Month: January 2016

படக்கவிதைப் போட்டி (47)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

ராம்குமார் ராதாகிருஷ்ணன் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பு ஆசிரியர் திருமதி சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (9.01.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர் குழு உறுப்பினர், தமிழ் இலக்கிய ஆராய்ச்சியாளர் திருமதி மேகலா தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பல முறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். இது, கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்கு பெற அழைக்கிறோம்.

புதுச்சேரி மாநிலத்தின் காரைக்காலில் பிறந்த திருமதி மேகலா இராமமூர்த்தி கணிப்பொறி (MCA) மற்றும் தமிழில் (MA) முதுகலைப் பட்டம் பெற்றவர். அமெரிக்க தமிழ்ச்சங்கப் பேரவையின் (FeTNA) 2008, 2009 ம் ஆண்டுகளில் (ஆர்லாண்டோ & அட்லாண்டா) கவியரங்கம், இலக்கிய வினாடி வினா நிகழ்ச்சிகளில் பங்கேற்று பாராட்டுகளும், பரிசுகளும் பெற்றுள்ளவர். புறநானூறு, குறுந்தொகைப் பாடல்களில் அதிக நாட்டமும், இலக்கியக் கூட்டங்களில் சுவைபட பேசுவதிலும் வல்லமை பெற்றவர். இவருடைய வலைப்பூ – மணிமிடைபவளம்

January 11, 2016
அரசுப் பள்ளியில் படித்து ஐ.ஏ.எஸ். ஆனேன்

அரசுப் பள்ளியில் படித்து ஐ.ஏ.எஸ். ஆனேன்
வேளாண்மை துறை இணை செயலர் செ. ராஜேந்திரன் ஐ.ஏ.எஸ். பெருமிதம்

தேவகோட்டை:
சிவகங்கை மாவட்டம் தேவகோட்டை சேர்மன் மாணிக்க வாசகம் அரசு உதவி பெறும் நடுநிலைப் பள்ளியில் தமிழ்நாடு அரசின் வேளாண்மை துறை இணை செயலர் செ. ராஜேந்திரன் ஐ.ஏ.எஸ். தான் அரசுப் பள்ளியில் படித்து ஐ.ஏ.எஸ். ஆனது குறித்து பெருமிதம் கொள்வதாக மாணவர்களிடம் பேசினார்.

கலந்துரையாடல் நிகழ்ச்சிக்கு வந்தவர்களைப் பள்ளி தலைமை ஆசிரியர் லெ. சொக்கலிங்கம் வரவேற்றார். நிகழ்ச்சியின் தொடக்கமாக மாணவிகளின் அபிராமி அந்தாதி நடனம் மற்றும் திருக்குறள் நடனம் நடைபெற்றது.
1ம் வகுப்பு மாணவி திவ்ய ஸ்ரீ திருப்பாவையும், திருப்பாவை போட்டிகளில் சிவகங்கை மாவட்ட அளவில் முதலிடம் பெற்று வெற்றி பெற்றுள்ள 1ம் வகுப்பு மாணவி ஜெயஸ்ரீ திருவெம்பாவையும்,
2ம் வகுப்பு மாணவர் வெங்கட்ராமன் திருமுருகாற்றுப்படை பாடல்களையும்,
6ம் வகுப்பு மாணவர் ரஞ்சித் தேவாரம் பாடல்களையும் ,
7ம் வகுப்பு மாணவி தனலெட்சுமி நன்னெறி பாடலையும் பாடினார்கள்.

மத்திய கிழக்கு பல்கலைக்கழகத்தின் முன்னாள் துணை வேந்தர் ஜெகநாதன், சேது பாஸ்கரா வேளாண்மை கல்லூரியின் தாளாளர் சேது குமணன் ,கோவில்பட்டி தொழில் அதிபர் நாகஜோதி ஆகியோர் முன்னிலை வகித்தனர். தமிழ்நாடு அரசின் வேளாண்மை துறை இணை செயலர் செ. ராஜேந்திரன் ஐ.ஏ.எஸ். நிகழ்ச்சிக்குத் தலைமை தாங்கிப் பேசுகையில், உங்களைப் போன்று நானும் அரசுப் பள்ளியில் படித்து ஐ.ஏ.எஸ். தேர்வில் வெற்றி பெற்று மாவட்ட ஆட்சியர் ஆனேன். குட்டிக் கதை ஒன்றைக் கூறி அதன் மூலம் உண்மையாக உழைப்பவனுக்குத் தான் நல்லவை அனைத்தும் கிடைக்கும் என்பதை மிக எளிமையாக மாணவர்களுக்குப் புரிய வைத்தார். ஒற்றுமையே பலம், தன்னம்பிக்கை வழியாகக் கிடைக்கும் வெற்றி, ஆசிரியரை மதிக்கும் பண்பு, பொய் சொல்லாமல் இருத்தல், நல்ல மாணவராக இருப்பதற்கு என்ன, என்ன செய்ய வேண்டும் என்பது குறித்தும் விளக்கினார்.

இயற்கை வேளாண்மை குறித்தும், ஐ.ஏ.எஸ். ஆவதற்கு எப்படிப் படிக்க வேண்டும் என்றும் அதற்கு இளம் வயதிலேயே தினசரி பத்திரிக்கை படிப்பது, பொது அறிவு தகவல்களை வளர்த்துக் கொள்ள நூலகத்தைப் பயன்படுத்துவது எப்படி என்பது உட்பட பல்வேறு தகவல்களை விரிவாக எடுத்துக் கூறினார். படிக்கும் மாணவர்கள் அனைவரும் நன்றாகப் படித்து அரசு நடத்தும் போட்டி தேர்வுகளில் பங்கு கொண்டு அதில் வெற்றி பெற்றால் அரசு வேலை கிடைக்கும் என்றும், ஐ.ஏ .எஸ். போன்ற பணி இடங்களுக்கு நன்றாகப் படித்தால் எளிதாகச் செல்லலாம் எனத் தெரிவித்தார். பாரதியார் பாடல்களை பாடிக் காண்பித்து பொய் சொல்லாமல் இருக்க வேண்டியதன் அவசியத்தையும், அதன் பலன்களையும் நன்றாக எடுத்து உரைத்தார். பள்ளி நூலகத்திற்கு மாணவர்கள் படிக்கும் வகையில் புதியதாக புத்தகங்களை வழங்கினார். நூலக புத்தகங்களை பார்வையிட்டுப் படித்து பார்த்தார்.

இணை செயலரிடம் மாணவிகள் தனலெட்சுமி, பிரவீணா, பரமேஸ்வரி, தனம், சந்தியா மாணவர்கள் அபினாஷ், ஈஸ்வரன், ஜெகதீஷ் உட்படப் பல மாணவமாணவியர் கேள்விகள் கேட்டு பதில் பெற்றனர். நிகழ்ச்சியில் நடனம் ஆடிய மாணவிகள், பாடல்கள் பாடிய மாணவ மாணவியர், கேள்விகள் கேட்டு பதில்கள் பெற்ற மாணவமாணவியர்களுக்கு பரிசுகள் வழங்கப்பட்டன. நிகழ்ச்சியில் வேளாண்மைத் துறை அதிகாரிகள் ஸ்ரீதரன், இளங்கோ, சென்னை தொழில் அதிபர் குணசேகரன், தேவகோட்டை நகர் காவல் ஆய்வாளர் ரமேஷ் உட்படப் பெற்றோர்கள் பலரும் கலந்து கொண்டனர். நிகழ்ச்சி தொடர்பாக ஆசிரியைகள் வாசுகி, சாந்தி, ஆசிரியர் ஸ்ரீதர், பெற்றோர்கள் மகேஷ்,சொர்ணாம்பாள், சீதா லெட்சுமி, சத்துணவு உதவியாளர் கலா உட்படப் பலர் பேசினார்கள். நிறைவாக ஆசிரியை முத்து மீனாள் நன்றி கூறினார். நிகழ்ச்சிக்கான ஏற்பாடுகளை சேவுகன் அண்ணாமலை கல்லூரி பேரா. கண்ணதாசன் செய்திருந்தார்.

பட விளக்கம் : சிவகங்கை மாவட்டம் தேவகோட்டை சேர்மன் மாணிக்க வாசகம் அரசு உதவி பெறும் நடுநிலைப் பள்ளி மாணவ,மாணவியரிடம் தமிழ்நாடு அரசின் வேளாண்மை துறை இணை செயலர் செ. ராஜேந்திரன் ஐ.ஏ.எஸ். பேசிய போது எடுத்த படம்.

அரசு உதவி பெறும் நடுநிலைப் பள்ளி மாணவர்களின் கேள்விகளும், தமிழ்நாடு அரசின் வேளாண்மை துறை இணை செயலர் செ. ராஜேந்திரன் ஐ.ஏ.எஸ். அவர்களின் பதில்களும் …

பரமேஸ்வரி : தமிழ்நாட்டில் எத்தனையோ அரசுத் துறைகள் இருக்கும்போது நீங்கள் ஏன் ஐ.ஏ .எஸ். பணியைத் தேர்ந்தெடுத்தீர்கள் ?

பதில் : மக்களுக்கு நல்லது செய்ய வேண்டும் என்கிற எண்ணத்தில் இப்பணியைத் தேர்ந்தெடுத்தேன்.

பூவதி : சிறந்த உரம் எது ?

பதில் : இயற்கை உரம்தான் சிறந்த உரம்.

மகாலெட்சுமி : 50 ஆண்டுகள் கழித்து இந்தியா எப்படி இருக்கும்?

பதில்: மிகப்பெரிய வல்லரசு நாடாக இருக்கும்.

சந்தோஷ் : படிக்கிற எல்லோர்க்கும் அரசாங்க வேலை கிடைக்குமா?

