Category: தலையங்கம்

பவள சங்கரி

தலையங்கம்

விவசாயத்திற்கு அடுத்தபடியாக அதிக வேலை வாய்ப்புகளை அளிக்கக்கூடிய, ஜவுளித்துறையின் நலிந்துவரும் இன்றைய நிலை மத்திய , மாநில அரசுகள் அதனை புறக்கணிப்பதையே வெளிப்படுத்துகின்றது. மற்ற நாடுகளில் இதற்கான மூலப்பொருட்கள் கொள்முதலுக்கு 4% வட்டி மட்டுமே விதிக்கப்படுகின்றது. ஆனால் இந்தியாவில் 12% வட்டி விதிக்கப்படுகின்றது. பருத்தி விளைச்சல் அமோகமாக இருப்பினும் ஆலை உரிமையாளர்களால் அதிக கொள்முதல் செய்யமுடிவதில்லை. பண முதலைகள் பருத்தியை அதிகமாகக் கொள்முதல் செய்து பதுக்கி வைத்து செயற்கையான விலையேற்றத்தை ஏற்படுத்துகின்றனர். இதைத் தவிர்ப்பதற்கு மத்திய அரசு பருத்தியைக் கொள்முதல் செய்வதற்கு 4% வட்டியில் கடன் அளிக்க ஏற்பாடு செய்தால் ஆலை உரிமையாளர்கள் 6 மாதம் முதல் 10 மாதம் வரை பயன்படுத்தக்கூடிய பருத்தியைக் கொள்முதல் செய்து உற்பத்தியில் தங்களுடைய முழுத் திறனையும் வெளிக்கொணரமுடியும். இதனால் நூல் விலை குறைவதோடு ஜவுளி உற்பத்தியையும் பெருக்க முடியும்.

ஒரு காலத்தில் தமிழ்நாடு பருத்தி விளைச்சலில் சிறந்து விளங்கி அதனை ஏற்றுமதி செய்யும் மாநிலமாகத் திகழ்ந்தது. இன்று விளை நிலங்கள் மிகவும் குறைந்துவிட்ட நிலையில் அதன் விளைச்சலும் 5% ஆகக் குறைந்துவிட்டது. தமிழ்நாட்டில் இருக்கும் மொத்த ஆலைகளுக்குத் தேவையான பருத்தியின் 95 சதவிகிதம் வெளி மாநிலங்களிலிருந்து எதிர்பார்க்க வேண்டியுள்ளது. நமது தமிழ்நாட்டில் மட்டும் 52 மில்லியன் சுழல் அச்சுகள் உள்ள ஆலைகள் உள்ளன என்பதும் குறிப்பிடத்தக்கது. இதையொட்டிய ஜவுளியின் மற்ற துறைகளிலும் நிர்வாகத்திறமை, தொழில் திறமை போன்றவைகள் அதிகப்படியாக இருப்பினும், அரசின் ஆதரவு இல்லாததால் கூலிக்கு வேலை செய்யவேண்டிய கட்டாய நிலையில் உள்ளது என்பதோடு வட மாநிலங்களை சார்ந்திருக்க வேண்டிய சூழ்நிலையும் உருவாகிறது. ஏற்றுமதியிலும் ஜவுளிக்கு ஆதரவான கொள்கை இல்லாததால் ஏற்றுமதி மூலமாக கிடைக்கக்கூடிய மிகப்பெரும் அந்நியச் செலாவணியையும் இழக்கக்கூடிய நிலையே உள்ளது. நாட்டின் பொருளாதார வளர்ச்சிக்கு மிகவும் இன்றியமையாத ஜவுளித் துறையை மத்திய அரசு உதாசீனப்படுத்தாமல் அதற்குரிய நலத்திட்டங்களை விரைந்து செயல்படுத்த வேண்டியது அவசியம் .

பவள சங்கரி

தேசிய குறியீட்டு எண்ணும், மும்பை குறியீட்டு எண்ணும் (நிஃப்டி, சென்செக்ஸ்) தங்கள் தகுதிக்கு மீறிய உச்சத்தை தினந்தோறும் தொட்டுக்கொண்டிருக்கின்றன. பல பங்குகள் 100 மடங்கு, 200 மடங்கு என்று விலை ஏறியுள்ளன. இதனால் கோடீசுவரர்கள் ஆனவர் பலர். தகுதிக்கு மீறிய வளர்ச்சி என்றும் நிலைத்து நிற்பதில்லை. 100 ரூபாய் பங்கு 110 க்கோ அல்லது 120க்கும் கூட விற்கலாம். 200 ரூபாய்க்கும்கூட விற்கலாம். ஆனால் 1000 ரூபாய்க்கு விற்றால் அது எப்படி நிலைத்து நிற்கும்?  இது திட்டமிட்டு பன்னாட்டு நிறுவனங்களால் ஒரு மாயையான உச்சத்தை அடைந்துள்ள நிலை. இந்த நிலையில் இது என்று வேண்டுமானாலும் அதள பாதாளத்தை அடையலாம். பல இலட்சக்கணக்கான சிறு முதலீட்டாளர்கள் மிகப்பெரிய இழப்பைச் சந்திக்க நேரிடலாம். இந்த உச்சம் நிலைத்து நிற்பது சாத்தியமில்லாதொன்று என்பது உறுதி. அமெரிக்காவில் 1987 இல் பங்குச்சந்தையில் Black  Monday ஏற்பட்டது நினைவு கூரத்தக்கது. 30 ஆண்டுகளுக்குப் பிறகு அதே போன்றதொரு வீழ்ச்சியை நாம் சந்திக்க நேர்ந்தால் நம் பொருளாதாரமே வீழ்ச்சியடையக்கூடும். நம் மத்ய நிதியமைச்சகமும், ரிசர்வ் வங்கியும் இதில் தலையிட்டு ஒரு நிலைப்பாட்டை எடுக்கவேண்டியது அவசியம். இன்று சீனாவின் மத்திய வங்கி பங்குச்சந்தை பற்றி கூறியுள்ளதும் கருத்தில் கொள்ளத்தக்கது..

