பவள சங்கரி
பயங்கரவாதிகள் பட்டியலிலிருந்து விடுதலைப் புலிகளை நீக்கி ஐரோப்பிய ஒன்றிய நீதிமன்றம் அறிவித்துள்ளது. விடுதலைப் புலிகளின் நிதி ஆதாரங்களை முடக்கி வைத்ததை இரத்து செய்தும் அறிவிப்பு வந்துள்ளது. இதன் மூலமாக விடுதலைப் புலிகளின் அமைப்பின் பொருளாதாரப் பிரச்சனைகளுக்கு ஒரு சிறந்த தீர்வு கிடைத்திருக்கிறது.
கிரேசி மோகன்
————————————————————–
சர்வம் கிருஷ்ணார்ப்பணமே கிருஷ்ணா! கிருஷ்ணா!
மர்மம் இதை அறிவார் கிருஷ்ணா! கிருஷ்ணா!
கர்மம் தனைத் துறப்பார் கிருஷ்ணா! கிருஷ்ணா!
தர்மமே தலைகாக்கும் கிருஷ்ணா! கிருஷ்ணா!
சேடன் படுத்திருந்தாய் கிருஷ்ணா! கிருஷ்ணா!
மாடுகள் மேய்க்கவந்தாய் கிருஷ்ணா! கிருஷ்ணா!
ஆடலக் காளிங்கன்மேல் கிருஷ்ணா! கிருஷ்ணா!
நாடகம் பாகவதம் கிருஷ்ணா! கிருஷ்ணா!….
ஏற்றிய தீபம் அகலை எரித்தது கிருஷ்ணா கிருஷ்ணா
சாற்றியமாலை சுறுக்காய் ஆனது கிருஷ்ணா கிருஷ்ணா
ஊற்றிய வெண்ணை உறைந்து போனதே கிருஷ்ணா கிருஷ்ணா
தேற்றிடு எம்மை தெய்வ நாயகா கிருஷ்ணா கிருஷ்ணா….!கிரேசி மோகன்….!
நாகை ராமஸ்வாமி
சிந்தனை செய்திட்டால் சித்தியும் சித்தியாக்கும் சிந்தனையில் வந்தமர் செந்தூர வண்ணவளே வந்தனை செய்துன் மலர்ப்பதம் பணியுமெனை என்ன வேண்டுமென செவியதில் கேட்பின்
என்னென்ன வேண்டுமோ அத்துணையும் தந்தனை என்னென்ன தகுமோ அதனையும் அளித்தனை சின்னவன் எனை நீ சீர்தூக்கி விட்டனை வண்ணமிகு வாசமலர் திருமேனி வருடிட புன்னகை பூக்குமுன் கருணை முகம் கனிந்திட பண்ணுடன் நின் துதி பாடவும் பணித்தனை
வேறென்ன வேண்டும் திருவே நின் துணையன்றி வேறென்ன வேண்டும் நினைப் பணிவதன்றி வேறென்ன வேண்டும் நின் நாம ஸ்மரணமன்றி வேறென்ன வேண்டும் நின் தாள் நிழலன்றி என்றுரைப்பேன் என்றே உரைப்பேன் என்னருமை தாயே பாராளும் நீலாயதாக்ஷியே
37/2017
நாகை வை. ராமஸ்வாமி
Website links to listen to Ambal songs
’’ஆடிப்பூ ரத்தாள்அவ் ஆண்டாள் அரங்கனால்,
நாடினாள் வைகுண்ட நாட்டாமை: -பாடினாள்
வில்லிபுதூர் வீதி வளையவந்து, பாற்கடல்
பள்ளிகொண்டான் பாசுரம்மூ பத்து( மூபத்து -முப்பது திருப்பாவை)’’….கிரேசி மோகன்….!
கொரிய மூலம் : கிம் யாங் – ஷிக்
ஆங்கில மூலம் : கிம் ஜின்மன்
தமிழாக்கம் : பவள சங்கரி
இன்று II
ஆகா ஆன்மா,
எல்லையற்ற வெளியில் ஓர் ஊதா
எம் ஆன்மா, வேதனையிலும், தனிமையிலும்!
இன்றோர் பனித்துகளாய் இருந்துவிடு
அந்த பாறையில் மோதி துகள்களாய் பறந்துவிடு.
