Blog

அப்துல் வதூத்

இன்றுதான்
அது நடந்தது

கரையெல்லாம்
கடல்!
கடலெல்லாம்
உடல்!

எப்போதும்
ஆர்பரிக்கும் அலைகடல்!
இன்று
உயிர்பறித்த கொலைக்கடல்!
காலில் விழுந்த அலைகள்
காலைச்சுற்றிய பாம்பானதே
காலையில்!

பிணங்களின் மீது அலைகள்
போர்த்தியது வெள்ளைத்துணி!

தலைவர்கள் சமாதி!
மீண்டும்
தண்ணீரில் சமாதி!
ஓ! இறப்பிலும் புதுப்பிப்பு
இவர்களுக்குத்தானா?
“செத்தாலும் மேன்மக்கள் மேன்மக்களே!”

ஏற்றத்தாழ்வு இருக்குமா
இறப்பில்?
மரணம் வந்தால் எல்லோருக்கும்
6 அடி தானே
இவர்களுக்கு மட்டுமேன்
50 அடியில் வந்தது..!?
இயற்கைக்கும் உண்டோ
முரண்பாட்டில் உடன்பாடு!

கடலே!
ஏனிந்த பெருங்கோபம்?
உன்னிடம்
முத்துக்குளித்தற்காகவா
எங்களை
செத்துக்குவித்தாய்
ஆழியே!
உன்னிடம்
சங்கு எடுத்ததற்க்க்காகவா
எங்கள் சங்கருத்தாய்?
உன் மீன்களை தரையில்
குவித்ததற்காகவா
எங்கள் பிணங்களை கரையில்
குவித்தாய்?
பாற்கடலே! நீ
அளிக்க தோன்றியவையன்றி
அழிக்க தோன்றவில்லை!

இனிய இயற்கையே!
மனிதனால் உனக்கு
நிறைய இழப்பு!
உன்னால் மனிதனுக்கு
நிறைய இறப்பு!
அதற்காக வேண்டாம்
இப்படி
சுனாமி ‘ செட்டில்மெண்ட்!’

இதுகேள் மனிதா!
உயிரினங்களிலேயே
நீ ‘பெரும்புள்ளி’ தான்
ஆனால்
இயற்கைக்கு முன்
நீ ‘வெரும்புள்ளியே’

“என் வளங்களை அழிக்காதே!”
இது சுனாமி வழியே
இயற்கை உனக்கு
சாவால் விட்ட சவால்!

(இந்த கொடூரம் நிகழ்ந்த போது திருவல்லிக்கேணி நல்லதம்பி தெருவில் தான் இருந்தேன்.ஆழிப்பேரலையின் நாக்கு இன்னும் 200 மீட்டர் நீண்டிருந்தால் கூட என்னையும் அள்ளிக்கொண்டோடிருக்கும்.பத்தாண்டுகள் கடந்தும் பதைபதைக்க வைத்த அனுபவங்களைத்தான் இங்கே பதிவுசெய்திருக்கிறேன்.)

நாகினி

போற்றுவோம் தேவனைப் போற்றுவோம்
போற்றுவோம் தேவனைப் போற்றுவோம்

மரியன்னை வயிற்றில் உதித்து
மாட்டுத் தொழுவத்தில் பிறந்த
கருணை நிறைந்த தேவனை
போற்றுவோம் தேவனைப் போற்றுவோம்..

பாவங்களை ரட்சிக்கும் மேய்ப்பரவர்
மாசு மன இருள் அகற்றும் தூயவரவர்
பாதம் சரணடைந்து அருள் ஒளி பெறவே
போற்றுவோம் தேவனைப் போற்றுவோம்..

அன்பெனும் விளக்காகி
பண்பின் வழிநடக்க பாதையாகி
கிருபைகள் நாளும் வழங்கி
புவி கிரகத்தில் வழிநடத்தும் தேவனை
போற்றுவோம் தேவனைப் போற்றுவோம்..

முள் முடி தரித்து
சிலுவை சுமக்க வைத்த
இருள் மனபாவிகளின் பாவங்களை
அருள் தோளில் சுமந்து
சிலுவையில் மரித்த தேவனை
போற்றுவோம் தேவனைப் போற்றுவோம்..

வன்ம இரும்பாணிகள் உயிரைக் குடித்தாலும்
திண்ம நம்பிக்கை ஒளிவடிவாய்
வன்மங்களைத் துண்டாட
தரணியில் உயிர்த்தெழுந்த தேவனை
போற்றுவோம் தேவனைப் போற்றுவோம்…!!

… நாகினி

 

-கலைமகள் ஹிதாயா ரிஸ்வி 

மழலையைத் தாங்கிச் செல்லும்
மாதினில் உண்மையான
அன்பினைக் கண்டேன் மண்ணில்
அழகெனிற் தாய்மைப் பேறே…..!