பதில் : படிக்கிற அனைவரும் அரசு நடத்தும் போட்டி தேர்வுகளில் பங்கேற்று வெற்றி பெற்றால் கண்டிப்பாக அரசாங்க வேலை கிடைக்கும்.

காயத்திரி : நீங்கள் எந்தப் பள்ளியில் படித்தீர்கள் ?

பதில் : உங்களைப் போன்று நானும் அரசுப் பள்ளியில் தான் படித்தேன். அரசுப் பள்ளியில் படித்து ஐ.ஏ.எஸ். ஆனது குறித்து பெருமிதம் கொள்கிறேன் என்றார்.

பிரவீணா : ஐ.ஏ.எஸ். ஆக என்ன படிக்க வேண்டும் ?

பதில் : பள்ளிப் பருவத்தில் இருந்தே நன்றாகப் படிக்க வேண்டும். பிறகு கல்லூரியில் படித்து ஐ.ஏ .எஸ். போட்டி தேர்வு எழுத வேண்டும். பள்ளிப் பருவத்தில் இருந்தே தினசரி ஆர்வத்துடன் பத்திரிக்கைகள் வாசிக்க வேண்டும். பொது அறிவு தொடர்புடைய புத்தகங்கள் அதிகமாக வாசிக்க வேண்டும். அவற்றை நினைவில் நிறுத்த வேண்டும். பிறகு போட்டி தேர்வுகளில் பங்கேற்று நம்பிக்கையுடன், மனஒருமைப்பாட்டுடன் தேர்வு எழுதினால் கண்டிப்பாக தேர்வில் வெற்றி பெற்று ஐ.ஏ .எஸ். ஆக முடியும்.

தனலெட்சுமி : ஐ.ஏ.எஸ். ஆக நீங்கள் ஆசைப்பட்டீர்களா ? அல்லது உங்கள் அப்பா, அம்மா ஆசைப் பட்டார்களா ?

பதில் : ஐ.ஏ .எஸ். ஆகி பொது மக்களுக்கு என்னால் ஆன உதவிகள் செய்ய வேண்டும் என்பது எனது மனதுக்குள் ஆர்வம் இருந்ததுடன், எனது பெற்றோரும் எனக்கு வேண்டிய உதவிகளைச் செய்து மனத்திடத்தை, நம்பிக்கையை ஏற்படுத்திக் கொடுத்தனர். குழந்தைப் பருவத்திலேயே எனது பெற்றோர்கள் என்னை நன்கு படிக்க சொல்லி ஆர்வமூட்டினார்கள். அத்துடன் எனது ஆர்வமும் இணைந்து இந்த வெற்றியைப் பெற முடிந்தது. பெற்றோர்கள் மற்றும் எனது முயற்சி, பயிற்சியின் கூட்டு முயற்சிதான் இந்த வெற்றிக்குக் காரணம்.

ஜெகதீஸ்வரன் : நீங்கள் எந்த வருடம் ஐ.ஏ.எஸ். ஆனீர்கள் ?

பதில் : 2008ம் வருடம் .

இது போன்று பல்வேறு கேள்விகளை கேட்டு மாணவர்கள் பதில் பெற்றனர்.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

January 11, 2016
இந்த வார வல்லமையாளர்!

ஜனவரி 11, 2016

இவ்வார வல்லமையாளர்

வல்லமைமிகு ரிஃபாத் ஷாருக் அவர்கள்

வல்லமையின் இந்தவார வல்லமையாளர், இந்தியாவின் இளம் அறிவியலாளராகப் பாராட்டப் பட்டுள்ள, தமிழ்நாட்டின் மேல்நிலைப் பள்ளி மாணவரான திருவளர் செல்வன் ரிஃபாத் ஷாருக் (Mohamed ‘Rifath Shaarook’ Raaj M D / https://www.facebook.com/rifath.stechlabs) அவர்கள். இந்தச் சாதனையாளரை வல்லமைக் குழுவின் கவனத்திற்குக் கொண்டு வந்தவர் குவைத் நகர் வாழ் தமிழன்பர் திரு. பி.எம். இப்ராஹீம் (BM Ibrahim / https://www.facebook.com/ibrahimadvt) அவர்கள். சென்ற வாரம் ஜனவரி 3 – 7, 2016, மைசூர் பல்கலைக்கழகத்தில் நடைபெற்ற 103வது இந்திய அறிவியல் மாநாட்டில் (The 103rd edition of Indian Science Congress – ISC / http://www.isc103.in/) கரூரை அடுத்த பள்ளப்பட்டியைச் சேர்ந்த ரிஃபாத் ஷாருக் தனது கண்டுபிடிப்பைச் சமர்ப்பித்து இச்சாதனையை நிகழ்த்தியுள்ளார். ரிஃபாத் ஷாருக் கரூர் ‘கிரசென்ட் மெட்ரிக் மேல்நிலைப் பள்ளியின் (Crescent Matric Higher Secondary School) பன்னிரண்டாம் வகுப்பு மாணவர்

இந்திய அறிவியல் மாநாட்டின் சிறுவர்களுக்கான 23ஆம் “ராஷ்ட்ரீய கிஷோர் வைகையானிக் சம்மேளனம்” (23d Rashriya Kishore Vaigyanik Sammelan / Children’s Science Congress) அமைப்பு முன்னெடுத்த மாணவர்களுக்கான போட்டியில், “இயற்கை அடிப்படையில் பருவநிலையைக் கண்டறிதல்“(Understanding Climate with Nature) என்ற கருத்தில் ஆய்வுகள் பள்ளி மாணவர்களிடம் இருந்து வரவேற்கப்பட்டன. “சாட்டிலாஸ்கோப்“(Sateloscope) என்ற கருவியை தனது ஆசிரியர் பச்சமுத்து (Pachamuth A) அவர்களின் மேற்பார்வையில் வடிவமைத்தார் ரிஃபாத் ஷாருக்.

சாட்டிலாஸ்கோப் என்பது உருவில் சிறிய ஒரு செயற்கைக்கோள் மற்றும் தொலைநோக்கி ஆகியவற்றினை இணைத்து உருவாக்கப்பட்ட கருவி (a nano satellite which is a combination of satellite and telescope). பொதுவாக நாம் அறிந்துள்ள செயற்கைக் கோளைவிட உருவில் சிறியதாகவும் எடையில் குறைவாகவும் உள்ளது இந்தக் கருவி. அதனால் குறைந்த எரிபொருளுடன், சிறிய விண்கலம் மூலம் விண்வெளிச் சுற்றுப்பாதையில் இதனை நிறுவிவிட முடியும். இதில் பொருத்தப்பட்டுள்ள வரிச்சுருள் பாகமானது கருவியைச் சுற்றி ஒரு செயற்கைக் காந்தப்புலத்தை உருவாக்கி, கருவி சுற்றுப்பாதையில் இருந்து விலகிவிடுவதைத் தவிர்க்கும் வகையிலும், சூரியக்கதிர் தாக்குதலில் இருந்து பாதுகாக்கும் வண்ணமும் வடிவமைக்கப்பட்டுள்ளது. தகவல் தொலைத் தொடர்பு தொழில் நுட்பத்தில் இக்கருவியின் பங்கு சிறந்த முறையில் பயன்படும் வகையில் அமைக்கப்பட்டுள்ளது. இது செயல்படும் நிலையில் உள்ள ஒரு கருவி. இத்துடன் செவ்வாய் கிரகத்தின் கனிம வளங்களை ஆராய உதவும் மேலும் இரு கருவிகளையும் (‘Nano Mars Lander and the other is ‘Nano Mars Rover’) செயல்படும் நிலையிலேயே ரிஃபாத் ஷாருக் போட்டிக்காகச் சமர்ப்பித்திருந்தார்.

சமர்ப்பிக்கப்பட்ட 89 கண்டுபிடிப்புகளில் இறுதிச் சுற்றில் மூன்று மாணவர்களின் கண்டுபிடிப்புகள் தேர்வு செய்யப்பட்டன. பிறகு அவற்றிலும் ரிஃபாத் ஷாருக் வடிவமைத்த கருவியே சிறந்ததாகத் தேர்வு செய்யப்பட்டு இந்திய அறிவியல் மாநாட்டு வழங்கிய மாணவர்களுக்கான இளம் அறிவியலாளர் பரிசைத் தட்டிச் சென்று தமிழகத்திற்குப் பெருமை சேர்த்துள்ளார் இவர். இப்பரிசு வியாழனன்று வழங்கப்பட்டு ரிஃபாத் ஷாருக் பாராட்டப் பட்டார்.

***

சுட்டி விகடனின் ‘சீனியர் சுட்டி ஸ்டார்’ பாராட்டைப் பெற்றவரான மாணவர் ரிஃபாத் ஷாருக் இதற்கும் முன்னரே அறிவியல் சாதனைகளுக்காக அறியப்பட்டவர். ஆண்டு தோறும் பள்ளி மாணவர்களுக்காக நடத்தப்படும் ‘ஸ்பேஸ் கிட்ஸ் இந்தியா அமைப்பு’ நடத்தும் “இந்திய இளம் அறிவியலாளர் ” போட்டியில் ( ‘Young Scientist India-2015’ organised by Space Kids India) பங்கேற்று நாட்டிலேயே முதல்முறையாக விண்வெளிக்கு அருகில் வானிலை ஆய்வுக் கருவியைச் செலுத்தி சாதனை நிகழ்த்தினார். ஏ.பி.ஜெ.அப்துல்கலாம் அவர்கள் மறைவுக்குப் பின் சில நாட்களிலேயே நிகழ்த்தப்பட்ட இவரது இச்சாதனை அப்துல் கலாமின் மறைவுக்குச் சிறந்த அஞ்சலியாகக் கருதப்பட்டது.

