Blog

அம்மா எனும் அதிசய காந்தம்!

-ஜெயஸ்ரீ ஷங்கர்

நான் பிறந்ததும்
எனக்குத் தெரியாது
என் ஊரும்
பெயரும் தெரியாது!

ஏதோவொரு கதகதப்பு
அதன் பாதுகாப்பு
அன்பின் உணர்வு
அது தான் அன்று நீயெனக்கு!

நானோ உனதாகி
உன்னோடு ஒட்டிக்கொண்டேன்
நீயோ எனக்குத் தாயாய்
எனைக் காத்தாய்!

ஆடும் கோழியும்
பசுவும் காகமும்
நீ சொல்லித்தான்
நான் தெரிந்து கொண்டேன்!

மேகமும் நிலவும் அதோ
பாரெனச் சுட்டிக் காட்டிப்
பசிக்கும் முன்னே
வயிறு நிறைத்தாய்!

தத்தித்தத்தி என்னோடு
நடையில் நீயும் பிள்ளையாய்
நடந்தபோதும் நினைவில்லை
எனக்கு நீ அம்மா என்று!

உறவு சொல்லிக்
கிளிப்பிள்ளையாய்ப்
பழக்கி முத்தமிட்டு
உச்சி முகர்ந்தாய்!

சீராட்டி அலங்கரித்து
நீ மகிழ்ந்த போதும்
புரியவில்லை நீயே
தெய்வத்தின் கருணை என்று!

உன்னோடு பின்னிப்
பிணைந்தது நம் பந்தம்
எனக்கு உலகைக்
காட்டிய நிர்ப்பந்தம்!

நீயே உலகமாய்
நான் நினைக்க…
என்னையே உலகமாய்
நீ நினைத்தாய்!

தியாகமும் கருணையும்
உனக்கே சொந்தம் அதுபோல்
என்னுள் தாய்மையை
விதைத்த தாய் நீ!

உன் அனுபவச் சொல்லை
அவ்வபோது மீறினால்
தொல்லை எனநான்
ஏசியும் நீ எனை நேசித்தாய்!

நீ சொல்லித்தந்த
எதையும் நான்
ஏற்கவில்லை மாறாகச்
செய்தாலும் நீ ஆதரித்தாய்!

நீ நடந்த பாதை வேறு
நான் நடக்கும் பாதை
வேறானாலும் நீயென்
ஆணிவேர் நான் மறுக்கவில்லை!

வாழ்க்கை சொல்லித்
தராத பாடங்களை
வார்த்தையால் கற்றுக்
கொடுத்த அனுபவப்பள்ளி நீ!

நான் புகுந்தவீடு
வந்தபின்பும் பிறந்த
வீட்டின் நினைவுகள்
உயிரெனச் சுமப்பவள்!

தென்றலும் புயலுமாய்க்
கடந்து வந்த பின்பும்
வாழ்வென்று உண்டாயின்
அங்கும் நீ தான்!

மரம் கொடுத்த விழுதோ நான்
விழுதுகள் தாங்கும்
விருட்சமாய் நீ
ஏங்கும் தாய்மை
எங்கும் நிழலாய்த் தொடருமோ?

சுழலும் வாழ்க்கைச் சக்கரத்தில்
தாய்மையே வெல்லும் தரணியில்
தாய்மையே இதயங்கள் ஈர்க்கும்
அதிசய காந்தம்…என் அம்மா
நீ நீடூழி வாழ்கவே!

May 11, 2015
முயலாமை!

—சுரேஜமீ.

அம்மா மதுரம் அவர்கள் திருவரங்கத்தைச்(Srirangam) சேர்ந்தவர்கள் என்பது தாங்கள் அறிந்ததே! கவிஞர் வாலி அவர்களும் அதே ஊரைச் சார்ந்தவர்தான்! வாலியின் இளமைக் காலங்களில், அய்யா என்.எஸ்.கே வைச் சந்திக்க விரும்பியிருக்கிறார். அப்போது, மதுரம் அம்மாவின் தம்பி மணி அவர்களும், வாலி அவர்களும் நண்பர்கள் என்பதால், அவர்கள் மூலம், உங்கள் அத்தான் (என்.எஸ்.கே) வரும்போது, சந்திக்க ஏற்பாடு செய் எனக் கேட்க, அந்த சந்திப்பும் நடந்தேறி இருக்கிறது.

என்.எஸ்.கேயிடம் தன்னை ஒரு தமிழ் ஆர்வலர் என்றும், பாட்டில் நாட்டம் உண்டு எனவும் அறிமுகம் செய்து கொண்டுள்ளார் வாலி. எல்லாவற்றையும் கேட்டுக்கொண்ட என்.எஸ்.கே அவர்கள்,

தம்பி நீ சொல்றதெல்லாம் சரி. நான் உன்னை ஒரு கேள்வி கேக்குறேன். அதுக்கு சரியான பதிலை சொல்லு அப்படின்னு சொல்லி,

‘முயலும் ஆமையும் கதை கேட்டிருக்கேளே …அது சொல்ற நீதி என்னனு சொல்லு! என்று கூறியிருக்கிறார்!

ஏதேதோ சொல்லியும், கடைசி வரை கலைவாணர் எதிர்பார்த்த ஒற்றை வரி நீதி சொல்ல இயலவில்லை வாலி அவர்களால்!

தலையைச் சொறிந்து கொண்டே….அண்ணே நீங்களே சொல்லுங்களேன்! அப்படின்னு வாலி கேட்க,

கலைவாணார் சொன்ன பதில் என்ன தெரியுமா?

‘முயலாமை’!

இதுதான் கலைவாணாரின் சிறப்பு!

(நன்றி: அருமைச் சகோதரர் NSK நல்லதம்பி)

May 11, 2015
கேசவ் வண்ணம் – கிரேசி எண்ணம்

வித்யா வினயமென்றான் வில்லுக்கு, அதன்பின்னே
யுக்தியாய் கர்மஞான யோகமென்றான், -பக்தி,
அனன்யம் பழகிட ஆபோல், அடுத்த
கணம்நான் அளித்திடுவேன் காப்பு ….கிரேசி மோகன்….

May 10, 2015
அன்னையர் தினச் சிந்தனைகள்

-மேகலா இராமமூர்த்தி

இன்று அன்னையர் தினம். அன்னையரைக் போற்றிக் கொண்டாடவேண்டிய நன்னாள். கடந்த சில ஆண்டுகளாக உலகிலுள்ள பல நாடுகளும் போட்டிபோட்டுக்கொண்டு அன்னையர் தினத்தை வெகு உற்சாகத்தோடு கொண்டாடி வருவது நாமறிந்ததே!

அன்னையர் தினத்தை அன்னா ஜார்விஸ் எனும் பெண்மணி 1908-ஆம் ஆண்டு மே மாதம் 10-ஆம் தேதி அமெரிக்காவில் பிள்ளையார்சுழிப் போட்டு ஆரம்பித்து வைத்தாலும் அதன் நதிமூலம் என்னவோ நம்மை இங்கிலாந்தை நோக்கி இழுத்துச் செல்கின்றது.

இடைக்காலத்தில், இங்கிலாந்தின் (Medieval England) பணக்கார வீடுகளில் வேலை செய்துகொண்டிருந்த சிறுவர், சிறுமியர் தம்முடைய எஜமானர்களின் வீடுகளிலேயே தங்கியிருந்து வேலை செய்வதே வழக்கமாயிருந்தது. தங்கள் சொந்த ஊர்களிலிருந்து வெளியூர்களுக்குச் சென்று இவ்வாறு பணிபுரிந்துவந்த இந்த ஏழைச்சிறுவர்கள் தம் சொந்த ஊர்களுக்குச் சென்று தம்முடைய வழிபடு தெய்வமாகிய அன்னை மேரியைத் தொழுவதற்கு எஜமானர்களால் ஒருநாள் விடுப்பு அளிக்கப்பட்டு வந்திருக்கின்றது. அவ் விடுமுறைதினம் மே மாதத்தின் நான்காவது ஞாயிற்றுக்கிழமையாக இருந்தது எனவும், அந்நாள் ’Mothering Sunday’ என்ற சிறப்புப்பெயரோடு அழைக்கப்பட்டது எனவும் தெரியவருகின்றது.

கிறித்துவ அன்னை மேரியை வழிபடச்செல்லும் அச்சிறுவர்கள் அவ்வழிபாட்டின்பின் தமையீன்ற அன்னையரையும் காண மலர்களோடும், மகிழ்வோடும் தம் இல்லங்களுக்குச் சென்றனர். அந்நன்னாளில் பழங்களினால் ஆன சிம்னல் (Simnel Cake) கேக்கையும் செய்து மகிழ்ந்திருக்கின்றனர் இங்கிலாந்து மக்கள். இன்றும் அந்தநாளை நினைவுகூறும் வகையில் ’சிம்னல் கேக்’ செய்யும் வழக்கம் இங்கிலாந்தில் இருக்கின்றதாம்.

இவ்வாறு இங்கிலாந்தில் முளைவிட்டு, அமெரிக்காவில் எழுச்சிபெற்ற அன்னையர் தினத்தை பின்பு உலகின் பெரும்பாலான நாடுகள் தத்து எடுத்துக்கொண்டுவிட்டன.

