Blog

இதுதான் வாழ்க்கை. இதுதான் பயணம்…. இவர் போல் வாழ இனி யார் வருவார்?

சுரேஜமீ

எம்.எஸ்.வி. எனும் இசை மண்ணிலிருந்து விண்ணுக்குச் சென்றிருக்கிறது!

என்ன சொல்ல? எதைச் சொல்ல? வாழ்வில் எத்தனையோ பேருக்கு ஒளி கொடுத்த விளக்கு, இப்போது விண்ணுக்குச் சென்று அங்கிருந்து இந்த அகிலத்திற்கே ஒளி காட்டும் விண்மீனாக பட்டொளி வீசப்போகிறது என்பதில் எள்ளவும் ஐயமில்லை!

சுமார் பத்து ஆண்டுகளுக்கு முன்பு ஒரு கண்ணதாசன் சம்பந்தப்பட்ட விழாவில் பேசுகிறார். அதில் அவருடைய கனவை வெளிப்படுத்துகிறார். ஒரு திரைப்படத்திற்கான கதை விவாதிக்கப்படுகிறது. கவியரசர் மற்றும் பலர் களத்தில் இருக்கிறார்கள். நடிகர், நடிகையர், கதை, திரைக்கதை, இயக்கம், பாடல்கள் எல்லாம் முடிவாகிக் கடைசியில் இசையமைப்பாளர் யார் எனும் கெள்வி எழ,

கவியரசர் தம்பி விசுவைப் போடலாம் என்கிறார். அதற்குப் பதில் உடனே வருகிறது…..அவர் இன்னும் இங்கு வரவில்லை என! உடனே கவியரசர் கேட்டாராம்….அவன் இன்னுமா வரவில்லை? அப்படியென்றால் இந்தப் பணியைத் தள்ளி வையுங்கள்….அவன் வரட்டும் என்று!

அந்த அளவிற்குக் கவியரசரும், மெல்லிசை மன்னரும் இணைபிரியாத இரு உடல்கள் ஊருயிராகத் திகழ்ந்தவர்கள் என்பது திரைத்துறையில் இருந்தவர்கள் அறிவார்கள்!

இதோ…..இன்று அதிகாலை அங்கே ……கவியரசர்…….இரு கரம் நீட்டி அழைக்க…..இசை அரசர்…..இதயம் இணைந்திருக்கிறது!

இறைவா……மண்ணுலகம் என்ன செய்யும் இனி?

இதுதான் வாழ்க்கை …இதுதான் பயணம்………இவர் போல் வாழ இனி யார் வருவார்?

July 14, 2015
நாடகத் துறையில் ஒரு மைல்கல்!

பவள சங்கரி

நம் சங்கத் தமிழ் என்பது இயல், இசை, நாடகம் என முத்தமிழையும் உள்ளடக்கியது. இயற்றமிழ் இன்று மெல்ல, மெல்ல உருமாறிக் கொண்டிருக்கிறதோ என்ற அச்சம் நம் தமிழ் வல்லுநர்கள் மத்தியில் பரவலாகப் பேசப்படுகிறது. கர்நாடக இசை, மெல்லிசைப் பாடல்கள், பக்தி இலக்கியம் போன்றவைகள் மூலமாக இசைத்தமிழ் காப்பாற்றப்பட்டு, தம் நிறம் இழக்காமல் இருக்கிறது. தம் எண்ணங்களை தமது உடல்மொழியின் வாயிலாக இயல்பாக வெளிப்படுத்தி, புறத்தார்க்குப் புலனாக நடித்துக் காட்டுதற்கு ஏற்றவாறு அமைந்த மொழிநடை நாடகத் தமிழ் என வழங்கப்படுகிறது. ஆனால் வீரம், காதல், பக்தி, வாழ்க்கை நெறி, வாழும் முறை என அனைத்தையும் உள்ளடக்கிய நம் தமிழ் கலாச்சாரத்தையும், பாரம்பரியத்தையும் பிரதிபலிக்கும் நாடகக் கலை இன்று வருங்கால சந்ததியினருக்கு முழுமையாகச் சென்றடையுமா என்பது ஒரு கேள்விக்குறியாகவே உள்ளது. தற்பொழுது திரு. கிரேசி மோகன், திரு ஒய்.ஜி. மகேந்திரன், திரு. எஸ்.வி. சேகர் போன்ற குறிப்பிட்ட சிலரே நாடகவியலை கட்டிக்காத்துக்கொண்டு வரும் சூழலில் சமீபத்தில் திரு.கிரேசி மோகன் அவர்களின், ‘சாக்லேட் கிருஷ்ணா’ என்ற நாடகம், நகைச்சுவையும், ஆன்மீகமும் கலந்த கலவையாக, பிரகாசித்துக் கொண்டிருக்கும் மேடை நாடகம் தன்னுடைய 777 வது நிகழ்ச்சியை வெகு சிறப்பாகக் கொண்டாடியுள்ளது. போகிற போக்கில் தம் யதார்த்தமான வசனம் மூலம், சகோதரர் மாது பாலாஜி மற்றும் தம் நாடகக் குடும்பத்துடன் உலகின் பல பகுதிகளில், வெகு சிறப்பாக நடந்து வரும் மேடை நாடகம் இது. திரையுலகிலும், எழுத்து, வசனம் என அனைத்திலும் தம் முத்திரையைப் பதித்துள்ள மூத்த எழுத்தாளர், திருமிகு சித்ராலயா கோபு, உலக நாயகர் திருமிகு கமலஹாசன், திருமிகு நல்லி குப்புசாமி அவர்கள் முன்னணியில், சென்னை மயிலை நாரத கான சபாவில், அரங்கு நிறைந்த காட்சியாக மிகச் சிறப்பாக நடந்தேறியது. இதில் முக்கியமாக கவனிக்க வேண்டியது, மிகப்பெரிய தொகைக்கு நுழைவுச் சீட்டு விற்பனை ஆகியுள்ளதுதான். மக்களிடம் நல்ல நாடகங்களைக் காணும் ஆவல் அதிகமாக இருப்பதையே இது உணர்த்துகிறது.

திரு.நல்லி குப்புசாமி அவர்கள் கமலஹாசன் அவர்களின் சமீபத்திய வெற்றிப்படமான ‘பாபநாசம்’ திரைப்படத்தை பாராட்டிப் பேசியவர், அப்படத்தில் பல காட்சிகளில் தாம் வெளியில் வந்து நின்று கொண்டதைக் கண்ட நண்பர்கள் காரணம் கேட்டபோது, தாம் ஏற்கனவே மலையாளத்தில் வந்த, மோகன்லால் படத்தை பார்த்திருந்ததால், போலீசார் அவரை அடிக்கும் காட்சி வரும் நேரத்தில் அதைக் காணச்சகிக்காது, வெளியில் வந்துவிட்டதாகச் சொன்னார்.

அடுத்து பேசிய சித்ராலயா கோபு கமல் ஆரம்பத்தில் நடித்த ‘உணர்ச்சிகள்’ என்ற படத்திலேயே பிற்காலத்தில் ஒரு பெரிய நடிகராக வரக்கூடிய தகுதி படைத்தவர் என்று சொன்னதாகவும், இன்று அதைவிட பலப்படிகள் கடந்து உலக நாயகராக உயர்ந்து நிற்பதாகக் கூறினார். கூடிய விரைவில் மிகச் சிறந்த இயக்குநராகவும் ஆகப்போகிறவர் என்றும் பாராட்டினார். திரு கிரேசி மோகன் அவர்களின் இந்த மாபெரும் வெற்றியை பாராட்டிப் பேசியவர், அதற்கான காரணம் அவருக்குத் தூணாகத் துணையிருக்கும் சகோதரர் மாது பாலாஜி மற்றும் பல ஆண்டுகளாக தொடர்ந்து அவரோடு இணைந்திருக்கும் நாடகக் குடும்பமும்தான் என்றார். மாது பாலாஜியை பல முறை திரைப்படத்தில் நடிக்க அழைத்தும், தம் குடும்பத்தார் அதை விரும்பவில்லை, நாடகம் மட்டுமே போதும் என்று தெளிவாக இருப்பதைக் குறிப்பிட்டபோது இந்த ஆழ்ந்த ஈடுபாடு இக்குழுவின் வெற்றிக்கு முக்கிய காரணமாக இருக்கலாம் என்ற எண்ணம் தோன்றியது. கிரேசி கிரியேஷன்ஸ் குழும நண்பர்கள் அனைவரும் ஒரே குடும்பமாக செயல்படுவதும், நறுக்கு தெறித்தாற்போன்ற வசனங்களும், நேரத்திற்கு ஏற்ற நகைச்சுவையும், வசனமும் என்று பல்வேறு காரணங்களை தம் அனுபவ மொழிகளில் அழகாகச் சொல்லிச்சென்றார் அந்த 84 வயது இளைஞர். காதலிக்க நேரமில்லை என்ற மிகச் சிறந்த நகைச்சுவை படத்திற்கு வசனம் எழுதியவரின் மதிப்பீடு கருத்தில் கொள்ளத்தக்கது.

திரு கிரேசி மோகன் அவர்கள் தங்கள் நாடகம் 777 வது நிகழ்ச்சியாக சாதனை புரிவதற்கு உறுதுணையாக இருக்கும் அனைவரையும் உள்ளம் நெகிழ நன்றி பாராட்டினார். திரு கமலஹாசன் அவர்களின் நட்பு தனக்கு பெரிய பலம் என்பதைச் சுட்டிக்காட்டினார். தன்னுடைய பல நினைவலைகளை பகிர்ந்துகொண்டார்.

நிகழ்ச்சி துவங்கும் முன்னரே, கௌதமி மற்றும் அவருடைய மகளுடன் வந்தவர், 1000 வது நிகழ்ச்சியின் வெற்றி விழாவும் விரைவில் நடைபெறும் என்றும் அதிலும் தாம் பங்கு பெறுவது உறுதி என்றும் நம்பிக்கையோடு கூறினார். கிரேசி மோகன் அவர்கள் நகைச்சுவை படைப்புகளே அதிகம் வழங்கினாலும், மற்ற அனைத்து விதமான படைப்புகளும் சர்வ சாதாரணமாகச் செய்யக்கூடிய சகலகலா வல்லவர் என்றாலும், ஏனோ பல முறை சொல்லிய பின்பும், அவர் நகைச்சுவையை விட்டு வெளிவராமல் அதையே தம் குறிக்கோளாகக் கொண்டிருக்கிறார் என்று பாராட்டினார். வழக்கம் போல நறுக், சுருக்கென்று தம் உரையை முடித்துக்கொண்டார். திரு கிரேசி மோகனின் அடுத்த வெளியீடு விரைவில் காணப்போவதையும் தானும் ஆவலாக எதிர்பார்த்திருப்பதாகக் கூறினார்.

நம் இந்திய நாட்டிற்கென்று தனிப்பட்ட பண்பாடும், கலாச்சாரம் இருப்பது போன்று பெரும்பாலான நாடுகளுக்கு இல்லை என்பது குறிப்பிடத்தக்கது. பிரித்தானிய நாட்டின் கலாச்சாரமே அமெரிக்க நாட்டு மக்களால் பின்பற்றப்படுகிறது. அப்படிப்பட்ட நம் கலாச்சாரத்தைக் கட்டிக்காக்கும் இது போன்ற நாடகங்கள் அழிவென்பதே அறியாதவாறு போற்றிப்பாதுகாக்கப்பட வேண்டியதும் உறுதியாகிறது. பல நூறு ஆண்டுகளுக்குப் பிறகும் இன்றும் இலண்டன் மாநகரில் ஷேக்ஸ்பியர் நாடகங்கள் நடத்தப்படுவது போல, ‘சாக்லேட் கிருஷ்ணா’ போன்ற நல்ல தமிழ் மேடை நாடகங்கள் பல நூறு ஆண்டுகளுக்கு நடக்க வேண்டும் என்று வாழ்த்துவோம். அதற்கான முயற்சியை, அதாவது தங்களுக்கான நல்ல கலையுலக வாரிசுகளை உருவாக்க வேண்டியது திரு கிரேசி மோகன் போன்ற அனுபவம் வாய்ந்த நல்ல படைப்பாளர்களின் முக்கிய கடமையாகிறது என்பதும் உறுதி.

படங்களுக்கு நன்றி: திரு. திருநாவுக்கரசு

July 14, 2015
கந்தன் களிப்பு

கண்ணன் அனுபூதி எழுதிய சந்தோஷத்தில் மால்மருகன் முருகன் வெண்பாக்கள் ”கந்தன் களிப்பு” என்ற தலைப்பில் எழுதினேன்… இன்று செவ்வேளுக்கு உகந்த செவ்வாயாய் இருப்பதால் பகிர்ந்து கொள்கிறேன்….இத்துடன் அடியேன் வரைந்த ”முருகர்” படத்தையும் இணைத்துள்ளேன்….கிரேசி மோகன்….

