Category: தலையங்கம்

பவள சங்கரி

தலையங்கம்

தமிழக அரசின் திருத்தப்பட்ட நிதிநிலை அறிக்கை நேற்று சட்டசபையில் தாக்கல் செய்யப்பட்டுள்ளது. இதில் வரவேற்கத்தக்க மகிழ்ச்சியான ஒரு செய்தி என்றால் அது எந்த ஒரு புதிய வரிவிதிப்பும் இல்லை என்பதுதான். மற்றபடி இந்த நிதிநிலை அறிக்கை ஆக்கப்பூர்வமானதாக இல்லை. தொழில் வளர்ச்சிக்குரிய அறிவிப்புகளோ அல்லது உள் கட்டமைப்பு வளர்ச்சிக்குரிய அறிவிப்புகளோ ஏதுமில்லை. புதிதாக தொழில் முனைவோர்கள் அல்லது தொழிலகங்களின் வளர்ச்சிகளையோ உற்சாகப்படுத்துவதற்கான அறிவிப்புகளும் ஏதும் இல்லை. தேர்தல் அறிக்கையில் அறிவிக்கப்பட்ட சில இலவசங்களை செயல்படுத்துவதற்கான அறிவிப்புகள் மட்டும் காணப்படுகின்றன. இரண்டரை இலட்சம் கோடி கடன் சுமையைக் குறைப்பதற்கான எந்தவிதமான வழிவகையும் அறிவிக்கப்படவில்லை. தமிழக அரசின் சார்பில் தொழிற்சாலைகளை ஏற்படுத்துவதற்கோ அல்லது அரசால் நிர்வகிக்கப்படக்கூடிய தொழிற்சாலைகளின் உற்பத்தியை பெருக்குவதற்குரியதான அறிவிப்புகளும் ஏதும் இல்லை. தமிழக அரசால் நிர்வகிக்கப்படும் பஞ்சாலைகளில் உற்பத்தித் திறனை மேம்படுத்தி இலாப நோக்கில் செயல்படுத்தும்விதமாகவும், வேலை வாய்ப்பை உருவாக்கக்கூடிய தொழிற்சாலைகளை ஊக்கப்படுத்துவதற்கும்கூட எந்தவிதமான அறிவிப்புகளும் இல்லை. மற்றபடி இந்த ஆண்டின் நிதிநிலை அறிக்கை சட்டசபையில் தாக்கல் செய்யப்பட்டுள்ளது என்பதை ஒரு செய்தியாக மட்டும் எடுத்துக்கொள்ளலாம்.

பவள சங்கரி

சென்ற வெள்ளியன்று (24/06/16) காலை 6.30 மணிக்கு வழக்கம்போல் செங்கல்பட்டு அருகே உள்ள பரனூர் மகேந்திரா சிட்டியில் உள்ள இன்போசிஸ் ஐடி நிறுவனத்தில் மென் பொறியாளராக தான் பணிபுரியும் அலுவலகத்திற்குச் செல்வதற்காக சென்னை நுங்கம்பாக்கம் இரயில் நிலையத்திற்கு தன் தந்தையுடன் வந்திருக்கிறார் சுவாதி. தினமும் மின்சார இரயிலில் பணிக்குச் செல்வது வழக்கம். மகளை இறுதியாகப் பார்க்கப்போவது அன்றுதான் என்ற எண்ணம் துளியும் இல்லாமல் அன்பு மகளை கொண்டுவந்து விட்டுவிட்டு கிளம்பிவிட்டார் அவர் தந்தை. மத்திய அரசு பணியில் இருந்து ஓய்வு பெற்ற சென்னை சூளைமேட்டை சேர்ந்த சந்தான கோபாலகிருஷ்ணன் என்பவரின் மகள் சுவாதி, 24 வயது இளம் பெண். மகளை இரயில் நிலையத்தில் விட்டுவிட்டு வீடு வந்து சேர்ந்த சில மணித்துளிகளில் அவர் இரயில் நிலையத்தில் கொலையான செய்தி கேட்டு துடிதுடித்து பதறி ஓடி வந்து இரத்த வெள்ளத்தில் அசைவற்றுக் கிடக்கும் உடலைப் பார்த்து தன் இரத்தம் உறைந்து அதிர்ச்சியில் நிற்கிறார். இரண்டு மணி நேரத்திற்கும் மேலாக அதே இடத்தில் நடைமேடையில், போவோர் வருவோருக்குக் காட்சிப் பொருளாக, பிரேதப் பரிசோதனைக்குக்கூட எடுத்துச் செல்லாமல் அங்கேயே வைத்து இருந்ததையும் சேர்த்தே விழுங்க வேண்டிய கொடுமையான சூழலில் ஒரு தந்தையின் நிலையை கற்பனை கூட செய்ய முடியவில்லை. சென்னை போன்ற ஒரு பெருநகரத்தில் இப்படியொரு நிலை சற்று வருத்தத்திற்குரியதுதான். அதுவும் கொலை செய்தவனைக் கண்டுபிடிப்பதற்கு ஏதுவாக சிசிடிவி கேமரா கூட இல்லை என்பதுதான் மேலும் வேதனைப்படச் செய்யும் விசயம்.

பட்டப்பகலில், மக்கள் நடமாட்டம் உள்ள இரயில் நிலையம் போன்ற பொது இடத்தில் இத்தனைக் கொடூரமாக ஒரு பெண்ணை வெட்டிக் கொன்றுவிட்டு கத்தியை தண்டவாளத்தில் தூக்கி வீசிவிட்டு சாவதானமாக ஒரு கொலைகாரன் தப்பிச் செல்லும் அளவிற்கா நம் காவல்துறையும், சமூகமும் இருக்கிறது? நினைக்கவே அச்சமாக இருக்கிறது. பாதுகாப்பு என்பதே கேள்விக்குறியாக இருக்கிறது. இதே நாளில் பல்வேறு இடங்களில் பல்வேறு விதமான கொலைகள் நடந்திருக்கின்றன என்றாலும் ஒரு பொது இடத்தில் ஒரு இளம் பெண் இப்படி பட்டப்பகலில் கொலை செய்யப்பட்டிருப்பது மக்கள் மத்தியில் பெரும் அதிர்ச்சியை ஏற்படுத்தியுள்ளது. ஏதோ சிறிய வாக்குவாதத்திற்குப் பிறகே அந்த இளைஞன் அப்பெண்ணை கொடூரமாகத் தாக்கிக் கொன்றிருக்கிறான் என்பது நேரில் கண்டவர்களின் வாக்குமூலம்.

சில நாட்களுக்கு முன்பு கால் டாக்சி ஓட்டுநரிடம் வாக்குவாதம் செய்து, அவர் பற்றி புகாரும் அளித்ததால் அவர் வேலையிலிருந்து நீக்கப்பட்டும் இருந்திருக்கிறார். இதுகூட கொலைக்கான காரணமாக இருக்குமோ என்ற நோக்கிலும் காவல்துறை விசாரணை இருந்திருக்கின்றது. ஆனாலும் தான் கொலை செய்யவில்லை என்று அந்த ஓட்டுநர் மறுத்திருக்கிறார். இன்னும் சரியான காரணம் புரிபடாத இந்நிலையில் ஊடகங்கள் தங்கள் மகளின் பெயருக்கு களங்கம் ஏற்படுத்த வேண்டாம் என்று குடும்பத்தினர் கேட்டுக்கொண்டிருக்கின்றனர். கொலைக்கான காரணம் சரியாக தெரியாதபோது மேலும் மேலும், புதிய புதிய கற்பனைக் கதைகளைச் சொல்லி வெந்த புண்ணில் வேலைப் பாய்ச்சுவதில் நியாயமில்லை. தேவையில்லாமல் சம்பவத்தை திசை திருப்புவதால் கொலையாளி தப்பிப்பதற்கும் அது வழிவகுத்துவிடும். ஊடகங்களும் பொது மக்களும் தேவையில்லாத விவாதத்தை நிறுத்தி, கொலைக்கான காரணமும், கொலையாளியும் பிடிபடும் வரை பொறுமை காப்பதே தற்போதைய தேவை.

பவள சங்கரி

தலையங்கம்

ஒவ்வொரு நாட்டிலும் அந்தந்த நாட்டின் தலைவர்கள் தங்களுடைய மக்களுக்கு இந்த வகையான வாழ்க்கை முறை தம் நாட்டு மக்களுக்கு ஏற்புடையது என்று வழி நடத்தி செல்கின்றனர். இசுடாலின், காரல் மார்க்சு போன்றோர் தமது மக்களுக்கு கம்யூனிச சித்தாந்தமே சரியானது என்று முடிவெடுத்தனர். காந்தியடிகள் அகிம்சையே நம் நாட்டிற்கு ஏற்புடையது என்று முடிவெடுத்தார். இங்கிலாந்து, சப்பான் போன்ற சில நாடுகளில் இன்றளவும் மன்னராட்சி நடைபெற்று வருகின்றது. அண்டை நாடான நேபாளத்தில் துப்பாக்கி முனையில் மன்னராட்சி அழிக்கப்பட்டு மக்களாட்சி கொண்டுவரப்பட்டது. முசோலினி, நெப்போலியன் போன்ற சர்வாதிகாரிகளின் ஆட்சியும் தூக்கி எறியப்பட்டு மக்களாலே மக்களாட்சி ஏற்படுத்தப்பட்டது. நமது நாட்டிலும் இலவசங்கள் எனும் கையூட்டு கொடுக்கப்பட்டு ஆட்சி அதிகாரங்கள் பெறப்படுகின்றன என்பதும் நிதர்சனமாக உள்ளது. இவை அனைத்திற்கும் மேலாக உலக அரங்கில் அதிசயித்து நோக்கத்தக்க வகையில் ஒரு நிகழ்வு நடந்துள்ளது.

ஆம், உலக அளவில் பொருளாதாரத்தில் மிகச்சிறந்து விளங்கும் சுவிட்சர்லாந்து அரசாங்கம் தமது மக்களுக்கு நலம் பயக்கும் வகையில் சில கொள்கைகளை வெளியிட்டது. அதன்படி அந்நாட்டின் மக்கள் ஒவ்வொருவருக்கும் மாதம் ஒன்றிற்கு 1,700 பிராங்க் அதாவது நமது உரூபாய் மதிப்பில் ஒரு நபருக்கு மாதம் ஒன்றிற்கு கிட்டத்தட்ட 1 1/4 இலட்சம் ரூபாய் வாழ்வுரிமைப் பணமாக அளிப்பதாக அறிவித்தது. இச்சட்டத்தின்படி அந்த நாட்டில் இரண்டாண்டுகளுக்கும் மேல் தங்கியிருக்கும் வெளிநாட்டு மக்களுக்கும் இச்சட்டம் பொருந்தும் என்று அறிவித்தனர். ஆனால் இச்சட்டம் மக்களிடையே பெரும் பாதிப்பை ஏற்படுத்தியது. நாட்டு மக்களுக்கு அரசு கொள்கை அறிவிப்பதுபோக அந்நாட்டு மக்கள் தங்களுக்கு இதுதான் கொள்கை என்று உணர்த்தும் வகையில் இச்சட்டத்திற்கு நூற்றுக்கு 80 சதவிகிதம் பேர் எதிர்ப்பு தெரிவித்துள்ளார்கள். தங்களுக்கு இலவசமாக பணம் வேண்டாம் என்றும், மற்ற நாட்டினர் அங்கு சென்று குடியேறுவதற்கு இந்த இலவசங்கள் ஒரு காரணமாகிவிடக்கூடாது என்பதாலும் இதுபோன்ற இலவசங்கள் தேவையில்லை என்று திட்டவட்டமாக மறுத்துள்ளனர்.

இன்று தங்கள் வியாபார யுக்தியாக ஒரு புடவைக்கு இரு புடவைகள் இலவசம், ஒன்றிற்கு ஒன்று இலவசம், ஒன்றின் விலையில் 50% தள்ளுபடி என்றும் பல விளம்பரங்களைப் பார்க்கிறோம். இவர்கள் எவரும் தங்களுடைய கொள்முதல் விலையிலோ, உற்பத்தி விலையிலோ இதுபோன்ற தள்ளுபடிகளை வழங்குவதில்லை என்பதே சாத்தியம். மக்களுடைய ஆசையைத் தூண்டிவிட்டு, அவர்களை ஏமாற்றி தங்கள் இலாபத்தையே குறிக்கோளாகக் கொண்டு செயல்படுகிறார்கள் என்பதே உண்மையான நிலை. அரசு எவ்வழி குடிகள் அவ்வழி என்று மக்கள் உணர்த்துகிறார்களோ?