பவள சங்கரி

தலையங்கம்

திரையரங்குகளுக்கு வசூலிக்கப்படும் நுழைவுக் கட்டணத்தை 25% ஆக உயர்த்திக்கொள்ள அனுமதித்து தமிழக அரசாணை வெளியிட்டுள்ளது. இதற்கு மேல் ஜிஎஸ்டி வரி, கேளிக்கை வரிகளும் சேர்த்து வசூலிக்கப்படும். இதில் வேடிக்கை என்னவென்றால் ஒரே திரைப்படத்திற்கு திரையரங்குகளுக்குத் தகுந்தாற்போல் கட்டண நிர்ணயம் செய்யப்பட்டுள்ளதுதான். குளிர்சாதன வசதி இல்லாத அரங்கிற்கு ஒரு கட்டணம், குளிர்சாதன வசதி இருக்கும் அரங்கிற்கு ஒரு கட்டணம், மல்டிபிளக்ஸ் அரங்குகளுக்கு ஒரு கட்டணம். இது மட்டுமன்றி திரையரங்கு நகராட்சி பகுதிகளில் இருந்தால் ஒரு கட்டணம், மாநகராட்சி பகுதியில் இருந்தால் அதிக கட்டணம். இதன் மூலமாக திரையரங்கு உரிமையாளர்கள் ஒரு நாளைக்கு ஒரு இலட்சம் உரூபாய் வரை கொள்ளையடித்துக்கொள்ள அனுமதிக்கப்பட்டுள்ளது. இந்த கட்டண உயர்வும் திரைப்படத் தயாரிப்பாளர்களுக்கும், திரையரங்கு உரிமையாளர்களுக்கும் போதாமல் திரையரங்கை மூடி வேலை நிறுத்தம் செய்யப்போகிறார்களாம். திரைப்படத் தயாரிப்பாளர்கள் தங்களுடைய வருமானத்தில் 25% குறைத்துக்கொள்ள மாட்டார்கள். பல கோடிகள் சம்பளமாகப் பெறும் நடிகர்கள் தங்கள் சம்பளத்தில் 25% குறைத்துக்கொள்ள மாட்டார்கள். ஆனாலும் மக்களிடம் அதிகமாகக் கொள்ளையடித்து இந்த ஒரு சில நூறு பேர்களை வாழவைக்கவேண்டும் என்று முடிவெடுத்திருக்கின்றனர். இதில் புதிய திரைப்படங்களை வெளியிடமாட்டோம் என்ற அறிவிப்பு வேறு. உண்மையிலேயே திரைப்படங்கள் வெளியிடப்படாவிட்டால் பொது மக்களுக்கு பெரிய பாதிப்பு என்பதெல்லாம் இல்லை. பாதிப்புகள் ஏகப்பட்ட இலாபம் பார்க்கும் திரைத்துறையினருக்குத்தான் என்பதை நினைவில் கொள்ளவேண்டும். அந்த வகையில் திரையரங்கக் கட்டணங்களை மிக அதிகப்படுத்துவதால் திரைத்துறை நலிவடைந்து அழியும் அபாயத்திற்கு உள்ளாகும் என்பதே நிதர்சனம்.

பவள சங்கரி

புதிய ஜிஎஸ்டி வரிவிதிப்புகள், உயர் நோட்டுகள் செல்லாது என்று அறிவித்து மூன்று மாதங்கள் நிறைவடைந்த நிலையில் எஸ்&பி ரேட்டிங் நிறுவனம் இந்திய பொருளாதாரத்திற்கு இறங்குமுக (downgrade ratings) மதிப்பீடு அளித்துள்ளது. இதன் உடனடி விளைவுகளாக ரூபாயின் மதிப்பு குறைதலும், அன்னிய செலாவணி கையிருப்பு குறைதலுமே பயனாகிறது. இதற்கான தீர்வாக நம் நிதியமைச்சகம் என்ன நடவடிக்கை எடுக்கப்போகிறது என்பதை பொறுத்திருந்துதான் பார்க்க வேண்டும்?

இன்றைய ஜிஎஸ்டி பற்றிய அரசு விளம்பரங்களின்படி உணவுப் பொருட்களுக்கு வரியிலிருந்ந்து விலக்கோ அல்லது முந்தைய மறைமுக வரியைவிட குறைவாக இருந்தாலும் இப்பொழுது உணவு விடுதி நிறுவனங்கள் ஏன் அதிகப்படியாக விலைவிதிப்பை செய்ய வேண்டும்?

