Month: May 2016

அருங்காட்சியகம் ஓர் அறிவுக் கருவூலம் – 62

கெல்ட்டன் அருங்காட்சியகம், ஹோஹ்டோர்ஃப், ஜெர்மனி

முனைவர்.சுபாஷிணி

ஏறக்குறைய இன்றைக்கு 2500 ஆயிரம் ஆண்டுகளுக்கு முன்னர் ஜெர்மனியின் பாடன் ஊர்ட்டென்பெர்க் எனும் மாநிலத்தில் உள்ள ஹோஹ்டோர்ஃப், எனும் பகுதியில் இறந்த தங்களின் மன்னனுக்காக கெல்ட் மக்கள் குன்று ஒன்றை உருவாக்கி அதில் நினைவாலயம் ஒன்றை உருவாக்கினார்கள். நாளடைவில் அப்பகுதியில் பல்வேறு பூகோள நில மாற்றங்களினாலும் விவசாயம் தொடர்பான நடவடிக்கைகளினாலும் அந்தக் குன்று சற்றே தாழ்நிலமாக வடிவம் பெற்றது. 1968ம் ஆண்டில் ஒரு தன்னார்வத் தொண்டூழிய தொல்லியல் ஆய்வாளர் சில வித்தியாசமான கற்களை அப்பகுதியில் கண்டெடுக்கவே, அப்பகுதியைத் தொல்லியல் ஆய்விற்கு உட்படுத்த முயற்சிகள் எடுக்க, அங்கு ஆய்வுகள் தொடங்கின. உயர்தரமான அகழ்வாய்வு முறைகளைப் பயன்படுத்தி இப்பகுதியிலும் அதன் சுற்று வட்டாரப் பகுதிகளிலும் தொல்லியல் துறையினர் மேற்கொண்ட முயற்சிக்குப் பலன் கிடைத்தது.

2500 ஆண்டுகளுக்கு முன்னர் இறந்து போன தம் மன்னனைப் புதைத்து வைத்து அவன் சென்றிருக்கும் மறு உலகத்தில் அவனுக்குத்தேவை எனத் தாம் கருதிய பொருட்களையும் கூடவே வைத்து மிக அழகிய அறை ஒன்றை அந்தக் குன்றிற்குள் அம்மக்கள் உருவாக்கியிருக்கின்றனர். அகழ்வாராய்ச்சியின் போது இறந்த மன்னனுக்காக அம்மக்கள் கட்டிய அறை, அந்த அறையில் அம்மன்னனை அவர்கள் உறங்க வைத்திருந்த தங்கக்கட்டில், அவன் உடலின் மேல் அவர்கள் அணிவித்திருந்த தங்கத்தினாலான அணிகணலன்களான கால் வளையங்கள், கை வளையங்கள் நெற்றிப்பகுதி அலங்காரம் என்பனவற்றோடு அவன் மேற்குலகில் பயணம் செய்வான் என்ற நம்பிக்கையில் அவனுக்காக உயர்தரமான ஒரு தேரும் அவன் நீர் அருந்தும் வகையில் பெரிய தங்கத்தினாலான ஒரு கூஜாவையும் தயாரித்து அந்த அறையில் அம்மக்கள் வைத்திருந்தனர் என்பது இந்த அகழ்வாய்வில் கண்டுபிடிக்கப்பட்டது.

டோனாவ் நதிக்கறையில் கண்டெடுக்கப்பட்ட ஏனைய சில இறந்தோருக்கான ஈமச்சடங்கு நினைவாலயங்களை ஒத்த வடிவிலேயே இந்த கெல்ட் நினைவாலயக் குன்றும் அதில் கிடைத்த ஈமச்சடங்குச் சின்னங்களும் அமைந்திருக்கின்றன, இந்த ஆய்வு ஜெர்மனியில் எந்தெந்த பகுதிகளில் கெல்ட் இன மக்கள் விரிந்து பரந்து வாழ்ந்தனர் என்பதை அடையாளம் காண உதவும் வகையில் இருக்கின்றது என்பது மிக முக்கிய அம்சமாக அமைகின்றது.

மன்னன் புதைக்கபப்ட்ட பகுதியில் அதனைச் சுற்றியுள்ள பகுதிகளில் தொடர்ந்து நிகழ்த்திய அகழ்வாய்வுகளில் அதே பகுதியில் கெல்ட் இன மக்கள் வாழ்ந்ததற்கானத் தடயங்களாக அமையும் பல பொருட்களை அகழ்வாய்வுக் குழுவினர் கண்டெடுத்திருக்கின்றனர். அதில் கெல்ட் சமூகத்தினர் தமது அன்றாட வாழ்க்கை உபயோகத்திற்காகப் பயன்படுத்திய பொருட்கள், இரும்புப் பட்டறை, மண்பாண்டங்கள், குதிரை வண்டிகள், சமையல் அடுப்புகள், சமையல் பாத்திரங்கள், அலங்காரப் பொருட்கள். தொழிற்கருவிகள், போருக்கான கருவிகள் என பலதரப்பட்ட பொருட்கள் கிடைத்துள்ளன. மனித எலும்புக்கூடுகளும் இதில் அடங்கும்.

இந்தப் பொருட்களை எல்லாம் காட்சி வைக்கும் பொருட்டு ஜெர்மனியின் பாடர்ன் ஊர்ட்டெம்பெர்க் மாநிலத்தில் உள்ள ஹோஹ்டோர்ஃப் பகுதியில் ஒரு பிரத்தியேக அருங்காட்சியகத்தை உருவாக்கி, அது 1991ம் ஆண்டு மே மாதம் 25ம் தேதி திறந்து வைக்கப்பட்டது. இந்த அருங்காட்சியகம் கி.மு. 540 வாக்கில் வாழ்ந்து இறந்த அம்மன்னனின் ஈமச்சடங்கு அறை, அவனது முழு உடலின் எலும்புக்கூடு ஆகியவற்றோடு அங்கே கண்டெடுக்கப்பட்ட அனைத்துப் பொருட்களையும் காட்சிக்கு வைத்திருக்கும் ஒர் இடமாகத் திகழ்கின்றது.

அருங்காட்சியகத்தின் உள்ளே பட விவரணைகள் உள்ளன. ஆங்கிலம், டோய்ச் ஆகிய இரு மொழிகளிலும் விளக்கம் வழங்கப்பட்டுள்ளது. முதல் தளத்தில் கெல்ட் சமூகத்து மக்கள் பற்றிய வரலாற்றுத் தகவல்களோடு விரிவான அகழ்வாய்வுப் பணி தொடர்பான செய்திகள் வழங்கப்பட்டுள்ளன. மன்னனின் எலும்புக்கூடும் முதல் தளத்திலேயே காட்சிக்கு வைக்கப்பட்டுள்ளது.

கீழ்தளத்தில் ஒரு தனிப்பகுதியில் மன்னனின் அறை, அவனது தங்கக் கட்டில், அவனது தேர், அவனது அணிகலன்கள், தண்ணீர் கூஜா ஆகியன மிகச்சிறப்பாகவும் பாதுகாப்பாகவும் காட்சிக்கு வைக்கப்பட்டுள்ளன.

இதனைக் கடந்து சென்றால் ஒரு தனி அறை வருகின்றது. அங்கே இந்த அருங்காட்சியகம் பற்றியும் இங்கு படிப்படியாக நிகழ்ந்த தொல்லியல் ஆய்வுகள் பற்றிய விளக்கமும் ஆவணப்படமாக காட்டப்படுகின்றது. பார்வையாளர்கள் இங்கு வந்து அமர்ந்து முழு தகவல்களையும் திரைக்காட்சியாகப் பார்த்து அறிந்து கொள்ள முடியும்.

இப்பகுதியில் நிகழ்ந்த அகழ்வாய்வில் கண்டெடுக்கப்பட்ட முக்கிய சிலை ஒன்றும் இதே அருங்காட்சியகத்தில் உள்ளது. அது ஒரு போர் வீரனின் சிற்பம். இது மிகத் தனித்துவம் வாய்ந்த கெல்ட் இன போர் வீரர்கள், அதிலும் குறிப்பாக ஆல்ப்ஸ் பகுதியை பிரதினிதிக்கும் வகையில் அமைந்த ஒரு மிகப் பெரிய, ஆளுயர சிற்பம்.

இந்த அருங்காட்சியகத்திற்கு வருபவர்கள் கெல்ட் மக்களைப் பற்றி அறிந்து கொள்ள பல தகவல்கள் உள்ளன. புத்தகங்களும் விற்பனைக்குக் கிடைக்கின்றன.

அருங்காட்சியகத்தின் வெளிப்புறத்தில் கெல்ட் மக்களின் பண்டைய வாழ்க்கை முறையை சித்தரிக்கும் மாதிரி குடியிருப்புகளை உருவாக்கியுள்ளனர். இது கெல்ட் மக்களின் பண்டைய இல்ல அமைப்பு, பட்டறை அமைப்பு, விவசாய அமைப்பு ஆகியவற்றைப் பார்வையாளர்களுக்கு விளக்குவதாகவும் அமைகின்றது.

நான் வசிக்கின்ற லியோன்பெர்க் நகரிலிருந்து 27 கி. மீ. தூரத்தில் தான் இந்த அருங்காட்சியகம் அமைந்திருக்கின்றது என்றாலும் இந்த ஆண்டு தான் இதற்கு செல்லும் வாய்ப்பு எனக்கு கிடைத்தது. கெல்ட் இன மக்களைப் பற்றி ஒரு நூலில் வாசித்த போது இந்த நகர் பற்றி தற்செயலாக அறிய வர மேலதிகத் தகவலை இணையத்தில் தேடிய போது இந்த அருங்காட்சியகம் பற்றிய தகவல் எனக்குக் கிடைத்தது. இங்கே நேரில் சென்று இங்குள்ள அரும்பொருட்களை அதிலும் குறிப்பாக இறந்த மன்னனின் ஈமச்சடங்கு அறை, தேர், அவனது தங்கக் கட்டில், அணிகலன்கள் என பார்த்தபோது ஆச்சரியத்தில் மூழ்கினேன்.

அருங்காட்சியகத்தின் முகவரி
Keltenmuseum Hochdorf/Enz
Keltenstraße 2, 71735 Eberdingen.

இப்படித்தான் பக்கத்திலே இருந்தாலும் கூட பல முக்கிய இடங்களை நாம் காணத்தவறுவது என்பது பலருக்கும் நிகழ்ந்திருக்கும். ஆக நமது சுற்றுப்புறத்தில் இருக்கின்ற முக்கிய வரலாற்று முக்கியத்துவம் வாய்ந்த பகுதிகளை தேடி அவற்றைச் சென்று பார்த்து வருவது நமது வரலாற்று அறிவை மேலும் வளர்த்துக் கொள்ள உதவும்.

சரி. அடுத்த பதிவில் ஐரோப்பாவில் உள்ள மேலும் ஒரு அருங்காட்சியகத்தை அறிமுகம் செய்கின்றேன். எந்த ஊரில் உள்ள எந்த அருங்காட்சியகமாக இருக்கும் என்று யோசித்து வையுங்கள்!

May 2, 2016
இலக்கியச்சித்திரம் – இனிய பிள்ளைத்தமிழ் – 17

–மீனாட்சி பாலகணேஷ்

பேரண்ட கடாகப் பரப்பே சிற்றில்!

ஒரு அற்புதக் காட்சி! மூன்றுவயதுக் குழந்தை ஒன்று தன் தந்தையுடன் அவர் நீராடச் சென்றபோது தானும் உடன்சென்றது. குழந்தையைக் குளக்கரையில் இருத்தித் தந்தை நீரில் மூழ்கி நீராடினார். தந்தையைக் காணாத சிறுவன், ‘அம்மையே அப்பா!’ எனவழைத்து வருந்தி அழுதபோது, உலகுக்கே அம்மையும் அப்பனும் ஆகிய இருவரும் – சிவபிரானும் பார்வதி அன்னையும்- அவன்முன்பு தோன்றினர். குழந்தை பசியால் அழுதானோ எனவெண்ணிப் பார்வதியன்னை, தன் முலைப்பாலைத் தங்கக்கிண்ணத்தில் நிறைத்து, அச்சிறுவனுக்குப் புகட்டினாளாம். இக்குழந்தைதான் பிற்காலத்தில் ‘காழிப்பிள்ளையார்’ எனப் புகழ்பெற்ற திருஞானசம்பந்தப்பெருமானாவார். முருகப்பெருமானின் அவதாரம் எனவும் கூறப்படுவார்.

இந்தக்குழந்தைக்கு தன் முலைப்பால் மூலம் அன்னை பார்வதி அருள்ஞானமாகிய வேதங்களின் உட்பொருளைப் புகட்டினாள். வேதங்கள் ’எழுதாமறை’ என்று அறியப்படுவன. இதனையே ‘சுருதி’ எனக் குறிப்பிடுகிறார் புலவர். இந்த எழுதாமறையாகிய வேதங்களை இச்சிறு பாலகனின் வாய்மொழியாக உலகிற்கு அறிவிக்க வேண்டி, அவனுக்கு ஞானப்பால் புகட்டினாள் பார்வதிதேவி. நேராக முலையிலிருந்து ஊட்டாது கிண்ணத்தில் சுரந்து ஊட்டியது எதனால்? இதற்கு அன்னையின் சகிமார் – பணிப்பெண்கள்- கூறும் விளக்கம் பார்வதிக்கே புன்னகையை வரவழைக்கிறது. அவ்வாறு என்னதான் அவர்கள் கூறினராம் தெரியுமா?

“பார்வதி அம்மையே! உனது மலைபோலும் பெரிய முலைகள் சிவபெருமானையே அணைத்துக் குழைத்த வலிமையுடையவை; அவற்றிலிருந்து நேரடியாக இச்சிறுவனுக்குப் பாலருந்துவித்தால் அவனுடைய சிறியவாய் உறுத்தி நோகுமல்லவா? மேலும் உன்கையில் இலங்கும் நகக்குறியானது இப்பாலகனுக்குப் பாலருத்துவிக்கும்போது அவனுடைய சிறுபல்லில்பட்டு குழந்தைக்கு நோகும் என்று எண்ணினாய் போலும். ஆதலினால் தானே உனது இனிய முலைப்பாலைக் கிண்ணத்தில் கறந்து அவனுக்குக் கொடுத்தாய்?” எனக் கனிவுடன் கேட்கின்றனர். அன்னை இச்சொற்களைக் கேட்டுப் புன்னகை புரிகிறாளாம்.

பிஞ்சுக்குழந்தைக்குப் பாலூட்டும் தாயின் அன்புநிறைந்த உள்ளத்தை அழகாக விளக்கும் இனிய பாடல் இது.

‘இவ்வாறான சொற்களைக்கேட்டுப் புன்னகை புரியும் அம்மையே! மகிழ்ச்சிநிறைந்ததும் கூர்மையான அழகிய வேல் போன்றவையுமான விழிகளை உடையவளே! அடியார்களின் பெருவாழ்வாக விளங்குபவளே, நீ எம்மிடம் ஓடோடி வருவாயாக! வளங்கள் கொழிக்கும் குளத்தூர் எனும் பதியில் வளரும் அமுதவல்லியே விரைவில் வருகவே!’ எனத் தாய் அழைப்பதாகக் கற்பனைசெய்து பாடியுள்ளார் புலவர்.