கந்தன் களிப்பு
——————-

ஒயிலாய் குறத்தி ஒருபக்கம், வேழ
மயிலாள் மறுபக்கம் மேவ -மயிலம்
அமர்ந்த முருகா அருள்வாய் எனக்கு
திமிர்ந்த ஞானத் துணிவு….(1)….

மோனை எதுகையாய் ஆனை குறவள்ளி
மானை மணந்த தமிழழகா -சேனை
தளபதியே சூரன் தலைபறித்த சூரா
உளமதிலே உட்கார் உவந்து….(2)….

வள்ளி மகளோடு புள்ளி மயிலேறும்
வெள்ளி மலையோன் விழிமைந்தா -உள்ளிருக்கும்
ஆன்ம குகனே அகந்தை அழித்தெனக்கு
வான்வசம் ஆக்கிட வா….(3)….

விடையேறு பாகன் விழிவந்த வேலா
படையேறி வாழ்கின்ற பிள்ளாய் -கடையோரம்
வைத்தேன் கவியெழுதி விற்றுன் அனுபூதி
துய்த்தேன் தமிழ்வணிகத் தில்….(4)….

உடைந்தாலும் கண்ணாடி உள்ளதைக் காட்டும்
குடைந்தாலும் கற்பாறை கோயிலாகும் -அடைந்தாலும்
ஆறு கடலைத்தான் சேறும் அதுபோல
ஏறு மயிலோன்கண் ஏகு….(5)….

பாம்பன் ஸ்வாமிகள் கோயில்….
—————————————-
உப்பு மிளகிட்டு சுப்பனின் சன்னிதியில்
தப்புத்தப்(பு) என்றுகன்னத் தாளமிட்டு -அப்புறம்
பாம்பன் சுவாமிகள் பாதம் பணிந்தளிக்கும்
சாம்பலை நெற்றியில் சூடு….(6)….

பாம்பணைப் பள்ளிப் பெருமாள் மருகோனைத்
தாம்புனைந்தார் சந்தத் தமிழ்கொண்டு -பாம்பன்
குமர குருதாசர் கூறு கவசம்
அமரநிலை சேர்க்கும் அமுது….(7)….

சாம்பவி புத்திரனே சம்பு புதல்வனே
மாம்பழ வாயன் மருகோனே -பாம்பன்
அடிகள் அழைக்க அழகுமயில் ஏறி
சடுதியில் வந்தோய் சரண்….(8)….

தந்தைக்கு மிக்கதோர் மந்திரம் கூறிய
எந்தையே ஏரகக் கந்தனே -முந்தைப்
பழவினைகள் போக்கி புதுவினைக்கு ஞானக்
கிழவனாய் வந்தெனையாட் கொள்….(9)….

ஆறு முகம்கொண்டோய் ஆறு படைநின்றோய்
கோறும் அடியார் குறைதீர்க்கும் -மாறுபடு
சூரனைக் கொன்ற சுரமகள் கேள்வனே
பாரெனைத் தாயாய் பரிந்து….(10)….

கந்தா குஹாகடம்பா கார்த்திகே யாவென்று
உன்தாள் பணிந்து உவப்புடன் -அந்தாள்
அருணகிரி போலே வருணகவி பாட
தருணமிது தாராய் தமிழ்….(11)….

அண்ணா மலைதீபம், உண்ணா முலையுந்தி
விண்ணாளும் தேவர்தம் வெற்றி -எந்நாளும்
காப்பதற்குக் கையில் கதிர்வேல் கொண்டவனாம்
தீப்பொறி தோற்றத்தைத் தொழு….(OR)….
தீப்பொறி தோற்றத்தில் தோய்….(12)….

தை பூசத்தன்று எழுதியது….
———————————–
மைபூசும் மாதர்வாய் பொய்பேசப் புல்லரித்து
கைகூசும் காலம் கலவிடுவாய் -தைபூச
நன்நாளின் தெய்வத்தை நெஞ்சில் நிறுத்திடுவீர்
பண்ணாத பாவமும் பாழ்….(13)….

அறுபடையோன் புகழ்….
——————————————
திருவேரகம்(சுவாமி மலை)….
————————————-
குந்திக்கால் மண்டியிட்டு கூப்பியக் கைகொண்ட
தந்தைக்கு சொன்ன தனயனை -சிந்தைக்குள்
வேராக ஊன்றி விருட்ஷமாய் நட்டிடு
ஏரகச் செல்வனை ஏத்து….(14)….

பழமுதிர்சோலை
——————–
கூப்பாடு போட்டவுடன் கும்பல் கூடிடும்
தோப்பாய் இருந்து தனிமரமாய் -மூப்பால்
கிழமுதிரும் போதேனும் கந்தன்கை கோர்க்க
பழமுதிர் சோலைக்குள் புகு….(15)….

திருத்தணி
————–
விருத்தனாய் வந்து குறத்தியைக் கூடி
திருத்தணி மேவும் தலைவா -மருத்துவன்
வைதீஸ் வரன்பெற்ற வேலா யுதாவாழ்வில்
பொய்தீசல் சேராது போக்கு….(16)….

திருச்செந்தூர்
——————-
மாறுபடு சூரனுடல் வேறுபட வேலெய்து
கூறுபட வைத்த குருநாதா -சீறுகடல்
செந்தூரில் பத்தினிகள் சேர வளர்ந்திடும்
சிந்தூர வண்ணனைச் சேர்….(17)….

பழனி
——–
மாம்பழம் தந்தை மறுத்ததால் கோபித்து
தீம்பிழம் பாகி தவக்கோலம் -நாம்பழனி
குன்றினில் கண்டு களித்திட காட்சிதரும்
நின்றிடும் ஆண்டி நமக்கு….(18)….

திருப்பரங்குன்றம்
———————–
குரங்கென்ற நெஞ்சோடு கூடிக் குலாவி
தரங்குன்றி தாழ்ந்தோம், தவித்தோம் -பரங்குன்றில்
தெய்வானை கைப்பிடித்த தேவ சகாயனை
கைவாய்மெய் கொண்டு கருது….(19)….

சுரமகள் அத்தி குறமகள் வள்ளி
இருபுறம் சுத்தி இழைய -அறுபடை
வீட்டில் வசித்திடும் வேலா மயிலேறி
பாட்டில் வருவாய் பறந்து….(20)….

கண்ணனுன் காதலன் கந்தனுன் காவலன்
எண்ணனும் நெஞ்சேநீ எந்நாளும் -முன்னவன்
மாலனும் பின்வந்த வேலனும் நம்வாழ்வில்
காலமும் நேரமும் காண்….(21)….

மயிலவர்க்கு கொண்டை மயிலிவர்க்கு அண்டை
சயிலம் இருவர்க்கும் ஜாகை -துயிலிருப்பார்
வேலையில் மாலவன் வேலனோ தீயோர்மேல்
வேலை விடக்கண் விழிப்பு….(22)….

சரவணா கேளாய் ஒருவினா ஞானம்
பெறவொணா வண்ணமேன் பெற்றாய் -குருவெனால்
சீடன் தவித்திருக்க சும்மா இருப்பதோ
பாடமனு பூதி புகட்டு….(23)….

கரம்தாங்கும் வேலும் புறம்தாங்கும் நீல
நிறம்தாங்கும் வண்ணமயில் நோக்கும் -அறம்தாங்கும்
ஆறு முகமும் அணிசேவல் கொக்கரிப்பும்
கூறு தமிழ்மொழியும் காப்பு….(24)….

சிலம்பும் சிலம்பணி செவ்வேள் கழலும்
புலம்பும்புள் சேவலும் போகக் -கிளம்பத்
தயாராக நிற்கும் தணிகைவேல் நீல
மயூரமும் எண்ண முருகு….(25)….

மலையளவு குற்றமும் மங்கிடும், பொங்கும்
அலையுலவு செந்தூர் அழகன் -சிலையுருவை
எண்ணித் துதிப்போர்க்கு ஏத்திப் புகழ்வோர்க்கு
நுண்ணிய நூலாய் நலிந்து….(26)….

கதிராய் வெளிப்பட்டு கார்த்திகை மாதர்
உதிர முலைப்பாலை உண்டு -அதிரும்
அயில்வேலை அன்னை அளித்திட வாங்கும்
துயில்வோன் மருகன் துணை….(27)….

சொந்தம் எனக்குநீ பந்தம் எனக்குநீ
தந்தை எனக்குநீ தாயாராய் -வந்தருள்
பாலிக்க வேண்டும் பராசக்தி பாலனே
காளிக்கை வேலனே காப்பு….(28)….

எண்ஜாண் உடம்புக்கும் ஏகாக்ர சிந்தைக்கும்
பஞ்சா மிருதமும், பண்ணிரெண்டு -கண்ஜாடைக்
காதலும் போதுமே, ஆதலால் கந்தனின்
மீதுலாவு நெஞ்சே முனைந்து….(29)….

சந்தமிகு செந்தமிழில் கந்தரனு பூதியை
தந்த அருணகிரி தான்போலே -உந்தன்
திருப்பதிகள் சென்று திருப்புகழ் பாடும்
விருப்பதை நேர்நிறை வேற்று….(30)….

அய்யோ எனக்கிளை குய்யோ முறையிடாது
அய்யோ மணாளர் அணுகும்முன் -மெய்யோடும்
தேகான்ம பாவத்தை தாண்டி நிலைபெற
வாகா னவழிசொல்ல வா….(31)….

புரியும் தொழிலெனக்கு பொல்லாத சூரன்
சரியும் படிவேல் செலுத்தும் -அரியின்
சகோதரி மைந்தனின், சங்கரன் சேயின்
மகோதரன் தம்பியின்த மிழ்….(32)….

முதற்பொருளை ஈசன் நுதற்பொருளை வள்ளிக்(கு)
இதப்பொருளை சந்த இசைக்குப் -பதப்பொருளை
மாறா ஸ்திதப்பொருளை மாறன் கதைப்பொருளை
வீரம் விதைப்பொருளை வாழ்த்து….(33)….

பொய்பேசா வாக்கும் புறங்கூறா வார்த்தையும்
கைகூசா காரியமும் கொள்வோர்கள் -தைபூசத்
தானருளால் நற்கதியும் தேயா துருவனைப்போல்
வானுருளும் மீனாகு வர்….(34)….

உதித்ததது தீயாய் உருமாற்றம் சேயாய்
பதித்ததது பொய்கையில் பாதம் -துதித்த
நதித்தலை ஈசர்க்(கு) உதிர்த்ததது ஓமை
விதித்ததை மாற்றுமது வேல்….(35)….

வம்பை விலைகொடுத்து சம்பு விடம்வாங்கி
தெம்பிழந்து மன்மதன் தீய்ந்ததோர் -சம்பவத்தில்
திண்டாடும் தேவர்க்காய் உண்டான பிள்ளையை
கொண்டாடக் கைகளைக் கூப்பு….(36)….

மனத்துள்ளான் பூச தினத்துள்ளான் வள்ளி
வனத்துள்ளான் சூரன்மேல் வைத்த -சினத்துள்ளான்
அண்ட கனத்துள்ளான் ஆதி கணத்துள்ளான்
விண்ட ஷணத்துள்ளான் வேல்….(37)….

ஆனைக்(கு) இளையானை ஆனைக் களியானை
ஆணை அமரர்க்(கு) அளிக்கின்ற -ஆணை
வணங்கி எழுவானை வள்ளிகல் யாணம்
இணங்கிய யானை அணைப்பு….(38)….

அய்யம் தகளியா ஐந்துபுலன் நெய்யாக
பொய்யாம் விளக்கேற்றப் போந்தேனே -அய்யா
விளக்குமாறு என்னை விலக்கிடாது உன்னை
விளக்குமாறு வெண்பாவில் வா….(39)….

சுட்ட பழமா! சுடாத பழமாவென்(று)
இட்டனை அவ்வைக்(கு) இடையூறு -கொட்டினை
நாவல் பழத்தை நமுட்டு விஷமமாய்
சேவல் கொடியோய் சிரித்து….(40)….

வீசும்வெண் சாமரம் பேசும் தமிழுனக்கு
ஆசு கவியாகி ஆறுதிவ்ய -தேசமும்
கூடி அருண கிரியாகி சந்தத்தில்
பாடிக் களிக்கலாம் போது….(41)….

வயதுமிக சேர்ந்தும், வயோதிகம் நேர்ந்தும்
தயவை எதிர்பார்த்து தாழ்ந்தும் -அயர்வில்
கரணங்கள் ஓய்ந்தும் கலங்காது கந்தன்
சரணங்கள் பற்ற செழிப்பு….(42)….

