சக்தி சக்திதாசன்

என் இனிய அன்பு உள்ளங்களே !

மார்ச் 8ம் திகதி உலக மகளிர் தினம். இத்தினத்தில் எனை இவ்வுலகில் ஈன்ற என் அன்னைக்கு, என்னை ஒரு மனிதனாய் உருமாற்றம் செய்ய அவள் செய்த அளப்பரிய தியாகங்களுக்கு, என்னை பண்புடை மனிதனாக வளர உதவிய என் சகோதரிகளுக்காக, சிதைந்து போன என் வாழ்வை தூக்கி நிறுத்தி இன்று என் அனுபவங்களை என் இனிய உறவுகளுடன் பகிர்ந்து கொள்ள வழி சமைத்த என் மனைவி, என் உயிர்த்தோழி, என் அன்பு மனைவிக்காக, இன்று என்னோடு உடன் பிறக்காவிட்டாலும் அண்ணா என்றும் தம்பி என்றும் என்னைத் தம் உடன்பிறப்புகளாக கெளரவிக்கும் என் தமிழன்னை தந்த சகோதரிகளுக்காகவும் இதோ இக்கவிதையைச் சமர்ப்பிக்கிறேன்

சக்தியெனக்கு கொடுத்தவள் என் அன்னை
சித்தியெனக்களித்தவள் என் அன்னை
புத்தியெனக்களித்தவள் என் அன்னை
முற்று முதலாய் அவளுக்கே என் வணக்கம்

தன்னில் ஒரு பாகம் கொடுத்து உலகில்
தந்தான் அந்த ஆதிமூலம் பெண்மையின் மகத்துவம்
எத்தனை வடிவங்கள் எடுத்துப் பெண்கள்
வித்தக விந்தைகள் புரிவர் இவ்வுலகில்

அன்னையாராக அன்பு மழை பொழிவர்
சகோதர சகோதரியராக பந்தம் வளர்த்திடுவர்
காதலியராக கனவுகளுக்கு உயிர் கொடுப்பர்
தொழியராக எம்முடன் துயர் பகிர்ந்திடுவர்

அன்றொருநஃஅள் எம் முப்பாட்டன் பாரதி
ஆணித்த்ரமாய் ஒலித்தான் பெண்ணின் பெருமை
அந்நிய நாட்டார் எம்மை அடிமை கொள்வது போல
அன்னை இனத்தை நாம் அடிமை கொள்ளலாகாது

தெள்ளிய உண்மை நிலைகளைத் தமிழில்
தெட்டத் தெளிவாய்ச் சொன்னவன் எம் பாரதி
உள்ளத்தில் வாங்கினோமா நாம் உண்மைகளை ?
உங்கள் இதயத்தைச் தொட்டுச் சொல்லுங்கள்

வேதனை பல தாங்கி உலகில் மாதர்கள்
சோதனை பல வென்று தன்னிரகற்ற
சாதனை கண்ட மகவுகள் தந்தனர் தோழரே !
போதனை அல்ல இது சத்தியம் என்பதே உண்மை

மகளிர் தினம் இதுவென்று உலகில் ந்2ஆம்
மார் தட்டிக் கொள்வதல்லை பெருமை
மகளிர் மாந்தருள் மாணிக்கமெனும் உண்மை
விளங்கிட எது செய்தோம் என்பதே கேள்வி ?

சமுதாயம் , கலாச்சாரம் எனும் போர்வையில்
மாதர்கள் கால்களில் பூட்டி விட்ட விலங்குகளை
சமத்துவம் எனும் சத்திய உளி கொண்டு என்று நாம்
உடைக்கின்றோமோ அன்றுதான் உன்மையான மகளிர் தினம்

எமையீன்ற அன்னையர்க்கு, எமைப் போல பல
உன்னத மகவுகளுக்காய் தம் வாழ்வை அர்ப்பணித்த
தியாகச் செம்மல்களாம் மகளீர் அனைவருக்கும்
வணக்கங்களோடு வாழ்த்துக்கள், வாழ்த்துக்கள்

அன்புடன்
சக்தி சக்திதாசன்

http://www.thamilpoonga.com
http://www.facebook.com/sakthi.sakthithasan

தமிழ்த்தேனீ

ஒவ்வொரு வருடமும் மார்ச் மாதம் 8ம் தேதி சர்வதேச பெண்கள் தினம் அல்லது அனைத்துலக பெண்கள் நாள் என்று கொண்டாடுகிறோம்.

