Author: ரா. பார்த்த சாரதி

ரா.பார்த்தசாரதி

பனிபடர்ந்த மலையின் மேலே

அழகினை கண்டு நின்றேன் சிலைபோலே ,

பச்சை வண்ணப்போர்வை மலைமகளை சுற்றிட,

நடுவே சுற்றி, நெளிந்து வாகனங்கள் சென்றிட !

பச்சைவண்ண என்றும் கண்களுக்கு குளிர்ச்சி 

அதுவே மனிதனின் மனதிற்கு தரும் புத்துணர்ச்சி !

இயற்கை அன்னையின் அழகினை ரசித்தோமே  

மனமகிழ்ச்சி கொண்டு மனதினில் பூரிப்படைதோமே!

மலைமேல் கதிரவன் ஒளி பட்டாலே 

வெண்ணிற பனிமலை தன் வெண்ணிறாடை நீக்காமலே !

ஒளிர்ந்து தென்றல் காற்று வீசியதே 

அருவியும், சிற்றோடையும் நடனமாடி வந்ததே !

இயற்க்கை அன்னை தந்ததெல்லாம் எல்லோர்க்கும் சொந்தமே 

எனது உனது என்பதெல்லாம்  இடையில் மாறும்  எண்ணமே ! 

ரா.பார்த்தசாரதி

 

ஆயிரம் எண்ணங்கள் உதயம் நம் மனதினிலே

எண்ணங்களும், ஆசைகளும், தோன்றும் நம் நெஞ்சத்தினிலே,

அலை பாயும், எண்ணங்களை  வடிகாலாய் வடித்து

பழைய திண்ணை பேச்சையும் சற்றே மறந்தோமே !

 

உழைத்து களைத்த  வேளையில் உறவுகள் சூழ

உணர்வுகளை பகிர்ந்து  மனம் தெளிந்தபோது

தொலை காட்சிக்கு முன், கணிணிக்கு பின்

நேரத்தை பிறர்க்கென நல்ல நேரத்தை வீணடித்தோமே!

 

நல்ல நேரத்தை வீணடித்து, குறிக்கோள்  இல்லா நிலைமை,

நேரம் நம்மை விழுங்கச் செய்வதே இக்கால  கொடுமை,

கைபேசியும், வலைதளமும், நம்மை கடத்தும்மே

எதையும், நினைத்துப் பார்க்கும் தகைமை இழந்தோமே !

 

இன்றைய நாகரிகத்தின் பொருள்  ஆடம்பரம்

இது  எழுதா சட்டமாகி   நம் உடைமையாகியதே ,

நேர்மையையும், உழைப்பின் மேன்மையையும் மதிப்பதில்லை,

கசங்காமல் காசு பணம் சேர்க்கத் தவறுவதில்லை !

 

இருப்பதைக்  கொண்டு  ஆனந்தம்  காண மறுக்கின்றோமே

பேராசையால் நற்குணத்தை தீயிலிட்டு பொசுக்கின்றோமே

நேசத்தையும், பாசத்தையும் வெளிப்படுத்த நேரமில்லையே

சுகம் என்பது நமக்கு   வரமாய் என்றும் கிடைப்பதிலையே !

 

மனித நேயத்தை இழந்தே வாழ்க்கையினை தொலைகின்றோம்,

பகிர்தல், பாசம்,அரவணைப்பு,  பண்பின் அடித்தளம் என்கிறோம்

உள்ளங்களால்   உயர்ந்த  சமூகமே வரலாற்றில் ஏற்படட்டுமே

நமது  வாழ்க்கை முழுதும் இன்பமும்,உறவும் மிளிரட்டுமே !

 

 

 

ஆய கலைகள் அறுபது நான்கு கலையே
யோகாவும் இதனில் அடங்கும் கலையே
யோகிகளும், துறவிகளும் வளர்த்த கலையே
நமது நாட்டினில் தோன்றிய கலையே !
அனுதினம் யோகாசனங்களை செய்ய பழகுங்கள்
அது உடலினை உறுதி செய்து, நோய் நீக்கும் இடமாகும் 1

உடற்பயிற்சியும், நடை பயிற்சியும் தினமும் மேற்கொள்ளுங்கள்
அது இளமை என்னும் ரகசியம் தோன்றும் இடமாகும் !

யோகாசனங்களில் பல வகைகள் உண்டு
சில யோகாசனங்களே மிகுந்த சிறப்புண்டு
சிறுவர் முதல், முதியோர்கள் வரை யோகா பழகலாம்
அனுதினம் இதனை கடைபிடித்தால் நோய்யின்றி வாழலாம் !