தாயாகிப் பாலகனுக்கு ஞானப்பால் ஊட்டியவளைச் சேயாக்கி அழைத்து பிள்ளைத்தமிழால் பாடி ஏத்துகிறார். பக்தியின் பேரானந்தம் கலந்த ஓர் வெளிப்பாடு இதுவன்றோ?

தெய்வச் சுருதி தமிழ்க்கன்றித் தீட்டா நிலைமைத் தெனவுலகிற்
றெரிக்குங் காழித் திருஞானச் செம்மற் குழவிக் கருண்ஞானம்,
பெய்து குழைக்க வோமுலையாம் பெரிய மலைவா யுறுத்துமென்றோ-
பெருமான் றனையுங் குழைத்தவலிப் பெற்றி யறிந்து தடுத்தோபூங்
கையி லிலகு நகக்குறிபற் கதுவ நோமென் றோதீம்பால்-
கறந்து கொடுத்தா யெனச்சகிமார் கனிந்து பாட நகைமுகிழ்க்கும்
வைவைத் தமைந்த மதர்வேற்கண் வாழ்வே வருக வருகவே –
வளங்கூர் குளந்தைப் பதியமுத வல்லி வருக வருகவே.

(குளத்தூர் அமுதாம்பிகை பிள்ளைத்தமிழ்- வருகைப்பருவம்- சிவஞான சுவாமிகள்)

(சுருதி- எழுதாமறை, வேதம்; )

*****

இமயப்பொருப்பில் ஐயன் சிவபிரான் அமர்ந்திருக்கிறார். அவர் சடையில் அணிந்திருக்கும் கொன்றைமலர் மிக்க நறுமணத்தை அள்ளி வீசுகின்றது. அவர்மகிழும் வண்ணம் அன்னை பார்வதி ‘ஐயன் அளந்தபடி இருநாழி கொண்டு’ முப்பத்திரண்டு அறங்களையும் இயற்றி ‘விளையாடிக் கொண்டிருக்கிறாள்’.

அதென்ன அன்னையின் விளையாட்டு?

‘லீலா க்லுப்த ப்ரஹ்மாண்ட மண்டலா’ என லலிதா சஹஸ்ரநாமத்தில் ஒரு நாமம் பார்வதிதேவி அன்னைக்கு உண்டு. அதன்பொருள்: விளையாட்டாகவே- அனாயாசமாகவே- மிக எளிதாக இவ்வுலகங்கள் அனைத்தையும் படைப்பவள் என்பதுதான் அது. பேரண்டமாகிய இந்த உலகினையே சிற்றில் இழைப்பதாக அவள் பாவனை செய்துகொண்டு இழைத்து, மிக அருமையாக, ஆசையாக, விதம்விதமாக, அழகாகப் படைக்கின்றாள்; பின் படைத்த உலகங்களில் வாழும் உயிர்களுக்கு உணவளிக்க சிறுசோறாக்குகிறாள்- எதனைக்கொண்டு? இருவினைப்பயன்கள்தாம் சிறுசோறெனச் சமைக்கப்படுகின்றன! யாருக்கு இவற்றை அளிக்கிறாள் அன்னையெனும் சிறுமி? இல்லையில்லை – சிறுமியாகிய நம்மன்னை? இவ்வுலகில் உள்ள எண்பத்துநாலாயிரம் கோடிவகை உயிர்களும் அவள் தான்விளையாடச் செய்துவைத்த பாவைகள் தாம். ஆயினும் உயிருள்ள பாவைகள். அவற்றை மலங்கள் எனப்படும் பாவங்கள் (கருமவினைப்பயன்கள்) நாள்தோறும் வாட்டி வருத்தித் துன்பத்தில் ஆழ்த்தியவண்ணம் உள்ளன. அவள் சமைத்து வைத்துள்ள சிறுசோற்றினை அந்தப் பாவைகளுக்கு உண்ணக்கொடுத்து அவற்றின் பசியைப்போக்கி அருளுகிறாள் அவள். இது ஒருநாளல்ல, இரு நாட்களல்ல, பொறுமையாகச் சலிப்பின்றி, கற்பகோடி காலங்களாகப் பாராசக்தி அன்னை எனும் சிறுமி செய்துவரும் விளையாட்டு; இவ்வாறு செய்யும் அவள், பராசக்தி- இங்கு குளத்தூர் அமுதாம்பிகை எனக் குறிப்பிடப்படுபவள்- விளையாடுமிடம் பரமானந்தப் பெருவீடு எனப்படும் உயர்ந்த ஞானப்பெருவெளியாகும். (அதாவது அவளை உணர்ந்து கொண்டவர்களுக்கே அவளுடைய இவ்விளையாடலையும் இக்கண்ணோட்டத்தில் உணர்ந்து போற்றவியலும்).

இவ்வாறெல்லாம் அன்னையை, சிற்றிலிழைக்கும் சிறுமியாகக் கண்டு கொண்டாடியவர், அன்பின் மிகுதியில் தன்னையிழந்து அவளை, “உண்ண உண்ணத் தெவிட்டாத இனிய அமுதமே! உயர்ந்த குன்றின்மேல் விளைகின்ற நறுங்கனி போன்றவளே! பெருக்கெடுத்துக் கொழிக்கும் ஆறுபோலும் கருணை பொழிபவளே! சிறிதும் சலிப்பின்றி எம்மை (இங்கு புலவர் கூறுவது தம்மை மட்டுமல்ல; உயிர்க்குலங்கள் அனைத்தையுமே தான்) என்றென்றும் காத்து எங்கள் வாழ்வாகவே இருப்பவளே! நீ ஓடோடி வருக அம்மையே! குளந்தைப்பதியில் வாழும் அமுதாம்பிகையே, வருக,” எனத் தாயாகமாறி பாசம்மீதூர விளிக்கிறார்.

அனைத்தையுமே இறைவடிவமாகத் தொழும் அடியவர்களுக்குக் குழந்தையும் தெய்வமும் ஒன்றுதான்; ஒன்றில் மற்றொன்றைக் காண்கின்றனர். இரண்டையும் ஒருவடிவாக்கிப் பாடுகின்றனர். பரவசத்தில் ஆடுகின்றனர்; களிப்பெய்தி நிற்கின்றனர். சைவசித்தாந்த நூலுக்கு உரைகண்ட பெரும் தெய்வமுனிவராயிற்றே இதனைப் புனைந்த புலவனார். சித்தாந்த வேதாந்தக் கருத்துக்கள் பாடல்கள்தோறும் பொங்கிப் பிரவகிக்கின்றன. நாமும் பொருளுணர்ந்து பயின்று களிப்போம்.

கடிகொண் டலரு நறுங்கடுக்கைக் கடவுண் மகிழப் பேரண்ட –
கடாகப் பரப்பே சிற்றிலெனக் கருமப் பகுப்பே சிறுசோறாம்,
படிகொண் டுயிராம் பாவைகட்குப் பைதன்மலநோய்ப் பசியிரியப்-
பல்கா லயிற்றி விளையாடிப் பரமானந்தப் பெருவீட்டிற்
குடிகொண் டிருக்குந் தீங்கொம்பே கொள்ளத் தெவிட்டா சுவையமுதே –
குன்றம் பயந்த நறுங்கனியே கொழிக்குங் கருணைப் பெருக்காறே –
மடிகொண் டயரா தெமைப்புரக்கும் வாழ்வே வருக வருகவே –
வளங்கூர் குளந்தைப் பதியமுத வல்லி வருக வருகவே.

(குளத்தூர் அமுதாம்பிகை பிள்ளைத்தமிழ்- வருகைப்பருவம்- சிவஞான சுவாமிகள்)

(கடுக்கை- கொன்றை; பேரண்ட கடாகப்பரப்பு- உருண்டையான இவ்வுலகு; கருமப்பகுப்பு- இருவினைப்பயன்கள்)

தமக்கு விருப்பமான தெய்வங்களின்மீது பிள்ளைத்தமிழ் பாடிவைத்த புலவர் பெருமக்கள் அவர்களை மானிடக் குழந்தைகளாக உருவகித்துக் கொண்டாலும், நம்மையும், நமது வாழ்வையும், வழிநடத்தும் தெய்வங்கள் எனும் பேருண்மை தம் மனதில் நிலைபெற்றமையால், தத்துவ வேதாந்தக் கருத்துக்களையும் ஊடே இழைத்துப் பாடல்களைப் புனைந்தளித்தனர். அந்த வகையில் இலக்கியநயமும் தத்துவக்கருத்துக்களும் கொண்டு மிளிரும் இவ்விரு பாடல்களையும் சிவஞான சுவாமிகள் இயற்றியருளிய குளத்தூர் அமுதாம்பிகை பிள்ளைத்தமிழ் எனும் நூலில் காணலாம். சிவஞான சுவாமிகள் அம்பிகையின் திருவிளையாடல்களில் மனத்தைப் பறிகொடுத்தவர் எனவும், அவளுடைய பிள்ளை விளையாட்டையும் உலகில் உயிர்கள் அனுபவிக்கும் கருமப்பயன்களாகக் கண்டுணர்கிறார் எனவும் அறியலாம். திருவாவடுதுறை ஆதீனத்தின் ஒரு புலவரான இவர் சைவசித்தாந்தத்துக்கு அடிப்படை நூலான சிவஞானபோதத்துக்கு ’மாபாடியம்’ எனும் விரிவுரை எழுதியுள்ளார். கலைசைச் செங்கழுநீர் விநாயகர் பிள்ளைத்தமிழ் எனும் நூலினையும் இயற்றியருளியுள்ளார்.

இன்னும் தொடர்ந்து இதுபோலும் பாடல்களைப் படித்து மகிழலாம்.

***

மீனாட்சி க. (மீனாட்சி பாலகணேஷ்)
{முனைவர் பட்ட ஆய்வாளர், தமிழ்த்துறை,
கற்பகம் பல்கலைக் கழகம், கோவை,
நெறியாளர்: முனைவர் ப. தமிழரசி,
தமிழ்த்துறைத் தலைவர்}

May 2, 2016
நலம் …… நலமறிய ஆவல்! (2)

நிர்மலா ராகவன்

படிக்க மட்டும்தானா கல்லூரி?

(நான் கோலாலம்பூரிலுள்ள ஒரு கல்லூரியில் தமிழ்ச் சங்க நிகழ்ச்சியில் உரையாற்றி முடிந்ததும் என்னிடம் ஒரு மாணவி பகிர்ந்துகொண்டது).

மாணவியின் வருத்தம்: என் தாய் அதிகப் படிப்பறிவு இல்லாதவர். கல்லூரியில் பாடங்கள் முடிந்ததும், எந்த நிகழ்ச்சியிலும், விளையாட்டிலும் கலந்துகொள்ளாது, உடனே வீட்டுக்கு வந்துவிட வேண்டும் என்று உத்தரவு போட்டிருக்கிறார். இதனால் பிற மாணவிகளின் கேலிக்கு ஆளாகிறேன்.
அலசல்: திரைப்படங்களில் கல்லூரி மாணவ மாணவிகள் அடிக்கும் கொட்டத்தைப் பார்த்து பயந்திருக்கவேண்டும் உங்கள் தாய். ஆண்களுடன் இளம்பெண்கள் பேசிப் பழகினாலே காதல் பிறந்துவிடும், இல்லையேல் தகாத உறவு ஏற்பட்டுவிடும் என்று நினைத்திருக்கிறார்கள்.
ஆண்-பெண் கவர்ச்சி இளமையில் மட்டுமல்ல, வேறு எந்த வயதிலும் ஏற்படலாம். இது இயற்கை. இது புரிந்து, மனதைக் கட்டுப்படுத்தத் தெரிந்திருக்க வேண்டுவது அவசியம்.

`அம்மாவுக்கு கல்லூரியைப்பற்றிச் சொன்னால் என்ன புரியும்!’ என்ற அலட்சியப்போக்கு இல்லாது, ஒவ்வொரு நாளும் தன்னை மகிழ்வித்த, அல்லது பாதித்த சமாசாரங்களைப் பகிர்ந்துகொள்ளலாம். (உதாரணம்: ஒரு பதின்ம வயதுப்பெண்ணுடன் படிக்கும் பையன்கள், `வாவ்! உன் காலெல்லாம் எவ்வளவு முடி!’ என்று வியந்து பாராட்ட, அவளுக்கோ ஒரே அவமானம். பையன்களுக்குப் பெருமையாகத் தோன்றுவது பெண்களுக்குக் கேவலமாகப்படும். தாயுடன் இதைப் பகிர்ந்துகொண்டால், உடலில் தேவையற்ற ரோமத்தை நீக்கும் வழியைச் சொல்லித்தருவாரே!)
நான் அந்த மாணவியிடம் கூறியது: `நீ உண்மையாக நடந்துகொள்கிறாய் என்ற நம்பிக்கையை ஏற்படுத்து. `தமிழ்ப்பெண்கள் உத்தியோகத்தில் படும் பாடு’ என்பதுபோல் நான் பேசியது உனக்கு உபயோகமாக இருந்ததா? அதைப் போய்ச்சொல்லு!’

`நான் இன்னிக்கே கடைக்குப் போய் நாலு புடவை வாங்கிக்கப்போறேன்!’ என்றாள் அப்பெண். (நான் எப்போதும் புடவையே உடுத்துவதை உத்தியோகம் பார்த்த இடத்தில் சில அறிவிலிகள் கேலி செய்வதாகக் கூறியிருந்தேன்).

மேலும் கேட்டேன்: `கல்லூரியில் நடப்பதை அம்மாகிட்டே சொல்வியா?’

அவள் ஆச்சரியத்துடன் என்னைப் பார்த்தாள். மறுத்துத் தலையாட்டினாள்.

`சொல்லணும்,’ என்றேன். `இன்னிக்கு நான் வந்து பேசினது, அதிலே ஒனக்குப் பிடிச்சது, பிடிக்காதது — இப்படி’.

அன்று சனிக்கிழமை. பாடங்கள் கிடையாது. இருந்தாலும், தோழி ஒருத்தி வற்புறுத்தி அவளை அழைத்து வந்திருந்தாள். `தமிழ்ச்சங்கமும், விளையாட்டுப்போட்டிகளும் உன்னைப் போன்றவர்களுக்குத்தானே! நீயே கலந்து கொள்ளாவிட்டால் எப்படி?’

அவள் முகம் மலர்ந்தது. `இன்னிக்கு அம்மாகிட்டே எல்லாத்தையும் சொல்லப்போறேன்!’ என்று விடைபெற்றுக்கொண்டாள்.

