Tag: மேகலா இராமமூர்த்தி

படக்கவிதைப் போட்டி – (90)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

ராமலஷ்மி எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 17.12.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்.

December 12, 2016
படக்கவிதைப் போட்டி 89-இன் முடிவுகள்

-மேகலா இராமமூர்த்தி

கடற்கரை மணலில் பதிந்த காலடித்தடங்களைப் புகைப்படப்பெட்டிக்குள் அடக்கிவந்திருப்பவர் திரு. ராமச்சந்திரன். இந்தக் காலடித்தடங்களை வைத்துக் கவிபாடுங்கள் என்று இவ்வாரப்படக்கவிதைப் போட்டிக்கு இதனைத் தெரிவுசெய்து தந்திருக்கிறார் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன். இவர்கள் இருவரும் நம் நன்றிக்கு உரியவர்கள்.

ஆறடி நிலத்தில் வாழ்க்கை அடங்கும்வரை மனிதர்களின் காலடிகள் பயணப்பட்டுக் கற்றுக்கொள்ளத்தான் எத்தனை விஷயங்கள் இத்தரை மீதினில் கொட்டிக்கிடக்கின்றன! இலட்சிய மனிதர்களின் காலடிச் சுவடுகளோ பின்னர்க் காலத்தின் சுவடுகளாகவே மாறி வரலாற்றில் தடம்பதித்துவிடுகின்றன!

இனி, இவ்வாரப் போட்டிக்கு வந்துள்ள கவிதைகளை இரசித்துவருவோம்.

”நிலத்தில் பதிந்த மனிதக் காலடி நிலவில் பதிந்த நாளொரு நன்னாள். அவை செவ்வாயிலும் வெற்றித்தடம் பதிக்கும் நாளே நமக்குப் பொன்னாள்!” என்று தன் ஆசை பகர்கின்றார் திரு. சி. ஜெயபாரதன்.

நிலத்தில் தடங்கள்

நிலத்தில் நடக்கும் கால்கள்
நேற்றுப் பகலில்
நிலவில் தடம் பதித்து
வரலாற்றுக் கல்லை
நிலைநாட்டும் !
எளிய மனிதனின்
பூதகர மான எட்டு வைப்பு !
ஆறறிவு மானிடன்
பேரளவு முயற்சியில் ஆற்றிய
ஏழறிவுச் சாதனை !
தவழப் பயின்று தட்டுத் தடுமாறி
நடக்கப் பழகி
இறக்கை யின்றிப் பறந்து
பிற அண்டத்தில்
தடங்கள் இட்டு மீண்டான் !
அடுத்துப்
பதினைந்து ஆண்டுகளில்
செந்நிறக் கோள்
செவ்வாயில் தடம் வைத்து
வெற்றி
விண்ணவனாய்
மீள்வான்,
மண்ணிலே தடம் வைத்த
மனிதன் !

***

கடற்கரையில் பதிக்கும் வெற்றுத் தடங்கள் கடலலைகளால் அழியலாம்; ஆனால் வாழ்வில் பதிக்கும் வெற்றித்தடங்களோ காலக் கடலலைகளால் அழிக்கமுடியாதவை என்பது திரு. செண்பக ஜெகதீசனின் திண்ணமான எண்ணம்.

கடற்கரையில்
காலடித் தடங்கள்
தொடர் பயணத்திற்கு ஏற்றவையல்ல..

இலக்கை எட்டமுடியாது
இவற்றைத் தொடர்ந்து சென்றால்..

கடலலைக் கரங்களால் அழிக்கப்பட்டு
காணாமலும் போய்விடும்..

வாழ்க்கைப் பயணத்தில்
நீ பதிக்கும்
வெற்றிக் காலடித்தடங்கள்,
காலக் கடலலைகளால் அழிவதில்லை..

வாழ்க்கை இது சாதிப்பதற்கே,
வெற்றித் தடங்களைப் பதிப்பதற்கே…!

***

மனித வாழ்க்கை போன்று மனிதக் காதலும் நிலையற்றதாய் மாறிவரும் நிலையினை, கடலலை போல் அது விரைந்து மறையும் விந்தையைத் தன் கவிதையில் அழகுறக் காட்சிப்படுத்தியுள்ளார் திருமிகு. ஜோ. குமாரி எலிசபெத். (புதிய கவிஞருக்கு நல்வரவு!)

அவசர வாழ்வில் அந்நிய மானது
அன்புட னிருந்த அருமை உறவுகள்
அன்றொரு நாள் அப்படித் தான்
அவளும் அவனும் பிரிந்ததைக் கண்டேன்

அவளின் கண்கள் அவனை நோக்க
அவனின் கண்கள் எங்கோ பார்க்க
வெறுப்பில் அவளின் வார்த்தை வெடிக்க
சிறுத்த முகத்துடன் அறைந்தானவளை…!

விழுந்த அறையில் காதல் ஒடிந்தது
கடந்து போனது காதல் அலைபோல்
எழுந்து போயினர் ஆளுக் கொருபுறம்
அழிந்தன அவரடி அலைகளினாலே….!

ஐந்தே நிமிடம் அந்த இடத்தில்
வந்து அமர்ந்தது மற்றொரு சோடி
இங்கு வந்ததில் ஆணோ பழையவன்
அறைந்தவளில்லை இவள் புதியவள்…!

அகன்ற கண்களை விலக்கிக் கொண்டு
அவசர உலகின் அவசரம் உணர்ந்தேன்
கடற்கரை காற்று எத்தனை கண்டதோ
வெறுத்து வீசுது வெப்பத்தோடு…!

***

காலடித் தடங்களுக்குப் புதிய சிந்தனை முகங்களைத் தம் கவிதைகளில் தந்திருக்கும் கவிஞர்களுக்குப் பாராட்டுக்கள்!

இவ்வாரத்தின் சிறந்த கவிதை அடுத்து…

காலத்தால் அழியாத காலடிகள்

காலடிகள் காணாமல் போகும் ஒருநாள் – ஆனால்
காவியம் படைத்தும் உள்ளது சில காலடிகள்…

அண்ணல் இராமன் காலடி ஸ்பரிக்க
அங்கே எழுந்தாள் அகல்யை உயிர் சிலிர்க்க‌

மூன்றடி மண்தான் கேட்டான் மாதவன் -ஆனால்
மூவுலகமும் வசமானது அவன் காலடியாலே

அஹிம்சையைப் போதித்தது புத்தனின் காலடி
அவ்வழி நடந்தது அண்ணல் காந்தியின் காலடிகள்

ஞானக் குஞ்சொன்று பிறந்தது காலடியிலே
அஞ்ஞானம் மாண்டதும் அவர் காலடியிலே

அறிஞரைப் போல மெய்யடியார்களைப் போல‌
அவர் வழி நடந்து பதிப்போம் நம் காலடிகளை

வரமாகப் பெற்ற இவ் வாழ்க்கைப் பாதையில்
தரமாக விட்டுச் செல்வோம் நமது காலடிகளை

ஞாலத்தில் பிறந்த மாந்தர் அனைவரும் காலடித்தடம் பதித்துத்தான் நடக்கிறார்கள். என்றாலும், அனைவரின் தடங்களும் பின்பற்றுவதற்கேற்ற வழித்தடங்களாய், வாழ்க்கைத்தடங்களாய் மாறுவதில்லை. அத்தகு திறனும் ஆற்றலும் ஒருசிலருக்கு மட்டுமே வாய்க்கும் வரம்!

”காலடியில் பிறந்த ஆதிசங்கரரின் காலடி அத்துவைதத்திற்குப் பாதை அமைத்தது. கருணைக்கடலாம் சித்தார்த்தரின் காலடி சத்தியத்துக்குப் பாதை அமைத்தது. அதன்வழி நடந்த அண்ணலின் காலடியோ அகிம்சைக்குப் பாதை அமைத்தது!” என்று காலத்தால் அழியாத காலடிகளின் வரிசையைக் காதலுடன் தன் கவிதையில் பதிவுசெய்திருக்கும் திருமிகு. ராதா விஸ்வநாதனை இவ்வாரத்தின் சிறந்த கவிஞராய் அறிவிக்கின்றேன்.

December 12, 2016
படக்கவிதைப் போட்டி … (89)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

ராமச் சந்திரன் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 10.12.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

December 5, 2016
படக்கவிதைப் போட்டி 88-இன் முடிவுகள்

-மேகலா இராமமூர்த்தி

தூளியில் துயிலுகின்ற இந்தத் தூமலரின் தோற்றம், உறங்கிக்கொண்டே ஆடும் ஆனந்த நடனமாய்க் காட்சிதந்து நம்மைக் கிறங்க வைக்கின்றது!

இவ்வழகிய புகைப்படத்தை அருமையாய் எடுத்திருக்கும் திரு. யெஸ்மெக்கிற்கும், இதனைப் போட்டிக்குத் தேர்வுசெய்து தந்திருக்கும் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பனுக்கும் நம் நன்றி!

இவ்வாரக் கவிதைப் போட்டிக்கு வந்துள்ள கவிதைகள் அடுத்து நம் பார்வைக்கு!

*****

”பெரியவர்கள் செய்யும் பித்தலாட்டங்களை இந்தப் புதுமலர் கண்ணுறாமல் கண்வளர்வதே நல்லது; அதனை எழுப்பாதே!” என அறிவுறுத்துகின்றார் திரு. செண்பக ஜெகதீசன்.

எழுப்பாதே…

பிள்ளை உறங்கட்டும்,
பெரியவர்களே அதை
எழுப்பவேண்டாம்..

பார்க்கவேண்டாம் அது
நீங்கள் படும் பாட்டை-
பணத்துக்காக..

மனிதம் மறந்து
பணத்தை நினைக்கும்
மனது அதற்கு வரவேண்டாம்..

இறப்பு மறந்து
இரக்கமின்றி அதைக்
கறக்கும் வழிகளை அது
காணவேண்டாம்..

சேர்த்த பணத்தை
நன்றாய்ச்
செலவிடாமல்,
மண்ணில் புதைத்து
மண்ணில் புதைவதைக்
கண்ணில் காணவேண்டாம்..

தூயதை மறந்து
தீயதை வளர்க்கும்
பணம்படுத்தும் பாட்டை அது
பார்க்கவே வேண்டாம்..

அதனால்,
பிள்ளை உறங்கட்டும்,
பெரியவர்களே அதை
எழுப்பவேண்டாம்…!

*****

இவ்வாரத்தின் சிறந்த கவிதையை இனிக் காண்போம்!

துயிலெனும் தூக்கம்
இறைவன் நமக்களித்த இலவசப் பரிசு – தூக்கம்
இமைகள் மூடி நமக்குள் நாமே தொலையக் கிட்டும் சுகம்
துயிலின் முடிவு விழிப்பா இல்லை
விழிப்பின் முடிவு துயிலா – இது
இயற்கை நமக்கு விடும் விடுகதை
இரண்டும் இருளும் ஒளியுமாய் ஓயாமல்
நம்மைச் சுற்றி உலா வரும் உண்மை
துயில்லில்லா வாழ்வு துயரமே அது போல்
விழிப்பில்லா வாழ்வும் அதி துயரமே
அளவோடு கொள்ளும் துயிலும் விழிப்பும் கொள்ள‌
வாழ்வும் வளமாகும் என் நாளுமே!
பொய்த் தூக்கம், பெருந்தூக்கம், அரைத்தூக்கம்
ஆழ்நிலைத் தூக்கம் பகல் தூக்கமெனப் பல வகை உண்டு
தூங்காது தூங்கி இருக்கும் நிலையோ
மெய்யடியார்கள் கண்ட கலை…
மானிடர் கொள்வது அறியா துயில் ஆனால்
மாதவன் கொண்டது ஆலிலையில் அறிதுயில்
ஆழ்துயிலில் துளிர் விட்ட அரிய சிந்தனைகளே
அறிஞர்கள் கண்ட அரும் பெரும் கண்டு பிடிப்புகள்
அறியாப் பருவம் வரை வந்த ஆழ்ந்த தூக்கம்
பருவம் வர வரப் பறப்பது ஏனோ
இனி வரம் ஒன்று கேட்கிறேன் இறைவா!
வரும் நாட்களில் குழந்தையைப் போல் தூங்கவே!