‘இங்கிலாந்தின் அதிஉயர குழுவின்’ (U.K. high altitude society) உறுப்பினரான ரிஃபாத் ஷாருக் அமெரிக்க விண்வெளி ஆய்வு மையத்தின் (The National Aeronautics and Space Administration – NASA) இணைய தளத்தின் மூலம் தனது விண்வெளி தகவல் அறியும் விருப்பத்தை நிறைவேற்றிக் கொள்பவர். ஒருமுறை அறிவிக்கப்பட்ட செயற்கைக் கோள் போட்டியில் வெளிநாட்டு மாணவர்கள் பங்கு பெற அனுமதியில்லை என்ற குறிப்பிற்குப் பிறகு, பின்னொருநாள் அதனை முயல வேண்டும் என்று திட்டமிட்டார். ஹீலியம் வாயு பலூனுடன் வானிலை தரவுகள் சேகரிக்கும் கருவிகளைப் பொருத்தி, விண்ணில் உள்ள வாயுக்கள் பற்றி பருவநிலை ஆய்வுக்கு உதவும் வகையில் அதனை அதிக உயரத்தில் விண்வெளிக்கு அருகில் கருவியை செலுத்தி சாதனை நிகழ்த்தினார்.

அதில் இணைக்கப்பட்டிருந்த 10 வகை ஆய்வுக் கருவிகளுடன் 70,000 அடி உயரம் திட்டமிட்டபடி பலூன் உயர்ந்து, 242 கிமீ கடந்து, பலூன் வெடித்து பாராசூட்டின் உதவியுடன் கூத்தானூரில் தரையிறங்கியது. புவியிடத்தைக் குறிக்கும் ஜி பி எஸ் கருவி மூலம் அதனைத் தொடர்ந்து சென்று பருவநிலையைப் பற்றி கருவிகள் பதிவு செய்த தகவல்களை ரிஃபாத் ஷாருக் சேகரித்து வெளியிட்டார். இது போன்ற உயரங்களில் பலூன் பறக்கவிட்டு ஆய்வுகள் செய்யப்படுவதை அன்று வரை வானிலை உயர் ஆய்வு மையங்கள் மட்டுமே மேற்கொண்டுவந்தன. பள்ளிமாணவர் ஒருவர் அத்தகைய செயலை நிகழ்த்திக் காட்டியதே அதன் சிறப்பு. இதற்காகச் சென்ற ஆகஸ்ட் மாதம் பாராட்டப்பட்டவர் ரிஃபாத் ஷாருக்.

சிறுவயதில் காகித ராக்கெட் செய்து பறக்கவிட்டு விளையாடிய தன்னை உண்மையான ராக்கெட் விடவேண்டும் உற்சாகப்படுத்தியவர் அந்நாட்களில் இஸ்ரோவில் பணிபுரிந்த தனது தந்தை என்று செய்தித்தாளுக்கு வழங்கிய செவ்வி ஒன்றில் குறிப்பிட்டுள்ளார் ரிஃபாத் ஷாருக். இவரை ஊக்கப்படுத்தி அறிவியல் ஆர்வத்தை வளர்க்க உறுதுணையாக இருந்த ரிஃபாத் ஷாருக்கின் பெற்றோர்களும், ஆசிரியர்களும், இவரது திட்டத்திற்கு உதவி செய்த பிற ஆர்வலர்களும் கூட இத்தருணத்தில் பாராட்டப்பட வேண்டியவர்கள் என்பதில் ஐயமில்லை.

மறைந்த டாக்டர் அப்துல் கலாம் அவர்களின், இந்தியா ஒரு வல்லரசாக உருவாகவேண்டும் என்ற கனவினை நனவாக்க, வலிமையான இந்தியாவை உருவாக்க விரும்பும் இளையபாரதத்தினருக்கு ரிஃபாத் ஷாருக் ஒரு சிறந்த முன்மாதிரியாக விளங்குவதற்காகப் பாராட்டுகள். விண்வெளி ஆராய்வுத் துறை பயன்பெற அவர் பற்பல கண்டுபிடிப்புகளை உருவாக்கி, மேலும் மேலும் உயர்ந்து நாளைய தலைமுறையினரின் நம்பிக்கை நட்சத்திரமாக அவர்களை வழிநடத்த வல்லமை இதழ் குழுவினரின் வாழ்த்துகள்.

**************************************************************************************
வல்லமையாளருக்குப் பாராட்டுகள்!!!
தங்களுடைய ஆக்கப்பூர்வமான பங்களிப்பினைத் தொடர்ந்திட
வல்லமை மின்னிதழ் அன்பர்களின் மனம் நிறைந்த வாழ்த்துகள்!!!

**************************************************************************************

[இந்த வாரத்தில் தனது ஆற்றலை சிறப்புற வெளிபடுத்தி உங்கள் கவனத்தைக் கவருபவரை வல்லமை ஆசிரியர் குழுவினரின் கவனத்திற்குக் கொண்டுவர விரும்பினால், வழக்கம் போலவே வல்லமை ஆசிரியரிடம் (vallamaieditor@gmail.com) உங்களது பரிந்துரைகளை அனுப்பி உதவிடுமாறு வேண்டுகிறோம், மேலும் வல்லமையாளர் விருது பற்றிய விவரங்களை இப்பக்கத்தில் காணலாம் –http://www.vallamai.com/?p=19391, இதுவரை வல்லமையாளர்களாகத் தேர்வு பெற்றோர் பட்டியலை இங்கே காணலாம் http://www.vallamai.com/?p=43179 ]

__________________________________________________

வல்லமையாளரைத் தொடர்புகொள்ள:
Facebook : https://www.facebook.com/rifath.stechlabs
LinkedIn member : https://in.linkedin.com/in/rifath-shaarook-945a6698
Google.Plus.Com : https://plus.google.com/106488140532656756020/
youtube.com : https://www.youtube.com/channel/UCFuX8hbTIN60XKd8lI6hH_Q
Blogger : http://stlppt.blogspot.com/

__________________________________________________

செய்திகள் பெற்ற தளங்கள்:
Tamil Nadu‘s Mohamed Rifath wins 23rd Children Science Congress
Current Affairs Recap of the Day: 8 January 2016
https://www.fresherslive.com/news/current-affairs-recap-of-the-week-3-january-to-9-january-2016/

TN lad’s nano sat project is winner – ICAST
http://www.icast.org.in/news/2016/jan16/jan07TOI.pdf

Dharwad boy’s model among best 3 exhibits in children’s congress
http://www.deccanherald.com/content/521644/dharwad-boys-model-among-3.html

Chennai teenager launches helium weather balloon
http://www.deccanchronicle.com/150824/nation-current-affairs/article/chennai-teenager-launches-helium-weather-balloon

Space Kidz India Sends Payload Concieved By A Teen Into Near Space
http://technews.co/2015/09/08/space-kidz-india-sends-payload-concieved-by-a-teen-into-near-space/
__________________________________________________

January 11, 2016
குறளின் கதிர்களாய்…(103)

-செண்பக ஜெகதீசன்

ஞாலங் கருதினுங் கைகூடுங் காலங்
கருதி யிடத்தாற் செயின்.    (திருக்குறள்-484: காலமறிதல்)

புதுக் கவிதையில்…

உலகு ஒன்றும்
உன் கைகளுக்கு எட்டாததல்ல…

உற்ற காலத்து
உரிய இடத்தில் செயலாற்றினால்,
உலகம் கூட
உனக்கு வசமாகும்…!

குறும்பாவில்…

காலம் இடமறிந்து
கடமையாற்றினால்,
உடமையாகிடும் உலகே…!

மரபுக் கவிதையில்…

நிலையா உலக வாழ்வினிலே
    -நடக்கா தென்பது எதுவுமில்லை,
விலையாய் ஏதும் வேண்டாமே
    –வினையைச் செய்திடு இடமறிந்தே,
அலையாய்ச் சென்றிடும் காலத்திலே
    –அறிந்து செயல்படு காலமதில்,
அலைந்தே வெற்றி தேடவேண்டாம்
    –அகிலம் உன்கை வசப்படுமே…!

லிமரைக்கூ…

காலம் இடமறிந்தே ஆற்றிடுவாய் கடமை,
வெற்றி உன்னைத் தேடிவரும்,
உலகமதும் ஆகிவிடும் உந்தன் உடமை!

கிராமிய பாணியில்…

கடமயச்செய்யி கடமயச்செய்யி
காலமறிஞ்சி கடமயச்செய்யி,
கடமயச்செய்யி கடமயச்செய்யி
எடத்தயும்பாத்து கடமயச்செய்யி…

அப்போ,
எல்லாம்ஒனக்குக் கெடச்சிருமே
எதுலயும்வெற்றி கெடச்சிருமே,
ஒலகத்தநீ கேட்டாலும்
ஓங்கையில கெடச்சிருமே…

அதால,

கடமயச்செய்யி கடமயச்செய்யி
காலமறிஞ்சி கடமயச்செய்யி,
கடமயச்செய்யி கடமயச்செய்யி
எடத்தயும்பாத்து கடமயச்செய்யி…!

January 11, 2016
மார்கழி மணாளன் – 26 – திருக்கோஷ்டியூர் -ஸ்ரீ சௌம்ய நாராயணப் பெருமாள்

க. பாலசுப்பிரமணியன்

நல்லோரும் வல்லோரும் நான் முகனும்

நமச்சிவாயத்தொடு கூடிய திருத்தலமே !

ஊர்வாழ உலகம்வாழ கைகோர்த்து வாழ

உள்ளங்கள் ஒன்றாக்கி காட்டிய தத்துவமே !