“குளு குளு” மழலை தன்னைக்
கொஞ்சிடும் அழகு –  மற்றும்
அழுகையைப் பாட்டினிலே
அணைப்பதும் அழகு காண்பீர்…..!

உலகினில் கருணை வெள்ளம்
உருகிடும் தாய்மை யுள்ளம்
மலரவள் குழந்தை பெற்றாள்
மலர்ந்திடல் மொட்டுத்தானே…..!

தாய்மையே பெண்மை வாழ்வில்
தனிநிகர் கனிவு ஆகும்
காய்களா அழகு இல்லை
கனிகளா அழகு சொல்வீர்…..!

விளை நிலம் அழகா சொல்வீர்
வெறு நிலம் அழகா சொல்வீர்
அழகில் தாய்மை மேலே
அடுத்தவை யாவும் கீழே…..!

-கவிஞர் காவிரிமைந்தன்

எந்த இடத்தில் இந்த மூச்சு நிற்கப்போகிறதோ
எந்த நொடியில் இந்த ஓட்டம் களைத்துவிழுகிறதோ
அந்த இடமும் அந்த நொடியும் ஆண்டவன் கையிலம்மா
ரகசிய முடிச்சு அவிழ்ப்பதற்கில்லை…நாம் வெறும் பொம்மையம்மா!

எவரின் கணக்கு எத்தனை நாட்கள் விவரம் தெரியாமல்
எத்தனை ஆசைகள் எத்தனை ஆணவம் எதற்கிங்கே அர்த்தமுண்டு?
கொடுத்தவன் கேட்கிறான்…கொட்டியே கவிழ்க்கிறான்!
கணக்கினில் பேதமில்லை! சமத்துவம் சாவதில்லை!!
நினைத்து நீ பார்க்கவே நெஞ்சத்தைக் கொடுத்திட்டான்!
வருத்தங்கள் மாறவே மறதியைச் சேர்த்திட்டான்!
அடுத்த நொடியிலே நடப்பதுகூட அத்தனை ரகசியமாய்
படைத்தவன் வகுத்ததால் சுழலும்சக்கரம் தடுப்பவர் யாருமில்லை!!

-கலைமகள் ஹிதாயா ரிஸ்வி 

சாதி மத பேத மின்றி
சரி சமமாய் மனிதர் நாம்
மேதினியில் ஒரு குடியாய்                                
மிடுக்காய் நிமிர்ந்து வாழ்வோம்….!

சிறிய குருவிக் கூட்டமெல்லாம்
சேர்ந்து இனிதே வாழ்கையில்
அறிவிற் சிறந்த மனிதர் நாமும்
அழிவுப் பாதை செல்வதா….?

உலகில் வாழும் மனிதர்க்கெல்லாம்
ஓடும் குருதி ஒரே நிறம்
கழகம் பண்ணிக் கடிந்து வாழ்தல்
காட்டு விலங்கின் இழி குணம்…..!

பிறப்பில் மனிதர் எவருமிங்கு
பெரிது சிறிது இல்லையே
சிறக்கும் வாழ்வில் செயலில் நேசச்
சிந்தையாலே உயருவார்….!

பலிகள் செய்து பாவியாகப்
பாரில் வாழ்வோர் சிறியவர்
தெளிந்த அறிவு அன்பினோடு
சேர்ந்து இனிது வாழுவோம்……!

 

-எம். ஜெயராம சர்மா – மெல்பேண்

நெஞ்சுவலி என்று சொல்லி
நீர் கேட்டு அருந்தியவர்
அரை நிமிடம் பேசிவிட்டு
அப்படியே தூங்கி விட்டார்!

தூங்கியவர் எழும்ப வில்லை
துக்கத்தைக் கொடுத்து விட்டு
ஏங்கி நின்று அழுதிடவே
எமனுலகை சென் றடைந்தார்!

தாயோடு பிள்ளைகளும்
தலைதலையாய் அடித்திட்டு
சஞ்சலமாம் கடலினுள்ளே
தாம் மூழ்கிக் கிடந்தனரே!

மூத்தபிள்ளை மணியாக
குடும்பத்தில் இருந்தமையால்
முழுப்பேரும் மணியினையே
முதலாகக் கொண்டுநின்றார்!

தந்தையில்லாக் குடும்பமதில்
தங்கைமார் ஐவருடன்
தாயுமே சேர்ந்து அவன்
தயவினையே பார்த்திருந்தார்!

மணிகுடும்ப நிலைகண்டு
மாதவனும் மனமிரங்கி
மருந்துக் கடைதன்னில்
மணிக்கு வேலைகொடுத்தனனே!

மணிவீட்டில் யாவருமே
வயிராற உண்பதற்கு
மருந்துக் கடைவேலை
மாமருந்தாய் ஆகியதே!

மணியனது வேலைகண்டு
மலைத்து நின்ற மாதவனும்
மானேஜர் பதவியிலே
மணியையுமே அமர்த்தினரே!