”ஆங்காரம் உள்ளடக்கி ஐம்புலனைச் சுட்டறுத்துத்
தூங்காமல் தூங்கிச் சுகம்பெறுவ தெக்காலம்?” என்று வினவுகின்றார் பட்டினத்தாரின் பரம அடியாரான பத்திரகிரியார் எனும் சித்தர். தூங்காமல் தூங்கிச் சுகம்பெறுவதெல்லாம் சித்தர்களுக்கு மட்டுமே சாத்தியப்படுபவை; சாமானியர்க்கு அல்ல!

கவலையும் முதுமையும் மனித உறக்கத்தின் அளவைக் குறைத்துவிடும் வாள் போன்றவை. கவலையின் வலையில் சிக்கிக்கொள்ளாத மழலையர் மட்டுமே மகிழ்ச்சியாய் உறங்கும் பேறுபெற்றவர்கள். அக்குழந்தைமையை இறைவனிடம் வரமாய் வேண்டும் திருமிகு. ராதா விஸ்வநாதனை இவ்வாரத்தின் சிறந்த கவிஞராய்த் தெரிவுசெய்திருக்கின்றேன். பாராட்டுக்கள் கவிஞருக்கு!

December 5, 2016
பொதுவுடைமை போற்றிய புரட்சியாளர்!

-மேகலா இராமமூர்த்தி

1959-ஆம் ஆண்டு ஜனவரி மாதத்தின் 8-ஆம் நாள் அது. அழகிய சிறிய தீவான கியூபாவின் தலைநகர் ஹவானாவில் தன் சக தோழர்களோடு நுழைந்த அந்த இளம் புரட்சியாளன், கியூபாவில் அப்போது ஆட்சியிலிருந்த முதலாளித்துவ ஆதரவாளனும், எதேச்சாதிகாரியும், அமெரிக்காவின் கைக்கூலியுமான ஃபுல்கென்சியோ படிஸ்டாவை (Fulgencio Batista) வீழ்த்தி, அவனை ஆட்சிக்கட்டிலிலிருந்து தூக்கியெறிந்தான். அவ்வெற்றியை அடைவதற்கு அப்புரட்சியாளன் சந்தித்த போர்க்களங்கள்தாம் எத்தனை!

தோளோடு தோள் நின்று போரிட்ட பொதுவுடைமைத் தோழர்கள் பலரை அந்த விடுதலை வேள்விக்கு அவன் தாரை வார்த்திருந்தான். படிஸ்டா அரசுக்கு எதிரான அந்த அறப்போரில் தொடர் தோல்விகளைச் சந்தித்துவந்த அவ்வீரன், அர்ஜென்டினாவின் பொதுவுடைமைப் புரட்சியாளரும், மார்க்சிய – லெனினியச் சிந்தனையாளருமான தோழர் சேகு வேராவோடு (Che Guevara – An Argentine Marxist revolutionary, Physician and a Guerrilla leader) இணைந்து கொரில்லாப் போர்முறையைக் கற்றுத்தேர்ந்தான். அப்போர்முறையைப் பயன்படுத்திப் பட்டிஸ்டாவுக்கு எதிரான போரில் வெற்றிக்கனியை எட்டிப்பறித்தான் அவன்!

எதேச்சாதிகாரி படிஸ்டா வீழ்ந்தான்; தலைநகர் ஹவானாவில் தன்முன் ஆர்வத்தோடு திரண்டிருந்த ஆயிரக்கணக்கான மக்களின்முன் வெற்றிஉரை நிகழ்த்தினான் அந்த மாவீரன். எதேச்சாதிகாரம் எமலோகம் அனுப்பப்பட்டு அமைதி மீண்டதன் அடையாளமாக வெண்புறாக்கள் வானில் பறக்கவிடப்பட்டன. பறந்துசென்ற புறாக்களில் ஒன்று திரும்பவந்து அந்த வெற்றிவீரனின் தோளில் அமர, அதனைக்கண்ட மக்கள்கூட்டம் எழுச்சிகொண்டு ’ஃபிடல், ஃபிடல்’ என்று விண்ணதிர வெற்றி முழக்கமிட்டது. ஆம், முதலாளித்துவத்திலிருந்து கியூபாவை மீட்டு, தொழிலாளர்களின் நலம்பேணும் பொதுவுடைமையை அங்கே மலரச்செய்த ஃபிடல் காஸ்ட்ரோதான் அந்தப் புரட்சியாளன்!

1926-ஆம் ஆண்டு ஆகஸ்டு 13-ஆம் தேதி வசதியான கரும்பு விவசாயி ஏஞ்சல் காஸ்ட்ரோவுக்கு மகனாகப் பிறந்தார் ஃபிடல் காஸ்ட்ரோ. ’ஃபிடல்’ என்ற சொல்லுக்கு ’நம்பிக்கை’ என்றும் ’காஸ்ட்ரோ’ என்ற சொல்லுக்குக் ’கோட்டை’ என்றும் பொருளாம். பொதுவுடைமை எனும் நல்ல நம்பிக்கையை – உயர்கொள்கையைக் கட்டிக்காக்கும் கோட்டையாக இப்பிள்ளை பின்னாளில் திகழப்போகிறான் என்பது பிள்ளைக்குப் பெயர்வைத்தபோது ஃபிடலின் தந்தைக்குத் தெரிந்திருக்க நியாயமில்லை. (சிலருக்கு அமையும் பெயர்ப்பொருத்தம் பிரமிக்கவைப்பதாய் இருக்கின்றது!).

கியூபாவின் தலைநகர் ஹவானாவிலுள்ள பல்கலைக்கழகத்தில் (University of Havana) சட்டம் படித்த ஃபிடல், இளைஞராய் இருந்தபோதே மார்க்ஸ், ஏங்கல்ஸ், லெனின் போன்றோரின் பொதுவுடைமைத் தத்துவங்களால் கவரப்பட்டு அவற்றையே தம் வாழ்வின் லட்சியங்களாய்க் கொண்டவர்.

கியூபாவின் தலைமை அமைச்சராய் (Prime Minister) பிப்ரவரி 16, 1959-இல் பதவியேற்ற அவர், உழவர்களுக்கான முதல் சீர்திருத்தச் சட்டத்தைக் கொண்டுவந்து ஒவ்வொரு விவசாயியும் அதிகபட்சம் 993 ஏக்கர் நிலத்தை மட்டுமே தன் உடைமையாகக் கொண்டிருக்கவேண்டும் என்ற விதியை நடைமுறைப்படுத்தினார். அத்தோடு, கியூபாவில் அயல்நாட்டார் நிலங்களை வாங்குவதற்கும் தடை விதித்தார். மார்க்சியவாதிகளையே தம் அரசாங்கத்தின் அனைத்து உயர்பதவிகளிலும் முக்கியப் பொறுப்புக்களிலும் நியமித்தார்.

’கண்ணுடையர் என்பவர் கற்றோர்’ எனும் வள்ளுவத்திற்கிணங்க, கல்விச்சாலைகளை அதிக அளவில் நாடெங்கும் ஏற்படுத்தி, மக்களின் அறிவுக்கண்களைத் திறந்தார். மருத்துவச்சேவையை அனைவருக்கும் இலவசமாக்கி மக்களை நோயற்ற வாழ்வு வாழச் செய்தார்.

ஃபிடலின் ஆட்சியும் மாட்சியும் கியூபாவுக்கு அருகிலிருந்த முதலாளித்துவ வல்லரசு நாடான அமெரிக்காவுக்குக் கடும் அதிருப்தியைத் தந்தது. அவரை ஒழித்துவிடவேண்டும் என்ற எண்ணத்தில் கியூபாவின் தெற்கிலுள்ள பன்றிகள் குடா (The Bay of Pigs) எனும் கடற்பகுதியில் படையெடுப்பை (The Bay of Pigs Invasion) நடத்தியது. அமெரிக்க அதிபர் ஜான் எஃப் கென்னடியின் ஆட்சியின்போது, அமெரிக்க உளவுத்துறையின் (CIA – Central Intelligence Agency) திட்டமிடல் மற்றும் வழிகாட்டுதலின்படி நடத்தப்பட்ட அப்படையெடுப்பில் கலகக்காரர்கள் சுமார் 1400 பேர் கலந்துகொண்டனர். ஆனால், கியூப வீரர்களின் தாக்குதலைச் சமாளிக்கமுடியாமல் மண்ணைக் கவ்வினர் அக் கலகக்காரர்கள். மாபெரும் வெற்றியை கியூபா பெற்றது. கென்னடி தலைமையிலான அமெரிக்க அரசுக்கு அது பெருத்த அவமானத்தைத் தந்தது எனில் மிகையில்லை.

’எங்கள் சாம்ராஜியத்தில் ஆதவன் என்றுமே மறைவதில்லை’ என்று மார்தட்டிக்கொண்டு, தருக்கோடும் செருக்கோடும் உலகையே அடக்கியாண்ட இங்கிலாந்துகூட பின்னாளில் அமெரிக்காவின் அடிவருடியாக மாறிவிட்டநிலையில், அமெரிக்க மாகாணங்களில் ஒன்றான பென்சில்வேனியாவின் அளவுகூட இல்லாத கியூபா, அமெரிக்காவைக் கண்டு சற்றும் அஞ்சவில்லை. ஒருவரல்ல… இருவரல்ல… பதினொரு அமெரிக்க அதிபர்களைத் தன் ஆட்சிகாலத்தில் சந்தித்துவிட்டார் ஃபிடல்; ஒருவரால்கூட அவரை ஆட்டவோ அசைக்கவோ முடியவில்லை என்பது வியத்தகு வரலாற்றுச் சாதனையே!

முதலாளித்துவ அமெரிக்காவோடு பகைமை பாராட்டினாலும், (அன்றைய) சோவியத் யூனியனுடனும், இலத்தீன் அமெரிக்க நாடுகளோடும், இடதுசாரிச் சிந்தனைகள் கொண்ட பிற நாடுகளோடும் தோழமையைப் பேணினார் ஃபிடல். ஆங்கிலக் காலனி ஆதிக்கத்தின் இரும்புப் பிடியிலிருந்து தென்ஆப்பிரிக்க நாடுகள் மீண்டுவரப் பேருதவி புரிந்தார் அவர். அந்நாடுகளுக்குக் கியூபாவிலிருந்து மருத்துவர்களையும் செவிலியர்களையும் அனுப்பி அம்மக்களின் நலன் காத்ததால் ஆப்பிரிக்காவின் நாயகனாக ஃபிடல் கொண்டாடப்பட்ட காலமும் உண்டு. அதனாலன்றோ தென்னாப்பிரிக்கக் கருப்பினத் தலைவரும், அதன் அதிபருமான நெல்சன் மண்டேலா தன்னுடைய 27 ஆண்டுகாலச் சிறைவாசத்தை முடித்தவுடன் கியூபாவின் தலைநகர் ஹவானாவுக்கு வந்து ஃபிடலை ஆரத்தழுவித் தன் நன்றியறிதலை வெளிப்படுத்தினார்.

நம் இந்தியத் திருநாட்டோடும் நல்ல நட்புறவு கொண்டிருந்தார் ஃபிடல். அணிசேரா நாடுகளின் அமைப்பில் (NAM – Non Aligned Movement) உறுப்பினராய் இருந்த இந்தியாவின் பண்டித நேருவும், கியூபாவின் ஃபிடலும் நியூயார்க் நகரில் முதன்முதலில் சந்தித்தபோது வேர்விட்ட நட்பு அது. பின்னர், நேருவின் மகளார் இந்திராவின் காலத்தில் மேலும் பலப்பட்டது. அன்னை இந்திராவைத் தன் உடன்பிறப்பாகவே எண்ணி அன்புபாராட்டினார் ஃபிடல்.