இறைவன் படைப்பிலே உருவான அத்துணை ஜீவராசிகளிலும் பெண்பாலினமும் ஆண்பாலினமும் படைக்க்கப் பட்டிருக்கிறது ஆனால் மனிதர்களத் தவிர மற்ற ஜீவராசிகள் பெண் அடிமையென்றும் ஆண் ஆளுபவன் என்றும் பேதம் பார்ப்பதில்லை ஆண்கள் கற்பழிப்பு கொலை போன்ற செயல்களை செய்து விட்டு அதை நியாயப்படுத்துவது போலப் பேசுவதும் , பெண்கள் வீட்டை விட்டு ஒரு குறிப்பிட்ட நேரத்துக்கு மேல் வெளியே வரக் கூடாது அப்படி வருதல் முறையன்று என்றெல்லாம் பிதற்றுவதும் , அப்படிப் பிதற்றும் குற்றவாளியின் பிதற்றலை பேட்டி எடுத்து மக்களுக்கு அவற்றை ஒலி ஒளிக் காட்சிகளாக அளிக்கும் ஊடகங்களும் தவறாக தங்கள் விளம்பரத்துக்காகவும் பணம் ஈட்டுவதற்காகவும் பயன்படுத்துவதைப் பார்த்தால் நாம் இன்னமும் கற்காலத்திலேயே இருக்கிறோமா என்று சந்தேகம் வருகிறது.

. சகோதரியும் பெண்தான் , தாயும் பெண்தான், மனைவியும் பெண்தான், மகளும் பெண்தான். ஆகவே ஒவ்வொரு உறவு முறையிலும் பெண்களை அந்தந்த உறவுக்கேற்ப நடத்த பழக்கிய பின்னரும் மாக்கள் என்னும் நிலையிலிருந்த நாம் படித்து அறிவு பெற்று, விஞ்ஞானத்தில் முன்னேறி நம்மைப் பண்படுத்திக் கொண்டு மக்களாக மாறி இக்காலத்திலும் இன்னமும் ஆண்களில் சிலர் மாக்கள் என்னும் மிருகத்தின் மன நிலையிலிருந்து மாறாமல் தராதரம் பாராமல் எல்லாப் பெண்களையுமே பெண்களை போகப் பொருளாக பார்க்கும் மனோ நிலையிலிருந்து ஆண்கள் மாற வேண்டும்..

பெண்களைப் பற்றி பலவிதமான கருத்துகள் ஆண்கள் மனதிலே இருந்தாலும் தொடக்க காலம் முதலே பெண்கள் அனைவருமே ஆண்களுக்கு சமமானவர்கள் அல்லர் என்னும் எண்ணம் கொண்டவர்கள் ஆண்கள். அதனாலேயே இலக்கியங்களிலும் , காவியங்களிலும் மற்று சரித்திரங்களிலும் ,புதினங்களிலும் இன்றைய திரைப்படங்கள் நெடுந் தொடர்கள், கதைகள் எல்லாமே இதே கருத்தை ஒட்டித்தான் தயாரிக்கப் படுகிறது.

ஆனால் பெண் என்பவள் மஹா சக்தி என்று ஒப்புக் கொள்ளப்படும் புராணங்களில் கூட ஒரு குறிப்பிட்ட எல்லைக்கு மேல் ஆண்தான் உயர்ந்தவன் , பெண் அவனுக்கு சேவகம் செய்யவே இருக்கிறாள் என்றே போதிக்கப் படுகிறது.
இந்த நவீன விஞ்ஞான யுகத்திலும் இன்னமும் ஆண்களும் பெண்களை சரியாக உணரவில்லை , பெண்களும் தங்கள் சக்தியை முறையாக முழுமையாக உணரவில்லை என்றே தோன்றுகிறது.