இனி, அன்னையர் தினத்தின் நாயகியரான அன்னையரைப் பற்றியும் சற்று சிந்திப்போம்.

அனைத்து உறவுகளினும் புனிதமானது அன்னையெனும் உறவே. அது உன்னதமானது; தன்னலமற்றது. பூமித்தாயினும் விஞ்சிய பொறுமையோடு நம் தாய்மார்கள் குடும்பங்களைத் தம் தியாகத்தால் தாங்கிப்பிடிப்பதால்தான் குடும்பம் எனும் கட்டமைப்பு இன்னும் நம் புண்ணிய பாரதத்தில் சிதறிப்போகாமல் உறுதியாய் நிற்கின்றது. குடும்பத்தின் விளக்காகத் திகழ்ந்து அதனைச் சுடர்விட்டு ஒளிரச் செய்பவள் தாய்.

முந்தித் தவமிருந்து முந்நூறு நாள் சுமந்து பிள்ளைகளைப் பெற்று வளர்ப்பவள் அன்னை. தன் பிள்ளைகளின் நல்வாழ்விற்காக உழைப்பதே தன் தலையாயக் கடமை எனும் எண்ணம் கொண்டவள் அவள். வறுமையின் கோரப்பிடியில் சிக்கி உண்ணச் சோறில்லாமல் தான் பட்டினி கிடக்கும் நிலைவந்தாலும், தன் பிள்ளைகளின் வயிறு வாடக்கூடாது என்று எண்ணி, இருப்பதைக் குழந்தைகளுக்குக் கொடுத்துக் காக்கும் வள்ளல் அவள்!

’ஈன்ற புறந்தருதல் என் தலைக்கடனே; சான்றோனாக்குதல் தந்தைக்குக் கடனே’ என்றாள் சங்ககாலத் தாயொருத்தி. ஆனால் இன்று நிலைமை மாறிவிட்டது. பல குடும்பங்களில் தம் பிள்ளைகளைச் சான்றோராக்குவதும் அன்னையரே! கல்வியறிவு நிரம்பப்பெற்ற இன்றைய தாய்மார்கள் உண்டிகொடுத்துக் குடும்பத்தார்க்கு உயிர்கொடுப்பதோடு தம் கடமை முடிந்தது என்று நின்றுவிடாமல் கல்வியெனும் அழிவற்ற செல்வத்தையும் பிள்ளைகளுக்கு அளித்து இரண்டாவது ஆசிரியராகவும் செயலாற்றுகின்றனர்.

கற்றாரும் மற்றாரும் போற்றும் சான்றோனாகத் தன் மகனைப் பார்ப்பதில்தான் ஓர் தாய்க்கு எத்துணை மகிழ்ச்சி! அப்போது அவள் அடையும் உவகை அக்குழந்தையை ஈன்றபோது அவளடைந்த உவகையைவிட மிகப்பெரிது என்பார் தெய்வப்புலவர்.

”ஈன்ற பொழுதிற் பெரிதுவக்கும் தன்மகனைச்
சான்றோன் எனக்கேட்ட தாய்” என்பது அவர் திருவாக்கு.

தாய்ப்பாலோடு வீரத்தையும் ஊட்டி வளர்த்தனர் அன்றைய தாயர் என்பதைச் சங்க நூல்கள் வாயிலாய் அறிந்து மகிழ்கின்றோம். தன் மகன் புறப்புண்பட்டு இறந்திருந்தால் அவனுக்குப் பாலூட்டிய மார்பை அறுத்தெறிவேன் என்று வீரத்தோடு முழங்கிய தாயையும், போரில் தன் தந்தையையும், கணவனையும் இழந்தபின்னும் தைரியம் இழக்காது குடும்பத்தின் கொழுந்தாக இருந்த ஒரே மகனையும் போருக்கு அனுப்புகின்ற மறத் தாயையும் கண்டு மெய்சிலிர்த்துப் போகிறோம் நாம்!

இன்னொருபுறம் அன்புமகள் தான் விரும்பிய காதலனோடு தன்னிடம் சொல்லாமல் சென்றுவிட, அவளை ஆசையோடு வளர்த்த அன்னை, அவள் வளர்த்த பிராணிகளையும், அவள் வைத்து விளையாடிய பொம்மைகளையும் கண்டுக் கண்ணீர்சொரிந்து ஏங்கியழுவதை நம் பண்டைய இலக்கியங்கள் உருக்கத்தோடு காட்டுவதைப் பார்த்து மனம் பதைக்கின்றோம்.

இதுவென் பாவை பாவை யிதுவென்
அலமரு நோக்கின் நலம்வரு சுடர்நுதற்
பைங்கிளி யெடுத்த பைங்கிளி யென்றிவை
காண்டொறுங் காண்டொறுங் கலங்க
நீங்கின ளோவென் பூங்க ணோளே. (ஐங்: 375)

காலங்கள் மாறலாம்; மனிதர்கொண்ட கோலங்கள் மாறலாம். ஆனால் என்றும் மாறாதது தன்னேரிலாத தாயன்பு. பிள்ளைகள் வல்லவராய் இருப்பதைவிட நல்லவராய் இருக்கவேண்டும் என்பதே ஒவ்வொரு தாயின் ஏக்கமும் எதிர்பார்ப்பும் ஆகும். தங்கள் எதிர்பார்ப்பு நன்முறையில் நிறைவேற வேண்டும் என்று எண்ணியே பல தாய்மார்கள் நம்முடைய புராணங்களிலிருந்தும், இதிகாசங்களிலிருந்தும் சிறந்த கதாபாத்திரங்களைப் பற்றியும் அவர்தம் குணநலன்கள் பற்றியும் தம் பிள்ளைகளுக்குச் சொல்லி வளர்ப்பர்.

நம் தேசத்தந்தை மகாத்மா காந்தியடிகளுக்குச் சத்தியத்தின் நித்தியத்தை உணர்த்தியது, அவருடைய அன்னை புத்லிபாய் சிறுவயதில் அவருக்குச் சொல்லிய அரிச்சந்திரன் எனும் வாய்மை வழுவாத மன்னனின் வரலாறே என்று அறிகின்றோம். அதுபோல் மராட்டிய சிவாஜியை வீரசிவாஜியாக மாற்றியது அவருடைய அன்னை சொல்லிய வீரக்கதைகளே என்றும் கேள்விப்படுகின்றோம்.

மொழியைத் தாய்மொழியென்றும், நாட்டைத் தாய்நாடென்றும் போற்றிக் கொண்டாடும் நம் மரபே தாய்க்கு நாம்தரும் உயர்வைத் தெற்றெனப் புலப்படுத்துகின்றது. படமாக ஆடிக்கொண்டிருக்கும் தெய்வங்களைவிடவும் நம்மெதிரில் நடமாடிக்கொண்டிருக்கும் தாய்மார்களே நாம் வணங்கி வழிபடவேண்டிய இல்லுறை தெய்வங்கள்.

தனக்கென்று தனியான ஆசைகள் எதையும் வைத்துக்கொள்ளாமல் தம் பிள்ளைகளுக்காவே வாழும் அன்னையருக்குப் பிள்ளைகள் கைம்மாறாகச் செய்யவேண்டியது என்ன? இல்லங்களை எழிலாக்கும் மனை விளக்குகளாம் அன்னையரின் ஆசைகளை, அவர்தம் விருப்பங்களை அறிந்து நிறைவேற்றுவதும், வயதான காலத்தில் அவர்களைப் புறக்கணிக்காது அன்போடு பேணிக்காப்பதுமே அவை.

அன்னையர் தினத்தன்று மட்டும் அன்னையரைக் கொண்டாடுவது அயல்நாட்டு மரபு; அன்பின் திருவுருவாய், ஆற்றலின் உறைவிடமாய்த் திகழும் அன்னையரைத் தினமும் கொண்டுவதே நம் இந்திய மரபு. எனவே அன்னையரை நிதமும் போற்றுவோம்; அன்னையர் தினத்தன்று இன்னும் சற்றுச் சிறப்பாகவே!

May 10, 2015
ஒருவரியில் எப்படி ’அம்மா’?!

-பா.ராஜசேகர்

ஒருவரியில்
எப்படிச் சொல்ல…?
நீயே உலகமம்மா!

என்மேல
மனசு வைத்தாய்
இதயம் உண்டாச்சு !

வேதனையில்
கண்விழித்தாய் உயிரே
உண்டாச்சு !

சோதனைகள்
நீ கடந்தாய் உன்உதிரம்
என்னுயிர் மூச்சாச்சு !

சுமைகள் நீசுமந்து
தொப்புள் கொடி
இரண்டாச்சு!

தூங்காம
தாலாட்டி
நீ தூங்க நாளாச்சு !

பசிக்குப் பாலூட்ட
உன் ரத்தம்
சோறாச்சு !

நான்தவழ நடைபழக
உன்கண்ணீரே
கவிதையாச்சு!

நீயே உலகமம்மா
ஒருவரியில்
எப்படிச் சொல்வேன் ’அம்மா’?!

May 10, 2015
அன்னையே தெய்வம்!

–ரா.பார்த்தசாரதி

தாயே விளைநிலமாம் தந்தையே வித்தாம்
குலம் தழைக்க வந்ததோர் சொத்தாம்!
பெண்முழுமை அடைவதும் தாய்மையாலே
தாயாக மாறுவதும் அந்தத் தாய்மையாலே!