பிரதம மந்திரியாகவும் பின்னர் அதிபராகவும் ஐம்பதாண்டுகளுக்கு மேல் கியூபாவைக் கட்டிக்காத்த ஃபிடலின் உடல்நிலை 2006ஆம் ஆண்டின் மத்தியில் (July 2006) சீர்கெடத் தொடங்கிற்று. தம் பெருங்குடலில் ஏற்பட்ட குருதிப்பெருக்கை நிறுத்த அவர் அறுவைசிகிச்சை மேற்கொள்ளவேண்டியதாயிற்று.

ஃபிடலின் நிலைகண்டு மகிழ்ந்த அப்போதைய அமெரிக்க அதிபர் ஜார்ஜ் டபிள்யூ புஷ், ”மிகவும் நல்லவரான ஆண்டவர் ஃபிடலை ஒருநாள் (தம்மிடம்) அழைத்துச் செல்வார்” என்று குத்தலாகச் சொல்ல, அதனையறிந்த கடவுள் மறுப்பாளரான ஃபிடல், “இப்போது எனக்குப் புரிகிறது… புஷ்ஷும் அவரையொத்த பிற அமெரிக்க அதிபர்களும் எனக்கு எதிராக நிகழ்த்திய படுகொலை முயற்சிகளிலிருந்தெல்லாம் நான் எவ்வாறு தப்பிப் பிழைத்தேன் என்று! புஷ் குறிப்பிடும் மிகவும் நல்லவரான அந்த ஆண்டவர்தான் என்னைக் காத்திருக்கின்றார்!” என்று நக்கலாகப் பதிலடி கொடுத்தார். (One day the good Lord will take Fidel Castro away”. Hearing about this, the atheist Castro ironically replied: “Now I understand why I survived Bush’s plans and the plans of other presidents who ordered my assassination: the good Lord protected me). ஃபிடலின் இந்தச் சாதுரியமான பதில் ஊடகங்களின் தலைப்புச் செய்தியாய் அப்போது எங்கும் உலா வந்தது. உளவுத்துறையின் (CIA) உதவியோடு ஃபிடலைக் கொல்ல 638 தடவை அமெரிக்கா முயன்றதாகத் தெரியவருகின்றது.

முதுமை காரணமாகப் பல்வேறு உடல்நலக் கோளாறுகளுக்கு ஆட்படத் தொடங்கிய ஃபிடலால் அரசாங்கப் பணிகளில் முன்புபோல் கவனம் செலுத்தமுடியவில்லை. எனவே, முக்கியப் பொறுப்புக்களை 2008-இல் தன் இளவல் ரௌல் காஸ்ட்ரோவின் வசம் தந்தவர், கட்சிப்பொறுப்புக்கள் அனைத்திலிருந்தும் விலகி, 2011-இல் ஆட்சிப்பொறுப்பை முழுமையாய் ரௌலிடமே ஒப்படைத்தார்.

கியூபாவின் மெசையாவாக (Messiah – The savior) பலராலும் போற்றப்பட்ட ஃபிடல் காஸ்ட்ரோ, மார்க்சியப் பொதுவுடைமைக் கொள்கைகளைப் பரப்பவும், அதனைத் தம் மண்ணில் நிலைக்கச்செய்யவுமே தம் வாழ்நாள் முழுவதும் பாடுபட்டார். சந்தைப் பொருளாதாரத்தை நயந்து உலகநாடுகள் அனைத்தும் அதன்பின்னே (ஆட்டு) மந்தைகளாய் நின்றபோதும் அதற்கு ஆட்படாமல் விலகியே இருந்தார் அவர். அதன்விளைவாய்க் கியூபாவின் உள்நாட்டுப் பொருளாதாரம் பெரும் பின்னடைவைச் சந்தித்ததை மறுப்பதற்கில்லை. ஆயினும், கட்டற்ற பொருளாதாரத்தை ஃபிடல் ஆதரிக்கவில்லை. இதனால் சொந்தநாட்டு மக்களின் வெறுப்புக்கும், விமரிசனத்துக்கும் அவர் ஆளாகவேண்டிய சூழலும் உருவானது. அப்போதும் தன்னுடைய கம்யூனிசக் கொள்கைகளைக் கைவிடாத லட்சியவாதியாகவே அவர் வாழ்ந்தார்.

இவ்வாறு, தூய கம்யூனிசத்தையே தன் உயிர்மூச்சாகக்
கொண்டு பொதுவுடைமை வானில் சுடர்விட்ட அந்த விடிவெள்ளி, சென்ற வெள்ளியன்று (நவம்பர் 25, 2016) மறைந்தது. ’கம்யூனிசத்தின் கடைசிமூச்சு நின்றுவிட்டது’ என்று முதலாளித்துவ ஆதரவாளர்கள் ஃபிடலின் மரணத்தை மகிழ்ச்சியோடு கொண்டாடிவருகின்றனர்.

இச்சூழலில், ஃபிடலின் கம்யூனிசக் கொள்கைகள் குறித்து அவர்நாட்டு மக்களின் மனநிலை என்ன என்று ஆராய்வது(ம்) அவசியமாகின்றது.

ஃபிடலின் தொடக்க காலப் போராட்ட வாழ்வையும், கம்யூனிசத்தை அவர் அரும்பாடுபட்டு வளர்த்த பாங்கையும் அறிந்த கியூபாவின் சென்ற தலைமுறையினர் இன்னமும் அவரைப் போற்றுதலுக்குரிய பொதுவுடைமைவாதியாகவே பார்க்கின்றனர். ஆனால், தகவல் தொழில்நுட்ப யுகத்தின் அசுரப்பிடியில் சிக்கியிருக்கும் இன்றைய இளந்தலைமுறையினரோ நாட்டின் முன்னேற்றத்திற்கும், தகவல்தொழில்நுட்ப வளர்ச்சிக்கும் கம்யூனிசம் பெரும் இடையூறாய் இருப்பதாகவே எண்ணுகின்றனர்.

இளைஞர்களின் ஆதரவில்லாத கொள்கையும், தலைவரும் வெற்றிபெறுவது அரிது. ஆகவே, ஃபிடலின் மறைவு கம்யூனிசத்தின் நிலையை இன்று கவலைக்கிடமாகவே மாற்றியுள்ளது.

கம்யூனிசத்துக்கு எதிரான இளைஞர்களின் மனநிலை மாறவேண்டும்; ஓடப்பரையும் உயரப்பரையும் ஒப்பப்பராய் மாற்றும் சிவப்புச் சித்தாந்தத்தை அவர்கள் மீண்டும் வெற்றியோடு வலம் வரச்செய்யவேண்டும் என்பதே அவற்றின்மீது உவப்புக் கொண்ட மக்களின் அவா.

வருங்காலம் இதற்கான விடை சொல்லும்!

*********

References:

http://opinion.inquirer.net/87678/cuba-si-yanqui-no

https://en.wikipedia.org/wiki/Fidel_Castro

தமிழ் இந்து – http://tamil.thehindu.com/opinion/columns/%E0%AE%95%E0%AF%8D%E0%AE%AF%E0%AF%82%E0%AE%AA-%E0%AE%9A%E0%AF%82%E0%AE%B0%E0%AE%BF%E0%AE%AF%E0%AE%A9%E0%AF%8D/article9391560.ece?ref=sliderNews

http://learning.blogs.nytimes.com/2012/04/17/april-17-1961-the-bay-of-pigs-invasion-against-castro/

November 30, 2016
படக்கவிதைப் போட்டி (88)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

யெஸ்மெக் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 03.12.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

November 28, 2016
படக்கவிதைப் போட்டி 87-இன் முடிவுகள்

-மேகலா இராமமூர்த்தி

திரு. அருண் வீரப்பன் எடுத்திருக்கும் புகைப்படத்தைப் படக்கவிதைப் போட்டிக்குத் தேர்வுசெய்திருப்பவர் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன். ஒளிப்பதிவாளருக்கும் தேர்வாளருக்கும் நம் நன்றிகள்!

முதியோர் மேற்கொள்ளவேண்டிய துறவை மழலையர் மேற்கொண்டிருப்பதைக் காணும்போது நம் மனம் சிந்தனையில் ஆழ்கின்றது. ஆசைகளைப் பணயம் வைத்து இவர்கள் மேற்கொண்டிருக்கும் துறவுப் பயணம் வெற்றிப் பயணமா அல்லது வெற்றுப் பயணமா? விடை காலதேவனின் கையில்!

சரி…சிந்தனை வளமிகு நம் கவிஞர்கள் இது குறித்து என்ன எண்ணுகிறார்கள் எனக் கண்டுவருவோம்!

*****

பொய்ம்மையை பெருக்கிப் பொழுதினைச் சுருக்காமல் மெய்ம்மையைத் தேடிப் புத்தனின் வழியில் பயணப்படும் இந்த இளம் துறவிகளை வாழ்த்திப் போற்றுகின்றார் திருமிகு. ராதா விஸ்வநாதன்.

துறவின் தொடக்கம் – இந்த‌
துள்ளித் திரியும் பருவத்தில்
உலகில் கால் பதிக்கும் முன்னே அதனை
உதறித் தள்ளிய ஒரு விடிவெள்ளியின் வெற்றிச் சிரிப்பு
பொய்மையைப் பெருக்கி
பொழுதினைச் சுருக்காமல் புறப்பட்ட பிஞ்சுகள்
புத்தனின் அறவழிச் சாலையில்
பூத்துக் குலுங்க நடப்படும் நாற்றுகள்
புறவழ்வில் காண இயலாத உண்மையை
அகத்தில் அகழ்வாராய்ச்சி செய்யப் போகும் ஞான குஞ்சுகள்
தவத்திற்கே தவம் செய்ய வேண்டும் இவ் வேள்வியில்
தானாகத் தன்னை தாரை வார்க்கும் ஆஹூதிகள்
பார்வையாளரே நாம் இங்கு தவிர – இப்
பாலகரை வாழ்த்தத் தவற வேண்டாம்!

*****

துறவின் மிக்கதோர் அறமில்லை என்றுணர்ந்து மனத்தை அடக்கி மாண்போடு வாழப் பழகும் சிறார் இவர்கள் என்கிறார் திருமிகு. சரஸ்வதி ராசேந்திரன்.

ஊனோடு உயிர் ஒளி பெற்றிட
உயர்ந்தோர் சொன்ன மந்திரம்
துன்பம் அறுத்துப் பேரின்பம் பெற
துறவறம் பூணுதலே
சிறந்த அறமாகக்கொண்டு
எண்ணித்துணிந்தார் சிறுவர்கள்
மனதை அடக்குவது கடினம் அந்த
மாண்பான செயலைச் செய்ய பயிற்சி எடுக்கிறார்
சிறுவயதிலேயே
ஐம்பொறி புலன்களை
நெறிப்படுத்த ஐந்து வயதிலேயே வளைக்கிறார்கள்
அறத்தின் மிக்க உறுதியில்லை
துறவறத்தை மிக்க வேறு இல்லை
*****

அடுத்து வருவது இவ்வாரத்தின் சிறந்த கவிதை!

துறவென்பது…

உறவின் நிலையறிந்து,
வாழ்வின்
உண்மைப் பொருள் தெரிந்து
துறவு துளிர்க்கவேண்டும்,
அது
தூயதாய் இருக்கவேண்டும்!

அறியாத சிறுவயதில்
பிள்ளைகள் தலையில்,
அறியாமையால் ஏற்றும்
துறவுச் சுமை
தருவதில்லை பயனெதுவுமே…

அது
அவர்களுக்கு ஒரு
வேடிக்கை விளையாட்டே…!