பசித்தால் உணவு, படுத்தால் கனவு
நசித்தால் நமனார் நினைவு -அசத்தே!
இதற்குமேல் ஒன்றுண்டு இன்னதென்றால் ஆதி
முதற்கதன்பேர் ஆறு முகம்….(43)….

மண்டை தகளியா மானசீக நெய்யூற்றி
குண்டலினி ஜோதி கொளுத்திட -தண்டை
செறிகழல் சந்தம் செவிகளில் கேட்க
விரிகுழல் வள்ளியுடன் வா….(44)….

கோபுரமீ தேறி குதித்த அருணகிரி
தாபஜுரம் தீர்த்து தடுத்தாண்டு -நாபுறத்தில்
முத்தென வேலின் முனையால் எடுத்தளித்தோய்
புத்தென்னுள் பாம்பாய் புகு….(45)….

பாலூட்டும் அன்னையிடம் வேலூட்டம் பெற்றதனால்
மாலாட்டும் பீலி மயிலேறி -தேளாட்டம்
கொட்டுகின்ற சூரனை கூறாய் வகிர்ந்திட
விட்டகலும் தாய்ப்பாலை வேல்….(46)….

குகையாம் மனதில் குடியேறி கந்தா
புகைஐம் புலனை பொசுக்கு -பகையாம்
எனைப்போய் விரட்டி எனக்கு பதிலாய்
உனைப்போல் குடித்தனமாய் உய்….(47)….

வெந்த உளப்புண்ணில் வேலினைப் பாய்ச்சிமா
சந்தத் தமிழ்மலையாய் செப்பனிடு -கந்தன்
கடம்பன் குகனென்று காலமெல்லாம் கூவ
உடம்பை ஒயில்மயிலாய் ஓட்டு….(48)….

சாத்திரம் கற்றும் சதுர்வேதம் ஓதியும்
தூர்த்தெரி காட்டில் துடைத்தெறிவர் -நேத்திரம்
தன்வழி சேயை துதிப்போர்கள் இப்பிறவிப்
புண்வழிபோய் வாரார் பிறந்து….(49)….

காவலுக்கு வேலுமறை கூவலுக்கு சேவலும்
தாவலுக்கு வண்ணமயில் தோகையும் -ஆவலுக்கு
வள்ளியும் சீவலுக்கு வீரமும், கேவலம்நான்
எள்ளி நகையாட ஏன்….(50)….

ஈசான்ய மூளை இருந்து புறப்பட்டு
தீசார்ந்த சேயை, தினைப்புன -பூசாய்ந்த
மார்பனை தேவர்கள் சார்பனை பாவலர்கை
நூற்பனை நுண்பொருளை நண்ணு….(51)….

உடலே சதமென்(று) உனைநான் மறந்து
திடலாம் கிளர்ச்சியைத் தாண்ட -அடடா
திடலாடி பள்ளமாய் திடீரென்று ஆச்சே
கடலாடி கந்தனே காப்பு….(52)….

வேகாத வெய்யிலில் வேகா ததையுண்டு
வேகாதி வேகத்தில் வேண்டுதலாய் -போகாதே
கோயில் குளமென்று ! குன்றாடும் கந்தனை
வாயில் வளர்வெண்பா வாய்….(53)….

முருகா எனச்சொல்லி மூச்சை இழுமால்
மருகா எனமுடக்கு மூச்சை -குரு!கா
எனவோதி மூச்சை மனதின்றி விட்டால்
உனதாயுள் கந்தர்க்(கு) உவமை….(54)….

கரும்பில் சுவையாய் இரும்பில் சுமையாய்
வெறும்புல் விரிப்பில் வனப்பாய் -துரும்பிலே
மாயமாய் தூணிலே சீயமாய் வானிலே
மேயும் ஒளிக்கூட்ட மாய்….(OR)
வேயும் பரவெளியாய் வேல்….(55)….

தடந்தோள் முதல்வன் தமிழ்த்தாய் புதல்வன்
மடந்தை இருவர் மணாளன் -விடம்தோய்
கழுத்தர்க்(கு) உரைத்தான் எழுத்தை குருவாய்
வழுத்தி வணங்குவோம் வேல்….(56)….

பெண்டாண்டு பொய்பேசி பாழ்மது மாமிசம்
சண்டாளர் நட்பால் சகித்துண்டு -பண்டாய
வேதங்கள் போற்றும் பாதம் பணிந்திலேன்
ஏதம் பொறுத்தருள்வாய் ஏற்பு….(57)….

சொன்னால் வினையழியும் பின்னால் பிறப்பொழியும்
முன்னால் விலகும் மரணபயம் -முன்னாளில்
தாரகனை மாய்த்த தணிகையான் நாமத்தை
கூறகம் பூரிக்கக் கூவு….(58)….

இக்கா சினிக்கிங்(கு) இருப்பொன்றும் இல்லை
முக்காலே வீசம் முழுமாயை -நிக்காதே
இன்றே அறுபடை இல்லத்திற்(கு) ஏகிடு
நன்றே நடக்குமிதை நம்பு….(59)….

அற்பமாய் மாதர் அழகில் மயங்கிநம்
கற்பினைத் தோற்றோம் கசடறாய் -வெற்பிலே
பூக்கும் முருகனால் புண்ணியம் தேடுவோம்
காக்கும் கனகவேல் கை….(60)….

நன்றுலர்ந்து தீது நமைவாட்டும் நேரத்தில்
அன்றலர்ந்த பூவால் அருச்சிப்பாய் -கன்றலைந்த
கோகுல மாமனார் கொண்டமாப் பிள்ளையை
ஆகுலம் தீர்ப்பான் அவன்….(61)….

அஞ்சரி யாசனத்தை ஆளத்தேர் மாமனின்
குஞ்சரிப் பெண்ணின் கரம்பிடித்த -நெஞ்செரி
கண்டரின் தீநுதற்க் கண்பிறந்த கந்தனை
கண்டறியும் ஆவலே காப்பு….(62)….

மாலோலன் பெற்றபின் மண்ணில் தவழவிட்ட
ஆலோல வள்ளி அகமுடையான் -கோலோடு
தென்பழனிக் குன்றில் திகம்ப ரனாய்நிற்போன்
முன்கழுவிக் கொள்மும் மலம்….(63)….

கோதையின் கைப்பிடித்த யாதவத்தாய் மாமனின்
சோதரி பால்குடித்த சண்முகனை -சூதறி
யாதபுத்தி யால்தொழுது ஆதரிப்போர்க்(கு) ஆயுளுக்கும்
வாதபித்த ஜன்னி விலக்கு….(64)….

அரியின் திகிரியை அன்றுண்(டு) உமிழ்ந்த
கரியின்பின் வந்த குமாரா -சரியை
கிரியை அறியா கசடன் எனக்கு
நெறியை நினைவில் நிறுத்து….(65)….

பார்வதி துர்கா பரமேஸ் வரிதந்த
நேர்கதி செல்லும் நெடுவேலால் -சூர்விதி
தீர்த்தவனை சேவலாய் தோகையாய் தன்னுடன்
சேர்த்தவனை செந்தூரில் சேர்….(66)….

ஆனை துரத்திய மானை மருவிய
மோனை எதுகை மொழிமுருகா -”நானை”
தனித்துப் பிரித்து திருத்தும் ரமண
ஜனிப்பே அருணா சலா….(67)….

ஊசித் துளைக்காதில் ஒட்டகம் போய்வரும்
யோசித்த குப்பையும் யாப்பாகும் -நேசித்து
யாசித்து நிற்பான் எதிரியும் கைகட்டி
பேசிப்பார் கந்தன் புகழ்….(68)….

கணிகையர் கூடி பிணிவினையில் வாடி
இனிதுயிரை தற்கொலைக்(கு) ஈய -தணிகையான்
துள்ளிக் குதித்தவனை தாங்கிப் பிடித்துரைத்தான்
பள்ளித் தலம்சென்று பாடு….(69)….

கந்தர் அலங்காரம் கந்தன் அனுபூதி
தந்த அருணகிரிக்(கு) ஈடாக -கந்தன்
களிப்பமைய வேண்டி கைகூப்பு கின்றேன்
பலித்தலை கால்பாது காப்பு….(OR)
களிப்பயல் கண்ணனே காப்பு….(70)….

வேதாள பூதங்கள் பாதாள பாம்புகள்
தீதாளும் மானுடத் துன்பங்கள் -சேதாரம்
ஆகிடும் சக்தியின் அன்புமகன் கட்டளைக்கு
ஏகிடும் வேல்முன் எதிர்ப்பு….(71)….

தந்தை சுமந்தவன் தாயால் வளர்ந்தவன்
விந்தையச் சேயை வணங்காது -மொந்தையில்
கள்ளுண்டு மாதரார் காமநெறி கொள்ளாதே
முள்ளுண்(டு) எறியாய் மலர்….(72)….

கூனல் முதுகோடு காணல் குறையோடு
தோணல் எதுவுமின்றி தூங்காதே -போநல்
உபதேசம் தந்தைக்(கு) உரைத்தவெகு ஞான
மக(ன்)தேசம் சாமி மலைக்கு….(73)….

வேசை புலன்காட்டும் ஆசைப் பனிமூட்டம்
காசைக் கரியாக்கிக் கண்மூடும் -ஓசை
இடும்கந்தன் தண்டை இணையடிகள் பற்றி
திடம்கொண்டு தீர்ப்பாய் தினவு….(74)….

தள்ளாத காலம் தடியூன்ற இல்லத்தோர்
செல்லாத காசாக்கி சுண்டிடுவர் -பொல்லாத
புத்தியே கந்தன் புராணம் படித்திடு
நெத்தியை நீறால் நனைத்து….(75)….

கல்லிரும்பு கூர்வயிரம் கொண்ட கடினமெலாம்
புல்துரும்பாய் போய்வெட்கும் பார்மனம்முன் -வல்லியயிச்
சூரன் பொடிபட சீறிடும் வேல்திருச்செந்
தூரன் வழிக்குத் திரும்பு….(76)….

நீர்கொழித்த மண்ணில் நடுமரம் ஓங்குதலாய்
ஆறெழுத்தைக் கூறி அனுதினமும் -தேரிழுத்து
தீதொழித்த பாண்டவ தூதன் மருகனை
போதழைக்கப் பொங்கும் பலம்….(77)….

ஆவீர் அனைத்துமாய் ஆனதெல்லாம் போனதும்
சாவீர் ஜனிப்பதற்கு ஜென்மங்காள் -போவீர்
கயலூறும் பொய்கை வயலூரில் வாழும்
பயலாறைப் பார்க்கப் பலன்….(78)….

தலைப்பாகை கொண்ட மலைப்பான வாழ்வை
கலைப்பானே கூற்றன், கிராதகி -முலைப்பாலை
முட்டக் குடித்திடும் மாமன் மருகோனை
எட்டுக் குடிசென்று ஏத்து….(79)….

சூடுவாய் கொட்டாய் சுடச்சுட வார்த்தைகள்
சூடுவாய் பூனையாய் வாடுவாய் -சூடுவாய்
கந்தர் அலங்காரம் கந்தன் அனுபூதி
அந்த வெறிவாய்க்(கு) அவல்….(80)….

ஆத்தின்மேல் சோத்தின்மேல் கூத்தியார் கொங்கைமேல்
பூத்துக் கசங்காதே புல்நெஞ்சே -நூத்தின்மேல்
பாண்டவர் கொண்ட பகைதீர்த்தோன் பெண்ணுக்காய்
வேண்டும் மருமகன்மேல் வை….(81)….

என்னதான் செய்வது ஏரகச் செல்வனே
முன்னதாம் கர்மம் மயக்குதே -பின்னதாய்
வந்தயிவ் வெண்பாக்கள் உந்தனருள் ஆகட்டும்
சொந்த சரக்கென்றால் சோர்வு….(82)….

தாமரையாள் தங்கும் தடந்தோள் மணிமார்பன்
மாமறைகள் காத்தோன் மருகனே -”யாமிருக்க
அச்சமேன்” என்றபய ஆறுதல் தந்தவனே
உச்சரிப்பாய் என்னுள்ளே ஓம்….(83)….

தொட்ட குறைகுறைய விட்ட நிறைபெருக
பட்ட துயரகல போய்ச்சென்று -கஷ்டமொடு
அண்டி வருவோர்க்கு வண்டி அருள்குவிக்கும்
கண்டி கதிர்காமம் காண்….(84)….