பழைய காலத்திலிருந்து ஒரு சொல்வழக்கு இன்னமும் தொடர்கிறது, அது “ பெண் புத்தி பின் புத்தி “ என்பது
அந்தச் சொல்வழக்கை நாம் தவறாக பொருள் புரிந்துகொண்டிருக்கிறோமோ என்பது என் சந்தேகம். ஒரு பெண் குழந்தை பிறக்கிறது, பெண் குழந்தைகள் கர்ப்பகாலத்தில் அதிக காலம் கர்ப்பக் க்ருகத்தில் இருக்கும் ஆனால் ஆண்குழந்தை குறிப்பிட்டபடி 10 மாதத்திலேயே பிறந்துவிடும், பெண் குழந்தைகள் தாமதமாக பிறக்கும், ஆண் குழந்தைகள் சீக்கிரம் அதாவது பத்து மாதங்களுக்கு முன்னரே பிறக்கும் ,இது அனுபவ பூர்வ உண்மை.

ஆண் முந்திக்கொள்கிறான், ஏனென்றால் எல்லாவற்றுக்கும் அவசரம் , நிதானமின்மை. இல்லறத்தில் அவசரப்பட்டு உணர்ச்சி கொள்பவன் ஆண் ,அதே போல அவசரமாக உணர்ச்சிகள் தணிந்து போவதும் ஆணுக்குதான்
ஆனால் பெண் அப்படியல்ல யோசிப்பவள், நிதானமாக தீர்க்கமாக யோசித்து செயலாற்றுபவள், பெண்கள் மிக நிதானமாக உணர்ச்சி கொள்வார்கள், அதேபோல் அதிலேயே தங்கி நிதானமாக உணர்ச்சியை தணிப்பார்கள். எல்லாச் செயலிலும் பெண்களுக்கும் ஒரு நிதானம் இருக்கும். ஒரு குடும்பத்தில் உருக்கும் ஆண்கள் மூத்தவர்களாக இருந்தாலும் அந்தக் குடும்பத்தில் இருக்கும் பெண் ஆலோசனைகளை சரியாகச் சொல்லும் திறம் கொண்டவளாக இருப்பாள். பெண்களை மதிக்காத ஆண்கள் விவேகமில்லாதவர்கள்.

நான் அடிக்கடி சொல்வேன் பெண் ஒரு சிறந்த நிர்வாகியாய் இருக்கிறாள் என்று தெரிந்தால் கணவன் நிர்வாகத்தை அவளிடம் கொடுக்கலாம். இவனை விட அவள் நிர்வாகத்தை நன்று திட்டமிட்டு நடத்துவாள் என்று
ஆனால் வேதப்படிப் பார்த்தால்முதலில் தோன்றியவள் சக்தி,ஆதிசக்தி, அந்த ஆதிசக்தி தோன்றிய பின்னர்தான் அந்த ஆதி சக்தி தன்னிலிருந்து விஷ்ணுவை உருவாக்கினாள், விஷ்ணுவின் நாபிக் கமலத்திலிருந்து ப்ரும்மாவை தோற்றுவித்தாள், அதன் பின்னர் சிவனைத் தோற்றுவித்தாள் ஆகவே பெண் புத்தி பின்னால் விளையப் போகும் அனைத்தையும் அறிந்த பின் புத்தி என்று பொருள் கொள்வோமே.

இயற்கையிலேயே கவனித்துப் பார்ப்பவர்களுக்கு புரியும்பெண் குழந்தைகள் வெகு சீக்கிரமே கவிழ்ந்து கொள்ளும், தவழத் தொடங்கும்,உட்காரத் தொடங்கும், நிற்கத் தொடங்கும், நடக்கத் தொடங்கும், ஆனால் ஆண் குழந்தைகள் பெண் குழந்தைகளைவிட காலதாமதமாகவே அனைத்து இயக்கங்களையும் செய்யும். ஏன் இப்படி என்று ஊன்றிக் கவனித்தால் இறைவனின் படைப்பின் ரகசியம் ,ஆச்சரியமான விஞ்ஞான ரகசியம் புரியும். இயல்பாகவே குழந்தைப் பருவத்தில் பெண்களுக்கு உடல் உறுப்புகள் உடலின் எந்த பாகத்திலும் வெளியே துறுத்திக்கொண்டிராது,