துறவு என்பதை வாழ்வின் இறுதிநிலையாகவே கண்டனர் வாழ்வியல் அனுபவத்தில் தேர்ந்த நம் தமிழ்மக்கள்.

”காமஞ் சான்ற கடைக்கோட் காலை
ஏமஞ் சான்ற மக்களொடு துவன்றி
அறம்புரி சுற்றமொடு கிழவனும் கிழத்தியும்
சிறந்தது பயிற்றல் இறந்ததன் பயனே.”என்று தமிழரின் தலையாய இலக்கணநூல் தொல்காப்பியம் இயம்புவதும் அதுவே!

பிரமசரியம், கிருகஸ்தம், வானபிரஸ்தம், சந்நியாசம் என்ற வடவர் வாழ்வியல்முறையும் அதனையே வழிமொழியக் காணலாம்.

ஆகவே, துறவுநிலை என்றால் என்னவென்றே அறியாத இளம்பிள்ளைகளை அவ்வறத்தில் ஈடுபடுத்துவது பலவந்தமான திணிப்பே; அவர்களுக்கு அதுவும் ஓர் வேடிக்கை விளையாட்டே என்ற உண்மையைத் தன் கவிதையில் பதிவுசெய்திருக்கும் திரு. செண்பக ஜெகதீசனை இவ்வாரத்தின் சிறந்த கவிஞராய் அறிவிக்கின்றேன்.

November 28, 2016
வான்கோழிகளின் தியாகத் திருநாள்!

-மேகலா இராமமூர்த்தி

நவம்பர் மாதத்தின் நான்காவது வியாழக்கிழமையை நன்றியறிதல்நாளாக (Thanksgiving Day) அமெரிக்கர்கள் கொண்டாடுவது வழக்கம். அமெரிக்க உள்நாட்டுப்போர் (American Civil War) நடந்துகொண்டிருந்த காலகட்டமான 1863-ஆம் ஆண்டில் அப்போதைய அமெரிக்க அதிபர் ஆபிரகாம் லிங்கன் அவர்கள் அவ்வாண்டின் நவம்பர் 26-ஆம் நாள், நன்றியறிதல்நாளாகக் கொண்டாடப்படும் என்று அறிவித்தார். அதன்பின்னர் அந்நடைமுறை இன்றுவரைத் தொடர்ந்து கடைப்பிடிக்கப்பட்டு வருகின்றது அமெரிக்காவில்!

நன்றியறிதல்நாள் தற்போது கனடா உள்ளிட்ட பிற ஐரோப்பிய நாடுகளிலும் கொண்டாடப்பட்டு வருவது இவ்விழாவின்மீது உலகமக்களுக்குள்ள ஈடுபாட்டைக் காட்டுகின்றது. இந்நன்றியறிதல்நாள் விழாவில் மக்களின் விருந்துணவில் முக்கிய இடம்பிடிப்பது வான்கோழி இறைச்சி.

வான்கோழி என்றதும் கானமயிலும் உடனே நம் நினைவுக்கு வந்துவிடுகின்றது. மயிலோடு போட்டியிடும் வான்கோழி குறித்து அறிவுசால் நங்கையாம் அவ்வை மொழிந்திருக்கும் மூதுரை வரிகள் மறக்க இயலாதவை!

கான மயிலாடக் கண்டிருந்த வான்கோழி
தானு மதுவாகப் பாவித்துத்–தானுந்தன்
பொல்லாச் சிறகைவிரித் தாடினாற் போலுமே
கல்லாதான் கற்ற கவி.

”எதனையும் முறையாகக் கல்லாத ஒருவன், கசடறக்கற்றவன் ஒருவன் கவிபாடுதல் கண்டு தானும் கவிபாடுதல், கானமயில் தன் அழகிய தோகையை விரித்தாடுதல் கண்ட வான்கோழி, தானும் தன் அழகில்லாச் சிறகை விரித்தாடுதல் போன்று நகைப்புக்கிடமானது” என்கிறார் அவ்வை.

அழகுக்குப் போட்டிவைத்தால் அனைவரின் வோட்டும் மயிலுக்குத்தான் விழும்; வான்கோழி ’டெபாசிட்’ இழக்கும் என்பதில் ஐயமில்லை. எனினும், இறைச்சிச்சுவை என்று வரும்போது வான்கோழியைக் குறைத்து மதிப்பிட இயலாது; சுவையில் அது மயிலை வென்றுவிடும் தகுதி படைத்தது என்கிறார்கள் அசைவப் பிரியர்கள்!

பெரிய உருவமும் விசிறிபோன்ற இறகுகளும் கொண்ட வான்கோழி, அமெரிக்காவைப் பூர்வீகமாகக் கொண்ட பறவையாயிருந்தும், அதற்கு Turkey என்ற ஆங்கிலப்பெயர் வந்தது எப்படி என்ற குழப்பம் பலருக்கும் எழுவதுண்டு. அந்த அமெரிக்கப் பறவை துருக்கியப் பறவையாக ஆனதெப்படி என்பதற்குக் கொலம்பியா பல்கலைக்கழகப் பேராசிரியர் மரியோ பை (Mario pei) அவர்கள் பின்வருமாறு விளக்கமளிக்கிறார்:

ஐரோப்பியர்கள் முதன்முதலில் வான்கோழியைக் கண்டதென்னவோ அமெரிக்காவில்தான்; ஆயினும், அப்பறவையை மேற்கு ஆப்பிரிக்காவின் கினி பகுதியைச் சேர்ந்த கோழிவகை (Guinea fowl) என்று அவர்கள் தவறாக எண்ணிக்கொண்டார்கள். அது, துருக்கிய வணிகர்களால் கான்ஸ்டாண்டிநோபில் (Constantinople – it’s modern name is Istanbul) நகரின் வழியாக ஐரோப்பாவுக்கு அதிக எண்ணிக்கையில் இறக்குமதி செய்யப்பட்டதைக் கண்ட அவர்கள் அப்பறவைக்குத் துருக்கியக் கோழி (turkey fowl) என்று பெயர்சூட்டியிருக்கிறார்கள். இதுவே பின்னாளில் Turkey என்று சுருங்கிவிட்டது என்கிறார் அப்பேராசிரியர்.

வான்கோழி விருந்து நன்றியறிதல்நாளில் நுழைந்தது எப்படி?

இங்கிலாந்து நாட்டுக் கிறித்தவம் தந்த நெருக்கடிகளையும் கடுமையான சட்டதிட்டங்களையும் விஷமென வெறுத்த சுதந்திரச் சிந்தனைகொண்ட வெள்ளையர்கள் சிலர் (they are popularly known as pilgrims) அங்கிருந்து கிளம்பி, மே மலர் (Mayflower) எனும் சிறிய படகில் புறப்பட்டு, புயலிலும் கடுங்குளிரிலும் 65 நாட்கள் நெடும் கடற்பயணம் மேற்கொண்டு அமெரிக்காவின் மசாசுசெட்ஸிலுள்ள (Massachusetts) ஒரு துறைமுகப்பகுதியை 1620-இல் வந்தடைந்திருக்கின்றனர். அவர்கள் அப்பகுதிக்கு இட்டபெயர் ப்ளைமவுத் (Plymouth) என்பதாகும். பசிக்கொடுமையாலும் குளிரின் கடுமையாலும் வந்தர்களில் பாதிப்பேர் பரிதாபமாக இறந்துபோயினர்!

எஞ்சியிருந்த வெள்ளையருக்கு ப்ளைமவுத் பகுதியை ஒட்டிய காடுகளில் வசித்துவந்த அமெரிக்கப் பழங்குடியினரோடு பழக்கம் ஏற்பட்டது. கள்ளமற்ற உள்ளம் படைத்த அந்தப் பழங்குடிமக்கள், புதிதாக வந்தவர்களுக்கு உணவு தந்து உபசரித்ததோடு, குடியிருப்புக்களை உருவாக்கிக்கொள்ளவும், சோளம், பரங்கி முதலியவற்றைப் பயிரிடவும், நன்னீரில் மீன்பிடித்தலையும் புதியவர்களுக்குக் கற்றுத் தந்திருக்கின்றனர். அதன்பயனாக, அடுத்த ஆண்டே, அதாவது 1621-இல், தங்கள் நிலங்களில் நல்ல விளைச்சலைக் கண்ட வெள்ளையர்கள் அதற்கு இறைவனுக்கு நன்றிதெரிவிக்கும் முகமாக நன்றியறிதல்நாளைக் கொண்டாடியிருக்கின்றனர். உணவுப்பொருள்களை விளைவிக்கக் கற்றுத்தந்த இப்பழங்குடியினருக்கும் அந்நன்னாளில் விருந்தளித்து உபசரித்திருக்கின்றனர்.

அந்த நன்றியறிதல்நாள் விருந்தில் என்னென்ன உணவுகள் பரிமாறப்பட்டன என்ற தகவலை அவ்விருந்தைத் தயாரித்த சமையற்காரர்கள் பதிவுசெய்யாததால், அதில் வான்கோழி இடம்பிடித்திருந்ததா இல்லையா எனும் கேள்விக்கு நம்மால் துல்லியமாகப் பதில்சொல்ல இயலவில்லை.

ஆயினும் வான்கோழிகளின் தொடக்ககாலப் பயன்பாடுகளை ஆராய்ந்தவர்கள் அவை ஆரம்பத்தில் உணவுக்காகப் பயன்படுத்தப்படவில்லையென்றும், அவற்றின் சிறகுகள் மட்டுமே கால்மிதிகள், போர்வைகள் முதலியவை தயாரிக்கப் பயன்படுத்தப்பட்டன என்றும் கூறுகிறார்கள். பின்னர், அவற்றின் இறைச்சியையும் ருசிபார்த்த மக்கள் அதன்சுவையில் ஈடுபட்டிருக்கவேண்டும். அந்த இறைச்சியைத் தங்களுடைய நன்றியறிதல்நாள் விழாவின் சிறப்புணவாக அவர்கள் சேர்த்துக்கொண்டிருக்கவேண்டும்.

வான்கோழி இவ்விழாவில் இடம்பிடித்ததற்கு மற்றொரு காரணமும் சொல்லப்படுகின்றது. இங்கிலாந்துக்கு எதிரான போரில் ஸ்பெயின் ஈடுபட்டபோது ஸ்பெயினின் கப்பலொன்று விபத்துக்குள்ளாகி நீரில் மூழ்கிவிட்டதாம். அதனையறிந்த இங்கிலாந்து மகாராணியார் முதலாம் எலிசபெத், வான்கோழிக்கறியை உண்டு அந்த மகிழ்ச்சியைக் கொண்டாடினாராம். அந்த அடிப்படையில்தான் மகிழ்ச்சித் திருநாளான நன்றியதல்நாளையும் அவ்வாறே வான்கோழியோடு கொண்டாடுவது எனும் வழக்கம் ஏற்பட்டதாம். (மாற்றானின் வீழ்ச்சியில் மகிழ்ச்சிகொண்டு ஆனந்தக்களியாடும் அநாகரிக வழக்கத்தை மானுடம் என்றுதான் நிறுத்தப்போகிறதோ தெரியவில்லை!)

அறுவடைத் திருநாளே நன்றியறிதல்நாளாக மலர்ந்திருக்கின்றது எனும்போது, அவற்றைக் கொண்டாடும் நாடுகள், அங்கே புதிதாக அறுவடையான உணவுப்பொருள்களையும், தானியங்களையும் கொண்டு உணவுசமைத்து உண்பதே பொருத்தமுடையதாக இருக்கும். அதைவிடுத்து, வான்கோழிகளைக் கணக்கில்லாமல் கொன்றுகுவித்து இந்நாளில் புசிப்பது எதற்காக? எத்தனை வான்கோழிகள் மக்களின் அற்ப மகிழ்ச்சிக்காகவும் பாரம்பரிய வழக்கத்துக்காகவும் இந்நன்னாளில் தம் இன்னுயிரைத் தியாகம் செய்கின்றன என எண்ணும்போது வேதனைதான் மிஞ்சுகின்றது.