கேட்ட தெலாம்கொடுக்கும் கேளா தனகுவிக்கும்
மாட்டேன் எனச்சொல்லா, மூடுபனி -மூட்டக்
கயிலை கபாலியும் கற்பகமும் கொஞ்சும்
மயிலை முருகன் மனம்….(85)….

உறிவள வெண்ணை உருகுநெய் பாலை
திருடுமுள மாமனின் தொண்டாய் -கிரிவலமாய்
சித்தம் ஒருமித்து செவ்வேள் மருகனின்
ரத்தி னகிரியைநீ சுத்து….(86)….

விண்வெற்றி கொள்ளவும் வீணரைக் கொல்லவும்
முன்நெற்றிக் கண்ணுதித்த மூலத்தை -பின்பற்று
பெண்கண் பொழிகின்ற போகத்தைப் பாராது
எண்கண் தரிசனத்திற்(கு) ஏங்கு….(87)….

பூண்டியில் ஈசனை பூஜித்த ஈராறால்
ஆண்டியே என்னை அணைத்தருள -பாண்டவ
பாஞ்சாலி மானத்தைப் போர்த்திய மாலவனின்
வாஞ்சை மருகோனே வா….(88)….

பணிக்கூனி யாலன்னை போவென்ற வாக்கை
அணிந்தா ரண்யம் அடைந்து -கனியை
இடகிழவி உண்ட இராமன் மருகோன்
வடபழனி செல்வோம் வா….(89)….

பாலை சரவணப் பொய்கைமார் போட்டிட
வேலை பராசக்தி வார்த்திட -ஆளாய்
உருமாறி பக்தர்க்(கு) உதவிடும் அன்புப்
பெருவா ரிதிக்கில்லை பூட்டு….(90)….

புள்ளி மயிலேறி பக்தர்க்(கு) அருள்வேலை
”துள்ளி வருகுதென” தோத்தரித்த -வல்லியூர்
பாரதிக் கண்ணனின் பாச மருகோனே
நேரெதிராய் வந்தென்முன் நில்….(91)….

தமிழ்வேலை சந்தம் உமிழ்வேலை சங்கம்
கமழ்வேலை ஈராறி கைகள் -தவழ்வேலை
காக்கும் அயில்வேலை நோக்க ஒயில்வேலை
தீக்கண் பயல்வேலை தீண்டு….(92)….

காற்று புகாகுகையில் கைதான நக்கீரர்
போற்றிப் புகழும் திருமுரு -காற்றுப்
படைநா யகன்வேற் படைதனை வீச
தடைவெற்(பு) அடைவு தரை….(93)….

சமாதான மான உமாதேவி ஈசர்
குமாரனின் சம்பவம் காண -இமாசலக்
கல்யாண பாரத்தைக் கொண்ட அகத்தியரின்
தொல்ஞான தேசிகனைத் தேடு….(94)….

நீராடிக் கார்த்திகையில் நீறாடி நேர்த்தியாய்
நீராடிப் பாடி நெடுங்குன்று -தோராடி
அல்லும் பகலும் அருளும் அருந்தமிழ்ச்
சொல்லின் பொருளில் சுகி….(95)….

சூல்தாங்கும் ஈசனுடன் வேல்தாங்கும் சக்தியுடன்
கால்தாங்கும் தேவர் குழாமுடன் -மால்தாங்கும்
பீலி மயிலேறி பத்தினிகள் பக்கமுற
மேலிருந்து வாழ்த்தும் முருகு….(96)….

நாதனை நான்முகன் வேதனையை ஈசர்க்கே
போதனை செய்த பிரணவத்தை -சேதுஅணை
கட்டிய மாமன்பெண் கட்டியமாப் பிள்ளையை
கட்டிப் பிடிக்கக் களிப்பு….(97)….

வேலனை ஈராறு தோளனை ஈசர்கண்
பாலனை வள்ளிமண வாளனை -மூலனை
முத்தமிழ் காவலனை முந்தியருள் ஏவலனை
உத்திரப் பங்குனியை உன்னு….(98)….

தலாப்பொருள் ஒன்று குலாவிடும் ஆறு
கலாமுகம் கொண்ட குமரன் -கலாப
மயிலேறி வள்ளி மகளானை சூழ்ந்த
ஒயிலோன் திருப்புகழ் ஓது….(99)….

சுராபதிச் சேனை உறாபகை வண்ணம்
கராதலம் வேல்கொண்ட கந்தா -பராபரைக்(கு)
உற்ற குமரனே பற்றினேன் பாதத்தை
சுற்றிவ ரச்செய் சபை….(100)….

கண்ணனைப் போலக் கடவுளிங்(கு) இல்லையென
கண்களை மூடிக் களித்திருந்தேன் -கண்ணனே
மாமனெனை ஒத்த மருகனிவன் என்றதால்
காமவேள் கந்தன் களிப்பு….(101)….
—————————————————————————

July 14, 2015
கேசவ் வண்ணம் – கிரேசி எண்ணம்

பசுவாகிய ஜீவாத்மா சத்திநிபாத விவேகத்தைக் கொண்டு , குரு கை காட்டியவாறு நீரும் நீர்க்குமிழியும் கலந்து ஒன்றானாற் போல, பதியினைச் சேர்ந்து ஐக்கிய பதம் பெற்ற பின் பசுவுடன் பாசம் நஷ்டமானபடியினாலே “பதி அணுகிற் பாசம் நில்லாவே” என்று “திருமூலர்” கூறுகிறார்….இங்கு பதி-கண்ணன், பசு-உயிர், பாசம்-தளை தட்டக் கூடாது அல்லது “ஈசனோடாயினும் ஆசை அறுமின்”….பசுவுக்கு உண்டான பதியின் பாத(ச)ம் பருகும் ஆசையைக் கூட விடவேண்டும் என்பதை கேசவ் அழகாகப் படம் பிடித்துக் காட்டுகிறார்….சூப்பர் கேசவ்….

”பசு,பதி பாதம் பருக முடியாது,
அசுவ ரதஓட்டி ஆவின், -சிசுவாய்,
பதியவன் பாசம் பசுவுக்(கு) அளித்த,
சதியவன்லீ லாவோகே சவ் ” ….கிரேசி மோகன்….

July 13, 2015
மழை வருவது மயிலுக்கு தெரியும்

கவிஞர் காவிரி மைந்தன்

ரிஷிமூலம் திரைப்படத்தில் இசைஞானி இளையராஜா இசையமைப்பில் கவியரசு கண்ணதாசன் எழுதிய பாடல்! எஸ்.ஜானகி குரலில்.. எஸ்.பி.முத்துராமன் இயக்கத்தில்! திரையில் தோன்றுகிறார் கே.ஆர்.விஜயா..

வண்ணத்தில் தோன்றும் இந்தப் பெண்ணின் நிலை என்ன என்பதை தன் எண்ணத்தில் தோன்றிய வார்த்தைகளிட்டு கவியரசர் காட்டுகின்றார். தாயின் தவிப்பு.. தன் மகனைக் காணத் துடிக்கும் பரபரப்பு.. நடந்த கதையெல்லாம் நான்கே வரிகளில்.. அவளின் இன்றைய மனநிலை.. அதையும் படப்பிடிப்பு நடத்துகின்றார் கவிதையிலே! யாரிடமாவது அந்த மகிழ்ச்சியைக் கொட்டித் தீர்த்துவிட எண்ணும் தாயுள்ளம்.. தக்கதோர் வழியாக பாடல் ஒன்று பாடுகிறது! தேவைக்கேற்ற இசை அங்கே கரம்கோர்க்கிறது! தனது பாவங்களை..நளினங்களை எல்லாம் வரிகள் வலிமைப்படுத்தித் தருவதைப்போல் பாட்டு பயணம் போகின்றது!

அம்மா என்றழைக்கும் பிள்ளை வரும்வரைதானே கணவன் கண்ணுக்கு முழுதாகத் தெரிகிறான்.. தன் வயிற்றில் கருவாகி.. உருவாகி.. உதிரத்தோடு கலந்த உறவாய் மகனோ மகளோ வந்துவிட்டால் அங்கே நாயகி தாயாகிவிடுகிறாள். தாயின் மனப்பான்மை, தனக்கென ஒரு உலகம் இனி இல்லையென தன் பிள்ளையே உலகமாய் விரிகிறாள்! அவள் கனவு.. நனவு எல்லாம் அவன்தான் என்றான பின்.. அவளுக்கான உலகம் எப்படியிருக்கும்? பட்டுத் தெறிக்கும் முத்துக்கள் போல வார்த்தைகள் வந்துவிழ அதைத் தொட்டு அளக்கும் இசையோ நம்மை மீண்டும் மீண்டும் கேட்க வைக்கிறது!

உள்ளத்தின் உணர்வுகளை எல்லாம் ஸ்வரங்களோடு மீட்டெடுத்து தருகின்ற கலைஞர்களாய் இசைஞானியும் கண்ணதாசனும் கைகுலுக்குகிறார்கள். மட்டில்லா மகிழ்ச்சி வெள்ளம் கரைபுரள.. தாயின் இதழ்கள் நடத்தும் உச்சரிப்பில் பாசமழை பொழிகிறதே! இந்த பூமி இன்னும் நனைகிறதே!

https://www.youtube.com/watch?v=gSZQtUZ51xw

மழை வருவது மயிலுக்கு தெரியும்
மகன் திருமுகம் மனதுக்கு தெரியும்

மழை வருவது மயிலுக்கு தெரியும்
மகன் திருமுகம் மனதுக்கு தெரியும்
இனி அவளது உலகத்தில் பகலென்ன இரவென்ன
மகனே கதிரவனாம் வரும் இரவினில்
அவனே புது நிலவாம்

மழை வருவது மயிலுக்கு தெரியும்
மகன் திருமுகம் மனதுக்கு தெரியும்

அவள் கலகல கலவென இருந்தவள் தான்
மிக படபட படவென பொரிந்தவள் தான்

அவள் கலகல கலவென இருந்தவள் தான்
மிக படபட படவென பொரிந்தவள் தான்
அவள் சரி என நினைத்தது
தவறென முடிந்தது கலகத்திலே
அவள் மிக மிக பழையவள் உலகத்திலே
இன்று மிக மிக புதியவள் குணத்தினிலே
இது கலியுகமோ இல்லை புது யுகமோ
இவள் இதயத்திலே… ஆ… ஆ…
லலா லலா லலா லலா

மழை வருவது மயிலுக்கு தெரியும்
மகன் திருமுகம் மனதுக்கு தெரியும்
இனி அவளது உலகத்தில் பகலென்ன இரவென்ன
மகனே கதிரவனாம் வரும் இரவினில்
அவனே புது நிலவாம்

மழை வருவது மயிலுக்கு தெரியும்
மகன் திருமுகம் மனதுக்கு தெரியும்

அன்று நடந்ததை நினைப்பதில் கலங்குகிறாள்
இன்று நடப்பதை நினைப்பதில் மயங்குகிறாள்
அன்று நடந்ததை நினைப்பதில் கலங்குகிறாள்
இன்று நடப்பதை நினைப்பதில் மயங்குகிறாள்
ஒரு மகனுக்கு தாயென
உலகத்தில் யாருக்கு தெரிகின்றது
அவள் மனதுக்குள் ரகசியம் இருக்கிறது
அது கனவிலும் நினவிலும் தவிக்கின்ற்து
அவன் மறந்துவிட்டான் இவள் மறக்கவில்லை
கதை நடக்கின்றது… ஆ… ஆ…
லலா லலா லலா லலா
மழை வருவது மயிலுக்கு தெரியும்
மகன் திருமுகம் மனதுக்கு தெரியும்
இனி அவளது உலகத்தில் பகலென்ன இரவென்ன
மகனே கதிரவனாம் வரும் இரவினில்
அவனே புது நிலவாம்
மழை வருவது மயிலுக்கு தெரியும்
மகன் திருமுகம் மனதுக்கு தெரியும்
லல லலலல லலலல லலலா
லல லலலல லலலல லலலா

July 13, 2015
சிவபிரதோஷம்

மீ.விசுவநாதன்

சித்திரம் வரையும் விரல்களானால்
சிவனே உன்னைநான் வரைந்திருப்பேன் !
முத்திரை அறிந்த முனிகளானால்
மௌன மின்னலாய் ஒளிர்ந்திருப்பேன் !
நித்திரை வேளை நினைத்திருந்தால்
நீண்ட வேதனை அழித்திருப்பேன் !
எத்திரை போட்டு மூடியதோ
இறைவா என்மனம் திறப்பதில்லை !

நந்தியைப் போலே நானிருந்தால்
நன்றாய் உன்னிரு தாள்பிடிப்பேன் !
சிந்திய வார்த்தை இசையானால்
சிறந்த கவியென சேவிப்பேன் !
அந்தியில் வானச் சிவப்பானால்
அழகு நெற்றியில் கண்ணாவேன் !
எந்திர வாழ்வில் ஓடுவதால்
ஈசன் பொன்னடி அறிவதில்லை !

