கொரிய மூலம் : கிம் யாங் – ஷிக்
ஆங்கில மூலம் : கிம்ன் ஜின் – சுப்
தமிழ் மொழிபெயர்ப்பு : பவள சங்கரி
INDIA /II
The day breaks
பொழுது புலர்கிறது
பொழுது புலர்கிறது,
என் செவிகளினூடே மத்தளமிட்டவாறு.
நறுமணமிக்க மலர்கள்
நித்திய ஒழுங்கு முறையில்
களங்கமின்றி மலர்கின்றன.
ஒளிரும் கதிரவனுடன்,
வழமையாய் மனிதருக்கு ஊட்டமளிக்க
வகைவகையாய் கனியும் அற்புதக்கனிகள்
இசைக்கருவிகள்,
மேசைவிரிப்புகளும் ஆடைகளும்.
இப்படியொரு அதியற்புத நாட்டை
என்றேனும் நான் கனவிலும் கண்டிருப்பேனா?
எம் . ஜெயராமசர்மா ….. மெல்பேண் …. அவுஸ்திரேலியா
கலியுகத்தின் தெய்வமே – கந்தப்பெருமானே
நிலைபெறவே வேண்டுறேன் – கந்தப்பெருமானே
பவவினைகள் போக்கிடுவாய் – கந்தப்பெருமானே
பாவிகளைக் காத்திடுவாய் – கந்தப்பெருமானே
முத்தமிழாய் முகிழ்த்தவனே – கந்தப்பெருமானே
சொத்தெனவே நிறைந்தவனே – கந்தப்பெருமானே
சத்தியமாய் உள்ளவனே – கந்தப்பெருமானே
சகலசெல்வம் ஆகியுள்ளாய் – கந்தப்பெருமானே
நித்தமுனைப் பாடிநிற்க – கந்தப்பெருமானே
நினதருளைத் தந்திடுவாய் – கந்தப்பெருமானே
அத்தனையும் உன்னிடத்தில் – கந்தப்பெருமானே
அடைக்கலமாய் அளித்திடுவேன் – கந்தப்பெருமானே !
நிர்மலா ராகவன்
இனி இல்லை தோல்வி
வெகு சிலரே வாழ்க்கையில் வெற்றி அடைகிறார்கள். அவர்களுக்கு மட்டும்தான் அறிவோ, திறமையோ இருக்கிறதென்று அர்த்தமில்லை. எல்லாம் இருந்தும், வெற்றி பெறுவதை எண்ணிக்கூடப் பார்க்க முடியாதபடி ஒருவித பயம் பலருக்கும்.
யார் யாருக்கு இந்தப் பயம்?
1 தந்தை, `எதையும் ஒழுங்காச் செய்யத் தெரியாது! நீ உருப்பட மாட்டே!’ என்று மகனைப் பழிப்பதைக் கேட்டிருப்பீர்கள். இப்படி மட்டம்தட்டிப் பேசுவதுதான் ஊக்குவிப்பது என்று தவறாக நினைத்துக் கொண்டிருந்தார்கள், கடந்த தலைமுறையில். இன்றும் சில பழமைவாதிகள் இதே முறையைத்தான் கையாள்கிறார்கள்.
சிறுவயதில் பழிக்கப்பட்டவர்கள் முன்னுக்கு வரமுடியாதவர்களாக இருக்கிறார்கள். அவர்கள் பெரியவர்கள் சொல்வதை அப்படியே நம்பிவிடுவார்கள். தாழ்வு மனப்பான்மையும் அதனால் விளையும் அச்சமும் மட்டும் நிரந்தரமாக அவர்களுடன் தங்கிவிடுகிறது என்பதுதான் பரிதாபம். அப்புறம் முன்னுக்கு வருவது ஏது!
2 இயற்கையாகவே கூச்ச சுபாவம் உடைய குழந்தைகள்.
கதை
சிறுவயதில் கிராமத்தில் பாட்டி, தாத்தாவுடன் மிகவும் அருமையாக வளர்ந்தவன் சோமு. பள்ளிப்படிப்புக்கு பெரிய நகரத்தில் பெற்றோர் வீட்டுக்கே வந்துவிட, தந்தையின் முரட்டுத்தனமான கண்டிப்பு அவனை மிரளச் செய்தது. தமிழ்ப்படங்களில் வருவதுபோல், தாய் மகனுக்குப் பரிய, தந்தை இன்னும் மூர்க்கமாக வாயாலேயே அவனை வதைத்தார். பரீட்சையில் தோல்வி அடைந்தால் அடி.
ஆண் பிள்ளைக்கோ தந்தைதான் முன்னோடி. அவர் சொன்னால் சரியாகத்தான் இருக்கும் என்று சோமு தன் தந்தை பழித்ததுபோலவே நடக்கத் தொடங்கினான்.
வெவ்வேறு சூழ்நிலைகளில் வளர்க்கப்பட்டதால் உண்டான கூச்ச சுபாவம், தோல்வி அடைந்தால் இன்னும் பழிச்சொல்லுக்கு ஆளாக வேண்டுமே என்ற பயம் எல்லாம் சேர்ந்து கொண்டன. பிறருடன் கலகலப்பாகப் பேசக்கூடப் பயந்து, புதிதாக எக்காரியத்தைச் செய்யவும் தைரியமின்றி, எதிலும் தோல்வி காண்பவனாக ஆகிப்போனான் சோமு.
சில பெற்றோர்கள் தம் பெண் குழந்தைகளுக்கு நல்லது செய்கிறோம் என்றெண்ணி, `நீ கடுமையாக உழைத்து, சிறந்த தேர்ச்சி பெற வேண்டும் என்கிற அவசியமில்லை. எப்படியும் கல்யாணம் செய்துகொள்ளத்தானே போகிறாய்! இளமைக்காலம் ஒருமுறைதான் வரும். இப்போதே நன்றாக அனுபவித்துவிடு!’ என்று சொல்வார்கள்.
இதை அப்படியே ஏற்று நடக்கும் பெண்களில் சிலர் `அப்பா மிக நல்ல அறிவுரை கூறினார்! அதற்குப்பின் அப்படி மகிழ்ச்சியாகவே இல்லை!’ என்பார்கள்.
வேறு சிலர், `நான் நிறையப் படித்து, நாலுபேர் மெச்ச வாழவேண்டும்!’ என்றெல்லாம் ஆசைப்பட்டாலும், அப்பாவுக்கு எதிராக நடப்பது சரிதானா என்ற குழப்பம் உண்டாக, வெற்றியைக்கண்டு அஞ்சுபவர்களாக ஆகிவிடுகிறார்கள்.
அளவுக்கு மீறிய பொறுமை
பிடிக்காத உத்தியோகத்திலிருந்து மாறப் பயந்து, அதைப்பற்றிப் புலம்பிக்கொண்டு, அதிலேயே நிலைத்திருப்பவர்கள் பொறுமைசாலிகள்தானா? வேறு வேலை கிடைக்கும் என்றாலும், புதிய ஒன்று எப்படி இருக்குமோ என்ற பயமே அவர்களை அப்படி இருக்கச் செய்கிறது.
அதேபோல்தான் கணவன் என்ன வதைத்தாலும் அதைத் தாங்கிப்போகும் பெண்களும். `பிறர் என்ன சொல்வார்களோ?’ என்ற அச்சம் எழ, பொறுக்க முடியாத வாழ்க்கையையும் எப்படியோ சமாளித்து வாழ்ந்தார்கள் இவர்கள், அண்மைக்காலம்வரை.
பெண்களுக்கு கல்வியும், சொந்தக்காலில் நிற்கும் திறனும் இருப்பதால், இப்போது நிலைமை சற்றே மாறியிருக்கிறது.
வெற்றியே பாரம்
ஏன் வெற்றி பெறுவதை ஒரு பாரமாக நினைக்கிறார்கள்?
கதை
`இவளைப்போன்ற அறிவாளியை நான் இதுவரை பார்த்ததே கிடையாது. வகுப்பில் முதலாவதாக ஏன் வருவதில்லை?’ என்று பூர்ணிமாவின் ஆசிரியை குழப்பத்துடன் அவள் தாயைக் கேட்டாள்.
தாய்க்கு என்ன நடந்திருக்கும் என்று ஊகிக்க முடிந்தது. வீட்டுக்குப் போனதும், மகளைக் கோபிக்காது, `நான் பாடம் சொல்லிக் கொடுத்தபோது, எல்லாவற்றிற்கும் சரியாகப் பதில் சொன்னாயே! வேண்டும் என்றே தப்பும் தவறுமாக எழுதியிருக்கிறாய். இல்லையா?’ என்று கேட்டாள் புன்சிரிப்புடன்.