தொடருவோம்

May 2, 2016
கற்றல் ஒரு ஆற்றல் 26
க. பாலசுப்பிரமணியன்

பேசும் திறன் – சில பார்வைகள்

பல நேரங்களில் நாம் மற்றவர்களுடன் தனியாகவோ அல்லது ஒரு அமைப்பாகவோ அல்லது கூட்டமாகவோ பேசிக்கொண்டிருக்கும் பொழுது கீழ்கண்டவைகளை நாம் கவனித்திருக்கலாம்

1.. ஒருவர் பேசும் பொழுது மற்றவர் குறுக்கிடுதல்
1. ஒருவர் பேசுவதை உடன் மறுத்துப் பேசுதல்
2. ஒருவர் பேசுவதை முழுதும் கேட்காமலேயே பேசத் துடித்தல்
3. ஒருவரோடு பேசும்பொழுது தேவையில்லாமல் குரலை உயர்த்திப் பேசுதல்
4. ஒருவரோடு பேசும்பொழுது கோபத்தோடு பதிலளித்தல்
5. ஒருவர் பேசியதை நிதர்சனமாக தரம் குறைத்தல்
6. ஒருவர் பேசியதையே மீண்டும் திருப்பிச் சொல்லுதல்
7. மற்றவர்களைப் பேசவிடாமல் தானே பேசிக்கொண்டிருத்தல்
8. மற்றவர்கள் கருத்துக்கு மதிப்பு கொடுக்க மறுத்தல்
9. தன் கருத்தை மற்றவர்கள் மீது திணித்தல்
இது போன்ற குறுக்கீடுகள் பேசும் கலையின் தரத்தைக் குறைக்கின்றன. பல அரங்கங்களிலும், நிறுவனங்களிலும் சில நேரங்களில் கருத்துப் பரிமாற்றங்களுக்காக கூட்டங்கள் நடத்தும் பொழுது இந்த மாதிரியான செயல்களை ஒருவருடைய அறியாமையாகவோ அல்லது முதிர்ச்சியில்லாத நடத்தையாகவோக் கருதுகின்றனர்

பள்ளிகளிலும் கல்லூரிகளிலும் மொழிசார்ந்த கற்றல் நடக்கும் தருணங்களில் இந்தக் கருத்துக்களை வலியுறுத்தி எவ்வாறு பேசும் திறன்களை வளர்த்துக்கொள்ளவேண்டும் என்று விளக்குதல் மற்றும் அறிவுறுத்தல் அவசியம்..

மேலும் ஒருவரோடு உரையாடல் நடக்கும்பொழுதில் கீழ்கண்ட குறிப்புகளை மனதில் கொள்ளுதல் அவசியம்:
1. மற்றவர்களோடு பேசும் பொழுது அவர்களுடைய கண்களை பார்த்துப் பேசுதல் வேண்டும்.
2. தலை குனிந்தோ, வேறு இடங்களில் பார்வையை திருப்பியோ வைத்துக் கொண்டு பேசவோ அல்லது கேட்கவோ கூடாது.
3. மற்றவர்கள் பேசும் பொழுதோ அல்லது நாம் உரையாடும் பொழுதோ நமது உடல் நிமிர்ந்தும் நேராகவும் இருத்தல் அவசியம்.
1. தொட்டுப் பேசுதலை கட்டாயம் தவிர்க்க வேண்டும். பல நாடுகளில் அதை மரியாதைக் குறைவாகக் கருதுகின்றனர்.
2. நாம் நிற்கும் தூரம், நம்முடைய குரலின் வளம் மீது கவனம் தேவை.
3. குரலின் உயர்வு தாழ்வு மற்றும் நெகிழ்தல் ஆகியவை கேட்பவரின் ஆர்வத்தையும் கவனத்தையும் ஈர்க்க வாய்ப்புள்ளது.
உரையாடலின் போது பேசுபவர்களுக்கிடையே உடல்மொழி பரிமாற்றங்கள் நடக்கின்றன. இது பார்ப்பதற்கு ஒரு அறிய விருந்து. விளையாட்டாக இதை “உரையாடல் நடனம்” (conversational dance ) என்று சொல்லுவார்கள்.

கற்றல் மேலும் சிறப்பாக அமைவதற்கு ஒரு தலை ராகமாக பாடங்களை நடத்தாமல், கருத்துப் பரிமாற்றங்களுக்கு கீழ்கண்ட முறைகளை பயன்படுத்தினால் அதிக பலன் அளிக்க வாய்ப்புள்ளது.
1. குழு விவாதம் (Group Discussion)
2. மூளை தாக்கங்கள் (Brain storming)
3. நேரடியான விவாதங்கள் (Debate)
4. மேடை விவாதங்கள் (Panel discussion)
5. அறிக்கையிடல் (Reporting )
6. கதை வழங்கல் ( Narrative presentation )
பல நேரங்களில் மாணவர்களும் இளைஞர்களும் அறிவுடையவர்களாக இருந்தாலும் திறன் உடையவர்களாக இருந்தாலும் பேச்சுத்திறன் இல்லாமையினாலோ அல்லது பேசும் கலையின் நுணுக்கங்களை அறியாததாலோ முழுத்தகுதி இல்லாதவர்களாகக் கருதப்படுகின்றனர். ஆகவே கற்றலில் பேசும் திறன்களை வளர்த்தலும் போற்றுதலும் இன்றியமையாததாகும்.

சில நேரங்களில் சில மேடைப் பேச்சாளர்களை நாம் பேச்சுத்திறன் உடையவர்களாகக் கருதுகின்றோம். எவ்வாறு மேடைப்பேச்சுக்கு சில திறன்கள் தேவையோ அதே போல ஒவ்வொரு முறையான பேச்சுக் கலைக்கும் வேறுபாட்ட திறன்கள் தேவைப்படுகின்றன. ஆகவே பேசும் திறன்களின் எல்லாவிதமான நுணுக்கங்களையும் கற்றலும் அவைகளை தேவையான அளவில் உபயோகித்தாலும் தேவை.

நல்ல பேச்சுத் திறனுக்கு கற்றல் மிகவும் அவசியம். நல்ல பல நூல்களையும் சான்றோர்களின் கருத்துகளையும் மற்றும் நடைமுறையில் உள்ள அறிவுசால் நூல்களையும் நன்றாகப் படித்து அவைகளின் கருத்துக்களை உள்வாங்கி தகுந்த நேரத்தில் தகுந்த இடத்தில் தகுந்த முறையில் உபயோகித்தல் ஒரு சிறந்த பேச்சாளரின் அறிகுறி. எந்த இடத்தில் ஒருவர் பேசினாலும் பொது அறிவு (common sense ) மிகவும் இன்றியமையாதது. நல்ல பல கருத்துகள்கூட நடைமுறை பொதுஅறிவு இல்லாதவரிடம் உயிரற்ற பொருளாகிவிடும். மற்றும் பேசும் கலைக்கு உயிர்நாடியாக இருப்பது ஒருவரின் நகைச்சுவை உணர்வு. இதைப் பற்றி மேலும் விவரமாகப் பார்ப்போம்.

(தொடரும் )
May 2, 2016
நினைவு நல்லது வேண்டும் (4)

முனைவர் சங்கரராமன்

Man on top of mountain. Conceptual design.

“பிரச்சினைகளை சமாளிப்பது எப்படினு நீங்க எழுதுங்கள் சார்” என் அன்பு மாணவனின் வேண்டுகோள் … எனக்கு என்ன பயமென்றால் பதிவை படித்துவிட்ட பிறகு பிரச்சினைக்கு வந்து விடுவார்களோ என்ற எண்ணத்திலேதான் எழுதுகிறேன். இந்த உலகில் இதுவரை பிரச்சினையைக் கண்டு ஒதுங்கியவர்கள் யாரும் வாழ்வில் வெற்றி பெற்றதாக சரித்திரம் இல்லை.

சிலர் அணுகும் முறையிலேயே பிரச்சினையை அதிகரித்துவிடுகிறார்கள். “காலைலேயே போனா. இன்னமும் வரல. எப்பவுமே சீக்கிரம் வந்துருவா ..இன்னமும் வரல” என்றே குழந்தைகள் பள்ளி கல்லூரி விட்டு வர தாமதமாகும் போது பெற்றோர்களுக்கு வரும் கவலை நியாயமானதே. ஆனால் வெறும் கவலை மட்டும் அதற்கு தீர்வாகிவிடுமா ?.

நமக்கெல்லாம் ஞாபகம் இருக்கும் முன்னர் தந்தி வந்தது என்றால் முதலில் அழுதுவிட்டுதான் பிரிப்பது வழக்கமாகவே இருந்தது . கடைசியாக அது வேலை கிடைத்த தந்தியாகவோ வாழ்த்து தந்தியாகவோஇருக்கும்.பிரச்சினைகளை புரிந்துகொள்ளும்போதே பாதி தீர்வு கிடைத்துவிடும். கண்ணாடிக் கதவுகளில் தள்ளு ,இழு என்று எழுதப்பட்டிருக்கும் அதை மாற்றிச் செய்தால் ஒரு போதும் கதவுகளை திறந்திட முடியாது. முதலில் பிரச்சினைகளை புரிந்துகொள்ளுங்கள். இரண்டாவது அதை எதிராளியின் இடத்தில் இருந்து யோசித்துப் பாருங்கள். பிரச்சினைகள் தீரந்துபோகும்

ஒரு சிறிய எலந்தைப் பழத்தை வைத்து பார்க்க சொல்லிவிட்டு கண்களை மூடச் சொல்லிவிட்டு திறக்கும்போது லென்சு ஒன்றை வைத்து அதே எலந்தைப் பழத்தைப் பார்த்தால் அதுவே பலாப்பழம் போல தெரியும் . உண்மையில் நமக்கு வரும் சிக்கல்களை நாம் அணுகும் முறையின் அவசரத்திலே அதை மிகப்பெரிய பிரச்சினையாக மாற்றி விடுகிறோம். எப்போதும் தீர்வுகளோடுதான் எல்லாப் பிரச்சினைகளுமே வரும். ஆனால் பதட்டத்தால் நாம் தீர்வுகளைக் கண்டுகொள்வதே இல்லை. தேவையின்றி நாம் படும் கவலைகளால் எந்த பயனும் இல்லை என்பதை உணர்ந்து கொள்ள வேண்டும் . அதே போன்று மோசமான ஒன்று நம்முடைய வறட்டுப் பிடிவாதங்கள் . அவற்றால் நாம் இழந்தவற்றை பட்டியலிட்டாலே தெரிந்து விடும். எத்தனை சுவாரசியமான வாழ்வை நாம் எத்தனை சிக்கலாக்கி வைத்துள்ளோம் என்று …

வறட்டுப் பிடிவாதங்கள் கவலைகள் அனைத்தையும் தூக்கி எறிவதே அனைத்து பிரச்சினைகளுக்குமே தீர்வாக அமையும்

கவலைகளால் எதையும்
கடந்துவிட முடியாது
மகிழ்ச்சியோடு அணுகுங்கள்
காணாமல் போகட்டும் கவலைகள்

தொடருவோம்

May 2, 2016
முறுக்கு

மீ.விசுவநாதன்

முறுக்கு தின்னும் ஆசையிலே – தெரு
மூலைக் கடைக்குச் சென்றேன்நான் !
குறுக்கு நெடுக்கு மாட்களெலாம் – அங்கு
கூடி யிருந்து சுற்றுகிறார் !

புழுங்க லரிசி முறுக்குதனில் – உள்ள
சுவைக்கு என்று மடிமைநான் !
விழுங்க எனக்கு மனமின்றி – வாய்
வெளியில் மென்று ருசித்திடுவேன்!

வேகா முறுக்கின் தனிருசிக்கு – நா
வெளியில் தொங்க நின்றிடுவேன் !
ஆகா ஆகா வெனச்சொல்லி – அந்த
அரைவேக் காட்டை அரைத்திடுவேன் !

அரைவேக் காடு முறுக்கல்ல – என்
அடங்கா ஆசை மனமென்று
உரைத்த புத்தி கேட்காமல் – வெளி
உலகில் மயங்கித் திரிகின்றேன் !

இளமை முறுக்கும் முதிர்ந்துவிடும் – ஒரு
இரவில் முதுமை விரைந்துவரும் !
வளரும் மோகம் உதிர்ந்தால்தான் – என்
மனிதப் பிறப்பும் அர்த்தம்பெரும் !

(01.05.2016)

May 2, 2016
நான் அறிந்த சிலம்பு – 207

–மலர் சபா

மதுரைக் காண்டம் – 09: ஊர்சூழ் வரி

கண்ணகி கோவலனைத் தழுவுதலும், அவன் உயிர்பெற்று எழுந்து பேசுதலும்

இவ்வாறெல்லாம் அழுது புலம்பினாள் கண்ணகி.
இலக்குமி வசித்துவரும் கோவலனின்
பொன்மார்பு தன் மார்போடு பொருந்துமாறு

அவள் அவனைத் தழுவிக் கொண்டாள்.

அப்போது கோவலன் உயிர்பெற்று எழுந்தான்.
“முழுநிலவு போன்ற உன் முகம் ஒளி குன்றிவிட்டதே”
என்றே அவன் கூறி,
அவளுடைய கண்ணீரைத்
தன் கைகளால் துடைத்தான்.

தன் பாதத்தைக் கண்ணகி பற்ற, கோவலன் வானுலகு செல்லுதல்

கண்ணகி ஏக்கம் கொண்டு அழுது, நிலத்தில் வீழ்ந்து,
வணங்கத் தகுந்த தன் கணவனின் திருவடிகளைத்
தன் கையால் பற்றிக் கொன்டாள்.
அந்த நேரம், வெட்டுப்பட்ட கோவலன்
உடல் காயங்கள் எல்லாம் நீங்கப்பெற்று,
உயிரோடு சொர்க்கம் புகுந்திட எழுந்தான்.

“ஓவியத்தில் வரைந்திட்டது போன்ற
அழகிய மைதீட்டிய கண்களை உடையவளே!
நீ இங்கேயே இருப்பாயாக” என்று கூறித்
தேவர்களுள் ஒருவனாகி வானுலகம் சென்றான்.

அடிப்படையாக அமைந்த சிலப்பதிகாரத்தின் வரிகள் இங்கே:

http://www.chennailibrary.com/iymperumkappiangal/silapathikaram9.html—

படத்துக்கு நன்றி: கூகுள்

May 2, 2016
திருமந்திரம் – 3

-பா.மஞ்சுளா

திரைவிலகட்டும்!

ஒன்பது தந்திரப் பகுப்புமுறைகள்

திருக்குறளும் திருமந்திரமும் பல இடங்களில் ஒன்றுபடுகிறது. திருமந்திரத்தின் தந்திரங்களை அதிகாரங்களாகப் பகுத்து

முதல்தந்திரத்தில் 24அதிகாரங்களாகவும்,
இதுவும் குறளைபோன்று புலால் மறுத்தல், கொல்லாமை, ஆட்சிமுறை, வான்சிறப்பு, அன்புடைமை, கல்வி, கல்லாமை போன்ற நீதிநூல்களில் பேசப்படும் செய்திகள் உள்ளன.

இரண்டாம் தந்திரம் 25 அதிகாரங்கள். இதில்
புராணங்களைப் புதிய அணுகுமுறையுடன் நாடியிருப்பதும், வேண்டுதல் ,வேண்டாமை இல்லாத இறைவழிபாட்டு முறையே புதிய
பொருள் விளக்கத்துடன் மிளிர செய்கிறது.