அரசு ஒவ்வொரு விசைத்தறி கூடங்களுக்கும் 500 யூனிட்டுகள் இலவசம் என்றும், கைத்தறிக் கூடங்களுக்கு 100 யூனிட் இலவசமும் ஒவ்வொரு இல்லங்களுக்கும் 100 யூனிட் இலவசம் என்றும் அறிவித்துள்ளது. சில நாட்களுக்கு முன்பு மத்திய ஜவுளித்துறை அமைச்சர், சோலார் பேனல் திட்டத்தைச் செயல்படுத்தினால் 50 சதவிகிதம் மான்யம் அளிப்பதாக அறிவித்துள்ளார். நமது தமிழ்நாடு அரசும் இந்த 500 யூனிட் இலவசம் தருவதற்குப் பதிலாக, சோலார் பேனல் வாங்குவதற்கு அதன் விலையில் 20 சதவிகிதம் மான்யம் அளித்தால் மின்சாரம் உற்பத்தி பெருகுவதோடு இலவசத்தால் ஒரு நிறுவனத்திற்கு ஆண்டொன்றிற்கு இருபதினாயிரம் உரூபாய் செலவு என்ற வகையில் ஆண்டொன்றிற்கு பல கோடிகளை மீதப்படுத்தி அதனை மற்றைய ஆக்கப்பூர்வமான செயல்களுக்குச் செலவிடலாம்.

பவள சங்கரி

தலையங்கம்

இது மலைப்பான செய்தியா அல்லது வருத்தப்படவேண்டிய செய்தியா என்று தெரியவில்லை. மத்திய மாநில அரசுகளின் பார்வைக்கு இதுபோன்ற செய்திகள் சென்று சேருகின்றதா என்றும் தெரியவில்லை. ஆனால் உலகளாவிய பொருளாதார ஆய்வறிக்கைகளின் முடிவு இதுபோன்ற எண்ணம் ஏற்படுத்துவதை தவிர்க்க இயலவில்லை. உலகிலுள்ள 10 பணக்கார நாடுகளின் வரிசையில், அமெரிக்கா முதல் இடத்திலும், சீனா இரண்டாவது இடத்திலும், நம் இந்தியா ஏழாவது இடத்திலும் உள்ளது என்கிறது ‘நியூ வேர்ல்ட் வெல்த்’ என்கிற ஆய்வு நிறுவனம். கடந்த 15 (2000-2015)ஆண்டுகளில் சீனா அதிவேக வளர்ச்சியைக் கண்டுள்ளதாகவும் இந்த ஆய்வறிக்கை கூறுகிறது. அமெரிக்க செல்வந்தரின் தனிப்பட்ட சொத்து மதிப்பு, 48,700 பில்லியன் டாலர்கள். இந்தியாவில் பெரும் பணக்காரர்களின் தனிப்பட்ட சொத்து மதிப்பு 5,200 பில்லியன் டாலர்கள் என்ற ஆச்சரியமான தகவல்களையும் அளிக்கிறது.

ஆனால் இந்தியா தனி மனித வருமானத்தில் மிக மிக பின் தங்கிய நிலையில், அதாவது கணக்கில் எடுத்துக்கொள்ளப்பட்ட 130 நாடுகளில் 129 ஆவது இடத்தில் உள்ளதாகவும் இந்த ஆய்வறிக்கை குண்டைத்தூக்கிப் போடுகிறது. அதாவது ஒரு சராசரி இந்தியன் மிகவும் ஏழ்மை நிலையில் இருக்கிறார்.

இதன் மூலம் நாம் அறிந்துகொள்ளக்கூடியது நம் இந்தியாவில் பெரும் செல்வந்தர்களே மீண்டும் மீண்டும் வளர்ச்சியடைவதற்குரிய நிலையிலேயே நம் நாட்டின் திட்டங்கள் உள்ளன என்பதுதான். அம்பானி மிகப்பெரிய பணக்காரர்கள் வரிசையில் முன்னணியில் உள்ளார். இலட்சுமி மிட்டல் போன்றவர்கள் இங்கிலாந்தில் தங்கிக்கொண்டு அங்கு தங்கள் வணிக சாம்ராச்சியத்தை பெருக்கிக்கொண்டுள்ளனர். இந்தியா முதலீடுகளை வரவேற்றதுபோக இன்று இந்தியர்களின் முதலீடுகளை இங்கிலாந்தும், அமெரிக்காவும் சிகப்புக் கம்பளம் விரித்து வரவேற்கின்றன. இங்கிலாந்தில் அன்னிய முதலீடுகளில் இந்தியர்களின் முதலீடு முதலிடத்தில் உள்ளது என்பதும் குறிப்பிடத்தக்கது. ஆனால் இங்கிலாந்திலுள்ள அரசு தனி மனித வருமானத்திற்கு மிக முக்கியத்துவம் அளித்து ஆண்டுக்கு மூன்றரை இலட்சம் பவுண்ட் வருமானம் உள்ளவர்கள் மட்டுமே அங்கு தங்குவதற்கு அனுமதித்துள்ளனர், மற்றவர்கள் அங்கிருந்து வெளியேற்றப்படுகின்றனர் அல்லது விசா மறுக்கப்படுகிறது என்பதும் குறிப்பிடத்தக்கது.

உலகில் பணக்கார நாடுகள் வரிசையில் ஆறாவதாக இருந்த பிரிட்டன் தற்போது ஐந்தாவது இடத்திற்கு வந்துள்ளது. தனிநபர் வருமானத்தின்கீழ் ஒவ்வொரு ஆண், பெண் மற்றும் குழந்தைக்கும் மொத்த உள்நாட்டு உற்பத்தி (Gross domestic product per capita) 2012 ல் 21, 692 பவுண்டுகளாக இருந்தது. அதாவது அமெரிக்கா, கனடா மற்றும் ஜெர்மனிக்கு அடுத்த நிலையில் இருந்தது. இதன் பொருள் பிரிட்டன் உலக நாடுகளான சப்பான், பிரான்சு, இத்தாலியைவிட முன்னேறி இருக்கிறது என்பதும், `பிரிக் (‘BRIC’ ) எனப்படும் பிரேசில், உருசியா, இந்தியா மற்றும் சீனாவைவிட பொருளாதார ரீதியாக மிகவும் முன்னேறியுள்ளது என்பதுதான். 1997இல் பிரிட்டன் அமெரிக்கா, கனடா, ஜப்பான், ஜெர்மனி மற்றும் பிரான்சுக்கு அடுத்து ஆறாவது இடத்தில்தான் இருந்தது என்பதும் குறிப்பிடத்தக்கது.தற்போது 5வது இடத்தில் ($9,200 பில்லியன் )உள்ளது. 16 முதல் 24 வயது வரையிலான 74 விழுக்காடு மக்கள் வேலையில் இருக்கிறார்கள். 5.4 சதவிகிதத்திற்கு குறைவாகவே வேலையில்லாத் திண்டாட்டம் உள்ளது. அதாவது பணிபுரியும் வல்லமையும், ஆர்வமும் உள்ள அனைவரும் வேலை செய்து நன்கு சம்பாதிக்கக்கூடிய நிலை அங்குள்ளது. மேலும் தனி மனித வருமானம் உயரும் வகையில் பல்வேறு நடவடிக்கைகள் எடுத்தும் வருகின்றனர்.

உலகப் பணக்காரர்களில் முதல் இடத்தில் இருக்கக்கூடிய அமெரிக்காவில் தனி மனித வருமானத்திற்கு உத்திரவாதம் அளிக்கும் வகையில் ஒபாமா அரசாங்கம் ஒரு மணிக்கு 7 1/2 டாலர் இருந்ததை மாற்றி 9 1/2 டாலராக உயர்த்தி குறைந்தபட்ச தனிமனித வருமானமாக அரசு நிர்ணயித்துள்ளது. இப்படி ஒவ்வொரு அரசும் தனி மனித வருமானத்திற்கு உத்திரவாதம் அளித்தும் வளமான வாழ்விற்கு வழிவகுத்தும் வருகின்றனர்.

உலகில் 7 வது இடத்தில் உள்ள இந்தியாவில் ஒருபுறம் பணக்காரர்கள் அதிகமாக உள்ளனர். மறுபுறம் மிக வறுமையான மக்கள் அதிகமாக உள்ள நாடும் இந்தியாவாகத்தான் உள்ளது. தனி மனித வருமான உயர்விற்கு அரசு எந்தவிதமான நடவடிக்கையும் எடுத்துள்ளதாகத் தெரியவில்லை.
இலவசங்களால் தனி மனித வருமானம் உயர்ந்து வளமான வாழ்வு கிடைக்காது. மத்திய அரசினால் பெருமளவில் விளம்பரம் செய்யப்பட்டு, இலவச எரிவாயு வழங்கும் திட்டத்தால் தனி மனித வருமானம் உயர்ந்துவிடுமா?

மாநில அரசுகளும் மக்களை மயக்கும் வகையில் அறிவித்துள்ள இலவசங்களால் தனி மனித வருமானம் உயர்ந்துவிடும் வாய்ப்பு துளியும் இல்லை என்பதே நிதர்சனம்.

தனிமனித வருமானம் உயரும் வகையில் செயல்படுத்தவேண்டியது வங்கிகளே. மத்திய அரசு அறிவித்த சில பல திட்டங்கள் மூலமாக தனிமனிதர்களின் உறுதுணையாக இருக்கவேண்டிய திட்டங்கள் வெறும் காகித அளவிலேயே உள்ளன. எந்த ஒரு வங்கியிலும் சென்று தனி மனிதர்கள் தங்களுடைய திட்டங்களுக்கு வங்கிகளின் ஆலோசனைகளையோ அல்லது அவர்களிடமிருந்து முதலீடுகளையோ எளிதில் பெற முடியாது என்பதே இன்றைய நிலை. ஆனால் வங்கிகளில் உள்ள வராக்கடன் தொகை நாளுக்கு நாள் பெருகிக்கொண்டே உள்ளது. இன்று நான்கு இலட்சத்து முப்பதாயிரம் கோடி வாராக்கடன் உள்ளதாக தகவல்கள் தெரிவிக்கின்றன. இன்று மத்திய அரசு வாராக்கடனை நிர்வாகம் செய்வதற்காக ஒரு தனி நிறுவனத்தையே உருவாக்கக்கூடிய நிலையில் உள்ளது என்பது மிகவும் வெட்கக்கேடான ஒரு செயல். விவசாயக் கடன் தள்ளுபடி, கல்விக்கடன் தள்ளுபடி என்று பொதுமக்களின் வரிப்பணத்தையோ அல்லது வங்கியில் கட்டிய பணத்தையோ எடுத்து விநியோகம் செய்தபிறகும் ஆண்டிற்கு 10,000 விவசாயிகளுக்குக் குறைவில்லாமல் தற்கொலை செய்வது ஏன்? அப்பொழுது தவறு எங்கோ நடப்பதாகத்தானே தெரிகிறது. விவசாயக் கடன் தள்ளுபடி கீழ்மட்ட விவசாயிகளுக்கு சென்று சேர்வதில்லை என்பதையே இது காட்டுகிறது.

வங்கிகள் பொதுமக்கள், விவசாயிகள், வணிக விவசாயச் சங்கங்கள் அனைத்தையும் இணைத்து ஒரு செயல் திட்டத்தை உருவாக்கினால் ஒழிய நமது இந்தியாவின் தனிமனித வருமானம் உயர்வதற்கு வழியே இல்லை. இல்லாவிட்டால் தற்பொழுது இருப்பதுபோன்று வங்கிகள் சகாராக்களையும், மல்லையாக்களையும் உருவாக்கிக்கொண்டிருக்கவேண்டியதுதான்.

மின்சாரம் மற்றும் பெட்ரோலியப் பொருட்களின் விலையேற்றமே தனிமனித வளர்ச்சிக்கு பெரும் முட்டுக்கட்டைகளாக உள்ளன. இன்றைய புள்ளிவிவரப்படி நமது அண்டை நாடுகளில் பெட்ரோலியப் பொருட்களின் விலை இலங்கையைத் தவிர்த்து கிழக்காசிய நாடுகள் அனைத்திலும் குறைவாக உள்ளது. மேற்கத்திய நாடுகளில் மிகவும் குறைவாக உள்ளது. ஆனால் இந்தியாவில் மட்டும் இந்த மாதம் 1ஆம் தேதி முதல் மீண்டும் விலை உயர்த்தப்பட்டுள்ள நிலையில் எப்படி தனி மனித வருமானம் உயரப்போகிறது?