((அறுசீர் விருத்தம் : மா, விளம், காய், மா, விளம், காய்)
(13.07.2015)

July 13, 2015
சிவபிரதோஷம்

கிரேசி மோகன்

ஆடகச் செம்பொன்னார் மேனியரே “ஆட வருகவே’’….
—————————————————————————————————–

முனிவர்கள் கூடி மெளனம் காத்திட
தனி ஆவர்த்தனம் நந்தி முழங்கிட
பனி மலை வாசன் பார்வதி யுடனிம்
மனிதனில் தாண்டவம் ஆட வருகவே….(1)

முகார விந்தம் முறுவல் பூத்திட
அகார,உகார,மகார அம்பிகை
அகோர மூர்த்தியை அணைத்து என்மன
விஹாரில் தாண்டவம் ஆட வருகவே….(2)

துந்துபி முழங்க டமருகம் ஒலிக்க
கந்தன் கணபதி கைக்கட்டி நிற்க
எந்தையும் தாயும் மகிழ்ந்து குலாவியென்
சிந்தையில் தாண்டவம் ஆட வருகவே….(3)

மாலவன் சங்க நாதம் ஊதிட
நாலு முகன் நல்வேதம் ஓதிட
ஞால அன்னையும் அப்பனும் எந்தன்
மூளையில் தாண்டவம் ஆட வருகவே….(4)

யாழில் பாரதி ஏழிசை சுரக்க
வாழிய கோஷம் வைதேஹி போட
ஊழி முதல்வனும் உமையும் எந்தன்
தோளில் தாண்டவம் ஆட வருகவே….(5)

பாக்கு வெற்றிலைப் போன்று இணைந்த
தேக்கு மேனியரும் தளிர் இடையாளும்
பாக்கள் பூக்களாய்ப் புலர்ந்திட எந்தன்
வாக்கில் தாண்டவம் ஆட வருகவே….(6)

பாஸியும் நீருமாய்ப் பிணைந்த இருவரும்
தூசி தோஷங்கள் தொல்லை இராது
வாசிவாசியென சுவாசிக்க எந்தன்
நாசியில் தாண்டவம் ஆட வருகவே….(7)

தென்னாடுடையான் தன்தேவியுடன்
பெண்ணாடுடலொடு பாவியேன் நானுனை
மன்றாடுதலால் மனமிசைந்(து) எந்தன்
முன்னால் தாண்டவம் ஆட வருகவே….(8)

வேத புராண இதிகாசங்கள்
பாதச் சிலம்பில் பதிந்திடவே திரு
வாதிரையான் தன் வாமியுடன் என்
காதில் தாண்டவம் ஆட வருகவே….(9)

வாடிய பயிரென் வாழ்க்கையிலே நீர்
ஆடிய பாதராய் அழகுமையாளை
சூடிய வண்ணம் சேர்ந்தென் முன்னால்
ஜோடியாய் தாண்டவம் ஆட வருகவே….(10)
————————————————————

July 13, 2015
Celebration of 777th Show of Chocolate Krishna

Mother

Celebration of 777^th Show of Chocolate Krishna

“Avvai Shri Shanmugam Annachi’s troupe, one of the very popular theatre groups in those days, in which I also acted, took 20 years to complete 1000 shows. It is indeed a great achievement for Crazy Mohan and his team to stage 777 shows of Chocolate Krishna alone in just 7 Years that too with packed houses and good collection” Said Kamal Hassan presiding over the celebrations of Chocolate Krishna at Narada Gana Sabha Hall last Saturday. He assured that he would partake in the 1000^th show as well.

Crazy Creations also chose the happy occasion to honor veteran humorist Chiralaya Gopu. When Crazy Mohan said that it was the perfect harmony of his friends that made this Himalayan task possible, Kamal Hassan recalled that it was such a harmonious relationship between Veteran director Sridhar and Gopu that reason for some of the great films produced by Chitralaya.

Tamizh Venbas on Ramana Maharishi titled Ramanayanam written by Crazy Mohan was released by Kamal Hassan in E Book format through Swathi Soft Soltuions. He also released “Crazy about Ramanar” – a book which is a collection of conversations of Crazy Mohan about Ramanar with his friend Kameshwararn.

Institutions and Sabhas which staged Chocolate Krishna maximum number of times were honored along with senior members of the troupe. Nalli Kuppuswamy Chetty also spoke on the occasion which was anchored by S B Khanthan, the director of Chocolate Krishna.

July 13, 2015
படக்கவிதைப் போட்டி – 21

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

அருண் வீரப்பன் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பு ஆசிரியர் திருமதி சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (18.07.2015) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர் குழு உறுப்பினர், தமிழ் இலக்கிய ஆராய்ச்சியாளர் திருமதி மேகலா தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பல முறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். இது, கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்கு பெற அழைக்கிறோம்.

புதுச்சேரி மாநிலத்தின் காரைக்காலில் பிறந்த மேகலா இராமமூர்த்தி கணிப்பொறி (MCA) மற்றும் தமிழில் (MA) முதுகலைப் பட்டம் பெற்றவர். அமெரிக்க தமிழ்ச்சங்கப் பேரவையின் (FeTNA) 2008, 2009 ம் ஆண்டுகளில் (ஆர்லாண்டோ & அட்லாண்டா) கவியரங்கம், இலக்கிய வினாடி வினா நிகழ்ச்சிகளில் பங்கேற்று பாராட்டுகளும், பரிசுகளும் பெற்றுள்ளவர். புறநானூறு, குறுந்தொகைப் பாடல்களில் அதிக நாட்டமும், இலக்கியக் கூட்டங்களில் சுவைபட பேசுவதிலும் வல்லமை பெற்றவர். இவருடைய வலைப்பூ – மணிமிடைபவளம்

July 13, 2015
இந்த வார வல்லமையாளர்!

ஜூலை 13, 2015

இவ்வார வல்லமையாளர்கள்
வல்லமைமிகு “தாஷி, நான்சி மாலிக் சகோதரிகள்”

முற்றிலும் மாறுபட்ட சாதனை ஒன்றினைப் புரிந்த இந்தியாவின் இரட்டையர்களை, தாஷி, நான்சி மாலிக் சகோதரிகளை இவ்வார வல்லமையாளர்களாக அறிமுகப்படுத்துவதில் வல்லமைக் குழுவினர் மகிழ்ச்சி அடைகிறோம். உத்தரகண்ட் மாநிலத்தைச் சேர்ந்த 24 வயதாகும் இரட்டையர்கள் பொதுவாக இந்தியர்கள் அதிகம் நுழையாத துறை ஒன்றில் சாதனையைச் செய்திருப்பது வியக்க வைப்பது.

“தீரச்செயல் புரிவோரின் பெருவெற்றி” என அழைக்கப்படும் (எக்ஸ்ப்ளோரர்ஸ் கிராண்ட் ஸ்லாம் – Explorers Grand Slam) என்ற சாகசத்தை நிகழ்த்தியுள்ளனர் இந்த இரட்டையர். வட தென் துருவங்களை அடைவது, உலகின் ஏழு கண்டங்களிலும் உள்ள உயரமான மலைச்சிகரங்களை அடைவது என ஒன்பது இடங்களுக்கும் சென்றுவருவது எக்ஸ்ப்ளோரர்ஸ் கிராண்ட் ஸ்லாம் சாதனை என்று அழைக்கப்படுகிறது. இதில் மிகவும் கடினமான முறை ஒன்றும், மற்றொன்று சற்று சுலபமான ‘லாஸ்ட் டிகிரி கிராண்ட் ஸ்லாம்’ (Last Degree Grand Slam) என ஒன்றும் இருக்கிறது. முதல் வகையான எக்ஸ்ப்ளோரர்ஸ் கிராண்ட் ஸ்லாம் என்ற முறையில் குறிப்பிட்ட கடற்கரையில் இருந்து வட தென் துருவங்களுக்கு பனிச்சறுக்கில் (Skiing) சென்றடைய வேண்டும். ‘லாஸ்ட் டிகிரி கிராண்ட் ஸ்லாம்’ முறையில் இந்தத் தூரம் குறைக்கப்பட்டுள்ளது

இங்கிலாந்தைச் சேர்ந்த ‘டேவிட் ஹெம்ப்ளிமேன் ஆடம்ஸ்’ (David Hempleman-Adams) என்பவரே முதன் முதலில் 1998 ஆம் ஆண்டில் இந்த ‘கிராண்ட் ஸ்லாம்’ சாதனையைச் செய்தவர். டேவிட் ஹெம்ப்ளிமேன் ஆடம்ஸ் உட்பட, இதுவரை பதினொரு பேர் இச்சாதனையைச் செய்துள்ளனர்.

அடுத்து, ‘லாஸ்ட் டிகிரி கிராண்ட் ஸ்லாம்‘ என்ற தொலைவு குறைந்த சுற்றை இதுநாள் வரை 33 பேர் வெற்றிகரமாக முடித்துள்ளார்கள். இவர்களில் இந்தியாவைச் சேர்ந்த தாஷி, நான்சி மாலிக் சகோதரிகளும் அடங்குவர். பிப்ரவரி 2012 ஆம் ஆண்டு 19,340 அடிகள் உயரம் உடைய ஆப்பிரிக்க “கிளிமாஞ்சரோ” சிகரத்தை முதலில் தொட்டத்தில் அட்வெஞ்ச்சரர்ஸ் கிராண்ட் ஸ்லாம் சுற்றை இவர்கள் தொடங்கினார்கள். அடுத்து 2013 ஆம் ஆண்டு மே மாதம் எவரெஸ்ட் சிகரத்தை அடைந்தார்கள். தொடர்ந்து மற்ற பிற ஐந்து கண்டங்களில் உள்ள மலைகளின் உயர்ந்த சிகரங்களையும், இந்த ஆண்டு வட தென் துருவங்களையும் அடையும் சுற்றினையும் முடித்து விட்டார்கள்.

முதன்முதலில்…
குறைந்த கால அளவில் கிராண்ட் ஸ்லாம் சாதனையைச் செய்த முதல் இந்தியர்கள்,
முதல் இந்திய, முதல் தெற்காசிய கிராண்ட் ஸ்லாம் சாதனையாளர்கள்,
கிராண்ட் ஸ்லாம் சாதனை செய்த முதல் இரட்டையர்கள்,
கிராண்ட் ஸ்லாம் சாதனை செய்த முதல் இளைய பெண்மணிகள்,
எவரெஸ்ட்டைத் தொட்ட முதல் இரட்டையர்கள்,
ஏழு கண்டங்களின் மலைச் சிகரங்களையும் அடைந்த முதல் உடன்பிறப்புகள்,
வட மற்றும் தென் துருவங்களை பனிச்சறுக்கு மூலம் அடைந்த முதல் இரட்டையர்கள், இந்தியர்கள், இளவயதுப் பெண்மணிகள் என்று பல “முதன்முதல்” என்ற சாதனைப் பட்டியலை அட்வெஞ்ச்சரர்ஸ் கிராண்ட் ஸ்லாம் சாதனையில் வெற்றி பெற்றதன் மூலம் இவர்கள் நிகழ்த்தியுள்ளார்கள்.

இவர்களது ஃபேஸ்புக் தளம் இவர்களது சாதனைகள் பட்டியலையும், ஏழுகண்டங்களிலும் உயர்ந்த மலைச்சிகரங்களைத் தொட்ட நாட்களையும், வட தென் துருவங்களை அடைந்த தேதிகளையும் பட்டியலிடும் படத்தையும் கீழே காணலாம்.

இந்தச் சாதனையின் சற்று வருத்தம் தரும் பகுதி என்னெவெனில், இந்த சகோதரிகளின் சாதனைகளுக்கு இந்திய அரசிடம் இருந்து உதவிகளோ, தனியார் ஆதரவு என்றோ எதுவும் இதுவரை கிடைக்கவில்லை. மிகவும் செலவு செய்ய வேண்டிய இந்தச் சாதனைக்கும், மலையேற்றப் பயணங்களுக்கும் இவரது பெற்றோர்கள்தான் இதுவரை உதவி வருகிறார்கள். எனவே நிதி நிலையில் அவர்கள் குடும்பத்திற்கு பெரும் கடன்கள் ஏற்பட்டுள்ளது இவர்கள் சாதனையில் விரும்பத் தகாத பக்க விளைவு. இந்திய அரசும், இந்திய மாநிலங்களும் மலையேற்றம் என்பதை விளையாட்டு வகையில் குறிப்பதா இல்லையா என்ற சிக்கலில் ஒவ்வொருவரும் ஒவ்வொருவிதாமாக இதை வரையறுக்கும் நிலை இவர்களுக்கு உதவிகரமாக இல்லை என்பதை இச்சகோதரிகள் பத்திரிக்கைகளுக்கு அளித்த செய்தி குறிக்கிறது.