கருவறையில் உன்னை  வைத்துக் காக்கின்றாள்
தனக்கென்று உண்ணாது உனக்காக உண்கிறாள்
பெண்ணிற்குப் பிரசவம் என்பதே மறுபிறப்பு
இதனை அறியாத மானிடப் பிறப்பு !

பிறந்த மேனியுடன் வெளிஉலகிற்கு வந்தாய்
தாய், தந்தைக்கு மட்டற்ற மகிழ்ச்சி தந்தாய்!
உனக்காகக் கண்விழித்துத் தூக்கத்தை மறந்தேன்
உனக்காக என் குருதியைப் பாலாக பொழிந்தேன் !

தோளையே தூளியாக்கி உன்னைச் சுமந்து செல்கின்றேன்
நீ பிறக்கும்போது நான் சுமந்த வலியை விடவா?
நீ    பசி தூக்கத்தை அழுது வெளிப்படுத்துகின்றாய்
உன் கள்ளமில்லச் சிரிப்பாலே கவலைகள்  போக்குகின்றாய் !

உன் அன்னைக்கு ஆயிரம் பிரச்சனை இருப்பு
உன்னைக் கட்டியணைப்பதில்தான் ஆனந்தக் களிப்பு !
உன் வளமே எங்கள் சிறப்பு
உன் நினைவே பாசத்தின் பிணைப்பு !

குழந்தையின் வளர்ப்பு தாய் தந்தையின் கடமையே
அன்னையின் வார்த்தைகள் குழந்தைக்கு இனிமையே
அன்னையைப் போல் ஒரு தெய்வம் இல்லை
திசை நான்கும் அவள் போல் எவருமில்லை !

May 10, 2015
கைகூப்பிக் கேட்கின்றேன் !

-எம். ஜெயராம சர்மா – மெல்பேண்

அன்னையின் அரவணைப்பில் ஆனந்தம் நாம்கண்டோம்
அவள்மடியில் படுத்துறங்கி அனைத்தையுமே நாம்பெற்றோம்
இல்லையெனும் வார்த்தையவள் இதயத்தில் வந்ததில்லை
இவ்வுலகில் அன்னையைப்போல் எவருமே இருந்ததில்லை

அழுகுரலை அவள்கேட்டாள் ஆடியே போய்விடுவாள்
பழுதெமை நாடாமல் பார்த்திடுவாள் அன்னையவள்
கொழுகொம்பு போலவள் கோலாமாய்க் கொண்டிடுவாள்
முழுவுலகில் அன்னையைப்போல் முன்னிற்பார் யாருமிலர்

அன்னையவள் அடிதொழுதால் அனைவருக்கும் ஆனந்தம்
அன்னையினை ஆலயமாய் அனைவருமே எண்ணிடுவோம்
ஆருமற்று நிற்கின்ற அவலம்தனைக் காணாமல்
அன்னையினைப் போற்றுதலே அவர்க்காற்றும் அருந்தொண்டே

காப்பாற்றி நின்றவளைக் காப்பகத்தில் விட்டுவிட்டுக்
கண்துடைக்கக் கொண்டாட்டம் கனவானே செய்யாதீர்
கண்ணுக்குள் மணியாகக் காத்துக்காத்து வளர்த்தவளைக்
கண்கலங்கச் செய்யாதீர் கைகூப்பிக் கேட்கின்றேன் !

May 10, 2015
அன்னையர் தினம்?

-சுரேஜமீ

அன்னையர் தினம் என்று அன்னியன் வைக்கின்றான்;
அதற்கும் நாமெலாம் அடிபணிந்து நிற்கின்றோம்!
அன்னைக்கு ஏதொரு தினம்?
அனுதினமும் அவள்தினம்தான்!

அன்னை தந்தை வளர்த்தெடுத்தார்
அவனியில் நாம் மகிழ்கின்றோம்!
அவர்தம்மை பிரிந்திருத்தல்
நாம் செய்த பாவமன்றோ!

அவர்தம்மைப் பார்த்திருத்தல்
அன்னவரின் பெருமையன்றோ!
அது கிடைக்கா எதுகிடைத்தும்
அருளில்லை இவ்வுலகில்!

பெற்றவரைப் போற்றிடுவர்
பேரெல்லாம் பெற்றிடுவர்
பெருமைபட வாழ்ந்திடுவர்
பெருகிவரும் செல்வமெலாம்!

வாழ்த்துதற்கு நாமென்ன வானவரா?
வணங்கிடுங்கள் தெய்வமதை
வளர்நாளும் வரலாறாய்
வாழ்ந்திடுங்கள் வாழ்த்துக்களால்!!

May 10, 2015
அவன் யசோதையின் நந்தனல்லவா….

சாயா சுந்தரம்

வீதிவீதியாகத்
தேடத்தொடங்குகிறாள்
தன் நந்தனை….
யாரேனும் தேவகியின்
பெயர் சொன்னால்
மேனிசிலிர்க்க
தவிர்க்கத் தொடங்குகிறாள்…
கேளாத ஒற்றை
வார்த்தையென
அந்தப் பெயரை….
தாளாதுப் புலம்பும்
தளிர்க்கொடிகள்
மிதிபட….
உற்றுக்கேட்கத்
தொடங்குகிறாள்
சிறுதண்டைக்
கொலுசொலியை….
மாயம் செய்பவனே
மதுசூதனா
விலகிச் செல்வாயோ என
பிதற்ற ஆரம்பிக்கிறாள்
பிச்சியென…
பாதம் பிடித்து
முழங்கால் பற்றி
கரம் பிடித்திழுத்து
மார்பு சாய்ந்து
கழுத்தணைத்துச்
செவிகளில்
இசைக்கத்தொடங்குகிறான்
சிறு கண்ணன்
‘அம்மா’ என…
மெதுவாக உயிர்பெறத்
தொடங்குகிறாள்
அவன் அன்னை
யசோதா….

May 10, 2015
அன்னையர் தின வாழ்த்துகள்…

கவிஞர் காவிரி மைந்தன்

அன்னைக்கு நிகரான சொல்கூட அகிலத்தில் இல்லை…

அவள் அன்புக்கு ஈடாக பூமிதனில் பொருளொன்றுமில்லை

கண்ணுக்கு நிகராக நம்மைக் காப்பதற்கு – கடவுள்

அன்னையை நமக்களித்தான் உண்மைதானே!

என்றைக்கும் அவளிருப்பாள் தாயாக… நாம்

அவள் மடிதனிலே கண்ணுறங்கும் சேயாக..

உண்ணவும் உறங்கவும் வைத்து நிதம்.. தன்

ஒருகோடி கனவுகளை தான் சுமப்பாள்!

சிறுதுன்பம் நமக்கென்றால் பொறுக்கமாட்டாள்

வரும்துயரம் யாவையும் தான் ஏற்பாள்

பசியென்று நாம் உணரா வைத்திருப்பாள்…

பகலிரவு அறியாமல் உழைத்திருப்பாள்

உயிருக்குள் உயிர் சுமந்த கோவிலவள்

ஒளியூட்டும் தீபம் நம் வாழ்வில் அவள்…

அன்னையைப் போற்றி நிதம் வழிபடுங்கள்…

அவள் பொற்பாதம் தொட்டு வணங்கிடுங்கள்..

உன்னை நான் ஈன்றெடுக்க என்ன தவம் செய்தேன்

என்று அவள் உள்ளம் தினம் பூரிக்கட்டும்!

அம்மா.. அம்மா.. அழைக்கின்றேன்… உன்

ஆசை முகம் பார்க்கத் துடிக்கின்றேன்…

கண்ணெதிரே இருந்தவரை காத்திருந்தேன்…

விண்ணுலகம் சென்று விட்டாய் என் செய்ய?

தாயென்னும் தெய்வத்தைத் தரணியிலே..

தந்ததற்கு கடவுளுக்கு நன்றி சொல்வோம்!!

அன்னையர் தின வாழ்த்துகள்…
(மு. இரவிச்சந்திரன்)
— என்னும்
கவிஞர் காவிரிமைந்தன்
நிறுவனர் மற்றும் பொதுச்செயலாளர்
கவியரசு கண்ணதாசன் தமிழ்ச் சங்கம்
பம்மல், சென்னை 600 075
தற்போது – அபுதாபி – அமீரகம்
00971 50 2519693
00971 50 4497052
kaviri2015@gmail.com
www.thamizhnadhi.com

May 10, 2015
பிரபஞ்ச சூட்டுத் தளங்களில் விண்மீன்களின் அருகிலே டியென்ஏ [DNA] உயிர் மூலச் செங்கற்கள் உற்பத்தி

சி. ஜெயபாரதன் B.E.(Hons) P.Eng (Nuclear) கனடா

https://www.youtube.com/watch?feature=player_detailpage&v=ofFhHcvasHA

http://www.educatinghumanity.com/2013/03/Solid-evidence-that-DNA-in-space-is-abundant-video.html

https://www.youtube.com/watch?feature=player_detailpage&v=NJQ4r81DZtY

https://www.youtube.com/watch?feature=player_detailpage&v=d-FLa0RKo5c

சட்டியில் ஆப்பம் ஒன்றைச்
சுட்டுத் தின்ன
அண்டக்கோள் ஒன்றை முதலில்
உண்டாக்க வேண்டும் !
அண்டக்கோள் தோன்றப்
பிரபஞ்சத்தில் ஒரு
பெருவெடிப்பு நேர வேண்டும் !
உயிரினம் உருவாக
சக்தி விசையூட்ட வேண்டும் !
கோடான கோடி யுகங்களில்
உருவான பூமியும் ஓர்
நுணுக்க அமைப்பு !
தனித்துவப் படைப்பு !
அகிலாண் டத்தில்
நிகரில்லை அதன் படைப்பிற்கு !
நாமறிந்த பிரபஞ்சத்தில்
பூமியைப் போல்
நீர்ப் பாறைக் கோள் ஒன்றை
வேறெங்கும் இதுவரைக் கண்டிலோம் !
நீர் ஆவியாய் நீங்காமல்
வைத்திருப்பது
வாயுக் குடை ! அக்கோள மின்றேல்
மாயும் உயிரினங்கள் !
மகத்துவமாய்
அகிலப் பிரம்மாண்டத்தை
நுணுகி நோக்க
மனிதரினம் தோன்றிய நமது
புனித கோளம்,
இனிய பூமி ஒன்றே !