பவள சங்கரி

தலையங்கம்

பல்வேறு பொருட்களுக்கு குறைந்தபட்சமாக 5%, அதிகபட்சமாக 28% வரி விதிக்கப்பட்டுள்ளது. ஜூலை மாதம் முதல் நடைமுறைக்கு வந்த இந்த வரிவிதிப்பால் அரசிற்கு கிடைத்த வருமானம் சுமாராக 95,000 கோடி ரூபாய். ஆனால் கடந்த ஆகஸ்ட் மாத வருவாய் 90,000 கோடியாகக் குறைந்துள்ளது என்று அரசின் புள்ளி விவரங்கள் கூறுகின்றன. ஒரு மாதத்தில் 5,000 கோடி ரூபாய் வரி வருவாய் குறைந்துள்ளது. அதாவது தொழில்துறையில் ஒரு மாதத்தில் சுமாராக 50,000 கோடி ரூபாய்க்கு உற்பத்தி அல்லது தொழில் நலிவடைந்துள்ளது என்பதையே இது உணர்த்துகிறது. அதிக வரிவிதிப்பால் தொழில்கள் முடங்குமேயொழிய அதிக வருவாய் கிடைக்கும் வாய்ப்பு குறைவு என்றே கொள்ள முடிகிறது. விழாக்காலமான இந்த சமயத்தில் வரி வருமானமும், தொழில் துறையும் மிகப்பெரிய அளவில் வளர்ச்சியடைய வேண்டிய காலகட்டம். மாறாக வரி வருவாய் குறைந்துள்ளது என்பது சிந்திக்க வேண்டிய விசயம். இன்று உணவு விடுதித் தொழில் நலிவுறும் நிலையில் உள்ளதைக் காணமுடிகிறது. பெரும்பாலும் உயர்மட்ட வகுப்பினர் வரி விதிப்பைப் பற்றி கவலை கொள்வதில்லை. ஆனால் பெருவாரியாக உள்ள மத்திய தர வகுப்பினர் இதனால் பெரிதும் பாதிக்கப்பட்டுள்ளனர். வாரத்திற்கு ஒரு நாளோ அல்லது மாதத்திற்கு இரண்டு நாட்களோ குடும்பத்துடன் உணவு விடுதிக்குச் செல்லக்கூடியவர்கள், குளிர் சாதன வசதியுள்ள விடுதிகளைத் தவிர்த்து சாதாரண விடுதிக்குச் செல்கின்றனர். அங்கும் கார வகைகளுக்கு அதிகமான வரியும், இனிப்பு வகைகளுக்கு குறைவான வரி விதிப்பும் செய்துள்ளது வருத்தம் அளிக்கக்கூடியது. இதில் சில உணவு விடுதிகள் இந்த வரி விதிப்பை பயன்படுத்தி மேலும் அதிக விலையில் விற்கின்றனர். அவர்கள் கொடுக்கும் இரசீதுகளில் இந்த வரிவிதிப்பு குறித்த எந்த விதமான தகவல்களும் இருப்பதில்லை. இதனால் பெரும்பாலான உணவு விடுதிகள் பெரும் சரிவைச் சந்திக்கின்றன. இப்படித்தான் அதிக வரிவிதிப்பால் அனைத்துத் தொழில்களும் நலிவுறும் அபாயமும் உள்ளது. அமெரிக்க அதிபர் பெரிய நிறுவனங்களுக்கான வரியை 30 சதவிகிதத்திலிருந்து 20 சதவிகிதமாகக் குறைத்து, இதன் மூலம் பொருளாதாரமும் தொழிலும் வளர்ச்சியடைந்து வேலை வாய்ப்புகளும் பெருகும் என்றும் அறிவித்துள்ளது குறிப்பிடத்தக்கதாகும். நமது அரசும் பெட்ரோலியப் பொருட்களுக்கான விலை உயர்வை கட்டுக்குள் வைப்பதற்கும், ரூபாயின் மதிப்பை அதிகரிப்பதற்கும் தக்க நடவடிக்கை எடுக்கவேண்டிய கட்டாயச் சூழலில் உள்ளது. அனைத்துப் பொருட்களையும் ஜிஎஸ்டி வரிவிதிப்பிற்குள் கொண்டுவந்த நடுவண் அரசு, பெட்ரோலியப் பொருட்களை மட்டும் இதற்குள் கொண்டுவராமல் மாநில அரசுகளை கேட்டுக்கொண்டிருப்பது நியாயமாகுமா? பெட்ரோலியத் துறை அமைச்சர் பல முறை அறிவித்தும் இதை நடைமுறைப்படுத்தாமல் இருப்பது பொது மக்களை மேலும் வேதனைக்குள்ளாக்குகிறது. ஜிஎஸ்டி வரிவிதிப்பில் உள்ள இந்த குளறுபடிகள் நீங்கி ஒரு இந்தியா ஒரு வரிவிதிப்பு என்ற நிலை வந்தால் நாடு நலம் பெறும் என்ற எதிர்பார்ப்பும் மக்களிடையே உள்ளது.

பவள சங்கரி

தலையங்கம்

விமானம் ஓடு பாதையில் விமானங்கள் 75 முதல் 80 வினாடிகளில் பறந்துவிட வேண்டும் என்றிருந்ததை இனி 70 வினாடிகளுக்குள் பறந்துவிட வேண்டும் என்று அறிவுறுத்தப்பட்டது. இது மேலும் 60 வினாடிகளாகக் குறைப்பதே நமது விமான நிலையத்தின் குறிக்கோளாக உள்ளது. சென்னை விமான நிலையத்திலிருந்து ஒரு மணிக்கு 32 விமானங்கள் என்று இருப்பதை இனி ஒரு மணிக்கு 36 விமானங்கள் பறகும். இது நமது சென்னை விமான நிலையத்தின் பொருளாதார வளர்ச்சியையும், பாதுகாப்பையும் மேம்படுத்துவதாக உள்ளது.

விமானத்தில் நுழைவதற்கு இருக்கை எண்ணுடன் கூடிய அனுமதிச்சீட்டு (boarding pass) முறை இரத்து செய்யப்படவிருப்பதால் கால தாமதங்கள் குறைய வாய்ப்பாகிறது.

பவள சங்கரி

தலையங்கம்

உயர்மதிப்புள்ள நோட்டுகள் செல்லாது என்ற அறிவிப்பு புதிய வரிவிதிப்பு கொள்கை, ஜி.எஸ்.டி. அறிமுகம் தினசரி பெட்ரோலியப்பொருட்களின் விலைவிதிப்பு, வங்கிகளுக்கு வானளாவிய அதிகாரங்கள் என பொருளாதார மாற்றங்களை நடுவண் அரசு பெருமளவில் கொண்டுவந்துள்ளது. இந்த மாற்றங்களால் அரசிற்கோ அல்லது பொது மக்களுக்கோ, அல்லது அதைச்சார்ந்த நிறுவனங்களுக்கோ எந்த அளவில் பயன் ஏற்பட்டுள்ளது? இந்த மாற்றங்களால் அரசின் வரி வருமானம் அதிகரித்துள்ளது என்பதில் ஐயமில்லை. கடந்த சூலை மாதத்தில் 70 சதவிகித கணக்குகள் மூலமாகவே உரூ 90,000 கோடி அரசிற்கு வருமானமாகக் கிடைத்துள்ளதாக ஒரு புள்ளி விவரம் தெரிவிக்கிறது. இதே 100 சதவிகிதமாக இருந்தால் ஒரு இலட்சத்து முப்பதினாயிரம் கோடி உரூபாய் மாத வரி வருமானமாகும். ஆண்டு ஒன்றிற்கு 15 இலட்சத்து 60,000 கோடி உரூபாயாகும்.