ஆனால் ஆண் குழந்தைகளுக்கு முக்கியமான உறுப்புகள் உடலைவிட்டு வெளியே துறுத்திக்கொண்டிருக்கும்
ஆதலால் முதலில் இயக்கங்களை தொடங்கும் பெண் குழந்தைகளுக்கு எந்த பாதிப்பும் வராது, ஆனால் ஆண் குழந்தைகள் வேகமாக இயங்கத் தொடங்கினால், பழக்கமின்மை காரணமாக கீழே விழுந்தால் துறுத்திக்கொண்டிருக்கும் ஆண் உறுப்பில் தாக்குதலை வாங்க வேண்டி வரும், அதனால் இயக்கங்கள் உடல் உறுதி பெற்று பெற்றுத்தான் மெதுவாக இயங்கும் ஆண் குழந்தைகளுக்கு, ஆனால் தாமதமாக வந்தாலும் பெண் குழந்தைகள் தளர்ச்சியின்றி வரும்
அதைத்தான் லேட்டா வந்தாலும் லேட்டஸ்டா வருவாரு என்பர்.

எந்த ஒரு மோசமான சூழ்நிலையிலும் பெண்கள் நிதானப் படுத்திக்கொண்டு யோசிப்பதைப் போல ஆண்களால் முடிவதில்லை.

உதாரணமாக ப்ரசவ காலத்தில், பத்து மாதம் சுமக்கும் காலத்திலும்,ப்ரசவம் நிகழும் நேரத்திலும், பதறாமல் இருக்க பெண்களால் முடியும் ஆனால் அந்தப் பெண்கள் மேல் பாசம் வைத்திருக்கும் ஆண்கள் பதறிக்கொண்டிருப்பார்கள், ஆனால் வெற்றிகரமாக ப்ரசவத்தையும் முடித்துக்கொண்டு கணவனுக்கும் ,தகப்பனுக்கும் தைரியம் சொல்பவள் பெண்

இன்னும் நுணுக்கமாக ஆராய்ந்தால் பிறப்பு என்றால் இறப்பும் இயற்கையே ஒரு பெண்ணை தவிக்க விட்டுவிட்டு ஒரு ஆண் அதாவது கணவன் இறந்து போகும் நிலை எற்பட்டால் துக்கத்தையும் ,சோகத்தையும் தாங்கிக்கொண்டு ஒரு பெண்ணால் அவளுடைய அடுத்த கடமைகளை கவனிக்க மனவலு இருக்கிறது,அந்தப் பெண் தாயுமாகி தந்தையுமாகி அனைவரையும் அரவணைத்துக்கொண்டு மீண்டு விடுவாள், தன் குழந்தைகளையும் நல்ல நிலைக்கு உயர்த்திவிடுவாள், ஆனால் அப்படி கணவனை விட்டு மனைவி இறக்கும் நிலை வந்தால் ஒரு ஆணால் பதறாமல்,எண்ணம் சிதறாமல் இருக்க முடிவதில்லை, அவனுடைய கடமைகளை சரியாக நடத்த முடிவதில்லை என்பது கண்கூடு,ஒன்று அவன் குழந்தைகளை,கடமைகளை சரிவர ஆற்ற முடியாமல் திகைத்துப் போவான், மனமொடிந்துபோவான், பதறுவான் அல்லது மனம் சிதறுவான். தன் சுகத்துக்காக தன் கடமைகளை மறந்து மற்றோர் பெண்ணை நாடி, தான் பெற்ற குழந்தைகளையும் தன் பெற்றோர்களையுமே மறந்துவிடும் ஆண்கள் தான் அதிகம், தாயுமானவன் என்னும் உயர்ந்த நிலையை அடையும் ஆண்கள் கோடியில் ஒருவரே.

நிதானமாக ஆராயாமல் அவசரகதியில் முடிவுகளை எடுப்பவன் ஆண். நிதானமாக யோசித்து தீர்க்கமான முடிவுகளை எடுப்பவள் பெண் அதனால் பெண் புத்தி பின் புத்தி என்பதை, பின்னால் வரபோக்கும் எந்த ஒரு நிகழ்விலும் பதறாமல். முன்கூட்டியே யோசித்து முடிவெடுக்கும் தீர்க்க தரிசிகளுக்கு பின் புத்தி என்று பெயரென்றால் அதை அப்படியே ஒப்புக்கொள்கிறேன் ஆமாம்

“ பெண் புத்தி பின் புத்திதான் “

அனைத்து உயிருக்கும் அவனே ஆதி
அவனை விடவா உயர்ந்தது ஜாதி?