க. பாலசுப்பிரமணியன்
குருவே சரணம்
இறைவனின் திருவடிகளை அடைவதற்கு எத்தனையோ வழிகள் இருக்கிறன. இதுதான் சரி என்ற எந்த ஒரு வழியையும் ஏற்கமுடியாது நிலையில் மனம் உள்ளது. அந்த நேரத்தில் மனம் சஞ்சலத்திற்கு உட்பட்டு வழிதெரியாமல் திண்டாடுகின்றது. அத்தகைய நேரத்தில் இருளடைந்த மனதிற்கு வெளிச்சம் போட்டுக் காட்டி ‘உனக்கு இதுதான் சரியான வழி ” என்ற சொல்லி வழிநடத்த ஒரு குருவின் துணை தேவைப்படுகின்றது. அவரே துயருற்ற உள்ளத்திற்கு நம்பிக்கை நட்சத்திரமாகத் தென்படுகின்றார். இதனால் தான் பண்டைய காலங்களிலிருந்து “குகுவின் பெருமை ” எடுத்துச் சொல்லப்படுகின்றது.
எப்படிப்பட்டவரை நாம் குருவாகக் கொள்ள வேண்டும்? ஒரு முறை குருவின் பாதங்களில் சரணடைந்து விட்டால் எப்படி அவரோடு நாம் உறவாட வேண்டும்? திருமூலர் கூறுகின்றார்:
கொள்ளினும் நல்ல குருவினைக் கொள்ளுக
உள்ள பொருள் உடல் அவ்வையுடன் ஈக:
எல்லாத்தணியும் இடைவிடாதே நின்று
தெள்ளி அரியச் சிவபதம் தானே.
அகத்தில் உள்ள மலத்தை நீக்கி இருளைக் களைந்து ஒளிமயமான இறைவனின் இணையில்லா அனுபூதியை நமக்கு அளிப்பவரன்றோ குரு? அப்படிப்பட்ட குரு நமக்குக் கிடைக்காவிட்டால், முற்றிலும் முதிர்ச்சியடைந்து மற்றவர்களுக்கு வழிகாட்ட முடியாது தன்னுடைய ஆணவத்தால் தன்னை குருவாக நினைக்கின்ற ஒருவர் குருவாக அமைந்துவிட்டால் அப்படிப்பட்ட சீடனின் நிலை என்னவாகும்? அழகாக விளக்குகின்றது திருமந்திரம்:
குருட்டினை நீக்கும் குருவினைக் கொள்ளார்
குருட்டினை நீக்காக் குருவினைக் கொள்வர்;
குருடுங் குருடுங் குருட்டாட்டம் ஆடிக்
குருடுங் குருடுங் குழிவிழு மாறே.
முருகப் பெருமானின் அருள் பெற்ற அருணகிரிநாதர் கந்தர் அனுபூதியில் முருகனை அழைத்து அவன் அருளை நாடும் பொழுது :”குருவாய் வருவாய் அருள்வாய் குகனே.” என அழைக்கின்றார்.
“ விவேக சூடாமணி” என்ற வடமொழியில் வரையப்பட்ட நூலில் குருவின் பெருமைகளை விளக்கு ஆதி சங்கரர் ” குரு கருணையின் கடல்” என்றும் “அறிவோடு அடக்கமும் உள்ளடக்கியவர்” என்றும் விளக்குகின்றார்.
“குருவும் இறைவனும் ஒரேநேரத்தில் என் முன்னே வந்து நின்றால் நான் யார் பாதங்களில் முதலில் விழுவேன் ” என்ற கேள்வி எழுந்த பொது கபீர்தாசர் சிறிதும் தயக்கமின்றி “முதலில் நான் குருவின் பாதங்களையே நாடுவேன். ஏனெனில் அவர் தான் எனக்கு இறைவனை அடைய வழி காட்டியவர் ” என்று ஆணித்தரமாகக் கூறுகின்றார்
பட்டினத்தாரோ ” இறைவா, குருவாகவும் நீ என் உள்ளிருந்ததை நான் அறியாத மூடனாக இருந்து விட்டேனே ” என்ற கருத்தை வெளிப்படுத்தும் வண்ணம் கூறுகின்றார்:
குருவாய்ப் பரமாகித் குடிலைசத்தி நாதவிந்தாய்
அருவா யுருவான தறிகிலேன் பூரணமே
குரு நமக்கு எவ்வாறு வழி காட்டுகின்றார்? நம்முடைய உள்ளத்தையும் சிந்தையையும் சீராக்கி நம்மை பக்குவப்படுத்துவதில் அவர் பங்கு என்ன? இதற்குத் திருமூலரின் விளக்கம் நம்மை வியக்க வைக்கின்றது.