நன்றியறிதல்நாள் என்றும் அறுவடைத் திருநாள் என்றும் சம்பிரதாயமாக இந்நாளை அழைப்பதைக் காட்டிலும் ’வான்கோழிகளின் தியாகத் திருநாள்’ என்று அழைப்பதுதான் சாலப்பொருத்தமாக இருக்குமோ?

November 25, 2016
படக்கவிதைப் போட்டி – (87)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

அருண் வீரப்பன் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 26.11.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

November 21, 2016
படக்கவிதைப் போட்டி 86-இன் முடிவுகள்

-மேகலா இராமமூர்த்தி

இவ்வாரப் போட்டிக்கான படத்தை எடுத்துத்தந்திருப்பவர் திருமதி. ராமலக்ஷ்மி. தேர்வாளர், வல்லமை ஃப்ளிக்கர் குழுமத்தின் பொறுப்பாசிரியரான திருமதி. சாந்தி மாரியப்பன். இவர்களுக்கு நம் நன்றிகளை உரித்தாக்குவோம்!

அன்னையவள் கரந்தவழும் அலைபேசி படம்பிடிப்பது யாரை என்று ஆவலுடன் பார்வையிடுகின்றதோ இந்த மழலை?

இதற்கான விடையைக் கண்டுபிடிக்க நம் கவிஞர்கள் காத்திருக்கின்றார்கள்.

***

”பிள்ளையைக் கவனியாது கைப்பேசியில் அன்னையவள் எடுக்கும் இந்தப் படம், பொய்வாழ்வே மெய்யென்று அப்பிள்ளைக்குச் சொல்லாமல் சொல்லித்தரும் பாடம்” என்கிறார் திரு. செண்பக ஜெகதீசன்.

நாளைய பாடம்…

கைக்குழந்தையைக் கவனிக்காமல்
கீழே விட்டு,
கைபேசியில் படமெடுத்து
மெய்மறந்தால்,
நாளை வரும்
பொய் வாழ்வு
தானே படம்பிடிக்கப்படுகிறது–
பிள்ளை நெஞ்சில்…!

***

”நிஜத்தைத் தொலைத்து நிழலை ஆராதிக்கும் வழக்கத்தை விஞ்ஞானம் கற்றுத்தந்துவிட்டதால், பெற்றமனம் கல்லாகவும் பிள்ளைமனம் பித்தாகவும் மாறிப்போயிருப்பது நிழலல்ல நிஜமே!” என்கிறார் திருமிகு. ராதா விஸ்வநாதன்.

நிஜங்களை விட
நிழல்களையே தேடுகிறது மனம்
நிழல்களை நிஜமாக்கி விட்டது விஞ்ஞானம்
வானைமுட்டும் இதன் வளர்ச்சியில்
இன்று நிஜங்களின் பலி ஏராளம்!
பிஞ்சு மனத்தின் கெஞ்சல்
பெற்றவளின் காதில் எட்டவில்லை
சுயத்தின் நிழலில் தொலைந்து விட்டது
அவளது தொடு உணர்வு
தொடர்பு எல்லைக்கு அப்பால் அவள் நிற்க
பிள்ளை மனம் பித்தாகி
பெற்ற மனம் கல்லான இக்காட்சி
நிழல் அல்ல நிஜம்

***

அழுதபிள்ளைக்குப் பாலூட்டாமல் அவசியமற்ற செயல்களில் சிந்தையைச் செலுத்தும் அன்னையைச் சாடுகின்றார் திரு. சி. ஜெயபாரதன்.

சேயிக்குப் பசி!
தாய்ப்பால் கேட்கிறது!
தாயிக்கு மோகம்!
ஆண்பால் தேடுது!
பெண்பாலுக்கு ஆண்பால்!
அழுத பிள்ளைக்குப் பாலூட்டும்
அன்னை இல்லை!
தவமிருந்து பெற்ற பிள்ளை
தவியாய்த் தவிக்குது!
பிள்ளை இல்லாதவள் அந்த
பிரம்மாவைத் துதிப்பாள்!
பிள்ளை உள்ளவள் காதலன் தேடி
கல்லாகிப் போனாள்!

***

இவ்வாரத்தின் சிறந்த கவிதை அடுத்து…

’செல்பி’ மோகம்

நின்றால் நடந்தால் இருந்தாலென்ன
சின்னச்சின்ன அதிர்வுகளும் கவனிக்கப்படும்
செல்லப்பிள்ளையாய் மனசு துடிக்கும்
சிறுவெற்றிடம் கிடைத்தாலும்
கைபேசி காட்சிப்படமாய் விரிந்திடும்
காட்சிப்படங்களை நுட்பமாய்ச் செதுக்குகையில்
காட்சிப்பிழைகளாய் அகாலமரணங்கள்
சிருங்காரம் முதல் மெய்ப்பாடுகள் கையடக்கப் பதிவுகளாய்
தன்மோகம் அதிகரித்துப் பிறர்வாட
வேடிக்கை பார்க்கும் நாகரிகம்
வேகமாய்ப் பரவும் மாயமென்ன?
இயற்கை அழகு கொட்டிக்கிடக்க
அன்னையவள் அருகிருக்க
பிஞ்சு மழலையின் பஞ்சுக் கரங்கள் பற்றிட ஆளில்லை
நெஞ்சுரத்தில் நஞ்சுரம் ஏறிய காரணமென்ன
யான் அறியேன் பராபரமே!

செல்பேசியில் ’செல்ஃபி’ எடுக்கும் வசதி வந்தாலும் வந்தது…மாந்தரனைவரும் வயது வித்தியாசமின்றித் ’தம்படம்’ (செல்ஃபி) எடுத்துத் தம் பெருமையைத் ’தம்பட்டம்’ அடித்துக் கொள்வதிலேயே பொழுதைக் கழிக்கத் தொடங்கிவிட்டனர். அரவணைக்கவேண்டிய பிஞ்சுக்குழந்தையையும் அந்நியமாக்கிவிடும் இந்த நஞ்சுகுணம் நல்லோரை அஞ்சவே செய்கின்றது எனும் அருங்கருத்தைத் தன்கவிதையில் பதிந்திருக்கும் திருமிகு. மா. பத்ம பிரியாவை இவ்வாரத்தின் சிறந்த கவிஞராய்த் தேர்ந்தெடுக்கின்றேன்.

November 21, 2016
காவிரி புரக்கும் நாடு – 6

-மேகலா இராமமூர்த்தி

காவிரிப்புனல் தமிழகத்தைப் பொன்கொழிக்கச் செய்தது கன்னடரின் மனத்தில் அனலை மூட்டியது போலும்! நம் மன்னர்களின் கை ஓங்கியிருந்த போதெல்லாம் ஒடுங்கியிருந்த அவர்களின் நரித்தனம், நம் பிடி சற்றுத் தளர்ந்தபோதெல்லாம் நர்த்தனம் ஆடியிருக்கின்றது!

மைசூரை ஆண்ட போசள மன்னனான முதலாம் நரசிம்மன், கி.பி. 12-ஆம் நூற்றாண்டில் மைசூருக்கருகே காவிரியில் அணைகட்டி அதன் சோழமண்டலப் பாசனத்தைத் தடுக்க முயன்றிருக்கின்றான். பிற்காலச் சோழர்களின் ஆட்சி நம் தமிழகத்தில் மாட்சியோடு நடைபெற்றுக்கொண்டிருந்த காலமது. அப்போது ஆண்டுகொண்டிருந்த இரண்டாம் குலோத்துங்கன், தன் மகனான இரண்டாம் இராசராசனிடம் ஓலை தந்து, அவனைப் போசள மன்னனிடம் அனுப்பி, அணை கட்டும் முயற்சியைக் கைவிடும்படிக் கேட்டிருக்கின்றான். போசள மன்னன் அதற்கு இணங்க மறுக்கவே, மறவர்படையோடு சென்று போசளன் கட்டிய அணையை உடைத்தெறிந்து காவிரியை விடுவித்திருக்கின்றான் இரண்டாம் இராசராசன்!

பிரச்சனை அத்தோடு முடிந்ததா…? இல்லை! மீண்டும் தலையெடுத்தது கி.பி. 17-ஆம் நூற்றாண்டில். (இதற்கு இடைப்பட்ட காலத்தில் இப்பிரச்சனை எந்த நிலையில் இருந்தது என அறியக்கூடவில்லை.) மைசூரை ஆண்ட சிக்கதேவராயன் என்ற மன்னன், காவிரியின் குறுக்கே செயற்கை மலை(!) ஒன்றை உருவாக்கிக் காவிரிநீர் தமிழகத்துக்கு வரமுடியாமல் தடுக்கப் பார்த்திருக்கிறான். அப்போது தஞ்சையை ஆண்ட மராட்டிய மன்னன் சாகசி, மதுரையை ஆண்ட ராணி மங்கம்மாள் படையின் துணையோடு காவிரியில் உருவாக்கப்பட்ட அந்தச் செயற்கை மலையை அகற்றப் புறப்பட்டான். இப்படை, அங்குச் செல்லும் முன்பாகவே மைசூர் மாநிலத்தில் பெய்த பெருமழை, சிக்க(ல்)தேவராயன் உருவாக்கிய அந்தச் செயற்கை மலையை அடித்துச் சென்றுவிட்டதாகத் தெரிகிறது. தமிழர்க்குத் துணைசெய்த அம் மாமழையைப் போற்றுவோம்!

கன்னடத்துக்கும் தமிழகத்துக்குமிடையே பேராறாக ஓடிப் பெருவளம் தந்த காவிரி, கொஞ்சங்கொஞ்சமாய்ப் பெரும் பிரச்சனையாக உருவெடுக்க ஆரம்பித்ததை மேற்கண்ட வரலாறுகள் தெற்றெனப் புலப்படுத்துகின்றன.

இருபதாம் நூற்றாண்டில் இப்பிரச்சனை மேலும் தீவிரமடையத் தொடங்கிற்று. கருணையற்ற கன்னடஅரசு காவிரியின் குறுக்கே பல அணைகளைக் கட்டித் தமிழகத்துக்கு வரவேண்டிய தண்ணீரைத் தடைசெய்து, நம் காவிரிடெல்டா விவசாயிகளைக் கண்ணீரில் நீந்தச்செய்து வருவது நாமறிந்ததே.

இமயத்தில் புலிச்சின்னம் பொறித்த இணையற்ற மாவீரன் கரிகாலனின் வளநாட்டில் பிறந்து,

”மண்திணி ஞாலத்து வாழ்வோர்க் கெல்லாம்
உண்டி கொடுத்தோர் உயிர் கொடுத்தோரே” எனும் நன்மொழிக்கிணங்க, ஊருக்கே உண்டிகொடுத்து உயிர்கொடுத்தச் சோழநாட்டு விவசாயிகள் இன்று தமக்கே உணவின்றித் தவிப்பதும், வேளாண்மை செய்யவியலா விரக்தியில் அவர்கள் தற்கொலைசெய்து மரிப்பதும்…அந்தோ! காணச் சகியாத கலியின் கொடுமைகள்!

இது ஒருபுறமிருக்க, காய்தல் உவத்தலின்றி அனைத்து மாநிலங்களிடமும் நடுநிலையோடு நடந்துகொள்ளவேண்டிய நடுவணரசோ, அரசியல் சுயலாபத்திற்காகக் கன்னடத்தைப் பகைத்துக்கொள்ள பயந்து பதுங்குகின்றது. உச்சநீதிமன்றம் இவ்விவகாரத்தில் தலையிட்டுத் தரும் தீர்ப்புகளையோ கன்னடம் துச்சமெனத் தூக்கியெறிகின்றது. ’தருமத்தின் வாழ்வுதனைச் சூது கவ்வும்’ என்றான் பாரதி. ’தமிழகத்துக் காவிரிநீரைக் கருநாடகம் வவ்வும்’ என்று அதனை மாற்றிப் பாடவேண்டிய அவலநிலை நமக்கு இப்போது நேர்ந்திருக்கின்றது.