அந்தப் பத்துவயதுச் சிறுமி ஒப்புக்கொண்டாள். முதலாவதாக வரும் பெண்ணைப்போல் கர்வியாக, தான் எது சொன்னாலும், செய்தாலும் சரிதான் என்று அடம்பிடிப்பவளாக ஆகப் பிடிக்கவில்லை என்று. அதனாலேயே அப்பெண்ணுக்கு நெருங்கிய தோழிகளே கிடையாது, தானும் அப்படித் தனித்து இருக்க விரும்பவில்லை என்றாள்!
`எனக்கு எவருடனும் ஒத்துப்போக முடியும்,’ என்று பெருமையாகச் சொல்லிக்கொள்பவர் தன் முழுத்திறமையை வெளிப்படையாகக் காட்டமாட்டார். வெற்றி, அதனால் கிடைக்கும் பதவி என்றால் பொறுப்புகளும் அதிகரித்துவிடும் என்பது ஒருபுறமிருக்க, பலருக்கும் தன்னைப் பிடிக்காமல் போய்விட்டால் என்ன செய்வது என்று, ஒரே நிலையில் இருப்பார்கள்.
ஆனால், இவர்களைப் போன்றவர்கள் நிம்மதியாகவோ, மகிழ்ச்சியாகவோ இருக்கிறார்கள் என்று சொல்லிவிட முடியாது. வெற்றியை நினைத்துப்பார்க்கவும் அஞ்சுபவர்களுக்கு இலக்கே கிடையாது. மாற்றமில்லாத வாழ்க்கையே பாரமாகி விடுகிறது.
தம்மையும் தம் குறைகளையும் மறக்க சிலர் தம்மைத் தாமே குலைத்துக்கொள்ளும் நடவடிக்கைகளில் ஈடுபடுவார்கள். மது, மாது, போதைப்பழக்கம் என்று ஏற்படுத்திக்கொள்வார்கள் என்கிறார்கள் ஆராய்ச்சியாளர்கள். தம் திறமைக்கு மீறிய காரியங்களில் ஈடுபட்டு (உதாரணம்: வியாபாரம்) தோல்வி அடைவார்கள்.
எப்படி இந்த நிலையை மாற்றுவது?
தன் குறை என்ன என்று புரிந்து, அதை நிவர்த்தி செய்துகொள்ள முயலுவது.
பூர்ணிமாவுக்குச் சற்று விவரம் புரிந்ததும், அவள் தாய் கூறியது: `கடவுள் உனக்கு நல்ல அறிவைக் கொடுத்திருக்கிறார். அதை முழுமையாகப் பயன்படுத்தாது விடலாமா?’
அதன்பின் அப்பெண் தன் புத்திசாலித்தனத்தை மறைத்துக்கொள்ள முயலவில்லை. அவளைப்போலவே இருந்த சிலருடன் நட்புடன் பழக, வாழ்க்கையில் பிடிப்பும், மகிழ்ச்சியும் உண்டாயின.
சிறு பிராயத்தில் கேட்ட வசவுகளால் தான் குறைபாடு உள்ளவனாக ஆகிவிடமாட்டோம் என்ற உறுதியுடன் செயல்படுவது.
தன்னைத் தாழ்த்த முயல்கிறவர்களின் தொடர்பைக் குறைத்துக்கொண்டு, அவர்கள் முயற்சியைத் தோற்கடிப்பது. வெற்றி பெற்றால், பலருடைய வாய்க்கு அவலாக ஆகிவிடுவோம், அதனால் பாதிப்படையக்கூடாது என்று தெளிவடைவது.
பிறர் நம்மைத் தாழ்த்தவோ, காயப்படுத்தவோ முயன்றால், அதனால் நாம் இழிந்தவர்களாக ஆகிவிடப்போவதில்லை. அவர்கள் சொல்வதில் உண்மை இருக்குமோ என்று நினைத்துக் குழம்புவது அநாவசியம். அவர்கள் எப்படியோ போகட்டும், விடுங்கள்!
உடலாலோ, மனதாலோ, உணர்ச்சிகளாலோ நாம் அவர்களை எதிர்க்காது இருப்பதே சிறந்தது.
இதைப் புரிந்துகொண்டால், தோல்வியைப் புறந்தள்ளலாம். வெற்றிக்கு அஞ்ச வேண்டியதில்லை.
தொடருவோம்
விசாலம்
“நீலா! நீலா! என்ன செய்யறே! எப்போ பாத்தாலும் செல் தானா கையில. இங்க வா! இந்த அகல் விளக்கெல்லாம் அலம்பி துடைச்சு வை. கொஞ்சமாவது எனக்கு உதவப்படாதா என்ன?’”
“இதோ வரேம்மா… எதுக்கு இப்ப இத்தனை அகல் விளக்கு வாங்கியிருக்கே!”
“நீயே யோசிச்சு பதில் சொல்லு. தீபாவளிக்கப்பறம் விசேஷமா என்ன பண்டிகை வரும்? “
“தெரியலேயே அம்மா”
“இதெல்லாம் எங்க இந்தக்கால பெண்ணுக்கு தெரியறது? வேலண்டின் டேன்னா மட்டும் ஒரு மாசம் முன்னாடியே ஆட ஆரம்பிசுடறதுகள்.”
“அதுல என்ன தப்பு இருக்கு?”
“அதுல ஒண்னும் தப்பில்ல. ஆனா அத்தோட நம்ம கலாசாரமும் தெரிஞ்சிருக்க வேண்டாமா? அந்தந்த பண்டிகையை கொண்டாடவும் தெரிஞ்சுக்கணும். அந்த நல்ல நாள் வந்த காரணமும் தெரிஞ்சிருக்கணும். நீயோ பி எட் படிக்கப்போறேன்னு சொல்றே. அப்ப ஸ்கூல் குழந்தைகளுக்கு எல்லாம் சொல்லித்தர உனக்கு முதல்ல தெரிஞ்சிருக்கணும் இல்லையா?”
“ஆமாம்மா நீ சொல்றது சரிதான். இப்ப சொல்லு ஏன் இவ்வளவு விளக்கு எடுத்திருக்கே. பித்தளை விளக்கும் பளபளன்னு தேச்சுருக்கே”
“இப்பவும் ஞாபகம் வல்லையா. கிழிஞ்சுது போ. அடப்பொண்ணே! கார்த்திகை தீபம் வரது தெரியலையா? போன வருஷம் எல்லா இடத்திலும் விளக்கெல்லாம் ஏத்தினோமே!”
“ஆமாம் ஆமாம் பொரி உருண்டை, கடலை உருண்டை, அப்பம் எல்லாம் கூட நைவேத்தியம் செய்தாயே. ஞாபகம் வந்துடுத்து.”
“ஆமாம் திங்கறதெல்லாம் மறக்காமல் ஞாபகம் வந்துடும்.”
“ஹூம் போம்மா! எப்ப பாத்தாலும் என்னை கிண்டல் பண்ணிண்டு.
அது சரிம்மா! நான் இந்த வேலையெல்லாம் செய்யறேன். நீ எதுக்கு கார்த்திகை தீப திருநாள் வந்ததுன்னு சொல்லு. எனக்கும் வேலை செய்ய போர் அடிக்காது”
“அப்படி வா வழிக்கு. சரி கேளு கதையை!
கார்த்திகைத் திருநாள் ரொம்ப சிறப்பு வாய்ந்தத் திருநாள். கல்யாணமோ கார்த்திகையோன்னு சொல்லுவா. கல்யாணம் எத்தனை முக்கியமோ அத விட முக்கியம் இந்த நாள். இதில முருகப்பெருமான் சிவன் பார்வதி துர்கையும் சம்பந்தப்பட்டிருக்கிறார்கள்.
ஒருசமயம் பிரும்மா, “நான் தானே எல்லாவற்றையும் சிருஷ்டி செய்கிறேன் நான் சிருஷ்டி செய்யாட்டா இந்த பிரும்மாண்டமான உலகமே இருக்காது அதனால் நான் தான் பெரியவன் ” என்று கர்வம் பிடிச்சு, எதற்கும் மஹாவிஷ்ணுவிடம் இத பத்தி கேட்கலாம்னுட்டு விஷ்ணுவிடம் சென்றார்.
விஷ்ணு பாற்கடலில் பள்ளிக்கொண்டிருந்தார். பிரும்மாவைப்
பார்த்து வந்த விஷயத்தைப் பத்திக் கேட்டார். பிரும்மா விஷயத்தைச் சொல்லி “இப்போது சொல்! நான் தானே படைக்கிறேன்; நான் தானே உயர்ந்தவன்” னு சொன்னார்.