பூவலகில் கண்ணனின் கால் வண்ணம்

பாற்கடலில் கிடக்கும் உடல் வண்ணம்

வைகுந்தத்தில் அவன் முழுவண்ணம்

மூவுலகும் ஒன்றாக்கும் எழில் வண்ணம் !

நானென்று வந்தான் நல்லதோர் மாணவன்

நாரணன் மந்திரம் நம்பியிடம் கற்றிட

வாவென்று சொல்ல மறுத்து வருத்தியே

வந்தானைத் திருப்பினார் ஆசானும் நம்பியே !

நானழிந்து வந்தவன் நற்கதி பெற்றிட

நாரணன் அட்சர மந்திரம் அறிந்தான் !

நானிலம் அனைத்துமே நற்கதி பெற்றிட

நற்கோவில் மேல்நின்றே ஒதிட்டான் !

நரகத்தின் பயமில்லை நல்லதோர் நெஞ்சுக்கு

நானிலம் வாழ்ந்திட்டால் நலமே உலகுக்கு

சாதியும் மதமும் சந்நிதியில் ஒன்றுதான்

சமத்துவப் பார்வை கண்ணனின் கீதைதான் !

பெருமாளின் அருள்பெற்ற அந்தணன் ராமனுஜன்

பெருந்தகை நம்பியின் ஆசியால் எம்பெருமான் !

ஊரினைக்கூட்டி திருவடி மந்திரம் தந்தவன்

திருவருள் பெருக்கிட்ட திருமாலின் திருத்தலம் !

January 11, 2016
அமைதி

-மெய்யன் நடராஜ்

பூங்காற்றின் அரவணைப்பில் பூவிதழை மெத்தையாக்கிப்
-பொன்னெழிலாய் பனியுறங்கும் அமைதி
நீங்காமல் நெஞ்சமதில் நிலைத்திருக்க நாள்தோறும்
-நினைக்கின்ற சுகமுமொரு அமைதி.

தேங்காய்க்குள் ளிருக்கின்ற தீர்த்தத்தைப் போலினிக்கும்
-தெய்வீகத் தன்மையுள அமைதி
வாங்காத கடனுக்கு வட்டியுடன் முதலாக
-வந்துவிடும் ஆனந்தம் அமைதி.

தூங்காமல் வதைக்கின்ற துயரத்தில் வாடுகையில்
-தூரத்தே போய்நிற்கும் அமைதி
தாங்காத துயரங்கள் தனைஏந்தி வைத்தமனம்
-தூர்வார ஊற்றெடுக்கும் அமைதி.

ஏங்காத இதயத்தில் இதமாகப் பதமாக
-என்றென்றும் குடியிருக்கும் அமைதி
தீங்கற்ற எண்ணத்துள் திளைக்கின்ற ஆசைக்குத்
-தேனாலே நீராட்டும் அமைதி.

இல்லாத பேருக்கு இருப்பதிலே ஏதேனும்
-ஈவதிலே கிடைக்கின்ற அமைதி
பொல்லாத மனிதர்களின் புகழ்வாக்கின் போதையிலே
-புளகாங்கிதம் கொள்ளாத அமைதி.

கல்லாத பேர்களிடம் கவலையற்றுக் கிடந்தேனும்
-கண்ணுறக்கம் கொடுத்துவிடும் அமைதி
சொல்லாத வார்த்தைகளின் சுகமான அர்த்தத்தில்
-சுகராகம் இசைத்துவிடும் அமைதி.

உனக்குள்ளே உனைத்தாங்கும் உயிர்த்தூணாய் இருக்கின்ற
-உள்ளத்தின் உறுதியெனும் அமைதி
தனக்கென்ற கொள்கைக்குத் தடைபோட்டு பிறர்க்கென்று
-தான்வாழச் சொல்கின்ற அமைதி.

இனத்துக்கும் சனத்துக்கும் எப்போதும் போராடி
-இழக்கின்ற சந்தோசம் அமைதி
எனக்கென்றும் உனக்கென்றும் எல்லாமே பொதுவானால்
-இழப்பற்று இருந்துவிடும் அமைதி

January 11, 2016
கற்றல் -ஒரு ஆற்றல் (11)

க. பாலசுப்பிரமணியன்

தவழ்தல் – மூளையின் வளர்ச்சிக்கு முதல் படி

வளரும் குழந்தைகளின் மனத்தில் கற்றலின் வித்துகள் பதிந்து இருக்கின்றன. ஒரு பொருளைப் பார்க்கும் பொழுது அதைப் பற்றி அறிந்து கொள்ளக்கூடிய ஆர்வம் உள் மனத்தில் வேரூன்றுகிறது. அதைப் பற்றி அறிந்து கொள்ளவும் அதனை உணந்து பார்க்கவும் மனம் விழைகின்றது. இதனால் ஏற்படும் ஊக்கத்தால் அதன் கை மற்றும் கண்ணசைவுகள் அந்தப் பொருளை நோக்கிச் செல்கின்றன. கூடிய விரைவில் அந்தப் பொருளை நோக்கிச் செல்ல மனத்தில் தூண்டுதல் ஏற்படுவதால் அந்தக் குழந்தையின் உடல் அசைவுகளில் முக்கியமான மாற்றங்கள் ஏற்படுகின்றன.

குழந்தை மன இயலையும் நலத்தையும் ஆராய்ச்சி செய்யும் வல்லுனர்கள் அவர்களின் மன மற்றும் மூளையின் வளர்ச்சிக்கு இந்தப் பருவத்தை மிக முக்கியமானதாகக் கருதுகின்றனர். எப்படி கண்ணோடு கண் நோக்குதல் உறவுகளுக்கும் புரிதலுக்கும் இன்றியமையாததோ அதுபோன்று கண்ணும்- கைகளும் சேர்ந்து உறவாடுதல் (eye – hand coordination ) மிக முக்கியமான செயல். ஒரு குழந்தையை உன்னிப்பாகக் கவனித்தால் எந்தப் பொருளிடம் நாட்டம் இருக்கின்றதோ அதை நோக்கி கை காட்டுதல், கைகளை ஆட்டுதல், கால்களை நீட்டுதல் போன்ற சில செயல்களைக் காணலாம்.

கண்-கைகளின் உறவாடுதல் வளர்ச்சியில் பிற்காலத்தில் திறன்களை வளர்க்கவும் (Skill Development ), பார்வை சார்ந்த திறன்கள் (visual skills ) மற்றும் கைத்திறன்களையும் நகர்வு சார்ந்த கலைகள்( Kinesthetic Skills )

மற்றும் திறன்களையும் வளர்ப்பதற்கு அடிவகுக்கும். ஆகவே குழந்தைகள் ஒரு பொருளை பிடித்தல், நகர்த்துதல், ஆட்டுதல், உடைத்தல், மற்றும் கிழித்தல் போன்ற செயல்களை வெறும் விளையாட்டாகக் கருதாமல் அதன் கற்றலின் உள்நோக்கங்களை அறிந்து பெற்றோர்கள் அதற்கு துணையாக இருத்தல் அவசியம். பொதுவாக மழலையர் பள்ளிகளில் குழந்தைகளுக்குப் பாடம் சொல்லிக்கொடுக்கும் பொழுது இது போன்ற திறன்களை வளர்ப்பதில் கவனம் செலுத்துகின்றனர். ஆனால் இந்தத் திறன்கள் மழலைப் பருவத்தில் பிறந்த சில மாதங்களிலேயே வெளிப்படத் துவங்குகின்றன.

வளரும் பாதையில் அடுத்த முக்கியமான நிகழ்வு குழந்தை தவழும் போது உருவாகின்றது. பொதுவாக வீடுகளில் குழந்தை தவழுவதை ஒரு மகிழ்சிகரமான செயலாக நாம் பார்க்கிறோம். சில நேரங்களில் அவை தவழ்ந்து சென்று ஏதாவது பொருளை எடுத்துவிடுமோ அல்லது உடைத்து விடுமோ என்ற பயமும், பாதுக்காப்பற்ற சூழ்நிலைகளில் அவர்களுக்கு ஏற்படக்கூடிய காயங்களையும், விபத்துக்களையும் கண்டு அஞ்சுகிறோம். ஆனால் தவழ்தல் என்ற ஒரு நிகழ்வு அந்தக் குழந்தையின் மன வளர்ச்சிக்கும் மன நலத்திற்கும் முக்கியமானதாக மேலை நாட்டு ஆராய்ச்சிகள் தெரிவிக்கின்றன.

ஒரு குழந்தையின் மூளை வளர்ச்சியில் வலது மற்றும் இடது பக்கத்தில் இருக்கின்ற பகுதிகள் ( left and right lobes) மூளையின் பல வித செயல்களைக் கட்டுப்படுத்துகின்றன. பொதுவாக இடது பக்கத்து மூளை உடலின் வலது பாகத்தையும் வலது பக்கத்து மூளை இடது பாகத்தையும் கட்டுபடுத்துவதாகக் கூறுகின்றனர். ஆகவே குழந்தை தவழும் பொழுது அந்த நகர்வுகள் வலது மற்றும் இடது பக்க மூளைகளை வலுப்படுத்த உதவும்.

வாழ்க்கையின் பின் பகுதிகளில் இந்த இடது-வலது சமன்பாடு (left -right coordination ) உடலின் பல பகுதிகளின் வேலைப்பாடுகளுக்கும் நலனுக்கும் அவசியம் தேவை. சில உடல் மற்றும் மன நல வல்லுனர்கள் இந்தத் தவழும் செயலை வயது முதிர்ந்தவர்களுக்கும் ஒரு பயிற்சியாகச் செய்ய ஆலோசனை அளிக்கின்றனர். இது பார்கின்சன் மற்றும் மூப்பு சார்ந்த பல நோய்களைத் தவிர்ப்பதற்கு உதவுவதாகப் பரவலான கருத்து நிலவுகின்றது.