கருத்த இரும்பே கனம தானான்
மரித்திரும் பாகா வகையது போலக்
குறித்த அப்போதே குருவருள் பெற்றான்
மறித்துப் பிறவியில் வந்தணு கானே
எவ்வாறு இரும்பு ரசவாதத் தமையினால் மாற்றம் கண்டு தங்கமாக ஒளிர்கின்றதோ அவ்வாறே குருவின் திருவடிகளில் அடைக்கலம் கொண்ட சீடன் தன்னுள் இருக்கும் மலங்களை நீக்கி ஒளிர்கின்றன. அது மட்டுமல்ல, ஒரு முறை தங்கமாக மாறிய உலோகம் எவ்வாறு மீண்டும் இரும்பாக மாறாதோ அதுபோல் பண்பட்ட உள்ளம் கொண்ட சீடன் ஒரு முறை இறை அனுபூதிக்கு பாத்திரமாக ஆனபின்னே மீண்டும் உலக மாயைகளுக்கு தன்னை இரையாக்கிக் கொள்ளமாட்டான் . ஆகவே குருவின் அருள் ஒவ்வொரு சீடனுக்கும் இன்றி அமையாதது. அந்த குருவினுடைய அருள் கிட்ட நாம் என்ன செய்ய வேண்டும் ?
குருவிடம் பூரண நம்பிக்கை கொண்டு, அவர் சொற்களை தலைமேற்கொண்டு அவருடைய பாதங்களில் முழுவதுமாக தங்களை அர்ப்பணித்துக்கொண்டால் குருவின் முழு அருளும் ஆசியும் நமக்குக் கிட்டும். இந்த நம்பிக்கை அவரை நம்முடைய அக மலத்தை அறிந்து அதற்குத் தேவையான முயற்சிகள் மூலம் அவைகளை நீக்கி நம்முடைய உள்ளத்தை பரிசுத்தமாக்கி இறை உணர்வின் பாதை தன்னில் கொண்டு சேர்க்கும். திருமூலரின் கீழ்கண்ட பாடல் இந்த நம்பிக்கைக்கு ஒரு முன்னுதாரணமாக விளங்குகின்றது.
இருவி னைநேரோப்பில் இன்னருட் சக்தி
குருவென வந்து குணம்பல நீக்கித்
தருமெனு ஞானத்தால் தன் செய லற்றலால்
திரிமலந் தீர்த்து சிவனவ னாமே .
தொடரும் …
ரா.பார்த்தசாரதி
நாடகமே உலகம் என்று கவிஞன் சொல்வதுண்டு
நாமெல்லாம் அதிலே நடிக்கும் பொம்மைகளாய் இருப்பதுண்டு
இன்று வியாபாரிகள் கையில் பொம்மையாக சுழல்வதுண்டு
இன்று எதுவுமே சும்மா கிடைப்பதில்லை !
இலவசம் என்றாலே மக்களுக்கு பரவசம்
ஏமாறாமல் இருப்பதே நம் வசம்
எதை வாங்க, எதை விலையாய் கொடுக்கின்றாய்
இலவசப் பொருளின் விலையும் இதில் அடங்குமே
வேலியே பயிரை மேய்வது தெரிகின்றது
அரசும் வரிகளால் மக்களை பிழிகின்றது
பாதிக்கப் படுவதோ நடுத்தர வர்க்கமானதே
மக்கள் அவதியுறுவது வரிச்சுமை என தெரிந்ததே!
மகிழ்ச்சியை தொலைத்து சொத்து சேர்க்கும் ஒரு கூட்டம்
ஆடம்பரத்தில் வீழ்ந்து மடிகின்றது ஒரு கூட்டம்
ஆடையையும், ஆபரணத்தையும் குவிக்கின்றது ஒரு கூட்டம்
பொன்னிலும்,மண்ணிலும் பற்று கொண்டு அலையுது ஒரு கூட்டம் !
தொலைக்காட்சியில், வியாபார முறையில் ஆயிரம் விளம்பரம்,
வேண்டாததை, வாங்கி குவிக்கும் இளைய தலைமுறை கூட்டம்,
அன்பை ஆராதிக்கவும், வளர்க்கவும் இவர்களுக்கு தெரியவில்லை
பாசம், மனித நேயம், இவைகளை பொருட்படுத்தவில்லை !
உண்மையான பாசத்தையும், நேசத்தையும் அடைய பார்
அதற்காக அன்பையும், நல்லதையும் செய்து பார்
மனமகிழ்ச்சியும், நிம்மதியுமே உன் வரவு
உன் மேன்மையையும், புகழினையும் வளப்படுத்தும் உறவு !
– ராஜகவி ராகில் –
நீர்க் குமிழியுடையாமல் அதனுள்ளே உனை
அழைத்துச் செல்வேன் பார்
பேரெழில் சிதையாமல் எனக்குள்ளே உனை
இழுத்துண்பேன் பார்
தேர்க் குடையாய்க் கார்மேகம் வரச் சொல்லி
உன் கைதான் பிடித்து நடப்பேன் நானடி – செல்லம்மா
தேநீர்க் குவளைக்குள் பேரெழில் தனை இறக்கி
உன் கண்ணால் குடித்துக் கிடப்பேன் நானடி
பெருவை பார்த்தசாரதி
மண்ணில் உதித்த மாமணியேயென் ரத்தினமே..