****************************

https://www.youtube.com/watch?feature=player_detailpage&v=qoERVSWKmGk

https://www.youtube.com/watch?feature=player_detailpage&v=W4mYwsr9gGE

இந்த சோதனைகள் மூலாதார மூலக்கூறுகளான கொய்னொலோன் & ஐசோகொய்னோலோன் [Quinolone & Isoquinolone] இரண்டும் சூட்டுச் சூழ்வெளியில் பின்னிப் பிணைந்து சூரியப் புயலில் வீசி எறியபடலாம் என்று அழுத்தமான சான்றுகளைக் காட்டுகின்றன. குளிர்ந்து போன மூலக்கூறு முகில்களில் இவை விழுந்த பின்பு குளிர்ந்த அண்டெவெளி நுண்துகள்களில் படிந்து இயற்கை நிகழ்வுகளில் ஈடுபடும். அவை மேலும் சிக்கலான உயிர்ச்சார்புள்ள மூலக்கூறுகளை உண்டாக்கி டியென்ஏ & ஆரென்ஏ உருவாக்க உதவும் [Biorelevant Molecules like Nuclebases to create DNA & RNA].

ரால்ஃப் கெய்ஸர், இரசாயனப் பேராசிரியர், ஹவாயி பல்கலைக் கழகம்

இதுதான் முதன்முறையாக எவரும் விண்மீன்கள் வெப்ப இயக்கத்தை உள்நோக்கியது. நைட்டிரஜன் கலந்துள்ள வளையத்தை கார்பன் அணுக்கள் உண்டாக்குவது அத்தனை எளிமை இல்லை. இப்புதிய ஆய்வு அந்த சூட்டு வாயுத் தோற்ற வாய்ப்பு இருப்பை மெய்ப்பிக்கிறது. அதை அகிலவெளிக் கனல் சமைப்பு [Cosmic Barbeque] என்று சொல்லலாம். ஆனால் அந்த இயக்கம் நிகழ்வதற்கு ஒரு சக்தி அரண் [Energy Barrier] உள்ளது. அந்த வரையறை ஓர் விண்மீன் அருகில் அல்லது ஆய்வகச் சோதனையில் மீறலாம். அதாவது இந்த உயிரின மூல மூலக்கூறுகளை இப்போது நாம் விண்மீன்களைச் சுற்றி இருப்பதைத் தேடலாம்.

முகஸகீத் அஹமத், பெர்க்கிலி ஆய்வுக்கூட விஞ்ஞானி

உயிரின மூலாதார இரட்டை நெளிவு இழை டியென்ஏ

பல ஆண்டுகளாக உயிரின மூலாதார இரட்டை நெளிவு இழை [Double Helix] எனப்படும் டியென்ஏ ஆக்கும் மூலக்கூறுகள் பிரபஞ்சத்தில் எப்படி உருவாகி வருகின்றன என்னும் கேள்வி கேட்கப்படுகிறது. அதற்கு மூலாதார மூலக்கூறுகள் : நைட்டிரஜன் அணுக்கள் பதிந்துள்ள கார்பன் வளைய அமைப்புகள் [Key Components of Nucleobases] எப்படித்

தோன்றுகின்றன என்று முதலில் அறிய வேண்டும்.

முதன்முறையாக அமெரிக்காவில் பெர்க்கிலி தேசீய ஆய்வகம், ஹவாயி பல்கலைக் கழகம் இரண்டும் சேர்ந்து ஆராய்வுகள் நடத்தி, பிரபஞ்சத்தில் விண்மீன்களுக்கு அருகில் உள்ள சூட்டுத் தளங்களில் தகுந்த சூழ்நிலை அமைந்து இவ்வகை மூலக்கூறு நைட்டிரஜன் படிந்த கார்பன் வளையங்கள் [Quinolone] உருவாக நிகழ்வுகள் நேர்கின்றன என்று கண்டுபிடித்து வெளி

யிட்டுள்ளார்கள்.

“உயிரினம் எதுவுமே இல்லாமல் எளியதாய்ப் பிரபஞ்சம் வெறும் பௌதிகம், இரசாயனத்தோடு, கால வெளியைத் தோற்றுவித்த அகில வெடிப்புத் தூசியோடு (Dust of Cosmic Explosion) இருந்திருக்

கலாம். உண்மையில் அப்படி நேரவில்லை ! பிரபஞ்சம் தோன்றி 10 பில்லியன் ஆண்டுகளுக்கு பிறகு வெறும் சூனியத்திலிருந்து உயிரினங்கள் உதித்தன என்று நான் நியாயப் படுத்துவது பைத்தியகாரத்தனம். “உயிரினப் படிப்படி மலர்ச்சி” (Evolution) என்னும் இயற்கை நியதி நேர்ந்தது மட்டுமில்லை ! அந்த மகத்தான நிகழ்ச்சியை உளவி அறிந்து கொள்ளும் மனிதரை உண்டாக்கவும் செய்திருக்கிறது.”ரிச்சர்டு டாக்கின்ஸ் உயிரியல் விஞ்ஞானி (Richard Dawkins)

“உயிரினம் எப்படி ஆரம்பமானது என்பதை நாம் அறிய முடியவில்லை என்று முதலில் ஒப்புக் கொள்வோம். பூர்வாங்க உலகில் எளிய ஆர்கானிக் மூலக்கூறுகள் தோன்ற பல்வேறு இயக்க முறைகள் ஒருங்கிணைந்து பாதை வகுத்தன என்று பொதுவாக நம்பப் படுகிறது ! அந்த மூலக்கூறுகள் இணைந்து மீண்டும் சிக்கலான இரசாயன அமைப்புக் கலவைகள் உண்டாகி, முடிவிலே உயிர் மூலவி என்று சொல்லப்படும் ஒரு பிறவி உருவானது ! இப்படி மேற்போக்கில் பொதுவாகச் சொல்லும் ஒரு விளக்கத்தில் எவரொவரும் திருப்தி அடைய முடியாது.”

மில்லர் & ஆர்ஜெல் (Miller & Orgel in their Book “The Origin of Life on Earth -1974)

உயிரினத் தோற்றம் பற்றி விளக்கம் கூறிய உலக மேதைகள்:

பெரும்பான்மையான உயிர்த்துவ இம்மிகள் [Living Organisms] மனிதர் கண்ணுக்குப் புலப்படா. உயிர்த்துவ மூல நுண்ணுருக்கள் [Microbes] சேர்ந்தவையே உயிரினங்கள். 80% நுண்ணுருக்கள் பூமிக்கு அடியிலே வசிக்கின்றன. அவற்றின் அளவீடுகளைக் கணிப்பது சிரமமானது. நோயை உண்டாக்கு வதும் அவையே. நோயைக் குணப்படுத்துவதும் நுண்ணுருக்களே. நமது பசுமைச் சூழ்வளம் [Ecosystem] ஏற்பாட்டுக்கும் நுண்ணுருக்களே அடிப்படைக் காரணமாய்ப் பங்கேற்கும். யூதக் கிறித்துவ, இஸ்லாமிய மத நூல்கள், கடவுளே பிண்டத்தில் உயிரை ஊதி உட்செலுத்தியது என்று கூறுகின்றன.

[384-322 ] B.C. ஆண்டுகளில் வாழ்ந்த கிரேக்க மேதை அரிஸ்டாடில்ஸ் “நியுமா” [Pneuma] என்னும் ஒரு தெய்வீக மூலமே [Divine Matter] விலங்கினத்தை உருவாக்கியது என்று கூறுகிறார். உயிரின மலர்ச்சி தொடர் இயக்கத்தில் மனித ஆத்மா பூரணத்துவம் அடைய, நியுமா என்பது ஒர் இடைநிலை அரங்கம். மனித உடலுக்கும், ஆத்மாவுக்கும் இடையே, அல்லது விலங்கினத்தின் உடம்புக்கும் உயிருக்கும் உரிய “இருமுகப்பு” [Duality] பற்றி அவரது குருநாதர் சாக்ரடீஸ் பள்ளியில் கருத்தாடல்கள் நடந்துள்ளன. அதில் ஒரு மாணவரே அரிஸ்டாடில்ஸ். குருநாதர் கூற்றுபடி உயிர் மூச்சு மனிதன் போன்ற உயர்ந்த விலங்கினங்களுக்கு பிறப்பாக்கத் தொடர்பு மூலம் [Procreation] வாரிசுகளுக்கு வழங்கப் பட்டது. பிறப்பு விதை யில்லாமலே சிற்சில பூச்சிகள், சிப்பிகள், கடல்நீர் ஜந்துகள் சுயமாய் உருவாகின என்பது கிரேக்க மேதை அரிஸ்டாடில்ஸின் கருத்து. சாக்ரடீஸ் குழுவினருக்கு முன்பே “தானாய் நேரும் பிறப்பு” [Spontaneous Generation] கோட்பாடுக் கருத்து இருந்துள்ளது. தானாய் நேரும் பிறப்புகளைப் பற்றி சைனா, இந்தியா, பாபிலோன், எகிப்திய ஏடுகளும் கூறியுள்ளன.