ஆகவே, உங்கள் குழந்தைகளோடு நீங்களும் கொஞ்சம் தவழ்ந்து பார்க்கலாமே ! !

தொடருவோம்

January 11, 2016
உன்னையறிந்தால் (38)

நிர்மலா ராகவன்

முதுமையில் இளமை

கேள்வி: என் சொற்ப சம்பாத்தியத்தில் நான் நல்ல புடவை வாங்கிக்கொண்டால், பட்டப்படிப்பு படித்த என் மகள், `45 வயதில் உனக்கு இதெல்லாம் தேவையா?’ என்று பழிக்கிறாள். மகனும், `என் ஃப்ரெண்ட்ஸ் எல்லாரும் உன்னை என் அக்காளா என்று கேட்கிறார்கள். மானம் போகிறது!’ என்று கடிந்துகொள்கிறான். என்ன செய்வது?

விளக்கம்: நீங்கள் செய்வதுதான் சரி. மூப்பு வரும்போது வரட்டுமே! நாமாக அதைத் தேடிப் போவானேன்!
`உங்களுக்கு முதுமையே வேண்டாமா?’ என்று யாராவது கேட்டால், `அது வருகிறபோது வரட்டும். நாமாக வரவழைத்துக் கொள்வானேன்! என்ன அவசரம்!’ என்று சொல்லிவிட்டுப் போங்களேன்!

உங்கள் மகனும், மகளும் பெருமைப்பட வேண்டிய விஷயம் உங்கள் இளமைத் தோற்றம். மாறாக, பொறாமையும், அவமானமும் அடைகிறார்கள்!

என் மகள் தமிழ்நாட்டில் ஒரு புடவைக்கடைக்குப் போய், `எங்கம்மாவுக்கு ஒரு புடவை காட்டுங்க,’ என்று கேட்க, அறுபது வயதுக்குமேல் ஆனவர்கள் என்று உத்தேசித்து, பழுப்பு நிறமாகக் காட்டினாராம் கடைச் சிப்பந்தி. இவள் அயர்ந்துபோனாள்.
ஏன், வயதானவர்கள் வண்ண வண்ணமாக உடுத்தக்கூடாதா?

இளமையில், பிறரைக் கவரத்தான் அழகாக உடுத்தினோமா, என்ன! எல்லார்போலவும் இருக்கவேண்டும் என நம் சொந்த விருப்புவெறுப்புகளை அலட்சியம் செய்வது கொடுமை.

ஐம்பது வயதில் திடீரென குண்டாகிவிட்ட நெருங்கிய சொந்தக்காரியிடம், `உடம்பைப் பாத்துக்கோ. ஏதாவது உடற்பயிற்சி செய்யக்கூடாதா!’ என்று ஆதங்கத்துடன் கேட்டேன்.

`ம்? B.P, ஷுகர் எல்லாம் வரவேண்டாமா?’ என்றாள் பதிலுக்கு. கிண்டலாகப் பேசுவதாக நினைப்பு.

சில வருடங்களிலேயே, அவளுக்கு மூட்டு வலி. இன்னும் மிக வயதானவர்களைத் தாக்கும் ஏதேதோ உபாதைகள். மன அழுத்தம் என்று மருந்துகள் வேறு. எப்போது வயதாகும், வியாதிகள் வரும் என்று எதிர்பார்த்து, `அது இயற்கை!’ என்று நம்மை நாமே சமாதானப்படுத்திக் கொண்டிருந்தால், வேறு எப்படி நடக்கும்?

இந்தியாவில், சில உறவினர் பெண்கள் என்னைக் கேட்டார்கள், `நீங்கள் என்னென்ன மருந்து சாப்பிடுகிறீர்கள்?’

வயதாகிவிட்டால், மருந்துகள் உட்கொண்டுதான் ஆகவேண்டும் என்று தீர்மானித்துவிட்டவர்களைப் பார்த்து எனக்கு வியப்பும், பரிதாபமும்தான் எழுந்தன. ஆரோக்கியமாக இருக்க வழிகளா இல்லை?

எனக்குத் தெரிந்த ஒரு 65 வயது சீனப் பெண்மணி, அவ்வப்போது முடிவெட்டிக்கொள்ள சலூனுக்குப் போவார். போய்வந்ததும், `இளமையாகக் காட்சி அளிக்கிறோமே!’ என்ற உற்சாகம் பெருக, ‘எங்காவது வெளியே போகலாமா?’ என்று சிறுபெண்போலத் துள்ளுவார்.

இளமைக்காலத்தில் வசதி குறைவாக இருந்ததால் எதையும் அனுபவிக்க முடியாது போய்விடுகிறது சிலருக்கு. நாற்பது வயதானபிறகு, வசதி வருகிறதென்று வைத்துக்கொள்வோம். ஆசைப்பட்டதை அப்போது அனுபவிக்க என்ன தடை? அதற்கென இன்னொரு பிறவி எடுத்தா வரமுடியும்? விருப்பப்படி கௌரவமான உடை அணியலாம். அது ஒரு பொருட்டேயில்லை. நமக்கு நம் மகிழ்ச்சி முக்கியம்தானே?

சுய நிம்மதியைவிட, `பிறர் என்ன சொல்லிவிடுவார்களோ!’ என்றே தமது ஒவ்வொரு சொல்லையும், செயலையும் அளப்பவர்கள், `சமூகம் விதித்தபடிதான் நாம் வாழ வேண்டும்!’ என்று வாதிடலாம். இப்படிப்பட்டவர்கள் சொல்வதை — நாம் பெற்ற குழந்தைகளே ஆனாலும் — பெரிதாக எடுத்துக்கொள்ளக்கூடாது.

சமூகம் என்பது என்ன?
நானும், நீங்களும்!
நாம் மாறினால், தானே சமூகமும் மாறிவிட்டுப்போகிறது!

`எனக்கு வயதாகிவிட்டது! இனி என்ன இருக்கிறது. என் வாழ்க்கை அவ்வளவுதான்!’ என்று விரக்தியுடன் பேசி நடந்துகொள்பவர்கள் வாழ்வில் ஒரு பிடிப்புமின்றி, இயந்திரத்தனமாக காலத்தை ஓட்ட வேண்டியிருக்கும். அவர்களுக்கும் மகிழ்ச்சி கிடையாது, அவர்களைச் சேர்ந்தவர்களுக்கும் அவர்களால் நிம்மதி கிடையாது.

இவர்களுக்கு மாற்றத்தை நாடும் துணிச்சல் இல்லை. மாறாக, தம் வித்தியாசத்தாலேயே வெற்றியைப் பிடித்திருக்கும் பிறரைப் பழிப்பதில் நிறைவு அடையும் கோழைகள். போதாத குறைக்கு, கூட இருப்பவர்களைச் சதா தொணதொணத்துக் கொண்டிருப்பதிலும், மட்டம் தட்டுவதிலும் அற்ப திருப்தி அடைவார்கள். (அதனால்தான், கிழப்பாட்டிமாதிரி தொணதொணக்காதே!’ என்று இளையவர்களைத் திட்டுகிறோம்).

இன்னதென்று புரியாத சூனியத்தை மறக்க இன்னொரு வழி அளவுக்கு அதிகமாகச் சாப்பிடுதல். இப்பழக்கத்தால் ஆரோக்கியம் மேலும் கெடும் என்பதை எவரும் நினைத்துப் பார்க்க விரும்புவதில்லை. சாப்பிடும் நேரத்தில் மட்டும் மகிழ்ச்சியாக உணர்வார்கள்.

தம்மை மாற்றிக்கொள்ள விரும்பாது, வெற்றியும், மகிழ்ச்சியுமாகக் காலத்தை ஓட்டிக் கொண்டிருப்பவர்களைப் பார்த்து, `என்னால் மட்டும் ஏனோ எதிலுமே பெயர் போட முடியவில்லையே!’ என்று ஏக்கப் பெருமூச்சு விடுவதால் என்ன பயன்!
நாம் ஒவ்வொருவரும் இறுதி மூச்சு விடும்வரை நமக்குப் பிடித்த ஏதாவது ஒரு நல்ல வழியில் வாழ்ந்தால்தான் வாழ்க்கை இனிமையாக இருக்கும். இல்லாவிட்டால் சுமைதான் –நமக்கும், பிறருக்கும்.

`நாற்பது வயதுக்குமேல் அழகாக அலங்கரித்துக்கொள்வதைப்பற்றி நீங்கள் என்ன நினைக்கிறர்கள்?’ என்று 65 வயது ஜெர்மனி நாட்டுப் பெண்மணி ஒருவரைக் கேட்டேன், முன்பு ஒரு முறை. உலகளாவிய நிலையில், மிகப் பெரிய உத்தியோகம் வகித்து வந்தவர் அவர்.

யோசிக்காமல் பதிலளித்தார்: `காலையில் என்னையே கண்ணாடியில் பார்த்துக்கொள்ளும்போது, ஒரு அழகான, இளமையான முகத்தைப் பார்க்கத்தான் விரும்புகிறேன்!’

சிலரின் வெற்றியின் ரகசியம் இதுதான் — தன்னம்பிக்கை, சுயமரியாதை மற்றும் பிறரது ஏச்சுப்பேச்சை அலட்சியம் செய்தல்.

