிலும் இது போன்ற கருக்கலைப்புகள் பல உயிர்களை பலி வாங்குவது வெளியில் தெரியாமலே போய்விடுவதும் உண்டு. இதன்அபாயம் எந்த அளவிலானது என்ற விழிப்புணர்வும் கூட இல்லாமலே மக்கள், குறிப்பாக பெண்கள் வாழ்ந்து கொண்டிருக்கும் துர்பாக்கிய நிலையே காணமுடிகிறது.

மருத்துவக் காப்பீட்டுத் திட்டங்களின் பயன்பாடு குறித்த விழிப்புணர்வே சுத்தமாக இல்லாத நிலையும் இதற்கொரு முக்கியமான காரணம். நுகர்வோர் உரிமைச் சட்டம் குறித்து அறிந்துள்ள அளவிற்குக்கூட இலவச மருத்துவ காப்பீடு திட்டம் பற்றி அறியாதவர்கள் உள்ளனர். “அட இப்படி ஒரு திட்டம் இருக்கிறதா, அதனால் என்ன பயன்?” என்று கேட்பவர்களே இன்று கனிசமாக இருக்கிறார்கள். இது போன்ற திட்டங்கள் பெண்களைச் சென்று அடைந்தால்தான் கருக்கலைப்பினாலோ அல்லது பிரசவத்தினாலோ, குழந்தைகளுக்கோ ஏற்படும் பிரச்சனைகளுக்காக மருத்துவமனையின் உதவியை நாடுவார்கள். இல்லையென்றால் அரசாங்க மருத்துமனைகளில் பல மணி நேரங்கள் காத்திருப்பதற்கு அஞ்சியும், தனியார் மருத்துவமனைகளின் அதிகமான கட்டணங்களுக்கு அஞ்சியும் தம் உயிரைப் பற்றியும் கவலைப் படாமல் முறையான பயிற்சி இல்லாதவர்களிடம் கருக்கலைப்பும், பிரசவமும் பார்த்துக்கொள்ள வேண்டிய நிலைக்குத் தள்ளப்படுகிறார்கள். மருத்துவமனைகள் எல்லாம் சேவை மையங்கள் என்ற நிலை மாறி இன்று வியாபார மையங்களாக மாறியுள்ளதால் ஏழை எளிய மக்களுக்கு தாய்மை என்பது ஒரு சாபமாக ஆகும் நிலையே ஏற்படுகிறது.  ஏட்டளவிலேயே பிரகாசித்துக் கொண்டிருக்கும் சில திட்டங்கள் குறித்த முழுமையான விழிப்புணர்வு ஏற்படுத்தப்படவில்லையெனில்  அதற்குரிய பயன்கள் தேவையானவர்களுக்குச் சென்று சேராமல் உயிரிழப்புகளும் ஏற்பட்டுக் கொண்டுதானிருக்கும். சவிதாவின் மரணம் இந்த அவல நிலைகளுக்கு ஒரு அபாய மணியாக ஒலிக்க வேண்டும் என்பதே சமூக ஆர்வலர்களின் விருப்பமாக உள்ளது.