அதுக்கு விஷ்ணு பகவான், “ஓ பிரும்மா! படைத்தால் மட்டும் போதாது, காக்கவும் வேண்டும். நான் எல்லோரையும் காக்கிறேன். அதனால் நான் தான் பெரியவன். “
வாக்குவாதம் அதிகமாக ரெண்டு பேரும் சிவன்ட கேட்கலாம்னு முடிவு செஞ்சு சிவபெருமானிடம் போய் சேர்ந்தனர். அப்போ சிவன் பெரிய நெருப்புப் பிழம்பாய் லிங்க வடிவில் தோன்றினார். இரு தரப்பிலேந்து எல்லாம் கேட்டப்பறம் அவர் ஒரு பரீட்சை வைச்சார். “யார் என்னுடைய முடியையும் அடியையும் கண்டு வந்து என்னிடம் சொல்லுகிறாரோ அவர்தான் பெரியவர், உயர்ந்தவர்” ன்னார். இதைப் பற்றி அறிய இருவருமே ஆவலாக இருந்தனர். ரொம்ப எளிதான காரியம்ன்னு எண்ணி ரெண்டு பேர்களும் ஒத்துக் கொண்டனர். பிரும்மா அன்னப்பறவையாக மாறினார். விஷ்ணு வராக அதாவது
பன்றி உருவம் எடுத்துக் கொண்டார். அன்னப் பறவையான
பிரும்மா ஆகாசத்துல உயர பறந்து பறந்து முடியைத் தேடித் தேடி அலைஞ்சார். பார்க்க முடியவில்லை. அலுத்து சலித்து களைச்சு போனார்.
சலித்தப்போது அங்க ஒரு தாழம்பூவைப் பார்த்தார்.
“தாழம்பூவே! எனக்கு ஒரு உபகாரம் செய்யணும். நான் சிவனது முடியைப் பார்த்ததாக ஒரு சின்னப் பொய் சொல்லணும்” ன்னார். தாழம்பூவும் சரின்னு
ஒத்துக் கொண்டது.
விஷ்ணுவோ பன்றி ரூபத்தில பூமியைக் குடைஞ்சு மிகவும் ஆழமாப்போய், ஆழமாப்போய் அடியைத் தேடினார். அவருக்கும் அடி தென்படவில்லை. இனி தேட முடியாதுன்னு களைச்சு அவரும் திரும்பி வந்துட்டார். இருவரும் வருத்தத்தோடு சிவனட்ட திரும்பி வந்தா.
தங்கள் தோல்வியை ஒப்புத்துண்டு மன்னிப்பும் கேட்டா. அப்போது சிவன் தன் உண்மையான ரூபத்தைக் சூரிய சந்தரனுடன் மூன்று கண்களுடன் அதாவது நெற்றியில் ஒரு கண்ணுடன் திருசூலம் ஏந்தி தரிசனம் தந்தார். “நாம் மூவரும் படைத்தல், காத்தல், அழித்தல் என்ற மூன்று காரியங்களுக்காக உண்டாக்கப்பட்டோம். நாம் மூவரும் உலகத்திற்கு முக்கியமானவர்கள் தான்”ன்னார்.
பின்னர் பொய் சொன்னதால் பிரும்மாவுக்கு ஒரு கோவிலும் இருக்கக்கூடாதுன்னு கோபத்துல சொன்னார். தாழம்பூவையும் சிவபூஜைக்கு சேர்ப்பதில்லை.”
“அம்மா அடுத்ததா நீ என்ன கேட்கப்போறேன்னு எனக்குத் தெரியும்.”
“என்ன?”
“இந்தக் கதைலேந்து என்ன தெரியறதுன்னு கேப்ப. இல்லையா?’
“ஆமாம் சொல்லேன்.”
“இந்தக் கதையிலிருந்து கர்வம் கொள்ளாதே. பணிவாக இரு. பொய் சொல்லாதே. உயர்ந்தவர் தாழ்ந்தவர் என்ற எண்ணம் கொள்ளாதே என்ற பாடம் கற்றுக்கொண்டோம் இல்லையா? ன்னு ஸ்கூல் குழந்தைகளுக்குச் சொல்ல நல்ல கதை அம்மா”
“நன்னா ஞாபகம் வச்சுக்கோ. ஸ்கூல்ல பாடம் எடுத்தா நிறைய கதை சொல்லி எடுத்தாக்க கிளாஸ் ரொம்ப இன்டெரெஸ்டிங்கா இருக்கும். இல்லாட்டா போர் அடிக்கும்.”‘
“அது சரி அம்மா. கமலா வீட்டிலே கார்த்திகை நமக்கு அடுத்த நாள் வரதாமே அது ஏன்? ஒரே பண்டிகையை ஏன் ரெண்டு ரெண்டு நாள் செய்யணும்?”
“அவாள்ளாம் வைஷ்ணவா. சிவ பூஜை செய்வதில்லை. அவளோட கார்த்திகை லட்சுமி தேவி சம்பந்தப்பட்டது.”
“அதுக்கும் ஒரு கதை இருக்குமே!”
“உம்… இருக்கு இருக்கு கேளு!
கார்த்திகைத் தீபம் எப்போதும் சைவர்களுக்கு முதல் நாளும் அதன் மறு நாள் வைஷ்ணவர்களுக்கும் வரும். இதே போல் ஜன்மாஷ்டமியும் இரண்டு நாட்கள். முதல் நாள் சைவர்கள் கொண்டாட மறுநாள் வைஷ்ணவர்கள் கொண்டாடறா. ஐயங்கார் கார்த்திகையை “பாஞ்சராத்ரதீபம்” என
கொண்டாடுகிறார்கள். அதாவது விஷ்ணு கோயில்ல பக்தர்கள் கோயிலுக்கு முன்னாடி கூடுவார்கள். அப்பறம் பனையோலைகளைக் கூடுகள் போல குமிச்சு அதைச்சொக்கப்பனாக நினைத்து எரிக்கிறா.”
” ஆஹா இன்னொரு கதை வந்துடுத்து”
“ஒரு தடவை மஹாலட்சுமியை ஒரு அசுரன் துரத்த திருமகள் காட்டு நடுவில போய் ஒளிஞ்சுண்டா. அசுரன் இத தெரிஞ்சுண்டு காட்டிற்குள்ளும் வந்துவிட்டான். அவள் அங்குதான் எங்கேயோ இருக்கணும்னு எண்ணி அவளை அழிக்க காட்டிற்குத் தீ வச்சான். ஆனால் மஹாலட்சுமி அந்த இடத்திலிருந்து மறைந்துப்போனாள். இதன் காரணமாகத்தான் விஷ்ணு கோயில்களில் இது போல் எரிப்பது வழக்கம்.
வேறொரு கதை… ஒரு தடவை பிரும்மா ஒரு யாகம் செய்தார். ஆனால் சரஸ்வதிக்கு இது தெரியாது. யாகம் நடக்கும் போது இந்த விஷயம் அவளுக்குத் தெரிஞ்சுது, அதனால் கோச்சுண்டு யாகத்திற்குத் தடங்கல் செய்ய ஒரு அரக்கனை உண்டாக்கினாள். அரக்கன் யாகத்தைத்தடுக்க உலகம் முழுவதையும் இருட்டாக்கினான். எங்க பாத்தாலும் ஒரே இருட்டு.
பிரம்மா மனம் கலங்கி ஸ்ரீமஹாவிஷ்ணுவைத் தியானித்தார்.
மஹவிஷ்ணுவும் மனம் கனிஞ்சு உலகம் முழுவதும் பிரகாசமாக
ஆக்க ஒளி கொடுத்தார்.,அதில உலகமே பிரகாசமானது.
இந்தச் சம்பவம் கார்த்திகை மாதம் கார்த்திகை நட்சத்திரத்தில்
தான் நடந்தது. இதனாலும் வைஷ்ணவர்கள் கார்த்திகைத் திருநாளைக் கொண்டாடுகின்றனர்.”
“போதும்மா நான் அப்பறம் எல்லாம் மறந்து போய்டுவேன்.”
“அது எப்படி மறப்பே! ஹாரி பாட்டர் நாலு பாகமும் நன்னா ஞாபகம் இருக்கே! எல்லாத்துக்கும் ஒரு ஆர்வம் வேணும்! அப்ப மறக்காது.”
“சரிம்மா! என் செல்ல அம்மா! நான் வரேன் நீ நல்ல டீச்சர் தான்.”
“போதும்டி ஐஸ் வைக்காதே! இந்த தடவை கார்த்திகைக்கு பட்டு பாவாடை கட்டிண்டு விளக்கு நீதான் ஏத்தணும்.”
“ஓகே டன் {done}”
க. பாலசுப்பிரமணியன்
“க் …க் .. ஆ ” அந்தக் காகம் “கா..கா.. ” என்று கத்த முயற்சித்துக் கொண்டிருந்தது. காலை நடைப்பயிற்சியில் ஈடுபட்டுக்கொண்டிருந்த எனக்கோ ஒரே வியப்பாக இருந்தது.. ஏன் அதனால் சரியாகக் கத்த முடியவில்லை?