தொடருவோம்

January 11, 2016
“அன்புள்ள அம்மா” (10)

ஸ்ரீ மாதா அமிர்தானந்தமயி சரிதம்

மீ.விசுவநாதன்

நாத்திகம் மாறியது

அந்த நாளும் வந்தது
அந்த வீட்டில் பாகவத
பாராயணம் ஒலித்தது !
அது கேட்டு
அவளின் கால்கள் அங்கே
முந்திக் கொண்டு வந்தது !
கிருஷ்ண நினைவிலே
கரைந்த அவள்
சொன்னதெல்லாம் பலித்தது !
நாத்திகர் ஒருவரை
அருகில் அழைத்தாள் நயந்து !
தந்தாள் அவரிடம்
தண்ணீர் உள்ள பாத்திரத்தை !
அவள் தொட்டாள்
தீர்த்தமானது ! மீண்டும்
அதிலே அவர் கையை
விட்டதும் பாலானது !

உடனே விட்டார்
சுதாமணி மீதிருந்த ஆத்திரத்தை !

நாத்திகர் நின்றார் வியந்து !
அவள் சக்தியைப்
பார்த்துப் பார்த்து பயந்து !

ஆத்திகத்தில் நம்பிக்கை
இல்லாத இன்னொருவரை
அழைத்தாள் !
அதே பாத்திரத்தில்
அவர் கையை விடச் சொன்னாள் !
அவர்கையில் பஞ்சாமிருதம்
அவள் சொன்னாள்
அதுதான் கிருஷ்ணாமிருதம் !

அவருக்கு ஆச்சர்யம்
அவர் உடம்பெல்லாம்
மயிர்க் கூச்சர்யம் !

அன்பையும் நேர்மையையும்
நம்பிக் கைபிடித்தால்
நம்பிக்கை வேர்பிடிக்கும்
நாத்திகம் மறைந்து
ஆத்திகம் ஏர்பிடிக்கும் !

ஆதரவு கேட்டவர்க்கு
ஆருதலானாள்!
பசி என்றோக்கு
அன்ன பூரணியானாள் !
அதனாலே ஊருக்கே
அவளென்றும் வற்றாத
ஆன்மிக ஊருணியானாள் !

அவளொரு தெய்வப்பிறவி

அவளுக்குத் திருமணம் செய்ய
எண்ணினார் தந்தை !
ஜாதகத்தைப் பார்த்ததும்
ஜோதிடர் சொன்னார்,
“அவளுக்கு இல்லை
திருமண சிந்தை !
அவள் ஒரு தெய்வப்பிறவி
சுயம்புவான துறவி !”

எப்பொழுதும் போலவே
அவள் இயல்பாய் இருந்தாள்
சொப்பன வாழ்வின்
சொகுசை மறந்தாள் !

ஊருக்கு வெளியில்
ஒரு ஆலமரத்தடியில்
கூடியிருந்த பக்தர்கள் முன்பு
பாட்டுப் பாடினாள் !
மழைவரும் நேரம்
தன்னை மறந்து
கூட்டுப் பிராத்தனை செய்தாள் !
எங்கும் பெய்தமழை
அங்கு அவர்களைச் சுற்றி
மட்டும் பெய்யாமல்
அருள் பெய்தாள் !

எல்லோருக்குமே அம்மாவானாள்

நாளுக்கு நாள்
பக்தர் கூட்டம் கூடியது !
அதுகண்டு தந்தையின்
முகம் வாடியது !
“நீ ஏன் இப்படி
கஷ்டப்படுகிறாய்” என்றார் !
“கஷ்டப் படுபவர்களின்
அகம் தேடியது” என்றாள் !

அப்பா சுகுணானந்தரிடம்
வீட்டுத் தொழுவத்தில் இடம்
கேட்டுப் பெற்றாள் பூசைக்கு !
அப்பாவி மக்கள்
நல்வாழ்வு காணும் ஆசைக்கு !
பசுவைத் தொட்டுக் கொண்டே
பாலகிருஷ்ண
சிசுவின் மீது மெட்டுப் போட்டு
ஆனந்தக் களியாடினாள் !
பக்தர்கள் மனத்தை
ஆகாய வெளியாக்கினாள் !

……(நம்மோடு இன்னும் தொடர்வாள் அம்மா)

January 11, 2016
ஓவியக்கவி கலில் கிப்ரான் கவிதைகள் – 46

–சி. ஜெயபாரதன்.

(1883-1931)

ஓவியக்கவி கலில் கிப்ரான் கவிதைகள்

மூலம் : கலில் கிப்ரான்

தமிழாக்கம் : சி. ஜெயபாரதன், கனடா

“நீதி மன்றங்களுக்குச் சென்று நேர்மையற்றுக் கைக்கூலி வாங்கிப் பொய்ச் சாட்சி கூறும் மனிதரைப் பார் ! பூனை எலியுடன் விளையாடுவது போல் எப்படி எளிய மனிதரின் உள்ளத்தையும், சிந்தனைகளையும் தம் வசம் வளைக்கிறார் என்பதைப் பார் ! பொய்யும் புரட்டும், சூதும், வஞ்சகமும் உள்ள செல்வந்தர் இல்லத்துக்குச் சென்று பார்”
கலில் கிப்ரான். (Decayed Teeth)
___________________

நித்திய ஞானி
___________________

பூமிக்கு எதிரி பல்லடுக்குத்
தளத்தின் கீழ்
ஒளிந்திருக்கும் மனிதனே !
ஈதர் ஆவிக் கிடையே உள்ளவன் !
அழுதிடும் அன்னையர் அலறலில்
பசித்திடும் மதலையர் குரல்தனில்
பங்கெடுப்பது பூமி !
தனிமச் சிதைப்பும்
மனித அற்பமும் எண்ணும் !
நேற்றைய தினம்
இங்கெல்லாம் குழந்தைகள்
நிம்மதி யாய்த் தூங்கியதை
நினைத்துக் கொள்ளும் !
இல்லமற்று இன்று நகரங்களில்
அல்ல லோடு மாந்தர்
அழுது கொண்டு நிற்பதை
அப்பால் வெறித்து நோக்குவதை
அவ நம்பிக்கை யோடு
கவலை யோடு,
போர் வாழ்வில்
புரண்டு வாழ்வதைக் கண்டு
பூமி மனம் உடையும் !
___________________

நின்று கொண்டி ருக்கும் ஆத்மா
நிலையற்ற சிந்தனையில்
கொன்றழிக்கும் கவலை யோடு
உலக சக்தி களை
ஆட்டிப் படைக்கும்
தெய்வ நியதியின் நீதியைச்
சந்தேகித்து
பூமி முணு முணுக்கும் :
“இந்தப் படைப்புக்களை எல்லாம்
உந்தச் செய்யு மந்த
நித்திய ஞானி
சீறிச் சினந்து
சீரழிவை விளை விக்கும் !
அத்துடன் எதிர் பாரா
பேரெழிலும் உருவாக்கும் !
___________________

January 11, 2016
படக்கவிதைப் போட்டி 46-இன் முடிவுகள்

-மேகலா இராமமூர்த்தி

திரு. வாசகன் பாலசூரியனின் வண்ணப்படத்தை இவ்வாரத்தின் போட்டிப்படமாகத் தேர்வுசெய்து தந்திருப்பவர் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன். இவ்விருவருக்கும் வல்லமை இதழின் நன்றி!

’யாரிடமும் பூசலின்றிப் பிணக்கின்றி ஊசலாடி மகிழ்ந்திருந்தால் வாழ்வே பூக்கோலந்தான்!’ என்று தன் புன்னகையால் புரியவைக்கின்றான் இந்தப் பாலகன். கள்ளமற்ற அவன் காந்தப்புன்னகை உள்ளம் தொடுகின்றது!

அடுத்து, போட்டிக்கு வந்துள்ள கவிதைகளைக் கண்ணுறுவோம் வாருங்கள்!

***

ஊனமான பொம்மையும், உடைந்த ஊஞ்சலுங்கூட வஞ்சமிலா நெஞ்சு படைத்த பிஞ்சுக்குழந்தைகட்குக் குதூகலத்தையும் மகிழ்வையும் தந்துவிடுகின்றன. பெரியவராகும்போதுதான் ’போதும்’ எனும் பெருந்தனம் நம்மிடமிருந்து காணாமல் போய்விடுகின்றது என்று வருந்துகின்றார் திரு. செண்பக ஜெகதீசன்.

வஞ்சித்துவிட்டாலும் வறுமை,
வஞ்சம் கொஞ்சமுமில்லை
பிஞ்சுகள் நெஞ்சினிலே,
அதனால்
பஞ்சமில்லை சிரிப்புக்கு..

ஊனமான பொம்மையிலும்,
உடைந்த ஊஞ்சலிலும்
கிடைத்துவிடுகிறது பேரானந்தம்..

அடைத்துவிடுகிறது இந்த
அமுத நீரூற்று,
போதுமென்ற பெருந்தனம்
போய்விடுகிறது,
பிள்ளை
பெரியவன் ஆனதும்..

மாறுவானா மனிதன்
மழலையரைப் பார்த்தாவது…!

***

கற்பனைச் சிறகில் விரிகின்ற புதுஉலகினை விதைப்பது இச்சிறுவனின் முறுவலோ? என்று வியக்கிறார் திரு. கவிஜி.

இல்லாத தேசத்தில்
இரை தேடும்
பறவையொன்றின்
தொலைந்து போன
ஒரு பாதை
நீண்டு கிடப்பதான
கற்பனையில்
உதிர்க்கின்ற ஒரு இறகு
புது உலகை
விதைக்கத் தொடங்குகிறது,
அது இவன் புன்னகையாகவும்
இருக்கலாம்…

***

ஆணி கழற்றிய பலகையில் ஆணிக்கையாய் ஆடுகின்றான் சிறுவன். இந்தப் பலகையின் பழுதை நீக்கி அதனைக் குழந்தைகள் ஆடுதற்கேற்ற ஆசனமாய் மாற்றிடல் வேண்டும் என்று கோரிக்கை வைக்கின்றார் திருமிகு. வேதா இலங்காதிலகம்.