…..மணமுடித்த கையுடனே நீயுந்தான் வந்துபிறந்தாய்.!
கண்ணில் உருளும் கண்மணியாயுனை காத்தாலும்..
…..காலதேவன் அழைப்பால் நீள்வாழ்வு கிட்டவில்லை.!
மின்னிடுமுன் முகத்தைத்தான் சட்டென மறப்பேனா..
…..மனதைப் பின்னிடுமுன் நினைவலைகள் நீங்கிடுமா.!
புண்ணிய உலகுக்கு பிறந்தவுடனே சென்றுவிட்டாய்..
…..புரண்டழுமென் பேய்ச்சத்தம்…தூரத்தில் கேட்குதா.?
பட்டால்தான் துயரமென்பது தெரியுமென்பார் நான்…
…..பட்டகடன் எத்துணையோயுனை மகவாய்ப் பெறுதற்கே.!
சுட்டால் வரும்தழும்பு வாழ்நாளிலழியா தென்பாருனை
…..சுருட்டிக் கொண்டுசென்ற யமனுக்கே இதுதர்மமா.?
கட்டழகு குலையாத கண்ணே நீயென் கண்ணைவிட்டு
…..காததூரம் போய்விட்டாய் காலனுனை அழைத்ததால்.!
மொட்டவிழ்ந்து மலராகுமுன் யமனுனுலகுக்குச் சென்றாலும்
…..எட்டாத தூரத்தில்கூட கேட்குமென் அலறல்சத்தம்.!
எரிகின்ற எரிதழலில் வேகின்றயுன் மென்னுடல்
…..எந்தன் வயிற்றையும் சேர்த்தெரிப்பதை யாரரிவார்..!
கரியாக நீமாறும் காட்சியைக் காணுமுன்னென்
…..கண்ணையும் பிடுங்கியுன் கையாலே எறிந்துவிடு.!
புரியாத மொழிபோலயான் புலம்புமதைக் கேட்டுப்
…..புரிந்து கொள்வோர்..! வானுலகில் இருக்கிறாரா.?
தெறிக்கு மொலிமீண்டும் எதிரொலியாய் கேட்பதுபோல்
…..புத்திரசோக கடுந்துக்கம் நெடுந்தூரத்தில் கேட்குதா..?
எப்போதும் இன்பமொன்றையே நாடுவர் மனிதர்கள்
…..என்றாலும் துன்பமொன்று வரும்போது தாங்கிடாரதை.!
தப்பேதும் செய்யாத தாய்க்கொரு தண்டணையாய்
…..தன்மகவை ஈன்றவுடன் பறிகொடுத்த நிலைகொடுமை.!
இப்படி ஆகுமென மனிதராரும் நினையாரில்லை
…..இதைப்போலத் துன்பமாருக்கும் வாராது அருள்வாயா.!
எப்படித் தாங்குமென்பலகீன இதயமிந்தப் பேரிடியை..
…..இனிவாழ்ந் தென்னபயன்.! என்னுயிரையும் எடுத்துவிடு.!
இறைவா..!
கிரேசி மோகன்
—————————————–
‘’மரணத்தின், ஜனனத்தின் மாயையில் தேவா -ஆன்
மனை மறந்தாய் ஜீவா
அய்யய்யோ, அய்யய்யோ, அய்யய்யோ
அய்யய்யய்ய அய்ய அய்யய்யோ….!
அஞ்சுபுலன்களின் ஆசையினாலே
பஞ்செனப் பறந்தது பிராணன்
வந்த சுகங்களில் வாழ்ந்ததனாலே
வீரன் ஆன்மனை இழந்தாய்….
அம்மம்மா அம்மம்மா அம்மம்மா
அய்யா அம்மா அம்மம்மா(அடியேன் எழுதி காத்தாடியால் பிரபலமான நாடகம்)….!
-மேகலா இராமமூர்த்தி
புள்ளிகளால் பாலங்கட்டி எழிற்கோலந் தீட்டும் சிறுமியைப் புகைப்படம் எடுத்துவந்துள்ளார் திருமிகு. ஷாமினி. படக்கவிதைப் போட்டிக்கு உகந்த படமிது என்று இதனைப் போட்டிக்குத் தெரிவுசெய்து தந்திருக்கின்றார் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன். இவர்கள் இருவருக்கும் என் நன்றி!
சிறுவயதிலேயே பயின்று தேரவேண்டிய அற்புதக் கலை கோலக் கலை! விரல்களுக்கு நல்ல பயிற்சியாகவும், கற்பனைக்கு உரமூட்டும் வாய்ப்பாகவும் அமையக்கூடியது இக்கலை எனில் மிகையில்லை. மனமொன்றிக் கோலம் தீட்டுவதுகூட ஒருவகை தியானந்தான்!