பவள சங்கரி

தலையங்கம்

புத்தாடை, பலகாரங்கள், பட்டாசு, வானவேடிக்கை என்று தீபாவளியை கோலாகலமாகக் கொண்டாடிய காலமொன்று இருந்தது. வருடம் முழுவதும் உழைத்து, அதில் பெற்ற ஊக்கத் தொகையை வைத்து ஆயிரம் கற்பனைகளுடன் காத்திருக்கும் குழந்தை குட்டிகளுக்கு ஓரளவிற்காவது திருப்திபடுத்தி இன்பமாக கொண்டாடிக் கொண்டிருந்ததற்கும் இன்று வேட்டு வைத்தாகிவிட்டது. “என்னங்க …. தீபாவளி, வயித்துப்பாட்டுக்கே இங்கே திண்டாட்டமா இருக்கு, இதுல எங்க, பண்டிகைக் கொண்டாட்டமெல்லாம்” இதுதான் இன்றைய ஜவுளி நகரமான கோவை மற்றும் அதன் சுற்று வட்டாரத்தின் மத்தியதர மற்றும் கீழ்தட்டு மக்களின் புலம்பலாக இருக்கிறது. மத்தியதர குடும்பங்களும் இன்று கீழ்தர பொருளாதார நிலைக்கு இறங்கியுள்ளதுதான் வேதனையின் உச்சம். உழைக்கத் தயாராக இருக்கும் மக்களுக்கே இந்த நிலை என்றால் ஏனையோருக்கு கேட்கவே வேண்டியதில்லை. மின்வெட்டு, வேலை இல்லை என்று சுருண்டு கிடக்கப் பழகிவிட்டார்கள். ஆம் நாளொன்றுக்கு மூன்று மணி நேரம் மட்டுமே தொழிற்கூடங்கள் இயங்க முடிகிற இன்றைய நிலையில் தொழிலாளர்களுக்கு, சிறு முதலீட்டாளர்கள் எந்த அளவிற்கு ஊக்கத்தொகை கொடுக்க முடியும்? எட்டு மணி நேரம் செய்யும் வேலைக்கு வாங்கும் கூலியே வாய்க்கும், வயிற்றுக்கும் போதவில்லை, குழந்தைகளை படிக்க வைக்க முடியவில்லை என்று புலம்பும் தொழிலாளர்கள் இன்று மூன்று மணி நேர வேலை மட்டுமே செய்ய முடிந்து அதற்கான கூலியை மட்டுமே பெறும் சூழலில் புலம்பவும் சத்தில்லாமல் நொந்து போய்க் கிடக்கிறார்கள் என்பதுதான் உணமை.. 50 தறி போட்டு ஓட்டிக் கொண்டிருக்கும் ஒரு சிறு முதலீட்டாளர், மூன்று மணி நேர மின்சாரம் மட்டுமே இருக்கும் சூழலில் , கொள்முதல் செய்யும் சரக்கின் அளவும் குறைந்து, அந்த வியாபாரிக்கும் சரக்கு தேங்கிப் போகும் சூழலோடு, தொழிலாளர்களுக்கு மூன்று மணி நேரத்திற்குரிய கூலி மட்டுமே கொடுக்க முடிகிறது.  அவர்களுக்கான ஊக்கத் தொகையும் கனிசமாகக் குறைத்து விட்டது.. சமத்துவம் என்று வாயளவில் பேசுபவர்களின் பாரபட்சம் விளங்கவில்லை. கடுமையாக தொழில்நிலை பாதிக்கப்பட்டு, மொத்த தமிழ்நாட்டின் பொருளாதாரத்தையே ஆட்டம் காணச் செய்யக்கூடிய ஜவுளி மற்றும் அதைச் சார்ந்த பிற தொழில்கள் நலிவடையும் படியாக கடுமையான மின்வெட்டு இருக்கும் போது சென்னை போன்ற பெரு நகரங்களுக்கு மட்டும் 2 மணி நேரமே மின்வெட்டு என்று நிர்ணயிப்பதில் என்ன நியாயம் இருக்கிறது. இதற்கான எதிர்ப்புகளும் கிளம்பிய சூட்டோடு அணைக்கப்பட்ட மர்மமும் புரியவில்லை. இந்த இலட்சணத்தில் பண்டிகை கொண்டாட்டங்களுக்காகச் சில பெரிய கடைகளில் சீரியல் விளக்குகளைப் போட்டு மின்சாரத்தை வீணாக்கும் கொடுமையைக் கேட்க எவரும் இல்லை, சம்பந்தப்பட்டவர்களுக்கும் அதற்கான பொறுப்பும் இருப்பதாகத் தெரியவில்லை. ஆக வாழ்வாதாரத்தையே பாதிக்கக்கூடியச் சூழலில் நோம்பிய்ம், நொடியும் தேவையா என்று நொந்து போயிருக்கும் மக்களுக்கு ஆதரவாக எந்த அறிக்கையும் இன்றுவரை வெளிவரவில்லை என்பதே நிதர்சனம்.  இருளில் ஒளிரும் தீபத்திருநாளுக்கு வாழ்த்துக்கள்.