தமிழ்நாடு அரசு இன்று விவசாய நிலத்திற்கு ஏக்கருக்கு 4000 ரூபாய் அளிப்பதாகவும் அந்தத் தொகை அவரவர் வங்கிக் கணக்கிலேயே செலுத்தப்படும் என்றும் அறிவிக்கப்பட்டுள்ளது. இதனால் தனிமனித வருமானம் உயரும் வாய்ப்பு இல்லை. விலைப்பொருட்களை பதப்படுத்தும் தொழிலை ஆரம்பிப்பதும், பதனக் கிடங்குகளை அந்தந்த மாவட்டங்களில் ஏற்படுத்துவதுமே இதற்கு நிரந்தரத் தீர்வாக இருக்குமே ஒழிய இதுபோன்று மானியம் மட்டுமே வழங்குவது சரியானத் தீர்வாக இருக்க முடியாது.

மத்திய மாநில அரசுகளின் நிதித்துறை அமைச்சர்களும், செயலாளர்களும் தனிமனித வருமானம் உயர்வதற்கான சூழலை உருவாக்குவார்களா?

பவள சங்கரி

தலையங்கம்

நவீனமயமாக்கினால் வருமானமும் பெருகும் ….

சென்னை பல்கலைக்கழக நூற்றாண்டு விழா அரங்கில் நடந்த விழாவில் இன்று 23-05-2016 திங்கட்கிழமையன்று தமிழக முதல்வராக, 6-வது முறையாக ஜெயலலிதா அவர்கள் பதவியேற்றுள்ளார். அவருடன் 28 அமைச்சர்களுக்கும் ஆளுநர் ரோசய்யா பதவிப் பிரமாணம் செய்து வைத்தார்.

முதல்வராகப் பதவியேற்றவுடன் ஜெயலலிதா தம் தேர்தல் அறிக்கையில் குறிப்பிட்டுள்ளபடி, ஒவ்வொரு வீட்டிற்கும் முதல் 100 யூனிட் மின்சாரம் இலவசம், விசைத்தறியாளர்களுக்கு வழங்கப்படும் இலவச மின்சாரம் 750 யூனிட் ஆக உயர்வு, கூட்டுறவு வங்கிகளின் மூலம் வழங்கப்பட்ட விவசாயப் பயிர்கடன் தள்ளுபடி. தொடக்கப்பள்ளிகளில் குழந்தைகளுக்கு காலையில் சிற்றுண்டி மற்றும் டாஸ்மாக் கடைகள் இனி மதியம் 12 மணி முதல் இரவு 10 மணிவரை மட்டுமே செயல்படும், தமிழகம் முழுவதும் 500 டாசுமாக்கு கடைகள் மூட உத்தரவு , தாலிக்கு தங்கம் 8 கிராமாக உயர்வு போன்ற திட்டங்களுக்கான கோப்புகளில் கையெழுத்திட்டுள்ளார் என்கிறது அரசு செய்திக் குறிப்பு.

தமிழகக் கருவூலத்தின் இன்றைய பொருளாதார நிலையை வைத்துப் பார்க்கும்போது இத்திட்டங்கள் அனைத்தும் நிறைவேற்றுவது மிகக்கடினமான ஒன்றே.

இன்று பீகாரில் நிதீசு குமார் அரசு பரிபூரண மதுவிலக்கைக் கொண்டுவந்துள்ளதும் குறிப்பிடத்தக்கது. அதோடு பான் மசாலா என்னும் குட்கா பொருட்கள் போன்றவற்றிற்கும் ஒரு ஆண்டிற்கு முழு தடை விதித்துள்ளனர். அவருடைய ஆட்சிக்காலம் வரை இத்தடை நீடிக்கப்படும் என்றும் அறிவிக்கப்பட்டுள்ளது. அண்டை மாநிலமான கேரளாவிலும் மது விலக்கு நடைமுறைப்படுத்தப்பட்டுள்ளது. தமிழ்நாட்டிலும் பூரண மதுவிலக்கு விரைவில் நடைமுறைப்படுத்தப்படும் என்ற நம்பிக்கையும் முதல்வரின் அறிக்கையின் மூலம் ஏற்படுகிறது.

பெருவாரியாக வாக்களித்துள்ள மேற்கு மண்டலத்தில், தொழிலாளர்கள் தாங்கள் வாங்கும் ஊதியத்தின் பெரும்பகுதியை மதுவிற்கு செலவிடுவதால் அவர்தம் குடும்பம் பாதிப்படைவதோடு, அவர்கள் ஒழுங்காக பணிக்கு வராததால் தொழிலும் பாதிக்கப்படுகிறது. ஆனால் டாசுமாக் கடைகளின் மொத்த வருமானத்தில் 60 சதவிகிதம் மேற்கு மண்டலத்திலிருந்து வருவதாக புள்ளி விவரங்கள் தெரிவிக்கின்றன. ஆகவே அரசு இதற்குத் தக்க நடவடிக்கை எடுத்து தொழில்வளம், மனைவளம் பெருக வழியமைக்கும் என்ற எதிர்பார்ப்பு மக்களிடையே அதிகமாகவே உள்ளது.

தமிழ்நாட்டில் உள்ள அனைத்து இல்லங்கள், சிறு, குறு தொழிலகங்களுக்கும் இலவசமாக மின்சாரம் வழங்குவது என்பது நல்ல செய்தி என்றாலும், இலவசமாக மின்சாரம் அளிப்பதற்குப்பதிலாக சோலார் எனர்ஜி என்கிற சூரிய சக்தி மூலம் மின்சாரம் தயாரிக்கும் முறையைக் கட்டாயப்படுத்துவதன் மூலம் நமது தமிழ் மாநிலத்தை மின்மிகை மாநிலமாக மாற்றுவது எளிதாகக்கூடும். மக்களுக்கு இலவச மின்சாரத்திற்குப் பதிலாக சூரிய சக்தி மூலம் மின்சாரம் தயாரிப்பு உபகரணங்களை மத்திய உதவித் தொகையோடு மாநில உதவித் தொகையும் இணைத்து 70 விழுக்காடு அளிப்பதன் மூலம், நாடு முழுவதும் இவை நிறுவப்பட்டால் ஒரு முறை செலவோடு தொடர் பலன் அளிக்கக்கூடிய செயலாக இருக்கும். அதுமட்டுமின்றி இந்த சூரிய சக்தி உபகரணங்களை அரசு, அரசின் எல்காட் மூலமாகவே தயாரித்தால் அதற்குரிய வருமானமும் பெருகும்.

பெண்களுக்கு இரு சக்கர வாகனங்கள் வாங்குவதற்காக 50 % மானியம் அளிப்பதற்குப் பதிலாக தமிழக அரசின் சொந்தத் தொழில் நிறுவனங்கள் மூலமாக உற்பத்தி செய்து தரமான இரு சக்கர ஊர்திகளை வழங்கும்போது வேலை வாய்ப்பும் பெருகும், வருமானமும் கூடும்.

மாசுக்கட்டுப்பாடு தொடர்பாக மத்திய மற்றும் அனைத்து நாடுகளும் பல்வேறு முயற்சிகள் எடுத்து பல ஆயிரம் கோடி பணங்களை செலவிட்டு வருகின்றன. நமது போக்குவரத்துத் துறையிலும், அரசு பயன்படுத்தும் அனைத்து வாகனங்களிலும் எல்.பி.ஜி., என்.பி.ஜி என்று சொல்லக்கூடிய திரவ பெட்ரோலியப் பொருட்கள், மற்றும் இயற்கை எரிவாய்வுகளையும் கட்டாயமாக்கினால் அரசின் வருமானம் கூடுவதோடு இயற்கைச் சூழலும் காப்பாற்றப்படும். நகரெங்கும் நிறைந்துள்ள ஆட்டோக்கள் அனைத்தும் எல்.பி.ஜியில் இயக்கப்பட்டால் இயற்கை சூழல் பாதுகாக்கப்படுவதோடு பொருளாதாரமும் நிலைப்படும். அந்த வகையில் நவீன முறையில் தமிழக அரசு இத்திட்டங்களை செயல்படுத்தினால் பொருளாதார பற்றாக்குறையும் தீர்ந்து, வாக்குறுதிகளும் காப்பாற்றப்படும் என்பது உறுதி.

தமிழகத்தில் உற்பத்தி செய்யப்படும் பொருட்களின் மீது ஆய வரி விதிக்கப்படுகிறது. இது உற்பத்தியைக் குறிக்கும் வரி. அதாவது உற்பத்தியின் அளவைப்பொறுத்தே வரி வருமானத்தின் அளவு இருக்கும். தமிழகத்தில் 2011 – 12இல், 10,000 கோடி ரூபாயாக இருந்த ஆய வரி வருமானம், 2015 – 16இல், 7,300 கோடியாக குறைந்துவிட்டது. அதாவது தமிழகத்தில் உற்பத்தித் திறன் குறைந்துவிட்டது என்றுதானே இதன் பொருள்? உற்பத்தி குறையும்பொழுது பொருளாதார வளர்ச்சி, வேலை வாய்ப்பு, தனிநபர் வருமானம் அனைத்துமே குறையும் என்பதுதானே நிதர்சனம்? 2015-16இல் 10 சதவீத பொருளாதார வளர்ச்சிக்கு 7.19 சதவீத சொந்த வரி வருமான வளர்ச்சி என்ற அளவில் குறைந்து உள்ளது. இப்படி வருவாய் கணக்கில் உள்ள பற்றாக்குறை ஏற்கனவே கடந்த இரண்டு ஆண்டுகளாக அதிகரித்து வருகிறது. மத்திய அரசிடம் கேட்டுப் பெறப்படும் உதவித்தொகையும், கடன் சுமையும் அதிகரித்துக்கொண்டு வருகிறது. இந்த நிலையில் இதுபோன்ற அறிவிப்புகளால் கடன் சுமை மேலும் கூடத்தானே செய்யும்? இதை எப்படி சரி செய்யப்போகிறார்கள்? அதற்கான எந்தத் திட்டமும் இன்னும் அறிவிக்கப்படவில்லையே? கடந்த பிப்ரவரி 16 ஆம் தேதி 2016-17 ஆம் நிதி ஆண்டுக்கான இடைக்கால நிதி நிலை அறிக்கையை தாக்கல் செய்து பேசியபோது தமிழக நிதி அமைச்சர், 2017 மார்ச் மாத முடிவில் தமிழக அரசின் மொத்த கடன் நிலுவை ரூ 2,47,031 கோடியாக இருக்கும் என்று அறிவித்தார் என்பதும் குறிப்பிடத்தக்கது.