பெட்ரோலியப் பொருட்கள் தினசரி விலை மாற்றத்தால் 65 உரூபாய்க்கு விற்ற ஒரு லிட்டர் பெட்ரோலின் விலை இன்று 73 உரூபாயாக உள்ளது. எந்தவிதமான கட்டுப்பாடுகளற்று இந்த இரண்டு மாதங்களில் சுமாராக லிட்டருக்கு 8 உரூபாய் விலை ஏற்றப்பட்டுள்ளது. டாலருக்கு நிகரான உரூபாயின் மதிப்பானது மூன்று மாதங்களில் இல்லாத வகையில் உச்சபட்ச நிலையை எட்டியுள்ளது. பெட்ரோலியப் பொருட்களின் சந்தை நிலவரப்படி விலையில் பெரும் மாற்றங்கள் இல்லை. ஆக, ஒரு லிட்டர் பெட்ரோலின் விலை 65 உரூபாய்க்கு கீழ் இருக்கவேண்டும். ஆனால் அந்த பெட்ரொல் விலைக்குரிய கணக்கீடுகள் சரிவரச் செய்யப்படவில்லையோ என்ற ஐயத்தை ஏற்படுத்துகின்றது. மத்திய நிதி அமைச்சர் அந்தந்த மாநிலங்கள் பெட்ரோலியப் பொருட்களுக்கு விதிக்கக்கூடிய வரிவிதிப்பை விலக்கக்கோரியும் இதுவரை எந்த மாநில அரசும் இதைச் செயல்படுத்தவில்லை. ஒரு புறம் எண்ணெய் நிறுவனங்களின் கேள்வி கேட்பாரற்ற விலை நிர்ணயங்களும், மாநில அரசுகளின் வரிவிதிப்புகளும் மக்களை கொள்ளையடிப்பதாகவே உள்ளது வேதனைக்குரியதாகும்.

உயர் மதிப்பு நோட்டு செல்லாததாக அறிவித்தபோதும், புதிய உயர் மதிப்பு நோட்டுகள் அறிவித்தபோதும் மக்கள் பல்வேறு சிரமங்களை அடைந்துள்ள நிலையிலும் அரசிற்கு உறுதுணையாகவே இருந்துள்ளனர். ஆனால் இதனுடைய பலாபலன் என்று பார்க்கும்போது மிகப்பெரிய சுழியமாகவே தெரிகிறது. வங்கித் துறையினரின் செயல்பாடுகள் மக்களுக்கு ஆதரவான கொள்கைகளை விடுத்து தங்களின் வருமானத்தைப் பெருக்குவதைச் சார்ந்ததாகவே உள்ளதும் குறிப்பிடத்தக்கது. பல்வேறு கட்டண விதிப்புகளும் காரணமற்ற பண வசூல்களும் வங்கித் துறையின் மீது நம்பிக்கையின்மையை ஏற்படுத்திக்கொண்டிருக்கின்றன. வங்கிக் காசோலைகள் பரிமாறும் இடங்கள், முன்பெப்போதும் இல்லாத வகையில் காலை ஆறு மணிக்கே செயல்படத்தொடங்கி வங்கிக்கணக்கில் பணம் இல்லையென்று காசோலைகள் திருப்பி அனுப்புதலும் அல்லது அந்தக் கணக்கில் பணம் இருந்தால் 12 மணிக்கு மேல் செல்லுபடியாகும் என்றும் அறிவிக்கின்றனர். வங்கி திறந்தவுடன் வங்கிக்கணக்கில் அந்த காசோலைக்கான பணம் செலுத்தப்பட்டு இருந்தாலும் காசோலைகள் திருப்பி அனுப்பப்படுகின்றன. இதற்குக் கட்டணமாக 500, 600 உரூபாய்கள் வசூலிக்கப்படுகின்றன. இதே பழைய முறையில், காசோலை திருப்பி அனுப்புவதற்கு முன்பு ஒருமுறை வங்கிக் கணக்குகள் சரி பார்க்கப்பட்டு அதன் பின்பே திருப்பி அனுப்பப்படும். ஆனால் வங்கிகள் இன்று தங்கள் வருமானத்தை மட்டும் கணக்கில் கொண்டு செயல்படுவது வருத்தத்திற்குரியதாகும்.

வங்கிகளிலிருந்து புழக்கத்திற்கு பணம் வெளியிடப்படுகிறது. ரொக்க வியாபாரம் செய்யக்கூடியவர்களிடமும் பெருமளவில் பணப்புழக்கம் இருக்கிறது. ஆனால் வங்கிகளில் இந்தப் பணத்தைச் செலுத்தினால் பணப்பரிவர்த்தனைக் கட்டணமாக பெருந்தொகை வசூல் செய்யப்படுவதால் வங்கிகளில் பணம் செலுத்த தயக்கம் காட்டும் நிலை ஏற்படுகிறது. இதனால் பணப்புழக்கத்திற்குரிய உரூபாய் நோட்டுகள் மிகவும் குறைவாகின்றன என்றாலும் இதுவே கருப்புப் பணத்திற்கான ஆரம்பமாகவும் ஆகலாம் என்பதும் கவனிக்கத்தக்கது. நிதியமைச்சகமும் அரசும் வங்கிகளில் பணத்தைச் செலுத்துவதற்கு உற்சாகப்படுத்தியும், வங்கிகளிலிருந்து பணம் வெளியேறுவதற்கு பழைய கட்டுப்பாடுகளை தொடர்ந்தாலுமே நம் பொருளாதாரம் பெருமளவில் சீர்படும்.

பல்வேறு பொருளாதார நடவடிக்கைகள் எடுத்த பிறகும் டாலருக்கு நிகரான நம் உரூபாயின் மதிப்பு பெருமளவில் ஏற்றம் பெறவில்லை என்பதும் வருத்தத்திற்குரிய விசயமாகும்.

பவள சங்கரி

தலையங்கம்

முதியோர் வைப்புத்தொகையின் வட்டி விகிதம் குறைக்கப்பட்டுள்ளது நியாயமா? தொழில் முனைவோர்களுக்கு குறைந்த வட்டியில் கடன் கொடுப்பதற்காக முதியோர் சிறுசேமிப்பு செய்த பணத்தை டெபாசிட் செய்கிறவர்களின் தலையில் கை வைப்பது நியாயமா?

முதியோரின் மன நிலையை ஆட்சியாளர்கள் அவசியம் உணர வேண்டும்.. இறுதிக் காலத்தில் யாரிடமும், பெற்ற பிள்ளைகளாக இருந்தாலும், கையேந்தாமல் தன்னிறைவு பெறவேண்டும் என்ற முனைப்பில் அரும்பாடுபட்டு சேமித்து வைத்து அதை அரசு வங்கிகளை மட்டும் நம்பி வைப்புத்தொகையாக வைத்து, வட்டியை மட்டும் வாங்கி செலவு செய்துகொண்டிருக்கும் முதியவர்களின் நிலை பற்றிய உளவியல் பிரச்சனை இது..

