சாகும் வரை….

 

பழமைபேசி

 

பணம் கொண்டு வாங்கிவிடுவேன் படுக்கை
எதைக் கொண்டு வாங்குவேன் உறக்கம்?

பணம் கொண்டு வாங்கிவிடுவேன் புல்லாங்குழல்
எதைக் கொண்டு வாங்குவேன் இசை?

பணம் கொண்டு வாங்கிவிடுவேன் நூலகம்
எதைக் கொண்டு வாங்குவேன் அறிவு?

பணம் கொண்டு வாங்கிவிடுவேன் எட்டுத்தொகை பத்துப்பாட்டு
எதைக் கொண்டு வாங்குவேன் தமிழ்?

பணம் கொண்டு வாங்கிவிடுவேன் திரவியம்
எதைக் கொண்டு வாங்குவேன் நறுமணம்?

பணம் கொண்டு வாங்கிவிடுவேன் என்சைக்ளோபீடியா
எதைக் கொண்டு வாங்குவேன் நினைவாற்றல்?

பணம் கொண்டு வாங்கிவிடுவேன் பேரழகி
எதைக் கொண்டு வாங்குவேன் பேரன்பு?

பணம் கொண்டு வாங்கிவிடுவேன் பட்டம்
எதைக் கொண்டு வாங்குவேன் படிப்பினை?

பணம் கொண்டு வாங்கிவிடுவேன் கூத்துப்பட்டறை
எதைக் கொண்டு வாங்குவேன் களிப்பு?

பணம் கொண்டு வாங்கிவிடுவேன் களிமாடம்
எதைக் கொண்டு வாங்குவேன் சிற்றின்பம்?

பணம் கொண்டு வாங்கிவிடுவேன் கடிகாரம்
எதைக் கொண்டு வாங்குவேன் நேரம்?

பணம் கொண்டு வாங்கிவிடுவேன் மனிதர்கள்
எதைக் கொண்டு வாங்குவேன் நட்பு?

பணம் கொண்டு வாங்கிவிடுவேன் ஆசிரமம்
எதைக் கொண்டு வாங்குவேன் மனநலம்?

பணம் கொண்டு வாங்கிவிடுவேன் குடிசை
எதைக் கொண்டு வாங்குவேன் எளிமை?

மனம், மனம், மனம்!
மனம் பண்பட வாசிப்போம்!!
சாகும் வரை வாசித்திருப்போம்  நூல்கள் பல!!!

About நா. கணேசன்

முனைவர் நா. கணேசன் ஹூஸ்டன் மாநகரில் 30 ஆண்டுகளாக விண்வெளி இயங்கியல் (Space Dynamics) பொறியாளராகப் பணியாற்றுகிறார். இணையம் தொடங்கிய நாளிலிருந்து தமிழ், இந்தியாவின் வரலாற்றில் திராவிட மொழிகளைப் பேசுவோரின் பங்கு, சிந்து சமவெளியும் தமிழர்களும், சொல்லாய்வுகள் பற்றி எழுதிவருகிறார். அமெரிக்காவில் பேரா. ஹார்ட் அமைத்த பெர்க்கிலி தமிழிருக்கை அமைய உதவியவர். தற்போது ஹூஸ்டன் பல்கலையில் 6 மில்லியன் டாலரில் நிரந்தரமான தமிழிருக்கை அமைக்கும் குழுவின் பொருளாளர், யூனிக்கோடு குறியேற்றம் தமிழுக்கு கணினி, இணையம், செல்பேசிகளில் அமைய உழைத்தவர். ’எழுத்து என்பது ஒரு கருவி. பொருளாதாரம், பணிகள் போன்றன நெருங்கிவரும் இந்தியாவில், ரோமன்/ஆங்கில எழுத்தில் இந்திய மொழிகள் எழுதும்முறை (ISO 15919) பரவலாக வேண்டும். அரசியல், உணர்ச்சி என்பதற்கும் மேலாக, இந்தியமொழிகளுக்கு இடையே உள்ள உறவுகளை அறிய இம்முறை உதவும். அப்போது, இந்தி எழுத்தைத் தமிழ்நாடு போன்ற மாநிலங்களில் திணிக்கும் தேவை இல்லாமல் போய்விடும். ’India as a Linguistic Area’ எனும் பேரா. எமனோவின் கோட்பாட்டை ரோமன் இலிபி துணையாக இந்திய அரசாங்கம் ஏற்பது நாட்டுவளர்ச்சிக்கு உதவும்’ என்ற கொள்கையுடையவர். உசாத்துணை: http://muelangovan.blogspot.com/2008/06/blog-post_29.html

உங்கள் கருத்துகளைத் தெரிவிக்க