நாணிட வேண்டிய விடயம்
பேணிப் பாதுகாக்காத விளையாட்டிடம்!
ஆணி களட்டிய பலகையது
ஆணிக்கையாகத் துணிந்து ஆசனமாக்கியது.

பட சட்டத்தின் நடுவில்
அடக்கிக் கட்டி, அமர்ந்து
படபடப்பின்றி ஆடுகிறான் ஊஞ்சல்!
அடடா! ஏழைக்கேற்ற எள்ளுருண்டை!

விழுந்திடாது பிடிக்கும் உறுதியும்
வழுகும் பலகையைக் கால்களால்
அழுத்தும் சாதுரியச் சிரிப்பும்
வாழ்வின் சவாலின் ஏற்பு!

துள்ளும் மகிழ்வில் ஆடுகிறான்
உள்ளதை வள்ளிசாக அனுபவித்துப்
பிள்ளைகள் மகிழ்வாரவர் குணமது!
அள்ளும் வாழ்க்கைப் பாடமது!

பிள்ளைகள் விளையாட்டிடத்தை வளமாக
பிரிதியுடன் பராமரித்தல் அவசியம்
பிற்போக்கு நிலைமை மாறட்டும்!
பிரதான கடமை மேலிடத்திற்கு!

(ஆணிக்கை – உறுதி)

***

சிறுவனின் ஊ(ஞ்)சலாட்டம் உணர்த்திடும் வாழ்வியல் உண்மைகளைப் பாங்குறப் பதிவுசெய்திருக்கும் கவிஞர்களுக்குப் பாராட்டுக்கள்!

இனி, இவ்வாரத்தின் சிறந்த கவிதையாய்த் தெரிவாகியிருப்பது எது, அதன் ஆசிரியர் யார் என்று காண்போம்!

கள்ளமற்ற வெள்ளை உள்ளம் பிள்ளைகளுடையது. அவர்களால் மட்டுமே சிறிய விஷயங்களில்கூடப் பெரிய இன்பத்தைக் காணமுடிகின்றது. தம் மனத்தைத் துயரின்றிப் பேணமுடிகின்றது. இந்தக்கலையை பெரியவர்களும் கற்றால் ’பேராசை’ எனும் வார்த்தையே வையத்தில் வழக்கொழிந்து போகுமே!

”இதோ ஒரு சிறுவன் உடைந்த ஆசனத்தையும் அரியாசனமாய் எண்ணி ஆடுகின்றான்! முகத்தில் மகிழ்ச்சியோ கரைபுரண்டு ஓடுகின்றது. அவன் ஊசலை உந்தி முன்னேறுவது போலவே நாமும் வாழ்வில் உந்துதலோடு முயன்றால் அனைவரையும் முந்தலாம் என்கிறது ஒரு கவிதை; தருகிறது மனத் தெளிவை!

போகி யால்
யாரோ போக்கிய
உடைந்த ஊஞ்சல்
பழைய இரும்பு
எடுப்பவனிடம் சிக்கப்
பழசானாலும்
புதிதாய்த் தெரிந்தது
அவன் மகனுக்கு
அடுத்த நாளே அதை
அரசு கட்டிலாக்கி
அரியணனை ஏறினான்
ஆனந்தமாய் வீசிவீசிஆட
தூசியாய் தெரிந்தது துயரம்
மகனின் உல்லாசம்
பெற்றவனையும்
தொற்றிக்கொண்டது
சுடுபட்ட வாழ்க்கை
விடு பட்டதுபோல்
ஊஞ்சல் ஆட்டம்
உல்லாசமானதுதான்
சிதறிக்கிடக்கும்
சீர் கெட்டவாழ்க்கை
உதறி உந்தி உந்தி ஆடி
உவகை அடைந்தான்
கிடைப்பதைக் கொண்டு
திருப்திப்படும் வாழ்க்கை
புரிந்து சகித்து
பொருந்தியே வாழும்
பாடம் எல்லோருக்கும்
பொருந்தும்தானே!

’கிடைப்பதில் நிறைவாய் வாழ்வதே வாழ்க்கை’ என்று முத்தாய்ப்பாய்த் தன் கவிதையை முடித்திருக்கும் திருமிகு. சரஸ்வதி ராசேந்திரனை இவ்வாரத்தின் சிறந்த கவிஞராய் அறிவிக்கின்றேன்.

***

’ஆண்டவன் ஆட்டுவிக்கும் ஊஞ்சலே இம்மானுட வாழ்க்கை; இதனை ஆடும் வகையில் ஆடினால் வாழ்வு பொருள்படும்; இல்லையேல் வாழ்வே இருள்படும்’ எனும் தத்துவ முத்தைத் தந்திருக்கும் கவிதையொன்று சிந்தை கவர்ந்தது.

இருப்பதைக் கொண்டு
மகிழ்வுடன் இங்கு
இருப்பதே வாழ்க்கை…..இதைக்
கருத்துடன் கூறும்
சிறுவனின் சிறுமுகம்
சிந்தனை நோக்கை.

எத்தனை துயரம்
இடரெது வரினும்
இலேசாய்க் கொண்டால்…மனமே
அத்தனைத் துயரையும்
அழிந்திடச் செய்யும்
அகத்தில் குழந்தை ஆனால்.

ஊஞ்சல் என்பது
ஆடிடும் வாழ்க்கை
யார்க்கும் எளிதாய் அமைவது…அதை
ஆடும் விதத்தில்
ஆடி மகிழ்ந்தால்
அற்புதமாகும் வாழ்வது.

சிதைந்த ஊஞ்சல்
அறுந்த சங்கிலி
சிந்தையில் காட்டும் பாடமிது…இந்தத்
திறந்த வெளியே
பாடம் புகட்டும்
சிறந்த பள்ளிக் கூடமிது.

பூக்கள் மலரும்
குழந்தையின் சிரிப்பில்
பூங்காவாகும் நாட்கள்….கவிப்
பாக்களில் வளரும்
பருவங்கள் தோறும்
வாழ்க்கைப் புத்தகத் தாள்கள்.

எல்லாம் அறிவோம்
எதுவும் அறியோம்
என்பது தானிங்கு வாடிக்கை….இதை
எண்ணி ஒவ்வொரு
மணித்துளிஂவாழ்ந்தால்
வாழ்க்கை வாண வேடிக்கை.

’ஊஞ்சலில் அமர்ந்து வாழ்வியலை உபதேசிக்கின்றான் இந்தச்சிறுவன். இவன் மனநிலையை நாமும் பெற்றால், வாழ்வே வண்ணம் சிந்தும் வாணவேடிக்கைதான்’ எனும் திரு. இளவல் ஹரிஹரனின் கவிதை பாராட்டுக்குரியதாய்த் தேர்வுபெறுகின்றது.

பங்குபெற்ற அனைவருக்கும் என் நன்றி!

January 11, 2016
களவு போகிறோமா?

பவள சங்கரி

தலையங்கம்

சமீபத்தில் மிகவும் சுவாரசியமான ஒரு கதை படித்தேன். அன்று சனிக்கிழமை. 12 மணியளவில் ஒரு வீட்டின் கதவைத் தட்டி தபால்காரர் ஒரு தபாலைக் கொடுக்கிறார். அந்த வீட்டு அம்மணி அதைப் பிரித்துப் பார்க்கிறார். அதில் அன்று வெளியான ஒரு பிரபலமான திரைப்படத்திற்கு சில நுழைவுச் சீட்டுகள் மற்றும் குடும்பத்துடன் சென்று ஒரு பெரிய உணவு விடுதியில் உணவருந்த பரிசுக் கூப்பன்களும் இருந்தன. இதை அனுப்பிய நான் யார் என்று தெரிகிறதா என்ற வாசகத்துடன் வாழ்த்துக்களும் இருந்த அதைக் கண்ட அந்த அம்மணிக்கு இன்ப அதிர்ச்சி. கணவனிடம் உடனே சென்று காண்பிக்க அவரும் சற்றே யோசிக்க, பின் குடும்பமே சேர்ந்து இந்தப் பரிசுகளை அனுபவித்துவிட்டு பின்பு இதைப்பற்றி யோசிக்கலாம் என்ற முடிவிற்கு வந்தவர்களாக மகிழ்ச்சியுடன் கிளம்பிச் சென்று ஆனந்தமாக திரைப்படமும் கண்டு களித்து, உணவு விடுதியிலும் சென்று மனமார உணவருந்திவிட்டு வீடு வந்து சேர்ந்தால், அங்கு பூட்டைத் திறக்க வேண்டிய வேலை கூட இல்லாமல் வீடு பறக்க திறந்திருந்ததோடு வீட்டிலுள்ள அனைத்து விலையுயர்ந்த பொருட்களும் காணாமல் போயிருந்தன. மேசையில் கொட்டை எழுத்தில் ஒரு வாசகமும் இருந்ததாம். ‘பரிசு வழங்கிய நான் யாரென்று இப்போது தெரிந்ததா’ என்று. இந்தக் கதையைப் படித்தவுடன் எனக்குத் தோன்றியது இன்றைய நம் பரிதாப நிலைதான்.