மணியறிவு மணியழகு
மாதவனைக் கவர்ந்தமையால்
மாப்பிள்ளை ஆக்கிவிட்டான்
மணிதன்னை மாதவனும்!

மணியினது மனத்தினிலே
பணத்தாசை பிடித்ததனால்
மனம்போன போக்கினிலே
பணம்பண்ணத் தொடங்கிவிட்டான்!

மருந்துக்கடை இப்போது
மணிவசத்தில் வந்தமையால்
கலப்படத்தைக் கையாண்டு
காசுழைக்கத் தொடங்கிவிட்டான்!

காசுவந்த காரணத்தால்
கடவுளையே மறந்தான்
கஷ்டப்பட்டு வந்ததையும்
கவனத்தில் கொள்ளவில்லை!

கலப்பட மருந்தினாலே
கணக்கின்றி நுடங்கிவிட்டு
கவலைப்பட்டு நிற்போரை
கருத்திலும் கொள்ளவில்லை!

நாட்பட்ட மருந்தையெல்லாம்
நல்லமருந்த தோடிணைத்து
மேல்பட்ட விலைக்குவிற்று
விரைவாகப் பணம்சேர்த்தான்!

பப்பாளிவிதை தன்னை
பக்குவமாய் பதப்படுத்தி
மிளகோடு சேர்த்துஅவன்
வெகுலாபம் ஈட்டிநின்றான்!

நாட்பட்ட பால்மாவை
நல்லமாவுடன் கலந்து
நம்பவைத்து எல்லோர்க்கும்
நயமாக விற்றுவந்தான்!

பணம்பணமாய் அவன்குவித்தான்
பண்பையவன் இழந்துநின்றான்
பத்துமாதம் சுமந்ததாய்
பதைபதைத்து நின்றிருந்தாள்!

பெண்கொடுத்த மாதவனும்
பித்துப்பிடித்து நின்றான்
கைபிடித்த மனையாளும்
கதிகலங்கி அங்குநின்றாள்!

காசுகாசாய் உழைத்தவனின்
கண்களிலே வியாதிவந்து
ஏறாதபடி இடமெல்லாம்
இறைத்தானே காசையெல்லாம்

சத்திரசிகிச்சை செய்தால்
சரியாக வருமென்றெண்ணி
முத்திரைபதித்த டாக்டர்
மூலமாய் செய்துநின்றான்!

சிகிச்சையின் போதுஅங்கு
கொடுத்திட்ட மருந்துயாவும்
சிக்கலை உண்டுபண்ணி
சிதைத்ததே வாழ்வுதன்னை

காசுழைத்தை மணிகண்கள்
காட்சிகாண மறுத்ததனால்
காசுகளை மணிகண்கள்
காணவே முடியவில்லை!

முத்திரை பதித்தடாக்டர்
மூச்சுவிடும் இடத்திலெல்லாம்
மணியினது கலப்படமே
மலிந்துமே இருந்ததுவே!

கலப்படத்தை கைக்கொண்ட
மணியினது மருந்திப்போ
கலப்பட மன்னனது
கண்களையே கலக்கியது!

மணியினது குடும்பத்தார்
மனம்நொந்து டாக்டரிடம்
மணிபார்வை வருவதற்கு
வழியுண்டா எனக்கேட்டார்!

கலப்பட மருந்தெல்லாம்
கண்டபடி உலவுவதால்
சிகிச்சையின் போதுஅது
சிக்காலாய் போச்சுயிங்கே!

இப்படி மருந்துவிற்கும்
எளியவரின் கூட்டத்தை
இறக்கும்வரை தூக்கிலிட
வேண்டுமென்றார் டாக்டருமே!

வீட்டிற்கு வந்தவுடன்
விவரத்தைச் சொன்னார்கள்
மெளனமாய் அவனிருந்தான்
மனமங்கே அழுததுவே!

கலப்படத்தால் கண்ணிழந்தோர்
காதிழந்தோர் எத்தனைபேர்
கலப்படத்தால் காலனிடம்
கட்டுண்டார் எத்தனைபேர்!

நாளாந்தம் கலப்படங்கள்
நாட்டில் உலாவருவதற்கு
நல்லதொரு பாடத்தை
நானறிந்தேன் எனநினைந்தான்!

மணிபோல எத்தனைபேர்
அணிவகுத்து நிற்கின்றார்
இனிமேலும்பொறுக்காமல்
எதிர்த்திடுவோம் கலப்படத்தை!

 

-செண்பக ஜெகதீசன்

கண்ணியம் மிக்க மேய்ப்பனைக்                
     கன்னி மரியாள் சேய்தனை,
புண்படச் சிலுவை சுமந்த
     புனித வெள்ளிச் சுடரதை,
உண்மைப் பொருளதை உணர்த்திட
     உயிர்த்தே எழுந்த பிதாவினை,
விண்ணின் மைந்தன் தேவனை
     வழிபட, வந்திடும் நலமதே…!