பவள சங்கரி

தலையங்கம்

இந்திய இளைய சமுதாயத்தினரிடையே இன்று அறிவியல் திறன் பெருமளவில் வளர்ந்துகொண்டிருக்கிறது. சமூக நலன் கருதிய பலவிதமான கண்டுபிடிப்புகள் இன்று பலர் முனைந்து செய்தாலும் பெரும்பாலும் அவைகள் வெளியே வராமலேயே முளையிலேயே கருகிவிடுகின்றன அல்லது குடத்திலிட்ட விளக்காக முடங்கிப்போய்விடுகின்றன. சமீபத்தில் தமிழ்நாட்டின் கொங்குச் சரகத்தில் ஒரு விவசாயக் குடும்பத்தைச் சார்ந்த இளம் பெண் ஒருவரின் கண்டுபிடிப்பு நம் நாட்டிற்கு மிக முக்கியமானது. தண்ணீர் பற்றாக்குறை நிறைந்த இக்காலகட்டத்தில் குறைந்த அளவு நீரை பயன்படுத்தி, சல்லி வேருக்கு நேரடியாக நீர் பாய்ச்சும் முறை மூலம் அதிக மகசூல் தரக்கூடிய ஒரு விவசாயத்துறை சார்ந்த கண்டுபிடிப்புதான் அது. அந்தப் பெண் பல்வேறு இடர்பாடுகளுக்கிடையே தமது ஆசிரியரின் துணையுடன் கோவை மாவட்டத்தில் நடைபெற்ற அறிவியல் கண்காட்சியில் நிரூபித்துக்காட்டினார். ஆனால் நாம் அறிந்த வகையில் அவருக்கு உரிய அங்கீகாரமோ அல்லது அவருடைய ஆய்வுகளுக்குத் துணை நிற்கும்வகையில் மாநில அரசோ, மத்திய அரசோ எந்தவிதமான நடவடிக்கைகளும் மேற்கொள்ளவில்லை. இது போன்று பல இளம் மாணவ விஞ்ஞானிகள் நம் நாட்டிலிருந்தும் அவர்கள் கண்டுகொள்ளப்படாமலே இருக்கிறார்கள் என்பது வருத்தத்திற்குரிய விசயம். அமெரிக்காவில் இளம் விஞ்ஞானிகளுக்கு மிகுந்த வரவேற்பும், ஊக்கமும், உற்சாகமும் வழங்கப்படுவதைக் காணமுடிகிறது. அந்நாட்டின் குடியரசுத் தலைவர் பராக் ஒபாமா அவர்கள் 100 இளம் விஞ்ஞானிகளை அழைத்து அவர்களுக்கு வெள்ளை மாளிகையில் விருந்து வைத்து அவர்களோடு அளவளாவி அவர்களின் கண்டுபிடிப்புகள் பற்றிய விவரம் அறிந்து அவர்களை பெரிதும் உற்சாகப்படுத்தியுள்ளார். இந்த 100 பேரில் 13 மாணவர்கள் இந்திய வம்சாவளியைச் சார்ந்தவர்கள் என்பது பெருமையுடன் குறிப்பிடத்தக்கது. அதில் நீல் தவே என்ற 20 வயது மாணவர் ‘திரவ திசு ஆய்வு’ மூலமாக புற்றுநோயை ஆரம்பக்கட்டத்திலேயே அறியக்கூடிய முக்கியமானதொரு கண்டுபிடிப்பை வழங்கியுள்ளார். இந்த கண்டுபிடிப்பின் மூலமாக புற்று நோய் மட்டுமன்றி காச நோய் போன்ற கொடிய நோய்களையும் ஆரம்பத்திலேயே கண்டுபிடிக்க முடியும் என்று நிரூபித்துள்ளார். இதையறிந்த, நாற்பத்தி ஆறு வயதான தன்னுடைய மகன் பியூ என்பவரை புற்று நோயால் இழந்த அமெரிக்கத் துணை குடியரசுத் தலைவர், ஜோ பிடன், அந்த மாணவர் படிக்கும் கல்லூரிக்கு நேரில் சென்று 30 நிமிடங்கள் இருந்து அந்த ஆய்வு பற்றிய தகவல்களைக் கோரிப் பெற்றதோடு அந்த மாணவர்களுக்குத் தேவையான ஆய்வுக் கூடம், மற்றும் அதற்குத் தேவையான அனைத்து வசதிகளையும் உடனடியாக செய்து தருவதாகவும் வாக்களித்துள்ளார். இதையறிந்த ஒபாமா அவர்கள் இந்திய வம்சாவளியைச் சேர்ந்த அந்த மாணவரை வரவழைத்து இதைப்பற்றிய அனைத்துச் செய்திகளையும் அறிந்துகொண்டதோடு குறிப்பிட்ட அந்த ஆய்வை மேலெடுத்துச்செல்ல அனைத்து உதவிகளையும் செய்வதாக வாக்களித்துள்ளார் என்பதும் குறிப்பிடத்தக்கது.

இதையெல்லாம் பார்க்கும்போது நம் மாணவர்களுக்கும் இப்படி உயரிய அங்கீகாரம் கிடைத்தால் இன்னும் பல அரிய கண்டுபிடிப்புகளைப் பெற முடியும் என்ற ஏக்கம் கொள்ளாமல் இருக்க முடியவில்லை. மத்திய அரசின் மனித வள மேம்பாட்டுத்துறை இதைக் கவனத்தில் கொள்ள வேண்டியது அவசியம். சமீபத்தில் அமெரிக்காவில் படிக்கும் ஒரு 16 வயது மாணவன், பெங்களூருவில் உள்ள தன் தாத்தா பாட்டியின் சிரமங்களைக் கண்ணுற்று அதைப்போக்க வேண்டும் என்ற உயரிய நோக்கில் ஒரு அரிய கண்டுபிடிப்பை வழங்கியுள்ளான். ஆம், முகுந்த் வெங்கடகிருட்டிணன் என்ற இந்திய வம்சாவளியைச் சேர்ந்த மாணவன் மிகக் குறைந்த விலையில் (60 அமெரிக்க டாலர்) காது கேளாதோருக்கான கருவியை கண்டுபிடித்திருக்கிறார். இக்கருவி 1500 முதல் 1,900 டாலர் வரை அனாவசிய விலை விற்பதை அவர் சுட்டிக்காட்டி தன் கண்டுபிடிப்பு மூலம் ஏழை எளியவர்களும் பயன்பெறும் வகையில் தொண்டு நிறுவனங்கள் மூலமாக இக்கருவிகளை வழங்கப்போவதாகக் குறிப்பிடுகிறார். இந்தியாவில் நடுத்தர குடும்பங்களில் ஒருவரின் வருமானம் ஆண்டொன்றிற்கு 616 அமெரிக்க டாலர் மட்டுமே என்ற வகையில் ஒருவர் வருடம் முழுவதும் உழைத்து அதை ஒரு பைசா செலவு செய்யாமல் சேர்த்து வைத்தாலும் காது கேட்கும் கருவியை வாங்க இயலாது.. வளர்ந்து வரும் நாடுகளில் பலருக்கு இது ஒரு ஆடம்பரச் செலவாகவே இருப்பதும் வருந்தத்தக்க விசயம் என்கிறார் இவர்.

பவள சங்கரி

தலையஙகம்

பீகாரில் 6.4.2016 முதல் பூரண மதுவிலக்கு நடைமுறைக்கு வந்துள்ளது. இதுநாள் வரை பெருந்துயருற்றிருந்த பெண்களும், பெண்கள் அமைப்புகளும் நேற்று மகிழ்ச்சியில் பாட்னா நகரெங்கும் ஆடியும் பாடியும் இச்சட்டத்திற்கு வரவேற்பு அளித்துள்ளனர். ஆனால் பெரும் குடிமக்கள் சிலரும் இதற்கு எதிர்ப்பும் தெரிவித்துள்ளனர். ஒரு பெரிய மனிதர் ஆண்டிற்கு 3000 கோடி வருமானத்தை நிதீசு இழந்துவிட்டார் என்று வசை பாடியுள்ளார். இன்னொரு தலைவர் நிதீசு இச்சட்டத்தைக் கொண்டுவந்தது சமூக நலத்திற்காக அல்ல, மாறாகத் தங்கள் அரசியல் ஆதாயத்திற்காகவே இந்த மதுவிலக்கைக் கொண்டுவந்துள்ளார். இதன் மூலம் 50, 60 விழுக்காடு வாக்குகளை தன்னகத்தே வைத்துக்கொள்ளுவார் என்று கூறியிருக்கிறார். எது எப்படியோ, காரணம் எதுவாக இருப்பினும், சமுதாயத்தை கரையான் புற்றாக அரித்துக்கொண்டிருந்த மதுவை ஒழித்த பெருமை நிதீசு குமார் அரசிற்கு உண்டு. இந்த 3000 கோடி உரூபாயை வசூல் செய்ய வேறு வழி இல்லாமல் இல்லை. மக்கள் அவதியுறாத வண்ணம் இந்தத் தொகையினை பீகார் மாநில அரசு எளிதாகப் பெற்றுவிட முடியும். இந்த மது விலக்கை எதிர்த்து உச்சநீதி மன்றம், உயர்நீதி மன்றங்களில் பல்வேறு வழக்குகள் தொடரப்பட்டுள்ளன. கேரளாவில், “பூரண மதுவிலக்கு எங்கள் கொள்கை அதைப் படிப்படியாக நிறைவேற்றுவோம்” என்று சில கட்டுப்பாடுகளை அம்மாநில அரசு முன்னெடுத்துள்ளது. இதையெதிர்த்தும் வழக்குகள் தொடரப்பட்டுள்ளன. மக்கள் நலனில் அக்கறை உள்ள நீதிமன்றங்களால் அவை தள்ளுபடி செய்யப்பட்டன. அதுபோலவே பாட்னா உயர்நீதி மன்றத்தில் தொடரப்பட்டுள்ள வழக்குகளும் தள்ளுபடியாக வேண்டும் என்று எதிர்பார்க்கலாம். இதேபோல நம் தமிழ்நாட்டிலும் மதுவிலக்கு வேண்டி மகாநாடு நடத்தத் திட்டமிட்டனர். ஆனால் அம்மகாநாடு தேசத்துரோக சட்டத்தின்கீழ் தடை செய்யப்பட்டது. தேசத் துரோகம் என்று சொல்வதற்கான காரணம் என்ன என்று தெரியவில்லை. மதுவிலக்கைக் கோரி உயிர் துறந்த காந்தியவாதி பிறந்த மண்ணில் மக்கள் நல்வாழ்வு வேண்டி நடத்தப்படும் இதுபோன்ற மகாநாடுகள் தேசத்துரோகமா?

சப்பானிய நாட்டில் பிறப்பு விகிதம் குறைந்துகொண்டே வருவதால் 60 வயதிற்கு மேற்பட்ட முதியோர்கள் எண்ணிக்கை 50 சதவிகிதத்தைத் தாண்டியுள்ளது. எல்லா நாடுகளிலும் வேலை இல்லாத நிலை இருக்கும்போது இங்கு மட்டும் வேலை செய்யக்கூடிய இளைய சமுதாயம் குறைந்துள்ளது என்று அந்நாட்டின் அரசு வருத்தப்பட்டு இளைய சமுதாயத்தின் வளர்ச்சி விகிதத்தை அதிகப்படுத்துவதற்கான முயற்சியில் ஈடுபட்டுள்ளது. சீனாவிலும், இதேபோல இளைய சமுதாயத்தினரின் எண்ணிக்கை குறைந்து வருவதால் ஒரு குழந்தைதான் பெற்றுக்கொள்ள வேண்டும் என்ற தங்களுடைய கொள்கையை மாற்றி ஒரு தம்பதியினர் இரண்டு குழந்தைகள் பெற்றுக்கொள்ளலாம் என்று அறிவித்துள்ளனர். உலக அளவில் 40 சதவிகிதத்திற்கும் அதிகமாக இளைய சமுதாயத்தினர் உள்ள ஒரே நாடு இந்தியாதான். ஒவ்வொரு நாடும் தங்கள் நாட்டின் இளைய சமுதாயத்தினரை தங்கள் நாட்டின் செல்வமாகக் கருதிப் பார்க்கின்ற இக்காலகட்டத்தில் நம் நாட்டில், குறிப்பாக தமிழகத்தில் இளைய சமுதாயத்தை பாதாளத்தில் தள்ளக்கூடிய மது விற்பனையை அரசே ஏற்று நடத்தி அதன் மூலமாக ஆண்டிற்கு 20,000 கோடி, 30,000 கோடி என்று வருமானத்தைப் பெருக்கத் துணிவது வேதனைக்குரிய செயலாகிறது. நமது நாட்டின் இளைஞர் சமுதாயத்தை அழிக்கத் துணிகிறோம் என்பதே நிதர்சனம் .