மனிதமும்,உலகமும் காப்போம்,
மௌனம் உணர்த்தாத பொருளை
சொற்கள் உணர்த்தாது

அன்புடன்
தமிழ்த்தேனீ
http://thamizthenee.blogspot.com
rkc1947@gmail.com
http://www.peopleofindia.net

-முனைவர் கமலம் சங்கர்

தாய்மை என்னும் சொல் பெண்மையை நினைவுபடுத்துவதே. பத்து மாதம் கருவிலே சுமந்து குழந்தையைப் பெற்றெடுக்கும் பெண்ணின் பொறுப்பு இயற்கையின் அற்புதம். பெண்மையின் பூரணத்துவம் தாய்மையில் என்பது உலக வழக்கு. ஏன்? ஒவ்வொரு பெண்ணுமே ஏற்பதும் கூட.

கவியரசர் கண்ணதாசன்,

எந்த மனதில் பாசம் உண்டோ

அந்த மனமே அம்மா அம்மா  (படம் : எங்க மாமா)

என்று உறுதியாகக் கூறியிருக்கிறார்.

அன்பு இல்லாத ஆண்மனம் உண்டா?

பாசம் பொழியாத ஆண்மனத்தைக் காட்ட முடியுமா?

அன்பும் பாசமும் காட்டி உருக வைக்கும் அண்ணன் பாத்திரம் திரைப்படங்களில் காட்டப்படும் போது பாசத்துக்கு ஓர் உருவம் கிடைக்கிறது.

மங்கலச் செல்வி அங்கயற்கண்ணி

திருமகளே செல்க!

வாழ்ந்த வீடும் கொண்டவன் வீடும்

மணம் பெறவே செல்க!  (படம் : பச்சை விளக்கு)

பிறந்த வீடும் புகுந்த வீடும் அவளால் சிறக்க  வேண்டும் என நெகிழ்ந்து வாழ்த்தும் அண்ணனின் மனம் அன்னையின் மனம்தானே?

தாயின் முகமிங்கு நிழலாடுது

தந்தை மனமிங்கு உறவாடுது

கோயில் விளக்கொன்று கூடப் பிறப்பென்று

பாடும் குரல் கேட்குது  (படம் : தங்கைக்காக)

என்று தங்கை ஒருத்தி தன் அண்ணனைத் தாயாகவும் தந்தையாகவும் உணர்ந்து வணங்குகிறாள்.

அன்பு காதலாகும் போது… ஆணின் மனம் உருகித் தவிக்கும்போது… தாய்மையும் அவனது உயிர்த் துடிப்பாகிறது. காதலனே – கணவனே – தாயாகி உருகும் பாடல்கள், உருக வைக்கும் திரைப் பாடல்கள் எத்தனை!

பெண் காதலில் முதன்முதலாக உணர்வதே பாதுகாப்புத் தரும் அணைப்பு. தாயின் அணைப்புக்குப் பின், தந்தை தரும் பாதுகாப்புக்குப் பின் வளர்ந்த பெண் அதே பிம்பத்தை உணரும் ஓர் ஆணிடம் தன் மனத்தைப் பறிகொடுக்கிறாள். மனம் அவள் மனத்தில் பொங்கும் தாய்மை தரும் இதத்தை சுவைக்கச் சுவைக்க… தன்னை இழப்பதும் ஒரு பொருட்டாகத் தெரிவதில்லை அவளுக்கு.

தாயார் அணைந்திருந்த மயக்கமுண்டு – நான்

தந்தை மடியிருந்த பழக்கமுண்டு

நீ யாரோ நான் யாரோ தெரியாது – இன்று

நேர்ந்தது என்ன வென்று புரியாது.  (படம் : பரிசு)

என்றும்,

தங்கமகள் கூந்தல் என்று

தாய் முடித்துப் பூவும் வைப்பாள்

மங்கை மணம் முடிந்துவிட்டால்

மணவாளன் பூ முடிப்பான்  (படம் : கைராசி)

என்றும் பெண்ணொருத்தி தாயின் அன்பைக் காதலனிடம் காணும் இயல்பைக் காட்டுகிறார் கவியரசர்.