லூயி பாஸ்டர் [1822-1895] செய்த ஒரு சோதனை மூலம் “தானாய் பிறக்கும் கோட்பாடுக்கு” முற்றுப் புள்ளி வைத்தார். அவருக்குப் பிறகுதான் “உயிரே உயிரை பிறப்பிக்கும்” கோட்பாடு நிலையானது. ஆனால் இந்தக் கோட்பாடு முதலில் தோன்றிய உயிர் வடிவத்துக்கு ஒவ்வாது என்றும் பாஸ்டர் கூறினார். அதாவது “தானாய் உருவாகும்” கோட்பாடு முதல் உயிர் வடிவுக்கு மட்டும் தகுதி பெறும்.

சார்லஸ் டார்வின் [1809-1882] உயிர்த் தோற்ற உற்பத்தி, அம்மோனியா, ஃபாஸ்ஃபரஸ் உப்புக்களோடு, ஒளி, வெப்பம், மின்சக்தி இயங்கிய ஒரு பூர்வக் குழம்பில் [Primeval Soup] நேர்ந்தது என்று நம்பினார். இந்தக் கூட்டுக் குழம்பு ஒருவிதப் புரோட்டீனை உண்டாக்கி, சிக்கலான இரசாயனக் கலவைகளாகி, அவற்றிலிருந்து உயிரினம் தோன்றின என்று கருதினார். உயிரியல் இரசாயன இயக்க விருத்தியில் [Biochemical Reactions Evolution] உயிரின மலர்ச்சி நேர்ந்தது என்னும் புதியதோர் கருத்தை நிலை நாட்டியவர் அலெக்ஸாண்டர் இவனோவிச் ஓபரின் [Alexander Ivanovich Oparin] [1894-1980].

“கிரீன்ஹௌஸ் விளைவின் வெப்பச் சீற்றத்தில் கரியமில வாயுவின் தீவிரத்தை விட, மீதேன் வாயு ஒவ்வொரு மூலக்கூறுக்கு ஒன்றாகப் பரிதியின் சூட்டை உறிஞ்சிச் சேமிக்கிறது! சூழ்வெளியில் மென்மேலும் கிரீன்ஹௌஸ் வாயுக்கள் திணிக்கப்படுவதால், ஆர்க்டிக் வட்டாரத்தின் வெப்பம் மிகையாகிப் “பூகோளச் சூடேற்றப் புரட்சி” [Runaway Global Warming (RGW)] தூண்டப்படும் என்று விஞ்ஞானிகள் மிகவும் கவலைப் படுகின்றனர்! அடுத்து வரும் 100 ஆண்டுகளில் பூகோளக் காலநிலை பெருத்த அளவில் மாறிச் சமூக, நிதிவளம், உயிர்ப்பயிரின விருத்திகள் பாதிக்கப்படும். அதன் துவக்க விளைவுகள் ஏற்கனவே ஆரம்பாகி விட்டன!”

ஆர்க்டிக் காலநிலைப் பாதிப்பு உளவு [Arctic Climate Impact Assessment (ACIA)]

1990 ஆண்டில் பிரென்ச், ரஷிய விஞ்ஞானிகள் அன்டார்க்டிகாவின் தென்துருவத்தில் 1.5 மைல் நீளமான பனித்தண்டைத் தோண்டி எடுத்து 400,000 ஆண்டுகளாக மீண்டும் மீண்டும் தோன்றி மாறிய நான்கு பனியுகங்களின் கரியமில வாயுவை [CO2 in Four Ice-Age Cycles] ஆய்ந்தனர்.

அந்தச் சோதனையில் உஷ்ணம் ஏற, ஏற கரியமில வாயுவின் கொள்ளளவு படிப்படியாகக் குறைந்து [மூன்றில் ஒரு பங்கு] வந்திருக்கிறது என்று அறியப்பட்டது. காரணம் மற்ற கிரீன்ஹௌஸ் வாயுக்கள் CO2 உடன் மாறி யிருக்க முடியும் என்று எளிதாகக் கருத வழி யிருக்கிறது. அந்த அரியக் கண்டுபிடிப்பு 1896 ஆண்டு விட்ட முன்னறிப்பை உறுதிப் படுத்தியுள்ளது.

பூகோளச் சூடேற்ற விளக்கமும் விவாதமும் [Global Warming Definitions & Debate]

பூமியின் பூர்வீக உயிரினங்களின் மூலத் தோற்றங்கள்

4.5 பில்லியன் ஆண்டுகளுக்கு முன்பு தோன்றிய பூமியின் முதல் 700 மில்லியன் ஆண்டுகளாக வால்மீன்கள், விண்பாறைகள் போன்ற சூரிய மண்டலத்தின் அண்டத் துணுக்குகள் பூமியை மிகத் தீவிரமாய் தாக்கி வந்திருக்கின்றன. அவற்றில் பேரடித் தாக்குதல்களால் வெளியான அதிர்வு சக்தி, கடல் வெள்ளத்தையும் ஆவியாக்கும் பேராற்றல் கொண்டிருந்தது. அப்போது தழைத்திருந்த உயிரினத் தோற்றங்களையும் பூமித் தளங்களில் அழிக்க வல்லது. 3.5 பில்லியன் ஆண்டுகளுக்கு முன்பு தடம் விட்டுச் சென்ற முதல் உயிரினத் தோற்றத்தின் புதைவடிவுப் பழஞ்சின்னச் சான்றுகள் (Fossil) இப்போது காணக் கிடைத்துள்ளன !

கலியுகத்தின் சிக்கலான உயிரனங்களின் அமைப்புகள் பூகோளத்தின் பௌதிக இரசாயனச் சூழ்வெளியில் (Environmental Globe) சீரான முறையில் படிப்படியாக பல கோடி ஆண்டுகளாகப் பரவி வந்துள்ளன. பூமியின் ஆக்ஸிஜன் சொற்பமான “சிறுத்திடும் சூழ்வெளி அழுத்தத்தில்” (Reducing Atmosphere with Traces of Oxygen) உள்வெளி அல்லது விண்வெளி ஒளிமந்தைகளின் ஆர்கானிக் மானோமெர்கள், பாலிமர்கள் (Terrestrial Organic Polymers or Extra-Terrestrial Organic Monomers) நியமித்த நிபந்தனைகளில் வளர்ச்சிச் சூழகத்தை நிலைநிறுத்தி இருந்தன. ஆகவே ஆக்ஸிஜன் வேண்டாத உயிரினங்கள் இரசாயனப் பந்தங்களைத் (Chemical Bonds) தாக்கும். ஆகவே பூர்வீகப் பூமியில் (Primitive Earth) ஏற்கனவே இருந்த ஆர்கானிக் மானோமெர்கள் அவற்றை விடச் சிக்கலான ஆர்கானிக் பாலிமர் உண்டாக வசதியான எரிசக்திச் சூழ்நிலைகள் உண்டாயின. ஆர்கானிக் மானோமெர்கள் இருவிதச் சேமிப்புகள் மூலம் உருவாகின்றன : 1. உள்வெளி ஒளிமந்தை இணைப்பு முறைகள் (Terrestrial Synthetic Pathways). 2. விண்வெளி ஒளிமந்தையிலிருந்து (Extra-Terrestrial) சூரிய மண்டலம் பெற்ற மூலங்கள்

பல்லாண்டு காலங்களாக எளிய மூலக்கூறுகள் மிகச் சிக்கலான உயிரியல் மூலக்கூறுகளாக விருத்தி யாகி முடிவில் “உயிரணுக்கள்” (Cells) ஆயின ! அவை மீண்டும் பல்வேறு வடிவாக விருத்தி யாகி “ஒளிச்சேர்க்கையில்” இரசாயன முறை மலர்ச்சி (Metabolically Capable of Photosynthesis) பெறும் உயிரணுக்களாக மாறின. அதற்குப் பிறகு அடுத்தடுத்து உயிரியல் பூதள இரசாயனச் சுழல் இயக்கங்களால் பின்னிய மீளா நிகழ்ச்சிகள் (Cascade of Irreversible Events Interconnected by Bio-Geochemical Cycles) நேர்ந்தன. அப்போது பூகோளத்தின் சூழ்வாயு அழுத்தம் ஆக்ஸிஜன் ஊட்டும் சூழ்வெளியாகி (Oxidizing Atmosphere) “ஓஸோன்” அடுக்கு (Ozone Layer) உண்டானது. ஓஸோன் அரங்கமானது பாதிக்கும் சூரியனின் புறவூதாக் கதிர்களை வடிகட்டும். ஆக்ஸிஜன் ஊட்டும் சூழ்வெளி பூர்வீக நுண்ணுயிர் அணுக்களை (Early Micro-Organisms) உயிரியல் விருத்தி செய்யும் மூல வாயுவாக இருந்து வந்தது. இவ்விதப் படிப்படி அரங்க மாறுதல்களால் பூமியானது தற்கால உயிரியல் கோளமாய்ப் (Present Day Biosphere) பின்னால் உருவானது.