பவள சங்கரி

தலையங்கம்

எரிபொருள் நிறுவனங்களின் சமீபத்திய அறிவிப்பு மக்களுக்கு அதிர்ச்சியளிக்கக்கூடியது. பெட்ரோலுக்கு ரூ. 2.19 உம், டீசலுக்கு ஒரு உரூபாயும் விலையை அதிகப்படுத்தியுள்ளனர். இதையடுத்து பெட்ரோல் விலை 61. 32 உரூபாயும், டீசல் விலை 50.09 உரூபாயாகவும் உள்ளன. இது கீழ்த்தட்டு மற்றும் மத்திய தர மக்களை பெரிதும் பாதிக்கக்கூடியது. உலகச் சந்தையின் கச்சா எண்ணெய் விலை ஏற்றத்தின் காரணம் காட்டி, மிக சமீபத்தில் சென்ற மார்ச் 17 ஆம் தேதியன்றுதான் பெட்ரோல் விலை லிட்டருக்கு ரூ. 3.06ம், டீசலுக்கு ரூ.1.96ம் உயர்த்தப்பட்டன. அதாவது இந்த ஒரு மாத காலத்தில் மட்டும் ரூ.5.25 வரை விலை உயர்ந்திருக்கிறது. ஏற்கனவே விலைவாசி ஏற்றத்தால் பாதிக்கப்பட்டுள்ள மக்கள் மீண்டும் ஒரு முறை விலைவாசி உயரும் நிலை வந்தால் மிகுந்த சிரமத்திற்குள்ளாவார்கள் என்ற கவலை துளியும் இன்றி நடுவண் அரசு இப்படி விருப்பம்போல் விலையேற்றம் செய்வது இந்த தேர்தல் நேரத்தில் நல்லதல்ல. டீசல் விலை உயர்ந்ததாலும், தமிழகச் சாலை பயன்பாட்டிற்குரிய சுங்கக் கட்டணம் உயர்ந்ததாலும், ஏற்கனவே சரக்குந்துகளின் கட்டணம் உயர்த்தப்பட்டிருந்ததால் சரக்குந்துகளின் வாடகையை உயர்த்தப்போவதாக வண்டி உரிமையாளர்கள் அறிவித்திருந்தார்கள். இப்போது இந்த எரிபொருள் விலையுயர்வு காரணமாக மேலும் வாடகை உயர்ந்தால் பால், காய்கறிகள் என அத்தியாவசியப் பொருட்களின் விலை மேலும் அதிகரிக்கும் அபாயம் நேரும். இதனால் பாதிக்கப்படப்போவது பொதுமக்கள்தான். பொதுவாகவே உலகச் சந்தையில் கச்சா எண்ணெயின் விலை குறையும்போது அதன் பயனை நாட்டு மக்களுக்கு வழங்காத அரசு விலையேற்றம் என்று வரும்போது மட்டும் பாரபட்சமின்றி விலையை உடனே ஏற்றிவிடுவது மக்களுக்கு ஆட்சியாளர்கள் மீது அதிருப்தியையே ஏற்படுத்தும் என்பதில் ஐயமில்லை.

பெட்ரோலியப் பொருட்களுக்கு விலை நிர்ணயிக்கும் அதிகாரத்தை அரசு அளித்தபோதே விலைவிதிப்பானது சந்தையில் கச்சா எண்ணையின் பேரல் விலைகளையும் சந்தை உரூபாய் மதிப்பையும் வைத்தே நிர்ணயிக்கவேண்டும் என்று அறிவுறுத்தப்பட்டுள்ளது. பெட்ரோலியப் பொருட்களை வாங்குவது மக்களுக்கு அத்தியாவசியத் தேவை என்பதாலேயே இந்நிறுவனங்கள் தங்கள் மனம் போன போக்கில் விலையை நிர்ணயம் செய்கின்றன. எப்போதுமே பெட்ரோலியப் பொருட்கள் விலை குறைவாக உள்ள மேற்கத்திய நாடுகள் மற்றும் கிழக்காசிய நாடுகளின் விலையுடன் நமது இந்தியாவில் விற்கப்படும் விலையை ஒப்பிட்டுப் பார்க்காமல் சந்தையிலுள்ள கச்சா எண்ணெயின் விலையையும் சந்தையிலுள்ள உரூப்பாயின் மதிப்பும் சரிவடையாமல் இருக்கும் இந்த சூழ்நிலையில் பெட்ரோலியப் பொருட்களின் விலை குறைக்கப்பட வேண்டுமேயொழிய இது போன்ற விலையேற்றம் அறிவிப்பு அதிர்ச்சியளிக்கக்கூடியதாகவே உள்ளது. இன்றைய சந்தை நிலவரப்படி ஒரு லிட்டர் பெட்ரோலின் விலை உரூபாய் 40 முதல் 50 வரை இருக்கலாம் என்று புள்ளி விவரங்கள் தெரிவிக்கின்றன. மக்கள் அதிகாரப்பூர்வமாக கொள்ளையடிக்கப்படுவதே நிதர்சனம். பெட்ரோலிய நிறுவனங்கள் பெட்ரோலியப் பொருட்களுக்கான விலைவிதிப்பு பற்றிய வெள்ளை அறிக்கையை பொது மக்களுக்கு அளிக்க வேண்டியதும் நடுவண் அரசின் கடமை. முந்தைய ஆட்சியில் இதேபோன்ற பிரச்சனை வந்தபோது இன்றைய ஆட்சியாளர்கள் பேசியவைகளை நினைவுகூர்தலும் இன்றைய தேவை.

சென்ற பிப்ரவரி மாதத்தில் என்.சி.ஆர்., எனப்படும், தேசிய தலைநகர் பிராந்தியத்தைச் சேர்ந்த நொய்டாவில், உள்ள ‘ரிங்கிங் பெல்ஸ்’ நிறுவனம் உலகின் மிக மலிவான, ‘பிரீடம் 251’ என்ற ஸ்மார்ட் போன் தயாரித்து, அதை 251 உரூபாய்க்கு விற்கப்பட இருந்தது நினைவிருக்கலாம். இந்த போன் ரூ. 5,000 மதிப்புள்ள போன்களுக்குச் சமமாக, 4 அங்குல தொடுதிரையுடன், ‘டுவிட்டர், பேஸ்புக்’ போன்ற சமூக வலைதளங்கள் விரைவாக இயங்கக் கூடிய வகையிலான, 1 ‘ஜிபி’ நினைவுத்திறன், 8 ஜிபி தகவல் சேமிப்பு திறன், 3.2 ‘மெகாபிக்சல்’ பின்புற கேமரா, ‘செல்பி’கேமரா, அதிகத் திறனுள்ள பேட்டரி (1450 எம்.ஏ.எச்.) மற்றும் 32 ஜி.பி., மைக்ரோ எஸ்.டி., கார்டு பொருத்தக்கூடிய வசதியும் உடைய அந்த நவீன கைபேசி 251 உரூபாய்க்கு வழங்குவதாக அறிவிக்கப்ப்பட்டு சாதாரண மக்களின் வயிற்றில் பால் வார்க்கச் செய்திருந்தது. ஆனால் நமது அரசோ அவர்களின் வங்கிக் கணக்கு, தொழிலகங்களின் ஆய்வு என்று பல்வேறு சோதனைகளை நடத்தி அந்த நிறுவனத்தையே முடக்கிவிட்டது. இந்த விசயத்தில் அரசு, அந்த நிறுவனத்தின் உற்பத்தியில் உறுதுணையாக இருந்து தரக்கட்டுப்பாடு அலுவலர்களை பணியாற்ற வைத்து, இன்னும் சற்று விலையில் கூடுதல் இருந்தாலும் கூட, அந்நியச் செலாவணியும் , மக்கள் பணமும் பாதுகாக்கப்பட்டிருக்கும். இதைவிடுத்து அந்த முயற்சியை முளையிலேயே கிள்ளியெறிந்தது பன்னாட்டு நிறுவனங்களின் நிர்ப்பந்தமா என்ற ஐயமும் கிளப்பிவிட்டது. அரசு பொதுவாக பன்னாட்டு நிறுவனங்களின் தயாரிப்புப் பொருட்களுக்கான விலைவிதிப்பை ஆய்வு செய்வதில்லை. உதாரணமாக ஒரு காரின் விலை 8 இலட்சம் என்று அறிவிக்கிறார்கள் என்றால் அந்தக் கார் அந்த 8 இலட்சத்திற்கு தகுதியுடையதா? அல்லது எத்தனை சதவிகிதம் இலாபம் எடுத்துக்கொள்கிறது என்ற ஆய்வை அரசு ஏன் மேற்கொள்வதில்லை. இது போல பல இலட்சங்கள், கோடிகள் என்று காரின் விலை நிர்ணயிக்கப்படுகின்றன. அந்த விலைக்கு அவை தகுதியுடையவைதானா? நம்முடைய தரக்கட்டுப்பாடு நிர்ணய அலுவலகம் இந்த வாகனங்களின் தரத்தை சோதனை செய்துள்ளதா? சமீபத்தில் ஒரு பிரபலமான கார் நிறுவனம் தாம் தயாரித்த வாகனங்களில் இலட்சம் வண்டிகளை திரும்பப் பெற்று அவை மீண்டும் சரி செய்யப்பட்டன. இதுபோன்று அலைபேசி, கைபேசி எனும் சுமார்ட் போன்களின் பயன்பாடு அதிவேகமாக பரவி வருகின்ற இன்றைய நிலையில் அலைக்கற்றையை உபயோகிப்பதற்கான கட்டணங்களை அரசு ஏன் வரைமுறைப்படுத்துவதில்லை?மக்களிடமிருந்து பல ஆயிரம் கோடி பணங்கள் கொள்ளையடிக்கப்படுவதையும் டிராய் கண்டுகொள்வதில்லை. இதைவிடுத்து அரசு நிறுவனங்களே பன்னாட்டு நிறுவனங்களும் போட்டி போட்டுக்கொண்டு கட்டணத்தை நிர்ணயித்து அதிலும் இலாபக் கணக்கைக் காட்டாமல் நட்டக் கணக்கை காட்டுவதே வியப்புக்குரிய செய்தியாக உள்ளது.

பன்னாட்டு நிறுவனங்களின் தடை செய்யப்பட்ட மருந்துகள் பற்றிய முடிவு என்ன எடுத்துள்ளது என்ற விவரம் அறிவிக்கப்படவில்லை. ஐந்து நாட்கள் மட்டுமே தடை செய்யப்பட்டதை நிறுத்திவைத்து நீதிமன்றம் வழங்கிய ஆணைக்குப் பிறகு இந்த மருந்துகளின் உற்பத்தி, விற்பனை எந்த நிலையில் உள்ளது, இதுபற்றி அரசின் நிலைப்பாடு என்ன என்பதுபற்றிய விவரங்களை மருந்து ஆளுமை மையம் மக்களுக்குத் தகவல் அறிவிப்பார்களா? தடை செய்யப்பட்ட மருந்துகளின் பட்டியல் ஒவ்வொரு மருந்தகங்களிலும் வைக்க அரசு ஆணை பிறப்பிக்குமா?

வாக்களிப்பது நம் உரிமை மட்டுமல்ல, கடமையும் கூட
வாக்களிக்கத் தவறாதீர்கள்! 100% வாக்களிப்புச் செய்வோம்!!