மூன்றாம் தந்திரம் 21 அதிகாரம். அட்டாங்க யோகம், யோக சாதனைகளை விளக்கிப் பின் ஆன்மீக பயிற்சியில் ஒருவனை ஈடுபடுத்துகிறது. இதுவே மனிதனின் உடம்பைக் சிதையாமல் பாதுகாக்கும் வழி எனக் கூறுகிறது.

நான்காம் தந்திரம் 13 அதிகாரங்களை கொண்டது. மந்திரங்களை வடிவமைக்கும் சக்கரங்களின் அமைப்பும், அவற்றை வழிபடும் முறையும் அதனாலே கிடைக்கும் நன்மைகள் பற்றியும் ஆராய்ந்து பேசுகிறது.

ஐந்தாம் தந்திரம் 20 அதிகாரங்களை உடையது.
இதுவே இந்நூலுக்கு உயிர்நாடி. முன்னும் பின்னுமாக அமைந்திருக்கும் முதல் நான்கு தந்திரங்களுக்கும், இறுதி நான்கு தந்திரங்களுக்கும் ஐந்தாம் தந்திரமே வழியும், பயனுமாக அமைந்தது. இதிலே சரியை,
கிரியை, யோகம், ஞானம் ஆகிய நால்வகை
நெறிகளும் அதற்கான தாசமார்க்கம், சற்புத்திர
மார்க்கம், சகமார்க்கம், சன்மார்க்கம் ஆகிய
நான்கு மார்க்கத்தின் உண்மைகள்மூலம் சைவத்தின் பெருமை உணர்த்தப்படுகிறது.

ஆறாம்தந்திரம் 14 அதிகாரங்கள். உண்மைகளை அறிந்து சிந்தித்து முற்றுணர்வு பெறுவதற்கு வேண்டிய சாதனங்களைக் கூறும்.

ஏழாம் தந்திரம் 38 அதிகாரங்கள். இது ஐம்பொறிகளையும்
அடக்கும் முறை, சிவநெறியில் நிற்போர்
அனைவரும் கடைப்பிடிக்க வேண்டிய நல்லுரைகளைத் தாங்கி நிற்கிறது.

எட்டாம் தந்திரம் 45 அதிகாரங்கள் கொண்டது.
சிவனது கூடுதல் என்னும் சிவயோக நிலையை
உணர்த்துவது.

ஒன்பதாம் தந்திரம் 27 அதிகாரங்கள். சிவனை
அடைவதால் ஏற்படும் வீடுபேற்று நிலையைக் கூறுகிறது. இதில் இடம் பெறும் ’சூனிய சம்பாதனை’ என்ற பகுதி விடுகதைபோல மறைபொருள்கள் பற்றிய பாடல்கள் அமைப்பை கொண்டது. மொத்தம் 227 அதிகாரங்களில் 3000 பாடல்களைக் கொண்டது.

பண்டைய தமிழகம் பெளத்தம், சமணம் முதலிய சமயங்களின் பிடியில் இருந்த இருண்ட காலத்தில் சமயங்களை மீட்டெடுக்க வேண்டிய கட்டாயத்தில் “ஒன்றே குலம் ஒருவனே தேவன்” என்னும் தீப்பொறியை மூலன் போட, அது பக்தி இயக்கத்தால் ஊதிப் பற்றவைக்கப்பட்டது. சைவத்தால் தமிழை மீட்டெடுக்க முதல் விதையைத் தமிழ்மண்ணில் திருமூலர் விதைத்தார்.

” என்னை நன்றாக இறைவன் படைத்தனன்
தன்னை நன்றாகத் தமிழ் செய்யுமாறே”

என்று தனது படைப்பின் நோக்கத்தைக் கூறுகிறார்.
சேவல்கள் காலமறிந்து கூவ வேண்டும்; காலமல்லாத காலத்தில் கூவும் கூவல்களை யாரும் பொருட்படுத்துவதில்லை. அப்படிக் காலம் அறிந்து கூவிய முதல் தமிழரது கூவலே திருமந்திரம்.

May 2, 2016
ஐயாண்டுத் தேர்தல் நையாண்டிகள்
தமிழ்த்தேனீ
1. விரலிலே மையிட்டு அழகு பார்க்கிறார் பதவி
வந்தவுடன் த்ரோணர் போல விரலைக் கேட்கிறார்
1. வாக்காளர் யார் பக்கம் என்று கருத்துக் கணிப்பு நடத்துபவர்களே யார் மக்கள் பக்கம் என்று கருத்துக் கணிப்பு எடுத்து விடையைச் சொன்னால் தேர்தலில் வாக்களிக்க உதவியாய் இருக்குமே
1. தேர்தல் விழிப்புணர்வு ன்னு மேடையிலே
பேசிக்கிறாங்களே அப்பிடீன்னா என்னாப்பா அது

அது ஒண்ணும் இல்லேடா கண்ணா அந்தப் பொதுக் கூட்டத்துக்கு போனா ரூபா குடுப்பாங்க சாப்பாடு குடுப்பாங்க அப்பிடிப் போகலைன்னா அதுவும் கிடைக்காது அதுதான் தேர்தல் விழிப்புணர்வு
1. கோடி கோடியாய் பணம் சேர்த்து வைத்திருப்போர் கோடி கோடியாய் சொத்துக்கள் சேர்த்திருப்போர்
வேட்பாளர்களாய்

கோடி கோடியாய் வாக்காளர்கள் ஏழைகளாய்

5, நாட்டிலுள்ள அனைத்து வாக்காளர்களுக்கும் வேட்பாளர்களுக்கும் தெரிகிறது அவர்களுக்கு எந்த ஊர் எந்த மாவட்டம் எந்த தொகுதி என்று

ஆனால் இந்த ரூபாய் நோட்டுக் கட்டுக்களுக்கு மட்டும் தெரியவில்லை எந்த ஊர் எந்த மாவட்டம் எந்த தொகுதி என்று. பாவம் அல்லாடிக் கொண்டிரு க்கிறது போக்கிடம் இல்லாத நோட்டுக்கட்டுகள் போவதெங்கே
1. அசோகர் சாலை இரு மருங்கிலும் மரங்களை நட்டார் ஆறுகள் குளங்கள் வெட்டினார்
ஆட்சியாளர்கள் சாலை இரு மருங்கிலும் மக்களை நடுகிறார்கள்

ஆறுகளை வெட்டுகிறார்கள் வெட்டி வெட்டி மணலை எடுத்து விற்கிறார்கள் ஏரிகள் குளங்களையெல்லாம் வெட்டி வெட்டி சதுரமாக்கி நீள் சதுரமாக்கி பொதுமக்களுக்கு சேவை செய்ய நிலங்கள் அளித்து வீடுகட்ட மணல் அளித்து பணம் ஈட்டுகிறார்கள்
1. முதுகு வலி தாங்க முடியாமல் வாலினி தெளிப்பான் அடித்துக் கொண்டேன். எரிச்சல் முதுகைப் பிளந்தது.சற்று நேரம் பொறுத்துக் கொள்ளுங்கள் வலி போய்விடும் என்றார்கள். சற்று நேரம் போனதும் எரிச்சல் பழகிவிட்டது.
இன்னும் சற்று நேரம் போனதும் எரிச்சல் அடங்கியது மீண்டும் முதுகு வலிக்க ஆரம்பித்தது.

வாழ்க்கையில் எல்லாமே அப்படித்தான் தேர்தலும் ஆட்சி மாற்றமும் கூட என்று புரிந்தது
1. இதுவரை நானே உங்களை ஆண்டேன் இனியும் நான்தான் ஆளுவேன் . நான் ஆளுகின்ற காலத்திலே உங்களுக்கு என்ன செய்தேன் என்பது முக்கியமல்ல
இனி ஆளப்போகும் காலங்களில் நான் என்ன செய்யப் போகிறேன் என்பதும் முக்கியமல்ல

என்னைத் தவிர யார் கேட்டாலும் ஆளும் பொறுப்பைத் தராதீர்கள் . ஏனென்றால் நாட்டை ஆண்டு ஆண்டே பழக்கப்பட்டுவிட்டேன் என்னால் இந்த நாட்டை ஆளாமல் இருக்க முடியாது என்பதுதான் முக்கியம்

அது மட்டுமல்ல பொதுமக்களே ஒரு ரகசியத்தையும் சொல்கிறேன் எனக்கு நாட்டை ஆள்வதைத் தவிர வேறு தொழில்களே எதுவும் தெரியாது . ஆகவே நான் உயிரோடு இருக்கும் வரையில் தயவு செய்து எனக்கே ஆளும் பொறுப்பினைத் தாருங்கள்

நீங்கள் யார் பேச்சையும் கேட்டு ஏமாறும் முட்டாள்களல்ல யாராலும் உங்களை ஏமாற்ற முடியாது என்பதை நான் அறிவேன் . ஆகவே இந்த நாட்டை ஆளும் பொறுப்பை எனக்குத்தான் தரவேண்டும் நிச்சயம் தருவீர்கள் நிச்சயம் தந்தே ஆகவேண்டும் என்று உங்களை அன்போடு மன்றாடிக் கேட்டுக் கொள்கிறேன்
1. அடங்காமலிருப்பது என்னும் கொள்கை எல்லா இடத்துக்கும் சரிப்படாது அடங்கி நடப்பது நல்லது என்பதை அறியாத சில எதிர்க் கட்சிக்காரர்கள் கேட்கிறார்கள் ஏன் காலில் விழுகிறீர்கள் என்று அவர்கள் ஒதைப்பேன் என்று கைகாட்டினாலும் பதிலுக்கு கைகூப்பினால் அதுக்கு தனி மரியாதை கிடைக்கும் என்று புரியாத எதிர்க்கட்சிக்காரர்கள்
1. . சுதந்திரத்துக்காக போராடிய நாம் பணம் செய்யும் தந்திரத்துக்காக போராடுகிறோம் என்கிறார்கள் அதைப் பாதுகாப்பது எவ்வளவு கடினம் சுதந்திரத்தை போராடி மீண்டும் பெறலாம் ஆனால் பணத்தை இழந்தால் அதைமீண்டும் பெறவே முடியாது என்பது என்னைப் போன்ற அரசியல்வாதிகளுக்குத்தான் தெரியும்.
2. இந்த நாட்டின் நிதி மந்திரியாகிய நான் நம் நாட்டின் நிதி நிலமை இவ்வளவு சீரழிந்து போய்விடும் என்று கனவுகூடக் காணவில்லை-
என் ஆட்சியில் மக்கள் இவ்வளவு கஷ்டப் படுகிறார்களா? அதற்கு என் ஆட்சிதான் காரணமா? நான் நினைக்கவே இல்லை முதன் மந்திரி
1. . கற்பனையைச் சொன்னேன் கரகோஷம் விண்ணைப் பிளந்தது உண்மையைச் சொன்னேன் கரங்கள் என்னைப் பிளந்தன
.
1. கோயிலில் இருக்கும் தெய்வத்தின் தரிசனம் காணக் கூட வேண்டுமாம் மந்திரியிடம் சிபாரிசுக் கடிதம்
.14.. ஒரு ரூபாய் தர்மம் கொடுத்தேன் வாயாரத் திட்டினான் பிச்சைக்காரன்

ஒரே ஒரு ஓட்டு போட்டேன் நாட்டையே வீடாக்கிக் கொண்டார் அரசியல்வாதி
1. மீன் விலையும் அதிகரிக்கிறது மின் விலையும் அதிகரிக்கிறது ஆனால் தேர்தல் ப்ரசார அலைகள் மட்டும் இரண்டையுமே தயாரிக்காமல் வெட்டியாய் ஓயாமல் வந்து வந்து போய்க் கொண்டிருக்கிறது ஆனால் கடலிலே கொந்தளிப்பே காணவில்லை அமைதியாய் இருக்கிறது
1. யார் ஜெயிப்பார் இந்த தேர்தலில் நமக்கு நிச்சயமாகத் தெரியும் கதாநாயகன்தான் ஜெயிப்பான் என்று
மக்கள் கண்ணுக்கு எல்லோருமே வில்லனாகத் தெரிகிறார்கள்.யார் ஜெயித்தாலும் அவர்களே வில்லன் அவர்களே கதாநாயகன் என்னும் முடிவுக்கு மக்கள் தங்களை தயார்படுத்திக் கொண்டுவிட்டார்கள்
1. மதுப்பாட்டில்களிலும் சிகரெட் அட்டையின் மீதும் அது ஆபத்தானது உயிரைக் குடிக்கும் புற்று நோய் வரும் சற்று நாட்களில் விஷம் உயிரைக் குடிக்கும் என்று எழுதி விற்கிறார்கள் இதைப் போல எச்சரிக்கை வாசகத்தை மேலே எழுதிவிட்டு விஷத்தையும் விற்பார்களா வாங்குவோர் அதை வாங்கி உபயோகப்படுத்தினால் நடவடிக்கை எடுப்பாமல் இருப்பார்களா
1. மேலிடத்திலே இருந்து வரும் தலைவர்கள் தமிழ் நாட்டிலே தமிழர்களிடம் இந்தி மொழியிலே பேசுகிறார்கள் தமிழ் மக்களுக்கு எப்படி புரியும் என்பது விவாதிக்கப்படுகிறது
எனக்கு ஒரு சந்தேகம் தமிழ் நாட்டிலே தமிழர்களிடம் தமிழிலே பேசுகிறார்கள் பல தலைவர்கள் அதெல்லாம் மட்டும் மக்களுக்கு புரிகிறதா என்ன ? என்று
1. அனைத்துக் கட்சித் தலைவர்களும் வேட்பாளர்களும் தங்களின் கடந்த காலத்தில் நடந்த நடத்தப்பட்ட தவறுகளை அலசி ஆராய்ந்து தங்களையே ஆராய்ச்சி செய்து கொண்டு தமக்குத் தாமே திருத்தி்க் கொள்ள அமைந்த ஒரு அருமையான நேரம் இந்தத் தேர்தல் களம் . யார் திருத்திக் கொள்கிறார்கள் யார் தங்கள் தவறுகளை நியாயப் படுத்துவதி்லேயே குறியாக இருக்கிறார்கள் என்று கூர்மையாக கவனியுங்கள் வாக்காளர்களே .
1. விலை உயர்ந்த நான்கு சக்கர வாகனத்தையும் தங்களோடு புதைக்கச் செய்யலாமா என்று யோசிக்கிறார்கள் செல்வந்தர்கள் ஆனால் போகுமிடத்தில் பெட்ரோல் அல்லது டீசல் கிடைக்குமா தெரியவில்லை
2. கப்பலை நிலை நிறுத்தப் பயன்படும் நங்கூரமும் கப்பலிலேயே பயணிக்கிறது வாகனங்களை நிறுத்த பயன் படும் ஓட்டத் தடை எனப்படும் Break வாகனத்தோடே பயணிக்கிறது ஊழலைத் தடுக்க மட்டும் எதாலும் முடிவதில்லை
1. ஹரிகேன் என்றால் புயல் புயல் அடித்தாலும் அணையாத விளக்கு என்று சொல்வார்கள் . அந்த விளக்கின் வடிவம் அப்படி அது போல் புயலடித்தாலும் இயற்கைச் சீற்றங்கள் ஏற்பட்டாலும் அவை மக்களைப் பாதிக்காத வண்ணம் சுற்றுச் சூழலை ஏற்படுத்தி மக்களைப் பாதுகாப்பதே ஆளுவோர் செய்ய வேண்டிய கடமைகளில் முக்கியமான ஒன்று
2. நான் சிறுவனாக இருந்த போது இவ்வளவு மக்கள் தொகை பெருகாத அந்தக் காலத்திலேயே 1960 ஆண்டு சென்னை வால்டாக்ஸ் சாலையில் சாக்கடை வடிகால் குழாய்கள் ஆளுயரத்துக்கு வட்ட வடிவமாக இருக்கும் அதிலே இறங்கி மாநகராட்சி துப்புறவுப் பணியாளர்கள் சுத்தம் செய்வார்கள். எட்டிப் பார்த்து அந்தக் குழாய்களின் ஆழத்தை நினைத்து பயந்தி்ருக்கிறேன். ஆனால் இவ்வளவு மக்கள் தொகைப் பெருக்கத்துக்குப் பின்
ஒப்பந்ததாரர்களை பணக்காரர்களாக்க இரண்டடி விட்டமுள்ள சிறு குழாய்களையே பதிக்கிறார்கள். அதையும் நகரின் பல பாகங்களில் இன்னமும் பதிக்காமல் சாலையிலேயே சாக்கடைகளை ஓடவிடுகிறார்கள். சாலைகளா சாக்கடைகளா என்றே தெரியாமல் மக்கள் அல்லாடுகிறார்கள்
1. வேட்பாளரை மாற்றக் கோரி நடத்தப்படும் ஆர்ப்பாட்டங்கள் ஒரு பக்கம் மக்களின் விழிப்புணர்வைக் காட்டினாலும் அறிவித்த வேட்பாளரின் எதிர்ப்பாளர்கள் செய்கின்ற ஆர்ப்பாட்டமோ எனும் சந்தேகமும் வருகிறதுப் பாவம் வாக்காளர்கள் அவர்களுக்கு எப்போதும் குழப்பமே
1. தேர்தல் அதிகாரிகள் இயன்றவரை சிறப்பாக செயல்பட்டு நேர்மையான முறையை தேர்தலை நடத்துகிறார்கள் . அவர்களுக்குத்தான் தெரியும் அவர்களின் கஷ்டங்கள்.
தேர்தல் முடிந்தவுடன் வேட்பாளர்கள் பதவி பெறுகிறார்கள்