“க் … க் ….” அதன் தொண்டையிலிருந்து குரல் எழும்பவே இல்லை.
ஒருவேளை அதற்குத் தொண்டை கட்டிக்கொண்டிருக்குமோ ?
“அதெல்லாம் ஒண்ணுமில்லீங்க… அது பக்கத்திலே எங்கையாவது எலும்புத் துண்டை பதம் பார்த்திருக்கும். அதிலுள்ள முள் ஏதாவது தொண்டையில் குத்தி குரல் போயிருக்கலாம்” இது அருகில் நின்ற என் மனைவி.
“எந்த எலும்புத்துண்டிலே முள் இருக்கு என்பதும் உனக்குத் தெரிந்திருக்குமே!” என் பதிலை கேட்டு தன் முகத்தைச் சுளித்துக் கொண்டு சென்று விட்டாள்.
தன்னுடைய ஒன்றரைக்கண்ணால் அந்தக் காகம் எங்களையே பார்த்துக்கொண்டிருந்தது.
“க் ..க.. ” மீண்டும் தன் குரலை இழுத்தது. அதன் குரலில் ஏதோ ஒரு வேதனை தெரிந்தது.,
இரண்டு காகங்கள் அதன் அருகில் வந்து உட்கார்ந்தன ” என்ன ஆச்சு உனக்கு?.” என்று தன் கழுத்தை திருப்பிக் கேட்டுக்கொண்டிருந்தன.
“க.. க ..” குரல் எழும்பவில்லை… “எங்கேயாவது கண்ட சாப்பாட்டை பார்த்து ஆசை பட்டிருப்பான்..” என்று ஏளனமாகச் சொன்னது.முதல் காகம்.
“வேறே ஒன்னும் இருக்காது. யாரவது ஐஸ் கிரீம் சாப்பிட்டுவிட்டு அந்த டப்பாவைக் கீழே போட்டிருப்பாங்க.. இது ஐஸ் கிரீம் ஆசையில் அதை சாப்பிட்டிருக்கும். காலங்கெட்ட நேரத்திலே ஐஸ் கிரீம் சாப்பிட்டால் இப்படித்தான் வரும்..” இது இன்னொரு காகத்தின் எண்ணம்.
பதில் சொல்லமுடியாமல் அந்தக் காகம் தன் கழுத்தை சொரிந்து விட்டுக்கொண்டது.
“க்க்க்க் ..” ஏப்பம் விடுவது போல் இன்னொரு இழுப்பு… இரண்டு காகங்களும் கேலி செய்வதுபோல் சிரித்துக்கொண்டே அந்த இடத்தைக் காலி செய்தன.
தனக்கு நேர்ந்த இந்த விபரீதத்தை நினைத்து தாழ்வு மனப்பான்மையுடன் முகத்தை மறைத்துக்கொள்ள அந்த காகம் இலைகள் நிறைந்த இன்னொரு கிளையில் சென்று அமர்ந்தது.
“ஹாய்…” ஒரு பெண்காகம் இதனருகில் வந்து அமர்ந்தது.
“இவ ..எங்கே.. இந்த நேரங்கெட்ட நேரத்திலே…”
“என்ன.. ஒரு ஹாய் கூட சொல்லமாட்டியா. “
“க்க.. “
“என்ன ஆச்சு இந்த தொண்டைக்கு…யாரையாவது கிண்டலடித்துப் பாடி வாங்கி கட்டிக்கொண்டாயா.? தொண்டையைப் பார்த்து அடிச்சுட்டாங்களா?..”
தன்னுடைய கோபத்தை காட்டுவதற்குத் தன் சிறகை வேகமாகப் பல முறை அடித்துக்கொண்டது.
“உன்னை எங்க அப்பாவுக்கு அறிமுகம் பண்ணலாமென்று நினைத்து இங்கே வந்தேன்.. கேவலமான குரலோடு உன்னை அழைத்துக் கொண்டுபோனால் .. அய்யய்யோ.. நினைத்தே பார்க்க முடியவில்லை…
சீக்கிரம் சரி செய்து கொண்டு என்னை வந்து பாரு…” பறந்து சென்றது.
தன் அழகான காதலியை நினைத்து ஏங்கி நின்ற காகத்தால் அவளைக் கூப்பிடத் திராணி இல்லை.
“க்க ..” வலித்தது..
வருத்தத்துடன் சிறிதே தன் திருப்பியதும் அதற்குக் கண்ணில் பட்டதோ பக்கதது வீட்டு சன்னல். உள்ளே அந்த வீட்டு பெரிய மனிதர் ஒரு கரும்பலகையில் எழுதி வைத்திருந்தார்: “முயற்சி திருவினையாக்கும்.”
இது எங்கிருந்தோ வந்த நம்பிக்கை ஒளி…
“க் க ….க் க ..” மீண்டும் மீண்டும் முயற்சி செய்தது.
“தம்பி…” இது ஒரு புதிய வருகை…
“என் பெயர் சின்ன கருப்பன்.. வைத்தியம் பார்க்கிறேன்.. கொஞ்ச நேரம் முன்னாடி ஒரு பொண்ணு வந்து உனக்கு ஏதோ தொண்டையில் பிரச்சினை.. கொஞ்சம் உதவி செய்யுங்க..” என்று சொல்லிவிட்டுப் போனாள் .
பெரியவர் கிளையில் பக்கத்தில் வந்து அமர்ந்தார்.
“கொஞ்சம் தொண்டையக் காட்டு பார்க்கலாம்.”
பரிசோதனை தொடங்கியது.. :”என்ன பண்றே.. கொஞ்சம் வேப்ப மரத்துக்குப் போய் நாலு பழுத்த வேப்பம் பழத்தை சாப்பிடு..சீக்கிரம் சரியாகிவிடும்.. “
“என்ன பெரிய தலைவலி! ..தொண்டையில் வந்து சனி பகவான் உட்கார்ந்து விட்டானா.?..எல்லோரிடமும் இப்படி அவமானப் பட வேண்டியிருக்கே..
“இவனுக்கென்ன ஆண்பிள்ளைக் குரலா?.. இல்லை பெண்பிள்ளைக குரலா? அருகில் பரந்த இரு காகங்கள் கருத்துப் பரிமாற்றம் செய்து கொண்டன.
“அங்கே பாருடா…. காக்காய்.. எப்படிக் கத்துதுன்னு.. நீயும் அது மாதிரி “கா.கா.” ன்னு சொல்லு…. தன் பேரனை இடுப்பில் ஏந்திக்கொண்டு வந்த பாட்டிக்கு இந்தக் குரலை கேட்டு ஒரே குஷி.
குழந்தையும் அந்த காகத்தைப் பார்த்து ..”க்…க் .. ” என்று கேலி செய்தது.
கோபத்தில் கண் சிவந்த காகம் பாட்டியையும் பேரனையும் சுற்றி வந்தது. பயந்துபோன பாட்டி அருகில் இருந்த கம்பினால் ஓங்கி ஒரு தட்டு தட்டிவிட.. அது இதன் சிறகில் பட..
அது பறந்து போய் பக்கத்து மைதானத்தில் உள்ள ஒரு மரக்கிளையில் அமர்ந்தது…
“மயில் அகவும் .. காகம் கரையும் ” பக்கத்தில் உள்ள பள்ளியின் வகுப்பறையில் ஆசிரியை மாணவர்களுக்கு பாடம் சொல்லிகொடுத்துக் கொண்டு இருந்தாள் …
“பசங்களா… சொல்லுங்க.. காகம் எப்படி கரையும்?”
உடனே எல்லா மாணவர்களும் “கா.. கா. ” என்று கத்த ஆரம்பித்துவிட்டனர்.
“ஆண்டவா.. இது என்ன சோதனை. எனக்குப் பாடம் சொல்லிக்கொடுக்கிறாங்களா..”
“க் … க் … என்று ஒருமுறை இழுத்தது..
“மிஸ்.. மிஸ்.. அந்தக் காகத்தைப் பாருங்கள் .. அது “கா.. கா.. ” என்று கத்தவில்லை.. “க்… க் .. ” என்று கரைகிறது..
“டேய் .. அவங்க கூட்டத்துக்கு அது ஒரு மியூசிக் டைரக்டர்டா.. ட்யூன் போட்டுக்கொண்டு இருக்கின்றது.. “
“போதும்.. போதும்.. பாடத்தைக் கவனியுங்கள்.. இல்லைனா .. நீங்களும் அந்த காக்கா மாதிரி தெருத்தெருவா அலையவேண்டியது தான்.