உயிரை வளர்ப்பானாம் காதலன்

தாம் விரும்பி மணமுடிப்பார்

தம் உயிரில் நமை வளர்ப்பார்  (படம் : கைராசி)

உண்மை! உயிரோடு சேரும் உறவுதானே காதல்? முதலில் சேர்க்கிறது. அதன்பின் ஆணின் உயிர் வளர்க்கும் உயிராகிறாள் பெண்.

குழிவிழுந்த கன்னத்தை என்

இதழில் மூடவா – உன்னைக்

குழந்தையாக்கி மடியில் வைத்துப்

பாட்டுப் பாடவா?  (படம் : பனித்திரை)

என்று கேட்கும் காதலன் கனிவின் உருவமாகிறான்.

பெண்ணுக்கு வேண்டியது அதுதான். அவள் பிள்ளை பெற்றுத் தாயானாலும் அவள் மனத்தில் புதைந்து கிடக்கும் ‘குழந்தை மனசு’ அதைக் கொஞ்ச வேண்டும் என்று எதிர்பார்க்கும் அப்போது மகிழும்!

சின்னச் சின்னப் பறவை

அன்னை அவள் மடியில்

தவழ்வதுபோல் நான் தவழ்ந்திருப்பேன்  (படம் : போலீஸ்காரன் மகள்)

இப்போது புரிகிறதா பெண்ணின் மனசு? அதன் எதிரொலியாக…

கண்ணை மெல்ல மறைத்து

உன்னைக் கையில் எடுத்து

காலமெல்லாம் நான் அணைத்திருப்பேன்  (படம் : போலீஸ்காரன் மகள்)

இப்படி நம்பிக்கையளிக்கிறான் ஆண். பெண்ணின் எதிர்பார்ப்பு, அவனிடம் தான் பெறத் தவிக்கும் தாய்மை வெளிப்பாடு! அவ்ன் அந்தத் தாய்மையுணர்வை நம்பிக்கையாக்கி, உறவுக்கு உரம் சேர்க்கிறான். பெண்ணின் உயிரோ கொடியாகப் பின்னிக் கொள்கிறது.

ஆலங்குடி சோமுவும் இத்தகைய நுண்மையான மனவோட்டத்தைத் தீட்டுகிறார்.

ஊஞ்சலைப் போலே பூங்கரம் நீட்டி

அருகில் நெருங்கிடவோ

உன்னை உரிமையினாலே குழந்தையைப் போலே

அள்ளி அணைத்திடவா?

அன்னையைன் போலே உன்னுடல் தன்னை

வருடிக் கொடுத்திடவா – நீ

அமைதியுடன் துயில் கொள்ளும்

அழகை ரசித்திடவா?  (படம் : கார்த்திகை தீபம்)

குழந்தையின் கண்களைத் தன் கையால் மூடி மூடி எடுப்பதும் – அள்ளி அணைப்பதும் – வருடிக் கொடுப்பதும் – உறங்க வைப்பதும் – உறங்கும் அமைதியான அழகை ரசிப்பதும், முத்தமிடுவதும்… அட எல்லாமே தாய்மை வெளிச்சத்தில் தகதகவென மின்னுகிற செயல்கள்!

தலையைத் தடவி – உச்சி முகர்ந்து – கன்னம் வருடி.. பூச்சூட்டி… என்றெல்லாம் ஆண் செய்யும் செயல்கள் பெண்ணை எப்படிக் குழந்தையாக்கிக் குதூகலிக்கச் செய்கின்றன என்பது அவளுக்கு மட்டும்தான் புரியும், அவள் இணங்குவதிலிருந்து அவனுக்குத் தெரியும்.

ஆணின் மனத்தில் பொங்குத் தாய்மைப் பிரவாகமே பெண் உணரும் காதல்! காமம்!! தாம்பத்திய சுகம்!!! எல்லாம்! எல்லாம்!! எல்லாமே!!!

கவியரசரின் கடைசிப் பாடலான ‘கண்ணே கலைமானே’ பாடல், ஆண் உள்ளத்தில் உறைந்து பிடந்து விரிந்து வானளவு பரவிய தாய்மை வெளிப்பாடுதானே?

உலக வரலாற்றில் போற்றப்படும் தலைவர்கள் எல்லாருமே இத்தகைய தாய்மையை அடித்தளமாக்கி மனித குலத்துக்கு வளம் சேர்த்தவர்கள் தாமே?