சங்கடமான இத்தருணத்தில் தமிழகஅரசு செய்யவேண்டியது என்ன?

தமிழகத்தில் விவசாயம் தழைக்கவும், விவசாயிகள் பிழைக்கவும், தமிழக அரசு தன்னுடைய செயலற்ற ’கோமா’ நிலையிலிருந்து வேகமாய் விடுபட்டு, தமிழகத்துக்கு நியாயமாகக் கிடைக்கவேண்டிய காவிரிநீருக்காக உரிமைக்குரல் எழுப்புவதும், நீதி கிடைக்கும்வரைத் தொடர் போராட்டங்களில் ஈடுபடுவதும் அவசியம்!

எதிர்பாராத காரணங்களினால் ஆட்சியின் ’தலைமை’ப் பொறுப்பிலிருப்போர் செயலிழக்கும் சூழலில், மக்களைக் காக்கவேண்டிய கடப்பாடு தலைமையின்கீழ் இயங்கும் ’கரைவேட்டிகளுக்கு’ (அமைச்சர்களுக்கு) இருக்கிறது. அக்கரைவேட்டிகள் வையத்தை வாழ்விக்கும் விவசாயிகள் நலனில் அக்கறைகாட்டாது, ’தலைமை’யின் நிலைமை குறித்தே அல்லும் பகலும் கவலைகொள்வதும், தமக்கான அரசியற் கடன்களை இடமறிந்து, காலமறிந்து நேர்த்தியாய்ச் செய்வதைவிடுத்து, (ஆலயங்களில்) ’நேர்த்திக் கடன்’ செலுத்துவதிலேயே தம் பொன்னான நேரத்தைக் கொன்னே கழிப்பதும் கடுங் கண்டனத்துக்குரியது!

இது நிற்க. நம் உரிமைகளுக்காக நாம் போராடும் அதே வேளையில், நம் கடமைகளையும் சரிவரச் செய்தல் அவசியமன்றோ?

என்ன கடமைகள் அவை?

பாழ்பட்டுவரும் காவிரியையும், அதையொத்த பிற தமிழக ஆறுகளையும் ஒழுங்காகத் தூர்வாரிப் பராமரிப்பதும், வெள்ளக் காலங்களில் கிடைக்கின்ற அதிகப்படியான நீரை, நீர்நிலைகளில் பாதுகாப்பாய்த் தேக்கிவைப்பதும், ஆற்றுநீரில் ஆலைக்கழிவுகள் கலந்து அதனை நஞ்சாக மாற்றுவதைத் தடுப்பதும், ஆறுகள் வறண்டிருக்கும் காலங்களில் அங்கே மணலை அள்ளுவது, குடியிருப்புக்களை உருவாக்குவது போன்ற முறைகேடுகளைத் தவிர்ப்பதும் காலந்தாழ்த்தாது நாம் ஆற்றவேண்டிய அருங்கடமைகளாகும். ஆறுகளும் ஏரிகளும் சரியாகப் பராமரிக்கப்படாததாலன்றோ சென்ற ஆண்டு நம் செந்தமிழ்நாட்டுக்கு ’வாராதுபோல் வந்த மாமழை’ வடதமிழகத்தையே தண்ணீரிலும் கண்ணீரிலும் மூழ்கடித்தது!

பண்டைச் சோழர்கள் காவிரிப் பேராற்றைத் தக்கமுறையில் பேணி, கரையெடுத்துக் காத்ததாலேயே அது சோழநாட்டை சோற்றுப் பஞ்சமற்ற வளநாடாக்கியது என்பதை நாம் நெஞ்சில் நிறுத்தவேண்டும்!

காவிரி புரக்கும் நாடாய்ச் சோழவளநாடு பீடுநடை போட்டதைப் பண்டை இலக்கியங்கள் ஐயத்திற்கிடமின்றி நமக்கு அறியத்தருகின்றன. ஆயிரங்கலம் நெல்விளைத்த வியன்கழனிகளும், திடர்தோறும் உயர்ந்துநின்ற நெற்கூடுகளும், சோறுவடித்த கொழுங்கஞ்சி ஆறாய்ப் பெருகியோடிய அகன்ற தெருக்களும், வான்பொய்ப்பினும் தான்பொய்யாது ஓடிய காவிரியின் கடும்புனல் வெள்ளமும், அப்புதுப்புனலில் நீந்திக்களித்த மக்களின் ஆரவாரமும் நம் நெஞ்சைவிட்டகலா அற்புதக் காட்சிகள்!

அப்பொற்காலம் நம் தமிழர்க்கு மீண்டு(ம்) வாராதோ?

(முற்றும்)

*****

படத்துக்கு நன்றி: http://www.mapsofindia.com/my-india/cities/cauvery-river-water-dispute

November 16, 2016
காவிரி புரக்கும் நாடு – 5

-மேகலா இராமமூர்த்தி

காவிரி வெள்ளத்தில் அத்தி அடித்துச்செல்லப்பட்டதைக் கண்டவர் அனைவரும் செயலற்று உறைந்திருக்க, ஆதிமந்தியோ அலறிக்கொண்டே சென்றாள் காவிரிக்கரையோரமாய். காவிரி, கடலில் கலக்கும் இடத்தருகே வந்தவள், “கல்போன்ற வலியதோளையுடைய என்னுயிர்க் காதலனே! நீ எங்கே சென்றாய்?” என்று கதறிக்கொண்டு கடலைப் பார்த்தபடியே கண்ணீர்வழிய நின்றிருந்தாள். திடீரென்று கடலின் மத்தியிலிருந்து ஒருபெண் தோன்றினாள்; மயக்கநிலையிலிருந்த அத்தியைத் தன் மலர்க்கரங்களில் ஏந்தியிருந்த அந்த ஏந்திழை, கரையை நோக்கி விரைந்துவந்தாள். அங்கே அலமந்து நின்றிருந்த ஆதிமந்தியிடம் அத்தியை ஒப்படைத்துவிட்டுச் சரேலென்று திரும்பியவள் கடலுக்குள் மூழ்கிமறைந்தாள்!

இந்த அதிசயத்தைக் கண்ட ஆதிமந்தி, தன் கண்களையே நம்பமுடியாது திகைத்தாள். பின்னர், திகைப்பு நீங்கி மயக்கத்திலிருந்துவிடுபட்ட தன் கணவனை அன்போடு அணைத்துக்கொண்டு புகார்நகர் நோக்கி மெல்ல நடந்தாள். அத்தியைக் கடலிலிருந்து காத்து, பின்னர்க் கடலுள் மூழ்கிமறைந்த (உயிர்நீத்த) அவ்வீரமங்கையின் பெயர் ’மருதி’ என்று பரணரால் குறிக்கப்பட்டிருக்கின்றது. அத்தி உயிர்பிழைத்ததில் மகிழும் நம் உள்ளம் மங்கைநல்லாள் மருதியின் மரணத்தால் வருத்தமடைகின்றது!

…முழவுமுகம் புலராக் கலிகொள் ஆங்கண்
கழாஅர்ப் பெருந்துறை விழவின் ஆடும்
ஈட்டெழில் பொலிந்த ஏந்துகுவவு மொய்ம்பின்
ஆட்டன் அத்தி நலன்நயந்து உரைஇத்
தாழிருங் கதுப்பின் காவிரி வவ்வலின்
மாதிரம் துழைஇ மதிமருண்டு அலந்த
ஆதி மந்தி காதலற் காட்டிப்
படுகடல் புக்க பாடல்சால் சிறப்பின்
மருதி அன்ன மாண்புகழ் பெறீஇயர்
சென்மோ வாழி தோழி… (அகம்: 222 – பரணர்)

தோழி தலைவியிடம் சொல்லுகின்ற பாங்கில் படைக்கப்பட்டுள்ள அகப்பாடல் இது!

தலைவியைச் சந்திக்கத் நாள்தவறாது வந்துகொண்டிருந்த தலைவனின் வரவு சிலநாட்களாய்த் தடைப்பட்டுப்போனது. அவன் எங்குப் போனான்? என்ன ஆனான்? எனும் கவலையில் ஆழ்ந்திருந்தனர் தலைவியும் அவள் ஆருயிர்த்தோழியும். அப்போது, ஆதிமந்தியின் கதையைத் தலைவிக்கு நினைவூட்டும் தோழி, “கலங்காதே கண்மணி! நாமும் தலைவனைத் தேடிப் புறப்படுவோம்! அவனைக் காணமாட்டாது உயிர்துறப்போமாயினும் தன் காதற்கணவனைத் தேடித்திரிந்த ஆதிமந்திக்கு அவள் காதலனைக் காட்டி மறைந்த மருதிபோல நாமும் மாண்புகழ் பெறலாம்!” என்று ஆறுதல் கூறுகின்றாள். (தலைவியும் தோழியும் பேசிக்கொண்டிருக்கும் இச்செய்திகளையெல்லாம் இவர்கள் ’காணவில்லை’ என்று தேடிக்கொண்டிருக்கும் தலைவனும் மறைந்திருந்து கேட்டுக்கொண்டுதான் இருக்கிறான் என்பதையும் அறிக!)

காவிரியின் கடும்புனல் வெள்ளமானது மணமலர்களை மட்டும் அள்ளிக்கொண்டு வருவதில்லை; சற்றே கவனக்குறைவாக இருந்தால் தன் தண்புனலில் நீராடுவோரையும் அள்ளிக்கொண்டு சென்றுவிடும் அபாயமுடைத்து என்பதே ஆட்டனத்தி குறித்த பாடல்களால் நாம் அறியும் செய்தி! காவிரி நீத்தத்தில் நீராடுவது ஆபத்தோடு கூடிய இன்பமாகத்தான் இருக்கும் போலிருக்கின்றது!

ஆட்டனத்தி ஆதிமந்தி வரலாற்றைப் பாவேந்தர் பாரதிதாசன் ’சேரதாண்டவம்’ என்ற பெயரில் நாடகமாக்கியுள்ளதும், கவியரசு கண்ணதாசன் ’ஆட்டனத்தி ஆதிமந்தி’ எனும் பெயரில் காவியமாய்ப் படைத்துள்ளதும் இக்க்கதையின்பால் நம் கவிஞர்களுக்குள்ள ஈர்ப்பைப் புலப்படுத்துகின்றது.

இதோ… புகார்நகர வீதியில் ஆணழகன் ஒருவனும், ஆரணங்கு ஒருத்தியும் சிரித்துப் பேசிக்கொண்டே செல்வதைப் பார்க்கிறோம். இவர்கள் யாரென்று அறிந்துகொண்டு வருவோம் வாருங்கள்!

ஓ…தெரிந்துவிட்டது! இளங்கோவின் காப்பியத் தலைவனான கோவலனும் அவன் அருமைக்காதலி மாதவியும் அல்லவா இவர்கள்! இந்த மருள்மாலை வேளையில் மனமகிழ்ச்சியோடு எங்கோ சென்றுகொண்டிருக்கிறார்களே இருவரும்! எங்கே? புரிந்துவிட்டது! புகார்நகரில் சீரும் சிறப்புமாய்க் கொண்டாடப்படும் இந்திரவிழாவின் இறுதிநாள் இன்று! அதனால்தான் இவர்கள் இருவரும் கடற்கரைக்குச் சென்று இன்பமாய்ப் பொழுதைக்கழிக்கப் போய்க்கொண்டிருக்கிறார்கள் போலும்!

நாமும் ஓசைப்படாமல் அவர்களைப் பின்தொடர்வோம்!