“பாவம்டா அந்த காக்கா. . “
“பரவாயில்லையே .. ” மனித ஜாதியில் இன்னும் சில நல்ல உள்ளங்கள் இருக்கின்றனவே.. மற்றவர்களுடைய துன்பத்தைக் கண்டு சிரிக்காமல்..பரிதாபப்படும் உள்ளங்கள்…
திடீரென்று ஒரு கல்.. கீழேயிருந்து …ஒரு சிறுவன் அந்த மாமரத்தில் உள்ள மாங்காயை நோக்கி அடிக்க.. அது குறி தவறி இந்த காகத்தின் மேல் விழ…
“கா .. “வலி தாங்க முடியாமல் ஒரே அலறல் ,, அடுத்த கல் விழுவதற்கு முன்னால்
“கா.. கா.. ” அது கரைந்து கொண்டே பறந்தது. சில நேரங்களில் ஆண்டவன் நமக்கு எதற்கு துன்பங்களைத் தருகிறான் என்பது நமக்கே தெரியாது.
“கா.. கா.. ” தன் சுய மரியாதை மீண்டும் கிடைத்ததை நினைத்து பெருமையுடன் பறந்து கொண்டிருந்தது.
xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx
க. பாலசுப்பிரமணியன்
கற்றலும் அதனைச் சார்ந்த கொள்கைகளும்
விழி, செவி மற்றும் செயல் சார் கற்றல் முறைகளின் பாதிப்புகள் கற்றலில் மட்டுமின்றி பொதுவாகவே வாழ்க்கையின் பல நடைமுறைகளில் தங்கள் அடையாளங்களைக் காட்டுகின்றன. பொருள்களைத் தேர்ந்தெடுத்தல், உரையாடும் முறைகள், செயல்படும் முறைகள், நம்முடைய நிரந்தரமான பழக்க வழக்கங்கள் ஆகிய பல வாழ்க்கை வழிகளில் இவைகளின் ஆதிக்கமும் ஊடுருவல்களும் காணப்படுகின்றன. ஆகவே, வளரும் பருவங்களில் கற்றலின் போது இந்த ஆதிக்கங்களுக்கு ஏதுவான முறையில் கற்றல் ஏற்படுமானால் அவை அந்தத் தனி நபரின் வளர்ச்சிக்கும் மனநலத்திற்கும் தன்னம்பிக்கைக்கும் ஏணிப்படியாக அமையும் என்பது பொதுவாக மன, மூளை-நரம்பியல் நிபுணர்களின் கருத்து.
மூளையில் கற்றலின் தாக்கங்களை ஆராய்ச்சி செய்த “காண்டல்” என்ற அறிவியல் நிபுணர் -“கற்றல் மூளைநரம்புகளின் இணையத்தைப் பொறுத்து அமைகின்றது ” (Learning is a neural connect) என்ற ஒரு கருத்தை முன்வைத்து கற்றலின் பொழுது மூளை நரம்புகள் தங்களுடைய பழைய இணைப்புகளை விலக்கி புதிய இணைப்புகளை ஏற்படுத்திக்கொள்கின்றன என்ற ஒரு ஆய்வினை வெளிப்படுத்தினார். இதற்கான நோபல் பரிசு அவருக்கு 2000-மாவது ஆண்டில் வழங்கப்பட்டது .
இந்த ஆய்வினால் வெளிப்படும் ஒரு முக்கியக் கருத்து “வகுப்பறைகளில் கற்றலின் பொழுது இருக்கின்ற சூழ்நிலைகள் கற்றலுக்கான உள்ளமைப்புகள் மூளையில் ஏற்படும் இந்த இணைப்புகளுக்கும் இணையங்களுக்கும் துணையாகவும் அவற்றை வளப்படுத்துவதாகவும் அமைதல் அவசியம் என்பதே”. எனவே பள்ளிச்சூழ்நிலைகள், பாட அமைப்புக்கள், பாடங்கள் நடத்தப்படும் விதங்கள், பள்ளிகளில் உறவாட அமையும் சூழ்நிலைகள் போன்ற பல இந்த இணைப்புக்களுக்கு உதவியாகவோ அல்லது எதிர்மறையாகவோ இருக்க வாய்ப்புண்டு. அதை சரியாக அமைப்பது சமுதாயத்தின் முக்கிய கடமை.
மூளை தொடர்ந்து கற்றலில் ஈடுபட்டு வருகின்றது. கருவறையிலிருந்து கடைசி மூச்சு வரை கற்றல் வெளிப்படையாகவோ அல்லது மறைமுகமாகவோ நடந்து கொண்டிருக்கின்றது. இதன் காரணமாக மூளையின் நியூரோன்களின் கட்டமைப்புகள் தொடர்ந்து மாறிக்கொண்டும் புதிதாகிக்கொண்டும் இருக்கின்றன. இது நாம் விரும்பியோ விரும்பாமலோ நடக்கின்ற செயல். இதன் மேல் நமக்கு எந்த கட்டுப்பாடும் கிடையாது.
கிட்டத்தட்ட நாற்பது ஆண்டுகளுக்கு முன்னே “இளமையில் கல் ” என்ற கருத்து வலுவாக இருந்தது. பொதுவாக கற்றலின் வேகமும் ஆழமும் இளமையில் அதிகமாக இருக்கும் என்றும் மேலும் சுமார் முப்பது வயதுக்கு மேல் கற்றலின் வேகமும் முழுமையும் குறைந்துவிடும் என்றும் கருதப்பட்டது. ஆனால் இந்த கருத்து தற்போது முழுமையாக நிராகரிக்கப்பட்டு “கற்றல் எந்த வயதிலும் நடக்கலாம் .. கடைசி மூக்சுவரை மூளை கற்றலுக்குத் தயாராகவே இருக்கின்றது” என்ற சீரிய கருத்து ஏற்கப்பட்டு அங்கீகரிக்கப்பட்டுள்ளது.
நரம்பு நெகிழின்மை (நியூரோ-பிளாஸ்டிசிடி ) என்ற புதிய அறிதல் மூலமாக நமது மூளையின் வேலைத்திறன்கள் பற்றிய புதிய கருத்துக்கள் கற்றல் பற்றிய நமது பழைய கருத்துக்களை வெகுவாக மாற்றியுள்ளன. மாணவர்களின் கற்றல் திறன்கள், கற்றலின் ஆழம், கற்றல் பற்றிய விருப்பு- வெறுப்புகள், ஆகியவை பற்றி புதிய கோணங்களில் ஆய்வுகள் மேற்கொள்ளப்பட்டு வருகின்றன.
இந்த கண்டுபிடிப்புகளின் காரணமாக கற்றலைப் பற்றிய கொள்கைகளில் பலவித மாற்றங்கள் தொடர்ந்து வந்து கொண்டிருக்கின்றன ஒரு நூறு ஆண்டுகளுக்கு முன்பு கற்றலின் இலக்கு கற்பவரின் நடவடிக்கைகளில் ஏற்படும் சிறப்பான பயனுள்ள மாற்றங்கள் (Behavioural outcomes ) என்பதை அடிப்படையாகக்கொண்ட “Behaviourism” என்பதாக இருந்தது . பின்னொரு காலகட்டத்தில் வல்லுநர்கள் “அறிவாற்றல்” இருந்தால்தான் நடைமுறை மாற்றங்கள் ஏற்படும் என்ற கருத்தை முன்னிறுத்தி “அறிவாற்றல் இயல்” (Cognitivism) என்ற ஒரு கொள்கையை முன்வைத்தனர்
பின்னொரு காலகட்டத்தில் “கற்றல்” என்பது ஒரு தனிப்பட்ட மனிதனின் மூளையில் நடக்கும் ஒரு சிந்தனை சார்ந்த செயல்; எனவே ஒவ்வொரு கற்றலும் ஆக்கப்பூர்வமானது” என்ற கருத்தை மேற்கொண்டு “Constructivism” என்ற புதியதோர் கருத்தை முன் வைத்தனர்.
அறிவியல் மற்றும் தொழில்நுட்ப வளர்ச்சிகள் காரணமாக கற்றலில் ஏற்பட்டுள்ள பாதிப்புகளைக் கண்டறிந்து கற்றல் ஒரு தனிப்பட்ட செயலாக இருந்தாலும் அது வெளியுலகின் துணையோடும் தாக்கங்களினாலும் உருவாக்கப்படுகின்றது என்ற கருத்தை மேற்கொண்டு “connectivism“ என்ற ஒரு கருத்தை ஏற்று “கற்றல் என்பது ஒரு சமூக அறிவாக்கச் செயல் “(KNOWLEDGE IS A SOCIAL CONSTRUCT ) என்ற கருத்தை முன்னிறுத்தியுள்ளனர்
எனவே கற்றலைப் பற்றியும் அறிவாக்கத்தைப் பற்றியும் நமது கருத்துக்களும் சிந்தனையும் காலப் போக்கில் மாறிக்கொண்டும் புதிதாக உருவாகிக்கொண்டும் வருகின்றது.