வண்ணக்கோலங்களை மிஞ்சும் வகையில் நம் கவிஞர்கள் தீட்டியுள்ள வார்த்தைக் கோலங்களை சுவைத்தின்புறும் தருணமிது! வாருங்கள்!
*****
”பாவையர் இடுவது இழைக்கோலம்; பாவியர் இடுவது பிழைக்கோலம்; வீரன்கொள்வான் போர்க்கோலம்; அவன் வெற்றியில் காண்பான் தேர்க்கோலம்” என்று வரிசையாய்க் கோலங்களின் வகைகளைப் பட்டியலிட்டு நம்மைப் பிரமிப்பில் ஆழ்த்துகின்றார் திருமிகு. சாய்ரேணு.
கோலம்
வாசலில் இடுவது மாக்கோலம்
வார்த்தையில் இடுவது பாக்கோலம்
பரம்பொருள் தந்தது ஒளிக்கோலம்
பாரிது கொண்டது களிக்கோலம்
பாவையர் இடுவது இழைக்கோலம்
பாவியர் இடுவது பிழைக்கோலம்
வானகம் கொண்டது மழைக்கோலம்
கானகம் பெற்றது தழைக்கோலம்
மேகங்கள் சேர்ந்தால் கார்க்கோலம் – அவை
மேனி சிலிர்த்தால் நீர்க்கோலம்
வீரன் கொள்வான் போர்க்கோலம் – அவன்
வெற்றியில் காண்பான் தேர்க்கோலம்
தீயவர் இடுவது அவக்கோலம் – உளத்
தூயவர் கொள்வது தவக்கோலம்
மேதையர் இடுவது மதிக்கோலம் – எங்கள்
மாயவன் இடுவது விதிக்கோலம்
பாவலர் எழுதுவர் கவிக்கோலம் – நம்
பரமன் செயலோ புவிக்கோலம்
பக்தியில் வருவது இசைக்கோலம் – நல்ல
பகலவன் தந்தது திசைக்கோலம்
அருமையாய் செழிக்கும் பயிர்க்கோலம் – வா!
அன்பிலே தழைக்கட்டும் உயிர்க்கோலம்
வழுவிலாதெழுதுங்கள் அகக்கோலம் – பின்
வாழ்வினில் எல்லாம் சுகக்கோலம்!
*****
திரு. பழ. செல்வமாணிக்கத்தின் கவிதையும் கோலங்களின் வகைகளையும் அவற்றின் பயன்களையும் பரக்கப் பேசுகின்றது.
எண்ணக் கோலங்கள்:
புள்ளி வைத்து கோலம் போடும் சின்னப் பெண்ணே !
உன் போல்,கோலமும் அழகு, செல்லப் பெண்ணே !
அன்புக் கோலம் உறவை வளர்க்கும் ஆசைப் பெண்ணே!
கல்விக் கோலம் அறிவை வளர்க்கும் சமத்துப் பெண்ணே!
கருணைக் கோலம், மனிதம் வளர்க்கும் வண்ணப் பெண்ணே !
புன்னகைக் கோலம், அழகை வளர்க்கும் சிட்டுப் பெண்ணே!
அமைதிக் கோலம், அகிலம் காக்கும் அருமைப் பெண்ணே!
ஒற்றுமைக் கோலம், உலகை உயர்த்தும் சுந்தரப் பெண்ணே!
உழைப்பு கோலம், வெற்றியைக் கொடுக்கும் புதுமைப் பெண்ணே !
முயற்சிக் கோலம், நினைத்ததைக் கொடுக்கும் இனிமைப் பெண்ணே!
அகந்தைக் கோலம், நம்மை அழிக்கும், உணர்வாய் பெண்ணே!
சாதிக் கோலம், சாவைக் கொடுக்கும், அறிவாய் பெண்ணே!
போதைக் கோலம் நாட்டை அழிக்கும், தெளிவாய் பெண்ணே !
போரின் கோலம், உலகை அழிக்கும், புரிவாய் பெண்ணே!
வண்ணக் கோலம் போட விழையும் தங்கப் பெண்ணே!
எண்ணக் கோலம் போட்டால், நன்மை பயக்கும் பெண்ணே!
*****
”துள்ளிச்செல்லும் பள்ளிச்சிறுமி இட்ட இந்த சிங்காரக்கோலம் காண்போர் உள்ளம் கொண்டது; பரிசை வென்றது” என்று குதூகலிக்கின்றார் திரு. சி. ஜெயபாரதன்.
கோலமிடும் பாவாய்!