நோய்யற்ற வாழ்வே குறைவற்ற செல்வம்,
யோகாசனங்களை செய்து உடல் நலனை பேணுங்கள்
யோகாசனங்களின் நன்மையினை உலகிற்கு எடுத்துரையுங்கள்
இதுவே உலக யோகா தினம் அறிவுறுத்தும் கருத்தென உணருங்கள் !

ரா.பார்த்தசாரதி

ரா.பார்த்தசாரதி

 

உண்மை உறவுகள் கிடைப்பது அறிதன்றோ !

கிடைத்திட்ட உறவினை இழப்பது கொடிதன்றோ

 

நிழலுக்கு ஒரு போதும் மதிப்புண்டோ

நிஜமில்லா உறவுகள் என்றும் நிரந்தரமுண்டோ !

 

சொல்லும், பேச்சும் என்றும் சொந்தமில்லை

வில்லற்ற அம்பு எய்யப்படுவதில்லை !
பொய்மைக்கு என்றும் புகழிடம் இல்லை

பொறுப்பில்லா பிள்ளைக்கு என்றும் வாழ்க்கையில்லை !
பொறுமையோடு இருப்பவனுக்கு என்றும் தொல்லை இல்லை

செல்வத்துடன் வாழ்பவனுக்கு இரக்கம் என்பதில்லை!
வெகுளியாய் திரிபவனுக்கு வாழ்வில் வளமில்லை

வளமோடு வாழ்ந்திட தகுதியான மனிதன் கிடைப்பதில்லை!
தோல்வி ஒன்றே சந்தித்தவன் என்றும் சோர்வதில்லை

வெற்றி கண்டவன் தலைகனத்தால் அழிவு உண்டாகாமலில்லை !

 

சொல்லொன்றும் செயலொன்றும் என வாழ்வது,

பிறர்சொல் படாமல் மடிவது பெரிது !

 

பிறர் மனம் நோகாமல் வாழ்க்கை நடத்துவது நல்லது

பிறர் வளம் செழிக்க பாடுபடுவதே நல்லது !
பின் நாளில் எந்நாளும் பொன்னாக மாறிடுமே

உந்தன் வாழ்வும் சீரும், சிறப்புடன் இருந்திடுமே !

 

கடுங்கோபம் கொண்டு கதிரவன் சினந்து எழுந்தான்

தன் வெப்பத்தை கடுமையாய் உமிழ்ந்தான்

சில இடங்களிலே முகில் சூழ்ந்து மழை பொழியும்

வீதிகள் தோறும் மழை நீரோடும் !

கோடை மழை வெப்பத்தை தணிக்கும்

மக்களின் தாகத்தை சற்றே தீர்க்கும்,

கோடை காலத்திலே குற்றால அருவிலே

நீராடும் போது மனம் மகிழும் வேளையிலே !

வெய்யிலில் அலைபவனுக்குத்தான் நிழலின் அருமை தெரியும்

குளிர் பானங்கள் எல்லாம் தாகம் தீர்க்கும்,

கோடை மழை வந்தாலும் சுகமாய் நனைவேனே

மழை வந்தாலே உள்ளத்தில் மகிழ்ச்சி கொள்வேனே !

ரா.பார்த்தசாரதி

 

ரா.பார்த்தசாரதி

 
தொழில்கள் சிறக்க தொழிலாளர்கள் தேவை

பொருட்கள் செய்யவும் தொழிலாளர்கள் தேவை

எந்திரங்கள் செய்தாலும் தொழிலாளி தேவை

அதனை இயக்கவும் ஒரு தொழிலாளி தேவை !

 

தொழில் வளர்ச்சிக்கு தொழிலாளி முக்கியம்

அவர்கள் இல்லை எனில் உற்பத்தி குறையும்.

அவர்களை நல்ல முறையில் நடத்துங்கள்

அவர்கள் நலனில் அக்கறைக் காட்டுங்கள் !

 

தொழிலாளியும் சாதிமதமற்ற மனிதன்தான்

அவனுக்கும் வீடு வாசல்என்பதுண்டு

முதலாளிகள் பலர் கசக்கிப் பிழிவதுண்டு

நியாத்தை கேட்க அவர்களுக்கு உரிமையுண்டு

 

தொழிலாளி மெச்சிய ஒரு முதலாளி இல்லை

முதலாளி மெச்சிய ஒரு தொழிலாளி இல்லை

என்றும் முதலாளி, தொழிலாளி முரண்பாடு

கோரிக்கைகள் ஏற்க தொழிலாளி போடும் கூப்பாடு

 