வாக்காளர்கள் எந்தப் புதுமையும் இன்றி பழைய வாழ்க்கைக்கு திரும்புகிறார்கள் .

அவ்வளவு மாதங்கள் உழைத்த தேர்தல் அதிகாரிகளை

இனி வரும் தேர்தல் நேரத்தில் நினைவுகொண்டால் போதும் என்று மக்களும் அதிகாரிகளும் அவரவர் வேலையைத் திறம்படச் செய்கிறார்கள்
1. உழைப்பவர் உழைக்கட்டும் திறமையாக உழைப்பவருக்கு உழைப்பை அளியுங்கள் தகறாரு செய்பவருக்கு பதவி உயர்வு அளியுங்கள் எனும் கொள்கை தீவிரமாக கடைப் பிடிக்கப்படுகிறது
1. நங்கூரத்தின் அளவைக் கொண்டு கப்பலின் அளவை ஓரளவு அறிய முடியும் உறைக்கேற்ற கத்தி அல்லது கத்திக்கேற்ற உறை போல் விரலுக்கேற்ற வீக்கம் என்பது போல் கப்பலுக்கேற்ற நங்கூரம் அது போல் மக்களுக்கேற்ற மன்னன்தான் அமைகிறான்
1. வெட்கமாகத்தான் இருக்கிறது !
அவரவர் கடமையை அவரவரர் செய்வதற்கு பணம் கொடுப்பது தான் நியாயமான செயல்

ஆனால் அவரவர் கடமையை அவரவர் வேலையைச் செய்யாமலிருக்க சாலைகளை விரிவாக்கம் செய்யாமலிருக்க ஏரிகளை ஆக்ரமிக்க நிலங்களை அபகரிக்க பணம் கொடுப்பது அநியாயமான செயல்

அதைத்தான் நாம் செய்து கொண்டிருக்கிறோம்

சாலைகளை விரிவாக்கம் செய்யாமலிருக்க சாலையோரக் கடைகள் நடத்துவோர் பெரும் தொகை கொடுக்கத் தயாராய் இருக்கிறார்கள். அப்போதுதான் அவர்கள் கடைகள் இடிக்கப்படாமல் இருக்கும்.

ஏரிகளை ஆக்ரமித்தால்தான் அந்த நிலங்களை பட்டா போட்டு விற்க முடியும் அதனால் பலர் ஏரிகளை ஆக்ரமிக்க பெருந்தொகை கொடுக்கத் தயாராய் இருக்கிறார்கள்

அரசு அதிகாரிகள் அவர்கள் கடமைகளை செய்யாமல் இருக்க பெருந்தொகை அளிக்க பலர் தயாராய் இருக்கிறார்கள் அப்போதுதான் சட்டவிரோதமாக பலர் சம்பாதிக்க முடியும் இப்படிச் செய்வோரெல்லாம் பொதுமக்களாகிய நம்முடனேயே கலந்திருக்கிறார்கள் .

நிலமை இப்படி இருக்க அரசையோ அரசியல்வாதிகளையோ குறை சொல்ல நமக்கு என்ன தகுதி இருக்கிறது என்று யோசித்தேன். வெட்கமாகத்தான் இருக்கிறது.
1. உற்பத்தி விளைச்சல் அதிகமானால் பொருட்களின் விலை குறைகிறது
விலை குறைந்தால் வியாபாரிகளுக்கு லாபம் குறைகிறது

உற்பத்தி குறைந்தால் தேவை அதிகமாகிறது தேவை அதிகமானால் விலை உயர்கிறது

விலை உயர்ந்தால் உற்பத்தியாளர்களுக்கும் வியாபாரிகளுக்கும் லாபம் அதிகமாகிறது
1. நாங்கள் ஆட்சிக்கு வந்தால்
நலத் திட்டங்களை செயல் படுத்துவோம்

என்று வாக்குறுதி அளிப்போரே ஏற்கெனவே ஆட்சியில் இருந்த போது அளித்த வாக்குறுதிகளை நிறைவேற்றிவிட்டீகளா? இன்னும் இல்லையா !

ஓ ! அவைகளையும் மீண்டும் ஆட்சிக்கு வந்தால்தான் நிறைவேற்றுவீர்களா இப்போதுதான் புரிகிறது
1. வேண்டுகோள் :
வில்லிவாக்கம் வழியாக பாடி அம்பத்தூர் தொழில் நகரம் போன்றவைகள் இருக்கும் திருவள்ளூர் நெடுஞ்சாலையை இணைக்கும் ஒரே பாலம் டீ ஐ சைக்கிள் அருகே இருக்கும் பாலம்தான். . அந்தப் பாலத்தை அகலப்படுத்தி உறுதிப்படுத்தினால் அம்பத்தூர் ஆவடி பட்டாபிராம் திருவள்ளூர் முதல் திருப்பதி வரை வாகனங்களில் செல்வோருக்கு உதவியாக இருக்கும்.

அந்த ஒற்றைப் பாலம் உறுதியாக இருக்கிறதா? அதை முதலில் கவனியுங்கள் ஆட்சியாளர்களே

பாலம் இடிந்து மக்கள் ஒடிந்து போனபின் ஆறுதல் சொல்வதை விட, ஈட்டுத் தொகை வழங்குவதற்கு செல்வழிக்கும் தொகையைக் காட்டிலும் குறைவாகவே செலவாகும் . மக்களும் காப்பாற்றப்டுவார்கள்
1. நாங்கள் ஆட்சிக்கு வந்தால் நாங்கள் ஆட்சிக்கு வந்தால் நாங்கள் ஆட்சிக்கு வந்தால் நாங்கள் ஆட்சிக்கு வந்தால் நாங்கள் ஆட்சிக்கு வந்தால் என்று எல்லோருமே பேசுகிறார்கள்.
ஆக மொத்தம் யாருக்குமே நம்பிக்கை இல்லை ஆட்சிக்கு வருவோம் என்று
1. ஒவ்வொரு முறை தேர்தல் வரும் போதும் அரசு ஊழியர்களுக்கு அகவிலைப்படியிலிருந்து புறவிலைப்படி வரையில் உயர்த்திக் கொடுக்கிறீர்களே பாராட்டுக்கள்
ஆமாம் அரசு ஊழியர் அல்லாத மற்ற ஊழியர்கள் யாரும் இந்த நாட்டு மக்கள் இல்லையா என்று ஒரு சந்தேகம் எழுகிறது.

பள்ளிக் குழந்தைகளுக்கு இலவச சைக்கிள் இலவச கணிணி எல்லாம் கொடுக்கிறீர்களே.

படிக்க இயலாத பிள்ளைகளுக்கு இலவச படிப்பைக் கொடுப்பீர்களா
1. ஆங்கிலேயர் காலத்திலே மதுவைக் கொடுத்து அடிமையாக வைத்திருக்கும் நுணுக்கத்தை கற்றுக் கொடுத்தார்கள் நம்மவர் எப்போதுமே கற்றுக் கொண்ட நுணுக்கங்களை
மறக்க மாட்டார்கள்

அதனால்தான் இன்னமும் அதே நுணுக்கத்தைப் பயன்படுத்துகிறோம். நன்றி மறவாதவர்கள் நாம்
1. ஊழலை ஒழிப்போம் ஊழலை ஒழிப்போம் என்கிறார்களே
குழந்தைகள் மேல் பாசமே இல்லாதவர்கள்.

பெற்ற தாயே குழந்தையைக் கொல்லலாமா

பெற்றவர்களே இப்படிச் செய்தால் அந்த ஊழல் குழந்தை

பாவம் எங்குதான் போகும்

குழந்தையை அனாதையாக விடலாமா?
1. நல்லவர்கள் அரசியலுக்கு வர மாட்டார்கள் ஏனென்றால் அவர்களுக்கு அரசியல் செய்யத் தெரியாது. அப்படி அரசியல் செய்யக் கற்றுக்கொண்டு விட்டால் அவர்களால் நல்லவர்களாக இருக்க முடியாது
1. நாட்டிலே அடையாளம் தெரியாத மர்ம நபர்கள் அதிகமாகிவிட்டனர் எங்கு குற்றம் நடந்தாலும் அடையாளம் தெரியாத சிலரால் நடத்தப்பட்டது என்கிறார்கள்.. ஒரு வேளை வேற்றுக் கிரகவாசிகளாக இருப்பரோ.
இந்த நாட்டில் உள்ளோரையே அடையாளம் தெரியவில்லை என்றால் வேற்று கிரக வாசிகளை எவ்வாறு அடையாளம் கண்டு கொள்ள முடியும்

அதனால் வேற்று கிரக வாசிகளைக் கண்டு பிடித்து முதலில் அவர்களுக்காவது அடையாள அட்டை கொடுக்க ஏற்பாடுகள் செய்ய வேண்டும் என்று தாழ்மையுடன் கேட்டுக் கொள்கிறேன்.

ஏனென்றால் தேர்தல் வாக்குறுதிகளில் மக்களுக்காக மக்கள் நலன் கருதி அடையாளம் தெரியாத மர்ம நபர்களைக் கண்டு பிடித்து நிச்சயமாக அடையாள அட்டைகள் வழங்கும் திட்டத்தை ஏற்படுத்துவோம் என்பது உறுதி ஆகவே எங்களுக்கே வாக்களியுங்கள் என்று மேடையிலே முழங்கும் அபாயம் ஏற்படும்
1. ஆங்கில வழித் தனியார் பள்ளியில் பிள்ளைகளைச் சேர்த்து கல்வி கற்க வைத்து இந்த நாட்டிலே வாழவைக்க பள்ளியின் வாசலிலே இரவெல்லாம் நடைபாதையில் காத்திருக்கின்றனர்தமிழ்ப் பெற்றோர்கள். எப்போது கதவு திறக்கும் ?
நான் பள்ளிக் கதவைப் பற்றி கேட்கவில்லை.

கல்விக் கதவைப் பற்றிக் கேட்கிறேன்

தமிழ்மொழிக் கதவைப் பற்றிக் கேட்கிறேன்
1. நாங்கள் ஆட்சிக்கு வந்தால் கொடுக்கும் வாக்குறுதிகளை நிறைவேற்றுவோம் என்று வாக்களிக்கும் தலைவர்களை
அப்படி நிறைவேற்றாவிட்டால் உங்களை என்ன செய்யலாம் என்று வாக்காளர்கள் யாரும் கேட்டுவிடாதீர்கள்

எங்களை அடுத்த முறை தேர்ந்தெடுக்காதீர்கள் என்று எந்தத் தலைவராலும் சொல்லவும் முடியாது, சொல்லவும் மாட்டார்கள்..