சின்னச் சின்ன கோலம்!
சிங்காரக் கோலம்!
வெள்ளை மாவில் அணியாய்ப்
புள்ளிகள் போட்டு
பள்ளிச் சிறுமி
துள்ளிப் பாடி
வரைந்த கோலம்!
அம்மா எழுவதற்கு முன்பு
முற்றம் பெருக்கி
பளிச்செனப் போட்ட கோலம்!
அம்மா கோலம்
சும்மா தோற்றுப் போகும்!
அக்கா போட்ட கோலம்
தப்பா போச்சுடி பார்!
தங்கிச் சிரிக்குது
தங்கை போட்ட கோலம்
மங்க வில்லை மாலை!
இறுதியில்
தெருப் போட்டிப் பரிசு
சின்னக் கோல மிட்ட
சிறுமிக்கே!
*****
”விண்ணில் புள்ளிவைத்த வானம் கோலமிடத்தெரியாமல் விழித்திருக்க, மண்ணில் தோன்றிய மங்கையர் எழிலார் கோலங்களால் வீதியை வனப்பாக்குகின்றனர்” என்று வனிதையரைப் புகழ்கின்றார் திரு. செண்பக ஜெகதீசன்.
அங்கும் இங்கும்…
விண்ணில்-
வீதியெல்லாம் புள்ளிவைத்துவிட்டு,
விரிவானக் கோலமிடத்
தெரியாமல்,
விழிக்கிறது வானம்..
மண்ணில்-
எண்ணம்போல் புள்ளிவைத்து,
எழிலோடு
எழிலாகக் கோலமிட்டு,
வீதியை வனப்பாக்கும்
எங்கள் செல்வங்கள்…!
*****
”வீதியில் போடும் கோலங்களில் பெண்ணின் கைத்திறமை மிளிர்கின்றது; வாழ்வில் அவள் போடும் கோலங்களில் மானுட வாழ்வே ஒளிர்கின்றது! ஆதலால் பெண் குழந்தை பெறுவதே பெருமை” என்று பெண்ணின் பெருமை பேசுகின்றார் பெருவை திரு. பார்த்தசாரதி.
பெண்குழந்தை பெறுவதே பெருமை..!
விழிப்புறுவாள் அதிகாலை மார்கழி நன்னாளில்..
…….விடியுமுன்னே வீடனைத்தையும் சுத்தம் செய்வாள்.!
விழிமூடா நிலையினிலே இயங்கிடுவாள் தரையினிலே
…….விரல்நுனியில் வேகமாய் புள்ளியினை இட்டிடுவாள்.!
மொழிகூடப் பேசு மவள்போட்ட மாக்கோலம்..
…….விழிதிறந்து பார்க்கையில் வியப்பில்நமை ஆழ்த்தும்.!
அழியாத கோலமாக அவளிட்ட கோலம்தான்..
…….ஆழமாக மனதினிலே பதிந்தவள் திறம்சொல்லும்.!
துள்ளித் துள்ளி ஓடிவரும் சின்னஞ்சிறுமியவள்
…….துடிப்புடனே செயல்படு மாற்றல் கொண்டவள்.!
பள்ளி செல்லுமுன் வாசலிலே கோலமிடுவாள்
…….பள்ளிமுடிந்ததும் படிப்பினிலே நாட்டம் வரும்.!
அள்ளியவளை அணைத்தே பெற்றோரும் மகிழ
…….அன்றாடம் அவள் செய்யுமருமைச் செயலினாலே.!
கிள்ளிச் செல்வாள் மனதையெலாம் தன்குறும்பாலே
…….கவர்ந்திடுவாள் படித்திடுவாள் பள்ளியிலே முதலாக.!
ஆண்மகவே வேண்டுமென்று விரும்புவது அன்று..
…….ஆணுக்கு இணையாக பெண்பேசப்படும் நிலையின்று.!
பெண் மகவொன்றை முதலாகப் பெற்று விட்டால்..
…….பெரிதென நினைத்து பெருமைப்படும் காலமுமிதுதான்.!
தூண்போல நின்று வாழ்வில்வரும் துயரெல்லாம்..
…….துடைத்து குடும்பத்தில் பெரும்பங்கு வகிப்பவளவளே.!
நாண்போன்று நற்குடும்பமதைக் கட்டிக் காப்பாளவள்..
…….பெண்ணென்று வெறும்பேச்சு சொல்ல அனுமதியாள்.!
*****
பிஞ்சுவிரல்களால் நெஞ்சைக் கவரும் கோலம் வரைந்த சிறுமியின் பெருமையை, அவள் வாழ்வில் கொள்ளும் பல்வேறு கோலங்களோடு ஒப்பிட்டுப் பேசியிருக்கும் கவிஞர்களுக்கு என் பாராட்டுக்கள்!