கார்ல்மார்க்ஸ் தொழிலாளர் இனத்தை மேம்படுத்தினார்

தொழிலாளர்க் கென தனி கொள்கைகளை வகுத்தார்

மே முதல்தேதி தொழிலாளர் தினமாய் கொண்டாடுகிறோம்

தொழிலாளர்களின் வாழ்வு வளம்பெற பாடுபடுவோம்

 

 

ரா.பார்த்தசாரதி

 
தேர்தல் வந்தால் மாறுதல் உண்டு

சூழ்ச்சிகளில் சிறந்த வேட்பாளர் உண்டு

மக்களிடையே பல வாக்குறுதிகள் கொடுப்பதுண்டு

தேர்தல் என்பதே ஒரு நாடக மேடை என சொல்வதுண்டு !

 
கட்சிக்கு செய்ததை விட தொகுதிக்கு என்ன செய்வாய்

மாதம் ஒரு முறை மக்களை நேரில் சந்திப்பாயா

மக்கள் குறைக் கேட்டு தீர்ப்பாயா

இலவசங்களை கொடுத்து மக்களை ஏமாற்றுவாயா !

 
மக்களே வாக்கினை அட்சயப் பாத்திரமாக நினையுங்கள்

அதை பிச்சை இட்டு பிச்சைக்காரனாக நிற்காதீர்கள்

பணம் கொடுப்பவர்களுக்கு வாக்கு அளிக்காதீர்கள்

படித்த நற்பண்போடு உள்ளவர்களுக்கே வாக்களியுங்கள் !

 
அரசியல் ஆதாயம் தேடுபவர்களை புறக்கணியுங்கள்

மக்களை பலிகடா ஆக்கும் வேட்பாளரை எதிர்த்திடுங்கள்

வாக்கினை பொன்னாகக் கருதி வாக்கு அளித்திடுங்கள்

நல்ல தலைவனை நியமித்து நாட்டிற்கு நலம் சேர்த்திடுங்கள் !

-ரா. பார்த்தசாரதி

வாழ்வின் ஏட்டினைத் திருப்பிப்  பார்த்தேன்
வலிதாங்கா இளமைபருவத்தை  எண்ணிப் பார்த்தேன்
எழுதுகோலைத்  துணிவுகொண்டு கையில் எடுத்தேன்
அன்னை சரோஜாவின் அருமையினை எழுதத் துணிந்தேன்!

மக்களைப் பெற்ற மகராசியே  தாய்தான்
குடும்பத்தின் ஆணிவேராய் இருப்பதும் தாய்தான்
ஞானியும், துறவியும் போற்றும் தெய்வம்
ஞாலம்  புகழ்ந்திடும் சிறந்த தெய்வம்!

ஏழு பிறவி எடுத்து ஏழு பிள்ளைகள் பெற்றாய்
ஏழு ஏழு ஜென்மத்திற்கு ஓர்  தொடர்பு வைத்தாய்
ஏழிலே ஒன்றே ஒன்று  பெண் ஆனாலும்
எல்லோரிடத்திலும் மாறா அன்பும் பாசமும் வைத்தாய்!

ஓய்வின்றி உறக்கம்மின்றி  உன்உயிரைக் கூட
ஒவ்வோர்  பிறவிக்கும் பணயம் வைத்தாய்
உன்னை வையகம் எந்நாளும் போற்றுமே
உன்அருமை அறியாப் பிள்ளைகளைத்  தூற்றுமே!

பாசமுள்ள வேளையிலே காசு பணம்  கூடலியே
காசுவந்த   வேளையிலே பாசம் வந்து சேரலியே
பருவத்திலே நாங்கள் பட்டவலி தாங்கலியே
வார்த்தையிலே வடிப்பதற்கு வார்த்தைகள் இல்லையே!

பாசத்தோடு வாழ்வதுதான் தாயின் குணமே
பாசத்துடன்  இருப்பதுதன் பிள்ளைகளுக்கும்  நலமே
எனக்கென்று துன்பம்வந்தால் உனக்கென்று வேறு பிள்ளையுண்டு
உனக்கென்று துன்பம் வந்தால் எனக்கென்று வேறு தாயுண்டோ?

தாயைவிடச்  சிறந்த தெய்வம் இல்லை
திசை நான்கும்  அவள்போல் எவரும் இல்லை
தாயின் பெருமையினைச் சொல்ல வார்த்தையில்லை
தியாகச்சுடரே  தாயுருவம் மனதினின்றும் மறைவதில்லை!

இளமையில் ஸ்பரிசம்  முதுமையில் பாசம்,
என்றும் உறவின்  சிறந்த பந்தபாசம்
இளமையில்  நான் உனக்கொரு குழந்தை
முதுமையில் எனக்கு    நீயொரு   குழந்தை!