யதார்த்தமாக வாழ்க்கையை சந்திக்கக்கூடிய மனிதர்கள் நாங்கள். ஜிஎஸ்டி வரிவிதிப்பை எதிர்க்கவும் முடியவில்லை, வரவேற்கவும் முடியவில்லை. இது எங்கள்மீது திணிக்கப்பட்டுள்ளது. வளர்ந்த நாடுகளில் எந்தவொரு புதிய சட்டமாக இருப்பினும் மக்களின் ஒப்புதலுக்குப் பிறகே ஏற்றுக்கொள்ளப்படுகிறது. உதாரணமாக பிரிட்டனில் பிரெக்ஸிட் இப்படித்தானே நடைமுறைப்படுத்தப்பட்டது. ஜிஎஸ்டி வரிவிதிப்பால் ஒரு சாதாரண வியாபாரி மாதத்திற்கு ஒரு இலட்சம் ரூபாயும் போக்குவரத்து நிலையங்கள் (லாரி பயன்பாட்டாளர்கள்) ஒரு நாளைக்கு குறைந்தபட்சம் 2 வண்டி பயன்படுத்தினாலே 6 இலட்சம் ரூபாய் ஜிஎஸ்டியாக செலுத்தப்பட வேண்டியுள்ளது. இத்தனை ஆண்டுகளாக இவை அரசுக்கு செலுத்தப்படாத வருமானங்கள். இன்று 2 இட்லி சாப்பிட்டாலே 5 ரூ ஜிஎஸ்டி வரியாக செலுத்த வேண்டியுள்ளது. இப்படி ஒரு சூழலில் ஒரு நாளைக்கு பல ஆயிரம் கோடி ரூபாய்கள் புதிய வருமானமாக வருகின்றன. இன்னும் 15 நாட்களில் ஸ்குவாட் வேறு வரப்போகிறது. இப்போது மக்கள் தாமாக முன்வந்து வரிவிதிப்பை ஏற்கும்போது முதியோரின் சிறு சேமிப்பில் கைவைத்து அவர்களின் வாழ்வாதாரங்களை பாழாக்குவது சரியா? நம் கண்முன்னே ஒரு நாட்டில் தம் மக்களுக்கு வாழ்வதற்காக ஆண்டுதோறும் சுமாராக 1 இலட்சம் டாலர்களை மக்களுக்கு வழங்கி அவர்கள் வேண்டாம் என்று சொல்லும் அளவிற்கு சுவீடன் நாட்டில் நடந்தது. மிகப்பெரிய ஒரு வருமானம் வரும்போதுகூட அரசு ஏன் முதியோர் சிறுசேமிப்பில் கை வைக்க வேண்டும்? தற்போது உள்ள அரசு வருமானங்களை சரியான முறையில் நிர்வகித்தாலே மக்களுக்கு பல நன்மைகள் செய்ய முடியுமே?

பிரதமர் மோடி அவர்களின் முகநூல் பக்கத்தில் பதியப்பட்டுள்ள ஒரு முதியவரின் வேதனையான மடல் இது 🙁

மதிப்பிற்குரிய பிரதமர் நரேந்திர மோடி ஜீ!

மதிப்பிற்குரிய நிதியமைச்சர் அருண் ஜெட்லி ஜீ!

உங்கள் பொன்னான நேரத்தில் சில நிமிடங்களை இதைப் படிப்பதற்காக செலவிட்டு இந்த விஷயத்தில் சரியான ஒரு முடிவு எடுப்பீர்கள் என்னும் நம்பிக்கையில் நன்றி சொல்லிக்கொள்கிறேன் முதலில்.

நான் இந்த நாட்டின் மூத்த குடிமகன். 1.8.2012 அன்று அரசுடமை வங்கியில் 40 லட்சம் ஐந்து வருடங்களுக்கு டெபாசிட் செய்தேன். ஒவ்வொரு மாதமும் எனக்கு ரூ. 35,352/- கிடைத்தது. எந்தப் பிரச்சினையுமில்லாமல் என் வாழ்க்கையை நடத்த முடிந்தது. 5 வருடம் முடிந்ததும், இப்போது மீண்டும் அந்தப் பணத்தை டெப்பாசிட் செய்தேன். இப்போது மாதம் ரூ.26489/- தான் கிடைக்கிறது. ஏற்கனவே வாங்கியதை விட ரூ.8863/-, அதாவது 25% குறைவான தொகை இது. இந்த இழப்பை எப்படி சரிக்கட்டுவது அல்லது மருந்து, காய்கறி, பருப்பு இவைகளில் எதைத் தியாகம் செய்வது என நீங்களே சொல்லுங்கள்.

2014ல் நீங்கள் பொறுப்புக்கு வந்த பிறகு மூத்த குடிமக்களுக்கு எதையும் நீங்கள் செய்யவில்லை. புதிதாக எந்த வசதிகளையும் செய்து தரவில்லை. ஆனால் இருப்பதையும் குறைத்து விட்டீர்கள். எந்தப் பொருட்களின் விலையும் 2014ல் இருந்தது போல் இல்லை. உங்களால் புள்ளி விபரங்களைக் குறைக்க முடிந்திருக்கிறதே தவிர விலைகளை குறைக்க முடியவில்லை. பருப்பு, உப்பு, வெங்காயம், இப்போது தக்காளியென தினசரி பயன்படுத்தும் அனைத்து அத்தியாவசியப் பொருட்களின் விலையும் ராக்கெட் வேகத்தில் உயர்ந்து கொண்டிருக்கிறது. சமயங்களில் சில பொருட்களை எட்டி பார்க்கக் கூட திராணி இல்லை எங்களுக்கு.

இந்த வட்டி விகிதக் குறைப்பிற்கு Demand மற்றும் supply ஐக் காட்டி அரசியல் மட்டும் கோட்பாட்டு ரீதியான காரணத்தை உங்களால் சொல்ல முடியும். ஆனால் பொருட்களின் விலையேற்றத்திற்கான காரணங்களைச் சொல்ல முடியாது. முதலீட்டாளர்களுக்கு குறைந்த வட்டியில் கடன் கொடுக்க தாங்கள் விரும்பினால், அது டெபாசிட் செய்கிறவர்களின் தலையில் கை வைப்பதாய் இருக்கக் கூடாது. வராக்கடன்கள் என்னும் எரிமலைகளின் மீது வங்கிகள் இயங்குகின்றன.