தாய்மை உடல் சார்ந்த மொழி அல்ல, உள்ளம் சார்ந்தது; உயிரைச் சார்ந்தது.

எனினும்…

உடலாலும் தாய்மை ஏற்று அதன் மணம் பரப்புபவள் பெண்! ஆம்! இது இயற்கையின் அதிசயம்!

உயிராலும் உள்ளத்தாலும் மட்டுமே தாய்மை ஏற்று, அந்த வரத்தைப் பரிசாக்குகிறான் ஆண்! ஆம்! இது இயற்கையின் பேரதிசயம்!

இந்த இணைப்பே இயற்கை இந்த உலகம் என்றும் வாழ வழங்கியிருக்கும் கொடை! அற்புதம்! ஆச்சர்யம்! எல்லாமே!

ஒற்றை வரியில் சொன்னால்…

ஆண்மையின் தாய்மையே பெண்மையின் தாய்மைக்கு வேர்! எல்லா உறவுகளிலும்!! எல்லா நிலைகளிலும்!!!

-முனைவர் கமலம் சங்கர், சென்னை.

06.03.2015

எம்.ரிஷான் ஷெரீப்

இலங்கையின் தேசிய சொத்தாகக் கருதப்படும் சீகிரியா சுவரின் மீது அறியாமையின் காரணமாக, தனது கூந்தல் பின்னால் தமிழ்ப் பெயரைக் கிறுக்கிய இளம் ஏழைத் தமிழ்ப் பெண்ணுக்கு இரண்டு வருட கடூழியச் சிறைத் தண்டனை வழங்கப்பட்டுள்ளது. இலங்கை, மட்டக்களப்பைச் சேர்ந்த உதேனி சின்னத்தம்பி எனப் பெயர் கொண்ட 23 வயது இளம்பெண்ணுக்கே இந் நிலைமை ஏற்பட்டுள்ளது. இந்தத் தண்டனையானது கடந்த 02.03.2015 அன்று தம்புள்ளை நீதவான் திரு.சஞ்சீவ ரம்யகுமாரால் வழங்கப்பட்டுள்ளது.

வறுமையின் காரணமாக தொழிற்சாலை ஊழியராகப் பணியாற்றி வரும் இவர், தனது தொழிற்சாலை ஏற்பாடு செய்திருந்த சுற்றுலாப் பயணத்தில் கலந்துகொண்டு, சீகிரியா பிரதேசத்துக்கு வந்திருந்தபோதே இச் சம்பவம் நடைபெற்றுள்ளது. அங்கிருந்த சுவரில் ‘நன்றி உதயா’ எனக் கிறுக்கியதோடு, நேர்மையாக தான் செய்த தவறினை ஒப்புக்கொண்டதால் இவர் உடனே கைது செய்யப்பட்டு சிறையிலடைக்கப்பட்டுள்ளார்.

உலக வரலாற்றுச் சின்னங்களிலொன்றான சீகிரிய குகையோவியங்கள் இலங்கை தொல்பொருளியலாளர்களால் பாதுகாக்கப்படுபவை. அவற்றினை திட்டமிட்டோ, வேண்டுமென்றோ சேதப்படுத்துவது தண்டனைக்குரிய குற்றம்தான். ஆனால் பாரிய குற்றங்களைச் செய்தவர்களுக்கு, அவர்களுக்கு இவ்வாறான தண்டனைகள் வழங்கப்படுவது அவர்களைத் திருத்துவதற்காகவும், அவர்களை மீள்புனரமைப்பதற்காகவும் எனில் ஒரு ஏழைத் தமிழ்ப் பெண்ணுக்கு இரண்டு வருட கடூழியச் சிறைத்தண்டனை எதற்காக? தான் செய்த தவறினை ஒப்புக் கொண்டு விட்டார். இனி ஒரு போதும் அவ்வாறு செய்யவும் மாட்டார். இந் நிலையில் இவ்வாறான தண்டனை அதிகபட்சமானது இல்லையா?