அதையும் தவிர இந்தக் கேள்விக்கு இன்னமும் யாருக்குமே பதில் தெரியாது .
1. இன்று 2016 ஏப்ரல் 25 ஆம் தேதி
பாச மழை பொழிகிறது கோடைக்கால மழையென்றால் அதிலே ஒரு தனிக் கவர்ச்சி இருக்கிறது. கொளுத்தும் வெய்யிலில் குளிர்விக்கும் பாச மழை நேச மழை வாக்கு மழை இப்போது சுகமாய்த்தான் இருக்கிறது ஆனால் அடுத்து வரப்போவது அக்னி நக்‌ஷத்திர வெய்யில் அப்போது தெரியும் தேர்தல் முடிவுகள். அப்போது பார்க்கலாம் பாசமழை குளிர்விக்கிறதா அல்லது இன்னும் அனலைக் கிளப்பப் போகிறதா என்று
1. நிருபர் :
நீங்கள் ஆட்சிக்கு வந்தால் என்னென்ன நலத்திட்டங்கள் செய்வீங்கன்னு கேட்டா இப்பிடி கொஞ்சம்கூட பொறுப்பே இல்லாம நாங்க ஆட்சிக்கு வரமாட்டோம் . எதுவும் செய்ய மாட்டோம்னு பதில் சொல்றீங்களே எந்த நம்பிக்கையிலே இப்பிடி சொல்றீங்க

ஒருவர் : நாங்கதான் தேர்தல்லேயே நிக்கலையே அந்த நம்பிக்கைலேதான் சொல்றோம்
1. கொய்யாக் கனிகளாக இருந்தாலும் கொய்யா கனியாக இருந்தால் கல்லடி படும்
கோடி கோடியாய்ப் பணமிருந்தாலும் முறையாக செலவழிக்காவிட்டால் கொள்ளையர்களுக்குத்தான் பயன்படும்.
1. வாக்காளர் யார் பக்கம் என்று கருத்துக் கணிப்பு நடத்துபவர்களே
  யார் மக்கள் பக்கம் என்று கருத்துக் கணிப்பு எடுத்து விடையைச் சொன்னால் தேர்தலில் வாக்களிக்க உதவியாய் இருக்குமே
1. நுகர்வோர்பயன் படுத்தும் மின்சாரக் கட்டணத்தைக் குறைக்க எளிதான பல வழிகள் உள்ளன . அவற்றில் சிறந்த வழி மின்சாரம் அளிப்பதைக் குறைப்பது ஒன்று
அப்போது மின் கட்டணம் அதிகமாகக் கட்டவேண்டிய அவசியம் இராது.
1. இலவசங்களை அள்ளிக் கொடுத்து அதுவும் நம் பணத்திலே அவர்கள் கொடுப்பது போல் கொடுத்து அவர்களை ஆளுவோர்களாக அடையாளம் காட்ட வைக்கிறார்கள் அதுதான் ஆள் காட்டி விரல் . அந்த ஆள்காட்டி விரலில் மை போட்டு நம்மை மயங்க வைத்து
அதை உணராமல் மந்திரச் சாவியைியும் கொடுத்துவிட்டு பொக்கிஷப் பெட்டியை திறக்க அவர்களை அனுமதியும் கொடுத்துவிட்டு மீண்டும் அவர்களை நோக்கி கையேந்துகிறோம்

சிந்தியுங்கள் வாக்காளர்களே

நம்மை ஆள்காட்டிகளாக ஆக்கு்வோரோ் அவர்கள்தான்

நாம் ஆள் காட்ட வேண்டாம் தகுதியானவரை ஆளுவோராக அனுமதிக்க வேண்டும் . நம்மை திறம்பட ஆள, நாட்டை முன்னேற்ற நமக்கு வேண்டிய வசதிகளைச் செய்து கொடுக்க அவர்களை நாம்தான் தேர்ந்தெடுக்கிறோம். ஆகவே நம் மனமே மந்திரச் சாவி

புரிந்து கொள்ளுங்கள்
1. டீ வீ மிக்ஸீ க்ரைண்டர் போன்ற எதுவானாலும் இயன்றவரை பணம் செல்வழித்து சரிபார்த்துவிட்டு இனியும் ஓடாது என்று தெரிந்தாலே தூக்கி வீசுகிறோம்
ஆனால் பெற்றோர்களை இதெல்லாம் செய்யாமல் உடனடியாக தூக்கி வெளியே வீசுகிறோமே பெற்றோர்களுக்கு வாரண்டியும் இல்லை கியாரண்டியும் இல்லை
1. அதிர்ஷ்டசாலிகளுக்கு திறமை தேவையில்லை திறமை சாலிகளுக்கு அதிர்ஷ்டம் வருவதில்லை
உழைப்பாளிகளுக்கு ஊதியம் கிடைப்பதில்லை ஊதியம் கிடைப்போர் உழைப்பதில்லை
1. ஏமாற்றுவோருக்கு ஏமாளிகள் கிடைக்கிறார்கள் ஏமாறுவோருக்கு ஏமாற்றுகிறவர்களே அமைகிறார்கள்
ஆக மொத்தத்தில் திறமையாக ஏமாற்றுவோரே வெற்றி பெறுகிறார்கள். ஏமாற்றுவோரெல்லாமே திறமைசாலிகள் என்று அவர்களே நினைத்துக் கொள்கிறார்கள்

ஏமாளிகள் என்றுமே ஏமாந்துகொண்டே இருக்கிறார்கள்
1. மனைவி :ஏங்க நீங்க நியாயமா செய்ய வேண்டிய வேலைக்கு எதுக்காக இப்பிடி லஞ்சப் பணம் வாங்கறீங்க
புருஷன் : நம்ம பிள்ளையை பள்ளிக் கூடத்திலே சேக்க அவங்களுக்கு பணம் குடுக்கணும்,

எந்த வேலை நடக்கணும்னாலும் பணம் குடுத்தாதான் நடக்கும் ,

தேர்தல்லே நிக்கணும்னா பணம் வேணும். வாக்காளர்களுக்கு பணம் குடுக்கணும், விளம்பரம் செய்யணுன்னா பணம் வேணும்.

எல்லாரும் வாங்கறாங்க நானும் வாங்கினாத்தானே குடுக்க முடியும்

இப்பிடி வாங்கினாத்தான் கேக்கறவங்களுக்கு குடுத்து எல்லாத்தையும் செய்ய முடியும்

உனக்கு அப்பப்போ தங்க நகை வாங்கணும் காஞ்சீவரம் போயி பட்டுப் புடவை வாங்கணும் .

பொண்ணுக்கு கல்யாணம் செய்ய மாப்பிள்ளை வீட்டாருக்கு வரதக்‌ஷணை குடுக்கணும். கார் வாங்கிக் குடுக்கணும் மாப்பிள்ளைக்கு , வீடு வாங்கிக் குடுக்கணும்

இதுக்கெல்லாம் நான் இப்பிடி வாங்கினாத்தான் குடுக்க முடியும் அப்பிடியே நாம வாங்காம இருந்தா பயித்தியக் காரன்னு திட்றாங்க

நான் வாங்கித்தான் ஆகணும் வேற வழியில்லே

இதுக்கெல்லாம் பணம் உங்க அப்பனா குடுப்பான் வாயை மூடிக்கிட்டுப் போவியா?

வேட்பாளர் :எங்களுக்கேஉங்க ஓட்டைப் போடுங்க

வாக்காளர் : சாக்கடைத் தண்ணியிலே குண்டும் குழியுமா கல்லும் முள்ளுமா இருட்டா இருக்கற எங்க சாலையிலே நடந்து வந்து ஓட்டுக் கேக்கறீங்களே உங்களைப் பாத்தா நல்லவராத் தெரியுது அதுனாலே உங்களுக்கே எங்கள் ஓட்டு
1. மகிழ்ச்சியின் உச்சத்தில் இருப்போரே அது ஆணவத்தின் உச்சமாக மாறும் அபாயம் இருக்கிறது .கீழே விழாமல் இருக்க கொஞ்சம் மட்டுப் படுத்திக் கொள்ளுங்கள் நிரந்தரமான மகிழ்ச்சிக்கு அதுவே வழி
விரக்தியின் உச்சத்தில் இருப்போரே மீண்டும் வாழத் தலைப்படுங்கள் அதுதான் ஒரு முடிவின் ஆரம்பம்
1. ஊழல் நாடுகள் பட்டியலில் எழுவத்தி ஆறாவது இடத்தில் இந்தியா உள்ளது.
டிரான்ஸ்பரன்சி இன்டர்நேஷனல் என்னும் அமைப்பு ஒவ்வொரு ஆண்டும் உலக நாடுகளின் ஊழல் நிலவரம் குறித்து தரவரிசை பட்டியலை வெளியிட்டு வருகிறது. 2015 ஆம் ஆண்டு தரவரிசைப் பட்டியல் கணக்கீட்டுக்காக 168 நாடுகள் எடுத்துக் கொள்ளப்பட்டன.

ஓ அதிலும் முதல் இடம் இல்லையா வருத்தமாகத்தான் இருக்கிறது இன்னும் முன்னேறினால்தான் முதல் இடத்தைப் பிடிக்க முடியும்
1. வேட்பாளர் : ட்ரைவர் எல்லாத்தையும் வேன்லே ஏத்திட்டியா பத்திரமா கொண்டு போயி வாக்காளர்கிட்டே சேக்க வேண்டியது உன் பொறுப்பு . அப்போதான்யா நமக்கு ஓட்டு கிடைக்கும்
ட்ரைவர் : நான் பாத்துக்கறேங்க நீங்க கவலைப்படாம இருங்க

வேட்பாளர் : அதுக்கில்லே போற வழியிலே ஏதாவது ப்ரச்சனைன்னா எப்பிடி சமாளிப்பே

ட்ரைவர் : நான் பாத்துக்கறேங்க நீங்க டென்ஷனாகாதீங்க

வேட்பாளர்: எதுக்கும் நம்ம ஆளுங்களை உஷாரா இருக்கச் சொல்லு

ட்ரைவர் : ஏங்க தேர்தல் வாக்குறுதி அச்சிட்டு எல்லாருக்கும் குடுக்கறீங்க அதுக்கு ஏன் இவ்ளோ பதட்டப் படறீங்க. வர வர நாட்டிலே ஒண்ணுமே புரியமாட்டேங்குது
1. ஓட்டுப் போட பணம் தருகிறோம் என்று யார் வந்தாலும் அவர்களிடம் பணம் வாங்காமல் அவர்களை விரட்டி அடியுங்கள் என்றார் ஒரு நண்பர்
இன்னொரு நண்பர் ஏய்யா தேர்தலுக்கு தேர்தல் நமக்குன்னு கிடைக்கறதே அது ஒண்ணுதான் வேற எதுவும் கிடைக்காது அதையும் வாங்காதே அப்பிடீன்னா எப்பிடி ?
1. தேங்காய்க்கு மேல் கடினமான ஓடு அதன் மேல் தென்னை நாறால் ஒரு கவசம், அதன் மேல் காய்ந்த தேங்காய் நாறின் கடினமான மேல் பகுதி இத்தனையையும் வைத்து இளநீரையும் தேங்காயையும் பாதுகாத்து அளிக்கிறான் இறைவன் ஆனால் கடினமான அவைகளை நீக்கி தேங்காயையும் இளநீரையும் நம்மால் அடைய முடிகிறது
ஆனால் லஞ்சம் ஊழல் பொய்கள் ஏமாற்று போன்ற கவசங்களை வைத்திருக்கும் அரசியல்வாதிகளிடமிருந்து அவைகளை நீக்கி நேர்மையான நாணயமான மனிதரை அடைய வழி ஏதும் வைக்கவில்லை அதே இறைவன்
May 2, 2016
படக்கவிதைப் போட்டி 61-இன் முடிவுகள்

-மேகலா இராமமூர்த்தி

பிஞ்சுக் குழந்தையின் மெய்தீண்டலும், அதன் அமுதனைய சொற்கேட்டலும் அன்னைக்கு அளிக்கும் இன்பம் அளவற்றது.

”மக்கள் மெய்தீண்டல் உடற்கின்பம் மற்றுஅவர்
சொற்கேட்டல் இன்பம் செவிக்கு” என்ற பொய்யில் புலவரின் பொருளுரை இங்கு நம் நினைவுக்கு வருகின்றது.

திருமிகு. அனிதா சத்யத்தின் கைவண்ணத்தில் மிளிரும் இந்த வண்ணப்படத்தைப் படக்கவிதைப் போட்டிக்குப் பாங்காய்த் தேர்ந்தெடுத்துத் தந்துள்ளார் திருமதி. சாந்தி மாரியப்பன். இருவருக்கும் வல்லமையின் நன்றி!

செங்கனி வாய்திறந்து இந்த மழலை உதிர்க்கும் சொல்முத்துக்கள், நம் கவிஞர்களிடம் பல கவிதை வித்துக்களை முளைவிடச் செய்திருக்கும். அவற்றை நாமும் இரசித்துவருவோம்!

”அப்பன் நம்மைக் காக்காவிட்டால் என்ன? அகிலம் பெரிது! வாழ நினைத்தால் வாழலாம்” எனத் தன் குழந்தைக்கு மனவுறுதியூட்டும் மறத்தாயைக் கவிதையில் வடித்துள்ளார் திரு. செண்பக ஜெகதீசன்.

அப்பன் விட்டுச் சென்றாலும்
அகிலம் பெரிது வாழ்ந்திடலாம்,
தப்பென யாரையும் சொல்லவேண்டாம்
தங்கமே உனைநான் வாழவைப்பேன்,
எப்பவும் நல்வழி நடந்திடுவாய்
ஏழைகள் நமைப்போல் பலருண்டு,
குப்பையில் கிடைத்த வைரம்நீ
கோபுரம் ஏற்றுவேன் தாய்நானே…!

***

பொக்கைவாய்ச் சிரிப்பிலும், மழலைப் பேச்சிலும் மனம் மயக்கும் இந்தக் குழந்தையின் பலத்தால், குடிகாரப் புருஷனால் முழுகிய தன்குடி தலைநிமிர்ந்துவிடும் என்று நம்புகின்ற தாயைக் காண்கின்றோம் திருமிகு. சரஸ்வதி ராசேந்திரனின் கவிதையில்.

குடிகாரப் புருஷனால்
குடிமுழுகிபோனாலும்
மடிநிறைய மலர்த்தோட்டமாய் நீ
அடிவைத்ததும் துன்பங்களெல்லாம்
ஓரடித் தூரத்தான்போயின
உன் பொக்கை வாய் சிரிப்பிலும்
உன் மழலைப் பேச்சிலும்
என் கவலைகள்தூசாகிப் போயின
மகனே உன் பலத்தால் உலகை ஆளும்
மனத்திண்மைபெறுவேன்
வெற்றிகள் பெற்று
விரைந்து செயலாற்ற
உற்றதுணை நீயே !
பய பஞ்சம் பத்து நாளில் போகுமென்பார்
நியதி நெறிகள் நிம்மதிப் பெய்தே
உயர நம்மை உயர்த்திவிடும் கண்ணே
அம்மா சொல்படி கேட்டுப் படித்து
சும்மா சோம்பேறியாய் இல்லாமல் மற்றவர்
மூக்கில் விரல் வைக்கப் படித்து
முன்னுக்கு வா என் முத்தாரமே
அச்சாரமாய்த் தருகிறேன் அன்பு முத்தம்

***

இந்த வாரத்தின் சிறந்த கவிஞராய்த் தேர்வுபெற்றிருப்பவரை அடுத்துச் சந்திப்போம்!

இன்மையாலும் (வறுமை), கணவன் மற்றும் குடும்பத்தினரின் அன்பும் ஆதரவும் இன்மையாலும், இப்புவியில் எத்தனையோ மங்கையர் உண்ண உணவின்றி, வாழ வழியின்றித் தம் வாழ்க்கையெனும் ஓடத்தை எதிர்நீச்சல் போட்டே செலுத்துகின்றனர். இதற்கிடையில், தம் குழந்தைகளைப் படிக்கவைத்து ஆளாக்க அவர்கள் படும்பாடோ வார்த்தைகளால் விவரிக்க இயலாத துயர காவியங்கள்!

மிடிமை தன்னை அடிமைசெய்து வாட்டிவதைக்கின்ற போதினும், கோழையைப்போல் தன் மகளுக்குக் கள்ளிப்பால் ஊட்டாத ஏழைத்தாயை நம் கண்முன் நிறுத்தும் கவிதை நம்நெஞ்சைக் கனக்கச்செய்கிறது.