தங்கள் பொன்னான காலங்களை எல்லாம் பல நிறுவனங்களுக்கும், தேசத்துக்கும் சேவை செய்து வாழ்ந்த எங்களைப் போன்ற மூத்த குடிமக்கள் மரியாதைக்குரிய வாழ்க்கையை மேற்கொள்ள வைப்பது அரசின் கடமையல்லவா? இந்த 25 % இழப்பினை எப்படி ஈடு கட்ட முடியும் என்பது எங்களுக்குத் தெரிகிறது. எந்த அமைச்சரோ, எம்பியோ, எம்.எல்.ஏவோ தங்கள் வருமானத்தை குறைத்துக் கொள்ள முன் வருவார்களா? இல்லையென்றால் மூத்த குடிமக்கள் மட்டும் ஏன் குறைத்துக் கொள்ள வேண்டும்?

உங்களைப் போல எங்களின் ஊதியத்தை நாங்களே நிர்ணயித்துக் கொள்ளும் நிலையில் இல்லை. எந்த விவாதமும் இல்லாமல் உங்கள் ஊதியத்தை நிர்ணயிக்க உங்களுக்கு இரண்டு நிமிடங்கள் போதும். ஆளும் கட்சி மேஜைகளில் இருப்பவர்களும், எதிர்க் கட்சி மேஜையில் இருப்பவர்களும் ஒன்று சேர்ந்து நிறைவேற்றிக் கொள்ள முடியும். பற்றாக்குறை, பொருளாதாரம் மற்ற எல்லாக் காரணங்களையும் உங்களால் கடந்து விட முடியும்.

மூத்த குடிமக்களுக்கான இந்த டெபாசிட்களுக்கான வட்டி விகிதம் ஆரம்பத்தில் 9.20 சதவீதமாக இருந்தது. ஜூலை, 2014ல் அது 8.3 சதவீதமாக குறைந்தது. அதுவும் 15 லட்சம் வரைதான். இந்த வட்டி விகிதம் ஓய்வு பெறுகிற ஒருவருக்கு கிடைப்பதைப் போல 12 சதவீதமாக இருக்க வேண்டும். மூத்த குடிமக்கள் பொருளாதார ரீதியான மரியாதையோடு தலை நிமிர்ந்து வாழ்வதை இந்த அரசு உறுதிப்படுத்த வேண்டும். எங்களின் சேமிப்பு மூலமாக வாழும் அவலநிலையில் நாங்கள் இருப்பதை தாங்கள் உணர்ந்து கொள்ள வேண்டும்.
நான் எதுவும் தவறாகச் சொல்லி இருந்தால் மன்னித்துக் கொள்ளுங்கள்.

மரியாதையோடும், நன்றியோடும்-

பவள சங்கரி

தலையங்கம்

சிஏஜி யின் அறிக்கையின்படி நமது ஏவுகணைகள் எட்டுவித காரணங்களால் தரம் தாழ்ந்து இருப்பதாக அறிவிக்கப்பட்டுள்ளது. இந்த ஏவுகணைகளைக்கொண்டு சீனாவோடு போர் மூண்டால் அதிக காலம் போரில் நிலைத்து நிற்பது சிரமம் என்று அந்த அறிக்கை தெரிவிக்கிறது.

இன்று பாகிசுதானில் அந்நாட்டு பிரதமர் தவறு செய்துள்ளார் என்று கண்டுபிடிக்கப்பட்டு பதவியிறக்கம் செய்யப்பட்டுள்ளதோடு இனி வாழ்நாள் முழுவதும் அரசு மற்றும் அரசியலில் பங்குகொள்ள இயலாதவாறு செயல்படுத்தப்படுகிறது. இந்த வழக்கைப் பொறுத்தவரை குறுகிய காலம் நிர்ணயிக்கப்பட்டு தீர்ப்பும் வழங்கப்பட்டுள்ளது என்பது குறிப்பிடத்தக்கது.

இந்த ஏவுகணைகளைப் பொறுத்தவரை தரக்கட்டுப்பாட்டு ஆய்வு மையத்தின் (DRDO) ஆய்வுக்கு உட்படுத்தப்பட்டும் சிஏஜி யால் தரம் குறைவாக இருப்பதாக அறிவிக்கப்பட்டால் தவறு எங்கே நடந்துள்ளது என்று கண்டறியப்பட்டு முளையிலேயே கிள்ளி எறிய வேண்டும். பாதுகாப்பு விசயத்தில் மெத்தனம் காட்டாமல் உடனடி நடவடிக்கை எடுக்கவேண்டியது அவசியம்.

பவள சங்கரி

தலையங்கம்

இந்தியாவில் 89% அதிகப்படியான மழையோ, பெய்யவேண்டிய அளவான மழையோ பெய்துள்ளது. கடந்த 2 மாதங்களில் மட்டும் 600 பேர் பெரும்மழையினால் உயிரிழந்துள்ளனர். இரண்டு இலட்சத்து இருபதினாயிரம் மக்கள் தங்கும் வீடுகள் இழந்து பாதுகாப்புப் பகுதிகளில் தஞ்சம் புகுந்துள்ளனர். அசாமில் மட்டும் 1 இலட்சம் பேர் பாதிப்படைந்துள்ளனர். வடக்கே கங்கை, பிரம்மபுத்ரா ஆகிய நதிகளிலும் பெரும் வெள்ளம். இந்த வெள்ளம் ஒரிசாவையே புரட்டிப் போட்டுள்ளது. குஜராத் மக்களும் தாங்கொணாத் துயரில் உள்ளனர். ஆனால் தமிழகத்தில் குடி நீர் கூட இல்லாமல் மக்கள் அல்லலுற்று தெருவில் இறங்கிப் போராடும் நிலையே உள்ளது. இப்படி இரண்டு பக்கங்களிலும் நேர் எதிராக வாழும் சூழலே நம் இந்தியாவில் நிலவுகிறது. மொழிவாரி மாநிலம் இருக்கட்டும் என்றாலும் நதிகள் மாநில வாரியாக இல்லாமல் அனைத்து நதிகளும் தேசிய உடைமையாக்கப்பட்டு கங்கை – காவேரி இணைப்புத் திட்டத்தை செயல்படுத்தினால் ஊழலற்ற பாரதமாக மட்டுமல்லாமல் வளமான பாரதமாகவும் மாறும் என்பது உறுதி. இதன் முதற்கட்டமாக அந்தந்த பகுதிகளில் இருக்கும் நதிகளை இணைத்து இந்த அரியப் பணியை தொடங்கி வைக்கலாம். இதற்கு பொருளாதாரம் ஒரு பிரச்சனை என்றால், நதிநீர் இணைப்பிற்காக ஒரு தனி வரியை ஏற்படுத்தினாலும் மக்கள் மனமுவந்து கட்டக்கூடும். வெள்ளத்தால் உயிரிழக்கும் துயரச் சம்பவங்களும் நடைபெறாமல் தவிர்க்கலாம். ஊழலற்ற பாரதம் என்பதோடு வளமான பாரதத்தையும் மக்கள் எதிர் நோக்கியுள்ளார்கள் என்பதே உண்மை.