(தொடரும்)
உலகத்தோ டொட்ட வொழுகல் பலகற்றுங்
கல்லா ரறிவிலா தார்.
-திருக்குறள் -140(ஒழுக்கமுடைமை)
புதுக் கவிதையில்…
பற்பல நூல்கற்றும்
அறிவில்லாதவரே,
உலகத்தாரோடு
ஒட்டி உறவாடி
ஒழுகக் கல்லாதவர்…!
குறும்பாவில்…
உலகத்தவர்களுடன் உறவாடி
ஒழுக அறியாதவர்,
பலநூல் கற்றும் அறிவிலாரே…!
மரபுக் கவிதையில்…
அறிவைப் பெருக்கிடப் பலநூற்கள்
ஆர்வமாய்த் தேடிப் படித்தேதான்
சிறந்த அறிவைப் பெற்றவரும்,
சுற்றி யுள்ள உலகோருடன்
உறவாய்ச் சேர்ந்தே உறவாடி
ஒழுகிடக் கற்க வில்லையெனில்,
அறிந்த கல்வியில் பலனில்லை
அறிவிலார் பெயரே பெறுவாரே…!
லிமரைக்கூ..
உலகத்தோடு சேர்ந்தொழுகக் கல்லார்,
பலநூல் படித்தே அறிவைப் பெற்றாலும்
உண்மையிலவர் அறிவென்பதே இல்லார்…!
கிராமிய பாணியில்…
கத்துக்க கத்துக்க
ஒழுக்கத்தக் கத்துக்க,
ஒலகத்தோட ஒண்ணுசேந்து
ஒழுக்கத்தக் கத்துக்க..
ஒலகத்தோட ஒண்ணுசேந்து
ஒழுக்கத்தக் கத்துக்கல்லண்ணா,
பலவகையாப் படிச்சியேதான்
பெருமறிவச் சேத்தாலும் பலனில்ல
எந்தப் பலனுமில்ல,
உண்மயில அவன் அறிவில்லாதவன்தான்..
அதால
கத்துக்க கத்துக்க
ஒழுக்கத்தக் கத்துக்க,
ஒலகத்தோட ஒண்ணுசேந்து
ஒழுக்கத்தக் கத்துக்க…!
-செண்பக ஜெகதீசன்…
பாரசீக மூலம் : உமர் கயாம் ரூபையாத்
ஆங்கில மூலம் : எட்வேர்டு ஃபிட்ஜெரால்டு
தமிழாக்கம் : சி. ஜெயபாரதன், கனடா.
+++++++++++++++
[55]
முதிய கயாம் திராட்சை ரசம் குடிக்கையில்
நதிக்கரை ஓரம் ரோஜா மலர் மிதக்க,
தேவதை யானவள் கருநிற ஒயினுடன்
உன்னைக் கவர வந்தால் பின் வாங்காதே.
[55].
While the Rose blows along the River Brink,
With old Khayyam and ruby vintage drink:
And when the Angel with his darker Draught
Draws up to Thee – take that, and do not shrink.
[56]
அஞ்சாதே! இன்றேல் உன் வசிப்புக் காலம்
முடிந்து போகும், அடையாளம் மறந்து போய்,
நிரந்தர ஊழ்சகி ஊற்றிய குவளையில் நம்போல்
குமிழிகள் கோடி; மேலும் படைக்க ஊற்றும்.
[56]
And fear not lest Existence closing your
Account, should lose, or know the type no more;
The Eternal Saki from the Bowl has pour’d
Millions of Bubbls like us, and will pour.
[57]
நீயும் நானும் திரை மறைவில் கடந்தோம்
நீண்ட நீண்ட தூரம் உலக விளிம்பு வரை,
நமது பிறப்பு, இறப்புக் கணக்கெடுத்தால்
கடலளவு அகண்ட கூழாங்கல் எண்ணிக்கை.
[57]
When You and I behind the Veil are past,
Oh but the long long while the World shall last,
Which of our Coming and Departure heeds
As much as Ocean of a pebble-cast.
++++++++++++++++++
நெசவாளியை நெய்கின்ற பட்டு நூல்
அணில் கனவு காண்கிறது
நீ தேவதைச் செடியென்றும் உன் இதழ்ப் பழம் கடித்து
உண்ணலாமென்றும்
பள்ளிக்கூடம் செல்லாத பாமரனும் எழுதுவான் செய்யுள்
இரண்டு இளநீர் மட்டுமே காய்த்திருக்கின்ற
இளந் தென்னை நீயென
குருவி கிளி விரும்பும்
உன் பற்கள் வெள்ளை நெற்கள் என நினைத்து
கொறித்திட
தென்றல் வாசித்து மகிழும் உன் மூக்கு
இரண்டு துளைகள் கொண்ட இரண்டு இஞ்சிப் புல்லாங்குழல்
என்று
மன்மதன் விரும்புவான்
உன் கன்னத் தங்கக் காகிதத்தில்
இதழ் எழுதுகோல் கொண்டு கவிதை எழுத
விலகியிருக்கும்
இரண்டு கறுப்புத் தண்டவாளங்கள் உன் புருவங்கள்
விபத்தாகுவான்
கண்களால் புகையிரதம் செலுத்துபவன்
உன் நுதல் கண்ட பிறை தொடர்ந்து வளராது
அப்படியே நிற்கும்
அழகில் சொக்கியும் சிக்கியும்
கறுப்பு வெள்ளையென இரண்டு மீன்கள் துடிக்கின்ற
உன் முகக் குளத்தில்
ஒற்றைக் காலில் நிற்கும் கொக்குப் பார்வை
நிலா
நட்சத்திரங்கள் உதிக்கலாம்
உன் கூந்தல் ஒரு துண்டு இரவென்று நினைத்து
கவனம்
உன்னைப் பார்த்தபடியே விழித்திருக்கிறது
அறைக்கண்ணாடி
அதற்குப் போடு அல்லது நீ போடு ‘ பர்தா ‘
புதிதாகப் படைக்கப்பட்ட தண்டுப் பூக்கள்
உன் விரல்கள்
அதில் போதையோடு அமரும் பட்டாம் பூச்சிகள்
நான் நம்புகிறேன்
பிறைப் பிஞ்சு பெளர்ணமிப் பழமாக
தண்ணீர் ஊற்றுகிறது உன் அழகுதான் என
– ராஜகவி ராகில்
வேலூர் மாவட்டம் வாலாஜாபேட்டை அனந்தலை மதுரா கீழ்புதுப்பேட்டையில் அமைந்துள்ள ஸ்ரீ தன்வந்திரி பீடத்தில் இன்று ஜீலை மாதம் 2 ம் தேதி ஞாயிற்றுக்கிழமை ஆனி சித்திரை நட்சத்திரம் ஸ்ரீசுதர்சனர் ஜெயந்தியை முன்னிட்டு காலை 10.00 மணியளவில் மாபெரும் சுதர்சன ஹோமம் வெகு சிறப்பாக நடைபெற்றது
இந்த யாகத்தில் தீர்க்கஆயுசு பெறவும் பூரண ஆயுள் கிடைக்கவும், நினைத்தது நிறைவேறவும் அஷ்ட ஐஸ்வர்யம் பெறவும், புத்தியில் தெளிவு கிடைக்கவும், ஆபத்துக்கள் வராமல் தடுக்கவும், பசுவிருத்தி ஏற்படவும் வீட்டில் உள்ள பசு அதிகம் பால்சுரக்கவும், பசுவை எந்த நோயும் அண்டாது இருக்கவும், சுகப்பிரசவம் ஆகவும், சுபிட்சங்கள்பெறவும், பசுவிருத்தியாகவும், எதிரிகள்தொல்லை நீங்கவும், மன நலம் குணமாகவும், புத்தி பேதலித்தவர்கள் நலம் பெறவும், விரைவில் மனோபலம் பெறவும், தீராத நோய்கள் தீரவும், கேன்சர், சர்க்கரை வியாதி போன்ற கண்ணுக்குத் தெரியாத நோய்கள் நீங்கவும் கோபம் தனியவும், குருவை அவமதித்த பாவம், சாதுக்களைத் திட்டிய சாபம், பெரியவர்களை மதிக்காமல் போன பாவம் நீங்குவதற்கும் பிரார்த்தனை செய்யபட்டது.
இந்த யாகத்தில் வெண்கடுகு, எள், கடுகு, தாமரைப்பூ, வில்வ இலை, பால் பாயசம், அருகம்புல், சர்க்கரை பொங்கல், தயிர், நாயுருவி, ஆலமரசமித்து, நெய், பஞ்சகவியம், கருநொச்சி, இருமுள், நீல ஊமத்தபூ, வெள்ளை புலாச்சு, குக்கிலு, சம்மதபூ, வெண்பட்டு போன்ற பொருட்கள் சேர்க்கப்பட்டது.