“இந்தச் சாதனை மிகவும் கடினமானது, சோர்வு தருவது. ஆனால் முயற்சிக்குக் கிடைத்த பலன் மகிழ்ச்சி அளிப்பது. எந்நேரம் முயற்சியைக் கைவிட்டு விடலாம் என்ற நிலையில் எங்களைத் தள்ள எத்தனையோ காரணங்கள் இருந்தன. இதனை நாங்கள் விடாமுயற்சியுடன் வெற்றிகரமாக முடித்தற்கு எங்களது ஆர்வம் மட்டுமே காரணம்.” என்று இரட்டையர்களில் இளையவரான நான்சி கூறியுள்ளார்.

தற்பொழுது நியூசிலாந்து அரசு இவர்களுக்கு உதவித்தொகை வழங்கி அவர்கள் நாட்டின் பல்கலைக்கழகத்தில் ஓராண்டு விளையாட்டும், உடற்பயிற்சி-உளவியல் கல்வியும் (Sports and Exercise Psychology) பயில உதவி செய்துள்ளது. இது இளம் சாதனையாளர்களுக்கு என்று நியூசிலாந்து அரசு வழங்கும் சலுகை, இதைப் பெற்றதில் சகோதரிகளும் மகிழ்ச்சி அடைந்துள்ளனர். நியூசிலாந்தின் உயர்ந்த மலைச் சிகரமான குக் மலைச்சிகரத்தைத் தொடுவது இரட்டையர்களின் அடுத்த இலக்கு. இவர்கள் பெற்ற பயண அனுபவங்களை நூலாகவும் எழுத எண்ணியுள்ளார்கள்.

இச்சகோதரிகளின் சாதனை இவர்களுக்காகச் செய்தது மட்டுமன்று; அது பாலினபேதத்தின் விளைவுகளைப் பற்றிய விழிப்புணர்வைக் கொண்டு வருவதற்கும், பாலின அடிப்படையில் பெண்களின் செயல்கள் எனப் பொதுமைப்படுத்தும் மனப்பான்மையைக் குறைப்பதற்கும் தங்கள் சாதனை உதவவேண்டும் என்று இச்சகோதரிகள் எதிர்பார்க்கிறார்கள். வாய்ப்பிருந்தால் பெண்களுக்கு சாதனைகள் செய்வதில் தடை இல்லை என்ற உணர்வையும், பெண்களின் வாழ்வும், உலகமும் வீட்டின் நான்கு சுவர்களுக்குள் முடங்கிக் கிடப்பதல்ல என்பதைச் சமூகம் புரிந்துகொள்ள வேண்டும் என்ற செய்தியை அளிப்பதும் இவர்கள் விருப்பம். இந்தியச் சிறுமிகள் இனி பெண்கள் என்பதற்காக தாங்கள் பெருமிதம் கொள்ளும் வகையில் இவர்கள் முயற்சி அமைவதில் மகிழ்ச்சியையும் அடைகிறார்கள் இச்சகோதரிகள். பெண்கள் தங்கள் திறமையில் நம்பிக்கை கொண்டு உயரும்பொழுது சமூகத்தில் பெண்கள் கண்ணியத்துடனும், மதிப்புடனும் நடத்தப்படுவார்கள் என்பது இவர்களது எதிர்பார்ப்பு.

இந்த அட்வெஞ்ச்சரர்ஸ் கிராண்ட் ஸ்லாம் சாதனையை இவர்கள் நிகழ்த்த விரும்பியதன் முக்கிய நோக்கம் …”பெண்களாலும் சாதனைகள் புரிய முடியும்” என்பதை சமூகத்திற்கு உணர்த்தவும், சிறுமிகளுக்கு தன்னம்பிக்கை ஊட்டுவதற்காகவும், இவர்களது சாதனை கண்டு பெண்குழந்தைகள் பெருமிதம் கொள்ள வேண்டும் என்பதே இந்த இரட்டையர்களின் குறிக்கோள். பெண்களுக்குச் சிறந்த முன்மாதிரியாக விளங்க விரும்பும் இவர்களது நோக்கமும், செயலும் பாராட்டத் தக்கன.

சாதனையாளர்களுக்கு வல்லமை இதழின் பாராட்டுகளும் வாழ்த்துகளும் உரித்தாகின்றன.

**************************************************************************************
வல்லமையாளருக்குப் பாராட்டுகள்!!!
தங்களுடைய ஆக்கப்பூர்வமான பங்களிப்பினைத் தொடர்ந்திட
வல்லமை மின்னிதழ் அன்பர்களின் மனம் நிறைந்த வாழ்த்துகள்!!!

**************************************************************************************

[இந்த வாரத்தில் தனது ஆற்றலை சிறப்புற வெளிபடுத்தி உங்கள் கவனத்தைக் கவருபவரை வல்லமை ஆசிரியர் குழுவினரின் கவனத்திற்குக் கொண்டுவர விரும்பினால், வழக்கம் போலவே வல்லமை ஆசிரியரிடம் (vallamaieditor@gmail.com) உங்களது பரிந்துரைகளை அனுப்பி உதவிடுமாறு வேண்டுகிறோம், மேலும் வல்லமையாளர் விருது பற்றிய விவரங்களை இப்பக்கத்தில் காணலாம் –http://www.vallamai.com/?p=19391, இதுவரை வல்லமையாளர்களாகத் தேர்வு பெற்றோர் பட்டியலை இங்கே காணலாம் http://www.vallamai.com/?p=43179 ]

தொடர்புக்கு:
ஃபேஸ்புக் வலைத்தளம்: https://www.facebook.com/tashinungshi.malik.7
இணைய வலைத்தளம்: http://www.nungshitashi.com/

படங்களும் தகவல்களும் பேஸ்புக், இளையதளம், செய்திகளிலிருந்து திரட்டப்பட்டன.

துணைபுரிந்த செய்திகள்:
‘Everest twins’ clinch Explorers Grand Slam
http://www.dnaindia.com/india/report-everest-twins-clinch-explorers-grand-slam-2103179

The feat was a tough one, but it was fully worth the effort: Tashi and Nancy Malik
http://www.sportskeeda.com/mountaineering/feat-was-tough-one-but-it-fully-worth-effort-tashi-nancy-malik

Indian Sisters, First Twins to Climb Mount Everest, Achieve Explorers Grand Slam
http://www.ndtv.com/india-news/indian-sisters-first-twins-to-climb-mount-everest-achieve-explorers-grand-slam-779414

July 13, 2015
வள்ளுவ மாலை

– சுரேஜமீ

மிகைச்சூடும் சூழ்வறட்டும் தாங்கா முடிவினிலே
மாண்டிடும் வாழ்விந்த மண்ணில் – நிலத்தை
மீட்டெடுக்க வள்ளுவம் போற்றிடு நாளும்
மனிதம் சேர்க்கும் மாண்பு!

எண்ணிக்கை கூட்டிடுதல் என்றும் உறவாகா
எண்ணங்கள் சேர்த்து இதயங்கள் கோத்து
உதவுங்கள் யார்க்கும் திருக்குறள் சொல்லும்
உயர்நெறி பற்றிச் சிறந்து!

நேர்பட வாழ்தல் சுகமென்றும் கொள்கை
நேர்கெடு அந்நாள் பழிவரும் பின்னர்
நேரும் கொடுமை கோள்கெடும் – உண்மைத்
திருக்குறள் மாண்பு தரும்!

மாறிடும் பண்பு நெறிசார் மண்ணேகி
மானுடம் காக்கத் தவறின் – கெட்டிடும்
முன்னோர் கொடுமரபும் பட்டிடத் தேறும்
மனமேசெல் வள்ளுவம் முன்!

கறையிலா நெஞ்சம் தினமும் கெஞ்சும்
இறையிடம் தஞ்சம் நிறைபட வேண்டி
உறைபவன் நிற்பான் துணையென – வள்ளுவம்
ஏகித்தொழச் சேரும் கருணை!

July 13, 2015
பழி

நிர்மலா ராகவன்

மோகன் ஸார்மேல் எல்லா மாணவிகளுக்குமே ஒரு `இது’.

விளையாட்டு வீரரானதால், கட்டுமஸ்தான உடல். எல்லாவற்றையுமே விளையாட்டாக எடுத்துக் கொள்வதுபோன்ற சிரித்த முகம், அன்பு கலந்த கண்டிப்பு, அசாதாரணமான கனிவு… இவை போதாதா ஒருவர்மீது காதல் கொள்ள!

விளையாட்டுப் பயிற்சிகளால் அவருடன் நெருங்கிப் பழகும் வாய்ப்பு பிரபாவைத் தேடி வந்தது. அதனால் அத்தனை பேருடைய பொறாமைக்கும் ஆளாகியிருந்ததுபற்றி அவளுக்குக் கொள்ளைப் பெருமை. `நீதான் மாஸ்டரோட செல்லம்!’ என்று அவர்கள் கேலி செய்ததை நம்பி, இரவெல்லாம் கண்விழித்து, ஒரு காதல் கடிதம் எழுதினாளே!

பதிலுக்கு, அவளிடமே அதைக் கொடுத்து, `இதை நான் பெரிசு படுத்தப் போறதில்லே. இன்னும் ரெண்டு வருஷம் போனா, நீ இப்ப செய்திருக்கிற காரியம் எவ்வளவு பைத்தியக்காரத்தனமானதுன்னு ஒனக்கே புரியும்!’ என்று அமைதி குன்றாது அவர் கூறியபோது, அவள் அடைந்த அவமானம் மறக்குமா! அவமானம் ஆத்திரமாக மாறியது.

ஆனால், இப்போது, பழி தீர்த்துக்கொள்ள தாய் ஒரு வழி வகுத்தபோது என்னவோ, அவளுக்குத் தயக்கமாகத்தான் இருந்தது. பொய் சொல்லலாமோ?

`நல்லொழுக்கம்’ என்று பள்ளியில் சொல்லிக் கொடுப்பது பரீட்சைகளில் தேர்ச்சி பெற மட்டும்தானா?

தன் பக்கத்தில் அமர்ந்து, கவனமாகப் பரிமாறிய தாயை மெல்ல ஏறிட்டாள் பிரபா.

ஒப்பனையற்ற முகம். பருத்திப் புடவை. `நானும் இருக்கிறேன்,’ என்பதுபோல், கண்ணுக்குத் தெரியாத அளவில் ஒரு பொட்டு.

“அம்மா..!” பிரபாவின் குரலில் தயக்கம்.

திருமணமாகாமலே பிறந்த மகள். உண்மை தெரிந்தும், `எப்பவோ நடந்ததைப்பத்தி இப்போ என்ன!’என்று பெரிய மனது காட்டுவதுபோல நடித்து, மணந்தபின், அதையே குத்திக்காட்டி, ஓயாது சந்தேகப்பட்டு வாழ்க்கையை நரகமாக்கிய கணவன். இரு ஆண்டுகளுக்குள்ளேயே திருமண முறிவு.

`பாவம், அம்மா!’ என்று பரிதாபப்பட்டாள் பிரபா. தான் பிறந்ததால்தானே இப்படி ஒரு அவல வாழ்க்கை! அதற்கு ஈடு செய்ய, அம்மா சொற்படி நடந்தால்தான் என்ன?

கடந்த ஐந்தாறு வருடங்களாகவே தனக்குக் கண்ணாமூச்சி காட்டியிருந்த பதவி உயர்வு அந்த ஆண்டு கண்டிப்பாகக் கிடைக்கும் என்று நம்பியிருந்தாள் சீதா. அதற்கேற்ப, கட்டொழுங்கு ஆசிரியையாகவும் ஆக்கப்பட்டிருந்தாள். பள்ளியே அவள் பொறுப்பில்தான் இருந்தது.

அந்தச் சமயம் பார்த்துத்தானா மோகன் அங்கு மாற்றலாகி வரவேண்டும்! தலைமை ஆசிரியை அவன்பக்கம் சாய்ந்தாள்.

புதிய மலேசிய சம்பளத் திட்டத்தின்கீழ், பதவி உயர்வு கிடைப்பது தலைமை ஆசிரியையின் சான்றிதழால்தான் என்று பிரபாவுக்குத் தெரியும். அம்மாவின் இந்தக் கனவு நிறைவேறாமல் போய்விடுமோ என்ற பயம், மோகன் ஸாரால் இப்போது வந்திருக்கிறது. `

அம்மாவை ஏமாற்றிய இரு ஆண்களினால், பிரபாவுக்கும் அந்த வர்க்கத்தின் மேலேயே துவேஷம் இருந்தது சீதாவுக்குச் சாதகமாகப் போயிற்று. என்ன பேசவேண்டும் என்று சொல்லிக்கொடுத்தாள்.