பவள சங்கரி

பீகார் முதலமைச்சர் நிதிஷ்குமார் தமது பதவியை நேற்று ராஜினாமா செய்தார். பிரதமர் அவரைப்பாராட்டி தமது சுற்றுரையில் இனி ஊழலை ஒழிப்பதில் இருவரும் இணைந்து பாடுபடுவோம் என்று கூறியுள்ளார்!

நிதிஷ்குமார் மீண்டும் பீகார் மாநில முதல்வராக உறுதிமொழி எடுக்கிறார். பாரதிய ஜனதா கட்சியைச் சார்ந்த சுசில் மோடி அவர்கள் துணை முதல்வராகிறார். நடு இரவில் ஆளுநரைச் சந்தித்து நிதிஷ்குமார் அவர்கள் முதலமைச்சராகப் பதவியேற்க அழைக்குமாறு கோரினார். அவருடைய கோரிக்கை ஏற்கப்பட்டுள்ளது!

பவள சங்கரி

பயங்கரவாதிகள் பட்டியலிலிருந்து விடுதலைப் புலிகளை நீக்கி ஐரோப்பிய ஒன்றிய நீதிமன்றம் அறிவித்துள்ளது. விடுதலைப் புலிகளின் நிதி ஆதாரங்களை முடக்கி வைத்ததை இரத்து செய்தும் அறிவிப்பு வந்துள்ளது. இதன் மூலமாக விடுதலைப் புலிகளின் அமைப்பின் பொருளாதாரப் பிரச்சனைகளுக்கு ஒரு சிறந்த தீர்வு கிடைத்திருக்கிறது.

பவள சங்கரி

தலையங்கம்

2000 ரூபாய் நோட்டுகள் புழக்கத்தில் குறைந்து கொண்டு வருகின்றன. மத்திய வங்கி படிப்படியாக 2000 ரூபாயை நிறுத்த முடிவு செய்துள்ளதா என மக்கள் மனதில் ஐயம் தோன்றியுள்ளது. மத்திய வங்கியிலிருந்து மற்ற வங்கிகளுக்கு 2000 ரூபாய் நோட்டுகள் குறைந்த அளவே அனுப்பப்படுவதாக செய்திகள் மூலம் அறிய முடிகிறது. இன்று வங்கிகள் அளிக்கக்கூடிய 2000 ரூபாய் நோட்டுகள் அனைத்தும் மறு சுழற்சியில் வரக்கூடியவை மட்டுமே. மத்திய அரசின் ஆணைப்படி சேமிப்பு வங்கிக் கணக்குகள், நடப்புக் கணக்குகள் ஆகியவைகளில் பெருந்தொகைகளை செலுத்தினால் சட்டப் பிரச்சனையை சந்திக்க நேரும் என்பதால் அந்த 2000 ரூபாய் நோட்டுகளை தனி நபர்கள் வங்கியில் செலுத்தாமலே கைகளிலேயே வைத்துக்கொள்கிறார்கள். சில தவறான அணுகுமுறைகளால் அல்லது வங்கிகளுக்கு வருமானத்தைக் கூட்டுவதற்காக ஏடிஎம்களிலிருந்து 3 – 5 முறைகளுக்கு மேல் பணம் எடுத்தால் கட்டணம் வசூலிப்பதால் சிறு சேமிப்பு கணக்குகளில் பணம் செலுத்துவது குறைந்து வருகிறது. இந்த ஏடிஎம்கள் சேவை புரிபவர்களால் (சர்வீஸ்மேன்) மிகவும் சுத்தமாகவும், எப்பொழுதும் பணம் நிரம்பியும் இருக்கும். ஆனால் வங்கிகளின் தவறான அணுகுமுறையால் பல ஆயிரம் கோடி ரூபாய் மதிப்புள்ள ஏடிஎம்கள் குப்பை மேடாகக் காட்சியளிக்கின்றன. நாம் எவ்வளவு தொகை வேண்டுமானாலும் எடுத்துக்கொள்ளலாம் என்றாலும் இன்று பத்திற்கு ஐந்து ஏடிஎம்களில் பணம் இருப்பதில்லை. இது போன்ற தவறான அணுகுமுறைகளே வங்கிகளின் செயல்பாடுகளில் உள்ளன. சுமாராக 50,000 ஏடிஎம்களில் பணம் நிரப்பும் நிறுவனங்களே இதன் செயல்பாடுகள் குறித்து அதிருப்தி தெரிவித்துள்ளனர். 2000 மற்றும் 500 ரூபாய் நோட்டுகள் ஏடிஎம்மில் ஒரு முறை நிரப்பினால் அவைகள் சராசரியாக 4 நாட்களுக்கு வரும். ஆனால் தற்போது 100 மற்றும் 500 ரூபாய் நோட்டுகள் மட்டும் வைப்பதால் தினசரி நிரப்பப்பட வேண்டியுள்ளது. மத்திய அரசும், மத்திய வங்கியும் சரியான கொள்கை முடிவையெடுத்து ரூபாய் நோட்டுகளை வங்கியில் செலுத்துவதற்குரிய கட்டுப்பாடுகளையும், ஏடிஎம்களில் பணம் எடுப்பதற்குரிய கட்டுப்பாடுகளைத் தளர்த்தியும் வங்கியிலிருந்து எடுக்கப்படும் தொகைக்கு கட்டுப்பாடுகள் விதித்தும் சில மாற்றங்கள் செய்தால் நம் பொருளாதாரம் மேலும் வலுவடையும் என்பதில் ஐயமில்லை. சமீபத்திய செய்தியின்படி 200 கோடி 2000 ரூபாய் நோட்டுகள் அச்சடிப்பதற்கு மத்திய வங்கிக்கு மத்திய அரசின் அனுமதி மறுக்கப்பட்டுள்ளது. இது ஒரு சரியான நடைமுறையாக இருந்தாலும் மாற்று ஏற்பாடுகள் செய்வது அவசியம். உயர் மதிப்பு நோட்டுகளுக்கு அதிகாரப்பூர்வமற்ற கட்டுப்பாடுகள் கொண்டுவருவதாகவே தெரிகிறது. இவ்வாறு பல நடவடிக்கைகள் எடுக்கப்பட்டபோதிலும் ரூபாயின் மதிப்பு அதிகரிக்கவில்லை என்பது வருத்தத்திற்குரியதாகும். ஏற்றுமதியை அதிகரித்து இறக்குமதியைக் குறைக்கும் விதத்தில் அரசின் செயல்பாடுகள் இருந்தால் ரூபாயின் மதிப்பு அதிகரிக்கும். அன்றாடம் சமையலுக்குப் பயன்படுத்தும் பூண்டிலிருந்து போஃபார்ஸ் உதிரிப்பாகங்கள் வரை தரமற்ற பொருட்களை சீனாவிலிருந்து இறக்குமதி செய்வதை தவிர்க்கலாமே.