பவள சங்கரி

தலையங்கம்

அனைத்துலகும் ஆவலுடன் எதிர்நோக்கியிருக்கும் அமெரிக்க அதிபர் தேர்தலில் மக்கள் வாக்களித்துக் கொண்டிருக்கிறார்கள். ஒபாமா மற்றும் மிட் ராம்னி என் இரு பெரும் தலைவர்கள் பங்கேற்கும் மிகப்பெரிய ஜனநாயக விழா, பல ஆயிரம் கோடி (5500 டாலர்) செலவில் நடத்தப்படுகிறது. இந்தத் தேர்தல் முடிவுகள் எதுவாக இருப்பினும் நிலையான முடிவுகள் என்று சில உண்டு. இந்தியாவுடனான தொடர்புகள் தொடரப்போவதில் சந்தேகம் இல்லை. சீனாவுடனான வணிகத் தொடர்புகள் கட்டுப்பாட்டுக்குள் வரலாம். பாகிஸ்தானுக்கான உதவிகள் தொடர்ந்தாலும் அவைகள் ஆய்வுக்கு உட்படுத்தப்படும். தகவல் தொழில்நுட்பத் துறையில் வெளிநாட்டவருக்கான வேலை வாய்ப்பு, போன்றவைகள் யார் ஆட்சிக்கு வந்தாலும் எந்த மாற்றமும் இல்லாமல் தொடர்வதற்கான சாத்தியங்கள் அதிகம். வெற்றிகரமான தொழில் அதிபரா அல்லது மக்களின் மனதில் குடிகொண்டிருக்கும் அதிபரா என்பதைப் பொறுத்திருந்துதான் பார்க்க வேண்டும்.  இன்னும் 48 மணி நேரத்தில் ஓரளவிற்குத் தெரிந்துவிடும். பணக்காரத் தத்துவம் நிறைந்த , சிறந்த தொழிலதிபரான மிட் ராம்னி தேர்ந்தெடுக்கப்பட்டால் செல்வந்தரின் நலனுக்காக மட்டுமே முடிவெடுத்து, செயல்படுத்தும் வாய்ப்புகள் அதிகம். ஒவ்வொரு தொழிலகங்களிலும் கொத்துக் கொத்தாக மக்கள் வேலை இழக்கக்கூடிய அபாயம் மேலும் அதிகரிக்கலாம். அமெரிக்க முதலாளித்துவ தத்துவங்கள் மீண்டும் மீண்டும் வலியுறுத்தப்படும். அவருடைய செயல்பாடுகள் அனைத்தும் பெரும்பாலும் பெரும் செல்வந்தர்களின் முதலீடுகளைப் பாதுகாப்பதாகவே அமையும். அதிபர் ஒபாமா தேர்ந்தெடுக்கப்பட்டால் ஏழை மக்களின் நலவாழ்வு பாதுகாக்கப்படும் வாய்ப்பு அதிகம்.  புதிய மருத்துவ காப்பீட்டுத் திட்டங்கள் தொடர்வதற்கான வாய்ப்புகளும் அதிகரிக்கும். ஏழை மக்களின் கண்ணீர் துடைப்புகளுக்கான நம்பிக்கை அதிகரிக்கலாம். ஏழை மக்களின் கண்ணீரா அல்லது செல்வந்தரின் பாதுகாக்கப்படும் செல்வமா என்று பொறுத்திருந்து பார்ப்போம். வாழ்க அமெரிக்க ஜனநாயகம்!

படத்திற்கு நன்றி :

http://www.bbc.co.uk/news/world-us-canada-20180630

பவள சங்கரி

தலையங்கம்

ஒவ்வொரு ஆண்டும் போலவே இந்த முறையும் காந்தியடிகள் பிறந்தநாளில் அவருடைய கொளகைகளையும், தத்துவங்களையும் நினைவில் கொண்டு அதைப்பற்றி வானளாவ புகழ்ந்து பேசுவதோடு நிறுத்திக்கொள்ள வேண்டியதுதான். நம்முடைய பண்டமாற்றுக்காக உபயோகிக்கும், ரூபாய்த் தாள்களில் மகாத்மாவின் உருவத்தைப் பதித்தால் மட்டும் போதுமா? ஆங்கிலேயர்களை வெளியேற்றுவதற்காக அண்ணல் எடுத்த முதல் ஆயுதமே அந்நிய பொருளக்ளின் புறக்கணிப்புதான். ஆனால் இன்றைய சூழ்நிலை என்ன.. அனைத்துப் பொருட்களும் வெளிநாட்டிலிருந்து இறக்குமதி செய்வதில் தவறில்லை, அன்னிய முதலீடுகளை ஏற்றுக்கொள்வதற்காக எந்த அளவிற்கும் வளைந்து கொடுக்கலாம் என்ற கருத்தில் இருக்கும்போது காந்தியடிகளை நினைவுகூர்வதில் என்ன பலன் வந்துவிடப்போகிறது. அவருடைய பிறந்த நாளை நூற்றாண்டு விழா மற்றும் அதற்கு மேலும் என்று கொண்டாடுகிறோமே தவிர அவருடைய கருத்துக்களை வாழ்க்கையில் ஏற்றுகொண்டுள்ளோமா என்றால் இல்லை என்பதுதான் நிதர்சனம். அன்னிய பொருட்களை வாங்கிக் கொண்டே செல்லச்செல்ல நம்முடைய பொருளாதாரம் கீழே இறங்கிக்கொண்டே அல்லவா இருக்கிறது. ரூபாயின் மதிப்பு குறைந்து கொண்டே வருகிறது. அன்று வரிகொடாமை இயக்கம் நடத்தி அன்னிய அரசாங்கத்திற்கு தன்னுடைய ஒத்துழையாமையை காட்டினார் அண்ணல். ஆனால் இன்று வரி இல்லை. அதற்குப் பதிலாக அவர்களுக்கு இலாபமாக வரியை கொட்டிக் கொடுத்துக்கொண்டு இருக்கிறோம். மகாத்மா காந்தியடிகளின் பிறந்த நாளாகிய இத்தருணத்திலாவது அவரு்டைய கருத்திற்கு ஏற்ப பொருளாதாரக் கொள்கைகளையும், மற்ற தத்துவங்களையும் கடைபிடித்து அதன்வழி நடப்பதே அவருக்கு நாம் செய்யும் சிறந்த அஞ்சலியாகும்.   