பந்தயத்தில் ஓடியபோது தான் கீழே விழுந்துவிட, மோகன் ஸார் சுளுக்கெடுத்ததை இப்போது நினைத்தாலும் சிலிர்த்தது.

தலைமை ஆசிரியை மிஸ். ராஜசிங்கம் தன்னை அவசரமாகக் கூப்பிட்டு அனுப்பியிருப்பது எதற்காக இருக்கும் என்று குழம்பியவனாக அவளுடைய அறையில் நுழைந்த மோகன், தன்னைக் கண்டதும் அவளுடைய முகத்தில் வழக்கமாகக் காணப்படும் புன்னகைக்குப் பதில் கடுமை படர்ந்திருப்பது கண்டு திகைத்தான்.

“பள்ளி சார்பிலே ஓட்டப் பந்தயத்துக்காக நேத்து மத்தியானம் மூணு பேரை கோலாலம்பூருக்கு — இங்கேயிருந்து ஐம்பது கிலோமீட்டர்– கூட்டிட்டுப் போனீங்க, சரி. மத்த ரெண்டு பெண்களையும் இறக்கி விட்டப்புறம், கார் ரிப்பேருங்கிற சாக்கிலே, நீங்க தகாத முறையிலே நடக்க முயற்சித்ததா பிரபா புகார் பண்ணியிருக்கா”. கோபத்தை உள்ளடக்கிய அந்தக் குற்றச்சாட்டு அவன் முகத்தில், `இது என்ன விந்தை!’ என்ற பாவத்தைத் தோற்றுவித்தது.

ஏதோ சொல்ல வாயெடுத்தவனை ஒரு கையை உயர்த்தி நிறுத்தினாள் மேலதிகாரி. “அப்படி ஏதும் நடக்கலேன்னு சொல்லப்போறீங்க. அதானே? சாயந்திரம் ஆறுமணிக்கு எல்லாப் போட்டியும் முடிஞ்சிருக்கு. இவளை வீட்டுக்குக் கொண்டு விடறப்போ, மணி பத்துக்குமேல ஆயிடுச்சுன்னு இவங்கம்மா, சீதா டீச்சர், புகார் குடுத்திருக்காங்க. விளையாட்டில தோத்துப்போனதுக்கு ஆறுதல் சொல்றமாதிரி, தோளைச் சுத்தி கை போட்டிருக்கீங்க. ராத்திரி வேளையிலே எங்கெங்கேயோ சுத்திட்டு, தொடையைத் தடவ ஆரம்பிச்சிருக்கீங்க. இதுக்கெல்லாம் என்ன அர்த்தம்? நல்லவேளை, அந்த சின்னப் பொண்ணுக்கு ஒங்களைத் தடுக்கற பலமும், தைரியமும் இருந்திருக்கு!”

மிஸ். ராஜசிங்கத்தின் பக்கத்திலேயே குனிந்த தலையோடு நின்றிருந்த பிரபாவை அதிர்ச்சியுடன் நோக்கினான் மோகன். விழுந்தவுடனேயே தான் கொடுத்த அவசரச் சிகிச்சைக்கு இந்தத் தண்டனையா!

தற்செயலாக நடந்தவைகளுக்கு வேறுவிதமான பூச்சு கொடுத்து அசிங்கப்படுத்த இவளுக்கு எப்படித் தோன்றியது?

காரைப் பழுது பார்த்தபின், அவள் வீட்டில் கொண்டுவிடும்போது ஒன்பது மணிக்குள்தானே இருக்கும்!

“இப்படி ஏதாவது நடக்கக்கூடாதுன்னுதான் எங்க ஸ்கூலிலே ஆண்களையே வேலைக்கு வைக்கக்கூடாதுன்னு இத்தனை வருஷம் கண்டிப்பா இருந்தேன்”. ஐம்பது வயதை எட்டியிருந்தவளுக்கு, அவனைவிட அதிர்ச்சியும், ஆத்திரமும் எழுந்தன. “சே! ஒங்க சிரிப்பையும், போலிப் பணிவையும் பாத்து, நான்கூட இல்லே ஏமாந்துட்டேன்!”

அந்தக் குளிர்சாதன அறையிலும் வியர்க்க, கரங்கள் தன்னிச்சையாக கழுத்தை இறுக்கியிருந்த டையைத் தளர்த்தப் போயின. இப்போது தான் எது சொன்னாலும் எடுபடப் போவதில்லை என்று புரிந்து, மௌனமாகத் தலையைக் குனிந்து கொண்டான் மோகன்.

“நல்லவேளை, சீதா டீச்சருக்கு நம்ப பள்ளிக்கூடத்தோட பேர் கெட்டுடக் கூடாதுங்கிற அக்கறை இருக்கு. அதான் எங்கிட்ட வந்து சொல்லியிருக்காங்க. அவங்க போலீஸ், கோர்ட்டுன்னு போயிருந்தா..? நெனைக்கவே கூசுது. கூடிய சீக்கிரமே ஒங்களை வேற..”.

“அதுக்கு அவசியம் இருக்காது, மிஸ். ராஜசிங்கம். நாளையோட நானே நின்னுக்கறேன்”. எவரையும் பாராது, அலாதியான அமைதியுடன் அவன் வெளியே நடந்தான்.

“தப்புப் பண்ணறதுக்கு முந்தி யோசிச்சு இருக்கணும். இப்ப ரோஷப்பட்டு என்ன புண்ணியம்?” என்று முணுமுணுத்து, அந்த இறுக்கமான சூழ்நிலையைச் சமாளிக்கப் பார்த்தாள் மிஸ். ராஜசிங்கம்.

அதற்குப்பின், பிரபாவுக்கு எதிலும் அக்கறையும், கவனமும் இல்லாமல் போயிற்று. `என்றாவது இவள் சிரித்திருப்பாளா?’ என்று காண்பவரைச் சிந்திக்க வைப்பதுபோல் ஒரு கடுமை அவள் முகத்தில் குடியேறியது. `ஒரு நல்ல மனிதர்மேல் அபாண்டமாகப் பழி சுமத்தி, அவருடைய எதிர்காலத்தையே நாசமாக்கிவிட்டேனே!’ என்று ஓயாது குமைந்தாள்.

“ஒனக்கும் பதினெட்டு வயசு ஆகிடுச்சு. நிறைய பேர் கேக்கறாங்க,” என்று தாய் அவளுடைய கல்யாணப்பேச்சை எடுத்தபோது, பிரபாவுக்கு அலற வேண்டும்போல இருந்தது.

“ஏம்மா? மோகன் ஸார்தான் என்னை ஏற்கெனவே கெடுத்துட்டாரே! மனசறிஞ்சு, இன்னொரு ஆம்பளையோட நான் எப்படிக் குடித்தனம் நடத்த முடியும்?” என்று தெளிவாகக் கேட்டு, அவள் வாயை அடைத்தாள்.

பதவி உயர்வுக்குப் பதில் சீதாவுக்குக் கிடைத்ததெல்லாம் குறைந்த ஓய்வூதியம்தான்.

`கெட்டதைப் போதிக்க நாவை உபயோகித்தாயே! இப்போது அவசியமானால்கூடப் பேச முடியவில்லை, பார்!’ என்று, பக்கவாதம் கண்ட தாயைக் குத்திக்காட்ட பிரபாவுக்குத் துடிக்கும்.

ஆனால், தாயைப் பார்க்கும்போதெல்லாம், `மிஸ்டர் மோகன் ஒன்னைக் கெடுக்கப் பாத்தாருன்னு சொல்லிடு!” என்ற போதனை இப்போதுதான் அவள் சொல்வதுபோல் ஒலிக்க, தன்னையே மன்னிக்க முடியாது, அவளருகே போவதையே தவிர்த்தாள்.

`வாழ்க்கையில் எதிர்பார்க்க இனி எந்த சுகமும் கிடையாது. இதே இயந்திர கதிதான்!’ என்ற நிதரிசனம் கனத்துப்போகும்போது மனத்தில் வெறுமை சூழும். தையல் இயந்திரத்தோடு இயந்திரமாக இயங்கி வயிற்றுப்பாட்டைக் கவனித்துக்கொண்டதாலோ, என்னவோ, முதுகு வளைந்திருந்தது.

அன்று கடையில் தைத்துக் கொண்டிருந்தபோது, தெரிந்த குரல் ஒன்று ஒலிக்க, நிமிர்ந்தாள் பிரபா.

“நீ.. பிரபா இல்லே?” அருகில் வந்தவரைக் கண்டதும் அவளுக்கு வியர்த்துப் போயிற்று.

ஐயோ! தானிருக்கும் இடத்தை எப்படிக் கண்டுபிடித்தார்?

பதினைந்து வருடங்களுக்குப் பிறகு தன்னை நியாயம் கேட்க வந்திருக்கிறாரா?

“நான்.. மோகன்!” இயல்பாகத் தன்னை அறிமுகப்படுத்திக் கொண்டார் வந்தவர். “இப்போ ஆஸ்திரேலியாவிலே இருக்கேன். அசிஸ்டண்ட் புரொபசர். அப்பவே அங்கே போயிட்டேன், மேல்படிப்புக்கு,” என்று பேசிக்கொண்டே போனவர், “ஆமா? நீ நல்லாப் படிச்சிட்டு இருந்தியே! மேலே படிக்கலே?” என்று கேட்டபோது, அந்தக் கனிவைத் தாங்க முடியாது, பிரபாவின் உதடுகள் துடித்தன.

அப்போது, “நீ இங்கேயா இருக்கே? ஒன்னை எங்கெல்லாம் தேடறது!” என்று செல்லக் கோபத்துடன் வந்தான் ஒரு வெள்ளைக்காரன். உரிமையுடன் மோகனது இடுப்பில் தன் கரத்தைப் படரவிட்டான்.

“ஓ.கே, பாக்கலாம்,” என்றபடி, அவனுடன் நடந்துபோனார் மோகன் ஸார்.

அதிர்ந்து போனவளாக, அவர்கள் சென்ற திக்கையே விறைத்தாள் பிரபா. தான் ஒவ்வொரு கணமும் எண்ணிக் கலங்கியதுபோல, அவருடைய வாழ்வு அழிந்து போகவில்லை! தன்னாலோ, ஏன், வேறு எந்தப் பெண்ணாலுமே அவரை மயக்க முடியாது!

இது புரியாமல், அவரைப் பழி வாங்கவென்று பொய் சொல்லி, அம்மாவை அடியோடு வெறுத்து, இன்னும்..படிப்பை அரைகுறையாக விட்டு..!

தன் முன்னிருந்த இயந்திரத்தின் மேலேயே தலையைக் கவிழ்த்தபடி, குலுங்கிக் குலுங்கி அழ ஆரம்பித்தாள் பிரபா, தனது நீண்டகால இழப்புகளை ஈடுகட்ட முடியாதவளாக.

July 13, 2015
உன்னையறிந்தால் …..! (13)

நிர்மலா ராகவன்

அறிவுத்திறன் வளர

கேள்வி: அரைகுறையான கல்வித்திறனுள்ள குடும்பத்தினர் குழந்தைகளின் அறிவுத்திறன் வளர பள்ளிக்கூடத்திற்கு அனுப்பினால் போதுமா?

விளக்கம்: மனிதனின் மூளை கருவிலிருக்கும்போதே வளர ஆரம்பிக்கிறது. நான்கு வயதுக்குள் 80% வளர்ந்துவிடுகிறது.

கருவிலிருக்கும் குழந்தை எப்படி, எல்லாவிதத்திலும் சிறந்து விளங்க முடியும் என்பதை ஆராய, ஒரு விஞ்ஞானப்பகுதியே இருக்கிறது, FETOLOGY என்ற பெயரில்.

கருவிற்கு நன்கு அறிமுகமான ஒரு ஒலி தாயின் இருதயத் துடிப்பு. ஆகவே, பயம், அதிர்ச்சி, கோபம் முதலிய எதிர்மறை உணர்ச்சிகளுக்குத் தாய் ஆளாகும்போது, அவளது நாடித் துடிப்பு அதிகரிக்க, கருவும் அதே நிலைக்குத் தள்ளப்படுகிறது. அவ்வளவு ஏன், தந்தை தாயுடன் உடலுறவு கொள்ளும்போது வன்முறையைப் பிரயோகித்தால், கருவுக்குள் உண்டாகும் அதிர்ச்சி ஆயுள் பூராவும் அதன் குணத்தைப் பாதிக்கும்.