—————————————–

பவள சங்கரி

நடந்து முடிந்துள்ள குடியரசுத் தலைவர் தேர்தலில் 99% மேலாக வாக்களித்து நமது பாராளுமன்ற, சட்டமன்ற உறுப்பினர்கள் தங்களுடைய ஜனநாயகக் கடமையை ஆற்றியுள்ளனர். இவர்களில் 77 சட்டமன்ற, பாராளுமன்ற உறுப்பினர்கள் செல்லாத வாக்களித்துள்ளனர். இது மிகவும் வேதனைக்குரிய விசயம். இந்த 77 உறுப்பினர்களின் வாக்குகளின் மொத்த மதிப்பு 20,000 வாக்குகள். இந்த 20,000 வாக்குகள் என்பது பல இலட்சம் மக்களின் பிரதிநிதித்துவத்தைக் கேலி செய்யும் விதமாகவே உள்ளது. தங்களுடைய முதலாவது, இரண்டாவது விருப்ப வாக்குகளை பதிவு செய்யாது இருந்தாலே அந்த வாக்குகள் செல்லாத வாக்குகளாக எடுத்துக்கொள்ளப்படும். இந்த 77 உறுப்பினர்கள் கட்சி அபிமானத்தோடு தங்களுடைய வாக்குகளை பதிவு செய்திருந்தாலோ அல்லது அறியாமையால் செய்த தவறு என்றாலும் அது கண்டனத்திற்குரியது. சம்பந்தப்பட்ட உறுப்பினர்களுக்கு சம்பளமாக பல இலட்சங்களும், இதர செலவுகளுக்காக பல கோடிகளும் மக்கள் பணம் செலவு செய்யப்படுவது வருத்தத்திற்குரியது. தேர்தல் ஆணையமும், மத்திய அரசும் இதுபற்றி சரியான நடவடிக்கை எடுத்தால் அடுத்து வரப்போகும் பொதுத்தேர்தலுக்கு இது ஒரு வழிகாட்டுதலாகவும் அமையும்.

பவள சங்கரி

தலையங்கம்

வாழ்வாதாரத்தையே தொலைத்துவிட்டு தமிழ் ஈழம் இழந்து 10 ஆண்டுகளுக்கு முன் தாயகத்திற்கு அகதிகளாக வந்து, சென்னை, ஈரோடு போன்ற பல்வேறு பகுதிகளில் அகதிகள் முகாம்களில் தங்கியிருந்தும், அல்லது அங்கிருந்து வெளியே வந்து தங்கியிருந்தும் கல்வி ஒன்றே தங்கள் நிலையான எதிர்காலம் என்பதை உணர்ந்துகொண்டு மிகச்சிறந்த முறையில் 10 ஆம் வகுப்பில் 92%, 12ஆம் வகுப்பில் 95%, குறிப்பாக பெண்கள் அதிகளவில் வெற்றி பெற்றும், இளநிலை பட்ட வகுப்பில் 500 பேருக்கு மேல் தேர்ச்சி பெற்றும், முதுநிலை பட்ட வகுப்பில் 250 பேரும், நல்ல தேர்ச்சி பெற்றும், 5 பேர் முனைவர் பட்டமும் பெற்றுள்ளனர். இவர்களுக்கு நிலையான தங்குமிடமோ, மற்ற வசதிகளோ கிடையாது என்றாலும் தங்கள் எதிர்காலமே கல்வியில்தான் என்பதை மனதில்கொண்டு இந்த உயரிய சிறப்பைப் பெற்றுள்ளதைக்கண்டு தாய்த்தமிழ் நாடே பெருமை கொள்கிறது. தமிழ் ஈழம் செல்ல விரும்புபவர்களுக்கு விமான பயணச்சீட்டு, தாங்கள் தங்கியிருக்கும் இடத்திலிருந்து விமான நிலையம் செல்ல ஆகும் செலவுத்தொகை மற்றும் இலங்கையில் விமான நிலையத்திலிருந்து அவர்கள் செல்லவேண்டிய பகுதிவரை அனைத்து செலவுகளையும் தமிழக அரசு ஏற்றுக்கொள்வதும் மகிழ்வான செய்தி. இவர்களுக்கு அங்குள்ள இலங்கை அரசு 6 மாதத்திற்குரிய தேவையான உணவுப் பொருட்களையும் அளிப்பதாக உறுதியளித்துள்ளது. இதைத் தவிர்த்து தமிழகத்திலேயே தங்க விரும்புபவர்களை தமிழக மக்களாகவே ஏற்றுக்கொள்வதாகவும் அறிவிக்கப்பட்டுள்ளதும் வரவேற்கத்தக்கது. அகில உலக அளவில் இதுபோன்ற அகதிகள் முகாமில் பென்களுக்கு இதுவரை எந்தவிதமான இன்னல்களும் ஏற்படவில்லை என்பதும் மகிழ்ந்து குறிப்பிடத்தக்கது!