பூதளச் சூழ்வெளியில் உயிரியல் கோளத்தின் அடுக்கான அமைப்பாடுகள்

நாமறிந்த பிரபஞ்சத்திலே உயிரினங்கள் பல கோடி ஆண்டுகள் வசித்து விருத்தியடைந்த ஓர் அண்டக் கோள் பூமியைத் தவிர வேறொன்றை இதுவரை யாரும் அறிந்திலர். சூழ்நிலைக்குத் தக்கபடி மாறிக் கொள்ளும் உயிரினங்கள் பூமியில் மத்திய வேனல் தளங்கள் முதல், துருவக் கூதல் பிரதேசங்கள் வரை நீடித்து வாழ்ந்து வருகின்றன. பூமியின் ஒவ்வொரு தளமும் நேரிடையாகவோ அன்றி மறைமுகமா கவோ உயிரின நீடிப்பு வளர்ச்சிக்கு வசதி செய்து வருகிறது. கடல் மட்டத்துக்குக் கீழ் 10 கி.மீடர் ஆழத்திலும் (6 மைல்), கடல் மட்டத்துக்கு மேல் 20 கி.மீடர் உயரத்திலும் (12 மைல்) உயிரினங்கள் உலவி வருகின்றன. கடலிலும், வானிலும், பாலைவனத்திலும், வட தென் துருவங்களிலும் உயிரினங்கள் பிழைத்துத் தழைத்து வருகின்றன. கனடாவின் ஆர்க்டிக் குளிர்ப் பகுதிகளில் பல்லாயிரம் ஆண்டுகளாய் பனிக்குகைகளில் எஸ்கிமோ இனத்தார் குடிவாழ்வு நடத்தி வருகிறார். வேனற் பகுதிகளில் பேரளவு உயிரினங்கள் வாழ்ந்து வருகிறன.

சூழ்வெளியின் அடுக்கடுக்கான வாயு அழுத்தம் குன்றிய அமைப்பாடு

1. பூதளத்திலிருந்து 8 முதல் 18 கி.மீடர் வரை: டோப்போ கோளம் (Toposphere)

2. பூதளத்திலிருந்து 18 முதல் 50 கி.மீடர் வரை: ஸ்டிராடோ கோளம் (Stratosphere)

3. பூதளத்திலிருந்து 50 முதல் 85 கி.மீடர் வரை: மெஸோ கோளம் (Mesosphere)

4. பூதளத்திலிருந்து 85 முதல் 450 கி.மீடர் வரை: தெர்மோ கோளம் (Thermosphere)

5. பூதளத்திலிருந்து 450 முதல் 10,000 கி.மீடர் வரை: எக்ஸோ கோளம் (Exosphere)

சூழ்வெளியில் பேரளவுக் கரியமில வாயுவின் சேமிப்பு:

கிரீன்ஹவுஸ் வாயுக்கள் காற்றில் சேமிப்பாகிப் பூகோளத்தின் உஷ்ணம் ஏறுவது போன்ற காலநிலைக் கோளாறுகள் ஆமை வேகத்தில் நிகழ்ந்து மெதுவாக மாறி வருபவை. அவற்றில் குறிப்பிடத் தக்க வாயு, மின்சாரம், நீராவி உற்பத்தி நிலையங்களுக்குப் பயன்படும் நிலக்கரி எரு எரிந்து உண்டாகும் கரிமில வாயு [CO2]. மற்ற கிரீன்ஹவுஸ் வாயுக்களில் ஒன்று மீதேன் வாயு [Methane Gas]. அது கழிவுப் பதப்படுப்பு சாலைகளிலும் [Waste Treatment Plants] தொழிற்சாலை வினைகள், வெப்பத் தணிப்பு முறைகள் வெளிவிடும் ஹாலோகார்பனிலும் [Halo-Carbons] உண்டாகுகிறது. அனைத்து பசுமைக் குடில் சூட்டு வாயுக்களையும் [Greenhouse Gases] CO2 வாயுச் சமனில் [CO2 Equivalence] கூறினால், 2003 ஆண்டில் மட்டும் அனைத்துலக CO2 வாயுச்சமன் எண்ணிக்கை: 2692. அதாவது 2002 ஆம் ஆண்டு CO2 வாயுச்சமன் எண்ணிக்கையை விட 10.6% மிகையானது என்று ஒப்பிடப் படுகிறது!

உயிரின நீடிப்புக்கு வாயுச் சூழ்வெளியின் இயக்கப்பாடுகள்

பரிதியின் ஒளிக்கதிர்கள் எரிக்காதவாறு உயிரினங்களுக்குக் குடைபிடிக்கும் வாயு மண்டலத்தின் பயன்கள், இயக்கப்பாடுகள் என்னவென்று தெரிந்து கொள்வோமா ? அந்த அரிய வாயுக் குடையை நீடித்துத் தன்னகத்தே இழுத்து வைத்துக் கொண்டிருப்பது பூமியின் பேராற்றல் கொண்ட ஈர்ப்பாற்றலே ! செவ்வாய்க் கோளில் இவ்வித வாயுக்குடை இல்லாமல் போனதற்கு முக்கிய காரணம் செவ்வாயின் ஈர்ப்பாற்றல் பல்லாயிரம் ஆண்டுகளுக்கு முன்பு சிறுத்துப் போனதே ! வாயுக்குடை தங்காமல் போனதும் பரிதியின் கொடிய தீக்கனல் செவ்வாய்த் தளத்தின் நீர்வளத்தை ஆவியாக்கி நீர்வற்றிய பாலைவனமாக்கி விட்டது !

பூமியின் வாயுக்குடை உயிரனத்துக்கு என்ன செய்கிறது ?

1. பரிதியின் கொடிய புறவூதா கதிர்கள், எக்ஸ்ரே கதிர்கள், பாதிக்கும் கதிர்வீச்சு போன்றவற்றைப் பகற் பொழுதில் தடுத்து எல்லா உயிரினங்களையும் பாதுகாப்பது.

2. பரிதியின் அவசியமான ஒளிச்சக்தியைக் கடல் மீதும் பூதளத்தின் மீதும் ஊடுருவிப் பாயும்படிச் செய்வது (எரிசக்தி மூலம்).

3. இராப் பொழுது துரிதக் குளிர்ச்சியில் பூதளத்தைக் கணப்புடன் வைத்திருப்பது. பகற் பொழுது துரித வெப்பத்தில் பூமியை மிதமாய் வைத்து மிகையாக்குவது. வாயு அழுத்தக் குடையால் புவியின் சராசரி தள உஷ்ணம் : +15 டிகிரி C. வாயுச் சூழ்வெளி இல்லையெனில் -18 டிகிரி C

4. பூமத்திய ரேகைப் பகுதிகளிலிருந்து மிதப்பகுதி & உயர்ப்பகுதிகளுக்கு வெப்பக்கனல் சக்திக் கடப்பாடு (Transport of Energy from Equtorial Regions to mediuam & Higher Altitudes) நிகழ்வது.

5. ஆவிநீர்க் கடப்பாடு (Transport of Water Vapour) கொந்தளிக்கும் பொதுநிலைக் காற்றோட்டத் தளங்கள் மூலமாய்ப் பரவி நீராகப் படிதல்.

6. பூகோளத்தின் வாயு மண்டலத்தில் பேரளவு தாவரப் பயிர்களுக்குத் தேவையான நைடிரஜன் (78%) வாயு சேமிப்பு. அத்துடன் ஆக்ஸிஜன் (21%), ஆவிநீர் (Moisture upto 4%) & கார்பன் டையாக்ஸைடு (0.036%) சேமிப்புக் களஞ்சியம்.

7. உயிரினங்கள், பயிரினங்கள் நீடித்து உயிர்வாழத் தேவையான வாயுக்கள் சூழ்வெளி எங்கும் இருப்பது.

8. இயற்கையாலும், மனிதச் செய்கையாலும் நிகழும் இரசாயன இயக்கங்களை (Oxidation, Reaction with Radicals & Photosynthesis) கடக்கச் செய்வது & பிரித்து விடுவது.

9. விண்வெளியிலிருந்து பூமியின் சூழ்வெளியில் வீழும் விண்கற்களைக் கடும் உராய்வு வெப்பத்தால் எரித்துச் சாம்பலாக்கி உயிரினங்கள் மீது படாது பாதுகாப்பது.