வாழ்க காந்தியம்
வளரட்டும் நம் பொருளாதாரம்.

படத்திற்கு நன்றி:

http://www.encyclopedia.com/topic/Mohandas_Karamchand_Gandhi.aspx

பவள சங்கரி

தலையங்கம்

 புதிய நிதி அமைச்சரின் வழிகாட்டுதலில் நமது பொருளாதாரம் சிறந்த இடத்தைப் பிடிக்குமா? சில்லறை வர்த்தகத்தில் அன்னிய முதலீடு இன்றைய சூழலில் தேவையா? முடங்கிப்போயுள்ள  மின்துறை, பொருளாதாரத்தை பின்னிழுத்துக் கொண்டிருக்கிற இந்த வேளையில் டீசலுக்கு, லிட்டருக்கு ரூ5  விலையேற்றம் நியாயமா? 12 முதல் 14 மணி நேரம் மின்சாரம் இல்லாத  இந்தச் சூழலில் தொழிலகங்கள், தங்களின் உற்பத்தியை ஒழுங்குபடுத்துவதற்கு டீசலை நம்பியிருக்கும் காலகட்டத்தில் இந்த விலையேற்றம் சரியானதா  ஏற்றுமதியாளர்களுக்கு இந்தச் சுமை பெரும் பற்றாக்குறையை ஏற்படுத்தாதா? உதாரணத்திற்கு, ஏற்றுமதிக்கான ஒரு ஆடை தயாரிப்பதற்கான செலவாக ரூ 100 என்ற கணக்கில் ஒப்பந்தம் போட்டதாகக் கொண்டால்,. மின்சாரப் பற்றாக்குறையால் குறைந்த உற்பத்திக்கு தொழிலாளர்களுக்கு அதிக சம்பளம் கொடுக்க வேண்டும். அதோடு சேர்த்து  மின் உற்பத்திக்கான டீசல் செலவும் அதிகமாகும்போது தயாரிப்புச் செலவே ரூ110 ஆகிவிடுகிறது. இதனால் ஏற்றுமதியாளருக்கு கோடிக்கணக்கில் நட்டம் ஏற்படும் வாய்ப்பு மிக அதிகம். இதை நம்முடைய நிதியமைச்சர் கருத்தில் கொண்டதாகத் தெரியவில்லை. இதேபோல் அனைத்துத் தொழில்களும் முடங்கிப் போகும் அபாயம் ஏற்படுகிறது. இதனால் நாட்டின் பொருளாதாரம் பெருமளவில் பாதிக்கக்கூடும்

பொருளாதார வல்லுநரான நம் பாரதப் பிரதமர் மரத்திலா டாலர் காய்க்கும் என்கிறார்.. அன்னிய செலாவணி அவசியம் தேவை என்கிறார்..  சில்லரை வணிகத்தில் அன்னிய முதலீடு செய்வதனால்  பொது மக்களுக்கு பெரிய இலாபம் எதிர்பார்க்க முடியாது என்பது அனைவரும் அறிந்ததே. மக்கள் தொகை குறைவாக உள்ள ஒரு சில நாடுகளுக்கு வேண்டுமானால் சங்கிலித்தொடர் கடைகள் சரிப்பட்டு வரலாம். ஆனால் பரந்து, விரிந்து மக்கள் தொகை மிகுந்த நம் நாட்டிற்கு இது சரிப்பட்டு வருமா என்பது ஐயப்பாடுதான்.  1000 முதலாளிகளை அழித்து ஒரு முதலாளியை உருவாக்குவதற்கு அரசு ஏன் பாடுபட வேண்டும். இலண்டன் பாராளுமன்றத்திற்கு தேர்ந்தெடுக்கப்பட்ட இந்திய வம்சாவழியைச் சார்ந்த பாரளுமன்ற உறுப்பினர் இந்தத் திட்டம் தம் தொகுதியில் மிகப் பெரிய தோல்வியைத் தழுவியதாக கூறியுள்ளதையும் நாம் கருத்தில் கொளள வேண்டும். இளம் வயதில் படித்த சிந்துபாத்தும் கிழவனும் கதைதான் நினைவிற்கு வருகிறது.. நாளை இந்த அன்னிய முதலீட்டாளர்கள் நம் தோளின் மீது உட்கார்ந்து கொண்டு நம் கழுத்தை நெறிக்கும் போது அதற்கு என்ன தீர்வை ஆட்சியாளர்கள் வைத்துள்ளார்கள் என்பது தெரிந்தாலாவது நிம்மதியாக இருக்க முடியும்.

.