கடற்கரைக்கு அருகிலுள்ள சோலையில்வந்து அமர்ந்துவிட்டனர் இருவரும். (இப்பகுதியை நெய்தலங்கானல் என்பர்). சற்றுத்தூரத்தில் துள்ளிச் சென்றுகொண்டிருந்த காவிரியாற்றைத் தன் கண்களால் பருகினான் கோவலன். விரைந்துசெல்லும் புனல்வெள்ளம் அவனுள் கற்பனைஊற்றைத் திறந்துவிட, காவிரிமங்கையைப் புகழ்ந்து கவிவெள்ளத்தைப் பாய்ச்சத் தொடங்கினான்!

திங்கள் மாலை வெண்குடையான்
சென்னி செங்கோல் அதுஒச்சிக்
கங்கை தன்னைப் புணர்ந்தாலும்
புலவாய் வாழி காவேரி.
கங்கை தன்னைப் புணர்ந்தாலும்
புலவாது ஒழிதல் கயல்கண்ணாய்.
மங்கை மாதர் பெருங்கற்புஎன்று
அறிந்தேன் வாழி காவேரி (சிலப்: கானல்வரி: ஆற்றுவரி – 2)

சிலம்பிலுள்ள கேட்கத் தெவிட்டாதக் கானல்வரிப் பாடல்களில் ஒன்று இது. (காவிரியாற்றின் புகழைச்சாற்றுவதால் இது ஆற்றுவரி எனப்படும்.)

பாடலின் பொருளறிந்து சுவைத்தால் இன்னும் இன்பம் கூடுமன்றோ?

”திங்களைப் போன்ற வெண்கொற்றக்குடையுடன் செங்கோலாட்சிசெய்யும் சோழமன்னன், கங்கையென்னும் வேறோர் பெண்ணைச் சேர்ந்தாலும் அதற்காக ஊடல்கொள்ளமாட்டாளாம் காவிரிப்பெண்ணாள்; அதுவே பெண்டிரின் பெருங்கற்பு(!) என அறிந்தேன்; அத்தகைய கற்புடைய காவிரியே நீ வாழி!” என்று காவிரியைத் தன் பாவில் வாழ்த்துகின்றான் கோவலன்.

கோவலனின் பாடல்வரிகளைக் கவனமாகக் கேட்டிருந்த மாதவி, ”இவர் பாடலுள் (விவகாரமான) வேறோர் குறிப்புத் தென்படுகின்றதே! கணவன் எப்படி இருந்தாலும் அவனை மன்னித்து மதித்து நடப்பதே மங்கைக்கு அழகு என்றல்லவா இதன் பொருள் அமைகின்றது! சரி, இருக்கட்டும்! என்முறை வந்ததும் இவர் பாடலுக்குத் தக்க பதிலடி தருகிறேன்” என்று தனக்குள் குறும்பாக எண்ணிக்கொண்டாள்.

தான் வேறோர் பெண்ணை நேசிப்பதைப் போன்ற பொருள்தொனிக்க மேலும் சில பாடல்களைக் கோவலன் பாடிமுடித்ததும் மாதவியின் முறை வந்தது. தன் காந்தள் மென்விரல்கள் யாழில் பாந்தமாய் விளையாட, பின்வரும் பாடலைப் பாடத் தொடங்கினாள் அவள்.

மருங்குவண்டு சிறந்தார்ப்ப மணிப்பூஆடை அதுபோர்த்துக்
கருங்கயற்கண் விழித்தொல்கி நடந்தாய்வாழி காவேரி
கருங்கயற்கண் விழித்தொல்கி நடந்தவெல்லாம் நின்கணவன்
திருந்துசெங்கோல் வளையாமை அறிந்தேன்வாழி காவேரி! (சிலப்: கானல்வரி: 144-147)

உன் கரைகளின் இருமருங்கிலும் வண்டுகள் கீதமிசைக்க, அழகிய பூவாடை போர்த்து, ஆற்றில்செல்லும் கரிய கயல்மீன்களையே கண்களாகக்கொண்டு விழித்துநோக்கி, ஒல்கி ஒசிந்து நடைபயிலும் காவிரிப் பெண்ணே…நீ வாழி!

நீ இவ்வாறு அழகுநடை பயிலக்காரணம் உன் கணவனாகிய சோழமன்னனின் வளையாத செங்கோலாட்சியே என்றறிந்தேன் என்கிறாள் மாதவி.

இங்கு அவள் குறிப்பால் உணர்த்துவது…”நேரிய ஆட்சிசெய்யும் உன் கணவனாகிய சோழமன்னன் சீரிய ஒழுக்கமுடையவனாகவும் இருப்பான்; அவன் அவ்வாறு ’நன்னடையோடு நடப்பதாலேயே அவன் மனைவியாகிய நீயும் பூரிப்போடு நளின நடை நடக்கின்றாய் என்பதே!”

இப்பாடலைத் தொடர்ந்து, (கோவலனுக்குப் போட்டியாக) தானும் வேறொருவனை நேசிப்பதுபோன்ற கருத்தமைந்த காதற்பாடல்களை மாதவி பாட, விதி தன் வேலையைக் காட்டத் தொடங்கியது! உண்மையாகவே மாதவி வேறொருவனை மனத்தில்வைத்தே இப்பாடல்களைப் பாடுகின்றாள் என்று தவறாக எண்ணிக்கொண்ட கோவலன் கடுங்கோபம் கொண்டவனாய் அவளிடம் சொல்லிக்கொள்ளாமலே அவ்விடம் விட்டு அகன்றான். அந்தப்பிரிவு நிரந்தரப் பிரிவாகவே அவர்கள் வாழ்வில் அமைந்துவிட்டது.

இதைத்தான், ’யாழிசைமேல் வைத்து ஊழ்வினை உருத்தது’ என்று வேதனையோடு விளம்புவார் இளங்கோ.

கோவலனும் மாதவியும் யாழிசைத்துப் பாடுகின்ற இப்பாடல்களைக் கானல்வரிப்பாடல்கள் என்று சொல்வதினும் தித்திக்கும் கன்னல்வரிப் பாடல்கள் என்று சொல்வதே சாலப்பொருத்தம். ஓசைநயமும் தாளக்கட்டுமுடைய இசைத்தமிழ்ப் பாடல்கள் இவை. புரியாத மொழிகளில் எதை எதையோ பாடிக் கேட்போரைச் சங்கடத்தில் ஆழ்த்தும் நம் செந்தமிழ்நாட்டு இசைவாணர்களும் வாணிகளும் இதுபோன்ற இன்றமிழ்ப் பாடல்களையும் இடைஇடையே அரங்கில்பாடினால் தமிழிசை மீண்டும் தழைக்காதோ?

சங்க இலக்கியப் புறப்பாடல்களும், அகப்பாடல்களும், நெஞ்சையள்ளும் சிலம்பும் போட்டிபோட்டுக்கொண்டு காவிரியின் வளத்தையும் நலத்தையும் பாடிப் பரவியிருக்கின்றன. அவற்றில் சிலவற்றையே இங்குநான் தொட்டுக் காட்டியுள்ளேன்.

சங்ககாலத் தமிழகத்தைத் தன் தண்புனலால் செழிக்கவைத்த காவிரிப் பேராறு பிற்காலச்சோழர்கள் காலந்தொட்டே பல்வேறு சிக்கல்களைச் சந்திக்க ஆரம்பித்ததை வரலாறு நமக்கு வெளிச்சமிட்டுக் காட்டுகின்றது.

அவைகுறித்து அடுத்த பகுதியில் அலசுவோம்!

(தொடரும்)

November 14, 2016
படக்கவிதைப் போட்டி 85-இன் முடிவுகள்

-மேகலா இராமமூர்த்தி

இவ்வாரப் படக்கவிதைப் போட்டிக்கான ஒளிப்படத்தை எடுத்தவரும், அதன் தேர்வாளரும் ஒருவரே; அவர்தான், நம் வல்லமை ஃப்ளிக்கர் குழுமத்தின் பொறுப்பாசிரியரான திருமதி. சாந்தி மாரியப்பன்! அவருக்கு நம் நன்றியை முதலில் பதிவுசெய்துவிடுவோம்!

மாடுகள் ஒன்றோடொன்று முட்டிக்கொள்ளும் இக்காட்சி, ”வடித்த சோற்றுக்கஞ்சி அகன்ற தெருவினில் ஆறாய் ஓட, அந்தக் கஞ்சியாற்றில் நின்றபடி இரு எருதுகள் பொருததாலே அது சேறாய் மாறியது” என்று புகார் நகரத்தின் சோற்றுவளம் பேசும் பட்டினப்பாலை வரிகளை எனக்கு நினைவூட்டுகின்றது.

….அகனட்டிற்
சோறுவாக்கிய கொழுங்கஞ்சி
யாறுபோலப் பரந்தொழுகி
ஏறுபொரச் சேறாகி… (பட்டினப்பாலை: 43-46)

இக்காட்சி நம் கவிஞர்களுக்கு எத்தகைய நினைவுகளைக் கிளறியிருக்கின்றது என்பதை அறிந்துவருவோம் இனி!

***

ஆறாமறிவை அடையாத உயிர்களெல்லாம் சண்டையின்றிச் சமாதானமாய் வாழ்ந்திருக்க, ஆறறிவு படைத்த மனிதன்மட்டும் எப்போதும் சண்டையிட்டு மண்டையை உடைத்துக்கொள்கிறானே, ஒன்றுபட்டால் உண்டுவாழ்வு என்பதை உணர மறுக்கிறானே என்று வருந்துகின்றார் திரு. சி.ஜெயபாரதன்.

காளைச் சண்டைகள்,
கோழிச் சண்டைகள்,
யானைச் சண்டைகள்,
ரோமா புரியில்
மானிட விலங்குச் சண்டைகள்,
அனுதினம்
ஆண் பெண் சண்டைகள்,
ஆயுதப் போர்கள்,
அணுகுண்டு யுத்தம்,
உலகப் போர்கள்,
யுக யுகமாய் நேர்வதைத்
தவிர்த்தாயா ?
தடுக்க நீ முயன்றாயா ?
கலை உலகில்,
சண்டை இல்லாத
திரைப் படங்கள் குறைவு !
சண்டையில்
மண்டை உடைந்தாலும் மாந்தர்
மரணம் அடைந்தாலும்,
சண்டைகள் குறையா !
பிறவிக் குணமாய்ப்
பிறப்புரி மையாய்
பரம்பரை வழக்கமாய்
மரண கீதம் பாடுகிறோம் !
ஆறறிவு படைத்த மனிதா !
ஈரறிவுள்ள எறும்பினம்,
தேனீக்கள்
சேர்ந்து வாழ்வதைக் காணடா !
தேன் திரட்டும்
ஆக்க வினையைப் பாரடா !
ஊக்கமுடன், பொறுமையுடன்,
ஒன்று சேர்ந்து வாழடா !
மூடச் சண்டையில்
நிம்மதி ஏதடா ?
ஒற்றுமையே வேத மென்று
ஓதடா !

***

இவ்வாரம் அதிகமான கவிதைகளைக் காண முடியாதது சற்று ஏமாற்றத்தையே அளிக்கின்றது.

இனி, இவ்வாரத்தின் சிறந்த கவிதையை உங்கள் பார்வைக்குத் தருகிறேன்.

ஆறாவதாய்…

இனத்துடன்
இனம் மோதுவது
மனிதனின் க(வ)லை…

இதை இப்போது
கற்றுக்கொண்டுவிட்டன
கால்நடைகளும்!

மனிதனைப் பார்த்து
மாடுகளுக்கும் வந்தது-
இந்த ஆறாம் அறிவு!