*****
காலம் போடும் கோலம் விசித்திரமானது. கணித்துரைக்க இயலாதது. ஆதலால் எத்தகைய கோலத்தைக் காலம் பெண்ணுக்குப் பரிசாய்த் தந்தாலும் அச்சங் கொள்ளாமல் அகந்தையில்லாமல் மரபுதனைப் பேணி தரணி வெல்வதே பெண்ணின் கடன் எனும் அரிய கருத்தை எளிமையாய்ச் சொல்லும் பாடலிது!
அறிவுரை
சின்ன சின்ன விரல்கள் கொண்டு
சிறு கோல மிடும் பைங்கிளியே
சிறிய தொரு அறிவுரையைச்
செவி மடுத்துக் கேட்டிடுவாய்…
இன்று,
உன் எண்ணமதை ஒருங்கிணைத்து
வண்ண வண்ண நிறங்கள் தீட்டி
வாசல் கோலம் நிறைவு செய்து
வீட்டி னுள்ளே நுழைந் திடலாம்
ஆனால்
வாழ்க்கைக் கோலம் என்னவென்று
வஞ்சி உனக் கெடுத் துரைக்க
நாளை எனும் நாட்கள் கொண்ட
வருங் காலம் காத்திருக்கு!!
தாயாக ஒரு கோலம்,
தாரமாக மறு கோலம்,
வன்மம் கொண்ட கயவர் காணின்
வீறு கொள்ளும் சினக் கோலம்…
நெடுந் தூரப் பயணங்கள்
உனக்காகக் காத்திருக்கத்
தடம் புரண்டு செல்லாமல்
தரணியதை நீயும் வெல்லு!
வாழ்க்கை செல்லும் பாதையிலே
பின் தொடர்ந்து போவதிலே
வழித்தடத்தைத் தொலைக்கின்றோம்
நம் மரபுகளை மறக்கின்றோம் !!
சின்னச் சின்ன மகிழ்ச்சிகளைச்
சிறைப் படுத்தி வைக்கின்றோம்
நம்மை நாமே மறக்கின்றோம்
மாற்ற மதில் கலக்கின்றோம்
ஆதலால்
ஓலம் பல வரினும்,
ஞாலம் எது தரினும்;
உன்னை நீயே தொலைக்காமல்
உன் தனித்துவத்தை இழக்காமல்
உன் காலம் உள்ள அதுமட்டும்
உயிர்க் காற்று உள்ள அதுமட்டும்
இன்று போல என் றென்றும்
கோல மிட்டு மகிழ்ந்து இரு !!
பயங்கொண்டு சுயமிழக்காது வாழ்வில் சயங் காணப் பெண்களை வலியுறுத்தும் இக்கவிதையின் ஆசிரியர் திருமிகு. இராஜலட்சுமி சுப்ரமணியத்தை இவ்வாரத்தின் சிறந்த கவிஞரென அறிவிப்பதில் மகிழ்கின்றேன்.
“வாஸ்த்தாவான் வந்த விரஜநிலம் வாழ்ந்திட ,-
தோஸ்த் தாவான் பார்த்தனுக்கு தோள்கொடுத்து , -ஆஸ்த்தான –
ஆவுக்கு ஞானம் அடிநீட் டியளிப்பான் –
பூவைத்து வைப்பான்செம் பொன் “….கிரேசி மோகன் …..
’’முலைகனத் தாயை அலைக்கழிய விட்டு
கொலைகுண பூதனை கொங்கை -மலைசுவைத்தாய்
அந்நஞ்சை காளியன்மேல் ஆடி ஜெரித்தவன்பால்
நன்நெஞ்சே நிற்பாய் நினைந்து’’….!
”கருத்தவர், ஆனால் கதிரொளி வீசும்
நிறத்தவர், நிர்மால்ய நீலம் -தரித்தவர்,
வண்ணமவர்,கேசவ்தன் எண்ணமவர், ஆய்ச்சியின்
கண்ணனை நெஞ்சே கருது’’….கிரேசி மோகன்….!
பவள சங்கரி
அன்பிற்கினிய நண்பர்களே!
வணக்கம். கண்ணையும் கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் ஆற்றல் கொண்டவரா நீங்கள்?
தினமுரசு புகைப்பட பத்திரிக்கையாளர் திரு. ஜேக்ஸன் ஹெர்பி எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி சாந்தி மாரியப்பன் தேர்ந்தெடுத்து அளித்துள்ளார்.
இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (29.07.2017) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும் தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு, ஏற்கனவே சிறந்த கவிஞராகத் தேர்ந்தெடுக்கப் பெற்றவர்களுக்கும் உண்டு.
ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.