வறுமை வாக்கரசி போட
சொந்த ஊரை விட்டு
சொப்பனம் தேடி வந்தேன்

அப்பன் ஆத்தாளை மறந்து
அடுக்குமாடி கட்டிடத்தில்
அயராது உழைத்தேன்

இருக்க மனையில்லை
இல்லறம் சுகமில்லை
பறக்கும் காகம் போல்
கண்ட இடத்தில்
உண்டு உறங்கி
உயிர் வாழும் எனக்கு …

சிம்ம சொப்பனமாய்ச்
சீமாட்டி நீ தரிக்க
பெண்மையை உணர்ந்து
பேறுகாலம் பெற்றேன்

கள்ளி அறியாத்
தாய்ப் பாலை
சொல்லிச் சொல்லி
கொடுத்தேன் என்
கட்டிச் செல்வமே

நான் கட்டையில்
போகும் வரை
உன் கடன் தீராதடி
முத்துச் செல்வமே
முழுமதியே

இந்தச் சொத்தைத் தவிர
வேறில்லையே
இந்த உலகில்
எழுந்து விளையாடு
எதிர் நீச்சல் நீ போட…!

பொன்னும் பொருளும் இல்லையென்று கலங்காது, பெற்ற குழந்தையையே பெறற்கரும் சொத்தாக நினைந்துபோற்றும் அன்னையின் உள்ளத்தைத் திறந்துகாட்டியிருக்கும் திருமிகு. ஹிஷாலியை இவ்வாரத்தின் சிறந்த கவிஞரென அறிவிக்கின்றேன்.

May 2, 2016
இன்னம்பூரான் பக்கம்: III:5 இந்திய தணிக்கைத்துறையும், நானும்[5]

கூட்டுக்களவாணிகள்

இன்னம்பூரான்

“…தணிக்கை என்பது காசுபணம் மட்டும் பார்க்காது. வச்ச காசுக்கு ஆதாயம் இருக்கிறதா என்று தோண்டிப் பார்க்கும். நாக்கை பிடுங்கிறாப்பல நாலு கேள்வி கேட்கும்… உண்ட வீட்டுக்கு இரண்டகம் செய்வதில் நமக்கு இணை நாம் மட்டும் தான். அது தவிர யான் ஒன்றும் அறியேன், பராபரமே !.”.

பாரததேசமென்று தோள் கொட்டியது கார்கில் போரில். பாரதத்துக்கு மோசம் செய்திடுவோம் என்று தேள் கொட்டியது மும்பை கொலாபாவில். உலகிலேயே விலை அதிகமான பூமி என்று அதற்கு புகழோ/இகழோ உண்டு. எனக்கு தெரிந்த கிராமமொன்றில், சுடுகாட்டில் போய் தகனமான பிணங்களின் தங்கப்பல்லை பிடுங்கும் மாபாவிகள் நிறைந்த இந்த சுதந்திர நாட்டில் ‘ஆதார்’ என்ற நற்பெயருக்குக் களங்கம் விளைத்து 2003ல் கட்டிய வானாளாவிய 31 தளங்கள் கொண்ட மாடமாளிகை ஒன்றை இடிக்கச்சொல்லி, இன்று மும்பாய் உச்சி மன்றம் ஆணையிட்டு இருக்கிறது. முழுக்கதையை சொல்ல ஒரு நூலே எழுதவேண்டும். இதையே விரல் விட்டு எண்ணக்கூடிய கனவான்கள் மட்டும் தான் படிப்பார்களோ? என்னமோ? இந்த அழகில் புத்தகம் போட்டால், கட்டை விரலை சப்பிக்க்கொள்ள வேண்டியது தான்! அதனால் ஆடிட்காரன் என்ன சொன்னான் என்பதை மட்டும் கேட்போம். 150 வருட பாரம்பரியம் கொண்டதும், அம்பேத்கார் அவர்களால் மிகவும் மதிக்கும் படி பேசப்பட்டு, இந்திய அரசியல் சாஸனத்துக்கு அடி பணிந்து ஊழியம் செய்யும் ஆடிட்டர் ஜெனெரலை கட்டிப்போட ஏன் விரும்பமாட்டார்கள், இந்த அரசியலர்?

இந்த ஆதார் உப்பரிகை பற்றி ஆடிட் ரிப்போர்ட் நாக்கை பிடுங்கிறாப்பல கேட்ட எட்டு கேள்விகள்:

வேலி பயிர் மேய்ந்த கதை, இது; இல்லை என்று நிரூபியுங்கள், பார்க்கலாம்;
கார்கில் போரில் வீரமரணம் அடைந்தவர்களின் விதவைகளுக்கும், தீவிர காயமடைந்த வீரர்களுக்கும், எத்தனையோ விதிமுறைகளை தளர்த்தி, இந்த இருப்பிடம் அவர்களுக்குத் தருவோம் என்று வாக்களிக்கும் முன்பே, உங்கள் திருட்டுக்கைவரிசையை தொடங்கிவிட்டது, இது தேசத்துரோகமா? இல்லையா?
பொறுப்புடன் நிர்வகிக்க சம்பளம் வாங்கும் பலர் மோசடிகள் ஏன் செய்தார்கள்?
மத்திய அரசு, மாநில அரசு, கட்டிட கலை வல்லுனர்கள், மந்திரிமார், உயர் அதிகாரிகள் எல்லாரும் செய்த இந்த அட்டூழியங்களை கூட்டுக்களவாணித்தனம் என்கிறோம். இல்லை என்று சொல்ல தகரியம் இருக்கிறதா?
விதி தளர்த்துவது, கட்டிட அளவுகளை கூட்டி அளிப்பது போன்ற சலுகைகள் கேட்டபொது, ‘ இது கார்கில் வீரர்களுக்கு’ என்று பதிவுகள் செய்யும்போதே, அவை பொய் என்று தெரிந்தும் துரோகம் ஏன் செய்தீர்கள்?
ஆகமொத்தம், ஆதாரத்தில் ஆதாய மீன் பிடித்தவர்களில், பெரும்பாலோர், கார்கில் சம்பந்தமற்ற அதிகாரிகள், பார்லிமண்ட் அங்கத்தினர்கள், பதவியில் இருப்பவர்களின் சொந்தபந்தம். இந்த அநீதி அடுக்குமா?
முனிசிபல் கமிஷனர் திரு.ஜெயராஜ் பதக் பதுங்கி பதுங்கி செய்ய வேண்டிய விதி விலக்குகளை செய்து கொடுத்தார். அதற்கு கைக்கூலி தானா, கார்கில் அருகே மனதால் கூட செல்லாத அவருடைய திருமகனாருக்கு ஒரு மாளிகை? இது அடுக்குமா?
எட்டு அகார்கிலார்களுக்கு (கார்கில் பக்கம் தலை வைக்காதவர்களுக்கு ) அலாட்மெண்ட் கொடுத்தால், அதிகப்படி கட்டிக்கலாம் என்றார்களே. இது எந்த ஊர் நியாயம்?

கதை மேலும் பயங்கரமா போகிறது. முதல் அமைச்சரே முதலை அமைச்சரானார்.

விவகாரம் மிகவும் பெரியது. வடூவூர் துரைசாமி அய்யங்கார் துப்பறியும் நாவல் போன்றது.

யாராவது கேட்டால் பார்க்கலாம். இல்லாவிடில் வாளாவிருக்கலாம்.
-#-
சித்திரத்துக்கு நன்றி:
https://mathimaran.files.wordpress.com/2013/12/8354158838_726a876ae2_m.jpg?w=640

இன்னம்பூரான்

May 2, 2016
கேசவ் வண்ணம் – கிரேசி எண்ணம்

‘EKA -தெய்வம் ஜனார்த்தனம்’
——————————————————-
‘ஏக பில்வம் சிவார்ப்பணம்’
பில்வாஷ்டகம் படித்த பாதிப்பில் எழுதியது
————————————————-

‘சங்குசக்ரம் சாரங்கம் தெண்டம்வாள் நந்தகி
அங்கையேந்தும் அவதார விஷ்ணு
ஏக தெய்வம் ஜனார்த்தனம்’….(1)

‘மூணுமோர் மறைகள் மீட்க மீனமாய்க் கடலுள் சென்ற
வானவைகுந்தனே
ஏக தெய்வம் ஜனார்த்தனம்’….(2)

‘கடல்கடைந்த போதன்று வடவரையை வழுவிடாது
உடல்சுமந்த ஆமையே
ஏக தெய்வம் ஜனார்த்தனம்’….(3)

‘கொம்பிலே குவலயத்தை கால்சிலம்பில் கோள்குலுங்க
நெம்பிய வராகரே
ஏக தெய்வம் ஜனார்த்தனம்’….(4)

‘தானாடும் துட்டனைத் தரைமட்டம் ஆக்கிட
தூணாடும் துரைசிங்கனே
ஏக தெய்வம் ஜனார்த்தனம்’….(5)

‘வந்தபின் வரம்வாங்கி அந்தவான் உலகளந்த
அந்தணன் வாமனனே
ஏக தெய்வம் ஜனார்த்தனம்’….(6)

‘ராமபரசு ராமஅரசு ராமபல ராமனாய்
நாமமொன்று நடிப்புவேறு
ஏக தெய்வம் ஜனார்த்தனம்’….(7)

‘பூபாரம் போக்கவன்று பாரதப் போர்முடித்த
கோபாலக் கண்ணனே
ஏக தெய்வம் ஜனார்த்தனம்’….(8)….கிரேசி மோகன்….

May 1, 2016
மே தின சிந்தனைகள்

எச்சரிக்கையாக இருப்பது மூலதனத்திற்கு நல்லது !

எஸ் வி வேணுகோபாலன்

இந்திய முதலாளிகள் எத்தனை ஏழைகள் என்பதை அண்மையில் வாசித்தபோது பெரிய கழிவிரக்கம் என்னைச் சூழ்ந்தது. மைக்ரோ சாஃப்ட் நிறுவனத்தின் தலைவர் சத்யா நதெல்லா, இத்தனைக்கும் தாமும் இந்தியர் என்றாலும், இந்தியாவின் மிக அதிகமாக ஊதியம் பெறும் 14 முதலாளிகள் ஈட்டும் மொத்த சம்பளத்தைத் தமது ஊதியமாகப் பெற்றுக் கொண்டிருக்கிறார்….இதெல்லாம் எந்த ஊர் நியாயம் என்று மனம் மிகவும் வருந்தியது. அதாவது நதெல்லாவின் ஆண்டு ஊதியம் ரூ 525 கோடியாம். நம்மவூர் முன்வரிசை முதலாளியின் ஊதியம் நாற்பது கோடிக்கும் கீழே என்றாகிறது. அதற்காக அவ்வளவு மோசமில்லை, முதல் இரண்டு ஏழை முதலாளிகள், அதாவது புருஷன் பெண்டாட்டி தலா அறுபது கோடி வாங்கி இருக்கின்றனர். வேறு யாரு, நம்ம சன் தொலைகாட்சி குழுமத்தின் கலாநிதி மாறன் மற்றும் காவேரி கலாநிதி இருவரும்தான்!

தொடர்ந்து முதலிடத்தைத் தக்க வைத்துக் கொண்டிருக்கும் இந்த ஜோடியை அடுத்து நிற்பவர், ஒன்பதாவது இடத்தில் இருந்து இரண்டாம் இடத்திற்குப் படிப்படியாக (இந்தச் சொல்லை இந்தத் தேர்தலில் வேறு எங்கோ கேட்டது மாதிரி இருக்கு இல்லே!) உயர்ந்து வந்திருக்கும் அப்போலோ டயர்ஸ் நிறுவனத் தலைவர் ஓங்கர் எஸ் கன்வர் இவர்களை விடவும் நல்லவர். தமது கம்பெனியின் லாபம் 2.73 சதவீதம் சரிந்ததைத் தமது ஊதியத்தை 11 கோடி அதிகரித்து ஆண்டு வருவாய் ரூ 41 கோடி அள்ளிக் கொண்டு போன பெருந்தகை! இந்தக் கணிதம் எல்லாம் நம்மவர்களுக்கு எங்கே புரிகிறது.

முதலாளியாக இருப்பது எத்தனை சோதனை மிகுந்த வாழ்க்கை, பாவம்! முகேஷ் அம்பானியை எடுத்துக் கொள்ளுங்களேன், பல ஆண்டுகளாக 44 கோடி ரூபாய் வீதம் வாங்கிக் கொண்டிருந்தவர் 2008-2009ல் வெறும் 15 கோடி அற்பச் சம்பளம் போதும் என்று சொல்லிவிட்டாராம்….என்னடா இந்தக் கொடுமைன்னு கேட்டால், நிறுவனத்தின் பங்குகளில் இருந்து ஆண்டுதோறும் வரும் ஈவுத் தொகை 1390 கோடியை வைக்கவே இடம் இல்லையாம்…போதும்டா நீங்களே வச்சுக்குங்க என்று சொல்ல எத்தனை பெரிய மனசு வேண்டும் பாருங்கள். அநியாயத்திற்கு முதலாளி வர்க்கம், சுரண்டல், அது இதுன்னு வெற்றுத் தத்துவம் பேசி தொழிலாளிகளை உசுப்பி விடும் ஆட்களை ஏதாவது செய்யத் தான் வேண்டும் அல்லவா…

நல்ல நாளும் அதுவுமா இத்தனை தெரிந்து கொண்டதோடு இன்னொரு செய்தியும் கற்றுக் கொள்வோம். முதலாளி வாங்கும் ஊதியத்திற்கும், நிறுவனத்தின் நடுவாந்திர ஊதியத்துக்கும் என்ன விகிதம் என்று பார்க்கும் கணக்கீடு ஒன்று உண்டாம். அப்படி பார்த்தால், நம்ம அப்போலா டயர்ஸ் நிறுவனத்துக்காரர் கன்வர் பற்றிப் பார்த்தோமே, மனுஷன் வாங்கும் ஊதியம் (ச்சே அதுக்கும் பேரு ஊதியம் தானாமே…என்ன நியாய உணர்வு!), நிறுவன நடுவாந்திர சம்பள வரிசையைப் போல 1069 மடங்காம்! அது சரி, டயர் கம்பெனி ஓனருக்கு எத்தனை ‘டயர்டா’ இருக்கும் அன்றாடம் எத்தனை கவலை, எத்தனை தொல்லை, எத்தனை வேலை பளு, அதுக்குத் தக்கின கூலி வேண்டாமா? முதலாளிகள் கஷ்டம் யாருக்குப் புரிகிறது, எக்குத் தப்பாகி பாவம் ஒரு விஜய மல்லையாவை வெளி நாட்டுக்கு ஓடவிட்டு அப்புறம் பாஸ்போர்ட்டை முடக்கி வைக்க வேண்டியாகப் போச்சு.

சரி, நாம் வாழும் உலகுக்கு வருவோம்….மத்திய அரசைக் குறைந்தபட்ச மாத ஊதியம் ரூ 10,000 அறிவிக்க வைக்கவே படாத பாடு பட்டுக் கொண்டிருக்கிறது தொழிலாளி வர்க்கம். பிச்சைக்காரகளுக்கு எத்தனை பெற்றுக் கொண்டால்தான் ஜென்மம் சாபல்யம் ஆகும் என்று நினைப்பு ஆட்சியாளர்களுக்கு. உள்ளே பணக்காரப் பந்தி பரிமாறல் நடத்தவே ஆள் அம்பு, கஜானா காசு கட்டுபடி ஆகாதபோது, பொழுதன்னிக்கும் வாசலில் கத்திக் கொண்டிருக்கும் பஞ்சைப் பராரிகளை அவர்களால் எப்படி சகித்துக் கொள்ள முடியும். ‘போ போ அப்பால, சாயந்திரமா வா ஏதாவது பார்த்துக் கொடுக்கலாம்’ என்று விரட்டவே நேரம் சரியாக இருக்கிறது அவர்களுக்கு.