மேலும் சுதர்சன பெருமாளுக்க 16 விதமான அபிஷேக திரவியங்களை கொண்டு மகா அபிஷேகமும் விஷேச அர்ச்சனையும் நடைபெற்று தொடர்ந்து அன்னதானமும் நடைபெற்றது. இந்த தகவலை தன்வந்திரி குடும்பத்தினர் தெரிவிதனர்.
பவள சங்கரி
தலையங்கம்
வாழ்வாதாரத்தையே தொலைத்துவிட்டு தமிழ் ஈழம் இழந்து 10 ஆண்டுகளுக்கு முன் தாயகத்திற்கு அகதிகளாக வந்து, சென்னை, ஈரோடு போன்ற பல்வேறு பகுதிகளில் அகதிகள் முகாம்களில் தங்கியிருந்தும், அல்லது அங்கிருந்து வெளியே வந்து தங்கியிருந்தும் கல்வி ஒன்றே தங்கள் நிலையான எதிர்காலம் என்பதை உணர்ந்துகொண்டு மிகச்சிறந்த முறையில் 10 ஆம் வகுப்பில் 92%, 12ஆம் வகுப்பில் 95%, குறிப்பாக பெண்கள் அதிகளவில் வெற்றி பெற்றும், இளநிலை பட்ட வகுப்பில் 500 பேருக்கு மேல் தேர்ச்சி பெற்றும், முதுநிலை பட்ட வகுப்பில் 250 பேரும், நல்ல தேர்ச்சி பெற்றும், 5 பேர் முனைவர் பட்டமும் பெற்றுள்ளனர். இவர்களுக்கு நிலையான தங்குமிடமோ, மற்ற வசதிகளோ கிடையாது என்றாலும் தங்கள் எதிர்காலமே கல்வியில்தான் என்பதை மனதில்கொண்டு இந்த உயரிய சிறப்பைப் பெற்றுள்ளதைக்கண்டு தாய்த்தமிழ் நாடே பெருமை கொள்கிறது. தமிழ் ஈழம் செல்ல விரும்புபவர்களுக்கு விமான பயணச்சீட்டு, தாங்கள் தங்கியிருக்கும் இடத்திலிருந்து விமான நிலையம் செல்ல ஆகும் செலவுத்தொகை மற்றும் இலங்கையில் விமான நிலையத்திலிருந்து அவர்கள் செல்லவேண்டிய பகுதிவரை அனைத்து செலவுகளையும் தமிழக அரசு ஏற்றுக்கொள்வதும் மகிழ்வான செய்தி. இவர்களுக்கு அங்குள்ள இலங்கை அரசு 6 மாதத்திற்குரிய தேவையான உணவுப் பொருட்களையும் அளிப்பதாக உறுதியளித்துள்ளது. இதைத் தவிர்த்து தமிழகத்திலேயே தங்க விரும்புபவர்களை தமிழக மக்களாகவே ஏற்றுக்கொள்வதாகவும் அறிவிக்கப்பட்டுள்ளதும் வரவேற்கத்தக்கது. அகில உலக அளவில் இதுபோன்ற அகதிகள் முகாமில் பென்களுக்கு இதுவரை எந்தவிதமான இன்னல்களும் ஏற்படவில்லை என்பதும் மகிழ்ந்து குறிப்பிடத்தக்கது!
தூங்க வருகவே
—————————
”பாரதப் போரில் பார்த்தனின் தேரை
சாரத்யம் செய்து சோர்ந்துக் களைத்தவன்
நாரத மாமுனி நாவிருப்போன் என்
மாரதில் புரண்டு தூங்க வருகவே”….கிரேசி மோகன்….!
எம் . ஜெயராமசர்மா … மெல்பேண் … அவுஸ்திரேலியா
ஒன்றுபட்டால் உண்டுவாழ்வு
ஒற்றுமை அகன்றிடின்
அனைவர்க்கும் தாழ்வு
என்றிடும் வாக்கினை
மனத்தினில் இருத்தி
இணைந்திட நினைப்போம்
ஏற்படும் உயர்வே !
கூட்டுறவென்பது நாட்டுயர்வாகும்
கூடிடும்போது கூடிடும்வலிமை
நாடுகள் பிரிந்தால்
நன்மைகள் உடையும்
கேடெலாம் சூழ்ந்து
நாடெலாம் குலையும்
குலைவினைத் தடுத்திட
கூட்டுறவதனை தலையெனக்கொண்டு
நிலைபெறச் செய்வோம் !
ஒருமித்து நின்றால்
உன்னதம் விளையும்
உடைந்துமே போனால்
உயர்வெலாம் சரியும்
கூடிடும் பொழுதில்
குறையெலாம் அகலும்
கூட்டுற வென்பது
நாட்டுக்குத் தேவை !
பொதுநலனை வளர்ப்பதற்கு
புறப்பட்டு வந்த
புத்தூக்கம் கூட்டுறவு
புதுப்பாதை அன்றோ
அதைவளர்க்க பலபேரும்
ஆண்டாண்டு காலம்
அயராது உழைத்ததனை
அகம்நிறைத்து வைப்போம் !
தனிமனித கூட்டுறவு
சமுதாய கூட்டுறவு
பொருள்விரியக் கூட்டுறவு
போரகற்றக் கூட்டுறவு
கூட்டுறவு எனும்கருத்து
மொட்டாக இல்லாமல்
மலர்ந்விடும் வேளைதனில்
மாவிளைவைத் தந்துநிற்கும் !
பலசபைகள் அமைக்கின்றார்
பலசட்டம் தீட்டுகிறார்
உலகசமாதனம் என்று
உரத்தெல்லாம் உரைக்கின்றார்
கலவரமோ நாடெல்லாம்
கனத்ததீயாய் எழுகிறது
கூட்டுறவை வளர்த்திருந்தால்
குழப்பங்கள் வந்திராதே !
ஆதிக்கம் ஆதிகாராம்
ஆணவத்தால் உலகமெலாம்
அழிவான பாதைசென்று
ஆக்கமெலாம் இழக்கிறது
கூட்டுறவு எனும்கருத்தை
நாடெல்லாம் கடைப்பிடித்தால்
ஆட்டிநிற்கும் ஆணவங்கள்
அடியற்றுப் போகுமன்றோ !
பெரும்பாலான ஜாதகருக்கு சனிதிசை, சனிபுக்தி, சனி அந்தரத்தினாலும் பலவிதமான இன்னல்களுக்கு ஆளாகின்றனர்.அதனால் காரியத்தடை, திருமணத்தடை, குழந்தை பாக்யதடை, தொழில் அபிவிருத்தி தடை போன்ற பலதடைகளும் ஏற்பட்டு மன உளச்சளுக்கு ஆளாகின்றனர். இத்தகைய தடைகளுக்கு நிவாரணம் தேடும் வகையில் வேலூர் மாவட்டம் வாலாஜாபேட்டைதன்வந்திரி பீடத்தில் ஸ்ரீ முரளிதர ஸ்வாமிகளின் ஆக்ஞைப்படி இன்று 01.07.2017 சனிக்கிழமை காலை 10.30 மணிக்கு சனி ப்ரீத்தி ஹோமம் காலதோஷ நிவர்த்தி ஹோமம் நடைபெற்றது இந்த ஹோமம் பித்ரு தோஷ நிவர்த்திக்காகவும், ஆயுள் அபிவிருத்திக்காகவும் நடைபெற்றது இந்த யாகத்தில் கருப்பு நிற வஸ்த்திரம், நீலநிற வஸ்த்திரம், பச்சரிசி, நெல், எள், நெல்பொரி, நல்லெண்ணைய், வெல்லம் வன்னி, சமித்து போன்ற பொருட்கள் சேர்க்கப்பட்டு காலசக்கர பூஜை பைரவர் பூஜை சஞ்சீவி ஆஞ்சநேயருக்கு சிறப்பு அபிஷேகம் நடைபெற்றது. இதனை தொடர்ந்து நாளை சுதர்சன ஜயந்தியை முன்னிட்டு மஹா சுதர்சன ஹோமம் மற்றும் சிறப்பு திருமஞ்சனம் நடைபெறவுள்ளது. இந்த தகவலை தன்வந்திரி குடும்பத்தினர் தெரிவித்தனர். பெற்றது.
வருகிற 27.07.2017 வியாழக் கிழமை காலை 10.00 மணி முதல் 12.00 மணி வரை நடைபெற உள்ளது
‘நம் கையில் சொத்து பத்து இல்லை என்றாலும், வியாதி வெக்கை இல்லாமல் நிம்மதியாக வாழ வேண்டும்’ என்பதுதான் இன்றைய தேதியில் அனைவரது பிரார்த்தனையாகவும் ஆசையாகவும் இருந்து வருகிறது. பக்தர்களுக்கு இத்தகைய ஒரு வரத்தை அருளும் பீடமாக விளங்கி வருகிறது வாலாஜா ஸ்ரீதன்வந்திரி ஆரோக்ய பீடம்.