வன்முறையில் ஈடுபடும் குற்றவாளிகள் இம்மாதிரி, பிறக்குமுன்னரே அதைத் தாயின்வழி தாமும் அனுபவித்திருப்பார்களாம்.

கதை: அனாதை ஆசிரமத்தில் இருந்த ஒரு குழந்தையை எவ்வளவோ அன்புடன் ஓர் ஏழைத் தாய் வளர்த்தும், குண்டர் கும்பலில் சேர்ந்து, `நான் பிறரைக் கொல்லுமுன் அவர்கள் கண்ணில் தோன்றும் பயம் எனக்கு மிகவும் மகிழ்ச்சி அளிப்பது!’ என்று என்னிடம் கூற அதிர்ந்தேன். அவன் தாய் அவனை அடித்ததே கிடையாது என்றான். அவனுக்குள் பின் எப்படி இவ்வளவு குரூரமான புத்தி வந்தது என்று யோசித்தேன். `கருவே கதையானால்’ என்ற சிறுகதை பிறந்தது.

ஒரு குழந்தையின் மூளையும் பிற பாகங்களும் கருவிலேயே வளர ஆரம்பித்து விடுகின்றன. அதாவது, எதையும் புரிந்து கொள்ளக்கூடிய திறன், உணர்வுகள் யாவும் குழந்தை தனி உருப்பெற்று பிறக்குமுன்னரே அதற்கு உண்டு.

கேட்கும் திறன் இருப்பதால், ஒரு கர்ப்பிணி நிறையப் புத்தகங்கள் படிக்கும்போது, புத்தகத்தின் பக்கங்கள் திருப்பப்படும் ஓசை கருவிற்கும் பழகிப்போவதால் அது விரும்பத்தக்க ஒலியாக ஆகிவிடும்.

சிறுவருக்கான கதையை தாய் திரும்பத் திரும்ப உரக்கப் படித்தால், அது கருவின் மனதில் படியும். பிறந்தபின், அதே கதை திரும்பப் படிக்கப்படும்போது, குழந்தை அதை உன்னிப்பாகக் கவனித்து, அதற்கேற்ப பால் குடிப்பதை உணர முடியும் என்கிறார் டேவிட் சேம்பர்லின் (1994) என்கிற கரு மனோதத்துவ நிபுணர். வேறு புதிய கதைகளில் இக்குழந்தை ஆர்வம் காட்டுவதில்லையாம்.

ஆறு மாதங்களாவது தாய்ப்பால் குடித்து வளரும் குழந்தைகளின் அறிவுத்திறன் வளரும். வியாதிகளும் எளிதில் அண்டாது. (பால் அதிகம் சுரக்க, கர்ப்பிணிப்பெண்கள் பூண்டை வதக்கிச் சாப்பிடலாம். அந்த வாசனை பிடிக்காதவர்கள் பாதம்பருப்பை ஊற வைத்து, தோலை நீக்கிச் சாப்பிடலாம்).

மூளைக்குப் போதிய உந்துதல் கிடைக்காதபோது சிறு குழந்தைகள் அழுதபடி இருப்பார்கள். இது தாயின் கவனத்தைக் கவர, அல்லது பொழுதுபோக. `ஏன் இந்த அசட்டு அழுகை?’ என்று அவர்களைத் திட்டி என்ன பயன்?
எந்த சூழ்நிலையாக இருந்தாலும், அதை அவர்களுக்கு விளக்கலாம்.

கதைகள்: என் பேரனுக்கு இரண்டு மாதங்களாக இருந்தபோது, ஒரு பேரங்காடியில் தள்ளு வண்டியுடன் லிஃப்டுக்காகக் காத்திருந்தேன். புதிய அனுபவம் எவருக்குமே சற்று அச்சத்தை விளைவிக்கும், இல்லையா? அதனால், `இப்போ உள்ளே போகப்போறோம். கொஞ்சம் குலுங்கும். பயப்படாதே!’ என்று கண்ணை மூடிக்கொண்டிருந்த குழந்தையிடம் சொன்னேன்.

நான் தானே பேசிக்கொள்வதாக நினைத்து ஒருவர் என்னைப் பார்த்தார். பிறகு குழந்தையைப் பார்த்தார். `இதனுடன் என்ன பேசுகிறாய்? பைத்தியமோ?’ என்று என்னை மீண்டும் அருவருப்புடன் கூடிய பார்வை! நான் லட்சியமே செய்யவில்லை.

வேறொரு முறை நாங்கள் வெளியூர் பேருந்து நிலையத்தில் காத்திருந்தோம். என் மாப்பிள்ளை தன் எட்டு மாத மகனைத் தூக்கிக்கொண்டிருந்தார். நான் குழந்தையிடம், `நிறைய பேர் அங்கேயே தங்கப்போறா. அதுக்காகத்தான் படுக்கை, பெட்டியெல்லாம் தூக்கிண்டு போறா, பாரு!’ என்று விளக்கினேன். அப்பாவின் கையிலிருந்து என்னிடம் தாவினான் பேரன்.

குழந்தைக்குப் புரியுமா என்ற சந்தேகமே இருக்கவில்லை. என் குழந்தைகளுடன் அப்படித்தான் பேசினேன். உடனுக்குடனே பதில் சொல்லத் தெரியாவிட்டாலும், மூன்று வருடங்கள் கழித்து, பேசும் திறன் வந்ததும், `அன்னிக்கு நீலப்புடவை கட்டிண்டு இருக்கறச்சே சொன்னியே..?’ என்று ஏதாவது சந்தேகம் கேட்பார்கள்.

எத்தனை நாட்களுக்குத்தான் வீட்டிலுள்ளவர்களே அறிவைப் போதிக்க முடியும்? தம் வயதையொத்த பிற குழந்தைகளுடன் சேர்ந்து படிக்கும்போது எளிதில் புரியும், சுவாரசியமாகவம் இருக்கும்.

ஆணோ, பெண்ணோ, படித்தால்தான் வாழ்வில் முன்னேற முடியும், மாற்றங்களை ஏற்கும் மனப்பக்குவம் வரும், ஏமாற்றத்தினால் விளையும் அதிருப்தி மற்றும் குற்றங்களைத் தவிர்க்கலாம் என்றெல்லாம் அனேகமாக எல்லா நாடுகளும் இப்போது புரிந்து கொண்டிருக்கின்றன.

வட அமெரிக்காவில் ஆங்கிலத்தைத் தாய்மொழியாகக் கொள்ளாத குடும்பங்களில் பிறக்கும் பிள்ளைகள் படிப்பிலும், சமூகத்திலும் பின்தங்கியவர்களாக இருக்கிறார்கள் என்று இவர்களை முன்னுக்குக் கொண்டுவரும் நோக்கத்துடன் ஒரு மாநிலம் தாய்மார்களுக்கு ஆங்கிலப் புத்தகங்களை இலவசமாக வழங்கியது.

எட்டு மாதங்களுக்குப்பின், குழந்தைகளை மடியில் வைத்துக்கொண்டு, தாய்மார்கள் அப்புத்தகங்களைப் புரட்டுவார்கள். (அவர்களுக்கு ஆங்கில மொழி தெரியாது).

வீட்டிலுள்ள பிறர் என்ன செய்தாலும், அதை அப்படியே பிடித்துக்கொள்ளும் குழந்தை தானும் புத்தகத்தைத் தொடுகிறது. வாயிலும் வைத்துக்கொள்கிறது, அது தின்னத் தகுந்ததுதானா என்று. எதையும் வாயில் போட்டுப்பார்ப்பது குழந்தைகளின் பிறவிக் குணம்! ஓரிரு மாதங்களில் தானே புத்தகத்தைக் கையில் எடுத்து, ஏதாவது ஒரு படத்தையே உற்றுப் பார்க்கிறது.

இதற்காக, அமெரிக்காவில் `தலையணைப் புத்தகம்’ என்று பருமனாக, துணியால் புத்தகங்கள் செய்கிறார்கள். காகிதத்தைப்போல் எளிதில் கிழியாது. அழுக்கானால் துவைக்கலாம். பூ, பழவகைகள், மிருகக் காட்சிசாலை, குட்டி மிருகங்கள் என்று, குழந்தைகளுக்குப் பிடித்த படங்கள் பெரிய அளவில். அவற்றின் பெயர்கள் கீழே கொடுக்கப்பட்டிருக்கும்.

படிக்காத பெண்களின் குழந்தைகள்கூட புத்திசாலிகளாக வளர வழிகள் இருக்கையில், படித்த நாமும் ஒவ்வொரு குழந்தையின் திறன்களையும் முழுமையாக வளர்க்க வேண்டாமா?

தொடருவோம்

July 13, 2015
நான் அறிந்த சிலம்பு – 173

-மலர் சபா

மதுரைக் காண்டம் – 05: அடைக்கலக் காதை

காவல் காடும் அகழியும்
வளைந்த இயந்திர வில்லும்
கரிய விரல் கொண்ட
குரங்கு போன்ற தோற்றத்தில்
வந்தவரைக் கடிக்கும் பொறியும்
கல்வீசும் கவணும்
மதில்வழி வரும் பகைவர் மீது ஊற்றச்
சூடாக வைக்கப்பட்டிருந்த நெய்யும்
செம்பை உருக்கும் கலன்களும்
இரும்பைக் காய்ச்ச வைக்கப்பட்ட உலைகளும்
கல் இட்டு வைத்துள்ள கூடைகளும்
அகழியில் ஏறவருபவர்களைப் பிடிக்கும்
தூண்டில் வடிவக் கருவிகளும்
எதிரியின் கழுத்தை முறிக்கும் சங்கிலிகளும்
ஆண்டலைப் பறவை வடிவில்
அமைக்கப்பட்டுள்ள அடுப்புகளும்
அம்புகளை ஏவும் அறைகளும்
எதிர்ப்பவர் தலையைத் திருகி எறியும் பொறிகளும்
மதில் உச்சிக்கு வருபவரின் கையைத் துளைக்கும்
ஊசிப் பொறிகளும்
பகைவர் கண்ணைப் பறிக்கும்
மீன்கொத்தி போன்ற பொறிகளும்
உடல் சிதைக்கும் பன்றிப் பொறிகளும்
மூங்கில் போன்ற பொறிகளும்
கதவுக்கு வலிமை சேர்க்க
உள்வாயிலில் இடும் மரங்களும்
கதவுக்குக் குறுக்காகக் கட்டப்பட்ட
கணைய மரங்களும்
எறிகோல் குத்துக்கோல் ஈட்டி
இன்னும் சில கருவிகளும் அமைந்திருந்தன.

நாள்தோறும் பகைவரை வென்று
உயர்ந்த கொடிகள் அசையும்
பலதரப்பட்ட பொறிகள் அமைந்த
அம்மதிலின் வாயிலைக் கடந்து
இடைக்குலப்பெண் மாதரி
தன் அடைக்கலத்தைப் பாதுகாத்திட வேண்டும்
என்ற கொள்கையுடையவளாய்த்
தன் மனையை அடைந்தாள்.

(அடைக்கலக் காதை முற்றியது; அடுத்து வருவது கொலைக்களக் காதை)

அடிப்படையாக அமைந்த சிலப்பதிகாரத்தின் வரிகள் இங்கே: 206 – 219

http://ilakkiyam.com/sangailakkiyam/23-tamil/iyal/sangailakkiyam/pathinenmerkanaku/ettuthogai/pura-nanooru/1133-adaikalakathai–

July 13, 2015
மனக்காடு

-பத்மநாபபுரம் அரவிந்தன்

நீ என்னை வெறுக்க வெறுக்க
நான் எங்கோ விரும்பப் படுகிறேன்
உன் வார்த்தைகள் என்னைக்
காயப்படுத்தும் போதெல்லாம்
அசரீரிபோல் எங்கிருந்தோ
நான் வாழ்த்தப்படும் ஓசை
காதுள் ஒலிக்கிறது…

உன் கண்கள் தீட்சண்யம் அற்றுபோய்
என்னை வெறுப்புடன் வெறிக்கையில்
என் மனக்கண்ணுள் தெரிகிறது
கவர்ந்திழுக்கும் இரு காந்தக் கண்கள்…

உனக்கு மிக நன்றாய்த் தெரியும்
உன்னை நான் வெறுப்பதில்லை என்பது
அதனாலேயே குறை குடமாய்க்
கூத்தாடுகிறது உன் மனது…

உனக்கு ஒருபோதும் புரிவதில்லை
ஆந்தையின் அலறலுக்குக்
காடு ஒருபோதும் அதிர்வதில்லை
காடு அசைந்து கொடுப்பதே
குயிலின் கூவலுக்குத்தான்!

July 13, 2015