வாழ்க்கைப்  படகினிலே  நீயொரு  துடுப்பு
எங்கள்  பிறப்பே  உன் படைப்பு
எங்கள்  வளமே உன் சிறப்பு
எங்கள்  நினைவே  பாசத்தின் பிணைப்பு!

பூமியைவிடச் சிறந்தவள் தாய்
ஆகாயத்தைவிடச்  சிறந்தவர்  தந்தை
பூவிலே சிறந்தது  மல்லிகை ரோஜா
எங்கள் தாயின் பெயரோ சரோஜா!

 

-ரா.பார்த்தசாரதி

திருவிழாவில் மாவிலைத் தோரணம் கட்டி
அழகாக அலங்கரிக்கக் கண்டேனே,
வானம்  எனும் வீதியிலே நிலவும்,
நட்சத்திரங்களும் மின்ன
அவைகள் என்னைக் கவர்ந்ததே!

தோரணத்தில் ஆங்காங்கே  பூக்களும்,
இலைகளும் செருகியதே ஓர்  அழகு,
உனது நறுமணமிக்க பார்வை என்னை விழுங்கியதே
நீ நீர்தெளித்துக் கோலமிடும் பெண்களுடன் நின்றேன்,
கோலத்தை ஒளிப்படம் எடுக்கும்போது என்னை ரசித்தாய்!

ஆடி மாத அம்மனுக்குப் பொங்கல் இட
சுள்ளிகளைப் பெண்களுடன் சேர்ந்து தீயில் இட்டேன்
அந்த வெயிலில்  தூரத்துச் சூரியனாய் ஒளிர்ந்து நின்றாய்!
சாமிக்குப் படைக்கப்பட்ட சர்க்கரைப் பொங்கலைக் கொடுக்கும்போது
என் இதயம் இனிக்கிறது என்றாய்
உன் சொல்லால் உலகமே இனித்தது எனக்கு!

மறுநாள் ஊருக்குக் கிளம்புகையில்
திரும்ப எப்ப வருவே  எனும் ஏக்க
விழியாலும், பார்வையாலும் என்னை நோக்கினாய்!
பிரியமானவளே, அப்போதுதான் புரிந்துகொண்டேன்
என் உடலை விட்டு என் உயிரை எடுத்துச் செல்கிறாய் என்று!

 

-ரா. பார்த்தசாரதி 

நள்ளிரவில்  சுதந்திரம் பெற்றோம்
வெள்ளையனே வெள்ளியேறு  எனச் சொன்னோம்!

அரசியல்வாதிகள்  ஊழலை மறைப்பதற்குச் சுதந்திரம்
ஏன்  என்று கேட்பவர்களுக்குச் சிறையே  அடைக்கலம்!

நாட்டிற்குச் சுதந்திரம் வாங்கித்தந்தவர்கள்  தியாகம்
இன்று கெடுதல் நடக்காமலிருக்க ஓர் யாகம்!

ஆன்மிகவாதிகளுக்கும் அரசியல்வாதிக்கும் சுதந்திரம்
நல்லதைச் செய்பவர்களைத்   தடைசெய்யுதே  சுதந்திரம்!

பறவைகள்  பறப்பதற்கு  என்றும்  சுதந்திரம்
பாவைகளுக்கு  எதிலே  இன்று சுதந்திரம்?

அறுபத்தொன்பது  ஆண்டுகள் ஆயினும்  வறுமைக்கோடு
இன்றோ ஏழை  கூக்குரலின்  கூப்பாடு !

கவிஞர்கள் முழக்கிய  சுதந்திரம்  எங்கே?
இன்றும் பெயரளவில் இயங்குது இங்கே!

இளைஞர்களே நீங்கள் சுதந்திரத்தை நெஞ்சினிலே நிறுத்துங்கள் !
தாய்நாட்டின் முன்னேற்றத்திற்குக் கடினமாய் உழைத்திடுங்கள் !

ஊழலையும் கொடுமைகளையும்  எதிர்த்துப் போராடுங்கள் !
ஊக்கத்துடன் போராடி வெற்றி காணுங்கள் !

சுதந்திரம் சும்மா வந்துவிடவில்லை  என நினையுங்கள் !
அதுவே  பல தியாகிகளின்  தியாகம் என நினைந்திடுங்கள் !

இன்று சுதந்திரத்தின்  உள்ளுணர்வு உங்களைத் தூண்டட்டும் !
இன்றைய பாரத இளைஞர்கள் ஒற்றுமை ஓங்கட்டும் !