கரியமில வாயுவைக் கணிக்க நாசா ஏவப்போகும் துணைக்கோள்

2009 பிரவரியில் நாசா ஏவப்போகும் துணைக்கோள் “ஓகோ” என்னும் “புவி சுற்றும் கரி நோக்ககம்” [Orbiting Carbon Observatory (OCO)] சூழ்வெளியில் பூதளத்துக்கு அருகில் சேரும் கார்பன் டையாக்ஸைடையும், அந்தப் பகுதியையும் பதிவு செய்து வரும். அதைப் பின்பற்றி ஜப்பான் “கோஸாட்” என்னும் “கிரீன்ஹௌஸ் வாயுக்கள் நோக்கும் துணைக்கோளை” (GOSAT Greenhouse Gases Observing Satellite) அடுத்து ஏவப் போகிறது. மூன்றாவதாக ஐரோப்பாவில் ஈசா “ஏ-ஸ்கோப்” [Advanced Space Carbon & Climate Observation of Planet Earth (A-Scope)] என்னும் துணைக்கோளை 2016 இல் அனுப்பும். பூமியின் சூழ்வெளியில் தாவர இனங்களுக்குத் தேவையான கார்பன் டையாக்ஸைடின் கொள்ளளவு இயற்கை நிகழ்வாலும், மனித வினையாலும் ஏறி இறங்குகிறது. அதே சமயத்தில் அது பேரளவு சேமிப்பானால் பூகோளம் சூடேறித் துருவப் பனிப்பாறைகள் உருகிக் கடல் மட்டம் உயர்கிறது. அத்துடன் கடல் நீரின் உஷ்ணமும் உயர்கிறது. அதனால் பேய் மழைகளும், பயங்கச் சூறாவளிகளும், ஹர்ரிகேன்களும் எழுந்து உயிரினத்துக்கும், பயினத்துக்கும் பேரின்னல்களை விளைவிக்கின்றன. அவற்றை வரும் முன் தடுக்கவும், வரும் போது எச்சரிக்கை செய்யவும் இந்தத் துணைக்கோள்கள் பேருதவி செய்யும் என்று எதிர்பார்க்கப் படுகிறது.

(தொடரும்)

++++++++++++++++++++++++++

தகவல்:

Picture Credits: NASA, JPL; National Geographic; Time Magazine, Discovery, Scientific American & Astronomy Magazines. Earth Science & the Environmental Book.

1. Our Universe – National Geographic Picture Atlas By: Roy A. Gallant (1986)
2. 50 Greatest Mysteries of the Universe – Is There Life on Mars, Titan or Europa ? (Aug 21, 2007)
3. Astronomy Facts File Dictionary (1986)
4. The Practical Astronomer By Brian Jones & Stephen Edberg (1990)
5. Sky & Telescope – Why Did Venus Lose Water ? [April 2008]
6. Cosmos By Carl Sagan (1980)
7. Dictionary of Science – Webster’s New world [1998]
8. The Universe Story By : Brian Swimme & Thomas Berry (1992)
9. Atlas of the Skies – An Astronomy Reference Book (2005)
10 Hyperspace By : Michio kaku (1994)
11 Universe Sixth Edition By: Roger Freedman & William Kaufmann III (2002)
12 Physics for the Rest of Us By : Roger Jones (1992)
13 National Geographic – Frontiers of Scince – The Family of the Sun (1982)
14 National Geographic – Living with a Stormy Star – The Sun (July 2004)
15 The World Book of Atlas : Anatomy of Earth & Atmosphere (1984)
16 Earth Science & Environment By : Dr. Graham Thompson & Dr. Jonathan Turk (1993)
17 The Geographical Atlas of the World, University of London (1993).
18 Hutchinson Encyclopedia of Earth Edited By : Peter Smith (1985)
19 A Pocket Guide to the Stars & Planets By: Duncan John (2006)
20. http://www.thinnai.com/?module=displaystory&story_id=40805151&format=html (வால்மீனிருந்து உயிரின மூலங்கள் பூமிக்கு வந்தனவா ?
21. The Daily Galaxy Website -The Biological Universe -A Galaxy Insight Posted By : Casey Kazan [Nov 20, 2008]
22. Hutchinson Encyclopedia of the Earth Edited By : Peter Smith [1985]
22 Earth Science & The Environment By : Graham Thompson, Ph.D. & Jonathan Turk, Ph.D.
23. Astronomy Magazine : The Solar System -What Makes Earth Right for Life ? By : Jonathan Lunine [Dec 2008]
24. BBC News – Milky Ways’s Sweetness Throughout [Nov 25, 2008]
25. BBC News : Sugar in Space Sweetens Chances of Life By : Dr. David Whitehouse [June 16, 2000]
26 NASA’s Genesis Space Mission – Life from Space Dust ? [Aug 15, 2001]
27 BBC News : Life’s Origin Among the Stars – A Salt Inclusion in a Meteorite is Evidence for Water By : Dr. David Whitehouse [March 27, 2002]
28 The Beginning of Life & Amphiphilic Molecules By: Janet Woo [August 2004]
29. The Biological Universe – A Galaxy Insight [Nov 20, 2008]
30. The Daily Galaxy – Could Cold “Super Earths” Potentially Support Life ? [Dec 16, 2008]
31. BBE News : NASA Set to Launch CO2 Hunter Satellite By : Jonathan Amos [Dec 18, 2008]

32. http://www.scientificamerican.com/article/a-simpler-origin-for-life/ [February 2007]

33. http://www.dailygalaxy.com/my_weblog/2013/02/rna-dnas-messenger-or-the-origin-of-life-on-earth.html [February 23, 2013]

34. http://www.ncbi.nlm.nih.gov/books/NBK26876/

35. http://alma.mtk.nao.ac.jp/e/aboutalma/outline/06.html

36. http://www.scielo.br/scielo.php?pid=S0103-40142007000100022&script=sci_arttext&tlng=en [April 2007]

37. http://www.independent.co.uk/news/science/found-the-origin-of-life-1684584.html [May 14, 2009]

37. http://en.wikipedia.org/wiki/RNA_world_hypothesis [June 6, 2014]

38. http://www.dailygalaxy.com/my_weblog/2015/03/secrets-of-extreme-continent-building-discovered-a-key-to-life-on-earth-and-beyond.html [March 31, 2015]

39. http://www.dailygalaxy.com/my_weblog/2015/05/cosmic-hotspots-near-stars-yield-buiding-blocks-of-dna.html [May 6, 2015]

40 http://www.sciencedaily.com/releases/2015/05/150506095248.htm [May 6, 2015]

(தொடரும்)

******************
S. Jayabarathan (jayabarathans@gmail.com) [May 9, 2015]

Attachments area

Preview YouTube video How Did Life Begin?

How Did Life Begin?

Preview YouTube video How Life Began Origins Nova Neil Degrasse Tyson

How Life Began Origins Nova Neil Degrasse Tyson

Preview YouTube video Finding Life Beyond Earth and Solar System NOVA Full Documentary

Finding Life Beyond Earth and Solar System NOVA Full Documentary

Preview YouTube video DNA and RNA – Part 1

DNA and RNA – Part 1

Preview YouTube video DNA and RNA – Part 2

DNA and RNA – Part 2

May 10, 2015
அன்னையர் தின வாழ்த்துகள்

எனது தோழனும் எங்கள் கிரேசி கிரியேஷன்ஸ் இயக்குநருமான திரு.S.B.KHANTHAN அவர்களின் தந்தையார் பிரும்மஸ்ரீ பாலகிருஷ்ண சாஸ்திரிகளும், தாயாரும்…. காந்தனின் தகப்பனாரும் தாயாரும் எனது தாய், தந்தைக்கு சமமானவர்கள்….என்னைப் பெற்ற தாயாரின் ஓவியம் – அடியேன் வெகு நாட்களுக்கு முன்பு வரைந்தது. அவர் 42வயதிலேயே காலமாகிவிட்டார். இதோ நான் வரைந்த என் அன்னையின் ஓவியம்!

லலிதாம் பிகையின் லயிப்புக்(கு) உதவும்
எலிதாங்கி சேயாய்(பிள்ளையாராய்) இருப்பாய்: -வலிதாங்கி
ஈரைந்து மாதங்கள் ஈன்றவளை தெய்வமாய்
பாரந்த சங்கரனே பார்ப்பு’’…..(அத்வைதம் சொன்ன சங்கரரே அன்னையைக் காண வந்தார்)….

”ஓமாய் உனக்குள்ளே,ஆமாம் அஜபாவாய்,
MOMமாய் ஒலித்திடும் மந்திரத்தை, -CALMமாக,
உச்சரிக்க ஓயா(து), உறக்கம்போய் மெய்யுணர்வு,
நச்சரிக்க, ஆன்ம நிலைப்பு’’….கிரேசி மோகன்…

OUR Mother – Smt Nagalakshmi Balakrishna Sastrigal, a vivid administrator of the family affairs leaving my illustrious father free in his mind to concentrate on His discourses and SBI office. Not a day passed in her life without rendering Vishnu and Lalitha Sahasranamam for 80+ Years in the morning and evening. She is 91 today…listening to Vishnu & Lalitha Sahasranamam from her bed even this day, courtesy my daughter Dvijavanthi’s idea of putting the headphone in her ears.

Happy Mothers day.

Appa/Amma photo courtesy: My dear friend A V Bhaskar – The Legendary photographer.

May 9, 2015
கேசவ் வண்ணம் – கிரேசி எண்ணம்

MUSICAL-CHAIR ஆடுது மாடுகள் , கண்ணனின்
DEW-துகள் கால்வருடி தொத்திக்க, -கோஸகன்,
கோபாலன் கால்தூஸாய், கஷ்டத்தை ஊதிடுவான்,
பூபாளம் போல்பிறக்கும் போது ….கிரேசி மோகன்….