தைப்பொங்கலுக்கு 100 ரூபாய் பணம், ஒரு கிலோ சக்கரை, கரும்பு 2 அடி துண்டு, பச்சரிசி என தமிழக அரசு வழங்கும் இலவசங்களைப் பெற முண்டியடிக்கும் மக்கள் வெள்ளம். இது போன்ற இலவசத் திட்டங்களுக்காக அரசாங்கத்தால் ஆண்டொன்றிற்கு ரூ. 20,000 கோடி செலவிடப்படுகிறது. கீழ்தட்டு மக்கள் வளம் பெறுவதற்காகவே இந்த இலவசங்களை அள்ளி வழங்குவதாக அறிவிப்புகளும் வந்த வண்ணம் உள்ளன. எதிர்கட்சிகளும் இதற்கு விதி விலக்கு அல்ல. இலவசங்கள் எனும் கையூட்டுகளைக் கொடுத்து மக்களின் வாக்குகளையும், அவர்தம் உரிமைகளையும் கவருகிறார்கள். ஆண்டொன்றிற்கு சுமாராக 20,000 கோடி ரூபாய் என்றால் ஐந்தாண்டுகளில் ஒரு இலட்சம் கோடி ரூபாய் செலவிடப்படுகிறது. இவர்கள் இலவசமாக வழங்கக்கூடிய பொருட்கள் பெரும்பாலும் தரமற்றவையாக இருப்பதும், அவைகள் பெரும்பாலும் பழுது பார்க்கும் மையங்களில் இருப்பதே கண்கூடாகக் காணப்படுகிறது. அதாவது இந்த ஒரு இலட்சம் கோடி ரூபாயானது தண்ணீர்ல் கரைந்த பெருங்காயமாக காணாமல் போய்க்கொண்டிருக்கிறது. இந்த நேரத்தில் திரு எம்.ஜி.ஆர் முதலமைச்சராக இருந்தபோது துவக்கப்பட்ட காகித ஆலை நிறுவனம் குறித்து சிந்திக்காமல் இருக்க முடியவில்லை. இந்த காகித ஆலை இன்று வளர்ந்தோங்கி இந்தியாவின் ஒரு தலை சிறந்த நிறுவனமாக மிளிர்வதைக் காணமுடிகிறது. இதை உருவாக்க சுமாராக 500 கோடி ரூபாய் செலவிடப்பட்டு இன்றும் நேரடியாகவும், மறைமுகமாகவும் பல ஆயிரம் பேருக்கு வேலை வாய்ப்பும், வழங்கி செழிப்புடன் அன்றாடம் இலாபத்தை ஈட்டிக்கொண்டிருக்கின்றது. இத்தனை ஆண்டுகளில் இந்த ஒரு இலட்சம் கோடி ரூபாயில் இது போன்று எத்தனை ஆலைகளை நிறுவி வேலை வாய்ப்பை ஏற்படுத்தியிருக்கலாம். இன்றைய தமிழ்நாட்டின் பொருளாதாரம் தடுமாறாமல் செழிப்புடன் இருக்க உத்திரவாதமாகியிருக்கலாம். இலாபத்தை ஈட்டித் தரும் வேலை வாய்ப்பைப் பெருக்கி மக்கள் வாழ்வில் நிரந்தர ஒளியேற்றியிருக்க வழியமைத்திருக்கலாம். ஒரு வேளை இலவசங்கள் வழங்கியேத் தீர வேண்டும் என்ற கட்டாயம் இருக்கும்பட்சத்தில் இலவசப் பொருட்கள் தயாரிப்பை அந்நிய நிறுவனங்களுக்கு அளிக்காமல், பல ஆண்டுகளுக்கு முன்பு துவக்கப்பட்ட மின்னணுசார் துறை மூலமாக உற்பத்தி செய்திருந்தால் பல ஆயிரம் படித்த பட்டதாரிகளுக்கு வேலை வாய்ப்புகளை உருவாக்கியிருக்கலாம் . இந்த வாய்ப்பை அந்நிய நிறுவனங்களுக்கு கொடுக்கப்பட்டதால் ஏற்பட்ட இழப்பை கருத்தில் கொள்ளவேண்டும். இதனால் தனியார் நிறுவனங்களே தரமற்ற பொருட்களை வழங்கி கொள்ளை இலாபம் ஈட்டியுள்ளனர். நாட்டின் பொருளாதாரத்தில் உண்மையான அக்கறையுடனும், தனிப்பட்ட மக்களின் பொருளாதார மேம்பாட்டிற்காகவும் சூலுறைத்து மேம்படுத்தக்கூடியத் திட்டங்களை எந்தக் கட்சியினரும் அறிவிக்காதது வேதனைக்குரியதாகும்.

இன்றைக்கு ஆறு ஆண்டுகளுக்கு முன்பு, அதாவது பிப்ரவரி 24ஆம் தேதி 2009ஆம் ஆண்டில் பதவியேற்ற பின்பு தம்முடைய முதல் உரையில் அமெரிக்க அதிபர் ஒபாமா, அந்த காலகட்டத்தில் அமெரிக்க பொருளாதாரம் மிகவும் நலிவடைந்த நிலையில் இருந்ததையும், வியாபாரம், வேலை வாய்ப்பு, தொழில்துறை என அனைத்தும் முடங்கிக் கிடந்த நிலையை எடுத்துக்கூறி, தம் நாட்டை பலம் பொருந்திய நாடாக உருவாக்கி, முன்னேற்றப் பாதைக்கு இட்டுச் செல்வதாக சூலுறைத்ததை, இன்று பலவற்றை சாதித்துக் காட்டியதை இன்று பட்டியலிட்டுள்ளதைக் காணும்போது நமக்கும் இது போன்ற சாதனைப் பட்டியலை எடுத்துரைக்கும் தலைவர்கள் அமையவில்லையோ என்று ஏக்கம் கொள்ளத்தான் செய்கிறது.

January 10, 2016
கேசவ் வண்ணம் – கிரேசி எண்ணம்

“ஆண்டாள் -25” ….
————————————–

ஒருத்தி மகனை ஒருபத்து மூன்றில்
இருத்தியானாள் வைகுண்ட இல்லாள், -கருத்தவன்
ஆரா அமுதன் அடைந்து மணத்தானே,
நாரவள் பூநார ணன் ….கிரேசி மோகன்….

January 10, 2016
மார்கழி மணாளன் – 25 கபிஸ்தலம் கஜேந்திர வரதப் பெருமாள்

க. பாலசுப்பிரமணியன்

சிரஞ்சீவியானாலும் சிரம் தாழ்த்தி வாழ்ந்தான்

சிந்தையிலே நின்றான் அனுமனுக்கு ஸ்ரீராமன்

சிதறாத அறிவுடனே சீதையைக் கண்டவன்

சிலையாகிக் காலடியில் அன்போடு அமர்ந்தான் !

வானுயரப் பறந்தாலும் பணிவுக்கு இலக்கணமே

வில்லோனின் உள்ளமதை வென்றிட்ட வித்தகனே

வைதேகி ராமனின் அருள்பெற்றது கபிஸ்தலமே

வருகின்ற துயர்நீக்கும் வள்ளல்களின் மன்னவனே !

மாமுனியே மனம்நொந்து மதக்களிராகச் சாபமிட

மன்னவன் மண்டியிட மாமுனி செப்பிட்டான்

“மாதவனை மனம்நிறுத்தி மலர்கள் தூவிடுவாய்

மாமன்னா! மாலனால் பெற்றுவிடுவாய் சிறப்பு !”

பூபாள நேரத்தில் பூப்பறிக்க வந்தது யானை

புலனறியா வலியினிலே நோக்கியது மண்ணை

காலிழுத்து உயிர்பறிக்க முனைந்தது முதலை

காத்திடக் கண்ணனை அழைத்தது நல்வினை !

அடியவர் குரலுக்கு அடியவன் ஆண்டவன்

அன்பினில் அடங்கிய ஆதவன் மாதவன்

கருடனில் ஏறினான் கருணையைப் பகிர்ந்திட

கால்களுக்கு கருணை கஜேந்திரனுக்கு மோட்சம் !

ஆனைக்கும் கபிக்கும் கிடைத்தது ஆண்டவன் காட்சி

அருந்தவ முனிவர்க்கும் கிடைக்காத அருளின் மாட்சி

அன்பினால் இணைந்திடும் உறவுகளுக்கு அவன் சாட்சி

அன்னையாய் தந்தையாய் நண்பனாய் நாரணன் ஆட்சி !

சூதில்லா மனமும் சுவை ஞானப்பொருளும்

மாசில்லாக் காற்றும் மங்களமும் வாழ்மரபும்

மந்தாரப் புன்னகையும் மடியாத ஈகையும்

மங்காமல் தந்தருள்வாய் மார்கழி மணாளனே !

January 10, 2016
கலைச் சாகரம் (கலைக் கடல்) விருது பெற்றமைக்கு வல்லமையின் வாழ்த்துகள் ஐயா!

30.12.2015 புதன்கிழமை பிற்பகல் 1330 மணி

சாவகச்சேரி, ஒல்லாந்தர் வீதி, ஐங்கரன் மண்டபம்.
தென்மராட்சிக் கலாச்சாரப் பேரவை, தென்மராட்சிப் பிரதேச சபை இணைந்து வழங்கிய பண்பாட்டுப் பெருவிழா.
தலைவர் பிரதேசச் செயலர், அஞ்சலிதேவி சாந்தசீலன்.

முதன்மை விருந்தினர் செ. சீனிவாசன், தலைவர் கூட்டுறவு ஊழியர் ஆணக்குழு.
தென்பொழில் மலர் வெளியீடு

கலை நிகழச்சிகள்.

கலைச் சாகரம் (கலைக் கடல்) விருதுகள் ஐவருக்கு வழங்கல்.
இலக்கியத்துக்கான விருது எனக்கு. யசோதரா (நடனம்), செல்லத்துரை (ஆர்மோனியம்), மாதுசிரோன்மணி (இசை), தங்கவேலு (நாதசுவரம்)

January 10, 2016