பவள சங்கரி

தலையங்கம்

பலகால தாமதங்களுக்குப் பிறகு மத்திய அரசு 344 வகையான மருந்துகளைத் தடை செய்வதாக அறிவித்துள்ளது. அந்த 344 மருந்துகளைத் தயாரிக்கக்கூடிய அந்நிய முதலீட்டு நிறுவனங்கள் உடனடி தடை செய்வதை நிறுத்தி வைக்கக்கூடிய நீதிமன்ற ஆணையைப் பெற்றன. இன்று அது மேலும் ஒரு வாரத்திற்கு நீடிக்கப்பட்டுள்ளன. இந்தத் தடை சில்லரை விற்பனை முகவர்களுக்கு பெரும் இழப்பை ஏற்படுத்தும் என்று காரணம் காட்டி இந்த நீட்டிப்பு வழங்கப்பட்டது. தடை செய்யப்பட்ட சில மருந்துகளின் தயாரிப்பாளர்கள் தங்கள் உற்பத்தியை நிறுத்திவைக்க முடிவு செய்தனர். நீதி மன்றங்கள் ஏனைய வழக்குகளைப்போல இதையும் ஒரு வழக்காக ஏற்றுக்கொண்டு நிறுத்தி வைப்பதற்கான ஆணையைப் பிறப்பித்துள்ளன. இந்த 344 மருந்துகளில் அதிகபட்சமான மருந்துகள் மேற்கத்திய நாடுகளில் ஏற்கனவே தடை செய்யப்பட்டவை. இவைகள் வெகு காலத்திற்கு முன்பே மேற்கத்திய நாடுகளில் தடை செய்யப்பட்டுள்ளவை என்பதும் குறிப்பிடத்தக்கது. பன்னாட்டு நிறுவனங்கள் இந்திய மருந்துச் சந்தையைக் குறிவைத்தே பல ஆயிரம் கோடி டாலர்களை சம்பாதித்துக்கொண்டிருக்கின்றன. அவர்களுக்கு நம் மக்களின் உயிர் பற்றிய அக்கறை இல்லை. நீதிமன்றங்கள், தடையை நிறுத்தி வைப்பதற்கான ஆணையை பிறப்பிப்பதற்கு முன்பு எந்தெந்த மருந்துகள் வெளி நாடுகளில் தடை செய்யப்பட்டுள்ளன என்பதை மத்திய மருந்து ஆணையத்திடமும், மருந்து தயாரிப்பு நிறுவனங்களிடமிருந்தும் கோரிப் பெற்றிருக்க வேண்டும். அதற்குப் பிறகே அந்த மருந்துகளைத் தவிர்த்து மற்ற மருந்துகளுக்கு நீதிமன்றங்கள் பரிகாரம் செய்திருக்கவேண்டும். இது மக்களின் உயிர் சம்பந்தப்பட்ட பிரச்சனை என்பதால் நிதியைப் பற்றிய கவலையை விட்டொழிக்க வேண்டியதே அவசியம். ஆகவே இந்த ஒவ்வொரு வாரம் நீட்டிப்பின்போதும் பல ஆயிரம் கோடி ரூபாய்கள் விற்பனை செய்து தங்களுடைய நட்டத்தைத் தவிர்த்துக்கொள்ளும்பொருட்டு இதுபற்றியெல்லாம் விழிப்புணர்வு ஏதும் அறியா மக்களைப் பலியிடுவது முறையாகுமா? மக்கள் நலம் சார்ந்த இதுபோன்ற விசயங்களில் நீதித்துறை தலையிடுவதற்கு முன்பு மருத்துவ ஆணையத்திடம் தகுந்த விளக்கங்கள் பெற்றிருக்கவேண்டியதும் அவசியம். நீதித்துறையும் மத்திய அரசும் இதுபோன்ற அத்தியாவசிய கருத்துகளை கவனத்தில் கொள்வதே மக்களுக்கு உயிர்காக்கும் நன்மை பயக்கும். ஈரோடு மாவட்ட வேதியியலாளர் மற்றும் மருந்துக்கடைக்காரர்கள் சங்கத் தலைவர் திரு காளியண்ணன் அவர்கள், ஒவ்வொரு விற்பனையாளரும் தடை செய்யப்பட்ட மருந்துகளை விற்காமல், அவையனைத்தையும் ஒரு அட்டைப் பெட்டியில் போட்டு, ‘இவை விற்பனைக்கு அல்ல’ என்று மக்களின் கண்ணில்படும்படி எழுதி வைக்கவேண்டும். மேலும் விற்பனையாளர்கள் அனைத்து தடை செய்யப்பட்ட மருந்துகளையும் மொத்த வியாபாரிகளுக்கோ அல்லது மருந்து தயாரிப்பாளர்களுக்கோ திருப்பி அனுப்புவதன் மூலமாக தங்கள் நட்டங்களை குறைத்துக்கொள்ளலாம் என்றும் கூறியிருப்பதும் குறிப்பிடத்தக்கது.

சமீபத்திய செய்திகளின்படி மிருகவதை தடுப்புச் சங்கம், மருந்துகளின் ஆய்வுகளுக்கு விலங்குகளை உட்படுத்தக்கூடாது என்று அறிவித்துள்ளனர். காலங்காலமாக மருத்துவத் துறையின் ஆய்வுகளுக்கு எலி, குரங்கு, போன்ற மிருகங்களே பயன்படுத்தப்பட்டு வந்துள்ளன. புதிய மருந்துகளை அவைகளுக்குக் கொடுத்து சோதித்துப் பார்த்துவிட்டு, அதற்குப் பின்பு அனுமதியுடன் இறுதியில் மனிதர்களுக்கும் கொடுத்து ஆய்வு செய்கின்றனர். அதன் பின்பே மக்களுக்கு பயன்பாட்டில் வருகின்றன. வாயில்லா சீவன்களை வதைப்பது இதன் நோக்கம் என்பதைக்காட்டிலும் அதற்கு மாறாக பல இலட்சம் உயிர்களைக் காப்பதே இதன் முக்கியமான நோக்கம் என்ற வகையிலேயே இந்த முறை தொடரப்பட்டு வருகிறது. அந்த வகையில் இந்த சங்கத்தினர் இதற்கான மாற்று உபாயம் குறித்து கருத்து தெரிவிப்பார்களேயானால் அது ஆக்கப்பூர்வமாக அமையும் என்பதும் நிதர்சனம்.

உலகிலேயே காச நோயால் பாதிக்கப்பட்ட மக்கள் அதிகமாக உள்ள நாடு சீனா. அதைக் கட்டுக்குள் கொண்டுவர பெரும் முயற்சிகள் மேற்கொள்ளப்பட்டு வருகின்றன. இந்தியாவிலும் இந்நோயை முற்றிலும் ஒழிப்பதற்கான முயற்சியில் நம் அரசு ஈடுபட்டுள்ளதும் குறிப்பிடத்தக்கது. இதற்கான விலையுயர்ந்த மருந்துகள் கட்டுப்பாட்டு விலையிலும், அரசு சுகாதார மையங்கள் மூலமாக இலவசமாகவும் கிடைப்பதற்கும் அரசு ஆவன செய்துள்ளதும் வரவேற்பிற்குரியது.

கோவை மாநகரில் போக்குவரத்து மிகுந்த ஒரு சாலையில் ஒரு நாள் மட்டும் பேருந்துகளோ அல்லது சிற்றுந்துகளோ இல்லாமல் மிதி வண்டியை மட்டும் உபயோகப்படுத்தி சமுதாயத்தைப் பாதுகாக்கக்கூடிய நல்லதொரு வழியை இந்து நாளிதழும், கோவை மாநகராட்சி பொது மக்களும் சேர்ந்து செயல்படுத்தி வருவது பாராட்டுதலுக்குரியது. அரசின் கவனத்தில் உள்ள, 15 – 20 ஆண்டுகளுக்கு மேற்பட்ட பழைய வாகனங்களுக்குப் பதிலாக புதிய வாகனங்கள் வாங்கப்படவேண்டும், அப்படி வாங்குபவர்களுக்கு அதனுடைய விலையில் 15% தள்ளுபடி செய்வதாகவும் பரிசீலனையில் உள்ளதும் வரவேற்கப்படவேண்டிய செயல். இது போன்ற செயல்களால் மாசுக்கட்டுப்பாட்டிற்கு வழியமைவதால் காச நோய் போன்றவைகள் பெருமளவில் குறைவதற்கான வாய்ப்புகள் அதிகரிப்பதும் நல்ல செய்தி. கோவையைப்போன்று இந்தியாவில் உள்ள அனைத்து நகரங்களிலும் வாகனங்கள் ஒரு நாள் நிறுத்தி வைத்தாலே அந்நிய செலாவணி சற்றேனும் குறைவதுடன் மாசுக்கட்டுப்பாட்டிற்கும் வழிவகுக்கும் என்பதும் திண்ணம்.

பவள சங்கரி

தலையங்கம்

ஜனநாயகம் காக்கப்படுவதற்காக எதிர் கட்சியை சார்ந்த பாராளுமன்ற உறுப்பினர்கள் 6 நாட்களுக்கும் மேலாக தொடர்ந்து பல மணி நேரங்களாக பேசிக்கொண்டிருக்கிறார்கள். நாட்டின் பாராளுமன்ற எதிர் கட்சித் தலைவர் மட்டும் தொடர்ச்சியாக 11 மணி நேரத்திற்கும் மேல் பேசியுள்ளார். அந்த நாட்டின் பாராளுமன்றத்தின் பாதிக்கு மேல் உள்ள ஆளும் கட்சியினர் அதை அமைதியாக கவனித்தும் வருகின்றனர். அதுவும் அவருடைய பேச்சுகளுக்கு எந்த விதமான இடையூறும் செய்யாமல் கவனித்து வருகிறார்கள். அந்த பாராளுமன்றத்தின் சபாநாயகர் 115 நேரத்திற்கு மேலாக பேசுவதற்கு அனுமதி அளித்துள்ளார். இந்த அதிசயம் நடந்திருப்பது நம் நாட்டில் அல்ல. தென் கொரிய நாட்டில் நடந்த இது முந்தைய கின்னஸ் சாதனையான கனடா பாராளுமன்றத்தில் 50 மணி நேரம் தொடர்ச்சியாகப் பேசியதை முறியடித்து புதிய சாதனை படைத்திருப்பது குறிப்பிடத்தக்கது.

அமெரிக்க செனட் சபையைச் சேர்ந்த சில உறுப்பினர்கள் ஒன்று சேர்ந்து இந்தியாவில் நடைபெறும் ஆட்சியில் மத உணர்வுகளுக்கு சகிப்புத் தன்மையின்மையை சுட்டிக்காட்டி பாரதப் பிரதமர் திரு மோடி அவர்கள் கண்டிக்க வேண்டுமென்று வற்புறுத்தியுள்ளனர்.

இங்கிலாந்து பாராளுமன்றத்தைச் சேர்ந்த உறுப்பினர்கள் கட்சிப் பாகுபாடின்றி அமெரிக்க குடியரசுத் தலைவர் தேர்தலில் போட்டியிடும் டிரம்ப் அவர்களின் தேர்தல் வாக்குறுதியான, “நான் வெற்றி பெற்றால் இசுலாமியர்களை அமெரிக்க நாட்டிற்குள் அனுமதிக்க மாட்டேன்” என்று கூறியதை வன்மையாகக் கண்டித்ததோடல்லாமல் டிரம்ப் அவர்களை இங்கிலாந்திற்குள் அனுமதிக்க மாட்டோம் என்றும் கூறியுள்ளனர். ஐரோப்பிய ஒன்றியத்திலிருந்து இங்கிலாந்து விலகும் என்ற முடிவினை ஆளும் கட்சி மற்றும் எதிர்கட்சி உறுப்பினர்களும் ஆக்கப்பூர்வமாக கருத்துகள் தெரிவித்து கேமரூன் அவர்கள் ஒன்றியத்திலிருந்து விலகுவதில்லை என்று முடிவு எடுத்தும் ஒன்றியத்தைச் சார்ந்த நாடுகளில் அகதிகளை ஏற்றுக்கொள்ளும் ஒத்தக் கருத்தினை ஏற்படுத்தியுள்ளனர். இப்படி வெளி நாடுகளில் உள்ள பாராளுமன்ற உறுப்பினர்கள் ஜனநாயகத்தைப் போற்றி பாதுகாக்கும் வேளையில் உலகின் இரண்டாவது மிகப் பெரிய ஜனநாயக நாடான இந்தியாவில் எதிர்கட்சியினரின் குரல்வளைகள் நசுக்கப்படுவதுடன், குண்டுக்கட்டாகத் தூக்கி எறியும் அவலங்களும், எதிர்கட்சியைச் சார்ந்த பெரும் தலைவர்கள் தேசத் துரோக குற்றச்சாட்டில் தில்லி முதலமைச்சர் திரு கேசரிவால் அவர்களும், கம்யுனிசத் தலைவர் திரு யெச்சூரி அவர்களையும், அகில இந்திய காங்கிரசின் துணைத் தலைவர் திரு ராகுல் காந்தி அவர்களையும் தேசத் துரோக குற்றச் சாட்டில் வழக்கு பதிவு செய்தலும், அகில இந்திய காங்கிரசு கட்சித் தலைவர் திருமதி சோனியா காந்தி, உதவித் தலைவர் ராகுல் காந்தி மற்றும் அக்கட்சியைச் சார்ந்த சில தலைவர்கள் மீது டெக்கான் ஹெரால்ட் வழக்கைப் போடுவதும், பாராளுமன்ற எதிர்கட்சியினராகிய காங்கிரசு கட்சியினர் பாராளுமன்றத்தை நடக்க விடாமல் முடக்குவதும், நமது நாட்டின் சட்ட மன்ற பாராளுமன்ற உறுப்பினர்களின் செயல்பாடுகளாக உள்ளது.

காந்தியின் சத்திய சோதனையின் அடிப்படையில் நடக்க வேண்டிய நமது நாட்டின் பாராளுமன்ற, சட்டமன்ற மாநகராட்சி மாமன்ற உறுப்பினர்கள் ஜனநாயகத்தை கேலிக்கூத்தாக்குவது மிகுந்த வேதனைக்குரிய விசயம். கீழ்த்திசை நாடான கொரியா ஆகட்டும், மேற்கத்திய நாடுகளாகிய அமெரிக்கா, இங்கிலாந்து போன்ற நாடுகளின் பாராளுமன்ற உறுப்பினர்களின் செயல்பாடுகள் பாராட்டுதலுக்குரியதாக உள்ளதை ஒப்புக்கொள்ளத்தான் வேண்டியுள்ளது.