May 9, 2015
பிரித்தானியாவில் டேவிட் கேமரூன் கட்சி வெற்றிவாகை சூடி ஆட்சியைத் தக்க வைத்துக்கொண்டுள்ளது!

பவள சங்கரி

பிரித்தானிய பாராளுமன்றத்தில் கன்சர்வேடிவ் பார்ட்டி மீண்டும் வெற்றி பெற்றுள்ளதை வாழ்த்தி வரவேற்போம். முக்கியமான எதிர்க்கட்சியான டேவிட் மிலிபான்ட்டின் லேபர் கட்சி 232 இடங்களை மட்டுமே வென்றுள்ளதால் தோல்வியைத் தழுவியுள்ளது. திருமிகு டேவிட் கேமரோன் தலைமையில் பிரித்தானிய பொருளாதாரம் மேலும் உயரும் என்று நம்புவோம். இந்திய வம்சாவளியைச் சார்ந்த பத்து பேர்கள் பிரித்தானிய பாராளுமன்றத்திற்கு தேர்ந்தெடுக்கப்பட்டிருக்கிறார்கள். இதனால் இந்திய பிரித்தானிய நட்பு மேலும் பலம் பெறும் என்று எதிர்பார்ப்போம்.

May 9, 2015
வாழ்த்துகள் மாணவச் செல்வங்களே!

பவள சங்கரி

தலையங்கம்

இந்த ஆண்டு (2015) +2 தேர்வில் வழக்கம்போல் பெண் குழந்தைகள் அதிக விகிதத்தில் தேர்ச்சி பெற்றுள்ளனர். கொங்கு மண்டலத்தைச் சார்ந்த இரண்டு பெண்கள் மாநில அளவில் தேர்ச்சி பெற்றுள்ளனர். சென்ற ஆண்டு முதலிடத்தில் இருந்த ஈரோடு கல்வி மாவட்டம் இந்த ஆண்டு மூன்றாவது இடத்தைப் பிடித்துள்ளது. விருதுநகர் மற்றும் பெரம்பலூர் மாவட்டங்கள் முதல் இரண்டு இடங்களைப் பெற்றுள்ளது. தேர்வில் பங்கு பெற்ற அனைத்து மாணவர்களுக்கும் வல்லமையின் வாழ்த்துகள்.

போட்டிகள் நிறைந்த உலகத்தில் திறமையாளர்கள் மட்டுமே வெற்றி பெற முடியும் என்ற இந்த காலகட்டத்தில் நம்முடைய கல்வித் திட்டம் மற்றும் கற்பிக்கும் முறைகளில் மாற்றம் செய்ய வேண்டிய கட்டாய தருணம் இது. உலகளாவிய நாடுகளின் கல்வித் திட்டங்களைக் காணும்போது நம் நாட்டின் கல்வித்திட்டங்களில் நிறைய மாற்றங்கள் தேவை என்பதை உணர முடியும். இன்றைய நம் கல்வித் திட்டத்தின்படி பாடங்களை மனனம் செய்து திருப்பி எழுதக் கூடிய மாணவர்களையே சாதனையாளர்களாக உருவாக்க முடிகிறது. மனனம் செய்தவற்றை அப்படியே வார்த்தை மாறாமல் திருப்பி எழுதுபவர் மட்டும் வெற்றி பெற்றவராகக் கருதப்படுகிறார்கள். மதிப்பெண்களில் பின் தங்கியவர்கள் அறிவற்றவர்கள் என்பதைவிட மனப்பாடம் செய்ய முடியாதவர்கள் என்று சொல்வதே தகும். ஒவ்வொரு ஆண்டும் இப்படிப்பட்ட கல்வி முறையால் மதிப்பெண் குறைவாகப் பெற்று உயிரிழக்கும் குழந்தைகள் எண்ணிக்கை குறைந்தபாடில்லை. குறைந்த மதிப்பெண் பெற்றதால் உயிரை மாயத்துக்கொண்ட அந்த இளம் தளிர்கள் செய்த பாவமென்ன .. அப்படியென்றால் மதிப்பெண் முறையே தவறா? இன்றைய கல்வித் திட்டத்தின்படி +2 தேர்வு என்பது மனப்பாடம் செய்து அவற்றை பதிவு செய்வதற்குரிய போட்டியாகத்தான் இருக்கிறது. கல்வித் துறையில் உள்ளவர்கள் இது குறித்த ஆக்கப்பூர்வமான ஆய்வை உடனடியாக மேற்கொள்ள வேண்டிய காலகட்டம் இது. 1970 – 80 ஆண்டுகளில் 100/100 மதிப்பெண்கள் பெறுவது என்பது குதிரைக் கொம்பாக இருந்தது. இன்று தமிழ் மொழிப்பாடத்தில் கூட 100/99 மதிப்பெண்கள் வாங்கக்கூடிய மாணவர்கள் எண்ணிக்கை அதிகம். இன்றைய கல்வித் திட்டத்தின்படி வெற்றி பெற்று பட்டங்களைப் பெற்ற மாணவர்கள்கூட முழுமையாகச் சிந்திக்கும் திறனின்றி இருக்கின்றனர். முக்கியமான ஒரு கடிதம் எழுத வேண்டிய நேரத்தில்கூட அவர்களுக்கு ஒரு மாதிரிப் படிவம் தேவையாக இருக்கிறது. இதுதான் நம் கல்வித்திட்டம் உருவாக்கிய இன்றைய இளைய பாரதத்தின் நிலை. அதாவது மாணவர்களின் சுய சிந்தனையை ஊக்குவிக்கும் வகையில் இல்லாததே நம்முடைய கல்வித் திட்டத்தில் உள்ள குறைபாடு.

இளைஞர்களின் புதிய கண்டுபிடிப்புகள் அங்கீகரிக்கப்படுவதுடன் ஊக்குவிக்கப்படவும் வேண்டும். குறைந்த அளவு நீர் உபயோகித்து அதிகப்படியான மகசூலைப் பெறக்கூடிய முறைமையைக் கண்டுபிடித்தது மட்டுமல்லாமல் அதனை செயல்படுத்தி விளைச்சலைக்காட்டியுள்ள இளைஞரை நாம் அறிவோம். ஆனால் அவருக்கோ, அவருடைய கண்டுபிடிப்பிற்கோ பெரிய அங்கீகாரம் கிடைத்ததாகத் தெரியவில்லை. இதைப்போல பலரின் அறிவியல் கண்டுபிடிப்புகள் அங்கீகரிக்கப்படாமல் இருப்பது வேதனைக்குரிய விசயம். நம்முடைய கல்வித் திட்டத்தில் புதிய மாற்றங்களைச் செய்து, இளைஞர்களின் புதிய கண்டுபிடிப்புகளை ஊக்குவித்து, சுய சிந்தனையாளர்களை உருவாக்குவதாக அமைய வழிவகுக்க வேண்டும் என்பதே சமூகவியலாளர்களின் கருத்தாக உள்ளது.

இயல்பாகவே ஆற்றல் மிகுந்த மாணவியர்களை சுய சிந்தனையாளராக மாற்றுவதை விட்டு, ஒரு கணினியாகவோ, நகல் எடுப்பானாகவோ மாற்ற முயல்வது தவிர்க்கப்பட வேண்டும். பெண் குழந்தைகள் என்பதால் அவர்களுடைய கல்வி மற்றும் வேலை வாய்ப்பை குறுகிய எல்லைக்குள் அடைக்க முயல்வதை பெற்றோர் தவிர்க்க வேண்டும்.

அடிப்படைக் கல்வியில் வேண்டுமானால் இந்தத் திட்டம் சரியாக இருக்கலாம். ஆனால் ஆறாம் வகுப்பு முதல் கற்பிக்கும் முறையில் முற்றிலும் மாற்றம் வேண்டும். ஆசிரியர்களுக்கும் கற்பிக்கும் முறையில் மாற்றம் ஏற்படுத்த வேண்டும் . இருபது வயதிற்குட்பட்ட பெண்கள், அவர்களுடைய சம்மதமின்றியே 74 சதவிகிதம் திருமணம் செய்துவிடுகின்றனர் என்கிறது ஒரு ஆய்வறிக்கை. அரசு 18 வயதில் திருமணம் செய்யலாம் என்று கூறினாலும் அவர்களுக்கு விருப்பம் இருந்தால் மட்டும் திருமணம் செய்து வைக்கும் வழமை பரவ வேண்டும். ‘ரேகிங்’ என்ற கொடிய அரக்கனால் நேற்று கேரளா மாநிலத்தில் நான்கு பெண் விளையாட்டு வீராங்கனைகள் உயிர் மாய்த்துக்கொள்ள முயன்று ஒரு பெண் உயிரிழந்துள்ளார். மற்ற மூவரும் கவலைக்கிடமான நிலையில் மருத்துவமனையில் உள்ளனர். ரேகிங் அறவே ஒழிக்கக்கூடிய வகையில் சட்டங்கள் கடுமையாக்கப்பட்டு மாணவிகள் அச்சமின்றி கல்விச்சாலைகளுக்கு வர ஆவண செய்ய வேண்டியதும் அவசியம்.

May 8, 2015