போட்டியின் நடுவரான திருமதி மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச் சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுகளும் பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்
செல்வன்
இந்தவார வல்லமையாளர் விருது! – கமலஹாசன்
இவ்வார வல்லமையாளராக கலைஞானி கமலஹாசன் அவர்களை தேர்ந்தெடுப்பதில் மிகுந்த மகிழ்ச்சி அடைகிறோம்.
இவ்வாரம் அதிகம் அடிபட்ட பெயர்களில் கமலஹாசன் பெயரே முதன்மையானது என்பதில் ஐயமில்லை. அரசியலுக்கு நடிகர்கள் வருவது புதிதல்ல எனினும் கமலஹாஸம் வருவார் என்பது யாரும் எதிர்பார்த்திராத ஒன்று. அவரும் இதுவரை “அரசியல் எனக்கு தெரியாதத் துறை” என்றே கூறிவந்தார். ஆனால் தமிழகத்தில் ஊழல் நிலவுவதாக அவர் கூறிய குற்றச்சாட்டுக்கு எதிர்வினையாக தமிழக அமைச்சர்கள் அவர் மேல் கண்டனக்கனைகளை பொழிந்தவுடன், தமிழக அமைச்சர்களின் மின்னஞ்சல் முகவரியை பொதுவெளியில் இட்டு ஊழல் நிலவுவதற்கான சான்றுகளை அம்மின்னஞ்சல் முகவரிக்கு அனுப்பக்கோரினார்.
இம்மாதிரி ஊழல் புகார்களை வரவேற்க வேண்டிய தமிழக அரசு அதற்கு மாற்றாக அச்சத்தினால் மின்னஞ்சல் முகவரிகளையே வலைதளத்திலிருந்து அகற்றியது சர்ச்சையை உண்டாக்கியது. இத்தகைய ஊழல் குறித்த மிகப்பெரும் விவாதத்தை பொதுமக்கள் சார்பில் எழுப்பிய காரணத்தால் கமலஹாசன் அவர்களை வல்லமையாளராக தேர்ந்தெடுக்கிறோம்.
தமிழகத்தில் இன்று நிலவும் மிகப்பெரும் கொள்ளை ஊழலின் விளைவாக இயற்கை வளங்களான ஏரிகள், குளங்கள், ஆற்றுமணல் ஆகியவை கொள்ளையடிக்கப்படுவது. எந்த கட்சி ஆட்சிக்கு வந்தாலும் மது, இயற்கை வளங்கள் கொள்ளை ஆகியவை நிற்கப்போவது கிடையாது. ஆக இதுகுறித்த விவாதங்கள் எழுந்து ஆளும், எதிர்கட்சிகள் இரண்டும் பொதுமன்றத்தில் மக்களுக்கு பதில் சொல்லவேண்டிய சூழல் உருவாவது நல்லதே. கமலஹாசன் போன்ற அறிஞர்கள் இதை எழுப்புவது பாராட்டுக்குரியது.
நடிகர் கமலஹாசன் பன்முகத்தன்மை கொன்ட கலைஞர். சிவாஜிக்குப்பின் தமிழகம் கண்ட சிறந்த நடிகக்கலைஞர்களில் முதன்மையானவர். இவரது படங்கள் மிக முற்போக்கான கருத்தைக்கொண்டவை. பகுத்தறிவு, மூடநம்பிக்கையைத் தொலைத்த ஆன்மிகம், சாதி,மத வாதம் கடிதல் ஆகிய முற்போக்கு கருத்துக்களை இவர் படங்களில் காணலாம். நாயகன், மகாநதி, அன்பே சிவம், குணா ஆகிய படங்கள் தமிழ் திரையுலகை அடுத்த கட்டத்துக்கு எடுத்துச்சென்றவை.
இத்தகைய மகா கலைஞனை இவ்வார வல்லமையாளராக அறிவிப்பதில் வல்லமை மகிழ்ச்சி அடைகிறது
இந்த வார வல்லமையாளராக தங்கள் கவனத்தைக் கவருபவர் எத்துறையைச் சார்ந்தவராக இருப்பினும் நம் வல்லமை ஆசிரியர் குழுவினரின் கவனத்திற்குக் கொண்டுவர விரும்பினால், vallamaiselva@gmail.com, vallamaieditor@gmail.com ஆகிய முகவரிகளில் தங்கள் பரிந்துரைகளை அனுப்பி வைக்கலாம். மேலும் வல்லமையாளர் விருது பற்றிய விவரங்களை இப்பக்கத்தில் காணலாம் –http://www.vallamai.com/?p=19391, இதுவரை வல்லமையாளர்களாகத் தேர்வு பெற்றோர் பட்டியலை இங்கே காணலாம் http://www.vallamai.com/?p=43179