பவள சங்கரி

தலையங்கம்

குஜராத்தில் பட்டேல் இனத்தவரின் போராட்டங்களும், ஹரியானாவில் ஜெட் இனத்தவரின் போராட்டங்களும், அவை மேற்கு உத்திர பிரதேசத்தில் பரவக்கூடிய வாய்ப்புகளும், சில ஆண்டுகளுக்கு முன்பு ஜெட் இனத்தவரின் ராஜஸ்தான் போராட்டங்களும் அங்கு ஆட்சியாளர்களின் வெவ்வேறு விதமான அணுகுமுறைகளால் தீர்க்கப்பட்டோ அன்றி ஒடுக்கப்பட்டோ பிரச்சனைகளை அப்போதைக்கப்போது அல்லது தற்காலிகமாக மட்டுமே தீர்க்கப்படுகின்றன. நடுவண் அரசோ அல்லது மாநில அரசுகளோ மனித வள மேம்பாட்டுக் கொள்கைகளில் நிலையானதொரு முடிவை எடுப்பதில்லை என்பதையே இது காட்டுகிறது. குறிப்பிட்ட சாரார்களுக்கான ஒதுக்கீடு என்பது முன்பெல்லாம் தாழ்த்தப்பட்ட, பிற்படுத்தப்பட்ட மக்களும், அரசு வேலை வாய்ப்புகளிலும், கல்வித் துறையிலும் வாய்ப்புகள் பெற வேண்டும் என்பதற்காக ஏற்படுத்தப்பட்டது. சுதந்திரம் அடைந்து 68 ஆண்டுகள் ஆகியும் நமது மக்கள் வளர்ச்சியடையாமல் தாழ்ந்த நிலையில் உள்ளார்கள் என்பதை பறைசாற்றும் விதமாக அரசே இப்படி ஒதுக்கீடு வழங்குவது தேவையா என்று சிந்திக்க வேண்டிய நிலையில் உள்ளோம்.

தடியெடுத்தவன் எல்லாம் தண்டல்காரன் என்பது போன்ற நிலையே உருவாகிக் கொண்டிருப்பதும் நாட்டின் வளர்ச்சிக்கு முட்டுக்கட்டை போடக்கூடியது. போராட்டம் என்ற பெயரில் போக்குவரத்திற்கு இடைஞ்சலாக ஆயிரம் ரயில்கள் நிறுத்தப்பட்டன. போராட்டத்தை கட்டுக்குள் கொண்டுவருவதற்காக இராணுவத்தை வானவெளி மூலமாகவே கொண்டுவர வேண்டியுள்ளது வெட்கப்பட வேண்டிய நிலை அல்லவா. இப்படி ஒவ்வொரு மாநிலத்திலும் ஏதோ ஒரு வகுப்பினர் போராட்டங்களை நடத்தினால் அரசு நிலை குலையும் நிலை ஏற்படும் என்பதும் அனைவரும் அறிந்ததே. இதற்கான தீர்வு என்ன என்பதை முறையாக சிந்தித்தால் மட்டுமே இதிலிருந்து முழுமையாக விடுபட முடியும். அதற்கு முதல் கட்டமாக , கட்சிப் பாகுபாடின்றி அனைத்துக் கட்சியினரும் ஒன்றாக அமர்ந்து பேசி பாரபட்சமற்ற முடிவை எடுக்க வேண்டியது அவசியம். இட ஒதுக்கீடு என்பது இனியும் தேவையா என்று முடிவெடுக்க வேண்டிய காலகட்டம் இது. திறமை உள்ளவர்கள் போட்டி போட்டுக்கொண்டு வெற்றி பெற வேண்டுமேயொழிய சமுதாயம், நாடு வளர்ச்சியடைவதற்கு பின்வழிகளை அரசு ஏற்கக்கூடாது. பல சமுதாயங்கள் இன்றளவிலும் வளர்ச்சியடையாமல் இருக்கும்பட்சத்தில் பொருளாதார உதவிகள் மூலம் இது போன்று போட்டியிடுவதற்குரிய திறமைகளை அதிகப்படுத்த வேண்டுமேயொழிய தேவையான திறமையற்றவர்கள் இந்த ஒதுக்கீடுகள் மூலமாக உயர்மட்ட பொறுப்புகளுக்கு வரும்பொழுது நாட்டு வளர்ச்சியும் பாதிக்கக்கூடும். உச்சக்கட்டத் தேர்வின்போது சம அளவிலான மதிப்பெண்களை தேர்வில் பங்குபெறும் நான்கு பேரும் பெற்றிருந்தால் அந்நிலையில் தாழ்த்தப்பட்ட சமுதாயத்திற்கோ, மாற்று வளர்ச்சியடையாத சமுதாயத்தை சேர்ந்தவருக்கோ அந்த வாய்ப்பை அளித்தால் சமுதாயம் முன்னேறுவதோடு நாடும் வளர்ச்சியடையும். இதை விடுத்து அரசியல் ஆதாயத்திற்காகவோ அல்லது வேறு ஏதும் காரணங்களுக்காகவோ இட ஒதுக்கீடு என்ற திட்டத்தை நிறைவேற்றுவது என்பது தவறான வழி வகைகளை ஏற்படுத்தும் என்பதோடு இதனால் நாட்டின் வளர்ச்சியும் பாதிப்படையும் என்பதும் உறுதி.

பவள சங்கரி

தலையங்கம்

வருமான வரி ஒழிப்பு பற்றி உயர்மட்டக் குழு ஆலோசனை

இன்று பரவலாக பேசப்படும் வருமான வரி ஒழிப்பு பற்றி மகாராஷ்டிர மாநிலம் ஔரங்காபாத்தை தலைமையிடமாகக் கொண்டு இயங்கும் அர்த்தகிரந்தி பிரதிஸ்தன் என்ற தன்னார்வக் குழுவினரின் அறிக்கையின்படி வருமான வரி மற்றும், மத்திய மாநில அரசுகளின் முப்பது வகையான வரிகளை நீக்குதல் சம்பந்தமான செயல்பாடுகள் துணை உயர்மட்ட குழுவின் ஆய்வில் இருப்பதாக செய்திகள் வருகின்றன. இதே கருத்தை நம் வல்லமை தலையங்கத்தில் சென்ற 2014ஆம் ஆண்டே ‘புதிய நிதிநிலை அறிக்கையும், மக்கள் எதிர்பார்ப்பும்!’ (Saturday, June 7, 2014, 22:40) என்ற தலைப்பில் நாம் வெளியிட்டோம்.

அர்த்தகிரந்தியின் அறிக்கையின்படி ஒரு இலட்சத்து நாற்பதாயிரம் கோடி ரூபாய் அரசிற்கு வருமானம் வரும் என்று குறிப்பிட்டுள்ளார்கள். ஆயினும் இத்திட்டத்தை இன்னும் விரிவாக செயல்படுத்தினால் நாட்டின் பொருளாதார வளர்ச்சிக்குப் பெரிதும் இடையூறாக இருக்கும் விற்பனை வரியையும் முற்றிலும் நீக்கிவிடலாம். அதாவது வருமான வரி, விற்பனை வரி அலுவலகங்களின் அவசியமே இல்லாமல் போகும் என்பதால் அந்த அலுவலகப் பணியாளர்களை மாற்று வகையில் வளர்ச்சித் திட்டங்களுக்குப் பயன்படுத்தினால் கையூட்டுகளும் குறைவதோடு வளர்ச்சிப் பணிகளும் பன்மடங்கு பெருகும். இதற்காக ஒவ்வொரு தனி நபரையும், பொது நிர்வாகங்களையும் தனிப்பட்ட முறையில் சோதனையிட்டு கண்டுபிடிக்க வேண்டிய அவசியமும் இருக்காது. ஒவ்வொரு மணித்துளியிலும் அரசிற்கு முழுமையான வருவாய் வந்து கொண்டிருக்கும். இதற்கு ‘பணப் பரிமாற்ற வரி’ என்றும் பெயரிடலாம். இதன் மூலம் அனைத்து வகையான பணப் பறிமாற்றங்களும் வங்கிகள் மற்றும் வங்கி அட்டைகள் மூலமாகவே நடைபெறும். இதனால் பல இலட்சம் கோடிகள் அரசிற்கு வருமானமாக அதிகரிப்பதுடன் செலவும் கணிசமாகக் குறையும். கருப்புப் பணமும் முற்றிலுமாக ஒழிக்கப்படும். கையூட்டு, அல்லது கட்சிகளுக்குக் கொடுக்கக்கூடிய அரசியல் நன்கொடைகளோ என அனைத்தும் வெளிப்படையாகவே இருக்கும். நாசிக்கில் அச்சடிக்கப்படும் ரூபாய் நோட்டுகள் 80 சதவிகிதம் குறையும். நாட்டின் பொருளாதார வளர்ச்சி கட்டாயம் 10 சதவிகிதத்தைத் தாண்டும் என்பதும் உறுதி. தொழில் துறையினர் எதற்கும் அஞ்சாமல் நேர்மையாக தமது தொழிலைக் கவனிக்கலாம். அதுபோல் ஏற்றுமதியாளர்கள், விவசாயிகளும் சிரமமின்றி தங்கள் தொழில்களை நடத்தும் வாய்ப்புகளும் பெருகும் என்பதிலும் ஐயமில்லை. தொழிலகங்களோ, தொழிலதிபர்களோ, என எவரும் எந்த ஏமாற்று வேலைகளிலும் ஈடுபட முடியாது. சிறப்பான நிர்வாகம், சிறந்த வளர்ச்சி என்று நாடு முன்னேற்றப் பாதையை நோக்கி பீடு நடை போடும். இதுபோன்று புதிய பொருளாதார சிந்தனைகளுக்கு ஊக்கமளித்தால் நாடு முன்னேற்றப்பாதையில் செல்வது உறுதி. இந்திய மக்களின் வளமான வாழ்க்கைக்கு வித்தாகவும் அமையும். இது மட்டுமன்றி பெரிதும் விவாதம் நடக்கும் ஜி.எஸ்.டி., எனப்படும், சரக்கு மற்றும் சேவை வரிக்கு அவசியம் இல்லாமலும் போகும்.

பவள சங்கரி

தலையங்கம்

கொடியேற்றம், அணிவகுப்பு, தேசிய அளவில் வெளிநாட்டு பிரமுகர்கள், சிறப்பு விருந்தினர்கள், மாநில அளவில் ஆளுநர் கொடியேற்றம், மாவட்ட அளவில் மாவட்ட ஆட்சியாளர்கள் கொடியேற்றம், பத்மவிபூஷன், பத்மபூஷன், பத்மஸ்ரீ போன்ற பட்டங்கள் வீர சக்கரா விருதுகள், மாநில அளவில் காவல்துறை விருதுகள் அளித்தல் போன்றவை வருடங்கள் தோறும் பெயரில் மட்டும் மாற்றங்களுடன் தவறாமல் நடைபெற்றுக்கொண்டிருக்கின்றன. ஆம் இவையனைத்தும் வெறும் சடங்குகளாக மட்டுமே நடைபெறுகின்றன. நாட்டின் இன்றைய வளர்ச்சியின் நிலையே சுதந்திர நாட்டின் வெற்றி விழாக் கொண்டாட்டமாக அமையும்!