”ஒருவனை ஒருவன் அடுதலும் தொலைதலும் ஆறாமறிவு பெற்ற மானுடனின் உயர்பண்புகளல்லவா! ஒற்றுமையை விரும்பும் மாடுகளே! நீங்கள் ஒருவரோடொருவர் பொருதழிவதைப் பார்த்தால் அந்த ஆறாமறிவு உங்களுக்கும் வந்துவிட்டதோ என்று எண்ணத்தோன்றுகின்றதே!” என்று வேதனையோடு வேடிக்கை செய்திருக்கிறார் திரு. செண்பக ஜெகதீசன். அவரை இவ்வாரத்தின் சிறந்த கவிஞராய் அறிவித்துப் பாராட்டுகின்றேன்.

November 14, 2016
படக்கவிதைப் போட்டி .. (86)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

திருமதி. ராமலஷ்மி எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை ( 19.11.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014-ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

November 14, 2016
காவிரி புரக்கும் நாடு – 4

-மேகலா இராமமூர்த்தி

மலைமிசைத் தொடுத்த மலிந்துசெலல் நீத்தம்
தலைநாள் மாமலர் தண்துறைத் தயங்கக்
கடற்கரை மெலிக்குங் காவிரிப் பேரியாற்று
அறல்வார் நெடுங்கயத்து அருநிலை கலங்க
மாலிருள் நடுநாட் போகித் தன்னையர்
காலைத் தந்த கணைக்கோட்டு வாளைக்கு
அவ்வாங்கு உந்தி அஞ்சொல் பாண்மகள்
நெடுங்கொடி நுடங்கு நறவுமலி மறுகில்
பழஞ்செந் நெல்லின் முகவை கொள்ளாள்
கழங்குறழ் முத்தமொடு நன்கலம் பெறூஉம்
பயங்கெழு வைப்பிற் பல்வேல் எவ்வி… (அகம்-126: நக்கீரர்)

குடமலையிலிருந்து தொடர்ந்துவிழுகின்ற காவிரியின் பெருவெள்ளமானது, முதல்நாள் தான் கொண்டுவந்து சேர்த்த மணமிகு மலர்கள் துறைகள்தோறும் பொலிந்துவிளங்க, கடற்கரையையே கரைத்துவிடும் அளவிற்குப் பாய்ந்தோடி வருகின்றது. கருமணல் ஒழுகுகின்ற அவ்வாற்றின் மடுவிலுள்ள நிலைகொள்ளாத நீர் கலங்குமாறு, நள்ளிருளில் ஆற்றைக் கடந்துசென்ற தன் தமையன்மார்கள் விடியற்காலையில் பிடித்துக்கொண்டுவந்து தன்னிடம் தந்த, திரண்ட கோடுகளையுடைய வாளைமீனைக் கையில் வாங்கினாள் கனிமொழிபேசும் பாணர்குலப் பைங்கிளி ஒருத்தி.

மகிழ்ச்சியில் மனம்துள்ள, நெடுங்கொடிகள் அசைவதும், கள் மிகுதியாக விற்கப்படுவதுமான ஒருதெருவின் வழியே நடந்துசென்றாள் அம்மீனை விற்க. (அப்போதே தமிழ்க்குடி கள்குடியில் திளைத்து மகிழ்ந்திருக்கின்றது என்பதை இதன்வாயிலாக அறிகிறோம்!).

தன் வாளைமீனை அத்தெருவில் விற்றவள், அதற்குப் பண்டமாற்றாகக் கடைக்காரர் தந்த செந்நெல்லை வாங்கமறுத்தாள். அவ்வனிதையின் உள்ளக்கிடக்கையை அறியாத அந்த வணிகர், ”நெல் வேண்டாமா? அப்படியானால் வேறென்ன வேண்டுமம்மா உனக்கு?” என்று அன்போடு அவளை வினவ, முத்துக்களாலான ஓர் அணிகலனைத் தொட்டுக்காட்டினாள் அவள்.

கடல்வளங்கொழிக்கும் வேளிர்குல அரசனான ’எவ்வி’யின் ஆட்சி செவ்வையாய் நடக்கும் ஊர் அது! அங்கே அம்மங்கை கேட்டது கிடைக்காமலா போய்விடும்? ”முத்துமாலைதானே வேண்டும்? இந்தா…பெற்றுக்கொள்!” என்று அந்த வணிகரும் கழங்குகளையொத்த பெரிய முத்துக்களால் கோக்கப்பட்ட ஒளிவீசும் மாலையை அவள்கையில் உடனே அளித்துவிட, முத்தைப்பழிக்கும் தன் வெண்பற்களைக் காட்டி முறுவலித்தாள் அந்தப் பாண்மகள்!

சங்கப் பெரும்புலவர் நக்கீரரின் அருந்தமிழ்ப் பாடலிது. இதில் பேசப்படும், கடற்கரையை மெலிக்கும் காவிரிப் பேராற்றை வியப்பதா அல்லது மீனைக் கொடுத்து முத்தாரம் வாங்கிய அந்த வித்தகியை வியப்பதா? பட்டிமன்றம் வைத்துத்தான் விடைகாண வேண்டும்!

ஆறுகளில் புதுவெள்ளம் பொங்கிவருவதைப் பெருவிழாவாகக் கொண்டாடும் வழக்கம் பண்டைத் தமிழரிடத்து இருந்திருக்கின்றது. அதன் அன்றைய பெயர் ’புதுப்புனல் விழா’ என்பதாகும். அவ்விழாவே இந்நாளில் ’ஆடிப்பெருக்கு’ என்று பெயர்மாற்றம் பெற்றுள்ளது எனலாம். இப்போதெல்லாம் ஆடிமாதத்தில் ஆற்றிலே வெள்ளப்பெருக்கை அவ்வளவாகக் காணமுடிவதில்லை; எனினும், வீட்டிலே சித்திரான்னங்களைத் தயார்செய்து எடுத்துக்கொண்டு, ஆற்றங்கரைகளில் சுற்றஞ்சூழ அமர்ந்துண்ணும் வழக்கம் இன்னமும் சில (கிராம) மக்களிடம் இருந்துவருவது நம் மரபின் எச்சம் இன்னமும் மிச்சமிருக்கின்றது எனும் நம்பிக்கையை நம்முள் விதைக்கின்றது!

சரி, புகார் நகருக்கு அருகிலுள்ள கழார் எனும் காவிரித்துறைக்குச் சென்று அங்கு நடைபெறும் புதுப்புனல் விழாவைக் கண்டுவருவோம்!

சோழ நன்னாட்டின் காவிரிக்கரையில் அமைந்திருந்த வளமான ஊர் கழார். அதனை ஆண்ட குறுநில மன்னன் மத்தி என்பான். அவன் குறித்துச் சில செய்திகள்…

சோழரின் ஆட்சியின்கீழ் இருந்த கழார்த் துறையை ஆண்ட பரதவர்கோமானான மத்தி, பெருவீரன். சோழமன்னனின் ஆணைக்கிணங்க, எழினி என்னும் மற்றொரு குறுநில மன்னனோடு போர்புரிந்த மத்தி, அவன் பல்லைப் பிடுங்கிக்கொண்டுவந்து தன் கோட்டைக் கதவின் வாயிலில் பதித்தானாம். கேட்கவே அச்சமாக இருக்கிறதல்லவா?

அஞ்சத்தக்க பெருவீரனான அந்த மத்தியின் ஊரான கழாரில் புதுப்புனல் விழா ஆண்டுதோறும் வெகுவிமரிசையாய்க் கொண்டாடப்படுவது வழக்கம். அவ்வாறு புதுப்புனல் விழா நடைபெறவிருந்த நன்னாள் அது! மன்னன் கரிகால்வளவனும் அவனுடைய கலிகொள் சுற்றத்தாரும் கழார்த் துறையில் வந்து கூடிவிட்டனர் விழாக்காண!

கரிகாலனின் அருகே அமர்ந்திருந்தாள் அவன் ஆசைமகள் ஆதிமந்தி. அவள் முகத்திலேதான் எத்தகைய மந்தகாசப் புன்னகை! இருக்காதா பின்னே…? இன்னும் சற்றுநேரத்தில் அவள் காதற்கணவனும், ஆட்டத்தில் தேர்ந்தவனுமான ’அத்தி’ காவிரிப்புனலில் நீச்சல்நடனம் நிகழ்த்தி அனைவரையும் மகிழ்விக்கக் காத்திருந்தான். அந்த பூரிப்புதான் ஆதிமந்தியின் முகத்தில் புன்னகையாய்ப் பூத்திருந்தது! (ஆட்டத்தில் தேர்ந்தவன் என்பதாலேயே அவன் ’ஆட்டனத்தி’ என்றழைக்கப்பட்டான்; அவன் சேரமன்னன் என்று குறிக்கப்படுகின்றான்.)

ஒளிமிகுபொறிகள் அவன் சேவடிகளில் திகழும் வீரக்கழல்களில் மின்ன, கஞ்சத்தாளம் ஒலிக்க, இணையில்லா ஆணழகனான அத்தி தன் ஆட்டத்தைத் தொடங்கினான். அனைவரும் இமைக்க மறந்து அவன் நடனத்தையே பார்த்திருக்க, திடீரென்று பாய்ந்துவந்த காவிரியின் பெருவெள்ளமானது அத்தியை அடித்துச்சென்றுவிட்டது. இதனைச் சற்றும் எதிர்பாராத அனைவரும் செய்வதறியாது திகைத்து நின்றனர்.

உண்மையில் நிகழ்ந்ததாக இலக்கியங்களில் பதிவுசெய்யப்பட்டுள்ள இச்சம்பவத்தைத் தன் அகப்பாடல் ஒன்றில் அழகாய்ப் பயன்படுத்தியுள்ளார் சங்கப் புலவர் பரணர்.

சேரிப்பரத்தையைத் தேடிச்சென்ற ஒரு மருதநிலத் தலைவன், அவளிடமிருந்து மீண்டு, தன் பழைய காதலியான இற்பரத்தையை நாடி வருகின்றான் (காதல்மன்னன் போலிருக்கிறது!). அவனைக் கண்ட இற்பரத்தை தன்முகத்தில் இகழ்ச்சிக்குறிப்புத் தோன்ற, ”என்னருமைத் தலைவனே! அத்தியின் அழகைக்கண்டு நயந்த காவிரிப்பெண்ணாள், அவனைக் கவர்ந்துசென்று கடலில் ஒளித்ததுபோல், சேரிப்பரத்தை உன்னை என்னோடு சேரவிடாது கவர்ந்துசென்று ஒளித்தாலும் நான் உன்னிடம் ஊடல் கொள்ளமாட்டேன்; உன்னை வெறுக்கவும் மாட்டேன்” என்று பகடிசெய்வதாக இப்பாடல் அமைந்துள்ளது.

…மலிபுனல் பொருத மருதொங்கு படப்பை
ஒலிகதிர்க் கழனிக் கழாஅர் முன்துறை
கலிகொள் சுற்றமொடு கரிகால் காணத்
தண்பதம் கொண்டு தவிர்த்த இன்னிசை
ஒண்பொறிப் புனைகழல் சேவடி புரளக்
கருங்கச்சு யாத்த காண்பின் அவ்வயிற்று
இரும்பொலப் பாண்டில் மணியொடு தெளிர்ப்பப்
புனல்நயந்து ஆடும் அத்தி அணிநயந்து
காவிரி கொண்டு ஒளித் தாங்கு மன்னோ!
நும்வயிற் புலத்தல் செல்லேம்… (அகம்: 376 – பரணர்)

நீச்சல்நடனம் ஆடிய அத்தியைக் கவர்ந்துசென்ற காவிரிப்பெண்ணாள், அவனைக் கடலில் ஒளித்தாள் என்கிறார் பரணர். அந்த ஆடலரசன் உயிரோடு மீண்டானா? அல்லது…கடலிலேயே மாண்டானா? என்ற பதைபதைப்பு நமக்கும் ஏற்படவே செய்கின்றது.

இதற்கான விடை விரைவில்!

(தொடரும்)

November 11, 2016