நிரந்தரமற்ற காசுவல் தொழிலாளி என்ற பெயர் இப்போது பொதுத்துறை வங்கிக்குள்ளேயே வந்து இறங்கியபிறகு தனியார் நிறுவனங்களைக் கேட்பானேன். ஆதாரமே அற்று அட்டைகளால் உறிஞ்சப் பட்டுக் கொண்டிருக்கும் கோடிக் கணக்கான ‘பாவி’களுக்கு ஆதார் அட்டைதான் குறைச்சலா? மொட்டையின் மகன் ஆண்டி, பிளாட்பார வீடு, தெருத் தெருவாய் சுற்றும் வீதி, மாதத்துக்கொரு மாநிலம் என்ற முகவரிக்கு யார் அரிசி, பருப்பு, சர்க்கரை, சமையல் எண்ணெய் எல்லாம் கொட்டிக் கொடுத்துச் சீரழிந்து கொண்டிருப்பது. ஆண்டவனாப் பார்த்து, மெட்ரோ கட்டுமானப் பணியின்போது சரிந்து விழும் பாறங்கல்லைத் தலையில் போட்டோ, வேறெங்காவது மின்சாரக் கம்பிகளில் இடித்துக் கொண்டோ, மௌலிவாக்கம் மாதிரி அப்பார்ட்மென்ட் இடிந்து நொறுங்கியோ அவர்களது பிரச்சனைகளைச் சிக்கல் இல்லாமல் முடித்துத் தருவதை ஈர மனத்தோடு பார்க்க ஒரு நாதி இல்லை, நாட்டில்.

இராச் சாப்பாடு இல்லாமல் உறங்கப் போகும் இந்தியர்கள் பற்றி பல ஆண்டுகளுக்கு முன்பே ஒரு கணக்கைச் சொன்ன மறைந்த மால்கம் ஆதி சேஷய்யா அவர்கள் இப்போது இருந்தால் நாணிக் கோணிப் போவார்கள். ஐ பி எல் ஆட்டம் எல்லாம் நடத்தி ஆட்டக்காரர்களை ஏலத்தில் எடுக்கவே நிதி பற்றாக்குறை ஏற்பட்டுத் தவிக்கும் நாட்டில் மைல் கணக்கில் நடந்தும் தூய்மையான குடி தண்ணீர் இல்லை என்று போராடும் மராத்திய மக்களை என்ன சொல்வது. குடிக்கவே தண்ணி இல்லையாம், இதில் வேளாண்மை வேறு நடத்தி நாசமாப் போனதெல்லாம் போதும் என்று தாயுள்ளத்தோடு முதல்வர் ஆனந்தி பென் சொன்ன குஜராத் மாநில மண் வாசம் எத்தனை மகோன்னதமானது. மூன்று மாத மழை ஒரே நாளில் பெய்தால் ஒரு வருடச் சாவு இரண்டே நாளில் விழத் தான் செய்யும் என்று சொல்லக் கூட ஐந்து ஆண்டுகளுக்கு ஒரே ஒரு முறை மக்களை தொலைவில் இருந்து வந்து சந்திக்கும் தமிழக முதல்வர் ஜெயலலிதா அவர்களது பாசமிக்க மிரட்டல்களைக் கொண்டாடத் தெரியாத குணமென்ன குணமோ!

போதாததற்கு,பொதுத் துறையில் இருக்கும் தொழிற்சங்கங்கள் ஆனாலும் எப்போது பார்த்தாலும் சத்தம் எழுப்பிக் கொண்டிருக்கின்றனர். காண்டிராக்டுமயம், பங்கு விற்பனை எந்த சீர்த்திருத்தமும் இவர்கள் கண்ணுக்கு அபாயமாகத் தெரிகிறதாம்….காலா காலத்தில் எல்லாவற்றையும் தனியார்மயம் ஆக்கி இருந்ததால் ஒரு பய கேள்வி கேட்க முடியுமா…..உலக வங்கிக்கும், உலக நாடுகளில் இருந்து வரும் நிதி மூலதனத்திற்கும் இவர்கள் அப்பனா வந்து பதில் சொல்லப்போவது! ஸ்வச் பாரத் என்று எதற்கு நரேந்திர மோடி குரல் கொடுத்தார், இந்தக் குப்பைகளை எல்லாம் பெருக்கி எடுத்துப் போடு என்பதற்குத் தானே!

உலக பொருளாதாரமே சிக்கித் திண்டாடியபோது இங்கே நாங்கள்தான் காப்பாற்றினோம் என்று ப சிதம்பரம் பீற்றிக் கொண்டாலும், உண்மையில் சீர்திருத்தங்களுக்கு முட்டுக்கட்டை போட்ட இடதுசாரிகளும், விடாது போராடிக் கொண்டிருக்கும் தொழிற்சங்கங்களும் தானே காரணம் என்று அமித் ஷா வகையறாக்களுக்குத் தெரியாதா என்ன, இதெல்லாம் ஒரு விஷயமா, உலகம் எந்த வேகத்தில் மாறிக் கொண்டிருக்கிறது, அதானி, அம்பானி குடும்பங்களுக்கு எத்தனை கனவு இன்னும் ஈடேறாமல் இருக்கிறது….கனவு காணுங்கள் என்று அப்துல் கலாம் சொன்ன சொற்களை மறக்கலாமா அரசு!

திருபாய் அம்பானி மறைவுக்குப் பிறகு, பல மடங்கு வர்த்தகமும், லாபமும் உயர்ந்த பிறகு எப்படி சொத்தைப் பிரித்துக் கொள்வது என்று அம்பானி சகோதரர்கள் சண்டை போட்டுக் கொண்டிருந்தபோது, அதில் தலையிட்டு சமாதானம் செய்த கோகிலா பென் அவர்களுக்கு நெஞ்சார்ந்த நன்றி தெரிவித்து ப சிதம்பரம் நிம்மதி பெருமூச்சு விட்டாரே, யார் அந்தப் பெண்மணி? சகோதர அம்பானிகளின் சாட்சாத் அம்மாவே தான். தேச பொருளாதாரம் சந்திக்க இருந்த நெருக்கடியை ஒரு சாதாரணத் தாய் தீர்த்தவைத்த சிலிர்க்கவைக்கும் தியாகக் கதைகளை தொழிலாளி வர்க்கம் கொண்டாட வேண்டாமா..அதை விட்டுவிட்டு, வெள்ளம் சூழ்ந்தபோது பம்பாயில் தகவல் தொடர்பு சேவையைத் தொடர முடியாது என்று ரிலையன்ஸ் மறுக்க, பொதுத்துறை தகவல் தொடர்பு நிறுவனம் மட்டுமே இயங்கி உயிரையும் உடைமையையும் பாதுகாக்க உதவி புரிந்ததாம்…இங்கும் தமிழக வெள்ள அபாயத்தின்போது பி எஸ் என் எல் மட்டுமே இயங்கியதாம், இதை எல்லாம் நினைவுபடுத்தி மக்களைக் குழப்பிக் கொண்டிருக்கின்றனர். தனியார் நிறுவனங்களுக்கு சூப்பர் சிங்கர் தமிழகத்தின் செல்லக் குரல் தேடலுக்கு லட்சக் கணக்கில் குறுஞ்செய்தி வசூலிக்க வேண்டி இருக்கிறது, அதிகக் காசு பிடுங்க வேண்டி இருக்கிறது, இதற்கே நேரம் இல்லையாம்…கொஞ்சம் அப்படி இப்படி தான் இருக்கும் சேவை, இதுக்குப் போயி அலட்டிக்கலாமா…

ஆயிற்று, இனி ஏழை பாழைகள் எதுவுமற்றவர்கள் ரயில்வே பிளாட்பாரங்களில் படுத்து இடத்தைப் பாழடித்துக் கொண்டிருக்க முடியாது. நாங்கள்தான் பிளாட்பாரத்தையே தனியாருக்கு விற்கப் போறோம்ல….அப்புறம் சரக்கு ரயில், பயணிகள் ரயிலில் பெட்டிகளை முதலாளி வீட்டுப் பிள்ளைகள் கொஞ்சம் சொந்தப் பொறுப்பில் வைத்து விளையாடிப் பார்க்க ஆசையாக இருக்கின்றனர்…உங்களுக்கு இல்லாததா கண்ணுகளா என்று எடுத்துக் கொடுத்தால் என்ன என்று தீவிர சிந்தனை ஓடிக் கொண்டிருக்கிறது.

ரகுராம் ராஜன், அதுதான் இந்த ரிசர்வ் வங்கியின் கவர்னர், கொஞ்சம் திருவாயை வைத்துக் கொண்டு சும்மா இருக்கிறாரா மனுஷன், பார்வையில்லாதோர் பூமியில் ஒற்றைக் கண் உடையவனே ராஜா என்று போட்டு உடைத்துவிட்டார்… ..ஜி டி பி., பி பி பி என்று மக்களுக்குப் புரியாத எழுத்துக்களைச் சொல்லி இந்தியா எங்கோ உயரத்திற்குப் போய்விட்டது என்று ஜல்லி அடித்துக் கொண்டிருந்தது பொறுக்காமல் காற்றைப் பிடுங்கி விட்டார். வளர்ச்சி எல்லாம் ச்சும்மா…..போக வேண்டிய தூரம் அதிகம் என்று இப்படியா உளறிக் கொட்டுவது.

நேற்று கூட பாருங்கள், தெலுங்கானா மண்ணில் வறட்சி, எட்டணாக் காசு இல்லை. குல்காசார்லா பேருந்து நிலையத்தில் சிறு வயது மகனை விட்டுப் போக முடியாத ஆற்றாமையோடு மாமனார் மாமியார் பொறுப்பில் விட்டுவிட்டு, பெண் குழந்தைகளை அழைத்துக் கொண்டு கணவனோடு வேலை தேடி மும்பைக்குப் புறப்படும் பெண்மணியின் கண்களில் இப்படியாக இடம் பெயர்ந்து செல்லும் கோடிக் கணக்கான உதிரி பாட்டளிகளின் சார்பில் கண்ணீர் கெஞ்சி நிற்கிறது…. வளர்ச்சி என்றால் சும்மாவா…வல்லரசுக் கனவு வேண்டாமா…அதற்கு எல்லாம் ஒரு விலை உண்டல்லவா….சோகமான திரைப்படம் மாதிரி ரசித்து விட்டு வேறு காட்சியை மாற்றிப் பாருங்கள்…சானலை மாற்றிக் கொள்ளுங்கள்…கோக், பெப்சி, கென்டக்கி சிக்கன் எடுத்துக் கொள்ளுங்கள்…ஓ நீங்கள் சுதேசியா…கவலையை விடுங்கள்…பாபா ராம்தேவ் வழங்கும் பதஞ்சலி உணவுப் பொருள்களுக்கு இணையதளத்தில் ஆர்டர் கொடுங்கள்…மலிவு விலையில் அம்மா தண்ணீர் ஒரு பாட்டில் வாங்கிக் குடித்து எல்லாவற்றையும் செரிக்கப் பழகிக் கொள்ளுங்கள்.

மே தினம் வரும்போதெல்லாம் கொஞ்சம் அதிர்ச்சி முழக்கங்கள் கேட்கும்தான்….பழைய வரலாற்றுக் கதைகளை பேசிக் கொண்டே போய்க் கொண்டிருப்பார்கள்… இப்படியே காலம் போய்விடாது என்பார்கள். மக்கள் கொதித்தெழுவார்கள் என்பார்கள். ஜனநாயகக் குரல்கள் ஒலிக்கும் என்பார்கள். புரட்சியின் கீதங்கள் இளைய தலைமுறையை ஒரு நாள் கவ்வும், படிப்பினைகளில் இருந்து புதிய திசைவழியில் விடுதலைக்கான இறுதிப் போர் நடக்கவே செய்யும் என்பார்கள். அதன் ஆச்சரிய விதைகளை ஆந்திரத்தில், தில்லியில் பல்கலைக் கழகங்களில், நம்மூர் ஐ ஐ டியில் பார்த்தீர்களா என்பார்கள்…சாதியைக் கடந்து, மதங்களைக் கடந்து உழைப்பாளி மக்களை ஒன்றுபடுத்தி அணிதிரட்டுவோம் என்பார்கள்…உங்களிடம் சொல்வதற்கென்ன, இப்படியான விஷயங்களில் உண்மை இருக்கத் தான் செய்கிறது…ஆங்காங்கு கலகங்கள் வெடிக்கத் தான் செய்கின்றன. இதை விரும்பாதவர்கள் போர்வையை இறுக்கப் போர்த்திக் கொண்டு குளுமை செய்யப்பட்ட அறைகளில் தூக்க மாத்திரை போட்டுக் கொண்டு நிம்மதியாகத் தூங்கப் பாருங்கள். ஏனென்றால், எப்போதுமே அநியாயமும் அக்கிரமும் வென்று கொண்டிருக்காது என்றுதான் சமயங்களில் தோன்றுகிறது. அதனால் எச்சரிக்கையாக இருப்பது மூலதனத்திற்கு நல்லது.

*****************

May 1, 2016
தொழிலாளர் தினம்

ரா.பார்த்தசாரதி

தொழில்கள் சிறக்க தொழிலாளர்கள் தேவை

பொருட்கள் செய்யவும் தொழிலாளர்கள் தேவை

எந்திரங்கள் செய்தாலும் தொழிலாளி தேவை

அதனை இயக்கவும் ஒரு தொழிலாளி தேவை !

தொழில் வளர்ச்சிக்கு தொழிலாளி முக்கியம்

அவர்கள் இல்லை எனில் உற்பத்தி குறையும்.

அவர்களை நல்ல முறையில் நடத்துங்கள்

அவர்கள் நலனில் அக்கறைக் காட்டுங்கள் !

தொழிலாளியும் சாதிமதமற்ற மனிதன்தான்

அவனுக்கும் வீடு வாசல்என்பதுண்டு

முதலாளிகள் பலர் கசக்கிப் பிழிவதுண்டு

நியாத்தை கேட்க அவர்களுக்கு உரிமையுண்டு

தொழிலாளி மெச்சிய ஒரு முதலாளி இல்லை

முதலாளி மெச்சிய ஒரு தொழிலாளி இல்லை

என்றும் முதலாளி, தொழிலாளி முரண்பாடு

கோரிக்கைகள் ஏற்க தொழிலாளி போடும் கூப்பாடு

கார்ல்மார்க்ஸ் தொழிலாளர் இனத்தை மேம்படுத்தினார்

தொழிலாளர்க் கென தனி கொள்கைகளை வகுத்தார்

மே முதல்தேதி தொழிலாளர் தினமாய் கொண்டாடுகிறோம்

தொழிலாளர்களின் வாழ்வு வளம்பெற பாடுபடுவோம்

May 1, 2016