பாரதப் பிரதமராகப் பதவியேற்றபின் மேதகு மோடி அவர்கள் எடுத்த பல முயற்சிகள் வரவேற்கத்தக்கதாக இருந்தன. அந்நிய முதலீடுகளை இந்தியாவிற்குக் கொண்டு வருவதிலும், மேக் இன் இந்தியா செயல் திட்டத்தை நடைமுறைக்கு கொண்டுவருதலில் அவர் காட்டிய முனைப்பு போன்றவைகள் பாராட்டுதலுக்குரியன. அது போல ஆந்திராவில் சந்திரபாபு நாயுடு, தெலுங்கானாவில் சந்திரசேகர ராவ் போன்றோர்கள் எடுத்துவரும் முயற்சிகளும் பாராட்டிற்குரியவைகளாகவே உள்ளன. தங்களுடைய மாநிலங்களை தொழில்வளம் மிக்க நாடுகளாக மாற்றுவதற்கு அவர்கள் எடுத்து வரும் முயற்சிகள் போற்றத்தக்கது. ஆந்திராவில் ஏர்பஸ் கம்பெனியுடன் இணைந்து விமானம் தயாரிப்பதற்கான முயற்சியில் இறங்கியுள்ளதும் பாராட்டிற்குரியது. வெறும் அறிவிப்புகளுடன் மட்டுமே நின்றுவிடாமல் , செயலிலும் வேகம் காட்டுவது வரவேற்பிற்குரியது. மிகவும் பின் தங்கிய பீகார் மாநில முதல்வர் நிதீஸ் குமார் அவர்கள் முழு மதுவிலக்கை அமல்படுத்தியுள்ளதும் மன நிறைவை ஏற்படுத்தக்கூடிய செயல். இப்படி குறிப்பிடும் வகையில் ஒரு சில முதல்வர்களே மக்கள் நல்வாழ்விலும், தொழில் வளத்திலும் அக்கறை காட்டி நம் இந்தியத் திருநாட்டின் வளர்ச்சியில் முனைப்பாக செயல்பட்டு வருகின்றனர். தமிழகம், மேற்கு வங்கம் போன்ற மாநிலங்களில் மாநிலத் தேர்தல் நெருங்கிக் கொண்டிருக்கின்ற இந்த நேரத்தில் ஆளும் கட்சியோ, பிரதான எதிர் கட்சிகளோ முன்னேற்றத்திற்கு வித்திடும் வகையில் தங்களுடைய மாநிலங்களை, தொழில் தலைநகராக மாற்றுவோம் என்பது போன்ற கோசங்களைக்கூட முன்வைப்பதில்லை என்பது வேதனைக்குரிய விசயம். தேர்தலுக்கு முந்தைய சட்டமன்றத்தின் இறுதிக் கூட்டத்தில் தனது ஆளுநர் உரையில் முழு மதுவிலக்கு என்பது இயலாத காரியம் என்று கூறியிருப்பது வருந்தக்கூடிய விசயமாகும். சில புள்ளிவிவரங்களின்படி விஸ்கி, பிராந்தி போன்ற மது அருந்துவோரின் எண்ணிக்கை பாதியாகக் குறைந்துள்ளதும். அதே நேரத்தில் மதுவின் பாதிப்பு குறைவாக உள்ள பீர் அருந்துவோரின் எண்ணிக்கை அதிகரித்துள்ளதாகவும் தெரிய வருகின்றன. மற்றொரு புள்ளி விவரத்தின்படி புகை பிடிக்கும் ஆண்களின் எண்ணிக்கை குறைந்தும், பெண்களின் எண்ணிக்கை அதிகரித்தும் வருவதாகவும் தெரிய வருகின்றன. இதைப் பற்றியெல்லாம், ஆளும் கட்சியோ அல்லது ஆள ஆசைப்படும் கட்சிகளுக்கோ அக்கறை இருப்பதாகத் தெரியவில்லை. பொருளாதாரம், தொழில் துறைகளில் வளர்ச்சியடைந்து வரும் தமிழகத்தைப் பாரதப் பிரதமரின் மேக் இன் இந்தியா திட்டத்தையொற்றி மேக் இன் தமிழ்நாடு என்ற கோசத்தை முன்வைத்துப் போட்டியிட எந்தக் கட்சியும் தயாராக இல்லை. மக்களின் அறியாமையைப் பயன்படுத்தி இலவசங்களைப் பற்றி மட்டுமே அறிவித்து மன மயக்கத்தை ஏற்படுத்துகின்றனர். சமீபத்திய கணக்கெடுப்பின்படி, 1% பேர் மட்டுமே இந்த இலவசத் திட்டங்களுக்கு எதிர்ப்பும், 24% பேர் வரவேற்றும், 24% இலவசங்களில் மாற்றங்களும் தேவை என்று கூறியிருக்கின்றனர். விலையில்லா மடிக்கணினி வழங்கும் திட்டத்தை பல சதவிகிதத்தினர் வரவேற்றுள்ளனர். இது அதிர்ச்சிக்குரிய தகவலாகவும், மக்களின் எதிர்மறை சிந்தைகளை பிரதிபலிப்பதாகவும் உள்ளது. பசிப்பவனுக்கு இரண்டு மீன்களைக் கொடுப்பதைவிட, மீன் பிடிக்கக் கற்றுக்கொடுப்போம் என்ற பெரியோரின் கருத்துகளை எள்ளி நகையாடும் விதமாக அரசு கருவூலங்கள் காலியானாலும் கவலையில்லை என்ற நோக்கில் வெற்றி பெறுவது மட்டுமே குறிக்கோளாகக் கொண்டு செயல்படுவது நம் நாட்டின் எதிர்கால வளர்ச்சிக்கு நன்மை பயக்கும் விதமாக இல்லை என்பதே வேதனையான விசயம்.

வாழ்க சுதந்திரம்!
குடியரசு தின வாழ்த்துகள்!

பவள சங்கரி

தலையங்கம்

சமீபத்தில் மிகவும் சுவாரசியமான ஒரு கதை படித்தேன். அன்று சனிக்கிழமை. 12 மணியளவில் ஒரு வீட்டின் கதவைத் தட்டி தபால்காரர் ஒரு தபாலைக் கொடுக்கிறார். அந்த வீட்டு அம்மணி அதைப் பிரித்துப் பார்க்கிறார். அதில் அன்று வெளியான ஒரு பிரபலமான திரைப்படத்திற்கு சில நுழைவுச் சீட்டுகள் மற்றும் குடும்பத்துடன் சென்று ஒரு பெரிய உணவு விடுதியில் உணவருந்த பரிசுக் கூப்பன்களும் இருந்தன. இதை அனுப்பிய நான் யார் என்று தெரிகிறதா என்ற வாசகத்துடன் வாழ்த்துக்களும் இருந்த அதைக் கண்ட அந்த அம்மணிக்கு இன்ப அதிர்ச்சி. கணவனிடம் உடனே சென்று காண்பிக்க அவரும் சற்றே யோசிக்க, பின் குடும்பமே சேர்ந்து இந்தப் பரிசுகளை அனுபவித்துவிட்டு பின்பு இதைப்பற்றி யோசிக்கலாம் என்ற முடிவிற்கு வந்தவர்களாக மகிழ்ச்சியுடன் கிளம்பிச் சென்று ஆனந்தமாக திரைப்படமும் கண்டு களித்து, உணவு விடுதியிலும் சென்று மனமார உணவருந்திவிட்டு வீடு வந்து சேர்ந்தால், அங்கு பூட்டைத் திறக்க வேண்டிய வேலை கூட இல்லாமல் வீடு பறக்க திறந்திருந்ததோடு வீட்டிலுள்ள அனைத்து விலையுயர்ந்த பொருட்களும் காணாமல் போயிருந்தன. மேசையில் கொட்டை எழுத்தில் ஒரு வாசகமும் இருந்ததாம். ‘பரிசு வழங்கிய நான் யாரென்று இப்போது தெரிந்ததா’ என்று. இந்தக் கதையைப் படித்தவுடன் எனக்குத் தோன்றியது இன்றைய நம் பரிதாப நிலைதான்.

தைப்பொங்கலுக்கு 100 ரூபாய் பணம், ஒரு கிலோ சக்கரை, கரும்பு 2 அடி துண்டு, பச்சரிசி என தமிழக அரசு வழங்கும் இலவசங்களைப் பெற முண்டியடிக்கும் மக்கள் வெள்ளம். இது போன்ற இலவசத் திட்டங்களுக்காக அரசாங்கத்தால் ஆண்டொன்றிற்கு ரூ. 20,000 கோடி செலவிடப்படுகிறது. கீழ்தட்டு மக்கள் வளம் பெறுவதற்காகவே இந்த இலவசங்களை அள்ளி வழங்குவதாக அறிவிப்புகளும் வந்த வண்ணம் உள்ளன. எதிர்கட்சிகளும் இதற்கு விதி விலக்கு அல்ல. இலவசங்கள் எனும் கையூட்டுகளைக் கொடுத்து மக்களின் வாக்குகளையும், அவர்தம் உரிமைகளையும் கவருகிறார்கள். ஆண்டொன்றிற்கு சுமாராக 20,000 கோடி ரூபாய் என்றால் ஐந்தாண்டுகளில் ஒரு இலட்சம் கோடி ரூபாய் செலவிடப்படுகிறது. இவர்கள் இலவசமாக வழங்கக்கூடிய பொருட்கள் பெரும்பாலும் தரமற்றவையாக இருப்பதும், அவைகள் பெரும்பாலும் பழுது பார்க்கும் மையங்களில் இருப்பதே கண்கூடாகக் காணப்படுகிறது. அதாவது இந்த ஒரு இலட்சம் கோடி ரூபாயானது தண்ணீர்ல் கரைந்த பெருங்காயமாக காணாமல் போய்க்கொண்டிருக்கிறது. இந்த நேரத்தில் திரு எம்.ஜி.ஆர் முதலமைச்சராக இருந்தபோது துவக்கப்பட்ட காகித ஆலை நிறுவனம் குறித்து சிந்திக்காமல் இருக்க முடியவில்லை. இந்த காகித ஆலை இன்று வளர்ந்தோங்கி இந்தியாவின் ஒரு தலை சிறந்த நிறுவனமாக மிளிர்வதைக் காணமுடிகிறது. இதை உருவாக்க சுமாராக 500 கோடி ரூபாய் செலவிடப்பட்டு இன்றும் நேரடியாகவும், மறைமுகமாகவும் பல ஆயிரம் பேருக்கு வேலை வாய்ப்பும், வழங்கி செழிப்புடன் அன்றாடம் இலாபத்தை ஈட்டிக்கொண்டிருக்கின்றது. இத்தனை ஆண்டுகளில் இந்த ஒரு இலட்சம் கோடி ரூபாயில் இது போன்று எத்தனை ஆலைகளை நிறுவி வேலை வாய்ப்பை ஏற்படுத்தியிருக்கலாம். இன்றைய தமிழ்நாட்டின் பொருளாதாரம் தடுமாறாமல் செழிப்புடன் இருக்க உத்திரவாதமாகியிருக்கலாம். இலாபத்தை ஈட்டித் தரும் வேலை வாய்ப்பைப் பெருக்கி மக்கள் வாழ்வில் நிரந்தர ஒளியேற்றியிருக்க வழியமைத்திருக்கலாம். ஒரு வேளை இலவசங்கள் வழங்கியேத் தீர வேண்டும் என்ற கட்டாயம் இருக்கும்பட்சத்தில் இலவசப் பொருட்கள் தயாரிப்பை அந்நிய நிறுவனங்களுக்கு அளிக்காமல், பல ஆண்டுகளுக்கு முன்பு துவக்கப்பட்ட மின்னணுசார் துறை மூலமாக உற்பத்தி செய்திருந்தால் பல ஆயிரம் படித்த பட்டதாரிகளுக்கு வேலை வாய்ப்புகளை உருவாக்கியிருக்கலாம் . இந்த வாய்ப்பை அந்நிய நிறுவனங்களுக்கு கொடுக்கப்பட்டதால் ஏற்பட்ட இழப்பை கருத்தில் கொள்ளவேண்டும். இதனால் தனியார் நிறுவனங்களே தரமற்ற பொருட்களை வழங்கி கொள்ளை இலாபம் ஈட்டியுள்ளனர். நாட்டின் பொருளாதாரத்தில் உண்மையான அக்கறையுடனும், தனிப்பட்ட மக்களின் பொருளாதார மேம்பாட்டிற்காகவும் சூலுறைத்து மேம்படுத்தக்கூடியத் திட்டங்களை எந்தக் கட்சியினரும் அறிவிக்காதது வேதனைக்குரியதாகும்.

இன்றைக்கு ஆறு ஆண்டுகளுக்கு முன்பு, அதாவது பிப்ரவரி 24ஆம் தேதி 2009ஆம் ஆண்டில் பதவியேற்ற பின்பு தம்முடைய முதல் உரையில் அமெரிக்க அதிபர் ஒபாமா, அந்த காலகட்டத்தில் அமெரிக்க பொருளாதாரம் மிகவும் நலிவடைந்த நிலையில் இருந்ததையும், வியாபாரம், வேலை வாய்ப்பு, தொழில்துறை என அனைத்தும் முடங்கிக் கிடந்த நிலையை எடுத்துக்கூறி, தம் நாட்டை பலம் பொருந்திய நாடாக உருவாக்கி, முன்னேற்றப் பாதைக்கு இட்டுச் செல்வதாக சூலுறைத்ததை, இன்று பலவற்றை சாதித்துக் காட்டியதை இன்று பட்டியலிட்டுள்ளதைக் காணும்போது நமக்கும் இது போன்ற சாதனைப் பட்டியலை எடுத்துரைக்கும் தலைவர்கள் அமையவில்லையோ என்று ஏக்கம் கொள்ளத்தான் செய்கிறது.