எனில் வாக்குவேட்டைகளுக்காக மட்டும் நம் வீடுகளுக்கு வரும் தமிழ் அரசியல்வாதிகளோ, ஊடகவியலாளர்களோ, எழுத்தாளர்களோ, கவிஞர்களோ, அநாதரவான பெண்களுக்காகக் குரல் கொடுப்பவர்களோ, பெண்ணியவாதிகளோ, வலைப்பதிவர்களோ, தமிழ் இணையத்தளங்களோ யாரும் ஏன் இந்த அபலைப் பெண்ணுக்காகக் குரல் எழுப்பவில்லை? இப்படி ஒரு சம்பவம் நிகழ்ந்திருக்கிறதென நீதி கேட்டு ஏன் ஒரு ஆழமான பதிவு கூட இல்லை? தொலைக்காட்சி நிகழ்ச்சிகளில் ‘தமிழனுக்கு ஒரு இன்னலென்றால் உயிரைக் கொடுப்பேன்’ என வீறு கொண்டு பேசும் தமிழ் அரசியல்வாதிகள், இந்த ஏழைத் தமிழச்சியை தண்டனையிலிருந்து மீட்க மறந்துபோனதேன்?

இலங்கையில் குற்றங்களுக்கான தண்டனைச் சட்டங்கள் ஏழைகள் மற்றும் இயலாதோர் மீது மாத்திரமே பிரயோகிக்கப்படுகின்றன. அச் சட்டங்கள் தவறுகளையும் குற்றங்களையும் தனித்தனியாகப் பிரித்துப் பார்ப்பதில்லை. வசதி படைத்தவர்கள் திட்டமிட்டுச் செய்யும் குற்றங்கள் கூட பண பலம் மற்றும் அதிகாரத்தின் மூலம் ‘தவறு’களாகக் கருதப்பட்டு தண்டனைகளிலிருந்து தப்பி விடுகின்றன. ஆனால் ஏழைகள் செய்யும் சிறு தவறுகள் கூட பாரிய குற்றங்களாகக் கருதப்பட்டு கடும் தண்டனைகள் வழங்கப்படுகின்றன.

இந்த ஏழைப்பெண் அறியாமையால் செய்த தவறுக்கு இவ்வளவு பாரிய தண்டனையெனில், கடத்தல்காரர்கள், கொள்ளைக்காரர்கள், போதைப்பொருள் கடத்துபவர்கள், போதைப்பொருள் விற்பனையாளர்கள், கொலைகாரர்கள், பாலியல்குற்றவாளிகள், ஊழல் அரசியல்வாதிகள் எல்லோரும் சட்டத்தின் தண்டனையிலிருந்து ஓரிரு நாட்களில் வெளிவருவது எவ்வாறு?

சீகிரிய குகையோவியங்கள் மிகவும் பாதுகாக்கப்பட வேண்டியவை. அதற்குரிய தக்க நடவடிக்கை எடுக்கப்பட வேண்டும். இவற்றைக் காக்கும் பொறுப்பு ஒப்படைக்கப்பட்டுள்ள தொல்பொருள் ஆய்வுத் திணைக்கள ஊழியர்கள், இந்தப் பெண் பத்து எழுத்துக்களைக் கிறுக்கும்வரையில் எங்கே போயிருந்தனர்? அவர்கள் தம் கடமையை ஒழுங்காகச் செய்திருந்தால் இந்தப் பெண் இவ்வாறு கிறுக்கியிருக்கச் சந்தர்ப்பம் வாய்த்திருக்காதே? ஏன் அவர்களுக்குரிய ஒழுக்காற்று நடவடிக்கை ஏதுமில்லை?

இந்த அபலைப் பெண்ணுக்குரிய இந்தத் தண்டனை அநீதமானது. இரண்டு வருடங்கள் சிறையில் சித்திரவதைகளோடு கழித்துவிட்டு வரப் போகும் உதேனி சின்னத்தம்பி எனும் இளம்பெண்ணின் எதிர்காலம் முழுவதும் இனிமேல் இருளன்றி வேறென்ன?

இனியும் தாமதமில்லை. தமிழ் அரசியல்வாதிகள், ஊடகவியலாளர்கள், எழுத்தாளர்கள், கவிஞர்கள், பெண்ணியவாதிகள் நீங்கள் நினைத்தால் இவரின் மீது சுமத்தப்பட்டுள்ள தண்டனையை மீள்பரிசீலனை செய்ய உத்தரவிட்டு இவரைக் காப்பாற்றலாம். இவரை இப்போதே காப்பாற்றப் போகின்றவர் யார்?

– எம்.ரிஷான் ஷெரீப்
mrishanshareef@gmail.com