‘நோயில்லா வாழ்வு அனைவருக்கும் கிடைக்க வேண்டும்’ என்பதே இந்த ஆரோக்ய பீடத்தின் குறிக்கோள். இதன் ஸ்தாபகரான ஞானகுரு டாக்டர் ஸ்ரீமுரளிதர ஸ்வாமிகள் இதற்காக எண்ணற்ற ஆராய்ச்சிகளையும் கூட்டுப் பிரார்த்தனைகளையும் இங்கே நடத்தி வருகிறார். ஹோமப் புகையில் கனன்று கொண்டிருக்கும் மூலிகைகளின் வாசமும், பிரமாண்டமான மூலிகைப் பண்ணையில் இருந்து வரும் சுகமான காற்றும் பக்தர்களின் மனதை வருடுகின்றன.
வேலூருக்கு அருகே வாலாஜாவில் அமைந்துள்ளது இந்த ஸ்ரீதன்வந்திரி ஆரோக்ய பீடம். இந்த பீடத்தை ஒரு வாழ்வியல் மையம், மனக் குறை தீர்க்கும் மையம் என்றே பக்தர்கள் குறிப்பிடுகின்றனர். அந்த அளவுக்கு இங்கு வந்து செல்லும் அனைவரும் ஸ்ரீதன்வந்திரி பகவானின் அருளாலும், டாக்டர் கயிலை ஞானகுரு ஸ்ரீமுரளிதர ஸ்வாமிகளின் ஆசியாலும் பலன் அடைகிறார்கள். வைத்தியத் துறையின் தந்தையான ஸ்ரீதன்வந்திரி பகவான் அருளும் இந்த ஆரோக்ய பீடத்தில் 73க்கு மேற்பட்ட திருச்சந்நிதிகள் உள்ளன.
அவற்றுள் ராகு & கேது சந்நிதியும் சிறப்பான ஒன்று. ‘ஏக சரீர ராகு & கேது-வாக தரிசனம் தரும் இந்த ராகு & கேது விக்கிரகத்தின் தலைப் பகுதி ராகுவாகவும், உடல் பகுதி கேதுவாகவும் அமைந்துள்ளது. சிவாலயங்களில் ஐப்பசி பௌர்ணமியில் ஈஸ்வரனுக்கு அன்னாபிஷேகம் செய்வது போல் இந்த ஏக சரீர ராகு & கேதுவுக்கு ஒவ்வொரு பௌர்ணமியின்போதும் அன்னாபிஷேகம் செய்யப்படுகிறது. அதன் பின் பிரசாதமாக விநியோகிக்கப்படும் இந்த அன்னத்தை உண்டால், உடல் செரிமானம் மற்றும் வயிறு தொடர்பான நோய்கள் நீங்கும்.
நவக்கிரகங்களில் சனியை விட செவ்வாயும், செவ்வாயை விட புதனும், புதனை விட குருவும், குருவை விட சுக்கிரனும், சுக்கிரனை விட சந்திரனும்,சந்திரனை விட சூரியனும், இவர்கள் அனைவரையும் விட ராகுவும் கேதுவும் பலம் பொருந்தி விளங்குகின்றனர் என்று ஜோதிடம் கூறுகிறது. இதில் இருந்து ராகு மற்றும் கேதுவுக்கு உள்ள முக்கியத்துவம் எளிதில் விளங்கும்.
ராகு கேது எந்த ராசியில் இருக்கிறார்களோ, எந்தக் கோள்களினால் பார்க்கப்படுகின்றரோ, எந்தக் கோள்களின் சேர்க்கை பெற்றுள்ளனரோ, அதற்கு தக்கவாறு பலன்களை முழுமையாகத் தருவார்கள். குறைகளையும் நிறைகளையும் வஞ்சகம் இல்லாமல் அள்ளித் தரும் மா வள்ளல் ராகு பகவான். ஞானகாரகன். ஞானம் அருள்பவர். புகழ், பதவி, அதிகாரம் போன்றவற்றைத் தருபவர்.
பொருளாதாரத்தில் அதல பாதாளத்தில் இருப்பவரைத் திடீரென கோடீஸ்வரர் ஆக்குபவரும் ராகு. கெட்ட சகவாசங்களுக்கும் காரணம் ராகுவே!ஞானம், மோட்சம் போன்றவற்றை அருள்பவர் கேது பகவான். கல்வி அறிவு, கேள்வி ஞானம் அருள்பவர். தோல் வியாதி, வாயுத் தொல்லை, வயிற்று வலி உட்பட பல வியாதிகளினால் பாதிக்கப்பட்டிருப்பவர்கள் கேது பகவானுக்குப் பரிகாரம் செய்து பாதிப்பில் இருந்து மீளலாம்.
குரு பெயர்ச்சி, சனி பெயர்ச்சியைப் போலவே ராகு & கேது பெயர்ச்சியும் இன்றைய காலகட்டத்தில் முக்கியமானதாக இருக்கிறது. ராகுவும் கேதுவும் ஒரு ராசியில் இருந்து இன்னொரு ராசிக்குச் செல்லும் காலகட்டத்தைதான் நாம் ராகு & கேது பெயர்ச்சி என்கிறோம். வருகிற 27.07.2017 வியாழன் அன்று சிம்மம் ராசியிலிருந்து இருந்து கடகராசிக்கு ராகு மாறுகிறார். கேதுவானவர் கும்பத்திலிருந்து மகரத்திற்கு இடப்பெயர்சி செய்கிறார்
அடுத்த ஒண்ணரை வருட காலத்துக்கு இவர்கள் இந்த ராசியிலேயே இருப்பார்கள். இந்தக் காலத்தில் அவரவர் தசாபுக்திக்கு ஏற்ப சுப பலன்களையும், அசுப பலன்களையும் தருவார்கள். வாலாஜாவில் அமைந்துள்ள ஸ்ரீதன்வந்திரி ஆரோக்ய பீடத்தில் குரு பெயர்ச்சி, சனி பெயர்ச்சி, ராகு & கேது பெயர்ச்சி போன்ற வைபவங்கள் சிறப்பு ஹோமங்களுடன் நன்றாகவே நடந்து வருகின்றன.
இந்த முறையும். பெயர்ச்சியை முன்னிட்டு தன்வந்திரி பீடத்தில் சிறப்பு ராகுகேது யாகமும் சிறப்பு அபிஷேகமும்.‘ராகு & கேது பெயர்ச்சி’ விமரிசையாக வருகிற 27.07.2017 வியாழக் கிழமை காலை 10.00 மணி முதல் 12.00 மணி வரை நடைபெறஉள்ளது. அவசியம் பரிகாரம் செய்து கொள்ள வேண்டிய ராசிகள்.
மேஷம், மிதுனம், கடகம், துலாம், தனுசு, மகரம், போன்ற ராசிக்காரர்கள் மற்றும் ராகுதிசை, ராகுபுத்தி, கேதுதிசை, கேதுபுத்தி, நடப்பவர்களும் ராகு & கேது பெயர்ச்சி அன்று உரிய பரிகாரங்கள் செய்து கொள்வது நல்லது. சங்கல்ப காணிக்கையாக ஒரு ராசிக்கு ரூபாய். 500/-மட்டும் செலுத்தி பங்கேற்று பலன் பெற ப்ரார்த்திக்கின்றோம்.
யாகத்தின் பலன்கள்.
திருமணத் தடை, உத்தியோகம் இன்மை, அயல்நாட்டுப் பயணம் தடைபடுதல், குழந்தைப் பேறின்மை, தம்பதிக்குள் ஒற்றுமை மிகுதல், வழக்கு விவகாரங்களில் வெற்றி பெறுதல் போன்ற பல்வேறு பிரார்த்தனைகளுக்குப் பலன் வேண்டுபவர்கள் இந்தப் பெயர்ச்சியில் கலந்து கொண்டு பிரார்த்தித்துப் பலன் பெறலாம். இந்த தகவலை தன்வந்திரி குடும்பத்தனர் தெரிவித்தனர்.
தொடர்புக்கு:
ஞானகுரு டாக்டர் ஸ்ரீமுரளிதர ஸ்வாமிகள்,
ஸ்ரீதன்வந்திரி ஆரோக்ய பீடம்,
அனந்தலை மதுரா, கீழ்ப்புதுப்பேட்டை,
வாலாஜாபேட்டை . 632 513.
வேலூர் மாவட்டம்.
போன்: 04172 – 230033,
மொபைல்: 94433 30203